(੮) ੩. ਸਨਿਮਿਤ੍ਤਵਗ੍ਗਵਣ੍ਣਨਾ

੭੮-੭੯. ਤਤਿਯਸ੍ਸ ਪਠਮੇ ਸਨਿਮਿਤ੍ਤਾਤਿ ਸਕਾਰਣਾ. ਦੁਤਿਯਾਦੀਸੁਪਿ ਏਸੇਵ ਨਯੋ. ਨਿਦਾਨਂ ਹੇਤੁ ਸਙ੍ਖਾਰੋ ਪਚ੍ਚਯੋ ਰੂਪਨ੍ਤਿ ਸਬ੍ਬਾਨਿਪਿ ਹਿ ਏਤਾਨਿ ਕਾਰਣਵੇਵਚਨਾਨੇਵ.

੮੪. ਸਤ੍ਤਮੇ ਸਵੇਦਨਾਤਿ ਪਚ੍ਚਯਭੂਤਾਯ ਸਮ੍ਪਯੁਤ੍ਤਵੇਦਨਾਯ ਸਤਿਯੇਵ ਉਪ੍ਪਜ੍ਜਨ੍ਤਿ, ਨਾਸਤੀਤਿ ਅਤ੍ਥੋ. ਅਟ੍ਠਮਨਵਮੇਸੁਪਿ ਏਸੇਵ ਨਯੋ.

੮੭. ਦਸਮੇ ਸਙ੍ਖਤਾਰਮ੍ਮਣਾਤਿ ਪਚ੍ਚਯਨਿਬ੍ਬਤ੍ਤਂ ਸਙ੍ਖਤਧਮ੍ਮਂ ਆਰਮ੍ਮਣਂ ਕਤ੍ਵਾਵ ਉਪ੍ਪਜ੍ਜਨ੍ਤਿ. ਨੋ ਅਸਙ੍ਖਤਾਰਮ੍ਮਣਾਤਿ ਅਸਙ੍ਖਤਂ ਪਨ ਨਿਬ੍ਬਾਨਂ ਆਰਬ੍ਭ ਨ ਉਪ੍ਪਜ੍ਜਨ੍ਤਿ. ਨ ਹੋਨ੍ਤੀਤਿ ਮਗ੍ਗਕ੍ਖਣੇ ਨ ਹੋਨ੍ਤਿ ਨਾਮ, ਫਲੇ ਪਤ੍ਤੇ ਨਾਹੇਸੁਨ੍ਤਿ. ਏਵਮੇਤੇਸੁ ਦਸਸੁਪਿ ਠਾਨੇਸੁ ਯਾਵ ਅਰਹਤ੍ਤਾ ਦੇਸਨਾ ਦੇਸਿਤਾਤਿ.

ਸਨਿਮਿਤ੍ਤਵਗ੍ਗੋ ਤਤਿਯੋ.