੧. ਸਮਣਸੁਤ੍ਤਵਣ੍ਣਨਾ

੮੨. ਚਤੁਤ੍ਥਸ੍ਸ ਪਠਮੇ ਸਮਣਿਯਾਨੀਤਿ ਸਮਣਸਨ੍ਤਕਾਨਿ. ਸਮਣਕਰਣੀਯਾਨੀਤਿ ਸਮਣੇਨ ਕਤ੍ਤਬ੍ਬਕਿਚ੍ਚਾਨਿ. ਅਧਿਸੀਲਸਿਕ੍ਖਾਸਮਾਦਾਨਨ੍ਤਿਆਦੀਸੁ ਸਮਾਦਾਨਂ ਵੁਚ੍ਚਤਿ ਗਹਣਂ, ਅਧਿਸੀਲਸਿਕ੍ਖਾਯ ਸਮਾਦਾਨਂ ਗਹਣਂ ਪੂਰਣਂ ਅਧਿਸੀਲਸਿਕ੍ਖਾਸਮਾਦਾਨਂ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਏਤ੍ਥ ਚ ਸੀਲਂ ਅਧਿਸੀਲਂ, ਚਿਤ੍ਤਂ ਅਧਿਚਿਤ੍ਤਂ, ਪਞ੍ਞਾ ਅਧਿਪਞ੍ਞਾਤਿ ਅਯਂ ਵਿਭਾਗੋ ਵੇਦਿਤਬ੍ਬੋ. ਤਤ੍ਥ ਪਞ੍ਚਸੀਲਂ ਸੀਲਂ ਨਾਮ, ਤਂ ਉਪਾਦਾਯ ਦਸਸੀਲਂ ਅਧਿਸੀਲਂ ਨਾਮ, ਤਮ੍ਪਿ ਉਪਾਦਾਯ ਚਤੁਪਾਰਿਸੁਦ੍ਧਿਸੀਲਂ ਅਧਿਸੀਲਂ ਨਾਮ. ਅਪਿਚ ਸਬ੍ਬਮ੍ਪਿ ਲੋਕਿਯਸੀਲਂ ਸੀਲਂ ਨਾਮ, ਲੋਕੁਤ੍ਤਰਸੀਲਂ ਅਧਿਸੀਲਂ, ਤਦੇਵ ਸਿਕ੍ਖਿਤਬ੍ਬਤੋ ਸਿਕ੍ਖਾਤਿ ਵੁਚ੍ਚਤਿ. ਕਾਮਾਵਚਰਚਿਤ੍ਤਂ ਪਨ ਚਿਤ੍ਤਂ ਨਾਮ, ਤਂ ਉਪਾਦਾਯ ਰੂਪਾਵਚਰਂ ਅਧਿਚਿਤ੍ਤਂ ਨਾਮ, ਤਮ੍ਪਿ ਉਪਾਦਾਯ ਅਰੂਪਾਵਚਰਂ ਅਧਿਚਿਤ੍ਤਂ ਨਾਮ. ਅਪਿਚ ਸਬ੍ਬਮ੍ਪਿ ਲੋਕਿਯਚਿਤ੍ਤਂ ਚਿਤ੍ਤਮੇਵ, ਲੋਕੁਤ੍ਤਰਂ ਅਧਿਚਿਤ੍ਤਂ. ਪਞ੍ਞਾਯਪਿ ਏਸੇਵ ਨਯੋ. ਤਸ੍ਮਾਤਿ ਯਸ੍ਮਾ ਇਮਾਨਿ ਤੀਣਿ ਸਮਣਕਰਣੀਯਾਨਿ, ਤਸ੍ਮਾ. ਤਿਬ੍ਬੋਤਿ ਬਹਲੋ. ਛਨ੍ਦੋਤਿ ਕਤ੍ਤੁਕਮ੍ਯਤਾਕੁਸਲਚ੍ਛਨ੍ਦੋ. ਇਤਿ ਇਮਸ੍ਮਿਂ ਸੁਤ੍ਤਨ੍ਤੇ ਤਿਸ੍ਸੋ ਸਿਕ੍ਖਾ ਲੋਕਿਯਲੋਕੁਤ੍ਤਰਾ ਕਥਿਤਾਤਿ.