੯. ਤਣ੍ਹਾਸੁਤ੍ਤਵਣ੍ਣਨਾ

੧੯੯. ਨਵਮੇ ਜਾਲਿਨਿਨ੍ਤਿ ਜਾਲਸਦਿਸਂ. ਯਥਾ ਹਿ ਜਾਲਂ ਸਮਨ੍ਤਤੋ ਸਂਸਿਬ੍ਬਿਤਂ ਆਕੁਲਬ੍ਯਾਕੁਲਂ, ਏਵਂ ਤਣ੍ਹਾਪੀਤਿ ਜਾਲਸਦਿਸਤ੍ਤਾ ਜਾਲਿਨੀਤਿ ਵੁਤ੍ਤਾ. ਤਯੋ ਵਾ ਭਵੇ ਅਜ੍ਝੋਤ੍ਥਰਿਤ੍ਵਾ ਠਿਤਾਯ ਏਤਿਸ੍ਸਾ ਤਤ੍ਥ ਤਤ੍ਥ ਅਤ੍ਤਨੋ ਕੋਟ੍ਠਾਸਭੂਤਂ ਜਾਲਂ ਅਤ੍ਥੀਤਿਪਿ ਜਾਲਿਨੀ. ਸਰਿਤਨ੍ਤਿ ਤਤ੍ਥ ਤਤ੍ਥ ਸਰਿਤ੍ਵਾ ਸਂਸਰਿਤ੍ਵਾ ਠਿਤਂ. ਵਿਸਟਨ੍ਤਿ ਪਤ੍ਥਟਂ ਵਿਕ੍ਖਿਤ੍ਤਂ. ਵਿਸਤ੍ਤਿਕਨ੍ਤਿ ਤਤ੍ਥ ਤਤ੍ਥ ਵਿਸਤ੍ਤਂ ਲਗ੍ਗਂ ਲਗਿਤਂ. ਅਪਿਚ ‘‘ਵਿਸਮੂਲਾਤਿ ਵਿਸਤ੍ਤਿਕਾ. ਵਿਸਫਲਾਤਿ ਵਿਸਤ੍ਤਿਕਾ’’ਤਿਆਦਿਨਾਪਿ (ਮਹਾਨਿ. ੩; ਚੂਲ਼ਨਿ. ਮੇਤ੍ਤਗੂਮਾਣਵਪੁਚ੍ਛਾਨਿਦ੍ਦੇਸੋ ੨੨) ਨਯੇਨੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਉਦ੍ਧਸ੍ਤੋਤਿ ਉਪਰਿ ਧਂਸਿਤੋ. ਪਰਿਯੋਨਦ੍ਧੋਤਿ ਸਮਨ੍ਤਾ ਵੇਠਿਤੋ. ਤਨ੍ਤਾਕੁਲਕਜਾਤੋਤਿ ਤਨ੍ਤਂ ਵਿਯ ਆਕੁਲਜਾਤੋ. ਯਥਾ ਨਾਮ ਦੁਨ੍ਨਿਕ੍ਖਿਤ੍ਤਂ ਮੂਸਿਕਚ੍ਛਿਨ੍ਨਂ ਪੇਸਕਾਰਾਨਂ ਤਨ੍ਤਂ ਤਹਿਂ ਤਹਿਂ ਆਕੁਲਂ ਹੋਤਿ, ‘‘ਇਦਂ ਅਗ੍ਗਂ ਇਦਂ ਮੂਲ’’ਨ੍ਤਿ ਅਗ੍ਗੇਨ ਵਾ ਅਗ੍ਗਂ, ਮੂਲੇਨ ਵਾ ਮੂਲਂ ਸਮਾਨੇਤੁਂ ਦੁਕ੍ਕਰਂ ਹੋਤਿ, ਏਵਂ ਸਤ੍ਤਾ ਇਮਾਯ ਤਣ੍ਹਾਯ ਪਰਿਯੋਨਦ੍ਧਾ ਆਕੁਲਬ੍ਯਾਕੁਲਾ ਨ ਸਕ੍ਕੋਨ੍ਤਿ ਅਤ੍ਤਨੋ ਨਿਸ੍ਸਰਣਮਗ੍ਗਂ ਉਜੁਂ ਕਾਤੁਂ. ਗੁਲਾਗੁਣ੍ਠਿਕਜਾਤੋਤਿ ਗੁਲਾਗੁਣ੍ਠਿਕਂ ਵੁਚ੍ਚਤਿ ਪੇਸਕਾਰਕਞ੍ਜਿਯਸੁਤ੍ਤਂ. ਗੁਲਾ ਨਾਮ ਸਕੁਣਿਕਾ, ਤਸ੍ਸਾ ਕੁਲਾਵਕੋਤਿਪਿ ਏਕੇ. ਯਥਾ ਤਦੁਭਯਮ੍ਪਿ ਆਕੁਲਂ ਅਗ੍ਗੇਨ ਵਾ ਅਗ੍ਗਂ, ਮੂਲੇਨ ਵਾ ਮੂਲਂ ਸਮਾਨੇਤੁਂ ਦੁਕ੍ਕਰਨ੍ਤਿ ਪੁਰਿਮਨਯੇਨੇਵ ਯੋਜੇਤਬ੍ਬਂ. ਮੁਞ੍ਜਪਬ੍ਬਜਭੂਤੋਤਿ ਮੁਞ੍ਜਤਿਣਂ ਵਿਯ ਪਬ੍ਬਜਤਿਣਂ ਵਿਯ ਚ ਭੂਤੋ, ਤਾਦਿਸੋ ਜਾਤੋ. ਯਥਾ ਤਾਨਿ ਤਿਣਾਨਿ ਕੋਟ੍ਟੇਤ੍ਵਾ ਕਤਰਜ੍ਜੁਂ ਜਿਣ੍ਣਕਾਲੇ ਕਤ੍ਥਚਿ ਪਤਿਤਂ ਗਹੇਤ੍ਵਾ ਤੇਸਂ ਤਿਣਾਨਂ ‘‘ਇਦਂ ਅਗ੍ਗਂ ਇਦਂ ਮੂਲ’’ਨ੍ਤਿ ਅਗ੍ਗੇਨ ਵਾ ਅਗ੍ਗਂ, ਮੂਲੇਨ ਵਾ ਮੂਲਂ ਸਮਾਨੇਤੁਂ ਦੁਕ੍ਕਰਂ. ਤਮ੍ਪਿ ਚ ਪਚ੍ਚਤ੍ਤਪੁਰਿਸਕਾਰੇ ਠਤ੍ਵਾ ਸਕ੍ਕਾ ਭਵੇਯ੍ਯ ਉਜੁਂ ਕਾਤੁਂ, ਠਪੇਤ੍ਵਾ ਪਨ ਬੋਧਿਸਤ੍ਤੇ ਅਞ੍ਞੋ ਸਤ੍ਤੋ ਅਤ੍ਤਨੋ ਧਮ੍ਮਤਾਯ ਤਣ੍ਹਾਜਾਲਂ ਪਦਾਲੇਤ੍ਵਾ ਅਤ੍ਤਨੋ ਨਿਸ੍ਸਰਣਮਗ੍ਗਂ ਉਜੁਂ ਕਾਤੁਂ ਸਮਤ੍ਥੋ ਨਾਮ ਨਤ੍ਥਿ. ਏਵਮਯਂ ਲੋਕੋ ਤਣ੍ਹਾਜਾਲੇਨ ਪਰਿਯੋਨਦ੍ਧੋ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਸਂਸਾਰਂ ਨਾਤਿਵਤ੍ਤਤਿ. ਤਤ੍ਥ ਅਪਾਯੋਤਿ ਨਿਰਯ-ਤਿਰਚ੍ਛਾਨਯੋਨਿ-ਪੇਤ੍ਤਿਵਿਸਯ-ਅਸੁਰਕਾਯਾ. ਸਬ੍ਬੇਪਿ ਹਿ ਤੇ ਵਡ੍ਢਿਸਙ੍ਖਾਤਸ੍ਸ ਆਯਸ੍ਸ ਅਭਾਵਤੋ ਅਪਾਯਾਤਿ ਵੁਚ੍ਚਨ੍ਤਿ. ਤਥਾ ਦੁਕ੍ਖਸ੍ਸ ਗਤਿਭਾਵਤੋ ਦੁਗ੍ਗਤਿ. ਸੁਖਸਮੁਸ੍ਸਯਤੋ ਵਿਨਿਪਤਿਤਤ੍ਤਾ ਵਿਨਿਪਾਤੋ. ਇਤਰੋ ਪਨ –

‘‘ਖਨ੍ਧਾਨਞ੍ਚ ਪਟਿਪਾਟਿ, ਧਾਤੁਆਯਤਨਾਨ ਚ;

ਅਬ੍ਬੋਚ੍ਛਿਨ੍ਨਂ ਵਤ੍ਤਮਾਨਾ, ਸਂਸਾਰੋਤਿ ਪਵੁਚ੍ਚਤਿ.

ਤਂ ਸਬ੍ਬਂ ਨਾਤਿਵਤ੍ਤਤਿ ਨਾਤਿਕ੍ਕਮਤਿ, ਅਥ ਖੋ ਚੁਤਿਤੋ ਪਟਿਸਨ੍ਧਿਂ ਪਟਿਸਨ੍ਧਿਤੋ ਚੁਤਿਨ੍ਤਿ ਏਵਂ ਪੁਨਪ੍ਪੁਨਂ ਚੁਤਿਪਟਿਸਨ੍ਧਿਯੋ ਗਣ੍ਹਮਾਨੋ ਤੀਸੁ ਭਵੇਸੁ ਚਤੂਸੁ ਯੋਨੀਸੁ ਪਞ੍ਚਸੁ ਗਤੀਸੁ ਸਤ੍ਤਸੁ ਵਿਞ੍ਞਾਣਟ੍ਠਿਤੀਸੁ ਨਵਸੁ ਸਤ੍ਤਾਵਾਸੇਸੁ ਮਹਾਸਮੁਦ੍ਦੇ ਵਾਤਕ੍ਖਿਤ੍ਤਨਾਵਾ ਵਿਯ ਯਨ੍ਤੇ ਯੁਤ੍ਤਗੋਣੋ ਵਿਯ ਚ ਪਰਿਬ੍ਭਮਤਿਯੇਵ.

ਅਜ੍ਝਤ੍ਤਿਕਸ੍ਸ ਉਪਾਦਾਯਾਤਿ ਅਜ੍ਝਤ੍ਤਿਕਂ ਖਨ੍ਧਪਞ੍ਚਕਂ ਉਪਾਦਾਯ. ਇਦਞ੍ਹਿ ਉਪਯੋਗਤ੍ਥੇ ਸਾਮਿਵਚਨਂ. ਬਾਹਿਰਸ੍ਸ ਉਪਾਦਾਯਾਤਿ ਬਾਹਿਰਂ ਖਨ੍ਧਪਞ੍ਚਕਂ ਉਪਾਦਾਯ, ਇਦਮ੍ਪਿ ਉਪਯੋਗਤ੍ਥੇ ਸਾਮਿਵਚਨਂ. ਅਸ੍ਮੀਤਿ, ਭਿਕ੍ਖਵੇ, ਸਤੀਤਿ, ਭਿਕ੍ਖਵੇ, ਯਦੇਤਂ ਅਜ੍ਝਤ੍ਤਂ ਖਨ੍ਧਪਞ੍ਚਕਂ ਉਪਾਦਾਯ ਤਣ੍ਹਾਮਾਨਦਿਟ੍ਠਿਵਸੇਨ ਸਮੂਹਗ੍ਗਾਹਤੋ ਅਸ੍ਮੀਤਿ ਹੋਤਿ, ਤਸ੍ਮਿਂ ਸਤੀਤਿ ਅਤ੍ਥੋ. ਇਤ੍ਥਸ੍ਮੀਤਿ ਹੋਤੀਤਿਆਦੀਸੁ ਪਨ ਏਵਂ ਸਮੂਹਤੋ ਅਹਨ੍ਤਿ ਗਹਣੇ ਸਤਿ ਤਤੋ ਅਨੁਪਨਿਧਾਯ ਚ ਉਪਨਿਧਾਯ ਚਾਤਿ ਦ੍ਵਿਧਾ ਗਹਣਂ ਹੋਤਿ. ਤਤ੍ਥ ਅਨੁਪਨਿਧਾਯਾਤਿ ਅਞ੍ਞਂ ਆਕਾਰਂ ਅਨੁਪਗਮ੍ਮ ਸਕਭਾਵਮੇਵ ਆਰਮ੍ਮਣਂ ਕਤ੍ਵਾ ਇਤ੍ਥਸ੍ਮੀਤਿ ਹੋਤਿ, ਖਤ੍ਤਿਯਾਦੀਸੁ ਇਦਂਪਕਾਰੋ ਅਹਨ੍ਤਿ ਏਵਂ ਤਣ੍ਹਾਮਾਨਦਿਟ੍ਠਿਵਸੇਨ ਹੋਤੀਤਿ ਅਤ੍ਥੋ. ਇਦਂ ਤਾਵ ਅਨੁਪਨਿਧਾਯ ਗਹਣਂ. ਉਪਨਿਧਾਯ ਗਹਣਂ ਪਨ ਦੁਵਿਧਂ ਹੋਤਿ ਸਮਤੋ ਚ ਅਸਮਤੋ ਚ. ਤਂ ਦਸ੍ਸੇਤੁਂ ਏਵਂਸ੍ਮੀਤਿ ਅਞ੍ਞਥਾਸ੍ਮੀਤਿ ਚ ਵੁਤ੍ਤਂ. ਤਤ੍ਥ ਏਵਂਸ੍ਮੀਤਿ ਇਦਂ ਸਮਤੋ ਉਪਨਿਧਾਯ ਗਹਣਂ, ਯਥਾਯਂ ਖਤ੍ਤਿਯੋ ਯਥਾਯਂ ਬ੍ਰਾਹ੍ਮਣੋ, ਏਵਮਹਮ੍ਪੀਤਿ ਅਤ੍ਥੋ. ਅਞ੍ਞਥਾਸ੍ਮੀਤਿ ਇਦਂ ਪਨ ਅਸਮਤੋ ਗਹਣਂ, ਯਥਾਯਂ ਖਤ੍ਤਿਯੋ ਯਥਾਯਂ ਬ੍ਰਾਹ੍ਮਣੋ, ਤਤੋ ਅਞ੍ਞਥਾ ਅਹਂ, ਹੀਨੋ ਵਾ ਅਧਿਕੋ ਵਾਤਿ ਅਤ੍ਥੋ. ਇਮਾਨਿ ਤਾਵ ਪਚ੍ਚੁਪ੍ਪਨ੍ਨਵਸੇਨ ਚਤ੍ਤਾਰਿ ਤਣ੍ਹਾਵਿਚਰਿਤਾਨਿ.

ਅਸਸ੍ਮੀਤਿ ਸਤਸ੍ਮੀਤਿ ਇਮਾਨਿ ਪਨ ਦ੍ਵੇ ਯਸ੍ਮਾ ਅਤ੍ਥੀਤਿ ਅਸਂ, ਨਿਚ੍ਚਸ੍ਸੇਤਂ ਅਧਿਵਚਨਂ. ਸੀਦਤੀਤਿ ਸਤਂ, ਅਨਿਚ੍ਚਸ੍ਸੇਤਂ ਅਧਿਵਚਨਂ. ਤਸ੍ਮਾ ਸਸ੍ਸਤੁਚ੍ਛੇਦਵਸੇਨ ਵੁਤ੍ਤਾਨੀਤਿ ਵੇਦਿਤਬ੍ਬਾਨਿ. ਇਤੋ ਪਰਾਨਿ ਸਨ੍ਤਿ ਏਵਮਾਦੀਨਿ ਚਤ੍ਤਾਰਿ ਸਂਸਯਪਰਿਵਿਤਕ੍ਕਵਸੇਨ ਵੁਤ੍ਤਾਨਿ. ਸਨ੍ਤਿ ਹੋਤੀਤਿ ਏਵਮਾਦੀਸੁ ਅਹਂ ਸਿਯਨ੍ਤਿ ਹੋਤੀਤਿ ਏਵਮਤ੍ਥੋ ਵੇਦਿਤਬ੍ਬੋ. ਅਧਿਪ੍ਪਾਯੋ ਪਨੇਤ੍ਥ ਪੁਰਿਮਚਤੁਕ੍ਕੇ ਵੁਤ੍ਤਨਯੇਨੇਵ ਗਹੇਤਬ੍ਬੋ. ਅਪਿਹਂ ਸਨ੍ਤਿਆਦੀਨਿ ਪਨ ਚਤ੍ਤਾਰਿ ਅਪਿ ਨਾਮ ਅਹਂ ਭਵੇਯ੍ਯਨ੍ਤਿ ਏਵਂ ਪਤ੍ਥਨਾਕਪ੍ਪਨਵਸੇਨ ਵੁਤ੍ਤਾਨਿ. ਤਾਨਿਪਿ ਪੁਰਿਮਚਤੁਕ੍ਕੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾਨਿ. ਭਵਿਸ੍ਸਨ੍ਤਿਆਦੀਨਿ ਪਨ ਚਤ੍ਤਾਰਿ ਅਨਾਗਤਵਸੇਨ ਵੁਤ੍ਤਾਨਿ. ਤੇਸਮ੍ਪਿ ਪੁਰਿਮਚਤੁਕ੍ਕੇ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ. ਏਵਮੇਤੇ –

‘‘ਦ੍ਵੇ ਦਿਟ੍ਠਿਸੀਸਾ ਸੀਸਞ੍ਞੇ, ਚਤ੍ਤਾਰੋ ਸੀਸਮੂਲਕਾ;

ਤਯੋ ਤਯੋਤਿ ਏਤਾਨਿ, ਅਟ੍ਠਾਰਸ ਵਿਭਾਵਯੇ.

ਏਤੇਸੁ ਹਿ ਅਸਸ੍ਮਿ, ਸਤਸ੍ਮੀਤਿ ਏਤੇ ਦ੍ਵੇ ਦਿਟ੍ਠਿਸੀਸਾ ਨਾਮ. ਅਸ੍ਮਿ, ਸਨ੍ਤਿ, ਅਪਿਹਂ ਸਨ੍ਤਿ, ਭਵਿਸ੍ਸਨ੍ਤਿ ਏਤੇ ਚਤ੍ਤਾਰੋ ਸੁਦ੍ਧਸੀਸਾ ਏਵ. ਇਤ੍ਥਸ੍ਮੀਤਿਆਦਯੋ ਤਯੋ ਤਯੋਤਿ ਦ੍ਵਾਦਸ ਸੀਸਮੂਲਕਾ ਨਾਮਾਤਿ ਏਵਮੇਤੇ ਦ੍ਵੇ ਦਿਟ੍ਠਿਸੀਸਾ ਚਤ੍ਤਾਰੋ ਸੁਦ੍ਧਸੀਸਾ ਦ੍ਵਾਦਸ ਸੀਸਮੂਲਕਾਤਿ ਅਟ੍ਠਾਰਸ ਤਣ੍ਹਾਵਿਚਰਿਤਧਮ੍ਮਾ ਵੇਦਿਤਬ੍ਬਾ. ਇਮਾਨਿ ਤਾਵ ਅਜ੍ਝਤ੍ਤਿਕਸ੍ਸ ਉਪਾਦਾਯ ਅਟ੍ਠਾਰਸ ਤਣ੍ਹਾਵਿਚਰਿਤਾਨਿ. ਬਾਹਿਰਸ੍ਸ ਉਪਾਦਾਯ ਤਣ੍ਹਾਵਿਚਰਿਤੇਸੁਪਿ ਏਸੇਵ ਨਯੋ. ਇਮਿਨਾਤਿ ਇਮਿਨਾ ਰੂਪੇਨ ਵਾ…ਪੇ… ਵਿਞ੍ਞਾਣੇਨ ਵਾਤਿ ਏਸ ਵਿਸੇਸੋ ਵੇਦਿਤਬ੍ਬੋ. ਸੇਸਂ ਤਾਦਿਸਮੇਵ.

ਇਤਿ ਏਵਰੂਪਾਨਿ ਅਤੀਤਾਨਿ ਛਤ੍ਤਿਂਸਾਤਿ ਏਕਮੇਕਸ੍ਸ ਪੁਗ੍ਗਲਸ੍ਸ ਅਤੀਤੇ ਅਦ੍ਧਨਿ ਛਤ੍ਤਿਂਸ. ਅਨਾਗਤਾਨਿ ਛਤ੍ਤਿਂਸਾਤਿ ਏਕਮੇਕਸ੍ਸੇਵ ਪੁਗ੍ਗਲਸ੍ਸ ਚ ਅਨਾਗਤੇ ਅਦ੍ਧਨਿ ਛਤ੍ਤਿਂਸ. ਪਚ੍ਚੁਪ੍ਪਨ੍ਨਾਨਿ ਛਤ੍ਤਿਂਸਾਤਿ ਏਕਸ੍ਸ ਵਾ ਪੁਗ੍ਗਲਸ੍ਸ ਯਥਾਸਮ੍ਭਵਤੋ ਬਹੂਨਂ ਵਾ ਪਚ੍ਚੁਪ੍ਪਨ੍ਨੇ ਅਦ੍ਧਨਿ ਛਤ੍ਤਿਂਸਾਵ. ਸਬ੍ਬਸਤ੍ਤਾਨਂ ਪਨ ਨਿਯਮੇਨੇਵ ਅਤੀਤੇ ਅਦ੍ਧਨਿ ਛਤ੍ਤਿਂਸ, ਅਨਾਗਤੇ ਛਤ੍ਤਿਂਸ, ਪਚ੍ਚੁਪ੍ਪਨ੍ਨੇ ਛਤ੍ਤਿਂਸ. ਅਨਨ੍ਤਾ ਹਿ ਅਸਦਿਸਤਣ੍ਹਾਮਾਨਦਿਟ੍ਠਿਭੇਦਾ ਸਤ੍ਤਾ. ਅਟ੍ਠਸਤਂ ਤਣ੍ਹਾਵਿਚਰਿਤਂ ਹੋਨ੍ਤੀਤਿ ਏਤ੍ਥ ਪਨ ਅਟ੍ਠਸਤਸਙ੍ਖਾਤਂ ਤਣ੍ਹਾਵਿਚਰਿਤਂ ਹੋਤੀਤਿ ਏਵਮਤ੍ਥੋ ਦਟ੍ਠਬ੍ਬੋ.