(੭) ੨. ਮਹਾਵਗ੍ਗੋ
੧. ਤਿਤ੍ਥਾਯਤਨਸੁਤ੍ਤਵਣ੍ਣਨਾ
੬੨. ਦੁਤਿਯਸ੍ਸ ਪਠਮੇ ਤਿਤ੍ਥਾਯਤਨਾਨੀਤਿ ਤਿਤ੍ਥਭੂਤਾਨਿ ਆਯਤਨਾਨਿ, ਤਿਤ੍ਥਿਯਾਨਂ ਵਾ ਆਯਤਨਾਨਿ. ਤਤ੍ਥ ਤਿਤ੍ਥਂ ਜਾਨਿਤਬ੍ਬਂ, ਤਿਤ੍ਥਕਰਾ ਜਾਨਿਤਬ੍ਬਾ, ਤਿਤ੍ਥਿਯਾ ਜਾਨਿਤਬ੍ਬਾ, ਤਿਤ੍ਥਿਯਸਾਵਕਾ ਜਾਨਿਤਬ੍ਬਾ. ਤਿਤ੍ਥਂ ਨਾਮ ਦ੍ਵਾਸਟ੍ਠਿ ਦਿਟ੍ਠਿਯੋ. ਤਿਤ੍ਥਿਕਰਾ ਨਾਮ ਤਾਸਂ ਦਿਟ੍ਠੀਨਂ ਉਪ੍ਪਾਦਕਾ. ਤਿਤ੍ਥਿਯਾ ਨਾਮ ਯੇਸਂ ਤਾ ਦਿਟ੍ਠਿਯੋ ਰੁਚ੍ਚਨ੍ਤਿ ਖਮਨ੍ਤਿ. ਤਿਤ੍ਥਿਯਸਾਵਕਾ ਨਾਮ ਤੇਸਂ ਪਚ੍ਚਯਦਾਯਕਾ. ਆਯਤਨਨ੍ਤਿ ‘‘ਕਮ੍ਬੋਜੋ ਅਸ੍ਸਾਨਂ ਆਯਤਨਂ, ਗੁਨ੍ਨਂ ਦਕ੍ਖਿਣਾਪਥੋ ਆਯਤਨ’’ਨ੍ਤਿ ਏਤ੍ਥ ਸਞ੍ਜਾਤਿਟ੍ਠਾਨਂ ਆਯਤਨਂ ਨਾਮ.
‘‘ਮਨੋਰਮੇ ਆਯਤਨੇ, ਸੇਵਨ੍ਤਿ ਨਂ ਵਿਹਙ੍ਗਮਾ;
ਛਾਯਂ ਛਾਯਤ੍ਥਿਨੋ ਯਨ੍ਤਿ, ਫਲਤ੍ਥਂ ਫਲਭੋਜਿਨੋ’’ਤਿ. (ਅ. ਨਿ. ੫.੩੮) –
ਏਤ੍ਥ ਸਮੋਸਰਣਟ੍ਠਾਨਂ. ‘‘ਪਞ੍ਚਿਮਾਨਿ, ਭਿਕ੍ਖਵੇ, ਵਿਮੁਤ੍ਤਾਯਤਨਾਨੀ’’ਤਿ (ਅ. ਨਿ. ੫.੨੬) ਏਤ੍ਥ ਕਾਰਣਂ. ਤਂ ਇਧ ਸਬ੍ਬਮ੍ਪਿ ਲਬ੍ਭਤਿ. ਸਬ੍ਬੇਪਿ ਹਿ ਦਿਟ੍ਠਿਗਤਿਕਾ ਸਞ੍ਜਾਯਮਾਨਾ ਇਮੇਸੁਯੇਵ ਤੀਸੁ ਠਾਨੇਸੁ ਸਞ੍ਜਾਯਨ੍ਤਿ, ਸਮੋਸਰਣਮਾਨਾਪਿ ਏਤੇਸੁਯੇਵ ਤੀਸੁ ਠਾਨੇਸੁ ਸਮੋਸਰਨ੍ਤਿ ਸਨ੍ਨਿਪਤਨ੍ਤਿ, ਦਿਟ੍ਠਿਗਤਿਕਭਾਵੇ ਚ ਨੇਸਂ ਏਤਾਨੇਵ ਤੀਣਿ ਕਾਰਣਾਨੀਤਿ ਤਿਤ੍ਥਭੂਤਾਨਿ ਸਞ੍ਜਾਤਿਆਦਿਨਾ ਅਤ੍ਥੇਨ ਆਯਤਨਾਨੀਤਿਪਿ ਤਿਤ੍ਥਾਯਤਨਾਨਿ. ਤੇਨੇਵਤ੍ਥੇਨ ਤਿਤ੍ਥਿਯਾਨਂ ਆਯਤਨਾਨੀਤਿਪਿ ਤਿਤ੍ਥਾਯਤਨਾਨਿ. ਸਮਨੁਯੁਞ੍ਜਿਯਮਾਨਾਨੀਤਿ ਕਾ ਨਾਮੇਤਾ ਦਿਟ੍ਠਿਯੋਤਿ ਏਵਂ ਪੁਚ੍ਛਿਯਮਾਨਾਨਿ. ਸਮਨੁਗਾਹਿਯਮਾਨਾਨੀਤਿ ਕਿਂਕਾਰਣਾ ਏਤਾ ਦਿਟ੍ਠਿਯੋ ਉਪ੍ਪਨ੍ਨਾਤਿ ਏਵਂ ਸਮ੍ਮਾ ਅਨੁਗ੍ਗਾਹਿਯਮਾਨਾਨਿ. ਸਮਨੁਭਾਸਿਯਮਾਨਾਨੀਤਿ ਪਟਿਨਿਸ੍ਸਜ੍ਜੇਥ ਏਤਾਨਿ ਪਾਪਕਾਨਿ ਦਿਟ੍ਠਿਗਤਾਨੀਤਿ ਏਵਂ ਸਮ੍ਮਾ ਅਨੁਸਾਸਿਯਮਾਨਾਨਿ. ਅਪਿਚ ਤੀਣਿਪਿ ਏਤਾਨਿ ਅਨੁਯੋਗਪੁਚ੍ਛਾਵੇਵਚਨਾਨੇਵ. ਤੇਨ ਵੁਤ੍ਤਂ ਅਟ੍ਠਕਥਾਯਂ – ‘‘ਸਮਨੁਯੁਞ੍ਜਤੀਤਿ ਵਾ ਸਮਨੁਗ੍ਗਾਹਤੀਤਿ ਵਾ ਸਮਨੁਭਾਸਤੀਤਿ ਵਾ ਏਸੇਸੇ ਏਕਟ੍ਠੇ ਸਮੇ ਸਮਭਾਗੇ ਤਜ੍ਜਾਤੇ ਤਞ੍ਞੇਵਾ’’ਤਿ.
ਪਰਮ੍ਪਿ ਗਨ੍ਤ੍ਵਾਤਿ ਆਚਰਿਯਪਰਮ੍ਪਰਾ ਲਦ੍ਧਿਪਰਮ੍ਪਰਾ ਅਤ੍ਤਭਾਵਪਰਮ੍ਪਰਾਤਿ ਏਤੇਸੁ ਯਂਕਿਞ੍ਚਿ ਪਰਮ੍ਪਰਂ ਗਨ੍ਤ੍ਵਾਪਿ. ਅਕਿਰਿਯਾਯ ਸਣ੍ਠਹਨ੍ਤੀਤਿ ਅਕਿਰਿਯਮਤ੍ਤੇ ਸਂਤਿਟ੍ਠਨ੍ਤਿ. ‘‘ਅਮ੍ਹਾਕਂ ਆਚਰਿਯੋ ਪੁਬ੍ਬੇਕਤਵਾਦੀ, ਅਮ੍ਹਾਕਂ ਪਾਚਰਿਯੋ ਪੁਬ੍ਬੇਕਤਵਾਦੀ, ਅਮ੍ਹਾਕਂ ਆਚਰਿਯਪਾਚਰਿਯੋ ਪੁਬ੍ਬੇਕਤਵਾਦੀ. ਅਮ੍ਹਾਕਂ ਆਚਰਿਯੋ ਇਸ੍ਸਰਨਿਮ੍ਮਾਨਵਾਦੀ, ਅਮ੍ਹਾਕਂ ਪਾਚਰਿਯੋ ਇਸ੍ਸਰਨਿਮ੍ਮਾਨਵਾਦੀ, ਅਮ੍ਹਾਕਂ ਆਚਰਿਯਪਾਚਰਿਯੋ ਇਸ੍ਸਰਨਿਮ੍ਮਾਨਵਾਦੀ. ਅਮ੍ਹਾਕਂ ਆਚਰਿਯੋ ਅਹੇਤੁਅਪਚ੍ਚਯਵਾਦੀ, ਅਮ੍ਹਾਕਂ ਪਾਚਰਿਯੋ ਅਹੇਤੁਅਪਚ੍ਚਯਵਾਦੀ, ਅਮ੍ਹਾਕਂ ਆਚਰਿਯਪਾਚਰਿਯੋ ਅਹੇਤੁਅਪਚ੍ਚਯਵਾਦੀ’’ਤਿ ਏਵਂ ਗਚ੍ਛਨ੍ਤਾਨਿ ਹਿ ਏਤਾਨਿ ਆਚਰਿਯਪਰਮ੍ਪਰਂ ਗਚ੍ਛਨ੍ਤਿ ਨਾਮ. ‘‘ਅਮ੍ਹਾਕਂ ਆਚਰਿਯੋ ਪੁਬ੍ਬੇਕਤਲਦ੍ਧਿਕੋ, ਅਮ੍ਹਾਕਂ ਪਾਚਰਿਯੋ…ਪੇ… ਅਮ੍ਹਾਕਂ ਆਚਰਿਯਪਾਚਰਿਯੋ ਅਹੇਤੁਅਪਚ੍ਚਯਲਦ੍ਧਿਕੋ’’ਤਿ ਏਵਂ ਗਚ੍ਛਨ੍ਤਾਨਿ ਲਦ੍ਧਿਪਰਮ੍ਪਰਂ ਗਚ੍ਛਨ੍ਤਿ ਨਾਮ. ‘‘ਅਮ੍ਹਾਕਂ ਆਚਰਿਯਸ੍ਸ ਅਤ੍ਤਭਾਵੋ ਪੁਬ੍ਬੇਕਤਹੇਤੁ, ਅਮ੍ਹਾਕਂ ਪਾਚਰਿਯਸ੍ਸ…ਪੇ… ਅਮ੍ਹਾਕਂ ਆਚਰਿਯਪਾਚਰਿਯਸ੍ਸ ਅਤ੍ਤਭਾਵੋ ਅਹੇਤੁ ਅਪਚ੍ਚਯੋ’’ਤਿ ਏਵਂ ਗਚ੍ਛਨ੍ਤਾਨਿ ਅਤ੍ਤਭਾਵਪਰਮ੍ਪਰਂ ਗਚ੍ਛਨ੍ਤਿ ਨਾਮ. ਏਵਂ ਪਨ ਸੁਵਿਦੂਰਮ੍ਪਿ ਗਚ੍ਛਨ੍ਤਾਨਿ ਅਕਿਰਿਯਮਤ੍ਤੇਯੇਵ ਸਣ੍ਠਹਨ੍ਤਿ, ਏਕੋਪਿ ਏਤੇਸਂ ਦਿਟ੍ਠਿਗਤਿਕਾਨਂ ਕਤ੍ਤਾ ਵਾ ਕਾਰੇਤਾ ਵਾ ਨ ਪਞ੍ਞਾਯਤਿ.
ਪੁਰਿਸਪੁਗ੍ਗਲੋਤਿ ਸਤ੍ਤੋ. ਕਾਮਞ੍ਚ ਪੁਰਿਸੋਤਿਪਿ ਵੁਤ੍ਤੇ ਪੁਗ੍ਗਲੋਤਿਪਿ ਵੁਤ੍ਤੇ ਸਤ੍ਤੋਯੇਵ ਵੁਤ੍ਤੋ ਹੋਤਿ, ਅਯਂ ਪਨ ਸਮ੍ਮੁਤਿਕਥਾ ਨਾਮ ਯੋ ਯਥਾ ਜਾਨਾਤਿ, ਤਸ੍ਸ ਤਥਾ ਵੁਚ੍ਚਤਿ. ਪਟਿਸਂਵੇਦੇਤੀਤਿ ਅਤ੍ਤਨੋ ਸਨ੍ਤਾਨੇ ਉਪ੍ਪਨ੍ਨਂ ਜਾਨਾਤਿ ਪਟਿਸਂਵਿਦਿਤਂ ਕਰੋਤਿ, ਅਨੁਭਵਤਿ ਵਾ. ਪੁਬ੍ਬੇਕਤਹੇਤੂਤਿ ਪੁਬ੍ਬੇਕਤਕਾਰਣਾ, ਪੁਬ੍ਬੇਕਤਕਮ੍ਮਪਚ੍ਚਯੇਨੇਵ ਪਟਿਸਂਵੇਦੇਤੀਤਿ ਅਤ੍ਥੋ. ਇਮਿਨਾ ਕਮ੍ਮਵੇਦਨਞ੍ਚ ਕਿਰਿਯਵੇਦਨਞ੍ਚ ਪਟਿਕ੍ਖਿਪਿਤ੍ਵਾ ਏਕਂ ਵਿਪਾਕਵੇਦਨਮੇਵ ਸਮ੍ਪਟਿਚ੍ਛਨ੍ਤਿ. ਯੇ ਵਾ ਇਮੇ ਪਿਤ੍ਤਸਮੁਟ੍ਠਾਨਾ ਆਬਾਧਾ ਸੇਮ੍ਹਸਮੁਟ੍ਠਾਨਾ ਵਾਤਸਮੁਟ੍ਠਾਨਾ ਸਨ੍ਨਿਪਾਤਿਕਾ ਉਤੁਪਰਿਣਾਮਜਾ ਵਿਸਮਪਰਿਹਾਰਜਾ ਓਪਕ੍ਕਮਿਕਾ ਆਬਾਧਾ ਕਮ੍ਮਵਿਪਾਕਜਾ ਆਬਾਧਾਤਿ ਅਟ੍ਠ ਰੋਗਾ ਵੁਤ੍ਤਾ, ਤੇਸੁ ਸਤ੍ਤ ਪਟਿਕ੍ਖਿਪਿਤ੍ਵਾ ਏਕਂ ਵਿਪਾਕਵੇਦਨਂਯੇਵ ਸਮ੍ਪਟਿਚ੍ਛਨ੍ਤਿ. ਯੇਪਿਮੇ ਦਿਟ੍ਠਧਮ੍ਮਵੇਦਨੀਯਂ ਉਪਪਜ੍ਜਵੇਦਨੀਯਂ ਅਪਰਪਰਿਯਾਯਵੇਦਨੀਯਨ੍ਤਿ ਤਯੋ ਕਮ੍ਮਰਾਸਯੋ ਵੁਤ੍ਤਾ, ਤੇਸੁਪਿ ਦ੍ਵੇ ਪਟਿਬਾਹਿਤ੍ਵਾ ਏਕਂ ਅਪਰਪਰਿਯਾਯਕਮ੍ਮਂਯੇਵ ਸਮ੍ਪਟਿਚ੍ਛਨ੍ਤਿ. ਯੇਪਿਮੇ ਦਿਟ੍ਠਧਮ੍ਮਵੇਦਨੀਯੋ ਵਿਪਾਕੋ ਉਪਪਜ੍ਜਵੇਦਨੀਯੋ ਅਪਰਪਰਿਯਾਯਵੇਦਨੀਯੋਤਿ ਤਯੋ ਵਿਪਾਕਰਾਸਯੋ ਵੁਤ੍ਤਾ, ਤੇਸੁਪਿ ਦ੍ਵੇ ਪਟਿਬਾਹਿਤ੍ਵਾ ਏਕਂ ਅਪਰਪਰਿਯਾਯਵਿਪਾਕਮੇਵ ਸਮ੍ਪਟਿਚ੍ਛਨ੍ਤਿ. ਯੇਪਿਮੇ ਕੁਸਲਚੇਤਨਾ ਅਕੁਸਲਚੇਤਨਾ ਵਿਪਾਕਚੇਤਨਾ ਕਿਰਿਯਚੇਤਨਾਤਿ ਚਤ੍ਤਾਰੋ ਚੇਤਨਾਰਾਸਯੋ ਵੁਤ੍ਤਾ, ਤੇਸੁਪਿ ਤਯੋ ਪਟਿਬਾਹਿਤ੍ਵਾ ਏਕਂ ਵਿਪਾਕਚੇਤਨਂਯੇਵ ਸਮ੍ਪਟਿਚ੍ਛਨ੍ਤਿ.
ਇਸ੍ਸਰਨਿਮ੍ਮਾਨਹੇਤੂਤਿ ਇਸ੍ਸਰਨਿਮ੍ਮਾਨਕਾਰਣਾ, ਇਸ੍ਸਰੇਨ ਨਿਮ੍ਮਿਤਤ੍ਤਾ ਪਟਿਸਂਵੇਦੇਤੀਤਿ ਅਤ੍ਥੋ. ਅਯਂ ਹਿ ਤੇਸਂ ਅਧਿਪ੍ਪਾਯੋ – ਇਮਾ ਤਿਸ੍ਸੋ ਵੇਦਨਾ ਪਚ੍ਚੁਪ੍ਪਨ੍ਨੇ ਅਤ੍ਤਨਾ ਕਤਮੂਲਕੇਨ ਵਾ ਆਣਤ੍ਤਿਮੂਲਕੇਨ ਵਾ ਪੁਬ੍ਬੇਕਤੇਨ ਵਾ ਅਹੇਤੁਅਪਚ੍ਚਯਾ ਵਾ ਪਟਿਸਂਵੇਦਿਤੁਂ ਨਾਮ ਨ ਸਕ੍ਕਾ, ਇਸ੍ਸਰਨਿਮ੍ਮਾਨਕਾਰਣਾਯੇਵ ਪਨ ਇਮਾ ਪਟਿਸਂਵੇਦੇਤੀਤਿ. ਏਵਂਵਾਦਿਨੋ ਪਨੇਤੇ ਹੇਟ੍ਠਾ ਵੁਤ੍ਤੇਸੁ ਅਟ੍ਠਸੁ ਰੋਗੇਸੁ ਏਕਮ੍ਪਿ ਅਸਮ੍ਪਟਿਚ੍ਛਿਤ੍ਵਾ ਸਬ੍ਬੇ ਪਟਿਬਾਹਨ੍ਤਿ, ਹੇਟ੍ਠਾ ਵੁਤ੍ਤੇਸੁ ਚ ਤੀਸੁ ਕਮ੍ਮਰਾਸੀਸੁ ਤੀਸੁ ਵਿਪਾਕਰਾਸੀਸੁ ਚਤੂਸੁ ਚੇਤਨਾਰਾਸੀਸੁ ਏਕਮ੍ਪਿ ਅਸਮ੍ਪਟਿਚ੍ਛਿਤ੍ਵਾ ਸਬ੍ਬੇਪਿ ਪਟਿਬਾਹਨ੍ਤਿ.
ਅਹੇਤੁਅਪਚ੍ਚਯਾਤਿ ਹੇਤੁਞ੍ਚ ਪਚ੍ਚਯਞ੍ਚ ਵਿਨਾ, ਅਕਾਰਣੇਨੇਵ ਪਟਿਸਂਵੇਦੇਤੀਤਿ ਅਤ੍ਥੋ. ਅਯਞ੍ਹਿ ਨੇਸਂ ਅਧਿਪ੍ਪਾਯੋ – ਇਮਾ ਤਿਸ੍ਸੋ ਵੇਦਨਾ ਪਚ੍ਚੁਪ੍ਪਨ੍ਨੇ ਅਤ੍ਤਨਾ ਕਤਮੂਲਕੇਨ ਵਾ ਆਣਤ੍ਤਿਮੂਲਕੇਨ ਵਾ ਪੁਬ੍ਬੇਕਤੇਨ ਵਾ ਇਸ੍ਸਰਨਿਮ੍ਮਾਨਹੇਤੁਨਾ ਵਾ ਪਟਿਸਂਵੇਦਿਤੁਂ ਨਾਮ ਨ ਸਕ੍ਕਾ, ਅਹੇਤੁਅਪਚ੍ਚਯਾਯੇਵ ਪਨ ਇਮਾ ਪਟਿਸਂਵੇਦੇਤੀਤਿ. ਏਵਂਵਾਦਿਨੋ ਪਨੇਤੇ ਹੇਟ੍ਠਾ ਵੁਤ੍ਤੇਸੁ ਰੋਗਾਦੀਸੁ ਏਕਮ੍ਪਿ ਅਸਮ੍ਪਟਿਚ੍ਛਿਤ੍ਵਾ ਸਬ੍ਬਂ ਪਟਿਬਾਹਨ੍ਤਿ.
ਏਵਂ ਸਤ੍ਥਾ ਮਾਤਿਕਂ ਨਿਕ੍ਖਿਪਿਤ੍ਵਾ ਇਦਾਨਿ ਤਂ ਵਿਭਜਿਤ੍ਵਾ ਦਸ੍ਸੇਤੁਂ ਤਤ੍ਰ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਏਵਂ ਵਦਾਮੀਤਿ ਲਦ੍ਧਿਪਤਿਟ੍ਠਾਪਨਤ੍ਥਂ ਏਵਂ ਵਦਾਮੀਤਿ ਦਸ੍ਸੇਤਿ. ਲਦ੍ਧਿਞ੍ਹਿ ਅਪ੍ਪਤਿਟ੍ਠਾਪੇਤ੍ਵਾ ਨਿਗ੍ਗਯ੍ਹਮਾਨਾ ਲਦ੍ਧਿਤੋ ਲਦ੍ਧਿਂ ਸਙ੍ਕਮਨ੍ਤਿ, ਭੋ ਗੋਤਮ, ਨ ਮਯਂ ਪੁਬ੍ਬੇਕਤਵਾਦਂ ਵਦਾਮਾਤਿਆਦੀਨਿ ਵਦਨ੍ਤਿ. ਲਦ੍ਧਿਯਾ ਪਨ ਪਤਿਟ੍ਠਾਪਿਤਾਯ ਸਙ੍ਕਮਿਤੁਂ ਅਲਭਨ੍ਤਾ ਸੁਨਿਗ੍ਗਹਿਤਾ ਹੋਨ੍ਤਿ, ਇਤਿ ਨੇਸਂ ਲਦ੍ਧਿਪਤਿਟ੍ਠਾਪਨਤ੍ਥਂ ਏਵਂ ਵਦਾਮੀਤਿ ਆਹ. ਤੇਨਹਾਯਸ੍ਮਨ੍ਤੋਤਿ ਤੇਨ ਹਿ ਆਯਸ੍ਮਨ੍ਤੋ. ਕਿਂ ਵੁਤ੍ਤਂ ਹੋਤਿ – ਯਦਿ ਏਤਂ ਸਚ੍ਚਂ, ਏਵਂ ਸਨ੍ਤੇ ਤੇਨ ਤੁਮ੍ਹਾਕਂ ਵਾਦੇਨ. ਪਾਣਾਤਿਪਾਤਿਨੋ ਭਵਿਸ੍ਸਨ੍ਤਿ ਪੁਬ੍ਬੇਕਤਹੇਤੂਤਿ ਯੇ ਕੇਚਿ ਲੋਕੇ ਪਾਣਂ ਅਤਿਪਾਤੇਨ੍ਤਿ, ਸਬ੍ਬੇ ਤੇ ਪੁਬ੍ਬੇਕਤਹੇਤੁ ਪਾਣਾਤਿਪਾਤਿਨੋ ਭਵਿਸ੍ਸਨ੍ਤਿ. ਕਿਂਕਾਰਣਾ? ਨ ਹਿ ਪਾਣਾਤਿਪਾਤਕਮ੍ਮਂ ਅਤ੍ਤਨਾ ਕਤਮੂਲਕੇਨ ਨ ਆਣਤ੍ਤਿਮੂਲਕੇਨ ਨ ਇਸ੍ਸਰਨਿਮ੍ਮਾਨਹੇਤੁਨਾ ਨ ਅਹੇਤੁਅਪਚ੍ਚਯਾ ਸਕ੍ਕਾ ਪਟਿਸਂਵੇਦੇਤੁਂ, ਪੁਬ੍ਬੇਕਤਹੇਤੁਯੇਵ ਪਟਿਸਂਵੇਦੇਤੀਤਿ ਅਯਂ ਵੋ ਲਦ੍ਧਿ. ਯਥਾ ਚ ਪਾਣਾਤਿਪਾਤਿਨੋ, ਏਵਂ ਪਾਣਾਤਿਪਾਤਾ ਵਿਰਮਨ੍ਤਾਪਿ ਪੁਬ੍ਬੇਕਤਹੇਤੁਯੇਵ ਵਿਰਮਿਸ੍ਸਨ੍ਤੀਤਿ. ਇਤਿ ਭਗਵਾ ਤੇਸਂਯੇਵ ਲਦ੍ਧਿਂ ਗਹੇਤ੍ਵਾ ਤੇਸਂ ਨਿਗ੍ਗਹਂ ਆਰੋਪੇਤਿ. ਇਮਿਨਾ ਨਯੇਨ ਅਦਿਨ੍ਨਾਦਾਯਿਨੋਤਿਆਦੀਸੁਪਿ ਯੋਜਨਾ ਵੇਦਿਤਬ੍ਬਾ.
ਸਾਰਤੋ ਪਚ੍ਚਾਗਚ੍ਛਤਨ੍ਤਿ ਸਾਰਭਾਵੇਨ ਗਣ੍ਹਨ੍ਤਾਨਂ. ਛਨ੍ਦੋਤਿ ਕਤ੍ਤੁਕਮ੍ਯਤਾਛਨ੍ਦੋ. ਇਦਂ ਵਾ ਕਰਣੀਯਂ ਇਦਂ ਵਾ ਅਕਰਣੀਯਨ੍ਤਿ ਏਤ੍ਥ ਅਯਂ ਅਧਿਪ੍ਪਾਯੋ – ਇਦਂ ਵਾ ਕਰਣੀਯਨ੍ਤਿ ਕਤ੍ਤਬ੍ਬਸ੍ਸ ਕਰਣਤ੍ਥਾਯ, ਇਦਂ ਵਾ ਅਕਰਣੀਯਨ੍ਤਿ ਅਕਤ੍ਤਬ੍ਬਸ੍ਸ ਅਕਰਣਤ੍ਥਾਯ ਕਤ੍ਤੁਕਮ੍ਯਤਾ ਵਾ ਪਚ੍ਚਤ੍ਤਪੁਰਿਸਕਾਰੋ ਵਾ ਨ ਹੋਤਿ. ਛਨ੍ਦਵਾਯਾਮੇਸੁ ਵਾ ਅਸਨ੍ਤੇਸੁ ‘‘ਇਦਂ ਕਤ੍ਤਬ੍ਬ’’ਨ੍ਤਿਪਿ ‘‘ਇਦਂ ਨ ਕਤ੍ਤਬ੍ਬ’’ਨ੍ਤਿਪਿ ਨ ਹੋਤਿ. ਇਤਿ ਕਰਣੀਯਾਕਰਣੀਯੇ ਖੋ ਪਨ ਸਚ੍ਚਤੋ ਥੇਤਤੋ ਅਨੁਪਲਬ੍ਭਿਯਮਾਨੇਤਿ ਏਵਂ ਕਤ੍ਤਬ੍ਬੇ ਚ ਅਕਤ੍ਤਬ੍ਬੇ ਚ ਭੂਤਤੋ ਥਿਰਤੋ ਅਪਞ੍ਞਾਯਮਾਨੇ ਅਲਬ੍ਭਮਾਨੇ. ਯਦਿ ਹਿ ਕਤ੍ਤਬ੍ਬਂ ਕਾਤੁਂ ਅਕਤ੍ਤਬ੍ਬਤੋ ਚ ਵਿਰਮਿਤੁਂ ਲਭੇਯ੍ਯ, ਕਰਣੀਯਾਕਰਣੀਯਂ ਸਚ੍ਚਤੋ ਥੇਤਤੋ ਉਪਲਬ੍ਭੇਯ੍ਯ. ਯਸ੍ਮਾ ਪਨ ਉਭਯਮ੍ਪਿ ਤਂ ਏਸ ਨੁਪਲਬ੍ਭਤਿ, ਤਸ੍ਮਾ ਤਂ ਸਚ੍ਚਤੋ ਥੇਤਤੋ ਨ ਉਪਲਬ੍ਭਤਿ, ਏਵਂ ਤਸ੍ਮਿਂ ਚ ਅਨੁਪਲਬ੍ਭਿਯਮਾਨੇਤਿ ਅਤ੍ਥੋ. ਮੁਟ੍ਠਸ੍ਸਤੀਨਨ੍ਤਿ ਨਟ੍ਠਸ੍ਸਤੀਨਂ ਵਿਸ੍ਸਟ੍ਠਸ੍ਸਤੀਨਂ. ਅਨਾਰਕ੍ਖਾਨਂ ਵਿਹਰਤਨ੍ਤਿ ਛਸੁ ਦ੍ਵਾਰੇਸੁ ਨਿਰਾਰਕ੍ਖਾਨਂ ਵਿਹਰਨ੍ਤਾਨਂ. ਨ ਹੋਤਿ ਪਚ੍ਚਤ੍ਤਂ ਸਹਧਮ੍ਮਿਕੋ ਸਮਣਵਾਦੋਤਿ ਏਵਂ ਭੂਤਾਨਂ ਤੁਮ੍ਹਾਕਂ ਵਾ ਅਞ੍ਞੇਸਂ ਵਾ ਮਯਂ ਸਮਣਾਤਿ ਪਚ੍ਚਤ੍ਤਂ ਸਕਾਰਣੋ ਸਮਣਵਾਦੋ ਨ ਹੋਤਿ ਨ ਇਜ੍ਝਤਿ. ਸਮਣਾਪਿ ਹਿ ਪੁਬ੍ਬੇਕਤਕਾਰਣਾਯੇਵ ਹੋਨ੍ਤਿ, ਅਸ੍ਸਮਣਾਪਿ ਪੁਬ੍ਬੇਕਤਕਾਰਣਾਯੇਵਾਤਿ. ਸਹਧਮ੍ਮਿਕੋਤਿ ਸਕਾਰਣੋ. ਨਿਗ੍ਗਹੋ ਹੋਤੀਤਿ ਮਮ ਨਿਗ੍ਗਹੋ ਹੋਤਿ, ਤੇ ਪਨ ਨਿਗ੍ਗਹਿਤਾ ਹੋਨ੍ਤੀਤਿ.
ਏਵਂ ਪੁਬ੍ਬੇਕਤਵਾਦਿਨੋ ਨਿਗ੍ਗਹੇਤ੍ਵਾ ਇਦਾਨਿ ਇਸ੍ਸਰਨਿਮ੍ਮਾਨਵਾਦਿਨੋ ਨਿਗ੍ਗਹੇਤੁਂ ਤਤ੍ਰ, ਭਿਕ੍ਖਵੇਤਿਆਦਿਮਾਹ. ਤਸ੍ਸਤ੍ਥੋ ਪੁਬ੍ਬੇਕਤਵਾਦੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ, ਤਥਾ ਅਹੇਤੁਕਵਾਦੇਪਿ.
ਏਵਂ ਇਮੇਸਂ ਤਿਤ੍ਥਾਯਤਨਾਨਂ ਪਰਮ੍ਪਿ ਗਨ੍ਤ੍ਵਾ ਅਕਿਰਿਯਾਯ ਸਣ੍ਠਹਨਭਾਵੇਨ ਤੁਚ੍ਛਭਾਵਂ ਅਨਿਯ੍ਯਾਨਿਕਭਾਵਂ, ਅਸਾਰਭਾਵੇਨ ਥੁਸਕੋਟ੍ਟਨਸਦਿਸਤਂ ਆਪਜ੍ਜਨਭਾਵੇਨ ਅਗ੍ਗਿਸਞ੍ਞਾਯ ਧਮਮਾਨਖਜ੍ਜੁਪਨਕਸਰਿਕ੍ਖਤਂ ਤਂਦਿਟ੍ਠਿਕਾਨਂ ਪੁਰਿਮਸ੍ਸਪਿ ਮਜ੍ਝਿਮਸ੍ਸਪਿ ਪਚ੍ਛਿਮਸ੍ਸਪਿ ਅਤ੍ਥਦਸ੍ਸਨਤਾਯ ਅਭਾਵੇਨ ਅਨ੍ਧਵੇਣੂਪਮਤਂ ਸਦ੍ਦਮਤ੍ਤੇਨੇਵ ਤਾਨਿ ਗਹੇਤ੍ਵਾ ਸਾਰਦਿਟ੍ਠਿਕਾਨਂ ਪਥਵਿਯਂ ਪਤਿਤਸ੍ਸ ਬੇਲੁਵਪਕ੍ਕਸ੍ਸ ਦਦ੍ਦਭਾਯਿਤਸਦ੍ਦਂ ਸੁਤ੍ਵਾ ‘‘ਪਥਵੀ ਸਂਵਟ੍ਟਮਾਨਾ ਆਗਚ੍ਛਤੀ’’ਤਿ ਸਞ੍ਞਾਯ ਪਲਾਯਨ੍ਤੇਨ ਸਸਕੇਨ ਸਰਿਕ੍ਖਭਾਵਞ੍ਚ ਦਸ੍ਸੇਤ੍ਵਾ ਇਦਾਨਿ ਅਤ੍ਤਨਾ ਦੇਸਿਤਸ੍ਸ ਧਮ੍ਮਸ੍ਸ ਸਾਰਭਾਵਞ੍ਚੇਵ ਨਿਯ੍ਯਾਨਿਕਭਾਵਞ੍ਚ ਦਸ੍ਸੇਤੁਂ ਅਯਂ ਖੋ ਪਨ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਅਨਿਗ੍ਗਹਿਤੋਤਿ ਅਞ੍ਞੇਹਿ ਅਨਿਗ੍ਗਹਿਤੋ ਨਿਗ੍ਗਹੇਤੁਂ ਅਸਕ੍ਕੁਣੇਯ੍ਯੋ. ਅਸਂਕਿਲਿਟ੍ਠੋਤਿ ਨਿਕ੍ਕਿਲੇਸੋ ਪਰਿਸੁਦ੍ਧੋ, ‘‘ਸਂਕਿਲਿਟ੍ਠਂ ਨਂ ਕਰਿਸ੍ਸਾਮਾ’’ਤਿ ਪਵਤ੍ਤੇਹਿਪਿ ਤਥਾ ਕਾਤੁਂ ਅਸਕ੍ਕੁਣੇਯ੍ਯੋ. ਅਨੁਪਵਜ੍ਜੋਤਿ ਉਪਵਾਦਵਿਨਿਮੁਤ੍ਤੋ. ਅਪ੍ਪਟਿਕੁਟ੍ਠੋਤਿ ‘‘ਕਿਂ ਇਮਿਨਾ ਹਰਥ ਨ’’ਨ੍ਤਿ ਏਵਂ ਅਪ੍ਪਟਿਬਾਹਿਤੋ, ਅਨੁਪਕ੍ਕੁਟ੍ਠੋ ਵਾ. ਵਿਞ੍ਞੂਹੀਤਿ ਪਣ੍ਡਿਤੇਹਿ. ਅਪਣ੍ਡਿਤਾਨਞ੍ਹਿ ਅਜਾਨਿਤ੍ਵਾ ਕਥੇਨ੍ਤਾਨਂ ਵਚਨਂ ਅਪ੍ਪਮਾਣਂ. ਤਸ੍ਮਾ ਵਿਞ੍ਞੂਹੀਤਿ ਆਹ.
ਇਦਾਨਿ ਤਸ੍ਸ ਧਮ੍ਮਸ੍ਸ ਦਸ੍ਸਨਤ੍ਥਂ ‘‘ਕਤਮੋ ਚ, ਭਿਕ੍ਖਵੇ’’ਤਿ ਪਞ੍ਹਂ ਪੁਚ੍ਛਿਤ੍ਵਾ ‘‘ਇਮਾ ਛ ਧਾਤੁਯੋ’’ਤਿਆਦਿਨਾ ਨਯੇਨ ਮਾਤਿਕਂ ਨਿਕ੍ਖਿਪਿਤ੍ਵਾ ਯਥਾਪਟਿਪਾਟਿਯਾ ਵਿਭਜਿਤ੍ਵਾ ਦਸ੍ਸੇਨ੍ਤੋ ਪੁਨ ਇਮਾ ਛ ਧਾਤੁਯੋਤਿਆਦਿਮਾਹ. ਤਤ੍ਥ ਧਾਤੁਯੋਤਿ ਸਭਾਵਾ. ਨਿਜ੍ਜੀਵਨਿਸ੍ਸਤ੍ਤਭਾਵਪ੍ਪਕਾਸਕੋ ਹਿ ਸਭਾਵਟ੍ਠੋ ਧਾਤ੍ਵਟ੍ਠੋ ਨਾਮ. ਫਸ੍ਸਾਯਤਨਾਨੀਤਿ ਵਿਪਾਕਫਸ੍ਸਾਨਂ ਆਕਰਟ੍ਠੇਨ ਆਯਤਨਾਨਿ. ਮਨੋਪਵਿਚਾਰਾਤਿ ਵਿਤਕ੍ਕਵਿਚਾਰਪਾਦੇਹਿ ਅਟ੍ਠਾਰਸਸੁ ਠਾਨੇਸੁ ਮਨਸ੍ਸ ਉਪਵਿਚਾਰਾ.
ਪਥਵੀਧਾਤੂਤਿ ਪਤਿਟ੍ਠਾਧਾਤੁ. ਆਪੋਧਾਤੂਤਿ ਆਬਨ੍ਧਨਧਾਤੁ. ਤੇਜੋਧਾਤੂਤਿ ਪਰਿਪਾਚਨਧਾਤੁ. ਵਾਯੋਧਾਤੂਤਿ ਵਿਤ੍ਥਮ੍ਭਨਧਾਤੁ. ਆਕਾਸਧਾਤੂਤਿ ਅਸਮ੍ਫੁਟ੍ਠਧਾਤੁ. ਵਿਞ੍ਞਾਣਧਾਤੂਤਿ ਵਿਜਾਨਨਧਾਤੁ. ਏਵਮਿਦਂ ਧਾਤੁਕਮ੍ਮਟ੍ਠਾਨਂ ਆਗਤਂ. ਤਂ ਖੋ ਪਨੇਤਂ ਸਙ੍ਖੇਪਤੋ ਆਗਤਟ੍ਠਾਨੇ ਸਙ੍ਖੇਪਤੋਪਿ ਵਿਤ੍ਥਾਰਤੋਪਿ ਕਥੇਤੁਂ ਵਟ੍ਟਤਿ. ਵਿਤ੍ਥਾਰਤੋ ਆਗਤਟ੍ਠਾਨੇ ਸਙ੍ਖੇਪਤੋ ਕਥੇਤੁਂ ਨ ਵਟ੍ਟਤਿ, ਵਿਤ੍ਥਾਰਤੋਵ ਵਟ੍ਟਤਿ. ਇਮਸ੍ਮਿਂ ਪਨ ਤਿਤ੍ਥਾਯਤਨਸੁਤ੍ਤੇ ਇਦਂ ਸਙ੍ਖੇਪਤੋ ਛਧਾਤੁਵਸੇਨ ਕਮ੍ਮਟ੍ਠਾਨਂ ਆਗਤਂ. ਤਂ ਉਭਯਥਾਪਿ ਕਥੇਤੁਂ ਵਟ੍ਟਤਿ.
ਸਙ੍ਖੇਪਤੋ ਛਧਾਤੁਵਸੇਨ ਕਮ੍ਮਟ੍ਠਾਨਂ ਪਰਿਗ੍ਗਣ੍ਹਨ੍ਤੋਪਿ ਏਵਂ ਪਰਿਗ੍ਗਣ੍ਹਾਤਿ – ਪਥਵੀਧਾਤੁ ਆਪੋਧਾਤੁ ਤੇਜੋਧਾਤੁ ਵਾਯੋਧਾਤੂਤਿ ਇਮਾਨਿ ਚਤ੍ਤਾਰਿ ਮਹਾਭੂਤਾਨਿ, ਆਕਾਸਧਾਤੁ ਉਪਾਦਾਰੂਪਂ. ਏਕਸ੍ਮਿਂ ਚ ਉਪਾਦਾਰੂਪੇ ਦਿਟ੍ਠੇ ਸੇਸਾਨਿ ਤੇਵੀਸਤਿ ਦਿਟ੍ਠਾਨੇਵਾਤਿ ਸਲ੍ਲਕ੍ਖੇਤਬ੍ਬਾਨਿ. ਵਿਞ੍ਞਾਣਧਾਤੂਤਿ ਚਿਤ੍ਤਂ ਵਿਞ੍ਞਾਣਕ੍ਖਨ੍ਧੋ ਹੋਤਿ, ਤੇਨ ਸਹਜਾਤਾ ਵੇਦਨਾ ਵੇਦਨਾਕ੍ਖਨ੍ਧੋ, ਸਞ੍ਞਾ ਸਞ੍ਞਾਕ੍ਖਨ੍ਧੋ, ਫਸ੍ਸੋ ਚ ਚੇਤਨਾ ਚ ਸਙ੍ਖਾਰਕ੍ਖਨ੍ਧੋਤਿ ਇਮੇ ਚਤ੍ਤਾਰੋ ਅਰੂਪਕ੍ਖਨ੍ਧਾ ਨਾਮ. ਚਤ੍ਤਾਰਿ ਪਨ ਮਹਾਭੂਤਾਨਿ ਚਤੁਨ੍ਨਞ੍ਚ ਮਹਾਭੂਤਾਨਂ ਉਪਾਦਾਰੂਪਂ ਰੂਪਕ੍ਖਨ੍ਧੋ ਨਾਮ. ਤਤ੍ਥ ਚਤ੍ਤਾਰੋ ਅਰੂਪਕ੍ਖਨ੍ਧਾ ਨਾਮਂ, ਰੂਪਕ੍ਖਨ੍ਧੋ ਰੂਪਨ੍ਤਿ ਨਾਮਞ੍ਚ ਰੂਪਞ੍ਚਾਤਿ ਦ੍ਵੇਯੇਵ ਧਮ੍ਮਾ ਹੋਨ੍ਤਿ, ਤਤੋ ਉਦ੍ਧਂ ਸਤ੍ਤੋ ਵਾ ਜੀਵੋ ਵਾ ਨਤ੍ਥੀਤਿ ਏਵਂ ਏਕਸ੍ਸ ਭਿਕ੍ਖੁਨੋ ਸਙ੍ਖੇਪਤੋ ਛਧਾਤੁਵਸੇਨ ਅਰਹਤ੍ਤਸਮ੍ਪਾਪਕਂ ਕਮ੍ਮਟ੍ਠਾਨਂ ਵੇਦਿਤਬ੍ਬਂ.
ਵਿਤ੍ਥਾਰਤੋ ਪਰਿਗ੍ਗਣ੍ਹਨ੍ਤੋ ਪਨ ਚਤ੍ਤਾਰਿ ਮਹਾਭੂਤਾਨਿ ਪਰਿਗ੍ਗਣ੍ਹਿਤ੍ਵਾ ਆਕਾਸਧਾਤੁਪਰਿਗ੍ਗਹਾਨੁਸਾਰੇਨ ਤੇਵੀਸਤਿ ਉਪਾਦਾਰੂਪਾਨਿ ਪਰਿਗ੍ਗਣ੍ਹਾਤਿ. ਅਥ ਨੇਸਂ ਪਚ੍ਚਯਂ ਉਪਪਰਿਕ੍ਖਨ੍ਤੋ ਪੁਨ ਚਤ੍ਤਾਰੇਵ ਮਹਾਭੂਤਾਨਿ ਦਿਸ੍ਵਾ ਤੇਸੁ ਪਥਵੀਧਾਤੁ ਵੀਸਤਿਕੋਟ੍ਠਾਸਾ, ਆਪੋਧਾਤੁ ਦ੍ਵਾਦਸ, ਤੇਜੋਧਾਤੁ ਚਤ੍ਤਾਰੋ, ਵਾਯੋਧਾਤੁ ਛਕੋਟ੍ਠਾਸਾਤਿ ਕੋਟ੍ਠਾਸਵਸੇਨ ਸਮੋਧਾਨੇਤ੍ਵਾ ਦ੍ਵਾਚਤ੍ਤਾਲੀਸ ਮਹਾਭੂਤਾਨਿ ਚ ਵਵਤ੍ਥਪੇਤ੍ਵਾ ਤੇਸੁ ਤੇਵੀਸਤਿ ਉਪਾਦਾਰੂਪਾਨਿ ਪਕ੍ਖਿਪਿਤ੍ਵਾ ਪਞ੍ਚਸਟ੍ਠਿ ਰੂਪਾਨਿ ਵਵਤ੍ਥਪੇਤਿ. ਤਾਨਿ ਚ ਵਤ੍ਥੁਰੂਪੇਨ ਸਦ੍ਧਿਂ ਛਸਟ੍ਠਿ ਹੋਨ੍ਤੀਤਿ ਛਸਟ੍ਠਿ ਰੂਪਾਨਿ ਪਸ੍ਸਤਿ. ਵਿਞ੍ਞਾਣਧਾਤੁ ਪਨ ਲੋਕਿਯਚਿਤ੍ਤਵਸੇਨ ਏਕਾਸੀਤਿ ਚਿਤ੍ਤਾਨਿ. ਤਾਨਿ ਸਬ੍ਬਾਨਿਪਿ ਵਿਞ੍ਞਾਣਕ੍ਖਨ੍ਧੋ ਨਾਮ ਹੋਤਿ. ਤੇਹਿ ਸਹਜਾਤਾ ਵੇਦਨਾਦਯੋਪਿ ਤਤ੍ਤਕਾਯੇਵਾਤਿ ਏਕਾਸੀਤਿ ਵੇਦਨਾ ਵੇਦਨਾਕ੍ਖਨ੍ਧੋ, ਏਕਾਸੀਤਿ ਸਞ੍ਞਾ ਸਞ੍ਞਾਕ੍ਖਨ੍ਧੋ, ਏਕਾਸੀਤਿ ਚੇਤਨਾ ਸਙ੍ਖਾਰਕ੍ਖਨ੍ਧੋਤਿ ਇਮੇ ਚਤ੍ਤਾਰੋ ਅਰੂਪਕ੍ਖਨ੍ਧਾ ਤੇਭੂਮਕਵਸੇਨ ਗਯ੍ਹਮਾਨਾ ਚਤੁਵੀਸਾਧਿਕਾਨਿ ਤੀਣਿ ਧਮ੍ਮਸਤਾਨਿ ਹੋਨ੍ਤੀਤਿ ਇਤਿ ਇਮੇ ਚ ਅਰੂਪਧਮ੍ਮਾ ਛਸਟ੍ਠਿ ਚ ਰੂਪਧਮ੍ਮਾਤਿ ਸਬ੍ਬੇਪਿ ਸਮੋਧਾਨੇਤ੍ਵਾ ਨਾਮਞ੍ਚ ਰੂਪਞ੍ਚਾਤਿ ਦ੍ਵੇਵ ਧਮ੍ਮਾ ਹੋਨ੍ਤਿ, ਤਤੋ ਉਦ੍ਧਂ ਸਤ੍ਤੋ ਵਾ ਜੀਵੋ ਵਾ ਨਤ੍ਥੀਤਿ ਨਾਮਰੂਪਵਸੇਨ ਪਞ੍ਚਕ੍ਖਨ੍ਧੇ ਵਵਤ੍ਥਪੇਤ੍ਵਾ ਤੇਸਂ ਪਚ੍ਚਯਂ ਪਰਿਯੇਸਨ੍ਤੋ ਅਵਿਜ੍ਜਾਪਚ੍ਚਯਾ ਤਣ੍ਹਾਪਚ੍ਚਯਾ ਕਮ੍ਮਪਚ੍ਚਯਾ ਆਹਾਰਪਚ੍ਚਯਾਤਿ ਏਵਂ ਪਚ੍ਚਯਂ ਦਿਸ੍ਵਾ ‘‘ਅਤੀਤੇਪਿ ਇਮੇਹਿ ਪਚ੍ਚਯੇਹਿ ਇਦਂ ਵਟ੍ਟਂ ਪਵਤ੍ਤਿਤ੍ਥ, ਅਨਾਗਤੇਪਿ ਏਤੇਹਿ ਪਚ੍ਚਯੇਹਿ ਪਵਤ੍ਤਿਸ੍ਸਤਿ, ਏਤਰਹਿਪਿ ਏਤੇਹਿਯੇਵ ਪਵਤ੍ਤਤੀ’’ਤਿ ਤੀਸੁ ਕਾਲੇਸੁ ਕਙ੍ਖਂ ਵਿਤਰਿਤ੍ਵਾ ਅਨੁਕ੍ਕਮੇਨ ਪਟਿਪਜ੍ਜਮਾਨੋ ਅਰਹਤ੍ਤਂ ਪਾਪੁਣਾਤਿ. ਏਵਂ ਵਿਤ੍ਥਾਰਤੋਪਿ ਛਧਾਤੁਵਸੇਨ ਅਰਹਤ੍ਤਸਮ੍ਪਾਪਕਂ ਕਮ੍ਮਟ੍ਠਾਨਂ ਵੇਦਿਤਬ੍ਬਂ.
ਚਕ੍ਖੁ ਫਸ੍ਸਾਯਤਨਨ੍ਤਿ ਸੁਵਣ੍ਣਾਦੀਨਂ ਸੁਵਣ੍ਣਾਦਿਆਕਰੋ ਵਿਯ ਦ੍ਵੇ ਚਕ੍ਖੁਵਿਞ੍ਞਾਣਾਨਿ ਦ੍ਵੇ ਸਮ੍ਪਟਿਚ੍ਛਨਾਨਿ ਤੀਣਿ ਸਨ੍ਤੀਰਣਾਨੀਤਿ ਇਮੇਹਿ ਸਤ੍ਤਹਿ ਵਿਞ੍ਞਾਣੇਹਿ ਸਹਜਾਤਾਨਂ ਸਤ੍ਤਨ੍ਨਂ ਫਸ੍ਸਾਨਂ ਸਮੁਟ੍ਠਾਨਟ੍ਠੇਨ ਆਕਰੋਤਿ ਆਯਤਨਂ. ਸੋਤਂ ਫਸ੍ਸਾਯਤਨਨ੍ਤਿਆਦੀਸੁਪਿ ਏਸੇਵ ਨਯੋ. ਮਨੋ ਫਸ੍ਸਾਯਤਨਨ੍ਤਿ ਏਤ੍ਥ ਪਨ ਦ੍ਵਾਵੀਸਤਿ ਵਿਪਾਕਫਸ੍ਸਾ ਯੋਜੇਤਬ੍ਬਾ. ਇਤਿ ਹਿਦਂ ਛਫਸ੍ਸਾਯਤਨਾਨਂ ਵਸੇਨ ਕਮ੍ਮਟ੍ਠਾਨਂ ਆਗਤਂ. ਤਂ ਸਙ੍ਖੇਪਤੋਪਿ ਵਿਤ੍ਥਾਰਤੋਪਿ ਕਥੇਤਬ੍ਬਂ. ਸਙ੍ਖੇਪਤੋ ਤਾਵ – ਏਤ੍ਥ ਹਿ ਪੁਰਿਮਾਨਿ ਪਞ੍ਚ ਆਯਤਨਾਨਿ ਉਪਾਦਾਰੂਪਂ, ਤੇਸੁ ਦਿਟ੍ਠੇਸੁ ਅਵਸੇਸਂ ਉਪਾਦਾਰੂਪਂ ਦਿਟ੍ਠਮੇਵ ਹੋਤਿ. ਛਟ੍ਠਂ ਆਯਤਨਂ ਚਿਤ੍ਤਂ, ਤਂ ਵਿਞ੍ਞਾਣਕ੍ਖਨ੍ਧੋ ਹੋਤਿ, ਤੇਨ ਸਹਜਾਤਾ ਵੇਦਨਾਦਯੋ ਸੇਸਾ ਤਯੋ ਅਰੂਪਕ੍ਖਨ੍ਧਾਤਿ ਹੇਟ੍ਠਾ ਵੁਤ੍ਤਨਯੇਨੇਵ ਸਙ੍ਖੇਪਤੋ ਚ ਵਿਤ੍ਥਾਰਤੋ ਚ ਅਰਹਤ੍ਤਸਮ੍ਪਾਪਕਂ ਕਮ੍ਮਟ੍ਠਾਨਂ ਵੇਦਿਤਬ੍ਬਂ.
ਚਕ੍ਖੁਨਾ ਰੂਪਂ ਦਿਸ੍ਵਾਤਿ ਚਕ੍ਖੁਵਿਞ੍ਞਾਣੇਨ ਰੂਪਂ ਪਸ੍ਸਿਤ੍ਵਾ. ਸੋਮਨਸ੍ਸਟ੍ਠਾਨਿਯਨ੍ਤਿ ਸੋਮਨਸ੍ਸਸ੍ਸ ਕਾਰਣਭੂਤਂ. ਉਪਵਿਚਰਤੀਤਿ ਤਤ੍ਥ ਮਨਂ ਚਾਰੇਨ੍ਤੋ ਉਪਵਿਚਰਤਿ. ਸੇਸਪਦੇਸੁਪਿ ਏਸੇਵ ਨਯੋ. ਏਤ੍ਥ ਚ ਇਟ੍ਠਂ ਵਾ ਹੋਤੁ ਅਨਿਟ੍ਠਂ ਵਾ, ਯਂ ਰੂਪਂ ਦਿਸ੍ਵਾ ਸੋਮਨਸ੍ਸਂ ਉਪ੍ਪਜ੍ਜਤਿ, ਤਂ ਸੋਮਨਸ੍ਸਟ੍ਠਾਨਿਯਂ ਨਾਮ. ਯਂ ਦਿਸ੍ਵਾ ਦੋਮਨਸ੍ਸਂ ਉਪ੍ਪਜ੍ਜਤਿ, ਤਂ ਦੋਮਨਸ੍ਸਟ੍ਠਾਨਿਯਂ ਨਾਮ. ਯਂ ਦਿਸ੍ਵਾ ਉਪੇਕ੍ਖਾ ਉਪ੍ਪਜ੍ਜਤਿ, ਤਂ ਉਪੇਕ੍ਖਾਟ੍ਠਾਨਿਯਂ ਨਾਮਾਤਿ ਵੇਦਿਤਬ੍ਬਂ. ਸਦ੍ਦਾਦੀਸੁਪਿ ਏਸੇਵ ਨਯੋ. ਇਤਿ ਇਦਂ ਸਙ੍ਖੇਪਤੋ ਕਮ੍ਮਟ੍ਠਾਨਂ ਆਗਤਂ. ਤਂ ਖੋ ਪਨੇਤਂ ਸਙ੍ਖੇਪਤੋ ਆਗਤਟ੍ਠਾਨੇ ਸਙ੍ਖੇਪਤੋਪਿ ਵਿਤ੍ਥਾਰਤੋਪਿ ਕਥੇਤੁਂ ਵਟ੍ਟਤਿ. ਵਿਤ੍ਥਾਰਤੋ ਆਗਤਟ੍ਠਾਨੇ ਸਙ੍ਖੇਪਤੋ ਕਥੇਤੁਂ ਨ ਵਟ੍ਟਤਿ. ਇਮਸ੍ਮਿਂ ਪਨ ਤਿਤ੍ਥਾਯਤਨਸੁਤ੍ਤੇ ਇਦਂ ਸਙ੍ਖੇਪਤੋ ਅਟ੍ਠਾਰਸਮਨੋਪਵਿਚਾਰਵਸੇਨ ਕਮ੍ਮਟ੍ਠਾਨਂ ਆਗਤਂ. ਤਂ ਸਙ੍ਖੇਪਤੋਪਿ ਵਿਤ੍ਥਾਰਤੋਪਿ ਕਥੇਤੁਂ ਵਟ੍ਟਤਿ.
ਤਤ੍ਥ ਸਙ੍ਖੇਪਤੋ ਤਾਵ – ਚਕ੍ਖੁ ਸੋਤਂ ਘਾਨਂ ਜਿਵ੍ਹਾ ਕਾਯੋ, ਰੂਪਂ ਸਦ੍ਦੋ ਗਨ੍ਧੋ ਰਸੋਤਿ ਇਮਾਨਿ ਨਵ ਉਪਾਦਾਰੂਪਾਨਿ, ਤੇਸੁ ਦਿਟ੍ਠੇਸੁ ਸੇਸਂ ਉਪਾਦਾਰੂਪਂ ਦਿਟ੍ਠਮੇਵ ਹੋਤਿ. ਫੋਟ੍ਠਬ੍ਬਂ ਤੀਣਿ ਮਹਾਭੂਤਾਨਿ, ਤੇਹਿ ਦਿਟ੍ਠੇਹਿ ਚਤੁਤ੍ਥਂ ਦਿਟ੍ਠਮੇਵ ਹੋਤਿ. ਮਨੋ ਵਿਞ੍ਞਾਣਕ੍ਖਨ੍ਧੋ, ਤੇਨ ਸਹਜਾਤਾ ਵੇਦਨਾਦਯੋ ਤਯੋ ਅਰੂਪਕ੍ਖਨ੍ਧਾਤਿ ਹੇਟ੍ਠਾ ਵੁਤ੍ਤਨਯੇਨੇਵ ਸਙ੍ਖੇਪਤੋ ਚ ਵਿਤ੍ਥਾਰਤੋ ਚ ਅਰਹਤ੍ਤਸਮ੍ਪਾਪਕਂ ਕਮ੍ਮਟ੍ਠਾਨਂ ਵੇਦਿਤਬ੍ਬਂ.
ਅਰਿਯਸਚ੍ਚਾਨੀਤਿ ਅਰਿਯਭਾਵਕਰਾਨਿ, ਅਰਿਯਪਟਿਵਿਦ੍ਧਾਨਿ ਵਾ ਸਚ੍ਚਾਨਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਤੋ ਪਨੇਤਂ ਪਦਂ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੨.੫੨੯) ਪਕਾਸਿਤਂ. ਛਨ੍ਨਂ, ਭਿਕ੍ਖਵੇ, ਧਾਤੂਨਨ੍ਤਿ ਇਦਂ ਕਿਮਤ੍ਥਂ ਆਰਦ੍ਧਂ? ਸੁਖਾਵਬੋਧਨਤ੍ਥਂ. ਯਸ੍ਸ ਹਿ ਤਥਾਗਤੋ ਦ੍ਵਾਦਸਪਦਂ ਪਚ੍ਚਯਾਵਟ੍ਟਂ ਕਥੇਤੁਕਾਮੋ ਹੋਤਿ, ਤਸ੍ਸ ਗਬ੍ਭਾਵਕ੍ਕਨ੍ਤਿ ਵਟ੍ਟਂ ਦਸ੍ਸੇਤਿ. ਗਬ੍ਭਾਵਕ੍ਕਨ੍ਤਿ ਵਟ੍ਟਸ੍ਮਿਂ ਹਿ ਦਸ੍ਸਿਤੇ ਕਥੇਤੁਮ੍ਪਿ ਸੁਖਂ ਹੋਤਿ ਪਰਂ ਅਵਬੋਧੇ ਉਤੁਮ੍ਪੀਤਿ ਸੁਖਾਵਬੋਧਨਤ੍ਥਂ ਇਦਮਾਰਦ੍ਧਨ੍ਤਿ ਵੇਦਿਤਬ੍ਬਂ. ਤਤ੍ਥ ਛਨ੍ਨਂ ਧਾਤੂਨਨ੍ਤਿ ਹੇਟ੍ਠਾ ਵੁਤ੍ਤਾਨਂਯੇਵ ਪਥਵੀਧਾਤੁਆਦੀਨਂ. ਉਪਾਦਾਯਾਤਿ ਪਟਿਚ੍ਚ. ਏਤੇਨ ਪਚ੍ਚਯਮਤ੍ਤਂ ਦਸ੍ਸੇਤਿ. ਇਦਂ ਵੁਤ੍ਤਂ ਹੋਤਿ ‘‘ਛਧਾਤੁਪਚ੍ਚਯਾ ਗਬ੍ਭਸ੍ਸਾਵਕ੍ਕਨ੍ਤਿ ਹੋਤੀ’’ਤਿ. ਕਸ੍ਸ ਛਨ੍ਨਂ ਧਾਤੂਨਂ ਪਚ੍ਚਯੇਨ, ਕਿਂ ਮਾਤੁ, ਉਦਾਹੁ ਪਿਤੂਤਿ? ਨ ਮਾਤੁ ਨ ਪਿਤੁ, ਪਟਿਸਨ੍ਧਿਗ੍ਗਣ੍ਹਨਕਸਤ੍ਤਸ੍ਸੇਵ ਪਨ ਛਨ੍ਨਂ ਧਾਤੂਨਂ ਪਚ੍ਚਯੇਨ ਗਬ੍ਭਸ੍ਸਾਵਕ੍ਕਨ੍ਤਿ ਨਾਮ ਹੋਤਿ. ਗਬ੍ਭੋ ਚ ਨਾਮੇਸ ਨਿਰਯਗਬ੍ਭੋ ਤਿਰਚ੍ਛਾਨਯੋਨਿਗਬ੍ਭੋ ਪੇਤ੍ਤਿਵਿਸਯਗਬ੍ਭੋ ਮਨੁਸ੍ਸਗਬ੍ਭੋ ਦੇਵਗਬ੍ਭੋਤਿ ਨਾਨਪ੍ਪਕਾਰੋ ਹੋਤਿ. ਇਮਸ੍ਮਿਂ ਪਨ ਠਾਨੇ ਮਨੁਸ੍ਸਗਬ੍ਭੋ ਅਧਿਪ੍ਪੇਤੋ. ਅਵਕ੍ਕਨ੍ਤਿ ਹੋਤੀਤਿ ਓਕ੍ਕਨ੍ਤਿ ਨਿਬ੍ਬਤ੍ਤਿ ਪਾਤੁਭਾਵੋ ਹੋਤਿ, ਕਥਂ ਹੋਤੀਤਿ? ਤਿਣ੍ਣਂ ਸਨ੍ਨਿਪਾਤੇਨ. ਵੁਤ੍ਤਞ੍ਹੇਤਂ –
‘‘ਤਿਣ੍ਣਂ ਖੋ ਪਨ, ਭਿਕ੍ਖਵੇ, ਸਨ੍ਨਿਪਾਤਾ ਗਬ੍ਭਸ੍ਸਾਵਕ੍ਕਨ੍ਤਿ ਹੋਤਿ. ਕਤਮੇਸਂ ਤਿਣ੍ਣਂ? ਇਧ ਮਾਤਾਪਿਤਰੋ ਚ ਸਨ੍ਨਿਪਤਿਤਾ ਹੋਨ੍ਤਿ, ਮਾਤਾ ਚ ਨ ਉਤੁਨੀ ਹੋਤਿ, ਗਨ੍ਧਬ੍ਬੋ ਚ ਨ ਪਚ੍ਚੁਪਟ੍ਠਿਤੋ ਹੋਤਿ. ਨੇਵ ਤਾਵ ਗਬ੍ਭਸ੍ਸਾਵਕ੍ਕਨ੍ਤਿ ਹੋਤਿ. ਇਧ ਮਾਤਾਪਿਤਰੋ ਚ ਸਨ੍ਨਿਪਤਿਤਾ ਹੋਨ੍ਤਿ, ਮਾਤਾ ਚ ਉਤੁਨੀ ਹੋਤਿ, ਗਨ੍ਧਬ੍ਬੋ ਚ ਨ ਪਚ੍ਚੁਪਟ੍ਠਿਤੋ ਹੋਤਿ, ਨੇਵ ਤਾਵ ਗਬ੍ਭਸ੍ਸਾਵਕ੍ਕਨ੍ਤਿ ਹੋਤਿ. ਯਤੋ ਚ ਖੋ, ਭਿਕ੍ਖਵੇ, ਮਾਤਾਪਿਤਰੋ ਚ ਸਨ੍ਨਿਪਤਿਤਾ ਹੋਨ੍ਤਿ, ਮਾਤਾ ਚ ਉਤੁਨੀ ਹੋਤਿ, ਗਨ੍ਧਬ੍ਬੋ ਚ ਪਚ੍ਚੁਪਟ੍ਠਿਤੋ ਹੋਤਿ. ਏਵਂ ਤਿਣ੍ਣਂ ਸਨ੍ਨਿਪਾਤਾ ਗਬ੍ਭਸ੍ਸਾਵਕ੍ਕਨ੍ਤਿ ਹੋਤੀ’’ਤਿ (ਮ. ਨਿ. ੧.੪੦੮).
ਓਕ੍ਕਨ੍ਤਿਯਾ ਸਤਿ ਨਾਮਰੂਪਨ੍ਤਿ ‘‘ਵਿਞ੍ਞਾਣਪਚ੍ਚਯਾ ਨਾਮਰੂਪ’’ਨ੍ਤਿ ਵੁਤ੍ਤਟ੍ਠਾਨੇ ਵਤ੍ਥੁਦਸਕਂ ਕਾਯਦਸਕਂ ਭਾਵਦਸਕਂ ਤਯੋ ਅਰੂਪਿਨੋ ਖਨ੍ਧਾਤਿ ਤੇਤ੍ਤਿਂਸ ਧਮ੍ਮਾ ਗਹਿਤਾ, ਇਮਸ੍ਮਿਂ ਪਨ ‘‘ਓਕ੍ਕਨ੍ਤਿਯਾ ਸਤਿ ਨਾਮਰੂਪ’’ਨ੍ਤਿ ਵੁਤ੍ਤਟ੍ਠਾਨੇ ਵਿਞ੍ਞਾਣਕ੍ਖਨ੍ਧਮ੍ਪਿ ਪਕ੍ਖਿਪਿਤ੍ਵਾ ਗਬ੍ਭਸੇਯ੍ਯਕਾਨਂ ਪਟਿਸਨ੍ਧਿਕ੍ਖਣੇ ਚਤੁਤ੍ਤਿਂਸ ਧਮ੍ਮਾ ਗਹਿਤਾਤਿ ਵੇਦਿਤਬ੍ਬਾ. ਨਾਮਰੂਪਪਚ੍ਚਯਾ ਸਲ਼ਾਯਤਨਨ੍ਤਿਆਦੀਹਿ ਯਥੇਵ ਓਕ੍ਕਨ੍ਤਿਯਾ ਸਤਿ ਨਾਮਰੂਪਪਾਤੁਭਾਵੋ ਦਸ੍ਸਿਤੋ, ਏਵਂ ਨਾਮਰੂਪੇ ਸਤਿ ਸਲ਼ਾਯਤਨਪਾਤੁਭਾਵੋ, ਸਲ਼ਾਯਤਨੇ ਸਤਿ ਫਸ੍ਸਪਾਤੁਭਾਵੋ, ਫਸ੍ਸੇ ਸਤਿ ਵੇਦਨਾਪਾਤੁਭਾਵੋ ਦਸ੍ਸਿਤੋ.
ਵੇਦਿਯਮਾਨਸ੍ਸਾਤਿ ਏਤ੍ਥ ਵੇਦਨਂ ਅਨੁਭਵਨ੍ਤੋਪਿ ਵੇਦਿਯਮਾਨੋਤਿ ਵੁਚ੍ਚਤਿ ਜਾਨਨ੍ਤੋਪਿ. ‘‘ਵੇਦਿਯਾਮਹਂ, ਭਨ੍ਤੇ, ਵੇਦਿਯਤੀਤਿ ਮਂ ਸਙ੍ਘੋ ਧਾਰੇਤੂ’’ਤਿ (ਚੂਲ਼ਵ. ਅਟ੍ਠ. ੧੦੨) ਏਤ੍ਥ ਹਿ ਅਨੁਭਵਨ੍ਤੋ ਵੇਦਿਯਮਾਨੋ ਨਾਮ, ‘‘ਸੁਖਂ ਵੇਦਨਂ ਵੇਦਿਯਮਾਨੋ ਸੁਖਂ ਵੇਦਨਂ ਵੇਦਿਯਾਮੀਤਿ ਪਜਾਨਾਤੀ’’ਤਿ (ਮ. ਨਿ. ੧.੧੧੩; ਦੀ. ਨਿ. ੨.੩੮੦; ਵਿਭ. ੩੬੩) ਏਤ੍ਥ ਜਾਨਨ੍ਤੋ. ਇਧਾਪਿ ਜਾਨਨ੍ਤੋਵ ਅਧਿਪ੍ਪੇਤੋ. ਇਦਂ ਦੁਕ੍ਖਨ੍ਤਿ ਪਞ੍ਞਪੇਮੀਤਿ ਏਵਂ ਜਾਨਨ੍ਤਸ੍ਸ ਸਤ੍ਤਸ੍ਸ ‘‘ਇਦਂ ਦੁਕ੍ਖਂ ਏਤ੍ਤਕਂ ਦੁਕ੍ਖਂ, ਨਤ੍ਥਿ ਇਤੋ ਉਦ੍ਧਂ ਦੁਕ੍ਖ’’ਨ੍ਤਿ ਪਞ੍ਞਪੇਮਿ ਬੋਧੇਮਿ ਜਾਨਾਪੇਮਿ. ਅਯਂ ਦੁਕ੍ਖਸਮੁਦਯੋਤਿਆਦੀਸੁਪਿ ਏਸੇਵ ਨਯੋ.
ਤਤ੍ਥ ਦੁਕ੍ਖਾਦੀਸੁ ਅਯਂ ਸਨ੍ਨਿਟ੍ਠਾਨਕਥਾ – ਠਪੇਤ੍ਵਾ ਹਿ ਤਣ੍ਹਂ ਤੇਭੂਮਕਾ ਪਞ੍ਚਕ੍ਖਨ੍ਧਾ ਦੁਕ੍ਖਂ ਨਾਮ, ਤਸ੍ਸੇਵ ਪਭਾਵਿਕਾ ਪੁਬ੍ਬਤਣ੍ਹਾ ਦੁਕ੍ਖਸਮੁਦਯੋ ਨਾਮ, ਤੇਸਂ ਦ੍ਵਿਨ੍ਨਮ੍ਪਿ ਸਚ੍ਚਾਨਂ ਅਨੁਪ੍ਪਤ੍ਤਿਨਿਰੋਧੋ ਦੁਕ੍ਖਨਿਰੋਧੋ ਨਾਮ, ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ ਨਾਮ. ਇਤਿ ਭਗਵਾ ਓਕ੍ਕਨ੍ਤਿਯਾ ਸਤਿ ਨਾਮਰੂਪਨ੍ਤਿ ਕਥੇਨ੍ਤੋਪਿ ਵੇਦਿਯਮਾਨਸ੍ਸ ਜਾਨਮਾਨਸ੍ਸੇਵ ਕਥੇਸਿ, ਨਾਮਰੂਪਪਚ੍ਚਯਾ ਸਲ਼ਾਯਤਨਨ੍ਤਿ ਕਥੇਨ੍ਤੋਪਿ, ਸਲ਼ਾਯਤਨਪਚ੍ਚਯਾ ਫਸ੍ਸੋਤਿ ਕਥੇਨ੍ਤੋਪਿ, ਫਸ੍ਸਪਚ੍ਚਯਾ ਵੇਦਨਾਤਿ ਕਥੇਨ੍ਤੋਪਿ, ਵੇਦਿਯਮਾਨਸ੍ਸ ਖੋ ਪਨਾਹਂ, ਭਿਕ੍ਖਵੇ, ਇਦਂ ਦੁਕ੍ਖਨ੍ਤਿ ਪਞ੍ਞਪੇਮੀਤਿ ਕਥੇਨ੍ਤੋਪਿ, ਅਯਂ ਦੁਕ੍ਖਸਮੁਦਯੋਤਿ, ਅਯਂ ਦੁਕ੍ਖਨਿਰੋਧੋਤਿ, ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾਤਿ ਪਞ੍ਞਪੇਮੀਤਿ ਕਥੇਨ੍ਤੋਪਿ ਵੇਦਿਯਮਾਨਸ੍ਸ ਜਾਨਮਾਨਸ੍ਸੇਵ ਕਥੇਸਿ.
ਇਦਾਨਿ ਤਾਨਿ ਪਟਿਪਾਟਿਯਾ ਠਪਿਤਾਨਿ ਸਚ੍ਚਾਨਿ ਵਿਤ੍ਥਾਰੇਨ੍ਤੋ ਕਤਮਞ੍ਚ, ਭਿਕ੍ਖਵੇਤਿਆਦਿਮਾਹ. ਤਂ ਸਬ੍ਬਂ ਸਬ੍ਬਾਕਾਰੇਨ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੨.੫੩੭) ਵਿਤ੍ਥਾਰਿਤਮੇਵ. ਤਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਅਯਂ ਪਨ ਵਿਸੇਸੋ – ਤਤ੍ਥ ‘‘ਦੁਕ੍ਖਸਮੁਦਯਂ ਅਰਿਯਸਚ੍ਚਂ ਯਾਯਂ ਤਣ੍ਹਾ ਪੋਨੋਬ੍ਭਵਿਕਾ’’ਤਿ (ਮ. ਨਿ. ੧.੧੩੩; ਦੀ. ਨਿ. ੨.੪੦੦; ਵਿਭ. ੨੦੩) ਇਮਾਯ ਤਨ੍ਤਿਯਾ ਆਗਤਂ, ਇਧ ‘‘ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ’’ਤਿ ਪਚ੍ਚਯਾਕਾਰਵਸੇਨ. ਤਤ੍ਥ ਚ ਦੁਕ੍ਖਨਿਰੋਧਂ ਅਰਿਯਸਚ੍ਚਂ ‘‘ਯੋ ਤਸ੍ਸਾਯੇਵ ਤਣ੍ਹਾਯ ਅਸੇਸਵਿਰਾਗਨਿਰੋਧੋ’’ਤਿ (ਮ. ਨਿ. ੧.੧੩੪; ਦੀ. ਨਿ. ੨.੪੦੧; ਵਿਭ. ੨੦੪) ਇਮਾਯ ਤਨ੍ਤਿਯਾ ਆਗਤਂ, ਇਧ ‘‘ਅਵਿਜ੍ਜਾਯਤ੍ਵੇਵ ਅਸੇਸਵਿਰਾਗਨਿਰੋਧਾ’’ਤਿ ਪਚ੍ਚਯਾਕਾਰਨਿਰੋਧਵਸੇਨ.
ਤਤ੍ਥ ਅਸੇਸਵਿਰਾਗਨਿਰੋਧਾਤਿ ਅਸੇਸਵਿਰਾਗੇਨ ਚ ਅਸੇਸਨਿਰੋਧੇਨ ਚ. ਉਭਯਮ੍ਪੇਤਂ ਅਞ੍ਞਮਞ੍ਞਵੇਵਚਨਮੇਵ. ਸਙ੍ਖਾਰਨਿਰੋਧੋਤਿ ਸਙ੍ਖਾਰਾਨਂ ਅਨੁਪ੍ਪਤ੍ਤਿਨਿਰੋਧੋ ਹੋਤਿ. ਸੇਸਪਦੇਸੁਪਿ ਏਸੇਵ ਨਯੋ. ਇਮੇਹਿ ਪਨ ਪਦੇਹਿ ਯਂ ਆਗਮ੍ਮ ਅਵਿਜ੍ਜਾਦਯੋ ਨਿਰੁਜ੍ਝਨ੍ਤਿ, ਅਤ੍ਥਤੋ ਤਂ ਨਿਬ੍ਬਾਨਂ ਦੀਪਿਤਂ ਹੋਤਿ. ਨਿਬ੍ਬਾਨਞ੍ਹਿ ਅਵਿਜ੍ਜਾਨਿਰੋਧੋਤਿਪਿ ਸਙ੍ਖਾਰਨਿਰੋਧੋਤਿਪਿ ਏਵਂ ਤੇਸਂ ਤੇਸਂ ਧਮ੍ਮਾਨਂ ਨਿਰੋਧਨਾਮੇਨ ਕਥੀਯਤਿ. ਕੇਵਲਸ੍ਸਾਤਿ ਸਕਲਸ੍ਸ. ਦੁਕ੍ਖਕ੍ਖਨ੍ਧਸ੍ਸਾਤਿ ਵਟ੍ਟਦੁਕ੍ਖਰਾਸਿਸ੍ਸ. ਨਿਰੋਧੋ ਹੋਤੀਤਿ ਅਪ੍ਪਵਤ੍ਤਿ ਹੋਤਿ. ਤਤ੍ਥ ਯਸ੍ਮਾ ਅਵਿਜ੍ਜਾਦੀਨਂ ਨਿਰੋਧੋ ਨਾਮ ਖੀਣਾਕਾਰੋਪਿ ਵੁਚ੍ਚਤਿ ਅਰਹਤ੍ਤਮ੍ਪਿ ਨਿਬ੍ਬਾਨਮ੍ਪਿ, ਤਸ੍ਮਾ ਇਧ ਖੀਣਾਕਾਰਦਸ੍ਸਨਵਸੇਨ ਦ੍ਵਾਦਸਸੁ ਠਾਨੇਸੁ ਅਰਹਤ੍ਤਂ, ਦ੍ਵਾਦਸਸੁਯੇਵ ਨਿਬ੍ਬਾਨਂ ਕਥਿਤਨ੍ਤਿ ਵੇਦਿਤਬ੍ਬਂ. ਇਦਂ ਵੁਚ੍ਚਤੀਤਿ ਏਤ੍ਥ ਨਿਬ੍ਬਾਨਮੇਵ ਸਨ੍ਧਾਯ ਇਦਨ੍ਤਿ ਵੁਤ੍ਤਂ. ਅਟ੍ਠਙ੍ਗਿਕੋਤਿ ਨ ਅਟ੍ਠਹਿ ਅਙ੍ਗੇਹਿ ਵਿਨਿਮੁਤ੍ਤੋ ਅਞ੍ਞੋ ਮਗ੍ਗੋ ਨਾਮ ਅਤ੍ਥਿ. ਯਥਾ ਪਨ ਪਞ੍ਚਙ੍ਗਿਕਂ ਤੂਰਿਯਨ੍ਤਿ ਵੁਤ੍ਤੇ ਪਞ੍ਚਙ੍ਗਮਤ੍ਤਮੇਵ ਤੂਰਿਯਨ੍ਤਿ ਵੁਤ੍ਤਂ ਹੋਤਿ, ਏਵਮਿਧਾਪਿ ਅਟ੍ਠਙ੍ਗਿਕਮਤ੍ਤਮੇਵ ਮਗ੍ਗੋ ਹੋਤੀਤਿ ਵੇਦਿਤਬ੍ਬੋ. ਅਨਿਗ੍ਗਹਿਤੋਤਿ ਨ ਨਿਗ੍ਗਹਿਤੋ. ਨਿਗ੍ਗਣ੍ਹਨ੍ਤੋ ਹਿ ਹਾਪੇਤ੍ਵਾ ਵਾ ਦਸ੍ਸੇਤਿ ਵਡ੍ਢੇਤ੍ਵਾ ਵਾ ਤਂ ਪਰਿਵਤ੍ਤੇਤ੍ਵਾ ਵਾ. ਤਤ੍ਥ ਯਸ੍ਮਾ ਚਤ੍ਤਾਰਿ ਅਰਿਯਸਚ੍ਚਾਨਿ ‘‘ਨ ਇਮਾਨਿ ਚਤ੍ਤਾਰਿ, ਦ੍ਵੇ ਵਾ ਤੀਣਿ ਵਾ’’ਤਿ ਏਵਂ ਹਾਪੇਤ੍ਵਾਪਿ ‘‘ਪਞ੍ਚ ਵਾ ਛ ਵਾ’’ਤਿ ਏਵਂ ਵਡ੍ਢੇਤ੍ਵਾਪਿ ‘‘ਨ ਇਮਾਨਿ ਚਤ੍ਤਾਰਿ ਅਰਿਯਸਚ੍ਚਾਨਿ, ਅਞ੍ਞਾਨੇਵ ਚਤ੍ਤਾਰਿ ਅਰਿਯਸਚ੍ਚਾਨੀ’’ਤਿ ਦਸ੍ਸੇਤੁਂ ਨ ਸਕ੍ਕਾ. ਤਸ੍ਮਾ ਅਯਂ ਧਮ੍ਮੋ ਅਨਿਗ੍ਗਹਿਤੋ ਨਾਮ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
੨. ਭਯਸੁਤ੍ਤਵਣ੍ਣਨਾ
੬੩. ਦੁਤਿਯੇ ਅਮਾਤਾਪੁਤ੍ਤਿਕਾਨੀਤਿ ਮਾਤਾ ਚ ਪੁਤ੍ਤੋ ਚ ਮਾਤਾਪੁਤ੍ਤਂ, ਪਰਿਤ੍ਤਾਤੁਂ ਸਮਤ੍ਥਭਾਵੇਨ ਨਤ੍ਥਿ ਏਤ੍ਥ ਮਾਤਾਪੁਤ੍ਤਨ੍ਤਿ ਅਮਾਤਾਪੁਤ੍ਤਿਕਾਨਿ. ਯਨ੍ਤਿ ਯਸ੍ਮਿਂ ਸਮਯੇ. ਤਤ੍ਥ ਮਾਤਾਪਿ ਪੁਤ੍ਤਂ ਨਪ੍ਪਟਿਲਭਤੀਤਿ ਤਸ੍ਮਿਂ ਅਗ੍ਗਿਭਯੇ ਉਪ੍ਪਨ੍ਨੇ ਮਾਤਾਪਿ ਪੁਤ੍ਤਂ ਪਸ੍ਸਿਤੁਂ ਨ ਲਭਤਿ, ਪੁਤ੍ਤੋਪਿ ਮਾਤਰਂ ਪਸ੍ਸਿਤੁਂ ਨ ਲਭਤੀਤਿ ਅਤ੍ਥੋ. ਭਯਂ ਹੋਤੀਤਿ ਚਿਤ੍ਤੁਤ੍ਰਾਸਭਯਂ ਹੋਤਿ. ਅਟਵਿਸਙ੍ਕੋਪੋਤਿ ਅਟਵਿਯਾ ਸਙ੍ਕੋਪੋ. ਅਟਵੀਤਿ ਚੇਤ੍ਥ ਅਟਵਿਵਾਸਿਨੋ ਚੋਰਾ ਵੇਦਿਤਬ੍ਬਾ. ਯਦਾ ਹਿ ਤੇ ਅਟਵਿਤੋ ਜਨਪਦਂ ਓਤਰਿਤ੍ਵਾ ਗਾਮਨਿਗਮਰਾਜਧਾਨਿਯੋ ਪਹਰਿਤ੍ਵਾ ਵਿਲੁਮ੍ਪਨ੍ਤਿ, ਤਦਾ ਅਟਵਿਸਙ੍ਕੋਪੋ ਨਾਮ ਹੋਤਿ, ਤਂ ਸਨ੍ਧਾਯੇਤਂ ਵੁਤ੍ਤਂ. ਚਕ੍ਕਸਮਾਰੂਲ਼੍ਹਾਤਿ ਏਤ੍ਥ ਇਰਿਯਾਪਥਚਕ੍ਕਮ੍ਪਿ ਵਟ੍ਟਤਿ ਯਾਨਚਕ੍ਕਮ੍ਪਿ. ਭਯਸ੍ਮਿਂ ਹਿ ਸਮ੍ਪਤ੍ਤੇ ਯੇਸਂ ਯਾਨਕਾਨਿ ਅਤ੍ਥਿ, ਤੇ ਅਤ੍ਤਨੋ ਪਰਿਕ੍ਖਾਰਭਣ੍ਡਂ ਤੇਸੁ ਆਰੋਪੇਤ੍ਵਾ ਪਲਾਯਨ੍ਤਿ. ਯੇਸਂ ਨਤ੍ਥਿ, ਤੇ ਕਾਜੇਨ ਵਾ ਆਦਾਯ ਸੀਸੇਨ ਵਾ ਉਕ੍ਖਿਪਿਤ੍ਵਾ ਪਲਾਯਨ੍ਤਿਯੇਵ. ਤੇ ਚਕ੍ਕਸਮਾਰੂਲ਼੍ਹਾ ਨਾਮ ਹੋਨ੍ਤਿ. ਪਰਿਯਾਯਨ੍ਤੀਤਿ ਇਤੋ ਚਿਤੋ ਚ ਗਚ੍ਛਨ੍ਤਿ. ਕਦਾਚੀਤਿ ਕਿਸ੍ਮਿਞ੍ਚਿਦੇਵ ਕਾਲੇ. ਕਰਹਚੀਤਿ ਤਸ੍ਸੇਵ ਵੇਵਚਨਂ. ਮਾਤਾਪਿ ਪੁਤ੍ਤਂ ਪਟਿਲਭਤੀਤਿ ਆਗਚ੍ਛਨ੍ਤਂ ਵਾ ਗਚ੍ਛਨ੍ਤਂ ਵਾ ਏਕਸ੍ਮਿਂ ਠਾਨੇ ਨਿਲੀਨਂ ਵਾ ਪਸ੍ਸਿਤੁਂ ਲਭਤਿ. ਉਦਕਵਾਹਕੋਤਿ ਨਦੀਪੂਰੋ. ਮਾਤਾਪਿ ਪੁਤ੍ਤਂ ਪਟਿਲਭਤੀਤਿ ਕੁਲ੍ਲੇ ਵਾ ਉਲ਼ੁਮ੍ਪੇ ਵਾ ਮਤ੍ਤਿਕਾਭਾਜਨੇ ਵਾ ਦਾਰੁਕ੍ਖਣ੍ਡੇ ਵਾ ਲਗ੍ਗਂ ਵੁਯ੍ਹਮਾਨਂ ਪਸ੍ਸਿਤੁਂ ਪਟਿਲਭਤਿ, ਸੋਤ੍ਥਿਨਾ ਵਾ ਪੁਨ ਉਤ੍ਤਰਿਤ੍ਵਾ ਗਾਮੇ ਵਾ ਅਰਞ੍ਞੇ ਵਾ ਠਿਤਂ ਪਸ੍ਸਿਤੁਂ ਲਭਤੀਤਿ.
ਏਵਂ ਪਰਿਯਾਯਤੋ ਅਮਾਤਾਪੁਤ੍ਤਿਕਾਨਿ ਭਯਾਨਿ ਦਸ੍ਸੇਤ੍ਵਾ ਇਦਾਨਿ ਨਿਪ੍ਪਰਿਯਾਯੇਨ ਦਸ੍ਸੇਨ੍ਤੋ ਤੀਣਿਮਾਨੀਤਿਆਦਿਮਾਹ. ਤਤ੍ਥ ਜਰਾਭਯਨ੍ਤਿ ਜਰਂ ਪਟਿਚ੍ਚ ਉਪ੍ਪਜ੍ਜਨਕਭਯਂ. ਇਤਰੇਸੁਪਿ ਏਸੇਵ ਨਯੋ. ਵੁਤ੍ਤਮ੍ਪਿ ਚੇਤਂ – ‘‘ਜਰਂ ਪਟਿਚ੍ਚ ਉਪ੍ਪਜ੍ਜਤਿ ਭਯਂ ਭਯਾਨਕਂ ਛਮ੍ਭਿਤਤ੍ਤਂ ਲੋਮਹਂਸੋ ਚੇਤਸੋ ਉਤ੍ਰਾਸੋ. ਬ੍ਯਾਧਿਂ ਪਟਿਚ੍ਚ, ਮਰਣਂ ਪਟਿਚ੍ਚ ਉਪ੍ਪਜ੍ਜਤਿ ਭਯਂ ਭਯਾਨਕਂ ਛਮ੍ਭਿਤਤ੍ਤਂ ਲੋਮਹਂਸੋ ਚੇਤਸੋ ਉਤ੍ਰਾਸੋ’’ਤਿ (ਵਿਭ. ੯੨੧). ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
੩. ਵੇਨਾਗਪੁਰਸੁਤ੍ਤਵਣ੍ਣਨਾ
੬੪. ਤਤਿਯੇ ਕੋਸਲੇਸੂਤਿ ਏਵਂਨਾਮਕੇ ਜਨਪਦੇ. ਚਾਰਿਕਂ ਚਰਮਾਨੋਤਿ ਅਦ੍ਧਾਨਗਮਨਂ ਗਚ੍ਛਨ੍ਤੋ. ਚਾਰਿਕਾ ਚ ਨਾਮੇਸਾ ਭਗਵਤੋ ਦੁਵਿਧਾ ਹੋਤਿ ਤੁਰਿਤਚਾਰਿਕਾ ਚ ਅਤੁਰਿਤਚਾਰਿਕਾ ਚਾਤਿ. ਤਤ੍ਥ ਦੂਰੇਪਿ ਬੋਧਨੇਯ੍ਯਪੁਗ੍ਗਲਂ ਦਿਸ੍ਵਾ ਤਸ੍ਸ ਬੋਧਨਤ੍ਥਾਯ ਸਹਸਾ ਗਮਨਂ ਤੁਰਿਤਚਾਰਿਕਾ ਨਾਮ. ਸਾ ਮਹਾਕਸ੍ਸਪਪਚ੍ਚੁਗ੍ਗਮਨਾਦੀਸੁ ਦਟ੍ਠਬ੍ਬਾ. ਯਂ ਪਨ ਗਾਮਨਿਗਮਪਟਿਪਾਟਿਯਾ ਦੇਵਸਿਕਂ ਯੋਜਨਅਦ੍ਧਯੋਜਨਵਸੇਨ ਪਿਣ੍ਡਪਾਤਚਰਿਯਾਦੀਹਿ ਲੋਕਂ ਅਨੁਗ੍ਗਣ੍ਹਨ੍ਤਸ੍ਸ ਗਮਨਂ, ਅਯਂ ਅਤੁਰਿਤਚਾਰਿਕਾ ਨਾਮ. ਇਮਂ ਸਨ੍ਧਾਯੇਤਂ ਵੁਤ੍ਤਂ – ‘‘ਚਾਰਿਕਂ ਚਰਮਾਨੋ’’ਤਿ. ਵਿਤ੍ਥਾਰੇਨ ਪਨ ਚਾਰਿਕਾਕਥਾ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ ਅਮ੍ਬਟ੍ਠਸੁਤ੍ਤਵਣ੍ਣਨਾਯਂ (ਦੀ. ਨਿ. ਅਟ੍ਠ. ੧.੨੫੪) ਵੁਤ੍ਤਾ. ਬ੍ਰਾਹ੍ਮਣਗਾਮੋਤਿ ਬ੍ਰਾਹ੍ਮਣਾਨਂ ਸਮੋਸਰਣਗਾਮੋਪਿ ਬ੍ਰਾਹ੍ਮਣਗਾਮੋਤਿ ਵੁਚ੍ਚਤਿ, ਬ੍ਰਾਹ੍ਮਣਾਨਂ ਭੋਗਗਾਮੋਪਿ. ਇਧ ਸਮੋਸਰਣਗਾਮੋ ਬ੍ਰਾਹ੍ਮਣਵਸਨਗਾਮੋਤਿ ਅਧਿਪ੍ਪੇਤੋ. ਤਦਵਸਰੀਤਿ ਤਤ੍ਥ ਅਵਸਰਿ, ਸਮ੍ਪਤ੍ਤੋਤਿ ਅਤ੍ਥੋ. ਵਿਹਾਰੋ ਪਨੇਤ੍ਥ ਅਨਿਯਾਮਿਤੋ. ਤਸ੍ਮਾ ਤਸ੍ਸ ਅਵਿਦੂਰੇ ਬੁਦ੍ਧਾਨਂ ਅਨੁਚ੍ਛਵਿਕੋ ਏਕੋ ਵਨਸਣ੍ਡੋ ਅਤ੍ਥਿ, ਸਤ੍ਥਾ ਤਂ ਵਨਸਣ੍ਡਂ ਗਤੋਤਿ ਵੇਦਿਤਬ੍ਬੋ.
ਅਸ੍ਸੋਸੁਨ੍ਤਿ ਸੁਣਿਂਸੁ ਉਪਲਭਿਂਸੁ, ਸੋਤਦ੍ਵਾਰਸਮ੍ਪਤ੍ਤਵਚਨਨਿਗ੍ਘੋਸਾਨੁਸਾਰੇਨ ਜਾਨਿਂਸੁ. ਖੋਤਿ ਅਵਧਾਰਣਤ੍ਥੇ, ਪਦਪੂਰਣਮਤ੍ਤੇ ਵਾ ਨਿਪਾਤੋ. ਤਤ੍ਥ ਅਵਧਾਰਣਤ੍ਥੇਨ ‘‘ਅਸ੍ਸੋਸੁਂ ਏਵ, ਨ ਤੇਸਂ ਕੋਚਿ ਸਵਨਨ੍ਤਰਾਯੋ ਅਹੋਸੀ’’ਤਿ ਅਯਮਤ੍ਥੋ ਵੇਦਿਤਬ੍ਬੋ. ਪਦਪੂਰਣੇਨ ਬ੍ਯਞ੍ਜਨਸਿਲਿਟ੍ਠਤਾਮਤ੍ਤਮੇਵ.
ਇਦਾਨਿ ਯਮਤ੍ਥਂ ਅਸ੍ਸੋਸੁਂ, ਤਂ ਪਕਾਸੇਤੁਂ ਸਮਣੋ ਖਲੁ, ਭੋ, ਗੋਤਮੋਤਿਆਦਿ ਵੁਤ੍ਤਂ. ਤਤ੍ਥ ਸਮਿਤਪਾਪਤ੍ਤਾ ਸਮਣੋਤਿ ਵੇਦਿਤਬ੍ਬੋ. ਖਲੂਤਿ ਅਨੁਸ੍ਸਵਤ੍ਥੇ ਨਿਪਾਤੋ. ਭੋਤਿ ਤੇਸਂ ਅਞ੍ਞਮਞ੍ਞਂ ਆਲਪਨਮਤ੍ਤਂ. ਗੋਤਮੋਤਿ ਭਗਵਤੋ ਗੋਤ੍ਤਵਸੇਨ ਪਰਿਦੀਪਨਂ, ਤਸ੍ਮਾ ‘‘ਸਮਣੋ ਖਲੁ, ਭੋ, ਗੋਤਮੋ’’ਤਿ ਏਤ੍ਥ ਸਮਣੋ ਕਿਰ, ਭੋ, ਗੋਤਮਗੋਤ੍ਤੋਤਿ ਏਵਮਤ੍ਥੋ ਦਟ੍ਠਬ੍ਬੋ. ਸਕ੍ਯਪੁਤ੍ਤੋਤਿ ਇਦਂ ਪਨ ਭਗਵਤੋ ਉਚ੍ਚਾਕੁਲਪਰਿਦੀਪਨਂ. ਸਕ੍ਯਕੁਲਾ ਪਬ੍ਬਜਿਤੋਤਿ ਸਦ੍ਧਾਪਬ੍ਬਜਿਤਭਾਵਪਰਿਦੀਪਨਂ, ਕੇਨਚਿ ਪਾਰਿਜੁਞ੍ਞੇਨ ਅਨਭਿਭੂਤੋ ਅਪਰਿਕ੍ਖੀਣਂਯੇਵ ਤਂ ਕੁਲਂ ਪਹਾਯ ਸਦ੍ਧਾਯ ਪਬ੍ਬਜਿਤੋਤਿ ਵੁਤ੍ਤਂ ਹੋਤਿ. ਤਂ ਖੋ ਪਨਾਤਿ ਇਤ੍ਥਮ੍ਭੂਤਾਖ੍ਯਾਨਤ੍ਥੇ ਉਪਯੋਗਵਚਨਂ, ਤਸ੍ਸ ਖੋ ਪਨ ਭੋਤੋ ਗੋਤਮਸ੍ਸਾਤਿ ਅਤ੍ਥੋ. ਕਲ੍ਯਾਣੋਤਿ ਕਲ੍ਯਾਣਗੁਣਸਮਨ੍ਨਾਗਤੋ, ਸੇਟ੍ਠੋਤਿ ਵੁਤ੍ਤਂ ਹੋਤਿ. ਕਿਤ੍ਤਿਸਦ੍ਦੋਤਿ ਕਿਤ੍ਤਿਯੇਵ, ਥੁਤਿਘੋਸੋ ਵਾ. ਅਬ੍ਭੁਗ੍ਗਤੋਤਿ ਸਦੇਵਕਂ ਲੋਕਂ ਅਜ੍ਝੋਤ੍ਥਰਿਤ੍ਵਾ ਉਗ੍ਗਤੋ. ਕਿਨ੍ਤਿ? ਇਤਿਪਿ ਸੋ ਭਗਵਾ…ਪੇ… ਬੁਦ੍ਧੋ ਭਗਵਾਤਿ. ਤਤ੍ਰਾਯਂ ਪਦਸਮ੍ਬਨ੍ਧੋ – ਸੋ ਭਗਵਾ ਇਤਿਪਿ ਅਰਹਂ, ਇਤਿਪਿ ਸਮ੍ਮਾਸਮ੍ਬੁਦ੍ਧੋ…ਪੇ… ਇਤਿਪਿ ਭਗਵਾਤਿ. ਇਮਿਨਾ ਚ ਇਮਿਨਾ ਚ ਕਾਰਣੇਨਾਤਿ ਵੁਤ੍ਤਂ ਹੋਤਿ.
ਤਤ੍ਥ ‘‘ਆਰਕਤ੍ਤਾ, ਅਰੀਨਂ ਅਰਾਨਞ੍ਚ ਹਤਤ੍ਤਾ, ਪਚ੍ਚਯਾਦੀਨਂ ਅਰਹਤ੍ਤਾ, ਪਾਪਕਰਣੇ ਰਹਾਭਾਵਾਤਿ ਇਮੇਹਿ ਕਾਰਣੇਹਿ ਸੋ ਭਗਵਾ ਅਰਹਨ੍ਤਿ ਵੇਦਿਤਬ੍ਬੋ’’ਤਿਆਦਿਨਾ ਨਯੇਨ ਮਾਤਿਕਂ ਨਿਕ੍ਖਿਪਿਤ੍ਵਾ ਸਬ੍ਬਾਨੇਵ ਏਤਾਨਿ ਪਦਾਨਿ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੧੨੫-੧੨੭) ਬੁਦ੍ਧਾਨੁਸ੍ਸਤਿਨਿਦ੍ਦੇਸੇ ਵਿਤ੍ਥਾਰਿਤਾਨੀਤਿ ਤਤੋ ਨੇਸਂ ਵਿਤ੍ਥਾਰੋ ਗਹੇਤਬ੍ਬੋ.
ਸੋ ਇਮਂ ਲੋਕਨ੍ਤਿ ਸੋ ਭਵਂ ਗੋਤਮੋ ਇਮਂ ਲੋਕਂ, ਇਦਾਨਿ ਵਤ੍ਤਬ੍ਬਂ ਨਿਦਸ੍ਸੇਤਿ. ਸਦੇਵਕਨ੍ਤਿ ਸਹ ਦੇਵੇਹਿ ਸਦੇਵਕਂ. ਏਵਂ ਸਹ ਮਾਰੇਨ ਸਮਾਰਕਂ. ਸਹ ਬ੍ਰਹ੍ਮੁਨਾ ਸਬ੍ਰਹ੍ਮਕਂ. ਸਹ ਸਮਣਬ੍ਰਾਹ੍ਮਣੇਹਿ ਸਸ੍ਸਮਣਬ੍ਰਾਹ੍ਮਣਿਂ. ਪਜਾਤਤ੍ਤਾ ਪਜਾ, ਤਂ ਪਜਂ. ਸਹ ਦੇਵਮਨੁਸ੍ਸੇਹਿ ਸਦੇਵਮਨੁਸ੍ਸਂ. ਤਤ੍ਥ ਸਦੇਵਕਵਚਨੇਨ ਪਞ੍ਚਕਾਮਾਵਚਰਦੇਵਗ੍ਗਹਣਂ ਵੇਦਿਤਬ੍ਬਂ, ਸਮਾਰਕਵਚਨੇਨ ਛਟ੍ਠਕਾਮਾਵਚਰਦੇਵਗ੍ਗਹਣਂ, ਸਬ੍ਰਹ੍ਮਕਵਚਨੇਨ ਬ੍ਰਹ੍ਮਕਾਯਿਕਾਦਿਬ੍ਰਹ੍ਮਗ੍ਗਹਣਂ, ਸਸ੍ਸਮਣਬ੍ਰਾਹ੍ਮਣਿਵਚਨੇਨ ਸਾਸਨਸ੍ਸ ਪਚ੍ਚਤ੍ਥਿਕਪਚ੍ਚਾਮਿਤ੍ਤਸਮਣਬ੍ਰਾਹ੍ਮਣਗ੍ਗਹਣਂ, ਸਮਿਤਪਾਪਬਾਹਿਤਪਾਪਸਮਣਬ੍ਰਾਹ੍ਮਣਗ੍ਗਹਣਞ੍ਚ, ਪਜਾਵਚਨੇਨ ਸਤ੍ਤਲੋਕਗ੍ਗਹਣਂ, ਸਦੇਵਮਨੁਸ੍ਸਵਚਨੇਨ ਸਮ੍ਮੁਤਿਦੇਵਅਵਸੇਸਮਨੁਸ੍ਸਗ੍ਗਹਣਂ. ਏਵਮੇਤ੍ਥ ਤੀਹਿ ਪਦੇਹਿ ਓਕਾਸਲੋਕੇਨ ਸਦ੍ਧਿਂ ਸਤ੍ਤਲੋਕੋ, ਦ੍ਵੀਹਿ ਪਜਾਵਸੇਨ ਸਤ੍ਤਲੋਕੋਵ ਗਹਿਤੋਤਿ ਵੇਦਿਤਬ੍ਬੋ.
ਅਪਰੋ ਨਯੋ – ਸਦੇਵਕਗ੍ਗਹਣੇਨ ਅਰੂਪਾਵਚਰਲੋਕੋ ਗਹਿਤੋ, ਸਮਾਰਕਗ੍ਗਹਣੇਨ ਛਕਾਮਾਵਚਰਦੇਵਲੋਕੋ, ਸਬ੍ਰਹ੍ਮਕਗ੍ਗਹਣੇਨ ਰੂਪੀਬ੍ਰਹ੍ਮਲੋਕੋ, ਸਸ੍ਸਮਣਬ੍ਰਾਹ੍ਮਣਾਦਿਗ੍ਗਹਣੇਨ ਚਤੁਪਰਿਸਵਸੇਨ, ਸਮ੍ਮੁਤਿਦੇਵੇਹਿ ਵਾ ਸਹ ਮਨੁਸ੍ਸਲੋਕੋ, ਅਵਸੇਸਸਬ੍ਬਸਤ੍ਤਲੋਕੋ ਵਾ. ਪੋਰਾਣਾ ਪਨਾਹੁ – ਸਦੇਵਕਨ੍ਤਿ ਦੇਵਤਾਹਿ ਸਦ੍ਧਿਂ ਅਵਸੇਸਲੋਕਂ. ਸਮਾਰਕਨ੍ਤਿ ਮਾਰੇਨ ਸਦ੍ਧਿਂ ਅਵਸੇਸਲੋਕਂ. ਸਬ੍ਰਹ੍ਮਕਨ੍ਤਿ ਬ੍ਰਹ੍ਮੇਹਿ ਸਦ੍ਧਿਂ ਅਵਸੇਸਲੋਕਂ. ਏਵਂ ਸਬ੍ਬੇਪਿ ਤਿਭਵੂਪਗੇ ਸਤ੍ਤੇ ਤੀਹਾਕਾਰੇਹਿ ਤੀਸੁ ਪਦੇਸੁ ਪਕ੍ਖਿਪਿਤ੍ਵਾ ਪੁਨ ਦ੍ਵੀਹਿ ਪਦੇਹਿ ਪਰਿਯਾਦਾਤੁਂ ਸਸ੍ਸਮਣਬ੍ਰਾਹ੍ਮਣਿਂ ਪਜਂ ਸਦੇਵਮਨੁਸ੍ਸਨ੍ਤਿ ਵੁਤ੍ਤਂ. ਏਵਂ ਪਞ੍ਚਹਿ ਪਦੇਹਿ ਤੇਨ ਤੇਨਾਕਾਰੇਨ ਤੇਧਾਤੁਕਮੇਵ ਪਰਿਯਾਦਿਨ੍ਨਨ੍ਤਿ.
ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਪਵੇਦੇਤੀਤਿ ਸਯਨ੍ਤਿ ਸਾਮਂ, ਅਪਰਨੇਯ੍ਯੋ ਹੁਤ੍ਵਾ. ਅਭਿਞ੍ਞਾਤਿ ਅਭਿਞ੍ਞਾਯ, ਅਧਿਕੇਨ ਞਾਣੇਨ ਞਤ੍ਵਾਤਿ ਅਤ੍ਥੋ. ਸਚ੍ਛਿਕਤ੍ਵਾਤਿ ਪਚ੍ਚਕ੍ਖਂ ਕਤ੍ਵਾ, ਏਤੇਨ ਅਨੁਮਾਨਾਦਿਪਟਿਕ੍ਖੇਪੋ ਕਤੋ. ਪਵੇਦੇਤੀਤਿ ਬੋਧੇਤਿ ਞਾਪੇਤਿ ਪਕਾਸੇਤਿ.
ਸੋ ਧਮ੍ਮਂ ਦੇਸੇਤਿ ਆਦਿਕਲ੍ਯਾਣਂ…ਪੇ… ਪਰਿਯੋਸਾਨਕਲ੍ਯਾਣਨ੍ਤਿ ਸੋ ਭਗਵਾ ਸਤ੍ਤੇਸੁ ਕਾਰੁਞ੍ਞਤਂ ਪਟਿਚ੍ਚ ਹਿਤ੍ਵਾਪਿ ਅਨੁਤ੍ਤਰਂ ਵਿਵੇਕਸੁਖਂ ਧਮ੍ਮਂ ਦੇਸੇਤਿ. ਤਞ੍ਚ ਖੋ ਅਪ੍ਪਂ ਵਾ ਬਹੁਂ ਵਾ ਦੇਸੇਨ੍ਤੋ ਆਦਿਕਲ੍ਯਾਣਾਦਿਪ੍ਪਕਾਰਮੇਵ ਦੇਸੇਤਿ, ਆਦਿਮ੍ਹਿਪਿ ਕਲ੍ਯਾਣਂ ਭਦ੍ਦਕਂ ਅਨਵਜ੍ਜਮੇਵ ਕਤ੍ਵਾ ਦੇਸੇਤਿ, ਮਜ੍ਝੇਪਿ, ਪਰਿਯੋਸਾਨੇਪਿ ਕਲ੍ਯਾਣਂ ਭਦ੍ਦਕਂ ਅਨਵਜ੍ਜਮੇਵ ਕਤ੍ਵਾ ਦੇਸੇਤੀਤਿ ਵੁਤ੍ਤਂ ਹੋਤਿ.
ਤਤ੍ਥ ਅਤ੍ਥਿ ਦੇਸਨਾਯ ਆਦਿਮਜ੍ਝਪਰਿਯੋਸਾਨਂ, ਅਤ੍ਥਿ ਸਾਸਨਸ੍ਸ. ਦੇਸਨਾਯ ਤਾਵ ਚਤੁਪ੍ਪਦਿਕਾਯਪਿ ਗਾਥਾਯ ਪਠਮਪਾਦੋ ਆਦਿ ਨਾਮ, ਤਤੋ ਦ੍ਵੇ ਮਜ੍ਝਂ ਨਾਮ, ਅਨ੍ਤੇ ਏਕੋ ਪਰਿਯੋਸਾਨਂ ਨਾਮ. ਏਕਾਨੁਸਨ੍ਧਿਕਸ੍ਸ ਸੁਤ੍ਤਸ੍ਸ ਨਿਦਾਨਂ ਆਦਿ, ਇਦਮਵੋਚਾਤਿ ਪਰਿਯੋਸਾਨਂ, ਉਭਿਨ੍ਨਂ ਅਨ੍ਤਰਾ ਮਜ੍ਝਂ. ਅਨੇਕਾਨੁਸਨ੍ਧਿਕਸ੍ਸ ਸੁਤ੍ਤਸ੍ਸ ਪਠਮਾਨੁਸਨ੍ਧਿ ਆਦਿ, ਅਨ੍ਤੇ ਅਨੁਸਨ੍ਧਿ ਪਰਿਯੋਸਾਨਂ, ਮਜ੍ਝੇ ਏਕੋ ਵਾ ਦ੍ਵੇ ਵਾ ਬਹੂ ਵਾ ਮਜ੍ਝਮੇਵ.
ਸਾਸਨਸ੍ਸ ਸੀਲਸਮਾਧਿਵਿਪਸ੍ਸਨਾ ਆਦਿ ਨਾਮ. ਵੁਤ੍ਤਮ੍ਪਿ ਚੇਤਂ – ‘‘ਕੋ ਚਾਦਿ ਕੁਸਲਾਨਂ ਧਮ੍ਮਾਨਂ, ਸੀਲਞ੍ਚ ਸੁਵਿਸੁਦ੍ਧਂ ਦਿਟ੍ਠਿ ਚ ਉਜੁਕਾ’’ਤਿ (ਸਂ. ਨਿ. ੫.੩੬੯). ‘‘ਅਤ੍ਥਿ, ਭਿਕ੍ਖਵੇ, ਮਜ੍ਝਿਮਾ ਪਟਿਪਦਾ ਤਥਾਗਤੇਨ ਅਭਿਸਮ੍ਬੁਦ੍ਧਾ’’ਤਿ ਏਵਂ ਵੁਤ੍ਤੋ ਪਨ ਅਰਿਯਮਗ੍ਗੋ ਮਜ੍ਝਂ ਨਾਮ. ਫਲਞ੍ਚੇਵ ਨਿਬ੍ਬਾਨਞ੍ਚ ਪਰਿਯੋਸਾਨਂ ਨਾਮ. ‘‘ਤਸ੍ਮਾਤਿਹ ਤ੍ਵਂ, ਬ੍ਰਾਹ੍ਮਣ, ਬ੍ਰਹ੍ਮਚਰਿਯਂ ਏਤਂਪਾਰਂ ਏਤਂਪਰਿਯੋਸਾਨ’’ਨ੍ਤਿ ਏਤ੍ਥ ਫਲਂ ਪਰਿਯੋਸਨਨ੍ਤਿ ਵੁਤ੍ਤਂ. ‘‘ਨਿਬ੍ਬਾਨੋਗਧਞ੍ਹਿ, ਆਵੁਸੋ ਵਿਸਾਖ, ਬ੍ਰਹ੍ਮਚਰਿਯਂ ਵੁਸ੍ਸਤਿ ਨਿਬ੍ਬਾਨਪਰਾਯਣਂ ਨਿਬ੍ਬਾਨਪਰਿਯੋਸਾਨ’’ਨ੍ਤਿ (ਮ. ਨਿ. ੧.੪੬੬) ਏਤ੍ਥ ਨਿਬ੍ਬਾਨਂ ਪਰਿਯੋਸਾਨਨ੍ਤਿ ਵੁਤ੍ਤਂ. ਇਧ ਪਨ ਦੇਸਨਾਯ ਆਦਿਮਜ੍ਝਪਰਿਯੋਸਾਨਂ ਅਧਿਪ੍ਪੇਤਂ. ਭਗਵਾ ਹਿ ਧਮ੍ਮਂ ਦੇਸੇਨ੍ਤੋ ਆਦਿਮ੍ਹਿ ਸੀਲਂ ਦਸ੍ਸੇਤ੍ਵਾ ਮਜ੍ਝੇ ਮਗ੍ਗਂ ਪਰਿਯੋਸਾਨੇ ਨਿਬ੍ਬਾਨਂ ਦਸ੍ਸੇਤਿ. ਤੇਨ ਵੁਤ੍ਤਂ – ‘‘ਸੋ ਧਮ੍ਮਂ ਦੇਸੇਤਿ ਆਦਿਕਲ੍ਯਾਣਂ ਮਜ੍ਝੇਕਲ੍ਯਾਣਂ ਪਰਿਯੋਸਾਨਕਲ੍ਯਾਣ’’ਨ੍ਤਿ. ਤਸ੍ਮਾ ਅਞ੍ਞੋਪਿ ਧਮ੍ਮਕਥਿਕੋ ਧਮ੍ਮਂ ਕਥੇਨ੍ਤੋ –
‘‘ਆਦਿਮ੍ਹਿ ਸੀਲਂ ਦਸ੍ਸੇਯ੍ਯ, ਮਜ੍ਝੇ ਮਗ੍ਗਂ ਵਿਭਾਵਯੇ;
ਪਰਿਯੋਸਾਨਮ੍ਹਿ ਨਿਬ੍ਬਾਨਂ, ਏਸਾ ਕਥਿਕਸਣ੍ਠਿਤੀ’’ਤਿ.
ਸਾਤ੍ਥਂ ਸਬ੍ਯਞ੍ਜਨਨ੍ਤਿ ਯਸ੍ਸ ਹਿ ਯਾਗੁਭਤ੍ਤਇਤ੍ਥਿਪੁਰਿਸਾਦਿਵਣ੍ਣਨਾਨਿਸ੍ਸਿਤਾ ਦੇਸਨਾ ਹੋਤਿ, ਨ ਸੋ ਸਾਤ੍ਥਂ ਦੇਸੇਤਿ. ਭਗਵਾ ਪਨ ਤਥਾਰੂਪਂ ਦੇਸਨਂ ਪਹਾਯ ਚਤੁਸਤਿਪਟ੍ਠਾਨਾਦਿਨਿਸ੍ਸਿਤਂ ਦੇਸਨਂ ਦੇਸੇਤਿ. ਤਸ੍ਮਾ ‘‘ਸਾਤ੍ਥਂ ਦੇਸੇਤੀ’’ਤਿ ਵੁਚ੍ਚਤਿ. ਯਸ੍ਸ ਪਨ ਦੇਸਨਾ ਏਕਬ੍ਯਞ੍ਜਨਾਦਿਯੁਤ੍ਤਾ ਵਾ ਸਬ੍ਬਨਿਰੋਟ੍ਠਬ੍ਯਞ੍ਜਨਾ ਵਾ ਸਬ੍ਬਵਿਸ੍ਸਟ੍ਠਬ੍ਯਞ੍ਜਨਾ ਵਾ ਸਬ੍ਬਨਿਗ੍ਗਹਿਤਬ੍ਯਞ੍ਜਨਾ ਵਾ, ਤਸ੍ਸ ਦਮਿਲ਼ਕਿਰਾਤਯਵਨਾਦਿਮਿਲਕ੍ਖਾਨਂ ਭਾਸਾ ਵਿਯ ਬ੍ਯਞ੍ਜਨਪਾਰਿਪੂਰਿਯਾ ਅਭਾਵਤੋ ਅਬ੍ਯਞ੍ਜਨਾ ਨਾਮ ਦੇਸਨਾ ਹੋਤਿ. ਭਗਵਾ ਪਨ –
‘‘ਸਿਥਿਲਂ ਧਨਿਤਞ੍ਚ ਦੀਘਰਸ੍ਸਂ, ਲਹੁਕਂ ਗਰੁਕਞ੍ਚ ਨਿਗ੍ਗਹੀਤਂ;
ਸਮ੍ਬਨ੍ਧਂ ਵਵਤ੍ਥਿਤਂ ਵਿਮੁਤ੍ਤਂ, ਦਸਧਾ ਬ੍ਯਞ੍ਜਨਬੁਦ੍ਧਿਯਾ ਪਭੇਦੋ’’ਤਿ. –
ਏਵਂ ਵੁਤ੍ਤਂ ਦਸਵਿਧਂ ਬ੍ਯਞ੍ਜਨਂ ਅਮਕ੍ਖੇਤ੍ਵਾ ਪਰਿਪੁਣ੍ਣਬ੍ਯਞ੍ਜਨਮੇਵ ਕਤ੍ਵਾ ਧਮ੍ਮਂ ਦੇਸੇਤਿ. ਤਸ੍ਮਾ ‘‘ਸਬ੍ਯਞ੍ਜਨਂ ਕਤ੍ਵਾ ਦੇਸੇਤੀ’’ਤਿ ਵੁਚ੍ਚਤਿ. ਕੇਵਲਪਰਿਪੁਣ੍ਣਨ੍ਤਿ ਏਤ੍ਥ ਕੇਵਲਨ੍ਤਿ ਸਕਲਾਧਿਵਚਨਂ. ਪਰਿਪੁਣ੍ਣਨ੍ਤਿ ਅਨੂਨਾਧਿਕਵਚਨਂ. ਇਦਂ ਵੁਤ੍ਤਂ ਹੋਤਿ – ਸਕਲਪਰਿਪੁਣ੍ਣਮੇਵ ਦੇਸੇਤਿ, ਏਕਦੇਸਨਾਪਿ ਅਪਰਿਪੁਣ੍ਣਾ ਨਤ੍ਥੀਤਿ. ਪਰਿਸੁਦ੍ਧਨ੍ਤਿ ਨਿਰੁਪਕ੍ਕਿਲੇਸਂ. ਯੋ ਹਿ ‘‘ਇਮਂ ਧਮ੍ਮਦੇਸਨਂ ਨਿਸ੍ਸਾਯ ਲਾਭਂ ਵਾ ਸਕ੍ਕਾਰਂ ਵਾ ਲਭਿਸ੍ਸਾਮੀ’’ਤਿ ਦੇਸੇਤਿ, ਤਸ੍ਸ ਅਪਰਿਸੁਦ੍ਧਾ ਦੇਸਨਾ ਨਾਮ ਹੋਤਿ. ਭਗਵਾ ਪਨ ਲੋਕਾਮਿਸਨਿਰਪੇਕ੍ਖੋ ਹਿਤਫਰਣੇਨੇਵ ਮੇਤ੍ਤਾਭਾਵਨਾਯ ਮੁਦੁਹਦਯੋ ਉਲ੍ਲੁਮ੍ਪਨਸਭਾਵਸਣ੍ਠਿਤੇਨ ਚਿਤ੍ਤੇਨ ਦੇਸੇਤਿ. ਤਸ੍ਮਾ ਪਰਿਸੁਦ੍ਧਂ ਦੇਸੇਤੀਤਿ ਵੁਚ੍ਚਤਿ. ਬ੍ਰਹ੍ਮਚਰਿਯਂ ਪਕਾਸੇਤੀਤਿ ਏਤ੍ਥ ਬ੍ਰਹ੍ਮਚਰਿਯਨ੍ਤਿ ਸਿਕ੍ਖਤ੍ਤਯਸਙ੍ਗਹਿਤਂ ਸਕਲਂ ਸਾਸਨਂ. ਤਸ੍ਮਾ ਬ੍ਰਹ੍ਮਚਰਿਯਂ ਪਕਾਸੇਤੀਤਿ ਸੋ ਧਮ੍ਮਂ ਦੇਸੇਤਿ ਆਦਿਕਲ੍ਯਾਣਂ…ਪੇ… ਪਰਿਸੁਦ੍ਧਂ, ਏਵਂ ਦੇਸੇਨ੍ਤੋ ਚ ਸਿਕ੍ਖਤ੍ਤਯਸਙ੍ਗਹਿਤਂ ਸਕਲਸਾਸਨਬ੍ਰਹ੍ਮਚਰਿਯਂ ਪਕਾਸੇਤੀਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਬ੍ਰਹ੍ਮਚਰਿਯਨ੍ਤਿ ਸੇਟ੍ਠਟ੍ਠੇਨ ਬ੍ਰਹ੍ਮਭੂਤਂ ਚਰਿਯਂ, ਬ੍ਰਹ੍ਮਭੂਤਾਨਂ ਵਾ ਬੁਦ੍ਧਾਦੀਨਂ ਚਰਿਯਨ੍ਤਿ ਵੁਤ੍ਤਂ ਹੋਤਿ.
ਸਾਧੁ ਖੋ ਪਨਾਤਿ ਸੁਨ੍ਦਰਂ ਖੋ ਪਨ, ਅਤ੍ਥਾਵਹਂ ਸੁਖਾਵਹਨ੍ਤਿ ਵੁਤ੍ਤਂ ਹੋਤਿ. ਤਥਾਰੂਪਾਨਂ ਅਰਹਤਨ੍ਤਿ ਯਥਾਰੂਪੋ ਸੋ ਭਵਂ ਗੋਤਮੋ, ਏਵਰੂਪਾਨਂ ਅਨੇਕੇਹਿਪਿ ਕਪ੍ਪਕੋਟਿਸਤਸਹਸ੍ਸੇਹਿ ਦੁਲ੍ਲਭਦਸ੍ਸਨਾਨਂ ਬ੍ਯਾਮਪ੍ਪਭਾਪਰਿਕ੍ਖਿਤ੍ਤੇਹਿ ਅਸੀਤਿਅਨੁਬ੍ਯਞ੍ਜਨਪਟਿਮਣ੍ਡਿਤੇਹਿ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਵਰੇਹਿ ਸਮਾਕਿਣ੍ਣਮਨੋਰਮਸਰੀਰਾਨਂ ਅਨਪ੍ਪਕਦਸ੍ਸਨਾਨਂ ਅਤਿਮਧੁਰਧਮ੍ਮਨਿਗ੍ਘੋਸਾਨਂ ਯਥਾਭੂਤਗੁਣਾਧਿਗਮੇਨ ਲੋਕੇ ਅਰਹਨ੍ਤੋਤਿ ਲਦ੍ਧਸਦ੍ਦਾਨਂ ਅਰਹਤਂ. ਦਸ੍ਸਨਂ ਹੋਤੀਤਿ ਪਸਾਦਸੋਮ੍ਮਾਨਿ ਅਕ੍ਖੀਨਿ ਉਮ੍ਮੀਲੇਤ੍ਵਾ ਦਸ੍ਸਨਮਤ੍ਤਮ੍ਪਿ ਸਾਧੁ ਹੋਤਿ. ਸਚੇ ਪਨ ਅਟ੍ਠਙ੍ਗਸਮਨ੍ਨਾਗਤੇਨ ਬ੍ਰਹ੍ਮਸ੍ਸਰੇਨ ਧਮ੍ਮਂ ਦੇਸੇਨ੍ਤਸ੍ਸ ਏਕਪਦਮ੍ਪਿ ਸੋਤੁਂ ਲਭਿਸ੍ਸਾਮ, ਸਾਧੁਤਰਂਯੇਵ ਭਵਿਸ੍ਸਤੀਤਿ ਏਵਂ ਅਜ੍ਝਾਸਯਂ ਕਤ੍ਵਾ. ਯੇਨ ਭਗਵਾ ਤੇਨੁਪਸਙ੍ਕਮਿਂਸੂਤਿ ਸਬ੍ਬਕਿਚ੍ਚਾਨਿ ਪਹਾਯ ਤੁਟ੍ਠਮਾਨਸਾ ਅਗਮਂਸੁ. ਅਞ੍ਜਲਿਂ ਪਣਾਮੇਤ੍ਵਾਤਿ ਏਤੇ ਉਭਤੋਪਕ੍ਖਿਕਾ, ਤੇ ਏਵਂ ਚਿਨ੍ਤੇਸੁਂ – ‘‘ਸਚੇ ਨੋ ਮਿਚ੍ਛਾਦਿਟ੍ਠਿਕਾ ਚੋਦੇਸ੍ਸਨ੍ਤਿ ‘ਕਸ੍ਮਾ ਤੁਮ੍ਹੇ ਸਮਣਂ ਗੋਤਮਂ ਵਨ੍ਦਿਤ੍ਥਾ’ਤਿ, ਤੇਸਂ ‘ਕਿਂ ਅਞ੍ਜਲਿਕਰਣਮਤ੍ਤੇਨਾਪਿ ਵਨ੍ਦਿਤਂ ਹੋਤੀ’ਤਿ ਵਕ੍ਖਾਮ. ਸਚੇ ਨੋ ਸਮ੍ਮਾਦਿਟ੍ਠਿਕਾ ਚੋਦੇਸ੍ਸਨ੍ਤਿ ‘ਕਸ੍ਮਾ ਭਗਵਨ੍ਤਂ ਨ ਵਨ੍ਦਿਤ੍ਥਾ’ਤਿ, ‘ਕਿਂ ਸੀਸੇਨ ਭੂਮਿਂ ਪਹਰਨ੍ਤੇਨੇਵ ਵਨ੍ਦਿਤਂ ਹੋਤਿ. ਨਨੁ ਅਞ੍ਜਲਿਕਮ੍ਮਮ੍ਪਿ ਵਨ੍ਦਨਾ ਏਵਾ’ਤਿ ਵਕ੍ਖਾਮਾ’’ਤਿ.
ਨਾਮਗੋਤ੍ਤਨ੍ਤਿ, ‘‘ਭੋ ਗੋਤਮ, ਅਹਂ ਅਸੁਕਸ੍ਸ ਪੁਤ੍ਤੋ ਦਤ੍ਤੋ ਨਾਮ ਮਿਤ੍ਤੋ ਨਾਮ ਇਧਾਗਤੋ’’ਤਿ ਵਦਨ੍ਤਾ ਨਾਮਂ ਸਾਵੇਨ੍ਤਿ ਨਾਮ. ‘‘ਭੋ ਗੋਤਮ, ਅਹਂ ਵਾਸੇਟ੍ਠੋ ਨਾਮ ਕਚ੍ਚਾਨੋ ਨਾਮ ਇਧਾਗਤੋ’’ਤਿ ਵਦਨ੍ਤਾ ਗੋਤ੍ਤਂ ਸਾਵੇਨ੍ਤਿ ਨਾਮ. ਏਤੇ ਕਿਰ ਦਲਿਦ੍ਦਾ ਜਿਣ੍ਣਕੁਲਪੁਤ੍ਤਾ ‘‘ਪਰਿਸਮਜ੍ਝੇ ਨਾਮਗੋਤ੍ਤਵਸੇਨ ਪਾਕਟਾ ਭਵਿਸ੍ਸਾਮਾ’’ਤਿ ਏਵਂ ਅਕਂਸੁ. ਯੇ ਪਨ ਤੁਣ੍ਹੀਭੂਤਾ ਨਿਸੀਦਿਂਸੁ, ਤੇ ਕੇਰਾਟਿਕਾ ਚੇਵ ਅਨ੍ਧਬਾਲਾ ਚ. ਤਤ੍ਥ ਕੇਰਾਟਿਕਾ ‘‘ਏਕਂ ਦ੍ਵੇ ਕਥਾਸਲ੍ਲਾਪੇ ਕਰੋਨ੍ਤੇ ਵਿਸ੍ਸਾਸਿਕੋ ਹੋਤਿ, ਅਥ ਵਿਸ੍ਸਾਸੇ ਸਤਿ ਏਕਂ ਦ੍ਵੇ ਭਿਕ੍ਖਾ ਅਦਾਤੁਂ ਨ ਯੁਤ੍ਤ’’ਨ੍ਤਿ ਤਤੋ ਅਤ੍ਤਾਨਂ ਮੋਚੇਨ੍ਤਾ ਤੁਣ੍ਹੀਭੂਤਾ ਨਿਸੀਦਨ੍ਤਿ. ਅਨ੍ਧਬਾਲਾ ਅਞ੍ਞਾਣਤਾਯੇਵ ਅਵਕ੍ਖਿਤ੍ਤਮਤ੍ਤਿਕਾਪਿਣ੍ਡਾ ਵਿਯ ਯਤ੍ਥ ਕਤ੍ਥਚਿ ਤੁਣ੍ਹੀਭੂਤਾ ਨਿਸੀਦਨ੍ਤਿ.
ਵੇਨਾਗਪੁਰਿਕੋਤਿ ਵੇਨਾਗਪੁਰਵਾਸੀ. ਏਤਦਵੋਚਾਤਿ ਪਾਦਨ੍ਤਤੋ ਪਟ੍ਠਾਯ ਯਾਵ ਕੇਸਗ੍ਗਾ ਤਥਾਗਤਸ੍ਸ ਸਰੀਰਂ ਓਲੋਕੇਨ੍ਤੋ ਅਸੀਤਿਅਨੁਬ੍ਯਞ੍ਜਨਸਮੁਜ੍ਜਲੇਹਿ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਪਟਿਮਣ੍ਡਿਤਂ ਸਰੀਰਾ ਨਿਕ੍ਖਮਿਤ੍ਵਾ ਸਮਨ੍ਤਤੋ ਅਸੀਤਿਹਤ੍ਥਪ੍ਪਦੇਸਂ ਅਜ੍ਝੋਤ੍ਥਰਿਤ੍ਵਾ ਠਿਤਾਹਿ ਛਬ੍ਬਣ੍ਣਾਹਿ ਘਨਬੁਦ੍ਧਰਂਸੀਹਿ ਸਮ੍ਪਰਿਵਾਰਿਤਂ ਤਥਾਗਤਸ੍ਸ ਸਰੀਰਂ ਦਿਸ੍ਵਾ ਸਞ੍ਜਾਤਵਿਮ੍ਹਯੋ ਵਣ੍ਣਂ ਭਣਨ੍ਤੋ ਏਤਂ ‘‘ਅਚ੍ਛਰਿਯਂ, ਭੋ ਗੋਤਮਾ’’ਤਿਆਦਿਵਚਨਂ ਅਵੋਚ.
ਤਤ੍ਥ ਯਾਵਞ੍ਚਿਦਨ੍ਤਿ ਅਧਿਮਤ੍ਤਪ੍ਪਮਾਣਪਰਿਚ੍ਛੇਦਵਚਨਮੇਤਂ. ਤਸ੍ਸ ਵਿਪ੍ਪਸਨ੍ਨਪਦੇਨ ਸਦ੍ਧਿਂ ਸਮ੍ਬਨ੍ਧੋ. ਯਾਵਞ੍ਚ ਵਿਪ੍ਪਸਨ੍ਨਾਨਿ ਅਧਿਮਤ੍ਤਵਿਪ੍ਪਸਨ੍ਨਾਨੀਤਿ ਅਤ੍ਥੋ. ਇਨ੍ਦ੍ਰਿਯਾਨੀਤਿ ਚਕ੍ਖਾਦੀਨਿ ਛ ਇਨ੍ਦ੍ਰਿਯਾਨਿ. ਤਸ੍ਸ ਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਪਤਿਟ੍ਠਿਤੋਕਾਸਸ੍ਸ ਵਿਪ੍ਪਸਨ੍ਨਤਂ ਦਿਸ੍ਵਾ ਤੇਸਂ ਵਿਪ੍ਪਸਨ੍ਨਤਾ ਪਾਕਟਾ ਅਹੋਸਿ. ਯਸ੍ਮਾ ਪਨ ਸਾ ਮਨੇ ਵਿਪ੍ਪਸਨ੍ਨੇਯੇਵ ਹੋਤਿ, ਅਵਿਪ੍ਪਸਨ੍ਨਚਿਤ੍ਤਾਨਞ੍ਹਿ ਇਨ੍ਦ੍ਰਿਯਪ੍ਪਸਾਦੋ ਨਾਮ ਨਤ੍ਥਿ, ਤਸ੍ਮਾਸ੍ਸ ਮਨਿਨ੍ਦ੍ਰਿਯਪ੍ਪਸਾਦੋਪਿ ਪਾਕਟੋ ਅਹੋਸਿ. ਤਂ ਏਸ ਵਿਪ੍ਪਸਨ੍ਨਤਂ ਗਹੇਤ੍ਵਾ ‘‘ਵਿਪ੍ਪਸਨ੍ਨਾਨਿ ਇਨ੍ਦ੍ਰਿਯਾਨੀ’’ਤਿ ਆਹ. ਪਰਿਸੁਦ੍ਧੋਤਿ ਨਿਮ੍ਮਲੋ. ਪਰਿਯੋਦਾਤੋਤਿ ਪਭਸ੍ਸਰੋ. ਸਾਰਦਂ ਬਦਰਪਣ੍ਡੁਨ੍ਤਿ ਸਰਦਕਾਲੇ ਜਾਤਂ ਨਾਤਿਸੁਪਰਿਪਕ੍ਕਂ ਬਦਰਂ. ਤਞ੍ਹਿ ਪਰਿਸੁਦ੍ਧਞ੍ਚੇਵ ਹੋਤਿ ਪਰਿਯੋਦਾਤਞ੍ਚ. ਤਾਲਪਕ੍ਕਨ੍ਤਿ ਸੁਪਰਿਪਕ੍ਕਤਾਲਫਲਂ. ਸਮ੍ਪਤਿ ਬਨ੍ਧਨਾ ਪਮੁਤ੍ਤਨ੍ਤਿ ਤਂਖਣਞ੍ਞੇਵ ਬਨ੍ਧਨਾ ਪਮੁਤ੍ਤਂ. ਤਸ੍ਸ ਹਿ ਬਨ੍ਧਨਮੂਲਂ ਅਪਨੇਤ੍ਵਾ ਪਰਮੁਖਂ ਕਤ੍ਵਾ ਫਲਕੇ ਠਪਿਤਸ੍ਸ ਚਤੁਰਙ੍ਗੁਲਮਤ੍ਤਂ ਠਾਨਂ ਓਲੋਕੇਨ੍ਤਾਨਂ ਪਰਿਸੁਦ੍ਧਂ ਪਰਿਯੋਦਾਤਂ ਹੁਤ੍ਵਾ ਖਾਯਤਿ. ਤਂ ਸਨ੍ਧਾਯੇਵਮਾਹ. ਨੇਕ੍ਖਂ ਜਮ੍ਬੋਨਦਨ੍ਤਿ ਸੁਰਤ੍ਤਵਣ੍ਣਸ੍ਸ ਜਮ੍ਬੋਨਦਸੁਵਣ੍ਣਸ੍ਸ ਘਟਿਕਾ. ਦਕ੍ਖਕਮ੍ਮਾਰਪੁਤ੍ਤਸੁਪਰਿਕਮ੍ਮਕਤਨ੍ਤਿ ਦਕ੍ਖੇਨ ਸੁਵਣ੍ਣਕਾਰਪੁਤ੍ਤੇਨ ਸੁਟ੍ਠੁ ਕਤਪਰਿਕਮ੍ਮਂ. ਉਕ੍ਕਾਮੁਖੇ ਸੁਕੁਸਲਸਮ੍ਪਹਟ੍ਠਨ੍ਤਿ ਸੁਵਣ੍ਣਕਾਰਉਦ੍ਧਨੇ ਪਚਿਤ੍ਵਾ ਸੁਕੁਸਲੇਨ ਸੁਵਣ੍ਣਕਾਰੇਨ ਘਟ੍ਟਨਪਰਿਮਜ੍ਜਨਹਂਸਨੇਨ ਸੁਟ੍ਠੁ ਪਹਟ੍ਠਂ ਸੁਪਰਿਮਦ੍ਦਿਤਨ੍ਤਿ ਅਤ੍ਥੋ. ਪਣ੍ਡੁਕਮ੍ਬਲੇ ਨਿਕ੍ਖਿਤ੍ਤਨ੍ਤਿ ਅਗ੍ਗਿਨਾ ਪਚਿਤ੍ਵਾ ਦੀਪਿਦਾਠਾਯ ਘਂਸਿਤ੍ਵਾ ਗੇਰੁਕਪਰਿਕਮ੍ਮਂ ਕਤ੍ਵਾ ਰਤ੍ਤਕਮ੍ਬਲੇ ਠਪਿਤਂ. ਭਾਸਤੇਤਿ ਸਞ੍ਜਾਤਓਭਾਸਤਾਯ ਭਾਸਤੇ. ਤਪਤੇਤਿ ਅਨ੍ਧਕਾਰਵਿਦ੍ਧਂਸਨਤਾਯ ਤਪਤੇ. ਵਿਰੋਚਤੀਤਿ ਵਿਜ੍ਜੋਤਮਾਨਂ ਹੁਤ੍ਵਾ ਵਿਰੋਚਤਿ, ਸੋਭਤੀਤਿ ਅਤ੍ਥੋ.
ਉਚ੍ਚਾਸਯਨਮਹਾਸਯਨਾਨੀਤਿ ਏਤ੍ਥ ਅਤਿਕ੍ਕਨ੍ਤਪ੍ਪਮਾਣਂ ਉਚ੍ਚਾਸਯਨਂ ਨਾਮ, ਆਯਤਵਿਤ੍ਥਤਂ ਅਕਪ੍ਪਿਯਭਣ੍ਡਂ ਮਹਾਸਯਨਂ ਨਾਮ. ਇਦਾਨਿ ਤਾਨਿ ਦਸ੍ਸੇਨ੍ਤੋ ਸੇਯ੍ਯਥਿਦਂ, ਆਸਨ੍ਦੀਤਿਆਦਿਮਾਹ. ਤਤ੍ਥ ਆਸਨ੍ਦੀਤਿ ਅਤਿਕ੍ਕਨ੍ਤਪ੍ਪਮਾਣਂ ਆਸਨਂ. ਪਲ੍ਲਙ੍ਕੋਤਿ ਪਾਦੇਸੁ ਵਾਲ਼ਰੂਪਾਨਿ ਠਪੇਤ੍ਵਾ ਕਤੋ. ਗੋਨਕੋਤਿ ਦੀਘਲੋਮਕੋ ਮਹਾਕੋਜਵੋ. ਚਤੁਰਙ੍ਗੁਲਾਧਿਕਾਨਿ ਕਿਰ ਤਸ੍ਸ ਲੋਮਾਨਿ. ਚਿਤ੍ਤਕੋਤਿ ਵਾਨਚਿਤ੍ਤਂ ਉਣ੍ਣਾਮਯਤ੍ਥਰਣਂ. ਪਟਿਕਾਤਿ ਉਣ੍ਣਾਮਯੋ ਸੇਤਤ੍ਥਰਕੋ. ਪਟਲਿਕਾਤਿ ਘਨਪੁਪ੍ਫੋ ਉਣ੍ਣਾਮਯਤ੍ਥਰਕੋ, ਯੋ ਆਮਲਕਪਟ੍ਟੋਤਿਪਿ ਵੁਚ੍ਚਤਿ. ਤੂਲਿਕਾਤਿ ਤਿਣ੍ਣਂ ਤੂਲਾਨਂ ਅਞ੍ਞਤਰਪੁਣ੍ਣਾ ਤੂਲਿਕਾ. ਵਿਕਤਿਕਾਤਿ ਸੀਹਬ੍ਯਗ੍ਘਾਦਿਰੂਪਵਿਚਿਤ੍ਰੋ ਉਣ੍ਣਾਮਯਤ੍ਥਰਕੋ. ਉਦ੍ਦਲੋਮੀਤਿ ਉਭਤੋਦਸਂ ਉਣ੍ਣਾਮਯਤ੍ਥਰਣਂ. ਕੇਚਿ ਏਕਤੋ ਉਗ੍ਗਤਪੁਪ੍ਫਨ੍ਤਿ ਵਦਨ੍ਤਿ. ਏਕਨ੍ਤਲੋਮੀਤਿ ਏਕਤੋਦਸਂ ਉਣ੍ਣਾਮਯਤ੍ਥਰਣਂ. ਕੇਚਿ ਉਭਤੋ ਉਗ੍ਗਤਪੁਪ੍ਫਨ੍ਤਿ ਵਦਨ੍ਤਿ. ਕਟ੍ਟਿਸ੍ਸਨ੍ਤਿ ਰਤਨਪਰਿਸਿਬ੍ਬਿਤਂ ਕੋਸੇਯ੍ਯਕਟ੍ਟਿਸ੍ਸਮਯਂ ਪਚ੍ਚਤ੍ਥਰਣਂ. ਕੋਸੇਯ੍ਯਨ੍ਤਿ ਰਤਨਪਰਿਸਿਬ੍ਬਿਤਮੇਵ ਕੋਸਿਯਸੁਤ੍ਤਮਯਂ ਪਚ੍ਚਤ੍ਥਰਣਂ. ਕੁਤ੍ਤਕਨ੍ਤਿ ਸੋਲ਼ਸਨ੍ਨਂ ਨਾਟਕਿਤ੍ਥੀਨਂ ਠਤ੍ਵਾ ਨਚ੍ਚਨਯੋਗ੍ਗਂ ਉਣ੍ਣਾਮਯਤ੍ਥਰਣਂ. ਹਤ੍ਥਤ੍ਥਰਾਦਯੋ ਹਤ੍ਥਿਪਿਟ੍ਠਾਦੀਸੁ ਅਤ੍ਥਰਣਕਅਤ੍ਥਰਕਾ ਚੇਵ ਹਤ੍ਥਿਰੂਪਾਦੀਨਿ ਦਸ੍ਸੇਤ੍ਵਾ ਕਤਅਤ੍ਥਰਕਾ ਚ. ਅਜਿਨਪ੍ਪਵੇਣੀਤਿ ਅਜਿਨਚਮ੍ਮੇਹਿ ਮਞ੍ਚਪ੍ਪਮਾਣੇਨ ਸਿਬ੍ਬਿਤ੍ਵਾ ਕਤਪ੍ਪਵੇਣੀ. ਸੇਸਂ ਹੇਟ੍ਠਾ ਵੁਤ੍ਤਤ੍ਥਮੇਵ.
ਨਿਕਾਮਲਾਭੀਤਿ ਅਤਿਕਾਮਲਾਭੀ ਇਚ੍ਛਿਤਿਚ੍ਛਿਤਲਾਭੀ. ਅਕਿਚ੍ਛਲਾਭੀਤਿ ਅਦੁਕ੍ਖਲਾਭੀ. ਅਕਸਿਰਲਾਭੀਤਿ ਵਿਪੁਲਲਾਭੀ ਮਹਨ੍ਤਲਾਭੀ, ਉਲ਼ਾਰੁਲ਼ਾਰਾਨੇਵ ਲਭਤਿ ਮਞ੍ਞੇਤਿ ਸਨ੍ਧਾਯ ਵਦਤਿ. ਅਯਂ ਕਿਰ ਬ੍ਰਾਹ੍ਮਣੋ ਸਯਨਗਰੁਕੋ, ਸੋ ਭਗਵਤੋ ਵਿਪ੍ਪਸਨ੍ਨਿਨ੍ਦ੍ਰਿਯਾਦਿਤਂ ਦਿਸ੍ਵਾ ‘‘ਅਦ੍ਧਾ ਏਸ ਏਵਰੂਪੇਸੁ ਉਚ੍ਚਾਸਯਨਮਹਾਸਯਨੇਸੁ ਨਿਸੀਦਤਿ ਚੇਵ ਨਿਪਜ੍ਜਤਿ ਚ. ਤੇਨਸ੍ਸ ਵਿਪ੍ਪਸਨ੍ਨਾਨਿ ਇਨ੍ਦ੍ਰਿਯਾਨਿ, ਪਰਿਸੁਦ੍ਧੋ ਛਵਿਵਣ੍ਣੋ ਪਰਿਯੋਦਾਤੋ’’ਤਿ ਮਞ੍ਞਮਾਨੋ ਇਮਂ ਸੇਨਾਸਨਵਣ੍ਣਂ ਕਥੇਸਿ.
ਲਦ੍ਧਾ ਚ ਪਨ ਨ ਕਪ੍ਪਨ੍ਤੀਤਿ ਏਤ੍ਥ ਕਿਞ੍ਚਿ ਕਿਞ੍ਚਿ ਕਪ੍ਪਤਿ. ਸੁਦ੍ਧਕੋਸੇਯ੍ਯਞ੍ਹਿ ਮਞ੍ਚੇਪਿ ਅਤ੍ਥਰਿਤੁਂ ਵਟ੍ਟਤਿ, ਗੋਨਕਾਦਯੋ ਚ ਭੂਮਤ੍ਥਰਣਪਰਿਭੋਗੇਨ, ਆਸਨ੍ਦਿਯਾ ਪਾਦੇ ਛਿਨ੍ਦਿਤ੍ਵਾ, ਪਲ੍ਲਙ੍ਕਸ੍ਸ ਵਾਲ਼ੇ ਭਿਨ੍ਦਿਤ੍ਵਾ, ਤੂਲਿਕਂ ਵਿਜਟੇਤ੍ਵਾ ‘‘ਬਿਮ੍ਬੋਹਨਞ੍ਚ ਕਾਤੁ’’ਨ੍ਤਿ (ਚੂਲ਼ਵ. ੨੯੭) ਵਚਨਤੋ ਇਮਾਨਿਪਿ ਏਕੇਨ ਵਿਧਾਨੇਨ ਕਪ੍ਪਨ੍ਤਿ. ਅਕਪ੍ਪਿਯਂ ਪਨ ਉਪਾਦਾਯ ਸਬ੍ਬਾਨੇਵ ਨ ਕਪ੍ਪਨ੍ਤੀਤਿ ਵੁਤ੍ਤਾਨਿ.
ਵਨਨ੍ਤਞ੍ਞੇਵ ਪਵਿਸਾਮੀਤਿ ਅਰਞ੍ਞਂਯੇਵ ਪਵਿਸਾਮਿ. ਯਦੇਵਾਤਿ ਯਾਨਿਯੇਵ. ਪਲ੍ਲਙ੍ਕਂ ਆਭੁਜਿਤ੍ਵਾਤਿ ਸਮਨ੍ਤਤੋ ਊਰੁਬਦ੍ਧਾਸਨਂ ਬਨ੍ਧਿਤ੍ਵਾ. ਉਜੁਂ ਕਾਯਂ ਪਣਿਧਾਯਾਤਿ ਅਟ੍ਠਾਰਸ ਪਿਟ੍ਠਿਕਣ੍ਟਕੇ ਕੋਟਿਯਾ ਕੋਟਿਂ ਪਟਿਪਾਦੇਨ੍ਤੋ ਉਜੁਂ ਕਾਯਂ ਠਪੇਤ੍ਵਾ. ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾਤਿ ਕਮ੍ਮਟ੍ਠਾਨਾਭਿਮੁਖਂ ਸਤਿਂ ਠਪੇਤ੍ਵਾ, ਪਰਿਗ੍ਗਹਿਤਨਿਯ੍ਯਾਨਂ ਵਾ ਕਤ੍ਵਾਤਿ ਅਤ੍ਥੋ. ਵੁਤ੍ਤਞ੍ਹੇਤਂ – ‘‘ਪਰੀਤਿ ਪਰਿਗ੍ਗਹਟ੍ਠੋ. ਮੁਖਨ੍ਤਿ ਨਿਯ੍ਯਾਨਟ੍ਠੋ. ਸਤੀਤਿ ਉਪਟ੍ਠਾਨਟ੍ਠੋ. ਤੇਨ ਵੁਚ੍ਚਤਿ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ’’ਤਿ (ਪਟਿ. ਮ. ੧.੧੬੪). ਉਪਸਮ੍ਪਜ੍ਜ ਵਿਹਰਾਮੀਤਿ ਪਟਿਲਭਿਤ੍ਵਾ ਪਚ੍ਚਕ੍ਖਂ ਕਤ੍ਵਾ ਵਿਹਰਾਮਿ. ਏਵਂਭੂਤੋਤਿ ਏਵਂ ਪਠਮਜ੍ਝਾਨਾਦੀਸੁ ਅਞ੍ਞਤਰਸਮਙ੍ਗੀ ਹੁਤ੍ਵਾ. ਦਿਬ੍ਬੋ ਮੇ ਏਸੋ ਤਸ੍ਮਿਂ ਸਮਯੇ ਚਙ੍ਕਮੋ ਹੋਤੀਤਿ ਚਤ੍ਤਾਰਿ ਹਿ ਰੂਪਜ੍ਝਾਨਾਨਿ ਸਮਾਪਜ੍ਜਿਤ੍ਵਾ ਚਙ੍ਕਮਨ੍ਤਸ੍ਸ ਚਙ੍ਕਮੋ ਦਿਬ੍ਬਚਙ੍ਕਮੋ ਨਾਮ ਹੋਤਿ, ਸਮਾਪਤ੍ਤਿਤੋ ਵੁਟ੍ਠਾਯ ਚਙ੍ਕਮਨ੍ਤਸ੍ਸਾਪਿ ਚਙ੍ਕਮੋ ਦਿਬ੍ਬਚਙ੍ਕਮੋਯੇਵ. ਠਾਨਾਦੀਸੁਪਿ ਏਸੇਵ ਨਯੋ. ਤਥਾ ਇਤਰੇਸੁ ਦ੍ਵੀਸੁ ਵਿਹਾਰੇਸੁ.
ਸੋ ਏਵਂ ਪਜਾਨਾਮਿ ‘‘ਰਾਗੋ ਮੇ ਪਹੀਨੋ’’ਤਿ ਮਹਾਬੋਧਿਪਲ੍ਲਙ੍ਕੇ ਅਰਹਤ੍ਤਮਗ੍ਗੇਨ ਪਹੀਨਰਾਗਮੇਵ ਦਸ੍ਸੇਨ੍ਤੋ ‘‘ਸੋ ਏਵਂ ਪਜਾਨਾਮਿ ਰਾਗੋ ਮੇ ਪਹੀਨੋ’’ਤਿ ਆਹ. ਸੇਸਪਦੇਸੁਪਿ ਏਸੇਵ ਨਯੋ. ਇਮਿਨਾ ਪਨ ਕਿਂ ਕਥਿਤਂ ਹੋਤੀਤਿ? ਪਚ੍ਚਵੇਕ੍ਖਣਾ ਕਥਿਤਾ, ਪਚ੍ਚਵੇਕ੍ਖਣਾਯ ਫਲਸਮਾਪਤ੍ਤਿ ਕਥਿਤਾ. ਫਲਸਮਾਪਤ੍ਤਿਞ੍ਹਿ ਸਮਾਪਨ੍ਨਸ੍ਸਪਿ ਸਮਾਪਤ੍ਤਿਤੋ ਵੁਟ੍ਠਿਤਸ੍ਸਾਪਿ ਚਙ੍ਕਮਾਦਯੋ ਅਰਿਯਚਙ੍ਕਮਾਦਯੋ ਹੋਨ੍ਤਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.
੪. ਸਰਭਸੁਤ੍ਤਵਣ੍ਣਨਾ
੬੫. ਚਤੁਤ੍ਥੇ ਰਾਜਗਹੇਤਿ ਏਵਂਨਾਮਕੇ ਨਗਰੇ. ਗਿਜ੍ਝਕੂਟੇ ਪਬ੍ਬਤੇਤਿ ਗਿਜ੍ਝਸਦਿਸਾਨਿਸ੍ਸ ਕੂਟਾਨਿ, ਗਿਜ੍ਝਾ ਵਾ ਤਸ੍ਸ ਕੂਟੇਸੁ ਵਸਨ੍ਤੀਤਿ ਗਿਜ੍ਝਕੂਟੋ, ਤਸ੍ਮਿਂ ਗਿਜ੍ਝਕੂਟੇ ਪਬ੍ਬਤੇ. ਏਤੇਨਸ੍ਸ ਰਾਜਗਹਂ ਗੋਚਰਗਾਮਂ ਕਤ੍ਵਾ ਵਿਹਰਨ੍ਤਸ੍ਸ ਵਸਨਟ੍ਠਾਨਂ ਦਸ੍ਸਿਤਂ. ਗਿਜ੍ਝਕੂਟਸ੍ਮਿਞ੍ਹਿ ਤਥਾਗਤਂ ਉਦ੍ਦਿਸ੍ਸ ਵਿਹਾਰੋ ਕਾਰਿਤੋ, ਗਿਜ੍ਝਕੂਟਵਿਹਾਰੋਤ੍ਵੇਵਸ੍ਸ ਨਾਮਂ. ਤਤ੍ਥਾਯਂ ਤਸ੍ਮਿਂ ਸਮਯੇ ਵਿਹਰਤੀਤਿ. ਸਰਭੋ ਨਾਮ ਪਰਿਬ੍ਬਾਜਕੋ ਅਚਿਰਪਕ੍ਕਨ੍ਤੋ ਹੋਤੀਤਿ ਸਰਭੋਤਿ ਏਵਂਨਾਮਕੋ ਪਰਿਬ੍ਬਾਜਕੋ ਇਮਸ੍ਮਿਂ ਸਾਸਨੇ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਪਕ੍ਕਨ੍ਤੋ ਹੋਤਿ, ਅਧੁਨਾ ਵਿਬ੍ਭਨ੍ਤੋਤਿ ਅਤ੍ਥੋ. ਸਮ੍ਮਾਸਮ੍ਬੁਦ੍ਧੇ ਹਿ ਲੋਕੇ ਉਪ੍ਪਨ੍ਨੇ ਤਿਤ੍ਥਿਯਾ ਨਟ੍ਠਲਾਭਸਕ੍ਕਾਰਾ ਅਹੇਸੁਂ, ਤਿਣ੍ਣਂ ਰਤਨਾਨਂ ਮਹਾਲਾਭਸਕ੍ਕਾਰੋ ਉਪ੍ਪਜ੍ਜਿ. ਯਥਾਹ –
‘‘ਤੇਨ ਖੋ ਪਨ ਸਮਯੇਨ ਭਗਵਾ ਸਕ੍ਕਤੋ ਹੋਤਿ ਗਰੁਕਤੋ ਮਾਨਿਤੋ ਪੂਜਿਤੋ ਅਪਚਿਤੋ ਲਾਭੀ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਾਨਂ. ਅਞ੍ਞਤਿਤ੍ਥਿਯਾ ਪਨ ਪਰਿਬ੍ਬਾਜਕਾ ਅਸਕ੍ਕਤਾ ਹੋਨ੍ਤਿ ਅਗਰੁਕਤਾ ਅਮਾਨਿਤਾ ਅਪੂਜਿਤਾ ਨ ਲਾਭਿਨੋ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਾਨ’’ਨ੍ਤਿ (ਉਦਾ.੧੪; ਸਂ.ਨਿ.੧.੨.੭੦).
ਤੇ ਏਵਂ ਪਰਿਹੀਨਲਾਭਸਕ੍ਕਾਰਾ ਪਞ੍ਚਸਤਮਤ੍ਤਾ ਏਕਸ੍ਮਿਂ ਪਰਿਬ੍ਬਾਜਕਾਰਾਮੇ ਸਨ੍ਨਿਪਤਿਤ੍ਵਾ ਸਮ੍ਮਨ੍ਤਯਿਂਸੁ – ‘‘ਭੋ, ਮਯਂ ਸਮਣਸ੍ਸ ਗੋਤਮਸ੍ਸ ਉਪ੍ਪਨ੍ਨਕਾਲਤੋ ਪਟ੍ਠਾਯ ਹਤਲਾਭਸਕ੍ਕਾਰਾ ਜਾਤਾ, ਸਮਣਸ੍ਸ ਗੋਤਮਸ੍ਸ ਸਾਵਕਾਨਞ੍ਚਸ੍ਸ ਏਕਂ ਅਵਣ੍ਣਂ ਉਪਧਾਰੇਥ, ਅਵਣ੍ਣਂ ਪਤ੍ਥਰਿਤ੍ਵਾ ਏਤਸ੍ਸ ਸਾਸਨਂ ਗਰਹਿਤ੍ਵਾ ਅਮ੍ਹਾਕਂ ਲਾਭਸਕ੍ਕਾਰਂ ਉਪ੍ਪਾਦੇਸ੍ਸਾਮਾ’’ਤਿ. ਤੇ ਵਜ੍ਜਂ ਓਲੋਕੇਨ੍ਤਾ – ‘‘ਤੀਸੁ ਦ੍ਵਾਰੇਸੁ ਆਜੀਵੇ ਚਾਤਿ ਚਤੂਸੁਪਿ ਠਾਨੇਸੁ ਸਮਣਸ੍ਸ ਗੋਤਮਸ੍ਸ ਵਜ੍ਜਂ ਪਸ੍ਸਿਤੁਂ ਨ ਸਕ੍ਕਾ, ਇਮਾਨਿ ਚਤ੍ਤਾਰਿ ਠਾਨਾਨਿ ਮੁਞ੍ਚਿਤ੍ਵਾ ਅਞ੍ਞਤ੍ਥ ਓਲੋਕੇਥਾ’’ਤਿ ਆਹਂਸੁ. ਅਥ ਨੇਸਂ ਅਨ੍ਤਰੇ ਏਕੋ ਏਵਮਾਹ – ‘‘ਅਹਂ ਅਞ੍ਞਂ ਨ ਪਸ੍ਸਾਮਿ, ਇਮੇ ਅਨ੍ਵਡ੍ਢਮਾਸਂ ਸਨ੍ਨਿਪਤਿਤ੍ਵਾ ਦ੍ਵਾਰਵਾਤਪਾਨਾਨਿ ਪਿਧਾਯ ਸਾਮਣੇਰਾਨਮ੍ਪਿ ਪਵੇਸਨਂ ਨ ਦੇਨ੍ਤਿ. ਜੀਵਿਤਸਦਿਸਾਪਿ ਉਪਟ੍ਠਾਕਾ ਦਟ੍ਠੁਂ ਨ ਲਭਨ੍ਤਿ, ਆਵਟ੍ਟਨਿਮਾਯਂ ਓਸਾਰੇਤ੍ਵਾ ਓਸਾਰੇਤ੍ਵਾ ਜਨਂ ਆਵਟ੍ਟੇਤ੍ਵਾ ਆਵਟ੍ਟੇਤ੍ਵਾ ਖਾਦਨ੍ਤਿ. ਸਚੇ ਤਂ ਮਯਂ ਆਹਰਿਤੁਂ ਸਕ੍ਖਿਸ੍ਸਾਮ, ਏਵਂ ਨੋ ਲਾਭਸਕ੍ਕਾਰਉਲ਼ਾਰੋ ਭਵਿਸ੍ਸਤੀ’’ਤਿ. ਅਪਰੋਪਿ ਏਵਮੇਵ ਵਦਨ੍ਤੋ ਉਟ੍ਠਾਸਿ. ਸਬ੍ਬੇ ਏਕਵਾਦਾ ਅਹੇਸੁਂ. ਤਤੋ ਆਹਂਸੁ – ‘‘ਯੋ ਤਂ ਆਹਰਿਤੁਂ ਸਕ੍ਖਿਸ੍ਸਤਿ, ਤਂ ਮਯਂ ਅਮ੍ਹਾਕਂ ਸਮਯੇ ਜੇਟ੍ਠਕਂ ਕਰਿਸ੍ਸਾਮਾ’’ਤਿ.
ਤਤੋ ਕੋਟਿਤੋ ਪਟ੍ਠਾਯ ‘‘ਤ੍ਵਂ ਸਕ੍ਖਿਸ੍ਸਸਿ, ਤ੍ਵਂ ਸਕ੍ਖਿਸ੍ਸਸੀ’’ਤਿ ਪੁਚ੍ਛਿਤ੍ਵਾ ‘‘ਅਹਂ ਨ ਸਕ੍ਖਿਸ੍ਸਾਮਿ, ਅਹਂ ਨ ਸਕ੍ਖਿਸ੍ਸਾਮੀ’’ਤਿ ਬਹੂਹਿ ਵੁਤ੍ਤੇ ਸਰਭਂ ਪੁਚ੍ਛਿਂਸੁ – ‘‘ਤ੍ਵਂ ਸਕ੍ਖਿਸ੍ਸਸਿ ਆਚਰਿਯਾ’’ਤਿ. ਸੋ ਆਹ – ‘‘ਅਗਰੁ ਏਤਂ ਆਹਰਿਤੁਂ, ਸਚੇ ਤੁਮ੍ਹੇ ਅਤ੍ਤਨੋ ਕਥਾਯ ਠਤ੍ਵਾ ਮਂ ਜੇਟ੍ਠਕਂ ਕਰਿਸ੍ਸਥਾ’’ਤਿ. ਅਗਰੁ ਏਤਮਾਚਰਿਯ ਆਹਰ, ਤ੍ਵਂ ਕਤੋਯੇਵਾਸਿ ਅਮ੍ਹੇਹਿ ਜੇਟ੍ਠਕੋਤਿ. ਸੋ ਆਹ – ‘‘ਤਂ ਆਹਰਨ੍ਤੇਨ ਥੇਨੇਤ੍ਵਾ ਵਾ ਵਿਲੁਮ੍ਪਿਤ੍ਵਾ ਵਾ ਆਹਰਿਤੁਂ ਨ ਸਕ੍ਕਾ, ਸਮਣਸ੍ਸ ਪਨ ਗੋਤਮਸ੍ਸ ਸਾਵਕਸਦਿਸੇਨ ਹੁਤ੍ਵਾ ਤਸ੍ਸ ਸਾਵਕੇ ਵਨ੍ਦਿਤ੍ਵਾ ਵਤ੍ਤਪਟਿਵਤ੍ਤਂ ਕਤ੍ਵਾ ਤੇਸਂ ਪਤ੍ਤੇ ਭਤ੍ਤਂ ਭੁਞ੍ਜਿਤ੍ਵਾ ਆਹਰਿਤੁਂ ਸਕ੍ਕਾ. ਰੁਚ੍ਚਤਿ ਵੋ ਏਤਸ੍ਸ ਏਤ੍ਤਕਸ੍ਸ ਕਿਰਿਯਾ’’ਤਿ. ਯਂਕਿਞ੍ਚਿ ਕਤ੍ਵਾ ਆਹਰਿਤ੍ਵਾ ਚ ਨੋ ਦੇਹੀਤਿ. ਤੇਨ ਹਿ ਮਂ ਦਿਸ੍ਵਾ ਅਪਸ੍ਸਨ੍ਤਾ ਵਿਯ ਭਵੇਯ੍ਯਾਥਾਤਿ ਪਰਿਬ੍ਬਾਜਕਾਨਂ ਸਞ੍ਞਂ ਦਤ੍ਵਾ ਦੁਤਿਯਦਿਵਸੇ ਪਾਤੋਵ ਉਟ੍ਠਾਯ ਗਿਜ੍ਝਕੂਟਮਹਾਵਿਹਾਰਂ ਗਨ੍ਤ੍ਵਾ ਦਿਟ੍ਠਦਿਟ੍ਠਾਨਂ ਭਿਕ੍ਖੂਨਂ ਪਞ੍ਚਪਤਿਟ੍ਠਿਤੇਨ ਪਾਦੇ ਵਨ੍ਦਿ. ਭਿਕ੍ਖੂ ਆਹਂਸੁ – ‘‘ਅਞ੍ਞੇ ਪਰਿਬ੍ਬਾਜਕਾ ਚਣ੍ਡਾ ਫਰੁਸਾ, ਅਯਂ ਪਨ ਸਦ੍ਧੋ ਭਵਿਸ੍ਸਤਿ ਪਸਨ੍ਨੋ’’ਤਿ. ਭਨ੍ਤੇ, ਤੁਮ੍ਹੇ ਞਤ੍ਵਾ ਯੁਤ੍ਤਟ੍ਠਾਨਸ੍ਮਿਂਯੇਵ ਪਬ੍ਬਜਿਤਾ, ਮਯਂ ਪਨ ਅਨੁਪਧਾਰੇਤ੍ਵਾ ਅਤਿਤ੍ਥੇਨੇਵ ਪਕ੍ਖਨ੍ਤਾ ਅਨਿਯ੍ਯਾਨਿਕਮਗ੍ਗੇ ਵਿਚਰਾਮਾਤਿ. ਸੋ ਏਵਂ ਵਤ੍ਵਾ ਦਿਟ੍ਠੇ ਦਿਟ੍ਠੇ ਭਿਕ੍ਖੂ ਪੁਨਪ੍ਪੁਨਂ ਵਨ੍ਦਤਿ, ਨ੍ਹਾਨੋਦਕਾਦੀਨਿ ਪਟਿਯਾਦੇਤਿ, ਦਨ੍ਤਕਟ੍ਠਂ ਕਪ੍ਪਿਯਂ ਕਰੋਤਿ, ਪਾਦੇ ਧੋਵਤਿ ਮਕ੍ਖੇਤਿ, ਅਤਿਰੇਕਭਤ੍ਤਂ ਲਭਿਤ੍ਵਾ ਭੁਞ੍ਜਤਿ.
ਤਂ ਇਮਿਨਾ ਨੀਹਾਰੇਨ ਵਸਨ੍ਤਂ ਏਕੋ ਮਹਾਥੇਰੋ ਦਿਸ੍ਵਾ, ‘‘ਪਰਿਬ੍ਬਾਜਕ, ਤ੍ਵਂ ਸਦ੍ਧੋ ਪਸਨ੍ਨੋ, ਕਿਂ ਨ ਪਬ੍ਬਜਸੀ’’ਤਿ. ਕੋ ਮਂ, ਭਨ੍ਤੇ, ਪਬ੍ਬਾਜੇਸ੍ਸਤਿ. ਮਯਞ੍ਹਿ ਚਿਰਕਾਲਂ ਭਦਨ੍ਤਾਨਂ ਪਚ੍ਚਤ੍ਥਿਕਾ ਹੁਤ੍ਵਾ ਵਿਚਰਿਮ੍ਹਾਤਿ. ਥੇਰੋ ‘‘ਸਚੇ ਤ੍ਵਂ ਪਬ੍ਬਜਿਤੁਕਾਮੋ, ਅਹਂ ਤਂ ਪਬ੍ਬਾਜੇਸ੍ਸਾਮੀ’’ਤਿ ਵਤ੍ਵਾ ਪਬ੍ਬਾਜੇਸਿ. ਸੋ ਪਬ੍ਬਜਿਤਕਾਲਤੋ ਪਟ੍ਠਾਯ ਨਿਰਨ੍ਤਰਂ ਵਤ੍ਤਪਟਿਵਤ੍ਤਮਕਾਸਿ. ਅਥ ਨਂ ਥੇਰੋ ਵਤ੍ਤੇ ਪਸੀਦਿਤ੍ਵਾ ਨਚਿਰਸ੍ਸੇਵ ਉਪਸਮ੍ਪਾਦੇਸਿ. ਸੋ ਉਪੋਸਥਦਿਵਸੇ ਭਿਕ੍ਖੂਹਿ ਸਦ੍ਧਿਂ ਉਪੋਸਥਗ੍ਗਂ ਪਵਿਸਿਤ੍ਵਾ ਭਿਕ੍ਖੂ ਮਹਨ੍ਤੇਨ ਉਸ੍ਸਾਹੇਨ ਪਾਤਿਮੋਕ੍ਖਂ ਪਗ੍ਗਣ੍ਹਨ੍ਤੇ ਦਿਸ੍ਵਾ ‘‘ਇਮਿਨਾ ਨੀਹਾਰੇਨ ਓਸਾਰੇਤ੍ਵਾ ਓਸਾਰੇਤ੍ਵਾ ਲੋਕਂ ਖਾਦਨ੍ਤਿ, ਕਤਿਪਾਹੇਨ ਹਰਿਸ੍ਸਾਮੀ’’ਤਿ ਚਿਨ੍ਤੇਸਿ. ਸੋ ਪਰਿਵੇਣਂ ਗਨ੍ਤ੍ਵਾ ਉਪਜ੍ਝਾਯਂ ਵਨ੍ਦਿਤ੍ਵਾ, ‘‘ਭਨ੍ਤੇ, ਕੋ ਨਾਮੋ ਅਯਂ ਧਮ੍ਮੋ’’ਤਿ ਪੁਚ੍ਛਿ. ਪਾਤਿਮੋਕ੍ਖੋ ਨਾਮ, ਆਵੁਸੋਤਿ. ਉਤ੍ਤਮਧਮ੍ਮੋ ਏਸ, ਭਨ੍ਤੇ, ਭਵਿਸ੍ਸਤੀਤਿ. ਆਮ, ਆਵੁਸੋ, ਸਕਲਸਾਸਨਧਾਰਣੀ ਅਯਂ ਸਿਕ੍ਖਾਤਿ. ਭਨ੍ਤੇ, ਸਚੇ ਏਸ ਸਿਕ੍ਖਾਧਮ੍ਮੋ ਉਤ੍ਤਮੋ, ਇਮਮੇਵ ਪਠਮਂ ਗਣ੍ਹਾਮੀਤਿ. ਗਣ੍ਹਾਵੁਸੋਤਿ ਥੇਰੋ ਸਮ੍ਪਟਿਚ੍ਛਿ. ਸੋ ਗਣ੍ਹਨ੍ਤੋ ਪਰਿਬ੍ਬਾਜਕੇ ਪਸ੍ਸਿਤ੍ਵਾ ‘‘ਕੀਦਿਸਂ ਆਚਰਿਯਾ’’ਤਿ ਪੁਚ੍ਛਿਤੋ, ‘‘ਆਵੁਸੋ, ਮਾ ਚਿਨ੍ਤਯਿਤ੍ਥ, ਕਤਿਪਾਹੇਨ ਆਹਰਿਸ੍ਸਾਮੀ’’ਤਿ ਵਤ੍ਵਾ ਨਚਿਰਸ੍ਸੇਵ ਉਗ੍ਗਣ੍ਹਿਤ੍ਵਾ ਉਪਜ੍ਝਾਯਂ ਆਹ – ‘‘ਏਤ੍ਤਕਮੇਵ, ਭਨ੍ਤੇ, ਉਦਾਹੁ ਅਞ੍ਞਮ੍ਪਿ ਅਤ੍ਥੀ’’ਤਿ. ਏਤ੍ਤਕਮੇਵ, ਆਵੁਸੋਤਿ.
ਸੋ ਪੁਨਦਿਵਸੇ ਯਥਾਨਿਵਤ੍ਥਪਾਰੁਤੋਵ ਗਹਿਤਨੀਹਾਰੇਨੇਵ ਪਤ੍ਤਂ ਗਹੇਤ੍ਵਾ ਗਿਜ੍ਝਕੂਟਾ ਨਿਕ੍ਖਮ੍ਮ ਪਰਿਬ੍ਬਾਜਕਾਰਾਮਂ ਅਗਮਾਸਿ. ਪਰਿਬ੍ਬਾਜਕਾ ਦਿਸ੍ਵਾ ‘‘ਕੀਦਿਸਂ, ਆਚਰਿਯ, ਨਾਸਕ੍ਖਿਤ੍ਥ ਮਞ੍ਞੇ ਆਵਟ੍ਟਨਿਮਾਯਂ ਆਹਰਿਤੁ’’ਨ੍ਤਿ ਤਂ ਪਰਿਵਾਰਯਿਂਸੁ. ਮਾ ਚਿਨ੍ਤਯਿਤ੍ਥ, ਆਵੁਸੋ, ਆਹਟਾ ਮੇ ਆਵਟ੍ਟਨਿਮਾਯਾ, ਇਤੋ ਪਟ੍ਠਾਯ ਅਮ੍ਹਾਕਂ ਲਾਭਸਕ੍ਕਾਰੋ ਮਹਾ ਭਵਿਸ੍ਸਤਿ. ਤੁਮ੍ਹੇ ਅਞ੍ਞਮਞ੍ਞਂ ਸਮਗ੍ਗਾ ਹੋਥ, ਮਾ ਵਿਵਾਦਂ ਅਕਤ੍ਥਾਤਿ. ਸਚੇ ਤੇ, ਆਚਰਿਯ, ਸੁਗ੍ਗਹਿਤਾ, ਅਮ੍ਹੇਪਿ ਨਂ ਵਾਚੇਹੀਤਿ. ਸੋ ਆਦਿਤੋ ਪਟ੍ਠਾਯ ਪਾਤਿਮੋਕ੍ਖਂ ਓਸਾਰੇਸਿ. ਅਥ ਤੇ ਸਬ੍ਬੇਪਿ – ‘‘ਏਥ, ਭੋ, ਨਗਰੇ ਵਿਚਰਨ੍ਤਾ ਸਮਣਸ੍ਸ ਗੋਤਮਸ੍ਸ ਅਵਣ੍ਣਂ ਕਥੇਸ੍ਸਾਮਾ’’ਤਿ ਅਨੁਗ੍ਘਾਟਿਤੇਸੁਯੇਵ ਨਗਰਦ੍ਵਾਰੇਸੁ ਦ੍ਵਾਰਸਮੀਪਂ ਗਨ੍ਤ੍ਵਾ ਵਿਵਟੇਨ ਦ੍ਵਾਰੇਨ ਸਬ੍ਬਪਠਮਂ ਪਵਿਸਿਂਸੁ. ਏਵਂ ਸਲਿਙ੍ਗੇਨੇਵ ਅਪਕ੍ਕਨ੍ਤਂ ਤਂ ਪਰਿਬ੍ਬਾਜਕਂ ਸਨ੍ਧਾਯ – ‘‘ਸਰਭੋ ਨਾਮ ਪਰਿਬ੍ਬਾਜਕੋ ਅਚਿਰਪਕ੍ਕਨ੍ਤੋ ਹੋਤੀ’’ਤਿ ਵੁਤ੍ਤਂ.
ਤਂ ਦਿਵਸਂ ਪਨ ਭਗਵਾ ਪਚ੍ਚੂਸਸਮਯੇ ਲੋਕਂ ਓਲੋਕੇਨ੍ਤੋ ਇਦਂ ਅਦ੍ਦਸ – ‘‘ਅਜ੍ਜ ਸਰਭੋ ਪਰਿਬ੍ਬਾਜਕੋ ਨਗਰੇ ਵਿਚਰਿਤ੍ਵਾ ਪਕਾਸਨੀਯਕਮ੍ਮਂ ਕਰਿਸ੍ਸਤਿ, ਤਿਣ੍ਣਂ ਰਤਨਾਨਂ ਅਵਣ੍ਣਂ ਕਥੇਨ੍ਤੋ ਵਿਸਂ ਸਿਞ੍ਚਿਤ੍ਵਾ ਪਰਿਬ੍ਬਾਜਕਾਰਾਮਂ ਗਮਿਸ੍ਸਤਿ, ਅਹਮ੍ਪਿ ਤਤ੍ਥੇਵ ਗਮਿਸ੍ਸਾਮਿ, ਚਤਸ੍ਸੋਪਿ ਪਰਿਸਾ ਤਤ੍ਥੇਵ ਓਸਰਿਸ੍ਸਨ੍ਤਿ. ਤਸ੍ਮਿਂ ਸਮਾਗਮੇ ਚਤੁਰਾਸੀਤਿ ਪਾਣਸਹਸ੍ਸਾਨਿ ਅਮਤਪਾਨਂ ਪਿਵਿਸ੍ਸਨ੍ਤੀ’’ਤਿ. ਤਤੋ ‘‘ਤਸ੍ਸ ਓਕਾਸੋ ਹੋਤੁ, ਯਥਾਰੁਚਿਯਾ ਅਵਣ੍ਣਂ ਪਤ੍ਥਰਤੂ’’ਤਿ ਚਿਨ੍ਤੇਤ੍ਵਾ ਆਨਨ੍ਦਤ੍ਥੇਰਂ ਆਮਨ੍ਤੇਸਿ – ‘‘ਆਨਨ੍ਦ, ਅਟ੍ਠਾਰਸਸੁ ਮਹਾਵਿਹਾਰੇਸੁ ਭਿਕ੍ਖੁਸਙ੍ਘਸ੍ਸ ਮਯਾ ਸਦ੍ਧਿਂਯੇਵ ਪਿਣ੍ਡਾਯ ਚਰਿਤੁਂ ਆਰੋਚੇਹੀ’’ਤਿ. ਥੇਰੋ ਤਥਾ ਅਕਾਸਿ. ਭਿਕ੍ਖੂ ਪਤ੍ਤਚੀਵਰਮਾਦਾਯ ਸਤ੍ਥਾਰਮੇਵ ਪਰਿਵਾਰਯਿਂਸੁ. ਸਤ੍ਥਾ ਭਿਕ੍ਖੁਸਙ੍ਘਂ ਆਦਾਯ ਦ੍ਵਾਰਗਾਮਸਮੀਪੇਯੇਵ ਪਿਣ੍ਡਾਯ ਚਰਿ. ਸਰਭੋਪਿ ਪਰਿਬ੍ਬਾਜਕੇਹਿ ਸਦ੍ਧਿਂ ਨਗਰਂ ਪਵਿਟ੍ਠੋ ਤਤ੍ਥ ਤਤ੍ਥ ਪਰਿਸਮਜ੍ਝੇ ਰਾਜਦ੍ਵਾਰਵੀਥਿਚਤੁਕ੍ਕਾਦੀਸੁ ਚ ਗਨ੍ਤ੍ਵਾ ‘‘ਅਞ੍ਞਾਤੋ ਮਯਾ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਧਮ੍ਮੋ’’ਤਿਆਦੀਨਿ ਅਭਾਸਿ. ਤਂ ਸਨ੍ਧਾਯ ਸੋ ਰਾਜਗਹੇ ਪਰਿਸਤਿ ਏਵਂ ਵਾਚਂ ਭਾਸਤੀਤਿਆਦਿ ਵੁਤ੍ਤਂ. ਤਤ੍ਥ ਅਞ੍ਞਾਤੋਤਿ ਞਾਤੋ ਅਵਬੁਦ੍ਧੋ, ਪਾਕਟਂ ਕਤ੍ਵਾ ਉਗ੍ਗਹਿਤੋਤਿ ਦੀਪੇਤਿ. ਅਞ੍ਞਾਯਾਤਿ ਜਾਨਿਤ੍ਵਾ. ਅਪਕ੍ਕਨ੍ਤੋਤਿ ਸਲਿਙ੍ਗੇਨੇਵ ਅਪਕ੍ਕਨ੍ਤੋ. ਸਚੇ ਹਿ ਸਮਣਸ੍ਸ ਗੋਤਮਸ੍ਸ ਸਾਸਨੇ ਕੋਚਿ ਸਾਰੋ ਅਭਵਿਸ੍ਸ, ਨਾਹਂ ਅਪਕ੍ਕਮਿਸ੍ਸਂ. ਤਸ੍ਸ ਪਨ ਸਾਸਨਂ ਅਸਾਰਂ ਨਿਸ੍ਸਾਰਂ, ਆਵਟ੍ਟਨਿਮਾਯਂ ਓਸਾਰੇਤ੍ਵਾ ਸਮਣਾ ਲੋਕਂ ਖਾਦਨ੍ਤੀਤਿ ਏਵਮਤ੍ਥਂ ਦੀਪੇਨ੍ਤੋ ਏਵਮਾਹ.
ਅਥ ਖੋ ਸਮ੍ਬਹੁਲਾ ਭਿਕ੍ਖੂਤਿ ਅਥ ਏਵਂ ਤਸ੍ਮਿਂ ਪਰਿਬ੍ਬਾਜਕੇ ਭਾਸਮਾਨੇ ਅਰਞ੍ਞਵਾਸਿਨੋ ਪਞ੍ਚਸਤਾ ਭਿਕ੍ਖੂ ‘‘ਅਸੁਕਟ੍ਠਾਨਂ ਨਾਮ ਸਤ੍ਥਾ ਪਿਣ੍ਡਾਯ ਚਰਿਤੁਂ ਗਤੋ’’ਤਿ ਅਜਾਨਨ੍ਤਾ ਭਿਕ੍ਖਾਚਾਰਵੇਲਾਯਂ ਰਾਜਗਹਂ ਪਿਣ੍ਡਾਯ ਪਵਿਸਿਂਸੁ. ਤੇ ਸਨ੍ਧਾਯੇਤਂ ਵੁਤ੍ਤਂ. ਅਸ੍ਸੋਸੁਨ੍ਤਿ ਸੁਣਿਂਸੁ. ਯੇਨ ਭਗਵਾ ਤੇਨੁਪਸਙ੍ਕਮਿਂਸੂਤਿ ‘‘ਇਮਂ ਕਾਰਣਂ ਦਸਬਲਸ੍ਸ ਆਰੋਚੇਸ੍ਸਾਮਾ’’ਤਿ ਉਪਸਙ੍ਕਮਿਂਸੁ.
ਸਿਪ੍ਪਿਨਿਕਾਤੀਰਨ੍ਤਿ ਸਿਪ੍ਪਿਨਿਕਾਤਿ ਏਵਂਨਾਮਿਕਾਯ ਨਦਿਯਾ ਤੀਰਂ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨਾਤਿ ਕਾਯਙ੍ਗਵਾਚਙ੍ਗਾਨਿ ਅਚੋਪੇਤ੍ਵਾ ਅਬ੍ਭਨ੍ਤਰੇ ਖਨ੍ਤਿਂ ਧਾਰੇਤ੍ਵਾ ਚਿਤ੍ਤੇਨੇਵ ਅਧਿਵਾਸੇਸੀਤਿ ਅਤ੍ਥੋ. ਏਵਂ ਅਧਿਵਾਸੇਤ੍ਵਾ ਪੁਨ ਚਿਨ੍ਤੇਸਿ – ‘‘ਕਿਂ ਨੁ ਖੋ ਅਜ੍ਜ ਮਯਾ ਸਰਭਸ੍ਸ ਵਾਦਂ ਮਦ੍ਦਿਤੁਂ ਗਚ੍ਛਨ੍ਤੇਨ ਏਕਕੇਨ ਗਨ੍ਤਬ੍ਬਂ, ਉਦਾਹੁ ਭਿਕ੍ਖੁਸਙ੍ਘਪਰਿਵੁਤੇਨਾ’’ਤਿ. ਅਥਸ੍ਸ ਏਤਦਹੋਸਿ – ਸਚਾਹਂ ਭਿਕ੍ਖੁਸਙ੍ਘਪਰਿਵੁਤੋ ਗਮਿਸ੍ਸਾਮਿ, ਮਹਾਜਨੋ ਏਵਂ ਚਿਨ੍ਤੇਸ੍ਸਤਿ – ‘‘ਸਮਣੋ ਗੋਤਮੋ ਵਾਦੁਪ੍ਪਤ੍ਤਿਟ੍ਠਾਨਂ ਗਚ੍ਛਨ੍ਤੋ ਪਕ੍ਖਂ ਉਕ੍ਖਿਪਿਤ੍ਵਾ ਗਨ੍ਤ੍ਵਾ ਪਰਿਸਬਲੇਨ ਉਪ੍ਪਨ੍ਨਂ ਵਾਦਂ ਮਦ੍ਦਤਿ, ਪਰਵਾਦੀਨਂ ਸੀਸਂ ਉਕ੍ਖਿਪਿਤੁਂ ਨ ਦੇਤੀ’’ਤਿ. ਨ ਖੋ ਪਨ ਮਯ੍ਹਂ ਉਪ੍ਪਨ੍ਨੇ ਵਾਦੇ ਪਰਂ ਗਹੇਤ੍ਵਾ ਮਦ੍ਦਨਕਿਚ੍ਚਂ ਅਤ੍ਥਿ, ਅਹਮੇਵ ਗਨ੍ਤ੍ਵਾ ਮਦ੍ਦਿਸ੍ਸਾਮਿ. ਅਨਚ੍ਛਰਿਯਂ ਚੇਤਂ ਯ੍ਵਾਹਂ ਇਦਾਨਿ ਬੁਦ੍ਧਭੂਤੋ ਅਤ੍ਤਨੋ ਉਪ੍ਪਨ੍ਨਂ ਵਾਦਂ ਮਦ੍ਦੇਯ੍ਯਂ, ਚਰਿਯਂ ਚਰਣਕਾਲੇ ਅਹੇਤੁਕਪਟਿਸਨ੍ਧਿਯਂ ਨਿਬ੍ਬਤ੍ਤੇਨਾਪਿ ਹਿ ਮਯਾ ਵਹਿਤਬ੍ਬਂ ਧੁਰਂ ਅਞ੍ਞੋ ਵਹਿਤੁਂ ਸਮਤ੍ਥੋ ਨਾਮ ਨਾਹੋਸਿ. ਇਮਸ੍ਸ ਪਨਤ੍ਥਸ੍ਸ ਸਾਧਨਤ੍ਥਂ –
‘‘ਯਤੋ ਯਤੋ ਗਰੁ ਧੁਰਂ, ਯਤੋ ਗਮ੍ਭੀਰਵਤ੍ਤਨੀ;
ਤਦਾਸ੍ਸੁ ਕਣ੍ਹਂ ਯੁਞ੍ਜੇਨ੍ਤਿ, ਸ੍ਵਾਸ੍ਸੁ ਤਂ ਵਹਤੇ ਧੁਰ’’ਨ੍ਤਿ. (ਜਾ. ੧.੧.੨੯) –
ਇਦਂ ਕਣ੍ਹਜਾਤਕਂ ਆਹਰਿਤਬ੍ਬਂ. ਅਤੀਤੇ ਕਿਰ ਏਕੋ ਸਤ੍ਥਵਾਹੋ ਏਕਿਸ੍ਸਾ ਮਹਲ੍ਲਿਕਾਯ ਗੇਹੇ ਨਿਵਾਸਂ ਗਣ੍ਹਿ. ਅਥਸ੍ਸ ਏਕਿਸ੍ਸਾ ਧੇਨੁਯਾ ਰਤ੍ਤਿਭਾਗਸਮਨਨ੍ਤਰੇ ਗਬ੍ਭਵੁਟ੍ਠਾਨਂ ਅਹੋਸਿ. ਸਾ ਏਕਂ ਵਚ੍ਛਕਂ ਵਿਜਾਯਿ. ਮਹਲ੍ਲਿਕਾਯ ਵਚ੍ਛਕਂ ਦਿਟ੍ਠਕਾਲਤੋ ਪਟ੍ਠਾਯ ਪੁਤ੍ਤਸਿਨੇਹੋ ਉਦਪਾਦਿ. ਪੁਨਦਿਵਸੇ ਸਤ੍ਥਵਾਹਪੁਤ੍ਤੋ – ‘‘ਤਵ ਗੇਹਵੇਤਨਂ ਗਣ੍ਹਾਹੀ’’ਤਿ ਆਹ. ਮਹਲ੍ਲਿਕਾ ‘‘ਮਯ੍ਹਂ ਅਞ੍ਞੇਨ ਕਿਚ੍ਚਂ ਨ ਅਤ੍ਥਿ, ਇਮਮੇਵ ਵਚ੍ਛਕਂ ਦੇਹੀ’’ਤਿ ਆਹ. ਗਣ੍ਹ, ਅਮ੍ਮਾਤਿ. ਸਾ ਤਂ ਗਣ੍ਹਿਤ੍ਵਾ ਖੀਰਂ ਪਾਯੇਤ੍ਵਾ ਯਾਗੁਭਤ੍ਤਤਿਣਾਦੀਨਿ ਦਦਮਾਨਾ ਪੋਸੇਸਿ. ਸੋ ਵੁਦ੍ਧਿਮਨ੍ਵਾਯ ਪਰਿਪੁਣ੍ਣਰੂਪੋ ਬਲਵੀਰਿਯਸਮ੍ਪਨ੍ਨੋ ਅਹੋਸਿ ਸਮ੍ਪਨ੍ਨਾਚਾਰੋ, ਕਾਲ਼ਕੋ ਨਾਮ ਨਾਮੇਨ. ਅਥੇਕਸ੍ਸ ਸਤ੍ਥਵਾਹਸ੍ਸ ਪਞ੍ਚਹਿ ਸਕਟਸਤੇਹਿ ਆਗਚ੍ਛਨ੍ਤਸ੍ਸ ਉਦਕਭਿਨ੍ਨਟ੍ਠਾਨੇ ਸਕਟਚਕ੍ਕਂ ਲਗ੍ਗਿ. ਸੋ ਦਸਪਿ ਵੀਸਮ੍ਪਿ ਤਿਂਸਮ੍ਪਿ ਯੋਜੇਤ੍ਵਾ ਨੀਹਰਾਪੇਤੁਂ ਅਸਕ੍ਕੋਨ੍ਤੋ ਕਾਲ਼ਕਂ ਉਪਸਙ੍ਕਮਿਤ੍ਵਾ ਆਹ – ‘‘ਤਾਤ, ਤਵ ਵੇਤਨਂ ਦਸ੍ਸਾਮਿ, ਸਕਟਂ ਮੇ ਉਕ੍ਖਿਪਿਤ੍ਵਾ ਦੇਹੀ’’ਤਿ. ਏਵਞ੍ਚ ਪਨ ਵਤ੍ਵਾ ਤਂ ਆਦਾਯ – ‘‘ਅਞ੍ਞੋ ਇਮਿਨਾ ਸਦ੍ਧਿਂ ਧੁਰਂ ਵਹਿਤੁਂ ਸਮਤ੍ਥੋ ਨਤ੍ਥੀ’’ਤਿ ਧੁਰਸਕਟੇ ਯੋਤ੍ਤਂ ਬਨ੍ਧਿਤ੍ਵਾ ਤਂ ਏਕਕਂਯੇਵ ਯੋਜੇਸਿ. ਸੋ ਤਂ ਸਕਟਂ ਉਕ੍ਖਿਪਿਤ੍ਵਾ ਥਲੇ ਪਤਿਟ੍ਠਾਪੇਤ੍ਵਾ ਏਤੇਨੇਵ ਨਿਹਾਰੇਨ ਪਞ੍ਚ ਸਕਟਸਤਾਨਿ ਨੀਹਰਿ. ਸੋ ਸਬ੍ਬਪਚ੍ਛਿਮਸਕਟਂ ਨੀਹਰਿਤ੍ਵਾ ਮੋਚਿਯਮਾਨੋ ‘‘ਸੁ’’ਨ੍ਤਿ ਕਤ੍ਵਾ ਸੀਸਂ ਉਕ੍ਖਿਪਿ.
ਸਤ੍ਥਵਾਹੋ ‘‘ਅਯਂ ਏਤ੍ਤਕਾਨਿ ਸਕਟਾਨਿ ਉਕ੍ਖਿਪਨ੍ਤੋ ਏਵਂ ਨ ਅਕਾਸਿ, ਵੇਤਨਤ੍ਥਂ ਮਞ੍ਞੇ ਕਰੋਤੀ’’ਤਿ ਸਕਟਗਣਨਾਯ ਕਹਾਪਣੇ ਗਹੇਤ੍ਵਾ ਪਞ੍ਚਸਤਭਣ੍ਡਿਕਂ ਤਸ੍ਸ ਗੀਵਾਯ ਬਨ੍ਧਾਪੇਸਿ. ਸੋ ਅਞ੍ਞੇਸਂ ਅਤ੍ਤਨੋ ਸਨ੍ਤਿਕਂ ਅਲ੍ਲੀਯਿਤੁਂ ਅਦੇਨ੍ਤੋ ਉਜੁਕਂ ਗੇਹਮੇਵ ਅਗਮਾਸਿ. ਮਹਲ੍ਲਿਕਾ ਦਿਸ੍ਵਾ ਮੋਚੇਤ੍ਵਾ ਕਹਾਪਣਭਾਵਂ ਞਤ੍ਵਾ ‘‘ਕਸ੍ਮਾ, ਪੁਤ੍ਤ, ਏਵਮਕਾਸਿ, ਮਾ ਤ੍ਵਂ ‘ਮਯਾ ਕਮ੍ਮਂ ਕਤ੍ਵਾ ਆਭਤੇਨ ਅਯਂ ਜੀਵਿਸ੍ਸਤੀ’ਤਿ ਸਞ੍ਞਮਕਾਸੀ’’ਤਿ ਵਤ੍ਵਾ ਗੋਣਂ ਉਣ੍ਹੋਦਕੇਨ ਨ੍ਹਾਪੇਤ੍ਵਾ ਤੇਲੇਨ ਅਬ੍ਭਞ੍ਜਿਤ੍ਵਾ ‘‘ਇਤੋ ਪਟ੍ਠਾਯ ਪੁਨ ਮਾ ਏਵਮਕਾਸੀ’’ਤਿ ਓਵਦਿ. ਏਵਂ ਸਤ੍ਥਾ ‘‘ਚਰਿਯਂ ਚਰਣਕਾਲੇ ਅਹੇਤੁਕਪਟਿਸਨ੍ਧਿਯਂ ਨਿਬ੍ਬਤ੍ਤੇਨਾਪਿ ਹਿ ਮਯਾ ਵਹਿਤਬ੍ਬਧੁਰਂ ਅਞ੍ਞੋ ਵਹਿਤੁਂ ਸਮਤ੍ਥੋ ਨਾਮ ਨਾਹੋਸੀ’’ਤਿ ਚਿਨ੍ਤੇਤ੍ਵਾ ਏਕਕੋਵ ਅਗਮਾਸਿ. ਤਂ ਦਸ੍ਸੇਤੁਂ ਅਥ ਖੋ ਭਗਵਾ ਸਾਯਨ੍ਹਸਮਯਂ ਪਟਿਸਲ੍ਲਾਨਾ ਵੁਟ੍ਠਿਤੋਤਿਆਦਿ ਵੁਤ੍ਤਂ.
ਤਤ੍ਥ ਪਟਿਸਲ੍ਲਾਨਾਤਿ ਪੁਥੁਤ੍ਤਾਰਮ੍ਮਣੇਹਿ ਚਿਤ੍ਤਂ ਪਟਿਸਂਹਰਿਤ੍ਵਾ ਸਲ੍ਲਾਨਤੋ, ਫਲਸਮਾਪਤ੍ਤਿਤੋਤਿ ਅਤ੍ਥੋ. ਤੇਨੁਪਸਙ੍ਕਮੀਤਿ ਪਰਿਬ੍ਬਾਜਕੇਸੁ ਸਕਲਨਗਰੇ ਪਕਾਸਨੀਯਕਮ੍ਮਂ ਕਤ੍ਵਾ ਨਗਰਾ ਨਿਕ੍ਖਮ੍ਮ ਪਰਿਬ੍ਬਾਜਕਾਰਾਮੇ ਸਨ੍ਨਿਪਤਿਤ੍ਵਾ ‘‘ਸਚੇ, ਆਵੁਸੋ ਸਰਭ, ਸਮਣੋ ਗੋਤਮੋ ਆਗਮਿਸ੍ਸਤਿ, ਕਿਂ ਕਰਿਸ੍ਸਸੀ’’ਤਿ. ਸਮਣੇ ਗੋਤਮੇ ਏਕਂ ਕਰੋਨ੍ਤੇ ਅਹਂ ਦ੍ਵੇ ਕਰਿਸ੍ਸਾਮਿ, ਦ੍ਵੇ ਕਰੋਨ੍ਤੇ ਚਤ੍ਤਾਰਿ, ਚਤ੍ਤਾਰਿ ਕਰੋਨ੍ਤੇ ਪਞ੍ਚ, ਪਞ੍ਚ ਕਰੋਨ੍ਤੇ ਦਸ, ਦਸ ਕਰੋਨ੍ਤੇ ਵੀਸਤਿ, ਵੀਸਤਿ ਕਰੋਨ੍ਤੇ ਤਿਂਸਂ, ਤਿਂਸਂ ਕਰੋਨ੍ਤੇ ਚਤ੍ਤਾਲੀਸਂ, ਚਤ੍ਤਾਲੀਸਂ ਕਰੋਨ੍ਤੇ ਪਞ੍ਞਾਸਂ, ਪਞ੍ਞਾਸਂ ਕਰੋਨ੍ਤੇ ਸਤਂ, ਸਤਂ ਕਰੋਨ੍ਤੇ ਸਹਸ੍ਸਂ ਕਰਿਸ੍ਸਾਮੀਤਿ ਏਵਂ ਅਞ੍ਞਮਞ੍ਞਂ ਸੀਹਨਾਦਕਥਂ ਸਮੁਟ੍ਠਾਪੇਤ੍ਵਾ ਨਿਸਿਨ੍ਨੇਸੁ ਉਪਸਙ੍ਕਮਿ.
ਉਪਸਙ੍ਕਮਨ੍ਤੋ ਪਨ ਯਸ੍ਮਾ ਪਰਿਬ੍ਬਾਜਕਾਰਾਮਸ੍ਸ ਨਗਰਮਜ੍ਝੇਨੇਵ ਮਗ੍ਗੋ, ਤਸ੍ਮਾ ਸੁਰਤ੍ਤਦੁਪਟ੍ਟਂ ਨਿਵਾਸੇਤ੍ਵਾ ਸੁਗਤਮਹਾਚੀਵਰਂ ਪਾਰੁਪਿਤ੍ਵਾ ਵਿਸ੍ਸਟ੍ਠਬਲੋ ਰਾਜਾ ਵਿਯ ਏਕਕੋਵ ਨਗਰਮਜ੍ਝੇਨ ਅਗਮਾਸਿ. ਮਿਚ੍ਛਾਦਿਟ੍ਠਿਕਾ ਦਿਸ੍ਵਾ ‘‘ਪਰਿਬ੍ਬਾਜਕਾ ਸਮਣਸ੍ਸ ਗੋਤਮਸ੍ਸ ਪਕਾਸਨੀਯਕਮ੍ਮਂ ਕਰੋਨ੍ਤਾ ਅਵਣ੍ਣਂ ਪਤ੍ਥਰਿਂਸੁ, ਸੋ ਏਤੇ ਅਨੁਵਤ੍ਤਿਤ੍ਵਾ ਸਞ੍ਞਾਪੇਤੁਂ ਗਚ੍ਛਤਿ ਮਞ੍ਞੇ’’ਤਿ ਅਨੁਬਨ੍ਧਿਂਸੁ. ਸਮ੍ਮਾਦਿਟ੍ਠਿਕਾਪਿ ‘‘ਸਮ੍ਮਾਸਮ੍ਬੁਦ੍ਧੋ ਪਤ੍ਤਚੀਵਰਂ ਆਦਾਯ ਏਕਕੋਵ ਨਿਕ੍ਖਨ੍ਤੋ, ਅਜ੍ਜ ਸਰਭੇਨ ਸਦ੍ਧਿਂ ਮਹਾਧਮ੍ਮਸਙ੍ਗਾਮੋ ਭਵਿਸ੍ਸਤਿ. ਮਯਮ੍ਪਿ ਤਸ੍ਮਿਂ ਸਮਾਗਮੇ ਕਾਯਸਕ੍ਖਿਨੋ ਭਵਿਸ੍ਸਾਮਾ’’ਤਿ ਅਨੁਬਨ੍ਧਿਂਸੁ. ਸਤ੍ਥਾ ਪਸ੍ਸਨ੍ਤਸ੍ਸੇਵ ਮਹਾਜਨਸ੍ਸ ਪਰਿਬ੍ਬਾਜਕਾਰਾਮਂ ਉਪਸਙ੍ਕਮਿ.
ਪਰਿਬ੍ਬਾਜਕਾ ਰੁਕ੍ਖਾਨਂ ਖਨ੍ਧਵਿਟਪਸਾਖਨ੍ਤਰੇਹਿ ਸਮੁਗ੍ਗਚ੍ਛਨ੍ਤਾ ਛਬ੍ਬਣ੍ਣਘਨਬੁਦ੍ਧਰਸ੍ਮਿਯੋ ਦਿਸ੍ਵਾ ‘‘ਅਞ੍ਞਦਾ ਏਵਰੂਪੋ ਓਭਾਸੋ ਨਾਮ ਨਤ੍ਥਿ, ਕਿਂ ਨੁ ਖੋ ਏਤ’’ਨ੍ਤਿ ਉਲ੍ਲੋਕੇਤ੍ਵਾ ‘‘ਸਮਣੋ ਗੋਤਮੋ ਆਗਚ੍ਛਤੀ’’ਤਿ ਆਹਂਸੁ. ਤਂ ਸੁਤ੍ਵਾਵ ਸਰਭੋ ਜਾਣੁਕਨ੍ਤਰੇ ਸੀਸਂ ਠਪੇਤ੍ਵਾ ਅਧੋਮੁਖੋ ਨਿਸੀਦਿ. ਏਵਂ ਤਸ੍ਮਿਂ ਸਮਯੇ ਭਗਵਾ ਤਂ ਆਰਾਮਂ ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਤਥਾਗਤੋ ਹਿ ਜਮ੍ਬੁਦੀਪਤਲੇ ਅਗ੍ਗਕੁਲੇ ਜਾਤਤ੍ਤਾ ਅਗ੍ਗਾਸਨਾਰਹੋਤਿਸ੍ਸ ਸਬ੍ਬਤ੍ਥ ਆਸਨਂ ਪਞ੍ਞਤ੍ਤਮੇਵ ਹੋਤਿ. ਏਵਂ ਪਞ੍ਞਤ੍ਤੇ ਮਹਾਰਹੇ ਬੁਦ੍ਧਾਸਨੇ ਨਿਸੀਦਿ.
ਤੇ ਪਰਿਬ੍ਬਾਜਕਾ ਸਰਭਂ ਪਰਿਬ੍ਬਾਜਕਂ ਏਤਦਵੋਚੁਨ੍ਤਿ ਸਮ੍ਮਾਸਮ੍ਬੁਦ੍ਧੇ ਕਿਰ ਸਰਭੇਨ ਸਦ੍ਧਿਂ ਏਤ੍ਤਕਂ ਕਥੇਨ੍ਤੇਯੇਵ ਭਿਕ੍ਖੁਸਙ੍ਘੋ ਸਤ੍ਥੁ ਪਦਾਨੁਪਦਿਕੋ ਹੁਤ੍ਵਾ ਪਰਿਬ੍ਬਾਜਕਾਰਾਮਂ ਸਮ੍ਪਾਪੁਣਿ, ਚਤਸ੍ਸੋਪਿ ਪਰਿਸਾ ਪਰਿਬ੍ਬਾਜਕਾਰਾਮੇਯੇਵ ਓਸਰਿਂਸੁ. ਤਤੋ ਤੇ ਪਰਿਬ੍ਬਾਜਕਾ ‘‘ਅਚ੍ਛਰਿਯਂ ਸਮਣਸ੍ਸ ਗੋਤਮਸ੍ਸ ਕਮ੍ਮਂ, ਸਕਲਨਗਰਂ ਵਿਚਰਿਤ੍ਵਾ ਅਵਣ੍ਣਂ ਪਤ੍ਥਰਿਤ੍ਵਾ ਪਕਾਸਨੀਯਕਮ੍ਮਂ ਕਤ੍ਵਾ ਆਗਤਾਨਂ ਵੇਰੀਨਂ ਪਟਿਸਤ੍ਤੂਨਂ ਪਚ੍ਚਾਮਿਤ੍ਤਾਨਂ ਸਨ੍ਤਿਕਂ ਆਗਨ੍ਤ੍ਵਾ ਥੋਕਮ੍ਪਿ ਵਿਗ੍ਗਾਹਿਕਕਥਂ ਨ ਕਥੇਸਿ, ਆਗਤਕਾਲਤੋ ਪਟ੍ਠਾਯ ਸਤਪਾਕਤੇਲੇਨ ਮਕ੍ਖੇਨ੍ਤੋ ਵਿਯ ਅਮਤਪਾਨਂ ਪਾਯੇਨ੍ਤੋ ਵਿਯ ਮਧੁਰਕਥਂ ਕਥੇਤੀ’’ਤਿ ਸਬ੍ਬੇਪਿ ਸਮ੍ਮਾਸਮ੍ਬੁਦ੍ਧਂ ਅਨੁਵਤ੍ਤਨ੍ਤਾ ਏਤਦਵੋਚੁਂ.
ਯਾਚੇਯ੍ਯਾਸੀਤਿ ਆਯਾਚੇਯ੍ਯਾਸਿ ਪਤ੍ਥੇਯ੍ਯਾਸਿ ਪਿਹੇਯ੍ਯਾਸਿ. ਤੁਣ੍ਹੀਭੂਤੋਤਿ ਤੁਣ੍ਹੀਭਾਵਂ ਉਪਗਤੋ. ਮਙ੍ਕੁਭੂਤੋਤਿ ਨਿਤ੍ਤੇਜਤਂ ਆਪਨ੍ਨੋ. ਪਤ੍ਤਕ੍ਖਨ੍ਧੋਤਿ ਓਨਤਗੀਵੋ. ਅਧੋਮੁਖੋਤਿ ਹੇਟ੍ਠਾਮੁਖੋ. ਸਮ੍ਮਾਸਮ੍ਬੁਦ੍ਧਸ੍ਸ ਤੇ ਪਟਿਜਾਨਤੋਤਿ ‘‘ਅਹਂ ਸਮ੍ਮਾਸਮ੍ਬੁਦ੍ਧੋ, ਸਬ੍ਬੇ ਧਮ੍ਮਾ ਮਯਾ ਅਭਿਸਮ੍ਬੁਦ੍ਧਾ’’ਤਿ ਏਵਂ ਪਟਿਜਾਨਤੋ ਤਵ. ਅਨਭਿਸਮ੍ਬੁਦ੍ਧਾਤਿ ਇਮੇ ਨਾਮ ਧਮ੍ਮਾ ਤਯਾ ਅਨਭਿਸਮ੍ਬੁਦ੍ਧਾ. ਤਤ੍ਥਾਤਿ ਤੇਸੁ ਅਨਭਿਸਮ੍ਬੁਦ੍ਧਾਤਿ ਏਵਂ ਦਸ੍ਸਿਤਧਮ੍ਮੇਸੁ. ਅਞ੍ਞੇਨ ਵਾ ਅਞ੍ਞਂ ਪਟਿਚਰਿਸ੍ਸਤੀਤਿ ਅਞ੍ਞੇਨ ਵਾ ਵਚਨੇਨ ਅਞ੍ਞਂ ਵਚਨਂ ਪਟਿਚ੍ਛਾਦੇਸ੍ਸਤਿ, ਅਞ੍ਞਂ ਪੁਚ੍ਛਿਤੋ ਅਞ੍ਞਂ ਕਥੇਸ੍ਸਤੀਤਿ ਅਧਿਪ੍ਪਾਯੋ. ਬਹਿਦ੍ਧਾ ਕਥਂ ਅਪਨਾਮੇਸ੍ਸਤੀਤਿ ਬਹਿਦ੍ਧਾ ਅਞ੍ਞਂ ਆਗਨ੍ਤੁਕਕਥਂ ਆਹਰਨ੍ਤੋ ਪੁਰਿਮਕਥਂ ਅਪਨਾਮੇਸ੍ਸਤਿ. ਅਪ੍ਪਚ੍ਚਯਨ੍ਤਿ ਅਨਭਿਰਦ੍ਧਿਂ ਅਤੁਟ੍ਠਾਕਾਰਂ ਪਾਤੁਕਰਿਸ੍ਸਤੀਤਿ ਪਾਕਟਂ ਕਰਿਸ੍ਸਤਿ. ਏਤ੍ਥ ਚ ਅਪ੍ਪਚ੍ਚਯੇਨ ਦੋਮਨਸ੍ਸਂ ਵੁਤ੍ਤਂ, ਪੁਰਿਮੇਹਿ ਦ੍ਵੀਹਿ ਮਨ੍ਦਬਲਵਭੇਦੋ ਕੋਧੋਯੇਵ.
ਏਵਂ ਭਗਵਾ ਪਠਮਵੇਸਾਰਜ੍ਜੇਨ ਸੀਹਨਾਦਂ ਨਦਿਤ੍ਵਾ ਪੁਨ ਦੁਤਿਯਾਦੀਹਿ ਨਦਨ੍ਤੋ ਯੋ ਖੋ ਮਂ ਪਰਿਬ੍ਬਾਜਕਾਤਿਆਦਿਮਾਹ. ਤਤ੍ਥ ਯਸ੍ਸ ਖੋ ਪਨ ਤੇ ਅਤ੍ਥਾਯ ਧਮ੍ਮੋ ਦੇਸਿਤੋਤਿ ਯਸ੍ਸ ਮਗ੍ਗਸ੍ਸ ਵਾ ਫਲਸ੍ਸ ਵਾ ਅਤ੍ਥਾਯ ਤਯਾ ਚਤੁਸਚ੍ਚਧਮ੍ਮੋ ਦੇਸਿਤੋ. ਸੋ ਨ ਨਿਯ੍ਯਾਤੀਤਿ ਸੋ ਧਮ੍ਮੋ ਨ ਨਿਯ੍ਯਾਤਿ ਨ ਨਿਗ੍ਗਚ੍ਛਤਿ, ਨ ਤਂ ਅਤ੍ਥਂ ਸਾਧੇਤੀਤਿ ਵੁਤ੍ਤਂ ਹੋਤਿ. ਤਕ੍ਕਰਸ੍ਸਾਤਿ ਯੋ ਨਂ ਕਰੋਤਿ, ਤਸ੍ਸ ਪਟਿਪਤ੍ਤਿਪੂਰਕਸ੍ਸ ਪੁਗ੍ਗਲਸ੍ਸਾਤਿ ਅਤ੍ਥੋ. ਸਮ੍ਮਾ ਦੁਕ੍ਖਕ੍ਖਯਾਯਾਤਿ ਹੇਤੁਨਾ ਨਯੇਨ ਕਾਰਣੇਨ ਸਕਲਸ੍ਸ ਵਟ੍ਟਦੁਕ੍ਖਸ੍ਸ ਖਯਾਯ. ਅਥ ਵਾ ਯਸ੍ਸ ਖੋ ਪਨ ਤੇ ਅਤ੍ਥਾਯ ਧਮ੍ਮੋ ਦੇਸਿਤੋਤਿ ਯਸ੍ਸ ਤੇ ਅਤ੍ਥਾਯ ਧਮ੍ਮੋ ਦੇਸਿਤੋ. ਸੇਯ੍ਯਥਿਦਂ – ਰਾਗਪਟਿਘਾਤਤ੍ਥਾਯ ਅਸੁਭਕਮ੍ਮਟ੍ਠਾਨਂ, ਦੋਸਪਟਿਘਾਤਤ੍ਥਾਯ ਮੇਤ੍ਤਾਭਾਵਨਾ, ਮੋਹਪਟਿਘਾਤਤ੍ਥਾਯ ਪਞ੍ਚ ਧਮ੍ਮਾ, ਵਿਤਕ੍ਕੁਪਚ੍ਛੇਦਾਯ ਆਨਾਪਾਨਸ੍ਸਤਿ. ਸੋ ਨ ਨਿਯ੍ਯਾਤਿ ਤਕ੍ਕਰਸ੍ਸ ਸਮ੍ਮਾ ਦੁਕ੍ਖਕ੍ਖਯਾਯਾਤਿ ਸੋ ਧਮ੍ਮੋ ਯੋ ਨਂ ਯਥਾਦੇਸਿਤਂ ਕਰੋਤਿ, ਤਸ੍ਸ ਤਕ੍ਕਰਸ੍ਸ ਸਮ੍ਮਾ ਹੇਤੁਨਾ ਨਯੇਨ ਕਾਰਣੇਨ ਵਟ੍ਟਦੁਕ੍ਖਕ੍ਖਯਾਯ ਨ ਨਿਯ੍ਯਾਤਿ ਨ ਨਿਗ੍ਗਚ੍ਛਤਿ, ਤਂ ਅਤ੍ਥਂ ਨ ਸਾਧੇਤੀਤਿ ਅਯਮੇਤ੍ਥ ਅਤ੍ਥੋ. ਸੇਯ੍ਯਥਾਪਿ ਸਰਭੋ ਪਰਿਬ੍ਬਾਜਕੋਤਿ ਯਥਾ ਅਯਂ ਸਰਭੋ ਪਰਿਬ੍ਬਾਜਕੋ ਪਜ੍ਝਾਯਨ੍ਤੋ ਅਪ੍ਪਟਿਭਾਨੋ ਨਿਸਿਨ੍ਨੋ, ਏਵਂ ਨਿਸੀਦਿਸ੍ਸਤੀਤਿ.
ਏਵਂ ਤੀਹਿ ਪਦੇਹਿ ਸੀਹਨਾਦਂ ਨਦਿਤ੍ਵਾ ਦੇਸਨਂ ਨਿਵਤ੍ਤੇਨ੍ਤਸ੍ਸੇਵ ਤਥਾਗਤਸ੍ਸ ਤਸ੍ਮਿਂ ਠਾਨੇ ਸਨ੍ਨਿਪਤਿਤਾ ਚਤੁਰਾਸੀਤਿਪਾਣਸਹਸ੍ਸਪਰਿਮਾਣਾ ਪਰਿਸਾ ਅਮਤਪਾਨਂ ਪਿਵਿ, ਸਤ੍ਥਾ ਪਰਿਸਾਯ ਅਮਤਪਾਨਸ੍ਸ ਪੀਤਭਾਵਂ ਞਤ੍ਵਾ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਪਕ੍ਕਾਮਿ. ਤਮਤ੍ਥਂ ਦਸ੍ਸੇਤੁਂ ਅਥ ਖੋ ਭਗਵਾਤਿਆਦਿ ਵੁਤ੍ਤਂ. ਤਤ੍ਥ ਸੀਹਨਾਦਨ੍ਤਿ ਸੇਟ੍ਠਨਾਦਂ ਅਭੀਤਨਾਦਂ ਅਪ੍ਪਟਿਨਾਦਂ. ਵੇਹਾਸਂ ਪਕ੍ਕਾਮੀਤਿ ਅਭਿਞ੍ਞਾਪਾਦਕਂ ਚਤੁਤ੍ਥਜ੍ਝਾਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਅਧਿਟ੍ਠਾਯ ਸਦ੍ਧਿਂ ਭਿਕ੍ਖੁਸਙ੍ਘੇਨ ਆਕਾਸਂ ਪਕ੍ਖਨ੍ਦਿ. ਏਵਂ ਪਕ੍ਖਨ੍ਦੋ ਚ ਪਨ ਤਂਖਣਞ੍ਞੇਵ ਗਿਜ੍ਝਕੂਟਮਹਾਵਿਹਾਰੇ ਪਤਿਟ੍ਠਾਸਿ.
ਵਾਚਾਯ ਸਨ੍ਨਿਤੋਦਕੇਨਾਤਿ ਵਚਨਪਤੋਦੇਨ. ਸਞ੍ਜਮ੍ਭਰਿਮਕਂਸੂਤਿ ਸਮ੍ਭਰਿਤਂ ਨਿਰਨ੍ਤਰਫੁਟਂ ਅਕਂਸੁ, ਉਪਰਿ ਵਿਜ੍ਝਿਂਸੂਤਿ ਵੁਤ੍ਤਂ ਹੋਤਿ. ਬ੍ਰਹਾਰਞ੍ਞੇਤਿ ਮਹਾਰਞ੍ਞੇ. ਸੀਹਨਾਦਂ ਨਦਿਸ੍ਸਾਮੀਤਿ ਸੀਹਸ੍ਸ ਨਦਤੋ ਆਕਾਰਂ ਦਿਸ੍ਵਾ ‘‘ਅਯਮ੍ਪਿ ਤਿਰਚ੍ਛਾਨਗਤੋ, ਅਹਮ੍ਪਿ, ਇਮਸ੍ਸ ਚਤ੍ਤਾਰੋ ਪਾਦਾ, ਮਯ੍ਹਮ੍ਪਿ, ਅਹਮ੍ਪਿ ਏਵਮੇਵ ਸੀਹਨਾਦਂ ਨਦਿਸ੍ਸਾਮੀ’’ਤਿ ਚਿਨ੍ਤੇਸਿ. ਸੋ ਸੀਹਸ੍ਸ ਸਮ੍ਮੁਖਾ ਨਦਿਤੁਂ ਅਸਕ੍ਕੋਨ੍ਤੋ ਤਸ੍ਮਿਂ ਗੋਚਰਾਯ ਪਕ੍ਕਨ੍ਤੇ ਏਕਕੋ ਨਦਿਤੁਂ ਆਰਭਿ. ਅਥਸ੍ਸ ਸਿਙ੍ਗਾਲਸਦ੍ਦੋਯੇਵ ਨਿਚ੍ਛਰਿ. ਤੇਨ ਵੁਤ੍ਤਂ – ਸਿਙ੍ਗਾਲਕਂਯੇਵ ਨਦਤੀਤਿ. ਭੇਰਣ੍ਡਕਨ੍ਤਿ ਤਸ੍ਸੇਵ ਵੇਵਚਨਂ. ਅਪਿਚ ਭਿਨ੍ਨਸ੍ਸਰਂ ਅਮਨਾਪਸਦ੍ਦਂ ਨਦਤੀਤਿ ਵੁਤ੍ਤਂ ਹੋਤਿ. ਏਵਮੇਵ ਖੋ ਤ੍ਵਨ੍ਤਿ ਇਮਿਨਾ ਓਪਮ੍ਮੇਨ ਪਰਿਬ੍ਬਾਜਕਾ ਤਥਾਗਤਂ ਸੀਹਸਦਿਸਂ ਕਤ੍ਵਾ ਸਰਭਂ ਸਿਙ੍ਗਾਲਸਦਿਸਂ ਅਕਂਸੁ. ਅਮ੍ਬੁਕਸਞ੍ਚਰੀਤਿ ਖੁਦ੍ਦਕਕੁਕ੍ਕੁਟਿਕਾ. ਪੁਰਿਸਕਰਵਿਤਂ ਰਵਿਸ੍ਸਾਮੀਤਿ ਮਹਾਕੁਕ੍ਕੁਟਂ ਰਵਨ੍ਤਂ ਦਿਸ੍ਵਾ ‘‘ਇਮਸ੍ਸਪਿ ਦ੍ਵੇ ਪਾਦਾ ਦ੍ਵੇ ਪਕ੍ਖਾ, ਮਯ੍ਹਮ੍ਪਿ ਤਥੇਵ, ਅਹਮ੍ਪਿ ਏਵਰੂਪਂ ਰਵਿਤਂ ਰਵਿਸ੍ਸਾਮੀ’’ਤਿ ਸਾ ਤਸ੍ਸ ਸਮ੍ਮੁਖਾ ਰਵਿਤੁਂ ਅਸਕ੍ਕੋਨ੍ਤੀ ਤਸ੍ਮਿਂ ਪਕ੍ਕਨ੍ਤੇ ਰਵਮਾਨਾ ਕੁਕ੍ਕੁਟਿਕਾਰਵਂਯੇਵ ਰਵਿ. ਤੇਨ ਵੁਤ੍ਤਂ – ਅਮ੍ਬੁਕਸਞ੍ਚਰਿਰਵਿਤਂਯੇਵ ਰਵਤੀਤਿ. ਉਸਭੋਤਿ ਗੋਣੋ. ਸੁਞ੍ਞਾਯਾਤਿ ਤੁਚ੍ਛਾਯ ਜੇਟ੍ਠਕਵਸਭੇਹਿ ਵਿਰਹਿਤਾਯ. ਗਮ੍ਭੀਰਂ ਨਦਿਤਬ੍ਬਂ ਮਞ੍ਞਤੀਤਿ ਜੇਟ੍ਠਕਵਸਭਸ੍ਸ ਨਾਦਸਦਿਸਂ ਗਮ੍ਭੀਰਨਾਦਂ ਨਦਿਤਬ੍ਬਂ ਮਞ੍ਞਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
੫. ਕੇਸਮੁਤ੍ਤਿਸੁਤ੍ਤਵਣ੍ਣਨਾ
੬੬. ਪਞ੍ਚਮੇ ਕਾਲਾਮਾਨਂ ਨਿਗਮੋਤਿ ਕਾਲਾਮਾ ਨਾਮ ਖਤ੍ਤਿਯਾ, ਤੇਸਂ ਨਿਗਮੋ. ਕੇਸਮੁਤ੍ਤਿਯਾਤਿ ਕੇਸਮੁਤ੍ਤਨਿਗਮਵਾਸਿਨੋ. ਉਪਸਙ੍ਕਮਿਂਸੂਤਿ ਸਪ੍ਪਿਨਵਨੀਤਾਦਿਭੇਸਜ੍ਜਾਨਿ ਚੇਵ ਅਟ੍ਠਵਿਧਪਾਨਕਾਨਿ ਚ ਗਾਹਾਪੇਤ੍ਵਾ ਉਪਸਙ੍ਕਮਿਂਸੁ. ਸਕਂਯੇਵ ਵਾਦਂ ਦੀਪੇਨ੍ਤੀਤਿ ਅਤ੍ਤਨੋਯੇਵ ਲਦ੍ਧਿਂ ਕਥੇਨ੍ਤਿ. ਜੋਤੇਨ੍ਤੀਤਿ ਪਕਾਸੇਨ੍ਤਿ. ਖੁਂਸੇਨ੍ਤੀਤਿ ਘਟ੍ਟੇਨ੍ਤਿ. ਵਮ੍ਭੇਨ੍ਤੀਤਿ ਅਵਜਾਨਨ੍ਤਿ. ਪਰਿਭਵਨ੍ਤੀਤਿ ਲਾਮਕਂ ਕਰੋਨ੍ਤਿ. ਓਮਕ੍ਖਿਂ ਕਰੋਨ੍ਤੀਤਿ ਉਕ੍ਖਿਤ੍ਤਕਂ ਕਰੋਨ੍ਤਿ, ਉਕ੍ਖਿਪਿਤ੍ਵਾ ਛਡ੍ਡੇਨ੍ਤਿ. ਅਪਰੇਪਿ, ਭਨ੍ਤੇਤਿ ਸੋ ਕਿਰ ਅਟਵਿਮੁਖੇ ਗਾਮੋ, ਤਸ੍ਮਾ ਤਤ੍ਥ ਅਟਵਿਂ ਅਤਿਕ੍ਕਨ੍ਤਾ ਚ ਅਤਿਕ੍ਕਮਿਤੁਕਾਮਾ ਚ ਵਾਸਂ ਕਪ੍ਪੇਨ੍ਤਿ. ਤੇਸੁਪਿ ਪਠਮਂ ਆਗਤਾ ਅਤ੍ਤਨੋ ਲਦ੍ਧਿਂ ਦੀਪੇਤ੍ਵਾ ਪਕ੍ਕਮਿਂਸੁ, ਪਚ੍ਛਾ ਆਗਤਾ ‘‘ਕਿਂ ਤੇ ਜਾਨਨ੍ਤਿ, ਅਮ੍ਹਾਕਂ ਅਨ੍ਤੇਵਾਸਿਕਾ ਤੇ, ਅਮ੍ਹਾਕਂ ਸਨ੍ਤਿਕੇ ਕਿਞ੍ਚਿ ਕਿਞ੍ਚਿ ਸਿਪ੍ਪਂ ਉਗ੍ਗਣ੍ਹਿਂਸੂ’’ਤਿ ਅਤ੍ਤਨੋ ਲਦ੍ਧਿਂ ਦੀਪੇਤ੍ਵਾ ਪਕ੍ਕਮਿਂਸੁ. ਕਾਲਾਮਾ ਏਕਲਦ੍ਧਿਯਮ੍ਪਿ ਸਣ੍ਠਹਿਤੁਂ ਨ ਸਕ੍ਖਿਂਸੁ. ਤੇ ਏਤਮਤ੍ਥਂ ਦੀਪੇਤ੍ਵਾ ਭਗਵਤੋ ਏਵਮਾਰੋਚੇਤ੍ਵਾ ਤੇਸਂ ਨੋ, ਭਨ੍ਤੇਤਿਆਦਿਮਾਹਂਸੁ. ਤਤ੍ਥ ਹੋਤੇਵ ਕਙ੍ਖਾਤਿ ਹੋਤਿਯੇਵ ਕਙ੍ਖਾ. ਵਿਚਿਕਿਚ੍ਛਾਤਿ ਤਸ੍ਸੇਵ ਵੇਵਚਨਂ. ਅਲਨ੍ਤਿ ਯੁਤ੍ਤਂ.
ਮਾ ਅਨੁਸ੍ਸਵੇਨਾਤਿ ਅਨੁਸ੍ਸਵਕਥਾਯਪਿ ਮਾ ਗਣ੍ਹਿਤ੍ਥ. ਮਾ ਪਰਮ੍ਪਰਾਯਾਤਿ ਪਰਮ੍ਪਰਕਥਾਯਪਿ ਮਾ ਗਣ੍ਹਿਤ੍ਥ. ਮਾ ਇਤਿਕਿਰਾਯਾਤਿ ਏਵਂ ਕਿਰ ਏਤਨ੍ਤਿ ਮਾ ਗਣ੍ਹਿਤ੍ਥ. ਮਾ ਪਿਟਕਸਮ੍ਪਦਾਨੇਨਾਤਿ ਅਮ੍ਹਾਕਂ ਪਿਟਕਤਨ੍ਤਿਯਾ ਸਦ੍ਧਿਂ ਸਮੇਤੀਤਿ ਮਾ ਗਣ੍ਹਿਤ੍ਥ. ਮਾ ਤਕ੍ਕਹੇਤੂਤਿ ਤਕ੍ਕਗ੍ਗਾਹੇਨਪਿ ਮਾ ਗਣ੍ਹਿਤ੍ਥ. ਮਾ ਨਯਹੇਤੂਤਿ ਨਯਗ੍ਗਾਹੇਨਪਿ ਮਾ ਗਣ੍ਹਿਤ੍ਥ. ਮਾ ਆਕਾਰਪਰਿਵਿਤਕ੍ਕੇਨਾਤਿ ਸੁਨ੍ਦਰਮਿਦਂ ਕਾਰਣਨ੍ਤਿ ਏਵਂ ਕਾਰਣਪਰਿਵਿਤਕ੍ਕੇਨਪਿ ਮਾ ਗਣ੍ਹਿਤ੍ਥ. ਮਾ ਦਿਟ੍ਠਿਨਿਜ੍ਝਾਨਕ੍ਖਨ੍ਤਿਯਾਤਿ ਅਮ੍ਹਾਕਂ ਨਿਜ੍ਝਾਯਿਤ੍ਵਾ ਖਮਿਤ੍ਵਾ ਗਹਿਤਦਿਟ੍ਠਿਯਾ ਸਦ੍ਧਿਂ ਸਮੇਤੀਤਿਪਿ ਮਾ ਗਣ੍ਹਿਤ੍ਥ. ਮਾ ਭਬ੍ਬਰੂਪਤਾਯਾਤਿ ਅਯਂ ਭਿਕ੍ਖੁ ਭਬ੍ਬਰੂਪੋ, ਇਮਸ੍ਸ ਕਥਂ ਗਹੇਤੁਂ ਯੁਤ੍ਤਨ੍ਤਿਪਿ ਮਾ ਗਣ੍ਹਿਤ੍ਥ. ਮਾ ਸਮਣੋ ਨੋ ਗਰੂਤਿ ਅਯਂ ਸਮਣੋ ਅਮ੍ਹਾਕਂ ਗਰੁ, ਇਮਸ੍ਸ ਕਥਂ ਗਹੇਤੁਂ ਯੁਤ੍ਤਨ੍ਤਿਪਿ ਮਾ ਗਣ੍ਹਿਤ੍ਥ. ਸਮਤ੍ਤਾਤਿ ਪਰਿਪੁਣ੍ਣਾ. ਸਮਾਦਿਨ੍ਨਾਤਿ ਗਹਿਤਾ ਪਰਾਮਟ੍ਠਾ. ਯਂਸ ਹੋਤੀਤਿ ਯਂ ਕਾਰਣਂ ਤਸ੍ਸ ਪੁਗ੍ਗਲਸ੍ਸ ਹੋਤਿ. ਅਲੋਭਾਦਯੋ ਲੋਭਾਦਿਪਟਿਪਕ੍ਖਵਸੇਨ ਵੇਦਿਤਬ੍ਬਾ. ਵਿਗਤਾਭਿਜ੍ਝੋਤਿਆਦੀਹਿ ਮੇਤ੍ਤਾਯ ਪੁਬ੍ਬਭਾਗੋ ਕਥਿਤੋ.
ਇਦਾਨਿ ਮੇਤ੍ਤਾਦਿਕਂ ਕਮ੍ਮਟ੍ਠਾਨਂ ਕਥੇਨ੍ਤੋ ਮੇਤ੍ਤਾਸਹਗਤੇਨਾਤਿਆਦਿਮਾਹ. ਤਤ੍ਥ ਕਮ੍ਮਟ੍ਠਾਨਕਥਾਯ ਵਾ ਭਾਵਨਾਨਯੇ ਵਾ ਪਾਲ਼ਿਵਣ੍ਣਨਾਯ ਵਾ ਯਂ ਵਤ੍ਤਬ੍ਬਂ ਸਿਯਾ, ਤਂ ਸਬ੍ਬਂ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੨੪੦) ਵੁਤ੍ਤਮੇਵ. ਏਵਂ ਅਵੇਰਚਿਤ੍ਤੋਤਿ ਏਵਂ ਅਕੁਸਲਵੇਰਸ੍ਸ ਚ ਪੁਗ੍ਗਲਵੇਰਿਨੋ ਚ ਨਤ੍ਥਿਤਾਯ ਅਵੇਰਚਿਤ੍ਤੋ. ਅਬ੍ਯਾਬਜ੍ਝਚਿਤ੍ਤੋਤਿ ਕੋਧਚਿਤ੍ਤਸ੍ਸ ਅਭਾਵੇਨ ਨਿਦ੍ਦੁਕ੍ਖਚਿਤ੍ਤੋ. ਅਸਂਕਿਲਿਟ੍ਠਚਿਤ੍ਤੋਤਿ ਕਿਲੇਸਸ੍ਸ ਨਤ੍ਥਿਤਾਯ ਅਸਂਕਿਲਿਟ੍ਠਚਿਤ੍ਤੋ. ਵਿਸੁਦ੍ਧਚਿਤ੍ਤੋਤਿ ਕਿਲੇਸਮਲਾਭਾਵੇਨ ਵਿਸੁਦ੍ਧਚਿਤ੍ਤੋ ਹੋਤੀਤਿ ਅਤ੍ਥੋ. ਤਸ੍ਸਾਤਿ ਤਸ੍ਸ ਏਵਰੂਪਸ੍ਸ ਅਰਿਯਸਾਵਕਸ੍ਸ. ਅਸ੍ਸਾਸਾਤਿ ਅਵਸ੍ਸਯਾ ਪਤਿਟ੍ਠਾ. ਸਚੇ ਖੋ ਪਨ ਅਤ੍ਥਿ ਪਰੋ ਲੋਕੋਤਿ ਯਦਿ ਇਮਮ੍ਹਾ ਲੋਕਾ ਪਰਲੋਕੋ ਨਾਮ ਅਤ੍ਥਿ. ਅਥਾਹਂ ਕਾਯਸ੍ਸ ਭੇਦਾ ਪਰਮ੍ਮਰਣਾ…ਪੇ… ਉਪਪਜ੍ਜਿਸ੍ਸਾਮੀਤਿ ਅਤ੍ਥੇਤਂ ਕਾਰਣਂ, ਯੇਨਾਹਂ ਕਾਯਸ੍ਸ ਭੇਦਾ ਪਰਮ੍ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਿਸ੍ਸਾਮੀਤਿ ਏਵਂ ਸਬ੍ਬਤ੍ਥ ਨਯੋ ਵੇਦਿਤਬ੍ਬੋ. ਅਨੀਘਨ੍ਤਿ ਨਿਦ੍ਦੁਕ੍ਖਂ. ਸੁਖਿਨ੍ਤਿ ਸੁਖਿਤਂ. ਉਭਯੇਨੇਵ ਵਿਸੁਦ੍ਧਂ ਅਤ੍ਤਾਨਂ ਸਮਨੁਪਸ੍ਸਾਮੀਤਿ ਯਞ੍ਚ ਪਾਪਂ ਨ ਕਰੋਮਿ, ਯਞ੍ਚ ਕਰੋਤੋਪਿ ਨ ਕਰੀਯਤਿ, ਇਮਿਨਾ ਉਭਯੇਨਾਪਿ ਵਿਸੁਦ੍ਧਂ ਅਤ੍ਤਾਨਂ ਸਮਨੁਪਸ੍ਸਾਮਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
੬. ਸਾਲ਼੍ਹਸੁਤ੍ਤਵਣ੍ਣਨਾ
੬੭. ਛਟ੍ਠੇ ਮਿਗਾਰਨਤ੍ਤਾਤਿ ਮਿਗਾਰਸੇਟ੍ਠਿਨੋ ਨਤ੍ਤਾ. ਸੇਖੁਨਿਯਨਤ੍ਤਾਤਿ ਸੇਖੁਨਿਯਸੇਟ੍ਠਿਨੋ ਨਤ੍ਤਾ. ਉਪਸਙ੍ਕਮਿਂਸੂਤਿ ਭੁਤ੍ਤਪਾਤਰਾਸਾ ਦਾਸਕਮ੍ਮਕਰਪਰਿਵੁਤਾ ਉਪਸਙ੍ਕਮਿਂਸੁ. ਤੇਸਂ ਕਿਰ ਪੁਰੇਭਤ੍ਤੇ ਪੁਬ੍ਬਣ੍ਹਸਮਯੇਯੇਵ ਗੇਹੇ ਏਕੋ ਪਞ੍ਹੋ ਸਮੁਟ੍ਠਿਤੋ, ਤਂ ਪਨ ਕਥੇਤੁਂ ਓਕਾਸੋ ਨਾਹੋਸਿ. ਤੇ ‘‘ਤਂ ਪਞ੍ਹਂ ਸੋਸ੍ਸਾਮਾ’’ਤਿ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਤੁਣ੍ਹੀ ਨਿਸੀਦਿਂਸੁ. ਥੇਰੋ ‘‘ਗਾਮੇ ਤਂ ਸਮੁਟ੍ਠਿਤਂ ਪਞ੍ਹਂ ਸੋਤੁਂ ਆਗਤਾ ਭਵਿਸ੍ਸਨ੍ਤੀ’’ਤਿ ਤੇਸਂ ਮਨਂ ਞਤ੍ਵਾ ਤਮੇਵ ਪਞ੍ਹਂ ਆਰਭਨ੍ਤੋ ਏਥ ਤੁਮ੍ਹੇ ਸਾਲ਼੍ਹਾਤਿਆਦਿਮਾਹ. ਤਤ੍ਥ ਅਤ੍ਥਿ ਲੋਭੋਤਿ ਲੁਬ੍ਭਨਸਭਾਵੋ ਲੋਭੋ ਨਾਮ ਅਤ੍ਥੀਤਿ ਪੁਚ੍ਛਤਿ. ਅਭਿਜ੍ਝਾਤਿ ਖੋ ਅਹਂ ਸਾਲ਼੍ਹਾ ਏਤਮਤ੍ਥਂ ਵਦਾਮੀਤਿ ਏਤਂ ਲੋਭਸਙ੍ਖਾਤਂ ਅਤ੍ਥਂ ਅਹਂ ‘‘ਅਭਿਜ੍ਝਾ’’ਤਿ ਵਦਾਮਿ, ‘‘ਤਣ੍ਹਾ’’ਤਿ ਵਦਾਮੀਤਿ ਸਮੁਟ੍ਠਿਤਪਞ੍ਹਸ੍ਸ ਅਤ੍ਥਂ ਦੀਪੇਨ੍ਤੋ ਆਹ. ਏਵਂ ਸਬ੍ਬਵਾਰੇਸੁ ਨਯੋ ਨੇਤਬ੍ਬੋ.
ਸੋ ਏਵਂ ਪਜਾਨਾਤੀਤਿ ਸੋ ਚਤ੍ਤਾਰੋ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਠਿਤੋ ਅਰਿਯਸਾਵਕੋ ਸਮਾਪਤ੍ਤਿਤੋ ਵੁਟ੍ਠਾਯ ਵਿਪਸ੍ਸਨਂ ਆਰਭਨ੍ਤੋ ਏਵਂ ਪਜਾਨਾਤਿ. ਅਤ੍ਥਿ ਇਦਨ੍ਤਿ ਅਤ੍ਥਿ ਦੁਕ੍ਖਸਚ੍ਚਸਙ੍ਖਾਤਂ ਖਨ੍ਧਪਞ੍ਚਕਂ ਨਾਮਰੂਪਵਸੇਨ ਪਰਿਚ੍ਛਿਨ੍ਦਿਤ੍ਵਾ ਪਜਾਨਨ੍ਤੋ ਏਸ ‘‘ਏਵਂ ਪਜਾਨਾਤਿ ਅਤ੍ਥਿ ਇਦ’’ਨ੍ਤਿ ਵੁਤ੍ਤੋ. ਹੀਨਨ੍ਤਿ ਸਮੁਦਯਸਚ੍ਚਂ. ਪਣੀਤਨ੍ਤਿ ਮਗ੍ਗਸਚ੍ਚਂ. ਇਮਸ੍ਸ ਸਞ੍ਞਾਗਤਸ੍ਸ ਉਤ੍ਤਰਿ ਨਿਸ੍ਸਰਣਨ੍ਤਿ ਇਮਸ੍ਸ ਵਿਪਸ੍ਸਨਾਸਞ੍ਞਾਸਙ੍ਖਾਤਸ੍ਸ ਸਞ੍ਞਾਗਤਸ੍ਸ ਉਤ੍ਤਰਿ ਨਿਸ੍ਸਰਣਂ ਨਾਮ ਨਿਬ੍ਬਾਨਂ, ਤਮਤ੍ਥੀਤਿ ਇਮਿਨਾ ਨਿਰੋਧਸਚ੍ਚਂ ਦਸ੍ਸੇਤਿ. ਵਿਮੁਤ੍ਤਸ੍ਮਿਂ ਵਿਮੁਤ੍ਤਮਿਤਿ ਞਾਣਨ੍ਤਿ ਏਕੂਨਵੀਸਤਿਵਿਧਂ ਪਚ੍ਚਵੇਕ੍ਖਣਞਾਣਂ ਕਥਿਤਂ. ਅਹੁ ਪੁਬ੍ਬੇ ਲੋਭੋਤਿ ਪੁਬ੍ਬੇ ਮੇ ਲੋਭੋ ਅਹੋਸਿ. ਤਦਹੁ ਅਕੁਸਲਨ੍ਤਿ ਤਂ ਅਕੁਸਲਂ ਨਾਮ ਅਹੋਸਿ, ਤਦਾ ਵਾ ਅਕੁਸਲਂ ਨਾਮ ਅਹੋਸਿ. ਇਚ੍ਚੇਤਂ ਕੁਸਲਨ੍ਤਿ ਇਤਿ ਏਤਂ ਕੁਸਲਂ, ਤਸ੍ਸੇਵ ਅਕੁਸਲਸ੍ਸ ਨਤ੍ਥਿਭਾਵਂ ਕੁਸਲਂ ਖੇਮਨ੍ਤਿ ਸਨ੍ਧਾਯ ਵਦਤਿ. ਨਿਚ੍ਛਾਤੋਤਿ ਨਿਤ੍ਤਣ੍ਹੋ. ਨਿਬ੍ਬੁਤੋਤਿ ਅਬ੍ਭਨ੍ਤਰੇ ਸਨ੍ਤਾਪਕਰਾਨਂ ਕਿਲੇਸਾਨਂ ਅਭਾਵੇਨ ਨਿਬ੍ਬੁਤੋ. ਸੀਤਿਭੂਤੋਤਿ ਸੀਤਲੀਭੂਤੋ. ਸੁਖਪ੍ਪਟਿਸਂਵੇਦੀਤਿ ਕਾਯਿਕਚੇਤਸਿਕਸ੍ਸ ਸੁਖਸ੍ਸ ਪਟਿਸਂਵੇਦਿਤਾ. ਬ੍ਰਹ੍ਮਭੂਤੇਨਾਤਿ ਸੇਟ੍ਠਭੂਤੇਨ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
੭. ਕਥਾਵਤ੍ਥੁਸੁਤ੍ਤਵਣ੍ਣਨਾ
੬੮. ਸਤ੍ਤਮੇ ਕਥਾਵਤ੍ਥੂਨੀਤਿ ਕਥਾਕਾਰਣਾਨਿ, ਕਥਾਯ ਭੂਮਿਯੋ ਪਤਿਟ੍ਠਾਯੋਤਿ ਅਤ੍ਥੋ. ਅਤੀਤਂ ਵਾ, ਭਿਕ੍ਖਵੇ, ਅਦ੍ਧਾਨਨ੍ਤਿ ਅਤੀਤਮਦ੍ਧਾਨਂ ਨਾਮ ਕਾਲੋਪਿ ਵਟ੍ਟਤਿ ਖਨ੍ਧਾਪਿ. ਅਨਾਗਤਪਚ੍ਚੁਪ੍ਪਨ੍ਨੇਸੁਪਿ ਏਸੇਵ ਨਯੋ. ਤਤ੍ਥ ਅਤੀਤੇ ਕਸ੍ਸਪੋ ਨਾਮ ਸਮ੍ਮਾਸਮ੍ਬੁਦ੍ਧੋ ਅਹੋਸਿ, ਤਸ੍ਸ ਕਿਕੀ ਨਾਮ ਕਾਸਿਕਰਾਜਾ ਅਗ੍ਗੁਪਟ੍ਠਾਕੋ ਅਹੋਸਿ, ਵੀਸਤਿ ਵਸ੍ਸਸਹਸ੍ਸਾਨਿ ਆਯੁ ਅਹੋਸੀਤਿ ਇਮਿਨਾ ਨਯੇਨ ਕਥੇਨ੍ਤੋ ਅਤੀਤਂ ਆਰਬ੍ਭ ਕਥਂ ਕਥੇਤਿ ਨਾਮ. ਅਨਾਗਤੇ ਮੇਤ੍ਤੇਯ੍ਯੋ ਨਾਮ ਬੁਦ੍ਧੋ ਭਵਿਸ੍ਸਤਿ, ਤਸ੍ਸ ਸਙ੍ਖੋ ਨਾਮ ਰਾਜਾ ਅਗ੍ਗੁਪਟ੍ਠਾਕੋ ਭਵਿਸ੍ਸਤਿ, ਅਸੀਤਿ ਵਸ੍ਸਸਹਸ੍ਸਾਨਿ ਆਯੁ ਭਵਿਸ੍ਸਤੀਤਿ ਇਮਿਨਾ ਨਯੇਨ ਕਥੇਨ੍ਤੋ ਅਨਾਗਤਂ ਆਰਬ੍ਭ ਕਥਂ ਕਥੇਤਿ ਨਾਮ. ਏਤਰਹਿ ਅਸੁਕੋ ਨਾਮ ਰਾਜਾ ਧਮ੍ਮਿਕੋਤਿ ਇਮਿਨਾ ਨਯੇਨ ਕਥੇਨ੍ਤੋ ਪਚ੍ਚੁਪ੍ਪਨ੍ਨਂ ਆਰਬ੍ਭ ਕਥਂ ਕਥੇਤਿ ਨਾਮ.
ਕਥਾਸਮ੍ਪਯੋਗੇਨਾਤਿ ਕਥਾਸਮਾਗਮੇਨ. ਕਚ੍ਛੋਤਿ ਕਥੇਤੁਂ ਯੁਤ੍ਤੋ. ਅਕਚ੍ਛੋਤਿ ਕਥੇਤੁਂ ਨ ਯੁਤ੍ਤੋ. ਏਕਂਸਬ੍ਯਾਕਰਣੀਯਂ ਪਞ੍ਹਨ੍ਤਿਆਦੀਸੁ, ‘‘ਚਕ੍ਖੁ, ਅਨਿਚ੍ਚ’’ਨ੍ਤਿ ਪੁਟ੍ਠੇਨ, ‘‘ਆਮ, ਅਨਿਚ੍ਚ’’ਨ੍ਤਿ ਏਕਂਸੇਨੇਵ ਬ੍ਯਾਕਾਤਬ੍ਬਂ. ਏਸੇਵ ਨਯੋ ਸੋਤਾਦੀਸੁ. ਅਯਂ ਏਕਂਸਬ੍ਯਾਕਰਣੀਯੋ ਪਞ੍ਹੋ. ‘‘ਅਨਿਚ੍ਚਂ ਨਾਮ ਚਕ੍ਖੂ’’ਤਿ ਪੁਟ੍ਠੇਨ ਪਨ ‘‘ਨ ਚਕ੍ਖੁਮੇਵ, ਸੋਤਮ੍ਪਿ ਅਨਿਚ੍ਚਂ, ਘਾਨਮ੍ਪਿ ਅਨਿਚ੍ਚ’’ਨ੍ਤਿ ਏਵਂ ਵਿਭਜਿਤ੍ਵਾ ਬ੍ਯਾਕਾਤਬ੍ਬਂ. ਅਯਂ ਵਿਭਜ੍ਜਬ੍ਯਾਕਰਣੀਯੋ ਪਞ੍ਹੋ. ‘‘ਯਥਾ ਚਕ੍ਖੁ, ਤਥਾ ਸੋਤਂ. ਯਥਾ ਸੋਤਂ, ਤਥਾ ਚਕ੍ਖੂ’’ਤਿ ਪੁਟ੍ਠੇਨ ‘‘ਕੇਨਟ੍ਠੇਨ ਪੁਚ੍ਛਸੀ’’ਤਿ ਪਟਿਪੁਚ੍ਛਿਤ੍ਵਾ ‘‘ਦਸ੍ਸਨਟ੍ਠੇਨ ਪੁਚ੍ਛਾਮੀ’’ਤਿ ਵੁਤ੍ਤੇ ‘‘ਨ ਹੀ’’ਤਿ ਬ੍ਯਾਕਾਤਬ੍ਬਂ. ‘‘ਅਨਿਚ੍ਚਟ੍ਠੇਨ ਪੁਚ੍ਛਾਮੀ’’ਤਿ ਵੁਤ੍ਤੇ, ‘‘ਆਮਾ’’ਤਿ ਬ੍ਯਾਕਾਤਬ੍ਬਂ. ਅਯਂ ਪਟਿਪੁਚ੍ਛਾਬ੍ਯਾਕਰਣੀਯੋ ਪਞ੍ਹੋ. ‘‘ਤਂ ਜੀਵਂ ਤਂ ਸਰੀਰ’’ਨ੍ਤਿਆਦੀਨਿ ਪੁਟ੍ਠੇਨ ਪਨ ‘‘ਅਬ੍ਯਾਕਤਮੇਤਂ ਭਗਵਤਾ’’ਤਿ ਠਪੇਤਬ੍ਬੋ, ਏਸ ਪਞ੍ਹੋ ਨ ਬ੍ਯਾਕਾਤਬ੍ਬੋ. ਅਯਂ ਠਪਨੀਯੋ ਪਞ੍ਹੋ.
ਠਾਨਾਠਾਨੇ ਨ ਸਣ੍ਠਾਤੀਤਿ ਕਾਰਣਾਕਾਰਣੇ ਨ ਸਣ੍ਠਾਤਿ. ਤਤ੍ਰਾਯਂ ਨਯੋ – ਸਸ੍ਸਤਵਾਦੀ ਯੁਤ੍ਤੇਨ ਕਾਰਣੇਨ ਪਹੋਤਿ ਉਚ੍ਛੇਦਵਾਦਿਂ ਨਿਗ੍ਗਹੇਤੁਂ, ਉਚ੍ਛੇਦਵਾਦੀ ਤੇਨ ਨਿਗ੍ਗਯ੍ਹਮਾਨੋ ‘‘ਕਿਂ ਪਨਾਹਂ ਉਚ੍ਛੇਦਂ ਵਦਾਮੀ’’ਤਿ ਸਸ੍ਸਤਵਾਦਿਭਾਵਮੇਵ ਦੀਪੇਤਿ, ਅਤ੍ਤਨੋ ਵਾਦੇ ਪਤਿਟ੍ਠਾਤੁਂ ਨ ਸਕ੍ਕੋਤਿ. ਏਵਂ ਉਚ੍ਛੇਦਵਾਦਿਮ੍ਹਿ ਪਹੋਨ੍ਤੇ ਸਸ੍ਸਤਵਾਦੀ, ਪੁਗ੍ਗਲਵਾਦਿਮ੍ਹਿ ਪਹੋਨ੍ਤੇ ਸੁਞ੍ਞਤਵਾਦੀ, ਸੁਞ੍ਞਤਵਾਦਿਮ੍ਹਿ ਪਹੋਨ੍ਤੇ ਪੁਗ੍ਗਲਵਾਦੀਤਿ ਏਵਂ ਠਾਨਾਠਾਨੇ ਨ ਸਣ੍ਠਾਤਿ ਨਾਮ.
ਪਰਿਕਪ੍ਪੇ ਨ ਸਣ੍ਠਾਤੀਤਿ ਇਦਂ ਪਞ੍ਹਪੁਚ੍ਛਨੇਪਿ ਪਞ੍ਹਕਥਨੇਪਿ ਲਬ੍ਭਤਿ. ਕਥਂ? ਏਕਚ੍ਚੋ ਹਿ ‘‘ਪਞ੍ਹਂ ਪੁਚ੍ਛਿਸ੍ਸਾਮੀ’’ਤਿ ਕਣ੍ਠਂ ਸੋਧੇਤਿ, ਸੋ ਇਤਰੇਨ ‘‘ਇਦਂ ਨਾਮ ਤ੍ਵਂ ਪੁਚ੍ਛਿਸ੍ਸਸੀ’’ਤਿ ਵੁਤ੍ਤੋ ਞਾਤਭਾਵਂ ਞਤ੍ਵਾ ‘‘ਨ ਏਤਂ, ਅਞ੍ਞਂ ਪੁਚ੍ਛਿਸ੍ਸਾਮੀ’’ਤਿ ਵਦਤਿ. ਪਞ੍ਹਂ ਪੁਟ੍ਠੋਪਿ ‘‘ਪਞ੍ਹਂ ਕਥੇਸ੍ਸਾਮੀ’’ਤਿ ਹਨੁਂ ਸਂਸੋਧੇਤਿ, ਸੋ ਇਤਰੇਨ ‘‘ਇਦਂ ਨਾਮ ਕਥੇਸ੍ਸਸੀ’’ਤਿ ਵੁਤ੍ਤੋ ਞਾਤਭਾਵਂ ਞਤ੍ਵਾ ‘‘ਨ ਏਤਂ, ਅਞ੍ਞਂ ਕਥੇਸ੍ਸਾਮੀ’’ਤਿ ਵਦਤਿ. ਏਵਂ ਪਰਿਕਪ੍ਪੇ ਨ ਸਣ੍ਠਾਤਿ ਨਾਮ.
ਅਞ੍ਞਾਤਵਾਦੇ ਨ ਸਣ੍ਠਾਤੀਤਿ ਅਞ੍ਞਾਤਵਾਦੇ ਜਾਨਿਤਵਾਦੇ ਨ ਸਣ੍ਠਾਤਿ. ਕਥਂ? ਏਕਚ੍ਚੋ ਪਞ੍ਹਂ ਪੁਚ੍ਛਤਿ, ਤਂ ਇਤਰੋ ‘‘ਮਨਾਪੋ ਤਯਾ ਪਞ੍ਹੋ ਪੁਚ੍ਛਿਤੋ, ਕਹਂ ਤੇ ਏਸ ਉਗ੍ਗਹਿਤੋ’’ਤਿ ਵਦਤਿ. ਇਤਰੋ ਪੁਚ੍ਛਿਤਬ੍ਬਨਿਯਾਮੇਨੇਵ ਪਞ੍ਹਂ ਪੁਚ੍ਛਿਤ੍ਵਾਪਿ ਤਸ੍ਸ ਕਥਾਯ ‘‘ਅਪਞ੍ਹਂ ਨੁ ਖੋ ਪੁਚ੍ਛਿਤ’’ਨ੍ਤਿ ਵਿਮਤਿਂ ਕਰੋਤਿ. ਅਪਰੋ ਪਞ੍ਹਂ ਪੁਟ੍ਠੋ ਕਥੇਤਿ, ਤਮਞ੍ਞੋ ‘‘ਸੁਟ੍ਠੁ ਤੇ ਪਞ੍ਹੋ ਕਥਿਤੋ, ਕਤ੍ਥ ਤੇ ਉਗ੍ਗਹਿਤੋ, ਪਞ੍ਹਂ ਕਥੇਨ੍ਤੇਨ ਨਾਮ ਏਵਂ ਕਥੇਤਬ੍ਬੋ’’ਤਿ ਵਦਤਿ. ਇਤਰੋ ਕਥੇਤਬ੍ਬਨਿਯਾਮੇਨੇਵ ਪਞ੍ਹਂ ਕਥੇਤ੍ਵਾਪਿ ਤਸ੍ਸ ਕਥਾਯ ‘‘ਅਪਞ੍ਹੋ ਨੁ ਖੋ ਮਯਾ ਕਥਿਤੋ’’ਤਿ ਵਿਮਤਿਂ ਕਰੋਤਿ.
ਪਟਿਪਦਾਯ ਨ ਸਣ੍ਠਾਤੀਤਿ ਪਟਿਪਤ੍ਤਿਯਂ ਨ ਤਿਟ੍ਠਤਿ, ਵਤ੍ਤਂ ਅਜਾਨਿਤ੍ਵਾ ਅਪੁਚ੍ਛਿਤਬ੍ਬਟ੍ਠਾਨੇ ਪੁਚ੍ਛਤੀਤਿ ਅਤ੍ਥੋ. ਅਯਂ ਪਞ੍ਹੋ ਨਾਮ ਚੇਤਿਯਙ੍ਗਣੇ ਪੁਚ੍ਛਿਤੇਨ ਨ ਕਥੇਤਬ੍ਬੋ, ਤਥਾ ਭਿਕ੍ਖਾਚਾਰਮਗ੍ਗੇ ਗਾਮਂ ਪਿਣ੍ਡਾਯ ਚਰਣਕਾਲੇ. ਆਸਨਸਾਲਾਯ ਨਿਸਿਨ੍ਨਕਾਲੇ ਯਾਗੁਂ ਵਾ ਭਤ੍ਤਂ ਵਾ ਗਹੇਤ੍ਵਾ ਨਿਸਿਨ੍ਨਕਾਲੇ ਪਰਿਭੁਞ੍ਜਿਤ੍ਵਾ ਨਿਸਿਨ੍ਨਕਾਲੇ ਦਿਵਾਵਿਹਾਰਟ੍ਠਾਨਗਮਨਕਾਲੇਪਿ. ਦਿਵਾਟ੍ਠਾਨੇ ਨਿਸਿਨ੍ਨਕਾਲੇ ਪਨ ਓਕਾਸਂ ਕਾਰੇਤ੍ਵਾਵ ਪੁਚ੍ਛਨ੍ਤਸ੍ਸ ਕਥੇਤਬ੍ਬੋ, ਅਕਾਰੇਤ੍ਵਾ ਪੁਚ੍ਛਨ੍ਤਸ੍ਸ ਨ ਕਥੇਤਬ੍ਬੋ. ਇਦਂ ਵਤ੍ਤਂ ਅਜਾਨਿਤ੍ਵਾ ਪੁਚ੍ਛਨ੍ਤੋ ਪਟਿਪਦਾਯ ਨ ਸਣ੍ਠਾਤਿ ਨਾਮ. ਏਵਂ ਸਨ੍ਤਾਯਂ, ਭਿਕ੍ਖਵੇ, ਪੁਗ੍ਗਲੋ ਅਕਚ੍ਛੋ ਹੋਤੀਤਿ, ਭਿਕ੍ਖਵੇ, ਏਤਂ ਇਮਸ੍ਮਿਂ ਚ ਕਾਰਣੇ ਸਤਿ ਅਯਂ ਪੁਗ੍ਗਲੋ ਨ ਕਥੇਤੁਂ ਯੁਤ੍ਤੋ ਨਾਮ ਹੋਤਿ.
ਠਾਨਾਠਾਨੇ ਸਣ੍ਠਾਤੀਤਿ ਸਸ੍ਸਤਵਾਦੀ ਯੁਤ੍ਤੇਨ ਕਾਰਣੇਨ ਪਹੋਤਿ ਉਚ੍ਛੇਦਵਾਦਿਂ ਨਿਗ੍ਗਹੇਤੁਂ, ਉਚ੍ਛੇਦਵਾਦੀ ਤੇਨ ਨਿਗ੍ਗਯ੍ਹਮਾਨੋਪਿ ‘‘ਅਹਂ ਤਯਾ ਸਤਕ੍ਖਤ੍ਤੁਂ ਨਿਗ੍ਗਯ੍ਹਮਾਨੋਪਿ ਉਚ੍ਛੇਦਵਾਦੀਯੇਵਾ’’ਤਿ ਵਦਤਿ. ਇਮਿਨਾ ਨਯੇਨ ਸਸ੍ਸਤਪੁਗ੍ਗਲਸੁਞ੍ਞਤਵਾਦਾਦੀਸੁਪਿ ਨਯੋ ਨੇਤਬ੍ਬੋ. ਏਵਂ ਠਾਨਾਠਾਨੇ ਸਣ੍ਠਾਤਿ ਨਾਮ. ਪਰਿਕਪ੍ਪੇ ਸਣ੍ਠਾਤੀਤਿ ‘‘ਪਞ੍ਹਂ ਪੁਚ੍ਛਿਸ੍ਸਾਮੀ’’ਤਿ ਕਣ੍ਠਂ ਸੋਧੇਨ੍ਤੋ ‘‘ਤ੍ਵਂ ਇਮਂ ਨਾਮ ਪੁਚ੍ਛਿਸ੍ਸਸੀ’’ਤਿ ਵੁਤ੍ਤੇ, ‘‘ਆਮ, ਏਤਂਯੇਵ ਪੁਚ੍ਛਿਸ੍ਸਾਮੀ’’ਤਿ ਵਦਤਿ. ਪਞ੍ਹਂ ਕਥੇਸ੍ਸਾਮੀਤਿ ਹਨੁਂ ਸਂਸੋਧੇਨ੍ਤੋਪਿ ‘‘ਤ੍ਵਂ ਇਮਂ ਨਾਮ ਕਥੇਸ੍ਸਸੀ’’ਤਿ ਵੁਤ੍ਤੇ, ‘‘ਆਮ, ਏਤਂਯੇਵ ਕਥੇਸ੍ਸਾਮੀ’’ਤਿ ਵਦਤਿ. ਏਵਂ ਪਰਿਕਪ੍ਪੇ ਸਣ੍ਠਾਤਿ ਨਾਮ.
ਅਞ੍ਞਾਤਵਾਦੇ ਸਣ੍ਠਾਤੀਤਿ ਇਮਂ ਪਞ੍ਹਂ ਪੁਚ੍ਛਿਤ੍ਵਾ ‘‘ਸੁਟ੍ਠੁ ਤੇ ਪਞ੍ਹੋ ਪੁਚ੍ਛਿਤੋ, ਪੁਚ੍ਛਨ੍ਤੇਨ ਨਾਮ ਏਵਂ ਪੁਚ੍ਛਿਤਬ੍ਬ’’ਨ੍ਤਿ ਵੁਤ੍ਤੇ ਸਮ੍ਪਟਿਚ੍ਛਤਿ, ਵਿਮਤਿਂ ਨ ਉਪ੍ਪਾਦੇਤਿ. ਪਞ੍ਹਂ ਕਥੇਤ੍ਵਾਪਿ ‘‘ਸੁਟ੍ਠੁ ਤੇ ਪਞ੍ਹੋ ਕਥਿਤੋ, ਕਥੇਨ੍ਤੇਨ ਨਾਮ ਏਵਂ ਕਥੇਤਬ੍ਬ’’ਨ੍ਤਿ ਵੁਤ੍ਤੇ ਸਮ੍ਪਟਿਚ੍ਛਤਿ, ਵਿਮਤਿਂ ਨ ਉਪ੍ਪਾਦੇਤਿ. ਪਟਿਪਦਾਯ ਸਣ੍ਠਾਤੀਤਿ ਗੇਹੇ ਨਿਸੀਦਾਪੇਤ੍ਵਾ ਯਾਗੁਖਜ੍ਜਕਾਦੀਨਿ ਦਤ੍ਵਾ ਯਾਵ ਭਤ੍ਤਂ ਨਿਟ੍ਠਾਤਿ, ਤਸ੍ਮਿਂ ਅਨ੍ਤਰੇ ਨਿਸਿਨ੍ਨੋ ਪਞ੍ਹਂ ਪੁਚ੍ਛਤਿ. ਸਪ੍ਪਿਆਦੀਨਿ ਭੇਸਜ੍ਜਾਨਿ ਅਟ੍ਠਵਿਧਾਨਿ ਪਾਨਕਾਨਿ ਵਤ੍ਥਚ੍ਛਾਦਨਮਾਲਾਗਨ੍ਧਾਦੀਨਿ ਵਾ ਆਦਾਯ ਵਿਹਾਰਂ ਗਨ੍ਤ੍ਵਾ ਤਾਨਿ ਦਤ੍ਵਾ ਦਿਵਾਟ੍ਠਾਨਂ ਪਵਿਸਿਤ੍ਵਾ ਓਕਾਸਂ ਕਾਰੇਤ੍ਵਾ ਪਞ੍ਹਂ ਪੁਚ੍ਛਤਿ. ਏਵਞ੍ਹਿ ਵਤ੍ਤਂ ਞਤ੍ਵਾ ਪੁਚ੍ਛਨ੍ਤੋ ਪਟਿਪਦਾਯ ਸਣ੍ਠਾਤਿ ਨਾਮ. ਤਸ੍ਸ ਪਞ੍ਹਂ ਕਥੇਤੁਂ ਵਟ੍ਟਤਿ.
ਅਞ੍ਞੇਨਞ੍ਞਂ ਪਟਿਚਰਤੀਤਿ ਅਞ੍ਞੇਨ ਵਚਨੇਨ ਅਞ੍ਞਂ ਪਟਿਚ੍ਛਾਦੇਤਿ, ਅਞ੍ਞਂ ਵਾ ਪੁਚ੍ਛਿਤੋ ਅਞ੍ਞਂ ਕਥੇਤਿ. ਬਹਿਦ੍ਧਾ ਕਥਂ ਅਪਨਾਮੇਤੀਤਿ ਆਗਨ੍ਤੁਕਕਥਂ ਓਤਾਰੇਨ੍ਤੋ ਪੁਰਿਮਕਥਂ ਬਹਿਦ੍ਧਾ ਅਪਨਾਮੇਤਿ. ਤਤ੍ਰਿਦਂ ਵਤ੍ਥੁ – ਭਿਕ੍ਖੂ ਕਿਰ ਸਨ੍ਨਿਪਤਿਤ੍ਵਾ ਏਕਂ ਦਹਰਂ, ‘‘ਆਵੁਸੋ, ਤ੍ਵਂ ਇਮਞ੍ਚਿਮਞ੍ਚ ਆਪਤ੍ਤਿਂ ਆਪਨ੍ਨੋ’’ਤਿ ਆਹਂਸੁ. ਸੋ ਆਹ – ‘‘ਭਨ੍ਤੇ, ਨਾਗਦੀਪਂ ਗਤੋਮ੍ਹੀ’’ਤਿ. ਆਵੁਸੋ, ਨ ਮਯਂ ਤਵ ਨਾਗਦੀਪਗਮਨੇਨ ਅਤ੍ਥਿਕਾ, ਆਪਤ੍ਤਿਂ ਪਨ ਆਪਨ੍ਨੋਤਿ ਪੁਚ੍ਛਾਮਾਤਿ. ਭਨ੍ਤੇ, ਨਾਗਦੀਪਂ ਗਨ੍ਤ੍ਵਾ ਮਚ੍ਛੇ ਖਾਦਿਨ੍ਤਿ. ਆਵੁਸੋ, ਤਵ ਮਚ੍ਛਖਾਦਨੇਨ ਕਮ੍ਮਂ ਨਤ੍ਥਿ, ਆਪਤ੍ਤਿਂ ਕਿਰਸਿ ਆਪਨ੍ਨੋਤਿ. ਸੋ ‘‘ਨਾਤਿਸੁਪਕ੍ਕੋ ਮਚ੍ਛੋ ਮਯ੍ਹਂ ਅਫਾਸੁਕਮਕਾਸਿ, ਭਨ੍ਤੇ’’ਤਿ. ਆਵੁਸੋ, ਤੁਯ੍ਹਂ ਫਾਸੁਕੇਨ ਵਾ ਅਫਾਸੁਕੇਨ ਵਾ ਕਮ੍ਮਂ ਨਤ੍ਥਿ, ਆਪਤ੍ਤਿਂ ਆਪਨ੍ਨੋਸੀਤਿ. ਭਨ੍ਤੇ, ਯਾਵ ਤਤ੍ਥ ਵਸਿਂ, ਤਾਵ ਮੇ ਅਫਾਸੁਕਮੇਵ ਜਾਤਨ੍ਤਿ. ਏਵਂ ਆਗਨ੍ਤੁਕਕਥਾਵਸੇਨ ਬਹਿਦ੍ਧਾ ਕਥਂ ਅਪਨਾਮੇਤੀਤਿ ਵੇਦਿਤਬ੍ਬਂ.
ਅਭਿਹਰਤੀਤਿ ਇਤੋ ਚਿਤੋ ਚ ਸੁਤ੍ਤਂ ਆਹਰਿਤ੍ਵਾ ਅਵਤ੍ਥਰਤਿ. ਤੇਪਿਟਕਤਿਸ੍ਸਤ੍ਥੇਰੋ ਵਿਯ. ਪੁਬ੍ਬੇ ਕਿਰ ਭਿਕ੍ਖੂ ਮਹਾਚੇਤਿਯਙ੍ਗਣੇ ਸਨ੍ਨਿਪਤਿਤ੍ਵਾ ਸਙ੍ਘਕਿਚ੍ਚਂ ਕਤ੍ਵਾ ਭਿਕ੍ਖੂਨਂ ਓਵਾਦਂ ਦਤ੍ਵਾ ਅਞ੍ਞਮਞ੍ਞਂ ਪਞ੍ਹਸਾਕਚ੍ਛਂ ਕਰੋਨ੍ਤਿ. ਤਤ੍ਥਾਯਂ ਥੇਰੋ ਤੀਹਿ ਪਿਟਕੇਹਿ ਤਤੋ ਤਤੋ ਸੁਤ੍ਤਂ ਆਹਰਿਤ੍ਵਾ ਦਿਵਸਭਾਗੇ ਏਕਮ੍ਪਿ ਪਞ੍ਹਂ ਨਿਟ੍ਠਾਪੇਤੁਂ ਨ ਦੇਤਿ. ਅਭਿਮਦ੍ਦਤੀਤਿ ਕਾਰਣਂ ਆਹਰਿਤ੍ਵਾ ਮਦ੍ਦਤਿ. ਅਨੁਪਜਗ੍ਘਤੀਤਿ ਪਰੇਨ ਪਞ੍ਹੇ ਪੁਚ੍ਛਿਤੇਪਿ ਕਥਿਤੇਪਿ ਪਾਣਿਂ ਪਹਰਿਤ੍ਵਾ ਮਹਾਹਸਿਤਂ ਹਸਤਿ, ਯੇਨ ਪਰਸ੍ਸ ‘‘ਅਪੁਚ੍ਛਿਤਬ੍ਬਂ ਨੁ ਖੋ ਪੁਚ੍ਛਿਂ, ਅਕਥੇਤਬ੍ਬਂ ਨੁ ਖੋ ਕਥੇਸਿ’’ਨ੍ਤਿ ਵਿਮਤਿ ਉਪ੍ਪਜ੍ਜਤਿ. ਖਲਿਤਂ ਗਣ੍ਹਾਤੀਤਿ ਅਪ੍ਪਮਤ੍ਤਕਂ ਮੁਖਦੋਸਮਤ੍ਤਂ ਗਣ੍ਹਾਤਿ, ਅਕ੍ਖਰੇ ਵਾ ਪਦੇ ਵਾ ਬ੍ਯਞ੍ਜਨੇ ਵਾ ਦੁਰੁਤ੍ਤੇ ‘‘ਏਵਂ ਨਾਮੇਤਂ ਵਤ੍ਤਬ੍ਬ’’ਨ੍ਤਿ ਉਜ੍ਝਾਯਮਾਨੋ ਵਿਚਰਤਿ. ਸਉਪਨਿਸੋਤਿ ਸਉਪਨਿਸ੍ਸਯੋ ਸਪਚ੍ਚਯੋ.
ਓਹਿਤਸੋਤੋਤਿ ਠਪਿਤਸੋਤੋ. ਅਭਿਜਾਨਾਤਿ ਏਕਂ ਧਮ੍ਮਨ੍ਤਿ ਏਕਂ ਕੁਸਲਧਮ੍ਮਂ ਅਭਿਜਾਨਾਤਿ ਅਰਿਯਮਗ੍ਗਂ. ਪਰਿਜਾਨਾਤਿ ਏਕਂ ਧਮ੍ਮਨ੍ਤਿ ਏਕਂ ਦੁਕ੍ਖਸਚ੍ਚਧਮ੍ਮਂ ਤੀਰਣਪਰਿਞ੍ਞਾਯ ਪਰਿਜਾਨਾਤਿ. ਪਜਹਤਿ ਏਕਂ ਧਮ੍ਮਨ੍ਤਿ ਏਕਂ ਸਬ੍ਬਾਕੁਸਲਧਮ੍ਮਂ ਪਜਹਤਿ ਵਿਨੋਦੇਤਿ ਬ੍ਯਨ੍ਤੀਕਰੋਤਿ. ਸਚ੍ਛਿਕਰੋਤਿ ਏਕਂ ਧਮ੍ਮਨ੍ਤਿ ਏਕਂ ਅਰਹਤ੍ਤਫਲਧਮ੍ਮਂ ਨਿਰੋਧਮੇਵ ਵਾ ਪਚ੍ਚਕ੍ਖਂ ਕਰੋਤਿ. ਸਮ੍ਮਾਵਿਮੁਤ੍ਤਿਂ ਫੁਸਤੀਤਿ ਸਮ੍ਮਾ ਹੇਤੁਨਾ ਨਯੇਨ ਕਾਰਣੇਨ ਅਰਹਤ੍ਤਫਲਵਿਮੋਕ੍ਖਂ ਞਾਣਫਸ੍ਸੇਨ ਫੁਸਤਿ.
ਏਤਦਤ੍ਥਾ, ਭਿਕ੍ਖਵੇ, ਕਥਾਤਿ, ਭਿਕ੍ਖਵੇ, ਯਾ ਏਸਾ ਕਥਾਸਮ੍ਪਯੋਗੇਨਾਤਿ ਕਥਾ ਦਸ੍ਸਿਤਾ, ਸਾ ਏਤਦਤ੍ਥਾ, ਅਯਂ ਤਸ੍ਸਾ ਕਥਾਯ ਭੂਮਿ ਪਤਿਟ੍ਠਾ. ਇਦਂ ਵਤ੍ਥੁ ਯਦਿਦਂ ਅਨੁਪਾਦਾ ਚਿਤ੍ਤਸ੍ਸ ਵਿਮੋਕ੍ਖੋਤਿ ਏਵਂ ਸਬ੍ਬਪਦੇਸੁ ਯੋਜਨਾ ਵੇਦਿਤਬ੍ਬਾ. ਏਤਦਤ੍ਥਾ ਮਨ੍ਤਨਾਤਿ ਯਾ ਅਯਂ ਕਚ੍ਛਾਕਚ੍ਛੇਸੁ ਪੁਗ੍ਗਲੇਸੁ ਕਚ੍ਛੇਨ ਸਦ੍ਧਿਂ ਮਨ੍ਤਨਾ, ਸਾਪਿ ਏਤਦਤ੍ਥਾਯੇਵ. ਏਤਦਤ੍ਥਾ ਉਪਨਿਸਾਤਿ ਓਹਿਤਸੋਤੋ ਸਉਪਨਿਸੋਤਿ ਏਵਂ ਵੁਤ੍ਤਾ ਉਪਨਿਸਾਪਿ ਏਤਦਤ੍ਥਾਯੇਵ. ਏਤਦਤ੍ਥਂ ਸੋਤਾਵਧਾਨਨ੍ਤਿ ਤਸ੍ਸਾ ਉਪਨਿਸਾਯ ਸੋਤਾਵਧਾਨਂ, ਤਮ੍ਪਿ ਏਤਦਤ੍ਥਮੇਵ. ਅਨੁਪਾਦਾਤਿ ਚਤੂਹਿ ਉਪਾਦਾਨੇਹਿ ਅਗ੍ਗਹੇਤ੍ਵਾ. ਚਿਤ੍ਤਸ੍ਸ ਵਿਮੋਕ੍ਖੋਤਿ ਅਰਹਤ੍ਤਫਲਵਿਮੋਕ੍ਖੋ. ਅਰਹਤ੍ਤਫਲਤ੍ਥਾਯ ਹਿ ਸਬ੍ਬਮੇਤਨ੍ਤਿ ਸੁਤ੍ਤਨ੍ਤਂ ਵਿਨਿਵਤ੍ਤੇਤ੍ਵਾ ਉਪਰਿ ਗਾਥਾਹਿ ਕੂਟਂ ਗਣ੍ਹਨ੍ਤੋ ਯੇ ਵਿਰੁਦ੍ਧਾਤਿਆਦਿਮਾਹ.
ਤਤ੍ਥ ਵਿਰੁਦ੍ਧਾਤਿ ਵਿਰੋਧਸਙ੍ਖਾਤੇਨ ਕੋਪੇਨ ਵਿਰੁਦ੍ਧਾ. ਸਲ੍ਲਪਨ੍ਤੀਤਿ ਸਲ੍ਲਾਪਂ ਕਰੋਨ੍ਤਿ. ਵਿਨਿਵਿਟ੍ਠਾਤਿ ਅਭਿਨਿਵਿਟ੍ਠਾ ਹੁਤ੍ਵਾ. ਸਮੁਸ੍ਸਿਤਾਤਿ ਮਾਨੁਸ੍ਸਯੇਨ ਸੁਟ੍ਠੁ ਉਸ੍ਸਿਤਾ. ਅਨਰਿਯਗੁਣਮਾਸਜ੍ਜਾਤਿ ਅਨਰਿਯਗੁਣਕਥਂ ਗੁਣਮਾਸਜ੍ਜ ਕਥੇਨ੍ਤਿ. ਗੁਣਂ ਘਟ੍ਟੇਤ੍ਵਾ ਕਥਾ ਹਿ ਅਨਰਿਯਕਥਾ ਨਾਮ, ਨ ਅਰਿਯਕਥਾ, ਤਂ ਕਥੇਨ੍ਤੀਤਿ ਅਤ੍ਥੋ. ਅਞ੍ਞੋਞ੍ਞਵਿਵਰੇਸਿਨੋਤਿ ਅਞ੍ਞਮਞ੍ਞਸ੍ਸ ਛਿਦ੍ਦਂ ਅਪਰਾਧਂ ਗਵੇਸਮਾਨਾ. ਦੁਬ੍ਭਾਸਿਤਨ੍ਤਿ ਦੁਕ੍ਕਥਿਤਂ. ਵਿਕ੍ਖਲਿਤਨ੍ਤਿ ਅਪ੍ਪਮਤ੍ਤਕਂ ਮੁਖਦੋਸਖਲਿਤਂ. ਸਮ੍ਪਮੋਹਂ ਪਰਾਜਯਨ੍ਤਿ ਅਞ੍ਞਮਞ੍ਞਸ੍ਸ ਅਪ੍ਪਮਤ੍ਤੇਨ ਮੁਖਦੋਸੇਨ ਸਮ੍ਪਮੋਹਞ੍ਚ ਪਰਾਜਯਞ੍ਚ. ਅਭਿਨਨ੍ਦਨ੍ਤੀਤਿ ਤੁਸ੍ਸਨ੍ਤਿ. ਨਾਚਰੇਤਿ ਨ ਚਰਤਿ ਨ ਕਥੇਤਿ. ਧਮ੍ਮਟ੍ਠਪਟਿਸਂਯੁਤ੍ਤਾਤਿ ਯਾ ਚ ਧਮ੍ਮੇ ਠਿਤੇਨ ਕਥਿਤਕਥਾ, ਸਾ ਧਮ੍ਮਟ੍ਠਾ ਚੇਵ ਹੋਤਿ ਤੇਨ ਚ ਧਮ੍ਮੇਨ ਪਟਿਸਂਯੁਤ੍ਤਾਤਿ ਧਮ੍ਮਟ੍ਠਪਟਿਸਂਯੁਤ੍ਤਾ. ਅਨੁਨ੍ਨਤੇਨ ਮਨਸਾਤਿ ਅਨੁਦ੍ਧਤੇਨ ਚੇਤਸਾ. ਅਪਲ਼ਾਸੋਤਿ ਯੁਗਗ੍ਗਾਹਪਲ਼ਾਸਵਸੇਨ ਅਪਲ਼ਾਸੋ ਹੁਤ੍ਵਾ. ਅਸਾਹਸੋਤਿ ਰਾਗਦੋਸਮੋਹਸਾਹਸਾਨਂ ਵਸੇਨ ਅਸਾਹਸੋ ਹੁਤ੍ਵਾ.
ਅਨੁਸੂਯਾਯਮਾਨੋਤਿ ਨ ਉਸੂਯਮਾਨੋ. ਦੁਬ੍ਭਟ੍ਠੇ ਨਾਪਸਾਦਯੇਤਿ ਦੁਕ੍ਕਥਿਤਸ੍ਮਿਂ ਨ ਅਪਸਾਦੇਯ੍ਯ. ਉਪਾਰਮ੍ਭਂ ਨ ਸਿਕ੍ਖੇਯ੍ਯਾਤਿ ਕਾਰਣੁਤ੍ਤਰਿਯਲਕ੍ਖਣਂ ਉਪਾਰਮ੍ਭਂ ਨ ਸਿਕ੍ਖੇਯ੍ਯ. ਖਲਿਤਞ੍ਚ ਨ ਗਾਹਯੇਤਿ ਅਪ੍ਪਮਤ੍ਤਕਂ ਮੁਖਖਲਿਤਂ ‘‘ਅਯਂ ਤੇ ਦੋਸੋ’’ਤਿ ਨ ਗਾਹਯੇਯ੍ਯ. ਨਾਭਿਹਰੇਤਿ ਨਾਵਤ੍ਥਰੇਯ੍ਯ. ਨਾਭਿਮਦ੍ਦੇਤਿ ਏਕਂ ਕਾਰਣਂ ਆਹਰਿਤ੍ਵਾ ਨ ਮਦ੍ਦੇਯ੍ਯ. ਨ ਵਾਚਂ ਪਯੁਤਂ ਭਣੇਤਿ ਸਚ੍ਚਾਲਿਕਪਟਿਸਂਯੁਤ੍ਤਂ ਵਾਚਂ ਨ ਭਣੇਯ੍ਯ. ਅਞ੍ਞਾਤਤ੍ਥਨ੍ਤਿ ਜਾਨਨਤ੍ਥਂ. ਪਸਾਦਤ੍ਥਨ੍ਤਿ ਪਸਾਦਜਨਨਤ੍ਥਂ. ਨ ਸਮੁਸ੍ਸੇਯ੍ਯ ਮਨ੍ਤਯੇਤਿ ਨ ਮਾਨੁਸ੍ਸਯੇਨ ਸਮੁਸ੍ਸਿਤੋ ਭਵੇਯ੍ਯ. ਨ ਹਿ ਮਾਨੁਸ੍ਸਿਤਾ ਹੁਤ੍ਵਾ ਪਣ੍ਡਿਤਾ ਕਥਯਨ੍ਤਿ, ਮਾਨੇਨ ਪਨ ਅਨੁਸ੍ਸਿਤੋਵ ਹੁਤ੍ਵਾ ਮਨ੍ਤਯੇ ਕਥੇਯ੍ਯ ਭਾਸੇਯ੍ਯਾਤਿ.
੮. ਅਞ੍ਞਤਿਤ੍ਥਿਯਸੁਤ੍ਤਵਣ੍ਣਨਾ
੬੯. ਅਟ੍ਠਮੇ ਭਗਵਂਮੂਲਕਾਤਿ ਭਗਵਾ ਮੂਲਂ ਏਤੇਸਨ੍ਤਿ ਭਗਵਂਮੂਲਕਾ. ਇਦਂ ਵੁਤ੍ਤਂ ਹੋਤਿ – ਇਮੇ, ਭਨ੍ਤੇ, ਅਮ੍ਹਾਕਂ ਧਮ੍ਮਾ ਪੁਬ੍ਬੇ ਕਸ੍ਸਪਸਮ੍ਮਾਸਮ੍ਬੁਦ੍ਧੇਨ ਉਪ੍ਪਾਦਿਤਾ, ਤਸ੍ਮਿਂ ਪਰਿਨਿਬ੍ਬੁਤੇ ਏਕਂ ਬੁਦ੍ਧਨ੍ਤਰਂ ਅਞ੍ਞੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਇਮੇ ਧਮ੍ਮੇ ਉਪ੍ਪਾਦੇਤੁਂ ਸਮਤ੍ਥੋ ਨਾਮ ਨਾਹੋਸਿ, ਭਗਵਤੋ ਪਨ ਨੋ ਇਮੇ ਧਮ੍ਮਾ ਉਪ੍ਪਾਦਿਤਾ. ਭਗਵਨ੍ਤਞ੍ਹਿ ਨਿਸ੍ਸਾਯ ਮਯਂ ਇਮੇ ਧਮ੍ਮੇ ਆਜਾਨਾਮ ਪਟਿਵਿਜ੍ਝਾਮਾਤਿ ਏਵਂ ਭਗਵਂਮੂਲਕਾ ਨੋ, ਭਨ੍ਤੇ, ਧਮ੍ਮਾਤਿ. ਭਗਵਂਨੇਤ੍ਤਿਕਾਤਿ ਭਗਵਾ ਧਮ੍ਮਾਨਂ ਨੇਤਾ ਵਿਨੇਤਾ ਅਨੁਨੇਤਾ ਯਥਾਸਭਾਵਤੋ ਪਾਟਿਯੇਕ੍ਕਂ ਪਾਟਿਯੇਕ੍ਕਂ ਨਾਮਂ ਗਹੇਤ੍ਵਾਵ ਦਸ੍ਸੇਤਾਤਿ ਧਮ੍ਮਾ ਭਗਵਂਨੇਤ੍ਤਿਕਾ ਨਾਮ ਹੋਨ੍ਤਿ. ਭਗਵਂਪਟਿਸਰਣਾਤਿ ਚਤੁਭੂਮਕਧਮ੍ਮਾ ਸਬ੍ਬਞ੍ਞੁਤਞ੍ਞਾਣਸ੍ਸ ਆਪਾਥਂ ਆਗਚ੍ਛਮਾਨਾ ਭਗਵਤਿ ਪਟਿਸਰਨ੍ਤਿ ਨਾਮਾਤਿ ਭਗਵਂਪਟਿਸਰਣਾ. ਪਟਿਸਰਨ੍ਤੀਤਿ ਓਸਰਨ੍ਤਿ ਸਮੋਸਰਨ੍ਤਿ. ਅਪਿਚ ਮਹਾਬੋਧਿਮਣ੍ਡੇ ਨਿਸਿਨ੍ਨਸ੍ਸ ਭਗਵਤੋ ਪਟਿਵੇਧਵਸੇਨ ਫਸ੍ਸੋ ਆਗਚ੍ਛਤਿ – ‘‘ਅਹਂ ਭਗਵਾ ਕਿਨ੍ਨਾਮੋ’’ਤਿ. ਤ੍ਵਂ ਫੁਸਨਟ੍ਠੇਨ ਫਸ੍ਸੋ ਨਾਮ. ਵੇਦਨਾ, ਸਞ੍ਞਾ, ਸਙ੍ਖਾਰਾ, ਵਿਞ੍ਞਾਣਂ ਆਗਚ੍ਛਤਿ – ‘‘ਅਹਂ ਭਗਵਾ ਕਿਨ੍ਨਾਮ’’ਨ੍ਤਿ. ਤ੍ਵਂ ਵਿਜਾਨਨਟ੍ਠੇਨ ਵਿਞ੍ਞਾਣਂ ਨਾਮਾਤਿ. ਏਵਂ ਚਤੁਭੂਮਕਧਮ੍ਮਾਨਂ ਯਥਾਸਭਾਵਤੋ ਪਾਟਿਯੇਕ੍ਕਂ ਪਾਟਿਯੇਕ੍ਕਂ ਨਾਮਂ ਗਣ੍ਹਨ੍ਤੋ ਭਗਵਾ ਧਮ੍ਮੇ ਪਟਿਸਰਤੀਤਿ ਭਗਵਂਪਟਿਸਰਣਾ. ਭਗਵਨ੍ਤਂਯੇਵ ਪਟਿਭਾਤੂਤਿ ਭਗਵਤੋਵ ਏਤਸ੍ਸ ਭਾਸਿਤਸ੍ਸ ਅਤ੍ਥੋ ਉਪਟ੍ਠਾਤੁ, ਤੁਮ੍ਹੇਯੇਵ ਨੋ ਕਥੇਤ੍ਵਾ ਦੇਥਾਤਿ ਅਤ੍ਥੋ.
ਰਾਗੋ ਖੋਤਿ ਰਜ੍ਜਨਵਸੇਨ ਪਵਤ੍ਤਰਾਗੋ. ਅਪ੍ਪਸਾਵਜ੍ਜੋਤਿ ਲੋਕਵਜ੍ਜਵਸੇਨਪਿ ਵਿਪਾਕਵਜ੍ਜਵਸੇਨਪੀਤਿ ਦ੍ਵੀਹਿਪਿ ਵਜ੍ਜੇਹਿ ਅਪ੍ਪਸਾਵਜ੍ਜੋ, ਅਪ੍ਪਦੋਸੋਤਿ ਅਤ੍ਥੋ. ਕਥਂ? ਮਾਤਾਪਿਤਰੋ ਹਿ ਭਾਤਿਭਗਿਨਿਆਦਯੋ ਚ ਪੁਤ੍ਤਭਾਤਿਕਾਨਂ ਆਵਾਹਵਿਵਾਹਮਙ੍ਗਲਂ ਨਾਮ ਕਾਰੇਨ੍ਤਿ. ਏਵਂ ਤਾਵੇਸੋ ਲੋਕਵਜ੍ਜਵਸੇਨ ਅਪ੍ਪਸਾਵਜ੍ਜੋ. ਸਦਾਰਸਨ੍ਤੋਸਮੂਲਿਕਾ ਪਨ ਅਪਾਯੇ ਪਟਿਸਨ੍ਧਿ ਨਾਮ ਨ ਹੋਤੀਤਿ ਏਵਂ ਵਿਪਾਕਵਜ੍ਜਵਸੇਨ ਅਪ੍ਪਸਾਵਜ੍ਜੋ. ਦਨ੍ਧਵਿਰਾਗੀਤਿ ਵਿਰਜ੍ਜਮਾਨੋ ਪਨੇਸ ਸਣਿਕਂ ਵਿਰਜ੍ਜਤਿ, ਨ ਸੀਘਂ ਮੁਚ੍ਚਤਿ. ਤੇਲਮਸਿਰਾਗੋ ਵਿਯ ਚਿਰਂ ਅਨੁਬਨ੍ਧਤਿ, ਦ੍ਵੇ ਤੀਣਿ ਭਵਨ੍ਤਰਾਨਿ ਗਨ੍ਤ੍ਵਾਪਿ ਨਾਪਗਚ੍ਛਤੀਤਿ ਦਨ੍ਧਵਿਰਾਗੀ.
ਤਤ੍ਰਿਦਂ ਵਤ੍ਥੁ – ਏਕੋ ਕਿਰ ਪੁਰਿਸੋ ਭਾਤੁ ਜਾਯਾਯ ਮਿਚ੍ਛਾਚਾਰਂ ਚਰਤਿ. ਤਸ੍ਸਾਪਿ ਇਤ੍ਥਿਯਾ ਅਤ੍ਤਨੋ ਸਾਮਿਕਤੋ ਸੋਯੇਵ ਪਿਯਤਰੋ ਅਹੋਸਿ. ਸਾ ਤਮਾਹ – ‘‘ਇਮਸ੍ਮਿਂ ਕਾਰਣੇ ਪਾਕਟੇ ਜਾਤੇ ਮਹਤੀ ਗਰਹਾ ਭਵਿਸ੍ਸਤਿ, ਤਵ ਭਾਤਿਕਂ ਘਾਤੇਹੀ’’ਤਿ. ਸੋ ‘‘ਨਸ੍ਸ, ਵਸਲਿ, ਮਾ ਏਵਂ ਪੁਨ ਅਵਚਾ’’ਤਿ ਅਪਸਾਦੇਸਿ. ਸਾ ਤੁਣ੍ਹੀ ਹੁਤ੍ਵਾ ਕਤਿਪਾਹਚ੍ਚਯੇਨ ਪੁਨ ਕਥੇਸਿ, ਤਸ੍ਸ ਚਿਤ੍ਤਂ ਦ੍ਵਜ੍ਝਭਾਵਂ ਅਗਮਾਸਿ. ਤਤੋ ਤਤਿਯਵਾਰਂ ਕਥਿਤੋ ‘‘ਕਿਨ੍ਤਿ ਕਤ੍ਵਾ ਓਕਾਸਂ ਲਭਿਸ੍ਸਾਮੀ’’ਤਿ ਆਹ. ਅਥਸ੍ਸ ਸਾ ਉਪਾਯਂ ਕਥੇਨ੍ਤੀ ‘‘ਤ੍ਵਂ ਮਯਾ ਵੁਤ੍ਤਮੇਵ ਕਰੋਹਿ, ਅਸੁਕਟ੍ਠਾਨੇ ਮਹਾਕਕੁਧਸਮੀਪੇ ਤਿਤ੍ਥਂ ਅਤ੍ਥਿ, ਤਤ੍ਥ ਤਿਖਿਣਂ ਦਣ੍ਡਕਵਾਸਿਂ ਗਹੇਤ੍ਵਾ ਤਿਟ੍ਠਾਹੀ’’ਤਿ. ਸੋ ਤਥਾ ਅਕਾਸਿ. ਜੇਟ੍ਠਭਾਤਾਪਿਸ੍ਸ ਅਰਞ੍ਞੇ ਕਮ੍ਮਂ ਕਤ੍ਵਾ ਘਰਂ ਆਗਤੋ. ਸਾ ਤਸ੍ਮਿਂ ਮੁਦੁਚਿਤ੍ਤਾ ਵਿਯ ਹੁਤ੍ਵਾ ‘‘ਏਹਿ ਸਾਮਿ, ਸੀਸੇ ਤੇ ਓਲਿਖਿਸ੍ਸਾਮੀ’’ਤਿ ਓਲਿਖਨ੍ਤੀ ‘‘ਉਪਕ੍ਕਿਲਿਟ੍ਠਂ ਤੇ ਸੀਸ’’ਨ੍ਤਿ ਆਮਲਕਪਿਣ੍ਡਂ ਦਤ੍ਵਾ ‘‘ਗਚ੍ਛ ਅਸੁਕਟ੍ਠਾਨੇ ਸੀਸਂ ਧੋਵਿਤ੍ਵਾ ਆਗਚ੍ਛਾਹੀ’’ਤਿ ਪੇਸੇਸਿ. ਸੋ ਤਾਯ ਵੁਤ੍ਤਤਿਤ੍ਥਮੇਵ ਗਨ੍ਤ੍ਵਾ ਆਮਲਕਕਕ੍ਕੇਨ ਸੀਸਂ ਮਕ੍ਖੇਤ੍ਵਾ ਉਦਕਂ ਓਰੁਯ੍ਹ ਓਨਮਿਤ੍ਵਾ ਸੀਸਂ ਧੋਵਿ. ਅਥ ਨਂ ਇਤਰੋ ਰੁਕ੍ਖਨ੍ਤਰਤੋ ਨਿਕ੍ਖਮਿਤ੍ਵਾ ਖਨ੍ਧਟ੍ਠਿਕੇ ਪਹਰਿਤ੍ਵਾ ਜੀਵਿਤਾ ਵੋਰੋਪੇਤ੍ਵਾ ਗੇਹਂ ਅਗਮਾਸਿ.
ਇਤਰੋ ਭਰਿਯਾਯ ਸਿਨੇਹਂ ਪਰਿਚ੍ਚਜਿਤੁਮਸਕ੍ਕੋਨ੍ਤੋ ਤਸ੍ਮਿਂਯੇਵ ਗੇਹੇ ਮਹਾਧਮ੍ਮਨਿ ਹੁਤ੍ਵਾ ਨਿਬ੍ਬਤ੍ਤਿ. ਸੋ ਤਸ੍ਸਾ ਠਿਤਾਯਪਿ ਨਿਸਿਨ੍ਨਾਯਪਿ ਗਨ੍ਤ੍ਵਾ ਸਰੀਰੇ ਪਤਤਿ. ਅਥ ਨਂ ਸਾ ‘‘ਸੋਯੇਵ ਅਯਂ ਭਵਿਸ੍ਸਤੀ’’ਤਿ ਘਾਤਾਪੇਸਿ. ਸੋ ਪੁਨ ਤਸ੍ਸਾ ਸਿਨੇਹੇਨ ਤਸ੍ਮਿਂਯੇਵ ਗੇਹੇ ਕੁਕ੍ਕੁਰੋ ਹੁਤ੍ਵਾ ਨਿਬ੍ਬਤ੍ਤਿ. ਸੋ ਪਦਸਾ ਗਮਨਕਾਲਤੋ ਪਟ੍ਠਾਯ ਤਸ੍ਸਾ ਪਚ੍ਛਤੋ ਪਚ੍ਛਤੋ ਚਰਤਿ. ਅਰਞ੍ਞਂ ਗਚ੍ਛਨ੍ਤਿਯਾਪਿ ਸਦ੍ਧਿਂਯੇਵ ਗਚ੍ਛਤਿ. ਤਂ ਦਿਸ੍ਵਾ ਮਨੁਸ੍ਸਾ ‘‘ਨਿਕ੍ਖਨ੍ਤੋ ਸੁਨਖਲੁਦ੍ਦਕੋ, ਕਤਰਟ੍ਠਾਨਂ ਗਮਿਸ੍ਸਤੀ’’ਤਿ ਉਪ੍ਪਣ੍ਡੇਨ੍ਤਿ. ਸਾ ਪੁਨ ਤਂ ਘਾਤਾਪੇਸਿ.
ਸੋਪਿ ਪੁਨ ਤਸ੍ਮਿਂਯੇਵ ਗੇਹੇ ਵਚ੍ਛਕੋ ਹੁਤ੍ਵਾ ਨਿਬ੍ਬਤ੍ਤਿ. ਤਥੇਵ ਤਸ੍ਸਾ ਪਚ੍ਛਤੋ ਪਚ੍ਛਤੋ ਚਰਤਿ. ਤਦਾਪਿ ਨਂ ਮਨੁਸ੍ਸਾ ਦਿਸ੍ਵਾ ‘‘ਨਿਕ੍ਖਨ੍ਤੋ ਗੋਪਾਲਕੋ, ਕਤ੍ਥ ਗਾਵਿਯੋ ਚਰਿਸ੍ਸਨ੍ਤੀ’’ਤਿ ਉਪ੍ਪਣ੍ਡੇਨ੍ਤਿ. ਸਾ ਤਸ੍ਮਿਮ੍ਪਿ ਠਾਨੇ ਤਂ ਘਾਤਾਪੇਸਿ. ਸੋ ਤਦਾਪਿ ਤਸ੍ਸਾ ਉਪਰਿ ਸਿਨੇਹਂ ਛਿਨ੍ਦਿਤੁਂ ਅਸਕ੍ਕੋਨ੍ਤੋ ਚਤੁਤ੍ਥੇ ਵਾਰੇ ਤਸ੍ਸਾਯੇਵ ਕੁਚ੍ਛਿਯਂ ਜਾਤਿਸ੍ਸਰੋ ਹੁਤ੍ਵਾ ਨਿਬ੍ਬਤ੍ਤਿ. ਸੋ ਪਟਿਪਾਟਿਯਾ ਚਤੂਸੁ ਅਤ੍ਤਭਾਵੇਸੁ ਤਾਯ ਘਾਤਿਤਭਾਵਂ ਦਿਸ੍ਵਾ ‘‘ਏਵਰੂਪਾਯ ਨਾਮ ਪਚ੍ਚਤ੍ਥਿਕਾਯ ਕੁਚ੍ਛਿਸ੍ਮਿਂ ਨਿਬ੍ਬਤ੍ਤੋਸ੍ਮੀ’’ਤਿ ਤਤੋ ਪਟ੍ਠਾਯ ਤਸ੍ਸਾ ਹਤ੍ਥੇਨ ਅਤ੍ਤਾਨਂ ਫੁਸਿਤੁਂ ਨ ਦੇਤਿ. ਸਚੇ ਨਂ ਸਾ ਫੁਸਤਿ, ਕਨ੍ਦਤਿ ਰੋਦਤਿ. ਅਥ ਨਂ ਅਯ੍ਯਕੋਵ ਪਟਿਜਗ੍ਗਤਿ. ਤਂ ਅਪਰਭਾਗੇ ਵੁਦ੍ਧਿਪ੍ਪਤ੍ਤਂ ਅਯ੍ਯਕੋ ਆਹ – ‘‘ਤਾਤ, ਕਸ੍ਮਾ ਤ੍ਵਂ ਮਾਤੁ ਹਤ੍ਥੇਨ ਅਤ੍ਤਾਨਂ ਫੁਸਿਤੁਂ ਨ ਦੇਸਿ. ਸਚੇਪਿ ਤਂ ਫੁਸਤਿ, ਮਹਾਸਦ੍ਦੇਨ ਰੋਦਸਿ ਕਨ੍ਦਸੀ’’ਤਿ. ਅਯ੍ਯਕੇਨ ਪੁਟ੍ਠੋ ‘‘ਨ ਏਸਾ ਮਯ੍ਹਂ ਮਾਤਾ, ਪਚ੍ਚਾਮਿਤ੍ਤਾ ਏਸਾ’’ਤਿ ਤਂ ਪਵਤ੍ਤਿਂ ਸਬ੍ਬਂ ਆਰੋਚੇਸਿ. ਸੋ ਤਂ ਆਲਿਙ੍ਗਿਤ੍ਵਾ ਰੋਦਿਤ੍ਵਾ ‘‘ਏਹਿ, ਤਾਤ, ਕਿਂ ਅਮ੍ਹਾਕਂ ਈਦਿਸੇ ਠਾਨੇ ਨਿਵਾਸਕਿਚ੍ਚ’’ਨ੍ਤਿ ਤਂ ਆਦਾਯ ਨਿਕ੍ਖਮਿਤ੍ਵਾ ਏਕਂ ਵਿਹਾਰਂ ਗਨ੍ਤ੍ਵਾ ਪਬ੍ਬਜਿਤ੍ਵਾ ਉਭੋਪਿ ਤਤ੍ਥ ਵਸਨ੍ਤਾ ਅਰਹਤ੍ਤਂ ਪਾਪੁਣਿਂਸੁ.
ਮਹਾਸਾਵਜ੍ਜੋਤਿ ਲੋਕਵਜ੍ਜਵਸੇਨਪਿ ਵਿਪਾਕਵਜ੍ਜਵਸੇਨਪੀਤਿ ਦ੍ਵੀਹਿਪਿ ਕਾਰਣੇਹਿ ਮਹਾਸਾਵਜ੍ਜੋ. ਕਥਂ? ਦੋਸੇਨ ਹਿ ਦੁਟ੍ਠੋ ਹੁਤ੍ਵਾ ਮਾਤਰਿਪਿ ਅਪਰਜ੍ਝਤਿ, ਪਿਤਰਿਪਿ ਭਾਤਿਭਗਿਨਿਆਦੀਸੁਪਿ ਪਬ੍ਬਜਿਤੇਸੁਪਿ. ਸੋ ਗਤਗਤਟ੍ਠਾਨੇਸੁ ‘‘ਅਯਂ ਪੁਗ੍ਗਲੋ ਮਾਤਾਪਿਤੂਸੁਪਿ ਅਪਰਜ੍ਝਤਿ, ਭਾਤਿਭਗਿਨਿਆਦੀਸੁਪਿ, ਪਬ੍ਬਜਿਤੇਸੁਪੀ’’ਤਿ ਮਹਤਿਂ ਗਰਹਂ ਲਭਤਿ. ਏਵਂ ਤਾਵ ਲੋਕਵਜ੍ਜਵਸੇਨ ਮਹਾਸਾਵਜ੍ਜੋ. ਦੋਸਵਸੇਨ ਪਨ ਕਤੇਨ ਆਨਨ੍ਤਰਿਯਕਮ੍ਮੇਨ ਕਪ੍ਪਂ ਨਿਰਯੇ ਪਚ੍ਚਤਿ. ਏਵਂ ਵਿਪਾਕਵਜ੍ਜਵਸੇਨ ਮਹਾਸਾਵਜ੍ਜੋ. ਖਿਪ੍ਪਵਿਰਾਗੀਤਿ ਖਿਪ੍ਪਂ ਵਿਰਜ੍ਜਤਿ. ਦੋਸੇਨ ਹਿ ਦੁਟ੍ਠੋ ਮਾਤਾਪਿਤੂਸੁਪਿ ਚੇਤਿਯੇਪਿ ਬੋਧਿਮ੍ਹਿਪਿ ਪਬ੍ਬਜਿਤੇਸੁਪਿ ਅਪਰਜ੍ਝਿਤ੍ਵਾ ‘‘ਮਯ੍ਹਂ ਖਮਥਾ’’ਤਿ. ਅਚ੍ਚਯਂ ਦੇਸੇਤਿ. ਤਸ੍ਸ ਸਹ ਖਮਾਪਨੇਨ ਤਂ ਕਮ੍ਮਂ ਪਾਕਤਿਕਮੇਵ ਹੋਤਿ.
ਮੋਹੋਪਿ ਦ੍ਵੀਹੇਵ ਕਾਰਣੇਹਿ ਮਹਾਸਾਵਜ੍ਜੋ. ਮੋਹੇਨ ਹਿ ਮੂਲ਼੍ਹੋ ਹੁਤ੍ਵਾ ਮਾਤਾਪਿਤੂਸੁਪਿ ਚੇਤਿਯੇਪਿ ਬੋਧਿਮ੍ਹਿਪਿ ਪਬ੍ਬਜਿਤੇਸੁਪਿ ਅਪਰਜ੍ਝਿਤ੍ਵਾ ਗਤਗਤਟ੍ਠਾਨੇ ਗਰਹਂ ਲਭਤਿ. ਏਵਂ ਤਾਵ ਲੋਕਵਜ੍ਜਵਸੇਨ ਮਹਾਸਾਵਜ੍ਜੋ. ਮੋਹਵਸੇਨ ਪਨ ਕਤੇਨ ਆਨਨ੍ਤਰਿਯਕਮ੍ਮੇਨ ਕਪ੍ਪਂ ਨਿਰਯੇ ਪਚ੍ਚਤਿ. ਏਵਂ ਵਿਪਾਕਵਜ੍ਜਵਸੇਨਪਿ ਮਹਾਸਾਵਜ੍ਜੋ. ਦਨ੍ਧਵਿਰਾਗੀਤਿ ਸਣਿਕਂ ਵਿਰਜ੍ਜਤਿ. ਮੋਹੇਨ ਮੂਲ਼੍ਹੇਨ ਹਿ ਕਤਕਮ੍ਮਂ ਸਣਿਕਂ ਮੁਚ੍ਚਤਿ. ਯਥਾ ਹਿ ਅਚ੍ਛਚਮ੍ਮਂ ਸਤਕ੍ਖਤ੍ਤੁਮ੍ਪਿ ਧੋਵਿਯਮਾਨਂ ਨ ਪਣ੍ਡਰਂ ਹੋਤਿ, ਏਵਮੇਵ ਮੋਹੇਨ ਮੂਲ਼੍ਹੇਨ ਕਤਕਮ੍ਮਂ ਸੀਘਂ ਨ ਮੁਚ੍ਚਤਿ, ਸਣਿਕਮੇਵ ਮੁਚ੍ਚਤੀਤਿ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ.
੯. ਅਕੁਸਲਮੂਲਸੁਤ੍ਤਵਣ੍ਣਨਾ
੭੦. ਨਵਮੇ ਅਕੁਸਲਮੂਲਾਨੀਤਿ ਅਕੁਸਲਾਨਂ ਮੂਲਾਨਿ, ਅਕੁਸਲਾਨਿ ਚ ਤਾਨਿ ਮੂਲਾਨਿ ਚਾਤਿ ਵਾ ਅਕੁਸਲਮੂਲਾਨਿ. ਯਦਪਿ, ਭਿਕ੍ਖਵੇ, ਲੋਭੋਤਿ ਯੋਪਿ, ਭਿਕ੍ਖਵੇ, ਲੋਭੋ. ਤਦਪਿ ਅਕੁਸਲਮੂਲਨ੍ਤਿ ਸੋਪਿ ਅਕੁਸਲਮੂਲਂ. ਅਕੁਸਲਮੂਲਂ ਵਾ ਸਨ੍ਧਾਯ ਇਧ ਤਮ੍ਪੀਤਿ ਅਤ੍ਥੋ ਵਟ੍ਟਤਿਯੇਵ. ਏਤੇਨੁਪਾਯੇਨ ਸਬ੍ਬਤ੍ਥ ਨਯੋ ਨੇਤਬ੍ਬੋ. ਅਭਿਸਙ੍ਖਰੋਤੀਤਿ ਆਯੂਹਤਿ ਸਮ੍ਪਿਣ੍ਡੇਤਿ ਰਾਸਿਂ ਕਰੋਤਿ. ਅਸਤਾ ਦੁਕ੍ਖਂ ਉਪ੍ਪਾਦਯਤੀਤਿ ਅਭੂਤੇਨ ਅਵਿਜ੍ਜਮਾਨੇਨ ਯਂਕਿਞ੍ਚਿ ਤਸ੍ਸ ਅਭੂਤਂ ਦੋਸਂ ਵਤ੍ਵਾ ਦੁਕ੍ਖਂ ਉਪ੍ਪਾਦੇਤਿ. ਵਧੇਨ ਵਾਤਿਆਦਿ ਯੇਨਾਕਾਰੇਨ ਦੁਕ੍ਖਂ ਉਪ੍ਪਾਦੇਤਿ, ਤਂ ਦਸ੍ਸੇਤੁਂ ਵੁਤ੍ਤਂ. ਤਤ੍ਥ ਜਾਨਿਯਾਤਿ ਧਨਜਾਨਿਯਾ. ਪਬ੍ਬਾਜਨਾਯਾਤਿ ਗਾਮਤੋ ਵਾ ਰਟ੍ਠਤੋ ਵਾ ਪਬ੍ਬਾਜਨੀਯਕਮ੍ਮੇਨ. ਬਲਵਮ੍ਹੀਤਿ ਅਹਮਸ੍ਮਿ ਬਲਵਾ. ਬਲਤ੍ਥੋ ਇਤਿਪੀਤਿ ਬਲੇਨ ਮੇ ਅਤ੍ਥੋ ਇਤਿਪਿ, ਬਲੇ ਵਾ ਠਿਤੋਮ੍ਹੀਤਿਪਿ ਵਦਤਿ.
ਅਕਾਲਵਾਦੀਤਿ ਕਾਲਸ੍ਮਿਂ ਨ ਵਦਤਿ, ਅਕਾਲਸ੍ਮਿਂ ਵਦਤਿ ਨਾਮ. ਅਭੂਤਵਾਦੀਤਿ ਭੂਤਂ ਨ ਵਦਤਿ, ਅਭੂਤਂ ਵਦਤਿ ਨਾਮ. ਅਨਤ੍ਥਵਾਦੀਤਿ ਅਤ੍ਥਂ ਨ ਵਦਤਿ, ਅਨਤ੍ਥਂ ਵਦਤਿ ਨਾਮ. ਅਧਮ੍ਮਵਾਦੀਤਿ ਧਮ੍ਮਂ ਨ ਵਦਤਿ, ਅਧਮ੍ਮਂ ਵਦਤਿ ਨਾਮ. ਅਵਿਨਯਵਾਦੀਤਿ ਵਿਨਯਂ ਨ ਵਦਤਿ, ਅਵਿਨਯਂ ਵਦਤਿ ਨਾਮ.
ਤਥਾ ਹਾਯਨ੍ਤਿ ਤਥਾ ਹਿ ਅਯਂ. ਨ ਆਤਪ੍ਪਂ ਕਰੋਤਿ ਤਸ੍ਸ ਨਿਬ੍ਬੇਠਨਾਯਾਤਿ ਤਸ੍ਸ ਅਭੂਤਸ੍ਸ ਨਿਬ੍ਬੇਠਨਤ੍ਥਾਯ ਵੀਰਿਯਂ ਨ ਕਰੋਤਿ. ਇਤਿਪੇਤਂ ਅਤਚ੍ਛਨ੍ਤਿ ਇਮਿਨਾਪਿ ਕਾਰਣੇਨ ਏਤਂ ਅਤਚ੍ਛਂ. ਇਤਰਂ ਤਸ੍ਸੇਵ ਵੇਵਚਨਂ.
ਦੁਗ੍ਗਤਿ ਪਾਟਿਕਙ੍ਖਾਤਿ ਨਿਰਯਾਦਿਕਾ ਦੁਗ੍ਗਤਿ ਇਚ੍ਛਿਤਬ੍ਬਾ, ਸਾ ਅਸ੍ਸ ਅਵਸ੍ਸਭਾਵਿਨੀ, ਤਤ੍ਥਾਨੇਨ ਨਿਬ੍ਬਤ੍ਤਿਤਬ੍ਬਨ੍ਤਿ ਅਤ੍ਥੋ. ਉਦ੍ਧਸ੍ਤੋਤਿ ਉਪਰਿ ਧਂਸਿਤੋ. ਪਰਿਯੋਨਦ੍ਧੋਤਿ ਸਮਨ੍ਤਾ ਓਨਦ੍ਧੋ. ਅਨਯਂ ਆਪਜ੍ਜਤੀਤਿ ਅਵੁਡ੍ਢਿਂ ਆਪਜ੍ਜਤਿ. ਬ੍ਯਸਨਂ ਆਪਜ੍ਜਤੀਤਿ ਵਿਨਾਸਂ ਆਪਜ੍ਜਤਿ. ਗਿਮ੍ਹਕਾਲਸ੍ਮਿਞ੍ਹਿ ਮਾਲੁਵਾਸਿਪਾਟਿਕਾਯ ਫਲਿਤਾਯ ਬੀਜਾਨਿ ਉਪ੍ਪਤਿਤ੍ਵਾ ਵਟਰੁਕ੍ਖਾਦੀਨਂ ਮੂਲੇ ਪਤਨ੍ਤਿ. ਤਤ੍ਥ ਯਸ੍ਸ ਰੁਕ੍ਖਸ੍ਸ ਮੂਲੇ ਤੀਸੁ ਦਿਸਾਸੁ ਤੀਣਿ ਬੀਜਾਨਿ ਪਤਿਤਾਨਿ ਹੋਨ੍ਤਿ, ਤਸ੍ਮਿਂ ਰੁਕ੍ਖੇ ਪਾਵੁਸ੍ਸਕੇਨ ਮੇਘੇਨ ਅਭਿਵਟ੍ਠੇ ਤੀਹਿ ਬੀਜੇਹਿ ਤਯੋ ਅਙ੍ਕੁਰਾ ਉਟ੍ਠਹਿਤ੍ਵਾ ਤਂ ਰੁਕ੍ਖਂ ਅਲ੍ਲੀਯਨ੍ਤਿ. ਤਤੋ ਪਟ੍ਠਾਯ ਰੁਕ੍ਖਦੇਵਤਾਯੋ ਸਕਭਾਵੇਨ ਸਣ੍ਠਾਤੁਂ ਨ ਸਕ੍ਕੋਨ੍ਤਿ. ਤੇਪਿ ਅਙ੍ਕੁਰਾ ਵਡ੍ਢਮਾਨਾ ਲਤਾਭਾਵਂ ਆਪਜ੍ਜਿਤ੍ਵਾ ਤਂ ਰੁਕ੍ਖਂ ਅਭਿਰੁਹਿਤ੍ਵਾ ਸਬ੍ਬਵਿਟਪਸਾਖਾਪਸਾਖਾ ਸਂਸਿਬ੍ਬਿਤ੍ਵਾ ਤਂ ਰੁਕ੍ਖਂ ਉਪਰਿ ਪਰਿਯੋਨਨ੍ਧਨ੍ਤਿ. ਸੋ ਮਾਲੁਵਾਲਤਾਹਿ ਸਂਸਿਬ੍ਬਿਤੋ ਘਨੇਹਿ ਮਹਨ੍ਤੇਹਿ ਮਾਲੁਵਾਪਤ੍ਤੇਹਿ ਸਞ੍ਛਨ੍ਨੋ ਦੇਵੇ ਵਾ ਵਸ੍ਸਨ੍ਤੇ ਵਾਤੇ ਵਾ ਵਾਯਨ੍ਤੇ ਤਤ੍ਥ ਤਤ੍ਥ ਪਲੁਜ੍ਜਿਤ੍ਵਾ ਖਾਣੁਮਤ੍ਤਮੇਵ ਅਵਸਿਸ੍ਸਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ.
ਏਵਮੇਵ ਖੋਤਿ ਏਤ੍ਥ ਪਨ ਇਦਂ ਓਪਮ੍ਮਸਂਸਨ੍ਦਨਂ – ਸਾਲਾਦੀਸੁ ਅਞ੍ਞਤਰਰੁਕ੍ਖੋ ਵਿਯ ਹਿ ਅਯਂ ਸਤ੍ਤੋ ਦਟ੍ਠਬ੍ਬੋ, ਤਿਸ੍ਸੋ ਮਾਲੁਵਾਲਤਾ ਵਿਯ ਤੀਣਿ ਅਕੁਸਲਮੂਲਾਨਿ, ਯਾਵ ਰੁਕ੍ਖਸਾਖਾ ਅਸਮ੍ਪਤ੍ਤਾ, ਤਾਵ ਤਾਸਂ ਲਤਾਨਂ ਉਜੁਕਂ ਰੁਕ੍ਖਾਰੋਹਨਂ ਵਿਯ ਲੋਭਾਦੀਨਂ ਦ੍ਵਾਰਂ ਅਸਮ੍ਪਤ੍ਤਕਾਲੋ, ਸਾਖਾਨੁਸਾਰੇਨ ਗਮਨਕਾਲੋ ਵਿਯ ਦ੍ਵਾਰਵਸੇਨ ਗਮਨਕਾਲੋ, ਪਰਿਯੋਨਦ੍ਧਕਾਲੋ ਵਿਯ ਲੋਭਾਦੀਹਿ ਪਰਿਯੁਟ੍ਠਿਤਕਾਲੋ, ਖੁਦ੍ਦਕਸਾਖਾਨਂ ਪਲੁਜ੍ਜਨਕਾਲੋ ਵਿਯ ਦ੍ਵਾਰਪ੍ਪਤ੍ਤਾਨਂ ਕਿਲੇਸਾਨਂ ਵਸੇਨ ਖੁਦ੍ਦਾਨੁਖੁਦ੍ਦਕਾ ਆਪਤ੍ਤਿਯੋ ਆਪਨ੍ਨਕਾਲੋ, ਮਹਾਸਾਖਾਨਂ ਪਲੁਜ੍ਜਨਕਾਲੋ ਵਿਯ ਗਰੁਕਾਪਤ੍ਤਿਂ ਆਪਨ੍ਨਕਾਲੋ, ਲਤਾਨੁਸਾਰੇਨ ਓਤਿਣ੍ਣੇਨ ਉਦਕੇਨ ਮੂਲੇਸੁ ਤਿਨ੍ਤੇਸੁ ਰੁਕ੍ਖਸ੍ਸ ਭੂਮਿਯਂ ਪਤਨਕਾਲੋ ਵਿਯ ਕਮੇਨ ਚਤ੍ਤਾਰਿ ਪਾਰਾਜਿਕਾਨਿ ਆਪਜ੍ਜਿਤ੍ਵਾ ਚਤੂਸੁ ਅਪਾਯੇਸੁ ਨਿਬ੍ਬਤ੍ਤਨਕਾਲੋ ਦਟ੍ਠਬ੍ਬੋ.
ਸੁਕ੍ਕਪਕ੍ਖੋ ਵੁਤ੍ਤਵਿਪਲ੍ਲਾਸੇਨ ਵੇਦਿਤਬ੍ਬੋ. ਏਵਮੇਵ ਖੋਤਿ ਏਤ੍ਥ ਪਨ ਇਦਂ ਓਪਮ੍ਮਸਂਸਨ੍ਦਨਂ – ਸਾਲਾਦੀਸੁ ਅਞ੍ਞਤਰਰੁਕ੍ਖੋ ਵਿਯ ਅਯਂ ਸਤ੍ਤੋ ਦਟ੍ਠਬ੍ਬੋ, ਤਿਸ੍ਸੋ ਮਾਲੁਵਾਲਤਾ ਵਿਯ ਤੀਣਿ ਅਕੁਸਲਮੂਲਾਨਿ, ਤਾਸਂ ਅਪ੍ਪਵਤ੍ਤਿਂ ਕਾਤੁਂ ਆਗਤਪੁਰਿਸੋ ਵਿਯ ਯੋਗਾਵਚਰੋ, ਕੁਦ੍ਦਾਲੋ ਵਿਯ ਪਞ੍ਞਾ, ਕੁਦ੍ਦਾਲਪਿਟਕਂ ਵਿਯ ਸਦ੍ਧਾਪਿਟਕਂ, ਪਲਿਖਨਨਖਣਿਤ੍ਤਿ ਵਿਯ ਵਿਪਸ੍ਸਨਾਪਞ੍ਞਾ, ਖਣਿਤ੍ਤਿਯਾ ਮੂਲਚ੍ਛੇਦਨਂ ਵਿਯ ਵਿਪਸ੍ਸਨਾਞਾਣੇਨ ਅਵਿਜ੍ਜਾਮੂਲਸ੍ਸ ਛਿਨ੍ਦਨਕਾਲੋ, ਖਣ੍ਡਾਖਣ੍ਡਿਕਂ ਛਿਨ੍ਦਨਕਾਲੋ ਵਿਯ ਖਨ੍ਧਵਸੇਨ ਦਿਟ੍ਠਕਾਲੋ, ਫਾਲਨਕਾਲੋ ਵਿਯ ਮਗ੍ਗਞਾਣੇਨ ਕਿਲੇਸਾਨਂ ਸਮੁਗ੍ਘਾਤਿਤਕਾਲੋ, ਮਸਿਕਰਣਕਾਲੋ ਵਿਯ ਧਰਮਾਨਕਪਞ੍ਚਕ੍ਖਨ੍ਧਕਾਲੋ, ਮਹਾਵਾਤੇ ਓਪੁਣਿਤ੍ਵਾ ਅਪ੍ਪਵਤ੍ਤਨਕਾਲੋ ਵਿਯ ਉਪਾਦਿਨ੍ਨਕਕ੍ਖਨ੍ਧਾਨਂ ਅਪ੍ਪਟਿਸਨ੍ਧਿਕਨਿਰੋਧੇਨ ਨਿਰੁਜ੍ਝਿਤ੍ਵਾ ਪੁਨਬ੍ਭਵੇ ਪਟਿਸਨ੍ਧਿਅਗ੍ਗਹਣਕਾਲੋ ਦਟ੍ਠਬ੍ਬੋਤਿ. ਇਮਸ੍ਮਿਂ ਸੁਤ੍ਤੇ ਵਟ੍ਟਵਿਵਟ੍ਟਂ ਕਥਿਤਂ.
੧੦. ਉਪੋਸਥਸੁਤ੍ਤਵਣ੍ਣਨਾ
੭੧. ਦਸਮੇ ਤਦਹੁਪੋਸਥੇਤਿ ਤਸ੍ਮਿਂ ਅਹੁ ਉਪੋਸਥੇ ਤਂ ਦਿਵਸਂ ਉਪੋਸਥੇ, ਪਨ੍ਨਰਸਿਕਉਪੋਸਥਦਿਵਸੇਤਿ ਵੁਤ੍ਤਂ ਹੋਤਿ. ਉਪਸਙ੍ਕਮੀਤਿ ਉਪੋਸਥਙ੍ਗਾਨਿ ਅਧਿਟ੍ਠਾਯ ਗਨ੍ਧਮਾਲਾਦਿਹਤ੍ਥਾ ਉਪਸਙ੍ਕਮਿ. ਹਨ੍ਦਾਤਿ ਵਵਸ੍ਸਗ੍ਗਤ੍ਥੇ ਨਿਪਾਤੋ. ਦਿਵਾ ਦਿਵਸ੍ਸਾਤਿ ਦਿਵਸਸ੍ਸ ਦਿਵਾ ਨਾਮ ਮਜ੍ਝਨ੍ਹੋ, ਇਮਸ੍ਮਿਂ ਠਿਤੇ ਮਜ੍ਝਨ੍ਹਿਕੇ ਕਾਲੇਤਿ ਅਤ੍ਥੋ. ਕੁਤੋ ਨੁ ਤ੍ਵਂ ਆਗਚ੍ਛਸੀਤਿ ਕਿਂ ਕਰੋਨ੍ਤੀ ਵਿਚਰਸੀਤਿ ਪੁਚ੍ਛਤਿ. ਗੋਪਾਲਕੁਪੋਸਥੋਤਿ ਗੋਪਾਲਕੇਹਿ ਸਦ੍ਧਿਂ ਉਪਵਸਨਉਪੋਸਥੋ. ਨਿਗਣ੍ਠੁਪੋਸਥੋਤਿ ਨਿਗਣ੍ਠਾਨਂ ਉਪਵਸਨਉਪੋਸਥੋ. ਅਰਿਯੁਪੋਸਥੋਤਿ ਅਰਿਯਾਨਂ ਉਪਵਸਨਉਪੋਸਥੋ. ਸੇਯ੍ਯਥਾਪਿ ਵਿਸਾਖੇਤਿ ਯਥਾ ਨਾਮ, ਵਿਸਾਖੇ. ਸਾਯਨ੍ਹਸਮਯੇ ਸਾਮਿਕਾਨਂ ਗਾਵੋ ਨਿਯ੍ਯਾਤੇਤ੍ਵਾਤਿ ਗੋਪਾਲਕਾ ਹਿ ਦੇਵਸਿਕਵੇਤਨੇਨ ਵਾ ਪਞ੍ਚਾਹਦਸਾਹਅਦ੍ਧਮਾਸਮਾਸਛਮਾਸਸਂਵਚ੍ਛਰਪਰਿਚ੍ਛੇਦੇਨ ਵਾ ਗਾਵੋ ਗਹੇਤ੍ਵਾ ਰਕ੍ਖਨ੍ਤਿ. ਇਧ ਪਨ ਦੇਵਸਿਕਵੇਤਨੇਨ ਰਕ੍ਖਨ੍ਤਂ ਸਨ੍ਧਾਯੇਤਂ ਵੁਤ੍ਤਂ – ਨਿਯ੍ਯਾਤੇਤ੍ਵਾਤਿ ਪਟਿਚ੍ਛਾਪੇਤ੍ਵਾ ‘‘ਏਤਾ ਵੋ ਗਾਵੋ’’ਤਿ ਦਤ੍ਵਾ. ਇਤਿ ਪਟਿਸਞ੍ਚਿਕ੍ਖਤੀਤਿ ਅਤ੍ਤਨੋ ਗੇਹਂ ਗਨ੍ਤ੍ਵਾ ਭੁਞ੍ਜਿਤ੍ਵਾ ਮਞ੍ਚੇ ਨਿਪਨ੍ਨੋ ਏਵਂ ਪਚ੍ਚਵੇਕ੍ਖਤਿ. ਅਭਿਜ੍ਝਾਸਹਗਤੇਨਾਤਿ ਤਣ੍ਹਾਯ ਸਮ੍ਪਯੁਤ੍ਤੇਨ. ਏਵਂ ਖੋ, ਵਿਸਾਖੇ, ਗੋਪਾਲਕੁਪੋਸਥੋ ਹੋਤੀਤਿ ਅਰਿਯੁਪੋਸਥੋਵ ਅਯਂ, ਅਪਰਿਸੁਦ੍ਧਵਿਤਕ੍ਕਤਾਯ ਪਨ ਗੋਪਾਲਕਉਪੋਸਥਟ੍ਠਾਨੇ ਠਿਤੋ. ਨ ਮਹਪ੍ਫਲੋਤਿ ਵਿਪਾਕਫਲੇਨ ਨ ਮਹਪ੍ਫਲੋ. ਨ ਮਹਾਨਿਸਂਸੋਤਿ ਵਿਪਾਕਾਨਿਸਂਸੇਨ ਨ ਮਹਾਨਿਸਂਸੋ. ਨ ਮਹਾਜੁਤਿਕੋਤਿ ਵਿਪਾਕੋਭਾਸੇਨ ਨ ਮਹਾਓਭਾਸੋ. ਨ ਮਹਾਵਿਪ੍ਫਾਰੋਤਿ ਵਿਪਾਕਵਿਪ੍ਫਾਰਸ੍ਸ ਅਮਹਨ੍ਤਤਾਯ ਨ ਮਹਾਵਿਪ੍ਫਾਰੋ.
ਸਮਣਜਾਤਿਕਾਤਿ ਸਮਣਾਯੇਵ. ਪਰਂ ਯੋਜਨਸਤਨ੍ਤਿ ਯੋਜਨਸਤਂ ਅਤਿਕ੍ਕਮਿਤ੍ਵਾ ਤਤੋ ਪਰਂ. ਤੇਸੁ ਦਣ੍ਡਂ ਨਿਕ੍ਖਿਪਾਹੀਤਿ ਤੇਸੁ ਯੋਜਨਸਤਤੋ ਪਰਭਾਗੇਸੁ ਠਿਤੇਸੁ ਸਤ੍ਤੇਸੁ ਦਣ੍ਡਂ ਨਿਕ੍ਖਿਪ, ਨਿਕ੍ਖਿਤ੍ਤਦਣ੍ਡੋ ਹੋਹਿ. ਨਾਹਂ ਕ੍ਵਚਨਿ ਕਸ੍ਸਚਿ ਕਿਞ੍ਚਨਤਸ੍ਮਿਨ੍ਤਿ ਅਹਂ ਕਤ੍ਥਚਿ ਕਸ੍ਸਚਿ ਪਰਸ੍ਸ ਕਿਞ੍ਚਨਤਸ੍ਮਿਂ ਨ ਹੋਮਿ. ਕਿਞ੍ਚਨਂ ਵੁਚ੍ਚਤਿ ਪਲਿਬੋਧੋ, ਪਲਿਬੋਧੋ ਨ ਹੋਮੀਤਿ ਵੁਤ੍ਤਂ ਹੋਤਿ. ਨ ਚ ਮਮ ਕ੍ਵਚਨਿ ਕਤ੍ਥਚਿ ਕਿਞ੍ਚਨਤਤ੍ਥੀਤਿ ਮਮਾਪਿ ਕ੍ਵਚਨਿ ਅਨ੍ਤੋ ਵਾ ਬਹਿਦ੍ਧਾ ਵਾ ਕਤ੍ਥਚਿ ਏਕਪਰਿਕ੍ਖਾਰੇਪਿ ਕਿਞ੍ਚਨਤਾ ਨਤ੍ਥਿ, ਪਲਿਬੋਧੋ ਨਤ੍ਥਿ, ਛਿਨ੍ਨਪਲਿਬੋਧੋਹਮਸ੍ਮੀਤਿ ਵੁਤ੍ਤਂ ਹੋਤਿ. ਭੋਗੇਤਿ ਮਞ੍ਚਪੀਠਯਾਗੁਭਤ੍ਤਾਦਯੋ. ਅਦਿਨ੍ਨਂਯੇਵ ਪਰਿਭੁਞ੍ਜਤੀਤਿ ਪੁਨਦਿਵਸੇ ਮਞ੍ਚੇ ਨਿਪਜ੍ਜਨ੍ਤੋਪਿ ਪੀਠੇ ਨਿਸੀਦਨ੍ਤੋਪਿ ਯਾਗੁਂ ਪਿਵਨ੍ਤੋਪਿ ਭਤ੍ਤਂ ਭੁਞ੍ਜਨ੍ਤੋਪਿ ਤੇ ਭੋਗੇ ਅਦਿਨ੍ਨੇਯੇਵ ਪਰਿਭੁਞ੍ਜਤਿ. ਨ ਮਹਪ੍ਫਲੋਤਿ ਨਿਪ੍ਫਲੋ. ਬ੍ਯਞ੍ਜਨਮੇਵ ਹਿ ਏਤ੍ਥ ਸਾਵਸੇਸਂ, ਅਤ੍ਥੋ ਪਨ ਨਿਰਵਸੇਸੋ. ਏਵਂ ਉਪਵੁਤ੍ਥਸ੍ਸ ਹਿ ਉਪੋਸਥਸ੍ਸ ਅਪ੍ਪਮਤ੍ਤਕਮ੍ਪਿ ਵਿਪਾਕਫਲਂ ਇਟ੍ਠਂ ਕਨ੍ਤਂ ਮਨਾਪਂ ਨਾਮ ਨਤ੍ਥਿ. ਤਸ੍ਮਾ ਨਿਪ੍ਫਲੋਤ੍ਵੇਵ ਵੇਦਿਤਬ੍ਬੋ. ਸੇਸਪਦੇਸੁਪਿ ਏਸੇਵ ਨਯੋ.
ਉਪਕ੍ਕਿਲਿਟ੍ਠਸ੍ਸ ਚਿਤ੍ਤਸ੍ਸਾਤਿ ਇਦਂ ਕਸ੍ਮਾ ਆਹ? ਸਂਕਿਲਿਟ੍ਠੇਨ ਹਿ ਚਿਤ੍ਤੇਨ ਉਪਵੁਤ੍ਥੋ ਉਪੋਸਥੋ ਨ ਮਹਪ੍ਫਲੋ ਹੋਤੀਤਿ ਦਸ੍ਸਿਤਤ੍ਤਾ ਵਿਸੁਦ੍ਧੇਨ ਚਿਤ੍ਤੇਨ ਉਪਵੁਤ੍ਥਸ੍ਸ ਮਹਪ੍ਫਲਤਾ ਅਨੁਞ੍ਞਾਤਾ ਹੋਤਿ. ਤਸ੍ਮਾ ਯੇਨ ਕਮ੍ਮਟ੍ਠਾਨੇਨ ਚਿਤ੍ਤਂ ਵਿਸੁਜ੍ਝਤਿ, ਤਂ ਚਿਤ੍ਤਵਿਸੋਧਨਕਮ੍ਮਟ੍ਠਾਨਂ ਦਸ੍ਸੇਤੁਂ ਇਦਮਾਹ. ਤਤ੍ਥ ਉਪਕ੍ਕਮੇਨਾਤਿ ਪਚ੍ਚਤ੍ਤਪੁਰਿਸਕਾਰੇਨ, ਉਪਾਯੇਨ ਵਾ. ਤਥਾਗਤਂ ਅਨੁਸ੍ਸਰਤੀਤਿ ਅਟ੍ਠਹਿ ਕਾਰਣੇਹਿ ਤਥਾਗਤਗੁਣੇ ਅਨੁਸ੍ਸਰਤਿ. ਏਤ੍ਥ ਹਿ ਇਤਿਪਿ ਸੋ ਭਗਵਾਤਿ ਸੋ ਭਗਵਾ ਇਤਿਪਿ ਸੀਲੇਨ, ਇਤਿਪਿ ਸਮਾਧਿਨਾਤਿ ਸਬ੍ਬੇ ਲੋਕਿਯਲੋਕੁਤ੍ਤਰਾ ਬੁਦ੍ਧਗੁਣਾ ਸਙ੍ਗਹਿਤਾ. ਅਰਹਨ੍ਤਿਆਦੀਹਿ ਪਾਟਿਯੇਕ੍ਕਗੁਣਾਵ ਨਿਦ੍ਦਿਟ੍ਠਾ. ਤਥਾਗਤਂ ਅਨੁਸ੍ਸਰਤੋ ਚਿਤ੍ਤਂ ਪਸੀਦਤੀਤਿ ਲੋਕਿਯਲੋਕੁਤ੍ਤਰੇ ਤਥਾਗਤਗੁਣੇ ਅਨੁਸ੍ਸਰਨ੍ਤਸ੍ਸ ਚਿਤ੍ਤੁਪ੍ਪਾਦੋ ਪਸਨ੍ਨੋ ਹੋਤਿ.
ਚਿਤ੍ਤਸ੍ਸ ਉਪਕ੍ਕਿਲੇਸਾਤਿ ਪਞ੍ਚ ਨੀਵਰਣਾ. ਕਕ੍ਕਨ੍ਤਿ ਆਮਲਕਕਕ੍ਕਂ. ਤਜ੍ਜਂ ਵਾਯਾਮਨ੍ਤਿ ਤਜ੍ਜਾਤਿਕਂ ਤਦਨੁਚ੍ਛਵਿਕਂ ਕਕ੍ਕੇਨ ਮਕ੍ਖਨਘਂਸਨਧੋਵਨਵਾਯਾਮਂ. ਪਰਿਯੋਦਪਨਾ ਹੋਤੀਤਿ ਸੁਦ੍ਧਭਾਵਕਰਣਂ ਹੋਤਿ. ਕਿਲਿਟ੍ਠਸ੍ਮਿਂ ਹਿ ਸੀਸੇ ਪਸਾਧਨਂ ਪਸਾਧੇਤ੍ਵਾ ਨਕ੍ਖਤ੍ਤਂ ਕੀਲ਼ਮਾਨੋ ਨ ਸੋਭਤਿ, ਪਰਿਸੁਦ੍ਧੇ ਪਨ ਤਸ੍ਮਿਂ ਪਸਾਧਨਂ ਪਸਾਧੇਤ੍ਵਾ ਨਕ੍ਖਤ੍ਤਂ ਕੀਲ਼ਮਾਨੋ ਸੋਭਤਿ, ਏਵਮੇਵ ਕਿਲਿਟ੍ਠਚਿਤ੍ਤੇਨ ਉਪੋਸਥਙ੍ਗਾਨਿ ਅਧਿਟ੍ਠਾਯ ਉਪੋਸਥੋ ਉਪਵੁਤ੍ਥੋ ਨ ਮਹਪ੍ਫਲੋ ਹੋਤਿ, ਪਰਿਸੁਦ੍ਧੇਨ ਪਨ ਚਿਤ੍ਤੇਨ ਉਪੋਸਥਙ੍ਗਾਨਿ ਅਧਿਟ੍ਠਾਯ ਉਪਵੁਤ੍ਥੋ ਉਪੋਸਥੋ ਮਹਪ੍ਫਲੋ ਹੋਤੀਤਿ ਅਧਿਪ੍ਪਾਯੇਨ ਏਵਮਾਹ. ਬ੍ਰਹ੍ਮੁਪੋਸਥਂ ਉਪਵਸਤੀਤਿ ਬ੍ਰਹ੍ਮਾ ਵੁਚ੍ਚਤਿ ਸਮ੍ਮਾਸਮ੍ਬੁਦ੍ਧੋ, ਤਸ੍ਸ ਗੁਣਾਨੁਸ੍ਸਰਣਵਸੇਨ ਅਯਂ ਉਪੋਸਥੋ ਬ੍ਰਹ੍ਮੁਪੋਸਥੋ ਨਾਮ, ਤਂ ਉਪਵਸਤਿ. ਬ੍ਰਹ੍ਮੁਨਾ ਸਦ੍ਧਿਂ ਸਂਵਸਤੀਤਿ ਸਮ੍ਮਾਸਮ੍ਬੁਦ੍ਧੇਨ ਸਦ੍ਧਿਂ ਸਂਵਸਤਿ. ਬ੍ਰਹ੍ਮਞ੍ਚਸ੍ਸ ਆਰਬ੍ਭਾਤਿ ਸਮ੍ਮਾਸਮ੍ਬੁਦ੍ਧਂ ਆਰਬ੍ਭ.
ਧਮ੍ਮਂ ਅਨੁਸ੍ਸਰਤੀਤਿ ਸਹਤਨ੍ਤਿਕਂ ਲੋਕੁਤ੍ਤਰਧਮ੍ਮਂ ਅਨੁਸ੍ਸਰਤਿ. ਸੋਤ੍ਤਿਨ੍ਤਿ ਕੁਰੁਵਿਨ੍ਦਕਸੋਤ੍ਤਿਂ. ਕੁਰੁਵਿਨ੍ਦਕਪਾਸਾਣਚੁਣ੍ਣੇਨ ਹਿ ਸਦ੍ਧਿਂ ਲਾਖਂ ਯੋਜੇਤ੍ਵਾ ਮਣਿਕੇ ਕਤ੍ਵਾ ਵਿਜ੍ਝਿਤ੍ਵਾ ਸੁਤ੍ਤੇਨ ਆਵੁਣਿਤ੍ਵਾ ਤਂ ਮਣਿ ਕਲਾਪਪਨ੍ਤਿਂ ਉਭਤੋ ਗਹੇਤ੍ਵਾ ਪਿਟ੍ਠਿਂ ਘਂਸੇਨ੍ਤਿ, ਤਂ ਸਨ੍ਧਾਯ ਵੁਤ੍ਤਂ – ‘‘ਸੋਤ੍ਤਿਞ੍ਚ ਪਟਿਚ੍ਚਾ’’ਤਿ. ਚੁਣ੍ਣਨ੍ਤਿ ਨ੍ਹਾਨੀਯਚੁਣ੍ਣਂ. ਤਜ੍ਜਂ ਵਾਯਾਮਨ੍ਤਿ ਉਬ੍ਬਟ੍ਟਨਘਂਸਨਧੋਵਨਾਦਿਕਂ ਤਦਨੁਰੂਪਵਾਯਾਮਂ. ਧਮ੍ਮੁਪੋਸਥਨ੍ਤਿ ਸਹਤਨ੍ਤਿਕਂ ਨਵਲੋਕੁਤ੍ਤਰਧਮ੍ਮਂ ਆਰਬ੍ਭ ਉਪਵੁਤ੍ਥਤ੍ਤਾ ਅਯਂ ਉਪੋਸਥੋ ‘‘ਧਮ੍ਮੁਪੋਸਥੋ’’ਤਿ ਵੁਤ੍ਤੋ. ਇਧਾਪਿ ਪਰਿਯੋਦਪਨਾਤਿ ਪਦੇ ਠਤ੍ਵਾ ਪੁਰਿਮਨਯੇਨੇਵ ਯੋਜਨਾ ਕਾਤਬ੍ਬਾ.
ਸਙ੍ਘਂ ਅਨੁਸ੍ਸਰਤੀਤਿ ਅਟ੍ਠਨ੍ਨਂ ਅਰਿਯਪੁਗ੍ਗਲਾਨਂ ਗੁਣੇ ਅਨੁਸ੍ਸਰਤਿ. ਉਸ੍ਮਞ੍ਚ ਪਟਿਚ੍ਚਾਤਿ ਦ੍ਵੇ ਤਯੋ ਵਾਰੇ ਗਾਹਾਪਿਤਂ ਉਸੁਮਂ ਪਟਿਚ੍ਚ. ਉਸਞ੍ਚਾਤਿਪਿ ਪਾਠੋ, ਅਯਮੇਵਤ੍ਥੋ. ਖਾਰਨ੍ਤਿ ਛਾਰਿਕਂ. ਗੋਮਯਨ੍ਤਿ ਗੋਮੁਤ੍ਤਂ ਵਾ ਅਜਲਣ੍ਡਿਕਾ ਵਾ. ਪਰਿਯੋਦਪਨਾਤਿ ਇਧਾਪਿ ਪੁਰਿਮਨਯੇਨੇਵ ਯੋਜਨਾ ਕਾਤਬ੍ਬਾ. ਸਙ੍ਘੁਪੋਸਥਨ੍ਤਿ ਅਟ੍ਠਨ੍ਨਂ ਅਰਿਯਪੁਗ੍ਗਲਾਨਂ ਗੁਣੇ ਆਰਬ੍ਭ ਉਪਵੁਤ੍ਥਤ੍ਤਾ ਅਯਂ ਉਪੋਸਥੋ ‘‘ਸਙ੍ਘੁਪੋਸਥੋ’’ਤਿ ਵੁਤ੍ਤੋ.
ਸੀਲਾਨੀਤਿ ਗਹਟ੍ਠੋ ਗਹਟ੍ਠਸੀਲਾਨਿ, ਪਬ੍ਬਜਿਤੋ ਪਬ੍ਬਜਿਤਸੀਲਾਨਿ. ਅਖਣ੍ਡਾਨੀਤਿਆਦੀਨਂ ਅਤ੍ਥੋ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੨੧) ਵਿਤ੍ਥਾਰਿਤੋਵ. ਵਾਲਣ੍ਡੁਪਕਨ੍ਤਿ ਅਸ੍ਸਵਾਲੇਹਿ ਵਾ ਮਕਚਿਵਾਲਾਦੀਹਿ ਵਾ ਕਤਂ ਅਣ੍ਡੁਪਕਂ. ਤਜ੍ਜਂ ਵਾਯਾਮਨ੍ਤਿ ਤੇਲੇਨ ਤੇਮੇਤ੍ਵਾ ਮਲਸ੍ਸ ਤਿਨ੍ਤਭਾਵਂ ਞਤ੍ਵਾ ਛਾਰਿਕਂ ਪਕ੍ਖਿਪਿਤ੍ਵਾ ਵਾਲਣ੍ਡੁਪਕੇਨ ਘਂਸਨਵਾਯਾਮੋ. ਇਧ ਪਰਿਯੋਦਪਨਾਤਿ ਪਦੇ ਠਤ੍ਵਾ ਏਵਂ ਯੋਜਨਾ ਕਾਤਬ੍ਬਾ ਕਿਲਿਟ੍ਠਸ੍ਮਿਞ੍ਹਿ ਆਦਾਸੇ ਮਣ੍ਡਿਤਪਸਾਧਿਤੋਪਿ ਅਤ੍ਤਭਾਵੋ ਓਲੋਕਿਯਮਾਨੋ ਨ ਸੋਭਤਿ, ਪਰਿਸੁਦ੍ਧੇ ਸੋਭਤਿ. ਏਵਮੇਵ ਕਿਲਿਟ੍ਠੇਨ ਚਿਤ੍ਤੇਨ ਉਪਵੁਤ੍ਥੋ ਉਪੋਸਥੋ ਨ ਮਹਪ੍ਫਲੋ ਹੋਤਿ, ਪਰਿਸੁਦ੍ਧੇਨ ਪਨ ਮਹਪ੍ਫਲੋ ਹੋਤੀਤਿ. ਸੀਲੁਪੋਸਥਨ੍ਤਿ ਅਤ੍ਤਨੋ ਸੀਲਾਨੁਸ੍ਸਰਣਵਸੇਨ ਉਪਵੁਤ੍ਥੋ ਉਪੋਸਥੋ ਸੀਲੁਪੋਸਥੋ ਨਾਮ. ਸੀਲੇਨ ਸਦ੍ਧਿਨ੍ਤਿ ਅਤ੍ਤਨੋ ਪਞ੍ਚਸੀਲਦਸਸੀਲੇਨ ਸਦ੍ਧਿਂ. ਸੀਲਞ੍ਚਸ੍ਸ ਆਰਬ੍ਭਾਤਿ ਪਞ੍ਚਸੀਲਂ ਦਸਸੀਲਞ੍ਚ ਆਰਬ੍ਭ.
ਦੇਵਤਾ ਅਨੁਸ੍ਸਰਤੀਤਿ ਦੇਵਤਾ ਸਕ੍ਖਿਟ੍ਠਾਨੇ ਠਪੇਤ੍ਵਾ ਅਤ੍ਤਨੋ ਸਦ੍ਧਾਦਿਗੁਣੇ ਅਨੁਸ੍ਸਰਤਿ. ਉਕ੍ਕਨ੍ਤਿ ਉਦ੍ਧਨਂ. ਲੋਣਨ੍ਤਿ ਲੋਣਮਤ੍ਤਿਕਾ. ਗੇਰੁਕਨ੍ਤਿ ਗੇਰੁਕਚੁਣ੍ਣਂ. ਨਾਲ਼ਿਕਸਣ੍ਡਾਸਨ੍ਤਿ ਧਮਨਨਾਲ਼ਿਕਞ੍ਚੇਵ ਪਰਿਵਤ੍ਤਨਸਣ੍ਡਾਸਞ੍ਚ. ਤਜ੍ਜਂ ਵਾਯਾਮਨ੍ਤਿ ਉਦ੍ਧਨੇ ਪਕ੍ਖਿਪਨਧਮਨਪਰਿਵਤ੍ਤਨਾਦਿਕਂ ਅਨੁਰੂਪਂ ਵਾਯਾਮਂ. ਇਧ ਪਰਿਯੋਦਪਨਾਤਿ ਪਦੇ ਠਤ੍ਵਾ ਏਵਂ ਯੋਜਨਾ ਵੇਦਿਤਬ੍ਬਾ – ਸਂਕਿਲਿਟ੍ਠਸੁਵਣ੍ਣਮਯੇਨ ਹਿ ਪਸਾਧਨਭਣ੍ਡੇਨ ਪਸਾਧਿਤਾ ਨਕ੍ਖਤ੍ਤਂ ਕੀਲ਼ਮਾਨਾ ਨ ਸੋਭਨ੍ਤਿ, ਪਰਿਸੁਦ੍ਧਸੁਵਣ੍ਣਮਯੇਨ ਸੋਭਨ੍ਤਿ. ਏਵਮੇਵ ਸਂਕਿਲਿਟ੍ਠਚਿਤ੍ਤਸ੍ਸ ਉਪੋਸਥੋ ਨ ਮਹਪ੍ਫਲੋ ਹੋਤਿ, ਪਰਿਸੁਦ੍ਧਚਿਤ੍ਤਸ੍ਸ ਮਹਪ੍ਫਲੋ. ਦੇਵਤੁਪੋਸਥਨ੍ਤਿ ਦੇਵਤਾ ਸਕ੍ਖਿਟ੍ਠਾਨੇ ਠਪੇਤ੍ਵਾ ਅਤ੍ਤਨੋ ਗੁਣੇ ਅਨੁਸ੍ਸਰਨ੍ਤੇਨ ਉਪਵੁਤ੍ਥਉਪੋਸਥੋ ਦੇਵਤੁਪੋਸਥੋ ਨਾਮ. ਸੇਸਂ ਇਮੇਸੁ ਬੁਦ੍ਧਾਨੁਸ੍ਸਤਿਆਦੀਸੁ ਕਮ੍ਮਟ੍ਠਾਨੇਸੁ ਯਂ ਵਤ੍ਤਬ੍ਬਂ ਸਿਯਾ, ਤਂ ਸਬ੍ਬਂ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੧੨੩ ਆਦਯੋ) ਵੁਤ੍ਤਮੇਵ.
ਪਾਣਾਤਿਪਾਤਨ੍ਤਿ ਪਾਣਵਧਂ. ਪਹਾਯਾਤਿ ਤਂ ਪਾਣਾਤਿਪਾਤਚੇਤਨਾਸਙ੍ਖਾਤਂ ਦੁਸ੍ਸੀਲ੍ਯਂ ਪਜਹਿਤ੍ਵਾ. ਪਟਿਵਿਰਤਾਤਿ ਪਹੀਨਕਾਲਤੋ ਪਟ੍ਠਾਯ ਤਤੋ ਦੁਸ੍ਸੀਲ੍ਯਤੋ ਓਰਤਾ ਵਿਰਤਾਵ. ਨਿਹਿਤਦਣ੍ਡਾ ਨਿਹਿਤਸਤ੍ਥਾਤਿ ਪਰੂਪਘਾਤਤ੍ਥਾਯ ਦਣ੍ਡਂ ਵਾ ਸਤ੍ਥਂ ਵਾ ਆਦਾਯ ਅਵਤ੍ਤਨਤੋ ਨਿਕ੍ਖਿਤ੍ਤਦਣ੍ਡਾ ਚੇਵ ਨਿਕ੍ਖਿਤ੍ਤਸਤ੍ਥਾ ਚਾਤਿ ਅਤ੍ਥੋ. ਏਤ੍ਥ ਚ ਠਪੇਤ੍ਵਾ ਦਣ੍ਡਂ ਸਬ੍ਬਮ੍ਪਿ ਅਵਸੇਸਂ ਉਪਕਰਣਂ ਸਤ੍ਤਾਨਂ ਵਿਹਿਂਸਨਭਾਵਤੋ ਸਤ੍ਥਨ੍ਤਿ ਵੇਦਿਤਬ੍ਬਂ. ਯਂ ਪਨ ਭਿਕ੍ਖੂ ਕਤ੍ਤਰਦਣ੍ਡਂ ਵਾ ਦਨ੍ਤਕਟ੍ਠਵਾਸਿਂ ਵਾ ਪਿਪ੍ਫਲਕਂ ਵਾ ਗਹੇਤ੍ਵਾ ਵਿਚਰਨ੍ਤਿ, ਨ ਤਂ ਪਰੂਪਘਾਤਤ੍ਥਾਯ. ਤਸ੍ਮਾ ਨਿਹਿਤਦਣ੍ਡਾ ਨਿਹਿਤਸਤ੍ਥਾਤ੍ਵੇਵ ਸਙ੍ਖਂ ਗਚ੍ਛਨ੍ਤਿ. ਲਜ੍ਜੀਤਿ ਪਾਪਜਿਗੁਚ੍ਛਨਲਕ੍ਖਣਾਯ ਲਜ੍ਜਾਯ ਸਮਨ੍ਨਾਗਤਾ. ਦਯਾਪਨ੍ਨਾਤਿ ਦਯਂ ਮੇਤ੍ਤਚਿਤ੍ਤਤਂ ਆਪਨ੍ਨਾ. ਸਬ੍ਬਪਾਣਭੂਤਹਿਤਾਨੁਕਮ੍ਪੀਤਿ ਸਬ੍ਬੇ ਪਾਣਭੂਤੇ ਹਿਤੇਨ ਅਨੁਕਮ੍ਪਕਾ, ਤਾਯ ਏਵ ਦਯਾਪਨ੍ਨਤਾਯ ਸਬ੍ਬੇਸਂ ਪਾਣਭੂਤਾਨਂ ਹਿਤਚਿਤ੍ਤਕਾਤਿ ਅਤ੍ਥੋ. ਅਹਮ੍ਪਜ੍ਜਾਤਿ ਅਹਮ੍ਪਿ ਅਜ੍ਜ. ਇਮਿਨਾਪਿ ਅਙ੍ਗੇਨਾਤਿ ਇਮਿਨਾਪਿ ਗੁਣਙ੍ਗੇਨ. ਅਰਹਤਂ ਅਨੁਕਰੋਮੀਤਿ ਯਥਾ ਪੁਰਤੋ ਗਚ੍ਛਨ੍ਤਂ ਪਚ੍ਛਤੋ ਗਚ੍ਛਨ੍ਤੋ ਅਨੁਗਚ੍ਛਤਿ ਨਾਮ, ਏਵਂ ਅਹਮ੍ਪਿ ਅਰਹਨ੍ਤੇਹਿ ਪਠਮਂ ਕਤਂ ਇਮਂ ਗੁਣਂ ਪਚ੍ਛਾ ਕਰੋਨ੍ਤੋ ਤੇਸਂ ਅਰਹਨ੍ਤਾਨਂ ਅਨੁਕਰੋਮਿ. ਉਪੋਸਥੋ ਚ ਮੇ ਉਪਵੁਤ੍ਥੋ ਭਵਿਸ੍ਸਤੀਤਿ ਏਵਂ ਕਰੋਨ੍ਤੇਨ ਮਯਾ ਅਰਹਤਞ੍ਚ ਅਨੁਕਤਂ ਭਵਿਸ੍ਸਤਿ, ਉਪੋਸਥੋ ਚ ਉਪਵੁਤ੍ਥੋ ਭਵਿਸ੍ਸਤਿ.
ਅਦਿਨ੍ਨਾਦਾਨਨ੍ਤਿ ਅਦਿਨ੍ਨਸ੍ਸ ਪਰਪਰਿਗ੍ਗਹਿਤਸ੍ਸ ਆਦਾਨਂ, ਥੇਯ੍ਯਂ ਚੋਰਿਕਨ੍ਤਿ ਅਤ੍ਥੋ. ਦਿਨ੍ਨਮੇਵ ਆਦਿਯਨ੍ਤੀਤਿ ਦਿਨ੍ਨਾਦਾਯੀ. ਚਿਤ੍ਤੇਨਪਿ ਦਿਨ੍ਨਮੇਵ ਪਟਿਕਙ੍ਖਨ੍ਤੀਤਿ ਦਿਨ੍ਨਪਾਟਿਕਙ੍ਖੀ. ਥੇਨੇਤੀਤਿ ਥੇਨੋ, ਨ ਥੇਨੇਨ ਅਥੇਨੇਨ. ਅਥੇਨਤ੍ਤਾਯੇਵ ਸੁਚਿਭੂਤੇਨ. ਅਤ੍ਤਨਾਤਿ ਅਤ੍ਤਭਾਵੇਨ, ਅਥੇਨਂ ਸੁਚਿਭੂਤਂ ਅਤ੍ਤਭਾਵਂ ਕਤ੍ਵਾ ਵਿਹਰਨ੍ਤੀਤਿ ਵੁਤ੍ਤਂ ਹੋਤਿ.
ਅਬ੍ਰਹ੍ਮਚਰਿਯਨ੍ਤਿ ਅਸੇਟ੍ਠਚਰਿਯਂ. ਬ੍ਰਹ੍ਮਂ ਸੇਟ੍ਠਂ ਆਚਾਰਂ ਚਰਨ੍ਤੀਤਿ ਬ੍ਰਹ੍ਮਚਾਰੀ. ਆਰਾਚਾਰੀਤਿ ਅਬ੍ਰਹ੍ਮਚਰਿਯਤੋ ਦੂਰਾਚਾਰੀ. ਮੇਥੁਨਾਤਿ ਰਾਗਪਰਿਯੁਟ੍ਠਾਨਵਸੇਨ ਸਦਿਸਤ੍ਤਾ ਮੇਥੁਨਕਾਤਿ ਲਦ੍ਧਵੋਹਾਰੇਹਿ ਪਟਿਸੇਵਿਤਬ੍ਬਤੋ ਮੇਥੁਨੋਤਿ ਸਙ੍ਖਂ ਗਤਾ ਅਸਦ੍ਧਮ੍ਮਾ. ਗਾਮਧਮ੍ਮਾਤਿ ਗਾਮਵਾਸੀਨਂ ਧਮ੍ਮਾ.
ਮੁਸਾਵਾਦਾਤਿ ਅਲਿਕਵਚਨਾ ਤੁਚ੍ਛਵਚਨਾ. ਸਚ੍ਚਂ ਵਦਨ੍ਤੀਤਿ ਸਚ੍ਚਵਾਦੀ. ਸਚ੍ਚੇਨ ਸਚ੍ਚਂ ਸਂਦਹਨ੍ਤਿ ਘਟ੍ਟੇਨ੍ਤੀਤਿ ਸਚ੍ਚਸਨ੍ਧਾ, ਨ ਅਨ੍ਤਰਨ੍ਤਰਾ ਮੁਸਾ ਵਦਨ੍ਤੀਤਿ ਅਤ੍ਥੋ. ਯੋ ਹਿ ਪੁਰਿਸੋ ਕਦਾਚਿ ਮੁਸਾਵਾਦਂ ਵਦਤਿ, ਕਦਾਚਿ ਸਚ੍ਚਂ. ਤਸ੍ਸ ਮੁਸਾਵਾਦੇਨ ਅਨ੍ਤਰਿਤਤ੍ਤਾ ਸਚ੍ਚਂ ਸਚ੍ਚੇਨ ਨ ਘਟੀਯਤਿ. ਤਸ੍ਮਾ ਨ ਸੋ ਸਚ੍ਚਸਨ੍ਧੋ. ਇਮੇ ਪਨ ਨ ਤਾਦਿਸਾ, ਜੀਵਿਤਹੇਤੁਪਿ ਮੁਸਾ ਅਵਤ੍ਵਾ ਸਚ੍ਚੇਨ ਸਚ੍ਚਂ ਸਂਦਹਨ੍ਤਿਯੇਵਾਤਿ ਸਚ੍ਚਸਨ੍ਧਾ. ਥੇਤਾਤਿ ਥਿਰਾ, ਠਿਤਕਥਾਤਿ ਅਤ੍ਥੋ. ਏਕੋ ਪੁਗ੍ਗਲੋ ਹਲਿਦ੍ਦਿਰਾਗੋ ਵਿਯ ਥੁਸਰਾਸਿਮ੍ਹਿ ਨਿਖਾਤਖਾਣੁ ਵਿਯ ਅਸ੍ਸਪਿਟ੍ਠੇ ਠਪਿਤਕੁਮ੍ਭਣ੍ਡਮਿਵ ਚ ਨ ਠਿਤਕਥੋ ਹੋਤਿ. ਏਕੋ ਪਾਸਾਣਲੇਖਾ ਵਿਯ ਇਨ੍ਦਖੀਲੋ ਵਿਯ ਚ ਠਿਤਕਥੋ ਹੋਤਿ, ਅਸਿਨਾ ਸੀਸਂ ਛਿਨ੍ਦਨ੍ਤੇਪਿ ਦ੍ਵੇ ਕਥਾ ਨ ਕਥੇਤਿ. ਅਯਂ ਵੁਚ੍ਚਤਿ ਥੇਤੋ. ਪਚ੍ਚਯਿਕਾਤਿ ਪਤ੍ਤਿਯਾਯਿਤਬ੍ਬਕਾ, ਸਦ੍ਧਾਯਿਕਾਤਿ ਅਤ੍ਥੋ. ਏਕਚ੍ਚੋ ਹਿ ਪੁਗ੍ਗਲੋ ਨ ਪਚ੍ਚਯਿਕੋ ਹੋਤਿ, ‘‘ਇਦਂ ਕੇਨ ਵੁਤ੍ਤਂ, ਅਸੁਕੇਨ ਨਾਮਾ’’ਤਿ ਵੁਤ੍ਤੇ ‘‘ਮਾ ਤਸ੍ਸ ਵਚਨਂ ਸਦ੍ਦਹਥਾ’’ਤਿ ਵਤ੍ਤਬ੍ਬਤਂ ਆਪਜ੍ਜਤਿ. ਏਕੋ ਪਚ੍ਚਯਿਕੋ ਹੋਤਿ, ‘‘ਇਦਂ ਕੇਨ ਵੁਤ੍ਤਂ, ਅਸੁਕੇਨਾ’’ਤਿ ਵੁਤ੍ਤੇ ‘‘ਯਦਿ ਤੇਨ ਵੁਤ੍ਤਂ, ਇਦਮੇਵ ਪਮਾਣਂ, ਇਦਾਨਿ ਪਟਿਕ੍ਖਿਪਿਤਬ੍ਬਂ ਨਤ੍ਥਿ, ਏਵਮੇਵਂ ਇਦ’’ਨ੍ਤਿ ਵਤ੍ਤਬ੍ਬਤਂ ਆਪਜ੍ਜਤਿ. ਅਯਂ ਵੁਚ੍ਚਤਿ ਪਚ੍ਚਯਿਕੋ. ਅਵਿਸਂਵਾਦਕਾ ਲੋਕਸ੍ਸਾਤਿ ਤਾਯ ਸਚ੍ਚਵਾਦਿਤਾਯ ਲੋਕਂ ਨ ਵਿਸਂਵਾਦੇਨ੍ਤੀਤਿ ਅਤ੍ਥੋ.
ਸੁਰਾਮੇਰਯਮਜ੍ਜਪਮਾਦਟ੍ਠਾਨਨ੍ਤਿ ਸੁਰਾਮੇਰਯਮਜ੍ਜਾਨਂ ਪਾਨਚੇਤਨਾਸਙ੍ਖਾਤਂ ਪਮਾਦਕਾਰਣਂ. ਏਕਭਤ੍ਤਿਕਾਤਿ ਪਾਤਰਾਸਭਤ੍ਤਂ ਸਾਯਮਾਸਭਤ੍ਤਨ੍ਤਿ ਦ੍ਵੇ ਭਤ੍ਤਾਨਿ. ਤੇਸੁ ਪਾਤਰਾਸਭਤ੍ਤਂ ਅਨ੍ਤੋਮਜ੍ਝਨ੍ਹਿਕੇਨ ਪਰਿਚ੍ਛਿਨ੍ਨਂ, ਇਤਰਂ ਮਜ੍ਝਨ੍ਹਿਕਤੋ ਉਦ੍ਧਂ ਅਨ੍ਤੋਅਰੁਣੇਨ. ਤਸ੍ਮਾ ਅਨ੍ਤੋਮਜ੍ਝਨ੍ਹਿਕੇ ਦਸਕ੍ਖਤ੍ਤੁਂ ਭੁਞ੍ਜਮਾਨਾਪਿ ਏਕਭਤ੍ਤਿਕਾਵ ਹੋਨ੍ਤਿ. ਤਂ ਸਨ੍ਧਾਯ ਵੁਤ੍ਤਂ – ‘‘ਏਕਭਤ੍ਤਿਕਾ’’ਤਿ. ਰਤ੍ਤਿਭੋਜਨਂ ਰਤ੍ਤਿ, ਤਤੋ ਉਪਰਤਾਤਿ ਰਤ੍ਤੂਪਰਤਾ. ਅਤਿਕ੍ਕਨ੍ਤੇ ਮਜ੍ਝਨ੍ਹਿਕੇ ਯਾਵ ਸੂਰਿਯਤ੍ਥਙ੍ਗਮਨਾ ਭੋਜਨਂ ਵਿਕਾਲਭੋਜਨਂ ਨਾਮ, ਤਤੋ ਵਿਰਤਤ੍ਤਾ ਵਿਰਤਾ ਵਿਕਾਲਭੋਜਨਾ.
ਸਾਸਨਸ੍ਸ ਅਨਨੁਲੋਮਤ੍ਤਾ ਵਿਸੂਕਂ ਪਟਾਣਿਭੂਤਂ ਦਸ੍ਸਨਨ੍ਤਿ ਵਿਸੂਕਦਸ੍ਸਨਂ, ਅਤ੍ਤਨਾ ਨਚ੍ਚਨਨਚ੍ਚਾਪਨਾਦਿਵਸੇਨ ਨਚ੍ਚਞ੍ਚ ਗੀਤਞ੍ਚ ਵਾਦਿਤਞ੍ਚ, ਅਨ੍ਤਮਸੋ ਮਯੂਰਨਚ੍ਚਨਾਦਿਵਸੇਨਾਪਿ ਪਵਤ੍ਤਾਨਂ ਨਚ੍ਚਾਦੀਨਂ ਵਿਸੂਕਭੂਤਂ ਦਸ੍ਸਨਞ੍ਚਾਤਿ ਨਚ੍ਚਗੀਤਵਾਦਿਤਵਿਸੂਕਦਸ੍ਸਨਂ. ਨਚ੍ਚਾਦੀਨਿ ਹਿ ਅਤ੍ਤਨਾ ਪਯੋਜੇਤੁਂ ਵਾ ਪਰੇਹਿ ਪਯੋਜਾਪੇਤੁਂ ਵਾ ਪਯੁਤ੍ਤਾਨਿ ਪਸ੍ਸਿਤੁਂ ਵਾ ਨੇਵ ਭਿਕ੍ਖੂਨਂ, ਨ ਭਿਕ੍ਖੁਨੀਨਂ ਵਟ੍ਟਨ੍ਤਿ.
ਮਾਲਾਦੀਸੁ ਮਾਲਾਤਿ ਯਂਕਿਞ੍ਚਿ ਪੁਪ੍ਫਂ. ਗਨ੍ਧਨ੍ਤਿ ਯਂਕਿਞ੍ਚਿ ਗਨ੍ਧਜਾਤਂ. ਵਿਲੇਪਨਨ੍ਤਿ ਛਵਿਰਾਗਕਰਣਂ. ਤਤ੍ਥ ਪਿਲ਼ਨ੍ਧਨ੍ਤੋ ਧਾਰੇਤਿ ਨਾਮ, ਊਨਟ੍ਠਾਨਂ ਪੂਰੇਨ੍ਤੋ ਮਣ੍ਡੇਤਿ ਨਾਮ, ਗਨ੍ਧਵਸੇਨ ਛਵਿਰਾਗਵਸੇਨ ਚ ਸਾਦਿਯਨ੍ਤੋ ਵਿਭੂਸੇਤਿ ਨਾਮ. ਠਾਨਂ ਵੁਚ੍ਚਤਿ ਕਾਰਣਂ, ਤਸ੍ਮਾ ਯਾਯ ਦੁਸ੍ਸੀਲ੍ਯਚੇਤਨਾਯ ਤਾਨਿ ਮਾਲਾਧਾਰਣਾਦੀਨਿ ਮਹਾਜਨੋ ਕਰੋਤਿ, ਤਤੋ ਪਟਿਵਿਰਤਾਤਿ ਅਤ੍ਥੋ. ਉਚ੍ਚਾਸਯਨਂ ਵੁਚ੍ਚਤਿ ਪਮਾਣਾਤਿਕ੍ਕਨ੍ਤਂ, ਮਹਾਸਯਨਂ ਅਕਪ੍ਪਿਯਤ੍ਥਰਣਂ, ਤਤੋ ਪਟਿਵਿਰਤਾਤਿ ਅਤ੍ਥੋ.
ਕੀਵਮਹਪ੍ਫਲੋਤਿ ਕਿਤ੍ਤਕਂ ਮਹਪ੍ਫਲੋ. ਸੇਸਪਦੇਸੁਪਿ ਏਸੇਵ ਨਯੋ. ਪਹੂਤਰਤ੍ਤਰਤਨਾਨਨ੍ਤਿ ਪਹੂਤੇਨ ਰਤ੍ਤਸਙ੍ਖਾਤੇਨ ਰਤਨੇਨ ਸਮਨ੍ਨਾਗਤਾਨਂ, ਸਕਲਜਮ੍ਬੁਦੀਪਤਲਂ ਭੇਰਿਤਲਸਦਿਸਂ ਕਤ੍ਵਾ ਕਟਿਪ੍ਪਮਾਣੇਹਿ ਸਤ੍ਤਹਿ ਰਤਨੇਹਿ ਪੂਰਿਤਾਨਨ੍ਤਿ ਅਤ੍ਥੋ. ਇਸ੍ਸਰਿਯਾਧਿਪਚ੍ਚਨ੍ਤਿ ਇਸ੍ਸਰਭਾਵੇਨ ਵਾ ਇਸ੍ਸਰਿਯਮੇਵ ਵਾ ਆਧਿਪਚ੍ਚਂ, ਨ ਏਤ੍ਥ ਸਾਹਸਿਕਕਮ੍ਮਨ੍ਤਿਪਿ ਇਸ੍ਸਰਿਯਾਧਿਪਚ੍ਚਂ. ਰਜ੍ਜਂ ਕਾਰੇਯ੍ਯਾਤਿ ਏਵਰੂਪਂ ਚਕ੍ਕਵਤ੍ਤਿਰਜ੍ਜਂ ਕਾਰੇਯ੍ਯ. ਅਙ੍ਗਾਨਨ੍ਤਿਆਦੀਨਿ ਤੇਸਂ ਜਨਪਦਾਨਂ ਨਾਮਾਨਿ. ਕਲਂ ਨਾਗ੍ਘਤਿ ਸੋਲ਼ਸਿਨ੍ਤਿ ਏਕਂ ਅਹੋਰਤ੍ਤਂ ਉਪਵੁਤ੍ਥਉਪੋਸਥੇ ਪੁਞ੍ਞਂ ਸੋਲ਼ਸਭਾਗੇ ਕਤ੍ਵਾ ਤਤੋ ਏਕਂ ਭਾਗਞ੍ਚ ਨ ਅਗ੍ਘਤਿ. ਏਕਰਤ੍ਤੁਪੋਸਥਸ੍ਸ ਸੋਲ਼ਸਿਯਾ ਕਲਾਯ ਯਂ ਵਿਪਾਕਫਲਂ, ਤਂਯੇਵ ਤਤੋ ਬਹੁਤਰਂ ਹੋਤੀਤਿ ਅਤ੍ਥੋ. ਕਪਣਨ੍ਤਿ ਪਰਿਤ੍ਤਕਂ.
ਅਬ੍ਰਹ੍ਮਚਰਿਯਾਤਿ ਅਸੇਟ੍ਠਚਰਿਯਤੋ. ਰਤ੍ਤਿਂ ਨ ਭੁਞ੍ਜੇਯ੍ਯ ਵਿਕਾਲਭੋਜਨਨ੍ਤਿ ਉਪੋਸਥਂ ਉਪਵਸਨ੍ਤੋ ਰਤ੍ਤਿਭੋਜਨਞ੍ਚ ਦਿਵਾਵਿਕਾਲਭੋਜਨਞ੍ਚ ਨ ਭੁਞ੍ਜੇਯ੍ਯ. ਮਞ੍ਚੇ ਛਮਾਯਂਵ ਸਯੇਥ ਸਨ੍ਥਤੇਤਿ ਮੁਟ੍ਠਿਹਤ੍ਥਪਾਦਕੇ ਕਪ੍ਪਿਯਮਞ੍ਚੇ ਵਾ ਸੁਧਾਦਿਪਰਿਕਮ੍ਮਕਤਾਯ ਭੂਮਿਯਂ ਵਾ ਤਿਣਪਣ੍ਣਪਲਾਲਾਦੀਨਿ ਸਨ੍ਥਰਿਤ੍ਵਾ ਕਤੇ ਸਨ੍ਥਤੇ ਵਾ ਸਯੇਥਾਤਿ ਅਤ੍ਥੋ. ਏਤਂ ਹਿ ਅਟ੍ਠਙ੍ਗਿਕਮਾਹੁਪੋਸਥਨ੍ਤਿ ਏਵਂ ਪਾਣਾਤਿਪਾਤਾਦੀਨਿ ਅਸਮਾਚਰਨ੍ਤੇਨ ਉਪਵੁਤ੍ਥਂ ਉਪੋਸਥਂ ਅਟ੍ਠਹਿ ਅਙ੍ਗੇਹਿ ਸਮਨ੍ਨਾਗਤਤ੍ਤਾ ਅਟ੍ਠਙ੍ਗਿਕਨ੍ਤਿ ਵਦਨ੍ਤਿ. ਤਂ ਪਨ ਉਪਵਸਨ੍ਤੇਨ ‘‘ਸ੍ਵੇ ਉਪੋਸਥਿਕੋ ਭਵਿਸ੍ਸਾਮੀ’’ਤਿ ਅਜ੍ਜੇਵ ‘‘ਇਦਞ੍ਚ ਇਦਞ੍ਚ ਕਰੇਯ੍ਯਾਥਾ’’ਤਿ ਆਹਾਰਾਦਿਵਿਧਾਨਂ ਵਿਚਾਰੇਤਬ੍ਬਂ. ਉਪੋਸਥਦਿਵਸੇ ਪਾਤੋਵ ਭਿਕ੍ਖੁਸ੍ਸ ਵਾ ਭਿਕ੍ਖੁਨਿਯਾ ਵਾ ਦਸਸੀਲਲਕ੍ਖਣਞ੍ਞੁਨੋ ਉਪਾਸਕਸ੍ਸ ਵਾ ਉਪਾਸਿਕਾਯ ਵਾ ਸਨ੍ਤਿਕੇ ਵਾਚਂ ਭਿਨ੍ਦਿਤ੍ਵਾ ਉਪੋਸਥਙ੍ਗਾਨਿ ਸਮਾਦਾਤਬ੍ਬਾਨਿ. ਪਾਲ਼ਿਂ ਅਜਾਨਨ੍ਤੇਨ ਪਨ ‘‘ਬੁਦ੍ਧਪਞ੍ਞਤ੍ਤਂ ਉਪੋਸਥਂ ਅਧਿਟ੍ਠਾਮੀ’’ਤਿ ਅਧਿਟ੍ਠਾਤਬ੍ਬਂ. ਅਞ੍ਞਂ ਅਲਭਨ੍ਤੇਨ ਅਤ੍ਤਨਾਪਿ ਅਧਿਟ੍ਠਾਤਬ੍ਬਂ, ਵਚੀਭੇਦੋ ਪਨ ਕਾਤਬ੍ਬੋਯੇਵ. ਉਪੋਸਥਂ ਉਪਵਸਨ੍ਤੇਨ ਪਰੂਪਰੋਧਪਟਿਸਂਯੁਤ੍ਤਾ ਕਮ੍ਮਨ੍ਤਾ ਨ ਵਿਚਾਰੇਤਬ੍ਬਾ, ਆਯਵਯਗਣਨਂ ਕਰੋਨ੍ਤੇਨ ਨ ਵੀਤਿਨਾਮੇਤਬ੍ਬਂ, ਗੇਹੇ ਪਨ ਆਹਾਰਂ ਲਭਿਤ੍ਵਾ ਨਿਚ੍ਚਭਤ੍ਤਿਕਭਿਕ੍ਖੁਨਾ ਵਿਯ ਪਰਿਭੁਞ੍ਜਿਤ੍ਵਾ ਵਿਹਾਰਂ ਗਨ੍ਤ੍ਵਾ ਧਮ੍ਮੋ ਵਾ ਸੋਤਬ੍ਬੋ, ਅਟ੍ਠਤਿਂਸਾਯ ਆਰਮ੍ਮਣੇਸੁ ਅਞ੍ਞਤਰਂ ਵਾ ਮਨਸਿਕਾਤਬ੍ਬਂ.
ਸੁਦਸ੍ਸਨਾਤਿ ਸੁਨ੍ਦਰਦਸ੍ਸਨਾ. ਓਭਾਸਯਨ੍ਤਿ ਓਭਾਸਯਮਾਨਾ. ਅਨੁਪਰਿਯਨ੍ਤੀਤਿ ਵਿਚਰਨ੍ਤਿ. ਯਾਵਤਾਤਿ ਯਤ੍ਤਕਂ ਠਾਨਂ. ਅਨ੍ਤਲਿਕ੍ਖਗਾਤਿ ਆਕਾਸਙ੍ਗਮਾ. ਪਭਾਸਨ੍ਤੀਤਿ ਜੋਤਨ੍ਤਿ ਪਭਾ ਮੁਞ੍ਚਨ੍ਤਿ. ਦਿਸਾਵਿਰੋਚਨਾਤਿ ਸਬ੍ਬਦਿਸਾਸੁ ਵਿਰੋਚਮਾਨਾ. ਅਥ ਵਾ ਪਭਾਸਨ੍ਤੀਤਿ ਦਿਸਾਹਿ ਦਿਸਾ ਓਭਾਸਨ੍ਤਿ. ਵਿਰੋਚਨਾਤਿ ਵਿਰੋਚਮਾਨਾ. ਵੇਲ਼ੁਰਿਯਨ੍ਤਿ ਮਣੀਤਿ ਵਤ੍ਵਾਪਿ ਇਮਿਨਾ ਜਾਤਿਮਣਿਭਾਵਂ ਦਸ੍ਸੇਤਿ. ਏਕਵਸ੍ਸਿਕਵੇਲ਼ੁਵਣ੍ਣਞ੍ਹਿ ਵੇਲ਼ੁਰਿਯਂ ਜਾਤਿਮਣਿ ਨਾਮ. ਤਂ ਸਨ੍ਧਾਯੇਵਮਾਹ. ਭਦ੍ਦਕਨ੍ਤਿ ਲਦ੍ਧਕਂ. ਸਿਙ੍ਗੀਸੁਵਣ੍ਣਨ੍ਤਿ ਗੋਸਿਙ੍ਗਸਦਿਸਂ ਹੁਤ੍ਵਾ ਉਪ੍ਪਨ੍ਨਤ੍ਤਾ ਏਵਂ ਨਾਮਕਂ ਸੁਵਣ੍ਣਂ. ਕਞ੍ਚਨਨ੍ਤਿ ਪਬ੍ਬਤੇਯ੍ਯਂ ਪਬ੍ਬਤੇ ਜਾਤਸੁਵਣ੍ਣਂ. ਜਾਤਰੂਪਨ੍ਤਿ ਸਤ੍ਥੁਵਣ੍ਣਸੁਵਣ੍ਣਂ. ਹਟਕਨ੍ਤਿ ਕਿਪਿਲ੍ਲਿਕਾਹਿ ਨੀਹਟਸੁਵਣ੍ਣਂ. ਨਾਨੁਭਵਨ੍ਤੀਤਿ ਨ ਪਾਪੁਣਨ੍ਤਿ. ਚਨ੍ਦਪ੍ਪਭਾਤਿ ਸਾਮਿਅਤ੍ਥੇ ਪਚ੍ਚਤ੍ਤਂ, ਚਨ੍ਦਪ੍ਪਭਾਯਾਤਿ ਅਤ੍ਥੋ. ਉਪਵਸ੍ਸੁਪੋਸਥਨ੍ਤਿ ਉਪਵਸਿਤ੍ਵਾ ਉਪੋਸਥਂ. ਸੁਖੁਦ੍ਰਯਾਨੀਤਿ ਸੁਖਫਲਾਨਿ ਸੁਖਵੇਦਨੀਯਾਨਿ. ਸਗ੍ਗਮੁਪੇਨ੍ਤਿ ਠਾਨਨ੍ਤਿ ਸਗ੍ਗਸਙ੍ਖਾਤਂ ਠਾਨਂ ਉਪਗਚ੍ਛਨ੍ਤਿ, ਕੇਨਚਿ ਅਨਿਨ੍ਦਿਤਾ ਹੁਤ੍ਵਾ ਦੇਵਲੋਕੇ ਉਪ੍ਪਜ੍ਜਨ੍ਤੀਤਿ ਅਤ੍ਥੋ. ਸੇਸਮੇਤ੍ਥ ਯਂ ਅਨ੍ਤਰਨ੍ਤਰਾ ਨ ਵੁਤ੍ਤਂ, ਤਂ ਵੁਤ੍ਤਾਨੁਸਾਰੇਨੇਵ ਵੇਦਿਤਬ੍ਬਨ੍ਤਿ.
ਮਹਾਵਗ੍ਗੋ ਦੁਤਿਯੋ.