੧. ਕੋਧਪੇਯ੍ਯਾਲਂ

੧੮੧. ਇਤੋ ਪਰੇਸੁ ਕੁਜ੍ਝਨਲਕ੍ਖਣੋ ਕੋਧੋ. ਉਪਨਨ੍ਧਨਲਕ੍ਖਣੋ ਉਪਨਾਹੋ. ਸੁਕਤਕਰਣਮਕ੍ਖਨਲਕ੍ਖਣੋ ਮਕ੍ਖੋ. ਯੁਗਗ੍ਗਾਹਲਕ੍ਖਣੋ ਪਲਾਸੋ. ਉਸੂਯਨਲਕ੍ਖਣਾ ਇਸ੍ਸਾ. ਪਞ੍ਚਮਚ੍ਛੇਰਭਾਵੋ ਮਚ੍ਛਰਿਯਂ. ਤਂ ਸਬ੍ਬਮ੍ਪਿ ਮਚ੍ਛਰਾਯਨਲਕ੍ਖਣਂ. ਕਤਪਟਿਚ੍ਛਾਦਨਲਕ੍ਖਣਾ ਮਾਯਾ. ਕੇਰਾਟਿਕਲਕ੍ਖਣਂ ਸਾਠੇਯ੍ਯਂ. ਅਲਜ੍ਜਨਾਕਾਰੋ ਅਹਿਰਿਕਂ. ਉਪਵਾਦਤੋ ਅਭਾਯਨਾਕਾਰੋ ਅਨੋਤ੍ਤਪ੍ਪਂ. ਅਕ੍ਕੋਧਾਦਯੋ ਤੇਸਂ ਪਟਿਪਕ੍ਖਵਸੇਨ ਵੇਦਿਤਬ੍ਬਾ.

੧੮੫. ਸੇਕ੍ਖਸ੍ਸ ਭਿਕ੍ਖੁਨੋਤਿ ਸਤ੍ਤਵਿਧਸ੍ਸਾਪਿ ਸੇਕ੍ਖਸ੍ਸ ਉਪਰਿਉਪਰਿਗੁਣੇਹਿ ਪਰਿਹਾਨਾਯ ਸਂਵਤ੍ਤਨ੍ਤਿ, ਪੁਥੁਜ੍ਜਨਸ੍ਸ ਪਨ ਪਠਮਤਰਂਯੇਵ ਪਰਿਹਾਨਾਯ ਸਂਵਤ੍ਤਨ੍ਤੀਤਿ ਵੇਦਿਤਬ੍ਬਾ. ਅਪਰਿਹਾਨਾਯਾਤਿ ਉਪਰਿਉਪਰਿਗੁਣੇਹਿ ਅਪਰਿਹਾਨਤ੍ਥਾਯ.

੧੮੭. ਯਥਾਭਤਂ ਨਿਕ੍ਖਿਤ੍ਤੋਤਿ ਯਥਾ ਆਨੇਤ੍ਵਾ ਨਿਕ੍ਖਿਤ੍ਤੋ, ਏਵਂ ਨਿਰਯੇ ਪਤਿਟ੍ਠਿਤੋ ਵਾਤਿ ਵੇਦਿਤਬ੍ਬੋ.

੧੯੦. ਏਕਚ੍ਚੋਤਿ ਯਸ੍ਸੇਤੇ ਕੋਧਾਦਯੋ ਅਤ੍ਥਿ, ਸੋ ਏਕਚ੍ਚੋ ਨਾਮ.

ਕੋਧਪੇਯ੍ਯਾਲਂ ਨਿਟ੍ਠਿਤਂ.