੬. ਸਕ੍ਕਸੁਤ੍ਤਵਣ੍ਣਨਾ

੪੬. ਛਟ੍ਠੇ ਸੋਕਸਭਯੇਤਿ ਸੋਕੇਨ ਸਭਯੇ. ਸੋਕਭਯੇਤਿ ਵਾ ਪਾਠੋ, ਅਯਮੇਵਤ੍ਥੋ. ਦੁਤਿਯਪਦੇਪਿ ਏਸੇਵ ਨਯੋ. ਯੇਨ ਕੇਨਚਿ ਕਮ੍ਮਟ੍ਠਾਨੇਨਾਤਿ ਕਸਿਵਣਿਜ੍ਜਾਦਿਕਮ੍ਮੇਸੁ ਯੇਨ ਕੇਨਚਿ ਕਮ੍ਮੇਨ. ਅਨਾਪਜ੍ਜ ਅਕੁਸਲਨ੍ਤਿ ਕਿਞ੍ਚਿ ਅਕੁਸਲਂ ਅਨਾਪਜ੍ਜਿਤ੍ਵਾ. ਨਿਬ੍ਬਿਸੇਯ੍ਯਾਤਿ ਉਪ੍ਪਾਦੇਯ੍ਯ ਆਚਿਨੇਯ੍ਯ. ਦਕ੍ਖੋਤਿ ਛੇਕੋ. ਉਟ੍ਠਾਨਸਮ੍ਪਨ੍ਨੋਤਿ ਉਟ੍ਠਾਨਵੀਰਿਯੇਨ ਸਮਨ੍ਨਾਗਤੋ. ਅਲਂ ਵਚਨਾਯਾਤਿ ਯੁਤ੍ਤੋ ਵਚਨਾਯ. ਏਕਨ੍ਤਸੁਖਪ੍ਪਟਿਸਂਵੇਦੀ ਵਿਹਰੇਯ੍ਯਾਤਿ ਏਕਨ੍ਤਮੇਵ ਕਾਯਿਕਚੇਤਸਿਕਸੁਖਂ ਞਾਣੇਨ ਪਟਿਸਂਵੇਦੇਨ੍ਤੋ ਵਿਹਰੇਯ੍ਯ. ਅਨਿਚ੍ਚਾਤਿ ਹੁਤ੍ਵਾ ਅਭਾਵਤੋ. ਤੁਚ੍ਛਾਤਿ ਸਾਰਰਹਿਤਾ. ਮੁਸਾਤਿ ਨਿਚ੍ਚਸੁਭਸੁਖਾ ਵਿਯ ਖਾਯਮਾਨਾਪਿ ਤਥਾ ਨ ਹੋਨ੍ਤੀਤਿ ਮੁਸਾ. ਮੋਸਧਮ੍ਮਾਤਿ ਨਸ੍ਸਨਸਭਾਵਾ. ਤਸ੍ਮਾ ਤੇ ਪਟਿਚ੍ਚ ਦੁਕ੍ਖਂ ਉਪ੍ਪਜ੍ਜਤੀਤਿ ਸਨ੍ਦਸ੍ਸੇਤਿ. ਇਧ ਪਨ ਵੋਤਿ ਏਤ੍ਥ ਵੋ ਤਿ ਨਿਪਾਤਮਤ੍ਤਂ. ਅਪਣ੍ਣਕਂ ਵਾ ਸੋਤਾਪਨ੍ਨੋਤਿ ਅਵਿਰਾਧਿਤਂ ਏਕਂਸੇਨ ਸੋਤਾਪਨ੍ਨੋ ਵਾ ਹੋਤਿ. ਸੋਪਿ ਝਾਨਂ ਨਿਬ੍ਬਤ੍ਤੇਤਿ, ਬ੍ਰਹ੍ਮਲੋਕਂ ਵਾ ਗਨ੍ਤ੍ਵਾ ਛਸੁ ਵਾ ਕਾਮਸਗ੍ਗੇਸੁ ਏਕਨ੍ਤਸੁਖਪ੍ਪਟਿਸਂਵੇਦੀ ਹੁਤ੍ਵਾ ਵਿਹਰੇਯ੍ਯ. ਇਮਸ੍ਮਿਂ ਸੁਤ੍ਤੇ ਸਤ੍ਥਾ ਅਟ੍ਠਙ੍ਗੁਪੋਸਥਸ੍ਸ ਗੁਣਂ ਕਥੇਸਿ.