੩. ਮਹਾਨਾਮਸਕ੍ਕਸੁਤ੍ਤਵਣ੍ਣਨਾ

੭੪. ਤਤਿਯੇ ਗਿਲਾਨਾ ਵੁਟ੍ਠਿਤੋਤਿ ਗਿਲਾਨੋ ਹੁਤ੍ਵਾ ਵੁਟ੍ਠਿਤੋ. ਗੇਲਞ੍ਞਾਤਿ ਗਿਲਾਨਭਾਵਤੋ. ਉਪਸਙ੍ਕਮੀਤਿ ਭੁਤ੍ਤਪਾਤਰਾਸੋ ਮਾਲਾਗਨ੍ਧਾਦੀਨਿ ਆਦਾਯ ਮਹਾਪਰਿਵਾਰਪਰਿਵੁਤੋ ਉਪਸਙ੍ਕਮਿ. ਬਾਹਾਯਂ ਗਹੇਤ੍ਵਾਤਿ ਨ ਬਾਹਾਯਂ ਗਹੇਤ੍ਵਾ ਆਕਡ੍ਢਿ, ਨਿਸਿਨ੍ਨਾਸਨਤੋ ਵੁਟ੍ਠਾਯ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਦਕ੍ਖਿਣਬਾਹਾਯਂ ਅਙ੍ਗੁਟ੍ਠਕੇਨ ਸਞ੍ਞਂ ਦਤ੍ਵਾ ਏਕਮਨ੍ਤਂ ਅਪਨੇਸੀਤਿ ਵੇਦਿਤਬ੍ਬੋ. ਅਥਸ੍ਸ ‘‘ਸੇਖਮ੍ਪਿ ਖੋ, ਮਹਾਨਾਮ, ਸੀਲ’’ਨ੍ਤਿਆਦਿਨਾ ਨਯੇਨ ਸਤ੍ਤਨ੍ਨਂ ਸੇਖਾਨਂ ਸੀਲਞ੍ਚ ਸਮਾਧਿਞ੍ਚ ਪਞ੍ਞਞ੍ਚ ਕਥੇਤ੍ਵਾ ਉਪਰਿ ਅਰਹਤ੍ਤਫਲਵਸੇਨ ਅਸੇਖਾ ਸੀਲਸਮਾਧਿਪਞ੍ਞਾਯੋ ਕਥੇਨ੍ਤੋ – ‘‘ਸੇਖਸਮਾਧਿਤੋ ਸੇਖਂ ਵਿਪਸ੍ਸਨਾਞਾਣਂ ਅਸੇਖਞ੍ਚ ਫਲਞਾਣਂ ਪਚ੍ਛਾ, ਸੇਖਵਿਪਸ੍ਸਨਾਞਾਣਤੋ ਚ ਅਸੇਖਫਲਸਮਾਧਿ ਪਚ੍ਛਾ ਉਪ੍ਪਜ੍ਜਤੀ’’ਤਿ ਦੀਪੇਸਿ. ਯਾਨਿ ਪਨ ਸਮ੍ਪਯੁਤ੍ਤਾਨਿ ਸਮਾਧਿਞਾਣਾਨਿ, ਤੇਸਂ ਅਪਚ੍ਛਾ ਅਪੁਰੇ ਉਪ੍ਪਤ੍ਤਿ ਵੇਦਿਤਬ੍ਬਾਤਿ.