(੯) ੪. ਸਮਣਵਗ੍ਗੋ
੧. ਸਮਣਸੁਤ੍ਤਵਣ੍ਣਨਾ
੮੨. ਚਤੁਤ੍ਥਸ੍ਸ ਪਠਮੇ ਸਮਣਿਯਾਨੀਤਿ ਸਮਣਸਨ੍ਤਕਾਨਿ. ਸਮਣਕਰਣੀਯਾਨੀਤਿ ਸਮਣੇਨ ਕਤ੍ਤਬ੍ਬਕਿਚ੍ਚਾਨਿ. ਅਧਿਸੀਲਸਿਕ੍ਖਾਸਮਾਦਾਨਨ੍ਤਿਆਦੀਸੁ ਸਮਾਦਾਨਂ ਵੁਚ੍ਚਤਿ ਗਹਣਂ, ਅਧਿਸੀਲਸਿਕ੍ਖਾਯ ਸਮਾਦਾਨਂ ਗਹਣਂ ਪੂਰਣਂ ਅਧਿਸੀਲਸਿਕ੍ਖਾਸਮਾਦਾਨਂ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਏਤ੍ਥ ਚ ਸੀਲਂ ਅਧਿਸੀਲਂ, ਚਿਤ੍ਤਂ ਅਧਿਚਿਤ੍ਤਂ, ਪਞ੍ਞਾ ਅਧਿਪਞ੍ਞਾਤਿ ਅਯਂ ਵਿਭਾਗੋ ਵੇਦਿਤਬ੍ਬੋ. ਤਤ੍ਥ ਪਞ੍ਚਸੀਲਂ ਸੀਲਂ ਨਾਮ, ਤਂ ਉਪਾਦਾਯ ਦਸਸੀਲਂ ਅਧਿਸੀਲਂ ਨਾਮ, ਤਮ੍ਪਿ ਉਪਾਦਾਯ ਚਤੁਪਾਰਿਸੁਦ੍ਧਿਸੀਲਂ ਅਧਿਸੀਲਂ ਨਾਮ. ਅਪਿਚ ਸਬ੍ਬਮ੍ਪਿ ਲੋਕਿਯਸੀਲਂ ਸੀਲਂ ਨਾਮ, ਲੋਕੁਤ੍ਤਰਸੀਲਂ ਅਧਿਸੀਲਂ, ਤਦੇਵ ਸਿਕ੍ਖਿਤਬ੍ਬਤੋ ਸਿਕ੍ਖਾਤਿ ਵੁਚ੍ਚਤਿ. ਕਾਮਾਵਚਰਚਿਤ੍ਤਂ ਪਨ ਚਿਤ੍ਤਂ ਨਾਮ, ਤਂ ਉਪਾਦਾਯ ਰੂਪਾਵਚਰਂ ਅਧਿਚਿਤ੍ਤਂ ਨਾਮ, ਤਮ੍ਪਿ ਉਪਾਦਾਯ ਅਰੂਪਾਵਚਰਂ ਅਧਿਚਿਤ੍ਤਂ ਨਾਮ. ਅਪਿਚ ਸਬ੍ਬਮ੍ਪਿ ਲੋਕਿਯਚਿਤ੍ਤਂ ਚਿਤ੍ਤਮੇਵ, ਲੋਕੁਤ੍ਤਰਂ ਅਧਿਚਿਤ੍ਤਂ. ਪਞ੍ਞਾਯਪਿ ਏਸੇਵ ਨਯੋ. ਤਸ੍ਮਾਤਿ ਯਸ੍ਮਾ ਇਮਾਨਿ ਤੀਣਿ ਸਮਣਕਰਣੀਯਾਨਿ, ਤਸ੍ਮਾ. ਤਿਬ੍ਬੋਤਿ ਬਹਲੋ. ਛਨ੍ਦੋਤਿ ਕਤ੍ਤੁਕਮ੍ਯਤਾਕੁਸਲਚ੍ਛਨ੍ਦੋ. ਇਤਿ ਇਮਸ੍ਮਿਂ ਸੁਤ੍ਤਨ੍ਤੇ ਤਿਸ੍ਸੋ ਸਿਕ੍ਖਾ ਲੋਕਿਯਲੋਕੁਤ੍ਤਰਾ ਕਥਿਤਾਤਿ.
੨. ਗਦ੍ਰਭਸੁਤ੍ਤਵਣ੍ਣਨਾ
੮੩. ਦੁਤਿਯੇ ਪਿਟ੍ਠਿਤੋ ਪਿਟ੍ਠਿਤੋਤਿ ਪਚ੍ਛਤੋ ਪਚ੍ਛਤੋ. ਅਹਮ੍ਪਿ ਦਮ੍ਮੋ ਅਹਮ੍ਪਿ ਦਮ੍ਮੋਤਿ ਅਹਮ੍ਪਿ ‘‘ਦਮ੍ਮੋ ਦਮ੍ਮਮਾਨੋ’’ਤਿ ਵਦਮਾਨੋ ਗਾਵੀਤਿ. ਸੇਯ੍ਯਥਾਪਿ ਗੁਨ੍ਨਨ੍ਤਿ ਯਥਾ ਗਾਵੀਨਂ. ਗਾਵੋ ਹਿ ਕਾਲ਼ਾਪਿ ਰਤ੍ਤਾਪਿ ਸੇਤਾਦਿਵਣ੍ਣਾਪਿ ਹੋਨ੍ਤਿ, ਗਦ੍ਰਭਸ੍ਸ ਪਨ ਤਾਦਿਸੋ ਵਣ੍ਣੋ ਨਾਮ ਨਤ੍ਥਿ. ਯਥਾ ਚ ਵਣ੍ਣੋ, ਏਵਂ ਸਰੋਪਿ ਪਦਮ੍ਪਿ ਅਞ੍ਞਾਦਿਸਮੇਵ. ਸੇਸਂ ਉਤ੍ਤਾਨਤ੍ਥਮੇਵ. ਇਮਸ੍ਮਿਮ੍ਪਿ ਸੁਤ੍ਤੇ ਤਿਸ੍ਸੋ ਸਿਕ੍ਖਾ ਮਿਸ੍ਸਿਕਾਵ ਕਥਿਤਾਤਿ.
੩. ਖੇਤ੍ਤਸੁਤ੍ਤਵਣ੍ਣਨਾ
੮੪. ਤਤਿਯੇ ਪਟਿਕਚ੍ਚੇਵਾਤਿ ਪਠਮਮੇਵ. ਸੁਕਟ੍ਠਂ ਕਰੋਤੀਤਿ ਨਙ੍ਗਲੇਨ ਸੁਕਟ੍ਠਂ ਕਰੋਤਿ. ਸੁਮਤਿਕਤਨ੍ਤਿ ਮਤਿਯਾ ਸੁਟ੍ਠੁ ਸਮੀਕਤਂ. ਕਾਲੇਨਾਤਿ ਵਪਿਤਬ੍ਬਯੁਤ੍ਤਕਾਲੇਨ. ਸੇਸਂ ਉਤ੍ਤਾਨਮੇਵ. ਇਧਾਪਿ ਤਿਸ੍ਸੋ ਸਿਕ੍ਖਾ ਮਿਸ੍ਸਿਕਾਵ ਕਥਿਤਾ.
੪. ਵਜ੍ਜਿਪੁਤ੍ਤਸੁਤ੍ਤਵਣ੍ਣਨਾ
੮੫. ਚਤੁਤ੍ਥੇ ਵਜ੍ਜਿਪੁਤ੍ਤਕੋਤਿ ਵਜ੍ਜਿਰਾਜਕੁਲਸ੍ਸ ਪੁਤ੍ਤੋ. ਦਿਯਡ੍ਢਸਿਕ੍ਖਾਪਦਸਤਨ੍ਤਿ ਪਣ੍ਣਾਸਾਧਿਕਂ ਸਿਕ੍ਖਾਪਦਸਤਂ. ਤਸ੍ਮਿਂ ਸਮਯੇ ਪਞ੍ਞਤ੍ਤਾਨਿ ਸਿਕ੍ਖਾਪਦਾਨੇਵ ਸਨ੍ਧਾਯੇਤਂ ਵੁਤ੍ਤਂ. ਸੋ ਕਿਰ ਭਿਕ੍ਖੁ ਅਜ੍ਜਵਸਮ੍ਪਨ੍ਨੋ ਉਜੁਜਾਤਿਕੋ ਅਵਙ੍ਕੋ ਅਕੁਟਿਲੋ, ਤਸ੍ਮਾ ‘‘ਅਹਂ ਏਤ੍ਤਕਾਨਿ ਸਿਕ੍ਖਾਪਦਾਨਿ ਰਕ੍ਖਿਤੁਂ ਸਕ੍ਕੁਣੇਯ੍ਯਂ ਵਾ ਨ ਵਾ’’ਤਿ ਚਿਨ੍ਤੇਤ੍ਵਾ ਸਤ੍ਥੁ ਆਰੋਚੇਸਿ. ਸਕ੍ਕੋਮਹਨ੍ਤਿ ਸਕ੍ਕੋਮਿ ਅਹਂ. ਸੋ ਕਿਰ ‘‘ਏਤ੍ਤਕੇਸੁ ਸਿਕ੍ਖਾਪਦੇਸੁ ਸਿਕ੍ਖਨ੍ਤਸ੍ਸ ਅਗਰੁ ਤੀਸੁ ਸਿਕ੍ਖਾਸੁ ਸਿਕ੍ਖਿਤੁ’’ਨ੍ਤਿ ਮਞ੍ਞਮਾਨੋ ਏਵਮਾਹ. ਅਥ ਭਗਵਾ ਯਥਾ ਨਾਮ ਪਞ੍ਞਾਸ ਤਿਣਕਲਾਪਿਯੋ ਉਕ੍ਖਿਪਿਤੁਂ ਅਸਕ੍ਕੋਨ੍ਤਸ੍ਸ ਕਲਾਪਿਯਸਤਂ ਬਨ੍ਧਿਤ੍ਵਾ ਸੀਸੇ ਠਪੇਯ੍ਯ, ਏਵਮੇਵ ਏਕਿਸ੍ਸਾਪਿ ਸਿਕ੍ਖਾਯ ਸਿਕ੍ਖਿਤੁਂ ਅਸਕ੍ਕੋਨ੍ਤਸ੍ਸ ਅਪਰਾ ਦ੍ਵੇਪਿ ਸਿਕ੍ਖਾ ਉਪਰਿ ਪਕ੍ਖਿਪਨ੍ਤੋ ਤਸ੍ਮਾਤਿਹ ਤ੍ਵਂ ਭਿਕ੍ਖੂਤਿਆਦਿਮਾਹ. ਸੁਖੁਮਾਲੋ ਕਿਰ ਉਤ੍ਤਰੋ ਨਾਮ ਜਾਨਪਦਮਨੁਸ੍ਸੋ ਲੋਹਪਾਸਾਦਵਿਹਾਰੇ ਵਸਤਿ. ਅਥ ਨਂ ਦਹਰਭਿਕ੍ਖੂ ਆਹਂਸੁ – ‘‘ਉਤ੍ਤਰ, ਅਗ੍ਗਿਸਾਲਾ ਓਵਸ੍ਸਤਿ, ਤਿਣਂ ਕਪ੍ਪਿਯਂ ਕਤ੍ਵਾ ਦੇਹੀ’’ਤਿ. ਤਂ ਆਦਾਯ ਅਟਵਿਂ ਗਨ੍ਤ੍ਵਾ ਤੇਨ ਲਾਯਿਤਂ ਤਿਣਂਯੇਵ ਕਰਲ਼ੇ ਬਨ੍ਧਿਤ੍ਵਾ ‘‘ਪਞ੍ਞਾਸ ਕਰਲ਼ੇ ਗਹੇਤੁਂ ਸਕ੍ਖਿਸ੍ਸਸਿ ਉਤ੍ਤਰਾ’’ਤਿ ਆਹਂਸੁ. ਸੋ ‘‘ਨ ਸਕ੍ਖਿਸ੍ਸਾਮੀ’’ਤਿ ਆਹ. ਅਸੀਤਿਂ ਪਨ ਸਕ੍ਖਿਸ੍ਸਸੀਤਿ? ਨ ਸਕ੍ਖਿਸ੍ਸਾਮਿ, ਭਨ੍ਤੇਤਿ. ਏਕਂ ਕਰਲ਼ਸਤਂ ਸਕ੍ਖਿਸ੍ਸਸੀਤਿ? ਆਮ, ਭਨ੍ਤੇ, ਗਣ੍ਹਿਸ੍ਸਾਮੀਤਿ. ਦਹਰਭਿਕ੍ਖੂ ਕਰਲ਼ਸਤਂ ਬਨ੍ਧਿਤ੍ਵਾ ਤਸ੍ਸ ਸੀਸੇ ਠਪਯਿਂਸੁ. ਸੋ ਉਕ੍ਖਿਪਿਤ੍ਵਾ ਨਿਤ੍ਥੁਨਨ੍ਤੋ ਗਨ੍ਤ੍ਵਾ ਅਗ੍ਗਿਸਾਲਾਯ ਸਮੀਪੇ ਪਾਤੇਸਿ. ਅਥ ਨਂ ਭਿਕ੍ਖੂ ‘‘ਕਿਲਨ੍ਤਰੂਪੋਸਿ ਉਤ੍ਤਰਾ’’ਤਿ ਆਹਂਸੁ. ਆਮ, ਭਨ੍ਤੇ, ਦਹਰਾ ਭਿਕ੍ਖੂ ਮਂ ਵਞ੍ਚੇਸੁਂ, ਇਮਂ ਏਕਮ੍ਪਿ ਕਰਲ਼ਸਤਂ ਉਕ੍ਖਿਪਿਤੁਂ ਅਸਕ੍ਕੋਨ੍ਤਂ ਮਂ ‘‘ਪਣ੍ਣਾਸ ਕਰਲ਼ੇ ਉਕ੍ਖਿਪਾਹੀ’’ਤਿ ਵਦਿਂਸੁ. ਆਮ, ਉਤ੍ਤਰ, ਵਞ੍ਚਯਿਂਸੁ ਤਨ੍ਤਿ. ਏਵਂ ਸਮ੍ਪਦਮਿਦਂ ਵੇਦਿਤਬ੍ਬਂ. ਇਧਾਪਿ ਤਿਸ੍ਸੋ ਸਿਕ੍ਖਾ ਮਿਸ੍ਸਿਕਾਵ ਕਥਿਤਾ.
੫. ਸੇਕ੍ਖਸੁਤ੍ਤਵਣ੍ਣਨਾ
੮੬. ਪਞ੍ਚਮੇ ਉਜੁਮਗ੍ਗਾਨੁਸਾਰਿਨੋਤਿ ਉਜੁਮਗ੍ਗੋ ਵੁਚ੍ਚਤਿ ਅਰਿਯਮਗ੍ਗੋ, ਤਂ ਅਨੁਸ੍ਸਰਨ੍ਤਸ੍ਸ ਪਟਿਪਨ੍ਨਕਸ੍ਸਾਤਿ ਅਤ੍ਥੋ. ਖਯਸ੍ਮਿਂ ਪਠਮਂ ਞਾਣਨ੍ਤਿ ਪਠਮਮੇਵ ਮਗ੍ਗਞਾਣਂ ਉਪ੍ਪਜ੍ਜਤਿ. ਮਗ੍ਗੋ ਹਿ ਕਿਲੇਸਾਨਂ ਖੇਪਨਤੋ ਖਯੋ ਨਾਮ, ਤਂਸਮ੍ਪਯੁਤ੍ਤਂ ਞਾਣਂ ਖਯਸ੍ਮਿਂ ਞਾਣਂ ਨਾਮ. ਤਤੋ ਅਞ੍ਞਾ ਅਨਨ੍ਤਰਾਤਿ ਤਤੋ ਚਤੁਤ੍ਥਮਗ੍ਗਞਾਣਤੋ ਅਨਨ੍ਤਰਾ ਅਞ੍ਞਾ ਉਪ੍ਪਜ੍ਜਤਿ, ਅਰਹਤ੍ਤਫਲਂ ਉਪ੍ਪਜ੍ਜਤੀਤਿ ਅਤ੍ਥੋ. ਅਞ੍ਞਾਵਿਮੁਤ੍ਤਸ੍ਸਾਤਿ ਅਰਹਤ੍ਤਫਲਵਿਮੁਤ੍ਤਿਯਾ ਵਿਮੁਤ੍ਤਸ੍ਸ. ਞਾਣਂ ਵੇ ਹੋਤੀਤਿ ਪਚ੍ਚਵੇਕ੍ਖਣਞਾਣਂ ਹੋਤਿ. ਇਤਿ ਸੁਤ੍ਤੇਪਿ ਗਾਥਾਸੁਪਿ ਸਤ੍ਤ ਸੇਖਾ ਕਥਿਤਾ. ਅਵਸਾਨੇ ਪਨ ਖੀਣਾਸਵੋ ਦਸ੍ਸਿਤੋਤਿ.
੬. ਪਠਮਸਿਕ੍ਖਾਸੁਤ੍ਤਵਣ੍ਣਨਾ
੮੭. ਛਟ੍ਠੇ ਅਤ੍ਤਕਾਮਾਤਿ ਅਤ੍ਤਨੋ ਹਿਤਕਾਮਾ. ਯਤ੍ਥੇਤਂ ਸਬ੍ਬਂ ਸਮੋਧਾਨਂ ਗਚ੍ਛਤੀਤਿ ਯਾਸੁ ਸਿਕ੍ਖਾਸੁ ਸਬ੍ਬਮੇਤਂ ਦਿਯਡ੍ਢਸਿਕ੍ਖਾਪਦਸਤਂ ਸਙ੍ਗਹਂ ਗਚ੍ਛਤਿ. ਪਰਿਪੂਰਕਾਰੀ ਹੋਤੀਤਿ ਸਮਤ੍ਤਕਾਰੀ ਹੋਤਿ. ਮਤ੍ਤਸੋ ਕਾਰੀਤਿ ਪਮਾਣੇਨ ਕਾਰਕੋ, ਸਬ੍ਬੇਨ ਸਬ੍ਬਂ ਕਾਤੁਂ ਨ ਸਕ੍ਕੋਤੀਤਿ ਅਤ੍ਥੋ. ਖੁਦ੍ਦਾਨੁਖੁਦ੍ਦਕਾਨੀਤਿ ਚਤ੍ਤਾਰਿ ਪਾਰਾਜਿਕਾਨਿ ਠਪੇਤ੍ਵਾ ਸੇਸਸਿਕ੍ਖਾਪਦਾਨਿ. ਤਤ੍ਰਾਪਿ ਸਙ੍ਘਾਦਿਸੇਸਂ ਖੁਦ੍ਦਕਂ, ਥੁਲ੍ਲਚ੍ਚਯਂ ਅਨੁਖੁਦ੍ਦਕਂ ਨਾਮ. ਥੁਲ੍ਲਚ੍ਚਯਞ੍ਚ ਖੁਦ੍ਦਕਂ, ਪਾਚਿਤ੍ਤਿਯਂ ਅਨੁਖੁਦ੍ਦਕਂ ਨਾਮ, ਪਾਚਿਤ੍ਤਿਯਞ੍ਚ ਖੁਦ੍ਦਕਂ, ਪਾਟਿਦੇਸਨਿਯਦੁਕ੍ਕਟਦੁਬ੍ਭਾਸਿਤਾਨਿ ਅਨੁਖੁਦ੍ਦਕਾਨਿ ਨਾਮ. ਇਮੇ ਪਨ ਅਙ੍ਗੁਤ੍ਤਰਮਹਾਨਿਕਾਯਵਲ਼ਞ੍ਜਨਕਆਚਰਿਯਾ ‘‘ਚਤ੍ਤਾਰਿ ਪਾਰਾਜਿਕਾਨਿ ਠਪੇਤ੍ਵਾ ਸੇਸਾਨਿ ਸਬ੍ਬਾਨਿਪਿ ਖੁਦ੍ਦਾਨੁਖੁਦ੍ਦਕਾਨੀ’’ਤਿ ਵਦਨ੍ਤਿ. ਤਾਨਿ ਆਪਜ੍ਜਤਿਪਿ ਵੁਟ੍ਠਾਤਿਪੀਤਿ ਏਤ੍ਥ ਪਨ ਖੀਣਾਸਵੋ ਤਾਵ ਲੋਕਵਜ੍ਜਂ ਨਾਪਜ੍ਜਤਿ, ਪਣ੍ਣਤ੍ਤਿਵਜ੍ਜਮੇਵ ਆਪਜ੍ਜਤਿ. ਆਪਜ੍ਜਨ੍ਤੋ ਚ ਕਾਯੇਨਪਿ ਵਾਚਾਯਪਿ ਚਿਤ੍ਤੇਨਪਿ ਆਪਜ੍ਜਤਿ. ਕਾਯੇਨ ਆਪਜ੍ਜਨ੍ਤੋ ਕੁਟਿਕਾਰਸਹਸੇਯ੍ਯਾਦੀਨਿ ਆਪਜ੍ਜਤਿ, ਵਾਚਾਯ ਆਪਜ੍ਜਨ੍ਤੋ ਸਞ੍ਚਰਿਤ੍ਤਪਦਸੋਧਮ੍ਮਾਦੀਨਿ, ਚਿਤ੍ਤੇਨ ਆਪਜ੍ਜਨ੍ਤੋ ਰੂਪਿਯਪਟਿਗ੍ਗਹਣਂ ਆਪਜ੍ਜਤਿ. ਸੇਕ੍ਖੇਸੁਪਿ ਏਸੇਵ ਨਯੋ. ਨ ਹਿ ਮੇਤ੍ਥ, ਭਿਕ੍ਖਵੇ, ਅਭਬ੍ਬਤਾ ਵੁਤ੍ਤਾਤਿ, ਭਿਕ੍ਖਵੇ, ਨ ਹਿ ਮਯਾ ਏਤ੍ਥ ਏਵਰੂਪਂ ਆਪਤ੍ਤਿਂ ਆਪਜ੍ਜਨੇ ਚ ਵੁਟ੍ਠਾਨੇ ਚ ਅਰਿਯਪੁਗ੍ਗਲਸ੍ਸ ਅਭਬ੍ਬਤਾ ਕਥਿਤਾ. ਆਦਿਬ੍ਰਹ੍ਮਚਰਿਯਕਾਨੀਤਿ ਮਗ੍ਗਬ੍ਰਹ੍ਮਚਰਿਯਸ੍ਸ ਆਦਿਭੂਤਾਨਿ ਚਤ੍ਤਾਰਿ ਮਹਾਸੀਲਸਿਕ੍ਖਾਪਦਾਨਿ. ਬ੍ਰਹ੍ਮਚਰਿਯਸਾਰੁਪ੍ਪਾਨੀਤਿ ਤਾਨਿਯੇਵ ਚਤੁਮਗ੍ਗਬ੍ਰਹ੍ਮਚਰਿਯਸ੍ਸ ਸਾਰੁਪ੍ਪਾਨਿ ਅਨੁਚ੍ਛਵਿਕਾਨਿ. ਤਤ੍ਥਾਤਿ ਤੇਸੁ ਸਿਕ੍ਖਾਪਦੇਸੁ. ਧੁਵਸੀਲੋਤਿ ਨਿਬਦ੍ਧਸੀਲੋ. ਠਿਤਸੀਲੋਤਿ ਪਤਿਟ੍ਠਿਤਸੀਲੋ. ਸੋਤਾਪਨ੍ਨੋਤਿ ਸੋਤਸਙ੍ਖਾਤੇਨ ਮਗ੍ਗੇਨ ਫਲਂ ਆਪਨ੍ਨੋ. ਅਵਿਨਿਪਾਤਧਮ੍ਮੋਤਿ ਚਤੂਸੁ ਅਪਾਯੇਸੁ ਅਪਤਨਸਭਾਵੋ. ਨਿਯਤੋਤਿ ਸੋਤਾਪਤ੍ਤਿਮਗ੍ਗਨਿਯਾਮੇਨ ਨਿਯਤੋ. ਸਮ੍ਬੋਧਿਪਰਾਯਣੋਤਿ ਉਪਰਿਮਗ੍ਗਤ੍ਤਯਸਮ੍ਬੋਧਿਪਰਾਯਣੋ.
ਤਨੁਤ੍ਤਾਤਿ ਤਨੁਭਾਵੋ. ਸਕਦਾਗਾਮਿਨੋ ਹਿ ਰਾਗਾਦਯੋ ਅਬ੍ਭਪਟਲਂ ਵਿਯ ਮਚ੍ਛਿਕਾਪਤ੍ਤਂ ਵਿਯ ਚ ਤਨੁਕਾ ਹੋਨ੍ਤਿ, ਨ ਬਹਲਾ. ਓਰਮ੍ਭਾਗਿਯਾਨਨ੍ਤਿ ਹੇਟ੍ਠਾਭਾਗਿਯਾਨਂ. ਸਂਯੋਜਨਾਨਨ੍ਤਿ ਬਨ੍ਧਨਾਨਂ. ਪਰਿਕ੍ਖਯਾਤਿ ਪਰਿਕ੍ਖਯੇਨ. ਓਪਪਾਤਿਕੋ ਹੋਤੀਤਿ ਉਪ੍ਪਨ੍ਨਕੋ ਹੋਤਿ. ਤਤ੍ਥ ਪਰਿਨਿਬ੍ਬਾਯੀਤਿ ਹੇਟ੍ਠਾ ਅਨੋਤਰਿਤ੍ਵਾ ਉਪਰਿਯੇਵ ਪਰਿਨਿਬ੍ਬਾਨਧਮ੍ਮੋ. ਅਨਾਵਤ੍ਤਿਧਮ੍ਮੋਤਿ ਯੋਨਿਗਤਿਵਸੇਨ ਅਨਾਗਮਨਧਮ੍ਮੋ.
ਪਦੇਸਂ ਪਦੇਸਕਾਰੀਤਿਆਦੀਸੁ ਪਦੇਸਕਾਰੀ ਪੁਗ੍ਗਲੋ ਨਾਮ ਸੋਤਾਪਨ੍ਨੋ ਚ ਸਕਦਾਗਾਮੀ ਚ ਅਨਾਗਾਮੀ ਚ, ਸੋ ਪਦੇਸਮੇਵ ਸਮ੍ਪਾਦੇਤਿ. ਪਰਿਪੂਰਕਾਰੀ ਨਾਮ ਅਰਹਾ, ਸੋ ਪਰਿਪੂਰਮੇਵ ਸਮ੍ਪਾਦੇਤਿ. ਅਵਞ੍ਝਾਨੀਤਿ ਅਤੁਚ੍ਛਾਨਿ ਸਫਲਾਨਿ ਸਉਦ੍ਰਯਾਨੀਤਿ ਅਤ੍ਥੋ. ਇਧਾਪਿ ਤਿਸ੍ਸੋ ਸਿਕ੍ਖਾ ਮਿਸ੍ਸਕਾਵ ਕਥਿਤਾ.
੭. ਦੁਤਿਯਸਿਕ੍ਖਾਸੁਤ੍ਤਵਣ੍ਣਨਾ
੮੮. ਸਤ੍ਤਮੇ ਕੋਲਂਕੋਲੋਤਿ ਕੁਲਾ ਕੁਲਂ ਗਮਨਕੋ. ਕੁਲਨ੍ਤਿ ਚੇਤ੍ਥ ਭਵੋ ਅਧਿਪ੍ਪੇਤੋ, ਤਸ੍ਮਾ ‘‘ਦ੍ਵੇ ਵਾ ਤੀਣਿ ਵਾ ਕੁਲਾਨੀ’’ਤਿ ਏਤ੍ਥਪਿ ਦ੍ਵੇ ਵਾ ਤਯੋ ਵਾ ਭਵੇਤਿ ਅਤ੍ਥੋ ਵੇਦਿਤਬ੍ਬੋ. ਅਯਞ੍ਹਿ ਦ੍ਵੇ ਵਾ ਭਵੇ ਸਨ੍ਧਾਵਤਿ ਤਯੋ ਵਾ, ਉਤ੍ਤਮਕੋਟਿਯਾ ਛ ਵਾ. ਤਸ੍ਮਾ ਦ੍ਵੇ ਵਾ ਤੀਣਿ ਵਾ ਚਤ੍ਤਾਰਿ ਵਾ ਪਞ੍ਚ ਵਾ ਛ ਵਾਤਿ ਏਵਮੇਤ੍ਥ ਵਿਕਪ੍ਪੋ ਦਟ੍ਠਬ੍ਬੋ. ਏਕਬੀਜੀਤਿ ਏਕਸ੍ਸੇਵ ਭਵਸ੍ਸ ਬੀਜਂ ਏਤਸ੍ਸ ਅਤ੍ਥੀਤਿ ਏਕਬੀਜੀ. ਉਦ੍ਧਂਸੋਤੋਤਿਆਦੀਸੁ ਅਤ੍ਥਿ ਉਦ੍ਧਂਸੋਤੋ ਅਕਨਿਟ੍ਠਗਾਮੀ, ਅਤ੍ਥਿ ਉਦ੍ਧਂਸੋਤੋ ਨ ਅਕਨਿਟ੍ਠਗਾਮੀ, ਅਤ੍ਥਿ ਨ ਉਦ੍ਧਂਸੋਤੋ ਅਕਨਿਟ੍ਠਗਾਮੀ, ਅਤ੍ਥਿ ਨ ਉਦ੍ਧਂਸੋਤੋ ਨ ਅਕਨਿਟ੍ਠਗਾਮੀ. ਤਤ੍ਥ ਯੋ ਇਧ ਅਨਾਗਾਮਿਫਲਂ ਪਤ੍ਵਾ ਅਵਿਹਾਦੀਸੁ ਨਿਬ੍ਬਤ੍ਤੋ ਤਤ੍ਥ ਯਾਵਤਾਯੁਕਂ ਠਤ੍ਵਾ ਉਪਰੂਪਰਿ ਨਿਬ੍ਬਤ੍ਤਿਤ੍ਵਾ ਅਕਨਿਟ੍ਠਂ ਪਾਪੁਣਾਤਿ, ਅਯਂ ਉਦ੍ਧਂਸੋਤੋ ਅਕਨਿਟ੍ਠਗਾਮੀ ਨਾਮ. ਯੋ ਪਨ ਅਵਿਹਾਦੀਸੁ ਨਿਬ੍ਬਤ੍ਤੋ ਤਤ੍ਥੇਵ ਅਪਰਿਨਿਬ੍ਬਾਯਿਤ੍ਵਾ ਅਕਨਿਟ੍ਠਮ੍ਪਿ ਅਪ੍ਪਤ੍ਵਾ ਉਪਰਿਮਬ੍ਰਹ੍ਮਲੋਕੇ ਪਰਿਨਿਬ੍ਬਾਯਤਿ, ਅਯਂ ਉਦ੍ਧਂਸੋਤੋ ਨ ਅਕਨਿਟ੍ਠਗਾਮੀ ਨਾਮ. ਯੋ ਇਤੋ ਚਵਿਤ੍ਵਾ ਅਕਨਿਟ੍ਠੇਯੇਵ ਨਿਬ੍ਬਤ੍ਤਤਿ, ਅਯਂ ਨ ਉਦ੍ਧਂਸੋਤੋ ਅਕਨਿਟ੍ਠਗਾਮੀ ਨਾਮ. ਯੋ ਪਨ ਅਵਿਹਾਦੀਸੁ ਚਤੂਸੁ ਅਞ੍ਞਤਰਸ੍ਮਿਂ ਨਿਬ੍ਬਤ੍ਤਿਤ੍ਵਾ ਤਤ੍ਥੇਵ ਪਰਿਨਿਬ੍ਬਾਯਤਿ, ਅਯਂ ਨ ਉਦ੍ਧਂਸੋਤੋ ਨ ਅਕਨਿਟ੍ਠਗਾਮੀ ਨਾਮ.
ਯਤ੍ਥ ਕਤ੍ਥਚਿ ਉਪ੍ਪਨ੍ਨੋ ਪਨ ਸਸਙ੍ਖਾਰੇਨ ਸਪ੍ਪਯੋਗੇਨ ਅਰਹਤ੍ਤਂ ਪਤ੍ਤੋ ਸਸਙ੍ਖਾਰਪਰਿਨਿਬ੍ਬਾਯੀ ਨਾਮ. ਅਸਙ੍ਖਾਰੇਨ ਅਪ੍ਪਯੋਗੇਨ ਪਤ੍ਤੋ ਅਸਙ੍ਖਾਰਪਰਿਨਿਬ੍ਬਾਯੀ ਨਾਮ. ਯੋ ਪਨ ਕਪ੍ਪਸਹਸ੍ਸਾਯੁਕੇਸੁ ਅਵਿਹੇਸੁ ਨਿਬ੍ਬਤ੍ਤਿਤ੍ਵਾ ਪਞ੍ਚਮਂ ਕਪ੍ਪਸਤਂ ਅਤਿਕ੍ਕਮਿਤ੍ਵਾ ਅਰਹਤ੍ਤਂ ਪਤ੍ਤੋ, ਅਯਂ ਉਪਹਚ੍ਚਪਰਿਨਿਬ੍ਬਾਯੀ ਨਾਮ. ਅਤਪ੍ਪਾਦੀਸੁਪਿ ਏਸੇਵ ਨਯੋ. ਅਨ੍ਤਰਾਪਰਿਨਿਬ੍ਬਾਯੀਤਿ ਯੋ ਆਯੁਵੇਮਜ੍ਝਂ ਅਨਤਿਕ੍ਕਮਿਤ੍ਵਾ ਪਰਿਨਿਬ੍ਬਾਯਤਿ, ਸੋ ਤਿਵਿਧੋ ਹੋਤਿ. ਕਪ੍ਪਸਹਸ੍ਸਾਯੁਕੇਸੁ ਤਾਵ ਅਵਿਹੇਸੁ ਨਿਬ੍ਬਤ੍ਤਿਤ੍ਵਾ ਏਕੋ ਨਿਬ੍ਬਤ੍ਤਦਿਵਸੇਯੇਵ ਅਰਹਤ੍ਤਂ ਪਾਪੁਣਾਤਿ. ਨੋ ਚੇ ਨਿਬ੍ਬਤ੍ਤਦਿਵਸੇ ਪਾਪੁਣਾਤਿ, ਪਠਮਸ੍ਸ ਪਨ ਕਪ੍ਪਸਤਸ੍ਸ ਮਤ੍ਥਕੇ ਪਾਪੁਣਾਤਿ, ਅਯਂ ਪਠਮੋ ਅਨ੍ਤਰਾਪਰਿਨਿਬ੍ਬਾਯੀ. ਅਪਰੋ ਏਵਂ ਅਸਕ੍ਕੋਨ੍ਤੋ ਦ੍ਵਿਨ੍ਨਂ ਕਪ੍ਪਸਤਾਨਂ ਮਤ੍ਥਕੇ ਪਾਪੁਣਾਤਿ, ਅਯਂ ਦੁਤਿਯੋ. ਅਪਰੋ ਏਵਮ੍ਪਿ ਅਸਕ੍ਕੋਨ੍ਤੋ ਚਤੁਨ੍ਨਂ ਕਪ੍ਪਸਤਾਨਂ ਮਤ੍ਥਕੇ ਪਾਪੁਣਾਤਿ, ਅਯਂ ਤਤਿਯੋ ਅਨ੍ਤਰਾਪਰਿਨਿਬ੍ਬਾਯੀ. ਸੇਸਂ ਵੁਤ੍ਤਨਯਮੇਵ.
ਇਮਸ੍ਮਿਂ ਪਨ ਠਾਨੇ ਠਤ੍ਵਾ ਚਤੁਵੀਸਤਿ ਸੋਤਾਪਨ੍ਨਾ, ਦ੍ਵਾਦਸ ਸਕਦਾਗਾਮਿਨੋ, ਅਟ੍ਠਚਤ੍ਤਾਲੀਸ ਅਨਾਗਾਮਿਨੋ, ਦ੍ਵਾਦਸ ਚ ਅਰਹਨ੍ਤੋ ਕਥੇਤਬ੍ਬਾ. ਇਮਸ੍ਮਿਂ ਹਿ ਸਾਸਨੇ ਸਦ੍ਧਾਧੁਰਂ ਪਞ੍ਞਾਧੁਰਨ੍ਤਿ ਦ੍ਵੇ ਧੁਰਾਨਿ, ਦੁਕ੍ਖਪਟਿਪਦਾਦਨ੍ਧਾਭਿਞ੍ਞਾਦਯੋ ਚਤਸ੍ਸੋ ਪਟਿਪਦਾ. ਤਤ੍ਥੇਕੋ ਸਦ੍ਧਾਧੁਰੇਨ ਅਭਿਨਿਵਿਸਿਤ੍ਵਾ ਸੋਤਾਪਤ੍ਤਿਫਲਂ ਪਤ੍ਵਾ ਏਕਮੇਵ ਭਵਂ ਨਿਬ੍ਬਤ੍ਤਿਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤਿ, ਅਯਮੇਕੋ ਏਕਬੀਜੀ. ਸੋ ਪਟਿਪਦਾਵਸੇਨ ਚਤੁਬ੍ਬਿਧੋ ਹੋਤਿ. ਯਥਾ ਚੇਸ, ਏਵਂ ਪਞ੍ਞਾਧੁਰੇਨ ਅਭਿਨਿਵਿਟ੍ਠੋਪੀਤਿ ਅਟ੍ਠ ਏਕਬੀਜਿਨੋ. ਤਥਾ ਕੋਲਂਕੋਲਾ ਸਤ੍ਤਕ੍ਖਤ੍ਤੁਪਰਮਾ ਚਾਤਿ ਇਮੇ ਚਤੁਵੀਸਤਿ ਸੋਤਾਪਨ੍ਨਾ ਨਾਮ. ਤੀਸੁ ਪਨ ਵਿਮੋਕ੍ਖੇਸੁ ਸੁਞ੍ਞਤਵਿਮੋਕ੍ਖੇਨ ਸਕਦਾਗਾਮਿਭੂਮਿਂ ਪਤ੍ਤਾ ਚਤੁਨ੍ਨਂ ਪਟਿਪਦਾਨਂ ਵਸੇਨ ਚਤ੍ਤਾਰੋ ਸਕਦਾਗਾਮਿਨੋ, ਤਥਾ ਅਨਿਮਿਤ੍ਤਵਿਮੋਕ੍ਖੇਨ ਪਤ੍ਤਾ ਚਤ੍ਤਾਰੋ, ਅਪ੍ਪਣਿਹਿਤਵਿਮੋਕ੍ਖੇਨ ਪਤ੍ਤਾ ਚਤ੍ਤਾਰੋਤਿ ਇਮੇ ਦ੍ਵਾਦਸ ਸਕਦਾਗਾਮਿਨੋ. ਅਵਿਹੇਸੁ ਪਨ ਤਯੋ ਅਨ੍ਤਰਾਪਰਿਨਿਬ੍ਬਾਯਿਨੋ, ਏਕੋ ਉਪਹਚ੍ਚਪਰਿਨਿਬ੍ਬਾਯੀ, ਏਕੋ ਉਦ੍ਧਂਸੋਤੋ ਅਕਨਿਟ੍ਠਗਾਮੀਤਿ ਪਞ੍ਚ ਅਨਾਗਾਮਿਨੋ, ਤੇ ਅਸਙ੍ਖਾਰਪਰਿਨਿਬ੍ਬਾਯਿਨੋ ਪਞ੍ਚ, ਸਸਙ੍ਖਾਰਪਰਿਨਿਬ੍ਬਾਯਿਨੋ ਪਞ੍ਚਾਤਿ ਦਸ ਹੋਨ੍ਤਿ, ਤਥਾ ਅਤਪ੍ਪਾਦੀਸੁ. ਅਕਨਿਟ੍ਠੇਸੁ ਪਨ ਉਦ੍ਧਂਸੋਤੋ ਨਤ੍ਥਿ, ਤਸ੍ਮਾ ਤਤ੍ਥ ਚਤ੍ਤਾਰੋ ਸਸਙ੍ਖਾਰਪਰਿਨਿਬ੍ਬਾਯੀ, ਚਤ੍ਤਾਰੋ ਅਸਙ੍ਖਾਰਪਰਿਨਿਬ੍ਬਾਯੀਤਿ ਅਟ੍ਠ, ਇਮੇ ਅਟ੍ਠਚਤ੍ਤਾਲੀਸ ਅਨਾਗਾਮਿਨੋ. ਯਥਾ ਪਨ ਸਕਦਾਗਾਮਿਨੋ, ਤਥੇਵ ਅਰਹਨ੍ਤੋਪਿ ਦ੍ਵਾਦਸ ਵੇਦਿਤਬ੍ਬਾ. ਇਧਾਪਿ ਤਿਸ੍ਸੋ ਸਿਕ੍ਖਾ ਮਿਸ੍ਸਿਕਾਵ ਕਥਿਤਾ.
੮. ਤਤਿਯਸਿਕ੍ਖਾਸੁਤ੍ਤਵਣ੍ਣਨਾ
੮੯. ਅਟ੍ਠਮੇ ਤਂ ਵਾ ਪਨ ਅਨਭਿਸਮ੍ਭਵਂ ਅਪ੍ਪਟਿਵਿਜ੍ਝਨ੍ਤਿ ਤਂ ਅਰਹਤ੍ਤਂ ਅਪਾਪੁਣਨ੍ਤੋ ਅਪ੍ਪਟਿਵਿਜ੍ਝਨ੍ਤੋ. ਇਮਿਨਾ ਨਯੇਨ ਸਬ੍ਬਟ੍ਠਾਨੇਸੁ ਅਤ੍ਥੋ ਵੇਦਿਤਬ੍ਬੋ. ਇਧਾਪਿ ਤਿਸ੍ਸੋ ਸਿਕ੍ਖਾ ਮਿਸ੍ਸਿਕਾਵ ਕਥਿਤਾ. ਨਵਮਂ ਉਤ੍ਤਾਨਤ੍ਥਮੇਵ. ਇਧਾਪਿ ਤਿਸ੍ਸੋ ਸਿਕ੍ਖਾ ਮਿਸ੍ਸਿਕਾਵ ਕਥਿਤਾ.
੧੦. ਦੁਤਿਯਸਿਕ੍ਖਤ੍ਤਯਸੁਤ੍ਤਵਣ੍ਣਨਾ
੯੧. ਦਸਮੇ ਆਸਵਾਨਂ ਖਯਾਤਿ ਏਤ੍ਥ ਅਰਹਤ੍ਤਮਗ੍ਗੋ ਅਧਿਪਞ੍ਞਾਸਿਕ੍ਖਾ ਨਾਮ. ਫਲਂ ਪਨ ਸਿਕ੍ਖਿਤਸਿਕ੍ਖਸ੍ਸ ਉਪ੍ਪਜ੍ਜਨਤੋ ਸਿਕ੍ਖਾਤਿ ਨ ਵਤ੍ਤਬ੍ਬਂ.
ਯਥਾ ਪੁਰੇ ਤਥਾ ਪਚ੍ਛਾਤਿ ਯਥਾ ਪਠਮਂ ਤੀਸੁ ਸਿਕ੍ਖਾਸੁ ਸਿਕ੍ਖਤਿ, ਪਚ੍ਛਾ ਤਥੇਵ ਸਿਕ੍ਖਤੀਤਿ ਅਤ੍ਥੋ. ਦੁਤਿਯਪਦੇਪਿ ਏਸੇਵ ਨਯੋ. ਯਥਾ ਅਧੋ ਤਥਾ ਉਦ੍ਧਨ੍ਤਿ ਯਥਾ ਹੇਟ੍ਠਿਮਕਾਯਂ ਅਸੁਭਵਸੇਨ ਪਸ੍ਸਤਿ, ਉਪਰਿਮਕਾਯਮ੍ਪਿ ਤਥੇਵ ਫਰਤਿ. ਦੁਤਿਯਪਦੇਪਿ ਏਸੇਵ ਨਯੋ. ਯਥਾ ਦਿਵਾ ਤਥਾ ਰਤ੍ਤਿਨ੍ਤਿ ਯਥਾ ਦਿਵਾ ਤਿਸ੍ਸੋ ਸਿਕ੍ਖਾ ਸਿਕ੍ਖਤਿ, ਰਤ੍ਤਿਮ੍ਪਿ ਤਥੇਵ ਸਿਕ੍ਖਤੀਤਿ ਅਤ੍ਥੋ. ਅਭਿਭੁਯ੍ਯ ਦਿਸਾ ਸਬ੍ਬਾਤਿ ਸਬ੍ਬਾ ਦਿਸਾ ਆਰਮ੍ਮਣਵਸੇਨ ਅਭਿਭਵਿਤ੍ਵਾ. ਅਪ੍ਪਮਾਣਸਮਾਧਿਨਾਤਿ ਅਰਹਤ੍ਤਮਗ੍ਗਸਮਾਧਿਨਾ.
ਸੇਕ੍ਖਨ੍ਤਿ ਸਿਕ੍ਖਮਾਨਂ ਸਕਰਣੀਯਂ. ਪਟਿਪਦਨ੍ਤਿ ਪਟਿਪਨ੍ਨਕਂ. ਸਂਸੁਦ੍ਧਚਾਰਿਯਨ੍ਤਿ ਸਂਸੁਦ੍ਧਚਰਣਂ ਪਰਿਸੁਦ੍ਧਸੀਲਂ. ਸਮ੍ਬੁਦ੍ਧਨ੍ਤਿ ਚਤੁਸਚ੍ਚਬੁਦ੍ਧਂ. ਧੀਰਂ ਪਟਿਪਦਨ੍ਤਗੁਨ੍ਤਿ ਖਨ੍ਧਧੀਰਆਯਤਨਧੀਰਵਸੇਨ ਧੀਰਂ ਧਿਤਿਸਮ੍ਪਨ੍ਨਂ ਪਟਿਪਤ੍ਤਿਯਾ ਅਨ੍ਤਂ ਗਤਂ. ਵਿਞ੍ਞਾਣਸ੍ਸਾਤਿ ਚਰਿਮਕਵਿਞ੍ਞਾਣਸ੍ਸ. ਤਣ੍ਹਾਕ੍ਖਯਵਿਮੁਤ੍ਤਿਨੋਤਿ ਤਣ੍ਹਾਕ੍ਖਯਵਿਮੁਤ੍ਤਿਸਙ੍ਖਾਤਾਯ ਅਰਹਤ੍ਤਫਲਵਿਮੁਤ੍ਤਿਯਾ ਸਮਨ੍ਨਾਗਤਸ੍ਸ. ਪਜ੍ਜੋਤਸ੍ਸੇਵ ਨਿਬ੍ਬਾਨਨ੍ਤਿ ਪਦੀਪਨਿਬ੍ਬਾਨਂ ਵਿਯ. ਵਿਮੋਕ੍ਖੋ ਹੋਤਿ ਚੇਤਸੋਤਿ ਚਿਤ੍ਤਸ੍ਸ ਵਿਮੁਤ੍ਤਿ ਵਿਮੁਚ੍ਚਨਾ ਅਪ੍ਪਵਤ੍ਤਿਭਾਵੋ ਹੋਤਿ. ਤਣ੍ਹਾਕ੍ਖਯਵਿਮੁਤ੍ਤਿਨੋ ਹਿ ਖੀਣਾਸਵਸ੍ਸ ਚਰਿਮਕਵਿਞ੍ਞਾਣਨਿਰੋਧੇਨ ਪਰਿਨਿਬ੍ਬਾਨਂ ਵਿਯ ਚੇਤਸੋ ਵਿਮੋਕ੍ਖੋ ਹੋਤਿ, ਨ ਗਤਟ੍ਠਾਨਂ ਪਞ੍ਞਾਯਤਿ, ਅਪਣ੍ਣਤ੍ਤਿਕਭਾਵੂਪਗਮੋਯੇਵ ਹੋਤੀਤਿ ਅਤ੍ਥੋ.
੧੧. ਸਙ੍ਕਵਾਸੁਤ੍ਤਵਣ੍ਣਨਾ
੯੨. ਏਕਾਦਸਮੇ ਸਙ੍ਕਵਾ ਨਾਮ ਕੋਸਲਾਨਂ ਨਿਗਮੋਤਿ ਸਙ੍ਕਵਾਤਿ ਏਵਂਨਾਮਕੋ ਕੋਸਲਰਟ੍ਠੇ ਨਿਗਮੋ. ਆਵਾਸਿਕੋਤਿ ਭਾਰਹਾਰੋ ਨਵੇ ਆਵਾਸੇ ਸਮੁਟ੍ਠਾਪੇਤਿ, ਪੁਰਾਣੇ ਪਟਿਜਗ੍ਗਤਿ. ਸਿਕ੍ਖਾਪਦਪਟਿਸਂਯੁਤ੍ਤਾਯਾਤਿ ਸਿਕ੍ਖਾਸਙ੍ਖਾਤੇਹਿ ਪਦੇਹਿ ਪਟਿਸਂਯੁਤ੍ਤਾਯ, ਤੀਹਿ ਸਿਕ੍ਖਾਹਿ ਸਮਨ੍ਨਾਗਤਾਯਾਤਿ ਅਤ੍ਥੋ. ਸਨ੍ਦਸ੍ਸੇਤੀਤਿ ਸਮ੍ਮੁਖੇ ਵਿਯ ਕਤ੍ਵਾ ਦਸ੍ਸੇਤਿ. ਸਮਾਦਪੇਤੀਤਿ ਗਣ੍ਹਾਪੇਤਿ. ਸਮੁਤ੍ਤੇਜੇਤੀਤਿ ਸਮੁਸ੍ਸਾਹੇਤਿ. ਸਮ੍ਪਹਂਸੇਤੀਤਿ ਪਟਿਲਦ੍ਧਗੁਣੇਹਿ ਵਣ੍ਣਂ ਕਥੇਨ੍ਤੋ ਵੋਦਾਪੇਤਿ. ਅਧਿਸਲ੍ਲਿਖਤੇਤਿ ਅਤਿਵਿਯ ਸਲ੍ਲਿਖਤਿ, ਅਤਿਵਿਯ ਸਲ੍ਲਿਖਿਤਂ ਕਤ੍ਵਾ ਸਣ੍ਹਂ ਸਣ੍ਹਂ ਕਥੇਤੀਤਿ ਅਤ੍ਥੋ.
ਅਚ੍ਚਯੋਤਿ ਅਪਰਾਧੋ. ਮਂ ਅਚ੍ਚਗਮਾਤਿ ਮਂ ਅਤਿਕ੍ਕਮ੍ਮ ਅਧਿਭਵਿਤ੍ਵਾ ਪਵਤ੍ਤੋ. ਅਹੁਦੇਵ ਅਕ੍ਖਨ੍ਤੀਤਿ ਅਹੋਸਿਯੇਵ ਅਨਧਿਵਾਸਨਾ. ਅਹੁ ਅਪ੍ਪਚ੍ਚਯੋਤਿ ਅਹੋਸਿ ਅਤੁਟ੍ਠਾਕਾਰੋ. ਪਟਿਗ੍ਗਣ੍ਹਾਤੂਤਿ ਖਮਤੁ. ਆਯਤਿਂ ਸਂਵਰਾਯਾਤਿ ਅਨਾਗਤੇ ਸਂਵਰਤ੍ਥਾਯ, ਪੁਨ ਏਵਰੂਪਸ੍ਸ ਅਪਰਾਧਸ੍ਸ ਦੋਸਸ੍ਸ ਖਲਿਤਸ੍ਸ ਵਾ ਅਕਰਣਤ੍ਥਾਯਾਤਿ ਅਤ੍ਥੋ. ਤਗ੍ਘਾਤਿ ਏਕਂਸੇਨ. ਯਥਾਧਮ੍ਮਂ ਪਟਿਕਰੋਸੀਤਿ ਯਥਾ ਧਮ੍ਮੋ ਠਿਤੋ, ਤਥਾ ਕਰੋਸਿ, ਖਮਾਪੇਸੀਤਿ ਵੁਤ੍ਤਂ ਹੋਤਿ. ਤਂ ਤੇ ਮਯਂ ਪਟਿਗ੍ਗਣ੍ਹਾਮਾਤਿ ਤਂ ਤਵ ਅਪਰਾਧਂ ਮਯਂ ਖਮਾਮ. ਵੁਦ੍ਧਿਹੇਸਾ, ਕਸ੍ਸਪ, ਅਰਿਯਸ੍ਸ ਵਿਨਯੇਤਿ ਏਸਾ ਕਸ੍ਸਪ ਬੁਦ੍ਧਸ੍ਸ ਭਗਵਤੋ ਸਾਸਨੇ ਵੁਦ੍ਧਿ ਨਾਮ. ਕਤਮਾ? ਯਾਯਂ ਅਚ੍ਚਯਂ ਅਚ੍ਚਯਤੋ ਦਿਸ੍ਵਾ ਯਥਾਧਮ੍ਮਂ ਪਟਿਕਰਿਤ੍ਵਾ ਆਯਤਿਂ ਸਂਵਰਾਪਜ੍ਜਨਾ. ਦੇਸਨਂ ਪਨ ਪੁਗ੍ਗਲਾਧਿਟ੍ਠਾਨਂ ਕਰੋਨ੍ਤੋ ‘‘ਯੋ ਅਚ੍ਚਯਂ ਅਚ੍ਚਯਤੋ ਦਿਸ੍ਵਾ ਯਥਾਧਮ੍ਮਂ ਪਟਿਕਰੋਤਿ, ਆਯਤਿਂ ਸਂਵਰਂ ਆਪਜ੍ਜਤੀ’’ਤਿ ਆਹ. ਨ ਸਿਕ੍ਖਾਕਾਮੋਤਿ ਤਿਸ੍ਸੋ ਸਿਕ੍ਖਾ ਨ ਕਾਮੇਤਿ ਨ ਪਤ੍ਥੇਤਿ ਨ ਪਿਹੇਤਿ. ਸਿਕ੍ਖਾਸਮਾਦਾਨਸ੍ਸਾਤਿ ਸਿਕ੍ਖਾਪਰਿਪੂਰਣਸ੍ਸ. ਨ ਵਣ੍ਣਵਾਦੀਤਿ ਗੁਣਂ ਨ ਕਥੇਤਿ. ਕਾਲੇਨਾਤਿ ਯੁਤ੍ਤਪ੍ਪਯੁਤ੍ਤਕਾਲੇਨ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.
ਸਮਣਵਗ੍ਗੋ ਚਤੁਤ੍ਥੋ.