੧. ਅਨੁਬੁਦ੍ਧਸੁਤ੍ਤਵਣ੍ਣਨਾ

੧. ਚਤੁਕ੍ਕਨਿਪਾਤਸ੍ਸ ਪਠਮੇ ਅਨਨੁਬੋਧਾਤਿ ਅਬੁਜ੍ਝਨੇਨ ਅਜਾਨਨੇਨ. ਅਪ੍ਪਟਿਵੇਧਾਤਿ ਅਪ੍ਪਟਿਵਿਜ੍ਝਨੇਨ ਅਪਚ੍ਚਕ੍ਖਕਿਰਿਯਾਯ. ਦੀਘਮਦ੍ਧਾਨਨ੍ਤਿ ਚਿਰਕਾਲਂ. ਸਨ੍ਧਾਵਿਤਨ੍ਤਿ ਭਵਤੋ ਭਵਂ ਗਮਨਵਸੇਨ ਸਨ੍ਧਾਵਿਤਂ. ਸਂਸਰਿਤਨ੍ਤਿ ਪੁਨਪ੍ਪੁਨਂ ਗਮਨਾਗਮਨਵਸੇਨ ਸਂਸਰਿਤਂ. ਮਮਞ੍ਚੇਵ ਤੁਮ੍ਹਾਕਞ੍ਚਾਤਿ ਮਯਾ ਚ ਤੁਮ੍ਹੇਹਿ ਚ. ਅਥ ਵਾ ਸਨ੍ਧਾਵਿਤਂ ਸਂਸਰਿਤਨ੍ਤਿ ਸਨ੍ਧਾਵਨਂ ਸਂਸਰਣਂ ਮਮਞ੍ਚੇਵ ਤੁਮ੍ਹਾਕਞ੍ਚ ਅਹੋਸੀਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਅਰਿਯਸ੍ਸਾਤਿ ਨਿਦ੍ਦੋਸਸ੍ਸ. ਸੀਲਂ ਸਮਾਧਿ ਪਞ੍ਞਾਤਿ ਇਮੇ ਪਨ ਤਯੋ ਧਮ੍ਮਾ ਮਗ੍ਗਫਲਸਮ੍ਪਯੁਤ੍ਤਾਵ ਵੇਦਿਤਬ੍ਬਾ, ਵਿਮੁਤ੍ਤਿਨਾਮੇਨ ਫਲਮੇਵ ਨਿਦ੍ਦਿਟ੍ਠਂ. ਭਵਤਣ੍ਹਾਤਿ ਭਵੇਸੁ ਤਣ੍ਹਾ. ਭਵਨੇਤ੍ਤੀਤਿ ਭਵਰਜ੍ਜੁ. ਤਣ੍ਹਾਯ ਏਵ ਏਤਂ ਨਾਮਂ. ਤਾਯ ਹਿ ਸਤ੍ਤਾ ਗੋਣਾ ਵਿਯ ਗੀਵਾਯ ਬਨ੍ਧਿਤ੍ਵਾ ਤਂ ਤਂ ਭਵਂ ਨੀਯਨ੍ਤਿ, ਤਸ੍ਮਾ ਭਵਨੇਤ੍ਤੀਤਿ ਵੁਚ੍ਚਤਿ.

ਅਨੁਤ੍ਤਰਾਤਿ ਲੋਕੁਤ੍ਤਰਾ. ਦੁਕ੍ਖਸ੍ਸਨ੍ਤਕਰੋਤਿ ਵਟ੍ਟਦੁਕ੍ਖਸ੍ਸ ਅਨ੍ਤਕਰੋ. ਚਕ੍ਖੁਮਾਤਿ ਪਞ੍ਚਹਿ ਚਕ੍ਖੂਹਿ ਚਕ੍ਖੁਮਾ. ਪਰਿਨਿਬ੍ਬੁਤੋਤਿ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋ. ਇਦਮਸ੍ਸ ਬੋਧਿਮਣ੍ਡੇ ਪਠਮਪਰਿਨਿਬ੍ਬਾਨਂ, ਪਚ੍ਛਾ ਪਨ ਯਮਕਸਾਲਾਨਮਨ੍ਤਰੇ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤੋਤਿ ਯਥਾਨੁਸਨ੍ਧਿਨਾ ਦੇਸਨਂ ਨਿਟ੍ਠਾਪੇਸਿ.