੭. ਰੋਗਸੁਤ੍ਤਵਣ੍ਣਨਾ

੧੫੭. ਸਤ੍ਤਮੇ ਵਿਘਾਤਵਾਤਿ ਮਹਿਚ੍ਛਾਪਚ੍ਚਯੇਨ ਵਿਘਾਤੇਨ ਦੁਕ੍ਖੇਨ ਸਮਨ੍ਨਾਗਤੋ. ਅਸਨ੍ਤੁਟ੍ਠੋਤਿ ਚਤੂਸੁ ਪਚ੍ਚਯੇਸੁ ਤੀਹਿ ਸਨ੍ਤੋਸੇਹਿ ਅਸਨ੍ਤੁਟ੍ਠੋ. ਅਨਵਞ੍ਞਪ੍ਪਟਿਲਾਭਾਯਾਤਿ ਪਰੇਹਿ ਅਨਵਜਾਨਨਸ੍ਸ ਪਟਿਲਾਭਤ੍ਥਾਯ. ਲਾਭਸਕ੍ਕਾਰਸਿਲੋਕਪ੍ਪਟਿਲਾਭਾਯਾਤਿ ਸੁਸਙ੍ਖਤਚਤੁਪਚ੍ਚਯਸਙ੍ਖਾਤਸ੍ਸ ਲਾਭਸਕ੍ਕਾਰਸ੍ਸ ਚੇਵ ਵਣ੍ਣਭਣਨਸਙ੍ਖਾਤਸ੍ਸ ਸਿਲੋਕਸ੍ਸ ਚ ਪਟਿਲਾਭਤ੍ਥਾਯ. ਸਙ੍ਖਾਯ ਕੁਲਾਨਿ ਉਪਸਙ੍ਕਮਤੀਤਿ ‘‘ਇਤਿ ਮਂ ਏਤੇ ਜਾਨਿਸ੍ਸਨ੍ਤੀ’’ਤਿ ਜਾਨਨਤ੍ਥਾਯ ਕੁਲਾਨਿ ਉਪਸਙ੍ਕਮਤਿ. ਸੇਸਪਦੇਸੁਪਿ ਏਸੇਵ ਨਯੋ.