੪. ਚਤੁਤ੍ਥਪਣ੍ਣਾਸਕਂ
(੧੬) ੧. ਇਨ੍ਦ੍ਰਿਯਵਗ੍ਗੋ
੧. ਇਨ੍ਦ੍ਰਿਯਸੁਤ੍ਤਾਦਿਵਣ੍ਣਨਾ
੧੫੧. ਚਤੁਤ੍ਥਸ੍ਸ ਪਠਮੇ ਸਦ੍ਧਾਧੁਰੇਨ ਇਨ੍ਦਟ੍ਠਂ ਕਰੋਤੀਤਿ ਸਦ੍ਧਿਨ੍ਦ੍ਰਿਯਂ. ਸੇਸੇਸੁਪਿ ਏਸੇਵ ਨਯੋ. ਦੁਤਿਯੇ ਅਸ੍ਸਦ੍ਧਿਯੇ ਅਕਮ੍ਪਨਟ੍ਠੇਨ ਸਦ੍ਧਾਬਲਂ. ਸੇਸੇਸੁਪਿ ਏਸੇਵ ਨਯੋ. ਤਤਿਯੇ ਅਨਵਜ੍ਜਬਲਨ੍ਤਿ ਨਿਦ੍ਦੋਸਬਲਂ. ਸਙ੍ਗਹਬਲਨ੍ਤਿ ਸਙ੍ਗਣ੍ਹਿਤਬ੍ਬਯੁਤ੍ਤਕਾਨਂ ਸਙ੍ਗਣ੍ਹਨਬਲਂ. ਚਤੁਤ੍ਥਪਞ੍ਚਮਾਨਿ ਉਤ੍ਤਾਨਾਨੇਵ.
੬. ਕਪ੍ਪਸੁਤ੍ਤਵਣ੍ਣਨਾ
੧੫੬. ਛਟ੍ਠੇ ਸਂਵਟ੍ਟਤੀਤਿ ਏਤ੍ਥ ਤਯੋ ਸਂਵਟ੍ਟਾ ਆਪੋਸਂਵਟ੍ਟੋ, ਤੇਜੋਸਂਵਟ੍ਟੋ, ਵਾਯੋਸਂਵਟ੍ਟੋਤਿ. ਤਿਸ੍ਸੋ ਸਂਵਟ੍ਟਸੀਮਾ ਆਭਸ੍ਸਰਾ, ਸੁਭਕਿਣ੍ਹਾ, ਵੇਹਪ੍ਫਲਾਤਿ. ਯਦਾ ਕਪ੍ਪੋ ਤੇਜੇਨ ਸਂਵਟ੍ਟਤਿ, ਆਭਸ੍ਸਰਤੋ ਹੇਟ੍ਠਾ ਅਗ੍ਗਿਨਾ ਡਯ੍ਹਤਿ. ਯਦਾ ਆਪੇਨ ਸਂਵਟ੍ਟਤਿ, ਸੁਭਕਿਣ੍ਹਤੋ ਹੇਟ੍ਠਾ ਉਦਕੇਨ ਵਿਲੀਯਤਿ. ਯਦਾ ਵਾਤੇਨ ਸਂਵਟ੍ਟਤਿ, ਵੇਹਪ੍ਫਲਤੋ ਹੇਟ੍ਠਾ ਵਾਤੇਨ ਵਿਦ੍ਧਂਸਤਿ. ਵਿਤ੍ਥਾਰਤੋ ਪਨ ਸਦਾਪਿ ਏਕਂ ਬੁਦ੍ਧਕ੍ਖੇਤ੍ਤਂ ਵਿਨਸ੍ਸਤਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਕਥਾ ਪਨ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੨.੪੦੩-੪੦੪ ਆਦਯੋ) ਵੁਤ੍ਤਨਯੇਨੇਵ ਵੇਦਿਤਬ੍ਬਾ.
੭. ਰੋਗਸੁਤ੍ਤਵਣ੍ਣਨਾ
੧੫੭. ਸਤ੍ਤਮੇ ਵਿਘਾਤਵਾਤਿ ਮਹਿਚ੍ਛਾਪਚ੍ਚਯੇਨ ਵਿਘਾਤੇਨ ਦੁਕ੍ਖੇਨ ਸਮਨ੍ਨਾਗਤੋ. ਅਸਨ੍ਤੁਟ੍ਠੋਤਿ ਚਤੂਸੁ ਪਚ੍ਚਯੇਸੁ ਤੀਹਿ ਸਨ੍ਤੋਸੇਹਿ ਅਸਨ੍ਤੁਟ੍ਠੋ. ਅਨਵਞ੍ਞਪ੍ਪਟਿਲਾਭਾਯਾਤਿ ਪਰੇਹਿ ਅਨਵਜਾਨਨਸ੍ਸ ਪਟਿਲਾਭਤ੍ਥਾਯ. ਲਾਭਸਕ੍ਕਾਰਸਿਲੋਕਪ੍ਪਟਿਲਾਭਾਯਾਤਿ ਸੁਸਙ੍ਖਤਚਤੁਪਚ੍ਚਯਸਙ੍ਖਾਤਸ੍ਸ ਲਾਭਸਕ੍ਕਾਰਸ੍ਸ ਚੇਵ ਵਣ੍ਣਭਣਨਸਙ੍ਖਾਤਸ੍ਸ ਸਿਲੋਕਸ੍ਸ ਚ ਪਟਿਲਾਭਤ੍ਥਾਯ. ਸਙ੍ਖਾਯ ਕੁਲਾਨਿ ਉਪਸਙ੍ਕਮਤੀਤਿ ‘‘ਇਤਿ ਮਂ ਏਤੇ ਜਾਨਿਸ੍ਸਨ੍ਤੀ’’ਤਿ ਜਾਨਨਤ੍ਥਾਯ ਕੁਲਾਨਿ ਉਪਸਙ੍ਕਮਤਿ. ਸੇਸਪਦੇਸੁਪਿ ਏਸੇਵ ਨਯੋ.
੮. ਪਰਿਹਾਨਿਸੁਤ੍ਤਵਣ੍ਣਨਾ
੧੫੮. ਅਟ੍ਠਮੇ ਗਮ੍ਭੀਰੇਸੂਤਿ ਅਤ੍ਥਗਮ੍ਭੀਰੇਸੁ. ਠਾਨਾਠਾਨੇਸੂਤਿ ਕਾਰਣਾਕਾਰਣੇਸੁ. ਨ ਕਮਤੀਤਿ ਨਾਵਗਾਹਤਿ ਨਪ੍ਪਵਤ੍ਤਤਿ. ਪਞ੍ਞਾਚਕ੍ਖੂਤਿ ਏਤ੍ਥ ਉਗ੍ਗਹਪਰਿਪੁਚ੍ਛਾਪਞ੍ਞਾਪਿ ਵਟ੍ਟਤਿ, ਸਮ੍ਮਸਨਪ੍ਪਟਿਵੇਧਪਞ੍ਞਾਪਿ ਵਟ੍ਟਤਿਯੇਵ.
੯. ਭਿਕ੍ਖੁਨੀਸੁਤ੍ਤਵਣ੍ਣਨਾ
੧੫੯. ਨਵਮੇ ਏਹਿ ਤ੍ਵਨ੍ਤਿ ਥੇਰੇ ਪਟਿਬਦ੍ਧਚਿਤ੍ਤਾ ਤਂ ਪਹਿਣਿਤੁਂ ਏਵਮਾਹ. ਸਸੀਸਂ ਪਾਰੁਪਿਤ੍ਵਾਤਿ ਸਹ ਸੀਸੇਨ ਕਾਯਂ ਪਾਰੁਪਿਤ੍ਵਾ. ਮਞ੍ਚਕੇ ਨਿਪਜ੍ਜੀਤਿ ਵੇਗੇਨ ਮਞ੍ਚਕਂ ਪਞ੍ਞਾਪੇਤ੍ਵਾ ਤਤ੍ਥ ਨਿਪਜ੍ਜਿ. ਏਤਦਵੋਚਾਤਿ ਤਸ੍ਸਾਕਾਰਂ ਸਲ੍ਲਕ੍ਖੇਤ੍ਵਾ ਲੋਭਪ੍ਪਹਾਨਤ੍ਥਾਯ ਸਣ੍ਹੇਨੇਵ ਅਸੁਭਕਥਂ ਕਥੇਤੁਂ ਏਤਂ ਅਵੋਚ. ਆਹਾਰਸਮ੍ਭੂਤੋਤਿ ਆਹਾਰੇਨ ਸਮ੍ਭੂਤੋ ਆਹਾਰਂ ਨਿਸ੍ਸਾਯ ਵਡ੍ਢਿਤੋ. ਆਹਾਰਂ ਨਿਸ੍ਸਾਯ ਆਹਾਰਂ ਪਜਹਤੀਤਿ ਪਚ੍ਚੁਪ੍ਪਨ੍ਨਂ ਕਬਲ਼ੀਕਾਰਾਹਾਰਂ ਨਿਸ੍ਸਾਯ ਤਂ ਏਵਂ ਯੋਨਿਸੋ ਸੇਵਮਾਨੋ ਪੁਬ੍ਬਕਮ੍ਮਸਙ੍ਖਾਤਂ ਆਹਾਰਂ ਪਜਹਤਿ. ਪਚ੍ਚੁਪ੍ਪਨ੍ਨੇਪਿ ਪਨ ਕਬਲ਼ੀਕਾਰਾਹਾਰੇ ਨਿਕਨ੍ਤਿਤਣ੍ਹਾ ਪਜਹਿਤਬ੍ਬਾ.
ਤਣ੍ਹਂ ਪਜਹਤੀਤਿ ਇਦਾਨਿ ਏਵਂ ਪਵਤ੍ਤਂ ਪਚ੍ਚੁਪ੍ਪਨ੍ਨਤਣ੍ਹਂ ਨਿਸ੍ਸਾਯ ਵਟ੍ਟਮੂਲਿਕਂ ਪੁਬ੍ਬਤਣ੍ਹਂ ਪਜਹਤਿ. ਅਯਂ ਪਨ ਪਚ੍ਚੁਪ੍ਪਨ੍ਨਤਣ੍ਹਾ ਕੁਸਲਾ ਅਕੁਸਲਾਤਿ? ਅਕੁਸਲਾ. ਸੇਵਿਤਬ੍ਬਾ ਨ ਸੇਵਿਤਬ੍ਬਾਤਿ? ਸੇਵਿਤਬ੍ਬਾ. ਪਟਿਸਨ੍ਧਿਂ ਆਕਡ੍ਢਤਿ ਨਾਕਡ੍ਢਤੀਤਿ? ਨਾਕਡ੍ਢਤਿ. ਏਤਿਸ੍ਸਾਪਿ ਪਨ ਪਚ੍ਚੁਪ੍ਪਨ੍ਨਾਯ ਸੇਵਿਤਬ੍ਬਤਣ੍ਹਾਯ ਨਿਕਨ੍ਤਿ ਪਜਹਿਤਬ੍ਬਾਯੇਵ. ਸੋ ਹਿ ਨਾਮ ਆਯਸ੍ਮਾ ਆਸਵਾਨਂ ਖਯਾ ਉਪਸਮ੍ਪਜ੍ਜ ਵਿਹਰਿਸ੍ਸਤਿ, ਕਿਮਙ੍ਗਂ ਪਨਾਹਨ੍ਤਿ ਏਤ੍ਥ ਕਿਮਙ੍ਗਂ ਪਨਾਤਿ ਕਾਰਣਪਰਿਵਿਤਕ੍ਕਨਮੇਤਂ. ਇਦਂ ਵੁਤ੍ਤਂ ਹੋਤਿ – ਸੋ ਆਯਸ੍ਮਾ ਅਰਹਤ੍ਤਫਲਂ ਸਚ੍ਛਿਕਤ੍ਵਾ ਵਿਹਰਿਸ੍ਸਤਿ, ਅਹਂ ਕੇਨ ਕਾਰਣੇਨ ਨ ਸਚ੍ਛਿਕਤ੍ਵਾ ਵਿਹਰਿਸ੍ਸਾਮਿ. ਸੋਪਿ ਹਿ ਆਯਸ੍ਮਾ ਸਮ੍ਮਾਸਮ੍ਬੁਦ੍ਧਸ੍ਸੇਵ ਪੁਤ੍ਤੋ, ਅਹਮ੍ਪਿ ਸਮ੍ਮਾਸਮ੍ਬੁਦ੍ਧਸ੍ਸੇਵ ਪੁਤ੍ਤੋ, ਮਯ੍ਹਮ੍ਪੇਤਂ ਉਪ੍ਪਜ੍ਜਿਸ੍ਸਤੀਤਿ. ਮਾਨਂ ਨਿਸ੍ਸਾਯਾਤਿ ਇਦਂ ਏਵਂ ਉਪ੍ਪਨ੍ਨਸੇਵਿਤਬ੍ਬਮਾਨਂ ਨਿਸ੍ਸਾਯ. ਮਾਨਂ ਪਜਹਤੀਤਿ ਵਟ੍ਟਮੂਲਕਂ ਪੁਬ੍ਬਮਾਨਂ ਪਜਹਤਿ. ਯਂ ਨਿਸ੍ਸਾਯ ਪਨੇਸ ਤਂ ਪਜਹਤਿ, ਸੋਪਿ ਤਣ੍ਹਾ ਵਿਯ ਅਕੁਸਲੋ ਚੇਵ ਸੇਵਿਤਬ੍ਬੋ ਚ, ਨੋ ਚ ਪਟਿਸਨ੍ਧਿਂ ਆਕਡ੍ਢਤਿ. ਨਿਕਨ੍ਤਿ ਪਨ ਤਸ੍ਮਿਮ੍ਪਿ ਪਜਹਿਤਬ੍ਬਾਵ.
ਸੇਤੁਘਾਤੋ ਵੁਤ੍ਤੋ ਭਗਵਤਾਤਿ ਪਦਘਾਤੋ ਪਚ੍ਚਯਘਾਤੋ ਬੁਦ੍ਧੇਨ ਭਗਵਤਾ ਕਥਿਤੋ. ਇਤਿ ਇਮੇਹਿ ਚਤੂਹਿ ਅਙ੍ਗੇਹਿ ਥੇਰੇ ਦੇਸਨਂ ਵਿਨਿਵਟ੍ਟੇਨ੍ਤੇ ਤਸ੍ਸਾ ਭਿਕ੍ਖੁਨਿਯਾ ਥੇਰਂ ਆਰਬ੍ਭ ਉਪ੍ਪਨ੍ਨੋ ਛਨ੍ਦਰਾਗੋ ਅਪਗਞ੍ਛਿ. ਸਾਪਿ ਥੇਰਂ ਖਮਾਪੇਤੁਂ ਅਚ੍ਚਯਂ ਦੇਸੇਸਿ, ਥੇਰੋਪਿਸ੍ਸਾ ਪਟਿਗ੍ਗਣ੍ਹਿ. ਤਂ ਦਸ੍ਸੇਤੁਂ ਅਥ ਖੋ ਸਾ ਭਿਕ੍ਖੁਨੀਤਿਆਦਿ ਵੁਤ੍ਤਂ.
੧੦. ਸੁਗਤਵਿਨਯਸੁਤ੍ਤਵਣ੍ਣਨਾ
੧੬੦. ਦਸਮੇ ਦੁਗ੍ਗਹਿਤਨ੍ਤਿ ਉਪ੍ਪਟਿਪਾਟਿਯਾ ਗਹਿਤਂ. ਪਰਿਯਾਪੁਣਨ੍ਤੀਤਿ ਵਲ਼ਞ੍ਜੇਨ੍ਤਿ ਕਥੇਨ੍ਤਿ. ਪਦਬ੍ਯਞ੍ਜਨੇਹੀਤਿ ਏਤ੍ਥ ਪਦਮੇਵ ਅਤ੍ਥਸ੍ਸ ਬ੍ਯਞ੍ਜਨਤੋ ਬ੍ਯਞ੍ਜਨਨ੍ਤਿ ਵੁਤ੍ਤਂ. ਦੁਨ੍ਨਿਕ੍ਖਿਤ੍ਤਸ੍ਸਾਤਿ ਦੁਟ੍ਠੁ ਨਿਕ੍ਖਿਤ੍ਤਸ੍ਸ ਉਪ੍ਪਟਿਪਾਟਿਯਾ ਠਪਿਤਸ੍ਸ. ਅਤ੍ਥੋਪਿ ਦੁਨ੍ਨਯੋ ਹੋਤੀਤਿ ਅਟ੍ਠਕਥਾ ਨੀਹਰਿਤ੍ਵਾ ਕਥੇਤੁਂ ਨ ਸਕ੍ਕਾ ਹੋਤਿ. ਛਿਨ੍ਨਮੂਲਕੋਤਿ ਮੂਲਭੂਤਾਨਂ ਭਿਕ੍ਖੂਨਂ ਉਪਚ੍ਛਿਨ੍ਨਤ੍ਤਾ ਛਿਨ੍ਨਮੂਲਕੋ. ਅਪ੍ਪਟਿਸਰਣੋਤਿ ਅਪ੍ਪਤਿਟ੍ਠੋ. ਬਾਹੁਲਿਕਾਤਿ ਪਚ੍ਚਯਬਾਹੁਲ੍ਲਾਯ ਪਟਿਪਨ੍ਨਾ. ਸਾਥਲਿਕਾਤਿ ਤਿਸ੍ਸੋ ਸਿਕ੍ਖਾ ਸਿਥਿਲਗ੍ਗਹਣੇਨ ਗਣ੍ਹਨਕਾ. ਓਕ੍ਕਮਨੇ ਪੁਬ੍ਬਙ੍ਗਮਾਤਿ ਪਞ੍ਚ ਨੀਵਰਣਾਨਿ ਅਵਗਮਨਤੋ ਓਕ੍ਕਮਨਨ੍ਤਿ ਵੁਚ੍ਚਨ੍ਤਿ, ਤਤ੍ਥ ਪੁਬ੍ਬਙ੍ਗਮਾਤਿ ਅਤ੍ਥੋ. ਪਵਿਵੇਕੇਤਿ ਤਿਵਿਧੇ ਵਿਵੇਕੇ. ਨਿਕ੍ਖਿਤ੍ਤਧੁਰਾਤਿ ਨਿਬ੍ਬੀਰਿਯਾ. ਇਮਿਨਾ ਨਯੇਨ ਪਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.
ਇਨ੍ਦ੍ਰਿਯਵਗ੍ਗੋ ਪਠਮੋ.
(੧੭) ੨. ਪਟਿਪਦਾਵਗ੍ਗੋ
੧. ਸਂਖਿਤ੍ਤਸੁਤ੍ਤਵਣ੍ਣਨਾ
੧੬੧. ਦੁਤਿਯਸ੍ਸ ਪਠਮੇ ਸੁਖਪਟਿਕ੍ਖੇਪੇਨ ਦੁਕ੍ਖਾ ਪਟਿਪਜ੍ਜਿਤਬ੍ਬਤੋ ਪਟਿਪਦਾ ਏਤਿਸ੍ਸਾਤਿ ਦੁਕ੍ਖਾਪਟਿਪਦਾ. ਅਸੀਘਪ੍ਪਵਤ੍ਤਿਤਾਯ ਗਰੁਭਾਵੇਨ ਦਨ੍ਧਾ ਅਭਿਞ੍ਞਾ ਏਤਿਸ੍ਸਾਤਿ ਦਨ੍ਧਾਭਿਞ੍ਞਾ. ਇਮਿਨਾਵ ਨਯੇਨ ਸਬ੍ਬਪਦੇਸੁ ਅਤ੍ਥੋ ਵੇਦਿਤਬ੍ਬੋ.
੨. ਵਿਤ੍ਥਾਰਸੁਤ੍ਤਵਣ੍ਣਨਾ
੧੬੨. ਦੁਤਿਯੇ ਅਭਿਕ੍ਖਣਨ੍ਤਿ ਅਭਿਣ੍ਹਂ. ਆਨਨ੍ਤਰਿਯਨ੍ਤਿ ਅਨਨ੍ਤਰਵਿਪਾਕਦਾਯਕਂ ਮਗ੍ਗਸਮਾਧਿਂ. ਆਸਵਾਨਂ ਖਯਾਯਾਤਿ ਅਰਹਤ੍ਤਫਲਤ੍ਥਾਯ. ਪਞ੍ਚਿਨ੍ਦ੍ਰਿਯਾਨੀਤਿ ਵਿਪਸ੍ਸਨਾਪਞ੍ਚਮਕਾਨਿ ਪਞ੍ਚਿਨ੍ਦ੍ਰਿਯਾਨਿ. ਪਞ੍ਞਿਨ੍ਦ੍ਰਿਯਨ੍ਤਿ ਹਿ ਏਤ੍ਥ ਵਿਪਸ੍ਸਨਾਪਞ੍ਞਾਵ ਪਞ੍ਞਿਨ੍ਦ੍ਰਿਯਨ੍ਤਿ ਅਧਿਪ੍ਪੇਤਂ. ਸੇਸਮੇਤ੍ਥ ਪਾਲ਼ਿਵਸੇਨ ਉਤ੍ਤਾਨਮੇਵ.
ਇਮਾਸਂ ਪਨ ਪਟਿਪਦਾਨਂ ਅਯਂ ਆਵਿਭਾਵਕਥਾ – ਇਧ ਭਿਕ੍ਖੁ ਪੁਬ੍ਬੇ ਅਕਤਾਭਿਨਿਵੇਸੋ ਪੁਬ੍ਬਭਾਗੇ ਰੂਪਪਰਿਗ੍ਗਹੇ ਕਿਲਮਤਿ, ਅਰੂਪਪਰਿਗ੍ਗਹੇ ਕਿਲਮਤਿ, ਪਚ੍ਚਯਪਰਿਗ੍ਗਹੇ ਕਿਲਮਤਿ, ਤੀਸੁ ਅਦ੍ਧਾਸੁ ਕਿਲਮਤਿ, ਮਗ੍ਗਾਮਗ੍ਗੇ ਕਿਲਮਤਿ. ਏਵਂ ਪਞ੍ਚਸੁ ਠਾਨੇਸੁ ਕਿਲਮਨ੍ਤੋ ਵਿਪਸ੍ਸਨਂ ਪਾਪੁਣਾਤਿ. ਵਿਪਸ੍ਸਨਂ ਪਤ੍ਵਾਪਿ ਉਦਯਬ੍ਬਯਾਨੁਪਸ੍ਸਨੇ, ਭਙ੍ਗਾਨੁਪਸ੍ਸਨੇ, ਭਯਤੁਪਟ੍ਠਾਨੇ, ਆਦੀਨਵਾਨੁਪਸ੍ਸਨੇ, ਨਿਬ੍ਬਿਦਾਨੁਪਸ੍ਸਨੇ, ਮੁਚ੍ਚਿਤੁਕਮ੍ਯਤਾਞਾਣੇ, ਸਙ੍ਖਾਰੁਪੇਕ੍ਖਾਞਾਣੇ, ਅਨੁਲੋਮਞਾਣੇ, ਗੋਤ੍ਰਭੁਞਾਣੇਤਿ ਇਮੇਸੁ ਨਵਸੁ ਵਿਪਸ੍ਸਨਾਞਾਣੇਸੁਪਿ ਕਿਲਮਿਤ੍ਵਾਵ ਲੋਕੁਤ੍ਤਰਮਗ੍ਗਂ ਪਾਪੁਣਾਤਿ. ਤਸ੍ਸ ਸੋ ਲੋਕੁਤ੍ਤਰਮਗ੍ਗੋ ਏਵਂ ਦੁਕ੍ਖੇਨ ਗਰੁਭਾਵੇਨ ਸਚ੍ਛਿਕਤਤ੍ਤਾ ਦੁਕ੍ਖਪਟਿਪਦੋ ਦਨ੍ਧਾਭਿਞ੍ਞੋ ਨਾਮ ਜਾਤੋ. ਯੋ ਪਨ ਪੁਬ੍ਬਭਾਗੇ ਪਞ੍ਚਸੁ ਞਾਣੇਸੁ ਕਿਲਮਨ੍ਤੋ ਅਪਰਭਾਗੇ ਨਵਸੁ ਵਿਪਸ੍ਸਨਾਞਾਣੇਸੁ ਅਕਿਲਮਿਤ੍ਵਾਵ ਮਗ੍ਗਂ ਸਚ੍ਛਿਕਰੋਤਿ, ਤਸ੍ਸ ਸੋ ਮਗ੍ਗੋ ਏਵਂ ਦੁਕ੍ਖੇਨ ਅਗਰੁਭਾਵੇਨ ਸਚ੍ਛਿਕਤਤ੍ਤਾ ਦੁਕ੍ਖਪਟਿਪਦੋ ਖਿਪ੍ਪਾਭਿਞ੍ਞੋ ਨਾਮ ਜਾਤੋ. ਇਮਿਨਾ ਉਪਾਯੇਨ ਇਤਰਾਪਿ ਦ੍ਵੇ ਵੇਦਿਤਬ੍ਬਾ.
ਗੋਣਪਰਿਯੇਸਕਉਪਮਾਹਿ ਚੇਤਾ ਵਿਭਾਵੇਤਬ੍ਬਾ – ਏਕਸ੍ਸ ਹਿ ਪੁਰਿਸਸ੍ਸ ਚਤ੍ਤਾਰੋ ਗੋਣਾ ਪਲਾਯਿਤ੍ਵਾ ਅਟਵਿਂ ਪਵਿਟ੍ਠਾ. ਸੋ ਸਕਣ੍ਟਕੇ ਸਗਹਨੇ ਵਨੇ ਤੇ ਪਰਿਯੇਸਨ੍ਤੋ ਗਹਨਮਗ੍ਗੇਨੇਵ ਕਿਚ੍ਛੇਨ ਕਸਿਰੇਨ ਗਨ੍ਤ੍ਵਾ ਗਹਨਟ੍ਠਾਨੇਯੇਵ ਨਿਲੀਨੇ ਗੋਣੇਪਿ ਕਿਚ੍ਛੇਨ ਕਸਿਰੇਨ ਅਦ੍ਦਸ. ਏਕੋ ਕਿਚ੍ਛੇਨ ਗਨ੍ਤ੍ਵਾ ਅਬ੍ਭੋਕਾਸੇ ਠਿਤੇ ਖਿਪ੍ਪਮੇਵ ਅਦ੍ਦਸ. ਅਪਰੋ ਅਬ੍ਭੋਕਾਸਮਗ੍ਗੇਨ ਸੁਖੇਨ ਗਨ੍ਤ੍ਵਾ ਗਹਨਟ੍ਠਾਨੇ ਨਿਲੀਨੇ ਕਿਚ੍ਛੇਨ ਕਸਿਰੇਨ ਅਦ੍ਦਸ. ਅਪਰੋ ਅਬ੍ਭੋਕਾਸਮਗ੍ਗੇਨੇਵ ਸੁਖੇਨ ਗਨ੍ਤ੍ਵਾ ਅਬ੍ਭੋਕਾਸੇ ਠਿਤੇਯੇਵ ਖਿਪ੍ਪਂ ਅਦ੍ਦਸ. ਤਤ੍ਥ ਚਤ੍ਤਾਰੋ ਗੋਣਾ ਵਿਯ ਚਤ੍ਤਾਰੋ ਅਰਿਯਮਗ੍ਗਾ ਦਟ੍ਠਬ੍ਬਾ, ਗੋਣਪਰਿਯੇਸਕੋ ਪੁਰਿਸੋ ਵਿਯ ਯੋਗਾਵਚਰੋ, ਗਹਨਮਗ੍ਗੇਨ ਕਿਚ੍ਛੇਨ ਕਸਿਰੇਨ ਗਮਨਂ ਵਿਯ ਪੁਬ੍ਬਭਾਗੇ ਪਞ੍ਚਸੁ ਞਾਣੇਸੁ ਕਿਲਮਤੋ ਦੁਕ੍ਖਾਪਟਿਪਦਾ. ਗਹਨਟ੍ਠਾਨੇ ਨਿਲੀਨਾਨਂ ਕਿਚ੍ਛੇਨੇਵ ਦਸ੍ਸਨਂ ਵਿਯ ਅਪਰਭਾਗੇ ਨਵਸੁ ਞਾਣੇਸੁ ਕਿਲਮਨ੍ਤਸ੍ਸ ਅਰਿਯਮਗ੍ਗਾਨਂ ਦਸ੍ਸਨਂ. ਇਮਿਨਾ ਉਪਾਯੇਨ ਸੇਸਉਪਮਾਪਿ ਯੋਜੇਤਬ੍ਬਾ.
੩. ਅਸੁਭਸੁਤ੍ਤਵਣ੍ਣਨਾ
੧੬੩. ਤਤਿਯੇ ਅਸੁਭਾਨੁਪਸ੍ਸੀ ਕਾਯੇ ਵਿਹਰਤੀਤਿ ਅਤ੍ਤਨੋ ਕਰਜਕਾਯੇ ‘‘ਯਥਾ ਏਤਂ, ਤਥਾ ਇਦ’’ਨ੍ਤਿ ਇਮਿਨਾ ਨਯੇਨ ਬਹਿਦ੍ਧਾ ਦਿਟ੍ਠਾਨਂ ਦਸਨ੍ਨਂ ਅਸੁਭਾਨਂ ਉਪਸਂਹਰਣਵਸੇਨ ਅਸੁਭਾਨੁਪਸ੍ਸੀ ਵਿਹਰਤਿ, ਅਤ੍ਤਨੋ ਕਾਯਂ ਅਸੁਭਤੋ ਪਟਿਕੂਲਤੋ ਞਾਣੇਨ ਪਸ੍ਸਤੀਤਿ ਅਤ੍ਥੋ. ਆਹਾਰੇ ਪਟਿਕੂਲਸਞ੍ਞੀਤਿ ਨਵਨ੍ਨਂ ਪਾਟਿਕੁਲ੍ਯਾਨਂ ਵਸੇਨ ਕਬਲ਼ੀਕਾਰਾਹਾਰੇ ਪਟਿਕੂਲਸਞ੍ਞੀ. ਸਬ੍ਬਲੋਕੇ ਅਨਭਿਰਤਿਸਞ੍ਞੀਤਿ ਸਬ੍ਬਸ੍ਮਿਮ੍ਪਿ ਤੇਧਾਤੁਕੇ ਲੋਕਸਨ੍ਨਿਵਾਸੇ ਅਨਭਿਰਤਾਯ ਉਕ੍ਕਣ੍ਠਿਤਸਞ੍ਞਾਯ ਸਮਨ੍ਨਾਗਤੋ. ਸਬ੍ਬਸਙ੍ਖਾਰੇਸੁ ਅਨਿਚ੍ਚਾਨੁਪਸ੍ਸੀਤਿ ਸਬ੍ਬੇਪਿ ਤੇਭੂਮਕਸਙ੍ਖਾਰੇ ਅਨਿਚ੍ਚਤੋ ਅਨੁਪਸ੍ਸਨ੍ਤੋ. ਮਰਣਸਞ੍ਞਾਤਿ ਮਰਣਂ ਆਰਬ੍ਭ ਉਪ੍ਪਨ੍ਨਸਞ੍ਞਾ. ਅਜ੍ਝਤ੍ਤਂ ਸੂਪਟ੍ਠਿਤਾ ਹੋਤੀਤਿ ਨਿਯਕਜ੍ਝਤ੍ਤੇ ਸੁਟ੍ਠੁ ਉਪਟ੍ਠਿਤਾ ਹੋਤਿ. ਏਤ੍ਤਾਵਤਾ ਬਲਵਵਿਪਸ੍ਸਨਾ ਕਥਿਤਾ. ਸੇਖਬਲਾਨੀਤਿ ਸਿਕ੍ਖਨਕਾਨਂ ਬਲਾਨਿ. ਸੇਸਮੇਤ੍ਥ ਪਾਲ਼ਿਵਸੇਨ ਉਤ੍ਤਾਨਮੇਵ. ‘‘ਅਸੁਭਾਨੁਪਸ੍ਸੀ’’ਤਿਆਦੀਨਿ ਪਨ ਦੁਕ੍ਖਾਯ ਪਟਿਪਦਾਯ ਦਸ੍ਸਨਤ੍ਥਂ ਵੁਤ੍ਤਾਨਿ, ਪਠਮਜ੍ਝਾਨਾਦੀਨਿ ਸੁਖਾਯ. ਅਸੁਭਾਦੀਨਿ ਹਿ ਪਟਿਕੂਲਾਰਮ੍ਮਣਾਨਿ, ਤੇਸੁ ਪਨ ਪਕਤਿਯਾਵ ਸਮ੍ਪਿਯਾਯਮਾਨਂ ਚਿਤ੍ਤਂ ਅਲ੍ਲੀਯਤਿ. ਤਸ੍ਮਾ ਤਾਨਿ ਭਾਵੇਨ੍ਤੋ ਦੁਕ੍ਖਪਟਿਪਦਂ ਪਟਿਪਨ੍ਨੋ ਨਾਮ ਹੋਤਿ. ਪਠਮਜ੍ਝਾਨਾਦੀਨਿ ਪਣੀਤਸੁਖਾਨਿ, ਤਸ੍ਮਾ ਤਾਨਿ ਪਟਿਪਨ੍ਨੋ ਸੁਖਪਟਿਪਦਂ ਪਟਿਪਨ੍ਨੋ ਨਾਮ ਹੋਤਿ.
ਅਯਂ ਪਨੇਤ੍ਥ ਸਬ੍ਬਸਾਧਾਰਣਾ ਉਪਮਾ – ਸਙ੍ਗਾਮਾਵਚਰਪੁਰਿਸੋ ਹਿ ਫਲਕਕੋਟ੍ਠਕਂ ਕਤ੍ਵਾ ਪਞ੍ਚਾਵੁਧਾਨਿ ਸਨ੍ਨਯ੍ਹਿਤ੍ਵਾ ਸਙ੍ਗਾਮਂ ਪਵਿਸਤਿ, ਸੋ ਅਨ੍ਤਰਾ ਵਿਸ੍ਸਮਿਤੁਕਾਮੋ ਫਲਕਕੋਟ੍ਠਕਂ ਪਵਿਸਿਤ੍ਵਾ ਵਿਸ੍ਸਮਤਿ ਚੇਵ ਪਾਨਭੋਜਨਾਦੀਨਿ ਚ ਪਟਿਸੇਵਤਿ. ਤਤੋ ਪੁਨ ਸਙ੍ਗਾਮਂ ਪਵਿਸਿਤ੍ਵਾ ਕਮ੍ਮਂ ਕਰੋਤਿ. ਤਤ੍ਥ ਸਙ੍ਗਾਮੋ ਵਿਯ ਕਿਲੇਸਸਙ੍ਗਾਮੋ ਦਟ੍ਠਬ੍ਬੋ, ਫਲਕਕੋਟ੍ਠਕੋ ਵਿਯ ਪਞ੍ਚਨਿਸ੍ਸਯਬਲਾਨਿ, ਸਙ੍ਗਾਮਪਵਿਸਨਪੁਰਿਸੋ ਵਿਯ ਯੋਗਾਵਚਰੋ, ਪਞ੍ਚਾਵੁਧਸਨ੍ਨਾਹੋ ਵਿਯ ਵਿਪਸ੍ਸਨਾਪਞ੍ਚਮਾਨਿ ਇਨ੍ਦ੍ਰਿਯਾਨਿ, ਸਙ੍ਗਾਮਂ ਪਵਿਸਨਕਾਲੋ ਵਿਯ ਵਿਪਸ੍ਸਨਾਯ ਕਮ੍ਮਕਰਣਕਾਲੋ, ਵਿਸ੍ਸਮਿਤੁਕਾਮਸ੍ਸ ਫਲਕਕੋਟ੍ਠਕਂ ਪਵਿਸਿਤ੍ਵਾ ਵਿਸ੍ਸਮਨਪਾਨਭੋਜਨਾਨਿ ਪਟਿਸੇਵਨਕਾਲੋ ਵਿਯ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤਸ੍ਸ ਚਿਤ੍ਤੁਪ੍ਪਾਦਸ੍ਸ ਨਿਰਸ੍ਸਾਦਕ੍ਖਣੇ ਪਞ੍ਚ ਬਲਾਨਿ ਨਿਸ੍ਸਾਯ ਚਿਤ੍ਤਂ ਸਮ੍ਪਹਂਸਨਕਾਲੋ, ਵਿਸ੍ਸਮਿਤ੍ਵਾ ਖਾਦਿਤ੍ਵਾ ਪਿਵਿਤ੍ਵਾ ਚ ਪੁਨ ਸਙ੍ਗਾਮਸ੍ਸ ਪਵਿਸਨਕਾਲੋ ਵਿਯ ਪਞ੍ਚਹਿ ਬਲੇਹਿ ਚਿਤ੍ਤਂ ਸਮ੍ਪਹਂਸੇਤ੍ਵਾ ਪੁਨ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤਸ੍ਸ ਵਿਵਟ੍ਟੇਤ੍ਵਾ ਅਰਹਤ੍ਤਗ੍ਗਹਣਕਾਲੋ ਵੇਦਿਤਬ੍ਬੋ. ਇਮਸ੍ਮਿਂ ਪਨ ਸੁਤ੍ਤੇ ਬਲਾਨਿ ਚੇਵ ਇਨ੍ਦ੍ਰਿਯਾਨਿ ਚ ਮਿਸ੍ਸਕਾਨੇਵ ਕਥਿਤਾਨੀਤਿ.
੪. ਪਠਮਖਮਸੁਤ੍ਤਵਣ੍ਣਨਾ
੧੬੪. ਚਤੁਤ੍ਥੇ ਅਕ੍ਖਮਾਤਿ ਅਨਧਿਵਾਸਿਕਪਟਿਪਦਾ. ਖਮਾਤਿ ਅਧਿਵਾਸਿਕਪਟਿਪਦਾ. ਦਮਾਤਿ ਇਨ੍ਦ੍ਰਿਯਦਮਨਪਟਿਪਦਾ. ਸਮਾਤਿ ਅਕੁਸਲਵਿਤਕ੍ਕਾਨਂ ਵੂਪਸਮਨਪਟਿਪਦਾ. ਰੋਸਨ੍ਤਂ ਪਟਿਰੋਸਤੀਤਿ ਘਟ੍ਟੇਨ੍ਤਂ ਪਟਿਘਟ੍ਟੇਤਿ. ਭਣ੍ਡਨ੍ਤਂ ਪਟਿਭਣ੍ਡਤੀਤਿ ਪਹਰਨ੍ਤਂ ਪਟਿਪਹਰਤਿ. ਪਞ੍ਚਮਛਟ੍ਠਾਨਿ ਉਤ੍ਤਾਨਤ੍ਥਾਨੇਵ.
੭. ਮਹਾਮੋਗ੍ਗਲ੍ਲਾਨਸੁਤ੍ਤਵਣ੍ਣਨਾ
੧੬੭. ਸਤ੍ਤਮੇ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਹੇਟ੍ਠਿਮਾ ਤਯੋ ਮਗ੍ਗਾ ਸੁਖਪਟਿਪਦਾ ਦਨ੍ਧਾਭਿਞ੍ਞਾ ਅਹੇਸੁਂ, ਅਰਹਤ੍ਤਮਗ੍ਗੋ ਦੁਕ੍ਖਪਟਿਪਦੋ ਖਿਪ੍ਪਾਭਿਞ੍ਞੋ. ਤਸ੍ਮਾ ਏਵਮਾਹ – ‘‘ਯਾਯਂ ਪਟਿਪਦਾ ਦੁਕ੍ਖਾ ਖਿਪ੍ਪਾਭਿਞ੍ਞਾ, ਇਮਂ ਮੇ ਪਟਿਪਦਂ ਆਗਮ੍ਮ ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਤ੍ਤ’’ਨ੍ਤਿ.
੮. ਸਾਰਿਪੁਤ੍ਤਸੁਤ੍ਤਵਣ੍ਣਨਾ
੧੬੮. ਅਟ੍ਠਮੇ ਧਮ੍ਮਸੇਨਾਪਤਿਤ੍ਥੇਰਸ੍ਸ ਹੇਟ੍ਠਿਮਾ ਤਯੋ ਮਗ੍ਗਾ ਸੁਖਪਟਿਪਦਾ ਦਨ੍ਧਾਭਿਞ੍ਞਾ, ਅਰਹਤ੍ਤਮਗ੍ਗੋ ਸੁਖਪਟਿਪਦੋ ਖਿਪ੍ਪਾਭਿਞ੍ਞੋ. ਤਸ੍ਮਾ ‘‘ਯਾਯਂ ਪਟਿਪਦਾ ਸੁਖਾ ਖਿਪ੍ਪਾਭਿਞ੍ਞਾ’’ਤਿ ਆਹ. ਇਮੇਸੁ ਪਨ ਦ੍ਵੀਸੁਪਿ ਸੁਤ੍ਤੇਸੁ ਮਿਸ੍ਸਿਕਾਵ ਪਟਿਪਦਾ ਕਥਿਤਾਤਿ ਵੇਦਿਤਬ੍ਬਾ.
੯. ਸਸਙ੍ਖਾਰਸੁਤ੍ਤਵਣ੍ਣਨਾ
੧੬੯. ਨਵਮੇ ਪਠਮਦੁਤਿਯਪੁਗ੍ਗਲਾ ਸੁਕ੍ਖਵਿਪਸ੍ਸਕਾ ਸਸਙ੍ਖਾਰੇਨ ਸਪ੍ਪਯੋਗੇਨ ਸਙ੍ਖਾਰਨਿਮਿਤ੍ਤਂ ਉਪਟ੍ਠਪੇਨ੍ਤਿ. ਤੇਸੁ ਏਕੋ ਵਿਪਸ੍ਸਨਿਨ੍ਦ੍ਰਿਯਾਨਂ ਬਲਵਤ੍ਤਾ ਇਧੇਵ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬਾਯਤਿ, ਏਕੋ ਇਨ੍ਦ੍ਰਿਯਾਨਂ ਦੁਬ੍ਬਲਤਾਯ ਇਧ ਅਸਕ੍ਕੋਨ੍ਤੋ ਅਨਨ੍ਤਰੇ ਅਤ੍ਤਭਾਵੇ ਤਦੇਵ ਮੂਲਕਮ੍ਮਟ੍ਠਾਨਂ ਪਟਿਲਭਿਤ੍ਵਾ ਸਸਙ੍ਖਾਰੇਨ ਸਪ੍ਪਯੋਗੇਨ ਸਙ੍ਖਾਰਨਿਮਿਤ੍ਤਂ ਉਪਟ੍ਠਪੇਤ੍ਵਾ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬਾਯਤਿ, ਤਤਿਯਚਤੁਤ੍ਥਾ ਸਮਥਯਾਨਿਕਾ. ਤੇਸਂ ਏਕੋ ਅਸਙ੍ਖਾਰੇਨ ਅਪ੍ਪਯੋਗੇਨ ਇਨ੍ਦ੍ਰਿਯਾਨਂ ਬਲਵਤ੍ਤਾ ਇਧੇਵ ਕਿਲੇਸੇ ਖੇਪੇਤਿ, ਏਕੋ ਇਨ੍ਦ੍ਰਿਯਾਨਂ ਦੁਬ੍ਬਲਤ੍ਤਾ ਇਧ ਅਸਕ੍ਕੋਨ੍ਤੋ ਅਨਨ੍ਤਰੇ ਅਤ੍ਤਭਾਵੇ ਤਦੇਵ ਮੂਲਕਮ੍ਮਟ੍ਠਾਨਂ ਪਟਿਲਭਿਤ੍ਵਾ ਅਸਙ੍ਖਾਰੇਨ ਅਪ੍ਪਯੋਗੇਨ ਕਿਲੇਸੇ ਖੇਪੇਤੀਤਿ ਵੇਦਿਤਬ੍ਬੋ.
੧੦. ਯੁਗਨਦ੍ਧਸੁਤ੍ਤਵਣ੍ਣਨਾ
੧੭੦. ਦਸਮੇ ਸਮਥਪੁਬ੍ਬਙ੍ਗਮਨ੍ਤਿ ਸਮਥਂ ਪੁਬ੍ਬਙ੍ਗਮਂ ਪੁਰੇਚਾਰਿਕਂ ਕਤ੍ਵਾ. ਮਗ੍ਗੋ ਸਞ੍ਜਾਯਤੀਤਿ ਪਠਮੋ ਲੋਕੁਤ੍ਤਰਮਗ੍ਗੋ ਨਿਬ੍ਬਤ੍ਤਤਿ. ਸੋ ਤਂ ਮਗ੍ਗਨ੍ਤਿ ਏਕਚਿਤ੍ਤਕ੍ਖਣਿਕਮਗ੍ਗਸ੍ਸ ਆਸੇਵਨਾਦੀਨਿ ਨਾਮ ਨਤ੍ਥਿ, ਦੁਤਿਯਮਗ੍ਗਾਦਯੋ ਪਨ ਉਪ੍ਪਾਦੇਨ੍ਤੋ ਤਮੇਵ ਆਸੇਵਤਿ ਭਾਵੇਤਿ ਬਹੁਲੀਕਰੋਤੀਤਿ ਵੁਚ੍ਚਤਿ. ਵਿਪਸ੍ਸਨਾਪੁਬ੍ਬਙ੍ਗਮਨ੍ਤਿ ਵਿਪਸ੍ਸਨਂ ਪੁਬ੍ਬਙ੍ਗਮਂ ਪੁਰੇਚਾਰਿਕਂ ਕਤ੍ਵਾ ਸਮਥਂ ਭਾਵੇਤਿ, ਪਕਤਿਯਾ ਵਿਪਸ੍ਸਨਾਲਾਭੀ ਵਿਪਸ੍ਸਨਾਯ ਠਤ੍ਵਾ ਸਮਾਧਿਂ ਉਪ੍ਪਾਦੇਤੀਤਿ ਅਤ੍ਥੋ.
ਯੁਗਨਦ੍ਧਂ ਭਾਵੇਤੀਤਿ ਯੁਗਨਦ੍ਧਂ ਕਤ੍ਵਾ ਭਾਵੇਤਿ. ਤਤ੍ਥ ਤੇਨੇਵ ਚਿਤ੍ਤੇਨ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਤੇਨੇਵ ਸਙ੍ਖਾਰੇ ਸਮ੍ਮਸਿਤੁਂ ਨ ਸਕ੍ਕਾ. ਅਯਂ ਪਨ ਯਾਵਤਾ ਸਮਾਪਤ੍ਤਿਯੋ ਸਮਾਪਜ੍ਜਤਿ, ਤਾਵਤਾ ਸਙ੍ਖਾਰੇ ਸਮ੍ਮਸਤਿ. ਯਾਵਤਾ ਸਙ੍ਖਾਰੇ ਸਮ੍ਮਸਤਿ, ਤਾਵਤਾ ਸਮਾਪਤ੍ਤਿਯੋ ਸਮਾਪਜ੍ਜਤਿ. ਕਥਂ? ਪਠਮਜ੍ਝਾਨਂ ਸਮਾਪਜ੍ਜਤਿ, ਤਤੋ ਵੁਟ੍ਠਾਯ ਸਙ੍ਖਾਰੇ ਸਮ੍ਮਸਤਿ, ਸਙ੍ਖਾਰੇ ਸਮ੍ਮਸਿਤ੍ਵਾ ਦੁਤਿਯਜ੍ਝਾਨਂ ਸਮਾਪਜ੍ਜਤਿ. ਤਤੋ ਵੁਟ੍ਠਾਯ ਪੁਨ ਸਙ੍ਖਾਰੇ ਸਮ੍ਮਸਤਿ. ਸਙ੍ਖਾਰੇ ਸਮ੍ਮਸਿਤ੍ਵਾ ਤਤਿਯਜ੍ਝਾਨਂ…ਪੇ… ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਂ ਸਮਾਪਜ੍ਜਤਿ, ਤਤੋ ਵੁਟ੍ਠਾਯ ਸਙ੍ਖਾਰੇ ਸਮ੍ਮਸਤਿ. ਏਵਮਯਂ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ ਨਾਮ.
ਧਮ੍ਮੁਦ੍ਧਚ੍ਚਵਿਗ੍ਗਹਿਤਨ੍ਤਿ ਸਮਥਵਿਪਸ੍ਸਨਾਧਮ੍ਮੇਸੁ ਦਸਵਿਪਸ੍ਸਨੁਪਕ੍ਕਿਲੇਸਸਙ੍ਖਾਤੇਨ ਉਦ੍ਧਚ੍ਚੇਨ ਵਿਗ੍ਗਹਿਤਂ, ਸੁਗ੍ਗਹਿਤਨ੍ਤਿ ਅਤ੍ਥੋ. ਸੋ, ਆਵੁਸੋ, ਸਮਯੋਤਿ ਇਮਿਨਾ ਸਤ੍ਤਨ੍ਨਂ ਸਪ੍ਪਾਯਾਨਂ ਪਟਿਲਾਭਕਾਲੋ ਕਥਿਤੋ. ਯਂ ਤਂ ਚਿਤ੍ਤਨ੍ਤਿ ਯਸ੍ਮਿਂ ਸਮਯੇ ਤਂ ਵਿਪਸ੍ਸਨਾਵੀਥਿਂ ਓਕ੍ਕਮਿਤ੍ਵਾ ਪਵਤ੍ਤਂ ਚਿਤ੍ਤਂ. ਅਜ੍ਝਤ੍ਤਮੇਵ ਸਨ੍ਤਿਟ੍ਠਤੀਤਿ ਵਿਪਸ੍ਸਨਾਵੀਥਿਂ ਪਚ੍ਚੋਤ੍ਥਰਿਤ੍ਵਾ ਤਸ੍ਮਿਂਯੇਵ ਗੋਚਰਜ੍ਝਤ੍ਤਸਙ੍ਖਾਤੇ ਆਰਮ੍ਮਣੇ ਸਨ੍ਤਿਟ੍ਠਤਿ. ਸਨ੍ਨਿਸੀਦਤੀਤਿ ਆਰਮ੍ਮਣਵਸੇਨ ਸਮ੍ਮਾ ਨਿਸੀਦਤਿ. ਏਕੋਦਿ ਹੋਤੀਤਿ ਏਕਗ੍ਗਂ ਹੋਤਿ. ਸਮਾਧਿਯਤੀਤਿ ਸਮ੍ਮਾ ਆਧਿਯਤਿ ਸੁਟ੍ਠਪਿਤਂ ਹੋਤਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ.
ਪਟਿਪਦਾਵਗ੍ਗੋ ਦੁਤਿਯੋ.
(੧੮) ੩. ਸਞ੍ਚੇਤਨਿਯਵਗ੍ਗੋ
੧. ਚੇਤਨਾਸੁਤ੍ਤਵਣ੍ਣਨਾ
੧੭੧. ਤਤਿਯਸ੍ਸ ਪਠਮੇ ਕਾਯੇਤਿ ਕਾਯਦ੍ਵਾਰੇ, ਕਾਯਵਿਞ੍ਞਤ੍ਤਿਯਾ ਸਤੀਤਿ ਅਤ੍ਥੋ. ਕਾਯਸਞ੍ਚੇਤਨਾਹੇਤੂਤਿਆਦੀਸੁ ਕਾਯਸਞ੍ਚੇਤਨਾ ਨਾਮ ਕਾਯਦ੍ਵਾਰੇ ਚੇਤਨਾ ਪਕਪ੍ਪਨਾ. ਸਾ ਅਟ੍ਠ ਕਾਮਾਵਚਰਕੁਸਲਵਸੇਨ ਅਟ੍ਠਵਿਧਾ, ਅਕੁਸਲਵਸੇਨ ਦ੍ਵਾਦਸਵਿਧਾਤਿ ਵੀਸਤਿਵਿਧਾ. ਤਥਾ ਵਚੀਸਞ੍ਚੇਤਨਾ, ਤਥਾ ਮਨੋਸਞ੍ਚੇਤਨਾ. ਅਪਿਚੇਤ੍ਥ ਨਵ ਮਹਗ੍ਗਤਚੇਤਨਾਪਿ ਲਬ੍ਭਨ੍ਤਿ. ਕਾਯਸਞ੍ਚੇਤਨਾਹੇਤੂਤਿ ਕਾਯਸਞ੍ਚੇਤਨਾਪਚ੍ਚਯਾ. ਉਪ੍ਪਜ੍ਜਤਿ ਅਜ੍ਝਤ੍ਤਂ ਸੁਖਦੁਕ੍ਖਨ੍ਤਿ ਅਟ੍ਠਕੁਸਲਕਮ੍ਮਪਚ੍ਚਯਾ ਨਿਯਕਜ੍ਝਤ੍ਤੇ ਸੁਖਂ ਉਪ੍ਪਜ੍ਜਤਿ, ਦ੍ਵਾਦਸਅਕੁਸਲਕਮ੍ਮਪਚ੍ਚਯਾ ਦੁਕ੍ਖਂ. ਸੇਸਦ੍ਵਾਰੇਸੁਪਿ ਏਸੇਵ ਨਯੋ. ਅਵਿਜ੍ਜਾਪਚ੍ਚਯਾਵਾਤਿ ਅਵਿਜ੍ਜਾਕਾਰਣੇਨੇਵ. ਸਚੇ ਹਿ ਅਵਿਜ੍ਜਾ ਛਾਦਯਮਾਨਾ ਪਚ੍ਚਯੋ ਹੋਤਿ, ਏਵਂ ਸਨ੍ਤੇ ਤੀਸੁ ਦ੍ਵਾਰੇਸੁ ਸੁਖਦੁਕ੍ਖਾਨਂ ਪਚ੍ਚਯਭੂਤਾ ਚੇਤਨਾ ਉਪ੍ਪਜ੍ਜਤਿ. ਇਤਿ ਮੂਲਭੂਤਾਯ ਅਵਿਜ੍ਜਾਯ ਵਸੇਨੇਤਂ ਵੁਤ੍ਤਂ.
ਸਾਮਂ ਵਾਤਿਆਦੀਸੁ ਪਰੇਹਿ ਅਨਾਣਤ੍ਤੋ ਸਯਮੇਵ ਅਭਿਸਙ੍ਖਰੋਨ੍ਤੋ ਸਾਮਂ ਕਾਯਸਙ੍ਖਾਰਂ ਅਭਿਸਙ੍ਖਰੋਤਿ ਨਾਮ. ਯਂ ਪਨ ਪਰੇ ਸਮਾਦਪੇਤ੍ਵਾ ਆਣਾਪੇਤ੍ਵਾ ਕਾਰੇਨ੍ਤਿ, ਤਸ੍ਸ ਤਂ ਕਾਯਸਙ੍ਖਾਰਂ ਪਰੇ ਅਭਿਸਙ੍ਖਰੋਨ੍ਤਿ ਨਾਮ. ਯੋ ਪਨ ਕੁਸਲਂ ਕੁਸਲਨ੍ਤਿ ਅਕੁਸਲਂ ਅਕੁਸਲਨ੍ਤਿ ਕੁਸਲਵਿਪਾਕਂ ਕੁਸਲਵਿਪਾਕੋਤਿ ਅਕੁਸਲਵਿਪਾਕਂ ਅਕੁਸਲਵਿਪਾਕੋਤਿ ਜਾਨਨ੍ਤੋ ਕਾਯਦ੍ਵਾਰੇ ਵੀਸਤਿਵਿਧਂ ਕਾਯਸਙ੍ਖਾਰਂ ਅਭਿਸਙ੍ਖਰੋਤਿ, ਅਯਂ ਸਮ੍ਪਜਾਨੋ ਅਭਿਸਙ੍ਖਰੋਤਿ ਨਾਮ. ਯੋ ਏਵਂ ਅਜਾਨਨ੍ਤੋ ਅਭਿਸਙ੍ਖਰੋਤਿ, ਅਯਂ ਅਸਮ੍ਪਜਾਨੋ ਅਭਿਸਙ੍ਖਰੋਤਿ ਨਾਮ. ਸੇਸਦ੍ਵਾਰੇਸੁਪਿ ਏਸੇਵ ਨਯੋ.
ਤਤ੍ਥ ਅਸਮ੍ਪਜਾਨਕਮ੍ਮਂ ਏਵਂ ਵੇਦਿਤਬ੍ਬਂ – ਦਹਰਦਾਰਕਾ ‘‘ਮਾਤਾਪਿਤੂਹਿ ਕਤਂ ਕਰੋਮਾ’’ਤਿ ਚੇਤਿਯਂ ਵਨ੍ਦਨ੍ਤਿ, ਪੁਪ੍ਫਪੂਜਂ ਕਰੋਨ੍ਤਿ, ਭਿਕ੍ਖੁਸਙ੍ਘਂ ਵਨ੍ਦਨ੍ਤਿ, ਤੇਸਂ ਕੁਸਲਨ੍ਤਿ ਅਜਾਨਨ੍ਤਾਨਮ੍ਪਿ ਤਂ ਕੁਸਲਮੇਵ ਹੋਤਿ. ਤਥਾ ਮਿਗਪਕ੍ਖਿਆਦਯੋ ਤਿਰਚ੍ਛਾਨਾ ਧਮ੍ਮਂ ਸੁਣਨ੍ਤਿ, ਸਙ੍ਘਂ ਵਨ੍ਦਨ੍ਤਿ, ਚੇਤਿਯਂ ਵਨ੍ਦਨ੍ਤਿ, ਤੇਸਂ ਜਾਨਨ੍ਤਾਨਮ੍ਪਿ ਅਜਾਨਨ੍ਤਾਨਮ੍ਪਿ ਤਂ ਕੁਸਲਮੇਵ ਹੋਤਿ. ਦਹਰਦਾਰਕਾ ਪਨ ਮਾਤਾਪਿਤਰੋ ਹਤ੍ਥਪਾਦੇਹਿ ਪਹਰਨ੍ਤਿ, ਭਿਕ੍ਖੂਨਂ ਤਲਸਤ੍ਤਿਕਂ ਉਗ੍ਗਿਰਨ੍ਤਿ, ਦਣ੍ਡਂ ਖਿਪਨ੍ਤਿ, ਅਕ੍ਕੋਸਨ੍ਤਿ. ਗਾਵਿਯੋ ਭਿਕ੍ਖੁਸਙ੍ਘਂ ਅਨੁਬਨ੍ਧਨ੍ਤਿ, ਸੁਨਖਾ ਅਨੁਬਨ੍ਧਨ੍ਤਿ, ਡਂਸਨ੍ਤਿ, ਸੀਹਬ੍ਯਗ੍ਘਾਦਯੋ ਅਨੁਬਨ੍ਧਨ੍ਤਿ, ਜੀਵਿਤਾ ਵੋਰੋਪੇਨ੍ਤਿ. ਤੇਸਂ ਜਾਨਨ੍ਤਾਨਮ੍ਪਿ ਅਜਾਨਨ੍ਤਾਨਮ੍ਪਿ ਅਕੁਸਲਕਮ੍ਮਂ ਹੋਤੀਤਿ ਵੇਦਿਤਬ੍ਬਂ.
ਇਦਾਨਿ ਤੀਸੁਪਿ ਦ੍ਵਾਰੇਸੁ ਆਯੂਹਨਚੇਤਨਾ ਸਮੋਧਾਨੇਤਬ੍ਬਾ. ਸੇਯ੍ਯਥਿਦਂ – ਕਾਯਦ੍ਵਾਰੇ ਸਯਂਕਤਮੂਲਿਕਾ ਵੀਸਤਿ ਚੇਤਨਾ, ਆਣਤ੍ਤਿਮੂਲਿਕਾ ਵੀਸਤਿ, ਸਮ੍ਪਜਾਨਮੂਲਿਕਾ ਵੀਸਤਿ, ਅਸਮ੍ਪਜਾਨਮੂਲਿਕਾ ਵੀਸਤੀਤਿ ਅਸੀਤਿ ਚੇਤਨਾ ਹੋਨ੍ਤਿ, ਤਥਾ ਵਚੀਦ੍ਵਾਰੇ. ਮਨੋਦ੍ਵਾਰੇ ਪਨ ਏਕੇਕਸ੍ਮਿਮ੍ਪਿ ਵਿਕਪ੍ਪੇ ਏਕੂਨਤਿਂਸ ਕਤ੍ਵਾ ਸਤਞ੍ਚ ਸੋਲ਼ਸ ਚ ਹੋਨ੍ਤਿ. ਇਤਿ ਸਬ੍ਬਾਪਿ ਤੀਸੁ ਦ੍ਵਾਰੇਸੁ ਦ੍ਵੇ ਸਤਾਨਿ ਛਸਤ੍ਤਤਿ ਚ ਚੇਤਨਾ. ਤਾ ਸਬ੍ਬਾਪਿ ਸਙ੍ਖਾਰਕ੍ਖਨ੍ਧੋਤੇਵ ਸਙ੍ਖਂ ਗਚ੍ਛਨ੍ਤਿ, ਤਂਸਮ੍ਪਯੁਤ੍ਤੋ ਵੇਦਯਿਤਾਕਾਰੋ ਵੇਦਨਾਕ੍ਖਨ੍ਧੋ, ਸਞ੍ਜਾਨਨਾਕਾਰੋ ਸਞ੍ਞਾਕ੍ਖਨ੍ਧੋ, ਚਿਤ੍ਤਂ ਵਿਞ੍ਞਾਣਕ੍ਖਨ੍ਧੋ, ਕਾਯੋ ਉਪਾਦਾਰੂਪਂ, ਤਸ੍ਸ ਪਚ੍ਚਯਾ ਚਤਸ੍ਸੋ ਧਾਤੁਯੋ ਚਤ੍ਤਾਰਿ ਭੂਤਾਨੀਤਿ ਇਮੇ ਪਞ੍ਚਕ੍ਖਨ੍ਧਾ ਦੁਕ੍ਖਸਚ੍ਚਂ ਨਾਮ.
ਇਮੇਸੁ, ਭਿਕ੍ਖਵੇ, ਧਮ੍ਮੇਸੁ ਅਵਿਜ੍ਜਾ ਅਨੁਪਤਿਤਾਤਿ ਇਮੇਸੁ ਵੁਤ੍ਤਪ੍ਪਭੇਦੇਸੁ ਚੇਤਨਾਧਮ੍ਮੇਸੁ ਅਵਿਜ੍ਜਾ ਸਹਜਾਤਵਸੇਨ ਚ ਉਪਨਿਸ੍ਸਯਵਸੇਨ ਚ ਅਨੁਪਤਿਤਾ. ਏਵਂ ਵਟ੍ਟਞ੍ਚੇਵ ਵਟ੍ਟਮੂਲਿਕਾ ਚ ਅਵਿਜ੍ਜਾ ਦਸ੍ਸਿਤਾ ਹੋਤਿ.
ਏਤ੍ਤਾਵਤਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਤ੍ਤਸ੍ਸ ਖੀਣਾਸਵਸ੍ਸ ਇਦਾਨਿ ਥੁਤਿਂ ਕਰੋਨ੍ਤੋ ਅਵਿਜ੍ਜਾਯਤ੍ਵੇਵ ਅਸੇਸਵਿਰਾਗਨਿਰੋਧਾਤਿਆਦਿਮਾਹ. ਤਤ੍ਥ ਅਸੇਸਵਿਰਾਗਨਿਰੋਧਾਤਿ ਅਸੇਸਵਿਰਾਗੇਨ ਚੇਵ ਅਸੇਸਨਿਰੋਧੇਨ ਚ. ਸੋ ਕਾਯੋ ਨ ਹੋਤੀਤਿ ਖੀਣਾਸਵਸ੍ਸ ਕਾਯੇਨ ਕਰਣਕਮ੍ਮਂ ਪਞ੍ਞਾਯਤਿ, ਚੇਤਿਯਙ੍ਗਣਸਮ੍ਮਜ੍ਜਨਂ ਬੋਧਿਯਙ੍ਗਣਸਮ੍ਮਜ੍ਜਨਂ ਅਭਿਕ੍ਕਮਨਂ ਪਟਿਕ੍ਕਮਨਂ ਵਤ੍ਤਾਨੁਵਤ੍ਤਕਰਣਨ੍ਤਿ ਏਵਮਾਦਿ. ਕਾਯਦ੍ਵਾਰੇ ਪਨਸ੍ਸ ਵੀਸਤਿ ਚੇਤਨਾ ਅਵਿਪਾਕਧਮ੍ਮਤਂ ਆਪਜ੍ਜਨ੍ਤਿ. ਤੇਨ ਵੁਤ੍ਤਂ – ‘‘ਸੋ ਕਾਯੋ ਨ ਹੋਤਿ, ਯਂ ਪਚ੍ਚਯਾਸ੍ਸ ਤਂ ਉਪ੍ਪਜ੍ਜਤਿ ਅਜ੍ਝਤ੍ਤਂ ਸੁਖਦੁਕ੍ਖ’’ਨ੍ਤਿ. ਕਾਯਦ੍ਵਾਰਪ੍ਪਵਤ੍ਤਾ ਹਿ ਚੇਤਨਾ ਇਧ ਕਾਯੋਤਿ ਅਧਿਪ੍ਪੇਤਾ. ਸੇਸਦ੍ਵਯੇਪਿ ਏਸੇਵ ਨਯੋ. ਖੇਤ੍ਤਨ੍ਤਿਆਦੀਨਿਪਿ ਕੁਸਲਾਕੁਸਲਕਮ੍ਮਸ੍ਸੇਵ ਨਾਮਾਨਿ. ਤਞ੍ਹਿ ਵਿਪਾਕਸ੍ਸ ਵਿਰੁਹਨਟ੍ਠਾਨਟ੍ਠੇਨ ਖੇਤ੍ਤਂ, ਪਤਿਟ੍ਠਾਨਟ੍ਠੇਨ ਵਤ੍ਥੁ, ਕਾਰਣਟ੍ਠੇਨ ਆਯਤਨਂ, ਅਧਿਕਰਣਟ੍ਠੇਨ ਅਧਿਕਰਣਨ੍ਤਿ ਵੁਚ੍ਚਤਿ.
ਇਤਿ ਸਤ੍ਥਾ ਏਤ੍ਤਕੇਨ ਠਾਨੇਨ ਤੀਹਿ ਦ੍ਵਾਰੇਹਿ ਆਯੂਹਿਤਕਮ੍ਮਂ ਦਸ੍ਸੇਤ੍ਵਾ ਇਦਾਨਿ ਤਸ੍ਸ ਕਮ੍ਮਸ੍ਸ ਵਿਪਚ੍ਚਨਟ੍ਠਾਨਂ ਦਸ੍ਸੇਤੁਂ ਚਤ੍ਤਾਰੋਮੇ ਭਿਕ੍ਖਵੇਤਿਆਦਿਮਾਹ. ਤਤ੍ਥ ਅਤ੍ਤਭਾਵਪ੍ਪਟਿਲਾਭਾਤਿ ਪਟਿਲਦ੍ਧਅਤ੍ਤਭਾਵਾ. ਅਤ੍ਤਸਞ੍ਚੇਤਨਾ ਕਮਤੀਤਿ ਅਤ੍ਤਨਾ ਪਕਪ੍ਪਿਤਚੇਤਨਾ ਵਹਤਿ ਪਵਤ੍ਤਤਿ.
ਅਤ੍ਤਸਞ੍ਚੇਤਨਾਹੇਤੁ ਤੇਸਂ ਸਤ੍ਤਾਨਂ ਤਮ੍ਹਾ ਕਾਯਾ ਚੁਤਿ ਹੋਤੀਤਿਆਦੀਸੁ ਖਿਡ੍ਡਾਪਦੋਸਿਕਾ ਦੇਵਾ ਅਤ੍ਤਸਞ੍ਚੇਤਨਾਹੇਤੁ ਚਵਨ੍ਤਿ. ਤੇਸਞ੍ਹਿ ਨਨ੍ਦਨਵਨਚਿਤ੍ਤਲਤਾਵਨਫਾਰੁਸਕਵਨਾਦੀਸੁ ਦਿਬ੍ਬਰਤਿਸਮਪ੍ਪਿਤਾਨਂ ਕੀਲ਼ਨ੍ਤਾਨਂ ਪਾਨਭੋਜਨੇ ਸਤਿ ਸਮ੍ਮੁਸ੍ਸਤਿ, ਤੇ ਆਹਾਰੁਪਚ੍ਛੇਦੇਨ ਆਤਪੇ ਖਿਤ੍ਤਮਾਲਾ ਵਿਯ ਮਿਲਾਯਨ੍ਤਿ. ਮਨੋਪਦੋਸਿਕਾ ਦੇਵਾ ਪਰਸਞ੍ਚੇਤਨਾਹੇਤੁ ਚਵਨ੍ਤਿ, ਏਤੇ ਚਾਤੁਮਹਾਰਾਜਿਕਾ ਦੇਵਾ. ਤੇਸੁ ਕਿਰ ਏਕੋ ਦੇਵਪੁਤ੍ਤੋ ‘‘ਨਕ੍ਖਤ੍ਤਂ ਕੀਲ਼ਿਸ੍ਸਾਮੀ’’ਤਿ ਸਪਰਿਵਾਰੋ ਰਥੇਨ ਵੀਥਿਂ ਪਟਿਪਜ੍ਜਤਿ. ਅਥਞ੍ਞੋ ਨਿਕ੍ਖਮਨ੍ਤੋ ਤਂ ਪੁਰਤੋ ਗਚ੍ਛਨ੍ਤਂ ਦਿਸ੍ਵਾ ‘‘ਕਿਂ, ਭੋ, ਅਯਂ ਕਪਣੋ ਅਦਿਟ੍ਠਪੁਬ੍ਬਂ ਵਿਯ ਏਤਂ ਦਿਸ੍ਵਾ ਪੀਤਿਯਾ ਉਦ੍ਧੁਮਾਤੋ ਵਿਯ ਗਜ੍ਜਮਾਨੋ ਵਿਯ ਚ ਗਚ੍ਛਤੀ’’ਤਿ ਕੁਜ੍ਝਤਿ. ਪੁਰਤੋ ਗਚ੍ਛਨ੍ਤੋਪਿ ਨਿਵਤ੍ਤਿਤ੍ਵਾ ਤਂ ਕੁਦ੍ਧਂ ਦਿਸ੍ਵਾ ਕੁਦ੍ਧਾ ਨਾਮ ਸੁਵਿਜਾਨਾ ਹੋਨ੍ਤੀਤਿ ਕੁਦ੍ਧਭਾਵਮਸ੍ਸ ਞਤ੍ਵਾ ‘‘ਤ੍ਵਂ ਕੁਦ੍ਧੋ ਮਯ੍ਹਂ ਕਿਂ ਕਰਿਸ੍ਸਸਿ, ਅਯਂ ਸਮ੍ਪਤ੍ਤਿ ਮਯਾ ਦਾਨਸੀਲਾਦੀਨਂ ਵਸੇਨ ਲਦ੍ਧਾ, ਨ ਤੁਯ੍ਹਂ ਵਸੇਨਾ’’ਤਿ ਪਟਿਕੁਜ੍ਝਤਿ. ਏਕਸ੍ਮਿਞ੍ਹਿ ਕੁਦ੍ਧੇ ਇਤਰੋ ਅਕੁਦ੍ਧੋ ਰਕ੍ਖਤਿ, ਉਭੋਸੁ ਪਨ ਕੁਦ੍ਧੇਸੁ ਏਕਸ੍ਸ ਕੋਧੋ ਇਤਰਸ੍ਸ ਪਚ੍ਚਯੋ ਹੋਤਿ, ਤਸ੍ਸਪਿ ਕੋਧੋ ਇਤਰਸ੍ਸ ਪਚ੍ਚਯੋ ਹੋਤੀਤਿ ਉਭੋ ਕਨ੍ਦਨ੍ਤਾਨਂਯੇਵ ਓਰੋਧਾਨਂ ਚਵਨ੍ਤਿ. ਮਨੁਸ੍ਸਾ ਅਤ੍ਤਸਞ੍ਚੇਤਨਾ ਚ ਪਰਸਞ੍ਚੇਤਨਾ ਚ ਹੇਤੁ ਚਵਨ੍ਤਿ, ਅਤ੍ਤਸਞ੍ਚੇਤਨਾਯ ਚ ਪਰਸਞ੍ਚੇਤਨਾਯ ਚ ਹੇਤੁਭੂਤਾਯ ਚਵਨ੍ਤੀਤਿ ਅਤ੍ਥੋ. ਮਨੁਸ੍ਸਾ ਹਿ ਕੁਜ੍ਝਿਤ੍ਵਾ ਅਤ੍ਤਨਾਵ ਅਤ੍ਤਾਨਂ ਹਤ੍ਥੇਹਿਪਿ ਦਣ੍ਡੇਹਿਪਿ ਪਹਰਨ੍ਤਿ, ਰਜ੍ਜੁਬਨ੍ਧਨਾਦੀਹਿਪਿ ਬਨ੍ਧਨ੍ਤਿ, ਅਸਿਨਾਪਿ ਸੀਸਂ ਛਿਨ੍ਦਨ੍ਤਿ, ਵਿਸਮ੍ਪਿ ਖਾਦਨ੍ਤਿ, ਪਪਾਤੇਪਿ ਪਤਨ੍ਤਿ, ਉਦਕਮ੍ਪਿ ਪਵਿਸਨ੍ਤਿ, ਅਗ੍ਗਿਮ੍ਪਿ ਪਵਿਸਨ੍ਤਿ, ਪਰੇਪਿ ਦਣ੍ਡੇਨ ਵਾ ਸਤ੍ਥਨੇ ਵਾ ਪਹਰਿਤ੍ਵਾ ਮਾਰੇਨ੍ਤਿ. ਏਵਂ ਤੇਸੁ ਅਤ੍ਤਸਞ੍ਚੇਤਨਾਪਿ ਪਰਸਞ੍ਚੇਤਨਾਪਿ ਕਮਤਿ.
ਕਤਮੇ ਤੇਨ ਦੇਵਾ ਦਟ੍ਠਬ੍ਬਾਤਿ ਕਤਮੇ ਨਾਮ ਤੇ ਦੇਵਾ ਦਟ੍ਠਬ੍ਬਾਤਿ ਅਤ੍ਥੋ. ਤੇਨ ਵਾ ਅਤ੍ਤਭਾਵੇਨ ਕਤਮੇ ਦੇਵਾ ਦਟ੍ਠਬ੍ਬਾਤਿਪਿ ਅਤ੍ਥੋ. ਕਸ੍ਮਾ ਪਨ ਥੇਰੋ ਇਮਂ ਪਞ੍ਹਂ ਪੁਚ੍ਛਤਿ, ਕਿਂ ਅਤ੍ਤਨਾ ਕਥੇਤੁਂ ਨਪ੍ਪਹੋਤੀਤਿ? ਪਹੋਤਿ, ਇਦਂ ਪਨ ਪਦਂ ਅਤ੍ਤਨੋ ਸਭਾਵੇਨ ਬੁਦ੍ਧਵਿਸਯਂ ਪਞ੍ਹਨ੍ਤਿ ਥੇਰੋ ਨ ਕਥੇਸਿ. ਤੇਨ ਦਟ੍ਠਬ੍ਬਾਤਿ ਤੇਨ ਅਤ੍ਤਭਾਵੇਨ ਦਟ੍ਠਬ੍ਬਾ. ਅਯਂ ਪਨ ਪਞ੍ਹੋ ਹੇਟ੍ਠਾ ਕਾਮਾਵਚਰੇਪਿ ਰੂਪਾਵਚਰੇਪਿ ਲਬ੍ਭਤਿ, ਭਵਗ੍ਗੇਨ ਪਨ ਪਰਿਚ੍ਛਿਨ੍ਦਿਤ੍ਵਾ ਕਥਿਤੋ ਨਿਪ੍ਪਦੇਸੇਨ ਕਥਿਤੋ ਹੋਤੀਤਿ ਭਗਵਤਾ ਏਵਂ ਕਥਿਤੋ.
ਆਗਨ੍ਤਾਰੋ ਇਤ੍ਥਤ੍ਤਨ੍ਤਿ ਇਤ੍ਥਭਾਵਂ ਕਾਮਾਵਚਰਪਞ੍ਚਕ੍ਖਨ੍ਧਭਾਵਮੇਵ ਆਗਨ੍ਤਾਰੋ, ਨੇਵ ਤਤ੍ਰੂਪਪਤ੍ਤਿਕਾ ਨ ਉਪਰੂਪਪਤ੍ਤਿਕਾ ਹੋਨ੍ਤਿ. ਅਨਾਗਨ੍ਤਾਰੋ ਇਤ੍ਥਤ੍ਤਨ੍ਤਿ ਇਮਂ ਖਨ੍ਧਪਞ੍ਚਕਂ ਅਨਾਗਨ੍ਤਾਰੋ, ਹੇਟ੍ਠੂਪਪਤ੍ਤਿਕਾ ਨ ਹੋਨ੍ਤਿ, ਤਤ੍ਰੂਪਪਤ੍ਤਿਕਾ ਵਾ ਉਪਰੂਪਪਤ੍ਤਿਕਾ ਵਾ ਤਤ੍ਥੇਵ ਵਾ ਪਰਿਨਿਬ੍ਬਾਯਿਨੋ ਹੋਨ੍ਤੀਤਿ ਅਤ੍ਥੋ. ਏਤ੍ਥ ਚ ਹੇਟ੍ਠਿਮਭਵੇ ਨਿਬ੍ਬਤ੍ਤਾਨਂ ਵਸੇਨ ਉਪਰੂਪਪਤ੍ਤਿਕਾ ਵੇਦਿਤਬ੍ਬਾ. ਭਵਗ੍ਗੇ ਪਨੇਤਂ ਨਤ੍ਥਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
੨. ਵਿਭਤ੍ਤਿਸੁਤ੍ਤਵਣ੍ਣਨਾ
੧੭੨. ਦੁਤਿਯੇ ਅਤ੍ਥਪਟਿਸਮ੍ਭਿਦਾਤਿ ਪਞ੍ਚਸੁ ਅਤ੍ਥੇਸੁ ਪਭੇਦਗਤਂ ਞਾਣਂ. ਓਧਿਸੋਤਿ ਕਾਰਣਸੋ. ਬ੍ਯਞ੍ਜਨਸੋਤਿ ਅਕ੍ਖਰਸੋ. ਅਨੇਕਪਰਿਯਾਯੇਨਾਤਿ ਅਨੇਕੇਹਿ ਕਾਰਣੇਹਿ. ਆਚਿਕ੍ਖਾਮੀਤਿ ਕਥੇਮਿ. ਦੇਸੇਮੀਤਿ ਪਾਕਟਂ ਕਤ੍ਵਾ ਕਥੇਮਿ. ਪਞ੍ਞਾਪੇਮੀਤਿ ਜਾਨਾਪੇਮਿ. ਪਟ੍ਠਪੇਮੀਤਿ ਪਟ੍ਠਪੇਤ੍ਵਾ ਪਵਤ੍ਤੇਤ੍ਵਾ ਕਥੇਮਿ. ਵਿਵਰਾਮੀਤਿ ਵਿਵਟਂ ਕਤ੍ਵਾ ਕਥੇਮਿ. ਵਿਭਜਾਮੀਤਿ ਵਿਭਜਿਤ੍ਵਾ ਕਥੇਮਿ. ਉਤ੍ਤਾਨੀਕਰੋਮੀਤਿ ਗਮ੍ਭੀਰਂ ਉਤ੍ਤਾਨਕਂ ਕਤ੍ਵਾ ਕਥੇਮਿ. ਸੋ ਮਂ ਪਞ੍ਹੇਨਾਤਿ ਸੋ ਮਂ ਪਞ੍ਹੇਨ ਉਪਗਚ੍ਛਤੁ. ਅਹਂ ਵੇਯ੍ਯਾਕਰਣੇਨਾਤਿ ਅਹਮਸ੍ਸ ਪਞ੍ਹਕਥਨੇਨ ਚਿਤ੍ਤਂ ਆਰਾਧੇਸ੍ਸਾਮਿ. ਯੋ ਨੋ ਧਮ੍ਮਾਨਂ ਸੁਕੁਸਲੋਤਿ ਯੋ ਅਮ੍ਹਾਕਂ ਅਧਿਗਤਧਮ੍ਮਾਨਂ ਸੁਕੁਸਲੋ ਸਤ੍ਥਾ, ਸੋ ਏਸ ਸਮ੍ਮੁਖੀਭੂਤੋ. ਯਦਿ ਮਯਾ ਅਤ੍ਥਪਟਿਸਮ੍ਭਿਦਾ ਨ ਸਚ੍ਛਿਕਤਾ, ‘‘ਸਚ੍ਛਿਕਰੋਹਿ ਤਾਵ ਸਾਰਿਪੁਤ੍ਤਾ’’ਤਿ ਵਤ੍ਵਾ ਮਂ ਪਟਿਬਾਹਿਸ੍ਸਤੀਤਿ ਸਤ੍ਥੁ ਪੁਰਤੋ ਨਿਸਿਨ੍ਨਕੋਵ ਸੀਹਨਾਦਂ ਨਦਤਿ. ਇਮਿਨਾ ਉਪਾਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਇਮਾਸੁ ਚ ਪਨ ਪਟਿਸਮ੍ਭਿਦਾਸੁ ਤਿਸ੍ਸੋ ਪਟਿਸਮ੍ਭਿਦਾ ਲੋਕਿਯਾ, ਅਤ੍ਥਪਟਿਸਮ੍ਭਿਦਾ ਲੋਕਿਯਲੋਕੁਤ੍ਤਰਾਤਿ.
੩. ਮਹਾਕੋਟ੍ਠਿਕਸੁਤ੍ਤਵਣ੍ਣਨਾ
੧੭੩. ਤਤਿਯੇ ਫਸ੍ਸਾਯਤਨਾਨਨ੍ਤਿ ਫਸ੍ਸਾਕਰਾਨਂ, ਫਸ੍ਸਸ੍ਸ ਉਪ੍ਪਤ੍ਤਿਟ੍ਠਾਨਾਨਨ੍ਤਿ ਅਤ੍ਥੋ. ਅਤ੍ਥਞ੍ਞਂ ਕਿਞ੍ਚੀਤਿ ਏਤੇਸੁ ਅਸੇਸਤੋ ਨਿਰੁਦ੍ਧੇਸੁ ਤਤੋ ਪਰਂ ਕੋਚਿ ਅਪ੍ਪਮਤ੍ਤਕੋਪਿ ਕਿਲੇਸੋ ਅਤ੍ਥੀਤਿ ਪੁਚ੍ਛਤਿ. ਨਤ੍ਥਞ੍ਞਂ ਕਿਞ੍ਚੀਤਿ ਇਧਾਪਿ ‘‘ਅਪ੍ਪਮਤ੍ਤਕੋਪਿ ਕਿਲੇਸੋ ਨਤ੍ਥੀ’’ਤਿ ਪੁਚ੍ਛਤਿ. ਸੇਸਦ੍ਵਯੇਪਿ ਏਸੇਵ ਨਯੋ. ਇਮੇ ਪਨ ਚਤ੍ਤਾਰੋਪਿ ਪਞ੍ਹੇ ਸਸ੍ਸਤੁਚ੍ਛੇਦਏਕਚ੍ਚਸਸ੍ਸਤਅਮਰਾਵਿਕ੍ਖੇਪਵਸੇਨ ਪੁਚ੍ਛਤਿ. ਤੇਨਸ੍ਸ ਥੇਰੋ ਪੁਚ੍ਛਿਤਪੁਚ੍ਛਿਤਂ ਪਟਿਬਾਹਨ੍ਤੋ ਮਾ ਹੇਵਨ੍ਤਿ ਆਹ. ਏਤ੍ਥ ਹਿਇਤਿ ਨਿਪਾਤਮਤ੍ਤਂ, ਏਵਂ ਮਾ ਭਣੀਤਿ ਅਤ੍ਥੋ. ਅਤ੍ਤੂਪਲਦ੍ਧਿਵਸੇਨੇਵ ‘‘ਅਤ੍ਥਞ੍ਞਂ ਕਿਞ੍ਚਿ ਅਞ੍ਞੋ ਕੋਚਿ ਅਤ੍ਤਾ ਨਾਮ ਅਤ੍ਥੀ’’ਤਿ ਸਸ੍ਸਤਾਦਿਆਕਾਰੇਨ ਪੁਚ੍ਛਤਿ. ਕਿਂ ਪਨੇਸ ਅਤ੍ਤੂਪਲਦ੍ਧਿਕੋਤਿ? ਨ ਅਤ੍ਤੂਪਲਦ੍ਧਿਕੋ. ਏਵਂਲਦ੍ਧਿਕੋ ਪਨ ਤਤ੍ਥੇਕੋ ਭਿਕ੍ਖੁ ਨਿਸਿਨ੍ਨੋ, ਸੋ ਪੁਚ੍ਛਿਤੁਂ ਨ ਸਕ੍ਕੋਤਿ. ਤਸ੍ਸ ਲਦ੍ਧਿਂ ਵਿਸ੍ਸਜ੍ਜਾਪਨਤ੍ਥਂ ਏਵਂ ਪੁਚ੍ਛਤਿ. ਯੇਪਿ ਚ ਅਨਾਗਤੇ ਏਵਂਲਦ੍ਧਿਕਾ ਭਵਿਸ੍ਸਨ੍ਤਿ, ਤੇਸਂ ‘‘ਬੁਦ੍ਧਕਾਲੇਪੇਸੋ ਪਞ੍ਹੋ ਮਹਾਸਾਵਕੇਹਿ ਵਿਸ੍ਸਜ੍ਜਿਤੋ’’ਤਿ ਵਚਨੋਕਾਸੁਪਚ੍ਛੇਦਨਤ੍ਥਂ ਪੁਚ੍ਛਤਿਯੇਵ.
ਅਪ੍ਪਪਞ੍ਚਂ ਪਪਞ੍ਚੇਤੀਤਿ ਨ ਪਪਞ੍ਚੇਤਬ੍ਬਟ੍ਠਾਨੇ ਪਪਞ੍ਚਂ ਕਰੋਤਿ, ਅਨਾਚਰਿਤਬ੍ਬਂ ਮਗ੍ਗਂ ਚਰਤਿ. ਤਾਵਤਾ ਪਪਞ੍ਚਸ੍ਸ ਗਤੀਤਿ ਯਤ੍ਤਕਾ ਛਨ੍ਨਂ ਫਸ੍ਸਾਯਤਨਾਨਂ ਗਤਿ, ਤਤ੍ਤਕਾਵ ਤਣ੍ਹਾਦਿਟ੍ਠਿਮਾਨਪ੍ਪਭੇਦਸ੍ਸ ਪਪਞ੍ਚਸ੍ਸ ਗਤਿ. ਛਨ੍ਨਂ, ਆਵੁਸੋ, ਫਸ੍ਸਾਯਤਨਾਨਂ ਅਸੇਸਵਿਰਾਗਨਿਰੋਧਾ ਪਪਞ੍ਚਨਿਰੋਧੋ ਪਪਞ੍ਚਵੂਪਸਮੋਤਿ ਏਤੇਸੁ ਛਸੁ ਆਯਤਨੇਸੁ ਸਬ੍ਬਸੋ ਨਿਰੁਦ੍ਧੇਸੁ ਪਪਞ੍ਚਾਪਿ ਨਿਰੁਦ੍ਧਾਵ ਹੋਨ੍ਤਿ, ਵੂਪਸਨ੍ਤਾਵ ਹੋਨ੍ਤੀਤਿ ਅਤ੍ਥੋ. ਆਰੁਪ੍ਪੇ ਪਨ ਪੁਥੁਜ੍ਜਨਦੇਵਤਾਨਂ ਕਿਞ੍ਚਾਪਿ ਪਞ੍ਚ ਫਸ੍ਸਾਯਤਨਾਨਿ ਨਿਰੁਦ੍ਧਾਨਿ, ਛਟ੍ਠਸ੍ਸ ਪਨ ਅਨਿਰੁਦ੍ਧਤ੍ਤਾ ਤਯੋਪਿ ਪਪਞ੍ਚਾ ਅਪ੍ਪਹੀਨਾਵ. ਅਪਿਚ ਪਞ੍ਚਵੋਕਾਰਭਵਵਸੇਨੇਵ ਪਞ੍ਹੋ ਕਥਿਤੋਤਿ. ਚਤੁਤ੍ਥੇ ਇਮਿਨਾਵ ਨਯੇਨ ਅਤ੍ਥੋ ਵੇਦਿਤਬ੍ਬੋ.
੫. ਉਪਵਾਣਸੁਤ੍ਤਵਣ੍ਣਨਾ
੧੭੫-੧੭੬. ਪਞ੍ਚਮੇ ਵਿਜ੍ਜਾਯਨ੍ਤਕਰੋ ਹੋਤੀਤਿ ਵਿਜ੍ਜਾਯ ਵਟ੍ਟਦੁਕ੍ਖਸ੍ਸ ਅਨ੍ਤਕਰੋ ਹੋਤਿ, ਸਕਲਂ ਵਟ੍ਟਦੁਕ੍ਖਂ ਪਰਿਚ੍ਛਿਨ੍ਨਂ ਪਰਿਵਟੁਮਂ ਕਤ੍ਵਾ ਤਿਟ੍ਠਤੀਤਿ. ਸੇਸਪਦੇਸੁਪਿ ਏਸੇਵ ਨਯੋ. ਸਉਪਾਦਾਨੋਤਿ ਸਗਹਣੋਵ ਹੁਤ੍ਵਾ. ਅਨ੍ਤਕਰੋ ਅਭਵਿਸ੍ਸਾਤਿ ਵਟ੍ਟਦੁਕ੍ਖਸ੍ਸ ਅਨ੍ਤਂ ਕਤ੍ਵਾ ਠਿਤੋ ਅਭਵਿਸ੍ਸ. ਚਰਣਸਮ੍ਪਨ੍ਨੋਤਿ ਪਨ੍ਨਰਸਧਮ੍ਮਭੇਦੇਨ ਚਰਣੇਨ ਸਮਨ੍ਨਾਗਤੋ. ਯਥਾਭੂਤਂ ਜਾਨਂ ਪਸ੍ਸਂ ਅਨ੍ਤਕਰੋ ਹੋਤੀਤਿ ਯਥਾਸਭਾਵਂ ਮਗ੍ਗਪਞ੍ਞਾਯ ਜਾਨਿਤ੍ਵਾ ਪਸ੍ਸਿਤ੍ਵਾ ਵਟ੍ਟਦੁਕ੍ਖਸ੍ਸ ਅਨ੍ਤਂ ਕਤ੍ਵਾ ਠਿਤੋ ਨਾਮ ਹੋਤੀਤਿ ਅਰਹਤ੍ਤਨਿਕੂਟੇਨ ਪਞ੍ਹਂ ਨਿਟ੍ਠਪੇਸਿ. ਛਟ੍ਠਂ ਹੇਟ੍ਠਾ ਏਕਕਨਿਪਾਤਵਣ੍ਣਨਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.
੭. ਰਾਹੁਲਸੁਤ੍ਤਵਣ੍ਣਨਾ
੧੭੭. ਸਤ੍ਤਮੇ ਅਜ੍ਝਤ੍ਤਿਕਾਤਿ ਕੇਸਾਦੀਸੁ ਵੀਸਤਿਯਾ ਕੋਟ੍ਠਾਸੇਸੁ ਥਦ੍ਧਾਕਾਰਲਕ੍ਖਣਾ ਪਥਵੀਧਾਤੁ. ਬਾਹਿਰਾਤਿ ਬਹਿਦ੍ਧਾ ਅਨਿਨ੍ਦ੍ਰਿਯਬਦ੍ਧੇਸੁ ਪਾਸਾਣਪਬ੍ਬਤਾਦੀਸੁ ਥਦ੍ਧਾਕਾਰਲਕ੍ਖਣਾ ਪਥਵੀਧਾਤੁ. ਇਮਿਨਾਵ ਨਯੇਨ ਸੇਸਾਪਿ ਧਾਤੁਯੋ ਵੇਦਿਤਬ੍ਬਾ. ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾਤਿ ਇਦਂ ਤਯਂ ਤਣ੍ਹਾਮਾਨਦਿਟ੍ਠਿਗ੍ਗਾਹਪਟਿਕ੍ਖੇਪਵਸੇਨ ਵੁਤ੍ਤਂ. ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬਨ੍ਤਿ ਹੇਤੁਨਾ ਕਾਰਣੇਨ ਮਗ੍ਗਪਞ੍ਞਾਯ ਪਸ੍ਸਿਤਬ੍ਬਂ. ਦਿਸ੍ਵਾਤਿ ਸਹਵਿਪਸ੍ਸਨਾਯ ਮਗ੍ਗਪਞ੍ਞਾਯ ਪਸ੍ਸਿਤ੍ਵਾ. ਅਚ੍ਛੇਚ੍ਛਿ ਤਣ੍ਹਨ੍ਤਿ ਮਗ੍ਗਵਜ੍ਝਤਣ੍ਹਂ ਸਮੂਲਕਂ ਛਿਨ੍ਦਿ. ਵਿਵਤ੍ਤਯਿ ਸਂਯੋਜਨਨ੍ਤਿ ਦਸਵਿਧਮ੍ਪਿ ਸਂਯੋਜਨਂ ਵਿਵਤ੍ਤਯਿ ਉਬ੍ਬਤ੍ਤੇਤ੍ਵਾ ਪਜਹਿ. ਸਮ੍ਮਾ ਮਾਨਾਭਿਸਮਯਾਤਿ ਹੇਤੁਨਾ ਕਾਰਣੇਨ ਨਵਵਿਧਸ੍ਸ ਮਾਨਸ੍ਸ ਪਹਾਨਾਭਿਸਮਯਾ. ਅਨ੍ਤਮਕਾਸਿ ਦੁਕ੍ਖਸ੍ਸਾਤਿ ਵਟ੍ਟਦੁਕ੍ਖਂ ਪਰਿਚ੍ਛਿਨ੍ਨਂ ਪਰਿਵਟੁਮਂ ਅਕਾਸਿ, ਕਤ੍ਵਾ ਠਿਤੋਤਿ ਅਤ੍ਥੋ. ਇਤਿ ਸਤ੍ਥਾਰਾ ਸਂਯੁਤ੍ਤਮਹਾਨਿਕਾਯੇ ਰਾਹੁਲੋਵਾਦੇ (ਸਂ. ਨਿ. ੩.੯੧ ਆਦਯੋ) ਵਿਪਸ੍ਸਨਾ ਕਥਿਤਾ, ਚੂਲ਼ਰਾਹੁਲੋਵਾਦੇਪਿ (ਮ. ਨਿ. ੩.੪੧੬ ਆਦਯੋ) ਵਿਪਸ੍ਸਨਾ ਕਥਿਤਾ, ਅਮ੍ਬਲਟ੍ਠਿਕਰਾਹੁਲੋਵਾਦੇ (ਮ. ਨਿ. ੨.੧੦੭ ਆਦਯੋ) ਦਹਰਸ੍ਸੇਵ ਸਤੋ ਮੁਸਾਵਾਦਾ ਵੇਰਮਣੀ ਕਥਿਤਾ, ਮਹਾਰਾਹੁਲੋਵਾਦੇ (ਮ. ਨਿ. ੨.੧੧੩ ਆਦਯੋ) ਵਿਪਸ੍ਸਨਾ ਕਥਿਤਾ. ਇਮਸ੍ਮਿਂ ਅਙ੍ਗੁਤ੍ਤਰਮਹਾਨਿਕਾਯੇ ਅਯਂ ਚਤੁਕੋਟਿਕਸੁਞ੍ਞਤਾ ਨਾਮ ਕਥਿਤਾਤਿ.
੮. ਜਮ੍ਬਾਲੀਸੁਤ੍ਤਵਣ੍ਣਨਾ
੧੭੮. ਅਟ੍ਠਮੇ ਸਨ੍ਤਂ ਚੇਤੋਵਿਮੁਤ੍ਤਿਨ੍ਤਿ ਅਟ੍ਠਨ੍ਨਂ ਸਮਾਪਤ੍ਤੀਨਂ ਅਞ੍ਞਤਰਂ ਸਮਾਪਤ੍ਤਿਂ. ਸਕ੍ਕਾਯਨਿਰੋਧਨ੍ਤਿ ਤੇਭੂਮਕਵਟ੍ਟਸਙ੍ਖਾਤਸ੍ਸ ਸਕ੍ਕਾਯਸ੍ਸ ਨਿਰੋਧਂ, ਨਿਬ੍ਬਾਨਨ੍ਤਿ ਅਤ੍ਥੋ. ਨ ਪਕ੍ਖਨ੍ਦਤੀਤਿ ਆਰਮ੍ਮਣਵਸੇਨ ਨ ਪਕ੍ਖਨ੍ਦਤਿ. ਸੇਸਪਦੇਸੁਪਿ ਏਸੇਵ ਨਯੋ. ਨ ਪਾਟਿਕਙ੍ਖੋਤਿ ਨ ਪਾਟਿਕਙ੍ਖਿਤਬ੍ਬੋ. ਲੇਪਗਤੇਨਾਤਿ ਲੇਪਮਕ੍ਖਿਤੇਨ.
ਇਮਸ੍ਮਿਞ੍ਚ ਪਨਤ੍ਥੇ ਨਦੀਪਾਰਂ ਗਨ੍ਤੁਕਾਮਪੁਰਿਸੋਪਮ੍ਮਂ ਆਹਰਿਤਬ੍ਬਂ – ਏਕੋ ਕਿਰ ਪੁਰਿਸੋ ਚਣ੍ਡਸੋਤਾਯ ਵਾਲ਼ਮਚ੍ਛਾਕੁਲਾਯ ਨਦਿਯਾ ਪਾਰਂ ਗਨ੍ਤੁਕਾਮੋ ‘‘ਓਰਿਮਂ ਤੀਰਂ ਸਾਸਙ੍ਕਂ ਸਪ੍ਪਟਿਭਯਂ, ਪਾਰਿਮਂ ਤੀਰਂ ਖੇਮਂ ਅਪ੍ਪਟਿਭਯਂ, ਕਿਂ ਨੁ ਖੋ ਕਤ੍ਵਾ ਪਾਰਂ ਗਮਿਸ੍ਸਾਮੀ’’ਤਿ ਪਟਿਪਾਟਿਯਾ ਠਿਤੇ ਅਟ੍ਠ ਕਕੁਧਰੁਕ੍ਖੇ ਦਿਸ੍ਵਾ ‘‘ਸਕ੍ਕਾ ਇਮਾਯ ਰੁਕ੍ਖਪਟਿਪਾਟਿਯਾ ਗਨ੍ਤੁ’’ਨ੍ਤਿ ਮਨਸਿਕਤ੍ਵਾ ‘‘ਕਕੁਧਰੁਕ੍ਖਾ ਨਾਮ ਮਟ੍ਠਸਾਖਾ ਹੋਨ੍ਤਿ, ਸਾਖਾਯ ਹਤ੍ਥਾ ਨ ਸਣ੍ਠਹੇਯ੍ਯੁ’’ਨ੍ਤਿ ਨਿਗ੍ਰੋਧਪਿਲਕ੍ਖਰੁਕ੍ਖਾਦੀਨਂ ਅਞ੍ਞਤਰਸ੍ਸ ਲਾਖਾਯ ਹਤ੍ਥਪਾਦੇ ਮਕ੍ਖੇਤ੍ਵਾ ਦਕ੍ਖਿਣਹਤ੍ਥੇਨ ਏਕਂ ਸਾਖਂ ਗਣ੍ਹਿ. ਹਤ੍ਥੋ ਤਤ੍ਥੇਵ ਲਗਿ. ਪੁਨ ਵਾਮਹਤ੍ਥੇਨ ਦਕ੍ਖਿਣਪਾਦੇਨ ਵਾਮਪਾਦੇਨਾਤਿ ਚਤ੍ਤਾਰੋਪਿ ਹਤ੍ਥਪਾਦਾ ਤਤ੍ਥੇਵ ਲਗਿਂਸੁ. ਸੋ ਅਧੋਸਿਰੋ ਲਮ੍ਬਮਾਨੋ ਉਪਰਿਨਦਿਯਂ ਦੇਵੇ ਵੁਟ੍ਠੇ ਪੁਣ੍ਣਾਯ ਨਦਿਯਾ ਸੋਤੇ ਨਿਮੁਗ੍ਗੋ ਕੁਮ੍ਭੀਲਾਦੀਨਂ ਭਕ੍ਖੋ ਅਹੋਸਿ.
ਤਤ੍ਥ ਨਦੀਸੋਤਂ ਵਿਯ ਸਂਸਾਰਸੋਤਂ ਦਟ੍ਠਬ੍ਬਂ, ਸੋਤਸ੍ਸ ਪਾਰਂ ਗਨ੍ਤੁਕਾਮਪੁਰਿਸੋ ਵਿਯ ਯੋਗਾਵਚਰੋ, ਓਰਿਮਤੀਰਂ ਵਿਯ ਸਕ੍ਕਾਯੋ, ਪਾਰਿਮਤੀਰਂ ਵਿਯ ਨਿਬ੍ਬਾਨਂ, ਪਟਿਪਾਟਿਯਾ ਠਿਤਾ ਅਟ੍ਠ ਕਕੁਧਰੁਕ੍ਖਾ ਵਿਯ ਅਟ੍ਠ ਸਮਾਪਤ੍ਤਿਯੋ, ਲੇਪਮਕ੍ਖਿਤੇਨ ਹਤ੍ਥੇਨ ਸਾਖਾਗਹਣਂ ਵਿਯ ਝਾਨਵਿਪਸ੍ਸਨਾਨਂ ਪਾਰਿਪਨ੍ਥਿਕੇ ਅਸੋਧੇਤ੍ਵਾ ਸਮਾਪਤ੍ਤਿਸਮਾਪਜ੍ਜਨਂ, ਚਤੂਹਿ ਹਤ੍ਥਪਾਦੇਹਿ ਸਾਖਾਯ ਬਦ੍ਧਸ੍ਸ ਓਲਮ੍ਬਨਂ ਵਿਯ ਪਠਮਜ੍ਝਾਨੇ ਨਿਕਨ੍ਤਿਯਾ ਲਗ੍ਗਕਾਲੋ, ਉਪਰਿਸੋਤੇ ਵੁਟ੍ਠਿ ਵਿਯ ਛਸੁ ਦ੍ਵਾਰੇਸੁ ਕਿਲੇਸਾਨਂ ਉਪ੍ਪਨ੍ਨਕਾਲੋ, ਨਦਿਯਾ ਪੁਣ੍ਣਾਯ ਸੋਤੇ ਨਿਮੁਗ੍ਗਸ੍ਸ ਕੁਮ੍ਭੀਲਾਦੀਨਂ ਭਕ੍ਖਭੂਤਕਾਲੋ ਵਿਯ ਸਂਸਾਰਸੋਤੇ ਨਿਮੁਗ੍ਗਸ੍ਸ ਚਤੂਸੁ ਅਪਾਯੇਸੁ ਦੁਕ੍ਖਾਨੁਭਵਨਕਾਲੋ ਵੇਦਿਤਬ੍ਬੋ.
ਸੁਦ੍ਧੇਨ ਹਤ੍ਥੇਨਾਤਿ ਸੁਧੋਤੇਨ ਪਰਿਸੁਦ੍ਧਹਤ੍ਥੇਨ. ਇਮਸ੍ਮਿਮ੍ਪਿ ਅਤ੍ਥੇ ਤਾਦਿਸਮੇਵ ਓਪਮ੍ਮਂ ਕਾਤਬ੍ਬਂ – ਤਥੇਵ ਹਿ ਪਾਰਂ ਗਨ੍ਤੁਕਾਮੋ ਪੁਰਿਸੋ ‘‘ਕਕੁਧਰੁਕ੍ਖਾ ਨਾਮ ਮਟ੍ਠਸਾਖਾ, ਕਿਲਿਟ੍ਠਹਤ੍ਥੇਨ ਗਣ੍ਹਨ੍ਤਸ੍ਸ ਹਤ੍ਥੋ ਪਰਿਗਲੇਯ੍ਯਾ’’ਤਿ ਹਤ੍ਥਪਾਦੇ ਸੁਧੋਤੇ ਕਤ੍ਵਾ ਏਕਂ ਸਾਖਂ ਗਣ੍ਹਿਤ੍ਵਾ ਪਠਮਂ ਰੁਕ੍ਖਂ ਆਰੁਲ਼੍ਹੋ. ਤਤੋ ਓਤਰਿਤ੍ਵਾ ਦੁਤਿਯਂ…ਪੇ… ਤਤੋ ਓਤਰਿਤ੍ਵਾ ਅਟ੍ਠਮਂ, ਅਟ੍ਠਮਰੁਕ੍ਖਤੋ ਓਤਰਿਤ੍ਵਾ ਪਾਰਿਮਤੀਰੇ ਖੇਮਨ੍ਤਭੂਮਿਂ ਗਤੋ.
ਤਤ੍ਥ ‘‘ਇਮੇਹਿ ਰੁਕ੍ਖੇਹਿ ਪਾਰਿਮਤੀਰਂ ਗਮਿਸ੍ਸਾਮੀ’’ਤਿ ਤਸ੍ਸ ਪੁਰਿਸਸ੍ਸ ਚਿਨ੍ਤਿਤਕਾਲੋ ਵਿਯ ਯੋਗਿਨੋ ‘‘ਅਟ੍ਠ ਸਮਾਪਤ੍ਤਿਯੋ ਸਮਾਪਜ੍ਜਿਤ੍ਵਾ ਸਮਾਪਤ੍ਤਿਤੋ ਵੁਟ੍ਠਾਯ ਅਰਹਤ੍ਤਂ ਗਮਿਸ੍ਸਾਮੀ’’ਤਿ ਚਿਨ੍ਤਿਤਕਾਲੋ, ਸੁਦ੍ਧੇਨ ਹਤ੍ਥੇਨ ਸਾਖਾਗਹਣਂ ਵਿਯ ਝਾਨਵਿਪਸ੍ਸਨਾਨਂ ਪਾਰਿਪਨ੍ਥਿਕਧਮ੍ਮੇ ਸੋਧੇਤ੍ਵਾ ਸਮਾਪਤ੍ਤਿਸਮਾਪਜ੍ਜਨਂ. ਤਤ੍ਥ ਪਠਮਰੁਕ੍ਖਾਰੋਹਣਕਾਲੋ ਵਿਯ ਪਠਮਜ੍ਝਾਨਸਮਾਪਤ੍ਤਿਕਾਲੋ, ਪਠਮਰੁਕ੍ਖਤੋ ਓਰੁਯ੍ਹ ਦੁਤਿਯਂ ਆਰੁਲ਼੍ਹਕਾਲੋ ਵਿਯ ਪਠਮਜ੍ਝਾਨੇ ਨਿਕਨ੍ਤਿਯਾ ਅਬਦ੍ਧਸ੍ਸ ਤਤੋ ਵੁਟ੍ਠਾਯ ਦੁਤਿਯਜ੍ਝਾਨਸਮਾਪਨ੍ਨਕਾਲੋ…ਪੇ… ਸਤ੍ਤਮਰੁਕ੍ਖਤੋ ਓਰੁਯ੍ਹ ਅਟ੍ਠਮਂ ਆਰੁਲ਼੍ਹਕਾਲੋ ਵਿਯ ਆਕਿਞ੍ਚਞ੍ਞਾਯਤਨਸਮਾਪਤ੍ਤਿਯਂ ਨਿਕਨ੍ਤਿਯਾ ਅਬਦ੍ਧਸ੍ਸ ਤਤੋ ਵੁਟ੍ਠਾਯ ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਨ੍ਨਕਾਲੋ. ਅਟ੍ਠਮਰੁਕ੍ਖਤੋ ਓਰੁਯ੍ਹ ਪਾਰਿਮਤੀਰਂ ਖੇਮਨ੍ਤਭੂਮਿਂ ਗਤਕਾਲੋ ਵਿਯ ਨੇਵਸਞ੍ਞਾਨਾਸਞ੍ਞਾਯਤਨੇ ਨਿਕਨ੍ਤਿਯਾ ਅਬਦ੍ਧਸ੍ਸ ਸਮਾਪਤ੍ਤਿਤੋ ਵੁਟ੍ਠਾਯ ਸਙ੍ਖਾਰੇ ਸਮ੍ਮਸਿਤ੍ਵਾ ਅਰਹਤ੍ਤਪ੍ਪਤ੍ਤਕਾਲੋ ਵੇਦਿਤਬ੍ਬੋ.
ਅਵਿਜ੍ਜਾਪ੍ਪਭੇਦਂ ਮਨਸਿ ਕਰੋਤੀਤਿ ਅਟ੍ਠਸੁ ਠਾਨੇਸੁ ਅਞ੍ਞਾਣਭੂਤਾਯ ਗਣਬਹਲਮਹਾਅਵਿਜ੍ਜਾਯ ਪਭੇਦਸਙ੍ਖਾਤਂ ਅਰਹਤ੍ਤਂ ਮਨਸਿ ਕਰੋਤਿ. ਨ ਪਕ੍ਖਨ੍ਦਤੀਤਿ ਆਰਮ੍ਮਣਵਸੇਨੇਵ ਨ ਪਕ੍ਖਨ੍ਦਤਿ. ਜਮ੍ਬਾਲੀਤਿ ਗਾਮਤੋ ਨਿਕ੍ਖਨ੍ਤਸ੍ਸ ਮਹਾਉਦਕਸ੍ਸ ਪਤਿਟ੍ਠਾਨਭੂਤੋ ਮਹਾਆਵਾਟੋ. ਅਨੇਕਵਸ੍ਸਗਣਿਕਾਤਿ ਗਾਮਸ੍ਸ ਵਾ ਨਗਰਸ੍ਸ ਵਾ ਉਪ੍ਪਨ੍ਨਕਾਲੇਯੇਵ ਉਪ੍ਪਨ੍ਨਤ੍ਤਾ ਅਨੇਕਾਨਿ ਵਸ੍ਸਗਣਾਨਿ ਉਪ੍ਪਨ੍ਨਾਯ ਏਤਿਸ੍ਸਾਤਿ ਅਨੇਕਵਸ੍ਸਗਣਿਕਾ. ਆਯਮੁਖਾਨੀਤਿ ਚਤਸ੍ਸੋ ਪਵਿਸਨਕਨ੍ਦਰਾ. ਅਪਾਯਮੁਖਾਨੀਤਿ ਅਪਵਾਹਨਚ੍ਛਿਦ੍ਦਾਨਿ. ਨ ਆਲ਼ਿਪ੍ਪਭੇਦੋ ਪਾਟਿਕਙ੍ਖੋਤਿ ਨ ਪਾਲ਼ਿਪ੍ਪਭੇਦੋ ਪਾਟਿਕਙ੍ਖਿਤਬ੍ਬੋ. ਨ ਹਿ ਤਤੋ ਉਦਕਂ ਉਟ੍ਠਾਯ ਪਾਲ਼ਿਂ ਭਿਨ੍ਦਿਤ੍ਵਾ ਕਚਵਰਂ ਗਹੇਤ੍ਵਾ ਮਹਾਸਮੁਦ੍ਦਂ ਪਾਪੁਣਾਤਿ.
ਇਮਸ੍ਸ ਪਨਤ੍ਥਸ੍ਸ ਵਿਭਾਵਨਤ੍ਥਂ ਉਯ੍ਯਾਨਗਵੇਸਕਓਪਮ੍ਮਂ ਆਹਰਿਤਬ੍ਬਂ. ਏਕੋ ਕਿਰ ਨਗਰਵਾਸਿਕੋ ਕੁਲਪੁਤ੍ਤੋ ਉਯ੍ਯਾਨਂ ਗਵੇਸਨ੍ਤੋ ਨਗਰਤੋ ਨਾਤਿਦੂਰੇ ਨਚ੍ਚਾਸਨ੍ਨੇ ਮਹਨ੍ਤਂ ਜਮ੍ਬਾਲਿਂ ਅਦ੍ਦਸ. ਸੋ ‘‘ਇਮਸ੍ਮਿਂ ਠਾਨੇ ਰਮਣੀਯਂ ਉਯ੍ਯਾਨਂ ਭਵਿਸ੍ਸਤੀ’’ਤਿ ਸਲ੍ਲਕ੍ਖੇਤ੍ਵਾ ਕੁਦ੍ਦਾਲਂ ਆਦਾਯ ਚਤ੍ਤਾਰਿਪਿ ਕਨ੍ਦਰਾਨਿ ਪਿਧਾਯ ਅਪਵਾਹਨਚ੍ਛਿਦ੍ਦਾਨਿ ਵਿਵਰਿਤ੍ਵਾ ਅਟ੍ਠਾਸਿ. ਦੇਵੋ ਨ ਸਮ੍ਮਾ ਵਸ੍ਸਿ, ਅਵਸੇਸਉਦਕਂ ਅਪਵਾਹਨਚ੍ਛਿਦ੍ਦੇਨ ਪਰਿਸ੍ਸਵਿਤ੍ਵਾ ਗਤਂ. ਚਮ੍ਮਖਣ੍ਡਪਿਲੋਤਿਕਾਦੀਨਿ ਤਤ੍ਥੇਵ ਪੂਤਿਕਾਨਿ ਜਾਤਾਨਿ, ਪਾਣਕਾ ਸਣ੍ਠਿਤਾ, ਸਮਨ੍ਤਾ ਅਨੁਪਗਮਨੀਯਾ ਜਾਤਾ. ਉਪਗਤਾਨਮ੍ਪਿ ਨਾਸਾਪੁਟੇ ਪਿਧਾਯ ਪਕ੍ਕਮਿਤਬ੍ਬਂ ਹੋਤਿ. ਸੋ ਕਤਿਪਾਹੇਨ ਆਗਨ੍ਤ੍ਵਾ ਪਟਿਕ੍ਕਮ੍ਮ ਠਿਤੋ ਓਲੋਕੇਤ੍ਵਾ ‘‘ਨ ਸਕ੍ਕਾ ਉਪਗਨ੍ਤੁ’’ਨ੍ਤਿ ਪਕ੍ਕਾਮਿ.
ਤਤ੍ਥ ਨਗਰਵਾਸੀ ਕੁਲਪੁਤ੍ਤੋ ਵਿਯ ਯੋਗਾਵਚਰੋ ਦਟ੍ਠਬ੍ਬੋ, ਉਯ੍ਯਾਨਂ ਗਵੇਸਨ੍ਤੇਨ ਗਾਮਦ੍ਵਾਰੇ ਜਮ੍ਬਾਲਿਯਾ ਦਿਟ੍ਠਕਾਲੋ ਵਿਯ ਚਾਤੁਮਹਾਭੂਤਿਕਕਾਯੋ, ਆਯਮੁਖਾਨਂ ਪਿਹਿਤਕਾਲੋ ਵਿਯ ਧਮ੍ਮਸ੍ਸਵਨੋਦਕਸ੍ਸ ਅਲਦ੍ਧਕਾਲੋ, ਅਪਾਯਮੁਖਾਨਂ ਵਿਵਟਕਾਲੋ ਵਿਯ ਛਦ੍ਵਾਰਿਕਸਂਵਰਸ੍ਸ ਵਿਸ੍ਸਟ੍ਠਕਾਲੋ, ਦੇਵਸ੍ਸ ਸਮ੍ਮਾ ਅਵੁਟ੍ਠਕਾਲੋ ਵਿਯ ਸਪ੍ਪਾਯਕਮ੍ਮਟ੍ਠਾਨਸ੍ਸ ਅਲਦ੍ਧਕਾਲੋ, ਅਵਸੇਸਉਦਕਸ੍ਸ ਅਪਾਯਮੁਖੇਹਿ ਪਰਿਸ੍ਸਵਿਤ੍ਵਾ ਗਤਕਾਲੋ ਵਿਯ ਅਬ੍ਭਨ੍ਤਰੇ ਗੁਣਾਨਂ ਪਰਿਹੀਨਕਾਲੋ, ਉਦਕਸ੍ਸ ਉਟ੍ਠਾਯ ਪਾਲ਼ਿਂ ਭਿਨ੍ਦਿਤ੍ਵਾ ਕਚਵਰਂ ਆਦਾਯ ਮਹਾਸਮੁਦ੍ਦਂ ਪਾਪੁਣਿਤੁਂ ਅਸਮਤ੍ਥਕਾਲੋ ਵਿਯ ਅਰਹਤ੍ਤਮਗ੍ਗੇਨ ਅਵਿਜ੍ਜਾਪਾਲ਼ਿਂ ਭਿਨ੍ਦਿਤ੍ਵਾ ਕਿਲੇਸਰਾਸਿਂ ਵਿਧਮਿਤ੍ਵਾ ਨਿਬ੍ਬਾਨਂ ਸਚ੍ਛਿਕਾਤੁਂ ਅਸਮਤ੍ਥਕਾਲੋ, ਚਮ੍ਮਖਣ੍ਡਪਿਲੋਤਿਕਾਦੀਨਂ ਤਤ੍ਥੇਵ ਪੂਤਿਭਾਵੋ ਵਿਯ ਅਬ੍ਭਨ੍ਤਰੇ ਰਾਗਾਦਿਕਿਲੇਸੇਹਿ ਪਰਿਪੂਰਿਤਕਾਲੋ, ਤਸ੍ਸ ਆਗਨ੍ਤ੍ਵਾ ਦਿਸ੍ਵਾ ਵਿਪ੍ਪਟਿਸਾਰਿਨੋ ਗਤਕਾਲੋ ਵਿਯ ਵਟ੍ਟਸਮਙ੍ਗਿਪੁਗ੍ਗਲਸ੍ਸ ਵਟ੍ਟੇ ਅਭਿਰਤਕਾਲੋ ਵੇਦਿਤਬ੍ਬੋ.
ਆਲ਼ਿਪ੍ਪਭੇਦੋ ਪਾਟਿਕਙ੍ਖੋਤਿ ਪਾਲ਼ਿਪ੍ਪਭੇਦੋ ਪਾਟਿਕਙ੍ਖਿਤਬ੍ਬੋ. ਤਤੋ ਹਿ ਉਦਕਂ ਉਟ੍ਠਾਯ ਪਾਲ਼ਿਂ ਭਿਨ੍ਦਿਤ੍ਵਾ ਕਚਵਰਂ ਆਦਾਯ ਮਹਾਸਮੁਦ੍ਦਂ ਪਾਪੁਣਿਤੁਂ ਸਕ੍ਖਿਸ੍ਸਤੀਤਿ ਅਤ੍ਥੋ.
ਇਧਾਪਿ ਤਦੇਵ ਓਪਮ੍ਮਂ ਆਹਰਿਤਬ੍ਬਂ. ਤਤ੍ਥ ਆਯਮੁਖਾਨਂ ਵਿਵਟਕਾਲੋ ਵਿਯ ਸਪ੍ਪਾਯਧਮ੍ਮਸ੍ਸਵਨਸ੍ਸ ਲਦ੍ਧਕਾਲੋ, ਅਪਾਯਮੁਖਾਨਂ ਪਿਹਿਤਕਾਲੋ ਵਿਯ ਛਸੁ ਦ੍ਵਾਰੇਸੁ ਸਂਵਰਸ੍ਸ ਪਚ੍ਚੁਪਟ੍ਠਿਤਕਾਲੋ, ਦੇਵਸ੍ਸ ਸਮ੍ਮਾ ਵੁਟ੍ਠਕਾਲੋ ਵਿਯ ਸਪ੍ਪਾਯਕਮ੍ਮਟ੍ਠਾਨਸ੍ਸ ਲਦ੍ਧਕਾਲੋ, ਉਦਕਸ੍ਸ ਉਟ੍ਠਾਯ ਪਾਲ਼ਿਂ ਭਿਨ੍ਦਿਤ੍ਵਾ ਕਚਵਰਂ ਆਦਾਯ ਮਹਾਸਮੁਦ੍ਦਂ ਪਤ੍ਤਕਾਲੋ ਵਿਯ ਅਰਹਤ੍ਤਮਗ੍ਗੇਨ ਅਵਿਜ੍ਜਂ ਭਿਨ੍ਦਿਤ੍ਵਾ ਅਕੁਸਲਰਾਸਿਂ ਵਿਧਮਿਤ੍ਵਾ ਅਰਹਤ੍ਤਂ ਸਚ੍ਛਿਕਤਕਾਲੋ, ਆਯਮੁਖੇਹਿ ਪਵਿਟ੍ਠੇਨ ਉਦਕੇਨ ਸਰਸ੍ਸ ਪਰਿਪੁਣ੍ਣਕਾਲੋ ਵਿਯ ਅਬ੍ਭਨ੍ਤਰੇ ਲੋਕੁਤ੍ਤਰਧਮ੍ਮੇਹਿ ਪਰਿਪੁਣ੍ਣਕਾਲੋ, ਸਮਨ੍ਤਤੋ ਵਤਿਂ ਕਤ੍ਵਾ ਰੁਕ੍ਖੇ ਰੋਪੇਤ੍ਵਾ ਉਯ੍ਯਾਨਮਜ੍ਝੇ ਪਾਸਾਦਂ ਮਾਪੇਤ੍ਵਾ ਨਾਟਕਾਨਿ ਪਚ੍ਚੁਪਟ੍ਠਪੇਤ੍ਵਾ ਸੁਭੋਜਨਂ ਭੁਞ੍ਜਨ੍ਤਸ੍ਸ ਨਿਸਿਨ੍ਨਕਾਲੋ ਵਿਯ ਧਮ੍ਮਪਾਸਾਦਂ ਆਰੁਯ੍ਹ ਨਿਬ੍ਬਾਨਾਰਮ੍ਮਣਂ ਫਲਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸਿਨ੍ਨਕਾਲੋ ਵੇਦਿਤਬ੍ਬੋ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ. ਦੇਸਨਾ ਪਨ ਲੋਕਿਯਲੋਕੁਤ੍ਤਰਮਿਸ੍ਸਿਕਾ ਕਥਿਤਾਤਿ.
੯. ਨਿਬ੍ਬਾਨਸੁਤ੍ਤਵਣ੍ਣਨਾ
੧੭੯. ਨਵਮੇ ਹਾਨਭਾਗਿਯਾ ਸਞ੍ਞਾਤਿਆਦੀਸੁ ‘‘ਪਠਮਸ੍ਸ ਝਾਨਸ੍ਸ ਲਾਭਿਂ ਕਾਮਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ, ਹਾਨਭਾਗਿਨੀ ਪਞ੍ਞਾ’’ਤਿ (ਵਿਭ. ੭੯੯) ਅਭਿਧਮ੍ਮੇ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ. ਯਥਾਭੂਤਂ ਨਪ੍ਪਜਾਨਨ੍ਤੀਤਿ ਯਥਾਸਭਾਵਤੋ ਮਗ੍ਗਞਾਣੇਨ ਨ ਜਾਨਨ੍ਤਿ.
੧੦. ਮਹਾਪਦੇਸਸੁਤ੍ਤਵਣ੍ਣਨਾ
੧੮੦. ਦਸਮੇ ਭੋਗਨਗਰੇ ਵਿਹਰਤੀਤਿ ਪਰਿਨਿਬ੍ਬਾਨਸਮਯੇ ਚਾਰਿਕਂ ਚਰਨ੍ਤੋ ਤਂ ਨਗਰਂ ਪਤ੍ਵਾ ਤਤ੍ਥ ਵਿਹਰਤਿ. ਆਨਨ੍ਦਚੇਤਿਯੇਤਿ ਆਨਨ੍ਦਯਕ੍ਖਸ੍ਸ ਭਵਨਟ੍ਠਾਨੇ ਪਤਿਟ੍ਠਿਤਵਿਹਾਰੇ. ਮਹਾਪਦੇਸੇਤਿ ਮਹਾਓਕਾਸੇ ਮਹਾਅਪਦੇਸੇ ਵਾ, ਬੁਦ੍ਧਾਦਯੋ ਮਹਨ੍ਤੇ ਮਹਨ੍ਤੇ ਅਪਦਿਸਿਤ੍ਵਾ ਵੁਤ੍ਤਾਨਿ ਮਹਾਕਾਰਣਾਨੀਤਿ ਅਤ੍ਥੋ. ਨੇਵ ਅਭਿਨਨ੍ਦਿਤਬ੍ਬਨ੍ਤਿ ਹਟ੍ਠਤੁਟ੍ਠੇਹਿ ਸਾਧੁਕਾਰਂ ਦਤ੍ਵਾ ਪੁਬ੍ਬੇਵ ਨ ਸੋਤਬ੍ਬਂ. ਏਵਂ ਕਤੇ ਹਿ ਪਚ੍ਛਾ ‘‘ਇਦਂ ਨ ਸਮੇਤੀ’’ਤਿ ਵੁਚ੍ਚਮਾਨੋਪਿ ‘‘ਕਿਂ ਪੁਬ੍ਬੇਵ ਅਯਂ ਧਮ੍ਮੋ, ਇਦਾਨਿ ਨ ਧਮ੍ਮੋ’’ਤਿ ਵਤ੍ਵਾ ਲਦ੍ਧਿਂ ਨ ਵਿਸ੍ਸਜ੍ਜੇਤਿ. ਨਪ੍ਪਟਿਕ੍ਕੋਸਿਤਬ੍ਬਨ੍ਤਿ ‘‘ਕਿਂ ਏਸ ਬਾਲੋ ਵਦਤੀ’’ਤਿ ਏਵਂ ਪੁਬ੍ਬੇਵ ਨ ਵਤ੍ਤਬ੍ਬਂ. ਏਵਂ ਵੁਤ੍ਤੇ ਹਿ ਵਤ੍ਤੁਂ ਯੁਤ੍ਤਮ੍ਪਿ ਨ ਵਕ੍ਖਤਿ. ਤੇਨਾਹ – ਅਨਭਿਨਨ੍ਦਿਤ੍ਵਾ ਅਪ੍ਪਟਿਕ੍ਕੋਸਿਤ੍ਵਾਤਿ. ਪਦਬ੍ਯਞ੍ਜਨਾਨੀਤਿ ਪਦਸਙ੍ਖਾਤਾਨਿ ਬ੍ਯਞ੍ਜਨਾਨਿ. ਸਾਧੁਕਂ ਉਗ੍ਗਹੇਤ੍ਵਾਤਿ ‘‘ਇਮਸ੍ਮਿਂ ਠਾਨੇ ਪਾਲ਼ਿ ਵੁਤ੍ਤਾ, ਇਮਸ੍ਮਿਂ ਠਾਨੇ ਅਤ੍ਥੋ ਵੁਤ੍ਤੋ, ਇਮਸ੍ਮਿਂ ਠਾਨੇ ਅਨੁਸਨ੍ਧਿ ਕਥਿਤਾ, ਇਮਸ੍ਮਿਂ ਠਾਨੇ ਪੁਬ੍ਬਾਪਰਂ ਕਥਿਤ’’ਨ੍ਤਿ ਸੁਟ੍ਠੁ ਗਹੇਤ੍ਵਾ. ਸੁਤ੍ਤੇ ਓਤਾਰੇਤਬ੍ਬਾਨੀਤਿ ਸੁਤ੍ਤੇ ਓਤਰਿਤਬ੍ਬਾਨਿ. ਵਿਨਯੇ ਸਨ੍ਦਸ੍ਸੇਤਬ੍ਬਾਨੀਤਿ ਵਿਨਯੇ ਸਂਸਨ੍ਦੇਤਬ੍ਬਾਨਿ.
ਏਤ੍ਥ ਚ ਸੁਤ੍ਤਨ੍ਤਿ ਵਿਨਯੋ ਵੁਤ੍ਤੋ. ਯਥਾਹ – ‘‘ਕਤ੍ਥ ਪਟਿਕ੍ਖਿਤ੍ਤਂ, ਸਾਵਤ੍ਥਿਯਂ ਸੁਤ੍ਤਵਿਭਙ੍ਗੇ’’ਤਿ (ਚੂਲ਼ਵ. ੪੫੭) ਵਿਨਯੋਤਿ ਖਨ੍ਧਕੋ. ਯਥਾਹ – ‘‘ਵਿਨਯਾਤਿਸਾਰੇ’’ਤਿ. ਏਵਂ ਵਿਨਯਪਿਟਕਮ੍ਪਿ ਨ ਪਰਿਯਾਦਿਯਤਿ. ਉਭਤੋਵਿਭਙ੍ਗਾ ਪਨ ਸੁਤ੍ਤਂ, ਖਨ੍ਧਕਪਰਿਵਾਰਾ ਵਿਨਯੋਤਿ ਏਵਂ ਵਿਨਯਪਿਟਕਂ ਪਰਿਯਾਦਿਯਤਿ. ਅਥ ਵਾ ਸੁਤ੍ਤਨ੍ਤਪਿਟਕਂ ਸੁਤ੍ਤਂ, ਵਿਨਯਪਿਟਕਂ ਵਿਨਯੋਤਿ ਏਵਂ ਦ੍ਵੇਯੇਵ ਪਿਟਕਾਨਿ ਪਰਿਯਾਦਿਯਨ੍ਤਿ. ਸੁਤ੍ਤਨ੍ਤਾਭਿਧਮ੍ਮਪਿਟਕਾਨਿ ਵਾ ਸੁਤ੍ਤਂ, ਵਿਨਯਪਿਟਕਂ ਵਿਨਯੋਤਿ ਏਵਮ੍ਪਿ ਤੀਣਿ ਪਿਟਕਾਨਿ ਨ ਤਾਵ ਪਰਿਯਾਦਿਯਨ੍ਤਿ. ਅਸੁਤ੍ਤਨਾਮਕਞ੍ਹਿ ਬੁਦ੍ਧਵਚਨਂ ਨਾਮ ਅਤ੍ਥਿ. ਸੇਯ੍ਯਥਿਦਂ – ਜਾਤਕਂ ਪਟਿਸਮ੍ਭਿਦਾ ਨਿਦ੍ਦੇਸੋ ਸੁਤ੍ਤਨਿਪਾਤੋ ਧਮ੍ਮਪਦਂ ਉਦਾਨਂ ਇਤਿਵੁਤ੍ਤਕਂ ਵਿਮਾਨਵਤ੍ਥੁ ਪੇਤਵਤ੍ਥੁ ਥੇਰਗਾਥਾ ਥੇਰੀਗਾਥਾ ਅਪਦਾਨਨ੍ਤਿ.
ਸੁਦਿਨ੍ਨਤ੍ਥੇਰੋ ਪਨ ‘‘ਅਸੁਤ੍ਤਨਾਮਕਂ ਬੁਦ੍ਧਵਚਨਂ ਨਤ੍ਥੀ’’ਤਿ ਤਂ ਸਬ੍ਬਂ ਪਟਿਕ੍ਖਿਪਿਤ੍ਵਾ ‘‘ਤੀਣਿ ਪਿਟਕਾਨਿ ਸੁਤ੍ਤਂ, ਵਿਨਯੋ ਪਨ ਕਾਰਣ’’ਨ੍ਤਿ ਆਹ. ਤਤੋ ਤਂ ਕਾਰਣਂ ਦਸ੍ਸੇਨ੍ਤੋ ਇਦਂ ਸੁਤ੍ਤਮਾਹਰਿ –
‘‘ਯੇ ਖੋ ਤ੍ਵਂ, ਗੋਤਮਿ, ਧਮ੍ਮੇ ਜਾਨੇਯ੍ਯਾਸਿ, ਇਮੇ ਧਮ੍ਮਾ ਸਰਾਗਾਯ ਸਂਵਤ੍ਤਨ੍ਤਿ ਨੋ ਵਿਰਾਗਾਯ, ਸਂਯੋਗਾਯ ਸਂਵਤ੍ਤਨ੍ਤਿ ਨੋ ਵਿਸਂਯੋਗਾਯ, ਸਉਪਾਦਾਨਾਯ ਸਂਵਤ੍ਤਨ੍ਤਿ ਨੋ ਅਨੁਪਾਦਾਨਾਯ, ਮਹਿਚ੍ਛਤਾਯ ਸਂਵਤ੍ਤਨ੍ਤਿ ਨੋ ਅਪ੍ਪਿਚ੍ਛਤਾਯ, ਅਸਨ੍ਤੁਟ੍ਠਿਯਾ ਸਂਵਤ੍ਤਨ੍ਤਿ ਨੋ ਸਨ੍ਤੁਟ੍ਠਿਯਾ, ਕੋਸਜ੍ਜਾਯ ਸਂਵਤ੍ਤਨ੍ਤਿ ਨੋ ਵੀਰਿਯਾਰਮ੍ਭਾਯ, ਸਙ੍ਗਣਿਕਾਯ ਸਂਵਤ੍ਤਨ੍ਤਿ ਨੋ ਪਵਿਵੇਕਾਯ, ਆਚਯਾਯ ਸਂਵਤ੍ਤਨ੍ਤਿ ਨੋ ਅਪਚਯਾਯ. ਏਕਂਸੇਨ, ਗੋਤਮਿ, ਜਾਨੇਯ੍ਯਾਸਿ ‘ਨੇਸੋ ਧਮ੍ਮੋ ਨੇਸੋ ਵਿਨਯੋ ਨੇਤਂ ਸਤ੍ਥੁ ਸਾਸਨ’ਨ੍ਤਿ.
‘‘ਯੇ ਚ ਖੋ ਤ੍ਵਂ, ਗੋਤਮਿ, ਧਮ੍ਮੇ ਜਾਨੇਯ੍ਯਾਸਿ, ਇਮੇ ਧਮ੍ਮਾ ਵਿਰਾਗਾਯ ਸਂਵਤ੍ਤਨ੍ਤਿ ਨੋ ਸਰਾਗਾਯ, ਵਿਸਂਯੋਗਾਯ ਸਂਵਤ੍ਤਨ੍ਤਿ ਨੋ ਸਂਯੋਗਾਯ. ਅਨੁਪਾਦਾਨਾਯ ਸਂਵਤ੍ਤਨ੍ਤਿ ਨੋ ਸਉਪਾਦਾਨਾਯ, ਅਪ੍ਪਿਚ੍ਛਤਾਯ ਸਂਵਤ੍ਤਨ੍ਤਿ ਨੋ ਮਹਿਚ੍ਛਤਾਯ, ਸਨ੍ਤੁਟ੍ਠਿਯਾ ਸਂਵਤ੍ਤਨ੍ਤਿ ਨੋ ਅਸਨ੍ਤੁਟ੍ਠਿਯਾ, ਵੀਰਿਯਾਰਮ੍ਭਾਯ ਸਂਵਤ੍ਤਨ੍ਤਿ ਨੋ ਕੋਸਜ੍ਜਾਯ, ਪਵਿਵੇਕਾਯ ਸਂਵਤ੍ਤਨ੍ਤਿ ਨੋ ਸਙ੍ਗਣਿਕਾਯ, ਅਪਚਯਾਯ ਸਂਵਤ੍ਤਨ੍ਤਿ ਨੋ ਆਚਯਾਯ. ਏਕਂਸੇਨ, ਗੋਤਮਿ, ਜਾਨੇਯ੍ਯਾਸਿ ‘ਏਸੋ ਧਮ੍ਮੋ ਏਸੋ ਵਿਨਯੋ ਏਤਂ ਸਤ੍ਥੁ ਸਾਸਨ’’’ਨ੍ਤਿ (ਚੂਲ਼ਵ. ੪੦੬; ਅ. ਨਿ. ੮.੫੩).
ਤਸ੍ਮਾ ਸੁਤ੍ਤੇਤਿ ਤੇਪਿਟਕਬੁਦ੍ਧਵਚਨੇ ਓਤਾਰੇਤਬ੍ਬਾਨਿ. ਵਿਨਯੇਤਿ ਏਤਸ੍ਮਿਂ ਰਾਗਾਦਿਵਿਨਯਕਾਰਣੇ ਸਂਸਨ੍ਦੇਤਬ੍ਬਾਨੀਤਿ ਅਯਮੇਤ੍ਥ ਅਤ੍ਥੋ. ਨ ਚੇਵ ਸੁਤ੍ਤੇ ਓਤਰਨ੍ਤੀਤਿ ਸੁਤ੍ਤਪਟਿਪਾਟਿਯਾ ਕਤ੍ਥਚਿ ਅਨਾਗਨ੍ਤ੍ਵਾ ਛਲ੍ਲਿਂ ਉਟ੍ਠਪੇਤ੍ਵਾ ਗੁਲ਼੍ਹਵੇਸ੍ਸਨ੍ਤਰ-ਗੁਲ਼੍ਹਉਮ੍ਮਗ੍ਗ-ਗੁਲ਼੍ਹਵਿਨਯਵੇਦਲ੍ਲਪਿਟਕਾਨਂ ਅਞ੍ਞਤਰਤੋ ਆਗਤਾਨਿ ਪਞ੍ਞਾਯਨ੍ਤੀਤਿ ਅਤ੍ਥੋ. ਏਵਂ ਆਗਤਾਨਿ ਹਿ ਰਾਗਾਦਿਵਿਨਯੇ ਚ ਅਪਞ੍ਞਾਯਮਾਨਾਨਿ ਛਡ੍ਡੇਤਬ੍ਬਾਨਿ ਹੋਨ੍ਤਿ. ਤੇਨ ਵੁਤ੍ਤਂ – ‘‘ਇਤਿ ਹਿਦਂ, ਭਿਕ੍ਖਵੇ, ਛਡ੍ਡੇਯ੍ਯਾਥਾ’’ਤਿ. ਏਤੇਨੁਪਾਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਇਦਂ, ਭਿਕ੍ਖਵੇ, ਚਤੁਤ੍ਥਂ ਮਹਾਪਦੇਸਂ ਧਾਰੇਯ੍ਯਾਥਾਤਿ ਇਮਂ, ਭਿਕ੍ਖਵੇ, ਚਤੁਤ੍ਥਂ ਧਮ੍ਮਸ੍ਸ ਪਤਿਟ੍ਠਾਨੋਕਾਸਂ ਧਾਰੇਯ੍ਯਾਥਾਤਿ.
ਸਞ੍ਚੇਤਨਿਯਵਗ੍ਗੋ ਤਤਿਯੋ.
(੧੯) ੪. ਬ੍ਰਾਹ੍ਮਣਵਗ੍ਗੋ
੧. ਯੋਧਾਜੀਵਸੁਤ੍ਤਵਣ੍ਣਨਾ
੧੮੧. ਚਤੁਤ੍ਥਸ੍ਸ ਪਠਮੇ ਠਾਨਕੁਸਲੋਤਿ ਯੇਨ ਠਾਨੇਨ ਠਿਤੋ ਅਵਿਰਾਧੇਤ੍ਵਾ ਵਿਜ੍ਝਿਤੁਂ ਸਕ੍ਕੋਤਿ, ਤਸ੍ਮਿਂ ਠਾਨੇ ਕੁਸਲੋ. ਸੇਸਂ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.
੨. ਪਾਟਿਭੋਗਸੁਤ੍ਤਵਣ੍ਣਨਾ
੧੮੨. ਦੁਤਿਯੇ ਨਤ੍ਥਿ ਕੋਚਿ ਪਾਟਿਭੋਗੋਤਿ ਅਹਂ ਤੇ ਪਾਟਿਭੋਗੋਤਿ ਏਵਂ ਪਾਟਿਭੋਗੋ ਭਵਿਤੁਂ ਸਮਤ੍ਥੋ ਨਾਮ ਨਤ੍ਥਿ. ਜਰਾਧਮ੍ਮਨ੍ਤਿ ਜਰਾਸਭਾਵਂ. ਏਸ ਨਯੋ ਸਬ੍ਬਤ੍ਥ.
੩. ਸੁਤਸੁਤ੍ਤਵਣ੍ਣਨਾ
੧੮੩. ਤਤਿਯੇ ਨਤ੍ਥਿ ਤਤੋ ਦੋਸੋਤਿ ਤਸ੍ਮਿਂ ਦੋਸੋ ਨਾਮ ਨਤ੍ਥੀਤਿ ਅਤ੍ਥੋ.
੪. ਅਭਯਸੁਤ੍ਤਵਣ੍ਣਨਾ
੧੮੪. ਚਤੁਤ੍ਥੇ ਕਿਚ੍ਛਾਜੀਵਿਤਕਾਰਣਟ੍ਠੇਨ ਰੋਗੋਵ ਰੋਗਾਤਙ੍ਕੋ ਨਾਮ. ਫੁਟ੍ਠਸ੍ਸਾਤਿ ਤੇਨ ਰੋਗਾਤਙ੍ਕੇਨ ਸਮਨ੍ਨਾਗਤਸ੍ਸ. ਉਰਤ੍ਤਾਲ਼ਿਂ ਕਨ੍ਦਤੀਤਿ ਉਰਂ ਤਾਲ਼ੇਤ੍ਵਾ ਰੋਦਤਿ. ਅਕਤਕਲ੍ਯਾਣੋਤਿਆਦੀਸੁ ਕਲ੍ਯਾਣਂ ਵੁਚ੍ਚਤਿ ਪੁਞ੍ਞਕਮ੍ਮਂ, ਤਂ ਅਕਤਂ ਏਤੇਨਾਤਿ ਅਕਤਕਲ੍ਯਾਣੋ. ਸੇਸਪਦੇਸੁਪਿ ਏਸੇਵ ਨਯੋ. ਪੁਞ੍ਞਕਮ੍ਮਮੇਵ ਹਿ ਕੋਸਲ੍ਲਸਮ੍ਭੂਤਤ੍ਤਾ ਕੁਸਲਂ, ਭੀਤਸ੍ਸ ਪਰਿਤ੍ਤਾਯਕਤ੍ਤਾ ਭੀਰੁਤ੍ਤਾਣਨ੍ਤਿ ਵੁਚ੍ਚਤਿ. ਕਤਪਾਪੋਤਿਆਦੀਸੁ ਪਾਪਂ ਵੁਚ੍ਚਤਿ ਲਾਮਕਂ ਅਕੁਸਲਕਮ੍ਮਂ. ਲੁਦ੍ਦਨ੍ਤਿ ਕਕ੍ਖਲ਼ਕਮ੍ਮਂ. ਕਿਬ੍ਬਿਸਨ੍ਤਿ ਸਮਲਂ ਅਪਰਿਸੁਦ੍ਧਕਮ੍ਮਂ. ਕਙ੍ਖੀ ਹੋਤੀਤਿ ਬੁਦ੍ਧਧਮ੍ਮਸਙ੍ਘਗੁਣੇਸੁ ਚੇਵ ਸਿਕ੍ਖਾਯ ਚ ਪੁਬ੍ਬਨ੍ਤੇ ਚ ਅਪਰਨ੍ਤੇ ਚ ਪੁਬ੍ਬਨ੍ਤਾਪਰਨ੍ਤੇ ਚ ਪਟਿਚ੍ਚਸਮੁਪ੍ਪਾਦੇ ਚਾਤਿ ਅਟ੍ਠਸੁ ਠਾਨੇਸੁ ਕਙ੍ਖਾਯ ਸਮਨ੍ਨਾਗਤੋ ਹੋਤਿ. ਵਿਚਿਕਿਚ੍ਛੀਤਿ ਵਿਚਿਕਿਚ੍ਛਾਯ ਸਮਨ੍ਨਾਗਤੋ ਸਾਸਨਸਦ੍ਧਮ੍ਮੇ ਨ ਨਿਟ੍ਠਂ ਗਤੋ, ਉਗ੍ਗਹਪਰਿਪੁਚ੍ਛਾਵਸੇਨ ਨਿਟ੍ਠਂ ਗਨ੍ਤੁਂ ਨ ਸਕ੍ਕੋਤਿ. ਇਮਿਨਾ ਨਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.
੫. ਬ੍ਰਾਹ੍ਮਣਸਚ੍ਚਸੁਤ੍ਤਵਣ੍ਣਨਾ
੧੮੫. ਪਞ੍ਚਮੇ ਬ੍ਰਾਹ੍ਮਣਸਚ੍ਚਾਨੀਤਿ ਬ੍ਰਾਹ੍ਮਣਾਨਂ ਸਚ੍ਚਾਨਿ ਤਥਾਨਿ. ਸੋ ਤੇਨ ਨ ਸਮਣੋਤਿ ਮਞ੍ਞਤੀਤਿ ਸੋ ਖੀਣਾਸਵੋ ਤੇਨ ਸਚ੍ਚੇਨ ‘‘ਅਹਂ ਸਮਣੋ’’ਤਿ ਤਣ੍ਹਾਮਾਨਦਿਟ੍ਠੀਹਿ ਨ ਮਞ੍ਞਤਿ. ਸੇਸਪਦੇਸੁਪਿ ਏਸੇਵ ਨਯੋ. ਯਦੇਵ ਤਤ੍ਥ ਸਚ੍ਚਂ, ਤਦਭਿਞ੍ਞਾਯਾਤਿ ਯਂ ਤਤ੍ਥ ‘‘ਸਬ੍ਬੇ ਪਾਣਾ ਅਵਜ੍ਝਾ’’ਤਿ ਪਟਿਪਤ੍ਤਿਯਾ ਸਚ੍ਚਂ ਤਥਂ ਅਵਿਪਰੀਤਂ. ਇਮਿਨਾ ਵਚੀਸਚ੍ਚਂ ਅਬ੍ਭਨ੍ਤਰਂ ਕਤ੍ਵਾ ਪਰਮਤ੍ਥਸਚ੍ਚਂ ਨਿਬ੍ਬਾਨਂ ਦਸ੍ਸੇਤਿ. ਤਦਭਿਞ੍ਞਾਯਾਤਿ ਤਂ ਉਭਯਮ੍ਪਿ ਅਭਿਵਿਸਿਟ੍ਠਾਯ ਪਞ੍ਞਾਯ ਜਾਨਿਤ੍ਵਾ. ਅਨੁਦ੍ਦਯਾਯ ਅਨੁਕਮ੍ਪਾਯ ਪਟਿਪਨ੍ਨੋ ਹੋਤੀਤਿ ਅਨੁਦ੍ਦਯਤ੍ਥਾਯ ਚ ਅਨੁਕਮ੍ਪਤ੍ਥਾਯ ਚ ਯਾ ਪਟਿਪਦਾ, ਤਂ ਪਟਿਪਨ੍ਨੋ ਹੋਤਿ, ਪੂਰੇਤ੍ਵਾ ਠਿਤੋਤਿ ਅਤ੍ਥੋ. ਸੇਸਪਟਿਪਦਾਸੁਪਿ ਏਸੇਵ ਨਯੋ.
ਸਬ੍ਬੇ ਕਾਮਾਤਿ ਸਬ੍ਬੇ ਵਤ੍ਥੁਕਾਮਕਿਲੇਸਕਾਮਾ. ਇਤਿ ਵਦਂ ਬ੍ਰਾਹ੍ਮਣੋ ਸਚ੍ਚਮਾਹਾਤਿ ਏਵਮ੍ਪਿ ਵਦਨ੍ਤੋ ਖੀਣਾਸਵਬ੍ਰਾਹ੍ਮਣੋ ਸਚ੍ਚਮੇਵ ਆਹ. ਸਬ੍ਬੇ ਭਵਾਤਿ ਕਾਮਭਵਾਦਯੋ ਤਯੋਪਿ. ਨਾਹਂ ਕ੍ਵਚਨੀਤਿ ਏਤ੍ਥ ਪਨ ਚਤੁਕ੍ਕੋਟਿਕਸੁਞ੍ਞਤਾ ਕਥਿਤਾ. ਅਯਞ੍ਹਿ ‘‘ਨਾਹਂ ਕ੍ਵਚਨੀ’’ਤਿ ਕ੍ਵਚਿ ਅਤ੍ਤਾਨਂ ਨ ਪਸ੍ਸਤਿ, ਕਸ੍ਸਚਿ ਕਿਞ੍ਚਨਤਸ੍ਮਿਨ੍ਤਿ ਅਤ੍ਤਨੋ ਅਤ੍ਤਾਨਂ ਕਸ੍ਸਚਿ ਪਰਸ੍ਸ ਕਿਞ੍ਚਨਭਾਵੇ ਉਪਨੇਤਬ੍ਬਂ ਨ ਪਸ੍ਸਤਿ, ਭਾਤਿਟ੍ਠਾਨੇ ਭਾਤਰਂ, ਸਹਾਯਟ੍ਠਾਨੇ ਸਹਾਯਂ, ਪਰਿਕ੍ਖਾਰਟ੍ਠਾਨੇ ਵਾ ਪਰਿਕ੍ਖਾਰਂ ਮਞ੍ਞਿਤ੍ਵਾ ਉਪਨੇਤਬ੍ਬਂ ਨ ਪਸ੍ਸਤੀਤਿ ਅਤ੍ਥੋ. ਨ ਚ ਮਮ ਕ੍ਵਚਨੀਤਿ ਏਤ੍ਥ ਮਮਸਦ੍ਦਂ ਤਾਵ ਠਪੇਤ੍ਵਾ ‘‘ਨ ਚ ਕ੍ਵਚਨਿ ਪਰਸ੍ਸ ਚ ਅਤ੍ਤਾਨਂ ਕ੍ਵਚਿ ਨ ਪਸ੍ਸਤੀ’’ਤਿ ਅਯਮਤ੍ਥੋ. ਇਦਾਨਿ ‘‘ਮਮਸਦ੍ਦਂ ਆਹਰਿਤ੍ਵਾ ਮਮ ਕਿਸ੍ਮਿਞ੍ਚਿ ਕਿਞ੍ਚਨਂ ਨਤ੍ਥੀ’’ਤਿ ਸੋ ਪਰਸ੍ਸ ਅਤ੍ਤਾ ਮਮ ਕਿਸ੍ਮਿਞ੍ਚਿ ਕਿਞ੍ਚਨਭਾਵੇ ਅਤ੍ਥੀਤਿ ਨ ਪਸ੍ਸਤਿ, ਅਤ੍ਤਨੋ ਭਾਤਿਟ੍ਠਾਨੇ ਭਾਤਰਂ, ਸਹਾਯਟ੍ਠਾਨੇ ਸਹਾਯਂ, ਪਰਿਕ੍ਖਾਰਟ੍ਠਾਨੇ ਵਾ ਪਰਿਕ੍ਖਾਰਨ੍ਤਿ ਕਿਸ੍ਮਿਞ੍ਚਿ ਠਾਨੇ ਪਰਸ੍ਸ ਅਤ੍ਤਾਨਂ ਇਮਿਨਾ ਕਿਞ੍ਚਨਭਾਵੇਨ ਉਪਨੇਤਬ੍ਬਂ ਨ ਪਸ੍ਸਤੀਤਿ ਅਤ੍ਥੋ. ਏਵਮਯਂ ਯਸ੍ਮਾ ਨੇਵ ਕਤ੍ਥਚਿ ਅਤ੍ਤਾਨਂ ਪਸ੍ਸਤਿ, ਨ ਤਂ ਪਰਸ੍ਸ ਕਿਞ੍ਚਨਭਾਵੇ ਉਪਨੇਤਬ੍ਬਂ ਪਸ੍ਸਤਿ, ਨ ਪਰਸ੍ਸ ਅਤ੍ਤਾਨਂ ਪਸ੍ਸਤਿ, ਨ ਪਰਸ੍ਸ ਅਤ੍ਤਾਨਂ ਅਤ੍ਤਨੋ ਕਿਞ੍ਚਨਭਾਵੇ ਉਪਨੇਤਬ੍ਬਂ ਪਸ੍ਸਤੀਤਿ. ਇਤਿ ਵਦਂ ਬ੍ਰਾਹ੍ਮਣੋਤਿ ਏਵਂ ਚਤੁਕ੍ਕੋਟਿਕਂ ਸੁਞ੍ਞਤਂ ਵਦਨ੍ਤੋਪਿ ਖੀਣਾਸਵਬ੍ਰਾਹ੍ਮਣੋ ਤਸ੍ਸਾ ਪਟਿਪਦਾਯ ਸਮ੍ਮਾ ਪਟਿਵਿਦ੍ਧਤ੍ਤਾ ਸਚ੍ਚਮੇਵ ਆਹ, ਨ ਮੁਸਾਤਿ ਸਬ੍ਬੇਸੁਪਿ ਵਾਰੇਸੁ ਮਞ੍ਞਨਾਨਂ ਪਹੀਨਤ੍ਤਾਯੇਵ ਨ ਮਞ੍ਞਤੀਤਿ ਚ ਅਤ੍ਥੋ ਵੇਦਿਤਬ੍ਬੋ. ਆਕਿਞ੍ਚਞ੍ਞਂਯੇਵ ਪਟਿਪਦਨ੍ਤਿ ਕਿਞ੍ਚਨਭਾਵਵਿਰਹਿਤਂ ਨਿਪ੍ਪਲਿਬੋਧਂ ਨਿਗ੍ਗਹਣਮੇਵ ਪਟਿਪਦਂ ਪਟਿਪਨ੍ਨੋ ਹੋਤਿ ਪੂਰੇਤ੍ਵਾ ਠਿਤੋ.
ਇਮਾਨਿ ਖੋ ਪਰਿਬ੍ਬਾਜਕਾ ਚਤ੍ਤਾਰਿ ਬ੍ਰਾਹ੍ਮਣਸਚ੍ਚਾਨਿ ਮਯਾ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਪਵੇਦਿਤਾਨੀਤਿ ਯਾਨਿ ਤੁਮ੍ਹੇ ਭੋਵਾਦਿਬ੍ਰਾਹ੍ਮਣਾਨਂ ਸਚ੍ਚਾਨਿ ਵਦੇਥ, ਤੇਹਿ ਅਞ੍ਞਾਨਿ ਮਯਾ ਇਮਾਨਿ ਬਾਹਿਤਪਾਪਬ੍ਰਾਹ੍ਮਣਸ੍ਸ ਚਤ੍ਤਾਰਿ ਸਚ੍ਚਾਨਿ ਚਤੂਹਿ ਮਗ੍ਗੇਹਿ ਸੋਲ਼ਸਵਿਧੇਨ ਕਿਚ੍ਚੇਨ ਜਾਨਿਤ੍ਵਾ ਪਚ੍ਚਕ੍ਖਂ ਕਤ੍ਵਾ ਪਵੇਦਿਤਾਨਿ ਦੇਸਿਤਾਨਿ ਜੋਤਿਤਾਨੀਤਿ ਅਤ੍ਥੋ. ਇਤਿ ਇਮਸ੍ਮਿਂ ਸੁਤ੍ਤੇ ਚਤੂਸੁਪਿ ਠਾਨੇਸੁ ਖੀਣਾਸਵਸ੍ਸ ਵਚੀਸਚ੍ਚਮੇਵ ਕਥਿਤਨ੍ਤਿ.
੬. ਉਮ੍ਮਗ੍ਗਸੁਤ੍ਤਵਣ੍ਣਨਾ
੧੮੬. ਛਟ੍ਠੇ ਪਰਿਕਸ੍ਸਤੀਤਿ ਆਕਡ੍ਢਿਯਤਿ. ਉਮ੍ਮਗ੍ਗੋਤਿ ਉਮ੍ਮੁਜ੍ਜਨਂ, ਪਞ੍ਞਾਗਮਨਨ੍ਤਿ ਅਤ੍ਥੋ. ਪਞ੍ਞਾ ਏਵ ਵਾ ਉਮ੍ਮੁਜ੍ਜਨਟ੍ਠੇਨ ਉਮ੍ਮਗ੍ਗੋਤਿ ਵੁਚ੍ਚਤਿ. ਸਾਵ ਪਟਿਭਾਨਟ੍ਠੇਨ ਪਟਿਭਾਨਂ. ਚਿਤ੍ਤਸ੍ਸ ਉਪ੍ਪਨ੍ਨਸ੍ਸ ਵਸਂ ਗਚ੍ਛਤੀਤਿ ਯੇ ਚਿਤ੍ਤਸ੍ਸ ਵਸਂ ਗਚ੍ਛਨ੍ਤਿ, ਤੇਸਂਯੇਵੇਤ੍ਥ ਗਹਣਂ ਵੇਦਿਤਬ੍ਬਂ. ਅਤ੍ਥਮਞ੍ਞਾਯ ਧਮ੍ਮਮਞ੍ਞਾਯਾਤਿ ਅਤ੍ਥਞ੍ਚ ਪਾਲ਼ਿਞ੍ਚ ਜਾਨਿਤ੍ਵਾ. ਧਮ੍ਮਾਨੁਧਮ੍ਮਪ੍ਪਟਿਪਨ੍ਨੋ ਹੋਤੀਤਿ ਲੋਕੁਤ੍ਤਰਧਮ੍ਮਸ੍ਸ ਅਨੁਚ੍ਛਵਿਕਧਮ੍ਮਂ ਸਹ ਸੀਲੇਨ ਪੁਬ੍ਬਭਾਗਪ੍ਪਟਿਪਦਂ ਪਟਿਪਨ੍ਨੋ ਹੋਤਿ. ਨਿਬ੍ਬੇਧਿਕਪਞ੍ਞੋਤਿ ਨਿਬ੍ਬਿਜ੍ਝਨਕਪਞ੍ਞੋ. ਇਦਂ ਦੁਕ੍ਖਨ੍ਤਿ ਠਪੇਤ੍ਵਾ ਤਣ੍ਹਂ ਸੇਸਂ ਤੇਭੂਮਕਕ੍ਖਨ੍ਧਪਞ੍ਚਕਂ ਦੁਕ੍ਖਨ੍ਤਿ ਸੁਤਂ ਹੋਤਿ. ਪਞ੍ਞਾਯਾਤਿ ਮਗ੍ਗਪਞ੍ਞਾਯ. ਅਯਂ ਦੁਕ੍ਖਸਮੁਦਯੋਤਿ ਵਟ੍ਟਮੂਲਕਤਣ੍ਹਾ ਤਸ੍ਸ ਦੁਕ੍ਖਸ੍ਸ ਸਮੁਦਯੋਤਿ ਸੁਤਂ ਹੋਤਿ. ਇਮਿਨਾ ਉਪਾਯੇਨ ਸੇਸਦ੍ਵਯੇਪਿ ਅਤ੍ਥੋ ਵੇਦਿਤਬ੍ਬੋ. ਚਤੁਤ੍ਥਪਞ੍ਹਵਿਸ੍ਸਜ੍ਜਨੇਨ ਅਰਹਤ੍ਤਫਲਂ ਕਥਿਤਨ੍ਤਿ ਵੇਦਿਤਬ੍ਬਂ.
੭. ਵਸ੍ਸਕਾਰਸੁਤ੍ਤਵਣ੍ਣਨਾ
੧੮੭. ਸਤ੍ਤਮੇ ਤੋਦੇਯ੍ਯਸ੍ਸਾਤਿ ਤੁਦਿਗਾਮਵਾਸਿਕਸ੍ਸ. ਪਰਿਸਤੀਤਿ ਸਨ੍ਨਿਪਤਿਤਾਯ ਪਰਿਸਾਯ. ਪਰੂਪਾਰਮ੍ਭਂ ਵਤ੍ਤੇਨ੍ਤੀਤਿ ਪਰਗਰਹਂ ਪਵਤ੍ਤੇਨ੍ਤਿ ਕਥੇਨ੍ਤਿ. ਬਾਲੋ ਅਯਂ ਰਾਜਾਤਿਆਦਿ ਯਂ ਤੇ ਉਪਾਰਮ੍ਭਂ ਵਤ੍ਤੇਨ੍ਤਿ, ਤਸ੍ਸ ਦਸ੍ਸਨਤ੍ਥਂ ਵੁਤ੍ਤਂ. ਸਮਣੇ ਰਾਮਪੁਤ੍ਤੇਤਿ ਉਦਕੇ ਰਾਮਪੁਤ੍ਤੇ. ਅਭਿਪ੍ਪਸਨ੍ਨੋਤਿ ਅਤਿਕ੍ਕਮ੍ਮ ਪਸਨ੍ਨੋ. ਪਰਮਨਿਪਚ੍ਚਕਾਰਨ੍ਤਿ ਉਤ੍ਤਮਨਿਪਾਤਕਿਰਿਯਂ ਨੀਚਵੁਤ੍ਤਿਂ. ਪਰਿਹਾਰਕਾਤਿ ਪਰਿਚਾਰਕਾ. ਯਮਕੋਤਿਆਦੀਨਿ ਤੇਸਂ ਨਾਮਾਨਿ. ਤੇਸੁ ਹਿ ਏਕੋ ਯਮਕੋ ਨਾਮ, ਏਕੋ ਮੋਗ੍ਗਲ੍ਲੋ ਨਾਮ, ਏਕੋ ਉਗ੍ਗੋ ਨਾਮ, ਏਕੋ ਨਾਵਿਨ੍ਦਕੀ ਨਾਮ, ਏਕੋ ਗਨ੍ਧਬ੍ਬੋ ਨਾਮ, ਏਕੋ ਅਗ੍ਗਿਵੇਸ੍ਸੋ ਨਾਮ. ਤ੍ਯਾਸ੍ਸੁਦਨ੍ਤਿ ਏਤ੍ਥ ਅਸ੍ਸੁਦਨ੍ਤਿ ਨਿਪਾਤਮਤ੍ਤਂ, ਤੇ ਅਤ੍ਤਨੋ ਪਰਿਸਤਿ ਨਿਸਿਨ੍ਨੇਤਿ ਅਤ੍ਥੋ. ਇਮਿਨਾ ਨਯੇਨ ਨੇਤੀਤਿ ਇਮਿਨਾ ਕਾਰਣੇਨ ਅਨੁਨੇਤਿ ਜਾਨਾਪੇਤਿ. ਕਰਣੀਯਾਧਿਕਰਣੀਯੇਸੂਤਿ ਪਣ੍ਡਿਤੇਹਿ ਕਤ੍ਤਬ੍ਬਕਿਚ੍ਚੇਸੁ ਚ ਅਤਿਰੇਕਕਤ੍ਤਬ੍ਬਕਿਚ੍ਚੇਸੁ ਚ. ਵਚਨੀਯਾਧਿਵਚਨੀਯੇਸੂਤਿ ਵਤ੍ਤਬ੍ਬੇਸੁ ਚ ਅਤਿਰੇਕਵਤ੍ਤਬ੍ਬੇਸੁ ਚ. ਅਲਮਤ੍ਥਦਸਤਰੇਹੀਤਿ ਏਤ੍ਥ ਅਤ੍ਥੇ ਪਸ੍ਸਿਤੁਂ ਸਮਤ੍ਥਾ ਅਲਮਤ੍ਥਦਸਾ, ਤੇ ਅਤਿਸਿਤ੍ਵਾ ਠਿਤਾ ਅਲਮਤ੍ਥਦਸਤਰਾ, ਤੇਹਿ ਅਲਮਤ੍ਥਦਸਤਰੇਹਿ. ਅਲਮਤ੍ਥਦਸਤਰੋਤਿ ਅਲਮਤ੍ਥਦਸਤਾਯ ਉਤ੍ਤਰਿਤਰੋ, ਛੇਕੇਹਿ ਛੇਕਤਰੋ ਪਣ੍ਡਿਤੇਹਿ ਪਣ੍ਡਿਤਤਰੋਤਿ ਪੁਚ੍ਛਨ੍ਤੋ ਏਵਮਾਹ. ਅਥਸ੍ਸ ਤੇ ਪਟਿਪੁਚ੍ਛਨ੍ਤਾ ਏਵਂ ਭੋਤਿਆਦਿਮਾਹਂਸੁ. ਇਤਿ ਬ੍ਰਾਹ੍ਮਣੋ ਅਤ੍ਤਨੋ ਸਪ੍ਪੁਰਿਸਤਾਯ ਤਂ ਏਲ਼ੇਯ੍ਯਰਾਜਾਨਮ੍ਪਿ ਤਸ੍ਸ ਪਰਿਵਾਰਿਕੇਪਿ ਉਦਕਮ੍ਪਿ ਰਾਮਪੁਤ੍ਤਂ ਪਸਂਸਿ. ਅਨ੍ਧੋ ਵਿਯ ਹਿ ਅਸਪ੍ਪੁਰਿਸੋ, ਚਕ੍ਖੁਮਾ ਵਿਯ ਸਪ੍ਪੁਰਿਸੋ. ਯਥਾ ਅਨ੍ਧੋ ਨੇਵ ਅਨਨ੍ਧਂ ਨ ਅਨ੍ਧਂ ਪਸ੍ਸਤਿ, ਏਵਂ ਅਸਪ੍ਪੁਰਿਸੋ ਨੇਵ ਸਪ੍ਪੁਰਿਸਂ ਨ ਅਸਪ੍ਪੁਰਿਸਂ ਜਾਨਾਤਿ. ਯਥਾ ਚਕ੍ਖੁਮਾ ਅਨ੍ਧਮ੍ਪਿ ਅਨਨ੍ਧਮ੍ਪਿ ਪਸ੍ਸਤਿ, ਏਵਂ ਸਪ੍ਪੁਰਿਸੋ ਸਪ੍ਪੁਰਿਸਮ੍ਪਿ ਅਸਪ੍ਪੁਰਿਸਮ੍ਪਿ ਜਾਨਾਤਿ. ਤੋਦੇਯ੍ਯੋਪਿ ਸਪ੍ਪੁਰਿਸਤਾਯ ਅਸਪ੍ਪੁਰਿਸੇ ਅਞ੍ਞਾਸੀਤਿ ਇਮਮਤ੍ਥਵਸਂ ਪਟਿਚ੍ਚ ਤੁਟ੍ਠਮਾਨਸੋ ਬ੍ਰਾਹ੍ਮਣੋ ਅਚ੍ਛਰਿਯਂ ਭੋ, ਗੋਤਮਾਤਿਆਦੀਨਿ ਵਤ੍ਵਾ ਤਥਾਗਤਸ੍ਸ ਭਾਸਿਤਂ ਅਨੁਮੋਦਿਤ੍ਵਾ ਪਕ੍ਕਾਮਿ.
੮. ਉਪਕਸੁਤ੍ਤਵਣ੍ਣਨਾ
੧੮੮. ਅਟ੍ਠਮੇ ਉਪਕੋਤਿ ਤਸ੍ਸ ਨਾਮਂ. ਮਣ੍ਡਿਕਾਪੁਤ੍ਤੋਤਿ ਮਣ੍ਡਿਕਾਯ ਪੁਤ੍ਤੋ. ਉਪਸਙ੍ਕਮੀਤਿ ਸੋ ਕਿਰ ਦੇਵਦਤ੍ਤਸ੍ਸ ਉਪਟ੍ਠਾਕੋ, ‘‘ਕਿਂ ਨੁ ਖੋ ਸਤ੍ਥਾ ਮਯਿ ਅਤ੍ਤਨੋ ਸਨ੍ਤਿਕਂ ਉਪਗਤੇ ਵਣ੍ਣਂ ਕਥੇਸ੍ਸਤਿ, ਉਦਾਹੁ ਅਵਣ੍ਣ’’ਨ੍ਤਿ ਪਰਿਗ੍ਗਣ੍ਹਨਤ੍ਥਂ ਉਪਸਙ੍ਕਮਿ. ‘‘ਨੇਰਯਿਕੋ ਦੇਵਦਤ੍ਤੋ ਕਪ੍ਪਟ੍ਠੋ ਅਤੇਕਿਚ੍ਛੋ’’ਤਿ (ਚੂਲ਼ਵ. ੩੪੮) ਵਚਨਂ ਸੁਤ੍ਵਾ ਸਤ੍ਥਾਰਂ ਘਟ੍ਟੇਤੁਕਾਮੋ ਉਪਸਙ੍ਕਮੀਤਿਪਿ ਵਦਨ੍ਤਿ. ਪਰੂਪਾਰਮ੍ਭਂ ਵਤ੍ਤੇਤੀਤਿ ਪਰਗਰਹਂ ਕਥੇਤਿ. ਸਬ੍ਬੋ ਸੋ ਨ ਉਪਪਾਦੇਤੀਤਿ ਸਬ੍ਬੋਪਿ ਸੋ ਕੁਸਲਧਮ੍ਮਂ ਨ ਉਪ੍ਪਾਦੇਤਿ, ਅਤ੍ਤਨੋ ਵਾ ਵਚਨਂ ਉਪਪਾਦੇਤੁਂ ਅਨੁਚ੍ਛਵਿਕਂ ਕਾਤੁਂ ਨ ਸਕ੍ਕੋਤਿ. ਅਨੁਪਪਾਦੇਨ੍ਤੋ ਗਾਰਯ੍ਹੋ ਹੋਤੀਤਿ ਕੁਸਲਂ ਧਮ੍ਮਂ ਉਪ੍ਪਾਦੇਤੁਂ ਅਸਕ੍ਕੋਨ੍ਤੋ ਅਤ੍ਤਨੋ ਚ ਵਚਨਂ ਉਪਪਨ੍ਨਂ ਅਨੁਚ੍ਛਵਿਕਂ ਕਾਤੁਂ ਅਸਕ੍ਕੋਨ੍ਤੋ ਗਾਰਯ੍ਹੋ ਹੋਤਿ. ਉਪਵਜ੍ਜੋਤਿ ਉਪਵਦਿਤਬ੍ਬੋ ਚ ਹੋਤਿ, ਵਜ੍ਜੇਨ ਵਾ ਉਪੇਤੋ ਹੋਤਿ, ਸਦੋਸੋ ਹੋਤੀਤਿ ਅਤ੍ਥੋ.
ਅਥ ਭਗਵਾ ਤਸ੍ਸ ਵਾਦਂ ਗਹੇਤ੍ਵਾ ਤਸ੍ਸੇਵ ਗੀਵਾਯ ਪਟਿਮੁਞ੍ਚਨ੍ਤੋ ਪਰੂਪਾਰਮ੍ਭਨ੍ਤਿਆਦਿਮਾਹ. ਉਮ੍ਮੁਜ੍ਜਮਾਨਕਂਯੇਵਾਤਿ ਉਦਕਤੋ ਸੀਸਂ ਉਕ੍ਖਿਪਨ੍ਤਂਯੇਵ. ਤਤ੍ਥ ਅਪਰਿਮਾਣਾ ਪਦਾਤਿਆਦੀਸੁ ਤਸ੍ਮਿਂ ਅਕੁਸਲਨ੍ਤਿ ਪਞ੍ਞਾਪਨੇ ਪਦਾਨਿਪਿ ਅਕ੍ਖਰਾਨਿਪਿ ਧਮ੍ਮਦੇਸਨਾਪਿ ਅਪਰਿਮਾਣਾਯੇਵ. ਇਤਿਪਿਦਂ ਅਕੁਸਲਨ੍ਤਿ ਇਦਮ੍ਪਿ ਅਕੁਸਲਂ ਇਦਮ੍ਪਿ ਅਕੁਸਲਂ ਇਮਿਨਾਪਿ ਕਾਰਣੇਨ ਇਮਿਨਾਪਿ ਕਾਰਣੇਨ ਅਕੁਸਲਨ੍ਤਿ ਏਵਂ ਅਕੁਸਲਪਞ੍ਞਤ੍ਤਿਯਂ ਆਗਤਾਨਿਪਿ ਅਪਰਿਮਾਣਾਨਿ. ਅਥਾਪਿ ਅਞ੍ਞੇਨਾਕਾਰੇਨ ਤਥਾਗਤੋ ਤਂ ਧਮ੍ਮਂ ਦੇਸੇਯ੍ਯ, ਏਵਮ੍ਪਿਸ੍ਸ ਦੇਸਨਾ ਅਪਰਿਮਾਣਾ ਭਵੇਯ੍ਯ. ਯਥਾਹ – ‘‘ਅਪਰਿਯਾਦਿਨ੍ਨਾਵਸ੍ਸ ਤਥਾਗਤਸ੍ਸ ਧਮ੍ਮਦੇਸਨਾ, ਅਪਰਿਯਾਦਿਨ੍ਨਂ ਧਮ੍ਮਪਦਬ੍ਯਞ੍ਜਨ’’ਨ੍ਤਿ (ਮ. ਨਿ. ੧.੧੬੧). ਇਮਿਨਾ ਉਪਾਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ. ਯਾਵ ਧਂਸੀ ਵਤਾਯਨ੍ਤਿ ਯਾਵ ਗੁਣਧਂਸੀ ਵਤ ਅਯਂ. ਲੋਣਕਾਰਦਾਰਕੋਤਿ ਲੋਣਕਾਰਗਾਮਦਾਰਕੋ. ਯਤ੍ਰ ਹਿ ਨਾਮਾਤਿ ਯੋ ਹਿ ਨਾਮ. ਆਸਾਦੇਤਬ੍ਬਂ ਮਞ੍ਞਿਸ੍ਸਤੀਤਿ ਘਟ੍ਟੇਤਬ੍ਬਂ ਮਞ੍ਞਿਸ੍ਸਤਿ. ਅਪੇਹੀਤਿ ਅਪਗਚ੍ਛ, ਮਾ ਮੇ ਪੁਰਤੋ ਅਟ੍ਠਾਸਿ. ਏਵਞ੍ਚ ਪਨ ਵਤ੍ਵਾ ਗੀਵਾਯ ਗਣ੍ਹਾਪੇਤ੍ਵਾ ਨਿਕ੍ਕਡ੍ਢਾਪੇਸਿਯੇਵਾਤਿ.
੯. ਸਚ੍ਛਿਕਰਣੀਯਸੁਤ੍ਤਵਣ੍ਣਨਾ
੧੮੯. ਨਵਮੇ ਕਾਯੇਨਾਤਿ ਨਾਮਕਾਯੇਨ. ਸਚ੍ਛਿਕਰਣੀਯਾਤਿ ਪਚ੍ਚਕ੍ਖਂ ਕਾਤਬ੍ਬਾ. ਸਤਿਯਾਤਿ ਪੁਬ੍ਬੇਨਿਵਾਸਾਨੁਸ੍ਸਤਿਯਾ. ਚਕ੍ਖੁਨਾਤਿ ਦਿਬ੍ਬਚਕ੍ਖੁਨਾ. ਪਞ੍ਞਾਯਾਤਿ ਝਾਨਪਞ੍ਞਾਯ ਵਿਪਸ੍ਸਨਾਪਞ੍ਞਾ ਸਚ੍ਛਿਕਾਤਬ੍ਬਾ, ਵਿਪਸ੍ਸਨਾਪਞ੍ਞਾਯ ਮਗ੍ਗਪਞ੍ਞਾ, ਮਗ੍ਗਪਞ੍ਞਾਯ ਫਲਪਞ੍ਞਾ, ਫਲਪਞ੍ਞਾਯ ਪਚ੍ਚਵੇਕ੍ਖਣਪਞ੍ਞਾ ਸਚ੍ਛਿਕਾਤਬ੍ਬਾ, ਪਤ੍ਤਬ੍ਬਾਤਿ ਅਤ੍ਥੋ. ਆਸਵਾਨਂ ਖਯਸਙ੍ਖਾਤਂ ਪਨ ਅਰਹਤ੍ਤਂ ਪਚ੍ਚਵੇਕ੍ਖਣਵਸੇਨ ਪਚ੍ਚਵੇਕ੍ਖਣਪਞ੍ਞਾਯ ਸਚ੍ਛਿਕਰਣੀਯਂ ਨਾਮਾਤਿ.
੧੦. ਉਪੋਸਥਸੁਤ੍ਤਵਣ੍ਣਨਾ
੧੯੦. ਦਸਮੇ ਤੁਣ੍ਹੀਭੂਤਂ ਤੁਣ੍ਹੀਭੂਤਨ੍ਤਿ ਯਤੋ ਯਤੋ ਅਨੁਵਿਲੋਕੇਤਿ, ਤਤੋ ਤਤੋ ਤੁਣ੍ਹੀਭੂਤਮੇਵ. ਭਿਕ੍ਖੂ ਆਮਨ੍ਤੇਸੀਤਿ ਪਟਿਪਤ੍ਤਿਸਮ੍ਪਨ੍ਨੇ ਭਿਕ੍ਖੂ ਪਸਨ੍ਨੇਹਿ ਚਕ੍ਖੂਹਿ ਅਨੁਵਿਲੋਕੇਤ੍ਵਾ ਉਪ੍ਪਨ੍ਨਧਮ੍ਮਪਾਮੋਜ੍ਜੋ ਥੋਮੇਤੁਕਾਮਤਾਯ ਆਮਨ੍ਤੇਸਿ. ਅਪਲਾਪਾਤਿ ਪਲਾਪਰਹਿਤਾ. ਇਤਰਂ ਤਸ੍ਸੇਵ ਵੇਵਚਨਂ. ਸੁਦ੍ਧਾਤਿ ਨਿਮ੍ਮਲਾ. ਸਾਰੇ ਪਤਿਟ੍ਠਿਤਾਤਿ ਸੀਲਾਦਿਸਾਰੇ ਪਤਿਟ੍ਠਿਤਾ. ਅਲਨ੍ਤਿ ਯੁਤ੍ਤਂ. ਯੋਜਨਗਣਨਾਨੀਤਿ ਏਕਂ ਯੋਜਨਂ ਯੋਜਨਮੇਵ, ਦਸਪਿ ਯੋਜਨਾਨਿ ਯੋਜਨਾਨੇਵ. ਤਤੋ ਉਦ੍ਧਂ ‘‘ਯੋਜਨਗਣਨਾਨੀ’’ਤਿ ਵੁਚ੍ਚਤਿ. ਇਧ ਪਨ ਯੋਜਨਸਤਮ੍ਪਿ ਯੋਜਨਸਹਸ੍ਸਮ੍ਪਿ ਅਧਿਪ੍ਪੇਤਂ. ਪੁਟੋਸੇਨਾਪੀਤਿ ਪੁਟੋਸਂ ਵੁਚ੍ਚਤਿ ਪਾਥੇਯ੍ਯਂ, ਪਾਥੇਯ੍ਯਂ ਗਹੇਤ੍ਵਾਪਿ ਉਪਸਙ੍ਕਮਿਤੁਂ ਯੁਤ੍ਤਮੇਵਾਤਿ ਅਤ੍ਥੋ. ਪੁਟਂਸੇਨਾਤਿਪਿ ਪਾਠੋ. ਤਸ੍ਸਤ੍ਥੋ – ਪੁਟੋ ਅਂਸੇ ਅਸ੍ਸਾਤਿ ਪੁਟਂਸੋ, ਤੇਨ ਪੁਟਂਸੇਨ, ਅਂਸੇਨ ਪਾਥੇਯ੍ਯਪੁਟਂ ਵਹਨ੍ਤੇਨਾਪੀਤਿ ਵੁਤ੍ਤਂ ਹੋਤਿ.
ਇਦਾਨਿ ਏਵਰੂਪੇਹਿ ਏਵਰੂਪੇਹਿ ਚ ਗੁਣੇਹਿ ਸਮਨ੍ਨਾਗਤਾ ਏਤ੍ਥ ਭਿਕ੍ਖੂ ਅਤ੍ਥੀਤਿ ਦਸ੍ਸੇਤੁਂ ਸਨ੍ਤਿ ਭਿਕ੍ਖਵੇਤਿਆਦਿਮਾਹ. ਤਤ੍ਥ ਦੇਵਪ੍ਪਤ੍ਤਾਤਿ ਉਪਪਤ੍ਤਿਦੇਵਨਿਬ੍ਬਤ੍ਤਕਂ ਦਿਬ੍ਬਵਿਹਾਰਂ ਦਿਬ੍ਬਵਿਹਾਰੇਨ ਚ ਅਰਹਤ੍ਤਂ ਪਤ੍ਤਾ. ਬ੍ਰਹ੍ਮਪ੍ਪਤ੍ਤਾਤਿ ਨਿਦ੍ਦੋਸਟ੍ਠੇਨ ਬ੍ਰਹ੍ਮਭਾਵਸਾਧਕਂ ਬ੍ਰਹ੍ਮਵਿਹਾਰਂ ਬ੍ਰਹ੍ਮਵਿਹਾਰੇਨ ਚ ਅਰਹਤ੍ਤਂ ਪਤ੍ਤਾ. ਆਨੇਞ੍ਜਪ੍ਪਤ੍ਤਾਤਿ ਅਨਿਞ੍ਜਨਭਾਵਸਾਧਕਂ ਆਨੇਞ੍ਜਂ ਆਨੇਞ੍ਜੇਨ ਚ ਅਰਹਤ੍ਤਂ ਪਤ੍ਤਾ. ਅਰਿਯਪ੍ਪਤ੍ਤਾਤਿ ਪੁਥੁਜ੍ਜਨਭਾਵਂ ਅਤਿਕ੍ਕਮ੍ਮ ਅਰਿਯਭਾਵਂ ਪਤ੍ਤਾ. ਏਵਂ ਖੋ, ਭਿਕ੍ਖਵੇ, ਭਿਕ੍ਖੁ ਦੇਵਪ੍ਪਤ੍ਤੋ ਹੋਤੀਤਿਆਦੀਸੁ ਏਵਂ ਰੂਪਾਵਚਰਚਤੁਤ੍ਥਜ੍ਝਾਨੇ ਠਤ੍ਵਾ ਚਿਤ੍ਤਂ ਵਿਵਟ੍ਟੇਤ੍ਵਾ ਅਰਹਤ੍ਤਂ ਪਤ੍ਤੋ ਦੇਵਪ੍ਪਤ੍ਤੋ ਨਾਮ ਹੋਤਿ, ਚਤੂਸੁ ਬ੍ਰਹ੍ਮਵਿਹਾਰੇਸੁ ਠਤ੍ਵਾ ਚਿਤ੍ਤਂ ਵਿਵਟ੍ਟੇਤ੍ਵਾ ਅਰਹਤ੍ਤਂ ਪਤ੍ਤੋ ਬ੍ਰਹ੍ਮਪ੍ਪਤ੍ਤੋ ਨਾਮ, ਚਤੂਸੁ ਅਰੂਪਜ੍ਝਾਨੇਸੁ ਠਤ੍ਵਾ ਚਿਤ੍ਤਂ ਵਿਵਟ੍ਟੇਤ੍ਵਾ ਅਰਹਤ੍ਤਂ ਪਤ੍ਤੋ ਆਨੇਞ੍ਜਪ੍ਪਤ੍ਤੋ ਨਾਮ. ਇਦਂ ਦੁਕ੍ਖਨ੍ਤਿਆਦੀਹਿ ਚਤੂਹਿ ਸਚ੍ਚੇਹਿ ਚਤ੍ਤਾਰੋ ਮਗ੍ਗਾ ਤੀਣਿ ਚ ਫਲਾਨਿ ਕਥਿਤਾਨਿ. ਤਸ੍ਮਾ ਇਮਂ ਅਰਿਯਧਮ੍ਮਂ ਪਤ੍ਤੋ ਭਿਕ੍ਖੁ ਅਰਿਯਪ੍ਪਤ੍ਤੋ ਨਾਮ ਹੋਤੀਤਿ.
ਬ੍ਰਾਹ੍ਮਣਵਗ੍ਗੋ ਚਤੁਤ੍ਥੋ.
(੨੦) ੫. ਮਹਾਵਗ੍ਗੋ
੧. ਸੋਤਾਨੁਗਤਸੁਤ੍ਤਵਣ੍ਣਨਾ
੧੯੧. ਪਞ੍ਚਮਸ੍ਸ ਪਠਮੇ ਸੋਤਾਨੁਗਤਾਨਨ੍ਤਿ ਪਸਾਦਸੋਤਂ ਓਦਹਿਤ੍ਵਾ ਞਾਣਸੋਤੇਨ ਵਵਤ੍ਥਪਿਤਾਨਂ. ਚਤ੍ਤਾਰੋ ਆਨਿਸਂਸਾ ਪਾਟਿਕਙ੍ਖਾਤਿ ਚਤ੍ਤਾਰੋ ਗੁਣਾਨਿਸਂਸਾ ਪਾਟਿਕਙ੍ਖਿਤਬ੍ਬਾ. ਇਦਂ ਪਨ ਭਗਵਤਾ ਅਤ੍ਥੁਪ੍ਪਤ੍ਤਿਵਸੇਨ ਆਰਦ੍ਧਂ. ਕਤਰਅਤ੍ਥੁਪ੍ਪਤ੍ਤਿਵਸੇਨਾਤਿ? ਭਿਕ੍ਖੂਨਂ ਧਮ੍ਮਸ੍ਸਵਨਾਯ ਅਨੁਪਸਙ੍ਕਮਨਅਤ੍ਥੁਪ੍ਪਤ੍ਤਿਵਸੇਨ. ਪਞ੍ਚਸਤਾ ਕਿਰ ਬ੍ਰਾਹ੍ਮਣਪਬ੍ਬਜਿਤਾ ‘‘ਸਮ੍ਮਾਸਮ੍ਬੁਦ੍ਧੋ ਲਿਙ੍ਗਵਚਨਵਿਭਤ੍ਤਿਪਦਬ੍ਯਞ੍ਜਨਾਦੀਹਿ ਕਥੇਨ੍ਤੋ ਅਮ੍ਹੇਹਿ ਞਾਤਮੇਵ ਕਥੇਸ੍ਸਤਿ, ਅਞ੍ਞਾਤਂ ਕਿਂ ਕਥੇਸ੍ਸਤੀ’’ਤਿ ਧਮ੍ਮਸ੍ਸਵਨਤ੍ਥਂ ਨ ਗਚ੍ਛਨ੍ਤਿ. ਸਤ੍ਥਾ ਤਂ ਪਵਤ੍ਤਿਂ ਸੁਤ੍ਵਾ ਤੇ ਪਕ੍ਕੋਸਾਪੇਤ੍ਵਾ ‘‘ਕਸ੍ਮਾ ਏਵਂ ਕਰੋਥ, ਸਕ੍ਕਚ੍ਚਂ ਧਮ੍ਮਂ ਸੁਣਾਥ, ਸਕ੍ਕਚ੍ਚਂ ਧਮ੍ਮਂ ਸੁਣਨ੍ਤਾਨਞ੍ਚ ਸਜ੍ਝਾਯਨ੍ਤਾਨਞ੍ਚ ਇਮੇ ਏਤ੍ਤਕਾ ਆਨਿਸਂਸਾ’’ਤਿ ਦਸ੍ਸੇਨ੍ਤੋ ਇਮਂ ਦੇਸਨਂ ਆਰਭਿ.
ਤਤ੍ਥ ਧਮ੍ਮਂ ਪਰਿਯਾਪੁਣਾਤੀਤਿ ਸੁਤ੍ਤਂ ਗੇਯ੍ਯਨ੍ਤਿਆਦਿਕਂ ਨਵਙ੍ਗਂ ਸਤ੍ਥੁਸਾਸਨਭੂਤਂ ਤਨ੍ਤਿਧਮ੍ਮਂ ਵਲ਼ਞ੍ਜੇਤਿ. ਸੋਤਾਨੁਗਤਾ ਹੋਨ੍ਤੀਤਿ ਸੋਤਂ ਅਨੁਪ੍ਪਤ੍ਤਾ ਅਨੁਪਵਿਟ੍ਠਾ ਹੋਨ੍ਤਿ. ਮਨਸਾਨੁਪੇਕ੍ਖਿਤਾਤਿ ਚਿਤ੍ਤੇਨ ਓਲੋਕਿਤਾ. ਦਿਟ੍ਠਿਯਾ ਸੁਪ੍ਪਟਿਵਿਦ੍ਧਾਤਿ ਅਤ੍ਥਤੋ ਚ ਕਾਰਣਤੋ ਚ ਪਞ੍ਞਾਯ ਸੁਟ੍ਠੁ ਪਟਿਵਿਦ੍ਧਾ ਪਚ੍ਚਕ੍ਖਂ ਕਤਾ. ਮੁਟ੍ਠਸ੍ਸਤਿ ਕਾਲਂ ਕੁਰੁਮਾਨੋਤਿ ਨਯਿਦਂ ਬੁਦ੍ਧਵਚਨਂ ਅਨੁਸ੍ਸਰਣਸਤਿਯਾ ਅਭਾਵੇਨ ਵੁਤ੍ਤਂ, ਪੁਥੁਜ੍ਜਨਕਾਲਕਿਰਿਯਂ ਪਨ ਸਨ੍ਧਾਯ ਵੁਤ੍ਤਂ. ਪੁਥੁਜ੍ਜਨੋ ਹਿ ਮੁਟ੍ਠਸ੍ਸਤਿ ਕਾਲਂ ਕਰੋਤਿ ਨਾਮ. ਉਪਪਜ੍ਜਤੀਤਿ ਸੁਦ੍ਧਸੀਲੇ ਪਤਿਟ੍ਠਿਤੋ ਦੇਵਲੋਕੇ ਨਿਬ੍ਬਤ੍ਤਤਿ. ਧਮ੍ਮਪਦਾ ਪ੍ਲਵਨ੍ਤੀਤਿ ਅਨ੍ਤਰਾਭਵੇ ਨਿਬ੍ਬਤ੍ਤਮੁਟ੍ਠਸ੍ਸਤਿਨੋ, ਯੇਪਿ ਪੁਬ੍ਬੇ ਸਜ੍ਝਾਯਮੂਲਿਕਾ ਵਾਚਾਪਰਿਚਿਤਬੁਦ੍ਧਵਚਨਧਮ੍ਮਾ, ਤੇ ਸਬ੍ਬੇ ਪਸਨ੍ਨੇ ਆਦਾਸੇ ਛਾਯਾ ਵਿਯ ਪ੍ਲਵਨ੍ਤਿ, ਪਾਕਟਾ ਹੁਤ੍ਵਾ ਪਞ੍ਞਾਯਨ੍ਤਿ. ਦਨ੍ਧੋ, ਭਿਕ੍ਖਵੇ, ਸਤੁਪ੍ਪਾਦੋਤਿ ਬੁਦ੍ਧਵਚਨਾਨੁਸ੍ਸਰਣਸਤਿਯਾ ਉਪ੍ਪਾਦੋ ਦਨ੍ਧੋ ਗਰੁ. ਅਥ ਸੋ ਸਤ੍ਤੋ ਖਿਪ੍ਪਂਯੇਵ ਵਿਸੇਸਗਾਮੀ ਹੋਤਿ, ਨਿਬ੍ਬਾਨਗਾਮੀ ਹੋਤੀਤਿ ਅਤ੍ਥੋ.
ਇਦ੍ਧਿਮਾ ਚੇਤੋਵਸਿਪ੍ਪਤ੍ਤੋਤਿ ਇਦ੍ਧਿਸਮ੍ਪਨ੍ਨੋ ਚਿਤ੍ਤਸ੍ਸ ਵਸਿਭਾਵਪਤ੍ਤੋ ਖੀਣਾਸਵੋ. ਅਯਂ ਵਾ ਸੋ ਧਮ੍ਮਵਿਨਯੋਤਿ ਏਤ੍ਥ ਵਿਭਾਵਨਤ੍ਥੋ ਵਾ-ਸਦ੍ਦੋ. ਯਤ੍ਥਾਤਿ ਯਸ੍ਮਿਂ ਧਮ੍ਮਵਿਨਯੇ. ਬ੍ਰਹ੍ਮਚਰਿਯਂ ਅਚਰਿਨ੍ਤਿ ਬ੍ਰਹ੍ਮਚਰਿਯਵਾਸਂ ਵਸਿਂ. ਇਦਮ੍ਪਿ ਬੁਦ੍ਧਵਚਨਂ ਮਯਾ ਪੁਬ੍ਬੇ ਵਲ਼ਞ੍ਜਿਤਨ੍ਤਿ ਬੁਦ੍ਧਵਚਨਾਨੁਸ੍ਸਰਣਵਸੇਨੇਤਂ ਵੁਤ੍ਤਂ. ਦੇਵਪੁਤ੍ਤੋਤਿ ਪਞ੍ਚਾਲਚਣ੍ਡੋ ਵਿਯ ਹਤ੍ਥਕਮਹਾਬ੍ਰਹ੍ਮਾ ਵਿਯ ਸਨਙ੍ਕੁਮਾਰਬ੍ਰਹ੍ਮਾ ਵਿਯ ਚ ਏਕੋ ਧਮ੍ਮਕਥਿਕਦੇਵਪੁਤ੍ਤੋ. ਓਪਪਾਤਿਕੋ ਓਪਪਾਤਿਕਂ ਸਾਰੇਤੀਤਿ ਪਠਮਂ ਉਪ੍ਪਨ੍ਨੋ ਦੇਵਪੁਤ੍ਤੋ ਪਚ੍ਛਾ ਉਪ੍ਪਨ੍ਨਂ ਸਾਰੇਤਿ. ਸਹਪਂਸੁਕੀਲ਼ਿਕਾਤਿ ਏਤੇਨ ਨੇਸਂ ਦੀਘਰਤ੍ਤਂ ਕਤਪਰਿਚਯਭਾਵਂ ਦਸ੍ਸੇਤਿ. ਸਮਾਗਚ੍ਛੇਯ੍ਯੁਨ੍ਤਿ ਸਾਲਾਯ ਵਾ ਰੁਕ੍ਖਮੂਲੇ ਵਾ ਸਮ੍ਮੁਖੀਭਾਵਂ ਗਚ੍ਛੇਯ੍ਯੁਂ. ਏਵਂ ਵਦੇਯ੍ਯਾਤਿ ਸਾਲਾਯ ਵਾ ਰੁਕ੍ਖਮੂਲੇ ਵਾ ਪਠਮਤਰਂ ਨਿਸਿਨ੍ਨੋ ਪਚ੍ਛਾ ਆਗਤਂ ਏਵਂ ਵਦੇਯ੍ਯ. ਸੇਸਮੇਤ੍ਥ ਪਾਲ਼ਿਨਯੇਨੇਵ ਵੇਦਿਤਬ੍ਬਂ.
੨. ਠਾਨਸੁਤ੍ਤਵਣ੍ਣਨਾ
੧੯੨. ਦੁਤਿਯੇ ਠਾਨਾਨੀਤਿ ਕਾਰਣਾਨਿ. ਠਾਨੇਹੀਤਿ ਕਾਰਣੇਹਿ. ਸੋਚੇਯ੍ਯਨ੍ਤਿ ਸੁਚਿਭਾਵੋ. ਸਂਵਸਮਾਨੋਤਿ ਏਕਤੋ ਵਸਮਾਨੋ. ਨ ਸਨ੍ਤਤਕਾਰੀਤਿ ਨ ਸਤਤਕਾਰੀ. ਨ ਸਨ੍ਤਤਵੁਤ੍ਤਿ ਸੀਲੇਸੂਤਿ ਸਤਤਂ ਸਬ੍ਬਕਾਲਂ ਸੀਲਜੀਵਿਤਂ ਨ ਜੀਵਤੀਤਿ ਅਤ੍ਥੋ. ਸਂਵੋਹਾਰਮਾਨੋਤਿ ਕਥੇਨ੍ਤੋ. ਏਕੇਨ ਏਕੋ ਵੋਹਰਤੀਤਿ ਏਕੇਨ ਸਦ੍ਧਿਂ ਏਕੋ ਹੁਤ੍ਵਾ ਕਥੇਤਿ. ਵੋਕ੍ਕਮਤੀਤਿ ਓਕ੍ਕਮਤਿ. ਪੁਰਿਮਵੋਹਾਰਾ ਪਚ੍ਛਿਮਵੋਹਾਰਨ੍ਤਿ ਪੁਰਿਮਕਥਾਯ ਪਚ੍ਛਿਮਕਥਂ, ਪੁਰਿਮਕਥਾਯ ਚ ਪਚ੍ਛਿਮਕਥਾ, ਪਚ੍ਛਿਮਕਥਾਯ ਚ ਪੁਰਿਮਕਥਾ ਨ ਸਮੇਤੀਤਿ ਅਤ੍ਥੋ.
ਞਾਤਿਬ੍ਯਸਨੇਨਾਤਿਆਦੀਸੁ ਞਾਤੀਨਂ ਬ੍ਯਸਨਂ ਞਾਤਿਬ੍ਯਸਨਂ, ਞਾਤਿਵਿਨਾਸੋਤਿ ਅਤ੍ਥੋ. ਦੁਤਿਯਪਦੇਪਿ ਏਸੇਵ ਨਯੋ. ਰੋਗਬ੍ਯਸਨੇ ਪਨ ਰੋਗੋਯੇਵ ਆਰੋਗ੍ਯਵਿਨਾਸਨਤੋ ਬ੍ਯਸਨਂ ਰੋਗਬ੍ਯਸਨਂ. ਅਨੁਪਰਿਵਤ੍ਤਨ੍ਤੀਤਿ ਅਨੁਬਨ੍ਧਨ੍ਤਿ. ਲਾਭੋ ਚਾਤਿਆਦੀਸੁ ਏਕਂ ਅਤ੍ਤਭਾਵਂ ਲਾਭੋ ਅਨੁਪਰਿਵਤ੍ਤਤਿ, ਏਕਂ ਅਲਾਭੋਤਿ ਏਵਂ ਨਯੋ ਨੇਤਬ੍ਬੋ. ਸਾਕਚ੍ਛਾਯਮਾਨੋਤਿ ਪਞ੍ਹਪੁਚ੍ਛਨਵਿਸ੍ਸਜ੍ਜਨਵਸੇਨ ਸਾਕਚ੍ਛਂ ਕਰੋਨ੍ਤੋ. ਯਥਾਤਿ ਯੇਨਾਕਾਰੇਨ. ਉਮ੍ਮਗ੍ਗੋਤਿ ਪਞ੍ਹੁਮ੍ਮਗ੍ਗੋ. ਅਭਿਨੀਹਾਰੋਤਿ ਪਞ੍ਹਾਭਿਸਙ੍ਖਰਣਵਸੇਨ ਚਿਤ੍ਤਸ੍ਸ ਅਭਿਨੀਹਾਰੋ. ਸਮੁਦਾਹਾਰੋਤਿ ਪਞ੍ਹਪੁਚ੍ਛਨਂ. ਸਨ੍ਤਨ੍ਤਿ ਪਚ੍ਚਨੀਕਸਨ੍ਤਤਾਯ ਸਨ੍ਤਂ ਕਤ੍ਵਾ ਨ ਕਥੇਤੀਤਿ ਅਤ੍ਥੋ. ਪਣੀਤਨ੍ਤਿ ਅਤਪ੍ਪਕਂ. ਅਤਕ੍ਕਾਵਚਰਨ੍ਤਿ ਯਥਾ ਤਕ੍ਕੇਨ ਨਯਗ੍ਗਾਹੇਨ ਗਹੇਤੁਂ ਸਕ੍ਕਾ ਹੋਤਿ, ਏਵਂ ਨ ਕਥੇਤੀਤਿ ਅਤ੍ਥੋ. ਨਿਪੁਣਨ੍ਤਿ ਸਣ੍ਹਂ. ਪਣ੍ਡਿਤਵੇਦਨੀਯਨ੍ਤਿ ਪਣ੍ਡਿਤੇਹਿ ਜਾਨਿਤਬ੍ਬਕਂ. ਸੇਸਂ ਸਬ੍ਬਤ੍ਥ ਵੁਤ੍ਤਾਨੁਸਾਰੇਨੇਵ ਵੇਦਿਤਬ੍ਬਂ.
੩. ਭਦ੍ਦਿਯਸੁਤ੍ਤਵਣ੍ਣਨਾ
੧੯੩. ਤਤਿਯੇ ਉਪਸਙ੍ਕਮੀਤਿ ਭੁਤ੍ਤਪਾਤਰਾਸੋ ਹੁਤ੍ਵਾ ਮਾਲਾਗਨ੍ਧਵਿਲੇਪਨਂ ਗਹੇਤ੍ਵਾ ਭਗਵਨ੍ਤਂ ਵਨ੍ਦਿਸ੍ਸਾਮੀਤਿ ਉਪਸਙ੍ਕਮਿ. ਮਾ ਅਨੁਸ੍ਸਵੇਨਾਤਿਆਦੀਸੁ ਅਨੁਸ੍ਸਵਵਚਨੇਨ ਮਮ ਕਥਂ ਮਾ ਗਣ੍ਹਥਾਤਿ ਇਮਿਨਾ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਸਾਰਮ੍ਭੋਤਿ ਕਰਣੁਤ੍ਤਰਿਯਲਕ੍ਖਣੋ ਸਾਰਮ੍ਭੋ. ਅਲੋਭਾਦਯੋ ਲੋਭਾਦਿਪਟਿਪਕ੍ਖਵਸੇਨ ਵੇਦਿਤਬ੍ਬਾ. ਕੁਸਲਧਮ੍ਮੂਪਸਮ੍ਪਦਾਯਾਤਿ ਕੁਸਲਧਮ੍ਮਾਨਂ ਸਮ੍ਪਾਦਨਤ੍ਥਾਯ, ਪਟਿਲਾਭਤ੍ਥਾਯਾਤਿ ਵੁਤ੍ਤਂ ਹੋਤਿ. ਇਮੇ ਚੇਪਿ, ਭਦ੍ਦਿਯ, ਮਹਾਸਾਲਾਤਿ ਪੁਰਤੋ ਠਿਤੇ ਸਾਲਰੁਕ੍ਖੇ ਦਸ੍ਸੇਨ੍ਤੋ ਏਵਮਾਹ. ਸੇਸਮੇਤ੍ਥ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਤ੍ਤਾ ਚ ਸੁਵਿਞ੍ਞੇਯ੍ਯਮੇਵ. ਸਤ੍ਥਰਿ ਪਨ ਦੇਸਨਂ ਵਿਨਿਵਟ੍ਟੇਨ੍ਤੇ ਭਦ੍ਦਿਯੋ ਸੋਤਾਪਨ੍ਨੋ ਜਾਤੋਤਿ.
੪. ਸਾਮੁਗਿਯਾਸੁਤ੍ਤਵਣ੍ਣਨਾ
੧੯੪. ਚਤੁਤ੍ਥੇ ਸਾਮੁਗਿਯਾਤਿ ਸਾਮੁਗਨਿਗਮਵਾਸਿਨੋ. ਬ੍ਯਗ੍ਘਪਜ੍ਜਾਤਿ ਤੇ ਆਲਪਨ੍ਤੋ ਏਵਮਾਹ. ਕੋਲਨਗਰਸ੍ਸ ਹਿ ਕੋਲਰੁਕ੍ਖੇ ਹਾਰੇਤ੍ਵਾ ਕਤਤ੍ਤਾ ਕੋਲਨਗਰਨ੍ਤਿ ਚ ਬ੍ਯਗ੍ਘਪਥੇ ਮਾਪਿਤਤ੍ਤਾ ਬ੍ਯਗ੍ਘਪਜ੍ਜਨ੍ਤਿ ਚ ਦ੍ਵੇ ਨਾਮਾਨਿ. ਏਤੇਸਞ੍ਚ ਪੁਬ੍ਬਪੁਰਿਸਾ ਤਤ੍ਥ ਵਸਿਂਸੂਤਿ ਬ੍ਯਗ੍ਘਪਜ੍ਜਵਾਸਿਤਾਯ ਬ੍ਯਗ੍ਘਪਜ੍ਜਵਾਸਿਨੋ ਬ੍ਯਗ੍ਘਪਜ੍ਜਾਤਿ ਵੁਚ੍ਚਨ੍ਤਿ. ਤੇ ਆਲਪਨ੍ਤੋ ਏਵਮਾਹ. ਪਾਰਿਸੁਦ੍ਧਿਪਧਾਨਿਯਙ੍ਗਾਨੀਤਿ ਪਾਰਿਸੁਦ੍ਧਿਅਤ੍ਥਾਯ ਪਧਾਨਿਯਙ੍ਗਾਨਿ ਪਦਹਿਤਬ੍ਬਵੀਰਿਯਸ੍ਸ ਅਙ੍ਗਾਨਿ, ਕੋਟ੍ਠਾਸਾਤਿ ਅਤ੍ਥੋ. ਸੀਲਪਾਰਿਸੁਦ੍ਧਿਪਧਾਨਿਯਙ੍ਗਨ੍ਤਿ ਸੀਲਪਰਿਸੋਧਨਵੀਰਿਯਸ੍ਸੇਤਂ ਨਾਮਂ. ਤਞ੍ਹਿ ਸੀਲਪਾਰਿਸੁਦ੍ਧਿਪਰਿਪੂਰਣਤ੍ਥਾਯ ਪਧਾਨਿਯਙ੍ਗਨ੍ਤਿ ਸੀਲਪਾਰਿਸੁਦ੍ਧਿਪਧਾਨਿਯਙ੍ਗਂ. ਸੇਸੇਸੁਪਿ ਏਸੇਵ ਨਯੋ. ਤਤ੍ਥ ਤਤ੍ਥ ਪਞ੍ਞਾਯ ਅਨੁਗ੍ਗਹੇਸ੍ਸਾਮੀਤਿ ਤਸ੍ਮਿਂ ਤਸ੍ਮਿਂ ਠਾਨੇ ਵਿਪਸ੍ਸਨਾਪਞ੍ਞਾਯ ਅਨੁਗ੍ਗਹੇਸ੍ਸਾਮਿ. ਯੋ ਤਤ੍ਥ ਛਨ੍ਦੋਤਿਆਦੀਸੁ ਯੋ ਤਸ੍ਮਿਂ ਅਨੁਗ੍ਗਣ੍ਹਨੇ ਕਤ੍ਤੁਕਾਮਤਾਛਨ੍ਦੋਤਿ ਇਮਿਨਾ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਸਤਿਸਮ੍ਪਜਞ੍ਞਂ ਪਨੇਤ੍ਥ ਸਤਿਂ ਉਪਟ੍ਠਪੇਤ੍ਵਾ ਞਾਣੇਨ ਪਰਿਚ੍ਛਿਨ੍ਦਿਤ੍ਵਾ ਵੀਰਿਯਪਗ੍ਗਹਨਤ੍ਥਂ ਵੁਤ੍ਤਂ. ਰਜਨੀਯੇਸੁ ਧਮ੍ਮੇਸੁ ਚਿਤ੍ਤਂ ਵਿਰਾਜੇਤੀਤਿ ਰਾਗਪਚ੍ਚਯੇਸੁ ਇਟ੍ਠਾਰਮ੍ਮਣੇਸੁ ਯਥਾ ਚਿਤ੍ਤਂ ਵਿਰਜ੍ਜਤਿ, ਏਵਂ ਕਰੋਤਿ. ਵਿਮੋਚਨੀਯੇਸੁ ਧਮ੍ਮੇਸੁ ਚਿਤ੍ਤਂ ਵਿਮੋਚੇਤੀਤਿ ਯੇਹਿ ਆਰਮ੍ਮਣੇਹਿ ਚਿਤ੍ਤਂ ਵਿਮੋਚੇਤਬ੍ਬਂ, ਤੇਸੁ ਯਥਾ ਵਿਮੁਚ੍ਚਤਿ, ਏਵਂ ਕਰੋਤਿ. ਵਿਰਾਜੇਤ੍ਵਾਤਿ ਏਤ੍ਥ ਮਗ੍ਗਕ੍ਖਣੇ ਵਿਰਾਜੇਤਿ ਨਾਮ, ਫਲਕ੍ਖਣੇ ਵਿਰਤ੍ਤਂ ਨਾਮ ਹੋਤਿ. ਦੁਤਿਯਪਦੇਪਿ ਏਸੇਵ ਨਯੋ. ਸਮ੍ਮਾਵਿਮੁਤ੍ਤਿਂ ਫੁਸਤੀਤਿ ਹੇਤੁਨਾ ਨਯੇਨ ਅਰਹਤ੍ਤਫਲਵਿਮੁਤ੍ਤਿਂ ਞਾਣਫਸ੍ਸੇਨ ਫੁਸਤੀਤਿ.
੫. ਵਪ੍ਪਸੁਤ੍ਤਵਣ੍ਣਨਾ
੧੯੫. ਪਞ੍ਚਮੇ ਵਪ੍ਪੋਤਿ ਦਸਬਲਸ੍ਸ ਚੂਲ਼ਪਿਤਾ ਸਕ੍ਯਰਾਜਾ. ਨਿਗਣ੍ਠਸਾਵਕੋਤਿ ਵੇਸਾਲਿਯਂ ਸੀਹਸੇਨਾਪਤਿ ਵਿਯ ਨਾਲ਼ਨ੍ਦਾਯਂ ਉਪਾਲਿਗਹਪਤਿ ਵਿਯ ਚ ਨਿਗਣ੍ਠਸ੍ਸ ਨਾਟਪੁਤ੍ਤਸ੍ਸ ਉਪਟ੍ਠਾਕੋ. ਕਾਯੇਨ ਸਂਵੁਤੋਤਿ ਕਾਯਦ੍ਵਾਰਸ੍ਸ ਸਂਵੁਤਤ੍ਤਾ ਪਿਹਿਤਤ੍ਤਾ ਕਾਯੇਨ ਸਂਵੁਤੋ ਨਾਮ. ਸੇਸਦ੍ਵਯੇਪਿ ਏਸੇਵ ਨਯੋ. ਅਵਿਜ੍ਜਾਵਿਰਾਗਾਤਿ ਅਵਿਜ੍ਜਾਯ ਖਯਵਿਰਾਗੇਨ. ਵਿਜ੍ਜੁਪ੍ਪਾਦਾਤਿ ਮਗ੍ਗਵਿਜ੍ਜਾਯ ਉਪ੍ਪਾਦੇਨ. ਤਂ ਠਾਨਨ੍ਤਿ ਤਂ ਕਾਰਣਂ. ਅਵਿਪਕ੍ਕਵਿਪਾਕਨ੍ਤਿ ਅਲਦ੍ਧਵਿਪਾਕਵਾਰਂ. ਤਤੋਨਿਦਾਨਨ੍ਤਿ ਤਂਹੇਤੁ ਤਪ੍ਪਚ੍ਚਯਾ. ਦੁਕ੍ਖਵੇਦਨਿਯਾ ਆਸਵਾ ਅਸ੍ਸਵੇਯ੍ਯੁਨ੍ਤਿ ਦੁਕ੍ਖਵੇਦਨਾਯ ਪਚ੍ਚਯਭੂਤਾ ਕਿਲੇਸਾ ਅਸ੍ਸਵੇਯ੍ਯੁਂ, ਤਸ੍ਸ ਪੁਰਿਸਸ੍ਸ ਉਪ੍ਪਜ੍ਜੇਯ੍ਯੁਨ੍ਤਿ ਅਤ੍ਥੋ. ਅਭਿਸਮ੍ਪਰਾਯਨ੍ਤਿ ਦੁਤਿਯੇ ਅਤ੍ਤਭਾਵੇ. ਕਾਯਸਮਾਰਮ੍ਭਪਚ੍ਚਯਾਤਿ ਕਾਯਕਮ੍ਮਪਚ੍ਚਯੇਨ. ਆਸਵਾਤਿ ਕਿਲੇਸਾ. ਵਿਘਾਤਪਰਿਲ਼ਾਹਾਤਿ ਏਤ੍ਥ ਵਿਘਾਤੋਤਿ ਦੁਕ੍ਖਂ. ਪਰਿਲ਼ਾਹੋਤਿ ਕਾਯਿਕਚੇਤਸਿਕੋ ਪਰਿਲ਼ਾਹੋ. ਫੁਸ੍ਸ ਫੁਸ੍ਸ ਬ੍ਯਨ੍ਤੀਕਰੋਤੀਤਿ ਞਾਣਵਜ੍ਝਂ ਕਮ੍ਮਂ ਞਾਣਫਸ੍ਸੇਨ ਫੁਸਿਤ੍ਵਾ ਫੁਸਿਤ੍ਵਾ ਖਯਂ ਗਮੇਤਿ, ਵਿਪਾਕਵਜ੍ਝਂ ਕਮ੍ਮਂ ਵਿਪਾਕਫਸ੍ਸੇਨ ਫੁਸਿਤ੍ਵਾ ਫੁਸਿਤ੍ਵਾ ਖਯਂ ਗਮੇਤਿ. ਨਿਜ੍ਜਰਾਤਿ ਕਿਲੇਸਜੀਰਣਕਪਟਿਪਦਾ. ਸੇਸਵਾਰੇਸੁਪਿ ਏਸੇਵ ਨਯੋ. ਇਧ ਠਤ੍ਵਾ ਅਯਂ ਭਿਕ੍ਖੁ ਖੀਣਾਸਵੋ ਕਾਤਬ੍ਬੋ, ਚਤ੍ਤਾਰਿ ਮਹਾਭੂਤਾਨਿ ਨੀਹਰਿਤ੍ਵਾ ਚਤੁਸਚ੍ਚਵਵਤ੍ਥਾਨਂ ਦਸ੍ਸੇਤ੍ਵਾ ਯਾਵ ਅਰਹਤ੍ਤਫਲਂ ਕਮ੍ਮਟ੍ਠਾਨਂ ਕਥੇਤਬ੍ਬਂ.
ਇਦਾਨਿ ਪਨ ਤਸ੍ਸ ਖੀਣਾਸਵਸ੍ਸ ਸਤਤਵਿਹਾਰੇ ਦਸ੍ਸੇਤੁਂ ਏਵਂ ਸਮ੍ਮਾ ਵਿਮੁਤ੍ਤਚਿਤ੍ਤਸ੍ਸਾਤਿਆਦਿਮਾਹ. ਤਤ੍ਥ ਸਮ੍ਮਾ ਵਿਮੁਤ੍ਤਚਿਤ੍ਤਸ੍ਸਾਤਿ ਹੇਤੁਨਾ ਕਾਰਣੇਨ ਸਮ੍ਮਾ ਵਿਮੁਤ੍ਤਸ੍ਸ. ਸਤਤਵਿਹਾਰਾਤਿ ਨਿਚ੍ਚਵਿਹਾਰਾ ਨਿਬਦ੍ਧਵਿਹਾਰਾ. ਨੇਵ ਸੁਮਨੋ ਹੋਤੀਤਿ ਇਟ੍ਠਾਰਮ੍ਮਣੇ ਰਾਗਵਸੇਨ ਨ ਸੋਮਨਸ੍ਸਜਾਤੋ ਹੋਤਿ. ਨ ਦੁਮ੍ਮਨੋਤਿ ਅਨਿਟ੍ਠਾਰਮ੍ਮਣੇ ਪਟਿਘਵਸੇਨ ਨ ਦੋਮਨਸ੍ਸਜਾਤੋ ਹੋਤਿ. ਉਪੇਕ੍ਖਕੋ ਵਿਹਰਤਿ ਸਤੋ ਸਮ੍ਪਜਾਨੋਤਿ ਸਤਿਸਮ੍ਪਜਞ੍ਞਪਰਿਗ੍ਗਹਿਤਾਯ ਮਜ੍ਝਤ੍ਤਾਕਾਰਲਕ੍ਖਣਾਯ ਉਪੇਕ੍ਖਾਯ ਤੇਸੁ ਆਰਮ੍ਮਣੇਸੁ ਉਪੇਕ੍ਖਕੋ ਮਜ੍ਝਤ੍ਤੋ ਹੁਤ੍ਵਾ ਵਿਹਰਤਿ.
ਕਾਯਪਰਿਯਨ੍ਤਿਕਨ੍ਤਿ ਕਾਯਨ੍ਤਿਕਂ ਕਾਯਪਰਿਚ੍ਛਿਨ੍ਨਂ, ਯਾਵ ਪਞ੍ਚਦ੍ਵਾਰਕਾਯੋ ਪਵਤ੍ਤਤਿ, ਤਾਵ ਪਵਤ੍ਤਂ ਪਞ੍ਚਦ੍ਵਾਰਿਕਵੇਦਨਨ੍ਤਿ ਅਤ੍ਥੋ. ਜੀਵਿਤਪਰਿਯਨ੍ਤਿਕਨ੍ਤਿ ਜੀਵਿਤਨ੍ਤਿਕਂ ਜੀਵਿਤਪਰਿਚ੍ਛਿਨ੍ਨਂ, ਯਾਵ ਜੀਵਿਤਂ ਪਵਤ੍ਤਤਿ, ਤਾਵ ਪਵਤ੍ਤਂ ਮਨੋਦ੍ਵਾਰਿਕਵੇਦਨਨ੍ਤਿ ਅਤ੍ਥੋ. ਤਤ੍ਥ ਪਞ੍ਚਦ੍ਵਾਰਿਕਵੇਦਨਾ ਪਚ੍ਛਾ ਉਪ੍ਪਜ੍ਜਿਤ੍ਵਾ ਪਠਮਂ ਨਿਰੁਜ੍ਝਤਿ, ਮਨੋਦ੍ਵਾਰਿਕਵੇਦਨਾ ਪਠਮਂ ਉਪ੍ਪਜ੍ਜਿਤ੍ਵਾ ਪਚ੍ਛਾ ਨਿਰੁਜ੍ਝਤਿ. ਸਾ ਹਿ ਪਟਿਸਨ੍ਧਿਕ੍ਖਣੇ ਵਤ੍ਥੁਰੂਪਸ੍ਮਿਂਯੇਵ ਪਤਿਟ੍ਠਾਤਿ. ਪਞ੍ਚਦ੍ਵਾਰਿਕਾ ਪਵਤ੍ਤੇ ਪਞ੍ਚਦ੍ਵਾਰਵਸੇਨ ਪਵਤ੍ਤਮਾਨਾ ਪਠਮਵਯੇ ਵੀਸਤਿਵਸ੍ਸਕਾਲੇ ਰਜ੍ਜਨਦੁਸ੍ਸਨਮੁਯ੍ਹਨਵਸੇਨ ਅਧਿਮਤ੍ਤਾ ਬਲਵਤੀ ਹੋਤਿ, ਪਣ੍ਣਾਸਵਸ੍ਸਕਾਲੇ ਠਿਤਾ ਹੋਤਿ, ਸਟ੍ਠਿਵਸ੍ਸਕਾਲਤੋ ਪਟ੍ਠਾਯ ਪਰਿਹਾਯਮਾਨਾ, ਅਸੀਤਿਨਵੁਤਿਵਸ੍ਸਕਾਲੇ ਮਨ੍ਦਾ ਹੋਤਿ. ਤਦਾ ਹਿ ਸਤ੍ਤਾ ‘‘ਚਿਰਰਤ੍ਤਂ ਏਕਤੋ ਨਿਸੀਦਿਮ੍ਹਾ ਨਿਪਜ੍ਜਿਮ੍ਹਾ’’ਤਿ ਵਦਨ੍ਤੇਪਿ ਨ ਜਾਨਾਮਾਤਿ ਵਦਨ੍ਤਿ. ਅਧਿਮਤ੍ਤਾਨਿਪਿ ਰੂਪਾਦਿਆਰਮ੍ਮਣਾਨਿ ਨ ਪਸ੍ਸਾਮ, ਸੁਗਨ੍ਧਦੁਗ੍ਗਨ੍ਧਂ ਵਾ ਸਾਦੁਅਸਾਦੁਂ ਵਾ ਥਦ੍ਧਮੁਦੁਕਂ ਵਾਤਿ ਨ ਜਾਨਾਮਾਤਿਪਿ ਵਦਨ੍ਤਿ. ਇਤਿ ਨੇਸਂ ਪਞ੍ਚਦ੍ਵਾਰਿਕਵੇਦਨਾ ਭਗ੍ਗਾ ਹੋਤਿ, ਮਨੋਦ੍ਵਾਰਿਕਾ ਪਵਤ੍ਤਤਿ. ਸਾਪਿ ਅਨੁਪੁਬ੍ਬੇਨ ਪਰਿਹਾਯਮਾਨਾ ਮਰਣਸਮਯੇ ਹਦਯਕੋਟਿਂਯੇਵ ਨਿਸ੍ਸਾਯ ਪਵਤ੍ਤਤਿ. ਯਾਵ ਪਨੇਸਾ ਪਵਤ੍ਤਤਿ, ਤਾਵ ਸਤ੍ਤੋ ਜੀਵਤੀਤਿ ਵੁਚ੍ਚਤਿ. ਯਦਾ ਨਪ੍ਪਵਤ੍ਤਤਿ, ਤਦਾ ‘‘ਮਤੋ ਨਿਰੁਦ੍ਧੋ’’ਤਿ ਵੁਚ੍ਚਤਿ.
ਸ੍ਵਾਯਮਤ੍ਥੋ ਵਾਪਿਯਾ ਦੀਪੇਤਬ੍ਬੋ – ਯਥਾ ਹਿ ਪੁਰਿਸੋ ਪਞ੍ਚਉਦਕਮਗ੍ਗਸਮ੍ਪਨ੍ਨਂ ਵਾਪਿਂ ਕਰੇਯ੍ਯ. ਪਠਮਂ ਦੇਵੇ ਵੁਟ੍ਠੇ ਪਞ੍ਚਹਿ ਉਦਕਮਗ੍ਗੇਹਿ ਉਦਕਂ ਪਵਿਸਿਤ੍ਵਾ ਅਨ੍ਤੋਵਾਪਿਯਂ ਆਵਾਟੇ ਪੂਰੇਯ੍ਯ. ਪੁਨਪ੍ਪੁਨਂ ਦੇਵੇ ਵਸ੍ਸਨ੍ਤੇ ਉਦਕਮਗ੍ਗੇ ਪੂਰੇਤ੍ਵਾ ਗਾਵੁਤਡ੍ਢਯੋਜਨਮਤ੍ਤਂ ਓਤ੍ਥਰਿਤ੍ਵਾ ਉਦਕਂ ਤਿਟ੍ਠੇਯ੍ਯ ਤਤੋ ਤਤੋ ਵਿਸ੍ਸਨ੍ਦਮਾਨਂ. ਅਥ ਨਿਦ੍ਧਮਨਤੁਮ੍ਬੇ ਵਿਵਰਿਤ੍ਵਾ ਖੇਤ੍ਤੇਸੁ ਕਮ੍ਮੇ ਕਯਿਰਮਾਨੇ ਉਦਕਂ ਨਿਕ੍ਖਮਨ੍ਤਂ, ਸਸ੍ਸਪਾਕਕਾਲੇ ਉਦਕਂ ਨਿਕ੍ਖਨ੍ਤਂ ਉਦਕਂ ਪਰਿਹੀਨਂ, ‘‘ਮਚ੍ਛੇ ਗਣ੍ਹਾਮਾ’’ਤਿ ਵਤ੍ਤਬ੍ਬਤਂ ਆਪਜ੍ਜੇਯ੍ਯ. ਤਤੋ ਕਤਿਪਾਹੇਨ ਆਵਾਟੇਸੁਯੇਵ ਉਦਕਂ ਸਣ੍ਠਹੇਯ. ਯਾਵ ਪਨ ਤਂ ਆਵਾਟੇਸੁ ਹੋਤਿ, ਤਾਵ ਮਹਾਵਾਪਿਯਂ ਉਦਕਂ ਅਤ੍ਥੀਤਿ ਸਙ੍ਖਂ ਗਚ੍ਛਤਿ. ਯਦਾ ਪਨ ਤਤ੍ਥ ਛਿਜ੍ਜਤਿ, ਤਦਾ ‘‘ਵਾਪਿਯਂ ਉਦਕਂ ਨਤ੍ਥੀ’’ਤਿ ਵੁਚ੍ਚਤਿ. ਏਵਂ ਸਮ੍ਪਦਮਿਦਂ ਵੇਦਿਤਬ੍ਬਂ.
ਪਠਮਂ ਦੇਵੇ ਵਸ੍ਸਨ੍ਤੇ ਪਞ੍ਚਹਿ ਮਗ੍ਗੇਹਿ ਉਦਕੇ ਪਵਿਸਨ੍ਤੇ ਆਵਾਟਾਨਂ ਪੂਰਣਕਾਲੋ ਵਿਯ ਹਿ ਪਠਮਮੇਵ ਪਟਿਸਨ੍ਧਿਕ੍ਖਣੇ ਮਨੋਦ੍ਵਾਰਿਕਵੇਦਨਾਯ ਵਤ੍ਥੁਰੂਪੇ ਪਤਿਟ੍ਠਿਤਕਾਲੋ, ਪੁਨਪ੍ਪੁਨਂ ਦੇਵੇ ਵਸ੍ਸਨ੍ਤੇ ਪਞ੍ਚਮਗ੍ਗਾਨਂ ਪੂਰਣਕਾਲੋ ਵਿਯ ਪਵਤ੍ਤੇ ਪਞ੍ਚਦ੍ਵਾਰਿਕਵੇਦਨਾਯ ਪਵਤ੍ਤਿ, ਗਾਵੁਤਡ੍ਢਯੋਜਨਮਤ੍ਤਂ ਅਜ੍ਝੋਤ੍ਥਰਣਂ ਵਿਯ ਪਠਮਵਯੇ ਵੀਸਤਿਵਸ੍ਸਕਾਲੇ ਰਜ੍ਜਨਾਦਿਵਸੇਨ ਤਸ੍ਸ ਅਧਿਮਤ੍ਤਬਲਵਭਾਵੋ, ਯਾਵ ਵਾਪਿਤੋ ਉਦਕਂ ਨ ਨਿਗ੍ਗਚ੍ਛਤਿ, ਤਾਵ ਪੂਰਾਯ ਵਾਪਿਯਾ ਠਿਤਕਾਲੋ ਵਿਯ ਪਞ੍ਞਾਸਵਸ੍ਸਕਾਲੇ ਤਸ੍ਸ ਠਿਤਕਾਲੋ, ਨਿਦ੍ਧਮਨਤੁਮ੍ਬੇਸੁ ਵਿਵਟੇਸੁ ਕਮ੍ਮੇ ਕਯਿਰਮਾਨੇ ਉਦਕਸ੍ਸ ਨਿਕ੍ਖਮਨਕਾਲੋ ਵਿਯ ਸਟ੍ਠਿਵਸ੍ਸਕਾਲਤੋ ਪਟ੍ਠਾਯ ਤਸ੍ਸ ਪਰਿਹਾਨਿ, ਉਦਕੇ ਭਟ੍ਠੇ ਉਦਕਮਗ੍ਗੇਸੁ ਪਰਿਤ੍ਤਉਦਕਸ੍ਸ ਠਿਤਕਾਲੋ ਵਿਯ ਅਸੀਤਿਨਵੁਤਿਕਾਲੇ ਪਞ੍ਚਦ੍ਵਾਰਿਕਵੇਦਨਾਯ ਮਨ੍ਦਕਾਲੋ, ਆਵਾਟੇਸੁਯੇਵ ਉਦਕਸ੍ਸ ਪਤਿਟ੍ਠਿਤਕਾਲੋ ਵਿਯ ਹਦਯਵਤ੍ਥੁਕੋਟਿਂ ਨਿਸ੍ਸਾਯ ਮਨੋਦ੍ਵਾਰੇ ਵੇਦਨਾਯ ਪਵਤ੍ਤਿਕਾਲੋ, ਆਵਾਟੇਸੁ ਪਰਿਤ੍ਤੇਪਿ ਉਦਕੇ ਸਤਿ ‘‘ਵਾਪਿਯਂ ਉਦਕਂ ਅਤ੍ਥੀ’’ਤਿ ਵਤ੍ਤਬ੍ਬਕਾਲੋ ਵਿਯ ਯਾਵ ਸਾ ਪਵਤ੍ਤਤਿ, ਤਾਵ ‘‘ਸਤ੍ਤੋ ਜੀਵਤੀ’’ਤਿ ਵੁਚ੍ਚਤਿ. ਯਥਾ ਪਨ ਆਵਾਟੇਸੁ ਉਦਕੇ ਛਿਨ੍ਨੇ ‘‘ਨਤ੍ਥਿ ਵਾਪਿਯਂ ਉਦਕ’’ਨ੍ਤਿ ਵੁਚ੍ਚਤਿ, ਏਵਂ ਮਨੋਦ੍ਵਾਰਿਕਵੇਦਨਾਯ ਅਪ੍ਪਵਤ੍ਤਮਾਨਾਯ ਸਤ੍ਤੋ ਮਤੋਤਿ ਵੁਚ੍ਚਤਿ. ਇਮਂ ਵੇਦਨਂ ਸਨ੍ਧਾਯ ਵੁਤ੍ਤਂ – ‘‘ਜੀਵਿਤਪਰਿਯਨ੍ਤਿਕਂ ਵੇਦਨਂ ਵੇਦਿਯਮਾਨੋ’’ਤਿ.
ਕਾਯਸ੍ਸ ਭੇਦਾਤਿ ਕਾਯਸ੍ਸ ਭੇਦੇਨ. ਉਦ੍ਧਂ ਜੀਵਿਤਪਰਿਯਾਦਾਨਾਤਿ ਜੀਵਿਤਕ੍ਖਯਤੋ ਉਦ੍ਧਂ. ਇਧੇਵਾਤਿ ਪਟਿਸਨ੍ਧਿਵਸੇਨ ਪਰਤੋ ਅਗਨ੍ਤ੍ਵਾ ਇਧੇਵ. ਸੀਤੀ ਭਵਿਸ੍ਸਨ੍ਤੀਤਿ ਪਵਤ੍ਤਿਵਿਪ੍ਫਨ੍ਦਨਦਰਥਰਹਿਤਾਨਿ ਸੀਤਾਨਿ ਅਪ੍ਪਵਤ੍ਤਨਧਮ੍ਮਾਨਿ ਭਵਿਸ੍ਸਨ੍ਤਿ.
ਥੂਣਂ ਪਟਿਚ੍ਚਾਤਿ ਰੁਕ੍ਖਂ ਪਟਿਚ੍ਚ. ਕੁਦ੍ਦਾਲਪਿਟਕਂ ਆਦਾਯਾਤਿ ਕੁਦ੍ਦਾਲਞ੍ਚ ਖਣਿਤ੍ਤਿਞ੍ਚ ਪਚ੍ਛਿਞ੍ਚ ਗਹੇਤ੍ਵਾਤਿ ਅਤ੍ਥੋ. ਦੇਸਨਾ ਪਨ ਕੁਦ੍ਦਾਲਵਸੇਨੇਵ ਕਤਾ. ਮੂਲੇ ਛਿਨ੍ਦੇਯ੍ਯਾਤਿ ਮੂਲਮ੍ਹਿ ਕੁਦ੍ਦਾਲੇਨ ਛਿਨ੍ਦੇਯ੍ਯ. ਪਲਿਖਣੇਯ੍ਯਾਤਿ ਖਣਿਤ੍ਤਿਯਾ ਸਮਨ੍ਤਾ ਖਣੇਯ੍ਯ.
ਏਵਮੇਵ ਖੋਤਿ ਏਤ੍ਥ ਇਦਂ ਓਪਮ੍ਮਸਂਸਨ੍ਦਨਂ – ਰੁਕ੍ਖੋ ਵਿਯ ਹਿ ਅਤ੍ਤਭਾਵੋ ਦਟ੍ਠਬ੍ਬੋ, ਰੁਕ੍ਖਂ ਪਟਿਚ੍ਚ ਛਾਯਾ ਵਿਯ ਕੁਸਲਾਕੁਸਲਂ ਕਮ੍ਮਂ, ਛਾਯਂ ਅਪ੍ਪਵਤ੍ਤਂ ਕਾਤੁਕਾਮੋ ਪੁਰਿਸੋ ਵਿਯ ਯੋਗਾਵਚਰੋ, ਕੁਦ੍ਦਾਲੋ ਵਿਯ ਪਞ੍ਞਾ, ਪਿਟਕਂ ਵਿਯ ਸਮਾਧਿ, ਖਣਿਤ੍ਤਿ ਵਿਯ ਵਿਪਸ੍ਸਨਾ, ਖਣਿਤ੍ਤਿਯਾ ਮੂਲਾਨਂ ਪਲਿਖਣਨਕਾਲੋ ਵਿਯ ਅਰਹਤ੍ਤਮਗ੍ਗੇਨ ਅਵਿਜ੍ਜਾਯ ਛੇਦਨਕਾਲੋ, ਖਣ੍ਡਾਖਣ੍ਡਂ ਕਰਣਕਾਲੋ ਵਿਯ ਖਨ੍ਧਵਸੇਨ ਦਿਟ੍ਠਕਾਲੋ, ਫਾਲਨਕਾਲੋ ਵਿਯ ਆਯਤਨਵਸੇਨ ਦਿਟ੍ਠਕਾਲੋ, ਸਕਲੀਕਰਣਕਾਲੋ ਵਿਯ ਧਾਤੁਵਸੇਨ ਦਿਟ੍ਠਕਾਲੋ, ਵਾਤਾਤਪੇਨ ਵਿਸੋਸਨਕਾਲੋ ਵਿਯ ਕਾਯਿਕਚੇਤਸਿਕਸ੍ਸ ਵੀਰਿਯਸ੍ਸ ਕਰਣਕਾਲੋ, ਅਗ੍ਗਿਨਾ ਡਹਨਕਾਲੋ ਵਿਯ ਞਾਣੇਨ ਕਿਲੇਸਾਨਂ ਡਹਨਕਾਲੋ, ਮਸਿਕਰਣਕਾਲੋ ਵਿਯ ਵਤ੍ਤਮਾਨਕ-ਪਞ੍ਚਕ੍ਖਨ੍ਧਕਾਲੋ, ਮਹਾਵਾਤੇ ਓਫੁਨਨਕਾਲੋ ਵਿਯ ਨਦੀਸੋਤੇ ਪਵਾਹਨਕਾਲੋ ਵਿਯ ਚ ਛਿਨ੍ਨਮੂਲਕਾਨਂ ਪਞ੍ਚਨ੍ਨਂ ਖਨ੍ਧਾਨਂ ਅਪ੍ਪਟਿਸਨ੍ਧਿਕਨਿਰੋਧੋ, ਓਫੁਨਨਪ੍ਪਵਾਹਨੇਹਿ ਅਪਞ੍ਞਤ੍ਤਿਕਭਾਵੂਪਗਮੋ ਵਿਯ ਪੁਨਬ੍ਭਵੇ ਵਿਪਾਕਕ੍ਖਨ੍ਧਾਨਂ ਅਨੁਪ੍ਪਾਦੇਨ ਅਪਣ੍ਣਤ੍ਤਿਕਭਾਵੋ ਵੇਦਿਤਬ੍ਬੋ.
ਭਗਵਨ੍ਤਂ ਏਤਦਵੋਚਾਤਿ ਸਤ੍ਥਰਿ ਦੇਸਨਂ ਵਿਨਿਵਟ੍ਟੇਨ੍ਤੇ ਸੋਤਾਪਤ੍ਤਿਫਲਂ ਪਤ੍ਵਾ ਏਤਂ ‘‘ਸੇਯ੍ਯਥਾਪਿ, ਭਨ੍ਤੇ’’ਤਿਆਦਿਵਚਨਂ ਅਵੋਚ. ਤਤ੍ਥ ਉਦਯਤ੍ਥਿਕੋਤਿ ਵਡ੍ਢਿਅਤ੍ਥਿਕੋ. ਅਸ੍ਸਪਣਿਯਂ ਪੋਸੇਯ੍ਯਾਤਿ ਪਞ੍ਚ ਅਸ੍ਸਪੋਤਸਤਾਨਿ ਕਿਣਿਤ੍ਵਾ ਪਚ੍ਛਾ ਵਿਕ੍ਕਿਣਿਸ੍ਸਾਮੀਤਿ ਪੋਸੇਯ੍ਯ. ਸਹਸ੍ਸਗ੍ਘਨਕਸ੍ਸ ਅਸ੍ਸਸ੍ਸ ਪਞ੍ਚਸਤਮਤ੍ਤਂ ਉਪਕਰਣਂ ਗਨ੍ਧਮਾਲਾਦਿਵਸੇਨ ਪੋਸਾਵਨਿਕਂਯੇਵ ਅਗਮਾਸਿ. ਅਥਸ੍ਸ ਤੇ ਅਸ੍ਸਾ ਏਕਦਿਵਸੇਨੇਵ ਰੋਗਂ ਫੁਸਿਤ੍ਵਾ ਸਬ੍ਬੇ ਜੀਵਿਤਕ੍ਖਯਂ ਪਾਪੁਣੇਯ੍ਯੁਨ੍ਤਿ ਇਮਿਨਾ ਅਧਿਪ੍ਪਾਯੇਨ ਏਵਮਾਹ. ਉਦਯਞ੍ਚੇਵ ਨਾਧਿਗਚ੍ਛੇਯ੍ਯਾਤਿ ਵਡ੍ਢਿਞ੍ਚ ਗੇਹਤੋ ਨੀਹਰਿਤ੍ਵਾ ਦਿਨ੍ਨਮੂਲਞ੍ਚ ਕਿਞ੍ਚਿ ਨ ਲਭੇਯ੍ਯ. ਪਯਿਰੁਪਾਸਿਨ੍ਤਿ ਚਤੂਹਿ ਪਚ੍ਚਯੇਹਿ ਉਪਟ੍ਠਹਿਂ. ਸ੍ਵਾਹਂ ਉਦਯਞ੍ਚੇਵ ਨਾਧਿਗਚ੍ਛਿਨ੍ਤਿ ਸੋ ਅਹਂ ਨੇਵ ਉਦਯਂ ਨ ਗੇਹਤੋ ਦਿਨ੍ਨਧਨਂ ਅਧਿਗਚ੍ਛਿਂ, ਪਣਿਯਅਸ੍ਸਜਗ੍ਗਨਕੋ ਨਾਮ ਜਾਤੋਸ੍ਮੀਤਿ ਦਸ੍ਸੇਤਿ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ.
੬. ਸਾਲ਼੍ਹਸੁਤ੍ਤਵਣ੍ਣਨਾ
੧੯੬. ਛਟ੍ਠੇ ਦ੍ਵਯੇਨਾਤਿ ਦ੍ਵੀਹਿ ਕੋਟ੍ਠਾਸੇਹਿ. ਓਘਸ੍ਸ ਨਿਤ੍ਥਰਣਨ੍ਤਿ ਚਤੁਰੋਘਨਿਤ੍ਥਰਣਂ. ਤਪੋਜਿਗੁਚ੍ਛਾਹੇਤੂਤਿ ਦੁਕ੍ਕਰਕਾਰਿਕਸਙ੍ਖਾਤੇਨ ਤਪੇਨ ਪਾਪਜਿਗੁਚ੍ਛਨਹੇਤੁ. ਅਞ੍ਞਤਰਂ ਸਾਮਞ੍ਞਙ੍ਗਨ੍ਤਿ ਏਕਂ ਸਮਣਧਮ੍ਮਕੋਟ੍ਠਾਸਂ. ਅਪਰਿਸੁਦ੍ਧਕਾਯਸਮਾਚਾਰਾਤਿਆਦੀਸੁ ਪੁਰਿਮੇਹਿ ਤੀਹਿ ਪਦੇਹਿ ਕਾਯਿਕਵਾਚਸਿਕਚੇਤਸਿਕਸੀਲਾਨਂ ਅਪਰਿਸੁਦ੍ਧਤਂ ਦਸ੍ਸੇਤ੍ਵਾ ਪਚ੍ਛਿਮੇਨ ਪਦੇਨ ਅਪਰਿਸੁਦ੍ਧਾਜੀਵਤਂ ਦਸ੍ਸੇਤਿ. ਞਾਣਦਸ੍ਸਨਾਯਾਤਿ ਮਗ੍ਗਞਾਣਸਙ੍ਖਾਤਾਯ ਦਸ੍ਸਨਾਯ. ਅਨੁਤ੍ਤਰਾਯ ਸਮ੍ਬੋਧਾਯਾਤਿ ਅਰਹਤ੍ਤਾਯ, ਅਰਹਤ੍ਤਞਾਣਫਸ੍ਸੇਨ ਫੁਸਿਤੁਂ ਅਭਬ੍ਬਾਤਿ ਵੁਤ੍ਤਂ ਹੋਤਿ. ਸਾਲਲਟ੍ਠਿਨ੍ਤਿ ਸਾਲਰੁਕ੍ਖਂ. ਨਵਨ੍ਤਿ ਤਰੁਣਂ. ਅਕੁਕ੍ਕੁਚ੍ਚਕਜਾਤਨ੍ਤਿ ‘‘ਭਵੇਯ੍ਯ ਨੁ ਖੋ, ਨ ਭਵੇਯ੍ਯਾ’’ਤਿ ਅਜਨੇਤਬ੍ਬਕੁਕ੍ਕੁਚ੍ਚਂ. ਲੇਖਣਿਯਾ ਲਿਖੇਯ੍ਯਾਤਿ ਅਵਲੇਖਨਮਤ੍ਤਕੇਨ ਅਵਲਿਖੇਯ੍ਯ. ਧੋਵੇਯ੍ਯਾਤਿ ਘਂਸੇਯ੍ਯ. ਅਨ੍ਤੋ ਅਵਿਸੁਦ੍ਧਾਤਿ ਅਬ੍ਭਨ੍ਤਰੇ ਅਸੁਦ੍ਧਾ ਅਪਨੀਤਸਾਰਾ.
ਏਵਮੇਵ ਖੋਤਿ ਏਤ੍ਥ ਇਦਂ ਓਪਮ੍ਮਸਂਸਨ੍ਦਨਂ – ਸਾਲਲਟ੍ਠਿ ਵਿਯ ਹਿ ਅਤ੍ਤਭਾਵੋ ਦਟ੍ਠਬ੍ਬੋ, ਨਦੀਸੋਤਂ ਵਿਯ ਸਂਸਾਰਸੋਤਂ, ਪਾਰਂ ਗਨ੍ਤੁਕਾਮਪੁਰਿਸੋ ਵਿਯ ਦ੍ਵਾਸਟ੍ਠਿ ਦਿਟ੍ਠਿਯੋ ਗਹੇਤ੍ਵਾ ਠਿਤਪੁਰਿਸੋ, ਸਾਲਲਟ੍ਠਿਯਾ ਬਹਿਦ੍ਧਾ ਸੁਪਰਿਕਮ੍ਮਕਤਕਾਲੋ ਵਿਯ ਬਹਿਦ੍ਧਾ ਤਪਚਰਣਂ ਗਾਲ਼੍ਹਂ ਕਤ੍ਵਾ ਗਹਿਤਕਾਲੋ, ਅਨ੍ਤੋ ਅਸੁਦ੍ਧਕਾਲੋ ਵਿਯ ਅਬ੍ਭਨ੍ਤਰੇ ਸੀਲਾਨਂ ਅਪਰਿਸੁਦ੍ਧਕਾਲੋ, ਸਾਲਲਟ੍ਠਿਯਾ ਸਂਸੀਦਿਤ੍ਵਾ ਅਧੋਗਮਨਂ ਵਿਯ ਦਿਟ੍ਠਿਗਤਿਕਸ੍ਸ ਸਂਸਾਰਸੋਤੇ ਸਂਸੀਦਨਂ ਵੇਦਿਤਬ੍ਬਂ.
ਫਿਯਾਰਿਤ੍ਤਂ ਬਨ੍ਧੇਯ੍ਯਾਤਿ ਫਿਯਞ੍ਚ ਅਰਿਤ੍ਤਞ੍ਚ ਯੋਜੇਯ੍ਯ. ਏਵਮੇਵਾਤਿ ਏਤ੍ਥਾਪਿ ਇਦਂ ਓਪਮ੍ਮਸਂਸਨ੍ਦਨਂ – ਸਾਲਲਟ੍ਠਿ ਵਿਯ ਅਤ੍ਤਭਾਵੋ, ਨਦੀਸੋਤਂ ਵਿਯ ਸਂਸਾਰਸੋਤਂ, ਪਾਰਂ ਗਨ੍ਤੁਕਾਮਪੁਰਿਸੋ ਵਿਯ ਯੋਗਾਵਚਰੋ, ਬਹਿਦ੍ਧਾ ਸੁਪਰਿਕਮ੍ਮਕਤਕਾਲੋ ਵਿਯ ਛਸੁ ਦ੍ਵਾਰੇਸੁ ਸਂਵਰਸ੍ਸ ਪਚ੍ਚੁਪਟ੍ਠਿਤਕਾਲੋ, ਅਨ੍ਤੋ ਸੁਵਿਸੋਧਿਤਭਾਵੋ ਵਿਯ ਅਬ੍ਭਨ੍ਤਰੇ ਪਰਿਸੁਦ੍ਧਸੀਲਭਾਵੋ, ਫਿਯਾਰਿਤ੍ਤਬਨ੍ਧਨਂ ਵਿਯ ਕਾਯਿਕਚੇਤਸਿਕਵੀਰਿਯਕਰਣਂ, ਸੋਤ੍ਥਿਨਾ ਪਾਰਿਮਤੀਰਗਮਨਂ ਵਿਯ ਅਨੁਪੁਬ੍ਬੇਨ ਸੀਲਂ ਪੂਰੇਤ੍ਵਾ ਸਮਾਧਿਂ ਪੂਰੇਤ੍ਵਾ ਪਞ੍ਞਂ ਪੂਰੇਤ੍ਵਾ ਨਿਬ੍ਬਾਨਗਮਨਂ ਦਟ੍ਠਬ੍ਬਂ.
ਕਣ੍ਡਚਿਤ੍ਰਕਾਨੀਤਿ ਸਰਲਟ੍ਠਿਸਰਰਜ੍ਜੁਸਰਪਾਸਾਦਸਰਸਾਣਿਸਰਪੋਕ੍ਖਰਣਿਸਰਪਦੁਮਾਨੀਤਿ ਅਨੇਕਾਨਿ ਕਣ੍ਡੇਹਿ ਕਤ੍ਤਬ੍ਬਚਿਤ੍ਰਾਨਿ. ਅਥ ਖੋ ਸੋ ਤੀਹਿ ਠਾਨੇਹੀਤਿ ਸੋ ਏਵਂ ਬਹੂਨਿ ਕਣ੍ਡਚਿਤ੍ਰਕਾਨਿ ਜਾਨਨ੍ਤੋਪਿ ਨ ਰਾਜਾਰਹੋ ਹੋਤਿ, ਤੀਹਿਯੇਵ ਪਨ ਠਾਨੇਹਿ ਹੋਤੀਤਿ ਅਤ੍ਥੋ. ਸਮ੍ਮਾਸਮਾਧਿ ਹੋਤੀਤਿ ਮਗ੍ਗਸਮਾਧਿਨਾ ਚ ਫਲਸਮਾਧਿਨਾ ਚ ਸਮਾਹਿਤੋ ਹੋਤੀਤਿ ਅਯਮੇਤ੍ਥ ਅਤ੍ਥੋ. ਸਮ੍ਮਾਦਿਟ੍ਠੀਤਿ ਮਗ੍ਗਸਮ੍ਮਾਦਿਟ੍ਠਿਯਾ ਸਮਨ੍ਨਾਗਤੋ. ਇਦਂ ਦੁਕ੍ਖਨ੍ਤਿਆਦੀਹਿ ਚਤੂਹਿ ਸਚ੍ਚੇਹਿ ਚਤ੍ਤਾਰੋ ਮਗ੍ਗਾ ਤੀਣਿ ਚ ਫਲਾਨਿ ਕਥਿਤਾਨਿ. ਅਯਂ ਪਨ ਮਗ੍ਗੇਨੇਵ ਅਵਿਰਾਧਿਤਂ ਵਿਜ੍ਝਤਿ ਨਾਮਾਤਿ ਵੇਦਿਤਬ੍ਬੋ. ਸਮ੍ਮਾਵਿਮੁਤ੍ਤੀਤਿ ਅਰਹਤ੍ਤਫਲਵਿਮੁਤ੍ਤਿਯਾ ਸਮਨ੍ਨਾਗਤੋ. ਅਵਿਜ੍ਜਾਕ੍ਖਨ੍ਧਂ ਪਦਾਲੇਤੀਤਿ ਅਰਹਤ੍ਤਮਗ੍ਗੇਨ ਪਦਾਲੇਤਿ ਨਾਮਾਤਿ ਵੁਚ੍ਚਤਿ. ਇਮਿਨਾ ਹਿ ਹੇਟ੍ਠਾ ਅਰਹਤ੍ਤਮਗ੍ਗੇਨ ਅਵਿਜ੍ਜਾਕ੍ਖਨ੍ਧੋ ਪਦਾਲਿਤੋ, ਇਧ ਪਨ ਪਦਾਲਿਤਂ ਉਪਾਦਾਯ ਪਦਾਲੇਤੀਤਿ ਵਤ੍ਤੁਂ ਵਟ੍ਟਤੀਤਿ.
੭. ਮਲ੍ਲਿਕਾਦੇਵੀਸੁਤ੍ਤਵਣ੍ਣਨਾ
੧੯੭. ਸਤ੍ਤਮੇ ਮਲ੍ਲਿਕਾ ਦੇਵੀਤਿ ਪਸੇਨਦਿਰਞ੍ਞੋ ਦੇਵੀ. ਯੇਨ ਮਿਧੇਕਚ੍ਚੋ ਮਾਤੁਗਾਮੋਤਿ ਯੇਨ ਇਧੇਕਚ੍ਚਾ ਇਤ੍ਥੀ. ਦੁਬ੍ਬਣ੍ਣਾਤਿ ਬੀਭਚ੍ਛਵਣ੍ਣਾ. ਦੁਰੂਪਾਤਿ ਦੁਸ੍ਸਣ੍ਠਿਤਾ. ਸੁਪਾਪਿਕਾਤਿ ਸੁਟ੍ਠੁ ਪਾਪਿਕਾ ਸੁਟ੍ਠੁ ਲਾਮਿਕਾ. ਦਸ੍ਸਨਾਯਾਤਿ ਪਸ੍ਸਿਤੁਂ. ਦਲਿਦ੍ਦਾਤਿ ਧਨਦਲਿਦ੍ਦਾ. ਅਪ੍ਪਸ੍ਸਕਾਤਿ ਸਕੇਨ ਧਨੇਨ ਰਹਿਤਾ. ਅਪ੍ਪਭੋਗਾਤਿ ਉਪਭੋਗਪਰਿਭੋਗਭਣ੍ਡਕਰਹਿਤਾ. ਅਪ੍ਪੇਸਕ੍ਖਾਤਿ ਅਪ੍ਪਪਰਿਵਾਰਾ. ਅਡ੍ਢਾਤਿ ਇਸ੍ਸਰਾ. ਮਹਦ੍ਧਨਾਤਿ ਵਲ਼ਞ੍ਜਨਕਧਨੇਨ ਮਹਦ੍ਧਨਾ. ਮਹਾਭੋਗਾਤਿ ਉਪਭੋਗਪਰਿਭੋਗਭਣ੍ਡਭੋਗੇਨ ਮਹਾਭੋਗਾ. ਮਹੇਸਕ੍ਖਾਤਿ ਮਹਾਪਰਿਵਾਰਾ. ਅਭਿਰੂਪਾਤਿ ਉਤ੍ਤਮਰੂਪਾ. ਦਸ੍ਸਨੀਯਾਤਿ ਦਸ੍ਸਨਯੁਤ੍ਤਾ. ਪਾਸਾਦਿਕਾਤਿ ਦਸ੍ਸਨੇਨ ਪਾਸਾਦਿਕਾ. ਵਣ੍ਣਪੋਕ੍ਖਰਤਾਯਾਤਿ ਵਣ੍ਣੇਨ ਚੇਵ ਸਰੀਰਸਣ੍ਠਾਨੇਨ ਚ.
ਅਭਿਸਜ੍ਜਤੀਤਿ ਲਗ੍ਗਤਿ. ਬ੍ਯਾਪਜ੍ਜਤੀਤਿ ਪਕਤਿਂ ਪਜਹਤਿ. ਪਤਿਤ੍ਥੀਯਤੀਤਿ ਕੋਧਵਸੇਨ ਥਿਨਭਾਵਂ ਥਦ੍ਧਭਾਵਂ ਆਪਜ੍ਜਤਿ. ਨ ਦਾਤਾ ਹੋਤੀਤਿ ਨ ਦਾਯਿਕਾ ਹੋਤਿ. ਸੇਯ੍ਯਾਵਸਥਪਦੀਪੇਯ੍ਯਨ੍ਤਿ ਏਤ੍ਥ ਸੇਯ੍ਯਾਤਿ ਮਞ੍ਚਪਲ੍ਲਙ੍ਕਾਦਿਸਯਨਂ. ਆਵਸਥੋਤਿ ਆਵਸਥਾਗਾਰਂ. ਪਦੀਪੇਯ੍ਯਂ ਵੁਚ੍ਚਤਿ ਵਟ੍ਟਿਤੇਲਾਦਿਪਦੀਪੂਪਕਰਣਂ. ਇਸ੍ਸਾਮਨਿਕਾਤਿ ਇਸ੍ਸਾਯ ਸਮ੍ਪਯੁਤ੍ਤਚਿਤ੍ਤਾ. ਇਮਿਨਾ ਨਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਕੋਧਨਾ ਅਹੋਸਿਨ੍ਤਿ ਕੋਧਮਨਾ ਅਹੋਸਿਂ. ਅਨਿਸ੍ਸਾਮਨਿਕਾ ਅਹੋਸਿਨ੍ਤਿ ਇਸ੍ਸਾਵਿਰਹਿਤਚਿਤ੍ਤਾ ਅਹੋਸਿਂ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.
੮. ਅਤ੍ਤਨ੍ਤਪਸੁਤ੍ਤਵਣ੍ਣਨਾ
੧੯੮. ਅਟ੍ਠਮੇ ਅਤ੍ਤਨ੍ਤਪਾਦੀਸੁ ਅਤ੍ਤਾਨਂ ਤਪਤਿ ਦੁਕ੍ਖਾਪੇਤੀਤਿ ਅਤ੍ਤਨ੍ਤਪੋ. ਅਤ੍ਤਨੋ ਪਰਿਤਾਪਨਾਨੁਯੋਗਂ ਅਤ੍ਤਪਰਿਤਾਪਨਾਨੁਯੋਗਂ. ਪਰਂ ਤਪਤੀਤਿ ਪਰਨ੍ਤਪੋ. ਪਰੇਸਂ ਪਰਿਤਾਪਨਾਨੁਯੋਗਂ ਪਰਪਰਿਤਾਪਨਾਨੁਯੋਗਂ. ਦਿਟ੍ਠੇਵ ਧਮ੍ਮੇਤਿ ਇਮਸ੍ਮਿਂਯੇਵ ਅਤ੍ਤਭਾਵੇ. ਨਿਚ੍ਛਾਤੋਤਿ ਛਾਤਂ ਵੁਚ੍ਚਤਿ ਤਣ੍ਹਾ, ਸਾ ਅਸ੍ਸ ਨਤ੍ਥੀਤਿ ਨਿਚ੍ਛਾਤੋ. ਸਬ੍ਬਕਿਲੇਸਾਨਂ ਨਿਬ੍ਬੁਤਤ੍ਤਾ ਨਿਬ੍ਬੁਤੋ. ਅਨ੍ਤੋ ਤਾਪਨਕਿਲੇਸਾਨਂ ਅਭਾਵਾ ਸੀਤਲੋ ਜਾਤੋਤਿ ਸੀਤੀਭੂਤੋ. ਝਾਨਮਗ੍ਗਫਲਨਿਬ੍ਬਾਨਸੁਖਾਨਿ ਪਟਿਸਂਵੇਦੇਤੀਤਿ ਸੁਖਪ੍ਪਟਿਸਂਵੇਦੀ. ਬ੍ਰਹ੍ਮਭੂਤੇਨ ਅਤ੍ਤਨਾਤਿ ਸੇਟ੍ਠਭੂਤੇਨ ਅਤ੍ਤਨਾ.
ਅਚੇਲਕੋਤਿਆਦੀਨਿ ਵੁਤ੍ਤਤ੍ਥਾਨੇਵ. ਓਰਬ੍ਭਿਕਾਦੀਸੁ ਉਰਬ੍ਭਾ ਵੁਚ੍ਚਨ੍ਤਿ ਏਲ਼ਕਾ, ਉਰਬ੍ਭੇ ਹਨਤੀਤਿ ਓਰਬ੍ਭਿਕੋ. ਸੂਕਰਿਕਾਦੀਸੁਪਿ ਏਸੇਵ ਨਯੋ. ਲੁਦ੍ਦੋਤਿ ਦਾਰੁਣੋ ਕਕ੍ਖਲ਼ੋ. ਮਚ੍ਛਘਾਤਕੋਤਿ ਮਚ੍ਛਬਨ੍ਧੋ ਕੇਵਟ੍ਟੋ. ਬਨ੍ਧਨਾਗਾਰਿਕੋਤਿ ਬਨ੍ਧਨਾਗਾਰਗੋਪਕੋ. ਕੁਰੂਰਕਮ੍ਮਨ੍ਤਾਤਿ ਦਾਰੁਣਕਮ੍ਮਨ੍ਤਾ.
ਮੁਦ੍ਧਾਵਸਿਤ੍ਤੋਤਿ ਖਤ੍ਤਿਯਾਭਿਸੇਕੇਨ ਮੁਦ੍ਧਨਿ ਅਭਿਸਿਤ੍ਤੋ. ਪੁਰਤ੍ਥਿਮੇਨ ਨਗਰਸ੍ਸਾਤਿ ਨਗਰਤੋ ਪੁਰਤ੍ਥਿਮਾਯ ਦਿਸਾਯ. ਸਨ੍ਥਾਗਾਰਨ੍ਤਿ ਯਞ੍ਞਸਾਲਂ. ਖਰਾਜਿਨਂ ਨਿਵਾਸੇਤ੍ਵਾਤਿ ਸਖੁਰਂ ਅਜਿਨਚਮ੍ਮਂ ਨਿਵਾਸੇਤ੍ਵਾ. ਸਪ੍ਪਿਤੇਲੇਨਾਤਿ ਸਪ੍ਪਿਨਾ ਚੇਵ ਤੇਲੇਨ ਚ. ਠਪੇਤ੍ਵਾ ਹਿ ਸਪ੍ਪਿਂ ਅਵਸੇਸੋ ਯੋ ਕੋਚਿ ਸ੍ਨੇਹੋ ਤੇਲਨ੍ਤਿ ਵੁਚ੍ਚਤਿ. ਕਣ੍ਡੁਵਮਾਨੋਤਿ ਨਖਾਨਂ ਛਿਨ੍ਨਤ੍ਤਾ ਕਣ੍ਡੁਵਿਤਬ੍ਬਕਾਲੇ ਤੇਨ ਕਣ੍ਡੁਵਮਾਨੋ. ਅਨਨ੍ਤਰਹਿਤਾਯਾਤਿ ਅਸਨ੍ਥਤਾਯ. ਸਰੂਪਵਚ੍ਛਾਯਾਤਿ ਸਦਿਸਵਚ੍ਛਾਯ. ਸਚੇ ਗਾਵੀ ਸੇਤਾ ਹੋਤਿ, ਵਚ੍ਛੋਪਿ ਸੇਤਕੋਵ. ਸਚੇ ਕਪਿਲਾ ਵਾ ਰਤ੍ਤਾ ਵਾ, ਵਚ੍ਛਕੋਪਿ ਤਾਦਿਸੋਵਾਤਿ ਏਵਂ ਸਰੂਪਵਚ੍ਛਾਯ. ਸੋ ਏਵਮਾਹਾਤਿ ਸੋ ਰਾਜਾ ਏਵਂ ਵਦੇਤਿ. ਵਚ੍ਛਤਰਾਤਿ ਤਰੁਣਵਚ੍ਛਕਭਾਵਂ ਅਤਿਕ੍ਕਨ੍ਤਾ ਬਲਵਵਚ੍ਛਾ. ਵਚ੍ਛਤਰੀਸੁਪਿ ਏਸੇਵ ਨਯੋ. ਬਰਿਹਿਸਤ੍ਥਾਯਾਤਿ ਪਰਿਕ੍ਖੇਪਕਰਣਤ੍ਥਾਯ ਚੇਵ ਯਞ੍ਞਭੂਮਿਯਂ ਅਤ੍ਥਰਣਤ੍ਥਾਯ ਚ.
ਚਤੁਤ੍ਥਪੁਗ੍ਗਲਂ ਬੁਦ੍ਧੁਪ੍ਪਾਦਤੋ ਪਟ੍ਠਾਯ ਦਸ੍ਸੇਤੁਂ ਇਧ, ਭਿਕ੍ਖਵੇ, ਤਥਾਗਤੋਤਿਆਦਿਮਾਹ. ਤਤ੍ਥ ਤਥਾਗਤੋਤਿਆਦੀਨਿ ਵੁਤ੍ਤਤ੍ਥਾਨੇਵ. ਤਂ ਧਮ੍ਮਨ੍ਤਿ ਤਂ ਵੁਤ੍ਤਪ੍ਪਕਾਰਸਮ੍ਪਦਂ ਧਮ੍ਮਂ. ਸੁਣਾਤਿ, ਗਹਪਤਿ, ਵਾਤਿ ਕਸ੍ਮਾ ਪਠਮਂ ਗਹਪਤਿਂ ਨਿਦ੍ਦਿਸਤਿ? ਨਿਹਤਮਾਨਤ੍ਤਾ ਉਸ੍ਸਨ੍ਨਤ੍ਤਾ ਚ. ਯੇਭੁਯ੍ਯੇਨ ਹਿ ਖਤ੍ਤਿਯਕੁਲਤੋ ਪਬ੍ਬਜਿਤਾ ਜਾਤਿਂ ਨਿਸ੍ਸਾਯ ਮਾਨਂ ਕਰੋਨ੍ਤਿ. ਬ੍ਰਾਹ੍ਮਣਕੁਲਾ ਪਬ੍ਬਜਿਤਾ ਮਨ੍ਤੇ ਨਿਸ੍ਸਾਯ ਮਾਨਂ ਕਰੋਨ੍ਤਿ, ਹੀਨਜਚ੍ਚਕੁਲਾ ਪਬ੍ਬਜਿਤਾ ਅਤ੍ਤਨੋ ਵਿਜਾਤਿਤਾਯ ਪਤਿਟ੍ਠਾਤੁਂ ਨ ਸਕ੍ਕੋਨ੍ਤਿ. ਗਹਪਤਿਦਾਰਕਾ ਪਨ ਕਚ੍ਛੇਹਿ ਸੇਦਂ ਮੁਞ੍ਚਨ੍ਤੇਹਿ ਪਿਟ੍ਠਿਯਾ ਲੋਣਂ ਪੁਪ੍ਫਮਾਨਾਯ ਭੂਮਿਂ ਕਸਿਤ੍ਵਾ ਤਾਦਿਸਸ੍ਸ ਮਾਨਸ੍ਸ ਅਭਾਵਤੋ ਨਿਹਤਮਾਨਦਪ੍ਪਾ ਹੋਨ੍ਤਿ. ਤੇ ਪਬ੍ਬਜਿਤ੍ਵਾ ਮਾਨਂ ਵਾ ਦਪ੍ਪਂ ਵਾ ਅਕਤ੍ਵਾ ਯਥਾਬਲਂ ਬੁਦ੍ਧਵਚਨਂ ਉਗ੍ਗਹੇਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤਾ ਸਕ੍ਕੋਨ੍ਤਿ ਅਰਹਤ੍ਤੇ ਪਤਿਟ੍ਠਾਤੁਂ. ਇਤਰੇਹਿ ਚ ਕੁਲੇਹਿ ਨਿਕ੍ਖਮਿਤ੍ਵਾ ਪਬ੍ਬਜਿਤਾ ਨ ਬਹੁਕਾ, ਗਹਪਤਿਕਾਵ ਬਹੁਕਾ. ਇਤਿ ਨਿਹਤਮਾਨਤ੍ਤਾ ਉਸ੍ਸਨ੍ਨਤ੍ਤਾ ਚ ਪਠਮਂ ਗਹਪਤਿਂ ਨਿਦ੍ਦਿਸਤੀਤਿ.
ਅਞ੍ਞਤਰਸ੍ਮਿਂ ਵਾਤਿ ਇਤਰੇਸਂ ਵਾ ਕੁਲਾਨਂ ਅਞ੍ਞਤਰਸ੍ਮਿਂ. ਪਚ੍ਚਾਜਾਤੋਤਿ ਪਤਿਜਾਤੋ. ਤਥਾਗਤੇ ਸਦ੍ਧਂ ਪਟਿਲਭਤੀਤਿ ਪਰਿਸੁਦ੍ਧਂ ਧਮ੍ਮਂ ਸੁਤ੍ਵਾ ਧਮ੍ਮਸਾਮਿਮ੍ਹਿ ਤਥਾਗਤੇ ‘‘ਸਮ੍ਮਾਸਮ੍ਬੁਦ੍ਧੋ ਵਤ ਭਗਵਾ’’ਤਿ ਸਦ੍ਧਂ ਪਟਿਲਭਤਿ. ਇਤਿ ਪਟਿਸਞ੍ਚਿਕ੍ਖਤੀਤਿ ਏਵਂ ਪਚ੍ਚਵੇਕ੍ਖਤਿ. ਸਮ੍ਬਾਧੋ ਘਰਾਵਾਸੋਤਿ ਸਚੇਪਿ ਸਟ੍ਠਿਹਤ੍ਥੇ ਘਰੇ ਯੋਜਨਸਤਨ੍ਤਰੇਪਿ ਵਾ ਦ੍ਵੇ ਜਾਯਮ੍ਪਤਿਕਾ ਵਸਨ੍ਤਿ, ਤਥਾਪਿ ਨੇਸਂ ਸਕਿਞ੍ਚਨਸਪਲਿਬੋਧਟ੍ਠੇਨ ਘਰਾਵਾਸੋ ਸਮ੍ਬਾਧੋਵ. ਰਜਾਪਥੋਤਿ ਰਾਗਰਜਾਦੀਨਂ ਉਟ੍ਠਾਨਟ੍ਠਾਨਨ੍ਤਿ ਮਹਾਅਟ੍ਠਕਥਾਯਂ ਵੁਤ੍ਤਂ. ਆਗਮਨਪਥੋਤਿਪਿ ਵਟ੍ਟਤਿ. ਅਲਗ੍ਗਨਟ੍ਠੇਨ ਅਬ੍ਭੋਕਾਸੋ ਵਿਯਾਤਿ ਅਬ੍ਭੋਕਾਸੋ. ਪਬ੍ਬਜਿਤੋ ਹਿ ਕੂਟਾਗਾਰਰਤਨਪਾਸਾਦਦੇਵਵਿਮਾਨਾਦੀਸੁ ਪਿਹਿਤਦ੍ਵਾਰਵਾਤਪਾਨੇਸੁ ਪਟਿਚ੍ਛਨ੍ਨੇਸੁ ਵਸਨ੍ਤੋਪਿ ਨੇਵ ਲਗ੍ਗਤਿ ਨ ਸਜ੍ਜਤਿ ਨ ਬਜ੍ਝਤਿ. ਤੇਨ ਵੁਤ੍ਤਂ – ‘‘ਅਬ੍ਭੋਕਾਸੋ ਪਬ੍ਬਜ੍ਜਾ’’ਤਿ. ਅਪਿਚ ਸਮ੍ਬਾਧੋ ਘਰਾਵਾਸੋ ਕੁਸਲਕਿਰਿਯਾਯ ਯਥਾਸੁਖਂ ਓਕਾਸਾਭਾਵਤੋ, ਰਜਾਪਥੋ ਅਸਂਵੁਤਸਙ੍ਕਾਰਟ੍ਠਾਨਂ ਵਿਯ ਰਜਾਨਂ, ਕਿਲੇਸਰਜਾਨਂ ਸਨ੍ਨਿਪਾਤਟ੍ਠਾਨਤੋ. ਅਬ੍ਭੋਕਾਸੋ ਪਬ੍ਬਜ੍ਜਾ ਕੁਸਲਕਿਰਿਯਾਯ ਯਥਾਸੁਖਂ ਓਕਾਸਸਬ੍ਭਾਵਤੋ.
ਨਯਿਦਂ ਸੁਕਰਂ…ਪੇ… ਪਬ੍ਬਜੇਯ੍ਯਨ੍ਤਿ ਏਤ੍ਥ ਅਯਂ ਸਙ੍ਖੇਪਕਥਾ – ਯਦੇਤਂ ਸਿਕ੍ਖਤ੍ਤਯਬ੍ਰਹ੍ਮਚਰਿਯਂ ਏਕਮ੍ਪਿ ਦਿਵਸਂ ਅਖਣ੍ਡਂ ਕਤ੍ਵਾ ਚਰਿਮਕਚਿਤ੍ਤਂ ਪਾਪੇਤਬ੍ਬਤਾਯ ਏਕਨ੍ਤਪਰਿਪੁਣ੍ਣਂ, ਏਕਦਿਵਸਮ੍ਪਿ ਚ ਕਿਲੇਸਮਲੇਨ ਅਮਲਿਨਂ ਕਤ੍ਵਾ ਚਰਿਮਕਚਿਤ੍ਤਂ ਪਾਪੇਤਬ੍ਬਤਾਯ ਏਕਨ੍ਤਪਰਿਸੁਦ੍ਧਂ, ਸਙ੍ਖਲਿਖਿਤਂ ਲਿਖਿਤਸਙ੍ਖਸਦਿਸਂ ਧੋਤਸਙ੍ਖਸਪ੍ਪਟਿਭਾਗਂ ਚਰਿਤਬ੍ਬਂ. ਇਦਂ ਨ ਸੁਕਰਂ ਅਗਾਰਂ ਅਜ੍ਝਾਵਸਤਾ ਅਗਾਰਮਜ੍ਝੇ ਵਸਨ੍ਤੇਨ ਏਕਨ੍ਤਪਰਿਪੁਣ੍ਣਂ…ਪੇ… ਚਰਿਤੁਂ. ਯਂਨੂਨਾਹਂ ਕੇਸੇ ਚ ਮਸ੍ਸੁਞ੍ਚ ਓਹਾਰੇਤ੍ਵਾ ਕਸਾਯਰਸਪੀਤਤਾਯ ਕਾਸਾਯਾਨਿ ਬ੍ਰਹ੍ਮਚਰਿਯਂ ਚਰਨ੍ਤਾਨਂ ਅਨੁਚ੍ਛਵਿਕਾਨਿ ਵਤ੍ਥਾਨਿ ਅਚ੍ਛਾਦੇਤ੍ਵਾ ਪਰਿਦਹਿਤ੍ਵਾ ਅਗਾਰਸ੍ਮਾ ਨਿਕ੍ਖਮਿਤ੍ਵਾ ਅਨਗਾਰਿਯਂ ਪਬ੍ਬਜੇਯ੍ਯਨ੍ਤਿ. ਏਤ੍ਥ ਚ ਯਸ੍ਮਾ ਅਗਾਰਸ੍ਸ ਹਿਤਂ ਕਸਿਵਣਿਜ੍ਜਾਦਿਕਮ੍ਮਂ ਅਗਾਰਿਯਨ੍ਤਿ ਵੁਚ੍ਚਤਿ, ਤਞ੍ਚ ਪਬ੍ਬਜ੍ਜਾਯ ਨਤ੍ਥਿ, ਤਸ੍ਮਾ ਪਬ੍ਬਜ੍ਜਾ ਅਨਗਾਰਿਯਾਤਿ ਞਾਤਬ੍ਬਾ, ਤਂ ਅਨਗਾਰਿਯਂ. ਪਬ੍ਬਜੇਯ੍ਯਨ੍ਤਿ ਪਟਿਪਜ੍ਜੇਯ੍ਯਂ.
ਅਪ੍ਪਂ ਵਾਤਿ ਸਹਸ੍ਸਤੋ ਹੇਟ੍ਠਾ ਭੋਗਕ੍ਖਨ੍ਧੋ ਅਪ੍ਪੋ ਨਾਮ ਹੋਤਿ, ਸਹਸ੍ਸਤੋ ਪਟ੍ਠਾਯ ਮਹਾ. ਆਬਨ੍ਧਨਟ੍ਠੇਨ ਞਾਤਿਯੇਵ ਞਾਤਿਪਰਿਵਟ੍ਟੋ. ਸੋ ਵੀਸਤਿਯਾ ਹੇਟ੍ਠਾ ਅਪ੍ਪੋ ਨਾਮ ਹੋਤਿ, ਵੀਸਤਿਯਾ ਪਟ੍ਠਾਯ ਮਹਾ. ਭਿਕ੍ਖੂਨਂ ਸਿਕ੍ਖਾਸਾਜੀਵਸਮਾਪਨ੍ਨੋਤਿ ਯਾ ਭਿਕ੍ਖੂਨਂ ਅਧਿਸੀਲਸਙ੍ਖਾਤਾ ਸਿਕ੍ਖਾ, ਤਞ੍ਚ, ਯਤ੍ਥ ਚੇਤੇ ਸਹ ਜੀਵਨ੍ਤਿ, ਏਕਜੀਵਿਕਾ ਸਭਾਗਵੁਤ੍ਤਿਨੋ ਹੋਨ੍ਤਿ, ਤਂ ਭਗਵਤਾ ਪਞ੍ਞਤ੍ਤਸਿਕ੍ਖਾਪਦਸਙ੍ਖਾਤਂ ਸਾਜੀਵਞ੍ਚ ਤਤ੍ਥ ਸਿਕ੍ਖਨਭਾਵੇਨ ਸਮਾਪਨ੍ਨੋਤਿ ਭਿਕ੍ਖੂਨਂ ਸਿਕ੍ਖਾਸਾਜੀਵਸਮਾਪਨ੍ਨੋ. ਸਮਾਪਨ੍ਨੋਤਿ ਸਿਕ੍ਖਂ ਪਰਿਪੂਰੇਨ੍ਤੋ ਸਾਜੀਵਞ੍ਚ ਅਵੀਤਿਕ੍ਕਮਨ੍ਤੋ ਹੁਤ੍ਵਾ ਤਦੁਭਯਂ ਉਪਗਤੋਤਿ ਅਤ੍ਥੋ.
ਪਾਣਾਤਿਪਾਤਂ ਪਹਾਯਾਤਿਆਦੀਨਿ ਵੁਤ੍ਤਤ੍ਥਾਨੇਵ. ਇਮੇਸਂ ਭੇਦਾਯਾਤਿ ਯੇਸਂ ਇਤੋਤਿ ਵੁਤ੍ਤਾਨਂ ਸਨ੍ਤਿਕੇ ਸੁਤਂ, ਤੇਸਂ ਭੇਦਾਯ. ਭਿਨ੍ਨਾਨਂ ਵਾ ਸਨ੍ਧਾਤਾਤਿ ਦ੍ਵਿਨ੍ਨਂ ਮਿਤ੍ਤਾਨਂ ਵਾ ਸਮਾਨੁਪਜ੍ਝਾਯਕਾਦੀਨਂ ਵਾ ਕੇਨਚਿਦੇਵ ਕਾਰਣੇਨ ਭਿਨ੍ਨਾਨਂ ਏਕਮੇਕਂ ਉਪਸਙ੍ਕਮਿਤ੍ਵਾ ‘‘ਤੁਮ੍ਹਾਕਂ ਈਦਿਸੇ ਕੁਲੇ ਜਾਤਾਨਂ ਏਵਂ ਬਹੁਸ੍ਸੁਤਾਨਂ ਇਦਂ ਨ ਯੁਤ੍ਤ’’ਨ੍ਤਿਆਦੀਨਿ ਵਤ੍ਵਾ ਸਨ੍ਧਾਨਂ ਕਤ੍ਤਾ. ਅਨੁਪ੍ਪਦਾਤਾਤਿ ਸਨ੍ਧਾਨਾਨੁਪ੍ਪਦਾਤਾ, ਦ੍ਵੇ ਜਨੇ ਸਮਗ੍ਗੇ ਦਿਸ੍ਵਾ ‘‘ਤੁਮ੍ਹਾਕਂ ਏਵਰੂਪੇ ਕੁਲੇ ਜਾਤਾਨਂ ਏਵਰੂਪੇਹਿ ਗੁਣੇਹਿ ਸਮਨ੍ਨਾਗਤਾਨਂ ਅਨੁਚ੍ਛਵਿਕਮੇਤ’’ਨ੍ਤਿਆਦੀਨਿ ਵਤ੍ਵਾ ਦਲ਼੍ਹੀਕਮ੍ਮਂ ਕਤ੍ਤਾਤਿ ਅਤ੍ਥੋ. ਸਮਗ੍ਗੋ ਆਰਾਮੋ ਅਸ੍ਸਾਤਿ ਸਮਗ੍ਗਾਰਾਮੋ. ਯਤ੍ਥ ਸਮਗ੍ਗਾ ਨਤ੍ਥਿ, ਤਤ੍ਥ ਵਸਿਤੁਮ੍ਪਿ ਨ ਇਚ੍ਛਤੀਤਿ ਅਤ੍ਥੋ. ਸਮਗ੍ਗਰਾਮੋਤਿਪਿ ਪਾਲ਼ਿ, ਅਯਮੇਵ ਅਤ੍ਥੋ. ਸਮਗ੍ਗਰਤੋਤਿ ਸਮਗ੍ਗੇਸੁ ਰਤੋ, ਤੇ ਪਹਾਯ ਅਞ੍ਞਤ੍ਥ ਗਨ੍ਤੁਂ ਨ ਇਚ੍ਛਤੀਤਿ ਅਤ੍ਥੋ. ਸਮਗ੍ਗੇ ਦਿਸ੍ਵਾਪਿ ਸੁਤ੍ਵਾਪਿ ਨਨ੍ਦਤੀਤਿ ਸਮਗ੍ਗਨਨ੍ਦੀ. ਸਮਗ੍ਗਕਰਣਿਂ ਵਾਚਂ ਭਾਸਿਤਾਤਿ ਯਾ ਵਾਚਾ ਸਤ੍ਤੇ ਸਮਗ੍ਗੇਯੇਵ ਕਰੋਤਿ, ਤਂ ਸਾਮਗ੍ਗਿਗੁਣਪਰਿਦੀਪਿਕਮੇਵ ਵਾਚਂ ਭਾਸਤਿ, ਨ ਇਤਰਨ੍ਤਿ.
ਨੇਲਾਤਿ ਏਲਂ ਵੁਚ੍ਚਤਿ ਦੋਸੋ, ਨਾਸ੍ਸਾ ਏਲਨ੍ਤਿ ਨੇਲਾ, ਨਿਦ੍ਦੋਸਾਤਿ ਅਤ੍ਥੋ ‘‘ਨੇਲਙ੍ਗੋ ਸੇਤਪਚ੍ਛਾਦੋ’’ਤਿ (ਉਦਾ. ੬੫) ਏਤ੍ਥ ਵੁਤ੍ਤਨੇਲਂ ਵਿਯ. ਕਣ੍ਣਸੁਖਾਤਿ ਬ੍ਯਞ੍ਜਨਮਧੁਰਤਾਯ ਕਣ੍ਣਾਨਂ ਸੁਖਾ, ਸੂਚਿਵਿਜ੍ਝਨਂ ਵਿਯ ਕਣ੍ਣਸੂਲਂ ਨ ਜਨੇਤਿ. ਅਤ੍ਥਮਧੁਰਤਾਯ ਸਕਲਸਰੀਰੇ ਕੋਪਂ ਅਜਨੇਤ੍ਵਾ ਪੇਮਂ ਜਨੇਤੀਤਿ ਪੇਮਨੀਯਾ. ਹਦਯਂ ਗਚ੍ਛਤਿ ਅਪ੍ਪਟਿਹਞ੍ਞਮਾਨਾ ਸੁਖੇਨ ਚਿਤ੍ਤਂ ਪਵਿਸਤੀਤਿ ਹਦਯਙ੍ਗਮਾ. ਗੁਣਪਰਿਪੁਣ੍ਣਤਾਯ ਪੁਰੇ ਭਵਾਤਿ ਪੋਰੀ. ਪੁਰੇ ਸਂਵਡ੍ਢਨਾਰੀ ਵਿਯ ਸੁਕੁਮਾਰਾਤਿਪਿ ਪੋਰੀ. ਪੁਰਸ੍ਸ ਏਸਾਤਿਪਿ ਪੋਰੀ, ਨਗਰਵਾਸੀਨਂ ਕਥਾਤਿ ਅਤ੍ਥੋ. ਨਗਰਵਾਸਿਨੋ ਹਿ ਯੁਤ੍ਤਕਥਾ ਹੋਨ੍ਤਿ, ਪਿਤਿਮਤ੍ਤਂ ਪਿਤਾਤਿ, ਭਾਤਿਮਤ੍ਤਂ ਭਾਤਾਤਿ ਵਦਨ੍ਤਿ. ਏਵਰੂਪੀ ਕਥਾ ਬਹੁਨੋ ਜਨਸ੍ਸ ਕਨ੍ਤਾ ਹੋਤੀਤਿ ਬਹੁਜਨਕਨ੍ਤਾ. ਕਨ੍ਤਭਾਵੇਨੇਵ ਬਹੁਜਨਸ੍ਸ ਮਨਾਪਾ ਚਿਤ੍ਤਵੁਡ੍ਢਿਕਰਾਤਿ ਬਹੁਜਨਮਨਾਪਾ.
ਕਾਲੇ ਵਦਤੀਤਿ ਕਾਲਵਾਦੀ, ਵਤ੍ਤਬ੍ਬਯੁਤ੍ਤਕਾਲਂ ਸਲ੍ਲਕ੍ਖੇਤ੍ਵਾ ਵਦਤੀਤਿ ਅਤ੍ਥੋ. ਭੂਤਂ ਤਚ੍ਛਂ ਸਭਾਵਮੇਵ ਵਦਤੀਤਿ ਭੂਤਵਾਦੀ. ਦਿਟ੍ਠਧਮ੍ਮਿਕਸਮ੍ਪਰਾਯਿਕਅਤ੍ਥਸਨ੍ਨਿਸ੍ਸਿਤਮੇਵ ਕਤ੍ਵਾ ਵਦਤੀਤਿ ਅਤ੍ਥਵਾਦੀ. ਨਵਲੋਕੁਤ੍ਤਰਧਮ੍ਮਸਨ੍ਨਿਸ੍ਸਿਤਂ ਕਤ੍ਵਾ ਵਦਤੀਤਿ ਧਮ੍ਮਵਾਦੀ. ਸਂਵਰਵਿਨਯਪਹਾਨਵਿਨਯਸਨ੍ਨਿਸ੍ਸਿਤਂ ਕਤ੍ਵਾ ਵਦਤੀਤਿ ਵਿਨਯਵਾਦੀ. ਨਿਧਾਨਂ ਵੁਚ੍ਚਤਿ ਠਪਨੋਕਾਸੋ, ਨਿਧਾਨਮਸ੍ਸਾ ਅਤ੍ਥੀਤਿ ਨਿਧਾਨਵਤੀ. ਹਦਯੇ ਨਿਧੇਤਬ੍ਬਯੁਤ੍ਤਕਂ ਵਾਚਂ ਭਾਸਿਤਾਤਿ ਅਤ੍ਥੋ. ਕਾਲੇਨਾਤਿ ਏਵਰੂਪਿਂ ਭਾਸਮਾਨੋਪਿ ਚ ‘‘ਅਹਂ ਨਿਧਾਨਵਤਿਂ ਵਾਚਂ ਭਾਸਿਸ੍ਸਾਮੀ’’ਤਿ ਨ ਅਕਾਲੇਨ ਭਾਸਤਿ, ਯੁਤ੍ਤਕਾਲਂ ਪਨ ਅਵੇਕ੍ਖਿਤ੍ਵਾਵ ਭਾਸਤੀਤਿ ਅਤ੍ਥੋ. ਸਾਪਦੇਸਨ੍ਤਿ ਸਉਪਮਂ, ਸਕਾਰਣਨ੍ਤਿ ਅਤ੍ਥੋ. ਪਰਿਯਨ੍ਤਵਤਿਨ੍ਤਿ ਪਰਿਚ੍ਛੇਦਂ ਦਸ੍ਸੇਤ੍ਵਾ, ਯਥਾਸ੍ਸਾ ਪਰਿਚ੍ਛੇਦੋ ਪਞ੍ਞਾਯਤਿ, ਏਵਂ ਭਾਸਤੀਤਿ ਅਤ੍ਥੋ. ਅਤ੍ਥਸਂਹਿਤਨ੍ਤਿ ਅਨੇਕੇਹਿਪਿ ਨਯੇਹਿ ਵਿਭਜਨ੍ਤੇਨ ਪਰਿਯਾਦਾਤੁਂ ਅਸਕ੍ਕੁਣੇਯ੍ਯਤਾਯ ਅਤ੍ਥਸਮ੍ਪਨ੍ਨਂ ਭਾਸਤਿ. ਯਂ ਵਾ ਸੋ ਅਤ੍ਥਵਾਦੀ ਅਤ੍ਥਂ ਵਦਤਿ, ਤੇਨ ਅਤ੍ਥੇਨ ਸਂਹਿਤਤ੍ਤਾ ਅਤ੍ਥਸਂਹਿਤਂ ਵਾਚਂ ਭਾਸਤਿ, ਨ ਅਞ੍ਞਂ ਨਿਕ੍ਖਿਪਿਤ੍ਵਾ ਅਞ੍ਞਂ ਭਾਸਤੀਤਿ ਵੁਤ੍ਤਂ ਹੋਤਿ.
ਬੀਜਗਾਮਭੂਤਗਾਮਸਮਾਰਮ੍ਭਾਤਿ ਮੂਲਬੀਜਂ ਖਨ੍ਧਬੀਜਂ ਫਲ਼ੁਬੀਜਂ ਅਗ੍ਗਬੀਜਂ ਬੀਜਬੀਜਨ੍ਤਿ ਪਞ੍ਚਵਿਧਸ੍ਸ ਬੀਜਗਾਮਸ੍ਸ ਚੇਵ ਯਸ੍ਸ ਕਸ੍ਸਚਿ ਨੀਲਤਿਣਰੁਕ੍ਖਾਦਿਕਸ੍ਸ ਭੂਤਗਾਮਸ੍ਸ ਚ ਸਮਾਰਮ੍ਭਾ, ਛੇਦਨਭੇਦਨਪਚਨਾਦਿਭਾਵੇਨ ਵਿਕੋਪਨਾ ਪਟਿਵਿਰਤੋਤਿ ਅਤ੍ਥੋ.