੩. ਉਬ੍ਬਾਹਿਕਾਸੁਤ੍ਤਵਣ੍ਣਨਾ

੩੩. ਤਤਿਯੇ ਉਬ੍ਬਾਹਿਕਾਯਾਤਿ ਸਮ੍ਪਤ੍ਤਅਧਿਕਰਣਂ ਵੂਪਸਮੇਤੁਂ ਸਙ੍ਘਤੋ ਉਬ੍ਬਾਹਿਤ੍ਵਾ ਉਦ੍ਧਰਿਤ੍ਵਾ ਗਹਣਤ੍ਥਾਯ. ਵਿਨਯੇ ਖੋ ਪਨ ਠਿਤੋ ਹੋਤੀਤਿ ਵਿਨਯਲਕ੍ਖਣੇ ਪਤਿਟ੍ਠਿਤੋ ਹੋਤਿ. ਅਸਂਹੀਰੋਤਿ ਨ ਅਞ੍ਞਸ੍ਸ ਵਚਨਮਤ੍ਤੇਨੇਵ ਅਤ੍ਤਨੋ ਲਦ੍ਧਿਂ ਵਿਸ੍ਸਜ੍ਜੇਤਿ. ਪਟਿਬਲੋਤਿ ਕਾਯਬਲੇਨਪਿ ਞਾਣਬਲੇਨਪਿ ਸਮਨ੍ਨਾਗਤੋ. ਸਞ੍ਞਾਪੇਤੁਨ੍ਤਿ ਜਾਨਾਪੇਤੁਂ. ਪਞ੍ਞਾਪੇਤੁਨ੍ਤਿ ਸਮ੍ਪਜਾਨਾਪੇਤੁਂ. ਨਿਜ੍ਝਾਪੇਤੁਨ੍ਤਿ ਓਲੋਕਾਪੇਤੁਂ. ਪੇਕ੍ਖਤੁਨ੍ਤਿ ਪਸ੍ਸਾਪੇਤੁਂ. ਪਸਾਦੇਤੁਨ੍ਤਿ ਸਞ੍ਜਾਤਪਸਾਦਂ ਕਾਤੁਂ. ਅਧਿਕਰਣਨ੍ਤਿ ਵਿਵਾਦਾਧਿਕਰਣਾਦਿਚਤੁਬ੍ਬਿਧਂ. ਅਧਿਕਰਣਸਮੁਦਯਨ੍ਤਿ ਵਿਵਾਦਮੂਲਾਦਿਕਂ ਅਧਿਕਰਣਕਾਰਕਂ. ਅਧਿਕਰਣਨਿਰੋਧਨ੍ਤਿ ਅਧਿਕਰਣਾਨਂ ਵੂਪਸਮਂ. ਅਧਿਕਰਣਨਿਰੋਧਗਾਮਿਨਿਂ ਪਟਿਪਦਨ੍ਤਿ ਸਤ੍ਤਵਿਧਅਧਿਕਰਣਸਮਥਂ.