੧. ਪਦਸੋਧਨਵਾਰੋ

(ਕ) ਅਨੁਲੋਮਂ

੧੦. (ਕ) ਚਕ੍ਖੁ ਚਕ੍ਖੁਧਾਤੂਤਿ?

ਦਿਬ੍ਬਚਕ੍ਖੁ ਪਞ੍ਞਾਚਕ੍ਖੁ ਚਕ੍ਖੁ, ਨ ਚਕ੍ਖੁਧਾਤੁ. ਚਕ੍ਖੁਧਾਤੁ ਚਕ੍ਖੁ ਚੇਵ ਚਕ੍ਖੁਧਾਤੁ ਚ.

(ਖ) ਚਕ੍ਖੁਧਾਤੁ ਚਕ੍ਖੂਤਿ? ਆਮਨ੍ਤਾ.

(ਕ) ਸੋਤਂ ਸੋਤਧਾਤੂਤਿ?

ਦਿਬ੍ਬਸੋਤਂ ਤਣ੍ਹਾਸੋਤਂ ਸੋਤਂ, ਨ ਸੋਤਧਾਤੁ. ਸੋਤਧਾਤੁ ਸੋਤਞ੍ਚੇਵ ਸੋਤਧਾਤੁ ਚ.

(ਖ) ਸੋਤਧਾਤੁ ਸੋਤਨ੍ਤਿ? ਆਮਨ੍ਤਾ.

(ਕ) ਘਾਨਂ ਘਾਨਧਾਤੂਤਿ? ਆਮਨ੍ਤਾ.

(ਖ) ਘਾਨਧਾਤੁ ਘਾਨਨ੍ਤਿ? ਆਮਨ੍ਤਾ. (ਜਿਵ੍ਹਾਪਿ ਘਾਨਧਾਤੁਸਦਿਸਾ).

(ਕ) ਕਾਯੋ ਕਾਯਧਾਤੂਤਿ?

ਕਾਯਧਾਤੁਂ ਠਪੇਤ੍ਵਾ ਅਵਸੇਸੋ ਕਾਯੋ [ਅਵਸੇਸੋ ਕਾਯੋ ਕਾਯੋ (ਸ੍ਯਾ.)], ਨ ਕਾਯਧਾਤੁ. ਕਾਯਧਾਤੁ ਕਾਯੋ ਚੇਵ ਕਾਯਧਾਤੁ ਚ.

(ਖ) ਕਾਯਧਾਤੁ ਕਾਯੋਤਿ? ਆਮਨ੍ਤਾ.

(ਕ) ਰੂਪਂ ਰੂਪਧਾਤੂਤਿ?

ਰੂਪਧਾਤੁਂ ਠਪੇਤ੍ਵਾ ਅਵਸੇਸਂ ਰੂਪਂ, ਨ ਰੂਪਧਾਤੁ. ਰੂਪਧਾਤੁ ਰੂਪਞ੍ਚੇਵ ਰੂਪਧਾਤੁ ਚ.

(ਖ) ਰੂਪਧਾਤੁ ਰੂਪਨ੍ਤਿ? ਆਮਨ੍ਤਾ. (ਸਦ੍ਦੋ ਘਾਨਸਦਿਸੋ).

(ਕ) ਗਨ੍ਧੋ ਗਨ੍ਧਧਾਤੂਤਿ?

ਸੀਲਗਨ੍ਧੋ ਸਮਾਧਿਗਨ੍ਧੋ ਪਞ੍ਞਾਗਨ੍ਧੋ ਗਨ੍ਧੋ, ਨ ਗਨ੍ਧਧਾਤੁ. ਗਨ੍ਧਧਾਤੁ ਗਨ੍ਧੋ ਚੇਵ ਗਨ੍ਧਧਾਤੁ ਚ.

(ਖ) ਗਨ੍ਧਧਾਤੁ ਗਨ੍ਧੋਤਿ? ਆਮਨ੍ਤਾ.

(ਕ) ਰਸੋ ਰਸਧਾਤੂਤਿ?

ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ ਰਸੋ, ਨ ਰਸਧਾਤੁ. ਰਸਧਾਤੁ ਰਸੋ ਚੇਵ ਰਸਧਾਤੁ ਚ.

(ਖ) ਰਸਧਾਤੁ ਰਸੋਤਿ? ਆਮਨ੍ਤਾ. (ਫੋਟ੍ਠਬ੍ਬੋ ਘਾਨਸਦਿਸੋ).

(ਕ) ਚਕ੍ਖੁਵਿਞ੍ਞਾਣਂ ਚਕ੍ਖੁਵਿਞ੍ਞਾਣਧਾਤੂਤਿ? ਆਮਨ੍ਤਾ.

(ਖ) ਚਕ੍ਖੁਵਿਞ੍ਞਾਣਧਾਤੁ ਚਕ੍ਖੁਵਿਞ੍ਞਾਣਨ੍ਤਿ? ਆਮਨ੍ਤਾ.

ਸੋਤਵਿਞ੍ਞਾਣਂ…ਪੇ… ਘਾਨਵਿਞ੍ਞਾਣਂ… ਜਿਵ੍ਹਾਵਿਞ੍ਞਾਣਂ… ਕਾਯਵਿਞ੍ਞਾਣਂ….

(ਕ) ਮਨੋ ਮਨੋਧਾਤੂਤਿ?

ਮਨੋਧਾਤੁਂ ਠਪੇਤ੍ਵਾ ਅਵਸੇਸੋ ਮਨੋ, ਨ ਮਨੋਧਾਤੁ. ਮਨੋਧਾਤੁ ਮਨੋ ਚੇਵ ਮਨੋਧਾਤੁ ਚ.

(ਖ) ਮਨੋਧਾਤੁ ਮਨੋਤਿ? ਆਮਨ੍ਤਾ.

(ਕ) ਮਨੋਵਿਞ੍ਞਾਣਂ ਮਨੋਵਿਞ੍ਞਾਣਧਾਤੂਤਿ? ਆਮਨ੍ਤਾ.

(ਖ) ਮਨੋਵਿਞ੍ਞਾਣਧਾਤੁ ਮਨੋਵਿਞ੍ਞਾਣਨ੍ਤਿ? ਆਮਨ੍ਤਾ.

(ਕ) ਧਮ੍ਮੋ ਧਮ੍ਮਧਾਤੂਤਿ?

ਧਮ੍ਮਧਾਤੁਂ ਠਪੇਤ੍ਵਾ ਅਵਸੇਸੋ ਧਮ੍ਮੋ, ਨ ਧਮ੍ਮਧਾਤੁ. ਧਮ੍ਮਧਾਤੁ ਧਮ੍ਮੋ ਚੇਵ ਧਮ੍ਮਧਾਤੁ ਚ.

(ਖ) ਧਮ੍ਮਧਾਤੁ ਧਮ੍ਮੋਤਿ? ਆਮਨ੍ਤਾ.

(ਖ) ਪਚ੍ਚਨੀਕਂ

੧੧. (ਕ) ਨ ਚਕ੍ਖੁ ਨ ਚਕ੍ਖੁਧਾਤੂਤਿ? ਆਮਨ੍ਤਾ.

(ਖ) ਨ ਚਕ੍ਖੁਧਾਤੁ ਨ ਚਕ੍ਖੂਤਿ?

ਦਿਬ੍ਬਚਕ੍ਖੁ ਪਞ੍ਞਾਚਕ੍ਖੁ ਨ ਚਕ੍ਖੁਧਾਤੁ, ਚਕ੍ਖੁ. ਚਕ੍ਖੁਞ੍ਚ ਚਕ੍ਖੁਧਾਤੁਞ੍ਚ ਠਪੇਤ੍ਵਾ ਅਵਸੇਸਂ ਨ ਚੇਵ ਚਕ੍ਖੁ ਨ ਚ ਚਕ੍ਖੁਧਾਤੁ.

(ਕ) ਨ ਸੋਤਂ ਨ ਸੋਤਧਾਤੂਤਿ? ਆਮਨ੍ਤਾ.

(ਖ) ਨ ਸੋਤਧਾਤੁ ਨ ਸੋਤਨ੍ਤਿ?

ਦਿਬ੍ਬਸੋਤਂ ਤਣ੍ਹਾਸੋਤਂ ਨ ਸੋਤਧਾਤੁ, ਸੋਤਂ. ਸੋਤਞ੍ਚ ਸੋਤਧਾਤੁਞ੍ਚ ਠਪੇਤ੍ਵਾ ਅਵਸੇਸਂ ਨ ਚੇਵ ਸੋਤਂ ਨ ਚ ਸੋਤਧਾਤੁ.

(ਕ) ਨ ਘਾਨਂ ਨ ਘਾਨਧਾਤੂਤਿ? ਆਮਨ੍ਤਾ.

(ਖ) ਨ ਘਾਨਧਾਤੁ ਨ ਘਾਨਨ੍ਤਿ? ਆਮਨ੍ਤਾ.

ਨ ਜਿਵ੍ਹਾ… (ਸਂਖਿਤ੍ਤਂ [ਯਂ ਸਂਖਿਤ੍ਤਂ (ਸ੍ਯਾ.)], ਉਭਤੋ ਆਮਨ੍ਤਾ).

(ਕ) ਨ ਕਾਯੋ ਨ ਕਾਯਧਾਤੂਤਿ? ਆਮਨ੍ਤਾ.

(ਖ) ਨ ਕਾਯਧਾਤੁ ਨ ਕਾਯੋਤਿ?

ਕਾਯਧਾਤੁਂ ਠਪੇਤ੍ਵਾ ਅਵਸੇਸੋ ਨ ਕਾਯਧਾਤੁ, ਕਾਯੋ. ਕਾਯਞ੍ਚ ਕਾਯਧਾਤੁਞ੍ਚ ਠਪੇਤ੍ਵਾ ਅਵਸੇਸੋ [ਅਵਸੇਸੋ ਕਾਯੋ (ਸ੍ਯਾ.)] ਨ ਚੇਵ ਕਾਯੋ ਨ ਚ ਕਾਯਧਾਤੁ.

(ਕ) ਨ ਰੂਪਂ ਨ ਰੂਪਧਾਤੂਤਿ? ਆਮਨ੍ਤਾ.

(ਖ) ਨ ਰੂਪਧਾਤੁ ਨ ਰੂਪਨ੍ਤਿ?

ਰੂਪਧਾਤੁਂ ਠਪੇਤ੍ਵਾ ਅਵਸੇਸਂ ਨ ਰੂਪਧਾਤੁ, ਰੂਪਂ. ਰੂਪਞ੍ਚ ਰੂਪਧਾਤੁਞ੍ਚ ਠਪੇਤ੍ਵਾ ਅਵਸੇਸਂ ਨ ਚੇਵ ਰੂਪਂ ਨ ਚ ਰੂਪਧਾਤੁ.

ਨ ਸਦ੍ਦੋ…ਪੇ… ਨ ਗਨ੍ਧੋ ਨ ਗਨ੍ਧਧਾਤੂਤਿ? ਆਮਨ੍ਤਾ.

ਨ ਗਨ੍ਧਧਾਤੁ ਨ ਗਨ੍ਧੋਤਿ?

ਸੀਲਗਨ੍ਧੋ ਸਮਾਧਿਗਨ੍ਧੋ ਪਞ੍ਞਾਗਨ੍ਧੋ ਨ ਗਨ੍ਧਧਾਤੁ, ਗਨ੍ਧੋ. ਗਨ੍ਧਞ੍ਚ ਗਨ੍ਧਧਾਤੁਞ੍ਚ ਠਪੇਤ੍ਵਾ ਅਵਸੇਸੋ ਨ ਚੇਵ ਗਨ੍ਧੋ ਨ ਚ ਗਨ੍ਧਧਾਤੁ.

(ਕ) ਨ ਰਸੋ ਨ ਰਸਧਾਤੂਤਿ? ਆਮਨ੍ਤਾ.

(ਖ) ਨ ਰਸਧਾਤੁ ਨ ਰਸੋਤਿ?

ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ ਨ ਰਸਧਾਤੁ, ਰਸੋ. ਰਸਞ੍ਚ ਰਸਧਾਤੁਞ੍ਚ ਠਪੇਤ੍ਵਾ ਅਵਸੇਸੋ ਨ ਚੇਵ ਰਸੋ ਨ ਚ ਰਸਧਾਤੁ.

ਨ ਫੋਟ੍ਠਬ੍ਬੋ…ਪੇ… ਨ ਚਕ੍ਖੁਵਿਞ੍ਞਾਣਂ ਨ ਚਕ੍ਖੁਵਿਞ੍ਞਾਣਧਾਤੂਤਿ? ਆਮਨ੍ਤਾ.

ਨ ਚਕ੍ਖੁਵਿਞ੍ਞਾਣਧਾਤੁ ਨ ਚਕ੍ਖੁਵਿਞ੍ਞਾਣਨ੍ਤਿ? ਆਮਨ੍ਤਾ.

ਨ ਸੋਤਵਿਞ੍ਞਾਣਂ…ਪੇ… ਨ ਘਾਨਵਿਞ੍ਞਾਣਂ… ਨ ਜਿਵ੍ਹਾਵਿਞ੍ਞਾਣਂ… ਨ ਕਾਯਵਿਞ੍ਞਾਣਂ….

(ਕ) ਨ ਮਨੋ ਨ ਮਨੋਧਾਤੂਤਿ? ਆਮਨ੍ਤਾ.

(ਖ) ਨ ਮਨੋਧਾਤੁ ਨ ਮਨੋਤਿ?

ਮਨੋਧਾਤੁਂ ਠਪੇਤ੍ਵਾ ਅਵਸੇਸੋ ਨ ਮਨੋਧਾਤੁ, ਮਨੋ. ਮਨਞ੍ਚ ਮਨੋਧਾਤੁਞ੍ਚ ਠਪੇਤ੍ਵਾ ਅਵਸੇਸੋ ਨ ਚੇਵ ਮਨੋ ਨ ਚ ਮਨੋਧਾਤੁ.

(ਕ) ਨ ਮਨੋਵਿਞ੍ਞਾਣਂ ਨ ਮਨੋਵਿਞ੍ਞਾਣਧਾਤੂਤਿ? ਆਮਨ੍ਤਾ.

(ਖ) ਨ ਮਨੋਵਿਞ੍ਞਾਣਧਾਤੁ ਨ ਮਨੋਵਿਞ੍ਞਾਣਨ੍ਤਿ? ਆਮਨ੍ਤਾ.

(ਕ) ਨ ਧਮ੍ਮੋ ਨ ਧਮ੍ਮਧਾਤੂਤਿ? ਆਮਨ੍ਤਾ.

(ਖ) ਨ ਧਮ੍ਮਧਾਤੁ ਨ ਧਮ੍ਮੋਤਿ?

ਧਮ੍ਮਧਾਤੁਂ ਠਪੇਤ੍ਵਾ ਅਵਸੇਸੋ ਨ ਧਮ੍ਮਧਾਤੁ, ਧਮ੍ਮੋ. ਧਮ੍ਮਞ੍ਚ ਧਮ੍ਮਧਾਤੁਞ੍ਚ ਠਪੇਤ੍ਵਾ ਅਵਸੇਸੋ ਨ ਚੇਵ ਧਮ੍ਮੋ ਨ ਚ ਧਮ੍ਮਧਾਤੁ.