੩. ਪਠਮਖਤਸੁਤ੍ਤਵਣ੍ਣਨਾ

੩. ਤਤਿਯਂ ਦੁਕਨਿਪਾਤਵਣ੍ਣਨਾਯਂ ਵੁਤ੍ਤਮੇਵ. ਗਾਥਾਸੁ ਪਨ ਨਿਨ੍ਦਿਯਨ੍ਤਿ ਨਿਨ੍ਦਿਤਬ੍ਬਯੁਤ੍ਤਕਂ. ਨਿਨ੍ਦਤੀਤਿ ਗਰਹਤਿ. ਪਸਂਸਿਯੋਤਿ ਪਸਂਸਿਤਬ੍ਬਯੁਤ੍ਤੋ. ਵਿਚਿਨਾਤਿ ਮੁਖੇਨ ਸੋ ਕਲਿਨ੍ਤਿ ਯੋ ਏਵਂ ਪਵਤ੍ਤੋ, ਤੇਨ ਮੁਖੇਨ ਕਲਿਂ ਵਿਚਿਨਾਤਿ ਨਾਮ. ਕਲਿਨਾ ਤੇਨ ਸੁਖਂ ਨ ਵਿਨ੍ਦਤੀਤਿ ਤੇਨ ਚ ਕਲਿਨਾ ਸੁਖਂ ਨ ਪਟਿਲਭਤਿ. ਸਬ੍ਬਸ੍ਸਾਪਿ ਸਹਾਪਿ ਅਤ੍ਤਨਾਤਿ ਸਬ੍ਬੇਨਪਿ ਸਕੇਨ ਧਨੇਨ ਚੇਵ ਅਤ੍ਤਨਾ ਚ ਸਦ੍ਧਿਂ ਯੋ ਪਰਾਜਯੋ, ਸੋ ਅਪ੍ਪਮਤ੍ਤਕੋਵ ਕਲੀਤਿ ਅਤ੍ਥੋ. ਯੋ ਸੁਗਤੇਸੂਤਿ ਯੋ ਪਨ ਸਮ੍ਮਗ੍ਗਤੇਸੁ ਪੁਗ੍ਗਲੇਸੁ ਚਿਤ੍ਤਂ ਪਦੁਸ੍ਸੇਯ੍ਯ, ਅਯਂ ਚਿਤ੍ਤਪਦੋਸੋਵ ਤਤੋ ਕਲਿਤੋ ਮਹਨ੍ਤਤਰੋ ਕਲਿ. ਇਦਾਨਿ ਤਸ੍ਸ ਮਹਨ੍ਤਤਰਭਾਵਂ ਦਸ੍ਸੇਨ੍ਤੋ ਸਤਂ ਸਹਸ੍ਸਾਨਨ੍ਤਿਆਦਿਮਾਹ. ਤਤ੍ਥ ਸਤਂ ਸਹਸ੍ਸਾਨਨ੍ਤਿ ਨਿਰਬ੍ਬੁਦਗਣਨਾਯ ਸਤਸਹਸ੍ਸਂ. ਛਤ੍ਤਿਂਸਤੀਤਿ ਅਪਰਾਨਿ ਚ ਛਤ੍ਤਿਂਸਤਿ ਨਿਰਬ੍ਬੁਦਾਨਿ. ਪਞ੍ਚ ਚਾਤਿ ਅਬ੍ਬੁਦਗਣਨਾਯ ਚ ਪਞ੍ਚ ਅਬ੍ਬੁਦਾਨਿ. ਯਮਰਿਯਗਰਹੀਤਿ ਯਂ ਅਰਿਯੇ ਗਰਹਨ੍ਤੋ ਨਿਰਯਂ ਉਪਪਜ੍ਜਤਿ, ਤਤ੍ਥ ਏਤ੍ਤਕਂ ਆਯੁਪ੍ਪਮਾਣਨ੍ਤਿ.