੫. ਮਿਗਸਾਲਾਸੁਤ੍ਤਵਣ੍ਣਨਾ

੭੫. ਪਞ੍ਚਮਸ੍ਸ ਆਦਿਮ੍ਹਿ ਤਾਵ ਯਂ ਵਤ੍ਤਬ੍ਬਂ, ਤਂ ਛਕ੍ਕਨਿਪਾਤੇ ਵੁਤ੍ਤਮੇਵ. ਦੁਸ੍ਸੀਲੋ ਹੋਤੀਤਿਆਦੀਸੁ ਪਨ ਦੁਸ੍ਸੀਲੋਤਿ ਨਿਸ੍ਸੀਲੋ. ਚੇਤੋਵਿਮੁਤ੍ਤਿਨ੍ਤਿ ਫਲਸਮਾਧਿਂ. ਪਞ੍ਞਾਵਿਮੁਤ੍ਤਿਨ੍ਤਿ ਫਲਞਾਣਂ. ਨਪ੍ਪਜਾਨਾਤੀਤਿ ਉਗ੍ਗਹਪਰਿਪੁਚ੍ਛਾਵਸੇਨ ਨ ਜਾਨਾਤਿ. ਦੁਸ੍ਸੀਲ੍ਯਂ ਅਪਰਿਸੇਸਂ ਨਿਰੁਜ੍ਝਤੀਤਿ ਏਤ੍ਥ ਪਞ੍ਚ ਦੁਸ੍ਸੀਲ੍ਯਾਨਿ ਤਾਵ ਸੋਤਾਪਤ੍ਤਿਮਗ੍ਗੇਨ ਪਹੀਯਨ੍ਤਿ, ਦਸ ਅਰਹਤ੍ਤਮਗ੍ਗੇਨ. ਫਲਕ੍ਖਣੇ ਤਾਨਿ ਪਹੀਨਾਨਿ ਨਾਮ ਹੋਨ੍ਤਿ. ਫਲਕ੍ਖਣਂ ਸਨ੍ਧਾਯ ਇਧ ‘‘ਨਿਰੁਜ੍ਝਤੀ’’ਤਿ ਵੁਤ੍ਤਂ. ਪੁਥੁਜ੍ਜਨਸ੍ਸ ਸੀਲਂ ਪਞ੍ਚਹਿ ਕਾਰਣੇਹਿ ਭਿਜ੍ਜਤਿ ਪਾਰਾਜਿਕਾਪਜ੍ਜਨੇਨ ਸਿਕ੍ਖਾਪਚ੍ਚਕ੍ਖਾਨੇਨ ਤਿਤ੍ਥਿਯਪਕ੍ਖਨ੍ਦਨੇਨ ਅਰਹਤ੍ਤੇਨ ਮਰਣੇਨਾਤਿ. ਤਤ੍ਥ ਪੁਰਿਮਾ ਤਯੋ ਭਾਵਨਾਪਰਿਹਾਨਾਯ ਸਂਵਤ੍ਤਨ੍ਤਿ, ਚਤੁਤ੍ਥੋ ਵਡ੍ਢਿਯਾ, ਪਞ੍ਚਮੋ ਨੇਵ ਹਾਨਾਯ ਨ ਵਡ੍ਢਿਯਾ. ਕਥਂ ਪਨੇਤਂ ਅਰਹਤ੍ਤੇਨ ਸੀਲਂ ਭਿਜ੍ਜਤੀਤਿ? ਪੁਥੁਜ੍ਜਨਸ੍ਸ ਹਿ ਸੀਲਂ ਅਚ੍ਚਨ੍ਤਕੁਸਲਮੇਵ ਹੋਤਿ, ਅਰਹਤ੍ਤਮਗ੍ਗੋ ਚ ਕੁਸਲਾਕੁਸਲਕਮ੍ਮਕ੍ਖਯਾਯ ਸਂਵਤ੍ਤਤੀਤਿ ਏਵਂ ਤੇਨ ਤਂ ਭਿਜ੍ਜਤਿ. ਸਵਨੇਨਪਿ ਅਕਤਂ ਹੋਤੀਤਿ ਸੋਤਬ੍ਬਯੁਤ੍ਤਕਂ ਅਸ੍ਸੁਤਂ ਹੋਤਿ. ਬਾਹੁਸਚ੍ਚੇਨਪਿ ਅਕਤਂ ਹੋਤੀਤਿ ਏਤ੍ਥ ਬਾਹੁਸਚ੍ਚਨ੍ਤਿ ਵੀਰਿਯਂ. ਵੀਰਿਯੇਨ ਕਤ੍ਤਬ੍ਬਯੁਤ੍ਤਕਂ ਅਕਤਂ ਹੋਤਿ, ਤਸ੍ਸ ਅਕਤਤ੍ਤਾ ਸਗ੍ਗਤੋਪਿ ਮਗ੍ਗਤੋਪਿ ਪਰਿਹਾਯਤਿ. ਦਿਟ੍ਠਿਯਾਪਿ ਅਪ੍ਪਟਿਵਿਦ੍ਧਂ ਹੋਤੀਤਿ ਦਿਟ੍ਠਿਯਾ ਪਟਿਵਿਜ੍ਝਿਤਬ੍ਬਂ ਅਪ੍ਪਟਿਵਿਦ੍ਧਂ ਹੋਤਿ ਅਪਚ੍ਚਕ੍ਖਕਤਂ. ਸਾਮਯਿਕਮ੍ਪਿ ਵਿਮੁਤ੍ਤਿਂ ਨ ਲਭਤੀਤਿ ਕਾਲਾਨੁਕਾਲਂ ਧਮ੍ਮਸ੍ਸਵਨਂ ਨਿਸ੍ਸਾਯ ਪੀਤਿਪਾਮੋਜ੍ਜਂ ਨ ਲਭਤਿ. ਹਾਨਾਯ ਪਰੇਤੀਤਿ ਹਾਨਾਯ ਪਵਤ੍ਤਤਿ.

ਯਥਾਭੂਤਂ ਪਜਾਨਾਤੀਤਿ ‘‘ਸੋਤਾਪਤ੍ਤਿਫਲਂ ਪਤ੍ਵਾ ਪਞ੍ਚਵਿਧਂ ਦੁਸ੍ਸੀਲ੍ਯਂ ਅਪਰਿਸੇਸਂ ਨਿਰੁਜ੍ਝਤੀ’’ਤਿ ਉਗ੍ਗਹਪਰਿਪੁਚ੍ਛਾਵਸੇਨ ਜਾਨਾਤਿ. ਤਸ੍ਸ ਸਵਨੇਨਪਿ ਕਤਂ ਹੋਤੀਤਿ ਸੋਤਬ੍ਬਯੁਤ੍ਤਕਂ ਸੁਤਂ ਹੋਤਿ. ਬਾਹੁਸਚ੍ਚੇਨਪਿ ਕਤਂ ਹੋਤੀਤਿ ਵੀਰਿਯੇਨ ਕਤ੍ਤਬ੍ਬਯੁਤ੍ਤਕਂ ਅਨ੍ਤਮਸੋ ਦੁਬ੍ਬਲਵਿਪਸ੍ਸਨਾਮਤ੍ਤਕਮ੍ਪਿ ਕਤਂ ਹੋਤਿ. ਦਿਟ੍ਠਿਯਾਪਿ ਸੁਪ੍ਪਟਿਵਿਦ੍ਧਂ ਹੋਤੀਤਿ ਅਨ੍ਤਮਸੋ ਲੋਕਿਯਪਞ੍ਞਾਯਪਿ ਪਚ੍ਚਯਪਟਿਵੇਧੋ ਕਤੋ ਹੋਤਿ. ਇਮਸ੍ਸ ਹਿ ਪੁਗ੍ਗਲਸ੍ਸ ਪਞ੍ਞਾ ਸੀਲਂ ਪਰਿਧੋਵਤਿ, ਸੋ ਪਞ੍ਞਾਪਰਿਧੋਤੇਨ ਵਿਸੇਸਂ ਪਾਪੁਣਾਤਿ.

ਪਮਾਣਿਕਾਤਿ ਪੁਗ੍ਗਲੇਸੁ ਪਮਾਣਗ੍ਗਾਹਕਾ. ਪਮਿਣਨ੍ਤੀਤਿ ਪਮੇਤੁਂ ਤੁਲੇਤੁਂ ਅਰਹਨ੍ਤਿ. ਏਕੋ ਹੀਨੋਤਿ ਏਕੋ ਗੁਣੇਹਿ ਹੀਨੋ. ਪਣੀਤੋਤਿ ਏਕੋ ਗੁਣੇਹਿ ਪਣੀਤੋ ਉਤ੍ਤਮੋ. ਤਂ ਹੀਤਿ ਤਂ ਪਮਾਣਕਰਣਂ. ਅਭਿਕ੍ਕਨ੍ਤਤਰੋਤਿ ਸੁਨ੍ਦਰਤਰੋ. ਪਣੀਤਤਰੋਤਿ ਉਤ੍ਤਮਤਰੋ. ਧਮ੍ਮਸੋਤੋ ਨਿਬ੍ਬਹਤੀਤਿ ਸੂਰਂ ਹੁਤ੍ਵਾ ਪਵਤ੍ਤਮਾਨਂ ਵਿਪਸ੍ਸਨਾਞਾਣਂ ਨਿਬ੍ਬਹਤਿ, ਅਰਿਯਭੂਮਿਂ ਪਾਪੇਤਿ. ਤਦਨ੍ਤਰਂ ਕੋ ਜਾਨੇਯ੍ਯਾਤਿ ਤਂ ਏਵਂ ਕਾਰਣਂ ਕੋ ਜਾਨੇਯ੍ਯ. ਸੀਲਵਾ ਹੋਤੀਤਿ ਲੋਕਿਯਸੀਲੇਨ ਸੀਲਵਾ ਹੋਤਿ. ਯਤ੍ਥਸ੍ਸ ਤਂ ਸੀਲਨ੍ਤਿ ਅਰਹਤ੍ਤਵਿਮੁਤ੍ਤਿਂ ਪਤ੍ਵਾ ਸੀਲਂ ਅਪਰਿਸੇਸਮ੍ਪਿ ਨਿਰੁਜ੍ਝਤਿ ਨਾਮ, ਤਤ੍ਥ ਯੁਤ੍ਤਿ ਵੁਤ੍ਤਾਯੇਵ. ਇਤੋ ਪਰੇਸੁ ਦ੍ਵੀਸੁ ਅਙ੍ਗੇਸੁ ਅਨਾਗਾਮਿਫਲਂ ਵਿਮੁਤ੍ਤਿ ਨਾਮ, ਪਞ੍ਚਮੇ ਅਰਹਤ੍ਤਮੇਵ. ਸੇਸਮੇਤ੍ਥ ਵੁਤ੍ਤਨਯਾਨੁਸਾਰੇਨੇਵ ਵੇਦਿਤਬ੍ਬਂ. ਛਟ੍ਠਂ ਉਤ੍ਤਾਨਤ੍ਥਮੇਵ.