੬. ਸੋਖੁਮ੍ਮਸੁਤ੍ਤਵਣ੍ਣਨਾ

੧੬. ਛਟ੍ਠੇ ਸੋਖੁਮ੍ਮਾਨੀਤਿ ਸੁਖੁਮਲਕ੍ਖਣਪਟਿਵਿਜ੍ਝਨਕਾਨਿ ਞਾਣਾਨਿ. ਰੂਪਸੋਖੁਮ੍ਮੇਨ ਸਮਨ੍ਨਾਗਤੋ ਹੋਤੀਤਿ ਰੂਪੇ ਸਣ੍ਹਸੁਖੁਮਲਕ੍ਖਣਪਰਿਗ੍ਗਾਹਕੇਨ ਞਾਣੇਨ ਸਮਨ੍ਨਾਗਤੋ ਹੋਤਿ. ਪਰਮੇਨਾਤਿ ਉਤ੍ਤਮੇਨ. ਤੇਨ ਚ ਰੂਪਸੋਖੁਮ੍ਮੇਨਾਤਿ ਤੇਨ ਯਾਵ ਅਨੁਲੋਮਭਾਵਂ ਪਤ੍ਤੇਨ ਸੁਖੁਮਲਕ੍ਖਣਪਰਿਗ੍ਗਾਹਕਞਾਣੇਨ. ਨ ਸਮਨੁਪਸ੍ਸਤੀਤਿ ਨਤ੍ਥਿਭਾਵੇਨੇਵ ਨ ਪਸ੍ਸਤਿ. ਨ ਪਤ੍ਥੇਤੀਤਿ ਨਤ੍ਥਿਭਾਵੇਨੇਵ ਨ ਪਤ੍ਥੇਤਿ. ਵੇਦਨਾਸੋਖੁਮ੍ਮਾਦੀਸੁਪਿ ਏਸੇਵ ਨਯੋ.

ਰੂਪਸੋਖੁਮ੍ਮਤਂ ਞਤ੍ਵਾਤਿ ਰੂਪਕ੍ਖਨ੍ਧਸ੍ਸ ਸਣ੍ਹਸੁਖੁਮਲਕ੍ਖਣਪਰਿਗ੍ਗਾਹਕੇਨ ਞਾਣੇਨ ਸੁਖੁਮਤਂ ਜਾਨਿਤ੍ਵਾ. ਵੇਦਨਾਨਞ੍ਚ ਸਮ੍ਭਵਨ੍ਤਿ ਵੇਦਨਾਕ੍ਖਨ੍ਧਸ੍ਸ ਚ ਪਭਵਂ ਜਾਨਿਤ੍ਵਾ. ਸਞ੍ਞਾ ਯਤੋ ਸਮੁਦੇਤੀਤਿ ਯਸ੍ਮਾ ਕਾਰਣਾ ਸਞ੍ਞਾਕ੍ਖਨ੍ਧੋ ਸਮੁਦੇਤਿ ਨਿਬ੍ਬਤ੍ਤਤਿ, ਤਞ੍ਚ ਜਾਨਿਤ੍ਵਾ. ਅਤ੍ਥਂ ਗਚ੍ਛਤਿ ਯਤ੍ਥ ਚਾਤਿ ਯਸ੍ਮਿਂ ਠਾਨੇ ਨਿਰੁਜ੍ਝਤਿ, ਤਞ੍ਚ ਜਾਨਿਤ੍ਵਾ. ਸਙ੍ਖਾਰੇ ਪਰਤੋ ਞਤ੍ਵਾਤਿ ਸਙ੍ਖਾਰਕ੍ਖਨ੍ਧਂ ਅਨਿਚ੍ਚਤਾਯ ਲੁਜ੍ਜਨਭਾਵੇਨ ਪਰਤੋ ਜਾਨਿਤ੍ਵਾ. ਇਮਿਨਾ ਹਿ ਪਦੇਨ ਅਨਿਚ੍ਚਾਨੁਪਸ੍ਸਨਾ ਕਥਿਤਾ. ਦੁਕ੍ਖਤੋ ਨੋ ਚ ਅਤ੍ਤਤੋਤਿ ਇਮਿਨਾ ਦੁਕ੍ਖਾਨਤ੍ਤਾਨੁਪਸ੍ਸਨਾ. ਸਨ੍ਤੋਤਿ ਕਿਲੇਸਸਨ੍ਤਤਾਯ ਸਨ੍ਤੋ. ਸਨ੍ਤਿਪਦੇ ਰਤੋਤਿ ਨਿਬ੍ਬਾਨੇ ਰਤੋ. ਇਤਿ ਸੁਤ੍ਤਨ੍ਤੇ ਚਤੂਸੁ ਠਾਨੇਸੁ ਵਿਪਸ੍ਸਨਾਵ ਕਥਿਤਾ, ਗਾਥਾਸੁ ਲੋਕੁਤ੍ਤਰਧਮ੍ਮੋਪੀਤਿ.