੭. ਸਨ੍ਤੁਟ੍ਠਿਸੁਤ੍ਤਵਣ੍ਣਨਾ

੨੭. ਸਤ੍ਤਮੇ ਅਪ੍ਪਾਨੀਤਿ ਪਰਿਤ੍ਤਾਨਿ. ਸੁਲਭਾਨੀਤਿ ਸੁਖੇਨ ਲਦ੍ਧਬ੍ਬਾਨਿ, ਯਤ੍ਥ ਕਤ੍ਥਚਿ ਸਕ੍ਕਾ ਹੋਨ੍ਤਿ ਲਭਿਤੁਂ. ਅਨਵਜ੍ਜਾਨੀਤਿ ਨਿਦ੍ਦੋਸਾਨਿ. ਪਿਣ੍ਡਿਯਾਲੋਪਭੋਜਨਨ੍ਤਿ ਜਙ੍ਘਾਪਿਣ੍ਡਿਯਬਲੇਨ ਚਰਿਤ੍ਵਾ ਆਲੋਪਮਤ੍ਤਂ ਲਦ੍ਧਂ ਭੋਜਨਂ. ਪੂਤਿਮੁਤ੍ਤਨ੍ਤਿ ਯਂਕਿਞ੍ਚਿ ਮੁਤ੍ਤਂ. ਯਥਾ ਹਿ ਸੁਵਣ੍ਣਵਣ੍ਣੋਪਿ ਕਾਯੋ ਪੂਤਿਕਾਯੋਤਿ ਵੁਚ੍ਚਤਿ, ਏਵਂ ਅਭਿਨਵਮ੍ਪਿ ਮੁਤ੍ਤਂ ਪੂਤਿਮੁਤ੍ਤਮੇਵ.

ਵਿਘਾਤੋਤਿ ਵਿਗਤਘਾਤੋ, ਚਿਤ੍ਤਸ੍ਸ ਦੁਕ੍ਖਂ ਨ ਹੋਤੀਤਿ ਅਤ੍ਥੋ. ਦਿਸਾ ਨਪ੍ਪਟਿਹਞ੍ਞਤੀਤਿ ਯਸ੍ਸ ਹਿ ‘‘ਅਸੁਕਟ੍ਠਾਨਂ ਨਾਮ ਗਤੋ ਚੀਵਰਾਦੀਨਿ ਲਭਿਸ੍ਸਾਮੀ’’ਤਿ ਚਿਤ੍ਤਂ ਉਪ੍ਪਜ੍ਜਤਿ, ਤਸ੍ਸ ਦਿਸਾ ਪਟਿਹਞ੍ਞਤਿ ਨਾਮ. ਯਸ੍ਸ ਏਵਂ ਨ ਉਪ੍ਪਜ੍ਜਤਿ, ਤਸ੍ਸ ਨਪ੍ਪਟਿਹਞ੍ਞਤਿ ਨਾਮ. ਧਮ੍ਮਾਤਿ ਪਟਿਪਤ੍ਤਿਧਮ੍ਮਾ. ਸਾਮਞ੍ਞਸ੍ਸਾਨੁਲੋਮਿਕਾਤਿ ਸਮਣਧਮ੍ਮਸ੍ਸ ਅਨੁਲੋਮਾ. ਅਧਿਗ੍ਗਹਿਤਾਤਿ ਸਬ੍ਬੇਤੇ ਤੁਟ੍ਠਚਿਤ੍ਤਸ੍ਸ ਭਿਕ੍ਖੁਨੋ ਅਧਿਗ੍ਗਹਿਤਾ ਹੋਨ੍ਤਿ ਅਨ੍ਤੋਗਤਾ ਨ ਪਰਿਬਾਹਿਰਾਤਿ.