੬. ਕੋਕਨੁਦਸੁਤ੍ਤਵਣ੍ਣਨਾ

੯੬. ਛਟ੍ਠੇ ਪੁਬ੍ਬਾਪਯਮਾਨੋਤਿ ਪੁਬ੍ਬਸਦਿਸਾਨਿ ਨਿਰੁਦਕਾਨਿ ਕੁਰੁਮਾਨੋ. ਕ੍ਵੇਤ੍ਥ, ਆਵੁਸੋਤਿ ਕੋ ਏਤ੍ਥ, ਆਵੁਸੋ. ਯਾਵਤਾ, ਆਵੁਸੋ, ਦਿਟ੍ਠੀਤਿ ਯਤ੍ਤਿਕਾ ਦ੍ਵਾਸਟ੍ਠਿਵਿਧਾਪਿ ਦਿਟ੍ਠਿ ਨਾਮ ਅਤ੍ਥਿ. ਯਾਵਤਾ ਦਿਟ੍ਠਿਟ੍ਠਾਨਨ੍ਤਿ ‘‘ਖਨ੍ਧਾਪਿ ਦਿਟ੍ਠਿਟ੍ਠਾਨਂ, ਅਵਿਜ੍ਜਾਪਿ, ਫਸ੍ਸੋਪਿ, ਸਞ੍ਞਾਪਿ, ਵਿਤਕ੍ਕੋਪਿ ਅਯੋਨਿਸੋਮਨਸਿਕਾਰੋਪਿ, ਪਾਪਮਿਤ੍ਤੋਪਿ, ਪਰਤੋਘੋਸੋਪਿ ਦਿਟ੍ਠਿਟ੍ਠਾਨ’’ਨ੍ਤਿ ਏਵਂ ਯਤ੍ਤਕਂ ਅਟ੍ਠਵਿਧਮ੍ਪਿ ਦਿਟ੍ਠਿਟ੍ਠਾਨਂ ਦਿਟ੍ਠਿਕਾਰਣਂ ਨਾਮ ਅਤ੍ਥਿ. ਦਿਟ੍ਠਾਧਿਟ੍ਠਾਨਨ੍ਤਿ ਦਿਟ੍ਠੀਨਂ ਅਧਿਟ੍ਠਾਨਂ, ਅਧਿਠਤ੍ਵਾ ਅਧਿਭਵਿਤ੍ਵਾ ਪਵਤ੍ਤਾਯ ਦਿਟ੍ਠਿਯਾ ਏਤਂ ਨਾਮਂ. ਦਿਟ੍ਠਿਪਰਿਯੁਟ੍ਠਾਨਨ੍ਤਿ ‘‘ਕਤਮਾਨਿ ਅਟ੍ਠਾਰਸ ਦਿਟ੍ਠਿਪਰਿਯੁਟ੍ਠਾਨਾਨਿ? ਯਾ ਦਿਟ੍ਠਿ ਦਿਟ੍ਠਿਗਤਂ ਦਿਟ੍ਠਿਗਹਨਂ ਦਿਟ੍ਠਿਕਨ੍ਤਾਰਂ ਦਿਟ੍ਠਿਵਿਸੂਕਂ ਦਿਟ੍ਠਿਵਿਪ੍ਫਨ੍ਦਿਤਂ ਦਿਟ੍ਠਿਸਂਯੋਜਨਂ ਦਿਟ੍ਠਿਸਲ੍ਲਂ ਦਿਟ੍ਠਿਸਮ੍ਬਾਧੋ ਦਿਟ੍ਠਿਪਲਿਬੋਧੋ ਦਿਟ੍ਠਿਬਨ੍ਧਨਂ ਦਿਟ੍ਠਿਪਪਾਤੋ ਦਿਟ੍ਠਾਨੁਸਯੋ ਦਿਟ੍ਠਿਸਨ੍ਤਾਪੋ ਦਿਟ੍ਠਿਪਰਿਲ਼ਾਹੋ ਦਿਟ੍ਠਿਗਨ੍ਥੋ ਦਿਟ੍ਠੁਪਾਦਾਨਂ ਦਿਟ੍ਠਾਭਿਨਿਵੇਸੋ ਦਿਟ੍ਠਿਪਰਾਮਾਸੋ. ਇਮਾਨਿ ਅਟ੍ਠਾਰਸ ਦਿਟ੍ਠਿਪਰਿਯੁਟ੍ਠਾਨਾਨੀ’’ਤਿ ਏਵਂ ਵੁਤ੍ਤਂ ਦਿਟ੍ਠਿਪਰਿਯੁਟ੍ਠਾਨਂ. ਸਮੁਟ੍ਠਾਨਨ੍ਤਿ ਦਿਟ੍ਠਿਟ੍ਠਾਨਸ੍ਸੇਵ ਵੇਵਚਨਂ. ਵੁਤ੍ਤਞ੍ਹੇਤਂ – ‘‘ਖਨ੍ਧਾ ਪਚ੍ਚਯੋ ਦਿਟ੍ਠੀਨਂ ਉਪਾਦਾਯ ਸਮੁਟ੍ਠਾਨਟ੍ਠੇਨਾ’’ਤਿ (ਪਟਿ. ਮ. ੧.੧੨੪) ਸਬ੍ਬਂ ਵਿਤ੍ਥਾਰੇਤਬ੍ਬਂ. ਸੋਤਾਪਤ੍ਤਿਮਗ੍ਗੋ ਪਨ ਦਿਟ੍ਠਿਸਮੁਗ੍ਘਾਤੋ ਨਾਮ ਸਬ੍ਬਦਿਟ੍ਠੀਨਂ ਸਮੁਗ੍ਘਾਤਕਤ੍ਤਾ. ਤਮਹਨ੍ਤਿ ਤਂ ਸਬ੍ਬਂ ਅਹਂ ਜਾਨਾਮਿ. ਕ੍ਯਾਹਂ ਵਕ੍ਖਾਮੀਤਿ ਕਿਂਕਾਰਣਾ ਅਹਂ ਵਕ੍ਖਾਮਿ.