੭. ਦੁਤਿਯਸਿਕ੍ਖਾਸੁਤ੍ਤਵਣ੍ਣਨਾ

੮੮. ਸਤ੍ਤਮੇ ਕੋਲਂਕੋਲੋਤਿ ਕੁਲਾ ਕੁਲਂ ਗਮਨਕੋ. ਕੁਲਨ੍ਤਿ ਚੇਤ੍ਥ ਭਵੋ ਅਧਿਪ੍ਪੇਤੋ, ਤਸ੍ਮਾ ‘‘ਦ੍ਵੇ ਵਾ ਤੀਣਿ ਵਾ ਕੁਲਾਨੀ’’ਤਿ ਏਤ੍ਥਪਿ ਦ੍ਵੇ ਵਾ ਤਯੋ ਵਾ ਭਵੇਤਿ ਅਤ੍ਥੋ ਵੇਦਿਤਬ੍ਬੋ. ਅਯਞ੍ਹਿ ਦ੍ਵੇ ਵਾ ਭਵੇ ਸਨ੍ਧਾਵਤਿ ਤਯੋ ਵਾ, ਉਤ੍ਤਮਕੋਟਿਯਾ ਛ ਵਾ. ਤਸ੍ਮਾ ਦ੍ਵੇ ਵਾ ਤੀਣਿ ਵਾ ਚਤ੍ਤਾਰਿ ਵਾ ਪਞ੍ਚ ਵਾ ਛ ਵਾਤਿ ਏਵਮੇਤ੍ਥ ਵਿਕਪ੍ਪੋ ਦਟ੍ਠਬ੍ਬੋ. ਏਕਬੀਜੀਤਿ ਏਕਸ੍ਸੇਵ ਭਵਸ੍ਸ ਬੀਜਂ ਏਤਸ੍ਸ ਅਤ੍ਥੀਤਿ ਏਕਬੀਜੀ. ਉਦ੍ਧਂਸੋਤੋਤਿਆਦੀਸੁ ਅਤ੍ਥਿ ਉਦ੍ਧਂਸੋਤੋ ਅਕਨਿਟ੍ਠਗਾਮੀ, ਅਤ੍ਥਿ ਉਦ੍ਧਂਸੋਤੋ ਨ ਅਕਨਿਟ੍ਠਗਾਮੀ, ਅਤ੍ਥਿ ਨ ਉਦ੍ਧਂਸੋਤੋ ਅਕਨਿਟ੍ਠਗਾਮੀ, ਅਤ੍ਥਿ ਨ ਉਦ੍ਧਂਸੋਤੋ ਨ ਅਕਨਿਟ੍ਠਗਾਮੀ. ਤਤ੍ਥ ਯੋ ਇਧ ਅਨਾਗਾਮਿਫਲਂ ਪਤ੍ਵਾ ਅਵਿਹਾਦੀਸੁ ਨਿਬ੍ਬਤ੍ਤੋ ਤਤ੍ਥ ਯਾਵਤਾਯੁਕਂ ਠਤ੍ਵਾ ਉਪਰੂਪਰਿ ਨਿਬ੍ਬਤ੍ਤਿਤ੍ਵਾ ਅਕਨਿਟ੍ਠਂ ਪਾਪੁਣਾਤਿ, ਅਯਂ ਉਦ੍ਧਂਸੋਤੋ ਅਕਨਿਟ੍ਠਗਾਮੀ ਨਾਮ. ਯੋ ਪਨ ਅਵਿਹਾਦੀਸੁ ਨਿਬ੍ਬਤ੍ਤੋ ਤਤ੍ਥੇਵ ਅਪਰਿਨਿਬ੍ਬਾਯਿਤ੍ਵਾ ਅਕਨਿਟ੍ਠਮ੍ਪਿ ਅਪ੍ਪਤ੍ਵਾ ਉਪਰਿਮਬ੍ਰਹ੍ਮਲੋਕੇ ਪਰਿਨਿਬ੍ਬਾਯਤਿ, ਅਯਂ ਉਦ੍ਧਂਸੋਤੋ ਨ ਅਕਨਿਟ੍ਠਗਾਮੀ ਨਾਮ. ਯੋ ਇਤੋ ਚਵਿਤ੍ਵਾ ਅਕਨਿਟ੍ਠੇਯੇਵ ਨਿਬ੍ਬਤ੍ਤਤਿ, ਅਯਂ ਨ ਉਦ੍ਧਂਸੋਤੋ ਅਕਨਿਟ੍ਠਗਾਮੀ ਨਾਮ. ਯੋ ਪਨ ਅਵਿਹਾਦੀਸੁ ਚਤੂਸੁ ਅਞ੍ਞਤਰਸ੍ਮਿਂ ਨਿਬ੍ਬਤ੍ਤਿਤ੍ਵਾ ਤਤ੍ਥੇਵ ਪਰਿਨਿਬ੍ਬਾਯਤਿ, ਅਯਂ ਨ ਉਦ੍ਧਂਸੋਤੋ ਨ ਅਕਨਿਟ੍ਠਗਾਮੀ ਨਾਮ.

ਯਤ੍ਥ ਕਤ੍ਥਚਿ ਉਪ੍ਪਨ੍ਨੋ ਪਨ ਸਸਙ੍ਖਾਰੇਨ ਸਪ੍ਪਯੋਗੇਨ ਅਰਹਤ੍ਤਂ ਪਤ੍ਤੋ ਸਸਙ੍ਖਾਰਪਰਿਨਿਬ੍ਬਾਯੀ ਨਾਮ. ਅਸਙ੍ਖਾਰੇਨ ਅਪ੍ਪਯੋਗੇਨ ਪਤ੍ਤੋ ਅਸਙ੍ਖਾਰਪਰਿਨਿਬ੍ਬਾਯੀ ਨਾਮ. ਯੋ ਪਨ ਕਪ੍ਪਸਹਸ੍ਸਾਯੁਕੇਸੁ ਅਵਿਹੇਸੁ ਨਿਬ੍ਬਤ੍ਤਿਤ੍ਵਾ ਪਞ੍ਚਮਂ ਕਪ੍ਪਸਤਂ ਅਤਿਕ੍ਕਮਿਤ੍ਵਾ ਅਰਹਤ੍ਤਂ ਪਤ੍ਤੋ, ਅਯਂ ਉਪਹਚ੍ਚਪਰਿਨਿਬ੍ਬਾਯੀ ਨਾਮ. ਅਤਪ੍ਪਾਦੀਸੁਪਿ ਏਸੇਵ ਨਯੋ. ਅਨ੍ਤਰਾਪਰਿਨਿਬ੍ਬਾਯੀਤਿ ਯੋ ਆਯੁਵੇਮਜ੍ਝਂ ਅਨਤਿਕ੍ਕਮਿਤ੍ਵਾ ਪਰਿਨਿਬ੍ਬਾਯਤਿ, ਸੋ ਤਿਵਿਧੋ ਹੋਤਿ. ਕਪ੍ਪਸਹਸ੍ਸਾਯੁਕੇਸੁ ਤਾਵ ਅਵਿਹੇਸੁ ਨਿਬ੍ਬਤ੍ਤਿਤ੍ਵਾ ਏਕੋ ਨਿਬ੍ਬਤ੍ਤਦਿਵਸੇਯੇਵ ਅਰਹਤ੍ਤਂ ਪਾਪੁਣਾਤਿ. ਨੋ ਚੇ ਨਿਬ੍ਬਤ੍ਤਦਿਵਸੇ ਪਾਪੁਣਾਤਿ, ਪਠਮਸ੍ਸ ਪਨ ਕਪ੍ਪਸਤਸ੍ਸ ਮਤ੍ਥਕੇ ਪਾਪੁਣਾਤਿ, ਅਯਂ ਪਠਮੋ ਅਨ੍ਤਰਾਪਰਿਨਿਬ੍ਬਾਯੀ. ਅਪਰੋ ਏਵਂ ਅਸਕ੍ਕੋਨ੍ਤੋ ਦ੍ਵਿਨ੍ਨਂ ਕਪ੍ਪਸਤਾਨਂ ਮਤ੍ਥਕੇ ਪਾਪੁਣਾਤਿ, ਅਯਂ ਦੁਤਿਯੋ. ਅਪਰੋ ਏਵਮ੍ਪਿ ਅਸਕ੍ਕੋਨ੍ਤੋ ਚਤੁਨ੍ਨਂ ਕਪ੍ਪਸਤਾਨਂ ਮਤ੍ਥਕੇ ਪਾਪੁਣਾਤਿ, ਅਯਂ ਤਤਿਯੋ ਅਨ੍ਤਰਾਪਰਿਨਿਬ੍ਬਾਯੀ. ਸੇਸਂ ਵੁਤ੍ਤਨਯਮੇਵ.

ਇਮਸ੍ਮਿਂ ਪਨ ਠਾਨੇ ਠਤ੍ਵਾ ਚਤੁਵੀਸਤਿ ਸੋਤਾਪਨ੍ਨਾ, ਦ੍ਵਾਦਸ ਸਕਦਾਗਾਮਿਨੋ, ਅਟ੍ਠਚਤ੍ਤਾਲੀਸ ਅਨਾਗਾਮਿਨੋ, ਦ੍ਵਾਦਸ ਚ ਅਰਹਨ੍ਤੋ ਕਥੇਤਬ੍ਬਾ. ਇਮਸ੍ਮਿਂ ਹਿ ਸਾਸਨੇ ਸਦ੍ਧਾਧੁਰਂ ਪਞ੍ਞਾਧੁਰਨ੍ਤਿ ਦ੍ਵੇ ਧੁਰਾਨਿ, ਦੁਕ੍ਖਪਟਿਪਦਾਦਨ੍ਧਾਭਿਞ੍ਞਾਦਯੋ ਚਤਸ੍ਸੋ ਪਟਿਪਦਾ. ਤਤ੍ਥੇਕੋ ਸਦ੍ਧਾਧੁਰੇਨ ਅਭਿਨਿਵਿਸਿਤ੍ਵਾ ਸੋਤਾਪਤ੍ਤਿਫਲਂ ਪਤ੍ਵਾ ਏਕਮੇਵ ਭਵਂ ਨਿਬ੍ਬਤ੍ਤਿਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤਿ, ਅਯਮੇਕੋ ਏਕਬੀਜੀ. ਸੋ ਪਟਿਪਦਾਵਸੇਨ ਚਤੁਬ੍ਬਿਧੋ ਹੋਤਿ. ਯਥਾ ਚੇਸ, ਏਵਂ ਪਞ੍ਞਾਧੁਰੇਨ ਅਭਿਨਿਵਿਟ੍ਠੋਪੀਤਿ ਅਟ੍ਠ ਏਕਬੀਜਿਨੋ. ਤਥਾ ਕੋਲਂਕੋਲਾ ਸਤ੍ਤਕ੍ਖਤ੍ਤੁਪਰਮਾ ਚਾਤਿ ਇਮੇ ਚਤੁਵੀਸਤਿ ਸੋਤਾਪਨ੍ਨਾ ਨਾਮ. ਤੀਸੁ ਪਨ ਵਿਮੋਕ੍ਖੇਸੁ ਸੁਞ੍ਞਤਵਿਮੋਕ੍ਖੇਨ ਸਕਦਾਗਾਮਿਭੂਮਿਂ ਪਤ੍ਤਾ ਚਤੁਨ੍ਨਂ ਪਟਿਪਦਾਨਂ ਵਸੇਨ ਚਤ੍ਤਾਰੋ ਸਕਦਾਗਾਮਿਨੋ, ਤਥਾ ਅਨਿਮਿਤ੍ਤਵਿਮੋਕ੍ਖੇਨ ਪਤ੍ਤਾ ਚਤ੍ਤਾਰੋ, ਅਪ੍ਪਣਿਹਿਤਵਿਮੋਕ੍ਖੇਨ ਪਤ੍ਤਾ ਚਤ੍ਤਾਰੋਤਿ ਇਮੇ ਦ੍ਵਾਦਸ ਸਕਦਾਗਾਮਿਨੋ. ਅਵਿਹੇਸੁ ਪਨ ਤਯੋ ਅਨ੍ਤਰਾਪਰਿਨਿਬ੍ਬਾਯਿਨੋ, ਏਕੋ ਉਪਹਚ੍ਚਪਰਿਨਿਬ੍ਬਾਯੀ, ਏਕੋ ਉਦ੍ਧਂਸੋਤੋ ਅਕਨਿਟ੍ਠਗਾਮੀਤਿ ਪਞ੍ਚ ਅਨਾਗਾਮਿਨੋ, ਤੇ ਅਸਙ੍ਖਾਰਪਰਿਨਿਬ੍ਬਾਯਿਨੋ ਪਞ੍ਚ, ਸਸਙ੍ਖਾਰਪਰਿਨਿਬ੍ਬਾਯਿਨੋ ਪਞ੍ਚਾਤਿ ਦਸ ਹੋਨ੍ਤਿ, ਤਥਾ ਅਤਪ੍ਪਾਦੀਸੁ. ਅਕਨਿਟ੍ਠੇਸੁ ਪਨ ਉਦ੍ਧਂਸੋਤੋ ਨਤ੍ਥਿ, ਤਸ੍ਮਾ ਤਤ੍ਥ ਚਤ੍ਤਾਰੋ ਸਸਙ੍ਖਾਰਪਰਿਨਿਬ੍ਬਾਯੀ, ਚਤ੍ਤਾਰੋ ਅਸਙ੍ਖਾਰਪਰਿਨਿਬ੍ਬਾਯੀਤਿ ਅਟ੍ਠ, ਇਮੇ ਅਟ੍ਠਚਤ੍ਤਾਲੀਸ ਅਨਾਗਾਮਿਨੋ. ਯਥਾ ਪਨ ਸਕਦਾਗਾਮਿਨੋ, ਤਥੇਵ ਅਰਹਨ੍ਤੋਪਿ ਦ੍ਵਾਦਸ ਵੇਦਿਤਬ੍ਬਾ. ਇਧਾਪਿ ਤਿਸ੍ਸੋ ਸਿਕ੍ਖਾ ਮਿਸ੍ਸਿਕਾਵ ਕਥਿਤਾ.