੩. ਤਤਿਯਪਣ੍ਣਾਸਕਂ
(੧੧) ੧. ਸਮ੍ਬੋਧਵਗ੍ਗੋ
੧. ਪੁਬ੍ਬੇਵਸਮ੍ਬੋਧਸੁਤ੍ਤਵਣ੍ਣਨਾ
੧੦੪. ਤਤਿਯਸ੍ਸ ਪਠਮੇ ਪੁਬ੍ਬੇਵ ਸਮ੍ਬੋਧਾਤਿ ਸਮ੍ਬੋਧਿਤੋ ਪੁਬ੍ਬੇਵ, ਅਰਿਯਮਗ੍ਗਪ੍ਪਤ੍ਤਿਤੋ ਅਪਰਭਾਗੇਯੇਵਾਤਿ ਵੁਤ੍ਤਂ ਹੋਤਿ. ਅਨਭਿਸਮ੍ਬੁਦ੍ਧਸ੍ਸਾਤਿ ਅਪ੍ਪਟਿਵਿਦ੍ਧਚਤੁਸਚ੍ਚਸ੍ਸ. ਬੋਧਿਸਤ੍ਤਸ੍ਸੇਵ ਸਤੋਤਿ ਬੁਜ੍ਝਨਕਸਤ੍ਤਸ੍ਸੇਵ ਸਤੋ, ਸਮ੍ਮਾਸਮ੍ਬੋਧਿਂ ਅਧਿਗਨ੍ਤੁਂ ਆਰਭਨ੍ਤਸ੍ਸੇਵ ਸਤੋ, ਸਮ੍ਬੋਧਿਯਾ ਵਾ ਸਤ੍ਤਸ੍ਸੇਵ ਲਗ੍ਗਸ੍ਸੇਵ ਸਤੋ. ਦੀਪਙ੍ਕਰਸ੍ਸ ਹਿ ਭਗਵਤੋ ਪਾਦਮੂਲੇ ਅਟ੍ਠਧਮ੍ਮਸਮੋਧਾਨੇਨ ਅਭਿਨੀਹਾਰਸਮਿਦ੍ਧਿਤੋ ਪਭੁਤਿ ਤਥਾਗਤੋ ਸਮ੍ਮਾਸਮ੍ਬੋਧਿਂ ਸਤ੍ਤੋ ਲਗ੍ਗੋ ‘‘ਪਤ੍ਤਬ੍ਬਾ ਮਯਾ ਏਸਾ’’ਤਿ ਤਦਧਿਗਮਾਯ ਪਰਕ੍ਕਮਂ ਅਮੁਞ੍ਚਨ੍ਤੋਯੇਵ ਆਗਤੋ, ਤਸ੍ਮਾ ਬੋਧਿਸਤ੍ਤੋਤਿ ਵੁਚ੍ਚਤਿ. ਕੋ ਨੁ ਖੋਤਿ ਕਤਮੋ ਨੁ ਖੋ. ਲੋਕੋਤਿ ਸਙ੍ਖਾਰਲੋਕੋ. ਅਸ੍ਸਾਦੋਤਿ ਮਧੁਰਾਕਾਰੋ. ਆਦੀਨਵੋਤਿ ਅਨਭਿਨਨ੍ਦਿਤਬ੍ਬਾਕਾਰੋ. ਤਸ੍ਸ ਮਯ੍ਹਨ੍ਤਿ ਤਸ੍ਸ ਏਵਂ ਬੋਧਿਸਤ੍ਤਸ੍ਸੇਵ ਸਤੋ ਮਯ੍ਹਂ. ਛਨ੍ਦਰਾਗਵਿਨਯੋ ਛਨ੍ਦਰਾਗਪ੍ਪਹਾਨਨ੍ਤਿ ਨਿਬ੍ਬਾਨਂ ਆਗਮ੍ਮ ਆਰਬ੍ਭ ਪਟਿਚ੍ਚ ਛਨ੍ਦਰਾਗੋ ਵਿਨਯਂ ਗਚ੍ਛਤਿ ਪਹੀਯਤਿ, ਤਸ੍ਮਾ ਨਿਬ੍ਬਾਨਂ ‘‘ਛਨ੍ਦਰਾਗਵਿਨਯੋ ਛਨ੍ਦਰਾਗਪ੍ਪਹਾਨ’’ਨ੍ਤਿ ਵੁਚ੍ਚਤਿ. ਇਦਂ ਲੋਕਨਿਸ੍ਸਰਣਨ੍ਤਿ ਇਦਂ ਨਿਬ੍ਬਾਨਂ ਲੋਕਤੋ ਨਿਸ੍ਸਟਤ੍ਤਾ ਲੋਕਨਿਸ੍ਸਰਣਨ੍ਤਿ ਵੁਚ੍ਚਤਿ. ਯਾਵਕੀਵਨ੍ਤਿ ਯਤ੍ਤਕਂ ਪਮਾਣਂ ਕਾਲਂ. ਅਬ੍ਭਞ੍ਞਾਸਿਨ੍ਤਿ ਅਭਿਵਿਸਿਟ੍ਠੇਨ ਅਰਿਯਮਗ੍ਗਞਾਣੇਨ ਅਞ੍ਞਾਸਿਂ. ਞਾਣਞ੍ਚ ਪਨ ਮੇ ਦਸ੍ਸਨਨ੍ਤਿ ਦ੍ਵੀਹਿਪਿ ਪਦੇਹਿ ਪਚ੍ਚਵੇਕ੍ਖਣਞਾਣਂ ਵੁਤ੍ਤਂ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ.
੨. ਪਠਮਅਸ੍ਸਾਦਸੁਤ੍ਤਵਣ੍ਣਨਾ
੧੦੫. ਦੁਤਿਯੇ ਅਸ੍ਸਾਦਪਰਿਯੇਸਨਂ ਅਚਰਿਨ੍ਤਿ ਅਸ੍ਸਾਦਪਰਿਯੇਸਨਤ੍ਥਾਯ ਅਚਰਿਂ. ਕੁਤੋ ਪਟ੍ਠਾਯਾਤਿ? ਸੁਮੇਧਕਾਲਤੋ ਪਟ੍ਠਾਯ. ਪਞ੍ਞਾਯਾਤਿ ਸਹਵਿਪਸ੍ਸਨਾਯ ਮਗ੍ਗਪਞ੍ਞਾਯ. ਸੁਦਿਟ੍ਠੋਤਿ ਸੁਪ੍ਪਟਿਵਿਦ੍ਧੋ. ਇਮਿਨਾ ਉਪਾਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਤਤਿਯਂ ਸਬ੍ਬਤ੍ਥ ਉਤ੍ਤਾਨਮੇਵ.
੪. ਸਮਣਬ੍ਰਾਹ੍ਮਣਸੁਤ੍ਤਵਣ੍ਣਨਾ
੧੦੭. ਚਤੁਤ੍ਥੇ ਸਾਮਞ੍ਞਤ੍ਥਨ੍ਤਿ ਚਤੁਬ੍ਬਿਧਂ ਅਰਿਯਫਲਂ. ਇਤਰਂ ਤਸ੍ਸੇਵ ਵੇਵਚਨਂ. ਸਾਮਞ੍ਞਤ੍ਥੇਨ ਵਾ ਚਤ੍ਤਾਰੋ ਮਗ੍ਗਾ, ਬ੍ਰਹ੍ਮਞ੍ਞਤ੍ਥੇਨ ਚਤ੍ਤਾਰਿ ਫਲਾਨਿ. ਇਮੇਸੁ ਪਨ ਚਤੂਸੁਪਿ ਸੁਤ੍ਤੇਸੁ ਖਨ੍ਧਲੋਕੋਵ ਕਥਿਤੋ.
੫. ਰੁਣ੍ਣਸੁਤ੍ਤਵਣ੍ਣਨਾ
੧੦੮. ਪਞ੍ਚਮਂ ਅਤ੍ਥੁਪ੍ਪਤ੍ਤਿਯਾ ਨਿਕ੍ਖਿਤ੍ਤਂ. ਕਤਰਾਯ ਅਤ੍ਥੁਪ੍ਪਤ੍ਤਿਯਾ? ਛਬ੍ਬਗ੍ਗਿਯਾਨਂ ਅਨਾਚਾਰੇ. ਤੇ ਕਿਰ ਗਾਯਨ੍ਤਾ ਨਚ੍ਚਨ੍ਤਾ ਹਸਨ੍ਤਾ ਵਿਚਰਿਂਸੁ. ਭਿਕ੍ਖੂ ਦਸਬਲਸ੍ਸ ਆਰੋਚਯਿਂਸੁ. ਸਤ੍ਥਾ ਤੇ ਪਕ੍ਕੋਸਾਪੇਤ੍ਵਾ ਤੇਸਂ ਓਵਾਦਤ੍ਥਾਯ ਇਦਂ ਸੁਤ੍ਤਂ ਆਰਭਿ. ਤਤ੍ਥ ਰੁਣ੍ਣਨ੍ਤਿ ਰੋਦਿਤਂ. ਉਮ੍ਮਤ੍ਤਕਨ੍ਤਿ ਉਮ੍ਮਤ੍ਤਕਕਿਰਿਯਾ. ਕੋਮਾਰਕਨ੍ਤਿ ਕੁਮਾਰਕੇਹਿ ਕਤ੍ਤਬ੍ਬਕਿਚ੍ਚਂ. ਦਨ੍ਤਵਿਦਂਸਕਹਸਿਤਨ੍ਤਿ ਦਨ੍ਤੇ ਦਸ੍ਸੇਤ੍ਵਾ ਪਾਣਿਂ ਪਹਰਨ੍ਤਾਨਂ ਮਹਾਸਦ੍ਦੇਨ ਹਸਿਤਂ. ਸੇਤੁਘਾਤੋ ਗੀਤੇਤਿ ਗੀਤੇ ਵੋ ਪਚ੍ਚਯਘਾਤੋ ਹੋਤੁ, ਸਹੇਤੁਕਂ ਗੀਤਂ ਪਜਹਥਾਤਿ ਦੀਪੇਤਿ. ਨਚ੍ਚੇਪਿ ਏਸੇਵ ਨਯੋ. ਅਲਨ੍ਤਿ ਯੁਤ੍ਤਂ. ਧਮ੍ਮਪ੍ਪਮੋਦਿਤਾਨਂ ਸਤਨ੍ਤਿ ਏਤ੍ਥ ਧਮ੍ਮੋ ਵੁਚ੍ਚਤਿ ਕਾਰਣਂ, ਕੇਨਚਿਦੇਵ ਕਾਰਣੇਨ ਪਮੁਦਿਤਾਨਂ ਸਨ੍ਤਾਨਂ. ਸਿਤਂ ਸਿਤਮਤ੍ਤਾਯਾਤਿ ਤਸ੍ਮਿਂ ਸਿਤਕਾਰਣੇ ਸਤਿ ਯਂ ਸਿਤਂ ਕਰੋਥ, ਤਂ ਵੋ ਸਿਤਮਤ੍ਤਾਯ ਅਗ੍ਗਦਨ੍ਤੇ ਦਸ੍ਸੇਤ੍ਵਾ ਪਹਟ੍ਠਾਕਾਰਮਤ੍ਤਦਸ੍ਸਨਾਯਯੇਵ ਯੁਤ੍ਤਨ੍ਤਿ ਵੁਤ੍ਤਂ ਹੋਤਿ.
੬. ਅਤਿਤ੍ਤਿਸੁਤ੍ਤਵਣ੍ਣਨਾ
੧੦੯. ਛਟ੍ਠੇ ਸੋਪ੍ਪਸ੍ਸਾਤਿ ਨਿਦ੍ਦਾਯ. ਪਟਿਸੇਵਨਾਯ ਨਤ੍ਥਿ ਤਿਤ੍ਤੀਤਿ ਯਥਾ ਯਥਾ ਪਟਿਸੇਵਤਿ, ਤਥਾ ਤਥਾ ਰੁਚ੍ਚਤਿਯੇਵਾਤਿ ਤਿਤ੍ਤਿ ਨਾਮ ਨਤ੍ਥਿ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਸਚੇ ਹਿ ਮਹਾਸਮੁਦ੍ਦੇ ਉਦਕਂ ਸੁਰਾ ਭਵੇਯ੍ਯ, ਸੁਰਾਸੋਣ੍ਡੋ ਚ ਮਚ੍ਛੋ ਹੁਤ੍ਵਾ ਨਿਬ੍ਬਤ੍ਤੇਯ੍ਯ, ਤਸ੍ਸ ਤਤ੍ਥ ਚਰਨ੍ਤਸ੍ਸਪਿ ਸਯਨ੍ਤਸ੍ਸਪਿ ਤਿਤ੍ਤਿ ਨਾਮ ਨ ਭਵੇਯ੍ਯ. ਇਮਸ੍ਮਿਂ ਸੁਤ੍ਤੇ ਵਟ੍ਟਮੇਵ ਕਥਿਤਂ.
੭. ਅਰਕ੍ਖਿਤਸੁਤ੍ਤਵਣ੍ਣਨਾ
੧੧੦. ਸਤ੍ਤਮੇ ਅਵਸ੍ਸੁਤਂ ਹੋਤੀਤਿ ਤਿਨ੍ਤਂ ਹੋਤਿ. ਨ ਭਦ੍ਦਕਂ ਮਰਣਂ ਹੋਤੀਤਿ ਅਪਾਯੇ ਪਟਿਸਨ੍ਧਿਪਚ੍ਚਯਤਾਯ ਨ ਲਦ੍ਧਕਂ ਹੋਤਿ. ਕਾਲਕਿਰਿਯਾਤਿ ਤਸ੍ਸੇਵ ਵੇਵਚਨਂ. ਸੁਕ੍ਕਪਕ੍ਖੇ ਸਗ੍ਗੇ ਪਟਿਸਨ੍ਧਿਪਚ੍ਚਯਤਾਯ ਭਦ੍ਦਕਂ ਹੋਤਿ ਲਦ੍ਧਕਂ. ਤਂ ਪਨ ਏਕਨ੍ਤੇਨ ਸੋਤਾਪਨ੍ਨਾਦੀਨਂ ਤਿਣ੍ਣਂ ਅਰਿਯਸਾਵਕਾਨਂਯੇਵ ਵਟ੍ਟਤਿ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ.
੮. ਬ੍ਯਾਪਨ੍ਨਸੁਤ੍ਤਵਣ੍ਣਨਾ
੧੧੧. ਅਟ੍ਠਮੇ ਬ੍ਯਾਪਨ੍ਨਨ੍ਤਿ ਪਕਤਿਭਾਵਂ ਜਹਿਤ੍ਵਾ ਠਿਤਂ. ਸੇਸਂ ਪੁਰਿਮਸੁਤ੍ਤੇ ਵੁਤ੍ਤਨਯਮੇਵ.
੯. ਪਠਮਨਿਦਾਨਸੁਤ੍ਤਵਣ੍ਣਨਾ
੧੧੨. ਨਵਮੇ ਨਿਦਾਨਾਨੀਤਿ ਕਾਰਣਾਨਿ. ਕਮ੍ਮਾਨਂ ਸਮੁਦਯਾਯਾਤਿ ਵਟ੍ਟਗਾਮਿਕਮ੍ਮਾਨਂ ਪਿਣ੍ਡਕਰਣਤ੍ਥਾਯ. ਲੋਭਪਕਤਨ੍ਤਿ ਲੋਭੇਨ ਪਕਤਂ. ਸਾਵਜ੍ਜਨ੍ਤਿ ਸਦੋਸਂ. ਤਂ ਕਮ੍ਮਂ ਕਮ੍ਮਸਮੁਦਯਾਯ ਸਂਵਤ੍ਤਤੀਤਿ ਤਂ ਕਮ੍ਮਂ ਅਞ੍ਞੇਸਮ੍ਪਿ ਵਟ੍ਟਗਾਮਿਕਮ੍ਮਾਨਂ ਸਮੁਦਯਾਯ ਪਿਣ੍ਡਕਰਣਤ੍ਥਾਯ ਸਂਵਤ੍ਤਤਿ. ਨ ਤਂ ਕਮ੍ਮਂ ਕਮ੍ਮਨਿਰੋਧਾਯਾਤਿ ਤਂ ਪਨ ਕਮ੍ਮਂ ਵਟ੍ਟਗਾਮਿਕਮ੍ਮਾਨਂ ਨਿਰੋਧਤ੍ਥਾਯ ਨ ਸਂਵਤ੍ਤਤਿ. ਸੁਕ੍ਕਪਕ੍ਖੇ ਕਮ੍ਮਾਨਂ ਸਮੁਦਯਾਯਾਤਿ ਵਿਵਟ੍ਟਗਾਮਿਕਮ੍ਮਾਨਂ ਸਮੁਦਯਤ੍ਥਾਯ. ਇਮਿਨਾ ਨਯੇਨ ਸਬ੍ਬਂ ਅਤ੍ਥਤੋ ਵੇਦਿਤਬ੍ਬਂ.
੧੦. ਦੁਤਿਯਨਿਦਾਨਸੁਤ੍ਤਵਣ੍ਣਨਾ
੧੧੩. ਦਸਮੇ ਕਮ੍ਮਾਨਨ੍ਤਿ ਵਟ੍ਟਗਾਮਿਕਮ੍ਮਾਨਮੇਵ. ਛਨ੍ਦਰਾਗਟ੍ਠਾਨਿਯੇਤਿ ਛਨ੍ਦਰਾਗਸ੍ਸ ਕਾਰਣਭੂਤੇ. ਆਰਬ੍ਭਾਤਿ ਆਗਮ੍ਮ ਸਨ੍ਧਾਯ ਪਟਿਚ੍ਚ. ਛਨ੍ਦੋਤਿ ਤਣ੍ਹਾਛਨ੍ਦੋ. ਯੋ ਚੇਤਸੋ ਸਾਰਾਗੋਤਿ ਯੋ ਚਿਤ੍ਤਸ੍ਸ ਰਾਗੋ ਰਜ੍ਜਨਾ ਰਜ੍ਜਿਤਤ੍ਤਂ, ਏਤਮਹਂ ਸਂਯੋਜਨਂ ਵਦਾਮਿ, ਬਨ੍ਧਨਂ ਵਦਾਮੀਤਿ ਅਤ੍ਥੋ. ਸੁਕ੍ਕਪਕ੍ਖੇ ਕਮ੍ਮਾਨਨ੍ਤਿ ਵਿਵਟ੍ਟਗਾਮਿਕਮ੍ਮਾਨਂ. ਤਦਭਿਨਿਵਤ੍ਤੇਤੀਤਿ ਤਂ ਅਭਿਨਿਵਤ੍ਤੇਤਿ. ਯਦਾ ਵਾ ਤੇਨ ਵਿਪਾਕੋ ਞਾਤੋ ਹੋਤਿ ਵਿਦਿਤੋ, ਤਦਾ ਤੇ ਚੇਵ ਧਮ੍ਮੇ ਤਞ੍ਚ ਵਿਪਾਕਂ ਅਭਿਨਿਵਤ੍ਤੇਤਿ. ਇਮਿਨਾ ਚ ਪਦੇਨ ਵਿਪਸ੍ਸਨਾ ਕਥਿਤਾ, ਤਦਭਿਨਿਵਤ੍ਤੇਤ੍ਵਾਤਿ ਇਮਿਨਾ ਮਗ੍ਗੋ. ਚੇਤਸਾ ਅਭਿਨਿਵਿਜ੍ਝਿਤ੍ਵਾਤਿ ਇਮਿਨਾ ਚ ਮਗ੍ਗੋਵ. ਪਞ੍ਞਾਯ ਅਤਿਵਿਜ੍ਝ ਪਸ੍ਸਤੀਤਿ ਸਹ ਵਿਪਸ੍ਸਨਾਯ ਮਗ੍ਗਪਞ੍ਞਾਯ ਨਿਬ੍ਬਿਜ੍ਝਿਤ੍ਵਾ ਪਸ੍ਸਤਿ. ਏਵਂ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਇਮਸ੍ਮਿਂ ਪਨ ਸੁਤ੍ਤੇ ਵਟ੍ਟਵਿਵਟ੍ਟਂ ਕਥਿਤਨ੍ਤਿ.
ਸਮ੍ਬੋਧਵਗ੍ਗੋ ਪਠਮੋ.
(੧੨) ੨. ਆਪਾਯਿਕਵਗ੍ਗੋ
੧. ਆਪਾਯਿਕਸੁਤ੍ਤਵਣ੍ਣਨਾ
੧੧੪. ਦੁਤਿਯਸ੍ਸ ਪਠਮੇ ਅਪਾਯਂ ਗਚ੍ਛਿਸ੍ਸਨ੍ਤੀਤਿ ਆਪਾਯਿਕਾ. ਨਿਰਯਂ ਗਚ੍ਛਿਸ੍ਸਨ੍ਤੀਤਿ ਨੇਰਯਿਕਾ. ਇਦਮਪ੍ਪਹਾਯਾਤਿ ਇਦਂ ਬ੍ਰਹ੍ਮਚਾਰਿਪਟਿਞ੍ਞਤਾਦਿਂ ਪਾਪਧਮ੍ਮਤ੍ਤਯਂ ਅਵਿਜਹਿਤ੍ਵਾ. ਬ੍ਰਹ੍ਮਚਾਰਿਪਟਿਞ੍ਞੋਤਿ ਬ੍ਰਹ੍ਮਚਾਰਿਪਟਿਰੂਪਕੋ, ਤੇਸਂ ਵਾ ਆਕਪ੍ਪਂ ਅਵਿਜਹਨੇਨ ‘‘ਅਹਮ੍ਪਿ ਬ੍ਰਹ੍ਮਚਾਰੀ’’ਤਿ ਏਵਂਪਟਿਞ੍ਞੋ. ਅਨੁਦ੍ਧਂਸੇਤੀਤਿ ਅਕ੍ਕੋਸਤਿ ਪਰਿਭਾਸਤਿ ਚੋਦੇਤਿ. ਨਤ੍ਥਿ ਕਾਮੇਸੁ ਦੋਸੋਤਿ ਕਿਲੇਸਕਾਮੇਨ ਵਤ੍ਥੁਕਾਮੇ ਸੇਵਨ੍ਤਸ੍ਸ ਨਤ੍ਥਿ ਦੋਸੋ. ਪਾਤਬ੍ਯਤਨ੍ਤਿ ਪਿਵਿਤਬ੍ਬਤਂ ਪਰਿਭੁਞ੍ਜਿਤਬ੍ਬਤਂ ਨਿਰਾਸਙ੍ਕੇਨ ਚਿਤ੍ਤੇਨ ਪਿਪਾਸਿਤਸ੍ਸ ਪਾਨੀਯਪਿਵਨਸਦਿਸਂ ਪਰਿਭੁਞ੍ਜਿਤਬ੍ਬਤਂ. ਇਮਸ੍ਮਿਂ ਸੁਤ੍ਤੇ ਵਟ੍ਟਮੇਵ ਕਥਿਤਂ.
੨. ਦੁਲ੍ਲਭਸੁਤ੍ਤਵਣ੍ਣਨਾ
੧੧੫. ਦੁਤਿਯੇ ਕਤਞ੍ਞੂ ਕਤਵੇਦੀਤਿ ‘‘ਇਮਿਨਾ ਮਯ੍ਹਂ ਕਤ’’ਨ੍ਤਿ ਤੇਨ ਕਤਕਮ੍ਮਂ ਞਤ੍ਵਾ ਵਿਦਿਤਂ ਪਾਕਟਂ ਕਤ੍ਵਾ ਪਟਿਕਰਣਕਪੁਗ੍ਗਲੋ.
੩. ਅਪ੍ਪਮੇਯ੍ਯਸੁਤ੍ਤਵਣ੍ਣਨਾ
੧੧੬. ਤਤਿਯੇ ਸੁਖੇਨ ਮੇਤਬ੍ਬੋਤਿ ਸੁਪ੍ਪਮੇਯ੍ਯੋ. ਦੁਕ੍ਖੇਨ ਮੇਤਬ੍ਬੋਤਿ ਦੁਪ੍ਪਮੇਯ੍ਯੋ. ਪਮੇਤੁਂ ਨ ਸਕ੍ਕੋਤੀਤਿ ਅਪ੍ਪਮੇਯ੍ਯੋ. ਉਨ੍ਨਲ਼ੋਤਿ ਉਗ੍ਗਤਨਲ਼ੋ, ਤੁਚ੍ਛਮਾਨਂ ਉਕ੍ਖਿਪਿਤ੍ਵਾ ਠਿਤੋਤਿ ਅਤ੍ਥੋ. ਚਪਲੋਤਿ ਪਤ੍ਤਮਣ੍ਡਨਾਦਿਨਾ ਚਾਪਲ੍ਲੇਨ ਸਮਨ੍ਨਾਗਤੋ. ਮੁਖਰੋਤਿ ਮੁਖਖਰੋ. ਵਿਕਿਣ੍ਣਵਾਚੋਤਿ ਅਸਞ੍ਞਤਵਚਨੋ. ਅਸਮਾਹਿਤੋਤਿ ਚਿਤ੍ਤੇਕਗ੍ਗਤਾਰਹਿਤੋ. ਵਿਬ੍ਭਨ੍ਤਚਿਤ੍ਤੋਤਿ ਭਨ੍ਤਚਿਤ੍ਤੋ ਭਨ੍ਤਗਾਵਿਭਨ੍ਤਮਿਗਸਪ੍ਪਟਿਭਾਗੋ. ਪਾਕਤਿਨ੍ਦ੍ਰਿਯੋਤਿ ਵਿਵਟਿਨ੍ਦ੍ਰਿਯੋ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ.
੪. ਆਨੇਞ੍ਜਸੁਤ੍ਤਵਣ੍ਣਨਾ
੧੧੭. ਚਤੁਤ੍ਥੇ ਤਦਸ੍ਸਾਦੇਤੀਤਿ ਤਂ ਝਾਨਂ ਅਸ੍ਸਾਦੇਤਿ. ਤਂ ਨਿਕਾਮੇਤੀਤਿ ਤਦੇਵ ਪਤ੍ਥੇਤਿ. ਤੇਨ ਚ ਵਿਤ੍ਤਿਂ ਆਪਜ੍ਜਤੀਤਿ ਤੇਨ ਝਾਨੇਨ ਤੁਟ੍ਠਿਂ ਆਪਜ੍ਜਤਿ. ਤਤ੍ਰ ਠਿਤੋਤਿ ਤਸ੍ਮਿਂ ਝਾਨੇ ਠਿਤੋ. ਤਦਧਿਮੁਤ੍ਤੋਤਿ ਤਤ੍ਥੇਵ ਅਧਿਮੁਤ੍ਤੋ. ਤਬ੍ਬਹੁਲਵਿਹਾਰੀਤਿ ਤੇਨ ਬਹੁਲਂ ਵਿਹਰਨ੍ਤੋ. ਸਹਬ੍ਯਤਂ ਉਪਪਜ੍ਜਤੀਤਿ ਸਹਭਾਵਂ ਉਪਪਜ੍ਜਤਿ, ਤਸ੍ਮਿਂ ਦੇਵਲੋਕੇ ਨਿਬ੍ਬਤ੍ਤਤੀਤਿ ਅਤ੍ਥੋ. ਨਿਰਯਮ੍ਪਿ ਗਚ੍ਛਤੀਤਿਆਦਿ ਨਿਰਯਾਦੀਹਿ ਅਵਿਪ੍ਪਮੁਤ੍ਤਤ੍ਤਾ ਅਪਰਪਰਿਯਾਯਵਸੇਨ ਤਤ੍ਥ ਗਮਨਂ ਸਨ੍ਧਾਯ ਵੁਤ੍ਤਂ. ਨ ਹਿ ਤਸ੍ਸ ਉਪਚਾਰਜ੍ਝਾਨਤੋ ਬਲਵਤਰਂ ਅਕੁਸਲਂ ਅਤ੍ਥਿ, ਯੇਨ ਅਨਨ੍ਤਰਂ ਅਪਾਯੇ ਨਿਬ੍ਬਤ੍ਤੇਯ੍ਯ. ਭਗਵਤੋ ਪਨ ਸਾਵਕੋਤਿ ਸੋਤਾਪਨ੍ਨਸਕਦਾਗਾਮਿਅਨਾਗਾਮੀਨਂ ਅਞ੍ਞਤਰੋ. ਤਸ੍ਮਿਂਯੇਵ ਭਵੇਤਿ ਤਤ੍ਥੇਵ ਅਰੂਪਭਵੇ. ਪਰਿਨਿਬ੍ਬਾਯਤੀਤਿ ਅਪ੍ਪਚ੍ਚਯਪਰਿਨਿਬ੍ਬਾਨੇਨ ਪਰਿਨਿਬ੍ਬਾਯਤਿ. ਅਧਿਪ੍ਪਯਾਸੋਤਿ ਅਧਿਕਪ੍ਪਯੋਗੋ. ਸੇਸਮੇਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਇਮਸ੍ਮਿਂ ਪਨ ਸੁਤ੍ਤੇ ਪੁਥੁਜ੍ਜਨਸ੍ਸ ਉਪਪਤ੍ਤਿਜ੍ਝਾਨਂ ਕਥਿਤਂ, ਅਰਿਯਸਾਵਕਸ੍ਸ ਤਦੇਵ ਉਪਪਤ੍ਤਿਜ੍ਝਾਨਞ੍ਚ ਵਿਪਸ੍ਸਨਾਪਾਦਕਜ੍ਝਾਨਞ੍ਚ ਕਥਿਤਂ.
੫. ਵਿਪਤ੍ਤਿਸਮ੍ਪਦਾਸੁਤ੍ਤਵਣ੍ਣਨਾ
੧੧੮. ਪਞ੍ਚਮੇ ਸੀਲਵਿਪਤ੍ਤੀਤਿ ਸੀਲਸ੍ਸ ਵਿਪਨ੍ਨਾਕਾਰੋ. ਸੇਸਦ੍ਵਯੇਪਿ ਏਸੇਵ ਨਯੋ. ਨਤ੍ਥਿ ਦਿਨ੍ਨਨ੍ਤਿ ਦਿਨ੍ਨਸ੍ਸ ਫਲਾਭਾਵਂ ਸਨ੍ਧਾਯ ਵਦਤਿ. ਯਿਟ੍ਠਂ ਵੁਚ੍ਚਤਿ ਮਹਾਯੋਗੋ. ਹੁਤਨ੍ਤਿ ਪਹੇਣਕਸਕ੍ਕਾਰੋ ਅਧਿਪ੍ਪੇਤੋ. ਤਮ੍ਪਿ ਉਭਯਂ ਫਲਾਭਾਵਮੇਵ ਸਨ੍ਧਾਯ ਪਟਿਕ੍ਖਿਪਤਿ. ਸੁਕਤਦੁਕ੍ਕਟਾਨਨ੍ਤਿ ਸੁਕਤਦੁਕ੍ਕਤਾਨਂ, ਕੁਸਲਾਕੁਸਲਾਨਨ੍ਤਿ ਅਤ੍ਥੋ. ਫਲਂ ਵਿਪਾਕੋਤਿ ਯਂ ਫਲਨ੍ਤਿ ਵਾ ਵਿਪਾਕੋਤਿ ਵਾ ਵੁਚ੍ਚਤਿ, ਤਂ ਨਤ੍ਥੀਤਿ ਵਦਤਿ. ਨਤ੍ਥਿ ਅਯਂ ਲੋਕੋਤਿ ਪਰਲੋਕੇ ਠਿਤਸ੍ਸ ਅਯਂ ਲੋਕੋ ਨਤ੍ਥਿ, ਨਤ੍ਥਿ ਪਰੋ ਲੋਕੋਤਿ ਇਧ ਲੋਕੇ ਠਿਤਸ੍ਸਾਪਿ ਪਰਲੋਕੋ ਨਤ੍ਥਿ, ਸਬ੍ਬੇ ਤਤ੍ਥ ਤਤ੍ਥੇਵ ਉਚ੍ਛਿਜ੍ਜਨ੍ਤੀਤਿ ਦਸ੍ਸੇਤਿ. ਨਤ੍ਥਿ ਮਾਤਾ ਨਤ੍ਥਿ ਪਿਤਾਤਿ ਤੇਸੁ ਸਮ੍ਮਾਪਟਿਪਤ੍ਤਿਮਿਚ੍ਛਾਪਟਿਪਤ੍ਤੀਨਂ ਫਲਾਭਾਵਵਸੇਨ ਵਦਤਿ. ਨਤ੍ਥਿ ਸਤ੍ਤਾ ਓਪਪਾਤਿਕਾਤਿ ਚਵਿਤ੍ਵਾ ਉਪ੍ਪਜ੍ਜਨਕਸਤ੍ਤਾ ਨਾਮ ਨਤ੍ਥੀਤਿ ਵਦਤਿ. ਸਮ੍ਪਦਾਤਿ ਪਾਰਿਪੂਰਿਯੋ. ਸੀਲਸਮ੍ਪਦਾਤਿ ਸੀਲਸ੍ਸ ਪਰਿਪੁਣ੍ਣਅਵੇਕਲ੍ਲਭਾਵੋ. ਸੇਸਦ੍ਵਯੇਪਿ ਏਸੇਵ ਨਯੋ. ਅਤ੍ਥਿ ਦਿਨ੍ਨਨ੍ਤਿਆਦਿ ਵੁਤ੍ਤਪਟਿਪਕ੍ਖਨਯੇਨ ਗਹੇਤਬ੍ਬਂ.
੬. ਅਪਣ੍ਣਕਸੁਤ੍ਤਵਣ੍ਣਨਾ
੧੧੯. ਛਟ੍ਠੇ ਅਪਣ੍ਣਕੋ ਮਣੀਤਿ ਛਹਿ ਤਲੇਹਿ ਸਮਨ੍ਨਾਗਤੋ ਪਾਸਕੋ. ਸੁਗਤਿਂ ਸਗ੍ਗਨ੍ਤਿ ਚਾਤੁਮਹਾਰਾਜਿਕਾਦੀਸੁ ਅਞ੍ਞਤਰਂ ਸਗ੍ਗਂ ਲੋਕਂ. ਇਮਸ੍ਮਿਂ ਸੁਤ੍ਤੇ ਸੀਲਞ੍ਚ ਸਮ੍ਮਾਦਿਟ੍ਠਿ ਚਾਤਿ ਉਭਯਮ੍ਪਿ ਮਿਸ੍ਸਕਂ ਕਥਿਤਂ. ਸਤ੍ਤਮਂ ਉਤ੍ਤਾਨਮੇਵ.
੮. ਪਠਮਸੋਚੇਯ੍ਯਸੁਤ੍ਤਵਣ੍ਣਨਾ
੧੨੧. ਅਟ੍ਠਮੇ ਸੋਚੇਯ੍ਯਾਨੀਤਿ ਸੁਚਿਭਾਵਾ. ਕਾਯਸੋਚੇਯ੍ਯਨ੍ਤਿ ਕਾਯਦ੍ਵਾਰੇ ਸੁਚਿਭਾਵੋ. ਸੇਸਦ੍ਵਯੇਪਿ ਏਸੇਵ ਨਯੋ. ਇਮੇਸੁ ਪਨ ਪਟਿਪਾਟਿਯਾ ਚਤੂਸੁ ਸੁਤ੍ਤੇਸੁ ਅਗਾਰਿਕਪਟਿਪਦਾ ਕਥਿਤਾ. ਸੋਤਾਪਨ੍ਨਸਕਦਾਗਾਮੀਨਮ੍ਪਿ ਵਟ੍ਟਤਿ.
੯. ਦੁਤਿਯਸੋਚੇਯ੍ਯਸੁਤ੍ਤਵਣ੍ਣਨਾ
੧੨੨. ਨਵਮੇ ਅਜ੍ਝਤ੍ਤਨ੍ਤਿ ਨਿਯਕਜ੍ਝਤ੍ਤਂ. ਕਾਮਚ੍ਛਨ੍ਦਨ੍ਤਿ ਕਾਮਚ੍ਛਨ੍ਦਨੀਵਰਣਂ. ਬ੍ਯਾਪਾਦਾਦੀਸੁਪਿ ਏਸੇਵ ਨਯੋ. ਸੇਸਮੇਤ੍ਥ ਹੇਟ੍ਠਾ ਵੁਤ੍ਤਨਯਮੇਵ. ਗਾਥਾਯ ਪਨ ਕਾਯਸੁਚਿਨ੍ਤਿ ਕਾਯਦ੍ਵਾਰੇ ਸੁਚਿਂ, ਕਾਯੇਨ ਵਾ ਸੁਚਿਂ. ਸੇਸਦ੍ਵਯੇਪਿ ਏਸੇਵ ਨਯੋ. ਨਿਨ੍ਹਾਤਪਾਪਕਨ੍ਤਿ ਸਬ੍ਬੇ ਪਾਪੇ ਨਿਨ੍ਹਾਪੇਤ੍ਵਾ ਧੋਵਿਤ੍ਵਾ ਠਿਤਂ. ਇਮਿਨਾ ਸੁਤ੍ਤੇਨਪਿ ਗਾਥਾਯਪਿ ਖੀਣਾਸਵੋਵ ਕਥਿਤੋਤਿ.
੧੦. ਮੋਨੇਯ੍ਯਸੁਤ੍ਤਵਣ੍ਣਨਾ
੧੨੩. ਦਸਮੇ ਮੋਨੇਯ੍ਯਾਨੀਤਿ ਮੁਨਿਭਾਵਾ. ਕਾਯਮੋਨੇਯ੍ਯਨ੍ਤਿ ਕਾਯਦ੍ਵਾਰੇ ਮੁਨਿਭਾਵੋ ਸਾਧੁਭਾਵੋ ਪਣ੍ਡਿਤਭਾਵੋ. ਸੇਸਦ੍ਵਯੇਪਿ ਏਸੇਵ ਨਯੋ. ਇਦਂ ਵੁਚ੍ਚਤਿ, ਭਿਕ੍ਖਵੇ, ਕਾਯਮੋਨੇਯ੍ਯਨ੍ਤਿ ਇਦਂ ਤਿਵਿਧਕਾਯਦੁਚ੍ਚਰਿਤਪ੍ਪਹਾਨਂ ਕਾਯਮੋਨੇਯ੍ਯਂ ਨਾਮ. ਅਪਿਚ ਤਿਵਿਧਂ ਕਾਯਸੁਚਰਿਤਮ੍ਪਿ ਕਾਯਮੋਨੇਯ੍ਯਂ, ਤਥਾ ਕਾਯਾਰਮ੍ਮਣਂ ਞਾਣਂ ਕਾਯਮੋਨੇਯ੍ਯਂ, ਕਾਯਪਰਿਞ੍ਞਾ ਕਾਯਮੋਨੇਯ੍ਯਂ, ਪਰਿਞ੍ਞਾਸਹਗਤੋ ਮਗ੍ਗੋ ਕਾਯਮੋਨੇਯ੍ਯਂ, ਕਾਯੇ ਛਨ੍ਦਰਾਗਸ੍ਸ ਪਹਾਨਂ ਕਾਯਮੋਨੇਯ੍ਯਂ, ਕਾਯਸਙ੍ਖਾਰਨਿਰੋਧੋ ਚਤੁਤ੍ਥਜ੍ਝਾਨਸਮਾਪਤ੍ਤਿ ਕਾਯਮੋਨੇਯ੍ਯਂ. ਵਚੀਮੋਨੇਯ੍ਯੇਪਿ ਏਸੇਵ ਨਯੋ.
ਅਯਂ ਪਨੇਤ੍ਥ ਵਿਸੇਸੋ – ਯਥਾ ਇਧ ਚਤੁਤ੍ਥਜ੍ਝਾਨਸਮਾਪਤ੍ਤਿ, ਏਵਂ ਤਤ੍ਥ ਵਚੀਸਙ੍ਖਾਰਨਿਰੋਧੋ ਦੁਤਿਯਜ੍ਝਾਨਸਮਾਪਤ੍ਤਿ ਵਚੀਮੋਨੇਯ੍ਯਨ੍ਤਿ ਵੇਦਿਤਬ੍ਬਾ. ਮਨੋਮੋਨੇਯ੍ਯਮ੍ਪਿ ਇਮਿਨਾਵ ਨਯੇਨ ਅਤ੍ਥਂ ਞਤ੍ਵਾ ਚਿਤ੍ਤਸਙ੍ਖਾਰਨਿਰੋਧੋ ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ ਮਨੋਮੋਨੇਯ੍ਯਨ੍ਤਿ ਵੇਦਿਤਬ੍ਬਾ. ਕਾਯਮੁਨਿਨ੍ਤਿ ਕਾਯਦ੍ਵਾਰੇ ਮੁਨਿਂ ਉਤ੍ਤਮਂ ਪਰਿਸੁਦ੍ਧਂ, ਕਾਯੇਨ ਵਾ ਮੁਨਿਂ. ਸੇਸਦ੍ਵਯੇਪਿ ਏਸੇਵ ਨਯੋ. ਸਬ੍ਬਪ੍ਪਹਾਯਿਨਨ੍ਤਿ ਖੀਣਾਸਵਂ. ਖੀਣਾਸਵੋ ਹਿ ਸਬ੍ਬਪ੍ਪਹਾਯੀ ਨਾਮਾਤਿ.
ਆਪਾਯਿਕਵਗ੍ਗੋ ਦੁਤਿਯੋ.
(੧੩) ੩. ਕੁਸਿਨਾਰਵਗ੍ਗੋ
੧. ਕੁਸਿਨਾਰਸੁਤ੍ਤਵਣ੍ਣਨਾ
੧੨੪. ਤਤਿਯਸ੍ਸ ਪਠਮੇ ਕੁਸਿਨਾਰਾਯਨ੍ਤਿ ਏਵਂਨਾਮਕੇ ਨਗਰੇ. ਬਲਿਹਰਣੇ ਵਨਸਣ੍ਡੇਤਿ ਏਵਂਨਾਮਕੇ ਵਨਸਣ੍ਡੇ. ਤਤ੍ਥ ਕਿਰ ਭੂਤਬਲਿਕਰਣਤ੍ਥਂ ਬਲਿਂ ਹਰਨ੍ਤਿ, ਤਸ੍ਮਾ ਬਲਿਹਰਣਨ੍ਤਿ ਵੁਚ੍ਚਤਿ. ਆਕਙ੍ਖਮਾਨੋਤਿ ਇਚ੍ਛਮਾਨੋ. ਸਹਤ੍ਥਾਤਿ ਸਹਤ੍ਥੇਨ. ਸਮ੍ਪਵਾਰੇਤੀਤਿ ਅਲਂ ਅਲਨ੍ਤਿ ਵਾਚਾਯ ਚੇਵ ਹਤ੍ਥਵਿਕਾਰੇਨ ਚ ਪਟਿਕ੍ਖਿਪਾਪੇਤਿ. ਸਾਧੁ ਵਤ ਮਾਯਨ੍ਤਿ ਸਾਧੁ ਵਤ ਮਂ ਅਯਂ. ਗਥਿਤੋਤਿ ਤਣ੍ਹਾਗੇਧੇਨ ਗਥਿਤੋ. ਮੁਚ੍ਛਿਤੋਤਿ ਤਣ੍ਹਾਮੁਚ੍ਛਨਾਯਯੇਵ ਮੁਚ੍ਛਿਤੋ. ਅਜ੍ਝੋਪਨ੍ਨੋਤਿ ਤਣ੍ਹਾਯ ਗਿਲਿਤ੍ਵਾ ਪਰਿਨਿਟ੍ਠਪੇਤ੍ਵਾ ਪਵਤ੍ਤੋ. ਅਨਿਸ੍ਸਰਣਪਞ੍ਞੋਤਿ ਛਨ੍ਦਰਾਗਂ ਪਹਾਯ ਸਂਕਡ੍ਢਿਤ੍ਵਾ ਪਰਿਭੁਞ੍ਜਨ੍ਤੋ ਨਿਸ੍ਸਰਣਪਞ੍ਞੋ ਨਾਮ ਹੋਤਿ, ਅਯਂ ਨ ਤਾਦਿਸੋ, ਸਚ੍ਛਨ੍ਦਰਾਗੋ ਪਰਿਭੁਞ੍ਜਤੀਤਿ ਅਨਿਸ੍ਸਰਣਪਞ੍ਞੋ. ਸੁਕ੍ਕਪਕ੍ਖੋ ਵੁਤ੍ਤਵਿਪਰਿਯਾਯੇਨ ਵੇਦਿਤਬ੍ਬੋ. ਨੇਕ੍ਖਮ੍ਮਵਿਤਕ੍ਕਾਦਯੋ ਪਨੇਤ੍ਥ ਮਿਸ੍ਸਕਾ ਕਥਿਤਾਤਿ ਵੇਦਿਤਬ੍ਬਾ.
੨. ਭਣ੍ਡਨਸੁਤ੍ਤਵਣ੍ਣਨਾ
੧੨੫. ਦੁਤਿਯੇ ਪਜਹਿਂਸੂਤਿ ਪਜਹਨ੍ਤਿ. ਬਹੁਲਮਕਂਸੂਤਿ ਪੁਨਪ੍ਪੁਨਂ ਕਰੋਨ੍ਤਿ. ਇਧਾਪਿ ਤਯੋ ਵਿਤਕ੍ਕਾ ਮਿਸ੍ਸਕਾਵ ਕਥਿਤਾ.
੩. ਗੋਤਮਕਚੇਤਿਯਸੁਤ੍ਤਵਣ੍ਣਨਾ
੧੨੬. ਤਤਿਯੇ ਗੋਤਮਕੇ ਚੇਤਿਯੇਤਿ ਗੋਤਮਕਯਕ੍ਖਸ੍ਸ ਭਵਨੇ. ਤਥਾਗਤੋ ਹਿ ਪਠਮਬੋਧਿਯਂ ਵੀਸਤਿ ਵਸ੍ਸਾਨਿ ਕਦਾਚਿ ਚਾਪਾਲੇ ਚੇਤਿਯੇ, ਕਦਾਚਿ ਸਾਰਨ੍ਦਦੇ, ਕਦਾਚਿ ਬਹੁਪੁਤ੍ਤੇ, ਕਦਾਚਿ ਗੋਤਮਕੇਤਿ ਏਵਂ ਯੇਭੁਯ੍ਯੇਨ ਦੇਵਕੁਲੇਸੁਯੇਵ ਵਿਹਾਸਿ. ਇਮਸ੍ਮਿਂ ਪਨ ਕਾਲੇ ਵੇਸਾਲਿਂ ਉਪਨਿਸ੍ਸਾਯ ਗੋਤਮਕਸ੍ਸ ਯਕ੍ਖਸ੍ਸ ਭਵਨਟ੍ਠਾਨੇ ਵਿਹਾਸਿ. ਤੇਨ ਵੁਤ੍ਤਂ – ‘‘ਗੋਤਮਕੇ ਚੇਤਿਯੇ’’ਤਿ. ਏਤਦਵੋਚਾਤਿ ਏਤਂ ‘‘ਅਭਿਞ੍ਞਾਯਾਹ’’ਨ੍ਤਿਆਦਿਕਂ ਸੁਤ੍ਤਂ ਅਵੋਚ.
ਇਦਞ੍ਚ ਭਗਵਤਾ ਸੁਤ੍ਤਂ ਅਤ੍ਥੁਪ੍ਪਤ੍ਤਿਯਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਕਤਰਅਤ੍ਥੁਪ੍ਪਤ੍ਤਿਯਨ੍ਤਿ? ਮੂਲਪਰਿਯਾਯਅਤ੍ਥੁਪ੍ਪਤ੍ਤਿਯਂ (ਮ. ਨਿ. ੧.੧ ਆਦਯੋ). ਸਮ੍ਬਹੁਲਾ ਕਿਰ ਬ੍ਰਾਹ੍ਮਣਪਬ੍ਬਜਿਤਾ ਅਤ੍ਤਨਾ ਉਗ੍ਗਹਿਤਬੁਦ੍ਧਵਚਨਂ ਨਿਸ੍ਸਾਯ ਜਾਨਨਮਦਂ ਉਪ੍ਪਾਦੇਤ੍ਵਾ ਧਮ੍ਮਸ੍ਸਵਨਗ੍ਗਂ ਨ ਗਚ੍ਛਨ੍ਤਿ – ‘‘ਸਮ੍ਮਾਸਮ੍ਬੁਦ੍ਧੋ ਕਥੇਨ੍ਤੋ ਅਮ੍ਹੇਹਿ ਞਾਤਮੇਵ ਕਥੇਸ੍ਸਤਿ, ਨੋ ਅਞ੍ਞਾਤ’’ਨ੍ਤਿ. ਭਿਕ੍ਖੂ ਤਥਾਗਤਸ੍ਸ ਆਰੋਚੇਸੁਂ. ਸਤ੍ਥਾ ਤੇ ਭਿਕ੍ਖੂ ਪਕ੍ਕੋਸਾਪੇਤ੍ਵਾ ਮੁਖਪਟਿਞ੍ਞਂ ਗਹੇਤ੍ਵਾ ਮੂਲਪਰਿਯਾਯਂ ਦੇਸੇਸਿ. ਤੇ ਭਿਕ੍ਖੂ ਦੇਸਨਾਯ ਨੇਵ ਆਗਤਟ੍ਠਾਨਂ, ਨ ਗਤਟ੍ਠਾਨਂ ਅਦ੍ਦਸਂਸੁ. ਅਪਸ੍ਸਨ੍ਤਾ ‘‘ਸਮ੍ਮਾਸਮ੍ਬੁਦ੍ਧੋ ‘ਮਯ੍ਹਂ ਕਥਾ ਨਿਯ੍ਯਾਤੀ’ਤਿ ਮੁਖਸਮ੍ਪਤ੍ਤਮੇਵ ਕਥੇਤੀ’’ਤਿ ਚਿਨ੍ਤਯਿਂਸੁ. ਸਤ੍ਥਾ ਤੇਸਂ ਮਨਂ ਜਾਨਿਤ੍ਵਾ ਇਮਂ ਸੁਤ੍ਤਨ੍ਤਂ ਆਰਭਿ.
ਤਤ੍ਥ ਅਭਿਞ੍ਞਾਯਾਤਿ ‘‘ਇਮੇ ਪਞ੍ਚਕ੍ਖਨ੍ਧਾ, ਦ੍ਵਾਦਸਾਯਤਨਾਨਿ, ਅਟ੍ਠਾਰਸ ਧਾਤੁਯੋ, ਬਾਵੀਸਤਿਨ੍ਦ੍ਰਿਯਾਨਿ, ਚਤ੍ਤਾਰਿ ਸਚ੍ਚਾਨਿ, ਨਵ ਹੇਤੂ, ਸਤ੍ਤ ਫਸ੍ਸਾ, ਸਤ੍ਤ ਵੇਦਨਾ, ਸਤ੍ਤ ਚੇਤਨਾ, ਸਤ੍ਤ ਸਞ੍ਞਾ, ਸਤ੍ਤ ਚਿਤ੍ਤਾਨੀ’’ਤਿ ਜਾਨਿਤ੍ਵਾ ਪਟਿਵਿਜ੍ਝਿਤ੍ਵਾ ਪਚ੍ਚਕ੍ਖਂ ਕਤ੍ਵਾ, ਤਥਾ – ‘‘ਇਮੇ ਚਤ੍ਤਾਰੋ ਸਤਿਪਟ੍ਠਾਨਾ’’ਤਿਆਦਿਨਾ ਨਯੇਨ ਤੇ ਤੇ ਧਮ੍ਮੇ ਜਾਨਿਤ੍ਵਾ ਪਟਿਵਿਜ੍ਝਿਤ੍ਵਾ ਪਚ੍ਚਕ੍ਖਮੇਵ ਕਤ੍ਵਾਤਿ ਅਤ੍ਥੋ. ਸਨਿਦਾਨਨ੍ਤਿ ਸਪ੍ਪਚ੍ਚਯਮੇਵ ਕਤ੍ਵਾ ਕਥੇਮਿ, ਨੋ ਅਪ੍ਪਚ੍ਚਯਂ. ਸਪ੍ਪਾਟਿਹਾਰਿਯਨ੍ਤਿ ਪਚ੍ਚਨੀਕਪਟਿਹਰਣੇਨ ਸਪ੍ਪਾਟਿਹਾਰਿਯਮੇਵ ਕਤ੍ਵਾ ਕਥੇਮਿ, ਨੋ ਅਪ੍ਪਾਟਿਹਾਰਿਯਂ. ਅਲਞ੍ਚ ਪਨ ਵੋਤਿ ਯੁਤ੍ਤਞ੍ਚ ਪਨ ਤੁਮ੍ਹਾਕਂ. ਤੁਟ੍ਠਿਯਾਤਿ ‘‘ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਕ੍ਖਾਤੋ ਧਮ੍ਮੋ, ਸੁਪ੍ਪਟਿਪਨ੍ਨੋ ਸਙ੍ਘੋ’’ਤਿ ਤੀਣਿ ਰਤਨਾਨਿ ਗੁਣਤੋ ਅਨੁਸ੍ਸਰਨ੍ਤਾਨਂ ਤੁਮ੍ਹਾਕਂ ਯੁਤ੍ਤਮੇਵ ਤੁਟ੍ਠਿਂ ਕਾਤੁਨ੍ਤਿ ਅਤ੍ਥੋ. ਸੇਸਪਦਦ੍ਵਯੇਪਿ ਏਸੇਵ ਨਯੋ.
ਅਕਮ੍ਪਿਤ੍ਥਾਤਿ ਛਹਿ ਆਕਾਰੇਹਿ ਅਕਮ੍ਪਿਤ੍ਥ. ਏਵਰੂਪੋ ਹਿ ਪਥਵਿਕਮ੍ਪੋ ਬੋਧਿਮਣ੍ਡੇਪਿ ਅਹੋਸਿ. ਬੋਧਿਸਤ੍ਤੇ ਕਿਰ ਦਕ੍ਖਿਣਦਿਸਾਭਾਗੇਨ ਬੋਧਿਮਣ੍ਡਂ ਅਭਿਰੁਲ਼੍ਹੇ ਦਕ੍ਖਿਣਦਿਸਾਭਾਗੋ ਹੇਟ੍ਠਾ ਅਵੀਚਿਂ ਪਾਪੁਣਨ੍ਤੋ ਵਿਯ ਅਹੋਸਿ, ਉਤ੍ਤਰਭਾਗੋ ਉਗ੍ਗਨ੍ਤ੍ਵਾ ਭਵਗ੍ਗਂ ਅਭਿਹਨਨ੍ਤੋ ਵਿਯ. ਪਚ੍ਛਿਮਦਿਸਂ ਗਤੇ ਪਚ੍ਛਿਮਭਾਗੋ ਹੇਟ੍ਠਾ ਅਵੀਚਿਂ ਪਾਪੁਣਨ੍ਤੋ ਵਿਯ ਅਹੋਸਿ, ਪਾਚੀਨਭਾਗੋ ਉਗ੍ਗਨ੍ਤ੍ਵਾ ਭਵਗ੍ਗਂ ਅਭਿਹਨਨ੍ਤੋ ਵਿਯ. ਉਤ੍ਤਰਦਿਸਂ ਗਤੇ ਉਤ੍ਤਰਦਿਸਾਭਾਗੋ ਹੇਟ੍ਠਾ ਅਵੀਚਿਂ ਪਾਪੁਣਨ੍ਤੋ ਵਿਯ, ਦਕ੍ਖਿਣਦਿਸਾਭਾਗੋ ਉਗ੍ਗਨ੍ਤ੍ਵਾ ਭਵਗ੍ਗਂ ਅਭਿਹਨਨ੍ਤੋ ਵਿਯ. ਪਾਚੀਨਦਿਸਂ ਗਤੇ ਪਾਚੀਨਦਿਸਾਭਾਗੋ ਹੇਟ੍ਠਾ ਅਵੀਚਿਂ ਪਾਪੁਣਨ੍ਤੋ ਵਿਯ, ਪਚ੍ਛਿਮਭਾਗੋ ਉਗ੍ਗਨ੍ਤ੍ਵਾ ਭਵਗ੍ਗਂ ਅਭਿਹਨਨ੍ਤੋ ਵਿਯ. ਬੋਧਿਰੁਕ੍ਖੋਪਿ ਸਕਿਂ ਹੇਟ੍ਠਾ ਅਵੀਚਿਂ ਪਾਪੁਣਨ੍ਤੋ ਵਿਯ, ਸਕਿਂ ਉਗ੍ਗਨ੍ਤ੍ਵਾ ਭਵਗ੍ਗਂ ਅਭਿਹਨਨ੍ਤੋ ਵਿਯ. ਤਸ੍ਮਿਮ੍ਪਿ ਦਿਵਸੇ ਏਵਂ ਛਹਿ ਆਕਾਰੇਹਿ ਚਕ੍ਕਵਾਲ਼ਸਹਸ੍ਸੀ ਮਹਾਪਥਵੀ ਅਕਮ੍ਪਿਤ੍ਥ.
੪. ਭਰਣ੍ਡੁਕਾਲਾਮਸੁਤ੍ਤਵਣ੍ਣਨਾ
੧੨੭. ਚਤੁਤ੍ਥੇ ਕੇਵਲਕਪ੍ਪਨ੍ਤਿ ਸਕਲਕਪ੍ਪਂ. ਅਨ੍ਵਾਹਿਣ੍ਡਨ੍ਤੋਤਿ ਵਿਚਰਨ੍ਤੋ. ਨਾਦ੍ਦਸਾਤਿ ਕਿਂ ਕਾਰਣਾ ਨ ਅਦ੍ਦਸ? ਅਯਂ ਕਿਰ ਭਰਣ੍ਡੁ ਕਾਲਾਮੋ ਸਕ੍ਯਾਨਂ ਅਗ੍ਗਪਿਣ੍ਡਂ ਖਾਦਨ੍ਤੋ ਵਿਚਰਤਿ. ਤਸ੍ਸ ਵਸਨਟ੍ਠਾਨਂ ਸਮ੍ਪਤ੍ਤਕਾਲੇ ਏਕਾ ਧਮ੍ਮਦੇਸਨਾ ਸਮੁਟ੍ਠਹਿਸ੍ਸਤੀਤਿ ਞਤ੍ਵਾ ਭਗਵਾ ਏਵਂ ਅਧਿਟ੍ਠਾਸਿ, ਯਥਾ ਅਞ੍ਞੋ ਆਵਸਥੋ ਨ ਪਞ੍ਞਾਯਿਤ੍ਥ. ਤਸ੍ਮਾ ਨ ਅਦ੍ਦਸ. ਪੁਰਾਣਸਬ੍ਰਹ੍ਮਚਾਰੀਤਿ ਪੋਰਾਣਕੋ ਸਬ੍ਰਹ੍ਮਚਾਰੀ. ਸੋ ਕਿਰ ਆਲ਼ਾਰਕਾਲਾਮਕਾਲੇ ਤਸ੍ਮਿਂਯੇਵ ਅਸ੍ਸਮੇ ਅਹੋਸਿ, ਤਂ ਸਨ੍ਧਾਯੇਵਮਾਹ. ਸਨ੍ਥਰਂ ਪਞ੍ਞਾਪੇਹੀਤਿ ਸਨ੍ਥਰਿਤਬ੍ਬਂ ਸਨ੍ਥਰਾਹੀਤਿ ਅਤ੍ਥੋ. ਸਨ੍ਥਰਂ ਪਞ੍ਞਾਪੇਤ੍ਵਾਤਿ ਕਪ੍ਪਿਯਮਞ੍ਚਕੇ ਪਚ੍ਚਤ੍ਥਰਣਂ ਪਞ੍ਞਾਪੇਤ੍ਵਾ. ਕਾਮਾਨਂ ਪਰਿਞ੍ਞਂ ਪਞ੍ਞਾਪੇਤੀਤਿ ਏਤ੍ਥ ਪਰਿਞ੍ਞਾ ਨਾਮ ਸਮਤਿਕ੍ਕਮੋ, ਤਸ੍ਮਾ ਕਾਮਾਨਂ ਸਮਤਿਕ੍ਕਮਂ ਪਠਮਜ੍ਝਾਨਂ ਪਞ੍ਞਾਪੇਤਿ. ਨ ਰੂਪਾਨਂ ਪਰਿਞ੍ਞਨ੍ਤਿ ਰੂਪਾਨਂ ਸਮਤਿਕ੍ਕਮਭੂਤਂ ਅਰੂਪਾਵਚਰਸਮਾਪਤ੍ਤਿਂ ਨ ਪਞ੍ਞਾਪੇਤਿ. ਨ ਵੇਦਨਾਨਂ ਪਰਿਞ੍ਞਨ੍ਤਿ ਵੇਦਨਾਨਂ ਸਮਤਿਕ੍ਕਮਂ ਨਿਬ੍ਬਾਨਂ ਨ ਪਞ੍ਞਾਪੇਤਿ. ਨਿਟ੍ਠਾਤਿ ਗਤਿ ਨਿਪ੍ਫਤ੍ਤਿ. ਉਦਾਹੁ ਪੁਥੂਤਿ ਉਦਾਹੁ ਨਾਨਾ.
੫. ਹਤ੍ਥਕਸੁਤ੍ਤਵਣ੍ਣਨਾ
੧੨੮. ਪਞ੍ਚਮੇ ਅਭਿਕ੍ਕਨ੍ਤਾਯ ਰਤ੍ਤਿਯਾਤਿ ਏਤ੍ਥ ਅਭਿਕ੍ਕਨ੍ਤਸਦ੍ਦੋ ਖਯਸੁਨ੍ਦਰਾਭਿਰੂਪਅਬ੍ਭਨੁਮੋਦਨਾਦੀਸੁ ਦਿਸ੍ਸਤਿ. ਤਤ੍ਥ ‘‘ਅਭਿਕ੍ਕਨ੍ਤਾ, ਭਨ੍ਤੇ, ਰਤ੍ਤਿ, ਨਿਕ੍ਖਨ੍ਤੋ ਪਠਮੋ ਯਾਮੋ, ਚਿਰਨਿਸਿਨ੍ਨੋ ਭਿਕ੍ਖੁਸਙ੍ਘੋ, ਉਦ੍ਦਿਸਤੁ, ਭਨ੍ਤੇ, ਭਗਵਾ ਭਿਕ੍ਖੂਨਂ ਪਾਤਿਮੋਕ੍ਖ’’ਨ੍ਤਿ ਏਵਮਾਦੀਸੁ ਖਯੇ ਦਿਸ੍ਸਤਿ. ‘‘ਅਯਂ ਇਮੇਸਂ ਚਤੁਨ੍ਨਂ ਪੁਗ੍ਗਲਾਨਂ ਅਭਿਕ੍ਕਨ੍ਤਤਰੋ ਚ ਪਣੀਤਤਰੋ ਚਾ’’ਤਿ ਏਵਮਾਦੀਸੁ (ਅ. ਨਿ. ੪.੧੦੦) ਸੁਨ੍ਦਰੇ.
‘‘ਕੋ ਮੇ ਵਨ੍ਦਤਿ ਪਾਦਾਨਿ, ਇਦ੍ਧਿਯਾ ਯਸਸਾ ਜਲਂ;
ਅਭਿਕ੍ਕਨ੍ਤੇਨ ਵਣ੍ਣੇਨ, ਸਬ੍ਬਾ ਓਭਾਸਯਂ ਦਿਸਾ’’ਤਿ. (ਵਿ. ਵ. ੮੫੭) –
ਏਵਮਾਦੀਸੁ ਅਭਿਰੂਪੇ. ‘‘ਅਭਿਕ੍ਕਨ੍ਤਂ, ਭੋ ਗੋਤਮਾ’’ਤਿ ਏਵਮਾਦੀਸੁ (ਪਾਰਾ. ੧੫) ਅਬ੍ਭਨੁਮੋਦਨੇ. ਇਧ ਪਨ ਸੁਨ੍ਦਰੇ. ਤੇਨ ਅਭਿਕ੍ਕਨ੍ਤਾਯ ਰਤ੍ਤਿਯਾਤਿ ਇਟ੍ਠਾਯ ਕਨ੍ਤਾਯ ਮਨਾਪਾਯ ਰਤ੍ਤਿਯਾਤਿ ਵੁਤ੍ਤਂ ਹੋਤਿ. ਅਭਿਕ੍ਕਨ੍ਤਵਣ੍ਣਾਤਿ ਇਧ ਅਭਿਕ੍ਕਨ੍ਤਸਦ੍ਦੋ ਅਭਿਰੂਪੇ, ਵਣ੍ਣਸਦ੍ਦੋ ਪਨ ਛਵਿਥੁਤਿਕੁਲਵਗ੍ਗਕਾਰਣਸਣ੍ਠਾਨਪਮਾਣਰੂਪਾਯਤਨਾਦੀਸੁ ਦਿਸ੍ਸਤਿ. ਤਤ੍ਥ ‘‘ਸੁਵਣ੍ਣਵਣ੍ਣੋਸਿ ਭਗਵਾ’’ਤਿ ਏਵਮਾਦੀਸੁ (ਮ. ਨਿ. ੨.੩੯੯; ਸੁ. ਨਿ. ੫੫੩) ਛਵਿਯਂ. ‘‘ਕਦਾ ਸਞ੍ਞੂਲ਼੍ਹਾ ਪਨ ਤੇ ਗਹਪਤਿ ਸਮਣਸ੍ਸ ਗੋਤਮਸ੍ਸ ਵਣ੍ਣਾ’’ਤਿ ਏਵਮਾਦੀਸੁ (ਮ. ਨਿ. ੨.੭੭) ਥੁਤਿਯਂ. ‘‘ਚਤ੍ਤਾਰੋਮੇ, ਭੋ ਗੋਤਮ, ਵਣ੍ਣਾ’’ਤਿ ਏਵਮਾਦੀਸੁ (ਦੀ. ਨਿ. ੩.੧੧੫) ਕੁਲਵਗ੍ਗੇ. ‘‘ਅਥ ਕੇਨ ਨੁ ਵਣ੍ਣੇਨ, ਗਨ੍ਧਤ੍ਥੇਨੋਤਿ ਵੁਚ੍ਚਤੀ’’ਤਿ ਏਵਮਾਦੀਸੁ (ਸਂ. ਨਿ. ੧.੨੩੪) ਕਾਰਣੇ. ‘‘ਮਹਨ੍ਤਂ ਹਤ੍ਥਿਰਾਜਵਣ੍ਣਂ ਅਭਿਨਿਮ੍ਮਿਨਿਤ੍ਵਾ’’ਤਿ ਏਵਮਾਦੀਸੁ (ਸਂ. ਨਿ. ੧.੧੩੮) ਸਣ੍ਠਾਨੇ. ‘‘ਤਯੋ ਪਤ੍ਤਸ੍ਸ ਵਣ੍ਣਾ’’ਤਿ ਏਵਮਾਦੀਸੁ (ਪਾਰਾ. ੬੦੨) ਪਮਾਣੇ. ‘‘ਵਣ੍ਣੋ ਗਨ੍ਧੋ ਰਸੋ ਓਜਾ’’ਤਿ ਏਵਮਾਦੀਸੁ ਰੂਪਾਯਤਨੇ. ਸੋ ਇਧ ਛਵਿਯਾ ਦਟ੍ਠਬ੍ਬੋ. ਤੇਨ ਅਭਿਕ੍ਕਨ੍ਤਵਣ੍ਣਾਤਿ ਅਭਿਰੂਪਚ੍ਛਵਿ, ਇਟ੍ਠਵਣ੍ਣਾ ਮਨਾਪਵਣ੍ਣਾਤਿ ਵੁਤ੍ਤਂ ਹੋਤਿ.
ਕੇਵਲਕਪ੍ਪਨ੍ਤਿ ਏਤ੍ਥ ਕੇਵਲਸਦ੍ਦੋ ਅਨਵਸੇਸਯੇਭੁਯ੍ਯਾਬ੍ਯਾਮਿਸ੍ਸਾਨਤਿਰੇਕਦਲ਼੍ਹਤ੍ਥਵਿਸਂਯੋਗਾਦਿਅਨੇਕਤ੍ਥੋ. ਤਥਾ ਹਿਸ੍ਸ ‘‘ਕੇਵਲਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯ’’ਨ੍ਤਿ ਏਵਮਾਦੀਸੁ (ਪਾਰਾ. ੧) ਅਨਵਸੇਸਤਾ ਅਤ੍ਥੋ. ‘‘ਕੇਵਲਕਪ੍ਪਾ ਚ ਅਙ੍ਗਮਗਧਾ ਪਹੂਤਂ ਖਾਦਨੀਯਂ ਭੋਜਨੀਯਂ ਆਦਾਯ ਉਪਸਙ੍ਕਮਿਸ੍ਸਨ੍ਤੀ’’ਤਿ ਏਵਮਾਦੀਸੁ (ਮਹਾਵ. ੪੩) ਯੇਭੁਯ੍ਯਤਾ. ‘‘ਕੇਵਲਸ੍ਸ ਦੁਕ੍ਖਕ੍ਖਨ੍ਧਸ੍ਸ ਸਮੁਦਯੋ ਹੋਤੀ’’ਤਿ ਏਵਮਾਦੀਸੁ (ਵਿਭ. ੨੨੫) ਅਬ੍ਯਾਮਿਸ੍ਸਤਾ. ‘‘ਕੇਵਲਂ ਸਦ੍ਧਾਮਤ੍ਤਕਂ ਨੂਨ ਅਯਮਾਯਸ੍ਮਾ’’ਤਿ ਏਵਮਾਦੀਸੁ (ਮਹਾਵ. ੨੪੪) ਅਨਤਿਰੇਕਤਾ. ‘‘ਆਯਸ੍ਮਤੋ, ਭਨ੍ਤੇ, ਅਨੁਰੁਦ੍ਧਸ੍ਸ ਬਾਹਿਯੋ ਨਾਮ ਸਦ੍ਧਿਵਿਹਾਰਿਕੋ ਕੇਵਲਕਪ੍ਪਂ ਸਙ੍ਘਭੇਦਾਯ ਠਿਤੋ’’ਤਿ ਏਵਮਾਦੀਸੁ (ਅ. ਨਿ. ੪.੨੪੩) ਦਲ਼੍ਹਤ੍ਥਤਾ. ‘‘ਕੇਵਲੀ ਵੁਸਿਤਵਾ ਉਤ੍ਤਮਪੁਰਿਸੋਤਿ ਵੁਚ੍ਚਤੀ’’ਤਿ ਏਵਮਾਦੀਸੁ (ਸਂ. ਨਿ. ੩.੫੭) ਵਿਸਂਯੋਗੋ. ਇਧ ਪਨ ਅਨਵਸੇਸਤਾ ਅਤ੍ਥੋਤਿ ਅਧਿਪ੍ਪੇਤਾ.
ਕਪ੍ਪਸਦ੍ਦੋ ਪਨਾਯਂ ਅਭਿਸਦ੍ਦਹਨਵੋਹਾਰਕਾਲਪਞ੍ਞਤ੍ਤਿਛੇਦਨਵਿਕਪ੍ਪਲੇਸਸਮਨ੍ਤਭਾਵਾਦਿਅਨੇਕਤ੍ਥੋ. ਤਥਾ ਹਿਸ੍ਸ ‘‘ਓਕਪ੍ਪਨਿਯਮੇਤਂ ਭੋਤੋ ਗੋਤਮਸ੍ਸ, ਯਥਾ ਤਂ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸਾ’’ਤਿ ਏਵਮਾਦੀਸੁ (ਮ. ਨਿ. ੧.੩੮੭) ਅਭਿਸਦ੍ਦਹਨਮਤ੍ਥੋ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਿ ਸਮਣਕਪ੍ਪੇਹਿ ਫਲਂ ਪਰਿਭੁਞ੍ਜਿਤੁ’’ਨ੍ਤਿ ਏਵਮਾਦੀਸੁ (ਚੂਲ਼ਵ. ੨੫੦) ਵੋਹਾਰੋ. ‘‘ਯੇਨ ਸੁਦਂ ਨਿਚ੍ਚਕਪ੍ਪਂ ਵਿਹਰਾਮੀ’’ਤਿ ਏਵਮਾਦੀਸੁ (ਮ. ਨਿ. ੧.੩੮੭) ਕਾਲੋ. ‘‘ਇਚ੍ਚਾਯਸ੍ਮਾ ਕਪ੍ਪੋ’’ਤਿ ਏਵਮਾਦੀਸੁ (ਸੁ. ਨਿ. ੧੦੯੮; ਚੂਲ਼ਨਿ. ਕਪ੍ਪਮਾਣਵਪੁਚ੍ਛਾ ੧੧੭, ਕਪ੍ਪਮਾਣਵਪੁਚ੍ਛਾਨਿਦ੍ਦੇਸੋ ੬੧) ਪਞ੍ਞਤ੍ਤਿ. ‘‘ਅਲਙ੍ਕਤੋ ਕਪ੍ਪਿਤਕੇਸਮਸ੍ਸੂ’’ਤਿ ਏਵਮਾਦੀਸੁ (ਜਾ. ੨.੨੨.੧੩੬੮; ਵਿ. ਵ. ੧੦੯੪) ਛੇਦਨਂ. ‘‘ਕਪ੍ਪਤਿ ਦ੍ਵਙ੍ਗੁਲਕਪ੍ਪੋ’’ਤਿ ਏਵਮਾਦੀਸੁ (ਚੂਲ਼ਵ. ੪੪੬) ਵਿਕਪ੍ਪੋ. ‘‘ਅਤ੍ਥਿ ਕਪ੍ਪੋ ਨਿਪਜ੍ਜਿਤੁ’’ਨ੍ਤਿ ਏਵਮਾਦੀਸੁ (ਅ. ਨਿ. ੮.੮੦) ਲੇਸੋ. ‘‘ਕੇਵਲਕਪ੍ਪਂ ਵੇਲ਼ੁਵਨਂ ਓਭਾਸੇਤ੍ਵਾ’’ਤਿ ਏਵਮਾਦੀਸੁ (ਸਂ. ਨਿ. ੧.੯੪) ਸਮਨ੍ਤਭਾਵੋ. ਇਧ ਪਨਸ੍ਸ ਸਮਨ੍ਤਭਾਵੋ ਅਤ੍ਥੋ ਅਧਿਪ੍ਪੇਤੋ. ਤਸ੍ਮਾ ਕੇਵਲਕਪ੍ਪਂ ਜੇਤਵਨਨ੍ਤਿ ਏਤ੍ਥ ਅਨਵਸੇਸਂ ਸਮਨ੍ਤਤੋ ਜੇਤਵਨਨ੍ਤਿ ਅਤ੍ਥੋ.
ਓਭਾਸੇਤ੍ਵਾਤਿ ਆਭਾਯ ਫਰਿਤ੍ਵਾ. ਵਾਲੁਕਾਯਾਤਿ ਸਣ੍ਹਾਯ ਵਾਲੁਕਾਯ. ਨ ਸਣ੍ਠਾਤੀਤਿ ਨ ਪਤਿਟ੍ਠਾਤਿ. ਓਲ਼ਾਰਿਕਨ੍ਤਿ ਬ੍ਰਹ੍ਮਦੇਵਤਾਯ ਹਿ ਪਥਵਿਯਂ ਪਤਿਟ੍ਠਾਨਕਾਲੇ ਅਤ੍ਤਭਾਵੋ ਓਲ਼ਾਰਿਕੋ ਮਾਪੇਤੁਂ ਵਟ੍ਟਤਿ ਪਥਵੀ ਵਾ, ਤਸ੍ਮਾ ਏਵਮਾਹ. ਧਮ੍ਮਾਤਿ ਇਮਿਨਾ ਪੁਬ੍ਬੇ ਉਗ੍ਗਹਿਤਬੁਦ੍ਧਵਚਨਂ ਦਸ੍ਸੇਤਿ. ਨਪ੍ਪਵਤ੍ਤਿਨੋ ਅਹੇਸੁਨ੍ਤਿ ਸਜ੍ਝਾਯਮੂਲ਼੍ਹਕਾ ਵਾਚਾ ਪਰਿਹੀਨਾਯੇਵ ਅਹੇਸੁਂ. ਅਪ੍ਪਟਿਵਾਨੋਤਿ ਅਨਿਵਤ੍ਤੋ ਅਨੁਕ੍ਕਣ੍ਠਿਤੋ.
ਦਸ੍ਸਨਸ੍ਸਾਤਿ ਚਕ੍ਖੁਵਿਞ੍ਞਾਣੇਨ ਦਸ੍ਸਨਸ੍ਸ. ਉਪਟ੍ਠਾਨਸ੍ਸਾਤਿ ਚਤੂਹਿ ਪਚ੍ਚਯੇਹਿ ਉਪਟ੍ਠਾਨਸ੍ਸ. ਅਧਿਸੀਲਨ੍ਤਿ ਦਸਵਿਧਂ ਸੀਲਂ. ਤਞ੍ਹਿ ਪਞ੍ਚਸੀਲਂ ਉਪਾਦਾਯ ਅਧਿਸੀਲਨ੍ਤਿ ਵੁਚ੍ਚਤਿ. ਅਵਿਹਂ ਗਤੋਤਿ ਅਵਿਹਬ੍ਰਹ੍ਮਲੋਕੇ ਨਿਬ੍ਬਤ੍ਤੋਸ੍ਮੀਤਿ ਦਸ੍ਸੇਤਿ.
੬. ਕਟੁਵਿਯਸੁਤ੍ਤਵਣ੍ਣਨਾ
੧੨੯. ਛਟ੍ਠੇ ਗੋਯੋਗਪਿਲਕ੍ਖਸ੍ਮਿਨ੍ਤਿ ਗਾਵੀਨਂ ਵਿਕ੍ਕਯਟ੍ਠਾਨੇ ਉਟ੍ਠਿਤਪਿਲਕ੍ਖਸ੍ਸ ਸਨ੍ਤਿਕੇ. ਰਿਤ੍ਤਸ੍ਸਾਦਨ੍ਤਿ ਝਾਨਸੁਖਾਭਾਵੇਨ ਰਿਤ੍ਤਸ੍ਸਾਦਂ. ਬਾਹਿਰਸ੍ਸਾਦਨ੍ਤਿ ਕਾਮਗੁਣਸੁਖਵਸੇਨ ਬਾਹਿਰਸ੍ਸਾਦਂ. ਕਟੁਵਿਯਨ੍ਤਿ ਉਚ੍ਛਿਟ੍ਠਂ. ਆਮਗਨ੍ਧੇਨਾਤਿ ਕੋਧਸਙ੍ਖਾਤੇਨ ਵਿਸ੍ਸਗਨ੍ਧੇਨ. ਅਵਸ੍ਸੁਤਨ੍ਤਿ ਤਿਨ੍ਤਂ. ਮਕ੍ਖਿਕਾਤਿ ਕਿਲੇਸਮਕ੍ਖਿਕਾ. ਨਾਨੁਪਤਿਸ੍ਸਨ੍ਤੀਤਿ ਉਟ੍ਠਾਯ ਨ ਅਨੁਬਨ੍ਧਿਸ੍ਸਨ੍ਤਿ. ਨਾਨ੍ਵਾਸ੍ਸਵਿਸ੍ਸਨ੍ਤੀਤਿ ਅਨੁਬਨ੍ਧਿਤ੍ਵਾ ਨ ਖਾਦਿਸ੍ਸਨ੍ਤਿ. ਸਂਵੇਗਮਾਪਾਦੀਤਿ ਸੋਤਾਪਨ੍ਨੋ ਜਾਤੋ.
ਕਟੁਵਿਯਕਤੋਤਿ ਉਚ੍ਛਿਟ੍ਠਕਤੋ. ਆਰਕਾ ਹੋਤੀਤਿ ਦੂਰੇ ਹੋਤਿ. ਵਿਘਾਤਸ੍ਸੇਵ ਭਾਗਵਾਤਿ ਦੁਕ੍ਖਸ੍ਸੇਵ ਭਾਗੀ. ਚਰੇਤੀਤਿ ਚਰਤਿ ਗਚ੍ਛਤਿ. ਦੁਮ੍ਮੇਧੋਤਿ ਦੁਪ੍ਪਞ੍ਞੋ. ਇਮਸ੍ਮਿਂ ਸੁਤ੍ਤੇ ਵਟ੍ਟਮੇਵ ਕਥਿਤਂ, ਗਾਥਾਸੁ ਵਟ੍ਟਵਿਵਟ੍ਟਂ ਕਥਿਤਨ੍ਤਿ. ਸਤ੍ਤਮੇ ਵਟ੍ਟਮੇਵ ਭਾਸਿਤਂ.
੮. ਦੁਤਿਯਅਨੁਰੁਦ੍ਧਸੁਤ੍ਤਵਣ੍ਣਨਾ
੧੩੧. ਅਟ੍ਠਮੇ ਇਦਂ ਤੇ ਮਾਨਸ੍ਮਿਨ੍ਤਿ ਅਯਂ ਤੇ ਨਵਵਿਧੇਨ ਵਡ੍ਢਿਤਮਾਨੋਤਿ ਅਤ੍ਥੋ. ਇਦਂ ਤੇ ਉਦ੍ਧਚ੍ਚਸ੍ਮਿਨ੍ਤਿ ਇਦਂ ਤਵ ਉਦ੍ਧਚ੍ਚਂ ਚਿਤ੍ਤਸ੍ਸ ਉਦ੍ਧਤਭਾਵੋ. ਇਦਂ ਤੇ ਕੁਕ੍ਕੁਚ੍ਚਸ੍ਮਿਨ੍ਤਿ ਇਦਂ ਤਵ ਕੁਕ੍ਕੁਚ੍ਚਂ.
੯. ਪਟਿਚ੍ਛਨ੍ਨਸੁਤ੍ਤਵਣ੍ਣਨਾ
੧੩੨. ਨਵਮੇ ਆਵਹਨ੍ਤੀਤਿ ਨਿਯ੍ਯਨ੍ਤਿ. ਪਟਿਚ੍ਛਨ੍ਨੋ ਆਵਹਤੀਤਿ ਪਟਿਚ੍ਛਨ੍ਨੋਵ ਹੁਤ੍ਵਾ ਨਿਯ੍ਯਾਤਿ. ਵਿਵਟੋ ਵਿਰੋਚਤੀਤਿ ਏਤ੍ਥ ਏਕਤੋ ਉਭਤੋ ਅਤ੍ਤਤੋ ਸਬ੍ਬਤ੍ਥਕਤੋਤਿ ਚਤੁਬ੍ਬਿਧਾ ਵਿਵਟਤਾ ਵੇਦਿਤਬ੍ਬਾ. ਤਤ੍ਥ ਏਕਤੋ ਵਿਵਟਂ ਨਾਮ ਅਸਾਧਾਰਣਸਿਕ੍ਖਾਪਦਂ. ਉਭਤੋ ਵਿਵਟਂ ਨਾਮ ਸਾਧਾਰਣਸਿਕ੍ਖਾਪਦਂ. ਅਤ੍ਤਤੋ ਵਿਵਟਂ ਨਾਮ ਪਟਿਲਦ੍ਧਧਮ੍ਮਗੁਣੋ. ਸਬ੍ਬਤ੍ਥਕਵਿਵਟਂ ਨਾਮ ਤੇਪਿਟਕਂ ਬੁਦ੍ਧਵਚਨਂ.
੧੦. ਲੇਖਸੁਤ੍ਤਵਣ੍ਣਨਾ
੧੩੩. ਦਸਮੇ ਅਭਿਣ੍ਹਨ੍ਤਿ ਅਭਿਕ੍ਖਣਂ ਨਿਰਨ੍ਤਰਂ. ਆਗਾਲ਼੍ਹੇਨਾਤਿ ਗਾਲ਼੍ਹੇਨ ਕਕ੍ਖਲ਼ੇਨ. ਫਰੁਸੇਨਾਤਿ ਫਰੁਸਵਚਨੇਨ. ਗਾਲ਼੍ਹਂ ਕਤ੍ਵਾ ਫਰੁਸਂ ਕਤ੍ਵਾ ਵੁਚ੍ਚਮਾਨੋਪੀਤਿ ਅਤ੍ਥੋ. ਅਮਨਾਪੇਨਾਤਿ ਮਨਂ ਅਨਲ੍ਲੀਯਨ੍ਤੇਨ ਅਵਡ੍ਢਨ੍ਤੇਨ. ਸਨ੍ਧਿਯਤਿਮੇਵਾਤਿ ਘਟਿਯਤਿਯੇਵ. ਸਂਸਨ੍ਦਤਿਮੇਵਾਤਿ ਨਿਰਨ੍ਤਰੋਵ ਹੋਤਿ. ਸਮ੍ਮੋਦਤਿਮੇਵਾਤਿ ਏਕੀਭਾਵਮੇਵ ਗਚ੍ਛਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਕੁਸਿਨਾਰਵਗ੍ਗੋ ਤਤਿਯੋ.
(੧੪) ੪. ਯੋਧਾਜੀਵਵਗ੍ਗੋ
੧. ਯੋਧਾਜੀਵਸੁਤ੍ਤਵਣ੍ਣਨਾ
੧੩੪. ਚਤੁਤ੍ਥਸ੍ਸ ਪਠਮੇ ਯੁਦ੍ਧਂ ਉਪਜੀਵਤੀਤਿ ਯੋਧਾਜੀਵੋ. ਰਾਜਾਰਹੋਤਿ ਰਞ੍ਞੋ ਅਨੁਚ੍ਛਵਿਕੋ. ਰਾਜਭੋਗ੍ਗੋਤਿ ਰਞ੍ਞੋ ਉਪਭੋਗਪਰਿਭੋਗੋ. ਅਙ੍ਗਨ੍ਤੇਵ ਸਙ੍ਖ੍ਯਂ ਗਚ੍ਛਤੀਤਿ ਹਤ੍ਥੋ ਵਿਯ ਪਾਦੋ ਵਿਯ ਚ ਅਵਸ੍ਸਂ ਇਚ੍ਛਿਤਬ੍ਬਤ੍ਤਾ ਅਙ੍ਗਨ੍ਤਿ ਸਙ੍ਖ੍ਯਂ ਗਚ੍ਛਤਿ. ਦੂਰੇ ਪਾਤੀ ਹੋਤੀਤਿ ਉਦਕੇ ਉਸਭਮਤ੍ਤਂ, ਥਲੇ ਅਟ੍ਠੁਸਭਮਤ੍ਤਂ, ਤਤੋ ਵਾ ਉਤ੍ਤਰਿਨ੍ਤਿ ਦੂਰੇ ਕਣ੍ਡਂ ਪਾਤੇਤਿ. ਦੁਟ੍ਠਗਾਮਣਿਅਭਯਸ੍ਸ ਹਿ ਯੋਧਾਜੀਵੋ ਨਵਉਸਭਮਤ੍ਤਂ ਕਣ੍ਡਂ ਪਾਤੇਸਿ, ਪਚ੍ਛਿਮਭਵੇ ਬੋਧਿਸਤ੍ਤੋ ਯੋਜਨਪ੍ਪਮਾਣਂ. ਅਕ੍ਖਣਵੇਧੀਤਿ ਅਵਿਰਾਧਿਤਵੇਧੀ, ਅਕ੍ਖਣਂ ਵਾ ਵਿਜ੍ਜੁ ਵਿਜ੍ਜਨ੍ਤਰਿਕਾਯ ਵਿਜ੍ਝਿਤੁਂ ਸਮਤ੍ਥੋਤਿ ਅਤ੍ਥੋ. ਮਹਤੋ ਕਾਯਸ੍ਸ ਪਦਾਲੇਤਾਤਿ ਏਕਤੋਬਦ੍ਧਂ ਫਲਕਸਤਮ੍ਪਿ ਮਹਿਂਸਚਮ੍ਮਸਤਮ੍ਪਿ ਅਙ੍ਗੁਟ੍ਠਪਮਾਣਬਹਲਂ ਲੋਹਪਟ੍ਟਮ੍ਪਿ ਚਤੁਰਙ੍ਗੁਲਬਹਲਂ ਅਸਨਪਦਰਮ੍ਪਿ ਵਿਦਤ੍ਥਿਬਹਲਂ ਉਦੁਮ੍ਬਰਪਦਰਮ੍ਪਿ ਦੀਘਨ੍ਤੇਨ ਵਾਲਿਕਸਕਟਮ੍ਪਿ ਵਿਨਿਵਿਜ੍ਝਿਤੁਂ ਸਮਤ੍ਥੋਤਿ ਅਤ੍ਥੋ. ਯਂਕਿਞ੍ਚਿ ਰੂਪਨ੍ਤਿਆਦਿ ਵਿਸੁਦ੍ਧਿਮਗ੍ਗੇ ਵਿਤ੍ਥਾਰਿਤਮੇਵ. ਨੇਤਂ ਮਮਾਤਿਆਦਿ ਤਣ੍ਹਾਮਾਨਦਿਟ੍ਠਿਪਟਿਕ੍ਖੇਪਵਸੇਨ ਵੁਤ੍ਤਂ. ਸਮ੍ਮਪ੍ਪਞ੍ਞਾਯ ਪਸ੍ਸਤੀਤਿ ਸਮ੍ਮਾ ਹੇਤੁਨਾ ਕਾਰਣੇਨ ਸਹਵਿਪਸ੍ਸਨਾਯ ਮਗ੍ਗਪਞ੍ਞਾਯ ਪਸ੍ਸਤਿ. ਪਦਾਲੇਤੀਤਿ ਅਰਹਤ੍ਤਮਗ੍ਗੇਨ ਪਦਾਲੇਤਿ.
੨. ਪਰਿਸਾਸੁਤ੍ਤਵਣ੍ਣਨਾ
੧੩੫. ਦੁਤਿਯੇ ਉਕ੍ਕਾਚਿਤਵਿਨੀਤਾਤਿ ਅਪ੍ਪਟਿਪੁਚ੍ਛਿਤ੍ਵਾ ਵਿਨੀਤਾ ਦੁਬ੍ਬਿਨੀਤਪਰਿਸਾ. ਪਟਿਪੁਚ੍ਛਾਵਿਨੀਤਾਤਿ ਪੁਚ੍ਛਿਤ੍ਵਾ ਵਿਨੀਤਾ ਸੁਵਿਨੀਤਪਰਿਸਾ. ਯਾਵਤਾਵਿਨੀਤਾਤਿ ਪਮਾਣਵਸੇਨ ਵਿਨੀਤਾ, ਪਮਾਣਂ ਞਤ੍ਵਾ ਵਿਨੀਤਪਰਿਸਾਤਿ ਅਤ੍ਥੋ. ‘‘ਯਾਵਤਜ੍ਝਾ’’ਤਿ ਪਾਲ਼ਿਯਾ ਪਨ ਯਾਵ ਅਜ੍ਝਾਸਯਾਤਿ ਅਤ੍ਥੋ, ਅਜ੍ਝਾਸਯਂ ਞਤ੍ਵਾ ਵਿਨੀਤਪਰਿਸਾਤਿ ਵੁਤ੍ਤਂ ਹੋਤਿ. ਤਤਿਯਂ ਉਤ੍ਤਾਨਮੇਵ.
੪. ਉਪ੍ਪਾਦਾਸੁਤ੍ਤਵਣ੍ਣਨਾ
੧੩੭. ਚਤੁਤ੍ਥੇ ਧਮ੍ਮਟ੍ਠਿਤਤਾਤਿ ਸਭਾਵਟ੍ਠਿਤਤਾ. ਧਮ੍ਮਨਿਯਾਮਤਾਤਿ ਸਭਾਵਨਿਯਾਮਤਾ. ਸਬ੍ਬੇ ਸਙ੍ਖਾਰਾਤਿ ਚਤੁਭੂਮਕਸਙ੍ਖਾਰਾ. ਅਨਿਚ੍ਚਾਤਿ ਹੁਤ੍ਵਾ ਅਭਾਵਟ੍ਠੇਨ ਅਨਿਚ੍ਚਾ. ਦੁਕ੍ਖਾਤਿ ਸਮ੍ਪਟਿਪੀਲ਼ਨਟ੍ਠੇਨ ਦੁਕ੍ਖਾ. ਅਨਤ੍ਤਾਤਿ ਅਵਸਵਤ੍ਤਨਟ੍ਠੇਨ ਅਨਤ੍ਤਾ. ਇਤਿ ਇਮਸ੍ਮਿਂ ਸੁਤ੍ਤੇ ਤੀਣਿ ਲਕ੍ਖਣਾਨਿ ਮਿਸ੍ਸਕਾਨਿ ਕਥਿਤਾਨਿ.
੫. ਕੇਸਕਮ੍ਬਲਸੁਤ੍ਤਵਣ੍ਣਨਾ
੧੩੮. ਪਞ੍ਚਮੇ ਤਨ੍ਤਾਵੁਤਾਨਂ ਵਤ੍ਥਾਨਨ੍ਤਿ ਪਚ੍ਚਤ੍ਤੇ ਸਾਮਿਵਚਨਂ, ਤਨ੍ਤੇਹਿ ਵਾਯਿਤਵਤ੍ਥਾਨੀਤਿ ਅਤ੍ਥੋ. ਕੇਸਕਮ੍ਬਲੋਤਿ ਮਨੁਸ੍ਸਕੇਸੇਹਿ ਵਾਯਿਤਕਮ੍ਬਲੋ. ਪੁਥੁਸਮਣਬ੍ਰਾਹ੍ਮਣਵਾਦਾਨਨ੍ਤਿ ਇਦਮ੍ਪਿ ਪਚ੍ਚਤ੍ਤੇ ਸਾਮਿਵਚਨਂ. ਪਟਿਕਿਟ੍ਠੋਤਿ ਪਚ੍ਛਿਮਕੋ ਲਾਮਕੋ. ਮੋਘਪੁਰਿਸੋਤਿ ਤੁਚ੍ਛਪੁਰਿਸੋ. ਪਟਿਬਾਹਤੀਤਿ ਪਟਿਸੇਧੇਤਿ. ਖਿਪ੍ਪਂ ਉਡ੍ਡੇਯ੍ਯਾਤਿ ਕੁਮਿਨਂ ਓਡ੍ਡੇਯ੍ਯ. ਛਟ੍ਠਸਤ੍ਤਮਾਨਿ ਉਤ੍ਤਾਨਤ੍ਥਾਨੇਵ.
੮. ਅਸ੍ਸਖਲ਼ੁਙ੍ਕਸੁਤ੍ਤਵਣ੍ਣਨਾ
੧੪੧. ਅਟ੍ਠਮੇ ਅਸ੍ਸਖਲ਼ੁਙ੍ਕੋਤਿ ਅਸ੍ਸਪੋਤੋ. ਇਦਮਸ੍ਸ ਜਵਸ੍ਮਿਂ ਵਦਾਮੀਤਿ ਅਯਮਸ੍ਸ ਞਾਣਜਵੋਤਿ ਵਦਾਮਿ. ਇਦਮਸ੍ਸ ਵਣ੍ਣਸ੍ਮਿਂ ਵਦਾਮੀਤਿ ਅਯਮਸ੍ਸ ਗੁਣਵਣ੍ਣੋਤਿ ਵਦਾਮਿ. ਇਦਮਸ੍ਸ ਆਰੋਹਪਰਿਣਾਹਸ੍ਮਿਨ੍ਤਿ ਅਯਮਸ੍ਸ ਉਚ੍ਚਭਾਵੋ ਪਰਿਮਣ੍ਡਲਭਾਵੋਤਿ ਵਦਾਮੀਤਿ.
੯. ਅਸ੍ਸਪਰਸ੍ਸਸੁਤ੍ਤਵਣ੍ਣਨਾ
੧੪੨. ਨਵਮੇ ਅਸ੍ਸਪਰਸ੍ਸੇਤਿ ਅਸ੍ਸੇਸੁ ਪਰਸ੍ਸੇ. ਪੁਰਿਸਪਰਸ੍ਸੇਤਿ ਪੁਰਿਸੇਸੁ ਪਰਸ੍ਸੇ, ਪੁਰਿਸਪੁਰਿਸੇਤਿ ਅਤ੍ਥੋ. ਇਮਸ੍ਮਿਂ ਸੁਤ੍ਤੇ ਤੀਣਿ ਮਗ੍ਗਫਲਾਨਿ ਕਥਿਤਾਨਿ. ਤਤ੍ਥ ਅਯਂ ਤੀਹਿ ਮਗ੍ਗੇਹਿ ਞਾਣਜਵਸਮ੍ਪਨ੍ਨੋਤਿ ਵੇਦਿਤਬ੍ਬੋ.
੧੦. ਅਸ੍ਸਾਜਾਨੀਯਸੁਤ੍ਤਵਣ੍ਣਨਾ
੧੪੩. ਦਸਮੇ ਭਦ੍ਰੇਤਿ ਭਦ੍ਦਕੇ. ਅਸ੍ਸਾਜਾਨੀਯੇਤਿ ਕਾਰਣਾਕਾਰਣਂ ਜਾਨਨਕੇ ਅਸ੍ਸੇ. ਪੁਰਿਸਾਜਾਨੀਯੇਸੁਪਿ ਏਸੇਵ ਨਯੋ. ਇਮਸ੍ਮਿਂ ਸੁਤ੍ਤੇ ਅਰਹਤ੍ਤਫਲਂ ਕਥਿਤਂ. ਤਤ੍ਰਾਯਂ ਅਰਹਤ੍ਤਮਗ੍ਗੇਨ ਞਾਣਜਵਸਮ੍ਪਨ੍ਨੋਤਿ ਵੇਦਿਤਬ੍ਬੋ.
੧੧. ਪਠਮਮੋਰਨਿਵਾਪਸੁਤ੍ਤਵਣ੍ਣਨਾ
੧੪੪. ਏਕਾਦਸਮੇ ਅਚ੍ਚਨ੍ਤਨਿਟ੍ਠੋਤਿ ਅਨ੍ਤਂ ਅਤਿਕ੍ਕਨ੍ਤਨਿਟ੍ਠੋ, ਅਕੁਪ੍ਪਨਿਟ੍ਠੋ ਧੁਵਨਿਟ੍ਠੋਤਿ ਅਤ੍ਥੋ. ਸੇਸਂ ਸਦਿਸਮੇਵ.
੧੨. ਦੁਤਿਯਮੋਰਨਿਵਾਪਸੁਤ੍ਤਵਣ੍ਣਨਾ
੧੪੫. ਦ੍ਵਾਦਸਮੇ ਇਦ੍ਧਿਪਾਟਿਹਾਰਿਯੇਨਾਤਿ ਇਜ੍ਝਨਕਪਾਟਿਹਾਰਿਯੇਨ. ਆਦੇਸਨਾਪਾਟਿਹਾਰਿਯੇਨਾਤਿ ਆਦਿਸਿਤ੍ਵਾ ਅਪਦਿਸਿਤ੍ਵਾ ਕਥਨਅਨੁਕਥਨਕਥਾਪਾਟਿਹਾਰਿਯੇਨ.
੧੩. ਤਤਿਯਮੋਰਨਿਵਾਪਸੁਤ੍ਤਵਣ੍ਣਨਾ
੧੪੬. ਤੇਰਸਮੇ ਸਮ੍ਮਾਦਿਟ੍ਠਿਯਾਤਿ ਫਲਸਮਾਪਤ੍ਤਤ੍ਥਾਯ ਸਮ੍ਮਾਦਿਟ੍ਠਿਯਾ. ਸਮ੍ਮਾਞਾਣੇਨਾਤਿ ਫਲਞਾਣੇਨ. ਸਮ੍ਮਾਵਿਮੁਤ੍ਤਿਯਾਤਿ ਸੇਸੇਹਿ ਫਲਸਮਾਪਤ੍ਤਿਧਮ੍ਮੇਹਿ. ਇਮੇਸੁ ਤੀਸੁਪਿ ਸੁਤ੍ਤੇਸੁ ਖੀਣਾਸਵੋਵ ਕਥਿਤੋਤਿ.
ਯੋਧਾਜੀਵਵਗ੍ਗੋ ਚਤੁਤ੍ਥੋ.
(੧੫) ੫. ਮਙ੍ਗਲਵਗ੍ਗੋ
੧-੯. ਅਕੁਸਲਸੁਤ੍ਤਾਦਿਵਣ੍ਣਨਾ
੧੪੭-੧੫੫. ਪਞ੍ਚਮਸ੍ਸ ਪਠਮੇ ਯਥਾਭਤਂ ਨਿਕ੍ਖਿਤ੍ਤੋਤਿ ਯਥਾ ਆਨੇਤ੍ਵਾ ਠਪਿਤੋ. ਦੁਤਿਯੇ ਸਾਵਜ੍ਜੇਨਾਤਿ ਸਦੋਸੇਨ. ਤਤਿਯੇ ਵਿਸਮੇਨਾਤਿ ਸਪਕ੍ਖਲਨੇਨ. ਸਮੇਨਾਤਿ ਅਪਕ੍ਖਲਨੇਨ. ਚਤੁਤ੍ਥੇ ਅਸੁਚਿਨਾਤਿ ਗੂਥਸਦਿਸੇਨ ਅਪਰਿਸੁਦ੍ਧੇਨ ਅਮੇਜ੍ਝੇਨ. ਸੁਚਿਨਾਤਿ ਪਰਿਸੁਦ੍ਧੇਨ ਮੇਜ੍ਝੇਨ. ਪਞ੍ਚਮਾਦੀਨਿ ਉਤ੍ਤਾਨਾਨੇਵ.
੧੦. ਪੁਬ੍ਬਣ੍ਹਸੁਤ੍ਤਵਣ੍ਣਨਾ
੧੫੬. ਦਸਮੇ ਸੁਨਕ੍ਖਤ੍ਤਨ੍ਤਿਆਦੀਸੁ ਯਸ੍ਮਿਂ ਦਿਵਸੇ ਤਯੋ ਸੁਚਰਿਤਧਮ੍ਮਾ ਪੂਰਿਤਾ ਹੋਨ੍ਤਿ, ਸੋ ਦਿਵਸੋ ਲਦ੍ਧਨਕ੍ਖਤ੍ਤਯੋਗੋ ਨਾਮ, ਤੇਨਸ੍ਸ ਸਦਾ ਸੁਨਕ੍ਖਤ੍ਤਂ ਨਾਮ ਹੋਤੀਤਿ ਵੁਚ੍ਚਤਿ. ਸ੍ਵੇਵ ਦਿਵਸੋ ਕਤਮਙ੍ਗਲੋ ਨਾਮ ਹੋਤਿ, ਤੇਨਸ੍ਸ ਸਦਾ ਸੁਮਙ੍ਗਲਨ੍ਤਿ ਵੁਚ੍ਚਤਿ. ਪਭਾਤਮ੍ਪਿਸ੍ਸ ਸਦਾ ਸੁਪ੍ਪਭਾਤਮੇਵ, ਸਯਨਤੋ ਉਟ੍ਠਾਨਮ੍ਪਿ ਸੁਹੁਟ੍ਠਿਤਮੇਵ, ਖਣੋਪਿ ਸੁਕ੍ਖਣੋਵ, ਮੁਹੁਤ੍ਤੋਪਿ ਸੁਮੁਹੁਤ੍ਤੋਵ. ਏਤ੍ਥ ਚ ਦਸਚ੍ਛਰਪਮਾਣੋ ਕਾਲੋ ਖਣੋ ਨਾਮ, ਤੇਨ ਖਣੇਨ ਦਸਕ੍ਖਣੋ ਕਾਲੋ ਲਯੋ ਨਾਮ, ਤੇਨ ਲਯੇਨ ਚ ਦਸਲਯੋ ਕਾਲੋ ਖਣਲਯੋ ਨਾਮ, ਤੇਨ ਦਸਗੁਣੋ ਮੁਹੁਤ੍ਤੋ ਨਾਮ, ਤੇਨ ਦਸਗੁਣੋ ਖਣਮੁਹੁਤ੍ਤੋ ਨਾਮਾਤਿ ਅਯਂ ਵਿਭਾਗੋ ਵੇਦਿਤਬ੍ਬੋ. ਸੁਯਿਟ੍ਠਂ ਬ੍ਰਹ੍ਮਚਾਰਿਸੂਤਿ ਯਸ੍ਮਿਂ ਦਿਵਸੇ ਤੀਣਿ ਸੁਚਰਿਤਾਨਿ ਪੂਰਿਤਾਨਿ, ਤਦਾਸ੍ਸ ਸੇਟ੍ਠਚਾਰੀਸੁ ਦਿਨ੍ਨਦਾਨਂ ਸੁਯਿਟ੍ਠਂ ਨਾਮ ਹੋਤਿ. ਪਦਕ੍ਖਿਣਂ ਕਾਯਕਮ੍ਮਨ੍ਤਿ ਤਂ ਦਿਵਸਂ ਤੇਨ ਕਤਂ ਕਾਯਕਮ੍ਮਂ ਵਡ੍ਢਿਕਾਯਕਮ੍ਮਂ ਨਾਮ ਹੋਤਿ. ਸੇਸਪਦੇਸੁਪਿ ਏਸੇਵ ਨਯੋ. ਪਦਕ੍ਖਿਣਾਨਿ ਕਤ੍ਵਾਨਾਤਿ ਵਡ੍ਢਿਯੁਤ੍ਤਾਨਿ ਕਾਯਕਮ੍ਮਾਦੀਨਿ ਕਤ੍ਵਾ. ਲਭਨ੍ਤਤ੍ਥੇ ਪਦਕ੍ਖਿਣੇਤਿ ਪਦਕ੍ਖਿਣੇ ਵਡ੍ਢਿਅਤ੍ਥੇਯੇਵ ਲਭਤਿ. ਸੇਸਂ ਉਤ੍ਤਾਨਮੇਵਾਤਿ.
ਮਙ੍ਗਲਵਗ੍ਗੋ ਪਞ੍ਚਮੋ.
ਤਤਿਯਪਣ੍ਣਾਸਕਂ ਨਿਟ੍ਠਿਤਂ.