੧੦. ਸੁਗਤਵਿਨਯਸੁਤ੍ਤਵਣ੍ਣਨਾ

੧੬੦. ਦਸਮੇ ਦੁਗ੍ਗਹਿਤਨ੍ਤਿ ਉਪ੍ਪਟਿਪਾਟਿਯਾ ਗਹਿਤਂ. ਪਰਿਯਾਪੁਣਨ੍ਤੀਤਿ ਵਲ਼ਞ੍ਜੇਨ੍ਤਿ ਕਥੇਨ੍ਤਿ. ਪਦਬ੍ਯਞ੍ਜਨੇਹੀਤਿ ਏਤ੍ਥ ਪਦਮੇਵ ਅਤ੍ਥਸ੍ਸ ਬ੍ਯਞ੍ਜਨਤੋ ਬ੍ਯਞ੍ਜਨਨ੍ਤਿ ਵੁਤ੍ਤਂ. ਦੁਨ੍ਨਿਕ੍ਖਿਤ੍ਤਸ੍ਸਾਤਿ ਦੁਟ੍ਠੁ ਨਿਕ੍ਖਿਤ੍ਤਸ੍ਸ ਉਪ੍ਪਟਿਪਾਟਿਯਾ ਠਪਿਤਸ੍ਸ. ਅਤ੍ਥੋਪਿ ਦੁਨ੍ਨਯੋ ਹੋਤੀਤਿ ਅਟ੍ਠਕਥਾ ਨੀਹਰਿਤ੍ਵਾ ਕਥੇਤੁਂ ਨ ਸਕ੍ਕਾ ਹੋਤਿ. ਛਿਨ੍ਨਮੂਲਕੋਤਿ ਮੂਲਭੂਤਾਨਂ ਭਿਕ੍ਖੂਨਂ ਉਪਚ੍ਛਿਨ੍ਨਤ੍ਤਾ ਛਿਨ੍ਨਮੂਲਕੋ. ਅਪ੍ਪਟਿਸਰਣੋਤਿ ਅਪ੍ਪਤਿਟ੍ਠੋ. ਬਾਹੁਲਿਕਾਤਿ ਪਚ੍ਚਯਬਾਹੁਲ੍ਲਾਯ ਪਟਿਪਨ੍ਨਾ. ਸਾਥਲਿਕਾਤਿ ਤਿਸ੍ਸੋ ਸਿਕ੍ਖਾ ਸਿਥਿਲਗ੍ਗਹਣੇਨ ਗਣ੍ਹਨਕਾ. ਓਕ੍ਕਮਨੇ ਪੁਬ੍ਬਙ੍ਗਮਾਤਿ ਪਞ੍ਚ ਨੀਵਰਣਾਨਿ ਅਵਗਮਨਤੋ ਓਕ੍ਕਮਨਨ੍ਤਿ ਵੁਚ੍ਚਨ੍ਤਿ, ਤਤ੍ਥ ਪੁਬ੍ਬਙ੍ਗਮਾਤਿ ਅਤ੍ਥੋ. ਪਵਿਵੇਕੇਤਿ ਤਿਵਿਧੇ ਵਿਵੇਕੇ. ਨਿਕ੍ਖਿਤ੍ਤਧੁਰਾਤਿ ਨਿਬ੍ਬੀਰਿਯਾ. ਇਮਿਨਾ ਨਯੇਨ ਪਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.

ਇਨ੍ਦ੍ਰਿਯਵਗ੍ਗੋ ਪਠਮੋ.