੧੪. ਏਤਦਗ੍ਗਵਗ੍ਗੋ

(੧੪) ੬. ਛਟ੍ਠਏਤਦਗ੍ਗਵਗ੍ਗੋ

ਤਪੁਸ੍ਸਭਲ੍ਲਿਕਵਤ੍ਥੁ

੨੪੮. ਉਪਾਸਕਪਾਲ਼ਿਯਾ ਪਠਮੇ ਪਠਮਂ ਸਰਣਂ ਗਚ੍ਛਨ੍ਤਾਨਨ੍ਤਿ ਸਬ੍ਬਪਠਮਂ ਸਰਣਂ ਗਚ੍ਛਨ੍ਤਾਨਂ ਤਪੁਸ੍ਸੋ ਚ ਭਲ੍ਲਿਕੋ ਚਾਤਿ ਇਮੇ ਦ੍ਵੇ ਵਾਣਿਜਾ ਅਗ੍ਗਾਤਿ ਦਸ੍ਸੇਤਿ. ਇਮੇ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਪਟਿਸਨ੍ਧਿਂ ਗਹੇਤ੍ਵਾ ਅਪਰਭਾਗੇ ਸਤ੍ਥੁ ਧਮ੍ਮਦੇਸਨਂ ਸੁਣਨ੍ਤਾ ਸਤ੍ਥਾਰਂ ਦ੍ਵੇ ਉਪਾਸਕੇ ਪਠਮਂ ਸਰਣਂ ਗਚ੍ਛਨ੍ਤਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥਯਿਂਸੁ. ਤੇ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਅਮ੍ਹਾਕਂ ਬੋਧਿਸਤ੍ਤਸ੍ਸ ਸਬ੍ਬਞ੍ਞੁਤਞ੍ਞਾਣਪਤ੍ਤਿਤੋ ਪੁਰੇਤਰਮੇਵ ਅਸਿਤਞ੍ਜਨਨਗਰੇ ਕੁਟੁਮ੍ਬਿਯਗੇਹੇ ਨਿਬ੍ਬਤ੍ਤਿਂਸੁ. ਜੇਟ੍ਠਭਾਤਿਕੋ ਤਪੁਸ੍ਸੋ ਨਾਮ ਅਹੋਸਿ, ਕਨਿਟ੍ਠੋ ਭਲ੍ਲਿਕੋ ਨਾਮ.

ਤੇ ਅਪਰੇਨ ਸਮਯੇਨ ਘਰਾਵਾਸਂ ਵਸਨ੍ਤਾ ਕਾਲੇਨ ਕਾਲਂ ਪਞ੍ਚ ਸਕਟਸਤਾਨਿ ਯੋਜਾਪੇਤ੍ਵਾ ਵਾਣਿਜਕਮ੍ਮਂ ਕਰੋਨ੍ਤਾ ਚਰਨ੍ਤਿ. ਤਸ੍ਮਿਂ ਸਮਯੇ ਅਮ੍ਹਾਕਂ ਬੋਧਿਸਤ੍ਤੋ ਸਬ੍ਬਞ੍ਞੁਤਂ ਪਤ੍ਵਾ ਸਤ੍ਤਸਤ੍ਤਾਹਂ ਬੋਧਿਮਣ੍ਡੇ ਵਿਹਰਿਤ੍ਵਾ ਅਟ੍ਠਮੇ ਸਤ੍ਤਾਹੇ ਰਾਜਾਯਤਨਮੂਲੇ ਨਿਸੀਦਿ. ਤਸ੍ਮਿਂ ਸਮਯੇ ਤੇ ਵਾਣਿਜਾ ਪਞ੍ਚਮਤ੍ਤੇਹਿ ਸਕਟਸਤੇਹਿ ਤਂ ਠਾਨਂ ਅਨੁਪ੍ਪਤ੍ਤਾ ਅਹੇਸੁਂ. ਤੇਸਂ ਅਨਨ੍ਤਰੇ ਅਤ੍ਤਭਾਵੇ ਮਾਤਾ ਤਸ੍ਮਿਂ ਪਦੇਸੇ ਦੇਵਤਾ ਹੁਤ੍ਵਾ ਨਿਬ੍ਬਤ੍ਤਿ. ਸਾ ਚਿਨ੍ਤੇਸਿ – ‘‘ਇਦਾਨਿ ਬੁਦ੍ਧਾਨਂ ਆਹਾਰੋ ਲਦ੍ਧੁਂ ਵਟ੍ਟਤਿ. ਨ ਹਿ ਸਕ੍ਕਾ ਇਤੋ ਪਰਂ ਨਿਰਾਹਾਰੇਹਿ ਯਾਪੇਤੁਂ. ਇਮੇ ਚ ਮੇ ਪੁਤ੍ਤਾ ਇਮਿਨਾ ਮਗ੍ਗੇਨ ਗਚ੍ਛਨ੍ਤਿ, ਤੇਹਿ ਅਜ੍ਜ ਬੁਦ੍ਧਾਨਂ ਪਿਣ੍ਡਪਾਤਂ ਦਾਪੇਤੁਂ ਵਟ੍ਟਤੀ’’ਤਿ ਪਞ੍ਚਸੁ ਸਕਟਸਤੇਸੁ ਯੁਤ੍ਤਗੋਣਾਨਂ ਗਮਨੁਪਚ੍ਛੇਦਂ ਅਕਾਸਿ. ਤੇ ‘‘ਕਿਂ ਨਾਮੇਤ’’ਨ੍ਤਿ ਨਾਨਾਵਿਧਾਨਿ ਨਿਮਿਤ੍ਤਾਨਿ ਓਲੋਕੇਨ੍ਤਿ. ਅਥ ਤੇਸਂ ਕਿਲਮਨਭਾਵਂ ਞਤ੍ਵਾ ਏਕਸ੍ਸ ਪੁਰਿਸਸ੍ਸ ਸਰੀਰੇ ਅਧਿਮੁਚ੍ਚਿਤ੍ਵਾ ‘‘ਕਿਂ ਕਾਰਣਾ ਕਿਲਮਥ? ਤੁਮ੍ਹਾਕਂ ਅਞ੍ਞੋ ਯਕ੍ਖਾਵਟ੍ਟੋ ਵਾ ਭੂਤਾਵਟ੍ਟੋ ਵਾ ਨਾਗਾਵਟ੍ਟੋ ਵਾ ਨਤ੍ਥਿ, ਅਹਂ ਪਨ ਵੋ ਅਤੀਤਤ੍ਤਭਾਵੇ ਮਾਤਾ ਇਮਸ੍ਮਿਂ ਠਾਨੇ ਭੁਮ੍ਮਦੇਵਤਾ ਹੁਤ੍ਵਾ ਨਿਬ੍ਬਤ੍ਤਾ. ਏਸ ਦਸਬਲੋ ਰਾਜਾਯਤਨਮੂਲੇ ਨਿਸਿਨ੍ਨੋ, ਤਸ੍ਸ ਪਠਮਂ ਪਿਣ੍ਡਪਾਤਂ ਦੇਥਾ’’ਤਿ.

ਤੇ ਤਸ੍ਸਾ ਕਥਂ ਸੁਤ੍ਵਾ ਤੁਟ੍ਠਮਾਨਸਾ ਹੁਤ੍ਵਾ ਮਨ੍ਥਞ੍ਚ ਮਧੁਪਿਣ੍ਡਿਕਞ੍ਚ ਸੁਵਣ੍ਣਥਾਲਕੇਨ ਆਦਾਯ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ‘‘ਇਮਂ ਭੋਜਨਂ ਪਟਿਗ੍ਗਣ੍ਹਥ, ਭਨ੍ਤੇ’’ਤਿ ਆਹਂਸੁ. ਸਤ੍ਥਾ ਅਤੀਤਬੁਦ੍ਧਾਨਂ ਆਚਿਣ੍ਣਂ ਓਲੋਕੇਸਿ, ਅਥਸ੍ਸ ਚਤ੍ਤਾਰੋ ਮਹਾਰਾਜਾਨੋ ਸੇਲਮਯੇ ਪਤ੍ਤੇ ਉਪਨਾਮੇਸੁਂ. ਸਤ੍ਥਾ ‘‘ਤੇਸਂ ਮਹਪ੍ਫਲਂ ਹੋਤੂ’’ਤਿ ਚਤ੍ਤਾਰੋਪਿ ਪਤ੍ਤੇ ‘‘ਏਕੋਵ ਪਤ੍ਤੋ ਹੋਤੂ’’ਤਿ ਅਧਿਟ੍ਠਾਸਿ. ਤਸ੍ਮਿਂ ਖਣੇ ਤੇ ਵਾਣਿਜਾ ਤਥਾਗਤਸ੍ਸ ਪਤ੍ਤੇ ਮਨ੍ਥਞ੍ਚ ਮਧੁਪਿਣ੍ਡਿਕਞ੍ਚ ਪਤਿਟ੍ਠਪੇਤ੍ਵਾ ਪਰਿਭੁਤ੍ਤਕਾਲੇ ਉਦਕਂ ਦਤ੍ਵਾ ਭਤ੍ਤਕਿਚ੍ਚਪਰਿਯੋਸਾਨੇ ਸਤ੍ਥਾਰਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਅਥ ਨੇਸਂ ਸਤ੍ਥਾ ਧਮ੍ਮਂ ਦੇਸੇਸਿ, ਦੇਸਨਾਪਰਿਯੋਸਾਨੇ ਦ੍ਵੇਪਿ ਜਨਾ ਦ੍ਵੇਵਾਚਿਕੇ ਸਰਣੇ ਪਤਿਟ੍ਠਾਯ ਸਤ੍ਥਾਰਂ ਅਭਿਵਾਦੇਤ੍ਵਾ ਅਤ੍ਤਨੋ ਨਗਰਂ ਗਨ੍ਤੁਕਾਮਾ, ‘‘ਭਨ੍ਤੇ, ਅਮ੍ਹਾਕਂ ਪਰਿਚਰਣਚੇਤਿਯਂ ਦੇਥਾ’’ਤਿ ਵਦਿਂਸੁ. ਸਤ੍ਥਾ ਦਕ੍ਖਿਣੇਨ ਹਤ੍ਥੇਨ ਸੀਸਂ ਪਰਾਮਸਿਤ੍ਵਾ ਦ੍ਵਿਨ੍ਨਮ੍ਪਿ ਜਨਾਨਂ ਅਟ੍ਠ ਕੇਸਧਾਤੁਯੋ ਅਦਾਸਿ. ਤੇ ਉਭੋਪਿ ਜਨਾ ਕੇਸਧਾਤੁਯੋ ਸੁਵਣ੍ਣਸਮੁਗ੍ਗੇਸੁ ਠਪੇਤ੍ਵਾ ਅਤ੍ਤਨੋ ਨਗਰਂ ਨੇਤ੍ਵਾ ਅਸਿਤਞ੍ਜਨਨਗਰਦ੍ਵਾਰੇ ਜੀਵਕੇਸਧਾਤੁਯਾ ਚੇਤਿਯਂ ਪਤਿਟ੍ਠਾਪੇਸੁਂ. ਉਪੋਸਥਦਿਵਸੇ ਚੇਤਿਯਤੋ ਨੀਲਸ੍ਮਿਯੋ ਨਿਗ੍ਗਚ੍ਛਨ੍ਤਿ. ਏਵਮੇਤਂ ਵਤ੍ਥੁ ਸਮੁਟ੍ਠਿਤਂ. ਸਤ੍ਥਾ ਪਨ ਅਪਰਭਾਗੇ ਜੇਤਵਨੇ ਨਿਸੀਦਿਤ੍ਵਾ ਉਪਾਸਕੇ ਪਟਿਪਾਟਿਯਾ ਠਾਨਨ੍ਤਰੇਸੁ ਠਪੇਨ੍ਤੋ ਇਮੇ ਦ੍ਵੇ ਜਨੇ ਪਠਮਂ ਸਰਣਂ ਗਚ੍ਛਨ੍ਤਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਅਨਾਥਪਿਣ੍ਡਿਕਸੇਟ੍ਠਿਵਤ੍ਥੁ

੨੪੯. ਦੁਤਿਯੇ ਦਾਯਕਾਨਨ੍ਤਿ ਦਾਨਾਭਿਰਤਾਨਂ ਸੁਦਤ੍ਤੋ, ਗਹਪਤਿ, ਅਨਾਥਪਿਣ੍ਡਿਕੋ ਅਗ੍ਗੋਤਿ ਦਸ੍ਸੇਤਿ. ਸੋ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਨਿਬ੍ਬਤ੍ਤੋ ਸਤ੍ਥੁ ਧਮ੍ਮਕਥਂ ਸੁਣਨ੍ਤੋ ਸਤ੍ਥਾਰਂ ਏਕਂ ਉਪਾਸਕਂ ਦਾਯਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸੋ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਸੁਮਨਸੇਟ੍ਠਿਸ੍ਸ ਗੇਹੇ ਨਿਬ੍ਬਤ੍ਤਿ, ਸੁਦਤ੍ਤੋਤਿਸ੍ਸ ਨਾਮਂ ਅਕਂਸੁ.

ਸੋ ਅਪਰਭਾਗੇ ਘਰਾਵਾਸੇ ਪਤਿਟ੍ਠਿਤੋ ਦਾਯਕੋ ਦਾਨਪਤਿ ਹੁਤ੍ਵਾ ਤੇਨੇਵ ਗੁਣੇਨ ਪਤ੍ਥਟਨਾਮਧੇਯ੍ਯੋ ਅਨਾਥਪਿਣ੍ਡਿਕੋ ਨਾਮ ਅਹੋਸਿ. ਸੋ ਪਞ੍ਚਹਿ ਸਕਟਸਤੇਹਿ ਭਣ੍ਡਂ ਆਦਾਯ ਰਾਜਗਹੇ ਅਤ੍ਤਨੋ ਪਿਯਸਹਾਯਕਸ੍ਸ ਸੇਟ੍ਠਿਨੋ ਗੇਹਂ ਗਨ੍ਤ੍ਵਾ ਤਤ੍ਥ ਬੁਦ੍ਧਸ੍ਸ ਭਗਵਤੋ ਉਪ੍ਪਨ੍ਨਭਾਵਂ ਸੁਤ੍ਵਾ ਬਲਵਪਚ੍ਚੂਸਕਾਲੇ ਦੇਵਤਾਨੁਭਾਵੇਨ ਵਿਵਟੇਨ ਦ੍ਵਾਰੇਨ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਧਮ੍ਮਂ ਸੁਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਾਯ ਦੁਤਿਯਦਿਵਸੇ ਚ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਸਾਵਤ੍ਥਿਂ ਆਗਮਨਤ੍ਥਾਯ ਸਤ੍ਥੁ ਪਟਿਞ੍ਞਂ ਗਹੇਤ੍ਵਾ ਅਨ੍ਤਰਾਮਗ੍ਗੇ ਪਞ੍ਚਚਤ੍ਤਾਲੀਸਯੋਜਨਮਗ੍ਗੇ ਸਤਸਹਸ੍ਸਂ ਸਤਸਹਸ੍ਸਂ ਦਤ੍ਵਾ ਯੋਜਨਿਕਵਿਹਾਰੇ ਕਾਰੇਤ੍ਵਾ ਜੇਤਵਨਂ ਕੋਟਿਸਨ੍ਥਾਰੇਨ ਸਨ੍ਥਰਿਤ੍ਵਾ ਅਟ੍ਠਾਰਸਹਿ ਕੋਟੀਹਿ ਕਿਣਿਤ੍ਵਾ ਅਟ੍ਠਾਰਸਹਿ ਕੋਟੀਹਿ ਵਿਹਾਰਂ ਕਾਰੇਤ੍ਵਾ ਵਿਹਾਰੇ ਨਿਟ੍ਠਿਤੇ ਚਤੁਨ੍ਨਂ ਪਰਿਸਾਨਂ ਪੁਰੇਭਤ੍ਤਪਚ੍ਛਾਭਤ੍ਤੇਸੁ ਯਦਿਚ੍ਛਕਂ ਦਾਨਂ ਦਦਨ੍ਤੋ ਅਟ੍ਠਾਰਸਹਿ ਕੋਟੀਹਿ ਵਿਹਾਰਮਹਂ ਨਿਟ੍ਠਾਪੇਸਿ. ਵਿਹਾਰਮਹੋ ਨਵਹਿ ਮਾਸੇਹਿ ਨਿਟ੍ਠਾਨਂ ਅਗਮਾਸਿ, ‘‘ਪਞ੍ਚਹੀ’’ਤਿ ਅਪਰੇ. ਤੇਮਾਸੇ ਪਨ ਸਬ੍ਬਾਚਰਿਯਾਨਂ ਵਿਵਾਦੋ ਨਤ੍ਥਿ.

ਏਵਂ ਚਤੁਪਣ੍ਣਾਸਕੋਟਿਧਨਂ ਵਿਸ੍ਸਜ੍ਜੇਤ੍ਵਾ ਨਿਚ੍ਚਕਾਲਂ ਗੇਹੇ ਏਵਰੂਪਂ ਦਾਨਂ ਪਵਤ੍ਤੇਸਿ. ਦੇਵਸਿਕਂ ਪਞ੍ਚ ਸਲਾਕਭਤ੍ਤਸਤਾਨਿ ਹੋਨ੍ਤਿ, ਪਞ੍ਚ ਪਕ੍ਖਿਕਭਤ੍ਤਸਤਾਨਿ, ਪਞ੍ਚ ਸਲਾਕਯਾਗੁਸਤਾਨਿ, ਪਞ੍ਚ ਪਕ੍ਖਿਕਯਾਗੁਸਤਾਨਿ, ਪਞ੍ਚ ਧੁਰਭਤ੍ਤਸਤਾਨਿ, ਪਞ੍ਚ ਆਗਨ੍ਤੁਕਭਤ੍ਤਸਤਾਨਿ, ਪਞ੍ਚ ਗਮਿਕਭਤ੍ਤਸਤਾਨਿ, ਪਞ੍ਚ ਗਿਲਾਨਭਤ੍ਤਸਤਾਨਿ, ਪਞ੍ਚ ਗਿਲਾਨੁਪਟ੍ਠਾਕਭਤ੍ਤਸਤਾਨਿ, ਪਞ੍ਚ ਆਸਨਸਤਾਨਿ ਗੇਹੇ ਨਿਚ੍ਚਪਞ੍ਞਤ੍ਤਾਨੇਵ ਹੋਨ੍ਤੀਤਿ. ਅਥ ਨਂ ਅਪਰਭਾਗੇ ਸਤ੍ਥਾ ਜੇਤਵਨੇ ਨਿਸਿਨ੍ਨੋ ਉਪਾਸਕੇ ਪਟਿਪਾਟਿਯਾ ਠਾਨਨ੍ਤਰੇਸੁ ਠਪੇਨ੍ਤੋ ਦਾਯਕਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਚਿਤ੍ਤਗਹਪਤਿਵਤ੍ਥੁ

੨੫੦. ਤਤਿਯੇ ਧਮ੍ਮਕਥਿਕਾਨਨ੍ਤਿ ਧਮ੍ਮਕਥਿਕਾਨਂ ਉਪਾਸਕਾਨਂ ਚਿਤ੍ਤੋ, ਗਹਪਤਿ, ਅਗ੍ਗੋਤਿ ਦਸ੍ਸੇਤਿ. ਸੋ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਨਿਬ੍ਬਤ੍ਤੋ ਅਪਰਭਾਗੇ ਧਮ੍ਮਕਥਂ ਸੁਣਨ੍ਤੋ ਸਤ੍ਥਾਰਂ ਏਕਂ ਉਪਾਸਕਂ ਧਮ੍ਮਕਥਿਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸੋ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਕਸ੍ਸਪਬੁਦ੍ਧਕਾਲੇ ਮਿਗਲੁਦ੍ਦਕਗੇਹੇ ਨਿਬ੍ਬਤ੍ਤੋ ਅਪਰਭਾਗੇ ਅਰਞ੍ਞੇ ਕਮ੍ਮਂ ਕਾਤੁਂ ਸਮਤ੍ਥਕਾਲੇ ਏਕਦਿਵਸਂ ਦੇਵੇ ਵਸ੍ਸਨ੍ਤੇ ਮਿਗਮਾਰਣਤ੍ਥਾਯ ਸਤ੍ਤਿਂ ਆਦਾਯ ਅਰਞ੍ਞਂ ਗਨ੍ਤ੍ਵਾ ਮਿਗਰੂਪਾਨਿ ਓਲੋਕੇਨ੍ਤੋ ਏਕਸ੍ਮਿਂ ਅਕਤਪਬ੍ਭਾਰੇ ਸਸੀਸਂ ਪਂਸੁਕੂਲਂ ਪਾਰੁਪਿਤ੍ਵਾ ਪਾਸਾਣਫਲਕੇ ਨਿਸਿਨ੍ਨਂ ਏਕਂ ਭਿਕ੍ਖੁਂ ਦਿਸ੍ਵਾ ‘‘ਏਕੋ ਅਯ੍ਯੋ ਸਮਣਧਮ੍ਮਂ ਕਰੋਨ੍ਤੋ ਨਿਸਿਨ੍ਨੋ ਭਵਿਸ੍ਸਤੀ’’ਤਿ ਸਞ੍ਞਂ ਉਪ੍ਪਾਦੇਤ੍ਵਾ ਵੇਗੇਨ ਘਰਂ ਗਨ੍ਤ੍ਵਾ ਏਕਸ੍ਮਿਂ ਉਦ੍ਧਨੇ ਹਿਯ੍ਯੋ ਆਭਤਮਂਸਂ, ਏਕਸ੍ਮਿਂ ਭਤ੍ਤਂ ਪਚਾਪੇਤ੍ਵਾ ਪਿਣ੍ਡਾਚਾਰਿਕੇ ਦ੍ਵੇ ਭਿਕ੍ਖੂ ਦਿਸ੍ਵਾ ਤੇਸਂ ਪਤ੍ਤਂ ਆਦਾਯ ਪਞ੍ਞਤ੍ਤਾਸਨੇ ਨਿਸੀਦਾਪੇਤ੍ਵਾ ਭਿਕ੍ਖਂ ਸਮਾਦਾਪੇਤ੍ਵਾ, ‘‘ਅਯ੍ਯੇ, ਪਰਿਵਿਸਥਾ’’ਤਿ ਅਞ੍ਞੇ ਆਣਾਪੇਤ੍ਵਾ ਤਂ ਭਤ੍ਤਂ ਕੁਟੇ ਪਕ੍ਖਿਪਿਤ੍ਵਾ ਪਣ੍ਣੇਨ ਮੁਖਂ ਬਨ੍ਧਿਤ੍ਵਾ ਕੁਟਂ ਆਦਾਯ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਨਾਨਾਵਿਧਾਨਿ ਪੁਪ੍ਫਾਨਿ ਓਚਿਨਿਤ੍ਵਾ ਪਤ੍ਤਪੁਟਕੇਨ ਗਹੇਤ੍ਵਾ ਥੇਰਸ੍ਸ ਨਿਸਿਨ੍ਨਟ੍ਠਾਨਂ ਗਨ੍ਤ੍ਵਾ ਕੁਟਂ ਓਤਾਰੇਤ੍ਵਾ ਏਕਮਨ੍ਤੇ ਠਪੇਤ੍ਵਾ ‘‘ਮਯ੍ਹਂ, ਭਨ੍ਤੇ, ਸਙ੍ਗਹਂ ਕਰੋਥਾ’’ਤਿ ਵਤ੍ਵਾ ਥੇਰਸ੍ਸ ਪਤ੍ਤਂ ਆਦਾਯ ਭਤ੍ਤਸ੍ਸ ਪੂਰੇਤ੍ਵਾ ਥੇਰਸ੍ਸ ਹਤ੍ਥੇ ਪਤਿਟ੍ਠਪੇਤ੍ਵਾ ਤੇਹਿ ਮਿਸ੍ਸਕਪੁਪ੍ਫੇਹਿ ਥੇਰਂ ਪੂਜੇਤ੍ਵਾ ਏਕਮਨ੍ਤੇ ਠਿਤੋ ‘‘ਯਥਾਯਂ ਰਸਪਿਣ੍ਡਪਾਤੇਨ ਸਦ੍ਧਿਂ ਪੁਪ੍ਫਪੂਜਾ ਚਿਤ੍ਤਂ ਪਰਿਤੋਸੇਤਿ, ਏਵਂ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਮੇ ਪਣ੍ਣਾਕਾਰਸਹਸ੍ਸਾਨਿ ਚੇਵ ਆਗਚ੍ਛਨ੍ਤੁ ਪਞ੍ਚਵਣ੍ਣਕੁਸੁਮਵਸ੍ਸਞ੍ਚ ਵਸ੍ਸਤੂ’’ਤਿ ਆਹ.

ਥੇਰੋ ਤਸ੍ਸ ਉਪਨਿਸ੍ਸਯਂ ਦਿਸ੍ਵਾ ਦ੍ਵਤ੍ਤਿਂਸਾਕਾਰਕਮ੍ਮਟ੍ਠਾਨਂ ਆਚਿਕ੍ਖਿਤ੍ਵਾ ਅਦਾਸਿ. ਸੋ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿ, ਨਿਬ੍ਬਤ੍ਤਟ੍ਠਾਨੇ ਜਣ੍ਣੁਮਤ੍ਤੇਨ ਓਧਿਨਾ ਦਿਬ੍ਬਪੁਪ੍ਫਵਸ੍ਸਂ ਵਸ੍ਸਿ, ਸਯਞ੍ਚ ਅਞ੍ਞਾਹਿ ਦੇਵਤਾਹਿ ਅਧਿਕਤਰੇਨ ਰੂਪੇਨ ਸਮਨ੍ਨਾਗਤੋ ਅਹੋਸਿ. ਸੋ ਏਕਂ ਬੁਦ੍ਧਨ੍ਤਰਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਮਗਧਰਟ੍ਠੇ ਮਚ੍ਛਿਕਾਸਣ੍ਡਨਗਰੇ ਸੇਟ੍ਠਿਕੁਲੇ ਨਿਬ੍ਬਤ੍ਤਿ, ਜਾਤਕਾਲੇਵਸ੍ਸ ਸਕਲਨਗਰੇ ਜਣ੍ਣੁਮਤ੍ਤੇਨ ਓਧਿਨਾ ਪਞ੍ਚਵਣ੍ਣਕੁਸੁਮਵਸ੍ਸਂ ਵਸ੍ਸਿ. ਅਥਸ੍ਸ ਮਾਤਾਪਿਤਰੋ ‘‘ਅਮ੍ਹਾਕਂ ਪੁਤ੍ਤੋ ਅਤ੍ਤਨਾਵ ਅਤ੍ਤਨੋ ਨਾਮਂ ਗਹੇਤ੍ਵਾ ਆਗਤੋ, ਜਾਤਦਿਵਸੇਵਸ੍ਸ ਸਕਲਨਗਰਂ ਪਞ੍ਚਵਣ੍ਣੇਹਿ ਪੁਪ੍ਫੇਹਿ ਵਿਚਿਤ੍ਤਂ ਜਾਤ’’ਨ੍ਤਿ ਚਿਤ੍ਤਕੁਮਾਰੋਤਿ ਨਾਮਂ ਅਕਂਸੁ.

ਸੋ ਅਪਰਭਾਗੇ ਘਰਾਵਾਸੇ ਪਤਿਟ੍ਠਿਤੋ ਪਿਤੁ ਅਚ੍ਚਯੇਨ ਤਸ੍ਮਿਂ ਨਗਰੇ ਸੇਟ੍ਠਿਟ੍ਠਾਨਂ ਪਾਪੁਣਿ. ਤਸ੍ਮਿਂ ਸਮਯੇ ਪਞ੍ਚਵਗ੍ਗਿਯਤ੍ਥੇਰਾਨਂ ਅਬ੍ਭਨ੍ਤਰੋ ਮਹਾਨਾਮਤ੍ਥੇਰੋ ਨਾਮ ਮਚ੍ਛਿਕਾਸਣ੍ਡਨਗਰਂ ਅਗਮਾਸਿ. ਚਿਤ੍ਤੋ ਗਹਪਤਿ ਤਸ੍ਸ ਇਰਿਯਾਪਥੇ ਪਸੀਦਿਤ੍ਵਾ ਪਤ੍ਤਂ ਆਦਾਯ ਗੇਹਂ ਆਨੇਤ੍ਵਾ ਪਿਣ੍ਡਪਾਤੇਨ ਪਤਿਮਾਨੇਤ੍ਵਾ ਕਤਭਤ੍ਤਕਿਚ੍ਚਂ ਅਮ੍ਬਾਟਕਾਰਾਮਂ ਨਾਮ ਉਯ੍ਯਾਨਂ ਨੇਤ੍ਵਾ ਤਤ੍ਥਸ੍ਸ ਵਸਨਟ੍ਠਾਨਂ ਕਾਰੇਤ੍ਵਾ ਨਿਬਦ੍ਧਂ ਅਤ੍ਤਨੋ ਗੇਹੇ ਪਿਣ੍ਡਪਾਤਂ ਗਹੇਤ੍ਵਾ ਵਸਨਤ੍ਥਾਯ ਪਟਿਞ੍ਞਂ ਗਣ੍ਹਿ. ਥੇਰੋਪਿ ਤਸ੍ਸ ਉਪਨਿਸ੍ਸਯਂ ਦਿਸ੍ਵਾ ਧਮ੍ਮਂ ਦੇਸੇਨ੍ਤੋ ਸਲ਼ਾਯਤਨਵਿਭਤ੍ਤਿਮੇਵ ਦੇਸੇਸਿ. ਚਿਤ੍ਤੋ ਗਹਪਤਿ ਪੁਰਿਮਭਵੇ ਮਦ੍ਦਿਤਸਙ੍ਖਾਰਤਾਯ ਨਚਿਰਸ੍ਸੇਵ ਅਨਾਗਾਮਿਫਲਂ ਸਮ੍ਪਾਪੁਣਿ. ਅਥੇਕਦਿਵਸਂ ਇਸਿਦਤ੍ਤਤ੍ਥੇਰੋ ਤਤ੍ਥ ਗਨ੍ਤ੍ਵਾ ਵਿਹਰਨ੍ਤੋ ਸੇਟ੍ਠਿਸ੍ਸ ਨਿਵੇਸਨੇ ਭਤ੍ਤਕਿਚ੍ਚਪਰਿਯੋਸਾਨੇ ਆਯਸ੍ਮਤਾ ਥੇਰੇਨ ਪਞ੍ਹਂ ਵਿਸ੍ਸਜ੍ਜੇਤੁਂ ਅਸਕ੍ਕੋਨ੍ਤੇਨ ਅਜ੍ਝਿਟ੍ਠੋ ਉਪਾਸਕਸ੍ਸ ਪਞ੍ਹਂ ਵਿਸ੍ਸਜ੍ਜੇਤ੍ਵਾ ਤੇਨ ਪੁਬ੍ਬੇ ਗਿਹਿਸਹਾਯਕਭਾਵੇ ਞਾਤੇ ‘‘ਨ ਇਦਾਨਿ ਇਧ ਵਤ੍ਥਬ੍ਬ’’ਨ੍ਤਿ ਯਥਾਸੁਖਂ ਪਕ੍ਕਾਮਿ. ਪੁਨੇਕਦਿਵਸਂ, ਸੇਟ੍ਠਿ ਗਹਪਤਿ, ਮਹਾਨਾਮਤ੍ਥੇਰਂ ਇਦ੍ਧਿਪਾਟਿਹਾਰਿਯਕਰਣਤ੍ਥਂ ਯਾਚਿ. ਸੋਪਿ ਤਸ੍ਸ ਤੇਜੋਸਮਾਪਤ੍ਤਿਪਾਟਿਹਾਰਿਯਂ ਦਸ੍ਸੇਤ੍ਵਾ ‘‘ਇਦਾਨਿ ਇਧ ਵਸਿਤੁਂ ਨ ਯੁਤ੍ਤ’’ਨ੍ਤਿ ਯਥਾਸੁਖਂ ਪਕ੍ਕਾਮਿ.

ਅਥੇਕਦਿਵਸਂ ਦ੍ਵੇ ਅਗ੍ਗਸਾਵਕਾ ਭਿਕ੍ਖੁਸਹਸ੍ਸਪਰਿਵਾਰਾ ਅਮ੍ਬਾਟਕਾਰਾਮਂ ਅਗਮਂਸੁ. ਸੇਟ੍ਠਿ ਗਹਪਤਿ, ਤੇਸਂ ਮਹਾਸਕ੍ਕਾਰਂ ਸਜ੍ਜੇਸਿ. ਸੁਧਮ੍ਮਤ੍ਥੇਰੋ ਤਂ ਅਸਹਮਾਨੋ ਸੇਟ੍ਠਿਂ ਤਿਲਸਙ੍ਗੁਲਿਕਾਵਾਦੇਨ ਖੁਂਸੇਤ੍ਵਾ ਤੇਨ ਪਣਾਮਿਤੋ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਓਵਾਦਂ ਲਭਿਤ੍ਵਾ ਦਸਬਲਸ੍ਸ ਓਵਾਦੇ ਠਿਤੋ ਚਿਤ੍ਤਂ ਗਹਪਤਿਂ ਖਮਾਪੇਤ੍ਵਾ ਤਤ੍ਥੇਵ ਅਮ੍ਬਾਟਕਾਰਾਮੇ ਵਿਹਰਨ੍ਤੋ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਤਦਾ ਉਪਾਸਕੋ ਚਿਨ੍ਤੇਸਿ – ‘‘ਅਹਂ ਦਸਬਲਂ ਅਦਿਸ੍ਵਾਵ ਚਿਰਂ ਵੀਤਿਨਾਮੇਸਿਂ, ਸਤ੍ਥੁ ਸਨ੍ਤਿਕਂ ਗਚ੍ਛਨ੍ਤੇਨ ਪਨ ਅਯੁਤ੍ਤਂ ਤੁਚ੍ਛਹਤ੍ਥੇਨ ਗਨ੍ਤੁ’’ਨ੍ਤਿ ਪਞ੍ਚਹਿ ਸਕਟਸਤੇਹਿ ਤੇਲਮਧੁਫਾਣਿਤਾਦੀਨਿ ਆਦਾਯ ‘‘ਯੇ ਦਸਬਲਂ ਪਸ੍ਸਿਤੁਕਾਮਾ, ਤੇ ਮਯਾ ਸਦ੍ਧਿਂ ਆਗਚ੍ਛਨ੍ਤੂ’’ਤਿ ਨਗਰੇ ਭੇਰਿਂ ਚਰਾਪੇਤ੍ਵਾ ਦ੍ਵੀਹਿ ਪੁਰਿਸਸਹਸ੍ਸੇਹਿ ਪਰਿਵੁਤੋ ਸਤ੍ਥਾਰਂ ਪਸ੍ਸਿਤੁਂ ਪਕ੍ਕਾਮਿ. ਤਿਂਸਯੋਜਨੇ ਮਗ੍ਗੇ ਦੇਵਤਾ ਪਣ੍ਣਾਕਾਰਂ ਉਪਟ੍ਠਪੇਸੁਂ. ਸੋ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਪਞ੍ਚਪਤਿਟ੍ਠਿਤੇਨ ਸਤ੍ਥਾਰਂ ਵਨ੍ਦਿ, ਤਸ੍ਮਿਂ ਖਣੇ ਆਕਾਸਾ ਪਞ੍ਚਵਣ੍ਣਾਨਂ ਪੁਪ੍ਫਾਨਂ ਵਸ੍ਸਂ ਵਸ੍ਸਿ.

ਸਤ੍ਥਾ ਤਸ੍ਸ ਅਜ੍ਝਾਸਯਵਸੇਨ ਸਲ਼ਾਯਤਨਵਿਭਤ੍ਤਿਮੇਵ ਕਥੇਸਿ. ਤਸ੍ਸ ਅਡ੍ਢਮਾਸਮਤ੍ਤਂ ਦਸਬਲਸ੍ਸ ਦਾਨਂ ਦੇਨ੍ਤਸ੍ਸਾਪਿ ਸਕਨਿਵੇਸਨਤੋ ਨੀਤਾਨਿ ਤਣ੍ਡੁਲਤੇਲਮਧੁਫਾਣਿਤਾਦੀਨਿ ਨ ਖੀਯਿਂਸੁ. ਰਾਜਗਹਵਾਸਿਕੇਹਿ ਪਹਿਤਪਣ੍ਣਾਕਾਰੋਵ ਅਲਂ ਅਹੋਸਿ. ਸੋ ਸਤ੍ਥਾਰਂ ਪਸ੍ਸਿਤ੍ਵਾ ਅਤ੍ਤਨੋ ਨਗਰਂ ਗਚ੍ਛਨ੍ਤੋ ਸਕਟੇਹਿ ਆਭਤਂ ਸਬ੍ਬਂ ਭਿਕ੍ਖੁਸਙ੍ਘਸ੍ਸ ਅਦਾਸਿ. ਸਕਟੇਸੁ ਤੁਚ੍ਛੇਸੁ ਜਾਤਮਤ੍ਤੇਸ੍ਵੇਵ ਦੇਵਤਾ ਸਤ੍ਤ ਰਤਨਾਨਿ ਪੂਰਯਿਂਸੁ. ਮਹਾਜਨਨ੍ਤਰੇ ਕਥਾ ਉਦਪਾਦਿ ‘‘ਯਾਵ ਸਕ੍ਕਾਰਸਮ੍ਮਾਨਪ੍ਪਤ੍ਤੋ ਵਤਾਯਂ ਚਿਤ੍ਤੋ ਗਹਪਤੀ’’ਤਿ. ਤਂ ਸੁਤ੍ਵਾ ਸਤ੍ਥਾ ਧਮ੍ਮਪਦੇ ਇਮਂ ਗਾਥਮਾਹ –

‘‘ਸਦ੍ਧੋ ਸੀਲੇਨ ਸਮ੍ਪਨ੍ਨੋ, ਯਸੋ ਭੋਗਸਮਪ੍ਪਿਤੋ;

ਯਂ ਯਂ ਪਦੇਸਂ ਭਜਤਿ, ਤਤ੍ਥ ਤਤ੍ਥੇਵ ਪੂਜਿਤੋ’’ਤਿ. (ਧ. ਪ. ੩੦੩);

ਸੋ ਤਤੋ ਪਟ੍ਠਾਯ ਅਰਿਯਸਾਵਕਾਨਂਯੇਵ ਉਪਾਸਕਾਨਂ ਪਞ੍ਚਹਿ ਸਤੇਹਿ ਪਰਿਵੁਤੋ ਵਿਚਰਤਿ. ਅਥ ਨਂ ਸਤ੍ਥਾ ਅਪਰਭਾਗੇ ਉਪਾਸਕੇ ਪਟਿਪਾਟਿਯਾ ਠਾਨਨ੍ਤਰੇ ਠਪੇਨ੍ਤੋ ਚਿਤ੍ਤਸਂਯੁਤ੍ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਧਮ੍ਮਕਥਿਕਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਹਤ੍ਥਕਆਲ਼ਵਕਵਤ੍ਥੁ

੨੫੧. ਚਤੁਤ੍ਥੇ ਚਤੂਹਿ ਸਙ੍ਗਹਵਤ੍ਥੂਹੀਤਿ ਚਤੁਬ੍ਬਿਧੇਨ ਸਙ੍ਗਹਵਤ੍ਥੁਨਾ ਪਰਿਸਂ ਸਙ੍ਗਣ੍ਹਨ੍ਤਾਨਂ ਹਤ੍ਥਕੋ ਆਲ਼ਵਕੋ ਅਗ੍ਗੋਤਿ ਦਸ੍ਸੇਤਿ. ਅਯਂ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਘਰੇ ਨਿਬ੍ਬਤ੍ਤੋ ਅਪਰਭਾਗੇ ਸਤ੍ਥੁ ਧਮ੍ਮਕਥਂ ਸੁਣਨ੍ਤੋ ਸਤ੍ਥਾਰਂ ਚਤੂਹਿ ਸਙ੍ਗਹਵਤ੍ਥੂਹਿ ਸਮਨ੍ਨਾਗਤਂ ਏਕਂ ਉਪਾਸਕਂ ਠਾਨਨ੍ਤਰੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸੋ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਆਲ਼ਵਿਰਟ੍ਠੇ ਆਲ਼ਵਿਨਗਰੇ ਆਲ਼ਵਕਸ੍ਸ ਰਞ੍ਞੋ ਗੇਹੇ ਪਟਿਸਨ੍ਧਿਂ ਗਣ੍ਹਿ, ਸ੍ਵੇ ਭਤ੍ਤਚਾਟਿਯਾ ਸਦ੍ਧਿਂ ਆਲ਼ਵਕਸ੍ਸ ਪੇਸੇਤਬ੍ਬੋ ਅਹੋਸਿ.

ਤਤ੍ਰਾਯਂ ਅਨੁਪੁਬ੍ਬਿਕਥਾ – ਏਕਦਿਵਸਂ ਕਿਰ ਆਲ਼ਵਕੋ ਰਾਜਾ ਮਿਗਵਤ੍ਥਾਯ ਅਰਞ੍ਞਂ ਗਨ੍ਤ੍ਵਾ ਏਕਂ ਮਿਗਂ ਅਨੁਬਨ੍ਧਿਤ੍ਵਾ ਘਾਤੇਤ੍ਵਾ ਛਿਨ੍ਦਿਤ੍ਵਾ ਧਨੁਕੋਟਿਯਂ ਲਗੇਤ੍ਵਾ ਨਿਵਤ੍ਤੇਤ੍ਵਾ ਆਗਚ੍ਛਨ੍ਤੋ ਵਾਤਾਤਪੇਨ ਕਿਲਨ੍ਤਕਾਯੋ ਏਕਂ ਸਨ੍ਦਚ੍ਛਾਯਂ ਨਿਗ੍ਰੋਧਰੁਕ੍ਖਮੂਲਂ ਪਵਿਸਿਤ੍ਵਾ ਨਿਸੀਦਿ. ਅਥ ਨਂ ਮੁਹੁਤ੍ਤਂ ਦਰਥਂ ਵਿਨੋਦੇਤ੍ਵਾ ਨਿਕ੍ਖਮਨ੍ਤਂ ਰੁਕ੍ਖੇ ਅਧਿਵਤ੍ਥਾ ਦੇਵਤਾ ‘‘ਤਿਟ੍ਠ ਤਿਟ੍ਠ, ਭਕ੍ਖੋਸਿ ਮੇ’’ਤਿ ਹਤ੍ਥੇ ਗਣ੍ਹਿ. ਸੋ ਦਲ਼੍ਹਂ ਗਹਿਤਤ੍ਤਾ ਅਞ੍ਞਂ ਉਪਾਯਂ ਅਪਸ੍ਸਨ੍ਤੋ ‘‘ਦੇਵਸਿਕਂ ਤੇ ਏਕੇਕਪੁਰਿਸੇਨ ਸਦ੍ਧਿਂ ਚਾਟਿਭਤ੍ਤਂ ਪੇਸੇਸ੍ਸਾਮੀ’’ਤਿ ਵਤ੍ਵਾ ਨਗਰਂ ਗਤੋ. ਤਤੋ ਪਟ੍ਠਾਯ ਬਨ੍ਧਨਾਗਾਰਤੋ ਏਕੇਕਮਨੁਸ੍ਸੇਨ ਸਦ੍ਧਿਂ ਚਾਟਿਭਤ੍ਤਂ ਪੇਸੇਸਿ. ਏਤੇਨੇਵ ਨਿਯਾਮੇਨ ਬਨ੍ਧਨਾਗਾਰੇ ਮਨੁਸ੍ਸੇਸੁ ਖੀਣੇਸੁ ‘‘ਮਹਲ੍ਲਕਮਨੁਸ੍ਸੇਸੁ ਗਯ੍ਹਮਾਨੇਸੁ ਰਟ੍ਠਖੋਭੋ ਹੋਤੀ’’ਤਿ ਤੇ ਅਗ੍ਗਹੇਤ੍ਵਾ ਦਹਰਕੁਮਾਰੇ ਗਣ੍ਹਿਤੁਂ ਆਰਭਿਂਸੁ. ਤਤੋ ਪਟ੍ਠਾਯ ਨਗਰੇ ਦਾਰਕਮਾਤਰੋ ਚ ਗਬ੍ਭਿਨਿਯੋ ਚ ਅਞ੍ਞਂ ਰਟ੍ਠਂ ਗਚ੍ਛਨ੍ਤਿ.

ਤਸ੍ਮਿਂ ਸਮਯੇ ਸਤ੍ਥਾ ਪਚ੍ਚੂਸਸਮਯਨ੍ਤੇ ਲੋਕਂ ਵੋਲੋਕੇਨ੍ਤੋ ਆਲ਼ਵਕਕੁਮਾਰਸ੍ਸ ਤਿਣ੍ਣਂ ਮਗ੍ਗਫਲਾਨਂ ਉਪਨਿਸ੍ਸਯਂ ਦਿਸ੍ਵਾ ‘‘ਅਯਂ ਕੁਮਾਰੋ ਕਪ੍ਪਸਤਸਹਸ੍ਸਂ ਪਤ੍ਥਿਤਪਤ੍ਥਨੋ ਦੇਵਲੋਕਾ ਚਵਿਤ੍ਵਾ ਆਲ਼ਵਕਰਞ੍ਞੋ ਗੇਹੇ ਨਿਬ੍ਬਤ੍ਤੋ, ਅਞ੍ਞਂ ਕੁਮਾਰਂ ਅਲਭਨ੍ਤਾ ਸ੍ਵੇ ਕੁਮਾਰਂ ਚਾਟਿਭਤ੍ਤੇਨ ਸਦ੍ਧਿਂ ਗਹੇਤ੍ਵਾ ਗਚ੍ਛਿਸ੍ਸਨ੍ਤੀ’’ਤਿ ਚਿਨ੍ਤੇਤ੍ਵਾ ਸਾਯਨ੍ਹਸਮਯੇ ਅਞ੍ਞਾਤਕਵੇਸੇਨ ਆਲ਼ਵਕਸ੍ਸ ਯਕ੍ਖਸ੍ਸ ਭਵਨਦ੍ਵਾਰਂ ਗਨ੍ਤ੍ਵਾ ਤਸ੍ਸ ਦੋਵਾਰਿਕਂ ਗਦ੍ਰਭਂ ਨਾਮ ਯਕ੍ਖਂ ਭਵਨਂ ਪਵਿਸਨਤ੍ਥਾਯ ਯਾਚਿ. ਸੋ ਆਹ – ‘‘ਭਗਵਾ ਤੁਮ੍ਹੇ ਪਵਿਸਥ, ਮਯ੍ਹਂ ਪਨ ਆਲ਼ਵਕਸ੍ਸ ਅਨਾਰੋਚਨਂ ਨਾਮ ਅਯੁਤ੍ਤ’’ਨ੍ਤਿ. ਸੋ ਹਿਮਵਨ੍ਤੇ ਯਕ੍ਖਸਮਾਗਮਂ ਗਤਸ੍ਸ ਆਲ਼ਵਕਸ੍ਸ ਸਨ੍ਤਿਕਂ ਅਗਮਾਸਿ. ਸਤ੍ਥਾਪਿ ਤਂ ਭਵਨਂ ਪਵਿਸਿਤ੍ਵਾ ਆਲ਼ਵਕਸ੍ਸ ਨਿਸੀਦਨਪਲ੍ਲਙ੍ਕੇ ਨਿਸੀਦਿ.

ਤਸ੍ਮਿਂ ਸਮਯੇ ਸਾਤਾਗਿਰਹੇਮਵਤਾ ਆਲ਼ਵਕਸ੍ਸ ਭਵਨਮਤ੍ਥਕੇਨ ਯਕ੍ਖਸਮਾਗਮਂ ਗਚ੍ਛਨ੍ਤਾ ਅਤ੍ਤਨੋ ਗਮਨੇ ਅਸਮ੍ਪਜ੍ਜਮਾਨੇ ‘‘ਕਿਂ ਨੁ ਖੋ ਕਾਰਣ’’ਨ੍ਤਿ ਆਵਜ੍ਜੇਨ੍ਤਾ ਸਤ੍ਥਾਰਂ ਆਲ਼ਵਕਸ੍ਸ ਭਵਨੇ ਨਿਸਿਨ੍ਨਂ ਦਿਸ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਯਕ੍ਖਸਮਾਗਮਂ ਗਨ੍ਤ੍ਵਾ ਆਲ਼ਵਕਸ੍ਸ ਤੁਟ੍ਠਿਂ ਪਵੇਦਯਿਂਸੁ – ‘‘ਲਾਭਾ ਤੇ, ਆਵੁਸੋ ਆਲ਼ਵਕ, ਯਸ੍ਸ ਤੇ ਸਦੇਵਕੇ ਲੋਕੇ ਅਗ੍ਗਪੁਗ੍ਗਲੋ ਭਵਨੇ ਨਿਸਿਨ੍ਨੋ, ਗਨ੍ਤ੍ਵਾ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਣਾਹੀ’’ਤਿ. ਸੋ ਤੇਸਂ ਕਥਂ ਸੁਤ੍ਵਾ ਚਿਨ੍ਤੇਸਿ – ‘‘ਇਮੇ ਏਕਸ੍ਸ ਮੁਣ੍ਡਕਸਮਣਸ੍ਸ ਮਮ ਪਲ੍ਲਙ੍ਕੇ ਨਿਸਿਨ੍ਨਭਾਵਂ ਕਥੇਨ੍ਤੀ’’ਤਿ ਅਨਤ੍ਤਮਨੋ ਕੋਧਾਭਿਭੂਤੋ ਹੁਤ੍ਵਾ ‘‘ਅਜ੍ਜ ਮਯ੍ਹਂ ਏਤੇਨ ਸਮਣੇਨ ਸਦ੍ਧਿਂ ਸਙ੍ਗਾਮੋ ਭਵਿਸ੍ਸਤਿ, ਤਤ੍ਥ ਮੇ ਸਹਾਯਾ ਨਾਮ ਹੋਥਾ’’ਤਿ ਦਕ੍ਖਿਣਪਾਦਂ ਉਕ੍ਖਿਪਿਤ੍ਵਾ ਸਟ੍ਠਿਯੋਜਨਮਤ੍ਤਂ ਪਬ੍ਬਤਕੂਟਂ ਅਕ੍ਕਮਿ, ਤਂ ਭਿਜ੍ਜਿਤ੍ਵਾ ਦ੍ਵਿਧਾ ਅਹੋਸਿ. ਇਤੋ ਪਟ੍ਠਾਯ ਆਲ਼ਵਕਯੁਦ੍ਧਂ ਵਿਤ੍ਥਾਰੇਤਬ੍ਬਂ. ਆਲ਼ਵਕੋ ਪਨ ਸਬ੍ਬਰਤ੍ਤਿਂ ਤਥਾਗਤੇਨ ਸਦ੍ਧਿਂ ਨਾਨਪ੍ਪਕਾਰੇਨ ਯੁਜ੍ਝਨ੍ਤੋਪਿ ਕਿਞ੍ਚਿ ਕਾਤੁਂ ਅਸਕ੍ਕੋਨ੍ਤੋ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਅਟ੍ਠ ਪਞ੍ਹੇ ਪੁਚ੍ਛਿ, ਸਤ੍ਥਾ ਵਿਸ੍ਸਜ੍ਜੇਸਿ. ਦੇਸਨਾਪਰਿਯੋਸਾਨੇ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ. ਵਿਤ੍ਥਾਰੇਤ੍ਵਾ ਕਥੇਤੁਕਾਮੇਨ ਆਲ਼ਵਕਸੁਤ੍ਤਵਣ੍ਣਨਾ (ਸਂ. ਨਿ. ਅਟ੍ਠ. ੧.੧.੨੪੬) ਓਲੋਕੇਤਬ੍ਬਾ.

ਪੁਨਦਿਵਸੇ ਉਟ੍ਠਿਤੇ ਅਰੁਣੇ ਚਾਟਿਭਤ੍ਤਾਹਰਣਵੇਲਾਯ ਸਕਲਨਗਰੇ ਗਹੇਤਬ੍ਬਯੁਤ੍ਤਂ ਦਾਰਕਂ ਅਦਿਸ੍ਵਾ ਰਞ੍ਞੋ ਆਰੋਚੇਸੁਂ. ਰਾਜਾ ਆਹ – ‘‘ਗਣ੍ਹਿਤੁਂ ਅਯੁਤ੍ਤਟ੍ਠਾਨੇ ਪਨ ਅਤ੍ਥਿ, ਤਾਤਾ’’ਤਿ. ਆਮ, ਦੇਵ, ਅਜ੍ਜ ਰਾਜਕੁਲੇ ਪੁਤ੍ਤੋ ਜਾਤੋਤਿ. ਗਚ੍ਛਥ, ਤਾਤਾ, ਮਯਂ ਜੀਵਨ੍ਤਾ ਪੁਤ੍ਤਂ ਲਭਿਸ੍ਸਾਮ, ਚਾਟਿਭਤ੍ਤੇਨ ਨਂ ਪੇਸੇਥਾਤਿ. ਤੇ ਦੇਵਿਯਾ ਵਿਕ੍ਕਨ੍ਦਮਾਨਾਯ ਦਾਰਕਂ ਗਹੇਤ੍ਵਾ ਚਾਟਿਭਤ੍ਤੇਨ ਸਦ੍ਧਿਂ ਆਲ਼ਵਕਸ੍ਸ ਭਵਨਦ੍ਵਾਰਂ ਗਨ੍ਤ੍ਵਾ ‘‘ਹਨ੍ਦ, ਅਯ੍ਯ, ਤਵ ਭਾਗਂ ਪਟਿਚ੍ਛਾਹੀ’’ਤਿ ਆਹਂਸੁ. ਆਲ਼ਵਕੋ ਤੇਸਂ ਕਥਂ ਸੁਤ੍ਵਾ ਅਰਿਯਸਾਵਕਤ੍ਤਾ ਲਜ੍ਜਮਾਨੋ ਅਧੋਮੁਖੋ ਨਿਸੀਦਿ. ਅਥ ਨਂ ਸਤ੍ਥਾ ਆਹ – ‘‘ਇਦਾਨਿ ਤੇ, ਆਲ਼ਵਕ, ਲਜ੍ਜਨਕਿਚ੍ਚਂ ਨਤ੍ਥਿ, ਦਾਰਕਂ ਗਹੇਤ੍ਵਾ ਮਮ ਹਤ੍ਥੇ ਠਪੇਹੀ’’ਤਿ. ਤੇ ਰਾਜਪੁਰਿਸਾ ਆਲ਼ਵਕਕੁਮਾਰਂ ਆਲ਼ਵਕਸ੍ਸ ਹਤ੍ਥੇ ਠਪੇਸੁਂ, ਆਲ਼ਵਕੋ ਤਂ ਆਦਾਯ ਦਸਬਲਸ੍ਸ ਹਤ੍ਥੇ ਠਪੇਸਿ, ਸਤ੍ਥਾ ਪਟਿਗ੍ਗਣ੍ਹਿਤ੍ਵਾ ਪੁਨ ਆਲ਼ਵਕਸ੍ਸ ਹਤ੍ਥੇ ਠਪੇਸਿ, ਆਲ਼ਵਕੋ ਤਂ ਗਹੇਤ੍ਵਾ ਰਾਜਪੁਰਿਸਾਨਂ ਹਤ੍ਥੇ ਠਪੇਸਿ. ਇਤਿਸ੍ਸ ਹਤ੍ਥਤੋ ਹਤ੍ਥਂ ਗਤਤ੍ਤਾ ‘‘ਹਤ੍ਥਕੋ ਆਲ਼ਵਕੋ’’ਤ੍ਵੇਵ ਨਾਮਂ ਅਕਂਸੁ.

ਅਥ ਨਂ ਤੇ ਰਾਜਪੁਰਿਸਾ ਤੁਟ੍ਠਮਾਨਸਾ ਆਦਾਯ ਰਞ੍ਞੋ ਸਨ੍ਤਿਕਂ ਅਗਮਂਸੁ. ਰਾਜਾ ਤਂ ਦਿਸ੍ਵਾ ‘‘ਅਜ੍ਜ ਚਾਟਿਭਤ੍ਤਂ ਨ ਸਮ੍ਪਟਿਚ੍ਛਤੀ’’ਤਿ ਸਞ੍ਞਂ ਕਤ੍ਵਾ ‘‘ਕਸ੍ਮਾ, ਤਾਤਾ, ਏਵਮੇਵ ਆਗਤਤ੍ਥਾ’’ਤਿ ਆਹ. ਦੇਵ, ਰਾਜਕੁਲਸ੍ਸ ਤੁਟ੍ਠਿ ਚ ਵਡ੍ਢਿ ਚ, ਸਤ੍ਥਾ ਆਲ਼ਵਕਸ੍ਸ ਭਵਨੇ ਨਿਸੀਦਿਤ੍ਵਾ ਆਲ਼ਵਕਂ ਦਮੇਤ੍ਵਾ ਉਪਾਸਕਤ੍ਤੇ ਪਤਿਟ੍ਠਾਪੇਤ੍ਵਾ ਕੁਮਾਰਂ ਅਮ੍ਹਾਕਂ ਦਾਪੇਸੀਤਿ. ਸਤ੍ਥਾਪਿ ਆਲ਼ਵਕਂ ਪਤ੍ਤਚੀਵਰਂ ਗਾਹਾਪੇਤ੍ਵਾ ਆਲ਼ਵਿਨਗਰਾਭਿਮੁਖੋ ਪਾਯਾਸਿ. ਸੋ ਨਗਰਂ ਉਪਸਙ੍ਕਮਨ੍ਤੋ ਲਜ੍ਜਿਤ੍ਵਾਵ ਓਸਕ੍ਕਤਿ. ਸਤ੍ਥਾ ਨਂ ਓਲੋਕੇਤ੍ਵਾ ‘‘ਲਜ੍ਜਸਿ, ਆਲ਼ਵਕਾ’’ਤਿ ਪੁਚ੍ਛਿ. ਆਮ, ਭਨ੍ਤੇ, ਨਗਰਵਾਸਿਨੋ ਮਂ ਨਿਸ੍ਸਾਯ ਮਾਤਿਮਰਣਂ ਪਿਤਿਮਰਣਂ ਪੁਤ੍ਤਦਾਰਮਰਣਞ੍ਚ ਪਾਪੁਣਿਂਸੁ. ਤੇ ਮਂ ਪਸ੍ਸਿਤ੍ਵਾ ਦਣ੍ਡੇਹਿਪਿ ਲੇਡ੍ਡੂਹਿਪਿ ਪਹਰਿਸ੍ਸਨ੍ਤਿ. ਤਸ੍ਮਾ ਓਸਕ੍ਕਾਮਿ, ਭਨ੍ਤੇਤਿ. ‘‘ਆਲ਼ਵਕ, ਨਤ੍ਥਿ ਤੇ ਮਯਾ ਸਦ੍ਧਿਂ ਗਚ੍ਛਨ੍ਤਸ੍ਸ ਭਯਂ, ਵਿਸ੍ਸਤ੍ਥੋ ਏਹੀ’’ਤਿ ਵਤ੍ਵਾ ਨਗਰਸ੍ਸ ਅਵਿਦੂਰੇ ਠਾਨੇ ਵਨਸਣ੍ਡੇ ਅਟ੍ਠਾਸਿ. ਆਲ਼ਵਕਰਾਜਾਪਿ ਨਾਗਰੇ ਗਹੇਤ੍ਵਾ ਸਤ੍ਥੁ ਪਚ੍ਚੁਗ੍ਗਮਨਂ ਗਤੋ. ਸਤ੍ਥਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ, ਦੇਸਨਾਵਸਾਨੇ ਚਤੁਰਾਸੀਤਿ ਪਾਣਸਹਸ੍ਸਾਨਿ ਅਮਤਪਾਨਂ ਪਿਵਿਂਸੁ. ਤੇ ਆਲ਼ਵਕਸ੍ਸ ਤਤ੍ਥੇਵ ਵਸਨਟ੍ਠਾਨਂ ਕਤ੍ਵਾ ਅਨੁਸਂਵਚ੍ਛਰਂ ਬਲਿਕਮ੍ਮਂ ਪਟ੍ਠਪੇਸੁਂ.

ਆਲ਼ਵਕੋਪਿ ਨਾਗਰੇ ਧਮ੍ਮਿਕਾਯ ਰਕ੍ਖਾਯ ਸਙ੍ਗਣ੍ਹਿ. ਸੋਪਿ ਆਲ਼ਵਕਕੁਮਾਰੋ ਵੁਡ੍ਢਿਪ੍ਪਤ੍ਤੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਤੀਣਿ ਮਗ੍ਗਫਲਾਨਿ ਪਟਿਵਿਜ੍ਝਿ. ਸੋ ਸਬ੍ਬਕਾਲਂ ਅਰਿਯਸਾਵਕਉਪਾਸਕਾਨਂ ਪਞ੍ਚਹਿ ਸਤੇਹਿ ਪਰਿਵੁਤੋ ਚਰਤਿ. ਅਥੇਕਦਿਵਸਂ ਤੇਹਿ ਉਪਾਸਕੇਹਿ ਸਦ੍ਧਿਂ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਸਤ੍ਥਾ ਸੁਵਿਨੀਤਂ ਪਰਿਸਂ ਦਿਸ੍ਵਾ ‘‘ਮਹਤੀ ਤੇ, ਆਲ਼ਵਕ, ਪਰਿਸਾ, ਕਥਂ ਤਂ ਸਙ੍ਗਣ੍ਹਾਸੀ’’ਤਿ ਆਹ. ਭਗਵਾ ਦਾਨੇਨ ਤੁਸ੍ਸਨ੍ਤਂ ਦਾਨੇਨ ਸਙ੍ਗਣ੍ਹਾਮਿ, ਪਿਯਵਚਨੇਨ ਤੁਸ੍ਸਨ੍ਤਂ ਪਿਯਵਚਨੇਨ ਸਙ੍ਗਣ੍ਹਾਮਿ, ਉਪ੍ਪਨ੍ਨੇਸੁ ਕਿਚ੍ਚੇਸੁ ਤੇਸਂ ਨਿਤ੍ਥਰਣੇਨ ਤੁਸ੍ਸਨ੍ਤਂ ਉਪ੍ਪਨ੍ਨਕਿਚ੍ਚਨਿਤ੍ਥਰਣੇਨ ਸਙ੍ਗਣ੍ਹਾਮਿ, ਸਮਾਨਤ੍ਤਟ੍ਠਾਨੇਨ ਤੁਸ੍ਸਨ੍ਤਂ ਸਮਾਨਤ੍ਤਤਾਯ ਸਙ੍ਗਣ੍ਹਾਮੀਤਿ. ਏਵਮੇਤਂ ਵਤ੍ਥੁ ਸਮੁਟ੍ਠਿਤਂ. ਅਥ ਸਤ੍ਥਾ ਅਪਰਭਾਗੇ ਜੇਤਵਨੇ ਨਿਸੀਦਿਤ੍ਵਾ ਉਪਾਸਕੇ ਠਾਨਨ੍ਤਰੇਸੁ ਠਪੇਨ੍ਤੋ ਹਤ੍ਥਕਂ ਆਲ਼ਵਕਂ ਚਤੂਹਿ ਸਙ੍ਗਹਵਤ੍ਥੂਹਿ ਪਰਿਸਂ ਸਙ੍ਗਣ੍ਹਨ੍ਤਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਮਹਾਨਾਮਸਕ੍ਕਵਤ੍ਥੁ

੨੫੨. ਪਞ੍ਚਮੇ ਪਣੀਤਦਾਯਕਾਨਨ੍ਤਿ ਪਣੀਤਰਸਦਾਯਕਾਨਂ ਮਹਾਨਾਮੋ ਸਕ੍ਕੋ ਅਗ੍ਗੋਤਿ ਦਸ੍ਸੇਤਿ. ਸੋ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਨਿਬ੍ਬਤ੍ਤੋ ਸਤ੍ਥੁ ਧਮ੍ਮਕਥਂ ਸੁਣਨ੍ਤੋ ਸਤ੍ਥਾਰਂ ਏਕਂ ਉਪਾਸਕਂ ਪਣੀਤਰਸਦਾਯਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸੋ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕਪਿਲਵਤ੍ਥੁਪੁਰੇ ਸਕ੍ਯਰਾਜਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਦਸਬਲਸ੍ਸ ਪਠਮਦਸ੍ਸਨੇਯੇਵ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ.

ਅਥੇਕਸ੍ਮਿਂ ਸਮਯੇ ਸਤ੍ਥਾ ਵੇਰਞ੍ਜਾਯਂ ਵਸ੍ਸਾਵਾਸਂ ਵਸਿਤ੍ਵਾ ਅਨੁਪੁਬ੍ਬੇਨ ਕਪਿਲਵਤ੍ਥੁਪੁਰਂ ਗਨ੍ਤ੍ਵਾ ਨਿਗ੍ਰੋਧਾਰਾਮੇ ਪਟਿਵਸਤਿ. ਮਹਾਨਾਮੋ ‘‘ਸਤ੍ਥਾ ਆਗਤੋ’’ਤਿ ਸੁਤ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਸਤ੍ਥਾਰਂ ਏਵਮਾਹ – ‘‘ਭਗਵਾ ਸੁਤਮੇਤਂ ‘ਭਿਕ੍ਖੁਸਙ੍ਘੋ ਕਿਰ ਵੇਰਞ੍ਜਾਯਂ ਭਿਕ੍ਖਾਚਾਰੇਨ ਕਿਲਮਤੀ’ਤਿ, ਮਮ ਚਤੁਮਾਸਂ ਭਿਕ੍ਖੁਸਙ੍ਘਸ੍ਸ ਪਟਿਜਗ੍ਗਨੇ ਪਟਿਞ੍ਞਂ ਦੇਥ, ਅਹਂ ਭਿਕ੍ਖੁਸਙ੍ਘਸ੍ਸ ਸਰੀਰੇ ਓਜਂ ਪਵੇਸੇਸ੍ਸਾਮੀ’’ਤਿ. ਸਤ੍ਥਾ ਅਧਿਵਾਸੇਸਿ. ਸੋ ਸਤ੍ਥੁ ਅਧਿਵਾਸਨਂ ਵਿਦਿਤ੍ਵਾ ਪੁਨਦਿਵਸਤੋ ਪਟ੍ਠਾਯ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤਰਸਭੋਜਨਚਤੁਮਧੁਰਾਦੀਹਿ ਪਟਿਜਗ੍ਗਿਤ੍ਵਾ ਪੁਨ ਚਤੁਮਾਸਂ ਪਟਿਞ੍ਞਂ ਗਹੇਤ੍ਵਾ ਅਟ੍ਠ ਮਾਸੇ ਪੂਰੇਤ੍ਵਾ ਪੁਨ ਚਤੁਮਾਸਂ ਪਟਿਞ੍ਞਂ ਗਹੇਤ੍ਵਾ ਸਕਲਸਂਵਚ੍ਛਰਂ ਪਟਿਜਗ੍ਗਿ. ਸਤ੍ਥਾ ਤਤੋ ਪਰਂ ਪਟਿਞ੍ਞਂ ਨਾਦਾਸਿ. ਮਹਾਨਾਮੋ ਪਨ ਤਤੋ ਪਟ੍ਠਾਯ ਅਪਰਾਪਰਂ ਸਮ੍ਪਤ੍ਤਭਿਕ੍ਖੁਸਙ੍ਘਸ੍ਸ ਤੇਨੇਵ ਨਿਯਾਮੇਨ ਸਕ੍ਕਾਰਂ ਕਰੋਤਿ. ਤਸ੍ਸ ਸੋ ਗੁਣੋ ਸਕਲਜਮ੍ਬੁਦੀਪੇ ਪਾਕਟੋ ਜਾਤੋ. ਏਵਮੇਤਂ ਵਤ੍ਥੁ ਸਮੁਟ੍ਠਿਤਂ. ਸਤ੍ਥਾ ਪਨ ਅਪਰਭਾਗੇ ਜੇਤਵਨੇ ਨਿਸੀਦਿਤ੍ਵਾ ਮਹਾਨਾਮਂ ਸਕ੍ਕਂ ਪਣੀਤਦਾਯਕਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਉਗ੍ਗਗਹਪਤਿਵਤ੍ਥੁ

੨੫੩. ਛਟ੍ਠੇ ਮਨਾਪਦਾਯਕਾਨਨ੍ਤਿ ਮਨਾਪਂ ਚਿਤ੍ਤਰੁਚਿਤਭੋਜਨਂ ਦਾਯਕਾਨਂ ਉਗ੍ਗੋ ਗਹਪਤਿ, ਵੇਸਾਲਿਕੋ ਅਗ੍ਗੋਤਿ ਦਸ੍ਸੇਤਿ. ਸੋ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਨਿਬ੍ਬਤ੍ਤੋ ਅਪਰਭਾਗੇ ਸਤ੍ਥੁ ਧਮ੍ਮਕਥਂ ਸੁਣਨ੍ਤੋ ਸਤ੍ਥਾਰਂ ਏਕਂ ਉਪਾਸਕਂ ਮਨਾਪਦਾਯਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸੋ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵੇਸਾਲਿਯਂ ਸੇਟ੍ਠਿਕੁਲੇ ਨਿਬ੍ਬਤ੍ਤਿ. ਤਸ੍ਸ ਜਾਤਕਾਲੇ ਨਾਮਂ ਅਨਿਯਾਮਿਤਂ. ਅਪਰਭਾਗੇ ਪਨਸ੍ਸ ਅਤ੍ਤਭਾਵੋਪਿ ਉਗ੍ਗਤੋ ਅਹੋਸਿ ਸਮਿਦ੍ਧੋ, ਅਲਙ੍ਕਤਤੋਰਣਂ ਵਿਯ ਉਸ੍ਸਿਤਚਿਤ੍ਤਪਟੋ ਵਿਯ ਚ ਅਤਿਵਿਰੋਚਿਤ੍ਥ. ਗੁਣਾਪਿਸ੍ਸ ਉਗ੍ਗਤਾ ਅਹੇਸੁਂ. ਸੋ ਇਮੇਸਂ ਦ੍ਵਿਨ੍ਨਮ੍ਪਿ ਉਗ੍ਗਤਤ੍ਤਾ ਉਗ੍ਗਸੇਟ੍ਠਿਤ੍ਵੇਵ ਸਙ੍ਖਂ ਗਤੋ. ਸੋ ਪਨਾਯਂ ਦਸਬਲਸ੍ਸ ਪਠਮਦਸ੍ਸਨੇਯੇਵ ਸੋਤਾਪਤ੍ਤਿਫਲੇ ਪਤਿਟ੍ਠਾਯ ਅਪਰਭਾਗੇ ਤੀਣਿਪਿ ਮਗ੍ਗਫਲਾਨਿ ਸਚ੍ਛਾਕਾਸਿ. ਸੋ ਅਤ੍ਤਨੋ ਮਹਲ੍ਲਕਕਾਲੇ ਰਹੋਗਤੋ ਨਿਸੀਦਿਤ੍ਵਾ ਚਿਨ੍ਤੇਸਿ – ‘‘ਯਂ ਯਂ ਮਯ੍ਹਂ ਪਿਯਂ ਮਨਾਪਂ, ਤਂ ਤਦੇਵ ਦਸਬਲਸ੍ਸ ਦਸ੍ਸਾਮਿ, ਇਦਂ ਮੇ ਸਤ੍ਥੁ ਸਮ੍ਮੁਖਾਪਿ ਸੁਤਂ ‘ਮਨਾਪਦਾਯੀ ਲਭਤੇ ਮਨਾਪ’’’ਨ੍ਤਿ. ਅਥਸ੍ਸ ਏਤਦਹੋਸਿ – ‘‘ਅਪਿ ਨੁ ਖੋ ਮੇ ਚਿਤ੍ਤਂ ਜਾਨਿਤ੍ਵਾ ਸਤ੍ਥਾਪਿ ਨਿਵੇਸਨਦ੍ਵਾਰਂ ਆਗਚ੍ਛੇਯ੍ਯਾ’’ਤਿ.

ਸਤ੍ਥਾਪਿ ਖੋ ਤਸ੍ਸ ਚਿਤ੍ਤਂ ਞਤ੍ਵਾ ਭਿਕ੍ਖੁਸਙ੍ਘਪਰਿਵੁਤੋ ਨਿਵੇਸਨਦ੍ਵਾਰੇਯੇਵ ਪਾਤੁਰਹੋਸਿ. ਸੋ ‘‘ਸਤ੍ਥਾ ਆਗਤੋ’’ਤਿ ਸੁਤ੍ਵਾ ਅਤਿਵਿਯ ਉਸ੍ਸਾਹਜਾਤੋ ਦਸਬਲਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਸਤ੍ਥੁ ਪਤ੍ਤਂ ਪਟਿਗ੍ਗਹੇਤ੍ਵਾ ਘਰਂ ਪਵੇਸੇਤ੍ਵਾ ਪਞ੍ਞਤ੍ਤਵਰਬੁਦ੍ਧਾਸਨੇ ਸਤ੍ਥਾਰਂ, ਅਵਸੇਸਆਸਨੇਸੁ ਭਿਕ੍ਖੁਸਙ੍ਘਂ ਨਿਸੀਦਾਪੇਤ੍ਵਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਾਨਗ੍ਗਰਸੇਹਿ ਪਰਿਵਿਸਿਤ੍ਵਾ ਭਤ੍ਤਕਿਚ੍ਚਪਰਿਯੋਸਾਨੇ ਏਕਮਨ੍ਤਂ ਨਿਸੀਦਿਤ੍ਵਾ ਏਵਮਾਹ – ‘‘ਸਮ੍ਮੁਖਾ ਮੇਤਂ, ਭਨ੍ਤੇ, ਭਗਵਤੋ ਸੁਤਂ ਸਮ੍ਮੁਖਾ ਪਟਿਗ੍ਗਹਿਤਂ ‘ਮਨਾਪਦਾਯੀ ਲਭਤੇ ਮਨਾਪ’’’ਨ੍ਤਿ. ਯਂ ਯਂ, ਭਨ੍ਤੇ, ਮਯ੍ਹਂ ਮਨਾਪਂ, ਤਂ ਤਂ ਮਯਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦਿਨ੍ਨਮੇਵਾ’’ਤਿ ਸਤ੍ਥਾਰਂ ਜਾਨਾਪੇਤ੍ਵਾ ਤਤੋ ਪਟ੍ਠਾਯ ਯਂ ਯਂ ਤਸ੍ਸ ਮਨਾਪਂ, ਤਂ ਤਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦੇਤਿ. ਤਂ ਪਨ ਸਬ੍ਬਂ ਪਞ੍ਚਕਨਿਪਾਤੇ ਉਗ੍ਗਸੁਤ੍ਤੇ ਵਿਤ੍ਥਾਰਤੋ ਆਗਮਿਸ੍ਸਤਿ. ਏਵਮੇਤਂ ਵਤ੍ਥੁ ਸਮੁਟ੍ਠਿਤਂ. ਸਤ੍ਥਾ ਅਪਰਭਾਗੇ ਜੇਤਵਨੇ ਵਿਹਰਨ੍ਤੋ ਤਂ ਉਪਾਸਕਂ ਮਨਾਪਦਾਯਕਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਉਗ੍ਗਤਗਹਪਤਿਵਤ੍ਥੁ

੨੫੪. ਸਤ੍ਤਮੇ ਸਙ੍ਘੁਪਟ੍ਠਾਕਾਨਨ੍ਤਿ ਭਿਕ੍ਖੁਸਙ੍ਘਸ੍ਸ ਉਪਟ੍ਠਾਕਾਨਂ ਹਤ੍ਥਿਗਾਮਕੋ ਉਗ੍ਗਤੋ ਗਹਪਤਿ, ਅਗ੍ਗੋਤਿ ਦਸ੍ਸੇਤਿ. ਸੋਪਿ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਨਿਬ੍ਬਤ੍ਤੋ ਅਪਰਭਾਗੇ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਸਤ੍ਥਾਰਂ ਏਕਂ ਉਪਾਸਕਂ ਸਙ੍ਘੁਪਟ੍ਠਾਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸੋ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਹਤ੍ਥਿਗਾਮੇ ਸੇਟ੍ਠਿਕੁਲੇ ਨਿਬ੍ਬਤ੍ਤਿ, ਤਸ੍ਸ ਉਗ੍ਗਤਕੁਮਾਰੋਤਿ ਨਾਮਂ ਅਕਂਸੁ.

ਸੋ ਅਪਰਭਾਗੇ ਘਰਾਵਾਸੇ ਪਤਿਟ੍ਠਿਤੋ ਪਿਤੁ ਅਚ੍ਚਯੇਨ ਸੇਟ੍ਠਿਟ੍ਠਾਨਂ ਪਾਪੁਣਿ. ਤੇਨ ਸਮਯੇਨ ਸਤ੍ਥਾ ਭਿਕ੍ਖੁਸਙ੍ਘਪਰਿਵੁਤੋ ਚਾਰਿਕਂ ਚਰਨ੍ਤੋ ਹਤ੍ਥਿਗਾਮਂ ਪਤ੍ਵਾ ਨਾਗਵਨੁਯ੍ਯਾਨੇ ਵਿਹਰਤਿ. ਤਦਾ ਅਯਂ ਉਗ੍ਗਤਸੇਟ੍ਠਿ ਸਤ੍ਤਾਹਂ ਪਾਨਮਦਮਤ੍ਤੋ ਹੁਤ੍ਵਾ ਨਾਟਕੇਹਿ ਪਰਿਵੁਤੋ ਨਾਗਵਨੁਯ੍ਯਾਨਂ ਗਨ੍ਤ੍ਵਾ ਪਰਿਚਾਰਯਮਾਨੋ ਦਸਬਲਂ ਦਿਸ੍ਵਾ ਬਲਵਹਿਰੋਤ੍ਤਪ੍ਪਂ ਪਚ੍ਚੁਪਟ੍ਠਾਪੇਸਿ. ਅਥਸ੍ਸ ਸਤ੍ਥਾਰਂ ਉਪਸਙ੍ਕਮਨ੍ਤਸ੍ਸ ਸਬ੍ਬੋ ਸੁਰਾਮਦੋ ਅਬ੍ਭਤ੍ਥਂ ਅਗਮਾਸਿ. ਸੋ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਅਥਸ੍ਸ ਸਤ੍ਥਾ ਧਮ੍ਮਂ ਦੇਸੇਸਿ. ਦੇਸਨਾਪਰਿਯੋਸਾਨੇ ਤੀਣਿ ਮਗ੍ਗਫਲਾਨਿ ਪਟਿਵਿਜ੍ਝਿ. ਤਤੋ ਪਟ੍ਠਾਯ ਨਾਟਕਾਨਿ ‘‘ਤੁਮ੍ਹੇ ਯਥਾਸੁਖਂ ਗਚ੍ਛਥਾ’’ਤਿ ਵਿਸ੍ਸਜ੍ਜੇਤ੍ਵਾ ਦਾਨਾਭਿਰਤੋ ਹੁਤ੍ਵਾ ਭਿਕ੍ਖੁਸਙ੍ਘਸ੍ਸ ਦਾਨਮੇਵ ਦੇਤਿ. ਦੇਵਤਾ ਰਤ੍ਤਿਭਾਗਸਮਨਨ੍ਤਰੇ ਆਗਨ੍ਤ੍ਵਾ ਸੇਟ੍ਠਿਸ੍ਸ ਆਰੋਚੇਨ੍ਤਿ – ‘‘ਗਹਪਤਿ, ਅਸੁਕੋ ਭਿਕ੍ਖੁ ਤੇਵਿਜ੍ਜੋ, ਅਸੁਕੋ ਭਿਕ੍ਖੁ ਛਲ਼ਭਿਞ੍ਞੋ, ਅਸੁਕੋ ਸੀਲਵਾ, ਅਸੁਕੋ ਦੁਸ੍ਸੀਲੋ’’ਤਿ. ਸੋ ਤਾਸਂ ਵਚਨਂ ਸੁਤ੍ਵਾਪਿ ਗੁਣਂ ਤਾਵ ਯਥਾਭੂਤਤੋ ਜਾਨਾਤਿ, ਦੇਯ੍ਯਧਮ੍ਮਂ ਪਨ ਸਮਚਿਤ੍ਤੇਨੇਵ ਦੇਤਿ. ਸਤ੍ਥੁ ਸਨ੍ਤਿਕੇ ਨਿਸੀਦਿਤ੍ਵਾਪਿ ਤਮੇਵ ਗੁਣਂ ਕਥੇਤਿ. ਅਪਰਭਾਗੇ ਸਤ੍ਥਾ ਜੇਤਵਨੇ ਨਿਸੀਦਿਤ੍ਵਾ ਤਂ ਗਹਪਤਿਂ ਸਙ੍ਘੁਪਟ੍ਠਾਕਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਸੂਰਮ੍ਬਟ੍ਠਵਤ੍ਥੁ

੨੫੫. ਅਟ੍ਠਮੇ ਅਵੇਚ੍ਚਪ੍ਪਸਨ੍ਨਾਨਨ੍ਤਿ ਅਵਿਗਚ੍ਛਨਸਭਾਵੇਨ ਅਚਲੇਨ ਪਸਾਦੇਨ ਸਮਨ੍ਨਾਗਤਾਨਂ ਸੂਰਮ੍ਬਟ੍ਠੋ ਅਗ੍ਗੋਤਿ ਦਸ੍ਸੇਤਿ. ਅਯਂ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਨਿਬ੍ਬਤ੍ਤੋ ਸਤ੍ਥੁ ਧਮ੍ਮਕਥਂ ਸੁਤ੍ਵਾ ਸਤ੍ਥਾਰਂ ਏਕਂ ਉਪਾਸਕਂ ਅਵੇਚ੍ਚਪ੍ਪਸਨ੍ਨਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸੋ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਸੇਟ੍ਠਿਕੁਲੇ ਨਿਬ੍ਬਤ੍ਤਿ, ਸੂਰਮ੍ਬਟ੍ਠੋਤਿਸ੍ਸ ਨਾਮਂ ਅਕਂਸੁ.

ਸੋ ਅਪਰਭਾਗੇ ਵਯਪ੍ਪਤ੍ਤੋ ਘਰਾਵਾਸੇ ਪਤਿਟ੍ਠਾਯ ਅਞ੍ਞਤਿਤ੍ਥਿਯਾਨਂ ਉਪਟ੍ਠਾਕੋ ਹੁਤ੍ਵਾ ਚਰਤਿ. ਅਥ ਸਤ੍ਥਾ ਪਚ੍ਚੂਸਸਮਯੇ ਲੋਕਂ ਵੋਲੋਕੇਨ੍ਤੋ ਤਸ੍ਸ ਸੋਤਾਪਤ੍ਤਿਮਗ੍ਗਹੇਤੁਂ ਦਿਸ੍ਵਾ ਭਿਕ੍ਖਾਚਾਰਵੇਲਾਯ ਨਿਵੇਸਨਦ੍ਵਾਰਂ ਅਗਮਾਸਿ. ਸੋ ਦਸਬਲਂ ਦਿਸ੍ਵਾ ਚਿਨ੍ਤੇਸਿ – ‘‘ਸਮਣੋ ਗੋਤਮੋ ਮਹਾਕੁਲੇ ਚੇਵ ਜਾਤੋ, ਲੋਕੇ ਚ ਅਭਿਞ੍ਞਾਤੋ, ਤੇਨਸ੍ਸ ਸਨ੍ਤਿਕਂ ਅਗਮਨਂ ਨਾਮ ਨ ਯੁਤ੍ਤ’’ਨ੍ਤਿ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਪਾਦੇਸੁ ਵਨ੍ਦਿਤ੍ਵਾ ਪਤ੍ਤਂ ਗਹੇਤ੍ਵਾ ਘਰਂ ਪਵੇਸੇਤ੍ਵਾ ਮਹਾਰਹੇ ਪਲ੍ਲਙ੍ਕੇ ਨਿਸੀਦਾਪੇਤ੍ਵਾ ਭਿਕ੍ਖਂ ਦਤ੍ਵਾ ਭਤ੍ਤਕਿਚ੍ਚਪਰਿਯੋਸਾਨੇ ਏਕਮਨ੍ਤਂ ਨਿਸੀਦਿ. ਸਤ੍ਥਾ ਤਸ੍ਸ ਚਰਿਤਵਸੇਨ ਧਮ੍ਮਂ ਦੇਸੇਸਿ. ਦੇਸਨਾਪਰਿਯੋਸਾਨੇ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਸਤ੍ਥਾਪਿ ਤਂ ਦਮੇਤ੍ਵਾ ਵਿਹਾਰਮੇਵ ਗਤੋ.

ਤਤੋ ਮਾਰੋ ਚਿਨ੍ਤੇਸਿ – ‘‘ਅਯਂ ਸੂਰਮ੍ਬਟ੍ਠੋ ਨਾਮ ਅਮ੍ਹਾਕਂ ਸਨ੍ਤਕੋ, ਸਤ੍ਥਾ ਪਨਸ੍ਸ ਅਜ੍ਜ ਗੇਹਂ ਗਤੋ, ਕਿਂ ਨੁ ਖੋ ਸਤ੍ਥੁ ਧਮ੍ਮਂ ਸੁਤ੍ਵਾ ਮਗ੍ਗਪਾਤੁਭਾਵਂ ਅਕਰਿਤ੍ਥਾਤਿ ਯਾਵਸ੍ਸ ਮਮ ਵਿਸਯਾ ਅਤਿਕ੍ਕਨ੍ਤਭਾਵਂ ਵਾ ਅਨਤਿਕ੍ਕਨ੍ਤਭਾਵਂ ਵਾ ਜਾਨਾਮੀ’’ਤਿ ਅਤ੍ਤਨੋ ਕਾਮਰੂਪਿਤਾਯ ਦਸਬਲਸ੍ਸ ਸਰਿਕ੍ਖਕਂ ਰੂਪਂ ਮਾਪੇਤ੍ਵਾ ਚੀਵਰਗ੍ਗਹਣਮ੍ਪਿ ਪਤ੍ਤਗ੍ਗਹਣਮ੍ਪਿ ਬੁਦ੍ਧਾਕਪ੍ਪੇਨੇਵ ਕਤ੍ਵਾ ਦ੍ਵਤ੍ਤਿਂਸਲਕ੍ਖਣਧਰੋ ਹੁਤ੍ਵਾ ਸੂਰਮ੍ਬਟ੍ਠਸ੍ਸ ਗੇਹਦ੍ਵਾਰੇ ਅਟ੍ਠਾਸਿ. ਸੂਰਮ੍ਬਟ੍ਠੋਪਿ ‘‘ਪੁਨ ਦਸਬਲੋ ਆਗਤੋ’’ਤਿ ਸੁਤ੍ਵਾ ‘‘ਬੁਦ੍ਧਾਨਂ ਅਨਿਯ੍ਯਾਨਿਕਗਮਨਂ ਨਾਮ ਨਤ੍ਥਿ, ਕੇਨ ਨੁ ਖੋ ਕਾਰਣੇਨ ਆਗਤੋ’’ਤਿ ਵੇਗੇਨ ‘‘ਦਸਬਲੋ’’ਤਿ ਸਞ੍ਞਾਯ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਅਭਿਵਾਦੇਤ੍ਵਾ ਏਕਮਨ੍ਤਂ ਠਿਤੋ, ‘‘ਭਨ੍ਤੇ, ਤੁਮ੍ਹੇ ਇਦਾਨੇਵ ਇਮਸ੍ਮਿਂ ਗੇਹੇ ਭਤ੍ਤਕਿਚ੍ਚਂ ਕਤ੍ਵਾ ਗਤਾ, ਕਿਂ ਨੁ ਖੋ ਕਾਰਣਂ ਪਟਿਚ੍ਚ ਪੁਨ ਆਗਤਤ੍ਥਾ’’ਤਿ ਆਹ. ‘‘ਸੂਰਮ੍ਬਟ੍ਠ ਮਯਾ ਧਮ੍ਮਂ ਕਥੇਨ੍ਤੇਨ ਏਕਂ ਅਨੁਪਧਾਰੇਤ੍ਵਾ ਕਥਿਤਂ. ਮਯਾ ਹਿ ਪਞ੍ਚਕ੍ਖਨ੍ਧਾ ‘ਸਬ੍ਬੇਵ ਅਨਿਚ੍ਚਾ ਦੁਕ੍ਖਾ ਅਨਤ੍ਤਾ’ਤਿ ਕਥਿਤਾ, ਨ ਪਨੇਤੇ ਸਬ੍ਬੇਵ ਏਵਰੂਪਾ. ਏਕਚ੍ਚੇ ਹਿ ਖਨ੍ਧਾ ਨਿਚ੍ਚਾ ਧੁਵਾ ਸਸ੍ਸਤਾ ਅਤ੍ਥੀ’’ਤਿ ਆਹ.

ਤਤੋ ਸੂਰਮ੍ਬਟ੍ਠੋ ਚਿਨ੍ਤੇਸਿ – ‘‘ਅਯਂ ਕਥਾ ਅਤਿਵਿਯ ਭਾਰਿਯਾ. ਬੁਦ੍ਧਾਨਞ੍ਹਿ ਅਨੁਪਧਾਰੇਤ੍ਵਾ ਕਥਨਂ ਨਾਮ ਨਤ੍ਥਿ, ਦਸਬਲਸ੍ਸ ਮਾਰੋ ਕਿਰ ਪਟਿਪਕ੍ਖੋ, ਅਦ੍ਧਾ ਅਯਂ ਮਾਰੋ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ – ‘‘ਮਾਰੋਸਿ ਤ੍ਵ’’ਨ੍ਤਿ ਆਹ. ਅਰਿਯਸਾਵਕੇਨ ਕਥਿਤਕਥਾ ਤਸ੍ਸ ਫਰਸੁਪ੍ਪਹਾਰੋ ਵਿਯ ਅਹੋਸਿ, ਤਸ੍ਮਾ ਸਕਭਾਵੇਨ ਠਾਤੁਂ ਅਸਕ੍ਕੋਨ੍ਤੋ ‘‘ਆਮ, ਸੂਰਮ੍ਬਟ੍ਠ, ਅਹਂ ਮਾਰੋ’’ਤਿ ਆਹ. ‘‘ਤਾਦਿਸਾਨਂ ਮਾਰਾਨਂ ਸਤਮ੍ਪਿ ਸਹਸ੍ਸਮ੍ਪਿ ਆਗਨ੍ਤ੍ਵਾ ਮਮ ਸਦ੍ਧਂ ਚਾਲੇਤੁਂ ਨ ਸਕ੍ਕੋਤਿ, ਮਹਾਗੋਤਮੋ ਦਸਬਲੋ ਮਯ੍ਹਂ ਧਮ੍ਮਂ ਦੇਸੇਨ੍ਤੋ ‘ਸਬ੍ਬੇ ਸਙ੍ਖਾਰਾ ਅਨਿਚ੍ਚਾ’ਤਿ ਬੋਧੇਤ੍ਵਾ ਦੇਸੇਸਿ, ਮਾ ਮੇ ਘਰਦ੍ਵਾਰੇ ਤਿਟ੍ਠਾ’’ਤਿ ਅਚ੍ਛਰਂ ਪਹਰਿ. ਮਾਰੋ ਤਸ੍ਸ ਵਚਨਂ ਸੁਤ੍ਵਾ ਪਟਿਪ੍ਫਰਿਤ੍ਵਾ ਕਥੇਤੁਂ ਅਸਕ੍ਕੋਨ੍ਤੋ ਤਤ੍ਥੇਵ ਅਨ੍ਤਰਧਾਯਿ. ਸੂਰਮ੍ਬਟ੍ਠੋਪਿ ਸਾਯਨ੍ਹਸਮਯੇ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਮਾਰੇਨ ਕਤਕਿਰਿਯਂ ਕਥੇਤ੍ਵਾ, ‘‘ਭਨ੍ਤੇ, ਏਵਂ ਮਾਰੋ ਮਮ ਸਦ੍ਧਂ ਚਾਲੇਤੁਂ ਵਾਯਮਿਤ੍ਥਾ’’ਤਿ ਆਹ. ਸਤ੍ਥਾ ਏਤਦੇਵ ਕਾਰਣਂ ਅਟ੍ਠੁਪਤ੍ਤਿਂ ਕਤ੍ਵਾ ਇਮਸ੍ਮਿਂ ਸਾਸਨੇ ਸੂਰਮ੍ਬਟ੍ਠਂ ਅਵੇਚ੍ਚਪ੍ਪਸਨ੍ਨਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਜੀਵਕਵਤ੍ਥੁ

੨੫੬. ਨਵਮੇ ਪੁਗ੍ਗਲਪ੍ਪਸਨ੍ਨਾਨਨ੍ਤਿ ਪੁਗ੍ਗਲਿਯਪ੍ਪਸਾਦੇਨ ਸਮਨ੍ਨਾਗਤਾਨਂ ਉਪਾਸਕਾਨਂ ਜੀਵਕੋ ਕੋਮਾਰਭਚ੍ਚੋ ਅਗ੍ਗੋਤਿ ਦਸ੍ਸੇਤਿ. ਸੋ ਹਿ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਨਿਬ੍ਬਤ੍ਤੋ. ਸਤ੍ਥੁ ਧਮ੍ਮਕਥਂ ਸੁਣਨ੍ਤੋ ਸਤ੍ਥਾਰਂ ਏਕਂ ਉਪਾਸਕਂ ਪੁਗ੍ਗਲਪ੍ਪਸਨ੍ਨਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸੋ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹਨਗਰੇ ਅਭਯਰਾਜਕੁਮਾਰਂ ਪਟਿਚ੍ਚ ਸਾਲਵਤਿਯਾ ਨਾਮ ਰੂਪੂਪਜੀਵਿਨਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤੋ. ਰੂਪੂਪਜੀਵਿਨਿਯੋ ਚ ਨਾਮ ਵਿਜਾਤਕਾਲੇ ਸਚੇ ਪੁਤ੍ਤੋ ਹੋਤਿ, ਛਡ੍ਡੇਨ੍ਤਿ. ਸਚੇ ਧੀਤਾ, ਪਟਿਜਗ੍ਗਨ੍ਤਿ. ਇਤਿ ਸਾ ਤਂ ਦਾਰਕਂ ਕਤ੍ਤਰਸੁਪ੍ਪਕੇਨ ਸਙ੍ਕਾਰਕੂਟੇ ਛਡ੍ਡਾਪੇਸਿ. ਅਥ ਨਂ ਅਭਯੋ ਰਾਜਕੁਮਾਰੋ ਰਾਜੁਪਟ੍ਠਾਨਂ ਗਚ੍ਛਨ੍ਤੋ ਤਂ ਦਿਸ੍ਵਾ ‘‘ਕਿਂ, ਭਣੇ, ਏਤਂ ਕਾਕੇਹਿ ਸਮ੍ਪਰਿਕਿਣ੍ਣ’’ਨ੍ਤਿ ਮਨੁਸ੍ਸੇ ਪੇਸੇਤ੍ਵਾ ‘‘ਦਾਰਕੋ ਦੇਵਾ’’ਤਿ. ਜੀਵਤਿ, ਭਣੇਤਿ, ‘‘ਜੀਵਤਿ, ਦੇਵਾ’’ਤਿ ਸੁਤ੍ਵਾ ਅਤ੍ਤਨੋ ਅਨ੍ਤੇਪੁਰੇ ਪੋਸਾਪੇਸਿ. ਤਸ੍ਸ ਜੀਵਤੀਤਿ ਕਥਿਤਤ੍ਤਾ ਜੀਵਕੋਤਿ ਨਾਮਂ ਅਕਂਸੁ, ਕੁਮਾਰੇਨ ਪੋਸਾਪਿਤੋਤਿ ਕੋਮਾਰਭਚ੍ਚੋਤਿ ਨਾਮਂ ਅਕਂਸੁ.

ਸੋ ਅਤ੍ਤਨੋ ਸੋਲ਼ਸਵਸ੍ਸੁਦ੍ਦੇਸਿਕਕਾਲੇ ਤਕ੍ਕਸਿਲਂ ਗਨ੍ਤ੍ਵਾ ਵੇਜ੍ਜਸਿਪ੍ਪਂ ਉਗ੍ਗਣ੍ਹਿਤ੍ਵਾ ਬਿਮ੍ਬਿਸਾਰਰਞ੍ਞੋ ਸਨ੍ਤਿਕਾ ਸਕ੍ਕਾਰਂ ਲਭਿਤ੍ਵਾ ਚਣ੍ਡਪਜ੍ਜੋਤਸ੍ਸ ਰਞ੍ਞੋ ਰੋਗਂ ਫਾਸੁਕਂ ਅਕਾਸਿ. ਸੋ ਤਸ੍ਸ ਪਞ੍ਚ ਤਣ੍ਡੁਲਸਕਟਸਤਾਨਿ ਸੋਲ਼ਸ ਕਹਾਪਣਸਹਸ੍ਸਾਨਿ ਦੁਸ੍ਸਸਹਸ੍ਸਪਰਿਵਾਰਂ ਅਨਗ੍ਘਂ ਸਿਵੇਯ੍ਯਕਂ ਦੁਸ੍ਸਯੁਗਞ੍ਚ ਪੇਸੇਸਿ. ਤਸ੍ਮਿਂ ਸਮਯੇ ਸਤ੍ਥਾ ਰਾਜਗਹਂ ਉਪਨਿਸ੍ਸਾਯ ਗਿਜ੍ਝਕੂਟੇ ਪਬ੍ਬਤੇ ਵਿਹਰਤਿ. ਜੀਵਕੋ ਸਤ੍ਥੁ ਉਸ੍ਸਨ੍ਨਧਾਤੁਕੇ ਕਾਯੇ ਵਿਰੇਚਨਂ ਦਤ੍ਵਾ ਭੇਸਜ੍ਜਂ ਕਰੋਨ੍ਤੋ ‘‘ਚਤ੍ਤਾਰੋ ਪਚ੍ਚਯਾ ਮਮ ਸਨ੍ਤਕਾਵ ਹੋਨ੍ਤੂ’’ਤਿ ਸਤ੍ਥਾਰਂ ਅਤ੍ਤਨੋ ਵਿਹਾਰੇ ਵਸਾਪੇਤ੍ਵਾ ਸਤ੍ਥੁ ਭੇਸਜ੍ਜਂ ਕਤ੍ਵਾ ਤਂ ਦੁਸ੍ਸਯੁਗਂ ਉਪਨੇਤ੍ਵਾ ‘‘ਇਦਂ, ਭਨ੍ਤੇ, ਤੁਮ੍ਹੇਯੇਵ ਪਰਿਭੋਗਂ ਕਰੋਥਾ’’ਤਿ ਵਤ੍ਵਾ ਤੇਨ ਸਦ੍ਧਿਂ ਲਦ੍ਧਂ ਦੁਸ੍ਸਸਹਸ੍ਸਂ ਭਿਕ੍ਖੁਸਙ੍ਘਸ੍ਸ ਅਦਾਸਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੇਨ ਪਨ ਜੀਵਕਵਤ੍ਥੁ ਖਨ੍ਧਕੇ (ਮਹਾਵ. ੩੨੬ ਆਦਯੋ) ਆਗਤਮੇਵ. ਸਤ੍ਥਾ ਅਪਰਭਾਗੇ ਜੇਤਵਨੇ ਵਿਹਰਨ੍ਤੋ ਜੀਵਕਂ ਕੋਮਾਰਭਚ੍ਚਂ ਪੁਗ੍ਗਲਪ੍ਪਸਨ੍ਨਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਨਕੁਲਪਿਤੁਗਹਪਤਿਵਤ੍ਥੁ

੨੫੭. ਦਸਮੇ ਵਿਸ੍ਸਾਸਕਾਨਨ੍ਤਿ ਵਿਸ੍ਸਾਸਿਕਕਥਂ ਕਥੇਨ੍ਤਾਨਂ ਉਪਾਸਕਾਨਂ ਅਨ੍ਤਰੇ, ਨਕੁਲਪਿਤਾ ਗਹਪਤਿ, ਅਗ੍ਗੋਤਿ ਦਸ੍ਸੇਤਿ. ਸੋ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਨਿਬ੍ਬਤ੍ਤੋ ਸਤ੍ਥੁ ਧਮ੍ਮਦੇਸਨਂ ਸੁਣਨ੍ਤੋ ਸਤ੍ਥਾਰਂ ਏਕਂ ਉਪਾਸਕਂ ਵਿਸ੍ਸਾਸਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸੋ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਭਗ੍ਗਰਟ੍ਠੇ ਸੁਸੁਮਾਰਗਿਰਿਨਗਰੇ ਸੇਟ੍ਠਿਕੁਲੇ ਨਿਬ੍ਬਤ੍ਤਿ. ਸਤ੍ਥਾਪਿ ਭਿਕ੍ਖੁਸਙ੍ਘਪਰਿਵੁਤੋ ਚਾਰਿਕਂ ਚਰਮਾਨੋ ਤਂ ਨਗਰਂ ਪਤ੍ਵਾ ਭੇਸਕਲ਼ਾਵਨੇ ਵਿਹਰਤਿ. ਅਥਾਯਂ, ਨਕੁਲਪਿਤਾ ਗਹਪਤਿ, ਸੁਸੁਮਾਰਗਿਰਿਵਾਸੀਹਿ ਸਦ੍ਧਿਂ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਪਠਮਦਸ੍ਸਨੇਨੇਵ ਸੋ ਚ ਭਰਿਯਾ ਚਸ੍ਸ ਦਸਬਲਂ ‘‘ਅਯਂ ਅਮ੍ਹਾਕਂ ਪੁਤ੍ਤੋ’’ਤਿ ਸਞ੍ਞਂ ਪਟ੍ਠਪੇਤ੍ਵਾ ਉਭੋਪਿ ਸਤ੍ਥੁ ਪਾਦੇਸੁ ਨਿਪਤਿਤ੍ਵਾ, ‘‘ਤਾਤ, ਤ੍ਵਂ ਏਤ੍ਤਕਂ ਕਾਲਂ ਅਮ੍ਹੇ ਛਡ੍ਡੇਤ੍ਵਾ ਕਹਂ ਵਿਚਰਸੀ’’ਤਿ ਆਹਂਸੁ. ਅਯਂ ਕਿਰ, ਨਕੁਲਪਿਤਾ ਗਹਪਤਿ, ਪੁਬ੍ਬੇ ਪਞ੍ਚ ਜਾਤਿਸਤਾਨਿ ਦਸਬਲਸ੍ਸ ਪਿਤਾ ਅਹੋਸਿ, ਪਞ੍ਚ ਜਾਤਿਸਤਾਨਿ ਚੂਲ਼ਪਿਤਾ, ਪਞ੍ਚ ਜਾਤਿਸਤਾਨਿ ਮਹਾਪਿਤਾ, ਪਞ੍ਚ ਜਾਤਿਸਤਾਨਿ ਮਾਤੁਲੋ, ਨਕੁਲਮਾਤਾਪਿ ਪਞ੍ਚ ਜਾਤਿਸਤਾਨਿ ਮਾਤਾ ਅਹੋਸਿ, ਪਞ੍ਚ ਜਾਤਿਸਤਾਨਿ ਚੂਲ਼ਮਾਤਾ, ਪਞ੍ਚ ਜਾਤਿਸਤਾਨਿ ਮਹਾਮਾਤਾ, ਪਞ੍ਚ ਜਾਤਿਸਤਾਨਿ ਪਿਤੁਚ੍ਛਾ. ਇਤਿ ਦੀਘਰਤ੍ਤਂ ਅਨੁਗਤਸਿਨੇਹਤ੍ਤਾ ਦਸਬਲਂ ਦਿਸ੍ਵਾਵ ‘‘ਪੁਤ੍ਤੋ’’ਤਿ ਸਞ੍ਞਂ ਕਤ੍ਵਾ ਸਣ੍ਠਾਤੁਂ ਨਾਸਕ੍ਖਿਂਸੁ. ਸਤ੍ਥਾ ਯਾਵ ਤੇਸਂ ਚਿਤ੍ਤਂ ਸਞ੍ਞਤ੍ਤਿਂ ਨ ਗਚ੍ਛਤਿ, ਤਾਵ ‘‘ਅਪੇਥਾ’’ਤਿ ਨਾਵੋਚ. ਅਥ ਨੇਸਂ ਯਥਾਮਨੇਨੇਵ ਸਤਿਂ ਪਟਿਲਭਿਤ੍ਵਾ ਮਜ੍ਝਤ੍ਤਭੂਤਾਨਂ ਆਸਯਂ ਞਤ੍ਵਾ ਧਮ੍ਮਂ ਦੇਸੇਸਿ. ਦੇਸਨਾਪਰਿਯੋਸਾਨੇ ਉਭੋਪਿ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੁ.

ਸਤ੍ਥਾ ਅਪਰਭਾਗੇ ਤੇਸਂ ਮਹਲ੍ਲਕਕਾਲੇ ਪੁਨ ਤਂ ਨਗਰਂ ਅਗਮਾਸਿ. ਤੇ ‘‘ਸਤ੍ਥਾ ਆਗਤੋ’’ਤਿ ਸੁਤ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਪੁਨਦਿਵਸੇ ਅਤ੍ਤਨੋ ਨਿਵੇਸਨੇ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਾਨਗ੍ਗਰਸੇਹਿ ਪਰਿਵਿਸਿਤ੍ਵਾ ਸਤ੍ਥਾਰਂ ਕਤਭਤ੍ਤਕਿਚ੍ਚਂ ਉਪਸਙ੍ਕਮਿਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਏਕਮਨ੍ਤਂ ਨਿਸਿਨ੍ਨੋ ਖੋ ਨਕੁਲਪਿਤਾ ਗਹਪਤਿ, ਭਗਵਨ੍ਤਂ ਏਤਦਵੋਚ – ‘‘ਯਤੋ ਮੇ, ਭਨ੍ਤੇ, ਨਕੁਲਮਾਤਾ ਗਹਪਤਾਨੀ, ਦਹਰਸ੍ਸੇਵ ਦਹਰਾ ਆਨੀਤਾ, ਨਾਭਿਜਾਨਾਮਿ ਨਕੁਲਮਾਤਰਂ ਗਹਪਤਾਨਿਂ ਮਨਸਾਪਿ ਅਤਿਚਰਿਤਾ, ਕੁਤੋ ਪਨ ਕਾਯੇਨ. ਇਚ੍ਛੇਯ੍ਯਾਮ ਮਯਂ, ਭਨ੍ਤੇ, ਦਿਟ੍ਠੇ ਚੇਵ ਧਮ੍ਮੇ ਅਞ੍ਞਮਞ੍ਞਂ ਪਸ੍ਸਿਤੁਂ ਅਭਿਸਮ੍ਪਰਾਯਞ੍ਚ ਅਞ੍ਞਮਞ੍ਞਂ ਪਸ੍ਸਿਤੁ’’ਨ੍ਤਿ. ਨਕੁਲਮਾਤਾਪਿ ਖੋ, ਗਹਪਤਾਨੀ, ਭਗਵਨ੍ਤਂ ਏਤਦਵੋਚ – ‘‘ਯਤੋ ਅਹਂ, ਭਨ੍ਤੇ, ਨਕੁਲਪਿਤੁਨੋ ਗਹਪਤਿਸ੍ਸ ਦਹਰਸ੍ਸੇਵ ਦਹਰਾ ਆਨੀਤਾ, ਨਾਭਿਜਾਨਾਮਿ ਨਕੁਲਪਿਤਰਂ ਗਹਪਤਿਂ ਮਨਸਾਪਿ ਅਤਿਚਰਿਤਾ, ਕੁਤੋ ਪਨ ਕਾਯੇਨ. ਇਚ੍ਛੇਯ੍ਯਾਮ ਮਯਂ, ਭਨ੍ਤੇ, ਦਿਟ੍ਠੇ ਚੇਵ ਧਮ੍ਮੇ ਅਞ੍ਞਮਞ੍ਞਂ ਪਸ੍ਸਿਤੁਂ ਅਭਿਸਮ੍ਪਰਾਯਞ੍ਚ ਅਞ੍ਞਮਞ੍ਞਂ ਪਸ੍ਸਿਤੁ’’ਨ੍ਤਿ. ਅਥ ਅਪਰਭਾਗੇ ਸਤ੍ਥਾ ਜੇਤਵਨੇ ਨਿਸੀਦਿਤ੍ਵਾ ਉਪਾਸਕੇ ਪਟਿਪਾਟਿਯਾ ਠਾਨਨ੍ਤਰੇਸੁ ਠਪੇਨ੍ਤੋ ਇਮਂ ਇਮੇਸਂ ਦ੍ਵਿਨ੍ਨਮ੍ਪਿ ਕਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਨਕੁਲਪਿਤਰਂ ਗਹਪਤਿਂ ਵਿਸ੍ਸਾਸਕਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਛਟ੍ਠਵਗ੍ਗਵਣ੍ਣਨਾ.

ਦਸਸੁਤ੍ਤਪਟਿਮਣ੍ਡਿਤਾਯ ਉਪਾਸਕਪਾਲ਼ਿਯਾ ਵਣ੍ਣਨਾ ਨਿਟ੍ਠਿਤਾ.