(੧੦) ੫. ਲੋਣਕਪਲ੍ਲਵਗ੍ਗੋ

੧. ਅਚ੍ਚਾਯਿਕਸੁਤ੍ਤਵਣ੍ਣਨਾ

੯੩. ਪਞ੍ਚਮਸ੍ਸ ਪਠਮੇ ਅਚ੍ਚਾਯਿਕਾਨੀਤਿ ਅਤਿਪਾਤਿਕਾਨਿ. ਕਰਣੀਯਾਨੀਤਿ ਅਵਸ੍ਸਕਿਚ੍ਚਾਨਿ. ਯਞ੍ਹਿ ਨ ਅਵਸ੍ਸਂ ਕਾਤਬ੍ਬਂ, ਤਂ ਕਿਚ੍ਚਨ੍ਤਿ ਵੁਚ੍ਚਤਿ. ਅਵਸ੍ਸਂ ਕਾਤਬ੍ਬਂ ਕਰਣੀਯਂ ਨਾਮ. ਸੀਘਂ ਸੀਘਨ੍ਤਿ ਵੇਗੇਨ ਵੇਗੇਨ. ਤਸ੍ਸ ਖੋ ਤਨ੍ਤਿ ਏਤ੍ਥ ਤਨ੍ਤਿ ਨਿਪਾਤਮਤ੍ਤਂ. ਨਤ੍ਥਿ ਸਾ ਇਦ੍ਧਿ ਵਾ ਆਨੁਭਾਵੋ ਵਾਤਿ ਸਾ ਵਾ ਇਦ੍ਧਿ ਸੋ ਵਾ ਆਨੁਭਾਵੋ ਨਤ੍ਥਿ. ਉਤ੍ਤਰਸ੍ਵੇਤਿ ਤਤਿਯਦਿਵਸੇ. ਉਤੁਪਰਿਣਾਮਿਨੀਤਿ ਲਦ੍ਧਉਤੁਪਰਿਣਾਮਾਨਿ ਹੁਤ੍ਵਾ. ਜਾਯਨ੍ਤਿਪੀਤਿ ਤਤਿਯਦਿਵਸੇ ਨਿਕ੍ਖਨ੍ਤਸੇਤਙ੍ਕੁਰਾਨਿ ਹੋਨ੍ਤਿ, ਸਤ੍ਤਾਹੇ ਪਤ੍ਤੇ ਨੀਲਙ੍ਕੁਰਾਨਿ ਹੋਨ੍ਤਿ. ਗਬ੍ਭੀਨਿਪਿ ਹੋਨ੍ਤੀਤਿ ਦਿਯਡ੍ਢਮਾਸਂ ਪਤ੍ਵਾ ਗਹਿਤਗਬ੍ਭਾਨਿ ਹੋਨ੍ਤਿ. ਪਚ੍ਚਨ੍ਤਿਪੀਤਿ ਤਯੋ ਮਾਸੇ ਪਤ੍ਵਾ ਪਚ੍ਚਨ੍ਤਿ. ਇਦਾਨਿ ਯਸ੍ਮਾ ਬੁਦ੍ਧਾਨਂ ਗਹਪਤਿਕੇਨ ਵਾ ਸਸ੍ਸੇਹਿ ਵਾ ਅਤ੍ਥੋ ਨਤ੍ਥਿ, ਸਾਸਨੇ ਪਨ ਤਪ੍ਪਟਿਰੂਪਕਂ ਪੁਗ੍ਗਲਂ ਵਾ ਅਤ੍ਥਂ ਵਾ ਦਸ੍ਸੇਤੁਂ ਤਂ ਤਂ ਓਪਮ੍ਮਂ ਆਹਰਨ੍ਤਿ. ਤਸ੍ਮਾ ਯਮਤ੍ਥਂ ਦਸ੍ਸੇਤੁਕਾਮੇਨ ਏਤਂ ਆਭਤਂ, ਤਂ ਦਸ੍ਸੇਨ੍ਤੋ ਏਵਮੇਵ ਖੋਤਿਆਦਿਮਾਹ. ਤਂ ਅਤ੍ਥਤੋ ਉਤ੍ਤਾਨਮੇਵ. ਸਿਕ੍ਖਾ ਪਨ ਇਧਾਪਿ ਮਿਸ੍ਸਿਕਾ ਏਵ ਕਥਿਤਾ.

੨. ਪਵਿਵੇਕਸੁਤ੍ਤਵਣ੍ਣਨਾ

੯੪. ਦੁਤਿਯੇ ਚੀਵਰਪਵਿਵੇਕਨ੍ਤਿ ਚੀਵਰਂ ਨਿਸ੍ਸਾਯ ਉਪ੍ਪਜ੍ਜਨਕਕਿਲੇਸੇਹਿ ਵਿਵਿਤ੍ਤਭਾਵਂ. ਸੇਸਦ੍ਵਯੇਪਿ ਏਸੇਵ ਨਯੋ. ਸਾਣਾਨੀਤਿ ਸਾਣਵਾਕਚੇਲਾਨਿ. ਮਸਾਣਾਨੀਤਿ ਮਿਸ੍ਸਕਚੇਲਾਨਿ. ਛਵਦੁਸ੍ਸਾਨੀਤਿ ਮਤਸਰੀਰਤੋ ਛਡ੍ਡਿਤਵਤ੍ਥਾਨਿ, ਏਰਕਤਿਣਾਦੀਨਿ ਵਾ ਗਨ੍ਥੇਤ੍ਵਾ ਕਤਨਿਵਾਸਨਾਨਿ. ਪਂਸੁਕੂਲਾਨੀਤਿ ਪਥਵਿਯਂ ਛਡ੍ਡਿਤਨਨ੍ਤਕਾਨਿ. ਤਿਰੀਟਾਨੀਤਿ ਰੁਕ੍ਖਤਚਵਤ੍ਥਾਨਿ. ਅਜਿਨਾਨੀਤਿ ਅਜਿਨਮਿਗਚਮ੍ਮਾਨਿ. ਅਜਿਨਕ੍ਖਿਪਨ੍ਤਿ ਤਦੇਵ ਮਜ੍ਝੇ ਫਾਲਿਤਂ, ਸਹਖੁਰਕਨ੍ਤਿਪਿ ਵਦਨ੍ਤਿ. ਕੁਸਚੀਰਨ੍ਤਿ ਕੁਸਤਿਣਾਨਿ ਗਨ੍ਥੇਤ੍ਵਾ ਕਤਚੀਰਂ. ਵਾਕਚੀਰਫਲਕਚੀਰੇਸੁਪਿ ਏਸੇਵ ਨਯੋ. ਕੇਸਕਮ੍ਬਲਨ੍ਤਿ ਮਨੁਸ੍ਸਕੇਸੇਹਿ ਕਤਕਮ੍ਬਲਂ. ਵਾਲਕਮ੍ਬਲਨ੍ਤਿ ਅਸ੍ਸਵਾਲਾਦੀਹਿ ਕਤਕਮ੍ਬਲਂ. ਉਲੂਕਪਕ੍ਖਿਕਨ੍ਤਿ ਉਲੂਕਪਤ੍ਤਾਨਿ ਗਨ੍ਥੇਤ੍ਵਾ ਕਤਨਿਵਾਸਨਂ.

ਸਾਕਭਕ੍ਖਾਤਿ ਅਲ੍ਲਸਾਕਭਕ੍ਖਾ. ਸਾਮਾਕਭਕ੍ਖਾਤਿ ਸਾਮਾਕਤਣ੍ਡੁਲਭਕ੍ਖਾ. ਨੀਵਾਰਾਦੀਸੁ ਨੀਵਾਰਾ ਨਾਮ ਅਰਞ੍ਞੇ ਸਯਂ ਜਾਤਵੀਹਿਜਾਤਿ. ਦਦ੍ਦੁਲਨ੍ਤਿ ਚਮ੍ਮਕਾਰੇਹਿ ਚਮ੍ਮਂ ਲਿਖਿਤ੍ਵਾ ਛਡ੍ਡਿਤਕਸਟਂ. ਹਟਂ ਵੁਚ੍ਚਤਿ ਸਿਲੇਸੋਪਿ ਸੇਵਾਲੋਪਿ ਕਣਿਕਾਰਾਦਿਰੁਕ੍ਖਨਿਯ੍ਯਾਸੋਪਿ. ਕਣਨ੍ਤਿ ਕੁਣ੍ਡਕਂ. ਆਚਾਮੋਤਿ ਭਤ੍ਤਉਕ੍ਖਲਿਕਾਯ ਲਗ੍ਗੋ ਝਾਮਓਦਨੋ. ਤਂ ਛਡ੍ਡਿਤਟ੍ਠਾਨੇ ਗਹੇਤ੍ਵਾ ਖਾਦਨ੍ਤਿ, ਓਦਨਕਞ੍ਜਿਯਨ੍ਤਿਪਿ ਵਦਨ੍ਤਿ. ਪਿਞ੍ਞਾਕਾਦਯੋ ਪਾਕਟਾਵ. ਪਵਤ੍ਤਫਲਭੋਜੀਤਿ ਪਤਿਤਫਲਭੋਜੀ. ਭੁਸਾਗਾਰਨ੍ਤਿ ਖਲਸਾਲਂ.

ਸੀਲਵਾਤਿ ਚਤੁਪਾਰਿਸੁਦ੍ਧਿਸੀਲੇਨ ਸਮਨ੍ਨਾਗਤੋ. ਦੁਸ੍ਸੀਲ੍ਯਞ੍ਚਸ੍ਸ ਪਹੀਨਂ ਹੋਤੀਤਿ ਪਞ੍ਚ ਦੁਸ੍ਸੀਲ੍ਯਾਨਿ ਪਹੀਨਾਨਿ ਹੋਨ੍ਤਿ. ਸਮ੍ਮਾਦਿਟ੍ਠਿਕੋਤਿ ਯਾਥਾਵਦਿਟ੍ਠਿਕੋ. ਮਿਚ੍ਛਾਦਿਟ੍ਠੀਤਿ ਅਯਾਥਾਵਦਿਟ੍ਠਿ. ਆਸਵਾਤਿ ਚਤ੍ਤਾਰੋ ਆਸਵਾ. ਅਗ੍ਗਪ੍ਪਤ੍ਤੋਤਿ ਸੀਲਗ੍ਗਪ੍ਪਤ੍ਤੋ. ਸਾਰਪ੍ਪਤ੍ਤੋਤਿ ਸੀਲਸਾਰਂ ਪਤ੍ਤੋ. ਸੁਦ੍ਧੋਤਿ ਪਰਿਸੁਦ੍ਧੋ. ਸਾਰੇ ਪਤਿਟ੍ਠਿਤੋਤਿ ਸੀਲਸਮਾਧਿਪਞ੍ਞਾਸਾਰੇ ਪਤਿਟ੍ਠਿਤੋ.

ਸੇਯ੍ਯਥਾਪੀਤਿ ਯਥਾ ਨਾਮ. ਸਮ੍ਪਨ੍ਨਨ੍ਤਿ ਪਰਿਪੁਣ੍ਣਂ ਪਰਿਪਕ੍ਕਸਾਲਿਭਰਿਤਂ. ਸਙ੍ਘਰਾਪੇਯ੍ਯਾਤਿ ਸਙ੍ਕਡ੍ਢਾਪੇਯ੍ਯ. ਉਬ੍ਬਹਾਪੇਯ੍ਯਾਤਿ ਖਲਟ੍ਠਾਨਂ ਆਹਰਾਪੇਯ੍ਯ. ਭੁਸਿਕਨ੍ਤਿ ਭੁਸਂ. ਕੋਟ੍ਟਾਪੇਯ੍ਯਾਤਿ ਉਦੁਕ੍ਖਲੇ ਪਕ੍ਖਿਪਾਪੇਤ੍ਵਾ ਮੁਸਲੇਹਿ ਪਹਰਾਪੇਯ੍ਯ. ਅਗ੍ਗਪ੍ਪਤ੍ਤਾਨੀਤਿ ਤਣ੍ਡੁਲਗ੍ਗਂ ਪਤ੍ਤਾਨਿ. ਸਾਰਪ੍ਪਤ੍ਤਾਦੀਸੁਪਿ ਏਸੇਵ ਨਯੋ. ਸੇਸਂ ਉਤ੍ਤਾਨਮੇਵ. ਯਂ ਪਨੇਤ੍ਥ ‘‘ਦੁਸ੍ਸੀਲ੍ਯਞ੍ਚਸ੍ਸ ਪਹੀਨਂ ਮਿਚ੍ਛਾਦਿਟ੍ਠਿ ਚਸ੍ਸ ਪਹੀਨਾ’’ਤਿ ਵੁਤ੍ਤਂ, ਤਂ ਸੋਤਾਪਤ੍ਤਿਮਗ੍ਗੇਨ ਪਹੀਨਭਾਵਂ ਸਨ੍ਧਾਯ ਵੁਤ੍ਤਨ੍ਤਿ ਵੇਦਿਤਬ੍ਬਂ.

੩. ਸਰਦਸੁਤ੍ਤਵਣ੍ਣਨਾ

੯੫. ਤਤਿਯੇ ਵਿਦ੍ਧੇਤਿ ਵਲਾਹਕਵਿਗਮੇਨ ਦੂਰੀਭੂਤੇ. ਦੇਵੇਤਿ ਆਕਾਸੇ. ਅਭਿਵਿਹਚ੍ਚਾਤਿ ਅਭਿਵਿਹਨਿਤ੍ਵਾ. ਯਤੋਤਿ ਯਸ੍ਮਿਂ ਕਾਲੇ. ਵਿਰਜਨ੍ਤਿ ਰਾਗਰਜਾਦਿਰਹਿਤਂ. ਤੇਸਂਯੇਵ ਮਲਾਨਂ ਵਿਗਤਤ੍ਤਾ ਵੀਤਮਲਂ. ਧਮ੍ਮਚਕ੍ਖੁਨ੍ਤਿ ਚਤੁਸਚ੍ਚਧਮ੍ਮਪਰਿਗ੍ਗਾਹਕਂ ਸੋਤਾਪਤ੍ਤਿਮਗ੍ਗਚਕ੍ਖੁਂ. ਨਤ੍ਥਿ ਤਂ ਸਂਯੋਜਨਨ੍ਤਿ ਦੁਵਿਧਮੇਵਸ੍ਸ ਸਂਯੋਜਨਂ ਨਤ੍ਥਿ, ਇਤਰਮ੍ਪਿ ਪਨ ਪੁਨ ਇਮਂ ਲੋਕਂ ਆਨੇਤੁਂ ਅਸਮਤ੍ਥਤਾਯ ਨਤ੍ਥੀਤਿ ਵੁਤ੍ਤਂ. ਇਮਸ੍ਮਿਂ ਸੁਤ੍ਤੇ ਝਾਨਾਨਾਗਾਮੀ ਨਾਮ ਕਥਿਤੋਤਿ.

੪. ਪਰਿਸਾਸੁਤ੍ਤਵਣ੍ਣਨਾ

੯੬. ਚਤੁਤ੍ਥੇ ਨ ਬਾਹੁਲਿਕਾ ਹੋਨ੍ਤੀਤਿ ਪਚ੍ਚਯਬਾਹੁਲ੍ਲਿਕਾ ਨ ਹੋਨ੍ਤਿ. ਨ ਸਾਥਲਿਕਾਤਿ ਤਿਸ੍ਸੋ ਸਿਕ੍ਖਾ ਸਿਥਿਲਂ ਕਤ੍ਵਾ ਨ ਗਣ੍ਹਨ੍ਤਿ. ਓਕ੍ਕਮਨੇ ਨਿਕ੍ਖਿਤ੍ਤਧੁਰਾਤਿ ਓਕ੍ਕਮਨਂ ਵੁਚ੍ਚਤਿ ਅਵਗਮਨਟ੍ਠੇਨ ਪਞ੍ਚ ਨੀਵਰਣਾਨਿ, ਤੇਸੁ ਨਿਕ੍ਖਿਤ੍ਤਧੁਰਾ. ਪਵਿਵੇਕੇ ਪੁਬ੍ਬਙ੍ਗਮਾਤਿ ਕਾਯਚਿਤ੍ਤਉਪਧਿਵਿਵੇਕਸਙ੍ਖਾਤੇ ਤਿਵਿਧੇਪਿ ਵਿਵੇਕੇ ਪੁਬ੍ਬਙ੍ਗਮਾ. ਵੀਰਿਯਂ ਆਰਭਨ੍ਤੀਤਿ ਦੁਵਿਧਮ੍ਪਿ ਵੀਰਿਯਂ ਪਗ੍ਗਣ੍ਹਨ੍ਤਿ. ਅਪ੍ਪਤ੍ਤਸ੍ਸਾਤਿ ਝਾਨਵਿਪਸ੍ਸਨਾਮਗ੍ਗਫਲਸਙ੍ਖਾਤਸ੍ਸ ਅਪ੍ਪਤ੍ਤਵਿਸੇਸਸ੍ਸ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਪਚ੍ਛਿਮਾ ਜਨਤਾਤਿ ਸਦ੍ਧਿਵਿਹਾਰਿਕਅਨ੍ਤੇਵਾਸਿਕਾਦਯੋ. ਦਿਟ੍ਠਾਨੁਗਤਿਂ ਆਪਜ੍ਜਤੀਤਿ ਆਚਰਿਯੁਪਜ੍ਝਾਯੇਹਿ ਕਤਂ ਅਨੁਕਰੋਤਿ. ਯਂ ਤਾਯ ਜਨਤਾਯ ਆਚਰਿਯੁਪਜ੍ਝਾਯੇਸੁ ਦਿਟ੍ਠਂ, ਤਸ੍ਸ ਅਨੁਗਤਿਂ ਆਪਜ੍ਜਤਿ ਨਾਮ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਗ੍ਗਵਤੀ ਪਰਿਸਾਤਿ, ਭਿਕ੍ਖਵੇ, ਅਯਂ ਪਰਿਸਾ ਅਗ੍ਗਪੁਗ੍ਗਲਵਤੀ ਨਾਮ ਵੁਚ੍ਚਤਿ.

ਭਣ੍ਡਨਜਾਤਾਤਿ ਜਾਤਭਣ੍ਡਨਾ. ਕਲਹਜਾਤਾਤਿ ਜਾਤਕਲਹਾ. ਭਣ੍ਡਨਨ੍ਤਿ ਚੇਤ੍ਥ ਕਲਹਸ੍ਸ ਪੁਬ੍ਬਭਾਗੋ, ਹਤ੍ਥਪਰਾਮਾਸਾਦਿਵਸੇਨ ਵੀਤਿਕ੍ਕਮੋ ਕਲਹੋ ਨਾਮ. ਵਿਵਾਦਾਪਨ੍ਨਾਤਿ ਵਿਰੁਦ੍ਧਵਾਦਂ ਆਪਨ੍ਨਾ. ਮੁਖਸਤ੍ਤੀਹੀਤਿ ਗੁਣਵਿਜ੍ਝਨਟ੍ਠੇਨ ਫਰੁਸਾ ਵਾਚਾ ‘‘ਮੁਖਸਤ੍ਤਿਯੋ’’ਤਿ ਵੁਚ੍ਚਨ੍ਤਿ, ਤਾਹਿ ਮੁਖਸਤ੍ਤੀਹਿ. ਵਿਤੁਦਨ੍ਤਾ ਵਿਹਰਨ੍ਤੀਤਿ ਵਿਜ੍ਝਨ੍ਤਾ ਵਿਚਰਨ੍ਤਿ.

ਸਮਗ੍ਗਾਤਿ ਸਹਿਤਾ. ਸਮ੍ਮੋਦਮਾਨਾਤਿ ਸਮਪ੍ਪਵਤ੍ਤਮੋਦਾ. ਖੀਰੋਦਕੀਭੂਤਾਤਿ ਖੀਰੋਦਕਂ ਵਿਯ ਭੂਤਾ. ਪਿਯਚਕ੍ਖੂਹੀਤਿ ਉਪਸਨ੍ਤੇਹਿ ਮੇਤ੍ਤਚਕ੍ਖੂਹਿ. ਪੀਤਿ ਜਾਯਤੀਤਿ ਪਞ੍ਚਵਣ੍ਣਾ ਪੀਤਿ ਉਪ੍ਪਜ੍ਜਤਿ. ਕਾਯੋ ਪਸ੍ਸਮ੍ਭਤੀਤਿ ਨਾਮਕਾਯੋਪਿ ਰੂਪਕਾਯੋਪਿ ਵਿਗਤਦਰਥੋ ਹੋਤਿ. ਪਸ੍ਸਦ੍ਧਕਾਯੋਤਿ ਅਸਾਰਦ੍ਧਕਾਯੋ. ਸੁਖਂ ਵੇਦਿਯਤੀਤਿ ਕਾਯਿਕਚੇਤਸਿਕਸੁਖਂ ਵੇਦਿਯਤਿ. ਸਮਾਧਿਯਤੀਤਿ ਆਰਮ੍ਮਣੇ ਸਮ੍ਮਾ ਠਪੀਯਤਿ.

ਥੁਲ੍ਲਫੁਸਿਤਕੇਤਿ ਮਹਾਫੁਸਿਤਕੇ. ਪਬ੍ਬਤਕਨ੍ਦਰਪਦਰਸਾਖਾਤਿ ਏਤ੍ਥ ਕਨ੍ਦਰੋ ਨਾਮ ‘‘ਕ’’ਨ੍ਤਿ ਲਦ੍ਧਨਾਮੇਨ ਉਦਕੇਨ ਦਾਰਿਤੋ ਉਦਕਭਿਨ੍ਨੋ ਪਬ੍ਬਤਪ੍ਪਦੇਸੋ, ਯੋ ‘‘ਨਿਤਮ੍ਭੋ’’ਤਿਪਿ ‘‘ਨਦਿਕੁਞ੍ਜੋ’’ਤਿਪਿ ਵੁਚ੍ਚਤਿ. ਪਦਰਂ ਨਾਮ ਅਟ੍ਠ ਮਾਸੇ ਦੇਵੇ ਅਵਸ੍ਸਨ੍ਤੇ ਫਲਿਤੋ ਭੂਮਿਪ੍ਪਦੇਸੋ. ਸਾਖਾਤਿ ਕੁਸੋਬ੍ਭਗਾਮਿਨਿਯੋ ਖੁਦ੍ਦਕਮਾਤਿਕਾਯੋ. ਕੁਸੋਬ੍ਭਾਤਿ ਖੁਦ੍ਦਕਆਵਾਟਾ. ਮਹਾਸੋਬ੍ਭਾਤਿ ਮਹਾਆਵਾਟਾ. ਕੁਨ੍ਨਦਿਯੋਤਿ ਖੁਦ੍ਦਕਨਦਿਯੋ. ਮਹਾਨਦਿਯੋਤਿ ਗਙ੍ਗਾਯਮੁਨਾਦਿਕਾ ਮਹਾਸਰਿਤਾ.

੫-੭. ਪਠਮਆਜਾਨੀਯਸੁਤ੍ਤਾਦਿਵਣ੍ਣਨਾ

੯੭-੯੯. ਪਞ੍ਚਮੇ ਅਙ੍ਗੇਹੀਤਿ ਗੁਣਙ੍ਗੇਹਿ. ਰਾਜਾਰਹੋਤਿ ਰਞ੍ਞੋ ਅਰਹੋ ਅਨੁਚ੍ਛਵਿਕੋ. ਰਾਜਭੋਗ੍ਗੋਤਿ ਰਞ੍ਞੋ ਉਪਭੋਗਭੂਤੋ. ਰਞ੍ਞੋ ਅਙ੍ਗਨ੍ਤਿ ਰਞ੍ਞੋ ਹਤ੍ਥਪਾਦਾਦਿਅਙ੍ਗਸਮਤਾਯ ਅਙ੍ਗਨ੍ਤੇਵ ਸਙ੍ਖਂ ਗਚ੍ਛਤਿ. ਵਣ੍ਣਸਮ੍ਪਨ੍ਨੋਤਿ ਸਰੀਰਵਣ੍ਣੇਨ ਸਮ੍ਪਨ੍ਨੋ. ਬਲਸਮ੍ਪਨ੍ਨੋਤਿ ਕਾਯਬਲੇਨ ਸਮ੍ਪਨ੍ਨੋ. ਆਹੁਨੇਯ੍ਯੋਤਿ ਆਹੁਤਿਸਙ੍ਖਾਤਂ ਪਿਣ੍ਡਪਾਤਂ ਪਟਿਗ੍ਗਹੇਤੁਂ ਯੁਤ੍ਤੋ. ਪਾਹੁਨੇਯ੍ਯੋਤਿ ਪਾਹੁਨਕਭਤ੍ਤਸ੍ਸ ਅਨੁਚ੍ਛਵਿਕੋ. ਦਕ੍ਖਿਣੇਯ੍ਯੋਤਿ ਦਸਵਿਧਦਾਨਵਤ੍ਥੁਪਰਿਚ੍ਚਾਗਵਸੇਨ ਸਦ੍ਧਾਦਾਨਸਙ੍ਖਾਤਾਯ ਦਕ੍ਖਿਣਾਯ ਅਨੁਚ੍ਛਵਿਕੋ. ਅਞ੍ਜਲਿਕਰਣੀਯੋਤਿ ਅਞ੍ਜਲਿਪਗ੍ਗਹਣਸ੍ਸ ਅਨੁਚ੍ਛਵਿਕੋ. ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸਾਤਿ ਸਬ੍ਬਲੋਕਸ੍ਸ ਅਸਦਿਸਂ ਪੁਞ੍ਞਵਿਰੁਹਨਟ੍ਠਾਨਂ.

ਵਣ੍ਣਸਮ੍ਪਨ੍ਨੋਤਿ ਗੁਣਵਣ੍ਣੇਨ ਸਮ੍ਪਨ੍ਨੋ. ਬਲਸਮ੍ਪਨ੍ਨੋਤਿ ਵੀਰਿਯਬਲੇਨ ਸਮ੍ਪਨ੍ਨੋ. ਜਵਸਮ੍ਪਨ੍ਨੋਤਿ ਞਾਣਜਵੇਨ ਸਮ੍ਪਨ੍ਨੋ. ਥਾਮਵਾਤਿ ਞਾਣਥਾਮੇਨ ਸਮਨ੍ਨਾਗਤੋ. ਦਲ਼੍ਹਪਰਕ੍ਕਮੋਤਿ ਥਿਰਪਰਕ੍ਕਮੋ. ਅਨਿਕ੍ਖਿਤ੍ਤਧੁਰੋਤਿ ਅਟ੍ਠਪਿਤਧੁਰੋ ਪਗ੍ਗਹਿਤਧੁਰੋ, ਅਗ੍ਗਫਲਂ ਅਰਹਤ੍ਤਂ ਅਪ੍ਪਤ੍ਵਾ ਵੀਰਿਯਧੁਰਂ ਨ ਨਿਕ੍ਖਿਪਿਸ੍ਸਾਮੀਤਿ ਏਵਂ ਪਟਿਪਨ੍ਨੋ. ਇਮਸ੍ਮਿਂ ਸੁਤ੍ਤੇ ਚਤੁਸਚ੍ਚਵਸੇਨ ਸੋਤਾਪਤ੍ਤਿਮਗ੍ਗੋ, ਸੋਤਾਪਤ੍ਤਿਮਗ੍ਗੇਨ ਚ ਞਾਣਜਵਸਮ੍ਪਨ੍ਨਤਾ ਕਥਿਤਾਤਿ. ਛਟ੍ਠੇ ਤੀਣਿ ਚ ਮਗ੍ਗਾਨਿ ਤੀਣਿ ਚ ਫਲਾਨਿ, ਤੀਹਿ ਮਗ੍ਗਫਲੇਹਿ ਚ ਞਾਣਜਵਸਮ੍ਪਨ੍ਨਤਾ ਕਥਿਤਾ. ਸਤ੍ਤਮੇ ਅਰਹਤ੍ਤਫਲਂ, ਅਰਹਤ੍ਤਫਲੇਨੇਵ ਚ ਮਗ੍ਗਕਿਚ੍ਚਂ ਕਥਿਤਂ. ਫਲਂ ਪਨ ਜਵਿਤਜਵੇਨ ਉਪ੍ਪਜ੍ਜਨਤੋ ਜਵੋਤਿ ਚ ਵਤ੍ਤੁਂ ਵਟ੍ਟਤਿ.

੮. ਪੋਤ੍ਥਕਸੁਤ੍ਤਵਣ੍ਣਨਾ

੧੦੦. ਅਟ੍ਠਮੇ ਨਵੋਤਿ ਕਰਣਂ ਉਪਾਦਾਯ ਵੁਚ੍ਚਤਿ. ਪੋਤ੍ਥਕੋਤਿ ਵਾਕਮਯਵਤ੍ਥਂ. ਮਜ੍ਝਿਮੋਤਿ ਪਰਿਭੋਗਮਜ੍ਝਿਮੋ. ਜਿਣ੍ਣੋਤਿ ਪਰਿਭੋਗਜਿਣ੍ਣੋ. ਉਕ੍ਖਲਿਪਰਿਮਜ੍ਜਨਨ੍ਤਿ ਉਕ੍ਖਲਿਪਰਿਪੁਞ੍ਛਨਂ ਦੁਸ੍ਸੀਲੋਤਿ ਨਿਸ੍ਸੀਲੋ. ਦੁਬ੍ਬਣ੍ਣਤਾਯਾਤਿ ਗੁਣਵਣ੍ਣਾਭਾਵੇਨ ਦੁਬ੍ਬਣ੍ਣਤਾਯ. ਦਿਟ੍ਠਾਨੁਗਤਿਂ ਆਪਜ੍ਜਨ੍ਤੀਤਿ ਤੇਨ ਕਤਂ ਅਨੁਕਰੋਨ੍ਤਿ. ਨ ਮਹਪ੍ਫਲਂ ਹੋਤੀਤਿ ਵਿਪਾਕਫਲੇਨ ਮਹਪ੍ਫਲਂ ਨ ਹੋਤਿ. ਨ ਮਹਾਨਿਸਂਸਨ੍ਤਿ ਵਿਪਾਕਾਨਿਸਂਸੇਨੇਵ ਨ ਮਹਾਨਿਸਂਸਂ. ਅਪ੍ਪਗ੍ਘਤਾਯਾਤਿ ਵਿਪਾਕਗ੍ਘੇਨ ਅਪ੍ਪਗ੍ਘਤਾਯ. ਕਾਸਿਕਂ ਵਤ੍ਥਨ੍ਤਿ ਤੀਹਿ ਕਪ੍ਪਾਸਅਂਸੂਹਿ ਸੁਤ੍ਤਂ ਕਨ੍ਤਿਤ੍ਵਾ ਕਤਵਤ੍ਥਂ, ਤਞ੍ਚ ਖੋ ਕਾਸਿਰਟ੍ਠੇਯੇਵ ਉਟ੍ਠਿਤਂ. ਸੇਸਂ ਉਤ੍ਤਾਨਮੇਵ. ਸੀਲਂ ਪਨੇਤ੍ਥ ਮਿਸ੍ਸਕਂ ਕਥਿਤਨ੍ਤਿ.

੯. ਲੋਣਕਪਲ੍ਲਸੁਤ੍ਤਵਣ੍ਣਨਾ

੧੦੧. ਨਵਮੇ ਯਥਾ ਯਥਾਯਨ੍ਤਿ ਯਥਾ ਯਥਾ ਅਯਂ. ਤਥਾ ਤਥਾ ਤਨ੍ਤਿ ਤਥਾ ਤਥਾ ਤਂ ਕਮ੍ਮਂ. ਇਦਂ ਵੁਤ੍ਤਂ ਹੋਤਿ – ਯੋ ਏਵਂ ਵਦੇਯ੍ਯ – ‘‘ਯਥਾ ਯਥਾ ਕਮ੍ਮਂ ਕਰੋਤਿ, ਤਥਾ ਤਥਾਸ੍ਸ ਵਿਪਾਕਂ ਪਟਿਸਂਵੇਦਿਯਤੇਵ. ਨ ਹਿ ਸਕ੍ਕਾ ਕਤਸ੍ਸ ਕਮ੍ਮਸ੍ਸ ਵਿਪਾਕਂ ਪਟਿਸੇਧੇਤੁਂ. ਤਸ੍ਮਾ ਯਤ੍ਤਕਂ ਕਮ੍ਮਂ ਕਰੋਤਿ, ਤਤ੍ਤਕਸ੍ਸ ਵਿਪਾਕਂ ਪਟਿਸਂਵੇਦਿਯਤੇਵਾ’’ਤਿ. ਏਵਂ ਸਨ੍ਤਨ੍ਤਿ ਏਵਂ ਸਨ੍ਤੇ. ਬ੍ਰਹ੍ਮਚਰਿਯਵਾਸੋ ਨ ਹੋਤੀਤਿ ਯਂ ਮਗ੍ਗਭਾਵਨਤੋ ਪੁਬ੍ਬੇ ਉਪਪਜ੍ਜਵੇਦਨੀਯਂ ਕਮ੍ਮਂ ਕਤਂ, ਤਸ੍ਸ ਅਵਸ੍ਸਂ ਪਟਿਸਂਵੇਦਨੀਯਤ੍ਤਾ ਬ੍ਰਹ੍ਮਚਰਿਯਂ ਵੁਤ੍ਥਮ੍ਪਿ ਅਵੁਤ੍ਥਮੇਵ ਹੋਤਿ. ਓਕਾਸੋ ਨ ਪਞ੍ਞਾਯਤਿ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾਤਿ ਯਸ੍ਮਾ ਚ ਏਵਂ ਸਨ੍ਤੇ ਤੇਨ ਕਮ੍ਮਾਯੂਹਨਞ੍ਚੇਵ ਵਿਪਾਕਾਨੁਭਵਨਾ ਚ ਹੋਤਿ, ਤਸ੍ਮਾ ਹੇਤੁਨਾ ਨਯੇਨ ਵਟ੍ਟਦੁਕ੍ਖਸ੍ਸ ਅਨ੍ਤਕਿਰਿਯਾਯ ਓਕਾਸੋ ਨ ਪਞ੍ਞਾਯਤਿ ਨਾਮ.

ਯਥਾ ਯਥਾ ਵੇਦਨੀਯਨ੍ਤਿ ਯੇਨ ਯੇਨਾਕਾਰੇਨ ਵੇਦਿਤਬ੍ਬਂ. ਤਥਾ ਤਥਾਸ੍ਸ ਵਿਪਾਕਂ ਪਟਿਸਂਵੇਦਿਯਤੀਤਿ ਤੇਨ ਤੇਨਾਕਾਰੇਨ ਅਸ੍ਸ ਵਿਪਾਕਂ ਪਚ੍ਚਨੁਭੋਤਿ. ਇਦਂ ਵੁਤ੍ਤਂ ਹੋਤਿ – ਯਦੇਤਂ ਸਤ੍ਤਸੁ ਜਵਨੇਸੁ ਪਠਮਜਵਨਕਮ੍ਮਂ ਸਤਿ ਪਚ੍ਚਯੇ ਵਿਪਾਕਵਾਰਂ ਲਭਨ੍ਤਮੇਵ ਦਿਟ੍ਠਧਮ੍ਮਵੇਦਨੀਯਂ ਹੋਤਿ, ਅਸਤਿ ਅਹੋਸਿਕਮ੍ਮਂ ਨਾਮ. ਯਞ੍ਚ ਸਤ੍ਤਮਜਵਨਕਮ੍ਮਂ ਸਤਿ ਪਚ੍ਚਯੇ ਉਪਪਜ੍ਜਵੇਦਨੀਯਂ ਹੋਤਿ, ਅਸਤਿ ਅਹੋਸਿਕਮ੍ਮਂ ਨਾਮ. ਯਞ੍ਚ ਮਜ੍ਝੇ ਪਞ੍ਚਜਵਨਕਮ੍ਮਂ ਯਾਵ ਸਂਸਾਰਪ੍ਪਵਤ੍ਤਿ, ਤਾਵ ਅਪਰਪਰਿਯਾਯਵੇਦਨੀਯਂ ਨਾਮ ਹੋਤਿ. ਏਤੇਸੁ ਆਕਾਰੇਸੁ ਯੇਨ ਯੇਨਾਕਾਰੇਨ ਵੇਦਿਤਬ੍ਬਂ ਕਮ੍ਮਂ ਅਯਂ ਪੁਰਿਸੋ ਕਰੋਤਿ, ਤੇਨ ਤੇਨੇਵਸ੍ਸ ਵਿਪਾਕਂ ਪਟਿਸਂਵੇਦਿਯਤਿ ਨਾਮ. ਅਟ੍ਠਕਥਾਯਞ੍ਹਿ ਲਦ੍ਧਵਿਪਾਕਵਾਰਮੇਵ ਕਮ੍ਮਂ ਯਥਾਵੇਦਨੀਯਂ ਕਮ੍ਮਂ ਨਾਮਾਤਿ ਵੁਤ੍ਤਂ. ਏਵਂ ਸਨ੍ਤਂ, ਭਿਕ੍ਖਵੇ, ਬ੍ਰਹ੍ਮਚਰਿਯਵਾਸੋ ਹੋਤੀਤਿ ਕਮ੍ਮਕ੍ਖਯਕਰਸ੍ਸ ਬ੍ਰਹ੍ਮਚਰਿਯਸ੍ਸ ਖੇਪੇਤਬ੍ਬਕਮ੍ਮਸਮ੍ਭਵਤੋ ਵਾਸੋ ਨਾਮ ਹੋਤਿ, ਵੁਤ੍ਥਂ ਸੁਵੁਤ੍ਥਮੇਵ ਹੋਤੀਤਿ ਅਤ੍ਥੋ. ਓਕਾਸੋ ਪਞ੍ਞਾਯਤਿ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾਤਿ ਯਸ੍ਮਾ ਏਵਂ ਸਨ੍ਤੇ ਤੇਨ ਤੇਨ ਮਗ੍ਗੇਨ ਅਭਿਸਙ੍ਖਾਰਵਿਞ੍ਞਾਣਸ੍ਸ ਨਿਰੋਧੇਨ ਤੇਸੁ ਤੇਸੁ ਭਵੇਸੁ ਆਯਤਿਂ ਵਟ੍ਟਦੁਕ੍ਖਂ ਨ ਉਪ੍ਪਜ੍ਜਤਿ, ਤਸ੍ਮਾ ਓਕਾਸੋ ਪਞ੍ਞਾਯਤਿ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯ.

ਇਦਾਨਿ ਤਂ ਯਥਾਵੇਦਨੀਯਕਮ੍ਮਸਭਾਵਂ ਦਸ੍ਸੇਨ੍ਤੋ ਇਧ, ਭਿਕ੍ਖਵੇ, ਏਕਚ੍ਚਸ੍ਸਾਤਿਆਦਿਮਾਹ. ਤਤ੍ਥ ਅਪ੍ਪਮਤ੍ਤਕਨ੍ਤਿ ਪਰਿਤ੍ਤਂ ਥੋਕਂ ਮਨ੍ਦਂ ਲਾਮਕਂ. ਤਾਦਿਸਂਯੇਵਾਤਿ ਤਂਸਰਿਕ੍ਖਕਮੇਵ. ਦਿਟ੍ਠਧਮ੍ਮਵੇਦਨੀਯਨ੍ਤਿ ਤਸ੍ਮਿਂ ਕਮ੍ਮੇਯੇਵ ਦਿਟ੍ਠਧਮ੍ਮੇ ਵਿਪਚ੍ਚਿਤਬ੍ਬਂ ਵਿਪਾਕਵਾਰਂ ਲਭਨ੍ਤਂ ਦਿਟ੍ਠਧਮ੍ਮਵੇਦਨੀਯਂ ਹੋਤਿ. ਨਾਣੁਪਿ ਖਾਯਤੀਤਿ ਦੁਤਿਯੇ ਅਤ੍ਤਭਾਵੇ ਅਣੁਪਿ ਨ ਖਾਯਤਿ, ਅਣੁਮਤ੍ਤਮ੍ਪਿ ਦੁਤਿਯੇ ਅਤ੍ਤਭਾਵੇ ਵਿਪਾਕਂ ਨ ਦੇਤੀਤਿ ਅਤ੍ਥੋ. ਬਹੁਦੇਵਾਤਿ ਬਹੁਕਂ ਪਨ ਵਿਪਾਕਂ ਕਿਮੇਵ ਦਸ੍ਸਤੀਤਿ ਅਧਿਪ੍ਪਾਯੋ. ਅਭਾਵਿਤਕਾਯੋਤਿਆਦੀਹਿ ਕਾਯਭਾਵਨਾਰਹਿਤੋ ਵਟ੍ਟਗਾਮੀ ਪੁਥੁਜ੍ਜਨੋ ਦਸ੍ਸਿਤੋ. ਪਰਿਤ੍ਤੋਤਿ ਪਰਿਤ੍ਤਗੁਣੋ. ਅਪ੍ਪਾਤੁਮੋਤਿ ਆਤੁਮਾ ਵੁਚ੍ਚਤਿ ਅਤ੍ਤਭਾਵੋ, ਤਸ੍ਮਿਂ ਮਹਨ੍ਤੇਪਿ ਗੁਣਪਰਿਤ੍ਤਤਾਯ ਅਪ੍ਪਾਤੁਮੋਯੇਵ. ਅਪ੍ਪਦੁਕ੍ਖਵਿਹਾਰੀਤਿ ਅਪ੍ਪਕੇਨਪਿ ਪਾਪੇਨ ਦੁਕ੍ਖਵਿਹਾਰੀ. ਭਾਵਿਤਕਾਯੋਤਿਆਦੀਹਿ ਖੀਣਾਸਵੋ ਦਸ੍ਸਿਤੋ. ਸੋ ਹਿ ਕਾਯਾਨੁਪਸ੍ਸਨਾਸਙ੍ਖਾਤਾਯ ਕਾਯਭਾਵਨਾਯ ਭਾਵਿਤਕਾਯੋ ਨਾਮ. ਕਾਯਸ੍ਸ ਵਾ ਵਡ੍ਢਿਤਤ੍ਤਾ ਭਾਵਿਤਕਾਯੋ. ਭਾਵਿਤਸੀਲੋਤਿ ਵਡ੍ਢਿਤਸੀਲੋ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਪਞ੍ਚਦ੍ਵਾਰਭਾਵਨਾਯ ਵਾ ਭਾਵਿਤਕਾਯੋ. ਏਤੇਨ ਇਨ੍ਦ੍ਰਿਯਸਂਵਰਸੀਲਂ ਵੁਤ੍ਤਂ, ਭਾਵਿਤਸੀਲੋਤਿ ਇਮਿਨਾ ਸੇਸਾਨਿ ਤੀਣਿ ਸੀਲਾਨਿ. ਅਪਰਿਤ੍ਤੋਤਿ ਨ ਪਰਿਤ੍ਤਗੁਣੋ. ਮਹਤ੍ਤੋਤਿ ਅਤ੍ਤਭਾਵੇ ਪਰਿਤ੍ਤੇਪਿ ਗੁਣਮਹਨ੍ਤਤਾਯ ਮਹਤ੍ਤੋ. ਅਪ੍ਪਮਾਣਵਿਹਾਰੀਤਿ ਖੀਣਾਸਵਸ੍ਸੇਤਂ ਨਾਮਮੇਵ. ਸੋ ਹਿ ਪਮਾਣਕਰਾਨਂ ਰਾਗਾਦੀਨਂ ਅਭਾਵੇਨ ਅਪ੍ਪਮਾਣਵਿਹਾਰੀ ਨਾਮ.

ਪਰਿਤ੍ਤੇਤਿ ਖੁਦ੍ਦਕੇ. ਉਦਕਮਲ੍ਲਕੇਤਿ ਉਦਕਸਰਾਵੇ. ਓਰਬ੍ਭਿਕੋਤਿ ਉਰਬ੍ਭਸਾਮਿਕੋ. ਉਰਬ੍ਭਘਾਤਕੋਤਿ ਸੂਨਕਾਰੋ. ਜਾਪੇਤੁਂ ਵਾਤਿ ਧਨਜਾਨਿਯਾ ਜਾਪੇਤੁਂ. ਝਾਪੇਤੁਨ੍ਤਿਪਿ ਪਾਠੋ, ਅਯਮੇਵਤ੍ਥੋ. ਯਥਾਪਚ੍ਚਯਂ ਵਾ ਕਾਤੁਨ੍ਤਿ ਯਥਾ ਇਚ੍ਛਤਿ, ਤਥਾ ਕਾਤੁਂ. ਉਰਬ੍ਭਧਨਨ੍ਤਿ ਏਲ਼ਕਅਗ੍ਘਨਕਮੂਲਂ. ਸੋ ਪਨਸ੍ਸ ਸਚੇ ਇਚ੍ਛਤਿ, ਦੇਤਿ. ਨੋ ਚੇ ਇਚ੍ਛਤਿ, ਗੀਵਾਯਂ ਗਹੇਤ੍ਵਾ ਨਿਕ੍ਕਡ੍ਢਾਪੇਤਿ. ਸੇਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਇਮਸ੍ਮਿਂ ਪਨ ਸੁਤ੍ਤੇ ਵਟ੍ਟਵਿਵਟ੍ਟਂ ਕਥਿਤਨ੍ਤਿ.

੧੦. ਪਂਸੁਧੋਵਕਸੁਤ੍ਤਵਣ੍ਣਨਾ

੧੦੨. ਦਸਮੇ ਧੋਵਤੀਤਿ ਵਿਕ੍ਖਾਲੇਤਿ. ਸਨ੍ਧੋਵਤੀਤਿ ਸੁਟ੍ਠੁ ਧੋਵਤਿ, ਪੁਨਪ੍ਪੁਨਂ ਧੋਵਤਿ. ਨਿਦ੍ਧੋਵਤੀਤਿ ਨਿਗ੍ਗਣ੍ਹਿਤ੍ਵਾ ਧੋਵਤਿ. ਅਨਿਦ੍ਧਨ੍ਤਕਸਾਵਨ੍ਤਿ ਅਨੀਹਤਦੋਸਂ ਅਨਪਨੀਤਕਸਾਵਂ. ਪਭਙ੍ਗੂਤਿ ਪਭਿਜ੍ਜਨਸਭਾਵਂ, ਅਧਿਕਰਣੀਯਂ ਠਪੇਤ੍ਵਾ ਮੁਟ੍ਠਿਕਾਯ ਪਹਟਮਤ੍ਤਂ ਭਿਜ੍ਜਤਿ. ਪਟ੍ਟਿਕਾਯਾਤਿ ਸੁਵਣ੍ਣਪਟ੍ਟਕਾਯ. ਗੀਵੇਯ੍ਯਕੇਤਿ ਗੀਵਾਲਙ੍ਕਾਰੇ.

ਅਧਿਚਿਤ੍ਤਨ੍ਤਿ ਸਮਥਵਿਪਸ੍ਸਨਾਚਿਤ੍ਤਂ. ਅਨੁਯੁਤ੍ਤਸ੍ਸਾਤਿ ਭਾਵੇਨ੍ਤਸ੍ਸ. ਸਚੇਤਸੋਤਿ ਚਿਤ੍ਤਸਮ੍ਪਨ੍ਨੋ. ਦਬ੍ਬਜਾਤਿਕੋਤਿ ਪਣ੍ਡਿਤਜਾਤਿਕੋ. ਕਾਮਵਿਤਕ੍ਕਾਦੀਸੁ ਕਾਮੇ ਆਰਬ੍ਭ ਉਪ੍ਪਨ੍ਨੋ ਵਿਤਕ੍ਕੋ ਕਾਮਵਿਤਕ੍ਕੋ. ਬ੍ਯਾਪਾਦਵਿਹਿਂਸਸਮ੍ਪਯੁਤ੍ਤਾ ਵਿਤਕ੍ਕਾ ਬ੍ਯਾਪਾਦਵਿਹਿਂਸਵਿਤਕ੍ਕਾ ਨਾਮ. ਞਾਤਿਵਿਤਕ੍ਕਾਦੀਸੁ ‘‘ਅਮ੍ਹਾਕਂ ਞਾਤਕਾ ਬਹੂ ਪੁਞ੍ਞਵਨ੍ਤਾ’’ਤਿਆਦਿਨਾ ਨਯੇਨ ਞਾਤਕੇ ਆਰਬ੍ਭ ਉਪ੍ਪਨ੍ਨੋ ਵਿਤਕ੍ਕੋ ਞਾਤਿਵਿਤਕ੍ਕੋ. ‘‘ਅਸੁਕੋ ਜਨਪਦੋ ਖੇਮੋ ਸੁਭਿਕ੍ਖੋ’’ਤਿਆਦਿਨਾ ਨਯੇਨ ਜਨਪਦਮਾਰਬ੍ਭ ਉਪ੍ਪਨ੍ਨੋ ਵਿਤਕ੍ਕੋ ਜਨਪਦਵਿਤਕ੍ਕੋ. ‘‘ਅਹੋ ਵਤ ਮਂ ਪਰੇ ਨ ਅਵਜਾਨੇਯ੍ਯੁ’’ਨ੍ਤਿ ਏਵਂ ਉਪ੍ਪਨ੍ਨੋ ਵਿਤਕ੍ਕੋ ਅਨਵਞ੍ਞਤ੍ਤਿਪਟਿਸਂਯੁਤ੍ਤੋ ਵਿਤਕ੍ਕੋ ਨਾਮ. ਧਮ੍ਮਵਿਤਕ੍ਕਾਵਸਿਸ੍ਸਨ੍ਤੀਤਿ ਧਮ੍ਮਵਿਤਕ੍ਕਾ ਨਾਮ ਦਸਵਿਪਸ੍ਸਨੁਪਕ੍ਕਿਲੇਸਵਿਤਕ੍ਕਾ. ਸੋ ਹੋਤਿ ਸਮਾਧਿ ਨ ਚੇਵ ਸਨ੍ਤੋਤਿ ਸੋ ਅਵਸਿਟ੍ਠਧਮ੍ਮਵਿਤਕ੍ਕੋ ਵਿਪਸ੍ਸਨਾਸਮਾਧਿ ਅਵੂਪਸਨ੍ਤਕਿਲੇਸਤ੍ਤਾ ਸਨ੍ਤੋ ਨ ਹੋਤਿ. ਨ ਪਣੀਤੋਤਿ ਨ ਅਤਪ੍ਪਕੋ. ਨਪ੍ਪਟਿਪ੍ਪਸ੍ਸਦ੍ਧਿਲਦ੍ਧੋਤਿ ਨ ਕਿਲੇਸਪਟਿਪ੍ਪਸ੍ਸਦ੍ਧਿਯਾ ਲਦ੍ਧੋ. ਨ ਏਕੋਦਿਭਾਵਾਧਿਗਤੋਤਿ ਨ ਏਕਗ੍ਗਭਾਵਪ੍ਪਤ੍ਤੋ. ਸਸਙ੍ਖਾਰਨਿਗ੍ਗਯ੍ਹਵਾਰਿਤਗਤੋਤਿ ਸਸਙ੍ਖਾਰੇਨ ਸਪ੍ਪਯੋਗੇਨ ਕਿਲੇਸੇ ਨਿਗ੍ਗਣ੍ਹਿਤ੍ਵਾ ਵਾਰੇਤ੍ਵਾ ਵਾਰਿਤੋ, ਨ ਕਿਲੇਸਾਨਂ ਛਿਨ੍ਨਨ੍ਤੇ ਉਪ੍ਪਨ੍ਨੋ, ਕਿਲੇਸੇ ਪਨ ਵਾਰੇਤ੍ਵਾ ਉਪ੍ਪਨ੍ਨੋ.

ਹੋਤਿ ਸੋ, ਭਿਕ੍ਖਵੇ, ਸਮਯੋਤਿ ਏਤ੍ਥ ਸਮਯੋ ਨਾਮ ਉਤੁਸਪ੍ਪਾਯਂ ਆਹਾਰਸਪ੍ਪਾਯਂ ਸੇਨਾਸਨਸਪ੍ਪਾਯਂ ਪੁਗ੍ਗਲਸਪ੍ਪਾਯਂ ਧਮ੍ਮਸ੍ਸਵਨਸਪ੍ਪਾਯਨ੍ਤਿ ਇਮੇਸਂ ਪਞ੍ਚਨ੍ਨਂ ਸਪ੍ਪਾਯਾਨਂ ਪਟਿਲਾਭਕਾਲੋ. ਯਂ ਤਂ ਚਿਤ੍ਤਨ੍ਤਿ ਯਸ੍ਮਿਂ ਸਮਯੇ ਤਂ ਵਿਪਸ੍ਸਨਾਚਿਤ੍ਤਂ. ਅਜ੍ਝਤ੍ਤਂਯੇਵ ਸਨ੍ਤਿਟ੍ਠਤੀਤਿ ਅਤ੍ਤਨਿਯੇਵ ਤਿਟ੍ਠਤਿ. ਨਿਯਕਜ੍ਝਤ੍ਤਞ੍ਹਿ ਇਧ ਅਜ੍ਝਤ੍ਤਂ ਨਾਮ. ਗੋਚਰਜ੍ਝਤ੍ਤਮ੍ਪਿ ਵਟ੍ਟਤਿ. ਪੁਥੁਤ੍ਤਾਰਮ੍ਮਣਂ ਪਹਾਯ ਏਕਸ੍ਮਿਂ ਨਿਬ੍ਬਾਨਗੋਚਰੇਯੇਵ ਤਿਟ੍ਠਤੀਤਿ ਵੁਤ੍ਤਂ ਹੋਤਿ. ਸਨ੍ਨਿਸੀਦਤੀਤਿ ਸੁਟ੍ਠੁ ਨਿਸੀਦਤਿ. ਏਕੋਦਿ ਹੋਤੀਤਿ ਏਕਗ੍ਗਂ ਹੋਤਿ. ਸਮਾਧਿਯਤੀਤਿ ਸਮ੍ਮਾ ਆਧਿਯਤਿ. ਸਨ੍ਤੋਤਿਆਦੀਸੁ ਪਚ੍ਚਨੀਕਕਿਲੇਸਵੂਪਸਮੇਨ ਸਨ੍ਤੋ. ਅਤਪ੍ਪਕਟ੍ਠੇਨ ਪਣੀਤੋ. ਕਿਲੇਸਪਟਿਪ੍ਪਸ੍ਸਦ੍ਧਿਯਾ ਲਦ੍ਧਤ੍ਤਾ ਪਟਿਪ੍ਪਸ੍ਸਦ੍ਧਲਦ੍ਧੋ. ਏਕਗ੍ਗਭਾਵਂ ਗਤਤ੍ਤਾ ਏਕੋਦਿਭਾਵਾਧਿਗਤੋ. ਕਿਲੇਸਾਨਂ ਛਿਨ੍ਨਨ੍ਤੇ ਉਪ੍ਪਨ੍ਨਤ੍ਤਾ ਨ ਸਪ੍ਪਯੋਗੇਨ ਕਿਲੇਸੇ ਨਿਗ੍ਗਣ੍ਹਿਤ੍ਵਾ ਵਾਰੇਤ੍ਵਾ ਵਾਰਿਤੋਤਿ ਨ ਸਸਙ੍ਖਾਰਨਿਗ੍ਗਯ੍ਹਵਾਰਿਤਗਤੋ. ਏਤ੍ਤਾਵਤਾ ਅਯਂ ਭਿਕ੍ਖੁ ਵਿਵਟ੍ਟੇਤ੍ਵਾ ਅਰਹਤ੍ਤਂ ਪਤ੍ਤੋ ਨਾਮ ਹੋਤਿ.

ਇਦਾਨਿ ਖੀਣਾਸਵਸ੍ਸ ਸਤੋ ਅਭਿਞ੍ਞਾਪਟਿਪਦਂ ਦਸ੍ਸੇਨ੍ਤੋ ਯਸ੍ਸ ਯਸ੍ਸ ਚਾਤਿਆਦਿਮਾਹ. ਤਤ੍ਥ ਅਭਿਞ੍ਞਾ ਸਚ੍ਛਿਕਰਣੀਯਸ੍ਸਾਤਿ ਅਭਿਜਾਨਿਤ੍ਵਾ ਪਚ੍ਚਕ੍ਖਂ ਕਾਤਬ੍ਬਸ੍ਸ. ਸਤਿ ਸਤਿਆਯਤਨੇਤਿ ਪੁਬ੍ਬਹੇਤੁਸਙ੍ਖਾਤੇ ਚੇਵ ਇਦਾਨਿ ਚ ਪਟਿਲਦ੍ਧਬ੍ਬੇ ਅਭਿਞ੍ਞਾਪਾਦਕਜ੍ਝਾਨਾਦਿਭੇਦੇ ਚ ਸਤਿ ਸਤਿਕਾਰਣੇ. ਵਿਤ੍ਥਾਰਤੋ ਪਨ ਅਯਂ ਅਭਿਞ੍ਞਾਕਥਾ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੨.੩੬੫ ਆਦਯੋ) ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਆਸਵਾਨਂ ਖਯਾਤਿਆਦਿ ਚੇਤ੍ਥ ਫਲਸਮਾਪਤ੍ਤਿਵਸੇਨ ਵੁਤ੍ਤਨ੍ਤਿ ਵੇਦਿਤਬ੍ਬਂ.

੧੧. ਨਿਮਿਤ੍ਤਸੁਤ੍ਤਵਣ੍ਣਨਾ

੧੦੩. ਏਕਾਦਸਮੇਪਿ ਅਧਿਚਿਤ੍ਤਂ ਸਮਥਵਿਪਸ੍ਸਨਾਚਿਤ੍ਤਮੇਵ. ਤੀਣਿ ਨਿਮਿਤ੍ਤਾਨੀਤਿ ਤੀਣਿ ਕਾਰਣਾਨਿ. ਕਾਲੇਨ ਕਾਲਨ੍ਤਿ ਕਾਲੇ ਕਾਲੇ, ਯੁਤ੍ਤਕਾਲੇਤਿ ਅਤ੍ਥੋ. ਕਾਲੇਨ ਕਾਲਂ ਸਮਾਧਿਨਿਮਿਤ੍ਤਂ ਮਨਸਿਕਾਤਬ੍ਬਨ੍ਤਿਆਦੀਸੁ ਤਂ ਤਂ ਕਾਲਂ ਸਲ੍ਲਕ੍ਖੇਤ੍ਵਾ ਏਕਗ੍ਗਤਾਯ ਯੁਤ੍ਤਕਾਲੇ ਏਕਗ੍ਗਤਾ ਮਨਸਿਕਾਤਬ੍ਬਾ. ਏਕਗ੍ਗਤਾ ਹਿ ਇਧ ਸਮਾਧਿਨਿਮਿਤ੍ਤਨ੍ਤਿ ਵੁਤ੍ਤਾ. ਤਤ੍ਰ ਵਚਨਤ੍ਥੋ – ਸਮਾਧਿਯੇਵ ਨਿਮਿਤ੍ਤਂ ਸਮਾਧਿਨਿਮਿਤ੍ਤਂ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਪਗ੍ਗਹੋਤਿ ਪਨ ਵੀਰਿਯਸ੍ਸ ਨਾਮਂ, ਉਪੇਕ੍ਖਾਤਿ ਮਜ੍ਝਤ੍ਤਭਾਵਸ੍ਸ. ਤਸ੍ਮਾ ਵੀਰਿਯਸ੍ਸ ਯੁਤ੍ਤਕਾਲੇ ਵੀਰਿਯਂ ਮਨਸਿਕਾਤਬ੍ਬਂ, ਮਜ੍ਝਤ੍ਤਭਾਵਸ੍ਸ ਯੁਤ੍ਤਕਾਲੇ ਮਜ੍ਝਤ੍ਤਭਾਵੇ ਠਾਤਬ੍ਬਨ੍ਤਿ. ਠਾਨਂ ਤਂ ਚਿਤ੍ਤਂ ਕੋਸਜ੍ਜਾਯ ਸਂਵਤ੍ਤੇਯ੍ਯਾਤਿ ਕਾਰਣਂ ਵਿਜ੍ਜਤਿ ਯੇਨ ਤਂ ਚਿਤ੍ਤਂ ਕੋਸਜ੍ਜਭਾਵੇ ਤਿਟ੍ਠੇਯ੍ਯ. ਇਤਰੇਸੁਪਿ ਏਸੇਵ ਨਯੋ. ਉਪੇਕ੍ਖਾਨਿਮਿਤ੍ਤਂਯੇਵ ਮਨਸਿ ਕਰੇਯ੍ਯਾਤਿ ਏਤ੍ਥ ਚ ਞਾਣਜਵਂ ਉਪੇਕ੍ਖੇਯ੍ਯਾਤਿ ਅਯਮਤ੍ਥੋ. ਆਸਵਾਨਂ ਖਯਾਯਾਤਿ ਅਰਹਤ੍ਤਫਲਤ੍ਥਾਯ.

ਉਕ੍ਕਂ ਬਨ੍ਧੇਯ੍ਯਾਤਿ ਅਙ੍ਗਾਰਕਪਲ੍ਲਂ ਸਜ੍ਜੇਯ੍ਯ. ਆਲਿਮ੍ਪੇਯ੍ਯਾਤਿ ਤਤ੍ਥ ਅਙ੍ਗਾਰੇ ਪਕ੍ਖਿਪਿਤ੍ਵਾ ਅਗ੍ਗਿਂ ਦਤ੍ਵਾ ਨਾਲ਼ਿਕਾਯ ਧਮਨ੍ਤੋ ਅਗ੍ਗਿਂ ਗਾਹਾਪੇਯ੍ਯ. ਉਕ੍ਕਾਮੁਖੇ ਪਕ੍ਖਿਪੇਯ੍ਯਾਤਿ ਅਙ੍ਗਾਰੇ ਵਿਯੂਹਿਤ੍ਵਾ ਅਙ੍ਗਾਰਮਤ੍ਥਕੇ ਵਾ ਠਪੇਯ੍ਯ, ਮੂਸਾਯ ਵਾ ਪਕ੍ਖਿਪੇਯ੍ਯ. ਅਜ੍ਝੁਪੇਕ੍ਖਤੀਤਿ ਪਕ੍ਕਾਪਕ੍ਕਭਾਵਂ ਉਪਧਾਰੇਤਿ.

ਸਮ੍ਮਾ ਸਮਾਧਿਯਤਿ ਆਸਵਾਨਂ ਖਯਾਯਾਤਿ ਅਰਹਤ੍ਤਫਲਤ੍ਥਾਯ ਸਮ੍ਮਾ ਠਪੀਯਤਿ. ਏਤ੍ਤਾਵਤਾ ਹਿ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਪ੍ਪਤ੍ਤੋ ਭਿਕ੍ਖੁ ਦਸ੍ਸਿਤੋ. ਇਦਾਨਿ ਤਸ੍ਸ ਖੀਣਾਸਵਸ੍ਸ ਅਭਿਞ੍ਞਾਯ ਪਟਿਪਦਂ ਦਸ੍ਸੇਨ੍ਤੋ ਯਸ੍ਸ ਯਸ੍ਸ ਚਾਤਿਆਦਿਮਾਹ. ਤਂ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਲੋਣਕਪਲ੍ਲਵਗ੍ਗੋ ਪਞ੍ਚਮੋ.