(੩) ਮੂਲਕਨਯੋ

੫੬. (ਕ) ਯੇ ਕੇਚਿ ਕੁਸਲਾ ਧਮ੍ਮਾ, ਸਬ੍ਬੇ ਤੇ ਕੁਸਲਮੂਲਕਾਤਿ? ਆਮਨ੍ਤਾ.

(ਖ) ਯੇ ਵਾ ਪਨ ਕੁਸਲਮੂਲਕਾ, ਸਬ੍ਬੇ ਤੇ ਧਮ੍ਮਾ ਕੁਸਲਾਤਿ?

ਕੁਸਲਸਮੁਟ੍ਠਾਨਂ ਰੂਪਂ ਕੁਸਲਮੂਲਕਂ ਨ ਕੁਸਲਂ. ਕੁਸਲਂ ਕੁਸਲਮੂਲਕਞ੍ਚੇਵ ਕੁਸਲਞ੍ਚ.

੫੭. (ਕ) ਯੇ ਕੇਚਿ ਕੁਸਲਾ ਧਮ੍ਮਾ, ਸਬ੍ਬੇ ਤੇ ਕੁਸਲਮੂਲੇਨ ਏਕਮੂਲਕਾਤਿ? ਆਮਨ੍ਤਾ.

(ਖ) ਯੇ ਵਾ ਪਨ ਕੁਸਲਮੂਲੇਨ ਏਕਮੂਲਕਾ, ਸਬ੍ਬੇ ਤੇ ਧਮ੍ਮਾ ਕੁਸਲਾਤਿ?

ਕੁਸਲਸਮੁਟ੍ਠਾਨਂ ਰੂਪਂ ਕੁਸਲਮੂਲੇਨ ਏਕਮੂਲਕਂ, ਨ ਕੁਸਲਂ. ਕੁਸਲਂ ਕੁਸਲਮੂਲੇਨ ਏਕਮੂਲਕਞ੍ਚੇਵ ਕੁਸਲਞ੍ਚ.

੫੮. (ਕ) ਯੇ ਕੇਚਿ ਕੁਸਲਮੂਲੇਨ ਏਕਮੂਲਕਾ ਧਮ੍ਮਾ, ਸਬ੍ਬੇ ਤੇ ਕੁਸਲਮੂਲੇਨ ਅਞ੍ਞਮਞ੍ਞਮੂਲਕਾਤਿ?

ਮੂਲਾਨਿ ਯਾਨਿ ਏਕਤੋ ਉਪ੍ਪਜ੍ਜਨ੍ਤਿ ਕੁਸਲਮੂਲਾਨਿ ਏਕਮੂਲਕਾਨਿ ਚੇਵ ਅਞ੍ਞਮਞ੍ਞਮੂਲਕਾਨਿ ਚ. ਅਵਸੇਸਾ ਕੁਸਲਮੂਲਸਹਜਾਤਾ ਧਮ੍ਮਾ ਕੁਸਲਮੂਲੇਨ ਏਕਮੂਲਕਾ, ਨ ਚ ਅਞ੍ਞਮਞ੍ਞਮੂਲਕਾ.

(ਖ) ਯੇ ਵਾ ਪਨ ਕੁਸਲਮੂਲੇਨ ਅਞ੍ਞਮਞ੍ਞਮੂਲਕਾ, ਸਬ੍ਬੇ ਤੇ ਧਮ੍ਮਾ ਕੁਸਲਾਤਿ? ਆਮਨ੍ਤਾ.