(੧੨) ੨. ਕੇਸਿਵਗ੍ਗੋ

੧. ਕੇਸਿਸੁਤ੍ਤਵਣ੍ਣਨਾ

੧੧੧. ਦੁਤਿਯਸ੍ਸ ਪਠਮੇ ਕੇਸੀਤਿ ਤਸ੍ਸ ਨਾਮਂ. ਅਸ੍ਸਦਮ੍ਮੇ ਸਾਰੇਤੀਤਿ ਅਸ੍ਸਦਮ੍ਮਸਾਰਥਿ. ਸਣ੍ਹੇਨਪਿ ਵਿਨੇਤੀਤਿਆਦੀਸੁ ਤਸ੍ਸ ਅਨੁਚ੍ਛਵਿਕਂ ਸਕ੍ਕਾਰਂ ਕਤ੍ਵਾ ਸੁਭੋਜਨਂ ਭੋਜੇਤ੍ਵਾ ਮਧੁਰਪਾਨਂ ਪਾਯੇਤ੍ਵਾ ਮੁਦੁਵਚਨੇਨ ਸਮੁਦਾਚਰਿਤ੍ਵਾ ਦਮੇਨ੍ਤੋ ਸਣ੍ਹੇਨ ਦਮੇਤਿ ਨਾਮ, ਜਾਣੁਬਨ੍ਧਨਮੁਖਬਨ੍ਧਨਾਦੀਹਿ ਚੇਵ ਪਤੋਦਵਿਜ੍ਝਨਕਸਾਭਿਘਾਤਫਰੁਸਵਚਨੇਹਿ ਚ ਦਮੇਨ੍ਤੋ ਫਰੁਸੇਨ ਦਮੇਤਿ ਨਾਮ, ਕਾਲੇਨ ਕਾਲਂ ਤਦੁਭਯਂ ਕਰੋਨ੍ਤੋ ਸਣ੍ਹਫਰੁਸੇਨ ਦਮੇਤਿ ਨਾਮ.

੨. ਜਵਸੁਤ੍ਤਵਣ੍ਣਨਾ

੧੧੨. ਦੁਤਿਯੇ ਅਜ੍ਜਵੇਨਾਤਿ ਉਜੁਕਭਾਵੇਨ. ਜਵੇਨਾਤਿ ਪਦਵੇਗੇਨ. ਖਨ੍ਤਿਯਾਤਿ ਅਧਿਵਾਸਨਕ੍ਖਨ੍ਤਿਯਾ. ਸੋਰਚ੍ਚੇਨਾਤਿ ਸੁਚਿਭਾਵਸੀਲੇਨ. ਪੁਗ੍ਗਲਗੁਣਙ੍ਗੇਸੁ ਜਵੇਨਾਤਿ ਞਾਣਜਵੇਨ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ.

੩. ਪਤੋਦਸੁਤ੍ਤਵਣ੍ਣਨਾ

੧੧੩. ਤਤਿਯੇ ਪਤੋਦਚ੍ਛਾਯਨ੍ਤਿ ਵਿਜ੍ਝਨਤ੍ਥਂ ਉਕ੍ਖਿਤ੍ਤਸ੍ਸ ਪਤੋਦਸ੍ਸ ਛਾਯਂ. ਸਂਵਿਜ੍ਜਤੀਤਿ ‘‘ਜਵੋ ਮੇ ਗਹੇਤਬ੍ਬੋ’’ਤਿ ਸਲ੍ਲਕ੍ਖਣਵਸੇਨ ਸਂਵਿਜ੍ਜਤਿ. ਸਂਵੇਗਂ ਆਪਜ੍ਜਤੀਤਿ ਸਂਵੇਗਂ ਪਟਿਪਜ੍ਜਤਿ ਲੋਮਵੇਧਵਿਦ੍ਧੋਤਿ ਲੋਮਕੂਪੇ ਪਤੋਦਵੇਧੇਨ ਵਿਦ੍ਧਮਤ੍ਤੋ. ਚਮ੍ਮਵੇਧਵਿਦ੍ਧੋਤਿ ਛਵਿਚਮ੍ਮਂ ਛਿਨ੍ਦਨ੍ਤੇਨ ਪਤੋਦਵੇਧੇਨ ਵਿਦ੍ਧੋ. ਅਟ੍ਠਿਵੇਧਵਿਦ੍ਧੋਤਿ ਅਟ੍ਠਿਂ ਭਿਨ੍ਦਨ੍ਤੇਨ ਵੇਧੇਨ ਵਿਦ੍ਧੋ. ਕਾਯੇਨਾਤਿ ਨਾਮਕਾਯੇਨ. ਪਰਮਸਚ੍ਚਨ੍ਤਿ ਨਿਬ੍ਬਾਨਂ. ਸਚ੍ਛਿਕਰੋਤੀਤਿ ਪਸ੍ਸਤਿ. ਪਞ੍ਞਾਯਾਤਿ ਸਹਵਿਪਸ੍ਸਨਾਯ ਮਗ੍ਗਪਞ੍ਞਾਯ.

੪. ਨਾਗਸੁਤ੍ਤਵਣ੍ਣਨਾ

੧੧੪. ਚਤੁਤ੍ਥੇ ਅਟ੍ਠਿਂ ਕਤ੍ਵਾਤਿ ਅਟ੍ਠਿਕੋ ਹੁਤ੍ਵਾ. ਤਿਣਵਨਿਨ੍ਨਾਦਸਦ੍ਦਾਨਨ੍ਤਿ ਏਤ੍ਥ ਤਿਣਵੋਤਿ ਡਿਣ੍ਡਿਮੋ, ਨਿਨ੍ਨਾਦਸਦ੍ਦੋਤਿ ਸਬ੍ਬੇਸਮ੍ਪਿ ਏਕਤੋਮਿਸ੍ਸਿਤੋ ਮਹਾਸਦ੍ਦੋ. ਡਂਸਾਦੀਸੁ ਡਂਸਾਤਿ ਪਿਙ੍ਗਲਮਕ੍ਖਿਕਾ, ਮਕਸਾ ਮਕਸਾਵ. ਖਿਪ੍ਪਞ੍ਞੇਵ ਗਨ੍ਤਾ ਹੋਤੀਤਿ ਸੀਲਸਮਾਧਿਪਞ੍ਞਾਵਿਮੁਤ੍ਤਿਵਿਮੁਤ੍ਤਿਞਾਣਦਸ੍ਸਨਾਨਿ ਪੂਰੇਤ੍ਵਾ ਸੀਘਮੇਵ ਗਨ੍ਤਾ ਹੋਤਿ.

੫. ਠਾਨਸੁਤ੍ਤਵਣ੍ਣਨਾ

੧੧੫. ਪਞ੍ਚਮੇ ਠਾਨਾਨੀਤਿ ਕਾਰਣਾਨਿ. ਅਨਤ੍ਥਾਯ ਸਂਵਤ੍ਤਤੀਤਿ ਅਹਿਤਾਯ ਅਵਡ੍ਢਿਯਾ ਸਂਵਤ੍ਤਤਿ. ਏਤ੍ਥ ਚ ਪਠਮਂ ਓਪਾਤਕ੍ਖਣਨਮਚ੍ਛਬਨ੍ਧਨਸਨ੍ਧਿਚ੍ਛੇਦਨਾਦਿਭੇਦਂ ਸਦੁਕ੍ਖਂ ਸਵਿਘਾਤਂ ਪਾਪਕਮ੍ਮਂ ਵੇਦਿਤਬ੍ਬਂ, ਦੁਤਿਯਂ ਸਮਜੀਵਿਕਾਨਂ ਗਿਹੀਨਂ ਪੁਪ੍ਫਚ੍ਛਡ੍ਡਕਾਦਿਕਮ੍ਮਂ ਸੁਧਾਕੋਟ੍ਟਨ-ਗੇਹਚ੍ਛਾਦਨਅਸੁਚਿਟ੍ਠਾਨਸਮ੍ਮਜ੍ਜਨਾਦਿਕਮ੍ਮਞ੍ਚ ਵੇਦਿਤਬ੍ਬਂ, ਤਤਿਯਂ ਸੁਰਾਪਾਨਗਨ੍ਧਵਿਲੇਪਨਮਾਲਾਪਿਲ਼ਨ੍ਧਨਾਦਿਕਮ੍ਮਞ੍ਚੇਵ ਅਸ੍ਸਾਦਵਸੇਨ ਪਵਤ੍ਤਂ ਪਾਣਾਤਿਪਾਤਾਦਿਕਮ੍ਮਞ੍ਚ ਵੇਦਿਤਬ੍ਬਂ, ਚਤੁਤ੍ਥਂ ਧਮ੍ਮਸ੍ਸਵਨਤ੍ਥਾਯ ਗਮਨਕਾਲੇ ਸੁਦ੍ਧਵਤ੍ਥਚ੍ਛਾਦਨ-ਮਾਲਾਗਨ੍ਧਾਦੀਨਂ ਆਦਾਯ ਗਮਨਂ ਚੇਤਿਯਵਨ੍ਦਨਂ ਬੋਧਿਵਨ੍ਦਨਂ ਮਧੁਰਧਮ੍ਮਕਥਾਸਵਨਂ ਪਞ੍ਚਸੀਲਸਮਾਦਾਨਨ੍ਤਿ ਏਵਮਾਦੀਸੁ ਸੋਮਨਸ੍ਸਸਮ੍ਪਯੁਤ੍ਤਂ ਕੁਸਲਕਮ੍ਮਂ ਵੇਦਿਤਬ੍ਬਂ. ਪੁਰਿਸਥਾਮੇਤਿ ਪੁਰਿਸਸ੍ਸ ਞਾਣਥਾਮਸ੍ਮਿਂ. ਸੇਸਦ੍ਵਯੇਪਿ ਏਸੇਵ ਨਯੋ.

੬. ਅਪ੍ਪਮਾਦਸੁਤ੍ਤਵਣ੍ਣਨਾ

੧੧੬. ਛਟ੍ਠੇ ਯਤੋ ਖੋਤਿ ਯਦਾ ਖੋ. ਸਮ੍ਪਰਾਯਿਕਸ੍ਸਾਤਿ ਦੇਸਨਾਮਤ੍ਤਮੇਤਂ, ਖੀਣਾਸਵੋ ਪਨ ਨੇਵ ਸਮ੍ਪਰਾਯਿਕਸ੍ਸ, ਨ ਦਿਟ੍ਠਧਮ੍ਮਿਕਸ੍ਸ ਮਰਣਸ੍ਸ ਭਾਯਤਿ. ਸੋਵ ਇਧ ਅਧਿਪ੍ਪੇਤੋ. ਕੇਚਿ ਪਨ ‘‘ਸਮ੍ਮਾਦਿਟ੍ਠਿ ਭਾਵਿਤਾਤਿ ਵਚਨਤੋ ਸੋਤਾਪਨ੍ਨਂ ਆਦਿਂ ਕਤ੍ਵਾ ਸਬ੍ਬੇਪਿ ਅਰਿਯਾ ਅਧਿਪ੍ਪੇਤਾ’’ਤਿ ਵਦਨ੍ਤਿ.

੭. ਆਰਕ੍ਖਸੁਤ੍ਤਵਣ੍ਣਨਾ

੧੧੭. ਸਤ੍ਤਮੇ ਅਤ੍ਤਰੂਪੇਨਾਤਿ ਅਤ੍ਤਨੋ ਅਨੁਰੂਪੇਨ ਅਨੁਚ੍ਛਵਿਕੇਨ, ਹਿਤਕਾਮੇਨਾਤਿ ਅਤ੍ਥੋ. ਰਜਨੀਯੇਸੂਤਿ ਰਾਗਸ੍ਸ ਪਚ੍ਚਯਭੂਤੇਸੁ. ਧਮ੍ਮੇਸੂਤਿ ਸਭਾਵੇਸੁ, ਇਟ੍ਠਾਰਮ੍ਮਣੇਸੂਤਿ ਅਤ੍ਥੋ. ਏਵਂ ਸਬ੍ਬਤ੍ਥ ਨਯੋ ਵੇਦਿਤਬ੍ਬੋ. ਨ ਰਜ੍ਜਤੀਤਿ ਦਿਟ੍ਠਿਵਸੇਨ ਨ ਰਜ੍ਜਤਿ. ਸੇਸਪਦੇਸੁਪਿ ਏਸੇਵ ਨਯੋ. ਨ ਚ ਪਨ ਸਮਣਵਚਨਹੇਤੁਪਿ ਗਚ੍ਛਤੀਤਿ ਸਮਣਾਨਂ ਪਰਵਾਦੀਨਂ ਵਚਨਹੇਤੁਪਿ ਅਤ੍ਤਨੋ ਦਿਟ੍ਠਿਂ ਪਹਾਯ ਤੇਸਂ ਦਿਟ੍ਠਿਵਸੇਨ ਨ ਗਚ੍ਛਤੀਤਿ ਅਤ੍ਥੋ. ਇਧਾਪਿ ਖੀਣਾਸਵੋਵ ਅਧਿਪ੍ਪੇਤੋ.

੮-੧੦. ਸਂਵੇਜਨੀਯਾਦਿਸੁਤ੍ਤਤ੍ਤਯਵਣ੍ਣਨਾ

੧੧੮-੧੨੦. ਅਟ੍ਠਮੇ ਦਸ੍ਸਨੀਯਾਨੀਤਿ ਪਸ੍ਸਿਤਬ੍ਬਯੁਤ੍ਤਕਾਨਿ. ਸਂਵੇਜਨੀਯਾਨੀਤਿ ਸਂਵੇਗਜਨਕਾਨਿ. ਨਵਮੇ ਜਾਤਿਭਯਨ੍ਤਿ ਜਾਤਿਂ ਆਰਬ੍ਭ ਉਪ੍ਪਜ੍ਜਨਕਭਯਂ. ਸੇਸਪਦੇਸੁਪਿ ਏਸੇਵ ਨਯੋ. ਦਸਮੇ ਅਗ੍ਗਿਭਯਨ੍ਤਿ ਅਗ੍ਗਿਂ ਪਟਿਚ੍ਚ ਉਪ੍ਪਜ੍ਜਨਕਭਯਂ. ਸੇਸਪਦੇਸੁਪਿ ਏਸੇਵ ਨਯੋ.

ਕੇਸਿਵਗ੍ਗੋ ਦੁਤਿਯੋ.