੧. ਆਪਾਯਿਕਸੁਤ੍ਤਵਣ੍ਣਨਾ

੧੧੪. ਦੁਤਿਯਸ੍ਸ ਪਠਮੇ ਅਪਾਯਂ ਗਚ੍ਛਿਸ੍ਸਨ੍ਤੀਤਿ ਆਪਾਯਿਕਾ. ਨਿਰਯਂ ਗਚ੍ਛਿਸ੍ਸਨ੍ਤੀਤਿ ਨੇਰਯਿਕਾ. ਇਦਮਪ੍ਪਹਾਯਾਤਿ ਇਦਂ ਬ੍ਰਹ੍ਮਚਾਰਿਪਟਿਞ੍ਞਤਾਦਿਂ ਪਾਪਧਮ੍ਮਤ੍ਤਯਂ ਅਵਿਜਹਿਤ੍ਵਾ. ਬ੍ਰਹ੍ਮਚਾਰਿਪਟਿਞ੍ਞੋਤਿ ਬ੍ਰਹ੍ਮਚਾਰਿਪਟਿਰੂਪਕੋ, ਤੇਸਂ ਵਾ ਆਕਪ੍ਪਂ ਅਵਿਜਹਨੇਨ ‘‘ਅਹਮ੍ਪਿ ਬ੍ਰਹ੍ਮਚਾਰੀ’’ਤਿ ਏਵਂਪਟਿਞ੍ਞੋ. ਅਨੁਦ੍ਧਂਸੇਤੀਤਿ ਅਕ੍ਕੋਸਤਿ ਪਰਿਭਾਸਤਿ ਚੋਦੇਤਿ. ਨਤ੍ਥਿ ਕਾਮੇਸੁ ਦੋਸੋਤਿ ਕਿਲੇਸਕਾਮੇਨ ਵਤ੍ਥੁਕਾਮੇ ਸੇਵਨ੍ਤਸ੍ਸ ਨਤ੍ਥਿ ਦੋਸੋ. ਪਾਤਬ੍ਯਤਨ੍ਤਿ ਪਿਵਿਤਬ੍ਬਤਂ ਪਰਿਭੁਞ੍ਜਿਤਬ੍ਬਤਂ ਨਿਰਾਸਙ੍ਕੇਨ ਚਿਤ੍ਤੇਨ ਪਿਪਾਸਿਤਸ੍ਸ ਪਾਨੀਯਪਿਵਨਸਦਿਸਂ ਪਰਿਭੁਞ੍ਜਿਤਬ੍ਬਤਂ. ਇਮਸ੍ਮਿਂ ਸੁਤ੍ਤੇ ਵਟ੍ਟਮੇਵ ਕਥਿਤਂ.