(੮) ੩. ਆਨਨ੍ਦਵਗ੍ਗੋ
੧. ਛਨ੍ਨਸੁਤ੍ਤਵਣ੍ਣਨਾ
੭੨. ਤਤਿਯਸ੍ਸ ਪਠਮੇ ਛਨ੍ਨੋਤਿ ਏਵਂਨਾਮਕੋ ਛਨ੍ਨਪਰਿਬ੍ਬਾਜਕੋ. ਤੁਮ੍ਹੇਪਿ, ਆਵੁਸੋਤਿ, ਆਵੁਸੋ, ਯਥਾ ਮਯਂ ਰਾਗਾਦੀਨਂ ਪਹਾਨਂ ਪਞ੍ਞਾਪੇਮ, ਕਿਂ ਏਵਂ ਤੁਮ੍ਹੇਪਿ ਪਞ੍ਞਾਪੇਥਾਤਿ ਪੁਚ੍ਛਤਿ. ਤਤੋ ਥੇਰੋ ‘‘ਅਯਂ ਪਰਿਬ੍ਬਾਜਕੋ ਅਮ੍ਹੇ ਰਾਗਾਦੀਨਂ ਪਹਾਨਂ ਪਞ੍ਞਾਪੇਮਾਤਿ ਵਦਤਿ, ਨਤ੍ਥਿ ਪਨੇਤਂ ਬਾਹਿਰਸਮਯੇ’’ਤਿ ਤਂ ਪਟਿਕ੍ਖਿਪਨ੍ਤੋ ਮਯਂ ਖੋ, ਆਵੁਸੋਤਿਆਦਿਮਾਹ. ਤਤ੍ਥ ਖੋਤਿ ਅਵਧਾਰਣਤ੍ਥੇ ਨਿਪਾਤੋ, ਮਯਮੇਵ ਪਞ੍ਞਾਪੇਮਾਤਿ ਅਤ੍ਥੋ. ਤਤੋ ਪਰਿਬ੍ਬਾਜਕੋ ਚਿਨ੍ਤੇਸਿ ‘‘ਅਯਂ ਥੇਰੋ ਬਾਹਿਰਸਮਯਂ ਲੁਞ੍ਚਿਤ੍ਵਾ ਹਰਨ੍ਤੋ ‘ਮਯਮੇਵਾ’ਤਿ ਆਹ. ਕਿਂ ਨੁ ਖੋ ਆਦੀਨਵਂ ਦਿਸ੍ਵਾ ਏਤੇ ਏਤੇਸਂ ਪਹਾਨਂ ਪਞ੍ਞਾਪੇਨ੍ਤੀ’’ਤਿ. ਅਥ ਥੇਰਂ ਪੁਚ੍ਛਨ੍ਤੋ ਕਿਂ ਪਨ ਤੁਮ੍ਹੇਤਿਆਦਿਮਾਹ. ਥੇਰੋ ਤਸ੍ਸ ਬ੍ਯਾਕਰੋਨ੍ਤੋ ਰਤ੍ਤੋ ਖੋਤਿਆਦਿਮਾਹ. ਤਤ੍ਥ ਅਤ੍ਤਤ੍ਥਨ੍ਤਿ ਦਿਟ੍ਠਧਮ੍ਮਿਕਸਮ੍ਪਰਾਯਿਕਂ ਲੋਕਿਯਲੋਕੁਤ੍ਤਰਂ ਅਤ੍ਤਨੋ ਅਤ੍ਥਂ. ਪਰਤ੍ਥਉਭਯਤ੍ਥੇਸੁਪਿ ਏਸੇਵ ਨਯੋ.
ਅਨ੍ਧਕਰਣੋਤਿਆਦੀਸੁ ਯਸ੍ਸ ਰਾਗੋ ਉਪ੍ਪਜ੍ਜਤਿ, ਤਂ ਯਥਾਭੂਤਦਸ੍ਸਨਨਿਵਾਰਣੇਨ ਅਨ੍ਧਂ ਕਰੋਤੀਤਿ ਅਨ੍ਧਕਰਣੋ. ਪਞ੍ਞਾਚਕ੍ਖੁਂ ਨ ਕਰੋਤੀਤਿ ਅਚਕ੍ਖੁਕਰਣੋ. ਞਾਣਂ ਨ ਕਰੋਤੀਤਿ ਅਞ੍ਞਾਣਕਰਣੋ. ਕਮ੍ਮਸ੍ਸਕਤਪਞ੍ਞਾ ਝਾਨਪਞ੍ਞਾ ਵਿਪਸ੍ਸਨਾਪਞ੍ਞਾਤਿ ਇਮਾ ਤਿਸ੍ਸੋ ਪਞ੍ਞਾ ਅਪ੍ਪਵਤ੍ਤਿਕਰਣੇਨ ਨਿਰੋਧੇਤੀਤਿ ਪਞ੍ਞਾਨਿਰੋਧਿਕੋ. ਅਨਿਟ੍ਠਫਲਦਾਯਕਤ੍ਤਾ ਦੁਕ੍ਖਸਙ੍ਖਾਤਸ੍ਸ ਵਿਘਾਤਸ੍ਸੇਵ ਪਕ੍ਖੇ ਵਤ੍ਤਤੀਤਿ ਵਿਘਾਤਪਕ੍ਖਿਕੋ. ਕਿਲੇਸਨਿਬ੍ਬਾਨਂ ਨ ਸਂਵਤ੍ਤੇਤੀਤਿ ਅਨਿਬ੍ਬਾਨਸਂਵਤ੍ਤਨਿਕੋ. ਅਲਞ੍ਚ ਪਨਾਵੁਸੋ ਆਨਨ੍ਦ, ਅਪ੍ਪਮਾਦਾਯਾਤਿ, ਆਵੁਸੋ ਆਨਨ੍ਦ, ਸਚੇ ਏਵਰੂਪਾ ਪਟਿਪਦਾ ਅਤ੍ਥਿ, ਅਲਂ ਤੁਮ੍ਹਾਕਂ ਅਪ੍ਪਮਾਦਾਯ ਯੁਤ੍ਤਂ ਅਨੁਚ੍ਛਵਿਕਂ, ਅਪ੍ਪਮਾਦਂ ਕਰੋਥ, ਆਵੁਸੋਤਿ ਥੇਰਸ੍ਸ ਵਚਨਂ ਅਨੁਮੋਦਿਤ੍ਵਾ ਪਕ੍ਕਾਮਿ. ਇਮਸ੍ਮਿਂ ਸੁਤ੍ਤੇ ਅਰਿਯਮਗ੍ਗੋ ਲੋਕੁਤ੍ਤਰਮਿਸ੍ਸਕੋ ਕਥਿਤੋ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.
੨. ਆਜੀਵਕਸੁਤ੍ਤਵਣ੍ਣਨਾ
੭੩. ਦੁਤਿਯੇ ਤੇਨ ਹਿ ਗਹਪਤੀਤਿ ਥੇਰੋ ਕਿਰ ਚਿਨ੍ਤੇਸਿ – ‘‘ਅਯਂ ਇਧ ਆਗਚ੍ਛਨ੍ਤੋ ਨ ਅਞ੍ਞਾਤੁਕਾਮੋ ਹੁਤ੍ਵਾ ਆਗਮਿ, ਪਰਿਗ੍ਗਣ੍ਹਨਤ੍ਥਂ ਪਨ ਆਗਤੋ. ਇਮਿਨਾ ਪੁਚ੍ਛਿਤਪਞ੍ਹਂ ਇਮਿਨਾਵ ਕਥਾਪੇਸ੍ਸਾਮੀ’’ਤਿ. ਇਤਿ ਤਂਯੇਵ ਕਥਂ ਕਥਾਪੇਤੁਕਾਮੋ ਤੇਨ ਹੀਤਿਆਦਿਮਾਹ. ਤਤ੍ਥ ਤੇਨ ਹੀਤਿ ਕਾਰਣਾਪਦੇਸੋ. ਯਸ੍ਮਾ ਤ੍ਵਂ ਏਵਂ ਪੁਚ੍ਛਸਿ, ਤਸ੍ਮਾ ਤਞ੍ਞੇਵੇਤ੍ਥ ਪਟਿਪੁਚ੍ਛਾਮੀਤਿ. ਕੇਸਂ ਨੋਤਿ ਕਤਮੇਸਂ ਨੁ. ਸਧਮ੍ਮੁਕ੍ਕਂਸਨਾਤਿ ਅਤ੍ਤਨੋ ਲਦ੍ਧਿਯਾ ਉਕ੍ਖਿਪਿਤ੍ਵਾ ਠਪਨਾ. ਪਰਧਮ੍ਮਾਪਸਾਦਨਾਤਿ ਪਰੇਸਂ ਲਦ੍ਧਿਯਾ ਘਟ੍ਟਨਾ ਵਮ੍ਭਨਾ ਅਵਕ੍ਖਿਪਨਾ. ਆਯਤਨੇਵ ਧਮ੍ਮਦੇਸਨਾਤਿ ਕਾਰਣਸ੍ਮਿਂਯੇਵ ਧਮ੍ਮਦੇਸਨਾ. ਅਤ੍ਥੋ ਚ ਵੁਤ੍ਤੋਤਿ ਮਯਾ ਪੁਚ੍ਛਿਤਪਞ੍ਹਾਯ ਅਤ੍ਥੋ ਚ ਪਕਾਸਿਤੋ. ਅਤ੍ਤਾ ਚ ਅਨੁਪਨੀਤੋਤਿ ਅਮ੍ਹੇ ਏਵਰੂਪਾਤਿ ਏਵਂ ਅਤ੍ਤਾ ਚ ਨ ਉਪਨੀਤੋ. ਨੁਪਨੀਤੋਤਿਪਿ ਪਾਠੋ.
੩. ਮਹਾਨਾਮਸਕ੍ਕਸੁਤ੍ਤਵਣ੍ਣਨਾ
੭੪. ਤਤਿਯੇ ਗਿਲਾਨਾ ਵੁਟ੍ਠਿਤੋਤਿ ਗਿਲਾਨੋ ਹੁਤ੍ਵਾ ਵੁਟ੍ਠਿਤੋ. ਗੇਲਞ੍ਞਾਤਿ ਗਿਲਾਨਭਾਵਤੋ. ਉਪਸਙ੍ਕਮੀਤਿ ਭੁਤ੍ਤਪਾਤਰਾਸੋ ਮਾਲਾਗਨ੍ਧਾਦੀਨਿ ਆਦਾਯ ਮਹਾਪਰਿਵਾਰਪਰਿਵੁਤੋ ਉਪਸਙ੍ਕਮਿ. ਬਾਹਾਯਂ ਗਹੇਤ੍ਵਾਤਿ ਨ ਬਾਹਾਯਂ ਗਹੇਤ੍ਵਾ ਆਕਡ੍ਢਿ, ਨਿਸਿਨ੍ਨਾਸਨਤੋ ਵੁਟ੍ਠਾਯ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਦਕ੍ਖਿਣਬਾਹਾਯਂ ਅਙ੍ਗੁਟ੍ਠਕੇਨ ਸਞ੍ਞਂ ਦਤ੍ਵਾ ਏਕਮਨ੍ਤਂ ਅਪਨੇਸੀਤਿ ਵੇਦਿਤਬ੍ਬੋ. ਅਥਸ੍ਸ ‘‘ਸੇਖਮ੍ਪਿ ਖੋ, ਮਹਾਨਾਮ, ਸੀਲ’’ਨ੍ਤਿਆਦਿਨਾ ਨਯੇਨ ਸਤ੍ਤਨ੍ਨਂ ਸੇਖਾਨਂ ਸੀਲਞ੍ਚ ਸਮਾਧਿਞ੍ਚ ਪਞ੍ਞਞ੍ਚ ਕਥੇਤ੍ਵਾ ਉਪਰਿ ਅਰਹਤ੍ਤਫਲਵਸੇਨ ਅਸੇਖਾ ਸੀਲਸਮਾਧਿਪਞ੍ਞਾਯੋ ਕਥੇਨ੍ਤੋ – ‘‘ਸੇਖਸਮਾਧਿਤੋ ਸੇਖਂ ਵਿਪਸ੍ਸਨਾਞਾਣਂ ਅਸੇਖਞ੍ਚ ਫਲਞਾਣਂ ਪਚ੍ਛਾ, ਸੇਖਵਿਪਸ੍ਸਨਾਞਾਣਤੋ ਚ ਅਸੇਖਫਲਸਮਾਧਿ ਪਚ੍ਛਾ ਉਪ੍ਪਜ੍ਜਤੀ’’ਤਿ ਦੀਪੇਸਿ. ਯਾਨਿ ਪਨ ਸਮ੍ਪਯੁਤ੍ਤਾਨਿ ਸਮਾਧਿਞਾਣਾਨਿ, ਤੇਸਂ ਅਪਚ੍ਛਾ ਅਪੁਰੇ ਉਪ੍ਪਤ੍ਤਿ ਵੇਦਿਤਬ੍ਬਾਤਿ.
੪. ਨਿਗਣ੍ਠਸੁਤ੍ਤਵਣ੍ਣਨਾ
੭੫. ਚਤੁਤ੍ਥੇ ਕੂਟਾਗਾਰਸਾਲਾਯਨ੍ਤਿ ਦ੍ਵੇ ਕਣ੍ਣਿਕਾ ਗਹੇਤ੍ਵਾ ਹਂਸਵਟ੍ਟਕਚ੍ਛਨ੍ਨੇਨ ਕਤਾਯ ਗਨ੍ਧਕੁਟਿਯਾ. ਅਪਰਿਸੇਸਂ ਞਾਣਦਸ੍ਸਨਂ ਪਟਿਜਾਨਾਤੀਤਿ ਅਪ੍ਪਮਤ੍ਤਕਮ੍ਪਿ ਅਸੇਸੇਤ੍ਵਾ ਸਬ੍ਬਂ ਞਾਣਦਸ੍ਸਨਂ ਪਟਿਜਾਨਾਤਿ. ਸਤਤਂ ਸਮਿਤਨ੍ਤਿ ਸਬ੍ਬਕਾਲਂ ਨਿਰਨ੍ਤਰਂ. ਞਾਣਦਸ੍ਸਨਂ ਪਚ੍ਚੁਪਟ੍ਠਿਤਨ੍ਤਿ ਸਬ੍ਬਞ੍ਞੁਤਞ੍ਞਾਣਂ ਮਯ੍ਹਂ ਉਪਟ੍ਠਿਤਮੇਵਾਤਿ ਦਸ੍ਸੇਤਿ. ਪੁਰਾਣਾਨਂ ਕਮ੍ਮਾਨਨ੍ਤਿ ਆਯੂਹਿਤਕਮ੍ਮਾਨਂ. ਤਪਸਾ ਬ੍ਯਨ੍ਤੀਭਾਵਨ੍ਤਿ ਦੁਕ੍ਕਰਤਪੇਨ ਵਿਗਤਨ੍ਤਕਰਣਂ. ਨਵਾਨਂ ਕਮ੍ਮਾਨਨ੍ਤਿ ਇਦਾਨਿ ਆਯੂਹਿਤਬ੍ਬਕਮ੍ਮਾਨਂ. ਅਕਰਣਾਤਿ ਅਨਾਯੂਹਨੇਨ. ਸੇਤੁਘਾਤਨ੍ਤਿ ਪਦਘਾਤਂ ਪਚ੍ਚਯਘਾਤਂ ਕਥੇਤਿ. ਕਮ੍ਮਕ੍ਖਯਾ ਦੁਕ੍ਖਕ੍ਖਯੋਤਿ ਕਮ੍ਮਵਟ੍ਟਕ੍ਖਯੇਨ ਦੁਕ੍ਖਕ੍ਖਯੋ. ਦੁਕ੍ਖਕ੍ਖਯਾ ਵੇਦਨਾਕ੍ਖਯੋਤਿ ਦੁਕ੍ਖਵਟ੍ਟਕ੍ਖਯੇਨ ਵੇਦਨਾਕ੍ਖਯੋ. ਦੁਕ੍ਖਵਟ੍ਟਸ੍ਮਿਞ੍ਹਿ ਖੀਣੇ ਵੇਦਨਾਵਟ੍ਟਮ੍ਪਿ ਖੀਣਮੇਵ ਹੋਤਿ. ਵੇਦਨਾਕ੍ਖਯਾ ਸਬ੍ਬਂ ਦੁਕ੍ਖਂ ਨਿਜ੍ਜਿਣ੍ਣਂ ਭਵਿਸ੍ਸਤੀਤਿ ਵੇਦਨਾਕ੍ਖਯੇਨ ਪਨ ਸਕਲਵਟ੍ਟਦੁਕ੍ਖਂ ਨਿਜ੍ਜਿਣ੍ਣਮੇਵ ਭਵਿਸ੍ਸਤਿ. ਸਨ੍ਦਿਟ੍ਠਿਕਾਯਾਤਿ ਸਾਮਂ ਪਸ੍ਸਿਤਬ੍ਬਾਯ ਪਚ੍ਚਕ੍ਖਾਯ. ਨਿਜ੍ਜਰਾਯ ਵਿਸੁਦ੍ਧਿਯਾਤਿ ਕਿਲੇਸਜੀਰਣਕਪਟਿਪਦਾਯ ਕਿਲੇਸੇ ਵਾ ਨਿਜ੍ਜੀਰਣਤੋ ਨਿਜ੍ਜਰਾਯ ਸਤ੍ਤਾਨਂ ਵਿਸੁਦ੍ਧਿਯਾ. ਸਮਤਿਕ੍ਕਮੋ ਹੋਤੀਤਿ ਸਕਲਸ੍ਸ ਵਟ੍ਟਦੁਕ੍ਖਸ੍ਸ ਅਤਿਕ੍ਕਮੋ ਹੋਤਿ. ਇਧ, ਭਨ੍ਤੇ, ਭਗਵਾ ਕਿਮਾਹਾਤਿ, ਭਨ੍ਤੇ, ਭਗਵਾ ਇਮਾਯ ਪਟਿਪਤ੍ਤਿਯਾ ਕਿਮਾਹ, ਕਿਂ ਏਤਂਯੇਵ ਕਿਲੇਸਨਿਜ੍ਜੀਰਣਕਪਟਿਪਦਂ ਪਞ੍ਞਪੇਤਿ, ਉਦਾਹੁ ਅਞ੍ਞਨ੍ਤਿ ਪੁਚ੍ਛਤਿ.
ਜਾਨਤਾਤਿ ਅਨਾਵਰਣਞਾਣੇਨ ਜਾਨਨ੍ਤੇਨ. ਪਸ੍ਸਤਾਤਿ ਸਮਨ੍ਤਚਕ੍ਖੁਨਾ ਪਸ੍ਸਨ੍ਤੇਨ. ਵਿਸੁਦ੍ਧਿਯਾਤਿ ਵਿਸੁਦ੍ਧਿਸਮ੍ਪਾਪਨਤ੍ਥਾਯ. ਸਮਤਿਕ੍ਕਮਾਯਾਤਿ ਸਮਤਿਕ੍ਕਮਨਤ੍ਥਾਯ. ਅਤ੍ਥਙ੍ਗਮਾਯਾਤਿ ਅਤ੍ਥਂ ਗਮਨਤ੍ਥਾਯ. ਞਾਯਸ੍ਸ ਅਧਿਗਮਾਯਾਤਿ ਸਹ ਵਿਪਸ੍ਸਨਾਯ ਮਗ੍ਗਸ੍ਸ ਅਧਿਗਮਨਤ੍ਥਾਯ. ਨਿਬ੍ਬਾਨਸ੍ਸ ਸਚ੍ਛਿਕਿਰਿਯਾਯਾਤਿ ਅਪਚ੍ਚਯਨਿਬ੍ਬਾਨਸ੍ਸ ਸਚ੍ਛਿਕਰਣਤ੍ਥਾਯ. ਨਵਞ੍ਚ ਕਮ੍ਮਂ ਨ ਕਰੋਤੀਤਿ ਨਵਂ ਕਮ੍ਮਂ ਨਾਯੂਹਤਿ. ਪੁਰਾਣਞ੍ਚ ਕਮ੍ਮਨ੍ਤਿ ਪੁਬ੍ਬੇ ਆਯੂਹਿਤਕਮ੍ਮਂ. ਫੁਸ੍ਸ ਫੁਸ੍ਸ ਬ੍ਯਨ੍ਤੀ ਕਰੋਤੀਤਿ ਫੁਸਿਤ੍ਵਾ ਫੁਸਿਤ੍ਵਾ ਵਿਗਤਨ੍ਤਂ ਕਰੋਤਿ, ਵਿਪਾਕਫਸ੍ਸਂ ਫੁਸਿਤ੍ਵਾ ਫੁਸਿਤ੍ਵਾ ਤਂ ਕਮ੍ਮਂ ਖੇਪੇਤੀਤਿ ਅਤ੍ਥੋ. ਸਨ੍ਦਿਟ੍ਠਿਕਾਤਿ ਸਾਮਂ ਪਸ੍ਸਿਤਬ੍ਬਾ. ਅਕਾਲਿਕਾਤਿ ਨ ਕਾਲਨ੍ਤਰੇ ਕਿਚ੍ਚਕਾਰਿਕਾ. ਏਹਿਪਸ੍ਸਿਕਾਤਿ ‘‘ਏਹਿ ਪਸ੍ਸਾ’’ਤਿ ਏਵਂ ਦਸ੍ਸੇਤੁਂ ਯੁਤ੍ਤਾ. ਓਪਨੇਯ੍ਯਿਕਾਤਿ ਉਪਨਯੇ ਯੁਤ੍ਤਾ ਅਲ੍ਲੀਯਿਤਬ੍ਬਯੁਤ੍ਤਾ. ਪਚ੍ਚਤ੍ਤਂ ਵੇਦਿਤਬ੍ਬਾ ਵਿਞ੍ਞੂਹੀਤਿ ਪਣ੍ਡਿਤੇਹਿ ਅਤ੍ਤਨੋ ਅਤ੍ਤਨੋ ਸਨ੍ਤਾਨੇਯੇਵ ਜਾਨਿਤਬ੍ਬਾ, ਬਾਲੇਹਿ ਪਨ ਦੁਜ੍ਜਾਨਾ. ਇਤਿ ਸੀਲਵਸੇਨ ਦ੍ਵੇ ਮਗ੍ਗਾ, ਦ੍ਵੇ ਚ ਫਲਾਨਿ ਕਥਿਤਾਨਿ. ਸੋਤਾਪਨ੍ਨਸਕਦਾਗਾਮਿਨੋ ਹਿ ਸੀਲੇਸੁ ਪਰਿਪੂਰਕਾਰਿਨੋਤਿ. ਵਿਵਿਚ੍ਚੇਵ ਕਾਮੇਹੀਤਿਆਦਿਕਾਯ ਪਨ ਸਮਾਧਿਸਮ੍ਪਦਾਯ ਤਯੋ ਮਗ੍ਗਾ, ਤੀਣਿ ਚ ਫਲਾਨਿ ਕਥਿਤਾਨਿ. ਅਨਾਗਾਮੀ ਅਰਿਯਸਾਵਕੋ ਹਿ ਸਮਾਧਿਮ੍ਹਿ ਪਰਿਪੂਰਕਾਰੀਤਿ ਵੁਤ੍ਤੋ. ਆਸਵਾਨਂ ਖਯਾਤਿਆਦੀਹਿ ਅਰਹਤ੍ਤਫਲਂ ਕਥਿਤਂ. ਕੇਚਿ ਪਨ ਸੀਲਸਮਾਧਯੋਪਿ ਅਰਹਤ੍ਤਫਲਸਮ੍ਪਯੁਤ੍ਤਾਵ ਇਧ ਅਧਿਪ੍ਪੇਤਾ. ਏਕੇਕਸ੍ਸ ਪਨ ਵਸੇਨ ਪਟਿਪਤ੍ਤਿਦਸ੍ਸਨਤ੍ਥਂ ਵਿਸੁਂ ਵਿਸੁਂ ਤਨ੍ਤਿ ਆਰੋਪਿਤਾਤਿ.
੫. ਨਿਵੇਸਕਸੁਤ੍ਤਵਣ੍ਣਨਾ
੭੬. ਪਞ੍ਚਮੇ ਅਮਚ੍ਚਾਤਿ ਸੁਹਜ੍ਜਾ. ਞਾਤੀਤਿ ਸਸ੍ਸੁਸਸੁਰਪਕ੍ਖਿਕਾ. ਸਾਲੋਹਿਤਾਤਿ ਸਮਾਨਲੋਹਿਤਾ ਭਾਤਿਭਗਿਨਿਆਦਯੋ. ਅਵੇਚ੍ਚਪ੍ਪਸਾਦੇਤਿ ਗੁਣੇ ਅਵੇਚ੍ਚ ਜਾਨਿਤ੍ਵਾ ਉਪ੍ਪਨ੍ਨੇ ਅਚਲਪ੍ਪਸਾਦੇ. ਅਞ੍ਞਥਤ੍ਤਨ੍ਤਿ ਭਾਵਞ੍ਞਥਤ੍ਤਂ. ਪਥਵੀਧਾਤੁਯਾਤਿਆਦੀਸੁ ਵੀਸਤਿਯਾ ਕੋਟ੍ਠਾਸੇਸੁ ਥਦ੍ਧਾਕਾਰਭੂਤਾਯ ਪਥਵੀਧਾਤੁਯਾ, ਦ੍ਵਾਦਸਸੁ ਕੋਟ੍ਠਾਸੇਸੁ ਯੂਸਗਤਾਯ ਆਬਨ੍ਧਨਭੂਤਾਯ ਆਪੋਧਾਤੁਯਾ, ਚਤੂਸੁ ਕੋਟ੍ਠਾਸੇਸੁ ਪਰਿਪਾਚਨਭੂਤਾਯ ਤੇਜੋਧਾਤੁਯਾ, ਛਸੁ ਕੋਟ੍ਠਾਸੇਸੁ ਵਿਤ੍ਥਮ੍ਭਨਭੂਤਾਯ ਵਾਯੋਧਾਤੁਯਾ ਸਿਯਾ ਅਞ੍ਞਥਤ੍ਤਂ. ਨ ਤ੍ਵੇਵਾਤਿ ਇਮੇਸਂ ਹਿ ਚਤੁਨ੍ਨਂ ਮਹਾਭੂਤਾਨਂ ਅਞ੍ਞਮਞ੍ਞਭਾਵੂਪਗਮਨੇਨ ਸਿਯਾ ਅਞ੍ਞਥਤ੍ਤਂ, ਅਰਿਯਸਾਵਕਸ੍ਸ ਪਨ ਨ ਤ੍ਵੇਵ ਸਿਯਾਤਿ ਦਸ੍ਸੇਤਿ. ਏਤ੍ਥ ਚ ਅਞ੍ਞਥਤ੍ਤਨ੍ਤਿ ਪਸਾਦਞ੍ਞਥਤ੍ਤਞ੍ਚ ਗਤਿਅਞ੍ਞਥਤ੍ਤਞ੍ਚ. ਤਞ੍ਹਿ ਤਸ੍ਸ ਨ ਹੋਤਿ, ਭਾਵਞ੍ਞਥਤ੍ਤਂ ਪਨ ਹੋਤਿ. ਅਰਿਯਸਾਵਕੋ ਹਿ ਮਨੁਸ੍ਸੋ ਹੁਤ੍ਵਾ ਦੇਵੋਪਿ ਹੋਤਿ ਬ੍ਰਹ੍ਮਾਪਿ. ਪਸਾਦੋ ਪਨਸ੍ਸ ਭਵਨ੍ਤਰੇਪਿ ਨ ਵਿਗਚ੍ਛਤਿ, ਨ ਚ ਅਪਾਯਗਤਿਸਙ੍ਖਾਤਂ ਗਤਿਅਞ੍ਞਥਤ੍ਤਂ ਪਾਪੁਣਾਤਿ. ਸਤ੍ਥਾਪਿ ਤਦੇਵ ਦਸ੍ਸੇਨ੍ਤੋ ਤਤ੍ਰਿਦਂ ਅਞ੍ਞਥਤ੍ਤਨ੍ਤਿਆਦਿਮਾਹ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.
੬. ਪਠਮਭਵਸੁਤ੍ਤਵਣ੍ਣਨਾ
੭੭. ਛਟ੍ਠੇ ਕਾਮਧਾਤੁਵੇਪਕ੍ਕਨ੍ਤਿ ਕਾਮਧਾਤੁਯਾ ਵਿਪਚ੍ਚਨਕਂ. ਕਾਮਭਵੋਤਿ ਕਾਮਧਾਤੁਯਂ ਉਪਪਤ੍ਤਿਭਵੋ. ਕਮ੍ਮਂ ਖੇਤ੍ਤਨ੍ਤਿ ਕੁਸਲਾਕੁਸਲਕਮ੍ਮਂ ਵਿਰੁਹਨਟ੍ਠਾਨਟ੍ਠੇਨ ਖੇਤ੍ਤਂ. ਵਿਞ੍ਞਾਣਂ ਬੀਜਨ੍ਤਿ ਸਹਜਾਤਂ ਅਭਿਸਙ੍ਖਾਰਵਿਞ੍ਞਾਣਂ ਵਿਰੁਹਨਟ੍ਠੇਨ ਬੀਜਂ. ਤਣ੍ਹਾ ਸ੍ਨੇਹੋਤਿ ਪਗ੍ਗਣ੍ਹਨਾਨੁਬ੍ਰੂਹਨਵਸੇਨ ਤਣ੍ਹਾ ਉਦਕਂ ਨਾਮ. ਅਵਿਜ੍ਜਾਨੀਵਰਣਾਨਨ੍ਤਿ ਅਵਿਜ੍ਜਾਯ ਆਵਰਿਤਾਨਂ. ਤਣ੍ਹਾਸਂਯੋਜਨਾਨਨ੍ਤਿ ਤਣ੍ਹਾਬਨ੍ਧਨੇਨ ਬਦ੍ਧਾਨਂ. ਹੀਨਾਯ ਧਾਤੁਯਾਤਿ ਕਾਮਧਾਤੁਯਾ. ਵਿਞ੍ਞਾਣਂ ਪਤਿਟ੍ਠਿਤਨ੍ਤਿ ਅਭਿਸਙ੍ਖਾਰਵਿਞ੍ਞਾਣਂ ਪਤਿਟ੍ਠਿਤਂ. ਮਜ੍ਝਿਮਾਯ ਧਾਤੁਯਾਤਿ ਰੂਪਧਾਤੁਯਾ. ਪਣੀਤਾਯ ਧਾਤੁਯਾਤਿ ਅਰੂਪਧਾਤੁਯਾ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.
੭. ਦੁਤਿਯਭਵਸੁਤ੍ਤਵਣ੍ਣਨਾ
੭੮. ਸਤ੍ਤਮੇ ਚੇਤਨਾਤਿ ਕਮ੍ਮਚੇਤਨਾ. ਪਤ੍ਥਨਾਪਿ ਕਮ੍ਮਪਤ੍ਥਨਾਵ. ਸੇਸਂ ਪੁਰਿਮਸਦਿਸਮੇਵਾਤਿ.
੮. ਸੀਲਬ੍ਬਤਸੁਤ੍ਤਵਣ੍ਣਨਾ
੭੯. ਅਟ੍ਠਮੇ ਸੀਲਬ੍ਬਤਨ੍ਤਿ ਸੀਲਞ੍ਚੇਵ ਵਤਞ੍ਚ. ਜੀਵਿਤਨ੍ਤਿ ਦੁਕ੍ਕਰਕਾਰਿਕਾਨੁਯੋਗੋ. ਬ੍ਰਹ੍ਮਚਰਿਯਨ੍ਤਿ ਬ੍ਰਹ੍ਮਚਰਿਯਵਾਸੋ. ਉਪਟ੍ਠਾਨਸਾਰਨ੍ਤਿ ਉਪਟ੍ਠਾਨੇਨ ਸਾਰਂ, ‘‘ਇਦਂ ਵਰਂ ਇਦਂ ਨਿਟ੍ਠਾ’’ਤਿ ਏਵਂ ਉਪਟ੍ਠਿਤਨ੍ਤਿ ਅਤ੍ਥੋ. ਸਫਲਨ੍ਤਿ ਸਉਦ੍ਰਯਂ ਸਵਡ੍ਢਿਕਂ ਹੋਤੀਤਿ ਪੁਚ੍ਛਤਿ. ਨ ਖ੍ਵੇਤ੍ਥ, ਭਨ੍ਤੇ, ਏਕਂਸੇਨਾਤਿ, ਭਨ੍ਤੇ, ਨ ਖੋ ਏਤ੍ਥ ਏਕਂਸੇਨ ਬ੍ਯਾਕਾਤਬ੍ਬਨ੍ਤਿ ਅਤ੍ਥੋ. ਉਪਟ੍ਠਾਨਸਾਰਂ ਸੇਵਤੋਤਿ ਇਦਂ ਸਾਰਂ ਵਰਂ ਨਿਟ੍ਠਾਤਿ ਏਵਂ ਉਪਟ੍ਠਿਤਂ ਸੇਵਮਾਨਸ੍ਸ. ਅਫਲਨ੍ਤਿ ਇਟ੍ਠਫਲੇਨ ਅਫਲਂ. ਏਤ੍ਤਾਵਤਾ ਕਮ੍ਮਵਾਦਿਕਿਰਿਯਵਾਦੀਨਂ ਪਬ੍ਬਜ੍ਜਂ ਠਪੇਤ੍ਵਾ ਸੇਸੋ ਸਬ੍ਬੋਪਿ ਬਾਹਿਰਕਸਮਯੋ ਗਹਿਤੋ ਹੋਤਿ. ਸਫਲਨ੍ਤਿ ਇਟ੍ਠਫਲੇਨ ਸਫਲਂ ਸਉਦ੍ਰਯਂ. ਏਤ੍ਤਾਵਤਾ ਇਮਂ ਸਾਸਨਂ ਆਦਿਂ ਕਤ੍ਵਾ ਸਬ੍ਬਾਪਿ ਕਮ੍ਮਵਾਦਿਕਿਰਿਯਵਾਦੀਨਂ ਪਬ੍ਬਜ੍ਜਾ ਗਹਿਤਾ. ਨ ਚ ਪਨਸ੍ਸ ਸੁਲਭਰੂਪੋ ਸਮਸਮੋ ਪਞ੍ਞਾਯਾਤਿ ਏਵਂ ਸੇਕ੍ਖਭੂਮਿਯਂ ਠਤ੍ਵਾ ਪਞ੍ਹਂ ਕਥੇਨ੍ਤੋ ਅਸ੍ਸ ਆਨਨ੍ਦਸ੍ਸ ਪਞ੍ਞਾਯ ਸਮਸਮੋ ਨ ਸੁਲਭੋਤਿ ਦਸ੍ਸੇਤਿ. ਇਮਸ੍ਮਿਂ ਸੁਤ੍ਤੇ ਸੇਕ੍ਖਭੂਮਿ ਨਾਮ ਕਥਿਤਾਤਿ.
੯. ਗਨ੍ਧਜਾਤਸੁਤ੍ਤਵਣ੍ਣਨਾ
੮੦. ਨਵਮੇ ਏਤਦਵੋਚਾਤਿ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਦਸਬਲਸ੍ਸ ਵਤ੍ਤਂ ਦਸ੍ਸੇਤ੍ਵਾ ਅਤ੍ਤਨੋ ਦਿਵਾਵਿਹਾਰਟ੍ਠਾਨਂ ਗਨ੍ਤ੍ਵਾ ‘‘ਇਮਸ੍ਮਿਂ ਲੋਕੇ ਮੂਲਗਨ੍ਧੋ ਨਾਮ ਅਤ੍ਥਿ, ਸਾਰਗਨ੍ਧੋ ਨਾਮ ਅਤ੍ਥਿ, ਪੁਪ੍ਫਗਨ੍ਧੋ ਨਾਮ ਅਤ੍ਥਿ. ਇਮੇ ਪਨ ਤਯੋਪਿ ਗਨ੍ਧਾ ਅਨੁਵਾਤਂਯੇਵ ਗਚ੍ਛਨ੍ਤਿ, ਨ ਪਟਿਵਾਤਂ. ਅਤ੍ਥਿ ਨੁ ਖੋ ਕਿਞ੍ਚਿ, ਯਸ੍ਸ ਪਟਿਵਾਤਮ੍ਪਿ ਗਨ੍ਧੋ ਗਚ੍ਛਤੀ’’ਤਿ ਚਿਨ੍ਤੇਤ੍ਵਾ ਅਟ੍ਠਨ੍ਨਂ ਵਰਾਨਂ ਗਹਣਕਾਲੇਯੇਵ ਕਙ੍ਖੁਪ੍ਪਤ੍ਤਿਸਮਯੇ ਉਪਸਙ੍ਕਮਨਵਰਸ੍ਸ ਗਹਿਤਤ੍ਤਾ ਤਕ੍ਖਣਂਯੇਵ ਦਿਵਾਟ੍ਠਾਨਤੋ ਵੁਟ੍ਠਾਯ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਉਪ੍ਪਨ੍ਨਾਯ ਕਙ੍ਖਾਯ ਵਿਨੋਦਨਤ੍ਥਂ ਏਤਂ ‘‘ਤੀਣਿਮਾਨਿ, ਭਨ੍ਤੇ’’ਤਿਆਦਿਵਚਨਂ ਅਵੋਚ. ਤਤ੍ਥ ਗਨ੍ਧਜਾਤਾਨੀਤਿ ਗਨ੍ਧਜਾਤਿਯੋ. ਮੂਲਗਨ੍ਧੋਤਿ ਮੂਲਵਤ੍ਥੁਕੋ ਗਨ੍ਧੋ, ਗਨ੍ਧਸਮ੍ਪਨ੍ਨਂ ਵਾ ਮੂਲਮੇਵ ਮੂਲਗਨ੍ਧੋ. ਤਸ੍ਸ ਹਿ ਗਨ੍ਧੋ ਅਨੁਵਾਤਂ ਗਚ੍ਛਤਿ. ਗਨ੍ਧਸ੍ਸ ਪਨ ਗਨ੍ਧੋ ਨਾਮ ਨਤ੍ਥਿ. ਸਾਰਗਨ੍ਧਪੁਪ੍ਫਗਨ੍ਧੇਸੁਪਿ ਏਸੇਵ ਨਯੋ. ਅਤ੍ਥਾਨਨ੍ਦ, ਕਿਞ੍ਚਿ ਗਨ੍ਧਜਾਤਨ੍ਤਿ ਏਤ੍ਥ ਸਰਣਗਮਨਾਦਯੋ ਗੁਣਵਣ੍ਣਭਾਸਨਵਸੇਨ ਦਿਸਾਗਾਮਿਤਾਯ ਗਨ੍ਧਸਦਿਸਤ੍ਤਾ ਗਨ੍ਧਾ, ਤੇਸਂ ਵਤ੍ਥੁਭੂਤੋ ਪੁਗ੍ਗਲੋ ਗਨ੍ਧਜਾਤਂ ਨਾਮ. ਗਨ੍ਧੋ ਗਚ੍ਛਤੀਤਿ ਵਣ੍ਣਭਾਸਨਵਸੇਨ ਗਚ੍ਛਤਿ. ਸੀਲਵਾਤਿ ਪਞ੍ਚਸੀਲੇਨ ਵਾ ਦਸਸੀਲੇਨ ਵਾ ਸੀਲਵਾ. ਕਲ੍ਯਾਣਧਮ੍ਮੋਤਿ ਤੇਨੇਵ ਸੀਲਧਮ੍ਮੇਨ ਕਲ੍ਯਾਣਧਮ੍ਮੋ ਸੁਨ੍ਦਰਧਮ੍ਮੋ. ਵਿਗਤਮਲਮਚ੍ਛੇਰੇਨਾਤਿਆਦੀਨਂ ਅਤ੍ਥੋ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੧੬੦) ਵਿਤ੍ਥਾਰਿਤੋਵ. ਦਿਸਾਸੂਤਿ ਚਤੂਸੁ ਦਿਸਾਸੁ ਚਤੂਸੁ ਅਨੁਦਿਸਾਸੁ. ਸਮਣਬ੍ਰਾਹ੍ਮਣਾਤਿ ਸਮਿਤਪਾਪਬਾਹਿਤਪਾਪਾ ਸਮਣਬ੍ਰਾਹ੍ਮਣਾ.
ਨ ਪੁਪ੍ਫਗਨ੍ਧੋ ਪਟਿਵਾਤਮੇਤੀਤਿ ਵਸ੍ਸਿਕਪੁਪ੍ਫਾਦੀਨਂ ਗਨ੍ਧੋ ਪਟਿਵਾਤਂ ਨ ਗਚ੍ਛਤਿ. ਨ ਚਨ੍ਦਨਂ ਤਗਰਮਲ੍ਲਿਕਾ ਵਾਤਿ ਚਨ੍ਦਨਤਗਰਮਲ੍ਲਿਕਾਨਮ੍ਪਿ ਗਨ੍ਧੋ ਪਟਿਵਾਤਂ ਨ ਗਚ੍ਛਤੀਤਿ ਅਤ੍ਥੋ. ਦੇਵਲੋਕੇਪਿ ਫੁਟਸੁਮਨਾ ਨਾਮ ਹੋਤਿ, ਤਸ੍ਸਾ ਪੁਪ੍ਫਿਤਦਿਵਸੇ ਗਨ੍ਧੋ ਯੋਜਨਸਤਂ ਅਜ੍ਝੋਤ੍ਥਰਤਿ. ਸੋਪਿ ਪਟਿਵਾਤਂ ਵਿਦਤ੍ਥਿਮਤ੍ਤਮ੍ਪਿ ਰਤਨਮਤ੍ਤਮ੍ਪਿ ਗਨ੍ਤੁਂ ਨ ਸਕ੍ਕੋਤੀਤਿ ਵਦਨ੍ਤਿ. ਸਤਞ੍ਚ ਗਨ੍ਧੋ ਪਟਿਵਾਤਮੇਤੀਤਿ ਸਤਞ੍ਚ ਪਣ੍ਡਿਤਾਨਂ ਬੁਦ੍ਧਪਚ੍ਚੇਕਬੁਦ੍ਧਬੁਦ੍ਧਪੁਤ੍ਤਾਨਂ ਸੀਲਾਦਿਗੁਣਗਨ੍ਧੋ ਪਟਿਵਾਤਂ ਗਚ੍ਛਤਿ. ਸਬ੍ਬਾ ਦਿਸਾ ਸਪ੍ਪੁਰਿਸੋ ਪਵਾਯਤੀਤਿ ਸਪ੍ਪੁਰਿਸੋ ਪਣ੍ਡਿਤੋ ਸੀਲਾਦਿਗੁਣਗਨ੍ਧੇਨ ਸਬ੍ਬਾ ਦਿਸਾ ਪਵਾਯਤਿ, ਸਬ੍ਬਾ ਦਿਸਾ ਗਨ੍ਧੇਨ ਅਵਤ੍ਥਰਤੀਤਿ ਅਤ੍ਥੋ.
੧੦. ਚੂਲ਼ਨਿਕਾਸੁਤ੍ਤਵਣ੍ਣਨਾ
੮੧. ਦਸਮਸ੍ਸ ਦੁਵਿਧੋ ਨਿਕ੍ਖੇਪੋ ਅਤ੍ਥੁਪ੍ਪਤ੍ਤਿਕੋਪਿ ਪੁਚ੍ਛਾਵਸਿਕੋਪਿ. ਕਤਰਅਤ੍ਥੁਪ੍ਪਤ੍ਤਿਯਂ ਕਸ੍ਸ ਪੁਚ੍ਛਾਯ ਕਥਿਤਨ੍ਤਿ ਚੇ? ਅਰੁਣਵਤਿਸੁਤ੍ਤਨ੍ਤਅਤ੍ਥੁਪ੍ਪਤ੍ਤਿਯਂ (ਸਂ. ਨਿ. ੧.੧੮੫ ਆਦਯੋ) ਆਨਨ੍ਦਤ੍ਥੇਰਸ੍ਸ ਪੁਚ੍ਛਾਯ ਕਥਿਤਂ. ਅਰੁਣਵਤਿਸੁਤ੍ਤਨ੍ਤੋ ਕੇਨ ਕਥਿਤੋਤਿ? ਦ੍ਵੀਹਿ ਬੁਦ੍ਧੇਹਿ ਕਥਿਤੋ ਸਿਖਿਨਾ ਚ ਭਗਵਤਾ ਅਮ੍ਹਾਕਞ੍ਚ ਸਤ੍ਥਾਰਾ. ਇਮਸ੍ਮਾ ਹਿ ਕਪ੍ਪਾ ਏਕਤਿਂਸਕਪ੍ਪਮਤ੍ਥਕੇ ਅਰੁਣਵਤਿਨਗਰੇ ਅਰੁਣਵਤੋ ਰਞ੍ਞੋ ਪਭਾਵਤਿਯਾ ਨਾਮ ਮਹੇਸਿਯਾ ਕੁਚ੍ਛਿਸ੍ਮਿਂ ਨਿਬ੍ਬਤ੍ਤਿਤ੍ਵਾ ਪਰਿਪਕ੍ਕੇ ਞਾਣੇ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਸਿਖੀ ਭਗਵਾ ਬੋਧਿਮਣ੍ਡੇ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੋ ਅਰੁਣਵਤਿਂ ਨਿਸ੍ਸਾਯ ਵਿਹਰਨ੍ਤੋ ਏਕਦਿਵਸਂ ਪਾਤੋਵ ਸਰੀਰਪ੍ਪਟਿਜਗ੍ਗਨਂ ਕਤ੍ਵਾ ਮਹਾਭਿਕ੍ਖੁਸਙ੍ਘਪਰਿਵਾਰੋ ‘‘ਅਰੁਣਵਤਿਂ ਪਿਣ੍ਡਾਯ ਪਵਿਸਿਸ੍ਸਾਮੀ’’ਤਿ ਨਿਕ੍ਖਮਿਤ੍ਵਾ ਵਿਹਾਰਦ੍ਵਾਰਕੋਟ੍ਠਕਸਮੀਪੇ ਠਿਤੋ ਅਭਿਭੁਂ ਨਾਮ ਅਗ੍ਗਸਾਵਕਂ ਆਮਨ੍ਤੇਸਿ – ‘‘ਅਤਿਪ੍ਪਗੋ ਖੋ, ਭਿਕ੍ਖੁ, ਅਰੁਣਵਤਿਂ ਪਿਣ੍ਡਾਯ ਪਵਿਸਿਤੁਂ, ਯੇਨ ਅਞ੍ਞਤਰੋ ਬ੍ਰਹ੍ਮਲੋਕੋ ਤੇਨੁਪਸਙ੍ਕਮਿਸ੍ਸਾਮਾ’’ਤਿ. ਯਥਾਹ –
‘‘ਅਥ ਖੋ, ਭਿਕ੍ਖਵੇ, ਸਿਖੀ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਅਭਿਭੁਂ ਭਿਕ੍ਖੁਂ ਆਮਨ੍ਤੇਸਿ – ‘ਆਯਾਮ, ਬ੍ਰਾਹ੍ਮਣ, ਯੇਨ ਅਞ੍ਞਤਰੋ ਬ੍ਰਹ੍ਮਲੋਕੋ ਤੇਨੁਪਸਙ੍ਕਮਿਸ੍ਸਾਮ, ਨ ਤਾਵ ਭਤ੍ਤਕਾਲੋ ਭਵਿਸ੍ਸਤੀ’ਤਿ. ‘ਏਵਂ, ਭਨ੍ਤੇ’ਤਿ ਖੋ, ਭਿਕ੍ਖਵੇ, ਅਭਿਭੂ ਭਿਕ੍ਖੁ ਸਿਖਿਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ ਪਚ੍ਚਸ੍ਸੋਸਿ. ਅਥ ਖੋ, ਭਿਕ੍ਖਵੇ, ਸਿਖੀ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਅਭਿਭੂ ਚ ਭਿਕ੍ਖੁ ਯੇਨ ਅਞ੍ਞਤਰੋ ਬ੍ਰਹ੍ਮਲੋਕੋ ਤੇਨੁਪਸਙ੍ਕਮਿਂਸੂ’’ਤਿ (ਸਂ. ਨਿ. ੧.੧੮੫).
ਤਤ੍ਥ ਮਹਾਬ੍ਰਹ੍ਮਾ ਸਮ੍ਮਾਸਮ੍ਬੁਦ੍ਧਂ ਦਿਸ੍ਵਾ ਅਤ੍ਤਮਨੋ ਪਚ੍ਚੁਗ੍ਗਮਨਂ ਕਤ੍ਵਾ ਬ੍ਰਹ੍ਮਾਸਨਂ ਪਞ੍ਞਾਪੇਤ੍ਵਾ ਅਦਾਸਿ, ਥੇਰਸ੍ਸਾਪਿ ਅਨੁਚ੍ਛਵਿਕਂ ਆਸਨਂ ਪਞ੍ਞਾਪਯਿਂਸੁ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ, ਥੇਰੋਪਿ ਅਤ੍ਤਨੋ ਪਞ੍ਞਤ੍ਤਾਸਨੇ ਨਿਸੀਦਿ. ਮਹਾਬ੍ਰਹ੍ਮਾਪਿ ਦਸਬਲਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ.
ਅਥ ਖੋ, ਭਿਕ੍ਖਵੇ, ਸਿਖੀ ਭਗਵਾ ਅਭਿਭੁਂ ਭਿਕ੍ਖੁਂ ਆਮਨ੍ਤੇਸਿ – ‘‘ਪਟਿਭਾਤੁ ਤਂ, ਬ੍ਰਾਹ੍ਮਣ, ਬ੍ਰਹ੍ਮੁਨੋ ਚ ਬ੍ਰਹ੍ਮਪਰਿਸਾਯ ਚ ਬ੍ਰਹ੍ਮਪਾਰਿਸਜ੍ਜਾਨਞ੍ਚ ਧਮ੍ਮੀਕਥਾਤਿ. ‘ਏਵਂ, ਭਨ੍ਤੇ’ਤਿ ਖੋ, ਭਿਕ੍ਖਵੇ, ਅਭਿਭੂ ਭਿਕ੍ਖੁ ਸਿਖਿਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ ਪਟਿਸ੍ਸੁਣਿਤ੍ਵਾ ਬ੍ਰਹ੍ਮੁਨੋ ਚ ਬ੍ਰਹ੍ਮਪਰਿਸਾਯ ਚ ਬ੍ਰਹ੍ਮਪਾਰਿਸਜ੍ਜਾਨਞ੍ਚ ਧਮ੍ਮਿਂ ਕਥਂ ਕਥੇਸਿ. ਥੇਰੇ ਧਮ੍ਮਂ ਕਥੇਨ੍ਤੇ ਬ੍ਰਹ੍ਮਗਣਾ ਉਜ੍ਝਾਯਿਂਸੁ – ‘‘ਚਿਰਸ੍ਸਞ੍ਚ ਮਯਂ ਸਤ੍ਥੁ ਬ੍ਰਹ੍ਮਲੋਕਾਗਮਨਂ ਲਭਿਮ੍ਹ, ਅਯਞ੍ਚ ਭਿਕ੍ਖੁ ਠਪੇਤ੍ਵਾ ਸਤ੍ਥਾਰਂ ਸਯਂ ਧਮ੍ਮਕਥਂ ਆਰਭੀ’’ਤਿ.
ਸਤ੍ਥਾ ਤੇਸਂ ਅਨਤ੍ਤਮਨਭਾਵਂ ਞਤ੍ਵਾ ਅਭਿਭੁਂ ਭਿਕ੍ਖੁਂ ਏਤਦਵੋਚ – ‘‘ਉਜ੍ਝਾਯਨ੍ਤਿ ਖੋ ਤੇ, ਬ੍ਰਾਹ੍ਮਣ, ਬ੍ਰਹ੍ਮਾ ਚ ਬ੍ਰਹ੍ਮਪਰਿਸਾ ਚ ਬ੍ਰਹ੍ਮਪਾਰਿਸਜ੍ਜਾ ਚ. ਤੇਨ ਹਿ ਤ੍ਵਂ – ਬ੍ਰਾਹ੍ਮਣ, ਭਿਯ੍ਯੋਸੋਮਤ੍ਤਾਯ ਸਂਵੇਜੇਹੀ’’ਤਿ. ਥੇਰੋ ਸਤ੍ਥੁ ਵਚਨਂ ਸਮ੍ਪਟਿਚ੍ਛਿਤ੍ਵਾ ਅਨੇਕਵਿਹਿਤਂ ਇਦ੍ਧਿਵਿਕੁਬ੍ਬਨਂ ਕਤ੍ਵਾ ਸਹਸ੍ਸਿਲੋਕਧਾਤੁਂ ਸਰੇਨ ਵਿਞ੍ਞਾਪੇਨ੍ਤੋ ‘‘ਆਰਮ੍ਭਥ ਨਿਕ੍ਕਮਥਾ’’ਤਿ (ਸਂ. ਨਿ. ੧.੧੮੫) ਗਾਥਾਦ੍ਵਯਂ ਅਭਾਸਿ. ਕਿਂ ਪਨ ਕਤ੍ਵਾ ਥੇਰੋ ਸਹਸ੍ਸਿਲੋਕਧਾਤੁਂ ਵਿਞ੍ਞਾਪੇਸੀਤਿ? ਨੀਲਕਸਿਣਂ ਤਾਵ ਸਮਾਪਜ੍ਜਿਤ੍ਵਾ ਸਬ੍ਬਤ੍ਥ ਅਨ੍ਧਕਾਰਂ ਫਰਿ, ਤਤੋ ‘‘ਕਿਮਿਦਂ ਅਨ੍ਧਕਾਰ’’ਨ੍ਤਿ ਸਤ੍ਤਾਨਂ ਆਭੋਗੇ ਉਪ੍ਪਨ੍ਨੇ ਆਲੋਕਂ ਦਸ੍ਸੇਸਿ. ‘‘ਕਿਂ ਆਲੋਕੋ ਅਯ’’ਨ੍ਤਿ ਵਿਚਿਨਨ੍ਤਾਨਂ ਅਤ੍ਤਾਨਂ ਦਸ੍ਸੇਸਿ, ਸਹਸ੍ਸਚਕ੍ਕਵਾਲ਼ੇ ਦੇਵਮਨੁਸ੍ਸਾ ਅਞ੍ਜਲਿਂ ਪਗ੍ਗਣ੍ਹਿਤ੍ਵਾ ਪਗ੍ਗਣ੍ਹਿਤ੍ਵਾ ਥੇਰਂਯੇਵ ਨਮਸ੍ਸਮਾਨਾ ਅਟ੍ਠਂਸੁ. ਥੇਰੋ ‘‘ਮਹਾਜਨੋ ਮਯ੍ਹਂ ਧਮ੍ਮਂ ਦੇਸੇਨ੍ਤਸ੍ਸ ਸਰਂ ਸੁਣਾਤੂ’’ਤਿ ਇਮਾ ਗਾਥਾ ਅਭਾਸਿ. ਸਬ੍ਬੇ ਓਸਟਾਯ ਪਰਿਸਾਯ ਮਜ੍ਝੇ ਨਿਸੀਦਿਤ੍ਵਾ ਧਮ੍ਮਂ ਦੇਸੇਨ੍ਤਸ੍ਸ ਵਿਯ ਸਦ੍ਦਂ ਅਸ੍ਸੋਸੁਂ. ਅਤ੍ਥੋਪਿ ਨੇਸਂ ਪਾਕਟੋ ਅਹੋਸਿ.
ਅਥ ਖੋ ਭਗਵਾ ਸਦ੍ਧਿਂ ਥੇਰੇਨ ਅਰੁਣਵਤਿਂ ਪਚ੍ਚਾਗਨ੍ਤ੍ਵਾ ਪਿਣ੍ਡਾਯ ਚਰਿਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਭਿਕ੍ਖੁਸਙ੍ਘਂ ਪੁਚ੍ਛਿ – ‘‘ਅਸ੍ਸੁਤ੍ਥ ਨੋ ਤੁਮ੍ਹੇ, ਭਿਕ੍ਖਵੇ, ਅਭਿਭੁਸ੍ਸ ਭਿਕ੍ਖੁਨੋ ਬ੍ਰਹ੍ਮਲੋਕੇ ਠਿਤਸ੍ਸ ਗਾਥਾਯੋ ਭਾਸਮਾਨਸ੍ਸਾ’’ਤਿ. ਤੇ ‘‘ਆਮ, ਭਨ੍ਤੇ’’ਤਿ ਪਟਿਜਾਨਿਤ੍ਵਾ ਸੁਤਭਾਵਂ ਆਵਿਕਰੋਨ੍ਤਾ ਤਦੇਵ ਗਾਥਾਦ੍ਵਯਂ ਉਦਾਹਰਿਂਸੁ. ਸਤ੍ਥਾ ‘‘ਸਾਧੁ ਸਾਧੂ’’ਤਿ ਸਾਧੁਕਾਰਂ ਦਤ੍ਵਾ ਦੇਸਨਂ ਨਿਟ੍ਠਪੇਸਿ. ਏਵਂ ਤਾਵ ਇਦਂ ਸੁਤ੍ਤਂ ਇਤੋ ਏਕਤਿਂਸਕਪ੍ਪਮਤ੍ਥਕੇ ਸਿਖਿਨਾ ਭਗਵਤਾ ਕਥਿਤਂ.
ਅਮ੍ਹਾਕਂ ਪਨ ਭਗਵਾ ਸਬ੍ਬਞ੍ਞੁਤਂ ਪਤ੍ਤੋ ਪਵਤ੍ਤਿਤਵਰਧਮ੍ਮਚਕ੍ਕੋ ਸਾਵਤ੍ਥਿਂ ਉਪਨਿਸ੍ਸਾਯ ਜੇਤਵਨੇ ਵਿਹਰਨ੍ਤੋ ਜੇਟ੍ਠਮੂਲਮਾਸਪੁਣ੍ਣਮਦਿਵਸੇ ਭਿਕ੍ਖੂ ਆਮਨ੍ਤੇਤ੍ਵਾ ਇਮਂ ਅਰੁਣਵਤਿਸੁਤ੍ਤਂ ਪਟ੍ਠਪੇਸਿ. ਆਨਨ੍ਦਤ੍ਥੇਰੋ ਬੀਜਨਿਂ ਗਹੇਤ੍ਵਾ ਬੀਜਯਮਾਨੋ ਠਿਤਕੋਵ ਆਦਿਤੋ ਪਟ੍ਠਾਯ ਯਾਵ ਪਰਿਯੋਸਾਨਾ ਏਕਬ੍ਯਞ੍ਜਨਮ੍ਪਿ ਅਹਾਪੇਤ੍ਵਾ ਸਕਲਸੁਤ੍ਤਂ ਉਗ੍ਗਣ੍ਹਿ. ਸੋ ਪੁਨਦਿਵਸੇ ਪਿਣ੍ਡਪਾਤਪਟਿਕ੍ਕਨ੍ਤੋ ਦਸਬਲਸ੍ਸ ਵਤ੍ਤਂ ਦਸ੍ਸੇਤ੍ਵਾ ਅਤ੍ਤਨੋ ਦਿਵਾਵਿਹਾਰਟ੍ਠਾਨਂ ਗਨ੍ਤ੍ਵਾ ਸਦ੍ਧਿਵਿਹਾਰਿਕਨ੍ਤੇਵਾਸਿਕੇਸੁ ਵਤ੍ਤਂ ਦਸ੍ਸੇਤ੍ਵਾ ਪਕ੍ਕਨ੍ਤੇਸੁ ਹਿਯ੍ਯੋ ਕਥਿਤਂ ਅਰੁਣਵਤਿਸੁਤ੍ਤਂ ਆਵਜ੍ਜੇਨ੍ਤੋ ਨਿਸੀਦਿ. ਅਥਸ੍ਸ ਸਬ੍ਬਂ ਸੁਤ੍ਤਂ ਵਿਭੂਤਂ ਉਪਟ੍ਠਾਸਿ. ਸੋ ਚਿਨ੍ਤੇਸਿ – ‘‘ਸਿਖਿਸ੍ਸ ਭਗਵਤੋ ਅਗ੍ਗਸਾਵਕੋ ਬ੍ਰਹ੍ਮਲੋਕੇ ਠਤ੍ਵਾ ਚਕ੍ਕਵਾਲ਼ਸਹਸ੍ਸੇ ਅਨ੍ਧਕਾਰਂ ਵਿਧਮੇਤ੍ਵਾ ਸਰੀਰੋਭਾਸਂ ਦਸ੍ਸੇਤ੍ਵਾ ਅਤ੍ਤਨੋ ਸਦ੍ਦਂ ਸਾਵੇਨ੍ਤੋ ਧਮ੍ਮਕਥਂ ਕਥੇਸੀਤਿ ਹਿਯ੍ਯੋ ਸਤ੍ਥਾਰਾ ਕਥਿਤਂ, ਸਾਵਕਸ੍ਸ ਤਾਵ ਵਿਸਯੋ ਏਵਰੂਪੋ, ਦਸ ਪਾਰਮਿਯੋ ਪੂਰੇਤ੍ਵਾ ਸਬ੍ਬਞ੍ਞੁਤਂ ਪਤ੍ਤੋ ਪਨ ਸਮ੍ਮਾਸਮ੍ਬੁਦ੍ਧੋ ਕਿਤ੍ਤਕਂ ਠਾਨਂ ਸਰੇਨ ਵਿਞ੍ਞਾਪੇਯ੍ਯਾ’’ਤਿ. ਸੋ ਏਵਂ ਉਪ੍ਪਨ੍ਨਾਯ ਵਿਮਤਿਯਾ ਵਿਨੋਦਨਤ੍ਥਂ ਤਙ੍ਖਣੇਯੇਵ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਤਮਤ੍ਥਂ ਪੁਚ੍ਛਿ. ਏਤਮਤ੍ਥਂ ਦਸ੍ਸੇਤੁਂ ਅਥ ਖੋ ਆਯਸ੍ਮਾ ਆਨਨ੍ਦੋਤਿ ਵੁਤ੍ਤਂ.
ਤਤ੍ਥ ਸਮ੍ਮੁਖਾਤਿ ਸਮ੍ਮੁਖੀਭੂਤੇਨ ਮਯਾ ਏਤਂ ਸੁਤਂ, ਨ ਅਨੁਸ੍ਸਵੇਨ, ਨ ਦੂਤਪਰਮ੍ਪਰਾਯਾਤਿ ਇਮਿਨਾ ਅਧਿਪ੍ਪਾਯੇਨ ਏਵਮਾਹ. ਕੀਵਤਕਂ ਪਹੋਤਿ ਸਰੇਨ ਵਿਞ੍ਞਾਪੇਤੁਨ੍ਤਿ ਕਿਤ੍ਤਕਂ ਠਾਨਂ ਸਰੀਰੋਭਾਸੇਨ ਵਿਹਤਨ੍ਧਕਾਰਂ ਕਤ੍ਵਾ ਸਰੇਨ ਵਿਞ੍ਞਾਪੇਤੁਂ ਸਕ੍ਕੋਤਿ. ਸਾਵਕੋ ਸੋ, ਆਨਨ੍ਦ, ਅਪ੍ਪਮੇਯ੍ਯਾ ਤਥਾਗਤਾਤਿ ਇਦਂ ਭਗਵਾ ਇਮਿਨਾ ਅਧਿਪ੍ਪਾਯੇਨਾਹ – ਆਨਨ੍ਦ, ਤ੍ਵਂ ਕਿਂ ਵਦੇਸਿ, ਸੋ ਪਦੇਸਞਾਣੇ ਠਿਤੋ ਸਾਵਕੋ. ਤਥਾਗਤਾ ਪਨ ਦਸ ਪਾਰਮਿਯੋ ਪੂਰੇਤ੍ਵਾ ਸਬ੍ਬਞ੍ਞੁਤਞ੍ਞਾਣਂ ਪਤ੍ਤਾ ਅਪ੍ਪਮੇਯ੍ਯਾ. ਸੋ ਤ੍ਵਂ ਨਖਸਿਖਾਯ ਪਂਸੁਂ ਗਹੇਤ੍ਵਾ ਮਹਾਪਥਵਿਪਂਸੁਨਾ ਸਦ੍ਧਿਂ ਉਪਮੇਨ੍ਤੋ ਵਿਯ ਕਿਂ ਨਾਮੇਤਂ ਵਦੇਸਿ. ਅਞ੍ਞੋ ਹਿ ਸਾਵਕਾਨਂ ਵਿਸਯੋ, ਅਞ੍ਞੋ ਬੁਦ੍ਧਾਨਂ. ਅਞ੍ਞੋ ਸਾਵਕਾਨਂ ਗੋਚਰੋ, ਅਞ੍ਞੋ ਬੁਦ੍ਧਾਨਂ. ਅਞ੍ਞਂ ਸਾਵਕਾਨਂ ਬਲਂ, ਅਞ੍ਞਂ ਬੁਦ੍ਧਾਨਨ੍ਤਿ. ਇਤਿ ਭਗਵਾ ਇਮਿਨਾ ਅਧਿਪ੍ਪਾਯੇਨ ਅਪ੍ਪਮੇਯ੍ਯਭਾਵਂ ਵਤ੍ਵਾ ਤੁਣ੍ਹੀ ਅਹੋਸਿ.
ਥੇਰੋ ਦੁਤਿਯਮ੍ਪਿ ਪੁਚ੍ਛਿ. ਸਤ੍ਥਾ, ‘‘ਆਨਨ੍ਦ, ਤ੍ਵਂ ਤਾਲ਼ਚ੍ਛਿਦ੍ਦਂ ਗਹੇਤ੍ਵਾ ਅਨਨ੍ਤਾਕਾਸੇਨ ਉਪਮੇਨ੍ਤੋ ਵਿਯ, ਚਾਤਕਸਕੁਣਂ ਗਹੇਤ੍ਵਾ ਦਿਯਡ੍ਢਯੋਜਨਸਤਿਕੇਨ ਸੁਪਣ੍ਣਰਾਜੇਨ ਉਪਮੇਨ੍ਤੋ ਵਿਯ, ਹਤ੍ਥਿਸੋਣ੍ਡਾਯ ਉਦਕਂ ਗਹੇਤ੍ਵਾ ਮਹਾਗਙ੍ਗਾਯ ਉਪਮੇਨ੍ਤੋ ਵਿਯ, ਚਤੁਰਤਨਿਕੇ ਆਵਾਟੇ ਉਦਕਂ ਗਹੇਤ੍ਵਾ ਸਤ੍ਤਹਿ ਸਰੇਹਿ ਉਪਮੇਨ੍ਤੋ ਵਿਯ, ਨਾਲ਼ਿਕੋਦਨਮਤ੍ਤਲਾਭਿਂ ਮਨੁਸ੍ਸਂ ਗਹੇਤ੍ਵਾ ਚਕ੍ਕਵਤ੍ਤਿਰਞ੍ਞਾ ਉਪਮੇਨ੍ਤੋ ਵਿਯ, ਪਂਸੁਪਿਸਾਚਕਂ ਗਹੇਤ੍ਵਾ ਸਕ੍ਕੇਨ ਦੇਵਰਞ੍ਞਾ ਉਪਮੇਨ੍ਤੋ ਵਿਯ, ਖਜ੍ਜੋਪਨਕਪ੍ਪਭਂ ਗਹੇਤ੍ਵਾ ਸੂਰਿਯਪ੍ਪਭਾਯ ਉਪਮੇਨ੍ਤੋ ਵਿਯ ਕਿਂ ਨਾਮੇਤਂ ਵਦੇਸੀਤਿ ਦੀਪੇਨ੍ਤੋ ਦੁਤਿਯਮ੍ਪਿ ਅਪ੍ਪਮੇਯ੍ਯਭਾਵਮੇਵ ਵਤ੍ਵਾ ਤੁਣ੍ਹੀ ਅਹੋਸਿ. ਤਤੋ ਥੇਰੋ ਚਿਨ੍ਤੇਸਿ – ‘‘ਸਤ੍ਥਾ ਮਯਾ ਪੁਚ੍ਛਿਤੋ ਨ ਤਾਵ ਕਥੇਸਿ, ਹਨ੍ਦ ਨਂ ਯਾਵਤਤਿਯਂ ਯਾਚਿਤ੍ਵਾ ਬੁਦ੍ਧਸੀਹਨਾਦਂ ਨਦਾਪੇਸ੍ਸਾਮੀ’’ਤਿ. ਸੋ ਤਤਿਯਮ੍ਪਿ ਯਾਚਿ. ਤਂ ਦਸ੍ਸੇਤੁਂ ਤਤਿਯਮ੍ਪਿ ਖੋਤਿਆਦਿ ਵੁਤ੍ਤਂ. ਅਥਸ੍ਸ ਭਗਵਾ ਬ੍ਯਾਕਰੋਨ੍ਤੋ ਸੁਤਾ ਤੇ ਆਨਨ੍ਦਾਤਿਆਦਿਮਾਹ. ਥੇਰੋ ਚਿਨ੍ਤੇਸਿ – ‘‘ਸਤ੍ਥਾ ਮੇ ‘ਸੁਤਾ ਤੇ, ਆਨਨ੍ਦ, ਸਹਸ੍ਸੀ ਚੂਲ਼ਨਿਕਾ ਲੋਕਧਾਤੂ’ਤਿ ਏਤ੍ਤਕਮੇਵ ਵਤ੍ਵਾ ਤੁਣ੍ਹੀ ਜਾਤੋ, ਇਦਾਨਿ ਬੁਦ੍ਧਸੀਹਨਾਦਂ ਨਦਿਸ੍ਸਤੀ’’ਤਿ ਸੋ ਸਤ੍ਥਾਰਂ ਯਾਚਨ੍ਤੋ ਏਤਸ੍ਸ ਭਗਵਾ ਕਾਲੋਤਿਆਦਿਮਾਹ.
ਭਗਵਾਪਿਸ੍ਸ ਵਿਤ੍ਥਾਰਕਥਂ ਕਥੇਤੁਂ ਤੇਨ ਹਾਨਨ੍ਦਾਤਿਆਦਿਮਾਹ. ਤਤ੍ਥ ਯਾਵਤਾਤਿ ਯਤ੍ਤਕਂ ਠਾਨਂ. ਚਨ੍ਦਿਮਸੂਰਿਯਾਤਿ ਚਨ੍ਦਿਮਾ ਚ ਸੂਰਿਯੋ ਚ. ਪਰਿਹਰਨ੍ਤੀਤਿ ਵਿਚਰਨ੍ਤਿ. ਦਿਸਾ ਭਨ੍ਤੀਤਿ ਸਬ੍ਬਦਿਸਾ ਓਭਾਸਨ੍ਤਿ. ਵਿਰੋਚਨਾਤਿ ਵਿਰੋਚਮਾਨਾ. ਏਤ੍ਤਾਵਤਾ ਏਕਚਕ੍ਕਵਾਲ਼ਂ ਪਰਿਚ੍ਛਿਨ੍ਦਿਤ੍ਵਾ ਦਸ੍ਸਿਤਂ ਹੋਤਿ. ਇਦਾਨਿ ਤਂ ਸਹਸ੍ਸਗੁਣਂ ਕਤ੍ਵਾ ਦਸ੍ਸੇਨ੍ਤੋ ਤਾਵ ਸਹਸ੍ਸਧਾ ਲੋਕੋਤਿ ਆਹ. ਤਸ੍ਮਿਂ ਸਹਸ੍ਸਧਾ ਲੋਕੇਤਿ ਤਸ੍ਮਿਂ ਸਹਸ੍ਸਚਕ੍ਕਵਾਲ਼ੇ. ਸਹਸ੍ਸਂ ਚਾਤੁਮਹਾਰਾਜਿਕਾਨਨ੍ਤਿ ਸਹਸ੍ਸਂ ਚਾਤੁਮਹਾਰਾਜਿਕਾਨਂ ਦੇਵਲੋਕਾਨਂ. ਯਸ੍ਮਾ ਪਨ ਏਕੇਕਸ੍ਮਿਂ ਚਕ੍ਕਵਾਲ਼ੇ ਚਤ੍ਤਾਰੋ ਚਤ੍ਤਾਰੋ ਮਹਾਰਾਜਾਨੋ, ਤਸ੍ਮਾ ਚਤ੍ਤਾਰਿ ਮਹਾਰਾਜਸਹਸ੍ਸਾਨੀਤਿ ਵੁਤ੍ਤਂ. ਇਮਿਨਾ ਉਪਾਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਚੂਲ਼ਨਿਕਾਤਿ ਖੁਦ੍ਦਿਕਾ. ਅਯਂ ਸਾਵਕਾਨਂ ਵਿਸਯੋ. ਕਸ੍ਮਾ ਪਨੇਸਾ ਆਨੀਤਾਤਿ? ਮਜ੍ਝਿਮਿਕਾਯ ਲੋਕਧਾਤੁਯਾ ਪਰਿਚ੍ਛੇਦਦਸ੍ਸਨਤ੍ਥਂ.
ਯਾਵਤਾਤਿ ਯਤ੍ਤਕਾ. ਤਾਵ ਸਹਸ੍ਸਧਾਤਿ ਤਾਵ ਸਹਸ੍ਸਭਾਗੇਨ. ਦ੍ਵਿਸਹਸ੍ਸੀ ਮਜ੍ਝਿਮਿਕਾ ਲੋਕਧਾਤੂਤਿ ਅਯਂ ਸਹਸ੍ਸਚਕ੍ਕਵਾਲ਼ਾਨਿ ਸਹਸ੍ਸਭਾਗੇਨ ਗਣੇਤ੍ਵਾ ਦਸਸਤਸਹਸ੍ਸਚਕ੍ਕਵਾਲ਼ਪਰਿਮਾਣਾ ਦ੍ਵਿਸਹਸ੍ਸੀ ਮਜ੍ਝਿਮਿਕਾ ਨਾਮ ਲੋਕਧਾਤੁ. ਅਯਂ ਸਾਵਕਾਨਂ ਅਵਿਸਯੋ, ਬੁਦ੍ਧਾਨਮੇਵ ਵਿਸਯੋ. ਏਤ੍ਤਕੇਪਿ ਹਿ ਠਾਨੇ ਤਥਾਗਤਾ ਅਨ੍ਧਕਾਰਂ ਵਿਧਮੇਤ੍ਵਾ ਸਰੀਰੋਭਾਸਂ ਦਸ੍ਸੇਤ੍ਵਾ ਸਰੇਨ ਵਿਞ੍ਞਾਪੇਤੁਂ ਸਕ੍ਕੋਨ੍ਤੀਤਿ ਦੀਪੇਤਿ. ਏਤ੍ਤਕੇਨ ਬੁਦ੍ਧਾਨਂ ਜਾਤਿਕ੍ਖੇਤ੍ਤਂ ਨਾਮ ਦਸ੍ਸਿਤਂ. ਬੋਧਿਸਤ੍ਤਾਨਞ੍ਹਿ ਪਚ੍ਛਿਮਭਵੇ ਦੇਵਲੋਕਤੋ ਚਵਿਤ੍ਵਾ ਮਾਤੁਕੁਚ੍ਛਿਯਂ ਪਟਿਸਨ੍ਧਿਗ੍ਗਹਣਦਿਵਸੇ ਚ ਕੁਚ੍ਛਿਤੋ ਨਿਕ੍ਖਮਨਦਿਵਸੇ ਚ ਮਹਾਭਿਨਿਕ੍ਖਮਨਦਿਵਸੇ ਚ ਸਮ੍ਬੋਧਿਧਮ੍ਮਚਕ੍ਕਪ੍ਪਵਤ੍ਤਨਆਯੁਸਙ੍ਖਾਰਵੋਸ੍ਸਜ੍ਜਨਪਰਿਨਿਬ੍ਬਾਨਦਿਵਸੇਸੁ ਚ ਏਤ੍ਤਕਂ ਠਾਨਂ ਕਮ੍ਪਤਿ.
ਤਿਸਹਸ੍ਸੀ ਮਹਾਸਹਸ੍ਸੀਤਿ ਸਹਸ੍ਸਿਤੋ ਪਟ੍ਠਾਯ ਤਤਿਯਾਤਿ ਤਿਸਹਸ੍ਸੀ, ਸਹਸ੍ਸਂ ਸਹਸ੍ਸਧਾ ਕਤ੍ਵਾ ਗਣਿਤਂ ਮਜ੍ਝਿਮਿਕਂ ਸਹਸ੍ਸਧਾ ਕਤ੍ਵਾ ਗਣਿਤਤ੍ਤਾ ਮਹਨ੍ਤੇਹਿ ਸਹਸ੍ਸੇਹਿ ਗਣਿਤਾਤਿ ਮਹਾਸਹਸ੍ਸੀ. ਏਤ੍ਤਾਵਤਾ ਕੋਟਿਸਤਸਹਸ੍ਸਚਕ੍ਕਵਾਲ਼ਪਰਿਮਾਣੋ ਲੋਕੋ ਦਸ੍ਸਿਤੋ ਹੋਤਿ. ਭਗਵਾ ਆਕਙ੍ਖਮਾਨੋ ਏਤ੍ਤਕੇ ਠਾਨੇ ਅਨ੍ਧਕਾਰਂ ਵਿਧਮੇਤ੍ਵਾ ਸਰੀਰੋਭਾਸਂ ਦਸ੍ਸੇਤ੍ਵਾ ਸਰੇਨ ਵਿਞ੍ਞਾਪੇਯ੍ਯਾਤਿ. ਗਣਕਪੁਤ੍ਤਤਿਸ੍ਸਤ੍ਥੇਰੋ ਪਨ ਏਵਮਾਹ – ‘‘ਨ ਤਿਸਹਸ੍ਸਿਮਹਾਸਹਸ੍ਸਿਲੋਕਧਾਤੁਯਾ ਏਵਂ ਪਰਿਮਾਣਂ. ਇਦਞ੍ਹਿ ਆਚਰਿਯਾਨਂ ਸਜ੍ਝਾਯਮੁਲ਼੍ਹਕਂ ਵਾਚਾਯ ਪਰਿਹੀਨਟ੍ਠਾਨਂ, ਦਸਕੋਟਿਸਤਸਹਸ੍ਸਚਕ੍ਕਵਾਲ਼ਪਰਿਮਾਣਂ ਪਨ ਠਾਨਂ ਤਿਸਹਸ੍ਸਿਮਹਾਸਹਸ੍ਸਿਲੋਕਧਾਤੁ ਨਾਮਾ’’ਤਿ. ਏਤ੍ਤਾਵਤਾ ਹਿ ਭਗਵਤਾ ਆਣਾਕ੍ਖੇਤ੍ਤਂ ਨਾਮ ਦਸ੍ਸਿਤਂ. ਏਤਸ੍ਮਿਞ੍ਹਿ ਅਨ੍ਤਰੇ ਆਟਾਨਾਟਿਯਪਰਿਤ੍ਤਇਸਿਗਿਲਿਪਰਿਤ੍ਤਧਜਗ੍ਗਪਰਿਤ੍ਤਬੋਜ੍ਝਙ੍ਗਪਰਿਤ੍ਤਖਨ੍ਧਪਰਿਤ੍ਤ- ਮੋਰਪਰਿਤ੍ਤਮੇਤ੍ਤਪਰਿਤ੍ਤਰਤਨਪਰਿਤ੍ਤਾਨਂ ਆਣਾ ਫਰਤਿ. ਯਾਵਤਾ ਪਨ ਆਕਙ੍ਖੇਯ੍ਯਾਤਿ ਯਤ੍ਤਕਂ ਠਾਨਂ ਇਚ੍ਛੇਯ੍ਯ, ਇਮਿਨਾ ਵਿਸਯਕ੍ਖੇਤ੍ਤਂ ਦਸ੍ਸੇਤਿ. ਬੁਦ੍ਧਾਨਞ੍ਹਿ ਵਿਸਯਕ੍ਖੇਤ੍ਤਸ੍ਸ ਪਮਾਣਪਰਿਚ੍ਛੇਦੋ ਨਾਮ ਨਤ੍ਥਿ, ਨਤ੍ਥਿਕਭਾਵੇ ਚਸ੍ਸ ਇਮਂ ਓਪਮ੍ਮਂ ਆਹਰਨ੍ਤਿ – ਕੋਟਿਸਤਸਹਸ੍ਸਚਕ੍ਕਵਾਲ਼ਮ੍ਹਿ ਯਾਵ ਬ੍ਰਹ੍ਮਲੋਕਾ ਸਾਸਪੇਹਿ ਪੂਰੇਤ੍ਵਾ ਸਚੇ ਕੋਚਿ ਪੁਰਤ੍ਥਿਮਾਯ ਦਿਸਾਯ ਏਕਚਕ੍ਕਵਾਲ਼ੇ ਏਕਂ ਸਾਸਪਂ ਪਕ੍ਖਿਪਨ੍ਤੋ ਆਗਚ੍ਛੇਯ੍ਯ, ਸਬ੍ਬੇਪਿ ਤੇ ਸਾਸਪਾ ਪਰਿਕ੍ਖਯਂ ਗਚ੍ਛੇਯ੍ਯੁਂ, ਨ ਤ੍ਵੇਵ ਪੁਰਤ੍ਥਿਮਾਯ ਦਿਸਾਯ ਚਕ੍ਕਵਾਲ਼ਾਨਿ. ਦਕ੍ਖਿਣਾਦੀਸੁਪਿ ਏਸੇਵ ਨਯੋ. ਤਤ੍ਥ ਬੁਦ੍ਧਾਨਂ ਅਵਿਸਯੋ ਨਾਮ ਨਤ੍ਥਿ.
ਏਵਂ ਵੁਤ੍ਤੇ ਥੇਰੋ ਚਿਨ੍ਤੇਸਿ – ‘‘ਸਤ੍ਥਾ ਏਵਮਾਹ – ‘ਆਕਙ੍ਖਮਾਨੋ, ਆਨਨ੍ਦ, ਤਥਾਗਤੋ ਤਿਸਹਸ੍ਸਿਮਹਾਸਹਸ੍ਸਿਲੋਕਧਾਤੁਂ ਸਰੇਨ ਵਿਞ੍ਞਾਪੇਯ੍ਯ, ਯਾਵਤਾ ਪਨ ਆਕਙ੍ਖੇਯ੍ਯਾ’ਤਿ. ਵਿਸਮੋ ਖੋ ਪਨਾਯਂ ਲੋਕੋ, ਅਨਨ੍ਤਾਨਿ ਚਕ੍ਕਵਾਲ਼ਾਨਿ, ਏਕਸ੍ਮਿਂ ਠਾਨੇ ਸੂਰਿਯੋ ਉਗ੍ਗਤੋ ਹੋਤਿ, ਏਕਸ੍ਮਿਂ ਠਾਨੇ ਮਜ੍ਝੇ ਠਿਤੋ, ਏਕਸ੍ਮਿਂ ਠਾਨੇ ਅਤ੍ਥਙ੍ਗਤੋ. ਏਕਸ੍ਮਿਂ ਠਾਨੇ ਪਠਮਯਾਮੋ ਹੋਤਿ, ਏਕਸ੍ਮਿਂ ਠਾਨੇ ਮਜ੍ਝਿਮਯਾਮੋ, ਏਕਸ੍ਮਿਂ ਠਾਨੇ ਪਚ੍ਛਿਮਯਾਮੋ. ਸਤ੍ਤਾਪਿ ਕਮ੍ਮਪ੍ਪਸੁਤਾ, ਖਿਡ੍ਡਾਪਸੁਤਾ, ਆਹਾਰਪ੍ਪਸੁਤਾਤਿ ਏਵਂ ਤੇਹਿ ਤੇਹਿ ਕਾਰਣੇਹਿ ਵਿਕ੍ਖਿਤ੍ਤਾ ਚ ਪਮਤ੍ਤਾ ਚ ਹੋਨ੍ਤਿ. ਕਥਂ ਨੁ ਖੋ ਤੇ ਸਤ੍ਥਾ ਸਰੇਨ ਵਿਞ੍ਞਾਪੇਯ੍ਯਾ’’ਤਿ. ਸੋ ਏਵਂ ਚਿਨ੍ਤੇਤ੍ਵਾ ਵਿਮਤਿਚ੍ਛੇਦਨਤ੍ਥਂ ਤਥਾਗਤਂ ਪੁਚ੍ਛਨ੍ਤੋ ਯਥਾ ਕਥਂ ਪਨਾਤਿਆਦਿਮਾਹ.
ਅਥਸ੍ਸ ਸਤ੍ਥਾ ਬ੍ਯਾਕਰੋਨ੍ਤੋ ਇਧਾਨਨ੍ਦ, ਤਥਾਗਤੋਤਿਆਦਿਮਾਹ. ਤਤ੍ਥ ਓਭਾਸੇਨ ਫਰੇਯ੍ਯਾਤਿ ਸਰੀਰੋਭਾਸੇਨ ਫਰੇਯ੍ਯ. ਫਰਮਾਨੋ ਪਨੇਸ ਕਿਂ ਕਰੇਯ੍ਯਾਤਿ? ਯਸ੍ਮਿਂ ਠਾਨੇ ਸੂਰਿਯੋ ਪਞ੍ਞਾਯਤਿ, ਤਤ੍ਥ ਨਂ ਅਤ੍ਤਨੋ ਆਨੁਭਾਵੇਨ ਅਤ੍ਥਂ ਗਮੇਯ੍ਯ. ਯਤ੍ਥ ਪਨ ਨ ਪਞ੍ਞਾਯਤਿ, ਤਤ੍ਥ ਨਂ ਉਟ੍ਠਾਪੇਤ੍ਵਾ ਮਜ੍ਝੇ ਠਪੇਯ੍ਯ. ਤਤੋ ਯਤ੍ਥ ਸੂਰਿਯੋ ਪਞ੍ਞਾਯਤਿ, ਤਤ੍ਥ ਮਨੁਸ੍ਸਾ ‘‘ਅਧੁਨਾਵ ਸੂਰਿਯੋ ਪਞ੍ਞਾਯਿਤ੍ਥ, ਸੋ ਇਦਾਨੇਵ ਅਤ੍ਥਙ੍ਗਮਿਤੋ, ਨਾਗਾਵਟ੍ਟੋ ਨੁ ਖੋ ਅਯਂ, ਭੂਤਾਵਟ੍ਟਯਕ੍ਖਾਵਟ੍ਟਦੇਵਤਾਵਟ੍ਟਾਨਂ ਅਞ੍ਞਤਰੋ’’ਤਿ ਵਿਤ੍ਤਕ੍ਕਂ ਉਪ੍ਪਾਦੇਯ੍ਯੁਂ. ਯਤ੍ਥ ਪਨ ਨ ਪਞ੍ਞਾਯਤਿ, ਤਤ੍ਥ ਮਨੁਸ੍ਸਾ ‘‘ਅਧੁਨਾਵ ਸੂਰਿਯੋ ਅਤ੍ਥਙ੍ਗਮਿਤੋ, ਸ੍ਵਾਯਂ ਇਦਾਨੇਵ ਉਟ੍ਠਿਤੋ, ਕਿਂ ਨੁ ਖੋ ਅਯਂ ਨਾਗਾਵਟ੍ਟਭੂਤਾਵਟ੍ਟਯਕ੍ਖਾਵਟ੍ਟਦੇਵਤਾਵਟ੍ਟਾਨਂ ਅਞ੍ਞਤਰੋ’’ਤਿ ਵਿਤਕ੍ਕਂ ਉਪ੍ਪਾਦੇਯ੍ਯੁਂ. ਤਤੋ ਤੇਸੁ ਮਨੁਸ੍ਸੇਸੁ ਆਲੋਕਞ੍ਚ ਅਨ੍ਧਕਾਰਞ੍ਚ ਆਵਜ੍ਜਿਤ੍ਵਾ ‘‘ਕਿਂ ਪਚ੍ਚਯਾ ਨੁ ਖੋ ਇਦ’’ਨ੍ਤਿ ਪਰਿਯੇਸਮਾਨੇਸੁ ਸਤ੍ਥਾ ਨੀਲਕਸਿਣਂ ਸਮਾਪਜ੍ਜਿਤ੍ਵਾ ਬਹਲਨ੍ਧਕਾਰਂ ਪਤ੍ਥਰੇਯ੍ਯ. ਕਸ੍ਮਾ? ਤੇਸਂ ਕਮ੍ਮਾਦਿਪ੍ਪਸੁਤਾਨਂ ਸਤ੍ਤਾਨਂ ਸਨ੍ਤਾਸਜਨਨਤ੍ਥਂ. ਅਥ ਨੇਸਂ ਸਨ੍ਤਾਸਂ ਆਪਨ੍ਨਭਾਵਂ ਞਤ੍ਵਾ ਓਦਾਤਕਸਿਣਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਪਣ੍ਡਰਂ ਘਨਬੁਦ੍ਧਰਸ੍ਮਿਂ ਵਿਸ੍ਸਜ੍ਜੇਨ੍ਤੋ ਚਨ੍ਦਸਹਸ੍ਸਸੂਰਿਯਸਹਸ੍ਸਉਟ੍ਠਾਨਕਾਲੋ ਵਿਯ ਏਕਪ੍ਪਹਾਰੇਨੇਵ ਸਬ੍ਬਂ ਏਕਾਲੋਕਂ ਕਰੇਯ੍ਯ. ਤਞ੍ਚ ਖੋ ਤਿਲਬੀਜਮਤ੍ਤੇਨ ਕਾਯਪ੍ਪਦੇਸੇਨ ਓਭਾਸਂ ਮੁਞ੍ਚਨ੍ਤੋ. ਯੋ ਹਿ ਚਕ੍ਕਵਾਲ਼ਪਥਵਿਂ ਦੀਪਕਪਲ੍ਲਕਂ ਕਤ੍ਵਾ ਮਹਾਸਮੁਦ੍ਦੇ ਉਦਕਂ ਤੇਲਂ ਕਤ੍ਵਾ ਸਿਨੇਰੁਂ ਵਟ੍ਟਿਂ ਕਤ੍ਵਾ ਅਞ੍ਞਸ੍ਮਿਂ ਸਿਨੇਰੁਮੁਦ੍ਧਨਿ ਠਪੇਤ੍ਵਾ ਜਾਲੇਯ੍ਯ, ਸੋ ਏਕਚਕ੍ਕਵਾਲ਼ੇਯੇਵ ਆਲੋਕਂ ਕਰੇਯ੍ਯ. ਤਤੋ ਪਰਂ ਵਿਦਤ੍ਥਿਮ੍ਪਿ ਓਭਾਸੇਤੁਂ ਨ ਸਕ੍ਕੁਣੇਯ੍ਯ. ਤਥਾਗਤੋ ਪਨ ਤਿਲਫਲਪ੍ਪਮਾਣੇਨ ਸਰੀਰਪ੍ਪਦੇਸੇਨ ਓਭਾਸਂ ਮੁਞ੍ਚਿਤ੍ਵਾ ਤਿਸਹਸ੍ਸਿਮਹਾਸਹਸ੍ਸਿਲੋਕਧਾਤੁਂ ਏਕੋਭਾਸਂ ਕਰੇਯ੍ਯ ਤਤੋ ਵਾ ਪਨ ਭਿਯ੍ਯੋ. ਏਵਂ ਮਹਨ੍ਤਾ ਹਿ ਬੁਦ੍ਧਗੁਣਾਤਿ.
ਤਂ ਆਲੋਕਂ ਸਞ੍ਜਾਨੇਯ੍ਯੁਨ੍ਤਿ ਤਂ ਆਲੋਕਂ ਦਿਸ੍ਵਾ ‘‘ਯੇਨ ਸੂਰਿਯੋ ਅਤ੍ਥਞ੍ਚੇਵ ਗਮਿਤੋ ਉਟ੍ਠਾਪਿਤੋ ਚ, ਬਹਲਨ੍ਧਕਾਰਞ੍ਚ ਵਿਸ੍ਸਟ੍ਠਂ, ਏਸ ਸੋ ਪੁਰਿਸੋ ਇਦਾਨਿ ਆਲੋਕਂ ਕਤ੍ਵਾ ਠਿਤੋ, ਅਹੋ ਅਚ੍ਛਰਿਯਪੁਰਿਸੋ’’ਤਿ ਅਞ੍ਜਲਿਂ ਪਗ੍ਗਯ੍ਹ ਨਮਸ੍ਸਮਾਨਾ ਨਿਸੀਦੇਯ੍ਯੁਂ. ਸਦ੍ਦਮਨੁਸ੍ਸਾਵੇਯ੍ਯਾਤਿ ਧਮ੍ਮਕਥਾਸਦ੍ਦਮਨੁਸ੍ਸਾਵੇਯ੍ਯ. ਯੋ ਹਿ ਏਕਂ ਚਕ੍ਕਵਾਲ਼ਪਬ੍ਬਤਂ ਭੇਰਿਂ ਕਤ੍ਵਾ ਮਹਾਪਥਵਿਂ ਭੇਰਿਚਮ੍ਮਂ ਕਤ੍ਵਾ ਸਿਨੇਰੁਂ ਦਣ੍ਡਂ ਕਤ੍ਵਾ ਅਞ੍ਞਸ੍ਮਿਂ ਸਿਨੇਰੁਮਤ੍ਥਕੇ ਠਪੇਤ੍ਵਾ ਆਕੋਟੇਯ੍ਯ, ਸੋ ਏਕਚਕ੍ਕਵਾਲ਼ੇਯੇਵ ਤਂ ਸਦ੍ਦਂ ਸਾਵੇਯ੍ਯ, ਪਰਤੋ ਵਿਦਤ੍ਥਿਮ੍ਪਿ ਅਤਿਕ੍ਕਾਮੇਤੁਂ ਨ ਸਕ੍ਕੁਣੇਯ੍ਯ. ਤਥਾਗਤੋ ਪਨ ਪਲ੍ਲਙ੍ਕੇ ਵਾ ਪੀਠੇ ਵਾ ਨਿਸੀਦਿਤ੍ਵਾ ਤਿਸਹਸ੍ਸਿਮਹਾਸਹਸ੍ਸਿਲੋਕਧਾਤੁਂ ਸਰੇਨ ਵਿਞ੍ਞਾਪੇਤਿ, ਤਤੋ ਵਾ ਪਨ ਭਿਯ੍ਯੋ, ਏਵਂ ਮਹਾਨੁਭਾਵਾ ਤਥਾਗਤਾਤਿ. ਇਤਿ ਭਗਵਾ ਇਮਿਨਾ ਏਤ੍ਤਕੇਨ ਵਿਸਯਕ੍ਖੇਤ੍ਤਮੇਵ ਦਸ੍ਸੇਤਿ.
ਇਮਞ੍ਚ ਪਨ ਬੁਦ੍ਧਸੀਹਨਾਦਂ ਸੁਤ੍ਵਾ ਥੇਰਸ੍ਸ ਅਬ੍ਭਨ੍ਤਰੇ ਬਲਵਪੀਤਿ ਉਪ੍ਪਨ੍ਨਾ, ਸੋ ਪੀਤਿਵਸੇਨ ਉਦਾਨਂ ਉਦਾਨੇਨ੍ਤੋ ਲਾਭਾ ਵਤ ਮੇਤਿਆਦਿਮਾਹ. ਤਤ੍ਥ ਯਸ੍ਸ ਮੇ ਸਤ੍ਥਾ ਏਵਂਮਹਿਦ੍ਧਿਕੋਤਿ ਯਸ੍ਸ ਮਯ੍ਹਂ ਸਤ੍ਥਾ ਏਵਂਮਹਿਦ੍ਧਿਕੋ, ਤਸ੍ਸ ਮਯ੍ਹਂ ਏਵਂਮਹਿਦ੍ਧਿਕਸ੍ਸ ਸਤ੍ਥੁ ਪਟਿਲਾਭੋ ਲਾਭਾ ਚੇਵ ਸੁਲਦ੍ਧਞ੍ਚਾਤਿ ਅਤ੍ਥੋ. ਅਥ ਵਾ ਯ੍ਵਾਹਂ ਏਵਰੂਪਸ੍ਸ ਸਤ੍ਥੁਨੋ ਪਤ੍ਤਚੀਵਰਂ ਗਹੇਤ੍ਵਾ ਵਿਚਰਿਤੁਂ, ਪਾਦਪਰਿਕਮ੍ਮਂ ਪਿਟ੍ਠਿਪਰਿਕਮ੍ਮਂ ਕਾਤੁਂ, ਮੁਖਧੋਵਨਉਦਕਨ੍ਹਾਨੋਦਕਾਨਿ ਦਾਤੁਂ, ਗਨ੍ਧਕੁਟਿਪਰਿਵੇਣਂ ਸਮ੍ਮਜ੍ਜਿਤੁਂ, ਉਪ੍ਪਨ੍ਨਾਯ ਕਙ੍ਖਾਯ ਪਞ੍ਹਂ ਪੁਚ੍ਛਿਤੁਂ, ਮਧੁਰਧਮ੍ਮਕਥਞ੍ਚ ਸੋਤੁਂ ਲਭਾਮਿ, ਏਤੇ ਸਬ੍ਬੇਪਿ ਮਯ੍ਹਂ ਲਾਭਾ ਚੇਵ ਸੁਲਦ੍ਧਞ੍ਚਾਤਿਪਿ ਸਨ੍ਧਾਯ ਏਵਮਾਹ. ਏਤ੍ਥ ਚ ਭਗਵਤੋ ਅਨ੍ਧਕਾਰਾਲੋਕਸਦ੍ਦਸਵਨਸਙ੍ਖਾਤਾਨਂ ਇਦ੍ਧੀਨਂ ਮਹਨ੍ਤਤਾਯ ਮਹਿਦ੍ਧਿਕਤਾ, ਤਾਸਂਯੇਵ ਅਨੁਫਰਣੇਨ ਮਹਾਨੁਭਾਵਤਾ ਵੇਦਿਤਬ੍ਬਾ. ਉਦਾਯੀਤਿ ਲਾਲ਼ੁਦਾਯਿਤ੍ਥੇਰੋ. ਸੋ ਕਿਰ ਪੁਬ੍ਬੇ ਉਪਟ੍ਠਾਕਤ੍ਥੇਰੇ ਆਘਾਤਂ ਬਨ੍ਧਿਤ੍ਵਾ ਚਰਤਿ. ਤਸ੍ਮਾ ਇਦਾਨਿ ਓਕਾਸਂ ਲਭਿਤ੍ਵਾ ਇਮਸ੍ਮਿਂ ਬੁਦ੍ਧਸੀਹਨਾਦਪਰਿਯੋਸਾਨੇ ਜਲਮਾਨਂ ਦੀਪਸਿਖਂ ਨਿਬ੍ਬਾਪੇਨ੍ਤੋ ਵਿਯ ਚਰਨ੍ਤਸ੍ਸ ਗੋਣਸ੍ਸ ਤੁਣ੍ਡੇ ਪਹਾਰਂ ਦੇਨ੍ਤੋ ਵਿਯ ਭਤ੍ਤਭਰਿਤਂ ਪਾਤਿਂ ਅਵਕੁਜ੍ਜਨ੍ਤੋ ਵਿਯ ਥੇਰਸ੍ਸ ਪਸਾਦਭਙ੍ਗਂ ਕਰੋਨ੍ਤੋ ਏਵਮਾਹ.
ਏਵਂ ਵੁਤ੍ਤੇ ਭਗਵਾਤਿ ਏਵਂ ਉਦਾਯਿਤ੍ਥੇਰੇਨ ਵੁਤ੍ਤੇ ਭਗਵਾ ਯਥਾ ਨਾਮ ਪਪਾਤਤਟੇ ਠਤ੍ਵਾ ਪਵੇਧਮਾਨਂ ਪੁਰਿਸਂ ਏਕਮਨ੍ਤੇ ਠਿਤੋ ਹਿਤੇਸੀ ਪੁਰਿਸੋ ‘‘ਇਤੋ ਏਹਿ ਇਤੋ ਏਹੀ’’ਤਿ ਪੁਨਪ੍ਪੁਨਂ ਵਦੇਯ੍ਯ, ਏਵਮੇਵਂ ਉਦਾਯਿਤ੍ਥੇਰਂ ਤਸ੍ਮਾ ਵਚਨਾ ਨਿਵਾਰੇਨ੍ਤੋ ਮਾ ਹੇਵਂ ਉਦਾਯਿ, ਮਾ ਹੇਵਂ ਉਦਾਯੀਤਿ ਆਹ. ਤਤ੍ਥ ਹੀਤਿ ਨਿਪਾਤਮਤ੍ਤਂ, ਮਾ ਏਵਂ ਅਵਚਾਤਿ ਅਤ੍ਥੋ. ਮਹਾਰਜ੍ਜਨ੍ਤਿ ਚਕ੍ਕਵਤ੍ਤਿਰਜ੍ਜਂ. ਨਨੁ ਚ ਸਤ੍ਥਾ ਏਕਸ੍ਸ ਸਾਵਕਸ੍ਸ ਧਮ੍ਮਦੇਸਨਾਯ ਉਪ੍ਪਨ੍ਨਪਸਾਦਸ੍ਸ ਮਹਾਨਿਸਂਸਂ ਅਪਰਿਚ੍ਛਿਨ੍ਨਂ ਅਕਾਸਿ, ਸੋ ਕਸ੍ਮਾ ਇਮਸ੍ਸ ਬੁਦ੍ਧਸੀਹਨਾਦਂ ਆਰਬ੍ਭ ਉਪ੍ਪਨ੍ਨਸ੍ਸ ਪਸਾਦਸ੍ਸ ਆਨਿਸਂਸਂ ਪਰਿਚ੍ਛਿਨ੍ਦਤੀਤਿ? ਅਰਿਯਸਾਵਕਸ੍ਸ ਏਤ੍ਤਕਅਤ੍ਤਭਾਵਪਰਿਮਾਣਤ੍ਤਾ. ਦਨ੍ਧਪਞ੍ਞੋਪਿ ਹਿ ਸੋਤਾਪਨ੍ਨੋ ਸਤ੍ਤਕ੍ਖਤ੍ਤੁਂ ਦੇਵੇਸੁ ਚ ਮਨੁਸ੍ਸੇਸੁ ਚ ਅਤ੍ਤਭਾਵਂ ਪਟਿਲਭਤਿ, ਤੇਨਸ੍ਸ ਗਤਿਂ ਪਰਿਚ੍ਛਿਨ੍ਦਨ੍ਤੋ ਏਵਮਾਹ. ਦਿਟ੍ਠੇਵ ਧਮ੍ਮੇਤਿ ਇਮਸ੍ਮਿਂਯੇਵ ਅਤ੍ਤਭਾਵੇ ਠਤ੍ਵਾ. ਪਰਿਨਿਬ੍ਬਾਯਿਸ੍ਸਤੀਤਿ ਅਪ੍ਪਚ੍ਚਯਪਰਿਨਿਬ੍ਬਾਨੇਨ ਪਰਿਨਿਬ੍ਬਾਯਿਸ੍ਸਤਿ. ਇਤਿ ਨਿਬ੍ਬਾਨੇਨ ਕੂਟਂ ਗਣ੍ਹਨ੍ਤੋ ਇਮਂ ਸੀਹਨਾਦਸੁਤ੍ਤਂ ਨਿਟ੍ਠਾਪੇਸੀਤਿ.
ਆਨਨ੍ਦਵਗ੍ਗੋ ਤਤਿਯੋ.