੩. ਪਠਮਸਂਵਾਸਸੁਤ੍ਤਵਣ੍ਣਨਾ

੫੩. ਤਤਿਯੇ ਸਮ੍ਬਹੁਲਾਪਿ ਖੋ ਗਹਪਤੀ ਚ ਗਹਪਤਾਨਿਯੋ ਚਾਤਿ ਬਹੁਕਾ ਗਹਪਤਯੋ ਚ ਗਹਪਤਾਨਿਯੋ ਚ ਆਵਾਹਵਿਵਾਹਕਰਣਤ੍ਥਾਯ ਗਚ੍ਛਨ੍ਤਾ ਤਮੇਵ ਮਗ੍ਗਂ ਪਟਿਪਨ੍ਨਾ ਹੋਨ੍ਤਿ. ਸਂਵਾਸਾਤਿ ਸਹਵਾਸਾ ਏਕਤੋਵਾਸਾ. ਛਵੋ ਛਵਾਯਾਤਿ ਗੁਣਮਰਣੇਨ ਮਤਤ੍ਤਾ ਛਵੋ ਗੁਣਮਰਣੇਨੇਵ ਮਤਾਯ ਛਵਾਯ ਸਦ੍ਧਿਂ. ਦੇਵਿਯਾ ਸਦ੍ਧਿਨ੍ਤਿ ਗੁਣੇਹਿ ਦੇਵਿਭੂਤਾਯ ਸਦ੍ਧਿਂ. ਦੁਸ੍ਸੀਲੋਤਿ ਨਿਸ੍ਸੀਲੋ. ਪਾਪਧਮ੍ਮੋਤਿ ਲਾਮਕਧਮ੍ਮੋ. ਅਕ੍ਕੋਸਕਪਰਿਭਾਸਕੋਤਿ ਦਸਹਿ ਅਕ੍ਕੋਸਵਤ੍ਥੂਹਿ ਅਕ੍ਕੋਸਕੋ, ਭਯਂ ਦਸ੍ਸੇਤ੍ਵਾ ਸਨ੍ਤਜ੍ਜਨੇਨ ਪਰਿਭਾਸਕੋ. ਏਵਂ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.

ਕਦਰਿਯਾਤਿ ਥਦ੍ਧਮਚ੍ਛਰਿਨੋ. ਜਾਨਿਪਤਯੋਤਿ ਜਯਮ੍ਪਤਿਕਾ. ਵਦਞ੍ਞੂਤਿ ਯਾਚਕਾਨਂ ਵਚਨਸ੍ਸ ਅਤ੍ਥਂ ਜਾਨਨ੍ਤਿ. ਸਞ੍ਞਤਾਤਿ ਸੀਲਸਂਯਮੇਨ ਸਮਨ੍ਨਾਗਤਾ. ਧਮ੍ਮਜੀਵਿਨੋਤਿ ਧਮ੍ਮੇ ਠਤ੍ਵਾ ਜੀਵਿਕਂ ਕਪ੍ਪੇਨ੍ਤੀਤਿ ਧਮ੍ਮਜੀਵਿਨੋ. ਅਤ੍ਥਾਸਂ ਪਚੁਰਾ ਹੋਨ੍ਤੀਤਿ ਵਡ੍ਢਿਸਙ੍ਖਾਤਾ ਅਤ੍ਥਾ ਏਤੇਸਂ ਬਹੂ ਹੋਨ੍ਤਿ. ਫਾਸੁਕਂ ਉਪਜਾਯਤੀਤਿ ਅਞ੍ਞਮਞ੍ਞਂ ਫਾਸੁਵਿਹਾਰੋ ਜਾਯਤਿ. ਕਾਮਕਾਮਿਨੋਤਿ ਕਾਮੇ ਕਾਮਯਮਾਨਾ.