(੪) ਮੂਲਮੂਲਕਨਯੋ

੫੯. (ਕ) ਯੇ ਕੇਚਿ ਕੁਸਲਾ ਧਮ੍ਮਾ, ਸਬ੍ਬੇ ਤੇ ਕੁਸਲਮੂਲਮੂਲਕਾਤਿ? ਆਮਨ੍ਤਾ.

(ਖ) ਯੇ ਵਾ ਪਨ ਕੁਸਲਮੂਲਮੂਲਕਾ, ਸਬ੍ਬੇ ਤੇ ਧਮ੍ਮਾ ਕੁਸਲਾਤਿ?

ਕੁਸਲਸਮੁਟ੍ਠਾਨਂ ਰੂਪਂ ਕੁਸਲਮੂਲਮੂਲਕਂ ਨ ਕੁਸਲਂ. ਕੁਸਲਂ ਕੁਸਲਮੂਲਮੂਲਕਞ੍ਚੇਵ ਕੁਸਲਞ੍ਚ.

੬੦. (ਕ) ਯੇ ਕੇਚਿ ਕੁਸਲਾ ਧਮ੍ਮਾ, ਸਬ੍ਬੇ ਤੇ ਕੁਸਲਮੂਲੇਨ ਏਕਮੂਲਮੂਲਕਾਤਿ? ਆਮਨ੍ਤਾ.

(ਖ) ਯੇ ਵਾ ਪਨ ਕੁਸਲਮੂਲੇਨ ਏਕਮੂਲਮੂਲਕਾ, ਸਬ੍ਬੇ ਤੇ ਧਮ੍ਮਾ ਕੁਸਲਾਤਿ?

ਕੁਸਲਸਮੁਟ੍ਠਾਨਂ ਰੂਪਂ ਕੁਸਲਮੂਲੇਨ ਏਕਮੂਲਮੂਲਕਂ, ਨ ਕੁਸਲਂ. ਕੁਸਲਂ ਕੁਸਲਮੂਲੇਨ ਏਕਮੂਲਮੂਲਕਞ੍ਚੇਵ ਕੁਸਲਞ੍ਚ.

੬੧. (ਕ) ਯੇ ਕੇਚਿ ਕੁਸਲਮੂਲੇਨ ਏਕਮੂਲਮੂਲਕਾ ਧਮ੍ਮਾ, ਸਬ੍ਬੇ ਤੇ ਕੁਸਲਮੂਲੇਨ ਅਞ੍ਞਮਞ੍ਞਮੂਲਮੂਲਕਾਤਿ?

ਮੂਲਾਨਿ ਯਾਨਿ ਏਕਤੋ ਉਪ੍ਪਜ੍ਜਨ੍ਤਿ ਕੁਸਲਮੂਲਾਨਿ ਏਕਮੂਲਮੂਲਕਾਨਿ ਚੇਵ ਅਞ੍ਞਮਞ੍ਞਮੂਲਮੂਲਕਾਨਿ ਚ. ਅਵਸੇਸਾ ਕੁਸਲਮੂਲਸਹਜਾਤਾ ਧਮ੍ਮਾ ਕੁਸਲਮੂਲੇਨ ਏਕਮੂਲਮੂਲਕਾ, ਨ ਚ ਅਞ੍ਞਮਞ੍ਞਮੂਲਮੂਲਕਾ.

(ਖ) ਯੇ ਵਾ ਪਨ ਕੁਸਲਮੂਲੇਨ ਅਞ੍ਞਮਞ੍ਞਮੂਲਮੂਲਕਾ, ਸਬ੍ਬੇ ਤੇ ਧਮ੍ਮਾ ਕੁਸਲਾਤਿ? ਆਮਨ੍ਤਾ.