(੧੦) ੫. ਬਾਲਵਗ੍ਗਵਣ੍ਣਨਾ

੯੯. ਪਞ੍ਚਮਸ੍ਸ ਪਠਮੇ ਅਨਾਗਤਂ ਭਾਰਂ ਵਹਤੀਤਿ ‘‘ਸਮ੍ਮਜ੍ਜਨੀ ਪਦੀਪੋ ਚ, ਉਦਕਂ ਆਸਨੇਨ ਚ, ਛਨ੍ਦਪਾਰਿਸੁਦ੍ਧਿਉਤੁਕ੍ਖਾਨਂ, ਭਿਕ੍ਖੁਗਣਨਾ ਚ ਓਵਾਦੋ, ਪਾਤਿਮੋਕ੍ਖਂ ਥੇਰਭਾਰੋਤਿ ਵੁਚ੍ਚਤੀ’’ਤਿ ਇਮਂ ਦਸਵਿਧਂ ਥੇਰਭਾਰਂ ਨਵਕੋ ਹੁਤ੍ਵਾ ਥੇਰੇਨ ਅਨਜ੍ਝਿਟ੍ਠੋ ਕਰੋਨ੍ਤੋ ਅਨਾਗਤਂ ਭਾਰਂ ਵਹਤਿ ਨਾਮ. ਆਗਤਂ ਭਾਰਂ ਨ ਵਹਤੀਤਿ ਥੇਰੋ ਸਮਾਨੋ ਤਮੇਵ ਦਸਵਿਧਂ ਭਾਰਂ ਅਤ੍ਤਨਾ ਵਾ ਅਕਰੋਨ੍ਤੋ ਪਰਂ ਵਾ ਅਸਮਾਦਪੇਨ੍ਤੋ ਆਗਤਂ ਭਾਰਂ ਨ ਵਹਤਿ ਨਾਮ. ਦੁਤਿਯਸੁਤ੍ਤੇਪਿ ਇਮਿਨਾਵ ਨਯੇਨ ਅਤ੍ਥੋ ਵੇਦਿਤਬ੍ਬੋ.

੧੦੧. ਤਤਿਯੇ ਅਕਪ੍ਪਿਯੇ ਕਪ੍ਪਿਯਸਞ੍ਞੀਤਿ ਅਕਪ੍ਪਿਯੇ ਸੀਹਮਂਸਾਦਿਮ੍ਹਿ ‘‘ਕਪ੍ਪਿਯਂ ਇਦ’’ਨ੍ਤਿ ਏਵਂਸਞ੍ਞੀ. ਕਪ੍ਪਿਯੇ ਅਕਪ੍ਪਿਯਸਞ੍ਞੀਤਿ ਕੁਮ੍ਭੀਲਮਂਸਬਿਲ਼ਾਰਮਂਸਾਦਿਮ੍ਹਿ ਕਪ੍ਪਿਯੇ ‘‘ਅਕਪ੍ਪਿਯਂ ਇਦ’’ਨ੍ਤਿ ਏਵਂਸਞ੍ਞੀ. ਚਤੁਤ੍ਥਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

੧੦੩. ਪਞ੍ਚਮੇ ਅਨਾਪਤ੍ਤਿਯਾ ਆਪਤ੍ਤਿਸਞ੍ਞੀਤਿ ਆਪੁਚ੍ਛਿਤ੍ਵਾ ਭਣ੍ਡਕਂ ਧੋਵਨ੍ਤਸ੍ਸ, ਪਤ੍ਤਂ ਪਚਨ੍ਤਸ੍ਸ, ਕੇਸੇ ਛਿਨ੍ਦਨ੍ਤਸ੍ਸ, ਗਾਮਂ ਪਵਿਸਨ੍ਤਸ੍ਸਾਤਿਆਦੀਸੁ ਅਨਾਪਤ੍ਤਿ, ਤਤ੍ਥ ‘‘ਆਪਤ੍ਤਿ ਅਯ’’ਨ੍ਤਿ ਏਵਂਸਞ੍ਞੀ. ਆਪਤ੍ਤਿਯਾ ਅਨਾਪਤ੍ਤਿਸਞ੍ਞੀਤਿ ਤੇਸਞ੍ਞੇਵ ਵਤ੍ਥੂਨਂ ਅਨਾਪੁਚ੍ਛਾਕਰਣੇ ਆਪਤ੍ਤਿ, ਤਤ੍ਥ ‘‘ਅਨਾਪਤ੍ਤੀ’’ਤਿ ਏਵਂਸਞ੍ਞੀ. ਛਟ੍ਠੇਪਿ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ. ਸਤ੍ਤਮਾਦੀਨਿ ਉਤ੍ਤਾਨਤ੍ਥਾਨੇਵ.

੧੦੯. ਏਕਾਦਸਮੇ ਆਸਵਾਤਿ ਕਿਲੇਸਾ. ਨ ਕੁਕ੍ਕੁਚ੍ਚਾਯਿਤਬ੍ਬਨ੍ਤਿ ਸਙ੍ਘਭੋਗਸ੍ਸ ਅਪਟ੍ਠਪਨਂ ਅਵਿਚਾਰਣਂ ਨ ਕੁਕ੍ਕੁਚ੍ਚਾਯਿਤਬ੍ਬਂ ਨਾਮ, ਤਂ ਕੁਕ੍ਕੁਚ੍ਚਾਯਤਿ. ਕੁਕ੍ਕੁਚ੍ਚਾਯਿਤਬ੍ਬਨ੍ਤਿ ਤਸ੍ਸੇਵ ਪਟ੍ਠਪਨਂ ਵਿਚਾਰਣਂ, ਤਂ ਨ ਕੁਕ੍ਕੁਚ੍ਚਾਯਤਿ. ਦ੍ਵਾਦਸਮਾਦੀਨਿ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਾਨੀਤਿ.

ਬਾਲਵਗ੍ਗੋ ਪਞ੍ਚਮੋ.