੧੪. ਏਤਦਗ੍ਗਵਗ੍ਗੋ

(੧੪) ੫. ਪਞ੍ਚਮਏਤਦਗ੍ਗਵਗ੍ਗੋ

ਮਹਾਪਜਾਪਤਿਗੋਤਮੀਥੇਰੀਵਤ੍ਥੁ

੨੩੫. ਥੇਰਿਪਾਲ਼ਿਯਾ ਪਠਮੇ ਯਦਿਦਂ ਮਹਾਪਜਾਪਤਿਗੋਤਮੀਤਿ ਮਹਾਪਜਾਪਤਿਗੋਤਮੀ ਥੇਰੀ ਰਤ੍ਤਞ੍ਞੂਨਂ ਅਗ੍ਗਾਤਿ ਦਸ੍ਸੇਤਿ.

ਤਸ੍ਸਾ ਪਞ੍ਹਕਮ੍ਮੇ ਪਨ ਅਯਮਨੁਪੁਬ੍ਬਿਕਥਾ – ਅਯਂ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਪਟਿਸਨ੍ਧਿਂ ਗਣ੍ਹਿਤ੍ਵਾ ਅਪਰੇਨ ਸਮਯੇਨ ਸਤ੍ਥੁ ਧਮ੍ਮਦੇਸਨਂ ਸੁਣਨ੍ਤੀ ਸਤ੍ਥਾਰਂ ਏਕਂ ਭਿਕ੍ਖੁਨਿਂ ਰਤ੍ਤਞ੍ਞੂਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਾ ਯਾਵਜੀਵਂ ਦਾਨਂ ਦਤ੍ਵਾ ਸੀਲਂ ਰਕ੍ਖਿਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਪਨ ਏਕਸ੍ਮਿਂ ਬੁਦ੍ਧਨ੍ਤਰੇ ਦੇਵਲੋਕਤੋ ਚਵਿਤ੍ਵਾ ਬਾਰਾਣਸਿਯਂ ਪਞ੍ਚਨ੍ਨਂ ਦਾਸਿਸਤਾਨਂ ਜੇਟ੍ਠਕਦਾਸੀ ਹੁਤ੍ਵਾ ਨਿਬ੍ਬਤ੍ਤਿ. ਅਥ ਵਸ੍ਸੂਪਨਾਯਿਕਸਮਯੇ ਪਞ੍ਚ ਪਚ੍ਚੇਕਬੁਦ੍ਧਾ ਨਨ੍ਦਮੂਲਕਪਬ੍ਭਾਰਤੋ ਇਸਿਪਤਨੇ ਓਤਰਿਤ੍ਵਾ ਨਗਰੇ ਪਿਣ੍ਡਾਯ ਚਰਿਤ੍ਵਾ ਇਸਿਪਤਨਮੇਵ ਗਨ੍ਤ੍ਵਾ ‘‘ਵਸ੍ਸੂਪਨਾਯਿਕਕੁਟਿਯਾ ਅਤ੍ਥਾਯ ਹਤ੍ਥਕਮ੍ਮਂ ਯਾਚਿਸ੍ਸਾਮਾ’’ਤਿ ਚਿਨ੍ਤੇਸੁਂ. ਕਸ੍ਮਾ? ਵਸ੍ਸਂ ਉਪਗਚ੍ਛਨ੍ਤੇਨ ਹਿ ਨਾਲਕਪਟਿਪਦਂ ਪਟਿਪਨ੍ਨੇਨਾਪਿ ਪਞ੍ਚਨ੍ਨਂ ਛਦਨਾਨਂ ਅਞ੍ਞਤਰੇਨ ਛਦਨੇਨ ਛਨ੍ਨੇ ਸਦ੍ਵਾਰਬਦ੍ਧੇ ਸੇਨਾਸਨੇ ਉਪਗਨ੍ਤਬ੍ਬਂ. ਵੁਤ੍ਤਞ੍ਹੇਤਂ ‘‘ਨ, ਭਿਕ੍ਖਵੇ, ਅਸੇਨਾਸਨਿਕੇਨ ਵਸ੍ਸਂ ਉਪਗਨ੍ਤਬ੍ਬਂ, ਯੋ ਉਪਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੨੦੪). ਤਸ੍ਮਾ ਵਸ੍ਸਕਾਲੇ ਉਪਕਟ੍ਠੇ ਸਚੇ ਸੇਨਾਸਨਂ ਲਭਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭਤਿ, ਹਤ੍ਥਕਮ੍ਮਂ ਪਰਿਯੇਸਿਤ੍ਵਾਪਿ ਕਾਤਬ੍ਬਂ. ਹਤ੍ਥਕਮ੍ਮਂ ਅਲਭਨ੍ਤੇਨ ਸਾਮਮ੍ਪਿ ਕਾਤਬ੍ਬਂ, ਨ ਤ੍ਵੇਵ ਅਸੇਨਾਸਨਿਕੇਨ ਵਸ੍ਸਂ ਉਪਗਨ੍ਤਬ੍ਬਂ. ਅਯਮਨੁਧਮ੍ਮਤਾ. ਤਸ੍ਮਾ ਤੇ ਪਚ੍ਚੇਕਬੁਦ੍ਧਾ ‘‘ਹਤ੍ਥਕਮ੍ਮਂ ਯਾਚਿਸ੍ਸਾਮਾ’’ਤਿ ਚੀਵਰਂ ਪਾਰੁਪਿਤ੍ਵਾ ਸਾਯਨ੍ਹਸਮਯੇ ਨਗਰਂ ਪਵਿਸਿਤ੍ਵਾ ਸੇਟ੍ਠਿਸ੍ਸ ਘਰਦ੍ਵਾਰੇ ਅਟ੍ਠਂਸੁ. ਜੇਟ੍ਠਕਦਾਸੀ ਕੁਟਂ ਗਹੇਤ੍ਵਾ ਉਦਕਤਿਤ੍ਥਂ ਗਚ੍ਛਨ੍ਤੀ ਪਚ੍ਚੇਕਬੁਦ੍ਧੇ ਨਗਰਂ ਪਵਿਸਨ੍ਤੇ ਅਦ੍ਦਸ. ਸੇਟ੍ਠਿ ਤੇਸਂ ਆਗਤਕਾਰਣਂ ਸੁਤ੍ਵਾ ‘‘ਅਮ੍ਹਾਕਂ ਓਕਾਸੋ ਨਤ੍ਥਿ, ਗਚ੍ਛਨ੍ਤੂ’’ਤਿ ਆਹ.

ਅਥ ਤੇ ਨਗਰਾ ਨਿਕ੍ਖਨ੍ਤੇ ਜੇਟ੍ਠਕਦਾਸੀ ਕੁਟਂ ਗਹੇਤ੍ਵਾ ਪਵਿਸਨ੍ਤੀ ਦਿਸ੍ਵਾ ਕੁਟਂ ਓਤਾਰੇਤ੍ਵਾ ਵਨ੍ਦਿਤ੍ਵਾ ਓਨਮਿਤ੍ਵਾ ਮੁਖਂ ਉਕ੍ਖਿਪਿਤ੍ਵਾ, ‘‘ਅਯ੍ਯਾ, ਨਗਰਂ ਪਵਿਟ੍ਠਮਤ੍ਤਾਵ ਨਿਕ੍ਖਨ੍ਤਾ, ਕਿਂ ਨੁ ਖੋ’’ਤਿ ਪੁਚ੍ਛਿ. ਵਸ੍ਸੂਪਨਾਯਿਕਕੁਟਿਯਾ ਹਤ੍ਥਕਮ੍ਮਂ ਯਾਚਿਤੁਂ ਆਗਤਮ੍ਹਾਤਿ. ਲਦ੍ਧਂ, ਭਨ੍ਤੇਤਿ? ਨ ਲਦ੍ਧਂ ਉਪਾਸਿਕੇਤਿ. ਕਿਂ ਪਨੇਸਾ ਕੁਟਿ ਇਸ੍ਸਰੇਹੇਵ ਕਾਤਬ੍ਬਾ, ਉਦਾਹੁ ਦੁਗ੍ਗਤੇਹਿਪਿ ਸਕ੍ਕਾ ਕਾਤੁਨ੍ਤਿ? ਯੇਨ ਕੇਨਚਿ ਸਕ੍ਕਾ ਕਾਤੁਨ੍ਤਿ. ਸਾਧੁ, ਭਨ੍ਤੇ, ਮਯਂ ਕਰਿਸ੍ਸਾਮ, ਸ੍ਵੇ ਮਯ੍ਹਂ ਭਿਕ੍ਖਂ ਗਣ੍ਹਥਾਤਿ ਨਿਮਨ੍ਤੇਤ੍ਵਾ ਪੁਨ ਕੁਟਂ ਗਹੇਤ੍ਵਾ ਆਗਮਨਤਿਤ੍ਥਮਗ੍ਗੇ ਠਤ੍ਵਾ ਆਗਤਾਗਤਾ ਅਵਸੇਸਦਾਸਿਯੋ ‘‘ਏਤ੍ਥੇਵ ਹੋਥਾ’’ਤਿ ਵਤ੍ਵਾ ਸਬ੍ਬਾਸਂ ਆਗਤਕਾਲੇ ਆਹ – ‘‘ਅਮ੍ਮਾ, ਕਿਂ ਨਿਚ੍ਚਮੇਵ ਪਰਸ੍ਸ ਦਾਸਿਕਮ੍ਮਂ ਕਰਿਸ੍ਸਥ, ਉਦਾਹੁ ਦਾਸਿਭਾਵਤੋ ਮੁਚ੍ਚਿਤੁਂ ਇਚ੍ਛਥਾ’’ਤਿ. ਅਜ੍ਜੇਵ ਮੁਚ੍ਚਿਤੁਂ ਇਚ੍ਛਾਮ, ਅਯ੍ਯੇਤਿ. ਯਦਿ ਏਵਂ, ਮਯਾ ਪਚ੍ਚੇਕਬੁਦ੍ਧਾ ਹਤ੍ਥਕਮ੍ਮਂ ਅਲਭਨ੍ਤਾ ਸ੍ਵਾਤਨਾਯ ਨਿਮਨ੍ਤਿਤਾ, ਤੁਮ੍ਹਾਕਂ ਸਾਮਿਕੇਹਿ ਏਕਦਿਵਸਂ ਹਤ੍ਥਕਮ੍ਮਂ ਦਾਪੇਥਾਤਿ. ਤਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਸਾਯਂ ਅਟਵਿਤੋ ਆਗਤਕਾਲੇ ਸਾਮਿਕਾਨਂ ਆਰੋਚੇਸੁਂ. ਤੇ ‘‘ਸਾਧੂ’’ਤਿ ਜੇਟ੍ਠਕਦਾਸਸ੍ਸ ਗੇਹਦ੍ਵਾਰੇ ਸਨ੍ਨਿਪਤਿਂਸੁ.

ਅਥ ਨੇ ਜੇਟ੍ਠਕਦਾਸੀ ‘‘ਸ੍ਵੇ, ਤਾਤਾ, ਪਚ੍ਚੇਕਬੁਦ੍ਧਾਨਂ ਹਤ੍ਥਕਮ੍ਮਂ ਦੇਥਾ’’ਤਿ ਆਨਿਸਂਸਂ ਆਚਿਕ੍ਖਿਤ੍ਵਾ ਯੇਪਿ ਨ ਕਾਤੁਕਾਮਾ, ਤੇ ਗਾਲ਼੍ਹੇਨ ਓਵਾਦੇਨ ਤਜ੍ਜੇਤ੍ਵਾ ਸਬ੍ਬੇਪਿ ਸਮ੍ਪਟਿਚ੍ਛਾਪੇਸਿ. ਸਾ ਪੁਨਦਿਵਸੇ ਪਚ੍ਚੇਕਬੁਦ੍ਧਾਨਂ ਭਤ੍ਤਂ ਦਤ੍ਵਾ ਸਬ੍ਬੇਸਂ ਦਾਸਪੁਤ੍ਤਾਨਂ ਸਞ੍ਞਂ ਅਦਾਸਿ. ਤੇ ਤਾਵਦੇਵ ਅਰਞ੍ਞਂ ਪਵਿਸਿਤ੍ਵਾ ਦਬ੍ਬਸਮ੍ਭਾਰੇ ਸਮੋਧਾਨੇਤ੍ਵਾ ਸਤਂ ਸਤਂ ਹੁਤ੍ਵਾ ਏਕੇਕਂ ਕੁਟਿਂ ਚਙ੍ਕਮਨਾਦਿਪਰਿਵਾਰਂ ਕਤ੍ਵਾ ਮਞ੍ਚਪੀਠਪਾਨੀਯ-ਪਰਿਭੋਜਨੀਯਾਦੀਨਿ ਠਪੇਤ੍ਵਾ ਪਚ੍ਚੇਕਬੁਦ੍ਧਾਨਂ ਤੇਮਾਸਂ ਤਤ੍ਥੇਵ ਵਸਨਤ੍ਥਾਯ ਪਟਿਞ੍ਞਂ ਕਾਰੇਤ੍ਵਾ ਵਾਰਭਿਕ੍ਖਂ ਪਟ੍ਠਪੇਸੁਂ. ਯਾ ਅਤ੍ਤਨੋ ਵਾਰਦਿਵਸੇ ਨ ਸਕ੍ਕੋਤਿ, ਤਸ੍ਸਾ ਜੇਟ੍ਠਕਦਾਸੀ ਸਕਗੇਹਤੋ ਨੀਹਰਿਤ੍ਵਾ ਦੇਤਿ. ਏਵਂ ਤੇਮਾਸਂ ਪਟਿਜਗ੍ਗਿਤ੍ਵਾ ਜੇਟ੍ਠਕਦਾਸੀ ਏਕੇਕਂ ਦਾਸਿਂ ਏਕੇਕਂ ਸਾਟਕਂ ਸਜ੍ਜਾਪੇਸਿ, ਪਞ੍ਚ ਥੂਲਸਾਟਕਸਤਾਨਿ ਅਹੇਸੁਂ. ਤਾਨਿ ਪਰਿਵਤ੍ਤਾਪੇਤ੍ਵਾ ਪਞ੍ਚਨ੍ਨਂ ਪਚ੍ਚੇਕਬੁਦ੍ਧਾਨਂ ਤਿਚੀਵਰਾਨਿ ਕਤ੍ਵਾ ਅਦਾਸਿ. ਪਚ੍ਚੇਕਬੁਦ੍ਧਾ ਤਾਸਂ ਪਸ੍ਸਨ੍ਤੀਨਂਯੇਵ ਆਕਾਸੇਨ ਗਨ੍ਧਮਾਦਨਪਬ੍ਬਤਂ ਅਗਮਂਸੁ.

ਤਾਪਿ ਸਬ੍ਬਾ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿਂਸੁ. ਤਾਸੁ ਜੇਟ੍ਠਿਕਾ ਤਤੋ ਚਵਿਤ੍ਵਾ ਬਾਰਾਣਸਿਯਾ ਅਵਿਦੂਰੇ ਪੇਸਕਾਰਗਾਮੇ ਪੇਸਕਾਰਜੇਟ੍ਠਕਸ੍ਸ ਗੇਹੇ ਨਿਬ੍ਬਤ੍ਤਿ. ਅਥੇਕਦਿਵਸਂ ਪਦੁਮਵਤਿਯਾ ਪੁਤ੍ਤਾ ਪਞ੍ਚਸਤਾ ਪਚ੍ਚੇਕਬੁਦ੍ਧਾ ਬਾਰਾਣਸਿਰਞ੍ਞਾ ਨਿਮਨ੍ਤਿਤਾ ਰਾਜਦ੍ਵਾਰਂ ਆਗਨ੍ਤ੍ਵਾ ਕਞ੍ਚਿ ਓਲੋਕੇਨ੍ਤਮ੍ਪਿ ਅਦਿਸ੍ਵਾ ਨਿਵਤ੍ਤਿਤ੍ਵਾ ਨਗਰਦ੍ਵਾਰੇਨ ਨਿਕ੍ਖਮਿਤ੍ਵਾ ਤਂ ਪੇਸਕਾਰਗਾਮਂ ਅਗਮਂਸੁ. ਸਾ ਇਤ੍ਥੀ ਪਚ੍ਚੇਕਬੁਦ੍ਧੇ ਦਿਸ੍ਵਾ ਸਮ੍ਪਿਯਾਯਮਾਨਾ ਸਬ੍ਬੇ ਵਨ੍ਦਿਤ੍ਵਾ ਭਿਕ੍ਖਂ ਅਦਾਸਿ. ਤੇ ਭਤ੍ਤਕਿਚ੍ਚਂ ਕਤ੍ਵਾ ਗਨ੍ਧਮਾਦਨਮੇਵ ਅਗਮਂਸੁ.

ਸਾਪਿ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੀ ਅਮ੍ਹਾਕਂ ਸਤ੍ਥੁ ਨਿਬ੍ਬਤ੍ਤਿਤੋ ਪੁਰੇਤਰਮੇਵ ਦੇਵਦਹਨਗਰੇ ਮਹਾਸੁਪ੍ਪਬੁਦ੍ਧਸ੍ਸ ਗੇਹੇ ਪਟਿਸਨ੍ਧਿਂ ਗਣ੍ਹਿ, ਗੋਤਮੀਤਿਸ੍ਸਾ ਨਾਮਂ ਅਕਂਸੁ. ਮਹਾਮਾਯਾਯ ਕਨਿਟ੍ਠਭਗਿਨੀ ਹੋਤਿ. ਮਨ੍ਤਜ੍ਝਾਯਕਾ ਬ੍ਰਾਹ੍ਮਣਾ ਲਕ੍ਖਣਾਨਿ ਪਰਿਗ੍ਗਣ੍ਹਨ੍ਤਾ ‘‘ਇਮਾਸਂ ਦ੍ਵਿਨ੍ਨਮ੍ਪਿ ਕੁਚ੍ਛਿਯਂ ਵਸਿਤਦਾਰਕਾ ਚਕ੍ਕਵਤ੍ਤਿਨੋ ਭਵਿਸ੍ਸਨ੍ਤੀ’’ਤਿ ਬ੍ਯਾਕਰਿਂਸੁ. ਸੁਦ੍ਧੋਦਨਮਹਾਰਾਜਾ ਵਯਪ੍ਪਤ੍ਤਕਾਲੇ ਤਾ ਦ੍ਵੇਪਿ ਮਙ੍ਗਲਂ ਕਤ੍ਵਾ ਅਤ੍ਤਨੋ ਘਰਂ ਆਨੇਸਿ. ਅਪਰਭਾਗੇ ਅਮ੍ਹਾਕਂ ਬੋਧਿਸਤ੍ਤੋ ਤੁਸਿਤਪੁਰਾ ਚਵਿਤ੍ਵਾ ਮਹਾਮਾਯਾਯ ਦੇਵਿਯਾ ਕੁਚ੍ਛਿਯਂ ਪਟਿਸਨ੍ਧਿਂ ਗਣ੍ਹਿ. ਮਹਾਮਾਯਾ ਤਸ੍ਸ ਜਾਤਦਿਵਸਤੋ ਸਤ੍ਤਮੇ ਦਿਵਸੇ ਕਾਲਂ ਕਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਿ. ਸੁਦ੍ਧੋਦਨਮਹਾਰਾਜਾ ਮਹਾਸਤ੍ਤਸ੍ਸ ਮਾਤੁਚ੍ਛਂ ਮਹਾਪਜਾਪਤਿਗੋਤਮਿਂ ਅਗ੍ਗਮਹੇਸਿਟ੍ਠਾਨੇ ਠਪੇਸਿ. ਤਸ੍ਮਿਂ ਕਾਲੇ ਨਨ੍ਦਕੁਮਾਰੋ ਜਾਤੋ. ਅਯਂ ਮਹਾਪਜਾਪਤਿ ਨਨ੍ਦਕੁਮਾਰਂ ਧਾਤੀਨਂ ਦਤ੍ਵਾ ਸਯਂ ਬੋਧਿਸਤ੍ਤਂ ਪਰਿਹਰਿ.

ਅਪਰੇਨ ਸਮਯੇਨ ਬੋਧਿਸਤ੍ਤੋ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਸਬ੍ਬਞ੍ਞੁਤਂ ਪਤ੍ਵਾ ਲੋਕਾਨੁਗ੍ਗਹਂ ਕਰੋਨ੍ਤੋ ਅਨੁਕ੍ਕਮੇਨ ਕਪਿਲਵਤ੍ਥੁਂ ਪਤ੍ਵਾ ਨਗਰਂ ਪਿਣ੍ਡਾਯ ਪਾਵਿਸਿ. ਅਥਸ੍ਸ ਪਿਤਾ ਸੁਦ੍ਧੋਦਨਮਹਾਰਾਜਾ ਅਨ੍ਤਰਵੀਥਿਯਂਯੇਵ ਧਮ੍ਮਕਥਂ ਸੁਤ੍ਵਾ ਸੋਤਾਪਨ੍ਨੋ ਅਹੋਸਿ. ਅਥ ਦੁਤਿਯਦਿਵਸੇ ਨਨ੍ਦੋ ਪਬ੍ਬਜਿ, ਸਤ੍ਤਮੇ ਦਿਵਸੇ ਰਾਹੁਲੋ. ਸਤ੍ਥਾ ਅਪਰੇਨ ਸਮਯੇਨ ਵੇਸਾਲਿਂ ਉਪਨਿਸ੍ਸਾਯ ਕੂਟਾਗਾਰਸਾਲਾਯਂ ਵਿਹਰਤਿ. ਤਸ੍ਮਿਂ ਸਮਯੇ ਸੁਦ੍ਧੋਦਨਮਹਾਰਾਜਾ ਸੇਤਚ੍ਛਤ੍ਤਸ੍ਸ ਹੇਟ੍ਠਾ ਅਰਹਤ੍ਤਂ ਸਚ੍ਛਿਕਤ੍ਵਾ ਪਰਿਨਿਬ੍ਬਾਯਿ. ਤਦਾ ਮਹਾਪਜਾਪਤਿਗੋਤਮੀ ਪਬ੍ਬਜ੍ਜਾਯ ਚਿਤ੍ਤਂ ਉਪ੍ਪਾਦੇਸਿ. ਤਤੋ ਰੋਹਿਣੀਨਦੀਤੀਰੇ ਕਲਹਵਿਵਾਦਸੁਤ੍ਤਪਰਿਯੋਸਾਨੇ (ਸੁ. ਨਿ. ੮੬੮ ਆਦਯੋ) ਨਿਕ੍ਖਮਿਤ੍ਵਾ ਪਬ੍ਬਜਿਤਾਨਂ ਪਞ੍ਚਨ੍ਨਂ ਕੁਮਾਰਸਤਾਨਂ ਪਾਦਪਰਿਚਾਰਿਕਾ ਸਬ੍ਬਾਵ ਏਕਚਿਤ੍ਤਾ ਹੁਤ੍ਵਾ ‘‘ਮਹਾਪਜਾਪਤਿਯਾ ਸਨ੍ਤਿਕਂ ਗਨ੍ਤ੍ਵਾ ਸਬ੍ਬਾਵ ਸਤ੍ਥੁ ਸਨ੍ਤਿਕੇ ਪਬ੍ਬਜਿਸ੍ਸਾਮਾ’’ਤਿ ਮਹਾਪਜਾਪਤਿਂ ਜੇਟ੍ਠਿਕਂ ਕਤ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਪਬ੍ਬਜਿਤੁਕਾਮਾ ਅਹੇਸੁਂ. ਅਯਞ੍ਚ ਮਹਾਪਜਾਪਤਿ ਪਠਮਮੇਵ ਏਕਵਾਰਂ ਸਤ੍ਥਾਰਂ ਪਬ੍ਬਜ੍ਜਂ ਯਾਚਮਾਨਾ ਨਾਲਤ੍ਥ, ਤਸ੍ਮਾ ਕਪ੍ਪਕਂ ਪਕ੍ਕੋਸਾਪੇਤ੍ਵਾ ਕੇਸੇ ਛਿਨ੍ਨਾਪੇਤ੍ਵਾ ਕਾਸਾਯਾਨਿ ਅਚ੍ਛਾਦੇਤ੍ਵਾ ਸਬ੍ਬਾ ਤਾ ਸਾਕਿਯਾਨਿਯੋ ਆਦਾਯ ਵੇਸਾਲਿਂ ਗਨ੍ਤ੍ਵਾ ਆਨਨ੍ਦਤ੍ਥੇਰੇਨ ਦਸਬਲਂ ਯਾਚਾਪੇਤ੍ਵਾ ਅਟ੍ਠਹਿ ਗਰੁਧਮ੍ਮੇਹਿ ਪਬ੍ਬਜ੍ਜਞ੍ਚ ਉਪਸਮ੍ਪਦਞ੍ਚ ਅਲਤ੍ਥ. ਇਤਰਾ ਪਨ ਸਬ੍ਬਾਪਿ ਏਕਤੋਵ ਉਪਸਮ੍ਪਨ੍ਨਾ ਅਹੇਸੁਂ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਤੋ ਪਨੇਤਂ ਵਤ੍ਥੁ ਪਾਲ਼ਿਯਂ (ਚੂਲ਼ਵ. ੪੦੨ ਆਦਯੋ) ਆਗਤਮੇਵ.

ਏਵਂ ਉਪਸਮ੍ਪਨ੍ਨਾ ਪਨ ਮਹਾਪਜਾਪਤਿ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ, ਅਥਸ੍ਸਾ ਸਤ੍ਥਾ ਧਮ੍ਮਂ ਦੇਸੇਸਿ. ਸਾ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਅਰਹਤ੍ਤਂ ਪਾਪੁਣਿ. ਸੇਸਾ ਪਞ੍ਚਸਤਾ ਭਿਕ੍ਖੁਨਿਯੋ ਨਨ੍ਦਕੋਵਾਦਸੁਤ੍ਤਪਰਿਯੋਸਾਨੇ (ਮ. ਨਿ. ੩.੩੯੮ ਆਦਯੋ) ਅਰਹਤ੍ਤਂ ਪਾਪੁਣਿਂਸੁ. ਏਵਮੇਤਂ ਵਤ੍ਥੁ ਸਮੁਟ੍ਠਿਤਂ. ਅਪਰਭਾਗੇ ਸਤ੍ਥਾ ਜੇਤਵਨੇ ਨਿਸਿਨ੍ਨੋ ਭਿਕ੍ਖੁਨਿਯੋ ਠਾਨਨ੍ਤਰੇ ਠਪੇਨ੍ਤੋ ਮਹਾਪਜਾਪਤਿਂ ਰਤ੍ਤਞ੍ਞੂਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਖੇਮਾਥੇਰੀਵਤ੍ਥੁ

੨੩੬. ਦੁਤਿਯੇ ਖੇਮਾਤਿ ਏਵਂਨਾਮਿਕਾ ਭਿਕ੍ਖੁਨੀ. ਇਤੋ ਪਟ੍ਠਾਯ ਚ ਪਨਸ੍ਸਾ ਪਞ੍ਹਕਮ੍ਮੇ ਅਯਮਨੁਪੁਬ੍ਬਿਕਥਾਤਿ ਅਵਤ੍ਵਾ ਸਬ੍ਬਤ੍ਥ ਅਭਿਨੀਹਾਰਂ ਆਦਿਂ ਕਤ੍ਵਾ ਵਤ੍ਤਬ੍ਬਮੇਵ ਵਕ੍ਖਾਮ.

ਅਤੀਤੇ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਅਯਂ ਪਰਪਰਿਯਾਪਨ੍ਨਾ ਹੁਤ੍ਵਾ ਨਿਬ੍ਬਤ੍ਤਿ. ਅਥੇਕਦਿਵਸਂ ਤਸ੍ਸ ਭਗਵਤੋ ਅਗ੍ਗਸਾਵਿਕਂ ਸੁਜਾਤਤ੍ਥੇਰਿਂ ਨਾਮ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ਤਯੋ ਮੋਦਕੇ ਦਤ੍ਵਾ ਤਂਦਿਵਸਮੇਵ ਅਤ੍ਤਨੋ ਕੇਸੇ ਵਿਸ੍ਸਜ੍ਜੇਤ੍ਵਾ ਥੇਰਿਯਾ ਦਾਨਂ ਦਤ੍ਵਾ ‘‘ਅਨਾਗਤੇ ਬੁਦ੍ਧੁਪ੍ਪਾਦੇ ਤੁਮ੍ਹੇ ਵਿਯ ਮਹਾਪਞ੍ਞਾ ਭਵੇਯ੍ਯ’’ਨ੍ਤਿ ਪਤ੍ਥਨਂ ਕਤ੍ਵਾ ਯਾਵਜੀਵਂ ਕੁਸਲਕਮ੍ਮੇਸੁ ਅਪ੍ਪਮਤ੍ਤਾ ਹੁਤ੍ਵਾ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਨ੍ਤੀ ਕਸ੍ਸਪਬੁਦ੍ਧਕਾਲੇ ਕਿਕਿਸ੍ਸ ਕਾਸਿਰਞ੍ਞੋ ਗੇਹੇ ਪਟਿਸਨ੍ਧਿਂ ਗਹੇਤ੍ਵਾ ਸਤ੍ਤਨ੍ਨਂ ਭਗਿਨੀਨਂ ਅਬ੍ਭਨ੍ਤਰਾ ਹੁਤ੍ਵਾ ਵੀਸਤਿਵਸ੍ਸਸਹਸ੍ਸਾਨਿ ਗੇਹੇਯੇਵ ਕੋਮਾਰਿਬ੍ਰਹ੍ਮਚਰਿਯਂ ਚਰਿਤ੍ਵਾ ਤਾਹਿ ਭਗਿਨੀਹਿ ਸਦ੍ਧਿਂ ਦਸਬਲਸ੍ਸ ਵਸਨਪਰਿਵੇਣਂ ਕਾਰੇਤ੍ਵਾ ਏਕਂ ਬੁਦ੍ਧਨ੍ਤਰਂ ਦੇਵਮਨੁਸ੍ਸੇਸੁ ਸਂਸਰਨ੍ਤੀ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਮਦ੍ਦਰਟ੍ਠੇ ਸਾਗਲਨਗਰੇ ਰਾਜਕੁਲੇ ਪਟਿਸਨ੍ਧਿਂ ਗਣ੍ਹਿ, ਖੇਮਾਤਿਸ੍ਸਾ ਨਾਮਂ ਅਕਂਸੁ. ਤਸ੍ਸਾ ਸਰੀਰਵਣ੍ਣੋ ਸੁਵਣ੍ਣਰਸਪਿਞ੍ਜਰੋ ਵਿਯ ਅਹੋਸਿ. ਸਾ ਵਯਪ੍ਪਤ੍ਤਾ ਬਿਮ੍ਬਿਸਾਰਰਞ੍ਞੋ ਗੇਹਂ ਅਗਮਾਸਿ.

ਸਾ ਤਥਾਗਤੇ ਰਾਜਗਹਂ ਉਪਨਿਸ੍ਸਾਯ ਵੇਲ਼ੁਵਨੇ ਵਿਹਰਨ੍ਤੇ ‘‘ਸਤ੍ਥਾ ਕਿਰ ਰੂਪੇ ਦੋਸਂ ਦਸ੍ਸੇਤੀ’’ਤਿ ਰੂਪਮਦਮਤ੍ਤਾ ਹੁਤ੍ਵਾ ‘‘ਮਯ੍ਹਮ੍ਪਿ ਰੂਪੇ ਦੋਸਂ ਦਸ੍ਸੇਯ੍ਯਾ’’ਤਿ ਭਯੇਨ ਦਸਬਲਂ ਦਸ੍ਸਨਾਯ ਨ ਗਚ੍ਛਤਿ. ਰਾਜਾ ਚਿਨ੍ਤੇਸਿ – ‘‘ਅਹਂ ਸਤ੍ਥੁ ਅਗ੍ਗੁਪਟ੍ਠਾਕੋ, ਮਾਦਿਸਸ੍ਸ ਚ ਨਾਮ ਅਰਿਯਸਾਵਕਸ੍ਸ ਅਗ੍ਗਮਹੇਸੀ ਦਸਬਲਂ ਦਸ੍ਸਨਾਯ ਨ ਗਚ੍ਛਤਿ, ਨ ਮੇ ਏਤਂ ਰੁਚ੍ਚਤੀ’’ਤਿ. ਸੋ ਕਵੀਹਿ ਵੇਲ਼ੁਵਨੁਯ੍ਯਾਨਸ੍ਸ ਵਣ੍ਣਂ ਬਨ੍ਧਾਪੇਤ੍ਵਾ ‘‘ਖੇਮਾਯ ਦੇਵਿਯਾ ਸਵਨੂਪਚਾਰੇ ਗਾਯਥਾ’’ਤਿ ਆਹ. ਸਾ ਉਯ੍ਯਾਨਸ੍ਸ ਵਣ੍ਣਂ ਸੁਤ੍ਵਾ ਗਨ੍ਤੁਕਾਮਾ ਹੁਤ੍ਵਾ ਰਾਜਾਨਂ ਪਟਿਪੁਚ੍ਛਿ. ਰਾਜਾ ‘‘ਉਯ੍ਯਾਨਂ ਗਚ੍ਛ, ਸਤ੍ਥਾਰਂ ਪਨ ਅਦਿਸ੍ਵਾ ਆਗਨ੍ਤੁਂ ਨ ਲਭਿਸ੍ਸਸੀ’’ਤਿ ਆਹ. ਸਾ ਰਞ੍ਞੋ ਪਟਿਵਚਨਂ ਅਦਤ੍ਵਾਵ ਮਗ੍ਗਂ ਪਟਿਪਜ੍ਜਿ. ਰਾਜਾ ਤਾਯ ਸਦ੍ਧਿਂ ਗਚ੍ਛਨ੍ਤੇ ਪੁਰਿਸੇ ਆਹ – ‘‘ਸਚੇ ਦੇਵੀ ਉਯ੍ਯਾਨਤੋ ਨਿਵਤ੍ਤਮਾਨਾ ਦਸਬਲਂ ਪਸ੍ਸਤਿ, ਇਚ੍ਚੇਤਂ ਕੁਸਲਂ. ਸਚੇ ਨ ਪਸ੍ਸਤਿ, ਰਾਜਾਣਾਯ ਨਂ ਦਸ੍ਸੇਥਾ’’ਤਿ. ਅਥ ਖੋ ਸਾ ਦੇਵੀ ਦਿਵਸਭਾਗਂ ਉਯ੍ਯਾਨੇ ਚਰਿਤ੍ਵਾ ਨਿਵਤ੍ਤਨ੍ਤੀ ਦਸਬਲਂ ਅਦਿਸ੍ਵਾਵ ਗਨ੍ਤੁਂ ਆਰਦ੍ਧਾ. ਅਥ ਨਂ ਰਾਜਪੁਰਿਸਾ ਅਤ੍ਤਨੋ ਅਰੁਚਿਯਾਵ ਦੇਵਿਂ ਸਤ੍ਥੁ ਸਨ੍ਤਿਕਂ ਨਯਿਂਸੁ.

ਸਤ੍ਥਾ ਤਂ ਆਗਚ੍ਛਨ੍ਤਿਂ ਦਿਸ੍ਵਾ ਇਦ੍ਧਿਯਾ ਏਕਂ ਦੇਵਚ੍ਛਰਂ ਨਿਮ੍ਮਿਨਿਤ੍ਵਾ ਤਾਲਵਣ੍ਟਂ ਗਹੇਤ੍ਵਾ ਬੀਜਮਾਨਂ ਵਿਯ ਅਕਾਸਿ. ਖੇਮਾ ਦੇਵੀ ਤਂ ਦਿਸ੍ਵਾ ਚਿਨ੍ਤੇਸਿ – ‘‘ਮਾਨਮ੍ਹਿ ਨਟ੍ਠਾ, ਏਵਰੂਪਾ ਨਾਮ ਦੇਵਚ੍ਛਰਪ੍ਪਟਿਭਾਗਾ ਇਤ੍ਥਿਯੋ ਦਸਬਲਸ੍ਸ ਅਵਿਦੂਰੇ ਤਿਟ੍ਠਨ੍ਤਿ, ਅਹਂ ਏਤਾਸਂ ਪਰਿਚਾਰਿਕਾਪਿ ਨਪ੍ਪਹੋਮਿ, ਮਾਨਮਦਂ ਹਿ ਨਿਸ੍ਸਾਯ ਪਾਪਚਿਤ੍ਤਸ੍ਸ ਵਸੇਨ ਨਟ੍ਠਾ’’ਤਿ ਤਂ ਨਿਮਿਤ੍ਤਂ ਗਹੇਤ੍ਵਾ ਤਮੇਵ ਇਤ੍ਥਿਂ ਓਲੋਕਯਮਾਨਾ ਅਟ੍ਠਾਸਿ. ਅਥਸ੍ਸਾ ਪਸ੍ਸਨ੍ਤਿਯਾਵ ਤਥਾਗਤਸ੍ਸ ਅਧਿਟ੍ਠਾਨਬਲੇਨ ਸਾ ਇਤ੍ਥੀ ਪਠਮਵਯਂ ਅਤਿਕ੍ਕਮ੍ਮ ਮਜ੍ਝਿਮਵਯੇ ਠਿਤਾ ਵਿਯ ਮਜ੍ਝਿਮਵਯਂ ਅਤਿਕ੍ਕਮ੍ਮ ਪਚ੍ਛਿਮਵਯੇ ਠਿਤਾ ਵਿਯ ਚ ਵਲਿਤ੍ਤਚਾ ਪਲਿਤਕੇਸਾ ਖਣ੍ਡਵਿਰਲ਼ਦਨ੍ਤਾ ਅਹੋਸਿ. ਤਤੋ ਤਸ੍ਸਾ ਪਸ੍ਸਨ੍ਤਿਯਾਵ ਸਦ੍ਧਿਂ ਤਾਲਵਣ੍ਟੇਨ ਪਰਿਵਤ੍ਤਿਤ੍ਵਾ ਪਰਿਪਤਿ. ਤਤੋ ਖੇਮਾ ਪੁਬ੍ਬਹੇਤੁਸਮ੍ਪਨ੍ਨਤ੍ਤਾ ਤਸ੍ਮਿਂ ਆਰਮ੍ਮਣੇ ਆਪਾਥਗਤੇ ਏਵਂ ਚਿਨ੍ਤੇਸਿ – ‘‘ਏਵਂਵਿਧਮ੍ਪਿ ਨਾਮ ਸਰੀਰਂ ਏਵਰੂਪਂ ਵਿਪਤ੍ਤਿਂ ਪਾਪੁਣਾਤਿ, ਮਯ੍ਹਮ੍ਪਿ ਸਰੀਰਂ ਏਵਂਗਤਿਕਮੇਵ ਭਵਿਸ੍ਸਤੀ’’ਤਿ. ਅਥਸ੍ਸਾ ਏਵਂ ਚਿਨ੍ਤਿਤਕ੍ਖਣੇ ਸਤ੍ਥਾ ਇਮਂ ਧਮ੍ਮਪਦੇ ਗਾਥਮਾਹ –

‘‘ਯੇ ਰਾਗਰਤ੍ਤਾਨੁਪਤਨ੍ਤਿ ਸੋਤਂ,

ਸਯਂਕਤਂ ਮਕ੍ਕਟਕੋਵ ਜਾਲਂ;

ਏਤਮ੍ਪਿ ਛੇਤ੍ਵਾਨ ਵਜਨ੍ਤਿ ਧੀਰਾ,

ਅਨਪੇਕ੍ਖਿਨੋ ਸਬ੍ਬਦੁਕ੍ਖਂ ਪਹਾਯਾ’’ਤਿ.

ਸਾ ਗਾਥਾਪਰਿਯੋਸਾਨੇ ਠਿਤਪਦੇ ਠਿਤਾਯੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਅਗਾਰਮਜ੍ਝੇ ਵਸਨ੍ਤੇਨ ਨਾਮ ਅਰਹਤ੍ਤਂ ਪਤ੍ਤੇਨ ਤਂਦਿਵਸਮੇਵ ਪਰਿਨਿਬ੍ਬਾਯਿਤਬ੍ਬਂ ਵਾ ਪਬ੍ਬਜਿਤਬ੍ਬਂ ਵਾ ਹੋਤਿ, ਸਾ ਪਨ ਅਤ੍ਤਨੋ ਆਯੁਸਙ੍ਖਾਰਾਨਂ ਪਵਤ੍ਤਨਭਾਵਂ ਞਤ੍ਵਾ ‘‘ਅਤ੍ਤਨੋ ਪਬ੍ਬਜ੍ਜਂ ਅਨੁਜਾਨਾਪੇਸ੍ਸਾਮੀ’’ਤਿ ਸਤ੍ਥਾਰਂ ਵਨ੍ਦਿਤ੍ਵਾ ਰਾਜਨਿਵੇਸਨਂ ਗਨ੍ਤ੍ਵਾ ਰਾਜਾਨਂ ਅਨਭਿਵਾਦੇਤ੍ਵਾਵ ਅਟ੍ਠਾਸਿ. ਰਾਜਾ ਇਙ੍ਗਿਤੇਨੇਵ ਅਞ੍ਞਾਸਿ – ‘‘ਅਰਿਯਧਮ੍ਮਂ ਪਤ੍ਤਾ ਭਵਿਸ੍ਸਤੀ’’ਤਿ. ਅਥ ਨਂ ਆਹ – ‘‘ਦੇਵਿ ਗਤਾ ਨੁ ਖੋ ਸਤ੍ਥੁਦਸ੍ਸਨਾਯਾ’’ਤਿ. ਮਹਾਰਾਜ, ਤੁਮ੍ਹੇਹਿ ਦਿਟ੍ਠਦਸ੍ਸਨਂ ਪਰਿਤ੍ਤਂ, ਅਹਂ ਪਨ ਦਸਬਲਂ ਸੁਦਿਟ੍ਠਮਕਾਸਿਂ, ਪਬ੍ਬਜ੍ਜਂ ਮੇ ਅਨੁਜਾਨਾਥਾਤਿ. ਰਾਜਾ ‘‘ਸਾਧੁ, ਦੇਵੀ’’ਤਿ ਸਮ੍ਪਟਿਚ੍ਛਿਤ੍ਵਾ ਸੁਵਣ੍ਣਸਿਵਿਕਾਯ ਭਿਕ੍ਖੁਨਿਉਪਸ੍ਸਯਂ ਉਪਨੇਤ੍ਵਾ ਪਬ੍ਬਾਜੇਸਿ. ਅਥਸ੍ਸਾ ‘‘ਖੇਮਾਥੇਰੀ ਨਾਮ ਗਿਹਿਭਾਵੇ ਠਤ੍ਵਾ ਅਰਹਤ੍ਤਂ ਪਤ੍ਤਾ’’ਤਿ ਮਹਾਪਞ੍ਞਭਾਵੋ ਪਾਕਟੋ ਅਹੋਸਿ. ਇਦਮੇਤ੍ਥ ਵਤ੍ਥੁ. ਅਥ ਸਤ੍ਥਾ ਅਪਰਭਾਗੇ ਜੇਤਵਨੇ ਨਿਸਿਨ੍ਨੋ ਭਿਕ੍ਖੁਨਿਯੋ ਪਟਿਪਾਟਿਯਾ ਠਾਨਨ੍ਤਰੇ ਠਪੇਨ੍ਤੋ ਖੇਮਾਥੇਰਿਂ ਮਹਾਪਞ੍ਞਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਉਪ੍ਪਲਵਣ੍ਣਾਥੇਰੀਵਤ੍ਥੁ

੨੩੭. ਤਤਿਯੇ ਉਪ੍ਪਲਵਣ੍ਣਾਤਿ ਨੀਲੁਪ੍ਪਲਗਬ੍ਭਸਦਿਸੇਨੇਵ ਵਣ੍ਣੇਨ ਸਮਨ੍ਨਾਗਤਤ੍ਤਾ ਏਵਂਲਦ੍ਧਨਾਮਾ ਥੇਰੀ. ਸਾ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਪਟਿਸਨ੍ਧਿਂ ਗਣ੍ਹਿਤ੍ਵਾ ਅਪਰਭਾਗੇ ਮਹਾਜਨੇਨ ਸਦ੍ਧਿਂ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਂ ਸੁਣਨ੍ਤੀ ਸਤ੍ਥਾਰਂ ਏਕਂ ਭਿਕ੍ਖੁਨਿਂ ਇਦ੍ਧਿਮਨ੍ਤੀਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਸਤ੍ਤਾਹਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਾ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੀ ਕਸ੍ਸਪਬੁਦ੍ਧਕਾਲੇ ਬਾਰਾਣਸਿਨਗਰੇ ਕਿਕਿਸ੍ਸ ਕਾਸਿਰਞ੍ਞੋ ਗੇਹੇ ਪਟਿਸਨ੍ਧਿਂ ਗਣ੍ਹਿਤ੍ਵਾ ਸਤ੍ਤਨ੍ਨਂ ਭਗਿਨੀਨਂ ਅਬ੍ਭਨ੍ਤਰਾ ਹੁਤ੍ਵਾ ਵੀਸਤਿ ਵਸ੍ਸਸਹਸ੍ਸਾਨਿ ਬ੍ਰਹ੍ਮਚਰਿਯਂ ਚਰਿਤ੍ਵਾ ਭਿਕ੍ਖੁਸਙ੍ਘਸ੍ਸ ਪਰਿਵੇਣਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਾ.

ਤਤੋ ਚਵਿਤ੍ਵਾ ਪੁਨ ਮਨੁਸ੍ਸਲੋਕਂ ਆਗਚ੍ਛਨ੍ਤੀ ਏਕਸ੍ਮਿਂ ਗਾਮੇ ਸਹਤ੍ਥਾ ਕਮ੍ਮਂ ਕਤ੍ਵਾ ਜੀਵਨਕਟ੍ਠਾਨੇ ਨਿਬ੍ਬਤ੍ਤਾ. ਸਾ ਏਕਦਿਵਸਂ ਖੇਤ੍ਤਕੁਟਿਂ ਗਚ੍ਛਨ੍ਤੀ ਅਨ੍ਤਰਾਮਗ੍ਗੇ ਏਕਸ੍ਮਿਂ ਸਰੇ ਪਾਤੋਵ ਪੁਪ੍ਫਿਤਂ ਪਦੁਮਪੁਪ੍ਫਂ ਦਿਸ੍ਵਾ ਤਂ ਸਰਂ ਓਰੁਯ੍ਹ ਤਞ੍ਚੇਵ ਪੁਪ੍ਫਂ ਲਾਜਪਕ੍ਖਿਪਨਤ੍ਥਾਯ ਪਦੁਮਿਨਿਯਾ ਪਤ੍ਤਞ੍ਚ ਗਹੇਤ੍ਵਾ ਕੇਦਾਰੇ ਸਾਲਿਸੀਸਾਨਿ ਛਿਨ੍ਦਿਤ੍ਵਾ ਕੁਟਿਕਾਯ ਨਿਸਿਨ੍ਨਾ ਲਾਜੇ ਭਜ੍ਜਿਤ੍ਵਾ ਪਞ੍ਚ ਲਾਜਸਤਾਨਿ ਗਣੇਸਿ. ਤਸ੍ਮਿਂ ਖਣੇ ਗਨ੍ਧਮਾਦਨਪਬ੍ਬਤੇ ਨਿਰੋਧਸਮਾਪਤ੍ਤਿਤੋ ਵੁਟ੍ਠਿਤੋ ਏਕੋ ਪਚ੍ਚੇਕਬੁਦ੍ਧੋ ਆਗਨ੍ਤ੍ਵਾ ਤਸ੍ਸਾ ਅਵਿਦੂਰੇ ਅਟ੍ਠਾਸਿ. ਸਾ ਪਚ੍ਚੇਕਬੁਦ੍ਧਂ ਦਿਸ੍ਵਾ ਲਾਜੇਹਿ ਸਦ੍ਧਿਂ ਪਦੁਮਪੁਪ੍ਫਂ ਗਹੇਤ੍ਵਾ ਕੁਟਿਤੋ ਓਰੁਯ੍ਹ ਲਾਜੇ ਪਚ੍ਚੇਕਬੁਦ੍ਧਸ੍ਸ ਪਤ੍ਤੇ ਪਕ੍ਖਿਪਿਤ੍ਵਾ ਪਦੁਮਪੁਪ੍ਫੇਨ ਪਤ੍ਤਂ ਪਿਧਾਯ ਅਦਾਸਿ. ਅਥਸ੍ਸਾ ਪਚ੍ਚੇਕਬੁਦ੍ਧੇ ਥੋਕਂ ਗਤੇ ਏਤਦਹੋਸਿ – ‘‘ਪਬ੍ਬਜਿਤਾ ਨਾਮ ਪੁਪ੍ਫੇਨ ਅਨਤ੍ਥਿਕਾ, ਅਹਂ ਪੁਪ੍ਫਂ ਗਹੇਤ੍ਵਾ ਪਿਲ਼ਨ੍ਧਿਸ੍ਸਾਮੀ’’ਤਿ ਗਨ੍ਤ੍ਵਾ ਪਚ੍ਚੇਕਬੁਦ੍ਧਸ੍ਸ ਹਤ੍ਥਤੋ ਪੁਪ੍ਫਂ ਗਹੇਤ੍ਵਾ ਪੁਨ ਚਿਨ੍ਤੇਸਿ – ‘‘ਸਚੇ, ਅਯ੍ਯੋ, ਪੁਪ੍ਫੇਨ ਅਨਤ੍ਥਿਕੋ ਅਭਵਿਸ੍ਸ, ਪਤ੍ਤਮਤ੍ਥਕੇ ਠਪੇਤੁਂ ਨ ਅਦਸ੍ਸ, ਅਦ੍ਧਾ ਅਯ੍ਯਸ੍ਸ ਅਤ੍ਥੋ ਭਵਿਸ੍ਸਤੀ’’ਤਿ ਪੁਨ ਗਨ੍ਤ੍ਵਾ ਪਤ੍ਤਮਤ੍ਥਕੇ ਠਪੇਤ੍ਵਾ ਪਚ੍ਚੇਕਬੁਦ੍ਧਂ ਖਮਾਪੇਤ੍ਵਾ, ‘‘ਭਨ੍ਤੇ, ਇਮੇਸਂ ਮੇ ਲਾਜਾਨਂ ਨਿਸ੍ਸਨ੍ਦੇਨ ਲਾਜਗਣਨਾਯ ਪੁਤ੍ਤਾ ਅਸ੍ਸੁ, ਪਦੁਮਪੁਪ੍ਫਸ੍ਸ ਨਿਸ੍ਸਨ੍ਦੇਨ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਮੇ ਪਦੇ ਪਦੇ ਪਦੁਮਪੁਪ੍ਫਂ ਉਟ੍ਠਹਤੂ’’ਤਿ ਪਤ੍ਥਨਂ ਅਕਾਸਿ. ਪਚ੍ਚੇਕਬੁਦ੍ਧੋ ਤਸ੍ਸਾ ਪਸ੍ਸਨ੍ਤਿਯਾਵ ਆਕਾਸੇਨ ਗਨ੍ਧਮਾਦਨਪਬ੍ਬਤਂ ਗਨ੍ਤ੍ਵਾ ਤਂ ਪਦੁਮਂ ਨਨ੍ਦਮੂਲਕਪਬ੍ਭਾਰੇ ਪਚ੍ਚੇਕਬੁਦ੍ਧਾਨਂ ਅਕ੍ਕਮਨਸੋਪਾਨਸਮੀਪੇ ਪਾਦਪੁਞ੍ਛਨਂ ਕਤ੍ਵਾ ਠਪੇਸਿ.

ਸਾਪਿ ਤਸ੍ਸ ਕਮ੍ਮਸ੍ਸ ਨਿਸ੍ਸਨ੍ਦੇਨ ਦੇਵਲੋਕੇ ਪਟਿਸਨ੍ਧਿਂ ਗਣ੍ਹਿ, ਨਿਬ੍ਬਤ੍ਤਕਾਲਤੋ ਪਟ੍ਠਾਯ ਚਸ੍ਸਾ ਪਦੇ ਪਦੇ ਮਹਾਪਦੁਮਪੁਪ੍ਫਂ ਉਟ੍ਠਾਸਿ. ਸਾ ਤਤੋ ਚਵਿਤ੍ਵਾ ਪਬ੍ਬਤਪਾਦੇ ਏਕਸ੍ਮਿਂ ਪਦੁਮਸ੍ਸਰੇ ਪਦੁਮਗਬ੍ਭੇ ਨਿਬ੍ਬਤ੍ਤਿ. ਤਂ ਨਿਸ੍ਸਾਯ ਏਕੋ ਤਾਪਸੋ ਵਸਤਿ, ਸੋ ਪਾਤੋਵ ਮੁਖਧੋਵਨਤ੍ਥਾਯ ਸਰਂ ਗਨ੍ਤ੍ਵਾ ਤਂ ਪੁਪ੍ਫਂ ਦਿਸ੍ਵਾ ਚਿਨ੍ਤੇਸਿ – ‘‘ਇਦਂ ਪੁਪ੍ਫਂ ਸੇਸੇਹਿ ਮਹਨ੍ਤਤਰਂ, ਸੇਸਾਨਿ ਚ ਪੁਪ੍ਫਿਤਾਨਿ, ਇਦਂ ਮਕੁਲ਼ਿਤਮੇਵ, ਭਵਿਤਬ੍ਬਮੇਤ੍ਥ ਕਾਰਣੇਨਾ’’ਤਿ ਉਦਕਂ ਓਤਰਿਤ੍ਵਾ ਤਂ ਪੁਪ੍ਫਂ ਗਣ੍ਹਿ. ਤਂ ਤੇਨ ਗਹਿਤਮਤ੍ਤਮੇਵ ਪੁਪ੍ਫਿਤਂ. ਤਾਪਸੋ ਅਨ੍ਤੋਪਦੁਮਗਬ੍ਭੇ ਨਿਪਨ੍ਨਦਾਰਿਕਂ ਅਦ੍ਦਸ. ਦਿਟ੍ਠਕਾਲਤੋ ਪਟ੍ਠਾਯ ਚ ਧੀਤੁਸਿਨੇਹਂ ਲਭਿਤ੍ਵਾ ਪਦੁਮੇਨੇਵ ਸਦ੍ਧਿਂ ਪਣ੍ਣਸਾਲਂ ਨੇਤ੍ਵਾ ਮਞ੍ਚਕੇ ਨਿਪਜ੍ਜਾਪੇਸਿ. ਅਥਸ੍ਸਾ ਪੁਞ੍ਞਾਨੁਭਾਵੇਨ ਅਙ੍ਗੁਟ੍ਠਕੇ ਖੀਰਂ ਨਿਬ੍ਬਤ੍ਤਿ. ਸੋ ਤਸ੍ਮਿਂ ਪੁਪ੍ਫੇ ਮਿਲਾਤੇ ਅਞ੍ਞਂ ਨਵਪੁਪ੍ਫਂ ਆਹਰਿਤ੍ਵਾ ਤਂ ਨਿਪਜ੍ਜਾਪੇਸਿ. ਅਥਸ੍ਸਾ ਆਧਾਵਨਵਿਧਾਵਨੇਨ ਕੀਲ਼ਿਤੁਂ ਸਮਤ੍ਥਕਾਲਤੋ ਪਟ੍ਠਾਯ ਪਦਵਾਰੇ ਪਦਵਾਰੇ ਪਦੁਮਪੁਪ੍ਫਂ ਉਟ੍ਠਾਸਿ, ਕੁਙ੍ਕੁਮਰਾਸਿਸ੍ਸ ਵਿਯਸ੍ਸਾ ਸਰੀਰਵਣ੍ਣੋ ਅਹੋਸਿ. ਸਾ ਅਪ੍ਪਤ੍ਤਾ ਦੇਵਵਣ੍ਣਂ, ਅਤਿਕ੍ਕਨ੍ਤਾ ਮਾਨੁਸਵਣ੍ਣਂ ਅਹੋਸਿ. ਸਾ ਪਿਤਰਿ ਫਲਾਫਲਤ੍ਥਾਯ ਗਤੇ ਪਣ੍ਣਸਾਲਾਯਂ ਓਹੀਯਤਿ.

ਅਥੇਕਦਿਵਸਂ ਤਸ੍ਸਾ ਵਯਪ੍ਪਤ੍ਤਕਾਲੇ ਪਿਤਰਿ ਫਲਾਫਲਤ੍ਥਾਯ ਗਤੇ ਏਕੋ ਵਨਚਰਕੋ ਤਂ ਦਿਸ੍ਵਾ ਚਿਨ੍ਤੇਸਿ – ‘‘ਮਨੁਸ੍ਸਾਨਂ ਨਾਮ ਏਵਂਵਿਧਂ ਰੂਪਂ ਨਤ੍ਥਿ, ਵੀਮਂਸਿਸ੍ਸਾਮਿ ਨ’’ਨ੍ਤਿ ਤਾਪਸਸ੍ਸ ਆਗਮਨਂ ਉਦਿਕ੍ਖਨ੍ਤੋ ਨਿਸੀਦਿ. ਸਾ ਪਿਤਰਿ ਆਗਚ੍ਛਨ੍ਤੇ ਪਟਿਪਥਂ ਗਨ੍ਤ੍ਵਾ ਤਸ੍ਸ ਹਤ੍ਥਤੋ ਕਾਜਕਮਣ੍ਡਲੁਂ ਅਗ੍ਗਹੇਸਿ, ਆਗਨ੍ਤ੍ਵਾ ਨਿਸਿਨ੍ਨਸ੍ਸ ਚਸ੍ਸ ਅਤ੍ਤਨਾ ਕਰਣਵਤ੍ਤਂ ਦਸ੍ਸੇਸਿ. ਤਦਾ ਸੋ ਵਨਚਰਕੋ ਮਨੁਸ੍ਸਭਾਵਂ ਞਤ੍ਵਾ ਤਾਪਸਂ ਅਭਿਵਾਦੇਤ੍ਵਾ ਨਿਸੀਦਿ. ਤਾਪਸੋ ਤਂ ਵਨਚਰਕਂ ਵਨਮੂਲਫਲਾਫਲੇਹਿ ਚ ਪਾਨੀਯੇਨ ਚ ਨਿਮਨ੍ਤੇਤ੍ਵਾ, ‘‘ਭੋ ਪੁਰਿਸ, ਇਮਸ੍ਮਿਂਯੇਵ ਠਾਨੇ ਵਸਿਸ੍ਸਸਿ, ਉਦਾਹੁ ਗਮਿਸਸ੍ਸੀ’’ਤਿ ਪੁਚ੍ਛਿ. ਗਮਿਸ੍ਸਾਮਿ, ਭਨ੍ਤੇ, ਇਧ ਕਿਂ ਕਰਿਸ੍ਸਾਮੀਤਿ. ਇਦਂ ਤਯਾ ਦਿਟ੍ਠਕਾਰਣਂ ਏਤ੍ਤੋ ਗਨ੍ਤ੍ਵਾ ਅਕਥੇਤੁਂ ਸਕ੍ਖਿਸ੍ਸਸੀਤਿ. ਸਚੇ, ਅਯ੍ਯੋ, ਨ ਇਚ੍ਛਤਿ, ਕਿਂ ਕਾਰਣਾ ਕਥੇਸ੍ਸਾਮੀਤਿ ਤਾਪਸਂ ਵਨ੍ਦਿਤ੍ਵਾ ਪੁਨ ਆਗਮਨਕਾਲੇ ਮਗ੍ਗਸਞ੍ਜਾਨਨਤ੍ਥਂ ਸਾਖਾਸਞ੍ਞਞ੍ਚ ਰੁਕ੍ਖਸਞ੍ਞਞ੍ਚ ਕਰੋਨ੍ਤੋ ਪਕ੍ਕਾਮਿ.

ਸੋ ਬਾਰਾਣਸਿਂ ਗਨ੍ਤ੍ਵਾ ਰਾਜਾਨਂ ਅਦ੍ਦਸ, ਰਾਜਾ ‘‘ਕਸ੍ਮਾ ਆਗਤੋਸੀ’’ਤਿ ਪੁਚ੍ਛਿ. ‘‘ਅਹਂ, ਦੇਵ, ਤੁਮ੍ਹਾਕਂ ਵਨਚਰਕੋ ਪਬ੍ਬਤਪਾਦੇ ਅਚ੍ਛਰਿਯਂ ਇਤ੍ਥਿਰਤਨਂ ਦਿਸ੍ਵਾ ਆਗਤੋਮ੍ਹੀ’’ਤਿ ਸਬ੍ਬਂ ਪਵਤ੍ਤਿਂ ਕਥੇਸਿ. ਸੋ ਤਸ੍ਸ ਵਚਨਂ ਸੁਤ੍ਵਾ ਵੇਗੇਨ ਪਬ੍ਬਤਪਾਦਂ ਗਨ੍ਤ੍ਵਾ ਅਵਿਦੂਰੇ ਠਾਨੇ ਖਨ੍ਧਾਵਾਰਂ ਨਿਵੇਸੇਤ੍ਵਾ ਵਨਚਰਕੇਨ ਚੇਵ ਅਞ੍ਞੇਹਿ ਚ ਪੁਰਿਸੇਹਿ ਸਦ੍ਧਿਂ ਤਾਪਸਸ੍ਸ ਭਤ੍ਤਕਿਚ੍ਚਂ ਕਤ੍ਵਾ ਨਿਸਿਨ੍ਨਵੇਲਾਯ ਤਤ੍ਥ ਗਨ੍ਤ੍ਵਾ ਅਭਿਵਾਦੇਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਏਕਮਨ੍ਤਂ ਨਿਸੀਦਿ. ਰਾਜਾ ਤਾਪਸਸ੍ਸ ਪਬ੍ਬਜਿਤਪਰਿਕ੍ਖਾਰਭਣ੍ਡਂ ਪਾਦਮੂਲੇ ਠਪੇਤ੍ਵਾ, ‘‘ਭਨ੍ਤੇ, ਇਮਸ੍ਮਿਂ ਠਾਨੇ ਕਿਂ ਕਰੋਮ, ਗਚ੍ਛਾਮਾ’’ਤਿ ਆਹ. ਗਚ੍ਛ, ਮਹਾਰਾਜਾਤਿ. ਆਮ, ਗਚ੍ਛਾਮਿ, ਭਨ੍ਤੇ. ਅਯ੍ਯਸ੍ਸ ਪਨ ਸਮੀਪੇ ਵਿਸਭਾਗਪਰਿਸਾ ਅਤ੍ਥੀਤਿ ਅਸ੍ਸੁਮ੍ਹ, ਅਸਾਰੁਪ੍ਪਾ ਏਸਾ ਪਬ੍ਬਜਿਤਾਨਂ, ਮਯਾ ਸਦ੍ਧਿਂ ਗਚ੍ਛਤੁ, ਭਨ੍ਤੇਤਿ. ਮਨੁਸ੍ਸਾਨਂ ਚਿਤ੍ਤਂ ਨਾਮ ਦੁਤ੍ਤੋਸਯਂ, ਕਥਂ ਬਹੂਨਂ ਮਜ੍ਝੇ ਵਸਿਸ੍ਸਤੀਤਿ. ਅਮ੍ਹਾਕਂ ਰੁਚਿਤਕਾਲਤੋ ਪਟ੍ਠਾਯ ਸੇਸਾਨਂ ਜੇਟ੍ਠਕਟ੍ਠਾਨੇ ਠਪੇਤ੍ਵਾ ਪਟਿਜਗ੍ਗਿਸ੍ਸਾਮਿ, ਭਨ੍ਤੇਤਿ.

ਸੋ ਰਞ੍ਞੋ ਕਥਂ ਸੁਤ੍ਵਾ ਦਹਰਕਾਲੇ ਗਹਿਤਨਾਮਵਸੇਨੇਵ, ‘‘ਅਮ੍ਮ, ਪਦੁਮਵਤੀ’’ਤਿ ਧੀਤਰਂ ਪਕ੍ਕੋਸਿ. ਸਾ ਏਕਵਚਨੇਨੇਵ ਪਣ੍ਣਸਾਲਤੋ ਨਿਕ੍ਖਮਿਤ੍ਵਾ ਪਿਤਰਂ ਅਭਿਵਾਦੇਤ੍ਵਾ ਅਟ੍ਠਾਸਿ. ਅਥ ਨਂ ਪਿਤਾ ਆਹ – ‘‘ਤ੍ਵਂ, ਅਮ੍ਮ, ਵਯਪ੍ਪਤ੍ਤਾ, ਇਮਸ੍ਮਿਂ ਠਾਨੇ ਰਞ੍ਞਾ ਦਿਟ੍ਠਕਾਲਤੋ ਪਟ੍ਠਾਯ ਵਸਿਤੁਂ ਅਯੁਤ੍ਤਾ, ਰਞ੍ਞਾ ਸਦ੍ਧਿਂ ਗਚ੍ਛ, ਅਮ੍ਮਾ’’ਤਿ. ਸਾ ‘‘ਸਾਧੁ, ਤਾਤਾ’’ਤਿ ਪਿਤੁ ਵਚਨਂ ਸਮ੍ਪਟਿਚ੍ਛਿਤ੍ਵਾ ਅਭਿਵਾਦੇਤ੍ਵਾ ਪਰੋਦਮਾਨਾ ਅਟ੍ਠਾਸਿ. ਰਾਜਾ ‘‘ਇਮਿਸ੍ਸਾ ਪਿਤੁ ਚਿਤ੍ਤਂ ਗਣ੍ਹਾਮੀ’’ਤਿ ਤਸ੍ਮਿਂਯੇਵ ਠਾਨੇ ਕਹਾਪਣਰਾਸਿਮ੍ਹਿ ਠਪੇਤ੍ਵਾ ਅਭਿਸੇਕਂ ਅਕਾਸਿ. ਅਥ ਨਂ ਗਹੇਤ੍ਵਾ ਅਤ੍ਤਨੋ ਨਗਰਂ ਆਨੇਤ੍ਵਾ ਆਗਤਕਾਲਤੋ ਪਟ੍ਠਾਯ ਸੇਸਇਤ੍ਥਿਯੋ ਅਨੋਲੋਕੇਤ੍ਵਾ ਤਾਯ ਸਦ੍ਧਿਂਯੇਵ ਰਮਤਿ. ਤਾ ਇਤ੍ਥਿਯੋ ਇਸ੍ਸਾਪਕਤਾ ਤਂ ਰਞ੍ਞੋ ਅਨ੍ਤਰੇ ਪਰਿਭਿਨ੍ਦਿਤੁਕਾਮਾ ਏਵਮਾਹਂਸੁ – ‘‘ਨਾਯਂ, ਮਹਾਰਾਜ, ਮਨੁਸ੍ਸਜਾਤਿਕਾ, ਕਹਂ ਨਾਮ ਤੁਮ੍ਹੇਹਿ ਮਨੁਸ੍ਸਾਨਂ ਵਿਚਰਣਟ੍ਠਾਨੇ ਪਦੁਮਾਨਿ ਉਟ੍ਠਹਨ੍ਤਾਨਿ ਦਿਟ੍ਠਪੁਬ੍ਬਾਨਿ, ਅਦ੍ਧਾ ਅਯਂ ਯਕ੍ਖਿਨੀ, ਨੀਹਰਥ ਨਂ ਮਹਾਰਾਜਾ’’ਤਿ. ਰਾਜਾ ਤਾਸਂ ਕਥਂ ਸੁਤ੍ਵਾ ਤੁਣ੍ਹੀ ਅਹੋਸਿ.

ਅਥਸ੍ਸ ਅਪਰੇਨ ਸਮਯੇਨ ਪਚ੍ਚਨ੍ਤੋ ਕੁਪਿਤੋ. ਸੋ ‘‘ਗਰੁਗਬ੍ਭਾ ਪਦੁਮਵਤੀ’’ਤਿ ਤਂ ਨਗਰੇ ਠਪੇਤ੍ਵਾ ਪਚ੍ਚਨ੍ਤਂ ਅਗਮਾਸਿ. ਅਥ ਤਾ ਇਤ੍ਥਿਯੋ ਤਸ੍ਸਾ ਉਪਟ੍ਠਾਯਿਕਾਯ ਲਞ੍ਜਂ ਦਤ੍ਵਾ ‘‘ਇਮਿਸ੍ਸਾ ਦਾਰਕਂ ਜਾਤਮਤ੍ਤਮੇਵ ਅਪਨੇਤ੍ਵਾ ਏਕਂ ਦਾਰੁਘਟਿਕਂ ਲੋਹਿਤੇਨ ਮਕ੍ਖੇਤ੍ਵਾ ਸਨ੍ਤਿਕੇ ਠਪੇਹੀ’’ਤਿ ਆਹਂਸੁ. ਪਦੁਮਵਤਿਯਾਪਿ ਨਚਿਰਸ੍ਸੇਵ ਗਬ੍ਭਵੁਟ੍ਠਾਨਂ ਅਹੋਸਿ. ਮਹਾਪਦੁਮਕੁਮਾਰੋ ਏਕਕੋਵ ਕੁਚ੍ਛਿਯਂ ਪਟਿਸਨ੍ਧਿਂ ਗਣ੍ਹਿ. ਅਵਸੇਸਾ ਏਕੂਨਪਞ੍ਚਸਤਾ ਦਾਰਕਾ ਮਹਾਪਦੁਮਕੁਮਾਰਸ੍ਸ ਮਾਤੁਕੁਚ੍ਛਿਤੋ ਨਿਕ੍ਖਮਿਤ੍ਵਾ ਨਿਪਨ੍ਨਕਾਲੇ ਸਂਸੇਦਜਾ ਹੁਤ੍ਵਾ ਨਿਬ੍ਬਤ੍ਤਿਂਸੁ. ਅਥਸ੍ਸ ‘‘ਨ ਤਾਵਾਯਂ ਸਤਿਂ ਪਟਿਲਭਤੀ’’ਤਿ ਞਤ੍ਵਾ ਉਪਟ੍ਠਾਯਿਕਾ ਏਕਂ ਦਾਰੁਘਟਿਕਂ ਲੋਹਿਤੇਨ ਮਕ੍ਖੇਤ੍ਵਾ ਸਮੀਪੇ ਠਪੇਤ੍ਵਾ ਤਾਸਂ ਇਤ੍ਥੀਨਂ ਸਞ੍ਞਂ ਅਦਾਸਿ. ਤਾ ਪਞ੍ਚਸਤਾਪਿ ਇਤ੍ਥਿਯੋ ਏਕੇਕਾ ਏਕੇਕਂ ਦਾਰਕਂ ਗਹੇਤ੍ਵਾ ਚੁਨ੍ਦਕਾਰਕਾਨਂ ਸਨ੍ਤਿਕਂ ਪੇਸੇਤ੍ਵਾ ਕਰਣ੍ਡਕੇ ਆਹਰਾਪੇਤ੍ਵਾ ਅਤ੍ਤਨਾ ਅਤ੍ਤਨਾ ਗਹਿਤਦਾਰਕੇ ਤਤ੍ਥ ਨਿਪਜ੍ਜਾਪੇਤ੍ਵਾ ਬਹਿ ਲਞ੍ਛਨਂ ਕਤ੍ਵਾ ਠਪਯਿਂਸੁ.

ਪਦੁਮਵਤੀਪਿ ਖੋ ਸਞ੍ਞਂ ਲਭਿਤ੍ਵਾ ਤਂ ਉਪਟ੍ਠਾਯਿਕਂ ‘‘ਕਿਂ ਵਿਜਾਤਮ੍ਹਿ, ਅਮ੍ਮਾ’’ਤਿ ਪੁਚ੍ਛਿ. ਸਾ ਤਂ ਸਨ੍ਤਜ੍ਜੇਤ੍ਵਾ ‘‘ਕੁਤੋ ਤ੍ਵਂ ਦਾਰਕਂ ਲਭਿਸ੍ਸਸੀ’’ਤਿ ਵਤ੍ਵਾ ‘‘ਅਯਂ ਤੇ ਕੁਚ੍ਛਿਤੋ ਨਿਕ੍ਖਨ੍ਤਦਾਰਕੋ’’ਤਿ ਲੋਹਿਤਮਕ੍ਖਿਤਂ ਦਾਰੁਘਟਿਕਂ ਪੁਰਤੋ ਠਪੇਸਿ. ਸਾ ਤਂ ਦਿਸ੍ਵਾ ਦੋਮਨਸ੍ਸਪ੍ਪਤ੍ਤਾ ‘‘ਸੀਘਂ ਨਂ ਫਾਲੇਤ੍ਵਾ ਅਪਨੇਹਿ, ਸਚੇ ਕੋਚਿ ਪਸ੍ਸੇਯ੍ਯ ਲਜ੍ਜਿਤਬ੍ਬਂ ਭਵੇਯ੍ਯਾ’’ਤਿ ਆਹ. ਸਾ ਤਸ੍ਸਾ ਕਥਂ ਸੁਤ੍ਵਾ ਅਤ੍ਥਕਾਮਾ ਵਿਯ ਦਾਰੁਘਟਿਕਂ ਫਾਲੇਤ੍ਵਾ ਉਦ੍ਧਨੇ ਪਕ੍ਖਿਪਿ.

ਰਾਜਾਪਿ ਪਚ੍ਚਨ੍ਤਤੋ ਆਗਨ੍ਤ੍ਵਾ ਨਕ੍ਖਤ੍ਤਂ ਪਟਿਮਾਨੇਨ੍ਤੋ ਬਹਿਨਗਰੇ ਖਨ੍ਧਾਵਾਰਂ ਬਨ੍ਧਿਤ੍ਵਾ ਨਿਸੀਦਿ. ਅਥ ਤਾ ਪਞ੍ਚਸਤਾ ਇਤ੍ਥਿਯੋ ਰਞ੍ਞੋ ਪਚ੍ਚੁਗ੍ਗਮਨਂ ਆਗਨ੍ਤ੍ਵਾ ਆਹਂਸੁ – ‘‘ਤ੍ਵਂ, ਮਹਾਰਾਜ, ਨ ਅਮ੍ਹਾਕਂ ਸਦ੍ਦਹਸਿ, ਅਮ੍ਹੇਹਿ ਵੁਤ੍ਤਂ ਅਕਾਰਣਂ ਵਿਯ ਹੋਤਿ. ਤ੍ਵਂ ਮਹੇਸਿਯਾ ਉਪਟ੍ਠਾਯਿਕਂ ਪਕ੍ਕੋਸਾਪੇਤ੍ਵਾ ਪਟਿਪੁਚ੍ਛ, ਦਾਰੁਘਟਿਕਂ ਤੇ ਦੇਵੀ ਵਿਜਾਤਾ’’ਤਿ. ਰਾਜਾ ਤਂ ਕਾਰਣਂ ਨ ਉਪਪਰਿਕ੍ਖਿਤ੍ਵਾਵ ‘‘ਅਮਨੁਸ੍ਸਜਾਤਿਕਾ ਭਵਿਸ੍ਸਤੀ’’ਤਿ ਤਂ ਗੇਹਤੋ ਨਿਕ੍ਕਡ੍ਢਿ. ਤਸ੍ਸਾ ਰਾਜਗੇਹਤੋ ਸਹ ਨਿਕ੍ਖਮਨੇਨੇਵ ਪਦੁਮਪੁਪ੍ਫਾਨਿ ਅਨ੍ਤਰਧਾਯਿਂਸੁ, ਸਰੀਰਚ੍ਛਵਿਪਿ ਵਿਵਣ੍ਣਾ ਅਹੋਸਿ. ਸਾ ਏਕਿਕਾਵ ਅਨ੍ਤਰਵੀਥਿਯਾ ਪਾਯਾਸਿ. ਅਥ ਨਂ ਏਕਾ ਵਯਪ੍ਪਤ੍ਤਾ ਮਹਲ੍ਲਿਕਾ ਇਤ੍ਥੀ ਦਿਸ੍ਵਾ ਧੀਤੁਸਿਨੇਹਂ ਉਪ੍ਪਾਦੇਤ੍ਵਾ ‘‘ਕਹਂ ਗਚ੍ਛਸਿ ਅਮ੍ਮਾ’’ਤਿ ਆਹ. ਆਗਨ੍ਤੁਕਮ੍ਹਿ, ਵਸਨਟ੍ਠਾਨਂ ਓਲੋਕੇਨ੍ਤੀ ਵਿਚਰਾਮੀਤਿ. ਇਧਾਗਚ੍ਛ, ਅਮ੍ਮਾਤਿ ਵਸਨਟ੍ਠਾਨਂ ਦਤ੍ਵਾ ਭੋਜਨਂ ਪਟਿਯਾਦੇਸਿ.

ਤਸ੍ਸਾ ਇਮਿਨਾਵ ਨਿਯਾਮੇਨ ਤਤ੍ਥ ਵਸਮਾਨਾਯ ਤਾ ਪਞ੍ਚਸਤਾ ਇਤ੍ਥਿਯੋ ਏਕਚਿਤ੍ਤਾ ਹੁਤ੍ਵਾ ਰਾਜਾਨਂ ਆਹਂਸੁ – ‘‘ਮਹਾਰਾਜ, ਤੁਮ੍ਹੇਸੁ ਯੁਦ੍ਧਂ ਗਤੇਸੁ ਅਮ੍ਹੇਹਿ ਗਙ੍ਗਾਦੇਵਤਾਯ ‘ਅਮ੍ਹਾਕਂ ਦੇਵੇ ਵਿਜਿਤਸਙ੍ਗਾਮੇ ਆਗਤੇ ਬਲਿਕਮ੍ਮਂ ਕਤ੍ਵਾ ਉਦਕਕੀਲ਼ਂ ਕਰਿਸ੍ਸਾਮਾ’ਤਿ ਪਤ੍ਥਿਤਂ ਅਤ੍ਥਿ, ਏਤਮਤ੍ਥਂ, ਦੇਵ, ਜਾਨਾਪੇਮਾ’’ਤਿ. ਰਾਜਾ ਤਾਸਂ ਵਚਨੇਨ ਤੁਟ੍ਠੋ ਗਙ੍ਗਾਯਂ ਉਦਕਕੀਲ਼ਂ ਕਾਤੁਂ ਅਗਮਾਸਿ. ਤਾਪਿ ਅਤ੍ਤਨਾ ਅਤ੍ਤਨਾ ਗਹਿਤਂ ਕਰਣ੍ਡਕਂ ਪਟਿਚ੍ਛਨ੍ਨਂ ਕਤ੍ਵਾ ਆਦਾਯ ਨਦਿਂ ਗਨ੍ਤ੍ਵਾ ਤੇਸਂ ਕਰਣ੍ਡਕਾਨਂ ਪਟਿਚ੍ਛਾਦਨਤ੍ਥਂ ਪਾਰੁਪਿਤ੍ਵਾ ਪਾਰੁਪਿਤ੍ਵਾ ਉਦਕੇ ਪਤਿਤ੍ਵਾ ਕਰਣ੍ਡਕੇ ਵਿਸ੍ਸਜ੍ਜੇਸੁਂ. ਤੇਪਿ ਖੋ ਕਰਣ੍ਡਕਾ ਸਬ੍ਬੇ ਸਹ ਗਨ੍ਤ੍ਵਾ ਹੇਟ੍ਠਾਸੋਤੇ ਪਸਾਰਿਤਜਾਲਮ੍ਹਿ ਲਗ੍ਗਿਂਸੁ. ਤਤੋ ਉਦਕਕੀਲ਼ਂ ਕੀਲ਼ਿਤ੍ਵਾ ਰਞ੍ਞੋ ਉਤ੍ਤਿਣ੍ਣਕਾਲੇ ਜਾਲਂ ਉਕ੍ਖਿਪਨ੍ਤਾ ਤੇ ਕਰਣ੍ਡਕੇ ਦਿਸ੍ਵਾ ਰਞ੍ਞੋ ਸਨ੍ਤਿਕਂ ਆਨਯਿਂਸੁ. ਰਾਜਾ ਕਰਣ੍ਡਕੇ ਦਿਸ੍ਵਾ ‘‘ਕਿਂ, ਤਾਤਾ, ਕਰਣ੍ਡਕੇਸੂ’’ਤਿ ਆਹ. ਨ ਜਾਨਾਮ, ਦੇਵਾਤਿ. ਸੋ ਤੇ ਕਰਣ੍ਡਕੇ ਵਿਵਰਾਪੇਤ੍ਵਾ ਓਲੋਕੇਨ੍ਤੋ ਪਠਮਂ ਮਹਾਪਦੁਮਕੁਮਾਰਸ੍ਸ ਕਰਣ੍ਡਕਂ ਵਿਵਰਾਪੇਸਿ. ਤੇਸਂ ਪਨ ਸਬ੍ਬੇਸਮ੍ਪਿ ਕਰਣ੍ਡਕੇਸੁ ਨਿਪਜ੍ਜਾਪਿਤਦਿਵਸੇਯੇਵ ਪੁਞ੍ਞਿਦ੍ਧਿਯਾ ਅਙ੍ਗੁਟ੍ਠਤੋ ਖੀਰਂ ਨਿਬ੍ਬਤ੍ਤਿ. ਸਕ੍ਕੋ ਦੇਵਰਾਜਾ ਤਸ੍ਸ ਰਞ੍ਞੋ ਨਿਕ੍ਕਙ੍ਖਭਾਵਤ੍ਥਂ ਅਨ੍ਤੋਕਰਣ੍ਡਕੇ ਅਕ੍ਖਰਾਨਿ ਲਿਖਾਪੇਸਿ ‘‘ਇਮੇ ਕੁਮਾਰਾ ਪਦੁਮਵਤਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਾ ਬਾਰਾਣਸਿਰਞ੍ਞੋ ਪੁਤ੍ਤਾ, ਅਥ ਨੇ ਪਦੁਮਵਤਿਯਾ ਸਪਤ੍ਤਿਯੋ ਪਞ੍ਚਸਤਾ ਇਤ੍ਥਿਯੋ ਕਰਣ੍ਡਕੇਸੁ ਪਕ੍ਖਿਪਿਤ੍ਵਾ ਉਦਕੇ ਖਿਪਿਂਸੁ, ਰਾਜਾ ਇਮਂ ਕਾਰਣਂ ਜਾਨਾਤੂ’’ਤਿ. ਕਰਣ੍ਡਕੇ ਵਿਵਰਿਤਮਤ੍ਤੇ ਰਾਜਾ ਅਕ੍ਖਰਾਨਿ ਵਾਚੇਤ੍ਵਾ ਦਾਰਕੇ ਦਿਸ੍ਵਾ ਮਹਾਪਦੁਮਕੁਮਾਰਂ ਉਕ੍ਖਿਪਿਤ੍ਵਾ ‘‘ਵੇਗੇਨ ਰਥੇ ਯੋਜੇਥ, ਅਸ੍ਸੇ ਕਪ੍ਪੇਥ, ਅਹਂ ਅਜ੍ਜ ਅਨ੍ਤੋਨਗਰਂ ਪਵਿਸਿਤ੍ਵਾ ਏਕਚ੍ਚਾਨਂ ਮਾਤੁਗਾਮਾਨਂ ਪਿਯਂ ਕਰਿਸ੍ਸਾਮੀ’’ਤਿ ਪਾਸਾਦਂ ਆਰੁਯ੍ਹ ਹਤ੍ਥਿਗੀਵਾਯ ਸਹਸ੍ਸਭਣ੍ਡਿਕਂ ਠਪੇਤ੍ਵਾ ਭੇਰਿਂ ਚਰਾਪੇਸਿ ‘‘ਯੋ ਪਦੁਮਵਤਿਂ ਪਸ੍ਸਤਿ, ਸੋ ਇਮਂ ਸਹਸ੍ਸਂ ਗਣ੍ਹਤੂ’’ਤਿ.

ਤਂ ਕਥਂ ਸੁਤ੍ਵਾ ਪਦੁਮਵਤੀ ਮਾਤੁਯਾ ਸਞ੍ਞਂ ਅਦਾਸਿ – ‘‘ਹਤ੍ਥਿਗੀਵਤੋ ਸਹਸ੍ਸਂ ਗਣ੍ਹ, ਅਮ੍ਮਾ’’ਤਿ. ਅਹਂ ਏਵਰੂਪਂ ਗਣ੍ਹਿਤੁਂ ਨ ਵਿਸਹਾਮੀਤਿ. ਸਾ ਦੁਤਿਯਮ੍ਪਿ ਤਤਿਯਮ੍ਪਿ ਵੁਤ੍ਤੇ, ‘‘ਕਿਂ ਵਤ੍ਵਾ ਗਣ੍ਹਾਮਿ ਅਮ੍ਮਾ’’ਤਿ ਆਹ. ‘‘ਮਮ ਧੀਤਾ, ਪਦੁਮਵਤਿਂ ਦੇਵਿਂ ਪਸ੍ਸਤੀ’’ਤਿ ਵਤ੍ਵਾ ਗਣ੍ਹਾਹੀਤਿ. ਸਾ ‘‘ਯਂ ਵਾ ਤਂ ਵਾ ਹੋਤੂ’’ਤਿ ਗਨ੍ਤ੍ਵਾ ਸਹਸ੍ਸਚਙ੍ਕੋਟਕਂ ਗਣ੍ਹਿ. ਅਥ ਨਂ ਮਨੁਸ੍ਸਾ ਪੁਚ੍ਛਿਂਸੁ – ‘‘ਪਦੁਮਵਤਿਂ ਦੇਵਿਂ ਪਸ੍ਸਸਿ, ਅਮ੍ਮਾ’’ਤਿ. ‘‘ਅਹਂ ਨ ਪਸ੍ਸਾਮਿ, ਧੀਤਾ ਕਿਰ ਮੇ ਪਸ੍ਸਤੀ’’ਤਿ ਆਹ. ਤੇ ‘‘ਕਹਂ ਪਨ ਸਾ, ਅਮ੍ਮਾ’’ਤਿ ਵਤ੍ਵਾ ਤਾਯ ਸਦ੍ਧਿਂ ਗਨ੍ਤ੍ਵਾ ਪਦੁਮਵਤਿਂ ਸਞ੍ਜਾਨਿਤ੍ਵਾ ਪਾਦੇਸੁ ਨਿਪਤਿਂਸੁ. ਤਸ੍ਮਿਂ ਕਾਲੇ ਸਾ ‘‘ਪਦੁਮਵਤੀ ਦੇਵੀ ਅਯ’’ਨ੍ਤਿ ਞਤ੍ਵਾ ‘‘ਭਾਰਿਯਂ ਵਤ ਇਤ੍ਥਿਯਾ ਕਮ੍ਮਂ ਕਤਂ, ਯਾ ਏਵਂਵਿਧਸ੍ਸ ਰਞ੍ਞੋ ਮਹੇਸੀ ਸਮਾਨਾ ਏਵਰੂਪੇ ਠਾਨੇ ਨਿਰਾਰਕ੍ਖਾ ਵਸੀ’’ਤਿ ਆਹ. ਤੇਪਿ ਰਾਜਪੁਰਿਸਾ ਪਦੁਮਵਤਿਯਾ ਨਿਵੇਸਨਂ ਸੇਤਸਾਣੀਹਿ ਪਰਿਕ੍ਖਿਪਾਪੇਤ੍ਵਾ ਦ੍ਵਾਰੇ ਆਰਕ੍ਖਂ ਠਪੇਤ੍ਵਾ ਰਞ੍ਞੋ ਆਰੋਚੇਸੁਂ. ਰਾਜਾ ਸੁਵਣ੍ਣਸਿਵਿਕਂ ਪੇਸੇਸਿ. ਸਾ ‘‘ਅਹਂ ਏਵਂ ਨ ਗਮਿਸ੍ਸਾਮਿ, ਮਮ ਵਸਨਟ੍ਠਾਨਤੋ ਪਟ੍ਠਾਯ ਯਾਵ ਰਾਜਗੇਹਂ ਏਤ੍ਥਨ੍ਤਰੇ ਵਰਪੋਤ੍ਥਕਚਿਤ੍ਤਤ੍ਥਰਣੇ ਅਤ੍ਥਰਾਪੇਤ੍ਵਾ ਉਪਰਿ ਸੁਵਣ੍ਣਤਾਰਕਵਿਚਿਤ੍ਤਂ ਚੇਲਵਿਤਾਨਂ ਬਨ੍ਧਾਪੇਤ੍ਵਾ ਪਸਾਧਨਤ੍ਥਾਯ ਸਬ੍ਬਾਲਙ੍ਕਾਰੇਸੁ ਪਹਿਤੇਸੁ ਪਦਸਾਵ ਗਮਿਸ੍ਸਾਮਿ, ਏਵਂ ਮੇ ਨਾਗਰਾ ਸਮ੍ਪਤ੍ਤਿਂ ਪਸ੍ਸਿਸ੍ਸਨ੍ਤੀ’’ਤਿ ਆਹ. ਰਾਜਾ ‘‘ਪਦੁਮਵਤਿਯਾ ਯਥਾਰੁਚਿਂ ਕਰੋਥਾ’’ਤਿ ਆਹ. ਤਤੋ ਪਦੁਮਵਤੀ ਸਬ੍ਬਪਸਾਧਨਂ ਪਸਾਧੇਤ੍ਵਾ ‘‘ਰਾਜਗੇਹਂ ਗਮਿਸ੍ਸਾਮੀ’’ਤਿ ਮਗ੍ਗਂ ਪਟਿਪਜ੍ਜਿ. ਅਥਸ੍ਸਾ ਅਕ੍ਕਨ੍ਤਅਕ੍ਕਨ੍ਤਟ੍ਠਾਨੇ ਵਰਪੋਤ੍ਥਕਚਿਤ੍ਤਤ੍ਥਰਣਾਨਿ ਭਿਨ੍ਦਿਤ੍ਵਾ ਪਦੁਮਪੁਪ੍ਫਾਨਿ ਉਟ੍ਠਹਿਂਸੁ. ਸਾ ਮਹਾਜਨਸ੍ਸ ਅਤ੍ਤਨੋ ਸਮ੍ਪਤ੍ਤਿਂ ਦਸ੍ਸੇਤ੍ਵਾ ਰਾਜਨਿਵੇਸਨਂ ਆਰੁਯ੍ਹ ਸਬ੍ਬੇ ਚਿਤ੍ਤਤ੍ਥਰਣੇ ਤਸ੍ਸਾ ਮਹਲ੍ਲਿਕਾਯ ਪੋਸਾਵਨਿਕਮੂਲਂ ਕਤ੍ਵਾ ਦਾਪੇਸਿ.

ਰਾਜਾਪਿ ਖੋ ਤਾ ਪਞ੍ਚਸਤਾ ਇਤ੍ਥਿਯੋ ਪਕ੍ਕੋਸਾਪੇਤ੍ਵਾ ‘‘ਇਮਾਯੋ ਤੇ ਦੇਵਿ ਦਾਸਿਯੋ ਕਤ੍ਵਾ ਦੇਮੀ’’ਤਿ ਆਹ. ਸਾਧੁ, ਮਹਾਰਾਜ, ਏਤਾਸਂ ਮਯ੍ਹਂ ਦਿਨ੍ਨਭਾਵਂ ਸਕਲਨਗਰੇ ਜਾਨਾਪੇਹੀਤਿ. ਰਾਜਾ ਨਗਰੇ ਭੇਰਿਂ ਚਰਾਪੇਸਿ – ‘‘ਪਦੁਮਵਤਿਯਾ ਦੂਬ੍ਭਿਕਾ ਪਞ੍ਚਸਤਾ ਇਤ੍ਥਿਯੋ ਏਤਿਸ੍ਸਾ ਏਵ ਦਾਸਿਯੋ ਕਤ੍ਵਾ ਦਿਨ੍ਨਾ’’ਤਿ. ਸਾ ‘‘ਤਾਸਂ ਸਕਲਨਗਰੇਨ ਦਾਸਿਭਾਵੋ ਸਲ੍ਲਕ੍ਖਿਤੋ’’ਤਿ ਞਤ੍ਵਾ ‘‘ਅਹਂ ਮਮ ਦਾਸਿਯੋ ਭੁਜਿਸ੍ਸਾ ਕਾਤੁਂ ਲਭਾਮਿ ਦੇਵਾ’’ਤਿ ਰਾਜਾਨਂ ਪੁਚ੍ਛਿ. ਤਵ ਇਚ੍ਛਾ ਦੇਵੀਤਿ. ਏਵਂ ਸਨ੍ਤੇ ਤਮੇਵ ਭੇਰਿਚਾਰਿਕਂ ਪਕ੍ਕੋਸਾਪੇਤ੍ਵਾ ‘‘ਪਦੁਮਵਤਿਦੇਵਿਯਾ ਅਤ੍ਤਨੋ ਦਾਸਿਯੋ ਕਤ੍ਵਾ ਦਿਨ੍ਨਾ ਪਞ੍ਚਸਤਾ ਇਤ੍ਥਿਯੋ ਸਬ੍ਬਾਵ ਭੁਜਿਸ੍ਸਾ ਕਤਾਤਿ ਪੁਨ ਭੇਰਿਂ ਚਰਾਪੇਥਾ’’ਤਿ ਆਹ. ਸਾ ਤਾਸਂ ਭੁਜਿਸ੍ਸਭਾਵੇ ਕਤੇ ਏਕੂਨਾਨਿ ਪਞ੍ਚਸਤ੍ਤਪੁਤ੍ਤਾਨਿ ਤਾਸਂਯੇਵ ਹਤ੍ਥੇ ਪੋਸਨਤ੍ਥਾਯ ਦਤ੍ਵਾ ਸਯਂ ਮਹਾਪਦੁਮਕੁਮਾਰਂਯੇਵ ਗਣ੍ਹਿ.

ਅਥ ਅਪਰਭਾਗੇ ਤੇਸਂ ਕੁਮਾਰਾਨਂ ਕੀਲ਼ਨਵਯੇ ਸਮ੍ਪਤ੍ਤੇ ਰਾਜਾ ਉਯ੍ਯਾਨੇ ਨਾਨਾਵਿਧਂ ਕੀਲ਼ਨਟ੍ਠਾਨਂ ਕਾਰੇਸਿ. ਤੇ ਅਤ੍ਤਨੋ ਸੋਲ਼ਸਵਸ੍ਸੁਦ੍ਦੇਸਿਕਕਾਲੇ ਸਬ੍ਬੇਵ ਏਕਤੋ ਹੁਤ੍ਵਾ ਉਯ੍ਯਾਨੇ ਪਦੁਮਸਞ੍ਛਨ੍ਨਾਯ ਮਙ੍ਗਲਪੋਕ੍ਖਰਣਿਯਾ ਕੀਲ਼ਨ੍ਤਾ ਨਵਪਦੁਮਾਨਿ ਪੁਪ੍ਫਿਤਾਨਿ ਪੁਰਾਣਪਦੁਮਾਨਿ ਚ ਵਣ੍ਟਤੋ ਪਤਨ੍ਤਾਨਿ ਦਿਸ੍ਵਾ ‘‘ਇਮਸ੍ਸ ਤਾਵ ਅਨੁਪਾਦਿਨ੍ਨਕਸ੍ਸ ਏਵਰੂਪਾ ਜਰਾ ਪਾਪੁਣਾਤਿ, ਕਿਮਙ੍ਗਂ ਪਨ ਅਮ੍ਹਾਕਂ ਸਰੀਰਸ੍ਸ. ਇਦਮ੍ਪਿ ਹਿ ਏਵਂਗਤਿਕਮੇਵ ਭਵਿਸ੍ਸਤੀ’’ਤਿ ਆਰਮ੍ਮਣਂ ਗਹੇਤ੍ਵਾ ਸਬ੍ਬੇਵ ਪਚ੍ਚੇਕਬੋਧਿਞਾਣਂ ਨਿਬ੍ਬਤ੍ਤੇਤ੍ਵਾ ਉਟ੍ਠਾਯੁਟ੍ਠਾਯ ਪਦੁਮਕਣ੍ਣਿਕਾਸੁ ਪਲ੍ਲਙ੍ਕੇਨ ਨਿਸੀਦਿਂਸੁ.

ਅਥ ਤੇਹਿ ਸਦ੍ਧਿਂ ਆਗਤਾ ਰਾਜਪੁਰਿਸਾ ਬਹੁਗਤਂ ਦਿਵਸਂ ਞਤ੍ਵਾ ‘‘ਅਯ੍ਯਪੁਤ੍ਤਾ ਤੁਮ੍ਹਾਕਂ ਵੇਲਂ ਜਾਨਾਥਾ’’ਤਿ ਆਹਂਸੁ. ਤੇ ਤੁਣ੍ਹੀ ਅਹੇਸੁਂ. ਤੇ ਪੁਰਿਸਾ ਗਨ੍ਤ੍ਵਾ ਰਞ੍ਞੋ ਆਰੋਚੇਸੁਂ – ‘‘ਕੁਮਾਰਾ ਦੇਵ, ਪਦੁਮਕਣ੍ਣਿਕਾਸੁ ਨਿਸਿਨ੍ਨਾ, ਅਮ੍ਹੇਸੁ ਕਥੇਨ੍ਤੇਸੁਪਿ ਵਚੀਭੇਦਂ ਨ ਕਰੋਨ੍ਤੀ’’ਤਿ. ਯਥਾਰੁਚਿਯਾ ਤੇਸਂ ਨਿਸੀਦਿਤੁਂ ਦੇਥਾਤਿ. ਤੇ ਸਬ੍ਬਰਤ੍ਤਿਂ ਗਹਿਤਾਰਕ੍ਖਾ ਪਦੁਮਕਣ੍ਣਿਕਾਸੁ ਨਿਸਿਨ੍ਨਨਿਯਾਮੇਨੇਵ ਅਰੁਣਂ ਉਟ੍ਠਾਪੇਸੁਂ. ਪੁਰਿਸਾ ਪੁਨਦਿਵਸੇ ਉਪਸਙ੍ਕਮਿਤ੍ਵਾ ‘‘ਦੇਵਾ ਵੇਲਂ ਜਾਨਾਥਾ’’ਤਿ ਆਹਂਸੁ. ਨ ਮਯਂ ਦੇਵਾ, ਪਚ੍ਚੇਕਬੁਦ੍ਧਾ ਨਾਮ ਮਯਨ੍ਤਿ. ਅਯ੍ਯਾ, ਤੁਮ੍ਹੇ ਭਾਰਿਯਂ ਕਥਂ ਕਥੇਥ, ਪਚ੍ਚੇਕਬੁਦ੍ਧਾ ਨਾਮ ਤੁਮ੍ਹਾਦਿਸਾ ਨ ਹੋਨ੍ਤਿ, ਦ੍ਵਙ੍ਗੁਲਕੇਸਮਸ੍ਸੁਧਰਾ ਕਾਯੇ ਪਟਿਮੁਕ੍ਕਅਟ੍ਠਪਰਿਕ੍ਖਾਰਾ ਹੋਨ੍ਤੀਤਿ. ਤੇ ਦਕ੍ਖਿਣਹਤ੍ਥੇਨ ਸੀਸਂ ਪਰਾਮਸਿਂਸੁ. ਤਾਵਦੇਵ ਗਿਹਿਲਿਙ੍ਗਂ ਅਨ੍ਤਰਧਾਯਿ, ਅਟ੍ਠ ਪਰਿਕ੍ਖਾਰਾ ਕਾਯੇ ਪਟਿਮੁਕ੍ਕਾਵ ਅਹੇਸੁਂ. ਤਤੋ ਪਸ੍ਸਨ੍ਤਸ੍ਸੇਵ ਮਹਾਜਨਸ੍ਸ ਆਕਾਸੇਨ ਨਨ੍ਦਮੂਲਕਪਬ੍ਭਾਰਂ ਅਗਮਂਸੁ.

ਸਾਪਿ ਖੋ, ਪਦੁਮਵਤੀ ਦੇਵੀ, ‘‘ਅਹਂ ਬਹੁਪੁਤ੍ਤਾ ਹੁਤ੍ਵਾ ਨਿਪੁਤ੍ਤਾ ਜਾਤਾ’’ਤਿ ਹਦਯਸੋਕਂ ਪਤ੍ਵਾ ਤੇਨੇਵ ਸੋਕੇਨ ਕਾਲਂ ਕਤ੍ਵਾ ਰਾਜਗਹਨਗਰਦ੍ਵਾਰਗਾਮਕੇ ਸਹਤ੍ਥੇਨ ਕਮ੍ਮਂ ਕਤ੍ਵਾ ਜੀਵਨਕਟ੍ਠਾਨੇ ਨਿਬ੍ਬਤ੍ਤਿ. ਅਪਰਭਾਗੇ ਕੁਲਘਰਂ ਗਨ੍ਤ੍ਵਾ ਏਕਦਿਵਸਂ ਸਾਮਿਕਸ੍ਸ ਖੇਤ੍ਤਂ ਯਾਗੁਂ ਹਰਮਾਨਾ ਤੇਸਂ ਅਤ੍ਤਨੋ ਪੁਤ੍ਤਾਨਂ ਅਨ੍ਤਰੇ ਅਟ੍ਠ ਪਚ੍ਚੇਕਬੁਦ੍ਧੇ ਭਿਕ੍ਖਾਚਾਰਵੇਲਾਯ ਆਕਾਸੇਨ ਗਚ੍ਛਨ੍ਤੇ ਦਿਸ੍ਵਾ ਸੀਘਂ ਸੀਘਂ ਗਨ੍ਤ੍ਵਾ ਸਾਮਿਕਸ੍ਸ ਆਰੋਚੇਸਿ – ‘‘ਪਸ੍ਸ, ਅਯ੍ਯ, ਪਚ੍ਚੇਕਬੁਦ੍ਧੇ, ਏਤੇ ਨਿਮਨ੍ਤੇਤ੍ਵਾ ਭੋਜੇਸ੍ਸਾਮਾ’’ਤਿ. ਸੋ ਆਹ – ‘‘ਸਮਣਸਕੁਣਾ ਨਾਮੇਤੇ ਅਞ੍ਞਤ੍ਥਾਪਿ ਏਵਂ ਚਰਨ੍ਤਿ, ਨ ਏਤੇ ਪਚ੍ਚੇਕਬੁਦ੍ਧਾ’’ਤਿ. ਤੇ ਤੇਸਂ ਕਥੇਨ੍ਤਾਨਂਯੇਵ ਅਵਿਦੂਰੇ ਠਾਨੇ ਓਤਰਿਂਸੁ. ਸਾ ਇਤ੍ਥੀ ਤਂਦਿਵਸਂ ਅਤ੍ਤਨੋ ਭਤ੍ਤਖਜ੍ਜਭੋਜਨਂ ਤੇਸਂ ਦਤ੍ਵਾ ‘‘ਸ੍ਵੇਪਿ ਅਟ੍ਠ ਜਨਾ ਮਯ੍ਹਂ ਭਿਕ੍ਖਂ ਗਣ੍ਹਥਾ’’ਤਿ ਆਹ. ਸਾਧੁ, ਉਪਾਸਿਕੇ, ਤਵ ਸਕ੍ਕਾਰੋ ਏਤ੍ਤਕੋਵ ਹੋਤੁ, ਆਸਨਾਨਿ ਚ ਅਟ੍ਠੇਵ ਹੋਨ੍ਤੁ, ਅਞ੍ਞੇਪਿ ਬਹੂ ਪਚ੍ਚੇਕਬੁਦ੍ਧੇ ਦਿਸ੍ਵਾ ਤਵ ਚਿਤ੍ਤਂ ਪਸਾਦੇਯ੍ਯਾਸੀਤਿ. ਸਾ ਪੁਨਦਿਵਸੇ ਅਟ੍ਠ ਆਸਨਾਨਿ ਪਞ੍ਞਾਪੇਤ੍ਵਾ ਅਟ੍ਠਨ੍ਨਂ ਸਕ੍ਕਾਰਸਮ੍ਮਾਨਂ ਪਟਿਯਾਦੇਤ੍ਵਾ ਨਿਸੀਦਿ.

ਨਿਮਨ੍ਤਿਤਪਚ੍ਚੇਕਬੁਦ੍ਧਾ ਸੇਸਾਨਂ ਸਞ੍ਞਂ ਅਦਂਸੁ – ‘‘ਮਾਰਿਸਾ, ਅਜ੍ਜ ਅਞ੍ਞਤ੍ਥ ਅਗਨ੍ਤ੍ਵਾ ਸਬ੍ਬੇਵ ਤੁਮ੍ਹਾਕਂ ਮਾਤੁ ਸਙ੍ਗਹਂ ਕਰੋਥਾ’’ਤਿ. ਤੇ ਤੇਸਂ ਵਚਨਂ ਸੁਤ੍ਵਾ ਸਬ੍ਬੇਵ ਏਕਤੋ ਆਕਾਸੇਨ ਆਗਨ੍ਤ੍ਵਾ ਮਾਤੁ-ਗੇਹਦ੍ਵਾਰੇ ਪਾਤੁਰਹੇਸੁਂ. ਸਾਪਿ ਪਠਮਂ ਲਦ੍ਧਸਞ੍ਞਤਾਯ ਬਹੂਪਿ ਦਿਸ੍ਵਾ ਨ ਕਮ੍ਪਿਤ੍ਥ, ਸਬ੍ਬੇਪਿ ਤੇ ਗੇਹਂ ਪਵੇਸੇਤ੍ਵਾ ਆਸਨੇਸੁ ਨਿਸੀਦਾਪੇਸਿ. ਤੇਸੁ ਪਟਿਪਾਟਿਯਾ ਨਿਸੀਦਨ੍ਤੇਸੁ ਨਵਮੋ ਅਞ੍ਞਾਨਿ ਅਟ੍ਠ ਆਸਨਾਨਿ ਮਾਪੇਤ੍ਵਾ ਸਯਂ ਧੁਰਾਸਨੇ ਨਿਸੀਦਿ. ਯਾਵ ਆਸਨਾਨਿ ਵਡ੍ਢਨ੍ਤਿ, ਤਾਵ ਗੇਹਂ ਵਡ੍ਢਤਿ. ਏਵਂ ਤੇਸੁ ਸਬ੍ਬੇਸੁਪਿ ਨਿਸਿਨ੍ਨੇਸੁ ਸਾ ਇਤ੍ਥੀ ਅਟ੍ਠਨ੍ਨਂ ਪਚ੍ਚੇਕਬੁਦ੍ਧਾਨਂ ਪਟਿਯਾਦਿਤਂ ਸਕ੍ਕਾਰਂ ਪਞ੍ਚਸਤਾਨਮ੍ਪਿ ਯਾਵਦਤ੍ਥਂ ਦਤ੍ਵਾ ਅਟ੍ਠ ਨੀਲੁਪ੍ਪਲਹਤ੍ਥਕੇ ਆਹਰਿਤ੍ਵਾ ਨਿਮਨ੍ਤਿਤਪਚ੍ਚੇਕਬੁਦ੍ਧਾਨਂਯੇਵ ਪਾਦਮੂਲੇ ਠਪੇਤ੍ਵਾ ਆਹ – ‘‘ਮਯ੍ਹਂ, ਭਨ੍ਤੇ, ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਸਰੀਰਵਣ੍ਣੋ ਇਮੇਸਂ ਨੀਲੁਪ੍ਪਲਾਨਂ ਅਨ੍ਤੋਗਬ੍ਭਵਣ੍ਣੋ ਵਿਯ ਹੋਤੂ’’ਤਿ ਪਤ੍ਥਨਂ ਅਕਾਸਿ. ਪਚ੍ਚੇਕਬੁਦ੍ਧਾ ਮਾਤੁ ਅਨੁਮੋਦਨਂ ਕਤ੍ਵਾ ਗਨ੍ਧਮਾਦਨਂਯੇਵ ਅਗਮਂਸੁ.

ਸਾਪਿ ਯਾਵਜੀਵਂ ਕੁਸਲਂ ਕਤ੍ਵਾ ਤਤੋ ਚੁਤਾ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਸੇਟ੍ਠਿਕੁਲੇ ਪਟਿਸਨ੍ਧਿਂ ਗਣ੍ਹਿ, ਨੀਲੁਪ੍ਪਲਗਬ੍ਭਸਮਾਨਵਣ੍ਣਤਾਯ ਚਸ੍ਸਾ ਉਪ੍ਪਲਵਣ੍ਣਾਤ੍ਵੇਵ ਨਾਮਂ ਅਕਂਸੁ. ਅਥਸ੍ਸਾ ਵਯਪ੍ਪਤ੍ਤਕਾਲੇ ਸਕਲਜਮ੍ਬੁਦੀਪਰਾਜਾਨੋ ਚ ਸੇਟ੍ਠਿਨੋ ਚ ਸੇਟ੍ਠਿਸ੍ਸ ਸਨ੍ਤਿਕਂ ਪਹਿਣਿਂਸੁ – ‘‘ਧੀਤਰਂ ਅਮ੍ਹਾਕਂ ਦੇਤੂ’’ਤਿ. ਅਪਹਿਣਨ੍ਤੋ ਨਾਮ ਨਾਹੋਸਿ. ਤਤੋ ਸੇਟ੍ਠਿ ਚਿਨ੍ਤੇਸਿ – ‘‘ਅਹਂ ਸਬ੍ਬੇਸਂ ਮਨਂ ਗਹੇਤੁਂ ਨ ਸਕ੍ਖਿਸ੍ਸਾਮਿ, ਉਪਾਯਂ ਪਨੇਕਂ ਕਰਿਸ੍ਸਾਮੀ’’ਤਿ ਧੀਤਰਂ ਪਕ੍ਕੋਸਾਪੇਤ੍ਵਾ ‘‘ਪਬ੍ਬਜਿਤੁਂ ਅਮ੍ਮ ਸਕ੍ਖਿਸ੍ਸਸੀ’’ਤਿ ਆਹ. ਤਸ੍ਸਾ ਪਚ੍ਛਿਮਭਵਿਕਤ੍ਤਾ ਪਿਤੁਵਚਨਂ ਸੀਸੇ ਆਸਿਤ੍ਤਸਤਪਾਕਤੇਲਂ ਵਿਯ ਅਹੋਸਿ, ਤਸ੍ਮਾ ਪਿਤਰਂ ‘‘ਪਬ੍ਬਜਿਸ੍ਸਾਮਿ, ਤਾਤਾ’’ਤਿ ਆਹ. ਸੋ ਤਸ੍ਸਾ ਸਕ੍ਕਾਰਂ ਕਤ੍ਵਾ ਭਿਕ੍ਖੁਨਿਉਪਸ੍ਸਯਂ ਨੇਤ੍ਵਾ ਪਬ੍ਬਾਜੇਸਿ. ਤਸ੍ਸਾ ਅਚਿਰਪਬ੍ਬਜਿਤਾਯ ਏਵ ਉਪੋਸਥਾਗਾਰੇ ਕਾਲਵਾਰੋ ਪਾਪੁਣਿ. ਸਾ ਦੀਪਂ ਜਾਲੇਤ੍ਵਾ ਉਪੋਸਥਾਗਾਰਂ ਸਮ੍ਮਜ੍ਜਿਤ੍ਵਾ ਦੀਪਸਿਖਾਯ ਨਿਮਿਤ੍ਤਂ ਗਣ੍ਹਿਤ੍ਵਾ ਪੁਨਪ੍ਪੁਨਂ ਓਲੋਕਯਮਾਨਾ ਤੇਜੋਕਸਿਣਾਰਮ੍ਮਣਂ ਝਾਨਂ ਨਿਬ੍ਬਤ੍ਤੇਤ੍ਵਾ ਤਦੇਵ ਪਾਦਕਂ ਕਤ੍ਵਾ ਅਰਹਤ੍ਤਂ ਪਾਪੁਣਿ. ਅਰਹਤ੍ਤਫਲੇਨ ਸਦ੍ਧਿਂਯੇਵ ਚ ਇਦ੍ਧਿਵਿਕੁਬ੍ਬਨੇ ਚਿਣ੍ਣਵਸੀ ਅਹੋਸਿ. ਸਾ ਅਪਰਭਾਗੇ ਸਤ੍ਥੁ ਯਮਕਪਾਟਿਹਾਰਿਯਕਰਣਦਿਵਸੇ ‘‘ਅਹਂ, ਭਨ੍ਤੇ, ਪਾਟਿਹਾਰਿਯਂ ਕਰਿਸ੍ਸਾਮੀ’’ਤਿ ਸੀਹਨਾਦਂ ਨਦਿ. ਸਤ੍ਥਾ ਇਦਂ ਕਾਰਣਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਜੇਤਵਨਵਿਹਾਰੇ ਨਿਸਿਨ੍ਨੋ ਪਟਿਪਾਟਿਯਾ ਭਿਕ੍ਖੁਨਿਯੋ ਠਾਨਨ੍ਤਰੇ ਠਪੇਨ੍ਤੋ ਇਮਂ ਥੇਰਿਂ ਇਦ੍ਧਿਮਨ੍ਤੀਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਪਟਾਚਾਰਾਥੇਰੀਵਤ੍ਥੁ

੨੩੮. ਚਤੁਤ੍ਥੇ ਵਿਨਯਧਰਾਨਂ ਯਦਿਦਂ ਪਟਾਚਾਰਾਤਿ ਪਟਾਚਾਰਾ ਥੇਰੀ ਵਿਨਯਧਰਾਨਂ ਅਗ੍ਗਾਤਿ ਦਸ੍ਸੇਤਿ. ਸਾ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਪਟਿਸਨ੍ਧਿਂ ਗਣ੍ਹਿਤ੍ਵਾ ਅਪਰਭਾਗੇ ਸਤ੍ਥੁ ਧਮ੍ਮਦੇਸਨਂ ਸੁਣਨ੍ਤੀ ਸਤ੍ਥਾਰਂ ਏਕਂ ਭਿਕ੍ਖੁਨਿਂ ਵਿਨਯਧਰਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਾ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਕਸ੍ਸਪਬੁਦ੍ਧਕਾਲੇ ਕਿਕਿਸ੍ਸ ਕਾਸਿਰਞ੍ਞੋ ਗੇਹੇ ਪਟਿਸਨ੍ਧਿਂ ਗਣ੍ਹਿਤ੍ਵਾ ਸਤ੍ਤਨ੍ਨਂ ਭਗਿਨੀਨਂ ਅਬ੍ਭਨ੍ਤਰਾ ਹੁਤ੍ਵਾ ਵੀਸਤਿ ਵਸ੍ਸਸਹਸ੍ਸਾਨਿ ਬ੍ਰਹ੍ਮਚਰਿਯਂ ਚਰਿਤ੍ਵਾ ਭਿਕ੍ਖੁਸਙ੍ਘਸ੍ਸ ਪਰਿਵੇਣਂ ਕਤ੍ਵਾ ਪੁਨ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਏਕਂ ਬੁਦ੍ਧਨ੍ਤਰਂ ਸਮ੍ਪਤ੍ਤਿਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਸੇਟ੍ਠਿਗੇਹੇ ਪਟਿਸਨ੍ਧਿਂ ਗਣ੍ਹਿ.

ਸਾ ਅਪਰਭਾਗੇ ਵਯਪ੍ਪਤ੍ਤਾ ਅਤ੍ਤਨੋ ਗੇਹੇ ਏਕੇਨ ਕਮ੍ਮਕਾਰੇਨ ਸਦ੍ਧਿਂ ਸਨ੍ਥਵਂ ਕਤ੍ਵਾ ਅਪਰਭਾਗੇ ਅਤ੍ਤਨੋ ਸਮਾਨਜਾਤਿਕਂ ਕੁਲਂ ਗਚ੍ਛਨ੍ਤੀ ਕਤਸਨ੍ਥਵਸ੍ਸ ਪੁਰਿਸਸ੍ਸ ਸਞ੍ਞਂ ਅਦਾਸਿ – ‘‘ਨ ਤ੍ਵਂ ਸ੍ਵੇ ਪਟ੍ਠਾਯ ਮਂ ਪਟਿਹਾਰਸਤੇਨਪਿ ਦਟ੍ਠੁਂ ਲਭਿਸ੍ਸਸਿ, ਸਚੇ ਤੇ ਕਮ੍ਮਂ ਅਤ੍ਥਿ, ਇਦਾਨਿ ਮਂ ਗਣ੍ਹਿਤ੍ਵਾ ਗਚ੍ਛਾਹੀ’’ਤਿ. ਸੋ ‘‘ਏਵਂ ਹੋਤੂ’’ਤਿ ਅਨੁਚ੍ਛਵਿਕਂ ਹਤ੍ਥਸਾਰਂ ਗਹੇਤ੍ਵਾ ਤਂ ਆਦਾਯ ਨਗਰਤੋ ਤੀਣਿ ਚਤ੍ਤਾਰਿ ਯੋਜਨਾਨਿ ਪਟਿਕ੍ਕਮਿਤ੍ਵਾ ਏਕਸ੍ਮਿਂ ਗਾਮਕੇ ਵਾਸਂ ਕਪ੍ਪੇਸਿ.

ਅਥ ਅਪਰਭਾਗੇ ਤਸ੍ਸਾ ਕੁਚ੍ਛਿਯਂ ਗਬ੍ਭੋ ਪਤਿਟ੍ਠਾਸਿ. ਸਾ ਗਬ੍ਭੇ ਪਰਿਪਕ੍ਕੇ ‘‘ਇਦਂ ਅਮ੍ਹਾਕਂ ਅਨਾਥਟ੍ਠਾਨਂ, ਕੁਲਗੇਹਂ ਗਚ੍ਛਾਮ ਸਾਮੀ’’ਤਿ ਆਹ. ਸੋ ‘‘ਅਜ੍ਜ ਗਚ੍ਛਾਮ, ਸ੍ਵੇ ਗਚ੍ਛਾਮਾ’’ਤਿ ਗਨ੍ਤੁਂ ਅਸਕ੍ਕੋਨ੍ਤੋ ਕਾਲਂ ਵੀਤਿਨਾਮੇਸਿ. ਸਾ ਤਸ੍ਸ ਕਾਰਣਂ ਞਤ੍ਵਾ ‘‘ਨਾਯਂ ਬਾਲੋ ਮਂ ਨੇਸ੍ਸਤੀ’’ਤਿ ਤਸ੍ਮਿਂ ਬਹਿ ਗਤੇ ‘‘ਏਕਿਕਾਵ ਕੁਲਗੇਹਂ ਗਮਿਸ੍ਸਾਮੀ’’ਤਿ ਮਗ੍ਗਂ ਪਟਿਪਜ੍ਜਿ. ਸੋ ਆਗਨ੍ਤ੍ਵਾ ਤਂ ਗੇਹੇ ਅਪਸ੍ਸਨ੍ਤੋ ਪਟਿਵਿਸ੍ਸਕੇ ਪੁਚ੍ਛਿਤ੍ਵਾ ‘‘ਕੁਲਗੇਹਂ ਗਤਾ’’ਤਿ ਸੁਤ੍ਵਾ ‘‘ਮਂ ਨਿਸ੍ਸਾਯ ਕੁਲਧੀਤਾ ਅਨਾਥਾ ਜਾਤਾ’’ਤਿ ਪਦਾਨੁਪਦਿਕਂ ਗਨ੍ਤ੍ਵਾ ਸਮ੍ਪਾਪੁਣਿ. ਤਸ੍ਸਾ ਅਨ੍ਤਰਾਮਗ੍ਗੇਵ ਗਬ੍ਭਵੁਟ੍ਠਾਨਂ ਅਹੋਸਿ. ਤਤੋ ‘‘ਯਸ੍ਸਤ੍ਥਾਯ ਮਯਂ ਗਚ੍ਛੇਯ੍ਯਾਮ, ਸੋ ਅਤ੍ਥੋ ਅਨ੍ਤਰਾਮਗ੍ਗੇਵ ਨਿਪ੍ਫਨ੍ਨੋ, ਇਦਾਨਿ ਗਨ੍ਤ੍ਵਾ ਕਿਂ ਕਰਿਸ੍ਸਾਮਾ’’ਤਿ ਪਟਿਨਿਵਤ੍ਤਿਂਸੁ. ਪੁਨ ਤਸ੍ਸਾ ਕੁਚ੍ਛਿਯਂ ਗਬ੍ਭੋ ਪਤਿਟ੍ਠਾਸੀਤਿ ਪੁਰਿਮਨਯੇਨੇਵ ਵਿਤ੍ਥਾਰੇਤਬ੍ਬਂ.

ਅਨ੍ਤਰਾਮਗ੍ਗੇ ਪਨਸ੍ਸਾ ਗਬ੍ਭਵੁਟ੍ਠਾਨੇ ਜਾਤਮਤ੍ਤੇਯੇਵ ਚਤੂਸੁ ਦਿਸਾਸੁ ਮਹਾਮੇਘੋ ਉਟ੍ਠਹਿ. ਸਾ ਤਂ ਪੁਰਿਸਂ ਆਹ – ‘‘ਸਾਮਿ, ਅਵੇਲਾਯ ਚਤੂਸੁ ਦਿਸਾਸੁ ਮੇਘੋ ਉਟ੍ਠਿਤੋ, ਅਤ੍ਤਨੋ ਵਸਨਟ੍ਠਾਨਂ ਕਾਤੁਂ ਵਾਯਮਾਹੀ’’ਤਿ. ਸੋ ‘‘ਏਵਂ ਕਰਿਸ੍ਸਾਮੀ’’ਤਿ ਦਣ੍ਡਕੇਹਿ ਕੁਟਿਕਂ ਕਤ੍ਵਾ ‘‘ਛਦਨਤ੍ਥਾਯ ਤਿਣਂ ਆਹਰਿਸ੍ਸਾਮੀ’’ਤਿ ਏਕਸ੍ਮਿਂ ਮਹਾਵਮ੍ਮਿਕਪਾਦੇ ਤਿਣਂ ਛਿਨ੍ਦਤਿ. ਅਥ ਨਂ ਵਮ੍ਮਿਕੇ ਨਿਪਨ੍ਨੋ ਕਣ੍ਹਸਪ੍ਪੋ ਪਾਦੇ ਡਂਸਿ, ਸੋ ਤਸ੍ਮਿਂਯੇਵ ਠਾਨੇ ਪਤਿਤੋ. ਸਾਪਿ ‘‘ਇਦਾਨਿ ਆਗਮਿਸ੍ਸਤਿ, ਇਦਾਨਿ ਆਗਮਿਸ੍ਸਤੀ’’ਤਿ ਸਬ੍ਬਰਤ੍ਤਿਂ ਖੇਪੇਤ੍ਵਾ ‘‘ਅਦ੍ਧਾ ਮਂ ਸੋ ‘ਅਨਾਥਾ ਏਸਾ’ਤਿ ਮਗ੍ਗੇ ਛਡ੍ਡੇਤ੍ਵਾ ਗਤੋ ਭਵਿਸ੍ਸਤੀ’’ਤਿ ਆਲੋਕੇ ਸਞ੍ਜਾਤੇ ਪਦਾਨੁਸਾਰੇਨ ਓਲੋਕੇਨ੍ਤੀ ਵਮ੍ਮਿਕਪਾਦੇ ਪਤਿਤਂ ਦਿਸ੍ਵਾ ‘‘ਮਂ ਨਿਸ੍ਸਾਯ ਨਟ੍ਠੋ ਪੁਰਿਸੋ’’ਤਿ ਪਰਿਦੇਵਿਤ੍ਵਾ ਦਹਰਦਾਰਕਂ ਪਸ੍ਸੇਨਾਦਾਯ ਮਹਲ੍ਲਕਂ ਅਙ੍ਗੁਲੀਹਿ ਗਾਹਾਪੇਤ੍ਵਾ ਮਗ੍ਗੇਨ ਗਚ੍ਛਨ੍ਤੀ ਅਨ੍ਤਰਾਮਗ੍ਗੇ ਏਕਂ ਉਤ੍ਤਾਨਨਦਿਂ ਦਿਸ੍ਵਾ ‘‘ਦ੍ਵੇਪਿ ਦਾਰਕੇ ਏਕਪ੍ਪਹਾਰੇਨੇਵ ਆਦਾਯ ਗਨ੍ਤੁਂ ਨ ਸਕ੍ਖਿਸ੍ਸਾਮੀ’’ਤਿ ਜੇਟ੍ਠਕਂ ਓਰਿਮਤੀਰੇ ਠਪੇਤ੍ਵਾ ਦਹਰਂ ਪਰਤੀਰਂ ਨੇਤ੍ਵਾ ਪਿਲੋਤਿਕਚੁਮ੍ਬਟਕੇ ਨਿਪਜ੍ਜਾਪੇਤ੍ਵਾ ਪੁਨ ਨਿਵਤ੍ਤਿਤ੍ਵਾ ‘‘ਇਤਰਂ ਗਹੇਤ੍ਵਾ ਗਮਿਸ੍ਸਾਮੀ’’ਤਿ ਨਦਿਂ ਓਤਰਿ.

ਅਥਸ੍ਸਾ ਨਦੀਮਜ੍ਝਂ ਪਤ੍ਤਕਾਲੇ ਏਕੋ ਸੇਨੋ ‘‘ਮਂਸਪਿਣ੍ਡੋ ਅਯ’’ਨ੍ਤਿ ਸਞ੍ਞਾਯ ਦਾਰਕਂ ਵਿਜ੍ਝਿਤੁਂ ਆਗਚ੍ਛਤਿ. ਸਾ ਹਤ੍ਥਂ ਪਸਾਰੇਤ੍ਵਾ ਸੇਨਂ ਪਲਾਪੇਸਿ. ਤਸ੍ਸਾ ਤਂ ਹਤ੍ਥਵਿਕਾਰਂ ਦਿਸ੍ਵਾ ਮਹਲ੍ਲਕਦਾਰਕੋ ‘‘ਮਂ ਪਕ੍ਕੋਸਤੀ’’ਤਿ ਸਞ੍ਞਾਯ ਨਦਿਂ ਓਤਰਿਤ੍ਵਾ ਸੋਤੇ ਪਤਿਤੋ ਯਥਾਸੋਤਂ ਅਗਮਾਸਿ. ਸੋਪਿ ਸੇਨੋ ਤਸ੍ਸਾ ਅਸਮ੍ਪਤ੍ਤਾਯ ਏਵ ਤਂ ਦਹਰਦਾਰਕਂ ਗਣ੍ਹਿਤ੍ਵਾ ਅਗਮਾਸਿ. ਸਾ ਬਲਵਸੋਕਾਭਿਭੂਤਾ ਅਨ੍ਤਰਾਮਗ੍ਗੇ ਇਮਂ ਵਿਲਾਪਗੀਤਂ ਗਾਯਨ੍ਤੀ ਗਚ੍ਛਤਿ –

‘‘ਉਭੋ ਪੁਤ੍ਤਾ ਕਾਲਙ੍ਕਤਾ, ਪਨ੍ਥੇ ਮਯ੍ਹਂ ਪਤੀ ਮਤੋ’’ਤਿ.

ਸਾ ਏਵਂ ਵਿਲਪਮਾਨਾਵ ਸਾਵਤ੍ਥਿਂ ਪਤ੍ਵਾ ਕੁਲਸਭਾਗਂ ਗਨ੍ਤ੍ਵਾਪਿ ਸੋਕਵਸੇਨੇਵ ਅਤ੍ਤਨੋ ਗੇਹਂ ਵਵਤ੍ਥਪੇਤੁਂ ਅਸਕ੍ਕੋਨ੍ਤੀ ‘‘ਇਮਸ੍ਮਿਂ ਠਾਨੇ ਏਵਂਵਿਧਂ ਨਾਮ ਕੁਲਂ ਅਤ੍ਥਿ, ਕਤਰਂ ਤਂ ਗੇਹ’’ਨ੍ਤਿ ਪਟਿਪੁਚ੍ਛਿ. ਤ੍ਵਂ ਤਂ ਕੁਲਂ ਪਟਿਪੁਚ੍ਛਿਤ੍ਵਾ ਕਿਂ ਕਰਿਸ੍ਸਸਿ? ਤੇਸਂ ਵਸਨਗੇਹਂ ਵਾਤਪ੍ਪਹਾਰੇਨ ਪਤਿਤਂ, ਤਤ੍ਥੇਵ ਤੇ ਸਬ੍ਬੇਪਿ ਜੀਵਿਤਕ੍ਖਯਂ ਪਤ੍ਤਾ, ਅਥ ਨੇ ਖੁਦ੍ਦਕਮਹਲ੍ਲਕੇ ਏਕਚਿਤਕਸ੍ਮਿਂਯੇਵ ਝਾਪੇਨ੍ਤਿ, ਪਸ੍ਸ ਏਸਾ ਧੂਮਵਟ੍ਟਿ ਪਞ੍ਞਾਯਤੀਤਿ. ਸਾ ਤਂ ਕਥਂ ਸੁਤ੍ਵਾਵ ਕਿਂ ਤੁਮ੍ਹੇ ਵਦਥਾ’’ਤਿ ਅਤ੍ਤਨੋ ਨਿਵਤ੍ਥਸਾਟਕਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤੀ ਜਾਤਨਿਯਾਮੇਨੇਵ ਬਾਹਾ ਪਗ੍ਗਯ੍ਹ ਕਨ੍ਦਮਾਨਾ ਞਾਤੀਨਂ ਚਿਤਕਟ੍ਠਾਨਂ ਗਨ੍ਤ੍ਵਾ ਤਂ ਵਿਲਾਪਗੀਤਂ ਪਰਿਪੁਣ੍ਣਂ ਕਤ੍ਵਾ ਪਰਿਦੇਵਮਾਨਾ –

‘‘ਉਭੋ ਪੁਤ੍ਤਾ ਕਾਲਙ੍ਕਤਾ, ਪਨ੍ਥੇ ਮਯ੍ਹਂ ਪਤੀ ਮਤੋ;

ਮਾਤਾ ਪਿਤਾ ਚ ਭਾਤਾ ਚ, ਏਕਚਿਤਕਸ੍ਮਿਂ ਡਯ੍ਹਰੇ’’ਤਿ. –

ਆਹ. ਅਞ੍ਞੇਨ ਜਨੇਨ ਸਾਟਕਂ ਦਿਨ੍ਨਮ੍ਪਿ ਫਾਲੇਤ੍ਵਾ ਫਾਲੇਤ੍ਵਾ ਛਡ੍ਡੇਤਿ. ਅਥ ਨਂ ਦਿਟ੍ਠਦਿਟ੍ਠਟ੍ਠਾਨੇ ਮਹਾਜਨੋ ਪਰਿਵਾਰੇਤ੍ਵਾ ਚਰਤਿ. ਅਥਸ੍ਸਾ ‘‘ਅਯਂ ਪਟਾਚਾਰਂ ਪਟਪਰਿਹਰਣਂ ਵਿਨਾ ਚਰਤੀ’’ਤਿ ਪਟਾਚਾਰਾਤੇਵ ਨਾਮਂ ਅਕਂਸੁ. ਯਸ੍ਮਾ ਚਸ੍ਸਾ ਸੋ ਨਗ੍ਗਭਾਵੇਨ ਅਲਜ੍ਜੀਆਚਾਰੋ ਪਾਕਟੋ ਅਹੋਸਿ, ਤਸ੍ਮਾ ਪਤਿਤੋ ਆਚਾਰੋ ਅਸ੍ਸਾਤਿ ਪਟਾਚਾਰਾਤ੍ਵੇਵ ਨਾਮਂ ਅਕਂਸੁ.

ਸਾ ਏਕਦਿਵਸਂ ਸਤ੍ਥਰਿ ਮਹਾਜਨਸ੍ਸ ਧਮ੍ਮਂ ਦੇਸੇਨ੍ਤੇ ਵਿਹਾਰਂ ਪਵਿਸਿਤ੍ਵਾ ਪਰਿਸਪਰਿਯਨ੍ਤੇ ਅਟ੍ਠਾਸਿ. ਸਤ੍ਥਾ ਮੇਤ੍ਤਾਫਰਣੇਨ ਫਰਿਤ੍ਵਾ ‘‘ਸਤਿਂ ਪਟਿਲਭ, ਭਗਿਨਿ, ਸਤਿਂ ਪਟਿਲਭ, ਭਗਿਨੀ’’ਤਿ ਆਹ. ਤਸ੍ਸਾ ਸਤ੍ਥੁ ਵਚਨਂ ਸੁਤ੍ਵਾ ਬਲਵਹਿਰੋਤ੍ਤਪ੍ਪਂ ਆਗਤਂ, ਸਾ ਤਤ੍ਥੇਵ ਭੂਮਿਯਂ ਨਿਸੀਦਿ. ਅਵਿਦੂਰੇ ਠਿਤੋ ਪੁਰਿਸੋ ਉਤ੍ਤਰਿਸਾਟਕਂ ਖਿਪਿਤ੍ਵਾ ਅਦਾਸਿ. ਸਾ ਤਂ ਨਿਵਾਸੇਤ੍ਵਾ ਧਮ੍ਮਂ ਅਸ੍ਸੋਸਿ. ਸਤ੍ਥਾ ਤਸ੍ਸਾ ਚਰਿਯਵਸੇਨ ਇਮਾ ਧਮ੍ਮਪਦੇ ਗਾਥਾ ਆਹ –

‘‘ਨ ਸਨ੍ਤਿ ਪੁਤ੍ਤਾ ਤਾਣਾਯ, ਨ ਪਿਤਾ ਨਾਪਿ ਬਨ੍ਧਵਾ;

ਅਨ੍ਤਕੇਨਾਧਿਪਨ੍ਨਸ੍ਸ, ਨਤ੍ਥਿ ਞਾਤੀਸੁ ਤਾਣਤਾ.

‘‘ਏਤਮਤ੍ਥਵਸਂ ਞਤ੍ਵਾ, ਪਣ੍ਡਿਤੋ ਸੀਲਸਂਵੁਤੋ;

ਨਿਬ੍ਬਾਨਗਮਨਂ ਮਗ੍ਗਂ, ਖਿਪ੍ਪਮੇਵ ਵਿਸੋਧਯੇ’’ਤਿ. (ਧ. ਪ. ੨੮੮-੨੮੯);

ਸਾ ਗਾਥਾਪਰਿਯੋਸਾਨੇ ਯਥਾਠਿਤਾਵ ਸੋਤਾਪਤ੍ਤਿਫਲੇ ਪਤਿਟ੍ਠਾਯ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਪਬ੍ਬਜ੍ਜਂ ਯਾਚਿ. ਸਤ੍ਥਾ ‘‘ਤਸ੍ਸਾ ਭਿਕ੍ਖੁਨਿਉਪਸ੍ਸਯਂ ਗਨ੍ਤ੍ਵਾ ਪਬ੍ਬਜਾ’’ਤਿ ਪਬ੍ਬਜ੍ਜਂ ਸਮ੍ਪਟਿਚ੍ਛਿ. ਸਾ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਤ੍ਵਾ ਬੁਦ੍ਧਵਚਨਂ ਗਣ੍ਹਨ੍ਤੀ ਵਿਨਯਪਿਟਕੇ ਚਿਣ੍ਣਵਸੀ ਅਹੋਸਿ. ਅਪਰਭਾਗੇ ਸਤ੍ਥਾ ਜੇਤਵਨੇ ਨਿਸਿਨ੍ਨੋ ਭਿਕ੍ਖੁਨਿਯੋ ਪਟਿਪਾਟਿਯਾ ਠਾਨਨ੍ਤਰੇ ਠਪੇਨ੍ਤੋ ਪਟਾਚਾਰਂ ਵਿਨਯਧਰਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਧਮ੍ਮਦਿਨ੍ਨਾਥੇਰੀਵਤ੍ਥੁ

੨੩੯. ਪਞ੍ਚਮੇ ਧਮ੍ਮਕਥਿਕਾਨਨ੍ਤਿ ਧਮ੍ਮਕਥਿਕਾਨਂ ਭਿਕ੍ਖੁਨੀਨਂ ਧਮ੍ਮਦਿਨ੍ਨਾ ਅਗ੍ਗਾਤਿ ਦਸ੍ਸੇਤਿ. ਸਾ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਪਰਾਯਤ੍ਤਟ੍ਠਾਨੇ ਨਿਬ੍ਬਤ੍ਤਿਤ੍ਵਾ ਪਦੁਮੁਤ੍ਤਰਸ੍ਸ ਭਗਵਤੋ ਅਗ੍ਗਸਾਵਕਸ੍ਸ ਸੁਜਾਤਤ੍ਥੇਰਸ੍ਸ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਾ ਯਾਵਜੀਵਂ ਕੁਸਲਂ ਕਤ੍ਵਾ ਸਗ੍ਗੇ ਨਿਬ੍ਬਤ੍ਤਿ. ਸਬ੍ਬਂ ਹੇਟ੍ਠਾ ਖੇਮਾਥੇਰਿਯਾ ਅਭਿਨੀਹਾਰਵਸੇਨੇਵ ਵੇਦਿਤਬ੍ਬਂ. ਫੁਸ੍ਸਬੁਦ੍ਧਕਾਲੇ ਪਨੇਸਾ ਸਤ੍ਥੁ ਵੇਮਾਤਿਕਾਨਂ ਤਿਣ੍ਣਂ ਭਾਤਿਕਾਨਂ ਦਾਨਾਧਿਕਾਰੇ ਠਪਿਤਕਮ੍ਮਿਕਸ੍ਸ ਗੇਹੇ ਵਸਮਾਨਾ ‘‘ਏਕਂ ਦੇਹੀ’’ਤਿ ਵੁਤ੍ਤਾ ਦ੍ਵੇ ਅਦਾਸਿ. ਏਵਂ ਸਬ੍ਬਂ ਅਪਰਿਹਾਪੇਨ੍ਤੀ ਦਤ੍ਵਾ ਦ੍ਵੇਨਵੁਤਿਕਪ੍ਪੇ ਅਤਿਕ੍ਕਮ੍ਮ ਕਸ੍ਸਪਬੁਦ੍ਧਕਾਲੇ ਕਿਕਿਸ੍ਸ ਕਾਸਿਰਞ੍ਞੋ ਗੇਹੇ ਪਟਿਸਨ੍ਧਿਂ ਗਣ੍ਹਿਤ੍ਵਾ ਸਤ੍ਤਨ੍ਨਂ ਭਗਿਨੀਨਂ ਅਬ੍ਭਨ੍ਤਰਾ ਹੁਤ੍ਵਾ ਵੀਸਤਿ ਵਸ੍ਸਸਹਸ੍ਸਾਨਿ ਬ੍ਰਹ੍ਮਚਰਿਯਂ ਚਰਿਤ੍ਵਾ ਭਿਕ੍ਖੁਸਙ੍ਘਸ੍ਸ ਵਸਨਪਰਿਵੇਣਂ ਕਾਰੇਤ੍ਵਾ ਏਕਂ ਬੁਦ੍ਧਨ੍ਤਰਂ ਦੇਵਮਨੁਸ੍ਸੇਸੁ ਸਂਸਰਨ੍ਤੀ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਪਟਿਸਨ੍ਧਿਂ ਗਣ੍ਹਿਤ੍ਵਾ ਅਪਰਭਾਗੇ ਵਿਸਾਖਸੇਟ੍ਠਿਨੋ ਗੇਹਂ ਗਤਾ. ਵਿਸਾਖਸੇਟ੍ਠਿ ਨਾਮ ਬਿਮ੍ਬਿਸਾਰਸ੍ਸ ਸਹਾਯਕੋ ਰਞ੍ਞਾ ਸਦ੍ਧਿਂ ਦਸਬਲਸ੍ਸ ਪਠਮਦਸ੍ਸਨਂ ਗਨ੍ਤ੍ਵਾ ਧਮ੍ਮਂ ਸੁਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਿਤੋ, ਅਪਰਭਾਗੇ ਅਨਾਗਾਮਿਫਲਂ ਸਚ੍ਛਾਕਾਸਿ.

ਸੋ ਤਂਦਿਵਸਂ ਘਰਂ ਗਨ੍ਤ੍ਵਾ ਸੋਪਾਨਮਤ੍ਥਕੇ ਠਿਤਾਯ ਧਮ੍ਮਦਿਨ੍ਨਾਯ ਹਤ੍ਥੇ ਪਸਾਰਿਤੇ ਹਤ੍ਥਂ ਅਨਾਲਮ੍ਬਿਤ੍ਵਾਵ ਪਾਸਾਦਂ ਅਭਿਰੁਹਿ. ਭੁਞ੍ਜਮਾਨੋਪਿ ‘‘ਇਮਂ ਦੇਥ, ਇਮਂ ਹਰਥਾ’’ਤਿ ਨ ਬ੍ਯਾਹਰਿ. ਧਮ੍ਮਦਿਨ੍ਨਾ ਕਟਚ੍ਛੁਂ ਗਹੇਤ੍ਵਾ ਪਰਿਵਿਸਮਾਨਾ ਚਿਨ੍ਤੇਸਿ – ‘‘ਅਯਂ ਮੇ ਹਤ੍ਥਾਲਮ੍ਬਕਂ ਦੇਨ੍ਤਿਯਾਪਿ ਹਤ੍ਥਂ ਨ ਆਲਮ੍ਬਿ, ਭੁਞ੍ਜਮਾਨੋਪਿ ਕਿਞ੍ਚਿ ਨ ਕਥੇਤਿ, ਕੋ ਨੁ ਖੋ ਮਯ੍ਹਂ ਦੋਸੋ’’ਤਿ? ਅਥ ਨਂ ਭੁਤ੍ਤਾਵਿਂ ‘‘ਕੋ ਨੁ ਖੋ ਮੇ, ਅਯ੍ਯ, ਦੋਸੋ’’ਤਿ ਪੁਚ੍ਛਿ. ਧਮ੍ਮਦਿਨ੍ਨੇ ਤੁਯ੍ਹਂ ਦੋਸੋ ਨਤ੍ਥਿ, ਅਹਂ ਪਨ ਅਜ੍ਜ ਪਟ੍ਠਾਯ ਸਨ੍ਥਵਵਸੇਨ ਤੁਮ੍ਹਾਕਂ ਸਨ੍ਤਿਕੇ ਨਿਸੀਦਿਤੁਂ ਵਾ ਠਾਤੁਂ ਵਾ ਆਹਰਾਪੇਤ੍ਵਾ ਖਾਦਿਤੁਂ ਵਾ ਭੁਞ੍ਜਿਤੁਂ ਵਾ ਅਭਬ੍ਬੋ. ਤ੍ਵਂ ਸਚੇ ਇਚ੍ਛਸਿ, ਇਮਸ੍ਮਿਂ ਗੇਹੇ ਵਸ. ਨੋ ਚੇ ਇਚ੍ਛਸਿ, ਯਤ੍ਤਕੇਨ ਤੇ ਧਨੇਨ ਅਤ੍ਥੋ, ਤਂ ਗਣ੍ਹਿਤ੍ਵਾ ਕੁਲਘਰਂ ਗਚ੍ਛਾਹੀਤਿ. ਅਯ੍ਯਪੁਤ੍ਤ, ਏਵਂ ਸਨ੍ਤੇ ਅਹਂ ਤੁਮ੍ਹੇਹਿ ਛਡ੍ਡਿਤਖੇਲ਼ਂ ਵਮਿਤਵਮਨਂ ਸੀਸੇਨ ਉਕ੍ਖਿਪਿਤ੍ਵਾ ਨ ਚਰਿਸ੍ਸਾਮਿ, ਮਯ੍ਹਂ ਪਬ੍ਬਜ੍ਜਂ ਅਨੁਜਾਨਾਥਾਤਿ. ਵਿਸਾਖੋ ‘‘ਸਾਧੁ, ਧਮ੍ਮਦਿਨ੍ਨੇ’’ਤਿ ਰਞ੍ਞੋ ਆਰੋਚੇਤ੍ਵਾ ਧਮ੍ਮਦਿਨ੍ਨਂ ਸੁਵਣ੍ਣਸਿਵਿਕਾਯ ਭਿਕ੍ਖੁਨਿਉਪਸ੍ਸਯਂ ਪਬ੍ਬਜ੍ਜਤ੍ਥਾਯ ਪੇਸੇਸਿ.

ਸਾ ਪਬ੍ਬਜਿਤ੍ਵਾ ਚਿਨ੍ਤੇਸਿ – ‘‘ਅਯਂ ਤਾਵ ਸੇਟ੍ਠਿ ਘਰਮਜ੍ਝੇ ਠਿਤੋਵ ਦੁਕ੍ਖਸ੍ਸਨ੍ਤਂ ਅਕਾਸਿ, ਪਬ੍ਬਜ੍ਜਂ ਲਦ੍ਧਕਾਲਤੋ ਪਟ੍ਠਾਯ ਪਨ ਮਯਾਪਿ ਦੁਕ੍ਖਸ੍ਸਨ੍ਤਂ ਕਾਤੁਂ ਵਟ੍ਟਤੀ’’ਤਿ ਆਚਰਿਯੁਪਜ੍ਝਾਯਾਨਂ ਸਨ੍ਤਿਕਂ ਗਨ੍ਤ੍ਵਾ, ‘‘ਅਯ੍ਯੇ, ਮਯ੍ਹਂ ਆਕਿਣ੍ਣਟ੍ਠਾਨੇ ਚਿਤ੍ਤਂ ਨ ਰਮਤਿ, ਗਾਮਕਾਵਾਸਂ ਗਚ੍ਛਾਮੀ’’ਤਿ ਆਹ. ਥੇਰਿਯੋ ਤਸ੍ਸਾ ਮਹਾਕੁਲਾ ਨਿਕ੍ਖਮ੍ਮ ਪਬ੍ਬਜਿਤਭਾਵੇਨ ਚਿਤ੍ਤਂ ਵਾਰੇਤੁਂ ਅਸਕ੍ਕੋਨ੍ਤਿਯੋ ਤਂ ਗਹੇਤ੍ਵਾ ਗਾਮਕਾਵਾਸਂ ਅਗਮਂਸੁ. ਸਾ ਅਤੀਤੇ ਮਦ੍ਦਿਤਸਙ੍ਖਾਰਤਾਯ ਨਚਿਰਸ੍ਸੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਅਥਸ੍ਸਾ ਏਤਦਹੋਸਿ – ‘‘ਮਯ੍ਹਂ ਕਿਚ੍ਚਂ ਮਤ੍ਥਕਂ ਪਤ੍ਤਂ, ਇਧ ਵਸਿਤ੍ਵਾ ਕਿਂ ਕਰਿਸ੍ਸਾਮਿ, ਰਾਜਗਹਮੇਵ ਗਚ੍ਛਾਮਿ, ਤਤ੍ਰ ਮਂ ਨਿਸ੍ਸਾਯ ਬਹੁ ਞਾਤਿਸਙ੍ਘੋ ਪੁਞ੍ਞਾਨਿ ਕਰਿਸ੍ਸਤੀ’’ਤਿ ਥੇਰਿਯੋ ਗਹੇਤ੍ਵਾ ਨਗਰਮੇਵ ਪਚ੍ਚਾਗਤਾ.

ਵਿਸਾਖੋ ਤਸ੍ਸਾ ਆਗਤਭਾਵਂ ਞਤ੍ਵਾ ‘‘ਸੀਘਂ ਆਗਤਾ ਉਕ੍ਕਣ੍ਠਿਤਾ ਨੁ ਖੋ ਭਵਿਸ੍ਸਤੀ’’ਤਿ ਸਾਯਨ੍ਹਸਮਯੇ ਤਸ੍ਸਾ ਸਨ੍ਤਿਕਂ ਗਨ੍ਤ੍ਵਾ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ‘‘ਉਕ੍ਕਣ੍ਠਿਤਭਾਵਂ ਪੁਚ੍ਛਿਤੁਂ ਅਯੁਤ੍ਤ’’ਨ੍ਤਿ ਪਞ੍ਚਕ੍ਖਨ੍ਧਾਦਿਵਸੇਨ ਪਞ੍ਹੇ ਪੁਚ੍ਛਿ, ਧਮ੍ਮਦਿਨ੍ਨਾ ਖਗ੍ਗੇਨ ਉਪ੍ਪਲਨਾਲਂ ਛਿਨ੍ਦਨ੍ਤੀ ਵਿਯ ਪੁਚ੍ਛਿਤਂ ਪੁਚ੍ਛਿਤਂ ਵਿਸ੍ਸਜ੍ਜੇਸਿ. ਉਪਾਸਕੋ ਧਮ੍ਮਦਿਨ੍ਨਾਥੇਰਿਯਾ ਞਾਣਸ੍ਸ ਸੂਰਭਾਵਂ ਞਤ੍ਵਾ ਅਤ੍ਤਨੋ ਅਧਿਗਤਟ੍ਠਾਨੇ ਪਟਿਪਾਟਿਯਾ ਤੀਸੁ ਮਗ੍ਗੇਸੁ ਸਬ੍ਬਾਕਾਰੇਨ ਪਞ੍ਹੇ ਪੁਚ੍ਛਿਤ੍ਵਾ ਉਗ੍ਗਹਵਸੇਨ ਅਰਹਤ੍ਤਮਗ੍ਗੇਪਿ ਪੁਚ੍ਛਿ. ਧਮ੍ਮਦਿਨ੍ਨਾਥੇਰੀਪਿ ਉਪਾਸਕਸ੍ਸ ਯਾਵ ਅਨਾਗਾਮਿਫਲਾਵ ਵਿਸਯਭਾਵਂ ਞਤ੍ਵਾ ‘‘ਇਦਾਨਿ ਅਤ੍ਤਨੋ ਵਿਸਯਂ ਅਤਿਕ੍ਕਮਿਤ੍ਵਾ ਧਾਵਤੀ’’ਤਿ ਤਂ ਨਿਵਤ੍ਤੇਨ੍ਤੀ ‘‘ਅਚ੍ਚਸਰਾ, ਆਵੁਸੋ ਵਿਸਾਖ, ਪਞ੍ਹੇ, ਨਾਸਕ੍ਖਿ ਪਞ੍ਹਾਨਂ ਪਰਿਯਨ੍ਤਂ ਗਹੇਤੁਂ, ਨਿਬ੍ਬਾਨੋਗਧਞ੍ਹਿ, ਆਵੁਸੋ ਵਿਸਾਖ, ਬ੍ਰਹ੍ਮਚਰਿਯਂ ਨਿਬ੍ਬਾਨਪਰਾਯਣਂ ਨਿਬ੍ਬਾਨਪਰਿਯੋਸਾਨਂ. ਆਕਙ੍ਖਮਾਨੋ ਚ ਤ੍ਵਂ, ਆਵੁਸੋ ਵਿਸਾਖ, ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਮਤ੍ਥਂ ਪੁਚ੍ਛੇਯ੍ਯਾਸਿ. ਯਥਾ ਚ ਤੇ ਭਗਵਾ ਬ੍ਯਾਕਰੋਤਿ, ਤਥਾ ਨਂ ਧਾਰੇਯ੍ਯਾਸੀ’’ਤਿ (ਮ. ਨਿ. ੧.੪੬੬) ਆਹ.

ਵਿਸਾਖੋ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਸਬ੍ਬਂ ਪੁਚ੍ਛਾਵਿਸ੍ਸਜ੍ਜਨਨਯਂ ਕਥੇਸਿ. ਸਤ੍ਥਾ ਤਸ੍ਸ ਵਚਨਂ ਸੁਤ੍ਵਾ ‘‘ਮਮ ਧੀਤਾਯ ਅਤੀਤਾਨਾਗਤਪਚ੍ਚੁਪ੍ਪਨ੍ਨੇਸੁ ਖਨ੍ਧੇਸੁ ਤਣ੍ਹਾ ਨਤ੍ਥੀ’’ਤਿ ਵਤ੍ਵਾ ਧਮ੍ਮਪਦੇ ਇਮਂ ਗਾਥਮਾਹ –

‘‘ਯਸ੍ਸ ਪੁਰੇ ਚ ਪਚ੍ਛਾ ਚ, ਮਜ੍ਝੇ ਚ ਨਤ੍ਥਿ ਕਿਞ੍ਚਨਂ;

ਅਕਿਞ੍ਚਨਂ ਅਨਾਦਾਨਂ, ਤਮਹਂ ਬ੍ਰੂਮਿ ਬ੍ਰਾਹ੍ਮਣ’’ਨ੍ਤਿ. (ਧ. ਪ. ੪੨੧);

ਤਤੋ ਧਮ੍ਮਦਿਨ੍ਨਾਯ ਸਾਧੁਕਾਰਂ ਦਤ੍ਵਾ ਵਿਸਾਖਂ ਉਪਾਸਕਂ ਏਤਦਵੋਚ – ‘‘ਪਣ੍ਡਿਤਾ, ਵਿਸਾਖ, ਧਮ੍ਮਦਿਨ੍ਨਾ ਭਿਕ੍ਖੁਨੀ, ਮਹਾਪਞ੍ਞਾ ਵਿਸਾਖ, ਧਮ੍ਮਦਿਨ੍ਨਾ ਭਿਕ੍ਖੁਨੀ. ਮਂ ਚੇਪਿ ਤ੍ਵਂ, ਵਿਸਾਖ, ਏਤਮਤ੍ਥਂ ਪੁਚ੍ਛੇਯ੍ਯਾਸਿ, ਅਹਮ੍ਪਿ ਤਂ ਏਵਮੇਵ ਬ੍ਯਾਕਰੇਯ੍ਯਂ, ਯਥਾ ਤਂ ਧਮ੍ਮਦਿਨ੍ਨਾਯ ਭਿਕ੍ਖੁਨਿਯਾ ਬ੍ਯਾਕਤਂ, ਏਸੋ ਚੇਵੇਤਸ੍ਸ ਅਤ੍ਥੋ, ਏਵਞ੍ਚ ਨਂ ਧਾਰੇਹੀ’’ਤਿ. ਏਵਮੇਤਂ ਵਤ੍ਥੁ ਸਮੁਟ੍ਠਿਤਂ. ਅਪਰਭਾਗੇ ਸਤ੍ਥਾ ਜੇਤਵਨੇ ਨਿਸਿਨ੍ਨੋ ਪਟਿਪਾਟਿਯਾ ਭਿਕ੍ਖੁਨਿਯੋ ਠਾਨਨ੍ਤਰੇ ਠਪੇਨ੍ਤੋ ਇਦਮੇਵ ਚੂਲ਼ਵੇਦਲ੍ਲਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਥੇਰਿਂ ਇਮਸ੍ਮਿਂ ਸਾਸਨੇ ਧਮ੍ਮਕਥਿਕਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਨਨ੍ਦਾਥੇਰੀਵਤ੍ਥੁ

੨੪੦. ਛਟ੍ਠੇ ਝਾਯੀਨਂ ਯਦਿਦਂ ਨਨ੍ਦਾਤਿ ਝਾਨਾਭਿਰਤਾਨਂ, ਨਨ੍ਦਾ ਥੇਰੀ, ਅਗ੍ਗਾਤਿ ਦਸ੍ਸੇਤਿ. ਸਾ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਪਟਿਸਨ੍ਧਿਂ ਗਹੇਤ੍ਵਾ ਅਪਰਭਾਗੇ ਸਤ੍ਥੁ ਧਮ੍ਮਂ ਸੁਣਨ੍ਤੀ ਸਤ੍ਥਾਰਂ ਏਕਂ ਭਿਕ੍ਖੁਨਿਂ ਝਾਨਾਭਿਰਤਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਾ ਤਤੋ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਅਮ੍ਹਾਕਂ ਸਤ੍ਥੁ ਨਿਬ੍ਬਤ੍ਤਿਤੋ ਪੁਰੇਤਰਮੇਵ ਮਹਾਪਜਾਪਤਿਗੋਤਮਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ, ਨਨ੍ਦਾਤਿਸ੍ਸਾ ਨਾਮਂ ਅਕਂਸੁ. ਰੂਪਨਨ੍ਦਾਤਿਪਿ ਵੁਚ੍ਚਤਿ. ਸਾ ਅਪਰਭਾਗੇ ਉਤ੍ਤਮਰੂਪਭਾਵੇਨ ਜਨਪਦਕਲ੍ਯਾਣੀ ਨਾਮ ਜਾਤਾ.

ਸਾ ਅਮ੍ਹਾਕਂ ਦਸਬਲੇ ਸਬ੍ਬਞ੍ਞੁਤਂ ਪਤ੍ਵਾ ਅਨੁਪੁਬ੍ਬੇਨ ਕਪਿਲਵਤ੍ਥੁਂ ਆਗਨ੍ਤ੍ਵਾ ਨਨ੍ਦਞ੍ਚ ਰਾਹੁਲਞ੍ਚ ਪਬ੍ਬਾਜੇਤ੍ਵਾ ਪਕ੍ਕਨ੍ਤੇ ਸੁਦ੍ਧੋਦਨਮਹਾਰਾਜਸ੍ਸ ਪਰਿਨਿਬ੍ਬੁਤਕਾਲੇ ‘‘ਮਹਾਪਜਾਪਤਿਗੋਤਮੀ ਚ ਰਾਹੁਲਮਾਤਾ ਚ ਨਿਕ੍ਖਮਿਤ੍ਵਾ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤਾ’’ਤਿ ਞਤ੍ਵਾ ‘‘ਇਮਾਸਂ ਪਬ੍ਬਜਿਤਕਾਲਤੋ ਪਟ੍ਠਾਯ ਮਯ੍ਹਂ ਇਧ ਕਿਂ ਕਮ੍ਮ’’ਨ੍ਤਿ ਮਹਾਪਜਾਪਤਿਯਾ ਸਨ੍ਤਿਕਂ ਗਨ੍ਤ੍ਵਾ ਪਬ੍ਬਜਿ. ਪਬ੍ਬਜਿਤਦਿਵਸਤੋ ਪਟ੍ਠਾਯ ‘‘ਸਤ੍ਥਾ ਰੂਪਂ ਗਰਹਤੀ’’ਤਿ ਸਤ੍ਥੁ ਉਪਟ੍ਠਾਨਂ ਨ ਗਚ੍ਛਤਿ, ਓਵਾਦਵਾਰੇ ਸਮ੍ਪਤ੍ਤੇ ਅਞ੍ਞਂ ਪੇਸੇਤ੍ਵਾ ਓਵਾਦਂ ਆਹਰਾਪੇਤਿ. ਸਤ੍ਥਾ ਤਸ੍ਸਾ ਰੂਪਮਦਮਤ੍ਤਭਾਵਂ ਞਤ੍ਵਾ ‘‘ਅਤ੍ਤਨੋ ਓਵਾਦਂ ਅਤ੍ਤਨਾਵ ਆਗਨ੍ਤ੍ਵਾ ਗਣ੍ਹਨ੍ਤੁ, ਨ ਭਿਕ੍ਖੁਨੀਹਿ ਅਞ੍ਞਾ ਪੇਸੇਤਬ੍ਬਾ’’ਤਿ ਆਹ. ਤਤੋ ਰੂਪਨਨ੍ਦਾ ਅਞ੍ਞਂ ਮਗ੍ਗਂ ਅਪਸ੍ਸਨ੍ਤੀ ਅਕਾਮਾ ਓਵਾਦਂ ਅਗਮਾਸਿ.

ਸਤ੍ਥਾ ਤਸ੍ਸਾ ਚਰਿਤਵਸੇਨ ਇਦ੍ਧਿਯਾ ਏਕਂ ਇਤ੍ਥਿਰੂਪਂ ਨਿਮ੍ਮਿਨਿਤ੍ਵਾ ਤਾਲਵਣ੍ਟਂ ਗਹੇਤ੍ਵਾ ਬੀਜਮਾਨਂ ਵਿਯ ਅਕਾਸਿ. ਰੂਪਨਨ੍ਦਾ ਤਂ ਦਿਸ੍ਵਾ ਚਿਨ੍ਤੇਸਿ – ‘‘ਅਹਂ ਅਕਾਰਣੇਨੇਵ ਪਮਤ੍ਤਾ ਹੁਤ੍ਵਾ ਨਾਗਚ੍ਛਾਮਿ, ਏਵਰੂਪਾਪਿ ਇਤ੍ਥਿਯੋ ਸਤ੍ਥੁ ਸਨ੍ਤਿਕੇ ਵਿਸ੍ਸਤ੍ਥਾ ਚਰਨ੍ਤਿ. ਮਮ ਰੂਪਂ ਏਤਾਸਂ ਰੂਪਸ੍ਸ ਕਲਂ ਨਾਗ੍ਘਤਿ ਸੋਲ਼ਸਿਂ, ਅਜਾਨਿਤ੍ਵਾਵ ਏਤ੍ਤਕਂ ਕਾਲਂ ਨ ਆਗਤਮ੍ਹੀ’’ਤਿ ਤਮੇਵ ਇਤ੍ਥਿਨਿਮਿਤ੍ਤਂ ਗਣ੍ਹਿਤ੍ਵਾ ਓਲੋਕੇਨ੍ਤੀ ਅਟ੍ਠਾਸਿ. ਸਤ੍ਥਾ ਤਸ੍ਸਾ ਪੁਬ੍ਬਹੇਤੁਸਮ੍ਪਨ੍ਨਤਾਯ ‘‘ਅਟ੍ਠੀਨਂ ਨਗਰਂ ਕਤ’’ਨ੍ਤਿ (ਧ. ਪ. ੧੫੦) ਧਮ੍ਮਪਦੇ ਗਾਥਂ ਵਤ੍ਵਾ –

‘‘ਚਰਂ ਵਾ ਯਦਿ ਵਾ ਤਿਟ੍ਠਂ, ਨਿਸਿਨ੍ਨੋ ਉਦ ਵਾ ਸਯ’’ਨ੍ਤਿ. (ਸੁ. ਨਿ. ੧੯੫) –

ਸੁਤ੍ਤਂ ਅਭਾਸਿ. ਸਾ ਤਸ੍ਮਿਂਯੇਵ ਰੂਪੇ ਖਯਵਯਂ ਪਟ੍ਠਪੇਤ੍ਵਾ ਅਰਹਤ੍ਤਂ ਪਾਪੁਣਿ. ਇਮਸ੍ਮਿਂ ਠਾਨੇ ਇਦਂ ਵਤ੍ਥੁ ਹੇਟ੍ਠਾ ਖੇਮਾਥੇਰਿਯਾ ਵਤ੍ਥੁਨਾ ਸਦਿਸਮੇਵਾਤਿ ਨ ਵਿਤ੍ਥਾਰਿਤਂ. ਤਤੋ ਪਟ੍ਠਾਯ, ਰੂਪਨਨ੍ਦਾ, ਝਾਨਾਭਿਰਤਾਨਂ ਅਨ੍ਤਰੇ ਧੁਰਪ੍ਪਤ੍ਤਾ ਅਹੋਸਿ. ਸਤ੍ਥਾ ਅਪਰਭਾਗੇ ਜੇਤਵਨੇ ਨਿਸਿਨ੍ਨੋ ਪਟਿਪਾਟਿਯਾ ਭਿਕ੍ਖੁਨਿਯੋ ਠਾਨਨ੍ਤਰੇ ਠਪੇਨ੍ਤੋ ਨਨ੍ਦਾਥੇਰਿਂ ਝਾਯੀਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਸੋਣਾਥੇਰੀਵਤ੍ਥੁ

੨੪੧. ਸਤ੍ਤਮੇ ਆਰਦ੍ਧਵੀਰਿਯਾਨਨ੍ਤਿ ਪਗ੍ਗਹਿਤਪਰਿਪੁਣ੍ਣਵੀਰਿਯਾਨਂ ਸੋਣਾ ਅਗ੍ਗਾਤਿ ਦਸ੍ਸੇਤਿ. ਅਯਂ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤੀਨਗਰੇ ਕੁਲਗੇਹੇ ਪਟਿਸਨ੍ਧਿਂ ਗਹੇਤ੍ਵਾ ਅਪਰਭਾਗੇ ਧਮ੍ਮਂ ਸੁਣਨ੍ਤੀ ਸਤ੍ਥਾਰਂ ਏਕਂ ਭਿਕ੍ਖੁਨਿਂ ਆਰਦ੍ਧਵੀਰਿਯਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਾ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਕੁਲਗੇਹੇ ਪਟਿਸਨ੍ਧਿਂ ਗਹੇਤ੍ਵਾ ਅਪਰਭਾਗੇ ਘਰਾਵਾਸੇ ਵੁਤ੍ਥਾ ਬਹੂ ਪੁਤ੍ਤਧੀਤਰੋ ਲਭਿਤ੍ਵਾ ਸਬ੍ਬੇਪਿ ਵਿਸੁਂ ਵਿਸੁਂ ਘਰਾਵਾਸੇ ਪਤਿਟ੍ਠਾਪੇਸਿ. ਤੇ ਤਤੋ ਪਟ੍ਠਾਯ ‘‘ਅਯਂ ਅਮ੍ਹਾਕਂ ਕਿਂ ਕਰਿਸ੍ਸਤੀ’’ਤਿ ਤਂ ਅਤ੍ਤਨੋ ਸਨ੍ਤਿਕਂ ਆਗਤਂ ‘‘ਮਾਤਾ’’ਤਿ ਸਞ੍ਞਮ੍ਪਿ ਨ ਕਰਿਂਸੁ. ਬਹੁਪੁਤ੍ਤਿਕਸੋਣਾ ਤੇਸਂ ਅਤ੍ਤਨਿ ਅਗਾਰਵਭਾਵਂ ਞਤ੍ਵਾ ‘‘ਘਰਾਵਾਸੇਨ ਕਿਂ ਕਰਿਸ੍ਸਾਮੀ’’ਤਿ ਨਿਕ੍ਖਮਿਤ੍ਵਾ ਪਬ੍ਬਜਿ. ਅਥ ਨਂ ਭਿਕ੍ਖੁਨਿਯੋ ‘‘ਅਯਂ ਵਤ੍ਤਂ ਨ ਜਾਨਾਤਿ, ਅਯੁਤ੍ਤਂ ਕਰੋਤੀ’’ਤਿ ਦਣ੍ਡਕਮ੍ਮਂ ਕਰੋਨ੍ਤਿ. ਪੁਤ੍ਤਧੀਤਰੋ ਤਂ ਦਣ੍ਡਕਮ੍ਮਂ ਆਹਰਨ੍ਤਿਂ ਦਿਸ੍ਵਾ ‘‘ਅਯਂ ਯਾਵਜ੍ਜਦਿਵਸਾ ਸਿਕ੍ਖਾਮਤ੍ਤਮ੍ਪਿ ਨ ਜਾਨਾਤੀ’’ਤਿ ਦਿਟ੍ਠਦਿਟ੍ਠਟ੍ਠਾਨੇ ਉਪ੍ਪਣ੍ਡੇਸੁਂ. ਸਾ ਤੇਸਂ ਵਚਨਂ ਸੁਤ੍ਵਾ ਉਪ੍ਪਨ੍ਨਸਂਵੇਗਾ ‘‘ਅਤ੍ਤਨੋ ਗਤਿਵਿਸੋਧਨਂ ਕਾਤੁਂ ਵਟ੍ਟਤੀ’’ਤਿ ਨਿਸਿਨ੍ਨਟ੍ਠਾਨੇਪਿ ਠਿਤਟ੍ਠਾਨੇਪਿ ਦ੍ਵਤ੍ਤਿਂਸਾਕਾਰਂ ਸਜ੍ਝਾਯਤਿ. ਸਾ ਯਥੇਵ ਪੁਬ੍ਬੇ ਬਹੁਪੁਤ੍ਤਿਕਸੋਣਤ੍ਥੇਰੀਤਿ ਪਞ੍ਞਾਯਿਤ੍ਥ, ਏਵਂ ਪਚ੍ਛਾ ਆਰਦ੍ਧਵੀਰਿਯਸੋਣਤ੍ਥੇਰੀਤਿ ਪਾਕਟਾ ਜਾਤਾ.

ਅਥੇਕਦਿਵਸਂ ਭਿਕ੍ਖੁਨਿਯੋ ਵਿਹਾਰਂ ਗਚ੍ਛਨ੍ਤਿਯੋ ‘‘ਭਿਕ੍ਖੁਨਿਸਙ੍ਘਸ੍ਸ ਉਦਕਂ ਤਾਪੇਯ੍ਯਾਸਿ, ਸੋਣੇ’’ਤਿ ਵਤ੍ਵਾ ਅਗਮਂਸੁ. ਸਾਪਿ ਉਦਕਤਾਪਨਤੋ ਪੁਰੇਤਰਮੇਵ ਅਗ੍ਗਿਸਾਲਾਯ ਚਙ੍ਕਮਿਤ੍ਵਾ ਚਙ੍ਕਮਿਤ੍ਵਾ ਦ੍ਵਤ੍ਤਿਂਸਾਕਾਰਂ ਸਜ੍ਝਾਯਨ੍ਤੀ ਵਿਪਸ੍ਸਨਂ ਵਡ੍ਢੇਸਿ. ਸਤ੍ਥਾ ਗਨ੍ਧਕੁਟਿਯਂ ਨਿਸਿਨ੍ਨੋਵ ਇਮਂ ਓਭਾਸਗਾਥਂ ਅਭਾਸਿ –

‘‘ਯੋ ਚ ਵਸ੍ਸਸਤਂ ਜੀਵੇ, ਅਪਸ੍ਸਂ ਧਮ੍ਮਮੁਤ੍ਤਮਂ;

ਏਕਾਹਂ ਜੀਵਿਤਂ ਸੇਯ੍ਯੋ, ਪਸ੍ਸਤੋ ਧਮ੍ਮਮੁਤ੍ਤਮ’’ਨ੍ਤਿ. (ਧ. ਪ. ੧੧੫);

ਸਾ ਗਾਥਾਪਰਿਯੋਸਾਨੇ ਅਰਹਤ੍ਤਂ ਪਤ੍ਵਾ ਚਿਨ੍ਤੇਸਿ – ‘‘ਅਹਂ ਅਰਹਤ੍ਤਂ ਪਤ੍ਤਾ, ਆਗਨ੍ਤੁਕਜਨੋ ਚ ਅਨੁਪਧਾਰੇਤ੍ਵਾਵ ਮਯਿ ਅਵਞ੍ਞਾਯ ਕਿਞ੍ਚਿ ਵਤ੍ਵਾ ਬਹੁਂ ਅਪੁਞ੍ਞਮ੍ਪਿ ਪਸਵੇਯ੍ਯ, ਤਸ੍ਮਾ ਸਂਲਕ੍ਖਣਕਾਰਣਂ ਕਾਤੁਂ ਵਟ੍ਟਤੀ’’ਤਿ. ਸਾ ਉਦਕਭਾਜਨਂ ਉਦ੍ਧਨਂ ਆਰੋਪੇਤ੍ਵਾ ਹੇਟ੍ਠਾ ਅਗ੍ਗਿਂ ਨ ਅਕਾਸਿ. ਭਿਕ੍ਖੁਨਿਯੋ ਆਗਨ੍ਤ੍ਵਾ ਉਦ੍ਧਨਂ ਓਲੋਕੇਨ੍ਤਿਯੋ ਅਗ੍ਗਿਂ ਅਦਿਸ੍ਵਾ ‘‘ਇਮਂ ਮਹਲ੍ਲਿਕਂ ‘ਭਿਕ੍ਖੁਨਿਸਙ੍ਘਸ੍ਸ ਉਦਕਂ ਤਾਪੇਹੀ’ਤਿ ਅਵੋਚੁਮ੍ਹ, ਅਜ੍ਜਾਪਿ ਉਦ੍ਧਨੇ ਅਗ੍ਗਿਮ੍ਪਿ ਨ ਕਰੋਤੀ’’ਤਿ ਆਹਂਸੁ. ਅਯ੍ਯੇ, ਕਿਂ ਤੁਮ੍ਹਾਕਂ ਅਗ੍ਗਿਨਾ, ਉਣ੍ਹੋਦਕੇਨ ਨ੍ਹਾਯਿਤੁਕਾਮਾ ਭਾਜਨਤੋ ਉਦਕਂ ਗਹੇਤ੍ਵਾ ਨ੍ਹਾਯਥਾਤਿ? ਤਾਪਿ ‘‘ਭਵਿਸ੍ਸਤਿ ਏਤ੍ਥ ਕਾਰਣ’’ਨ੍ਤਿ ਗਨ੍ਤ੍ਵਾ ਉਦਕੇ ਹਤ੍ਥਂ ਓਤਾਰੇਤ੍ਵਾ ਉਣ੍ਹਭਾਵਂ ਞਤ੍ਵਾ ਏਕਕੁਟਂ ਆਹਰਿਤ੍ਵਾ ਉਦਕਂ ਗਣ੍ਹਨ੍ਤਿ, ਗਹਿਤਗਹਿਤਟ੍ਠਾਨਂ ਪਰਿਪੂਰਤਿ. ਤਦਾ ਸਬ੍ਬਾਵ ਤਸ੍ਸਾ ਅਰਹਤ੍ਤੇ ਠਿਤਭਾਵਂ ਞਤ੍ਵਾ ਦਹਰਤਰਾ ਤਾਵ ਪਞ੍ਚਪਤਿਟ੍ਠਿਤੇਨ ਪਾਦੇਸੁ ਪਤਿਤ੍ਵਾ ‘‘ਮਯਂ, ਅਯ੍ਯੇ, ਏਤ੍ਤਕਂ ਕਾਲਂ ਤੁਮ੍ਹੇ ਅਨੁਪਧਾਰੇਤ੍ਵਾ ਵਿਹੇਠੇਤ੍ਵਾ ਵਿਹੇਠੇਤ੍ਵਾ ਕਥਯਿਮ੍ਹ, ਖਮਥ ਨੋ’’ਤਿ ਖਮਾਪੇਸੁਂ. ਵੁਦ੍ਧਤਰਾਪਿ ਉਕ੍ਕੁਟਿਕਂ ਨਿਸੀਦਿਤ੍ਵਾ ‘‘ਖਮ, ਅਯ੍ਯੇ’’ਤਿ ਖਮਾਪੇਸੁਂ. ਤਤੋ ਪਟ੍ਠਾਯ ‘‘ਮਹਲ੍ਲਕਕਾਲੇ ਪਬ੍ਬਜਿਤ੍ਵਾਪਿ ਆਰਦ੍ਧਵੀਰਿਯਭਾਵੇਨ ਨਚਿਰਸ੍ਸੇਵ ਅਗ੍ਗਫਲੇ ਪਤਿਟ੍ਠਿਤਾ’’ਤਿ ਥੇਰਿਯਾ ਗੁਣੋ ਪਾਕਟੋ ਅਹੋਸਿ. ਅਪਰਭਾਗੇ ਸਤ੍ਥਾ ਜੇਤਵਨੇ ਨਿਸੀਦਿਤ੍ਵਾ ਭਿਕ੍ਖੁਨਿਯੋ ਪਟਿਪਾਟਿਯਾ ਠਾਨਨ੍ਤਰੇ ਠਪੇਨ੍ਤੋ ਸੋਣਤ੍ਥੇਰਿਂ ਆਰਦ੍ਧਵੀਰਿਯਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਬਕੁਲਾਥੇਰੀਵਤ੍ਥੁ

੨੪੨. ਅਟ੍ਠਮੇ ਦਿਬ੍ਬਚਕ੍ਖੁਕਾਨਂ ਯਦਿਦਂ ਬਕੁਲਾਤਿ ਦਿਬ੍ਬਚਕ੍ਖੁਕਾਨਂ, ਬਕੁਲਾ ਥੇਰੀ, ਅਗ੍ਗਾਤਿ ਦਸ੍ਸੇਤਿ. ਅਯਂ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਸਤ੍ਥੁ ਧਮ੍ਮਕਥਂ ਸੁਣਨ੍ਤੀ ਸਤ੍ਥਾਰਂ ਏਕਂ ਭਿਕ੍ਖੁਨਿਂ ਦਿਬ੍ਬਚਕ੍ਖੁਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਾ ਕਪ੍ਪਸਤਸਹਸ੍ਸਂ ਦੇਵੇਸੁ ਚ ਮਨੁਸ੍ਸੇਸੁ ਚ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਅਪਰਭਾਗੇ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਟਿਲਦ੍ਧਸਦ੍ਧਾ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਸਾ ਤਤੋ ਪਟ੍ਠਾਯ ਦਿਬ੍ਬਚਕ੍ਖੁਮ੍ਹਿ ਚਿਣ੍ਣਵਸੀ ਅਹੋਸਿ. ਅਪਰਭਾਗੇ ਸਤ੍ਥਾ ਜੇਤਵਨੇ ਨਿਸਿਨ੍ਨੋ ਭਿਕ੍ਖੁਨਿਯੋ ਪਟਿਪਾਟਿਯਾ ਠਾਨਨ੍ਤਰੇ ਠਪੇਨ੍ਤੋ ਇਮਂ ਥੇਰਿਂ ਦਿਬ੍ਬਚਕ੍ਖੁਕਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਕੁਣ੍ਡਲਕੇਸਾਥੇਰੀਵਤ੍ਥੁ

੨੪੩. ਨਵਮੇ ਖਿਪ੍ਪਾਭਿਞ੍ਞਾਨਨ੍ਤਿ ਖਿਪ੍ਪਾਭਿਞ੍ਞਾਨਂ ਭਿਕ੍ਖੁਨੀਨਂ, ਭਦ੍ਦਾ ਕੁਣ੍ਡਲਕੇਸਾ, ਅਗ੍ਗਾਤਿ ਦਸ੍ਸੇਤਿ. ਅਯਮ੍ਪਿ ਹਿ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਨਿਬ੍ਬਤ੍ਤਾ ਸਤ੍ਥੁ ਧਮ੍ਮਕਥਂ ਸੁਤ੍ਵਾ ਸਤ੍ਥਾਰਂ ਏਕਂ ਭਿਕ੍ਖੁਨਿਂ ਖਿਪ੍ਪਾਭਿਞ੍ਞਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਾ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਕਸ੍ਸਪਬੁਦ੍ਧਕਾਲੇ ਕਿਕਿਸ੍ਸ ਕਾਸਿਰਞ੍ਞੋ ਗੇਹੇ ਸਤ੍ਤਨ੍ਨਂ ਭਗਿਨੀਨਂ ਅਬ੍ਭਨ੍ਤਰਾ ਹੁਤ੍ਵਾ ਵੀਸਤਿ ਵਸ੍ਸਸਹਸ੍ਸਾਨਿ ਦਸ ਸੀਲਾਨਿ ਸਮਾਦਾਯ ਕੋਮਾਰਿਕਬ੍ਰਹ੍ਮਚਰਿਯਂ ਚਰਨ੍ਤੀ ਸਙ੍ਘਸ੍ਸ ਵਸਨਪਰਿਵੇਣਂ ਕਾਰੇਤ੍ਵਾ ਏਕਂ ਬੁਦ੍ਧਨ੍ਤਰਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹਨਗਰੇ ਸੇਟ੍ਠਿਕੁਲੇ ਪਟਿਸਨ੍ਧਿਂ ਗਣ੍ਹਿ, ਭਦ੍ਦਾਤਿਸ੍ਸਾ ਨਾਮਂ ਅਕਂਸੁ.

ਤਂਦਿਵਸਂਯੇਵ ਚ ਤਸ੍ਮਿਂ ਨਗਰੇ ਪੁਰੋਹਿਤਪੁਤ੍ਤੋ ਜਾਤੋ. ਤਸ੍ਸ ਜਾਤਵੇਲਾਯ ਰਾਜਨਿਵੇਸਨਂ ਆਦਿਂ ਕਤ੍ਵਾ ਸਕਲਨਗਰੇ ਆਵੁਧਾਨਿ ਪਜ੍ਜਲਿਂਸੁ. ਪੁਰੋਹਿਤੋ ਪਾਤੋਵ ਰਾਜਕੁਲਂ ਗਨ੍ਤ੍ਵਾ ਰਾਜਾਨਂ ਸੁਖਸੇਯ੍ਯਂ ਪੁਚ੍ਛਿ. ਰਾਜਾ ‘‘ਕੁਤੋ ਮੇ, ਆਚਰਿਯ, ਸੁਖਸੇਯ੍ਯਾ, ਅਜ੍ਜ ਸਬ੍ਬਰਤ੍ਤਿਂ ਰਾਜਨਿਵੇਸਨੇ ਆਵੁਧਾਨਿ ਪਜ੍ਜਲਿਤਾਨਿ ਦਿਸ੍ਵਾ ਭਯਪ੍ਪਤ੍ਤਾ ਅਹੁਮ੍ਹਾ’’ਤਿ ਆਹ. ਮਹਾਰਾਜ, ਤਪ੍ਪਚ੍ਚਯਾ ਮਾ ਚਿਨ੍ਤਯਿਤ੍ਥ, ਨ ਤੁਮ੍ਹਾਕਂਯੇਵ ਗੇਹੇ ਆਵੁਧਾਨਿ ਪਜ੍ਜਲਿਂਸੁ, ਸਕਲਨਗਰੇ ਏਵਂ ਅਹੋਸੀਤਿ. ਕਿਂ ਕਾਰਣਾ, ਆਚਰਿਯਾਤਿ? ਅਮ੍ਹਾਕਂ ਗੇਹੇ ਚੋਰਨਕ੍ਖਤ੍ਤੇਨ ਦਾਰਕੋ ਜਾਤੋ, ਸੋ ਸਕਲਨਗਰਸ੍ਸ ਸਤ੍ਤੁ ਹੁਤ੍ਵਾ ਉਪ੍ਪਨ੍ਨੋ, ਤਸ੍ਸੇਤਂ ਪੁਬ੍ਬਨਿਮਿਤ੍ਤਂ. ਤੁਮ੍ਹਾਕਂ ਉਪਦ੍ਦਵੋ ਨਤ੍ਥਿ, ਸਚੇ ਪਨ ਇਚ੍ਛਥ, ਹਾਰੇਮ ਨਨ੍ਤਿ. ਅਮ੍ਹਾਕਂ ਪੀਲ਼ਾਯ ਅਸਤਿਯਾ ਹਾਰਣਕਮ੍ਮਂ ਨਤ੍ਥੀਤਿ. ਪੁਰੋਹਿਤੋ ‘‘ਮਮ ਪੁਤ੍ਤੋ ਅਤ੍ਤਨੋ ਨਾਮਂ ਗਹੇਤ੍ਵਾਵ ਆਗਤੋ’’ਤਿ ਸਤ੍ਤੁਕੋਤੇਵਸ੍ਸ ਨਾਮਂ ਅਕਾਸਿ. ਸੇਟ੍ਠਿਗੇਹੇਪਿ ਭਦ੍ਦਾ ਵਡ੍ਢਤਿ, ਪੁਰੋਹਿਤਗੇਹੇਪਿ ਸਤ੍ਤੁਕੋ ਵਡ੍ਢਤਿ. ਸੋ ਅਤ੍ਤਨੋ ਆਧਾਵਨਵਿਧਾਵਨੇਨ ਕੀਲ਼ਿਤੁਂ ਸਮਤ੍ਥਕਾਲਤੋ ਪਟ੍ਠਾਯ ਅਤ੍ਤਨੋ ਵਿਚਰਣਟ੍ਠਾਨੇ ਯਂ ਯਂ ਪਸ੍ਸਤਿ, ਤਂ ਤਂ ਸਬ੍ਬਂ ਆਹਰਿਤ੍ਵਾ ਮਾਤਾਪਿਤੂਨਂ ਗੇਹਂ ਪੂਰੇਤਿ. ਪਿਤਾ ਨਂ ਕਾਰਣਸਹਸ੍ਸਮ੍ਪਿ ਵਤ੍ਵਾ ਵਾਰੇਤੁਂ ਨਾਸਕ੍ਖਿ.

ਅਪਰਭਾਗੇ ਪਨਸ੍ਸ ਵਯਪ੍ਪਤ੍ਤਸ੍ਸ ਸਬ੍ਬਾਕਾਰੇਨਾਪਿ ਵਾਰੇਤੁਂ ਅਸਕ੍ਕੁਣੇਯ੍ਯਭਾਵਂ ਞਤ੍ਵਾ ਦ੍ਵੇ ਨੀਲਸਾਟਕੇ ਦਤ੍ਵਾ ਸਨ੍ਧਿਚ੍ਛੇਦਨਉਪਕਰਣਞ੍ਚ ਸਿਙ੍ਘਾਟਕਯਨ੍ਤਞ੍ਚ ਹਤ੍ਥੇ ਦਤ੍ਵਾ ‘‘ਤ੍ਵਂ ਇਮਿਨਾਵ ਕਮ੍ਮੇਨ ਜੀਵਾਹੀ’’ਤਿ ਨਂ ਵਿਸ੍ਸਜ੍ਜੇਸਿ. ਸੋ ਤਂਦਿਵਸਤੋ ਪਟ੍ਠਾਯ ਸਿਙ੍ਘਾਟਕਯਨ੍ਤਂ ਖਿਪਿਤ੍ਵਾ ਕੁਲਾਨਂ ਪਾਸਾਦੇ ਆਰੁਯ੍ਹ ਸਨ੍ਧਿਂ ਛਿਨ੍ਦਿਤ੍ਵਾ ਪਰਕੁਲੇਸੁ ਨਿਕ੍ਖਿਤ੍ਤਭਣ੍ਡਂ ਅਤ੍ਤਨਾ ਠਪਿਤਂ ਵਿਯ ਗਹੇਤ੍ਵਾ ਗਚ੍ਛਤਿ. ਸਕਲਨਗਰੇ ਤੇਨ ਅਵਿਲੁਤ੍ਤਗੇਹਂ ਨਾਮ ਨਾਹੋਸਿ. ਏਕਦਿਵਸਂ ਰਾਜਾ ਰਥੇਨ ਨਗਰੇ ਵਿਚਰਨ੍ਤੋ ਸਾਰਥਿਂ ਪੁਚ੍ਛਿ – ‘‘ਕਿਂ ਨੁ ਖੋ ਇਮਸ੍ਮਿਂ ਨਗਰੇ ਤਸ੍ਮਿਂ ਤਸ੍ਮਿਂ ਘਰੇ ਛਿਦ੍ਦਮੇਵ ਪਞ੍ਞਾਯਤੀ’’ਤਿ. ਦੇਵ ਇਮਸ੍ਮਿਂ ਨਗਰੇ ਸਤ੍ਤੁਕੋ ਨਾਮ ਚੋਰੋ ਭਿਤ੍ਤਿਂ ਛਿਨ੍ਦਿਤ੍ਵਾ ਕੁਲਾਨਂ ਸਨ੍ਤਕਂ ਹਰਤੀਤਿ. ਰਾਜਾ ਨਗਰਗੁਤ੍ਤਿਕਂ ਪਕ੍ਕੋਸਾਪੇਤ੍ਵਾ ‘‘ਇਮਸ੍ਮਿਂ ਕਿਰ ਨਗਰੇ ਏਵਰੂਪੋ ਨਾਮ ਚੋਰੋ ਅਤ੍ਥਿ, ਕਸ੍ਮਾ ਨਂ ਨ ਗਣ੍ਹਸੀ’’ਤਿ ਆਹ. ਮਯਂ, ਦੇਵ, ਤਂ ਚੋਰਂ ਸਹੋਡ੍ਢਂ ਪਸ੍ਸਿਤੁਂ ਨ ਸਕ੍ਕੋਮਾਤਿ. ਸਚੇ ਅਜ੍ਜ ਨਂ ਚੋਰਂ ਗਣ੍ਹਸਿ, ਜੀਵਸਿ. ਸਚੇ ਨ ਗਣ੍ਹਸਿ, ਰਾਜਾਣਂ ਤੇ ਕਰਿਸ੍ਸਾਮੀਤਿ. ਏਵਂ ਦੇਵਾਤਿ ਨਗਰਗੁਤ੍ਤਿਕੋ ਸਕਲਨਗਰੇ ਮਨੁਸ੍ਸੇ ਚਾਰੇਤ੍ਵਾ ਤਂ ਭਿਤ੍ਤਿਂ ਛਿਨ੍ਦਿਤ੍ਵਾ ਪਰਭਣ੍ਡਂ ਅਵਹਰਨ੍ਤਂ ਸਹੋਡ੍ਢਮੇਵ ਗਹੇਤ੍ਵਾ ਰਞ੍ਞੋ ਦਸ੍ਸੇਸਿ. ਰਾਜਾ ‘‘ਇਮਂ ਚੋਰਂ ਦਕ੍ਖਿਣਦ੍ਵਾਰੇਨ ਨੀਹਰਿਤ੍ਵਾ ਘਾਤੇਥਾ’’ਤਿ ਆਹ. ਨਗਰਗੁਤ੍ਤਿਕੋ ਰਞ੍ਞੋ ਪਟਿਸ੍ਸੁਣਿਤ੍ਵਾ ਤਂ ਚੋਰਂ ਚਤੁਕ੍ਕੇ ਚਤੁਕ੍ਕੇ ਪਹਾਰਸਹਸ੍ਸੇਨ ਤਾਲ਼ੇਨ੍ਤੋ ਗਾਹਾਪੇਤ੍ਵਾ ਦਕ੍ਖਿਣਦ੍ਵਾਰਂ ਗਚ੍ਛਤਿ.

ਤਸ੍ਮਿਂ ਸਮਯੇ ਅਯਂ ਭਦ੍ਦਾ ਨਾਮ ਸੇਟ੍ਠਿਧੀਤਾ ਮਹਾਜਨਸ੍ਸ ਕੋਲਾਹਲਸਦ੍ਦੇਨ ਸੀਹਪਞ੍ਜਰਂ ਉਗ੍ਘਾਟੇਤ੍ਵਾ ਓਲੋਕੇਨ੍ਤੀ ਤਂ ਸਤ੍ਤੁਕਂ ਚੋਰਂ ਤਥਾ ਨੀਯਮਾਨਂ ਦਿਸ੍ਵਾ ਉਭੋਹਿ ਹਤ੍ਥੇਹਿ ਹਦਯਂ ਸਨ੍ਧਾਰੇਨ੍ਤੀ ਗਨ੍ਤ੍ਵਾ ਸਿਰਿਸਯਨੇ ਅਧੋਮੁਖਾ ਨਿਪਜ੍ਜਿ. ਸਾ ਚ ਤਸ੍ਸ ਕੁਲਸ੍ਸ ਏਕਧੀਤਾ, ਤੇਨਸ੍ਸਾ ਞਾਤਕਾ ਅਪ੍ਪਮਤ੍ਤਕਮ੍ਪਿ ਮੁਖਵਿਕਾਰਂ ਸਹਿਤੁਂ ਨ ਸਕ੍ਕੋਨ੍ਤਿ. ਅਥ ਨਂ ਮਾਤਾ ਸਯਨੇ ਨਿਪਨ੍ਨਂ ਦਿਸ੍ਵਾ ‘‘ਕਿਂ ਕਰੋਸਿ, ਅਮ੍ਮਾ’’ਤਿ ਪੁਚ੍ਛਿ. ਏਤਂ ਵਜ੍ਝਂ ਕਤ੍ਵਾ ਨੀਯਮਾਨਂ ਚੋਰਂ ਅਦ੍ਦਸ, ਅਮ੍ਮਾਤਿ? ਆਮ, ਅਮ੍ਮਾਤਿ. ਏਤਂ ਲਭਮਾਨਾ ਜੀਵਿਸ੍ਸਾਮਿ, ਅਲਭਮਾਨਾਯ ਮੇ ਮਰਣਮੇਵਾਤਿ. ਤੇ ਤਂ ਨਾਨਪ੍ਪਕਾਰੇਨਪਿ ਸਞ੍ਞਾਪੇਤੁਂ ਅਸਕ੍ਕੋਨ੍ਤਾ ‘‘ਮਰਣਾ ਜੀਵਿਤਂ ਸੇਯ੍ਯੋ’’ਤਿ ਸਲ੍ਲਕ੍ਖੇਸੁਂ. ਅਥਸ੍ਸਾ ਪਿਤਾ ਨਗਰਗੁਤ੍ਤਿਕਸ੍ਸ ਸਨ੍ਤਿਕਂ ਗਨ੍ਤ੍ਵਾ ਸਹਸ੍ਸਂ ਲਞ੍ਜਂ ਦਤ੍ਵਾ ‘‘ਮਯ੍ਹਂ ਧੀਤਾ ਚੋਰੇ ਪਟਿਬਦ੍ਧਚਿਤ੍ਤਾ, ਯੇਨ ਕੇਨਚਿ ਉਪਾਯੇਨ ਇਮਂ ਮੁਞ੍ਚਾ’’ਤਿ ਆਹ. ਸੋ ‘‘ਸਾਧੂ’’ਤਿ ਸੇਟ੍ਠਿਸ੍ਸ ਪਟਿਸ੍ਸੁਣਿਤ੍ਵਾ ਚੋਰਂ ਗਹੇਤ੍ਵਾ ਯਾਵ ਸੂਰਿਯਸ੍ਸ ਅਤ੍ਥਙ੍ਗਮਨਾ ਇਤੋ ਚਿਤੋ ਚ ਪਪਞ੍ਚਾਪੇਤ੍ਵਾ ਸੂਰਿਯੇ ਅਤ੍ਥਙ੍ਗਤੇ ਚਾਰਕਤੋ ਏਕਂ ਮਨੁਸ੍ਸਂ ਨੀਹਰਾਪੇਤ੍ਵਾ ਸਤ੍ਤੁਕਸ੍ਸ ਬਨ੍ਧਨਂ ਮੋਚੇਤ੍ਵਾ ਸਤ੍ਤੁਕਂ ਸੇਟ੍ਠਿਗੇਹਂ ਪੇਸੇਤ੍ਵਾ ਤੇਨ ਬਨ੍ਧਨੇਨ ਇਤਰਂ ਬਨ੍ਧਿਤ੍ਵਾ ਦਕ੍ਖਿਣਦ੍ਵਾਰੇਨ ਨੀਹਰਿਤ੍ਵਾ ਘਾਤੇਸਿ. ਸੇਟ੍ਠਿਦਾਸਾਪਿ ਸਤ੍ਤੁਕਂ ਗਹੇਤ੍ਵਾ ਸੇਟ੍ਠਿਨੋ ਨਿਵੇਸਨਂ ਆਗਮਂਸੁ. ਤਂ ਦਿਸ੍ਵਾ ਸੇਟ੍ਠਿ ‘‘ਧੀਤੁ ਮਨਂ ਪੂਰੇਸ੍ਸਾਮੀ’’ਤਿ ਸਤ੍ਤੁਕਂ ਗਨ੍ਧੋਦਕੇਨ ਨ੍ਹਾਪੇਤ੍ਵਾ ਸਬ੍ਬਾਲਙ੍ਕਾਰਪਟਿਮਣ੍ਡਿਤਂ ਕਾਰੇਤ੍ਵਾ ਪਾਸਾਦਂ ਪੇਸੇਸਿ. ਭਦ੍ਦਾਪਿ ‘‘ਪਰਿਪੁਣ੍ਣੋ ਮੇ ਸਙ੍ਕਪ੍ਪੋ’’ਤਿ ਅਨੇਕਾਲਙ੍ਕਾਰੇਨ ਅਲਙ੍ਕਰਿਤ੍ਵਾ ਤਂ ਪਰਿਚਰਤਿ.

ਸਤ੍ਤੁਕੋ ਕਤਿਪਾਹਂ ਵੀਤਿਨਾਮੇਤ੍ਵਾ ਚਿਨ੍ਤੇਸਿ – ‘‘ਇਮਿਸ੍ਸਾ ਪਸਾਧਨਭਣ੍ਡਕਂ ਮਯ੍ਹਂ ਭਵਿਸ੍ਸਤਿ, ਕੇਨਚਿ ਉਪਾਯੇਨ ਇਮਂ ਆਭਰਣਂ ਗਹੇਤੁਂ ਵਟ੍ਟਤੀ’’ਤਿ ਸਮੀਪੇ ਸੁਖੇਨ ਨਿਸਿਨ੍ਨਕਾਲੇ ਭਦ੍ਦਂ ਆਹ – ‘‘ਮਯ੍ਹਂ ਏਕਂ ਵਚਨਂ ਵਤ੍ਤਬ੍ਬਂ ਅਤ੍ਥੀ’’ਤਿ. ਸੇਟ੍ਠਿਧੀਤਾ ਸਹਸ੍ਸਲਾਭਂ ਲਭਿਤ੍ਵਾ ਵਿਯ ਤੁਟ੍ਠਮਾਨਸਾ ‘‘ਵਿਸ੍ਸਤ੍ਥਂ ਵਦੇਹਿ, ਅਯ੍ਯਾ’’ਤਿ ਆਹ. ਤ੍ਵਂ ਚਿਨ੍ਤੇਸਿ – ‘‘ਮਂ ਨਿਸ੍ਸਾਯ ਇਮਿਨਾ ਜੀਵਿਤਂ ਲਦ੍ਧ’’ਨ੍ਤਿ, ਅਹਂ ਪਨ ਗਹਿਤਮਤ੍ਤੋਵ ਚੋਰਪਪਾਤਪਬ੍ਬਤੇ ਅਧਿਵਤ੍ਥਾਯ ਦੇਵਤਾਯ ‘‘ਸਚਾਹਂ ਜੀਵਿਤਂ ਲਭਿਸ੍ਸਾਮਿ, ਬਲਿਕਮ੍ਮਂ ਤੇ ਦਸ੍ਸਾਮੀ’’ਤਿ ਆਯਾਚਿਂ. ਤਂ ਨਿਸ੍ਸਾਯ ਮਯਾ ਜੀਵਿਤਂ ਲਦ੍ਧਂ, ਸੀਘਂ ਬਲਿਕਮ੍ਮਂ ਸਜ੍ਜਾਪੇਹੀਤਿ. ਭਦ੍ਦਾ, ‘‘ਅਹਂ ਤਸ੍ਸ ਮਨਂ ਪੂਰੇਸ੍ਸਾਮੀ’’ਤਿ ਬਲਿਕਮ੍ਮਂ ਸਜ੍ਜਾਪੇਤ੍ਵਾ ਸਬ੍ਬਂ ਪਸਾਧਨਂ ਪਸਾਧੇਤ੍ਵਾ ਏਕਯਾਨੇ ਆਰੁਯ੍ਹ ਸਾਮਿਕੇਨ ਸਦ੍ਧਿਂ ਚੋਰਪਪਾਤਪਬ੍ਬਤਂ ਗਨ੍ਤ੍ਵਾ ‘‘ਪਬ੍ਬਤਦੇਵਤਾਯ ਬਲਿਕਮ੍ਮਂ ਕਰਿਸ੍ਸਾਮੀ’’ਤਿ ਅਭਿਰੁਹਿਤੁਂ ਆਰਦ੍ਧਾ. ਸਤ੍ਤੁਕੋ ਚਿਨ੍ਤੇਸਿ – ‘‘ਸਬ੍ਬੇਸੁ ਅਭਿਰੁਹਨ੍ਤੇਸੁ ਮਮ ਇਮਿਸ੍ਸਾ ਆਭਰਣਂ ਗਹੇਤੁਂ ਨ ਓਕਾਸੋ ਭਵਿਸ੍ਸਤੀ’’ਤਿ ਤਮੇਵ ਬਲਿਭਾਜਨਂ ਗਾਹਾਪੇਤ੍ਵਾ ਪਬ੍ਬਤਂ ਅਭਿਰੁਹਿ.

ਸੋ ਭਦ੍ਦਾਯ ਸਦ੍ਧਿਂ ਕਥੇਨ੍ਤੋ ਪਿਯਕਥਂ ਨ ਕਥੇਤਿ. ਸਾ ਇਙ੍ਗਿਤੇਨੇਵ ਤਸ੍ਸ ਅਧਿਪ੍ਪਾਯਂ ਅਞ੍ਞਾਸਿ. ਅਥ ਨਂ ਸੋ ਆਹ – ‘‘ਭਦ੍ਦੇ, ਤਵ ਉਤ੍ਤਰਿਸਾਟਕਂ ਓਮੁਞ੍ਚਿਤ੍ਵਾ ਕਾਯਾਰੁਲ਼੍ਹਂ ਤੇ ਪਸਾਧਨਂ ਏਤ੍ਥ ਭਣ੍ਡਿਕਂ ਕਰੋਹੀ’’ਤਿ. ਸਾਮਿ ਮਯ੍ਹਂ ਕੋ ਅਪਰਾਧੋਤਿ? ਕਿਂ ਪਨਾਹਂ, ਬਾਲੇ, ਬਲਿਕਮ੍ਮਤ੍ਥਂ ਆਗਤੋਤਿ ਸਞ੍ਞਂ ਕਰੋਸਿ? ਅਹਞ੍ਹਿ ਇਮਿਸ੍ਸਾ ਦੇਵਤਾਯ ਯਕਨਂ ਉਬ੍ਬਟ੍ਠੇਤ੍ਵਾ ਦਦੇਯ੍ਯਂ, ਬਲਿਕਮ੍ਮਾਪਦੇਸੇਨ ਪਨ ਤਵ ਆਭਰਣਂ ਗਣ੍ਹਿਤੁਕਾਮੋ ਹੁਤ੍ਵਾ ਆਗਤੋਮ੍ਹੀਤਿ. ਕਸ੍ਸ ਪਨ, ਅਯ੍ਯ, ਪਸਾਧਨਂ, ਕਸ੍ਸ ਅਹਨ੍ਤਿ? ਮਯਂ ਏਵਰੂਪਂ ਨ ਜਾਨਾਮ, ਅਞ੍ਞਂ ਤਵ ਸਨ੍ਤਕਂ, ਅਞ੍ਞਂ ਮਮ ਸਨ੍ਤਕਨ੍ਤਿ. ਸਾਧੁ, ਅਯ੍ਯ, ਏਕਂ ਪਨ ਮੇ ਅਧਿਪ੍ਪਾਯਂ ਪੂਰੇਥ, ਅਲਙ੍ਕਤਨਿਯਾਮੇਨੇਵ ਮੇ ਪੁਰਤੋ ਚ ਪਚ੍ਛਤੋ ਚ ਆਲਿਙ੍ਗਿਤੁਂ ਦੇਥਾਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਸਾ ਤੇਨ ਸਮ੍ਪਟਿਚ੍ਛਿਤਭਾਵਂ ਞਤ੍ਵਾ ਪੁਰਤੋ ਆਲਿਙ੍ਗਿਤ੍ਵਾ ਪਚ੍ਛਤੋ ਆਲਿਙ੍ਗਨ੍ਤੀ ਵਿਯ ਹੁਤ੍ਵਾ ਪਬ੍ਬਤਪਪਾਤੇ ਪਾਤੇਸਿ. ਸੋ ਪਤਨ੍ਤੋ ਆਕਾਸੇਯੇਵ ਚੁਣ੍ਣਵਿਚੁਣ੍ਣੋ ਅਹੋਸਿ. ਤਾਯ ਕਤਂ ਵਿਚਿਤ੍ਰਭਾਵਂ ਦਿਸ੍ਵਾ ਪਬ੍ਬਤੇ ਅਧਿਵਤ੍ਥਾ ਦੇਵਤਾ ਗੁਣਕਿਤ੍ਤਨਵਸੇਨ ਇਮਾ ਗਾਥਾ ਆਹ –

‘‘ਨ ਸੋ ਸਬ੍ਬੇਸੁ ਠਾਨੇਸੁ, ਪੁਰਿਸੋ ਹੋਤਿ ਪਣ੍ਡਿਤੋ;

ਇਤ੍ਥੀਪਿ ਪਣ੍ਡਿਤਾ ਹੋਤਿ, ਤਤ੍ਥ ਤਤ੍ਥ ਵਿਚਕ੍ਖਣਾ.

‘‘ਨ ਸੋ ਸਬ੍ਬੇਸੁ ਠਾਨੇਸੁ, ਪੁਰਿਸੋ ਹੋਤਿ ਪਣ੍ਡਿਤੋ;

ਇਤ੍ਥੀਪਿ ਪਣ੍ਡਿਤਾ ਹੋਤਿ, ਮੁਹੁਤ੍ਤਮਪਿ ਚਿਨ੍ਤਯੇ’’ਤਿ. (ਅਪ. ਥੇਰੀ ੨.੩.੩੧-੩੨);

ਤਤੋ ਭਦ੍ਦਾ ਚਿਨ੍ਤੇਸਿ – ‘‘ਨ ਸਕ੍ਕਾ ਮਯਾ ਇਮਿਨਾ ਨਿਯਾਮੇਨ ਪੁਨ ਗੇਹਂ ਗਨ੍ਤੁਂ, ਇਤੋਵ ਗਨ੍ਤ੍ਵਾ ਏਕਂ ਪਬ੍ਬਜ੍ਜਂ ਪਬ੍ਬਜਿਸ੍ਸਾਮੀ’’ਤਿ, ਨਿਗਣ੍ਠਾਰਾਮਂ ਗਨ੍ਤ੍ਵਾ ਨਿਗਣ੍ਠੇ ਪਬ੍ਬਜ੍ਜਂ ਯਾਚਿ. ਅਥ ਨਂ ਤੇ ਆਹਂਸੁ – ‘‘ਕੇਨ ਨਿਯਾਮੇਨ ਪਬ੍ਬਜ੍ਜਾ ਹੋਤੂ’’ਤਿ? ਯਂ ਤੁਮ੍ਹਾਕਂ ਪਬ੍ਬਜ੍ਜਾਯ ਉਤ੍ਤਮਂ, ਤਦੇਵ ਕਰੋਥਾਤਿ. ਤੇ ‘‘ਸਾਧੂ’’ਤਿ ਤਸ੍ਸਾ ਤਾਲਟ੍ਠਿਨਾ ਕੇਸੇ ਲੁਞ੍ਚਿਤ੍ਵਾ ਪਬ੍ਬਾਜੇਸੁਂ. ਕੇਸਾ ਪੁਨ ਵਡ੍ਢਨ੍ਤਾ ਰਾਸਿਰਾਸਿਵਸੇਨ ਕੁਣ੍ਡਲਾਵਤ੍ਤਾ ਹੁਤ੍ਵਾ ਵਡ੍ਢਿਂਸੁ. ਸਾ ਤੇਨੇਵ ਕਾਰਣੇਨ ਕੁਣ੍ਡਲਕੇਸਾ ਨਾਮ ਜਾਤਾ. ਸਾ ਅਤ੍ਤਨੋ ਪਬ੍ਬਜਿਤਟ੍ਠਾਨੇ ਸਬ੍ਬਸਿਪ੍ਪਂ ਉਗ੍ਗਣ੍ਹਿਤ੍ਵਾ ‘‘ਏਤੇਸਂ ਇਤੋ ਉਤ੍ਤਰਿ ਵਿਸੇਸੋ ਨਤ੍ਥੀ’’ਤਿ ਞਤ੍ਵਾ ਗਾਮਨਿਗਮਰਾਜਧਾਨਿਯੋ ਵਿਚਰਨ੍ਤੀ ਯਤ੍ਥ ਯਤ੍ਥ ਪਣ੍ਡਿਤਾ ਅਤ੍ਥਿ, ਤਤ੍ਥ ਤਤ੍ਥ ਗਨ੍ਤ੍ਵਾ ਤੇਸਂ ਜਾਨਨਸਿਪ੍ਪਂ ਸਬ੍ਬਮੇਵ ਉਗ੍ਗਣ੍ਹਾਤਿ. ਅਥਸ੍ਸਾ ਬਹੂਸੁ ਠਾਨੇਸੁ ਸਿਕ੍ਖਿਤਭਾਵੇਨ ਪਟਿਵਾਦਂ ਦਾਤੁਂ ਸਮਤ੍ਥਾ ਨ ਹੋਨ੍ਤਿ. ਸਾ ਅਤ੍ਤਨਾ ਸਦ੍ਧਿਂ ਕਥੇਤੁਂ ਸਮਤ੍ਥਂ ਅਦਿਸ੍ਵਾ ਯਂ ਗਾਮਂ ਵਾ ਨਿਗਮਂ ਵਾ ਪਵਿਸਤਿ, ਤਸ੍ਸ ਦ੍ਵਾਰੇ ਵਾਲੁਕਰਾਸਿਂ ਕਤ੍ਵਾ ਤਤ੍ਥ ਜਮ੍ਬੁਸਾਖਂ ਠਪੇਤਿ. ‘‘ਯੋ ਮਮ ਵਾਦਂ ਆਰੋਪੇਤੁਂ ਸਕ੍ਕੋਤਿ, ਸੋ ਇਮਂ ਸਾਖਂ ਮਦ੍ਦਤੂ’’ਤਿ ਸਮੀਪੇ ਠਿਤਾਨਂ ਦਾਰਕਾਨਂ ਸਞ੍ਞਂ ਦੇਤਿ. ਤਂ ਸਤ੍ਤਾਹਮ੍ਪਿ ਮਦ੍ਦਨ੍ਤਾ ਨ ਹੋਨ੍ਤਿ. ਅਥ ਨਂ ਗਹੇਤ੍ਵਾ ਪਕ੍ਕਮਤਿ.

ਤਸ੍ਮਿਂ ਸਮਯੇ ਅਮ੍ਹਾਕਂ ਭਗਵਾ ਲੋਕੇ ਨਿਬ੍ਬਤ੍ਤਿਤ੍ਵਾ ਸਾਵਤ੍ਥਿਂ ਉਪਨਿਸ੍ਸਾਯ ਜੇਤਵਨੇ ਵਿਹਰਤਿ. ਕੁਣ੍ਡਲਕੇਸਾਪਿ ਖੋ ਅਨੁਪੁਬ੍ਬੇਨ ਸਾਵਤ੍ਥਿਂ ਪਤ੍ਵਾ ਅਨ੍ਤੋਨਗਰਂ ਪਵਿਸਮਾਨਾ ਪੋਰਾਣਕਨਿਯਾਮੇਨੇਵ ਵਾਲੁਕਾਰਾਸਿਮ੍ਹਿ ਸਾਖਂ ਠਪੇਤ੍ਵਾ ਦਾਰਕਾਨਂ ਸਞ੍ਞਂ ਦਤ੍ਵਾ ਪਾਵਿਸਿ. ਤਸ੍ਮਿਂ ਸਮਯੇ ਧਮ੍ਮਸੇਨਾਪਤਿ ਭਿਕ੍ਖੁਸਙ੍ਘੇ ਪਵਿਟ੍ਠੇ ਏਕਕੋਵ ਨਗਰਂ ਪਵਿਸਨ੍ਤੋ ਵਾਲੁਕਾਥੂਪੇ ਜਮ੍ਬੁਸਾਖਂ ਦਿਸ੍ਵਾ ‘‘ਕਸ੍ਮਾ ਅਯਂ ਠਪਿਤਾ’’ਤਿ ਪੁਚ੍ਛਿ. ਦਾਰਕਾ ਤਂ ਕਾਰਣਂ ਅਪਰਿਹਾਪੇਤ੍ਵਾ ਕਥੇਸੁਂ. ਏਵਂ ਸਨ੍ਤੇ ਇਮਂ ਗਹੇਤ੍ਵਾ ਮਦ੍ਦਥ, ਦਾਰਕਾਤਿ. ਤੇਸੁ ਥੇਰਸ੍ਸ ਵਚਨਂ ਸੁਤ੍ਵਾ ਏਕਚ੍ਚੇ ਮਦ੍ਦਿਤੁਂ ਨ ਵਿਸਹਿਂਸੁ, ਏਕਚ੍ਚੇ ਤਂਖਣੇਯੇਵ ਮਦ੍ਦਿਤ੍ਵਾ ਚੁਣ੍ਣਵਿਚੁਣ੍ਣਂ ਅਕਂਸੁ. ਕੁਣ੍ਡਲਕੇਸਾ ਭਤ੍ਤਕਿਚ੍ਚਂ ਕਤ੍ਵਾ ਨਿਕ੍ਖਮਨ੍ਤੀ ਤਂ ਸਾਖਂ ਮਦ੍ਦਿਤਂ ਦਿਸ੍ਵਾ ‘‘ਕਸ੍ਸੇਤਂ ਕਮ੍ਮ’’ਨ੍ਤਿ ਪੁਚ੍ਛਿ. ਅਥਸ੍ਸਾ ਧਮ੍ਮਸੇਨਾਪਤਿਨਾ ਕਾਰਾਪਿਤਭਾਵਂ ਕਥਯਿਂਸੁ. ਸਾ ‘‘ਅਤ੍ਤਨੋ ਥਾਮਂ ਅਜਾਨਨ੍ਤੋ ਇਮਂ ਸਾਖਂ ਮਦ੍ਦਾਪੇਤੁਂ ਨੋ ਵਿਸਹਿਸ੍ਸਤਿ, ਅਦ੍ਧਾ ਮਹਨ੍ਤੋ ਏਸੋ ਭਵਿਸ੍ਸਤਿ. ਅਹਮ੍ਪਿ ਪਨ ਖੁਦ੍ਦਿਕਾ ਭਵਨ੍ਤੀ ਨ ਸੋਭਿਸ੍ਸਾਮਿ, ਅਨ੍ਤੋਗਾਮਮੇਵ ਪਵਿਸਿਤ੍ਵਾ ਪਰਿਸਾਯ ਸਞ੍ਞਂ ਦਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਤਥਾ ਅਕਾਸਿ. ਅਸੀਤਿਕੁਲਸਹਸ੍ਸਨਿਵਾਸੇ ਨਗਰੇ ਸਭਾਗਸਭਾਗਵਸੇਨ ਸਬ੍ਬੇਵ ਸਞ੍ਜਾਨਿਂਸੂਤਿ ਵੇਦਿਤਬ੍ਬਂ.

ਥੇਰੋਪਿ ਭਤ੍ਤਕਿਚ੍ਚਂ ਕਤ੍ਵਾ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸੀਦਿ. ਅਥਾਯਂ ਕੁਣ੍ਡਲਕੇਸਾ ਮਹਾਜਨਪਰਿਵੁਤਾ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਏਕਮਨ੍ਤਂ ਠਤ੍ਵਾ, ‘‘ਭਨ੍ਤੇ, ਤੁਮ੍ਹੇਹਿ ਸਾਖਾ ਮਦ੍ਦਾਪਿਤਾ’’ਤਿ ਪੁਚ੍ਛਿ. ਆਮ, ਮਯਾ ਮਦ੍ਦਾਪਿਤਾਤਿ. ਏਵਂ ਸਨ੍ਤੇ ਤੁਮ੍ਹੇਹਿ ਸਦ੍ਧਿਂ ਅਮ੍ਹਾਕਂ ਵਾਦੋ ਹੋਤੁ, ਭਨ੍ਤੇਤਿ. ਹੋਤੁ, ਭਦ੍ਦੇਤਿ. ਕਸ੍ਸ ਪੁਚ੍ਛਾ ਹੋਤੁ, ਕਸ੍ਸ ਵਿਸ੍ਸਜ੍ਜਨਨ੍ਤਿ? ਪੁਚ੍ਛਾ ਨਾਮ ਅਮ੍ਹਾਕਂ ਪਤ੍ਤਾ, ਤ੍ਵਂ ਪਨ ਤੁਯ੍ਹਂ ਜਾਨਨਕਂ ਪੁਚ੍ਛਾਤਿ. ਸਾ ਥੇਰੇਨ ਦਿਨ੍ਨਅਨੁਮਤਿਯਾ ਸਬ੍ਬਮੇਵ ਅਤ੍ਤਨੋ ਜਾਨਨਕਂ ਵਾਦਂ ਪੁਚ੍ਛਿ, ਥੇਰੋ ਸਬ੍ਬਂ ਵਿਸ੍ਸਜ੍ਜੇਸਿ. ਸਾ ਸਬ੍ਬਂ ਪੁਚ੍ਛਿਤ੍ਵਾ ਤੁਣ੍ਹੀ ਅਹੋਸਿ. ਅਥ ਨਂ ਥੇਰੋ ਆਹ – ‘‘ਤਯਾ ਬਹੁਂ ਪੁਚ੍ਛਿਤਂ, ਮਯਮ੍ਪਿ ਏਕਂ ਪਞ੍ਹਂ ਪੁਚ੍ਛਾਮਾ’’ਤਿ. ਪੁਚ੍ਛਥ, ਭਨ੍ਤੇਤਿ. ਏਕਂ ਨਾਮ ਕਿਨ੍ਤਿ? ਕੁਣ੍ਡਲਕੇਸਾ ‘‘ਨ ਜਾਨਾਮਿ, ਭਨ੍ਤੇ’’ਤਿ ਆਹ. ਤ੍ਵਂ ਏਤ੍ਤਕਮ੍ਪਿ ਨ ਜਾਨਾਸਿ, ਅਞ੍ਞਂ ਕਿਂ ਜਾਨਿਸ੍ਸਸੀਤਿ? ਸਾ ਥੇਰਸ੍ਸ ਪਾਦੇਸੁ ਪਤਿਤ੍ਵਾ ‘‘ਤੁਮ੍ਹਾਕਂ ਸਰਣਂ ਗਚ੍ਛਾਮਿ, ਭਨ੍ਤੇ’’ਤਿ ਆਹ. ਮਮ ਸਰਣਗਮਨਕਮ੍ਮਂ ਨਤ੍ਥਿ, ਸਦੇਵਕੇ ਲੋਕੇ ਅਗ੍ਗਪੁਗ੍ਗਲੋ ਧੁਰਵਿਹਾਰੇ ਵਸਤਿ, ਤਂ ਸਰਣਂ ਗਚ੍ਛਾਹੀਤਿ. ਸਾ ‘‘ਏਵਂ ਕਰਿਸ੍ਸਾਮਿ, ਭਨ੍ਤੇ’’ਤਿ ਸਾਯਨ੍ਹਸਮਯੇ ਸਤ੍ਥੁ ਧਮ੍ਮਦੇਸਨਾਵੇਲਾਯ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਸਤ੍ਥਾ ਤਸ੍ਸਾ ਮਦ੍ਦਿਤਸਙ੍ਖਾਰਾਯ ਚਰਿਯਾਵਸੇਨ ਧਮ੍ਮਪਦੇ ਇਮਂ ਗਾਥਮਾਹ –

‘‘ਸਹਸ੍ਸਮਪਿ ਚੇ ਗਾਥਾ, ਅਨਤ੍ਥਪਦਸਂਹਿਤਾ;

ਏਕਂ ਗਾਥਾਪਦਂ ਸੇਯ੍ਯੋ, ਯਂ ਸੁਤ੍ਵਾ ਉਪਸਮ੍ਮਤੀ’’ਤਿ. (ਧ. ਪ. ੧੦੧);

ਸਾ ਗਾਥਾਪਰਿਯੋਸਾਨੇ ਯਥਾਠਿਤਾਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਪਬ੍ਬਜ੍ਜਂ ਯਾਚਿ. ਸਤ੍ਥਾ ਤਸ੍ਸਾ ਪਬ੍ਬਜ੍ਜਂ ਸਮ੍ਪਟਿਚ੍ਛਿ. ਸਾ ਭਿਕ੍ਖੁਨੁਪਸ੍ਸਯਂ ਗਨ੍ਤ੍ਵਾ ਪਬ੍ਬਜਿ. ਅਪਰਭਾਗੇ ਚਤੁਪਰਿਸਮਜ੍ਝੇ ਕਥਾ ਉਦਪਾਦਿ – ‘‘ਮਹਨ੍ਤਾ ਵਤਾਯਂ ਭਦ੍ਦਾ ਕੁਣ੍ਡਲਕੇਸਾ, ਯਾ ਚਤੁਪ੍ਪਦਿਕਗਾਥਾਵਸਾਨੇ ਅਰਹਤ੍ਤਂ ਪਤ੍ਤਾ’’ਤਿ. ਸਤ੍ਥਾ ਤਂ ਕਾਰਣਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਥੇਰਿਂ ਖਿਪ੍ਪਾਭਿਞ੍ਞਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਭਦ੍ਦਾਕਾਪਿਲਾਨੀਥੇਰੀਵਤ੍ਥੁ

੨੪੪. ਦਸਮੇ ਪੁਬ੍ਬੇਨਿਵਾਸਨ੍ਤਿ ਪੁਬ੍ਬੇ ਨਿਵੁਤ੍ਥਕ੍ਖਨ੍ਧਸਨ੍ਤਾਨਂ ਅਨੁਸ੍ਸਰਨ੍ਤੀਨਂ ਭਦ੍ਦਾ ਕਾਪਿਲਾਨੀ ਅਗ੍ਗਾਤਿ ਦਸ੍ਸੇਤਿ. ਸਾ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਸਤ੍ਥੁ ਧਮ੍ਮਦੇਸਨਂ ਸੁਣਨ੍ਤੀ ਸਤ੍ਥਾਰਂ ਏਕਂ ਭਿਕ੍ਖੁਨਿਂ ਪੁਬ੍ਬੇਨਿਵਾਸਂ ਅਨੁਸ੍ਸਰਨ੍ਤੀਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਾ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਅਨੁਪ੍ਪਨ੍ਨੇ ਬੁਦ੍ਧੇ ਬਾਰਾਣਸਿਯਂ ਕੁਲਗੇਹੇ ਪਟਿਸਨ੍ਧਿਂ ਗਣ੍ਹਿਤ੍ਵਾ ਅਤ੍ਤਨੋ ਸਾਮਿਭਗਿਨਿਯਾ ਸਦ੍ਧਿਂ ਕਲਹਂ ਕਰੋਨ੍ਤੀ ਤਾਯ ਪਚ੍ਚੇਕਬੁਦ੍ਧਸ੍ਸ ਪਿਣ੍ਡਪਾਤੇ ਦਿਨ੍ਨੇ, ‘‘ਅਯਂ ਇਮਸ੍ਸ ਪਿਣ੍ਡਪਾਤਂ ਦਤ੍ਵਾ ਅਤ੍ਤਨੋ ਵਸਂ ਵਤ੍ਤੇਤੀ’’ਤਿ ਪਚ੍ਚੇਕਬੁਦ੍ਧਸ੍ਸ ਹਤ੍ਥਤੋ ਪਤ੍ਤਂ ਗਣ੍ਹਿਤ੍ਵਾ ਭਤ੍ਤਂ ਛਡ੍ਡੇਤ੍ਵਾ ਕਲਲਸ੍ਸ ਪੂਰੇਤ੍ਵਾ ਅਦਾਸਿ. ਮਹਾਜਨੋ ‘‘ਬਾਲਾ ਅਯ’’ਨ੍ਤਿ ਗਰਹਿਤ੍ਵਾ, ‘‘ਯਾਯ ਤੇ ਸਦ੍ਧਿਂ ਕਲਹੋ ਕਤੋ, ਤਸ੍ਸਾ ਕਿਞ੍ਚਿ ਨ ਕਰੋਸਿ, ਪਚ੍ਚੇਕਬੁਦ੍ਧੋ ਤੇ ਕਿਂ ਅਪਰਜ੍ਝਤੀ’’ਤਿ ਆਹ. ਸਾ ਤੇਸਂ ਵਚਨੇਨ ਲਜ੍ਜਾਯਮਾਨਾ ਪੁਨ ਪਤ੍ਤਂ ਗਹੇਤ੍ਵਾ ਕਲਲਂ ਹਾਰੇਤ੍ਵਾ ਧੋਵਿਤ੍ਵਾ ਗਨ੍ਧਚੁਣ੍ਣੇਨ ਉਬ੍ਬਟ੍ਟੇਤ੍ਵਾ ਚਤੁਮਧੁਰਸ੍ਸ ਪੂਰੇਤ੍ਵਾ ਉਪਰਿ ਆਸਿਤ੍ਤੇਨ ਪਦੁਮਗਬ੍ਭਵਣ੍ਣੇਨ ਸਪ੍ਪਿਨਾ ਵਿਜ੍ਜੋਤਮਾਨਂ ਪਚ੍ਚੇਕਬੁਦ੍ਧਸ੍ਸ ਹਤ੍ਥੇ ਠਪੇਤ੍ਵਾ ‘‘ਯਥਾ ਅਯਂ ਪਿਣ੍ਡਪਾਤੋ ਓਭਾਸਜਾਤੋ, ਏਵਂ ਓਭਾਸਜਾਤਂ ਮੇ ਸਰੀਰਂ ਹੋਤੂ’’ਤਿ ਪਤ੍ਥਨਂ ਪਟ੍ਠਪੇਸੀਤਿ ਸਬ੍ਬਂ ਮਹਾਕਸ੍ਸਪਤ੍ਥੇਰਸ੍ਸ ਵਤ੍ਥੁਮ੍ਹਿ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਮਹਾਕਸ੍ਸਪਤ੍ਥੇਰੋ ਪਨ ਦਕ੍ਖਿਣਮਗ੍ਗਂ ਗਹੇਤ੍ਵਾ ਦਸਬਲਸ੍ਸ ਸਨ੍ਤਿਕਂ ਬਹੁਪੁਤ੍ਤਕਨਿਗ੍ਰੋਧਮੂਲਂ ਗਤੋ, ਅਯਂ ਭਦ੍ਦਾ ਕਾਪਿਲਾਨੀ ਵਾਮਮਗ੍ਗਂ ਗਣ੍ਹਿਤ੍ਵਾ ਮਾਤੁਗਾਮਸ੍ਸ ਪਬ੍ਬਜ੍ਜਾਯ ਅਨਨੁਞ੍ਞਾਤਭਾਵੇਨ ਪਰਿਬ੍ਬਾਜਿਕਾਰਾਮਂ ਅਗਮਾਸਿ. ਯਦਾ ਪਨ ਮਹਾਪਜਾਪਤਿਗੋਤਮੀ ਪਬ੍ਬਜ੍ਜਞ੍ਚ ਉਪਸਮ੍ਪਦਞ੍ਚ ਲਭਿ, ਤਦਾ ਸਾ ਥੇਰੀ ਥੇਰਿਯਾ ਸਨ੍ਤਿਕੇ ਪਬ੍ਬਜ੍ਜਞ੍ਚ ਉਪਸਮ੍ਪਦਞ੍ਚ ਲਭਿਤ੍ਵਾ ਅਪਰਭਾਗੇ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੀ ਅਰਹਤ੍ਤਂ ਪਤ੍ਵਾ ਪੁਬ੍ਬੇਨਿਵਾਸਞਾਣੇ ਚਿਣ੍ਣਵਸੀ ਅਹੋਸਿ. ਅਥ ਸਤ੍ਥਾ ਜੇਤਵਨੇ ਨਿਸੀਦਿਤ੍ਵਾ ਭਿਕ੍ਖੁਨਿਯੋ ਪਟਿਪਾਟਿਯਾ ਠਾਨਨ੍ਤਰੇਸੁ ਠਪੇਨ੍ਤੋ ਇਮਂ ਥੇਰਿਂ ਪੁਬ੍ਬੇਨਿਵਾਸਂ ਅਨੁਸ੍ਸਰਨ੍ਤੀਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਭਦ੍ਦਾਕਚ੍ਚਾਨਾਥੇਰੀਵਤ੍ਥੁ

੨੪੫. ਏਕਾਦਸਮੇ ਮਹਾਭਿਞ੍ਞਾਪ੍ਪਤ੍ਤਾਨਨ੍ਤਿ ਮਹਤਿਯੋ ਅਭਿਞ੍ਞਾਯੋ ਪਤ੍ਤਾਨਂ, ਭਦ੍ਦਾ ਕਚ੍ਚਾਨਾ, ਨਾਮ ਅਗ੍ਗਾਤਿ ਦਸ੍ਸੇਤਿ. ਏਕਸ੍ਸ ਹਿ ਬੁਦ੍ਧਸ੍ਸ ਚਤ੍ਤਾਰੋਵ ਜਨਾ ਮਹਾਭਿਞ੍ਞਾ ਹੋਨ੍ਤਿ, ਨ ਅਵਸੇਸਸਾਵਕਾ. ਅਵਸੇਸਸਾਵਕਾ ਹਿ ਕਪ੍ਪਸਤਸਹਸ੍ਸਮੇਵ ਅਨੁਸ੍ਸਰਿਤੁਂ ਸਕ੍ਕੋਨ੍ਤਿ, ਨ ਤਤੋ ਪਰਂ. ਮਹਾਭਿਞ੍ਞਾਪ੍ਪਤ੍ਤਾ ਪਨ ਕਪ੍ਪਸਤਸਹਸ੍ਸਾਧਿਕਂ ਅਸਙ੍ਖ੍ਯੇਯ੍ਯਂ ਅਨੁਸ੍ਸਰਨ੍ਤਿ. ਅਮ੍ਹਾਕਮ੍ਪਿ ਸਤ੍ਥੁ ਸਾਸਨੇ ਦ੍ਵੇ ਅਗ੍ਗਸਾਵਕਾ ਬਾਕੁਲਤ੍ਥੇਰੋ ਭਦ੍ਦਾ ਕਚ੍ਚਾਨਾਤਿ ਇਮੇ ਚਤ੍ਤਾਰੋ ਏਤ੍ਤਕਂ ਅਨੁਸ੍ਸਰਿਤੁਂ ਸਕ੍ਖਿਂਸੁ. ਤਸ੍ਮਾ ਅਯਂ ਥੇਰੀ ਮਹਾਭਿਞ੍ਞਾਪ੍ਪਤ੍ਤਾਨਂ ਅਗ੍ਗਾ ਨਾਮ ਜਾਤਾ. ਭਦ੍ਦਾ ਕਚ੍ਚਾਨਾਤਿ ਤਸ੍ਸਾ ਨਾਮਂ. ਭਦ੍ਦਕਞ੍ਚਨਸ੍ਸ ਹਿ ਉਤ੍ਤਮਸੁਵਣ੍ਣਸ੍ਸ ਵਿਯ ਤਸ੍ਸਾ ਸਰੀਰਵਣ੍ਣੋ ਅਹੋਸਿ, ਸਾ ਤਸ੍ਮਾ ਭਦ੍ਦਕਞ੍ਚਨਾਤਿ ਨਾਮਂ ਲਭਿ, ਸਾ ਪਚ੍ਛਾ ਕਚ੍ਚਾਨਾਤ੍ਵੇਵ ਸਙ੍ਖਂ ਗਤਾ. ਰਾਹੁਲਮਾਤਾਯੇਤਂ ਅਧਿਵਚਨਂ.

ਸਾ ਹਿ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਪਟਿਸਨ੍ਧਿਂ ਗਹੇਤ੍ਵਾ ਅਪਰਭਾਗੇ ਸਤ੍ਥੁ ਧਮ੍ਮਕਥਂ ਸੁਣਨ੍ਤੀ ਸਤ੍ਥਾਰਂ ਏਕਂ ਭਿਕ੍ਖੁਨਿਂ ਮਹਾਭਿਞ੍ਞਾਪ੍ਪਤ੍ਤਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਾ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸੁਪ੍ਪਬੁਦ੍ਧਸਕ੍ਕਸ੍ਸ ਗੇਹੇ ਪਟਿਸਨ੍ਧਿਂ ਗਣ੍ਹਿ, ਭਦ੍ਦਾ ਕਚ੍ਚਾਨਾਤਿਸ੍ਸਾ ਨਾਮਂ ਅਕਂਸੁ.

ਸਾ ਵਯਪ੍ਪਤ੍ਤਾ ਬੋਧਿਸਤ੍ਤਸ੍ਸ ਗੇਹਂ ਅਗਮਾਸਿ. ਸਾ ਅਪਰਭਾਗੇ ਰਾਹੁਲਕੁਮਾਰਂ ਨਾਮ ਪੁਤ੍ਤਂ ਵਿਜਾਯਿ. ਤਸ੍ਸ ਜਾਤਦਿਵਸੇਵ ਬੋਧਿਸਤ੍ਤੋ ਨਿਕ੍ਖਮਿਤ੍ਵਾ ਬੋਧਿਮਣ੍ਡੇ ਸਬ੍ਬਞ੍ਞੁਤਂ ਪਤ੍ਵਾ ਲੋਕਾਨੁਗ੍ਗਹਂ ਕਰੋਨ੍ਤੋ ਅਨੁਪੁਬ੍ਬੇਨ ਕਪਿਲਵਤ੍ਥੁਂ ਆਗਮ੍ਮ ਞਾਤੀਨਂ ਸਙ੍ਗਹਂ ਅਕਾਸਿ. ਅਪਰਭਾਗੇ ਪਰਿਨਿਬ੍ਬੁਤੇ ਸੁਦ੍ਧੋਦਨਮਹਾਰਾਜੇ ਮਹਾਪਜਾਪਤਿਗੋਤਮੀ ਪਞ੍ਚਹਿ ਮਾਤੁਗਾਮਸਤੇਹਿ ਸਦ੍ਧਿਂ ਸਤ੍ਥੁ ਸਨ੍ਤਿਕੇ ਪਬ੍ਬਜਿ. ਰਾਹੁਲਮਾਤਾਪਿ ਜਨਪਦਕਲ੍ਯਾਣੀਪਿ ਥੇਰਿਯਾ ਸਨ੍ਤਿਕਂ ਗਨ੍ਤ੍ਵਾ ਪਬ੍ਬਜਿ. ਸਾ ਪਬ੍ਬਜਿਤਕਾਲਤੋ ਪਟ੍ਠਾਯ ਭਦ੍ਦਕਚ੍ਚਾਨਤ੍ਥੇਰੀਤ੍ਵੇਵ ਪਾਕਟਾ ਅਹੋਸਿ. ਸਾ ਅਪਰਭਾਗੇ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਤ੍ਵਾ ਅਭਿਞ੍ਞਾਸੁ ਚਿਣ੍ਣਵਸੀ ਅਹੋਸਿ, ਏਕਪਲ੍ਲਙ੍ਕੇਨ ਨਿਸਿਨ੍ਨਾ ਏਕਾਵਜ੍ਜਨੇਨ ਕਪ੍ਪਸਤਸਹਸ੍ਸਾਧਿਕਂ ਅਸਙ੍ਖ੍ਯੇਯ੍ਯਂ ਅਨੁਸ੍ਸਰਤਿ. ਤਸ੍ਸਾ ਤਸ੍ਮਿਂ ਗੁਣੇ ਪਾਕਟੇ ਜਾਤੇ ਸਤ੍ਥਾ ਜੇਤਵਨੇ ਨਿਸਿਨ੍ਨੋ ਭਿਕ੍ਖੁਨਿਯੋ ਪਟਿਪਾਟਿਯਾ ਠਾਨਨ੍ਤਰੇ ਠਪੇਨ੍ਤੋ ਇਮਂ ਥੇਰਿਂ ਮਹਾਭਿਞ੍ਞਾਪ੍ਪਤ੍ਤਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਕਿਸਾਗੋਤਮੀਥੇਰੀਵਤ੍ਥੁ

੨੪੬. ਦ੍ਵਾਦਸਮੇ ਲੂਖਚੀਵਰਧਰਾਨਨ੍ਤਿ ਤੀਹਿ ਲੂਖੇਹਿ ਸਮਨ੍ਨਾਗਤਂ ਪਂਸੁਕੂਲਂ ਧਾਰੇਨ੍ਤੀਨਂ, ਕਿਸਾਗੋਤਮੀ, ਅਗ੍ਗਾਤਿ ਦਸ੍ਸੇਤਿ. ਗੋਤਮੀਤਿ ਤਸ੍ਸਾ ਨਾਮਂ, ਥੋਕਂ ਕਿਸਧਾਤੁਕਤ੍ਤਾ ਪਨ ਕਿਸਾਗੋਤਮੀਤਿ ਵੁਚ੍ਚਤਿ. ਅਯਮ੍ਪਿ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਸਤ੍ਥੁ ਧਮ੍ਮਦੇਸਨਂ ਸੁਣਨ੍ਤੀ ਸਤ੍ਥਾਰਂ ਏਕਂ ਭਿਕ੍ਖੁਨਿਂ ਲੂਖਚੀਵਰਧਰਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਾ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਦੁਗ੍ਗਤਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤਕਾਲੇ ਏਕਂ ਕੁਲਂ ਅਗਮਾਸਿ. ਤਤ੍ਥ ਨਂ ‘‘ਦੁਗ੍ਗਤਕੁਲਸ੍ਸ ਧੀਤਾ’’ਤਿ ਪਰਿਭਵਿਂਸੁ.

ਸਾ ਅਪਰਭਾਗੇ ਪੁਤ੍ਤਂ ਵਿਜਾਯਿ, ਅਥਸ੍ਸਾ ਸਮ੍ਮਾਨਮਕਂਸੁ. ਸੋ ਪਨਸ੍ਸਾ ਦਾਰਕੋ ਆਧਾਵਿਤ੍ਵਾ ਪਰਿਧਾਵਿਤ੍ਵਾ ਕੀਲ਼ਨਵਯੇ ਠਿਤੋ ਕਾਲਮਕਾਸਿ, ਤਸ੍ਸਾ ਸੋਕੋ ਉਦਪਾਦਿ. ਸਾ ‘‘ਅਹਂ ਇਮਸ੍ਮਿਂਯੇਵ ਗੇਹੇ ਹਤਲਾਭਸਕ੍ਕਾਰਾ ਹੁਤ੍ਵਾ ਪੁਤ੍ਤਸ੍ਸ ਜਾਤਕਾਲਤੋ ਪਟ੍ਠਾਯ ਸਕ੍ਕਾਰਂ ਪਾਪੁਣਿਂ, ਇਮੇ ਮਯ੍ਹਂ ਪੁਤ੍ਤਂ ਬਹਿ ਛਡ੍ਡੇਤੁਮ੍ਪਿ ਵਾਯਮੇਯ੍ਯੁ’’ਨ੍ਤਿ ਪੁਤ੍ਤਂ ਅਙ੍ਕੇਨਾਦਾਯ ‘‘ਪੁਤ੍ਤਸ੍ਸ ਮੇ ਭੇਸਜ੍ਜਂ ਦੇਥਾ’’ਤਿ ਗੇਹਦ੍ਵਾਰਪਟਿਪਾਟਿਯਾ ਵਿਚਰਤਿ. ਦਿਟ੍ਠਦਿਟ੍ਠਟ੍ਠਾਨੇ ਮਨੁਸ੍ਸਾ ‘‘ਕਤ੍ਥ ਤੇ ਮਤਕਸ੍ਸ ਭੇਸਜ੍ਜਂ ਦਿਟ੍ਠਪੁਬ੍ਬ’’ਨ੍ਤਿ ਪਾਣਿਂ ਪਹਰਿਤ੍ਵਾ ਪਰਿਹਾਸਂ ਕਰੋਨ੍ਤਿ. ਸਾ ਤੇਸਂ ਕਥਾਯ ਨੇਵ ਸਞ੍ਞਤ੍ਤਿਂ ਗਚ੍ਛਤਿ. ਅਥ ਨਂ ਏਕੋ ਪਣ੍ਡਿਤਪੁਰਿਸੋ ਦਿਸ੍ਵਾ, ‘‘ਅਯਂ ਪੁਤ੍ਤਸੋਕੇਨ ਚਿਤ੍ਤਵਿਕ੍ਖੇਪਂ ਪਤ੍ਤਾ ਭਵਿਸ੍ਸਤਿ, ਏਤਿਸ੍ਸਾ ਪਨ ਭੇਸਜ੍ਜਂ ਨ ਅਞ੍ਞੋ ਜਾਨਿਸ੍ਸਤਿ, ਦਸਬਲੋਵ ਜਾਨਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਏਵਮਾਹ – ‘‘ਅਮ੍ਮ, ਤਵ ਪੁਤ੍ਤਸ੍ਸ ਭੇਸਜ੍ਜਂ ਅਞ੍ਞੋ ਜਾਨਨ੍ਤੋ ਨਾਮ ਨਤ੍ਥਿ, ਸਦੇਵਕੇ ਪਨ ਲੋਕੇ ਅਗ੍ਗਪੁਗ੍ਗਲੋ ਦਸਬਲੋ ਧੁਰਵਿਹਾਰੇ ਵਸਤਿ, ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪੁਚ੍ਛਾਹੀ’’ਤਿ. ਸਾ ‘‘ਸਚ੍ਚਂ ਪੁਰਿਸੋ ਕਥੇਤੀ’’ਤਿ ਪੁਤ੍ਤਮਾਦਾਯ ਤਥਾਗਤਸ੍ਸ ਬੁਦ੍ਧਾਸਨੇ ਨਿਸਿਨ੍ਨਵੇਲਾਯ ਪਰਿਸਪਰਿਯਨ੍ਤੇ ਠਤ੍ਵਾ ‘‘ਪੁਤ੍ਤਸ੍ਸ ਮੇ ਭੇਸਜ੍ਜਂ ਦੇਥ ਭਗਵਾ’’ਤਿ ਆਹ.

ਸਤ੍ਥਾ ਤਸ੍ਸਾ ਉਪਨਿਸ੍ਸਯਂ ਦਿਸ੍ਵਾ ‘‘ਭਦ੍ਦਕਂ ਤੇ ਗੋਤਮਿ ਕਤਂ ਭੇਸਜ੍ਜਤ੍ਥਾਯ ਇਧਾਗਚ੍ਛਨ੍ਤਿਯਾ, ਗਚ੍ਛ ਨਗਰਂ ਪਵਿਸਿਤ੍ਵਾ ਕੋਟਿਤੋ ਪਟ੍ਠਾਯ ਸਕਲਨਗਰਂ ਚਰਿਤ੍ਵਾ ਯਸ੍ਮਿਂ ਗੇਹੇ ਕੋਚਿ ਮਤਪੁਬ੍ਬੋ ਨਤ੍ਥਿ, ਤਤੋ ਸਿਦ੍ਧਤ੍ਥਕਂ ਆਹਰਾ’’ਤਿ ਆਹ. ਸਾ ‘‘ਸਾਧੁ, ਭਨ੍ਤੇ’’ਤਿ ਤੁਟ੍ਠਮਾਨਸਾ ਅਨ੍ਤੋਨਗਰਂ ਪਵਿਸਿਤ੍ਵਾ ਪਠਮਗੇਹੇਯੇਵ ‘‘ਦਸਬਲੋ ਮਮ ਪੁਤ੍ਤਸ੍ਸ ਭੇਸਜ੍ਜਤ੍ਥਾਯ ਸਿਦ੍ਧਤ੍ਥਕਂ ਆਹਰਾਪੇਤਿ, ਸਿਦ੍ਧਤ੍ਥਕਂ ਮੇ ਦੇਥਾ’’ਤਿ ਆਹ. ‘‘ਹਨ੍ਦ ਗੋਤਮੀ’’ਤਿ ਨੀਹਰਿਤ੍ਵਾ ਅਦਂਸੁ. ਅਹਂ ਏਵਂ ਗਹੇਤੁਂ ਨ ਸਕ੍ਕੋਮਿ, ਇਮਸ੍ਮਿਂ ਗੇਹੇ ਕੋਚਿ ਮਤਪੁਬ੍ਬੋ ਨਾਮ ਨਤ੍ਥੀਤਿ? ਕਿਂ ਵਦੇਸਿ ਗੋਤਮਿ, ਕੋ ਇਧ ਮਤਕੇ ਗਣੇਤੁਂ ਸਕ੍ਕੋਤੀਤਿ? ‘‘ਤੇਨ ਹਿ ਅਲਂ ਨਾਹਂ ਗਣ੍ਹਿਸ੍ਸਾਮਿ, ਦਸਬਲੋ ਮਂ ਯਤ੍ਥ ਮਤਪੁਬ੍ਬੋ ਨਤ੍ਥਿ, ਤਤੋ ਨਂ ਗਣ੍ਹਾਪੇਤੀ’’ਤਿ ਆਹ. ਸਾ ਇਮਿਨਾਵ ਨਿਯਾਮੇਨ ਤਤਿਯਘਰਂ ਗਨ੍ਤ੍ਵਾ ਚਿਨ੍ਤੇਸਿ – ‘‘ਸਕਲਨਗਰੇ ਅਯਮੇਵ ਨਿਯਾਮੋ ਭਵਿਸ੍ਸਤਿ, ਇਦਂ ਹਿਤਾਨੁਕਮ੍ਪਕੇਨ ਬੁਦ੍ਧੇਨ ਦਿਟ੍ਠਂ ਭਵਿਸ੍ਸਤੀ’’ਤਿ ਸਂਵੇਗਂ ਲਭਿਤ੍ਵਾ ਤਤੋਵ ਬਹਿ ਨਿਕ੍ਖਮਿਤ੍ਵਾ ਆਮਕਸੁਸਾਨਂ ਗਨ੍ਤ੍ਵਾ ਪੁਤ੍ਤਂ ਹਤ੍ਥੇਨ ਗਹੇਤ੍ਵਾ, ‘‘ਪੁਤ੍ਤਕ, ਅਹਂ ਇਮਂ ਮਰਣਂ ਤਵੇਵ ਉਪ੍ਪਨ੍ਨਨ੍ਤਿ ਚਿਨ੍ਤੇਸਿਂ, ਨ ਪਨੇਤਂ ਤਵੇਵ, ਮਹਾਜਨਸਾਧਾਰਣੋ ਏਸ ਧਮ੍ਮੋ’’ਤਿ ਵਤ੍ਵਾ ਪੁਤ੍ਤਂ ਆਮਕਸੁਸਾਨੇ ਛਡ੍ਡੇਤ੍ਵਾ ਇਮਂ ਗਾਥਮਾਹ –

‘‘ਨ ਗਾਮਧਮ੍ਮੋ ਨੋ ਨਿਗਮਸ੍ਸ ਧਮ੍ਮੋ,

ਨ ਚਾਪਿਯਂ ਏਕਕੁਲਸ੍ਸ ਧਮ੍ਮੋ;

ਸਬ੍ਬਸ੍ਸ ਲੋਕਸ੍ਸ ਸਦੇਵਕਸ੍ਸ,

ਏਸੇਵ ਧਮ੍ਮੋ ਯਦਿਦਂ ਅਨਿਚ੍ਚਤਾ’’ਤਿ. (ਅਪ. ਥੇਰੀ ੨.੩.੮੨);

ਏਵਞ੍ਚ ਪਨ ਵਤ੍ਵਾ ਸਤ੍ਥੁ ਸਨ੍ਤਿਕਂ ਅਗਮਾਸਿ. ਅਥ ਨਂ ਸਤ੍ਥਾ ‘‘ਲਦ੍ਧੋ ਤੇ, ਗੋਤਮਿ, ਸਿਦ੍ਧਤ੍ਥਕੋ’’ਤਿ ਆਹ. ਨਿਟ੍ਠਿਤਂ, ਭਨ੍ਤੇ, ਸਿਦ੍ਧਤ੍ਥਕੇਨ ਕਮ੍ਮਂ, ਪਤਿਟ੍ਠਂ ਪਨ ਮੇ ਦੇਥਾਤਿ ਆਹ. ਅਥਸ੍ਸਾ ਸਤ੍ਥਾ ਧਮ੍ਮਪਦੇ ਇਮਂ ਗਾਥਮਾਹ –

‘‘ਤਂ ਪੁਤ੍ਤਪਸੁਸਮ੍ਮਤ੍ਤਂ, ਬ੍ਯਾਸਤ੍ਤਮਨਸਂ ਨਰਂ;

ਸੁਤ੍ਤਂ ਗਾਮਂ ਮਹੋਘੋਵ, ਮਚ੍ਚੁ ਆਦਾਯ ਗਚ੍ਛਤੀ’’ਤਿ. (ਧ. ਪ. ੨੮੭);

ਸਾ ਗਾਥਾਪਰਿਯੋਸਾਨੇ ਯਥਾਠਿਤਾਵ ਸੋਤਾਪਤ੍ਤਿਫਲੇ ਪਤਿਟ੍ਠਾਯ ਪਬ੍ਬਜ੍ਜਂ ਯਾਚਿ, ਸਤ੍ਥਾ ਪਬ੍ਬਜ੍ਜਂ ਅਨੁਜਾਨਿ. ਸਾ ਤਿਕ੍ਖਤ੍ਤੁਂ ਸਤ੍ਥਾਰਂ ਪਦਕ੍ਖਿਣਂ ਕਤ੍ਵਾ ਵਨ੍ਦਿਤ੍ਵਾ ਭਿਕ੍ਖੁਨਿਉਪਸ੍ਸਯਂ ਗਨ੍ਤ੍ਵਾ ਪਬ੍ਬਜ੍ਜਞ੍ਚ ਉਪਸਮ੍ਪਦਞ੍ਚ ਲਭਿਤ੍ਵਾ ਨਚਿਰਸ੍ਸੇਵ ਯੋਨਿਸੋਮਨਸਿਕਾਰੇ ਕਮ੍ਮਂ ਕਰੋਨ੍ਤੀ ਵਿਪਸ੍ਸਨਂ ਵਡ੍ਢੇਸਿ. ਅਥਸ੍ਸਾ ਸਤ੍ਥਾ ਇਮਂ ਓਭਾਸਗਾਥਮਾਹ –

‘‘ਯੋ ਚ ਵਸ੍ਸਸਤਂ ਜੀਵੇ, ਅਪਸ੍ਸਂ ਅਮਤਂ ਪਦਂ;

ਏਕਾਹਂ ਜੀਵਿਤਂ ਸੇਯ੍ਯੋ, ਪਸ੍ਸਤੋ ਅਮਤਂ ਪਦ’’ਨ੍ਤਿ. (ਧ. ਪ. ੧੧੪);

ਸਾ ਗਾਥਾਪਰਿਯੋਸਾਨੇ ਅਰਹਤ੍ਤਂ ਪਤ੍ਤਾ ਪਰਿਕ੍ਖਾਰਵਲਞ੍ਜੇ ਪਰਮੁਕ੍ਕਟ੍ਠਾ ਹੁਤ੍ਵਾ ਤੀਹਿ ਲੂਖੇਹਿ ਸਮਨ੍ਨਾਗਤਂ ਚੀਵਰਂ ਪਾਰੁਪਿਤ੍ਵਾ ਵਿਚਰਿ. ਅਪਰਭਾਗੇ ਸਤ੍ਥਾ ਜੇਤਵਨੇ ਨਿਸਿਨ੍ਨੋ ਭਿਕ੍ਖੁਨਿਯੋ ਪਟਿਪਾਟਿਯਾ ਠਾਨਨ੍ਤਰੇ ਠਪੇਨ੍ਤੋ ਇਮਂ ਥੇਰਿਂ ਲੂਖਚੀਵਰਧਰਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਸਿਙ੍ਗਾਲਕਮਾਤਾਥੇਰੀਵਤ੍ਥੁ

੨੪੭. ਤੇਰਸਮੇ ਸਦ੍ਧਾਧਿਮੁਤ੍ਤਾਨਨ੍ਤਿ ਸਦ੍ਧਾਲਕ੍ਖਣੇ ਅਭਿਨਿਵਿਟ੍ਠਾਨਂ, ਸਿਙ੍ਗਾਲਕਮਾਤਾ, ਅਗ੍ਗਾਤਿ ਦਸ੍ਸੇਤਿ. ਅਯਂ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਘਰੇ ਨਿਬ੍ਬਤ੍ਤਾ ਸਤ੍ਥੁ ਧਮ੍ਮਕਥਂ ਸੁਣਨ੍ਤੀ ਸਤ੍ਥਾਰਂ ਏਕਂ ਭਿਕ੍ਖੁਨਿਂ ਸਦ੍ਧਾਧਿਮੁਤ੍ਤਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਾ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹਨਗਰੇ ਸੇਟ੍ਠਿਕੁਲੇ ਨਿਬ੍ਬਤ੍ਤਾ ਸਮਾਨਜਾਤਿਕਂ ਕੁਲਂ ਗਨ੍ਤ੍ਵਾ ਏਕਂ ਪੁਤ੍ਤਂ ਵਿਜਾਯਿ, ਤਸ੍ਸ ਸਿਙ੍ਗਾਲਕਕੁਮਾਰੋਤਿ ਨਾਮਂ ਅਕਂਸੁ. ਸਾਪਿ ਤੇਨੇਵ ਕਾਰਣੇਨ ਸਿਙ੍ਗਾਲਕਮਾਤਾ ਨਾਮ ਜਾਤਾ. ਸਾ ਏਕਦਿਵਸਂ ਸਤ੍ਥੁ ਧਮ੍ਮਕਥਂ ਸੁਤ੍ਵਾ ਪਟਿਲਦ੍ਧਸਦ੍ਧਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਪਬ੍ਬਜਿ. ਪਬ੍ਬਜਿਤਕਾਲਤੋ ਪਟ੍ਠਾਯ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਪਟਿਲਭਿ. ਸਾ ਧਮ੍ਮਸ੍ਸਵਨਤ੍ਥਾਯ ਵਿਹਾਰਂ ਗਨ੍ਤ੍ਵਾ ਦਸਬਲਸ੍ਸ ਸਰੀਰਸਮ੍ਪਤ੍ਤਿਂ ਓਲੋਕਯਮਾਨਾਵ ਤਿਟ੍ਠਤਿ. ਸਤ੍ਥਾ ਤਸ੍ਸਾ ਸਦ੍ਧਾਲਕ੍ਖਣੇ ਅਭਿਨਿਵਿਟ੍ਠਭਾਵਂ ਞਤ੍ਵਾ ਸਪ੍ਪਾਯਂ ਕਤ੍ਵਾ ਪਸਾਦਨੀਯਮੇਵ ਧਮ੍ਮਂ ਦੇਸੇਸਿ. ਸਾਪਿ ਥੇਰੀ ਸਦ੍ਧਾਲਕ੍ਖਣਮੇਵ ਧੁਰਂ ਕਤ੍ਵਾ ਅਰਹਤ੍ਤਂ ਪਾਪੁਣਿ. ਅਥ ਨਂ ਸਤ੍ਥਾ ਅਪਰਭਾਗੇ ਜੇਤਵਨੇ ਨਿਸੀਦਿਤ੍ਵਾ ਭਿਕ੍ਖੁਨਿਯੋ ਪਟਿਪਾਟਿਯਾ ਠਾਨਨ੍ਤਰੇ ਠਪੇਨ੍ਤੋ ਇਮਂ ਥੇਰਿਂ ਸਦ੍ਧਾਧਿਮੁਤ੍ਤਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਪਞ੍ਚਮਵਗ੍ਗਵਣ੍ਣਨਾ.

ਤੇਰਸਸੁਤ੍ਤਪਟਿਮਣ੍ਡਿਤਾਯ ਥੇਰਿਪਾਲ਼ਿਯਾ ਵਣ੍ਣਨਾ ਨਿਟ੍ਠਿਤਾ.