੪. ਵਜ੍ਜਿਪੁਤ੍ਤਸੁਤ੍ਤਵਣ੍ਣਨਾ

੮੫. ਚਤੁਤ੍ਥੇ ਵਜ੍ਜਿਪੁਤ੍ਤਕੋਤਿ ਵਜ੍ਜਿਰਾਜਕੁਲਸ੍ਸ ਪੁਤ੍ਤੋ. ਦਿਯਡ੍ਢਸਿਕ੍ਖਾਪਦਸਤਨ੍ਤਿ ਪਣ੍ਣਾਸਾਧਿਕਂ ਸਿਕ੍ਖਾਪਦਸਤਂ. ਤਸ੍ਮਿਂ ਸਮਯੇ ਪਞ੍ਞਤ੍ਤਾਨਿ ਸਿਕ੍ਖਾਪਦਾਨੇਵ ਸਨ੍ਧਾਯੇਤਂ ਵੁਤ੍ਤਂ. ਸੋ ਕਿਰ ਭਿਕ੍ਖੁ ਅਜ੍ਜਵਸਮ੍ਪਨ੍ਨੋ ਉਜੁਜਾਤਿਕੋ ਅਵਙ੍ਕੋ ਅਕੁਟਿਲੋ, ਤਸ੍ਮਾ ‘‘ਅਹਂ ਏਤ੍ਤਕਾਨਿ ਸਿਕ੍ਖਾਪਦਾਨਿ ਰਕ੍ਖਿਤੁਂ ਸਕ੍ਕੁਣੇਯ੍ਯਂ ਵਾ ਨ ਵਾ’’ਤਿ ਚਿਨ੍ਤੇਤ੍ਵਾ ਸਤ੍ਥੁ ਆਰੋਚੇਸਿ. ਸਕ੍ਕੋਮਹਨ੍ਤਿ ਸਕ੍ਕੋਮਿ ਅਹਂ. ਸੋ ਕਿਰ ‘‘ਏਤ੍ਤਕੇਸੁ ਸਿਕ੍ਖਾਪਦੇਸੁ ਸਿਕ੍ਖਨ੍ਤਸ੍ਸ ਅਗਰੁ ਤੀਸੁ ਸਿਕ੍ਖਾਸੁ ਸਿਕ੍ਖਿਤੁ’’ਨ੍ਤਿ ਮਞ੍ਞਮਾਨੋ ਏਵਮਾਹ. ਅਥ ਭਗਵਾ ਯਥਾ ਨਾਮ ਪਞ੍ਞਾਸ ਤਿਣਕਲਾਪਿਯੋ ਉਕ੍ਖਿਪਿਤੁਂ ਅਸਕ੍ਕੋਨ੍ਤਸ੍ਸ ਕਲਾਪਿਯਸਤਂ ਬਨ੍ਧਿਤ੍ਵਾ ਸੀਸੇ ਠਪੇਯ੍ਯ, ਏਵਮੇਵ ਏਕਿਸ੍ਸਾਪਿ ਸਿਕ੍ਖਾਯ ਸਿਕ੍ਖਿਤੁਂ ਅਸਕ੍ਕੋਨ੍ਤਸ੍ਸ ਅਪਰਾ ਦ੍ਵੇਪਿ ਸਿਕ੍ਖਾ ਉਪਰਿ ਪਕ੍ਖਿਪਨ੍ਤੋ ਤਸ੍ਮਾਤਿਹ ਤ੍ਵਂ ਭਿਕ੍ਖੂਤਿਆਦਿਮਾਹ. ਸੁਖੁਮਾਲੋ ਕਿਰ ਉਤ੍ਤਰੋ ਨਾਮ ਜਾਨਪਦਮਨੁਸ੍ਸੋ ਲੋਹਪਾਸਾਦਵਿਹਾਰੇ ਵਸਤਿ. ਅਥ ਨਂ ਦਹਰਭਿਕ੍ਖੂ ਆਹਂਸੁ – ‘‘ਉਤ੍ਤਰ, ਅਗ੍ਗਿਸਾਲਾ ਓਵਸ੍ਸਤਿ, ਤਿਣਂ ਕਪ੍ਪਿਯਂ ਕਤ੍ਵਾ ਦੇਹੀ’’ਤਿ. ਤਂ ਆਦਾਯ ਅਟਵਿਂ ਗਨ੍ਤ੍ਵਾ ਤੇਨ ਲਾਯਿਤਂ ਤਿਣਂਯੇਵ ਕਰਲ਼ੇ ਬਨ੍ਧਿਤ੍ਵਾ ‘‘ਪਞ੍ਞਾਸ ਕਰਲ਼ੇ ਗਹੇਤੁਂ ਸਕ੍ਖਿਸ੍ਸਸਿ ਉਤ੍ਤਰਾ’’ਤਿ ਆਹਂਸੁ. ਸੋ ‘‘ਨ ਸਕ੍ਖਿਸ੍ਸਾਮੀ’’ਤਿ ਆਹ. ਅਸੀਤਿਂ ਪਨ ਸਕ੍ਖਿਸ੍ਸਸੀਤਿ? ਨ ਸਕ੍ਖਿਸ੍ਸਾਮਿ, ਭਨ੍ਤੇਤਿ. ਏਕਂ ਕਰਲ਼ਸਤਂ ਸਕ੍ਖਿਸ੍ਸਸੀਤਿ? ਆਮ, ਭਨ੍ਤੇ, ਗਣ੍ਹਿਸ੍ਸਾਮੀਤਿ. ਦਹਰਭਿਕ੍ਖੂ ਕਰਲ਼ਸਤਂ ਬਨ੍ਧਿਤ੍ਵਾ ਤਸ੍ਸ ਸੀਸੇ ਠਪਯਿਂਸੁ. ਸੋ ਉਕ੍ਖਿਪਿਤ੍ਵਾ ਨਿਤ੍ਥੁਨਨ੍ਤੋ ਗਨ੍ਤ੍ਵਾ ਅਗ੍ਗਿਸਾਲਾਯ ਸਮੀਪੇ ਪਾਤੇਸਿ. ਅਥ ਨਂ ਭਿਕ੍ਖੂ ‘‘ਕਿਲਨ੍ਤਰੂਪੋਸਿ ਉਤ੍ਤਰਾ’’ਤਿ ਆਹਂਸੁ. ਆਮ, ਭਨ੍ਤੇ, ਦਹਰਾ ਭਿਕ੍ਖੂ ਮਂ ਵਞ੍ਚੇਸੁਂ, ਇਮਂ ਏਕਮ੍ਪਿ ਕਰਲ਼ਸਤਂ ਉਕ੍ਖਿਪਿਤੁਂ ਅਸਕ੍ਕੋਨ੍ਤਂ ਮਂ ‘‘ਪਣ੍ਣਾਸ ਕਰਲ਼ੇ ਉਕ੍ਖਿਪਾਹੀ’’ਤਿ ਵਦਿਂਸੁ. ਆਮ, ਉਤ੍ਤਰ, ਵਞ੍ਚਯਿਂਸੁ ਤਨ੍ਤਿ. ਏਵਂ ਸਮ੍ਪਦਮਿਦਂ ਵੇਦਿਤਬ੍ਬਂ. ਇਧਾਪਿ ਤਿਸ੍ਸੋ ਸਿਕ੍ਖਾ ਮਿਸ੍ਸਿਕਾਵ ਕਥਿਤਾ.