੫-੭. ਪਠਮਸੁਖਸੁਤ੍ਤਾਦਿਵਣ੍ਣਨਾ

੬੫-੬੭. ਪਞ੍ਚਮੇ ਵਟ੍ਟਮੂਲਕਂ ਸੁਖਦੁਕ੍ਖਂ ਪੁਚ੍ਛਿਤਂ, ਛਟ੍ਠੇ ਸਾਸਨਮੂਲਕਂ. ਸਤ੍ਤਮੇ ਨਲ਼ਕਪਾਨਨ੍ਤਿ ਅਤੀਤੇ ਬੋਧਿਸਤ੍ਤਸ੍ਸ ਓਵਾਦੇ ਠਤ੍ਵਾ ਵਾਨਰਯੂਥੇਨ ਨਲ਼ੇਹਿ ਉਦਕਸ੍ਸ ਪੀਤਟ੍ਠਾਨੇ ਮਾਪਿਤਤ੍ਤਾ ਏਵਂਲਦ੍ਧਨਾਮੋ ਨਿਗਮੋ. ਤੁਣ੍ਹੀਭੂਤਂ ਤੁਣ੍ਹੀਭੂਤਨ੍ਤਿ ਯਂ ਯਂ ਦਿਸਂ ਅਨੁਵਿਲੋਕੇਤਿ, ਤਤ੍ਥ ਤਤ੍ਥ ਤੁਣ੍ਹੀਭੂਤਮੇਵ. ਅਨੁਵਿਲੋਕੇਤ੍ਵਾਤਿ ਤਤੋ ਤਤੋ ਵਿਲੋਕੇਤ੍ਵਾ. ਪਿਟ੍ਠਿ ਮੇ ਆਗਿਲਾਯਤੀਤਿ ਕਸ੍ਮਾ ਆਗਿਲਾਯਤਿ? ਭਗਵਤੋ ਹਿ ਛ ਵਸ੍ਸਾਨਿ ਮਹਾਪਧਾਨਂ ਪਦਹਨ੍ਤਸ੍ਸ ਮਹਨ੍ਤਂ ਕਾਯਦੁਕ੍ਖਂ ਅਹੋਸਿ, ਅਥਸ੍ਸ ਅਪਰਭਾਗੇ ਮਹਲ੍ਲਕਕਾਲੇ ਪਿਟ੍ਠਿਵਾਤੋ ਉਪ੍ਪਜ੍ਜਿ. ਉਪਾਦਿਨ੍ਨਕਸਰੀਰਸ੍ਸ ਠਾਨਨਿਸਜ੍ਜਾਦੀਹਿ ਅਪ੍ਪਮਤ੍ਤਕੇਨ ਆਬਾਧੇਨ ਨ ਸਕ੍ਕਾ ਕੇਨਚਿ ਭਵਿਤੁਂ. ਤਂ ਗਹੇਤ੍ਵਾਪਿ ਥੇਰਸ੍ਸ ਓਕਾਸਕਰਣਤ੍ਥਂ ਏਵਮਾਹ. ਸਙ੍ਘਾਟਿਂ ਪਞ੍ਞਾਪੇਤ੍ਵਾ ਏਕਮਨ੍ਤੇ ਪਤਿਰੂਪਟ੍ਠਾਨੇ ਪਞ੍ਞਤ੍ਤਸ੍ਸ ਕਪ੍ਪਿਯਮਞ੍ਚਸ੍ਸ ਉਪਰਿ ਅਤ੍ਥਰਿਤ੍ਵਾ.