੩. ਤਤਿਯਪਣ੍ਣਾਸਕਂ

(੧੧) ੧. ਆਸਾਦੁਪ੍ਪਜਹਵਗ੍ਗਵਣ੍ਣਨਾ

੧੧੯. ਤਤਿਯਸ੍ਸ ਪਣ੍ਣਾਸਕਸ੍ਸ ਪਠਮੇ ਆਸਾਤਿ ਤਣ੍ਹਾ. ਦੁਪ੍ਪਜਹਾਤਿ ਦੁਚ੍ਚਜਾ ਦੁਨ੍ਨੀਹਰਾ. ਲਾਭਾਸਾਯ ਦੁਪ੍ਪਜਹਭਾਵੇਨ ਸਤ੍ਤਾ ਦਸਪਿ ਵਸ੍ਸਾਨਿ ਵੀਸਤਿਪਿ ਸਟ੍ਠਿਪਿ ਵਸ੍ਸਾਨਿ ‘‘ਅਜ੍ਜ ਲਭਿਸ੍ਸਾਮ, ਸ੍ਵੇ ਲਭਿਸ੍ਸਾਮਾ’’ਤਿ ਰਾਜਾਨਂ ਉਪਟ੍ਠਹਨ੍ਤਿ, ਕਸਿਕਮ੍ਮਾਦੀਨਿ ਕਰੋਨ੍ਤਿ, ਉਭਤੋਬ੍ਯੂਲ਼੍ਹਂ ਸਙ੍ਗਾਮਂ ਪਕ੍ਖਨ੍ਦਨ੍ਤਿ, ਅਜਪਥਸਙ੍ਕੁਪਥਾਦਯੋ ਪਟਿਪਜ੍ਜਨ੍ਤਿ, ਨਾਵਾਯ ਮਹਾਸਮੁਦ੍ਦਂ ਪਵਿਸਨ੍ਤਿ. ਜੀਵਿਤਾਸਾਯ ਦੁਪ੍ਪਜਹਤ੍ਤਾ ਸਮ੍ਪਤ੍ਤੇ ਮਰਣਕਾਲੇਪਿ ਵਸ੍ਸਸਤਜੀਵਿਂ ਅਤ੍ਤਾਨਂ ਮਞ੍ਞਨ੍ਤਿ. ਸੋ ਕਮ੍ਮਕਮ੍ਮਨਿਮਿਤ੍ਤਾਦੀਨਿ ਪਸ੍ਸਨ੍ਤੋਪਿ ‘‘ਦਾਨਂ ਦੇਹਿ ਪੂਜਂ, ਕਰੋਹੀ’’ਤਿ ਅਨੁਕਮ੍ਪਕੇਹਿ ਵੁਚ੍ਚਮਾਨੋ ‘‘ਨਾਹਂ ਮਰਿਸ੍ਸਾਮਿ, ਜੀਵਿਸ੍ਸਾਮਿ’’ਚ੍ਚੇਵ ਆਸਾਯ ਕਸ੍ਸਚਿ ਵਚਨਂ ਨ ਗਣ੍ਹਾਤਿ.

੧੨੦. ਦੁਤਿਯੇ ਪੁਬ੍ਬਕਾਰੀਤਿ ਪਠਮਂ ਉਪਕਾਰਸ੍ਸ ਕਾਰਕੋ. ਕਤਞ੍ਞੂਕਤਵੇਦੀਤਿ ਤੇਨ ਕਤਂ ਞਤ੍ਵਾ ਪਚ੍ਛਾ ਕਾਰਕੋ. ਤੇਸੁ ਪੁਬ੍ਬਕਾਰੀ ‘‘ਇਣਂ ਦੇਮੀ’’ਤਿ ਸਞ੍ਞਂ ਕਰੋਤਿ, ਪਚ੍ਛਾ ਕਾਰਕੋ ‘‘ਇਣਂ ਜੀਰਾਪੇਮੀ’’ਤਿ ਸਞ੍ਞਂ ਕਰੋਤਿ.

੧੨੧. ਤਤਿਯੇ ਤਿਤ੍ਤੋ ਚ ਤਪ੍ਪੇਤਾ ਚਾਤਿ ਪਚ੍ਚੇਕਬੁਦ੍ਧੋ ਚ ਤਥਾਗਤਸਾਵਕੋ ਚ ਖੀਣਾਸਵੋ ਤਿਤ੍ਤੋ ਨਾਮ, ਤਥਾਗਤੋ ਅਰਹਂ ਸਮ੍ਮਾਸਮ੍ਬੁਦ੍ਧੋ ਤਿਤ੍ਤੋ ਚ ਤਪ੍ਪੇਤਾ ਚ.

੧੨੨. ਚਤੁਤ੍ਥੇ ਦੁਤ੍ਤਪ੍ਪਯਾਤਿ ਦਾਯਕੇਨ ਦੁਤ੍ਤਪ੍ਪਯਾ ਤਪ੍ਪੇਤੁਂ ਨ ਸੁਕਰਾ. ਨਿਕ੍ਖਿਪਤੀਤਿ ਨਿਦਹਤਿ ਨ ਪਰਿਭੁਞ੍ਜਤਿ. ਵਿਸ੍ਸਜ੍ਜੇਤੀਤਿ ਪਰੇਸਂ ਦੇਤਿ.

੧੨੩. ਪਞ੍ਚਮੇ ਨ ਵਿਸ੍ਸਜ੍ਜੇਤੀਤਿ ਸਬ੍ਬਂਯੇਵ ਪਰੇਸਂ ਨ ਦੇਤਿ, ਅਤ੍ਤਨੋ ਪਨ ਯਾਪਨਮਤ੍ਤਂ ਗਹੇਤ੍ਵਾ ਅਵਸੇਸਂ ਦੇਤਿ.

੧੨੪. ਛਟ੍ਠੇ ਸੁਭਨਿਮਿਤ੍ਤਨ੍ਤਿ ਇਟ੍ਠਾਰਮ੍ਮਣਂ.

੧੨੫. ਸਤ੍ਤਮੇ ਪਟਿਘਨਿਮਿਤ੍ਤਨ੍ਤਿ ਅਨਿਟ੍ਠਨਿਮਿਤ੍ਤਂ.

੧੨੬. ਅਟ੍ਠਮੇ ਪਰਤੋ ਚ ਘੋਸੋਤਿ ਪਰਸ੍ਸ ਸਨ੍ਤਿਕਾ ਅਸ੍ਸਦ੍ਧਮ੍ਮਸਵਨਂ.

੧੨੭. ਨਵਮੇ ਪਰਤੋ ਚ ਘੋਸੋਤਿ ਪਰਸ੍ਸ ਸਨ੍ਤਿਕਾ ਸਦ੍ਧਮ੍ਮਸਵਨਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਆਸਾਦੁਪ੍ਪਜਹਵਗ੍ਗੋ ਪਠਮੋ.

(੧੨) ੨. ਆਯਾਚਨਵਗ੍ਗਵਣ੍ਣਨਾ

੧੩੧. ਦੁਤਿਯਸ੍ਸ ਪਠਮੇ ਏਵਂ ਸਮ੍ਮਾ ਆਯਾਚਮਾਨੋ ਆਯਾਚੇਯ੍ਯਾਤਿ ਸਦ੍ਧੋ ਭਿਕ੍ਖੁ ਉਟ੍ਠਹਿਤ੍ਵਾ ‘‘ਯਾਦਿਸੋ ਸਾਰਿਪੁਤ੍ਤਤ੍ਥੇਰੋ ਪਞ੍ਞਾਯ, ਅਹਮ੍ਪਿ ਤਾਦਿਸੋ ਹੋਮਿ. ਯਾਦਿਸੋ ਮਹਾਮੋਗ੍ਗਲ੍ਲਾਨਤ੍ਥੇਰੋ ਇਦ੍ਧਿਯਾ, ਅਹਮ੍ਪਿ ਤਾਦਿਸੋ ਹੋਮੀ’’ਤਿ ਏਵਂ ਆਯਾਚਨ੍ਤੋ ਪਿਹੇਨ੍ਤੋ ਪਤ੍ਥੇਨ੍ਤੋ ਯਂ ਅਤ੍ਥਿ, ਤਸ੍ਸੇਵ ਪਤ੍ਥਿਤਤ੍ਤਾ ਸਮ੍ਮਾ ਪਤ੍ਥੇਯ੍ਯ ਨਾਮ. ਇਤੋ ਉਤ੍ਤਰਿ ਪਤ੍ਥੇਨ੍ਤੋ ਮਿਚ੍ਛਾ ਪਤ੍ਥੇਯ੍ਯ. ਏਵਰੂਪਾ ਹਿ ਪਤ੍ਥਨਾ ਯਂ ਨਤ੍ਥਿ, ਤਸ੍ਸ ਪਤ੍ਥਿਤਤ੍ਤਾ ਮਿਚ੍ਛਾਪਤ੍ਥਨਾ ਨਾਮ ਹੋਤਿ. ਕਿਂ ਕਾਰਣਾ? ਏਸਾ, ਭਿਕ੍ਖਵੇ, ਤੁਲਾ ਏਤਂ ਪਮਾਣਨ੍ਤਿ ਯਥਾ ਹਿ ਸੁਵਣ੍ਣਂ ਵਾ ਹਿਰਞ੍ਞਂ ਵਾ ਤੁਲੇਨ੍ਤਸ੍ਸ ਤੁਲਾ ਇਚ੍ਛਿਤਬ੍ਬਾ, ਧਞ੍ਞਂ ਮਿਨਨ੍ਤਸ੍ਸ ਮਾਨਨ੍ਤਿ ਤੁਲਨੇ ਤੁਲਾ, ਮਿਨਨੇ ਚ ਮਾਨਂ ਪਮਾਣਂ ਹੋਤਿ, ਏਵਮੇਵ ਮਮ ਸਾਵਕਾਨਂ ਭਿਕ੍ਖੂਨਂ ਏਸਾ ਤੁਲਾ ਏਤਂ ਪਮਾਣਂ ਯਦਿਦਂ ਸਾਰਿਪੁਤ੍ਤਮੋਗ੍ਗਲ੍ਲਾਨਾ. ਤੇ ਗਹੇਤ੍ਵਾ ‘‘ਅਹਮ੍ਪਿ ਞਾਣੇਨ ਵਾ ਇਦ੍ਧਿਯਾ ਵਾ ਏਤਮ੍ਪਮਾਣੋ ਹੋਮੀ’’ਤਿ ਅਤ੍ਤਾਨਂ ਤੁਲੇਤੁਂ ਵਾ ਪਮਾਣੇਤੁਂ ਵਾ ਸਕ੍ਕਾ, ਨ ਇਤੋ ਅਞ੍ਞਥਾ.

੧੩੨. ਦੁਤਿਯਾਦੀਸੁਪਿ ਏਸੇਵ ਨਯੋ. ਇਦਂ ਪਨੇਤ੍ਥ ਵਿਸੇਸਮਤ੍ਤਂ – ਖੇਮਾ ਚ ਭਿਕ੍ਖੁਨੀ ਉਪ੍ਪਲਵਣ੍ਣਾ ਚਾਤਿ ਏਤਾਸੁ ਹਿ ਖੇਮਾ ਪਞ੍ਞਾਯ ਅਗ੍ਗਾ, ਉਪ੍ਪਲਵਣ੍ਣਾ ਇਦ੍ਧਿਯਾ. ਤਸ੍ਮਾ ‘‘ਪਞ੍ਞਾਯ ਵਾ ਇਦ੍ਧਿਯਾ ਵਾ ਏਤਾਦਿਸੀ ਹੋਮੀ’’ਤਿ ਸਮ੍ਮਾ ਆਯਾਚਮਾਨਾ ਆਯਾਚੇਯ੍ਯ. ਤਥਾ ਚਿਤ੍ਤੋ ਗਹਪਤਿ ਪਞ੍ਞਾਯ ਅਗ੍ਗੋ, ਹਤ੍ਥਕੋ ਰਾਜਕੁਮਾਰੋ ਮਹਿਦ੍ਧਿਕਤਾਯ. ਤਸ੍ਮਾ ‘‘ਪਞ੍ਞਾਯ ਵਾ ਇਦ੍ਧਿਯਾ ਵਾ ਏਦਿਸੋ ਹੋਮੀ’’ਤਿ ਸਮ੍ਮਾ ਆਯਾਚਮਾਨੋ ਆਯਾਚੇਯ੍ਯ. ਖੁਜ੍ਜੁਤ੍ਤਰਾਪਿ ਮਹਾਪਞ੍ਞਤਾਯ ਅਗ੍ਗਾ, ਨਨ੍ਦਮਾਤਾ ਮਹਿਦ੍ਧਿਕਤਾਯ. ਤਸ੍ਮਾ ‘‘ਪਞ੍ਞਾਯ ਵਾ ਇਦ੍ਧਿਯਾ ਵਾ ਏਤਾਦਿਸੀ ਹੋਮੀ’’ਤਿ ਸਮ੍ਮਾ ਆਯਾਚਮਾਨਾ ਆਯਾਚੇਯ੍ਯ.

੧੩੫. ਪਞ੍ਚਮੇ ਖਤਨ੍ਤਿ ਗੁਣਾਨਂ ਖਤਤ੍ਤਾ ਖਤਂ. ਉਪਹਤਨ੍ਤਿ ਗੁਣਾਨਂ ਉਪਹਤਤ੍ਤਾ ਉਪਹਤਂ, ਛਿਨ੍ਨਗੁਣਂ ਨਟ੍ਠਗੁਣਨ੍ਤਿ ਅਤ੍ਥੋ. ਅਤ੍ਤਾਨਂ ਪਰਿਹਰਤੀਤਿ ਨਿਗ੍ਗੁਣਂ ਅਤ੍ਤਾਨਂ ਜਗ੍ਗਤਿ ਗੋਪਾਯਤਿ. ਸਾਵਜ੍ਜੋਤਿ ਸਦੋਸੋ. ਸਾਨੁਵਜ੍ਜੋਤਿ ਸਉਪਵਾਦੋ. ਪਸਵਤੀਤਿ ਪਟਿਲਭਤਿ. ਅਨਨੁਵਿਚ੍ਚਾਤਿ ਅਜਾਨਿਤ੍ਵਾ ਅਵਿਨਿਚ੍ਛਿਨਿਤ੍ਵਾ. ਅਪਰਿਯੋਗਾਹੇਤ੍ਵਾਤਿ ਅਨਨੁਪਵਿਸਿਤ੍ਵਾ. ਅਵਣ੍ਣਾਰਹਸ੍ਸਾਤਿ ਅਵਣ੍ਣਯੁਤ੍ਤਸ੍ਸ ਮਿਚ੍ਛਾਪਟਿਪਨ੍ਨਸ੍ਸ ਤਿਤ੍ਥਿਯਸ੍ਸ ਵਾ ਤਿਤ੍ਥਿਯਸਾਵਕਸ੍ਸ ਵਾ. ਵਣ੍ਣਂ ਭਾਸਤੀਤਿ ‘‘ਸੁਪ੍ਪਟਿਪਨ੍ਨੋ ਏਸ ਸਮ੍ਮਾਪਟਿਪਨ੍ਨੋ’’ਤਿ ਗੁਣਂ ਕਥੇਤਿ. ਵਣ੍ਣਾਰਹਸ੍ਸਾਤਿ ਬੁਦ੍ਧਾਦੀਸੁ ਅਞ੍ਞਤਰਸ੍ਸ ਸਮ੍ਮਾਪਟਿਪਨ੍ਨਸ੍ਸ. ਅਵਣ੍ਣਂ ਭਾਸਤੀਤਿ ‘‘ਦੁਪ੍ਪਟਿਪਨ੍ਨੋ ਏਸ ਮਿਚ੍ਛਾਪਟਿਪਨ੍ਨੋ’’ਤਿ ਅਗੁਣਂ ਕਥੇਤਿ. ਅਵਣ੍ਣਾਰਹਸ੍ਸ ਅਵਣ੍ਣਂ ਭਾਸਤੀਤਿ ਇਧੇਕਚ੍ਚੋ ਪੁਗ੍ਗਲੋ ਦੁਪ੍ਪਟਿਪਨ੍ਨਾਨਂ ਮਿਚ੍ਛਾਪਟਿਪਨ੍ਨਾਨਂ ਤਿਤ੍ਥਿਯਾਨਂ ਤਿਤ੍ਥਿਯਸਾਵਕਾਨਂ ‘‘ਇਤਿਪਿ ਦੁਪ੍ਪਟਿਪਨ੍ਨਾ ਇਤਿਪਿ ਮਿਚ੍ਛਾਪਟਿਪਨ੍ਨਾ’’ਤਿ ਅਵਣ੍ਣਂ ਭਾਸਤਿ. ਵਣ੍ਣਾਰਹਸ੍ਸ ਵਣ੍ਣਂ ਭਾਸਤੀਤਿ ਸੁਪ੍ਪਟਿਪਨ੍ਨਾਨਂ ਸਮ੍ਮਾਪਟਿਪਨ੍ਨਾਨਂ ਬੁਦ੍ਧਾਨਂ ਬੁਦ੍ਧਸਾਵਕਾਨਂ ‘‘ਇਤਿਪਿ ਸੁਪ੍ਪਟਿਪਨ੍ਨਾ ਇਤਿਪਿ ਸਮ੍ਮਾਪਟਿਪਨ੍ਨਾ’’ਤਿ ਵਣ੍ਣਂ ਭਾਸਤਿ.

੧੩੬. ਛਟ੍ਠੇ ਅਪ੍ਪਸਾਦਨੀਯੇ ਠਾਨੇਤਿ ਅਪ੍ਪਸਾਦਕਾਰਣੇ. ਪਸਾਦਂ ਉਪਦਂਸੇਤੀਤਿ ਦੁਪ੍ਪਟਿਪਦਾਯ ਮਿਚ੍ਛਾਪਟਿਪਦਾਯ ‘‘ਅਯਂ ਸੁਪ੍ਪਟਿਪਦਾ ਸਮ੍ਮਾਪਟਿਪਦਾ’’ਤਿ ਪਸਾਦਂ ਜਨੇਤਿ. ਪਸਾਦਨੀਯੇ ਠਾਨੇ ਅਪ੍ਪਸਾਦਨ੍ਤਿ ਸੁਪ੍ਪਟਿਪਦਾਯ ਸਮ੍ਮਾਪਟਿਪਦਾਯ ‘‘ਅਯਂ ਦੁਪ੍ਪਟਿਪਦਾ ਮਿਚ੍ਛਾਪਟਿਪਦਾ’’ਤਿ ਅਪ੍ਪਸਾਦਂ ਜਨੇਤੀਤਿ. ਸੇਸਮੇਤ੍ਥ ਉਤ੍ਤਾਨਮੇਵ.

੧੩੭. ਸਤ੍ਤਮੇ ਦ੍ਵੀਸੂਤਿ ਦ੍ਵੀਸੁ ਓਕਾਸੇਸੁ ਦ੍ਵੀਸੁ ਕਾਰਣੇਸੁ. ਮਿਚ੍ਛਾਪਟਿਪਜ੍ਜਮਾਨੋਤਿ ਮਿਚ੍ਛਾਪਟਿਪਤ੍ਤਿਂ ਪਟਿਪਜ੍ਜਮਾਨੋ. ਮਾਤਰਿ ਚ ਪਿਤਰਿ ਚਾਤਿ ਮਿਤ੍ਤਵਿਨ੍ਦਕੋ ਵਿਯ ਮਾਤਰਿ, ਅਜਾਤਸਤ੍ਤੁ ਵਿਯ ਪਿਤਰਿ. ਸੁਕ੍ਕਪਕ੍ਖੋ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

੧੩੮. ਅਟ੍ਠਮੇ ਤਥਾਗਤੇ ਚ ਤਥਾਗਤਸਾਵਕੇ ਚਾਤਿ ਦੇਵਦਤ੍ਤੋ ਵਿਯ ਤਥਾਗਤੇ, ਕੋਕਾਲਿਕੋ ਵਿਯ ਚ ਤਥਾਗਤਸਾਵਕੇ. ਸੁਕ੍ਕਪਕ੍ਖੇ ਆਨਨ੍ਦਤ੍ਥੇਰੋ ਵਿਯ ਤਥਾਗਤੇ, ਨਨ੍ਦਗੋਪਾਲਕਸੇਟ੍ਠਿਪੁਤ੍ਤੋ ਵਿਯ ਚ ਤਥਾਗਤਸਾਵਕੇ.

੧੩੯. ਨਵਮੇ ਸਚਿਤ੍ਤਵੋਦਾਨਨ੍ਤਿ ਸਕਚਿਤ੍ਤਸ੍ਸ ਵੋਦਾਨਂ, ਅਟ੍ਠਨ੍ਨਂ ਸਮਾਪਤ੍ਤੀਨਂ ਏਤਂ ਨਾਮਂ. ਨ ਚ ਕਿਞ੍ਚਿ ਲੋਕੇ ਉਪਾਦਿਯਤੀਤਿ ਲੋਕੇ ਚ ਰੂਪਾਦੀਸੁ ਧਮ੍ਮੇਸੁ ਕਿਞ੍ਚਿ ਏਕਂ ਧਮ੍ਮਮ੍ਪਿ ਨ ਗਣ੍ਹਾਤਿ ਨ ਪਰਾਮਸਤਿ. ਏਵਮੇਤ੍ਥ ਅਨੁਪਾਦਾਨਂ ਨਾਮ ਦੁਤਿਯੋ ਧਮ੍ਮੋ ਹੋਤਿ. ਦਸਮੇਕਾਦਸਮਾਨਿ ਉਤ੍ਤਾਨਤ੍ਥਾਨੇਵਾਤਿ.

ਆਯਾਚਨਵਗ੍ਗੋ ਦੁਤਿਯੋ.

(੧੩) ੩. ਦਾਨਵਗ੍ਗਵਣ੍ਣਨਾ

੧੪੨. ਤਤਿਯਸ੍ਸ ਪਠਮੇ ਦਾਨਾਨੀਤਿ ਦਿਯ੍ਯਨਕਵਸੇਨ ਦਾਨਾਨਿ, ਦੇਯ੍ਯਧਮ੍ਮਸ੍ਸੇਤਂ ਨਾਮਂ. ਸਵਤ੍ਥੁਕਾ ਵਾ ਚੇਤਨਾ ਦਾਨਂ, ਸਮ੍ਪਤ੍ਤਿਪਰਿਚ੍ਚਾਗਸ੍ਸੇਤਂ ਨਾਮਂ. ਆਮਿਸਦਾਨਨ੍ਤਿ ਚਤ੍ਤਾਰੋ ਪਚ੍ਚਯਾ ਦਿਯ੍ਯਨਕਵਸੇਨ ਆਮਿਸਦਾਨਂ ਨਾਮ. ਧਮ੍ਮਦਾਨਨ੍ਤਿ ਇਧੇਕਚ੍ਚੋ ਅਮਤਪਤ੍ਤਿਪਟਿਪਦਂ ਕਥੇਤ੍ਵਾ ਦੇਤਿ, ਇਦਂ ਧਮ੍ਮਦਾਨਂ ਨਾਮ.

੧੪੩. ਦੁਤਿਯੇ ਚਤ੍ਤਾਰੋ ਪਚ੍ਚਯਾ ਯਜਨਕਵਸੇਨ ਯਾਗੋ ਨਾਮ ਧਮ੍ਮੋਪਿ ਯਜਨਕਵਸੇਨ ਯਾਗੋਤਿ ਵੇਦਿਤਬ੍ਬੋ.

੧੪੪. ਤਤਿਯੇ ਆਮਿਸਸ੍ਸ ਚਜਨਂ ਆਮਿਸਚਾਗੋ, ਧਮ੍ਮਸ੍ਸ ਚਜਨਂ ਧਮ੍ਮਚਾਗੋ. ਚਤੁਤ੍ਥੇ ਉਪਸਗ੍ਗਮਤ੍ਤਂ ਵਿਸੇਸੋ.

੧੪੬. ਪਞ੍ਚਮੇ ਚਤੁਨ੍ਨਂ ਪਚ੍ਚਯਾਨਂ ਭੁਞ੍ਜਨਂ ਆਮਿਸਭੋਗੋ, ਧਮ੍ਮਸ੍ਸ ਭੁਞ੍ਜਨਂ ਧਮ੍ਮਭੋਗੋ. ਛਟ੍ਠੇ ਉਪਸਗ੍ਗਮਤ੍ਤਂ ਵਿਸੇਸੋ.

੧੪੮. ਸਤ੍ਤਮੇ ਚਤੁਨ੍ਨਂ ਪਚ੍ਚਯਾਨਂ ਸਂਵਿਭਜਨਂ ਆਮਿਸਸਂਵਿਭਾਗੋ, ਧਮ੍ਮਸ੍ਸ ਸਂਵਿਭਜਨਂ ਧਮ੍ਮਸਂਵਿਭਾਗੋ.

੧੪੯. ਅਟ੍ਠਮੇ ਚਤੂਹਿ ਪਚ੍ਚਯੇਹਿ ਸਙ੍ਗਹੋ ਆਮਿਸਸਙ੍ਗਹੋ, ਧਮ੍ਮੇਨ ਸਙ੍ਗਹੋ ਧਮ੍ਮਸਙ੍ਗਹੋ.

੧੫੦. ਨਵਮੇ ਚਤੂਹਿ ਪਚ੍ਚਯੇਹਿ ਅਨੁਗ੍ਗਣ੍ਹਨਂ ਆਮਿਸਾਨੁਗ੍ਗਹੋ, ਧਮ੍ਮੇਨ ਅਨੁਗ੍ਗਣ੍ਹਨਂ ਧਮ੍ਮਾਨੁਗ੍ਗਹੋ.

੧੫੧. ਦਸਮੇ ਚਤੂਹਿ ਪਚ੍ਚਯੇਹਿ ਅਨੁਕਮ੍ਪਨਂ ਆਮਿਸਾਨੁਕਮ੍ਪਾ, ਧਮ੍ਮੇਨ ਅਨੁਕਮ੍ਪਨਂ ਧਮ੍ਮਾਨੁਕਮ੍ਪਾਤਿ.

ਦਾਨਵਗ੍ਗੋ ਤਤਿਯੋ.

(੧੪) ੪. ਸਨ੍ਥਾਰਵਗ੍ਗਵਣ੍ਣਨਾ

੧੫੨. ਚਤੁਤ੍ਥਸ੍ਸ ਪਠਮੇ ਚਤੂਹਿ ਪਚ੍ਚਯੇਹਿ ਅਤ੍ਤਨੋ ਚ ਪਰਸ੍ਸ ਚ ਅਨ੍ਤਰਪਟਿਚ੍ਛਾਦਨਵਸੇਨ ਸਨ੍ਥਰਣਂ ਆਮਿਸਸਨ੍ਥਾਰੋ, ਧਮ੍ਮੇਨ ਸਨ੍ਥਰਣਂ ਧਮ੍ਮਸਨ੍ਥਾਰੋ. ਦੁਤਿਯੇ ਉਪਸਗ੍ਗਮਤ੍ਤਂ ਵਿਸੇਸੋ.

੧੫੪. ਤਤਿਯੇ ਵੁਤ੍ਤਪ੍ਪਕਾਰਸ੍ਸ ਆਮਿਸਸ੍ਸ ਏਸਨਾ ਆਮਿਸੇਸਨਾ, ਧਮ੍ਮਸ੍ਸ ਏਸਨਾ ਧਮ੍ਮੇਸਨਾ. ਚਤੁਤ੍ਥੇ ਉਪਸਗ੍ਗਮਤ੍ਤਮੇਵ ਵਿਸੇਸੋ.

੧੫੬. ਪਞ੍ਚਮੇ ਮਤ੍ਥਕਪ੍ਪਤ੍ਤਾ ਆਮਿਸਪਰਿਯੇਸਨਾ ਆਮਿਸਪਰਿਯੇਟ੍ਠਿ, ਮਤ੍ਥਕਪ੍ਪਤ੍ਤਾਵ ਧਮ੍ਮਪਰਿਯੇਸਨਾ ਧਮ੍ਮਪਰਿਯੇਟ੍ਠੀਤਿ ਵੁਤ੍ਤਾ.

੧੫੭. ਛਟ੍ਠੇ ਆਮਿਸੇਨ ਪੂਜਨਂ ਆਮਿਸਪੂਜਾ, ਧਮ੍ਮੇਨ ਪੂਜਨਂ ਧਮ੍ਮਪੂਜਾ.

੧੫੮. ਸਤ੍ਤਮੇ ਆਤਿਥੇਯ੍ਯਾਨੀਤਿ ਆਗਨ੍ਤੁਕਦਾਨਾਨਿ. ਅਤਿਥੇਯ੍ਯਾਨੀਤਿਪਿ ਪਾਠੋ.

੧੫੯. ਅਟ੍ਠਮੇ ਆਮਿਸਂ ਇਜ੍ਝਨਕਸਮਿਜ੍ਝਨਕਵਸੇਨ ਆਮਿਸਿਦ੍ਧਿ, ਧਮ੍ਮੋਪਿ ਇਜ੍ਝਨਕਸਮਿਜ੍ਝਨਕਵਸੇਨ ਧਮ੍ਮਿਦ੍ਧਿ.

੧੬੦. ਨਵਮੇ ਆਮਿਸੇਨ ਵਡ੍ਢਨਂ ਆਮਿਸਵੁਦ੍ਧਿ, ਧਮ੍ਮੇਨ ਵਡ੍ਢਨਂ ਧਮ੍ਮਵੁਦ੍ਧਿ.

੧੬੧. ਦਸਮੇ ਰਤਿਕਰਣਟ੍ਠੇਨ ਆਮਿਸਂ ਆਮਿਸਰਤਨਂ, ਧਮ੍ਮੋ ਧਮ੍ਮਰਤਨਂ.

੧੬੨. ਏਕਾਦਸਮੇ ਆਮਿਸਸ੍ਸ ਚਿਨਨਂ ਵਡ੍ਢਨਂ ਆਮਿਸਸਨ੍ਨਿਚਯੋ, ਧਮ੍ਮਸ੍ਸ ਚਿਨਨਂ ਵਡ੍ਢਨਂ ਧਮ੍ਮਸਨ੍ਨਿਚਯੋ.

੧੬੩. ਦ੍ਵਾਦਸਮੇ ਆਮਿਸਸ੍ਸ ਵਿਪੁਲਭਾਵੋ ਆਮਿਸਵੇਪੁਲ੍ਲਂ, ਧਮ੍ਮਸ੍ਸ ਵਿਪੁਲਭਾਵੋ ਧਮ੍ਮਵੇਪੁਲ੍ਲਨ੍ਤਿ.

ਸਨ੍ਥਾਰਵਗ੍ਗੋ ਚਤੁਤ੍ਥੋ.

(੧੫) ੫. ਸਮਾਪਤ੍ਤਿਵਗ੍ਗਵਣ੍ਣਨਾ

੧੬੪. ਪਞ੍ਚਮਸ੍ਸ ਪਠਮੇ ਸਮਾਪਤ੍ਤਿਕੁਸਲਤਾਤਿ ਆਹਾਰਸਪ੍ਪਾਯਂ ਉਤੁਸਪ੍ਪਾਯਂ ਪਰਿਗ੍ਗਣ੍ਹਿਤ੍ਵਾ ਸਮਾਪਤ੍ਤਿਸਮਾਪਜ੍ਜਨੇ ਛੇਕਤਾ. ਸਮਾਪਤ੍ਤਿਵੁਟ੍ਠਾਨਕੁਸਲਤਾਤਿ ਯਥਾਪਰਿਚ੍ਛੇਦੇਨ ਗਤੇ ਕਾਲੇ ਵਿਯਤ੍ਤੋ ਹੁਤ੍ਵਾ ਉਟ੍ਠਹਨ੍ਤੋ ਵੁਟ੍ਠਾਨਕੁਸਲੋ ਨਾਮ ਹੋਤਿ, ਏਵਂ ਕੁਸਲਤਾ.

੧੬੫. ਦੁਤਿਯੇ ਅਜ੍ਜਵਨ੍ਤਿ ਉਜੁਭਾਵੋ. ਮਦ੍ਦਵਨ੍ਤਿ ਮੁਦੁਭਾਵੋ.

੧੬੬. ਤਤਿਯੇ ਖਨ੍ਤੀਤਿ ਅਧਿਵਾਸਨਖਨ੍ਤਿ. ਸੋਰਚ੍ਚਨ੍ਤਿ ਸੁਸੀਲ੍ਯਭਾਵੇਨ ਸੁਰਤਭਾਵੋ.

੧੬੭. ਚਤੁਤ੍ਥੇ ਸਾਖਲ੍ਯਨ੍ਤਿ ਸਣ੍ਹਵਾਚਾਵਸੇਨ ਸਮ੍ਮੋਦਮਾਨਭਾਵੋ. ਪਟਿਸਨ੍ਥਾਰੋਤਿ ਆਮਿਸੇਨ ਵਾ ਧਮ੍ਮੇਨ ਵਾ ਪਟਿਸਨ੍ਥਰਣਂ.

੧੬੮. ਪਞ੍ਚਮੇ ਅਵਿਹਿਂਸਾਤਿ ਕਰੁਣਾਪੁਬ੍ਬਭਾਗੋ. ਸੋਚੇਯ੍ਯਨ੍ਤਿ ਸੀਲਵਸੇਨ ਸੁਚਿਭਾਵੋ. ਛਟ੍ਠਸਤ੍ਤਮਾਨਿ ਉਤ੍ਤਾਨਤ੍ਥਾਨੇਵ.

੧੭੧. ਅਟ੍ਠਮੇ ਪਟਿਸਙ੍ਖਾਨਬਲਨ੍ਤਿ ਪਚ੍ਚਵੇਕ੍ਖਣਬਲਂ.

੧੭੨. ਨਵਮੇ ਮੁਟ੍ਠਸ੍ਸਚ੍ਚੇ ਅਕਮ੍ਪਨੇਨ ਸਤਿਯੇਵ ਸਤਿਬਲਂ. ਉਦ੍ਧਚ੍ਚੇ ਅਕਮ੍ਪਨੇਨ ਸਮਾਧਿਯੇਵ ਸਮਾਧਿਬਲਂ.

੧੭੩. ਦਸਮੇ ਸਮਥੋਤਿ ਚਿਤ੍ਤੇਕਗ੍ਗਤਾ. ਵਿਪਸ੍ਸਨਾਤਿ ਸਙ੍ਖਾਰਪਰਿਗ੍ਗਾਹਕਞ੍ਞਾਣਂ.

੧੭੪. ਏਕਾਦਸਮੇ ਸੀਲਵਿਪਤ੍ਤੀਤਿ ਦੁਸ੍ਸੀਲ੍ਯਂ. ਦਿਟ੍ਠਿਵਿਪਤ੍ਤੀਤਿ ਮਿਚ੍ਛਾਦਿਟ੍ਠਿ.

੧੭੫. ਦ੍ਵਾਦਸਮੇ ਸੀਲਸਮ੍ਪਦਾਤਿ ਪਰਿਪੁਣ੍ਣਸੀਲਤਾ. ਦਿਟ੍ਠਿਸਮ੍ਪਦਾਤਿ ਸਮ੍ਮਾਦਿਟ੍ਠਿਕਭਾਵੋ. ਤੇਨ ਕਮ੍ਮਸ੍ਸਕਤਸਮ੍ਮਾਦਿਟ੍ਠਿ, ਝਾਨਸਮ੍ਮਾਦਿਟ੍ਠਿ, ਵਿਪਸ੍ਸਨਾਸਮ੍ਮਾਦਿਟ੍ਠਿ, ਮਗ੍ਗਸਮ੍ਮਾਦਿਟ੍ਠਿ, ਫਲਸਮ੍ਮਾਦਿਟ੍ਠੀਤਿ ਸਬ੍ਬਾਪਿ ਪਞ੍ਚਵਿਧਾ ਸਮ੍ਮਾਦਿਟ੍ਠਿ ਸਙ੍ਗਹਿਤਾ ਹੋਤਿ.

੧੭੬. ਤੇਰਸਮੇ ਸੀਲਵਿਸੁਦ੍ਧੀਤਿ ਵਿਸੁਦ੍ਧਿਸਮ੍ਪਾਪਕਂ ਸੀਲਂ. ਦਿਟ੍ਠਿਵਿਸੁਦ੍ਧੀਤਿ ਵਿਸੁਦ੍ਧਿਸਮ੍ਪਾਪਿਕਾ ਚਤੁਮਗ੍ਗਸਮ੍ਮਾਦਿਟ੍ਠਿ, ਪਞ੍ਚਵਿਧਾਪਿ ਵਾ ਸਮ੍ਮਾਦਿਟ੍ਠਿ.

੧੭੭. ਚੁਦ੍ਦਸਮੇ ਦਿਟ੍ਠਿਵਿਸੁਦ੍ਧੀਤਿ ਵਿਸੁਦ੍ਧਿਸਮ੍ਪਾਪਿਕਾ ਸਮ੍ਮਾਦਿਟ੍ਠਿਯੇਵ. ਯਥਾਦਿਟ੍ਠਿਸ੍ਸ ਚ ਪਧਾਨਨ੍ਤਿ ਹੇਟ੍ਠਿਮਮਗ੍ਗਸਮ੍ਪਯੁਤ੍ਤਂ ਵੀਰਿਯਂ. ਤਞ੍ਹਿ ਤਸ੍ਸਾ ਦਿਟ੍ਠਿਯਾ ਅਨੁਰੂਪਤ੍ਤਾ ‘‘ਯਥਾਦਿਟ੍ਠਿਸ੍ਸ ਚ ਪਧਾਨ’’ਨ੍ਤਿ ਵੁਤ੍ਤਂ.

੧੭੮. ਪਨ੍ਨਰਸਮੇ ਅਸਨ੍ਤੁਟ੍ਠਿਤਾ ਚ ਕੁਸਲੇਸੁ ਧਮ੍ਮੇਸੂਤਿ ਅਞ੍ਞਤ੍ਰ ਅਰਹਤ੍ਤਮਗ੍ਗਾ ਕੁਸਲੇਸੁ ਧਮ੍ਮੇਸੁ ਅਸਨ੍ਤੁਟ੍ਠਿਭਾਵੋ.

੧੭੯. ਸੋਲ਼ਸਮੇ ਮੁਟ੍ਠਸ੍ਸਚ੍ਚਨ੍ਤਿ ਮੁਟ੍ਠਸ੍ਸਤਿਭਾਵੋ. ਅਸਮ੍ਪਜਞ੍ਞਨ੍ਤਿ ਅਞ੍ਞਾਣਭਾਵੋ.

੧੮੦. ਸਤ੍ਤਰਸਮੇ ਅਪਿਲਾਪਨਲਕ੍ਖਣਾ ਸਤਿ. ਸਮ੍ਮਾ ਪਜਾਨਨਲਕ੍ਖਣਂ ਸਮ੍ਪਜਞ੍ਞਨ੍ਤਿ.

ਸਮਾਪਤ੍ਤਿਵਗ੍ਗੋ ਪਞ੍ਚਮੋ. ਤਤਿਯਪਣ੍ਣਾਸਕਂ ਨਿਟ੍ਠਿਤਂ.