੧. ਚਰਸੁਤ੍ਤਵਣ੍ਣਨਾ

੧੧. ਦੁਤਿਯਸ੍ਸ ਪਠਮੇ ਅਧਿਵਾਸੇਤੀਤਿ ਚਿਤ੍ਤਂ ਅਧਿਰੋਪੇਤ੍ਵਾ ਵਾਸੇਤਿ. ਨਪ੍ਪਜਹਤੀਤਿ ਨ ਪਰਿਚ੍ਚਜਤਿ. ਨ ਵਿਨੋਦੇਤੀਤਿ ਨ ਨੀਹਰਤਿ. ਨ ਬ੍ਯਨ੍ਤੀਕਰੋਤੀਤਿ ਨ ਵਿਗਤਨ੍ਤਂ ਪਰਿਚ੍ਛਿਨ੍ਨਪਰਿਵਟੁਮਂ ਕਰੋਤਿ. ਨ ਅਨਭਾਵਂ ਗਮੇਤੀਤਿ ਨ ਅਨੁਅਭਾਵਂ ਅਵਡ੍ਢਿਂ ਵਿਨਾਸਂ ਗਮੇਤਿ. ਚਰਮ੍ਪੀਤਿ ਚਰਨ੍ਤੋਪਿ. ਅਨਾਤਾਪੀਤਿ ਨਿਬ੍ਬੀਰਿਯੋ. ਅਨੋਤ੍ਤਾਪੀਤਿ ਉਪਵਾਦਭਯਰਹਿਤੋ. ਸਤਤਨ੍ਤਿ ਨਿਚ੍ਚਂ. ਸਮਿਤਨ੍ਤਿ ਨਿਰਨ੍ਤਰਂ. ਏਵਂ ਸਬ੍ਬਤ੍ਥ ਅਤ੍ਥਂ ਞਤ੍ਵਾ ਸੁਕ੍ਕਪਕ੍ਖੇ ਵੁਤ੍ਤਵਿਪਰਿਯਾਯੇਨ ਅਤ੍ਥੋ ਵੇਦਿਤਬ੍ਬੋ.

ਗਾਥਾਸੁ ਗੇਹਨਿਸ੍ਸਿਤਨ੍ਤਿ ਕਿਲੇਸਨਿਸ੍ਸਿਤਂ. ਮੋਹਨੇਯ੍ਯੇਸੂਤਿ ਮੋਹਜਨਕੇਸੁ ਆਰਮ੍ਮਣੇਸੁ. ਅਭਬ੍ਬੋਤਿ ਅਭਾਜਨਭੂਤੋ. ਫੁਟ੍ਠੁਂ ਸਮ੍ਬੋਧਿਮੁਤ੍ਤਮਨ੍ਤਿ ਅਰਹਤ੍ਤਮਗ੍ਗਸਙ੍ਖਾਤਂ ਉਤ੍ਤਮਞਾਣਂ ਫੁਸਿਤੁਂ.