੯. ਉਪਾਲਿਸੁਤ੍ਤਵਣ੍ਣਨਾ
੯੯. ਨਵਮੇ ਦੁਰਭਿਸਮ੍ਭਵਾਨੀਤਿ ਸਮ੍ਭਵਿਤੁਂ ਦੁਕ੍ਖਾਨਿ ਦੁਸ੍ਸਹਾਨਿ, ਨ ਸਕ੍ਕਾ ਅਪ੍ਪੇਸਕ੍ਖੇਹਿ ਅਜ੍ਝੋਗਾਹਿਤੁਨ੍ਤਿ ਵੁਤ੍ਤਂ ਹੋਤਿ. ਅਰਞ੍ਞਵਨਪਤ੍ਥਾਨੀਤਿ ਅਰਞ੍ਞਾਨਿ ਚ ਵਨਪਤ੍ਥਾਨਿ ਚ. ਆਰਞ੍ਞਕਙ੍ਗਨਿਪ੍ਫਾਦਨੇਨ ਅਰਞ੍ਞਾਨਿ, ਗਾਮਨ੍ਤਂ ਅਤਿਕ੍ਕਮਿਤ੍ਵਾ ਮਨੁਸ੍ਸਾਨਂ ਅਨੁਪਚਾਰਟ੍ਠਾਨਭਾਵੇਨ ਵਨਪਤ੍ਥਾਨਿ. ਪਨ੍ਤਾਨੀਤਿ ਪਰਿਯਨ੍ਤਾਨਿ ਅਤਿਦੂਰਾਨਿ. ਦੁਕ੍ਕਰਂ ਪਵਿਵੇਕਨ੍ਤਿ ਕਾਯਵਿਵੇਕੋ ਦੁਕ੍ਕਰੋ. ਦੁਰਭਿਰਮਨ੍ਤਿ ਅਭਿਰਮਿਤੁਂ ਨ ਸੁਕਰਂ. ਏਕਤ੍ਤੇਤਿ ਏਕੀਭਾਵੇ. ਕਿਂ ਦਸ੍ਸੇਤਿ? ਕਾਯਵਿਵੇਕੇ ਕਤੇਪਿ ਤਤ੍ਥ ਚਿਤ੍ਤਂ ਅਭਿਰਮਾਪੇਤੁਂ ਦੁਕ੍ਕਰਂ. ਦ੍ਵਯਂਦ੍ਵਯਾਰਾਮੋ ਹਿ ਅਯਂ ਲੋਕੋਤਿ. ਹਰਨ੍ਤਿ ਮਞ੍ਞੇਤਿ ਹਰਨ੍ਤਿ ਵਿਯ ਘਸਨ੍ਤਿ ਵਿਯ. ਮਨੋਤਿ ਚਿਤ੍ਤਂ. ਸਮਾਧਿਂ ਅਲਭਮਾਨਸ੍ਸਾਤਿ ਉਪਚਾਰਸਮਾਧਿਂ ਵਾ ਅਪ੍ਪਨਾਸਮਾਧਿਂ ਵਾ ਅਲਭਨ੍ਤਸ੍ਸ. ਕਿਂ ਦਸ੍ਸੇਤਿ? ਈਦਿਸਸ੍ਸ ਭਿਕ੍ਖੁਨੋ ਤਿਣਪਣ੍ਣਮਿਗਾਦਿਸਦ੍ਦੇਹਿ ਵਿਵਿਧੇਹਿ ਚ ਭੀਸਨਕੇਹਿ ਵਨਾਨਿ ਚਿਤ੍ਤਂ ਵਿਕ੍ਖਿਪਨ੍ਤਿ ਮਞ੍ਞੇਤਿ. ਸਂਸੀਦਿਸ੍ਸਤੀਤਿ ਕਾਮਵਿਤਕ੍ਕੇਨ ਸਂਸੀਦਿਸ੍ਸਤਿ. ਉਪ੍ਲਵਿਸ੍ਸਤੀਤਿ ਬ੍ਯਾਪਾਦਵਿਹਿਂਸਾਵਿਤਕ੍ਕੇਹਿ ਉਦ੍ਧਂ ਪ੍ਲਵਿਸ੍ਸਤਿ.
ਕਣ੍ਣਸਂਧੋਵਿਕਨ੍ਤਿ ਕਣ੍ਣੇ ਧੋਵਨ੍ਤੇਨ ਕੀਲ਼ਿਤਬ੍ਬਂ. ਪਿਟ੍ਠਿਸਂਧੋਵਿਕਨ੍ਤਿ ਪਿਟ੍ਠਿਂ ਧੋਵਨ੍ਤੇਨ ਕੀਲ਼ਿਤਬ੍ਬਂ. ਤਤ੍ਥ ਉਦਕਂ ਸੋਣ੍ਡਾਯ ਗਹੇਤ੍ਵਾ ਦ੍ਵੀਸੁ ਕਣ੍ਣੇਸੁ ਆਸਿਞ੍ਚਨਂ ਕਣ੍ਣਸਂਧੋਵਿਕਾ ਨਾਮ, ਪਿਟ੍ਠਿਯਂ ਆਸਿਞ੍ਚਨਂ ਪਿਟ੍ਠਿਸਂਧੋਵਿਕਾ ਨਾਮ. ਗਾਧਂ ਵਿਨ੍ਦਤੀਤਿ ਪਤਿਟ੍ਠਂ ਲਭਤਿ. ਕੋ ਚਾਹਂ ਕੋ ਚ ਹਤ੍ਥਿਨਾਗੋਤਿ ਅਹਂ ਕੋ, ਹਤ੍ਥਿਨਾਗੋ ਕੋ, ਅਹਮ੍ਪਿ ਤਿਰਚ੍ਛਾਨਗਤੋ, ਅਯਮ੍ਪਿ, ਮਯ੍ਹਮ੍ਪਿ ਚਤ੍ਤਾਰੋ ਪਾਦਾ, ਇਮਸ੍ਸਪਿ, ਨਨੁ ਉਭੋਪਿ ਮਯਂ ਸਮਸਮਾਤਿ.
ਵਙ੍ਕਕਨ੍ਤਿ ਕੁਮਾਰਕਾਨਂ ਕੀਲ਼ਨਕਂ ਖੁਦ੍ਦਕਨਙ੍ਗਲਂ. ਘਟਿਕਨ੍ਤਿ ਦੀਘਦਣ੍ਡਕੇਨ ਰਸ੍ਸਦਣ੍ਡਕਂ ਪਹਰਣਕੀਲ਼ਂ. ਮੋਕ੍ਖਚਿਕਨ੍ਤਿ ਸਂਪਰਿਵਤ੍ਤਕਕੀਲ਼ਂ, ਆਕਾਸੇ ਦਣ੍ਡਕਂ ਗਹੇਤ੍ਵਾ ਭੂਮਿਯਂ ਵਾ ਸੀਸਂ ਠਪੇਤ੍ਵਾ ਹੇਟ੍ਠੁਪਰਿਯਭਾਵੇਨ ਪਰਿਵਤ੍ਤਨਕੀਲ਼ਨ੍ਤਿ ਵੁਤ੍ਤਂ ਹੋਤਿ. ਚਿਙ੍ਗੁਲਕਨ੍ਤਿ ਤਾਲਪਣ੍ਣਾਦੀਹਿ ਕਤਂ ਵਾਤਪ੍ਪਹਾਰੇਨ ਪਰਿਬ੍ਭਮਨਚਕ੍ਕਂ. ਪਤ੍ਤਾਲ਼੍ਹਕਂ ਵੁਚ੍ਚਤਿ ਪਣ੍ਣਨਾਲ਼ਿ, ਤਾਯ ਵਾਲੁਕਾਦੀਨਿ ਮਿਨਨ੍ਤਾ ਕੀਲ਼ਨ੍ਤਿ. ਰਥਕਨ੍ਤਿ ਖੁਦ੍ਦਕਰਥਂ. ਧਨੁਕਨ੍ਤਿ ਖੁਦ੍ਦਕਧਨੁਮੇਵ.
ਇਧ ਖੋ ਪਨ ਵੋਤਿ ਏਤ੍ਥ ਵੋਤਿ ਨਿਪਾਤਮਤ੍ਤਂ, ਇਧ ਖੋ ਪਨਾਤਿ ਅਤ੍ਥੋ. ਇਙ੍ਘ ਤ੍ਵਂ, ਉਪਾਲਿ, ਸਙ੍ਘੇ ਵਿਹਰਾਹੀਤਿ ਏਤ੍ਥ ਇਙ੍ਘਾਤਿ ਚੋਦਨਤ੍ਥੇ ਨਿਪਾਤੋ. ਤੇਨ ਥੇਰਂ ਸਙ੍ਘਮਜ੍ਝੇ ਵਿਹਾਰਤ੍ਥਾਯ ਚੋਦੇਤਿ, ਨਾਸ੍ਸ ਅਰਞ੍ਞਵਾਸਂ ਅਨੁਜਾਨਾਤਿ. ਕਸ੍ਮਾ? ਅਰਞ੍ਞਸੇਨਾਸਨੇ ਵਸਤੋ ਕਿਰਸ੍ਸ ਵਾਸਧੁਰਮੇਵ ਪੂਰਿਸ੍ਸਤਿ, ਨ ਗਨ੍ਥਧੁਰਂ. ਸਙ੍ਘਮਜ੍ਝੇ ਵਸਨ੍ਤੋ ਪਨ ਦ੍ਵੇ ਧੁਰਾਨਿ ਪੂਰੇਤ੍ਵਾ ਅਰਹਤ੍ਤਂ ਪਾਪੁਣਿਸ੍ਸਤਿ, ਵਿਨਯਪਿਟਕੇ ਚ ਪਾਮੋਕ੍ਖੋ ਭਵਿਸ੍ਸਤਿ. ਅਥਸ੍ਸਾਹਂ ਪਰਿਸਮਜ੍ਝੇ ਪੁਬ੍ਬਪਤ੍ਥਨਂ ਪੁਬ੍ਬਾਭਿਨੀਹਾਰਞ੍ਚ ਕਥੇਤ੍ਵਾ ਇਮਂ ਭਿਕ੍ਖੁਂ ਵਿਨਯਧਰਾਨਂ ਅਗ੍ਗਟ੍ਠਾਨੇ ਠਪੇਸ੍ਸਾਮੀਤਿ ਇਮਮਤ੍ਥਂ ਪਸ੍ਸਮਾਨੋ ਸਤ੍ਥਾ ਥੇਰਸ੍ਸ ਅਰਞ੍ਞਵਾਸਂ ਨਾਨੁਜਾਨੀਤਿ. ਦਸਮਂ ਉਤ੍ਤਾਨਤ੍ਥਮੇਵਾਤਿ.
ਉਪਾਲਿਵਗ੍ਗੋ ਪਞ੍ਚਮੋ.
ਦੁਤਿਯਪਣ੍ਣਾਸਕਂ ਨਿਟ੍ਠਿਤਂ.