੩. ਧਾਤੁਵਿਭਙ੍ਗੋ
੧. ਸੁਤ੍ਤਨ੍ਤਭਾਜਨੀਯਂ
੧੭੨. ਛ ਧਾਤੁਯੋ – ਪਥਵੀਧਾਤੁ [ਪਠਵੀਧਾਤੁ (ਸੀ. ਸ੍ਯਾ.) ਏਵਮੁਪਰਿਪਿ], ਆਪੋਧਾਤੁ, ਤੇਜੋਧਾਤੁ, ਵਾਯੋਧਾਤੁ, ਆਕਾਸਧਾਤੁ, ਵਿਞ੍ਞਾਣਧਾਤੁ.
੧੭੩. ਤਤ੍ਥ ਕਤਮਾ ਪਥਵੀਧਾਤੁ? ਪਥਵੀਧਾਤੁਦ੍ਵਯਂ – ਅਤ੍ਥਿ ਅਜ੍ਝਤ੍ਤਿਕਾ, ਅਤ੍ਥਿ ਬਾਹਿਰਾ. ਤਤ੍ਥ ਕਤਮਾ ਅਜ੍ਝਤ੍ਤਿਕਾ ਪਥਵੀਧਾਤੁ? ਯਂ ਅਜ੍ਝਤ੍ਤਂ ਪਚ੍ਚਤ੍ਤਂ ਕਕ੍ਖਲ਼ਂ ਖਰਿਗਤਂ ਕਕ੍ਖਲ਼ਤ੍ਤਂ ਕਕ੍ਖਲ਼ਭਾਵੋ ਅਜ੍ਝਤ੍ਤਂ ਉਪਾਦਿਨ੍ਨਂ, ਸੇਯ੍ਯਥਿਦਂ – ਕੇਸਾ ਲੋਮਾ ਨਖਾ ਦਨ੍ਤਾ ਤਚੋ ਮਂਸਂ ਨ੍ਹਾਰੁ [ਨਹਾਰੁ (ਸੀ.)] ਅਟ੍ਠਿ ਅਟ੍ਠਿਮਿਞ੍ਜਂ [ਅਟ੍ਠਿਮਿਞ੍ਜਾ (ਸੀ.)] ਵਕ੍ਕਂ ਹਦਯਂ ਯਕਨਂ ਕਿਲੋਮਕਂ ਪਿਹਕਂ ਪਪ੍ਫਾਸਂ ਅਨ੍ਤਂ ਅਨ੍ਤਗੁਣਂ ਉਦਰਿਯਂ ਕਰੀਸਂ, ਯਂ ਵਾ ਪਨਞ੍ਞਮ੍ਪਿ ਅਤ੍ਥਿ ਅਜ੍ਝਤ੍ਤਂ ਪਚ੍ਚਤ੍ਤਂ ਕਕ੍ਖਲ਼ਂ ਖਰਿਗਤਂ ਕਕ੍ਖਲ਼ਤ੍ਤਂ ਕਕ੍ਖਲ਼ਭਾਵੋ ਅਜ੍ਝਤ੍ਤਂ ਉਪਾਦਿਨ੍ਨਂ – ਅਯਂ ਵੁਚ੍ਚਤਿ ‘ਅਜ੍ਝਤ੍ਤਿਕਾ ਪਥਵੀਧਾਤੁ’.
ਤਤ੍ਥ ਕਤਮਾ ਬਾਹਿਰਾ ਪਥਵੀਧਾਤੁ? ਯਂ ਬਾਹਿਰਂ ਕਕ੍ਖਲ਼ਂ ਖਰਿਗਤਂ ਕਕ੍ਖਲ਼ਤ੍ਤਂ ਕਕ੍ਖਲ਼ਭਾਵੋ ਬਹਿਦ੍ਧਾ ਅਨੁਪਾਦਿਨ੍ਨਂ, ਸੇਯ੍ਯਥਿਦਂ – ਅਯੋ ਲੋਹਂ ਤਿਪੁ ਸੀਸਂ ਸਜ੍ਝਂ [ਸਜ੍ਝੁ (ਸ੍ਯਾ.)] ਮੁਤ੍ਤਾ ਮਣਿ ਵੇਲ਼ੁਰਿਯੋ ਸਙ੍ਖੋ ਸਿਲਾ ਪਵਾਲ਼ਂ ਰਜਤਂ ਜਾਤਰੂਪਂ ਲੋਹਿਤਙ੍ਕੋ [ਲੋਹਿਤਙ੍ਗੋ (ਸ੍ਯਾ. ਕ.), ਲੋਹਿਤਕੋ (?)] ਮਸਾਰਗਲ੍ਲਂ ਤਿਣਂ ਕਟ੍ਠਂ ਸਕ੍ਖਰਾ ਕਠਲਂ [ਕਥਲਂ (ਕ.)] ਭੂਮਿ ਪਾਸਾਣੋ ਪਬ੍ਬਤੋ, ਯਂ ਵਾ ਪਨਞ੍ਞਮ੍ਪਿ ਅਤ੍ਥਿ ਬਾਹਿਰਂ ਕਕ੍ਖਲ਼ਂ ਖਰਿਗਤਂ ਕਕ੍ਖਲ਼ਤ੍ਤਂ ਕਕ੍ਖਲ਼ਭਾਵੋ ਬਹਿਦ੍ਧਾ ਅਨੁਪਾਦਿਨ੍ਨਂ – ਅਯਂ ਵੁਚ੍ਚਤਿ ‘ਬਾਹਿਰਾ ਪਥਵੀਧਾਤੁ’. ਯਾ ਚ ਅਜ੍ਝਤ੍ਤਿਕਾ ਪਥਵੀਧਾਤੁ ਯਾ ਚ ਬਾਹਿਰਾ ਪਥਵੀਧਾਤੁ, ਤਦੇਕਜ੍ਝਂ ਅਭਿਸਞ੍ਞੂਹਿਤ੍ਵਾ ਅਭਿਸਙ੍ਖਿਪਿਤ੍ਵਾ – ਅਯਂ ਵੁਚ੍ਚਤਿ ‘‘ਪਥਵੀਧਾਤੁ’’.
੧੭੪. ਤਤ੍ਥ ਕਤਮਾ ਆਪੋਧਾਤੁ? ਆਪੋਧਾਤੁਦ੍ਵਯਂ – ਅਤ੍ਥਿ ਅਜ੍ਝਤ੍ਤਿਕਾ, ਅਤ੍ਥਿ ਬਾਹਿਰਾ. ਤਤ੍ਥ ਕਤਮਾ ਅਜ੍ਝਤ੍ਤਿਕਾ ਆਪੋਧਾਤੁ? ਯਂ ਅਜ੍ਝਤ੍ਤਂ ਪਚ੍ਚਤ੍ਤਂ ਆਪੋ ਆਪੋਗਤਂ ਸਿਨੇਹੋ ਸਿਨੇਹਗਤਂ [ਸ੍ਨੇਹੋ ਸ੍ਨੇਹਗਤਂ (ਸ੍ਯਾ.)] ਬਨ੍ਧਨਤ੍ਤਂ ਰੂਪਸ੍ਸ ਅਜ੍ਝਤ੍ਤਂ ਉਪਾਦਿਨ੍ਨਂ, ਸੇਯ੍ਯਥਿਦਂ – ਪਿਤ੍ਤਂ ਸੇਮ੍ਹਂ ਪੁਬ੍ਬੋ ਲੋਹਿਤਂ ਸੇਦੋ ਮੇਦੋ ਅਸ੍ਸੁ ਵਸਾ ਖੇਲ਼ੋ ਸਿਙ੍ਘਾਣਿਕਾ ਲਸਿਕਾ ਮੁਤ੍ਤਂ, ਯਂ ਵਾ ਪਨਞ੍ਞਮ੍ਪਿ ਅਤ੍ਥਿ ਅਜ੍ਝਤ੍ਤਂ ਪਚ੍ਚਤ੍ਤਂ ਆਪੋ ਆਪੋਗਤਂ ਸਿਨੇਹੋ ਸਿਨੇਹਗਤਂ ਬਨ੍ਧਨਤ੍ਤਂ ਰੂਪਸ੍ਸ ਅਜ੍ਝਤ੍ਤਂ ਉਪਾਦਿਨ੍ਨਂ – ਅਯਂ ਵੁਚ੍ਚਤਿ ‘ਅਜ੍ਝਤ੍ਤਿਕਾ ਆਪੋਧਾਤੁ’.
ਤਤ੍ਥ ਕਤਮਾ ਬਾਹਿਰਾ ਆਪੋਧਾਤੁ? ਯਂ ਬਾਹਿਰਂ ਆਪੋ ਆਪੋਗਤਂ ਸਿਨੇਹੋ ਸਿਨੇਹਗਤਂ ਬਨ੍ਧਨਤ੍ਤਂ ਰੂਪਸ੍ਸ ਬਹਿਦ੍ਧਾ ਅਨੁਪਾਦਿਨ੍ਨਂ, ਸੇਯ੍ਯਥਿਦਂ – ਮੂਲਰਸੋ ਖਨ੍ਧਰਸੋ ਤਚਰਸੋ ਪਤ੍ਤਰਸੋ ਪੁਪ੍ਫਰਸੋ ਫਲਰਸੋ ਖੀਰਂ ਦਧਿ ਸਪ੍ਪਿ ਨਵਨੀਤਂ ਤੇਲਂ ਮਧੁ ਫਾਣਿਤਂ ਭੁਮ੍ਮਾਨਿ ਵਾ ਉਦਕਾਨਿ ਅਨ੍ਤਲਿਕ੍ਖਾਨਿ ਵਾ, ਯਂ ਵਾ ਪਨਞ੍ਞਮ੍ਪਿ ਅਤ੍ਥਿ ਬਾਹਿਰਂ ਆਪੋ ਆਪੋਗਤਂ ਸਿਨੇਹੋ ਸਿਨੇਹਗਤਂ ਬਨ੍ਧਨਤ੍ਤਂ ਰੂਪਸ੍ਸ ਬਹਿਦ੍ਧਾ ਅਨੁਪਾਦਿਨ੍ਨਂ – ਅਯਂ ਵੁਚ੍ਚਤਿ ‘ਬਾਹਿਰਾ ਆਪੋਧਾਤੁ’. ਯਾ ਚ ਅਜ੍ਝਤ੍ਤਿਕਾ ਆਪੋਧਾਤੁ ਯਾ ਚ ਬਾਹਿਰਾ ਆਪੋਧਾਤੁ, ਤਦੇਕਜ੍ਝਂ ਅਭਿਸਞ੍ਞੂਹਿਤ੍ਵਾ ਅਭਿਸਙ੍ਖਿਪਿਤ੍ਵਾ – ਅਯਂ ਵੁਚ੍ਚਤਿ ‘‘ਆਪੋਧਾਤੁ’’.
੧੭੫. ਤਤ੍ਥ ਕਤਮਾ ਤੇਜੋਧਾਤੁ? ਤੇਜੋਧਾਤੁਦ੍ਵਯਂ – ਅਤ੍ਥਿ ਅਜ੍ਝਤ੍ਤਿਕਾ, ਅਤ੍ਥਿ ਬਾਹਿਰਾ. ਤਤ੍ਥ ਕਤਮਾ ਅਜ੍ਝਤ੍ਤਿਕਾ ਤੇਜੋਧਾਤੁ? ਯਂ ਅਜ੍ਝਤ੍ਤਂ ਪਚ੍ਚਤ੍ਤਂ ਤੇਜੋ ਤੇਜੋਗਤਂ ਉਸ੍ਮਾ ਉਸ੍ਮਾਗਤਂ ਉਸੁਮਂ ਉਸੁਮਗਤਂ ਅਜ੍ਝਤ੍ਤਂ ਉਪਾਦਿਨ੍ਨਂ, ਸੇਯ੍ਯਥਿਦਂ – ਯੇਨ ਚ ਸਨ੍ਤਪ੍ਪਤਿ ਯੇਨ ਚ ਜੀਰੀਯਤਿ ਯੇਨ ਚ ਪਰਿਡਯ੍ਹਤਿ ਯੇਨ ਚ ਅਸਿਤਪੀਤਖਾਯਿਤਸਾਯਿਤਂ ਸਮ੍ਮਾ ਪਰਿਣਾਮਂ ਗਚ੍ਛਤਿ, ਯਂ ਵਾ ਪਨਞ੍ਞਮ੍ਪਿ ਅਤ੍ਥਿ ਅਜ੍ਝਤ੍ਤਂ ਪਚ੍ਚਤ੍ਤਂ ਤੇਜੋ ਤੇਜੋਗਤਂ ਉਸ੍ਮਾ ਉਸ੍ਮਾਗਤਂ ਉਸੁਮਂ ਉਸੁਮਗਤਂ ਅਜ੍ਝਤ੍ਤਂ ਉਪਾਦਿਨ੍ਨਂ – ਅਯਂ ਵੁਚ੍ਚਤਿ ‘ਅਜ੍ਝਤ੍ਤਿਕਾ ਤੇਜੋਧਾਤੁ’.
ਤਤ੍ਥ ਕਤਮਾ ਬਾਹਿਰਾ ਤੇਜੋਧਾਤੁ? ਯਂ ਬਾਹਿਰਂ ਤੇਜੋ ਤੇਜੋਗਤਂ ਉਸ੍ਮਾ ਉਸ੍ਮਾਗਤਂ ਉਸੁਮਂ ਉਸੁਮਗਤਂ ਬਹਿਦ੍ਧਾ ਅਨੁਪਾਦਿਨ੍ਨਂ, ਸੇਯ੍ਯਥਿਦਂ – ਕਟ੍ਠਗ੍ਗਿ ਪਲਾਲਗ੍ਗਿ [ਸਕਲਿਕਗ੍ਗਿ (ਸਬ੍ਬਤ੍ਥ)] ਤਿਣਗ੍ਗਿ ਗੋਮਯਗ੍ਗਿ ਥੁਸਗ੍ਗਿ ਸਙ੍ਕਾਰਗ੍ਗਿ ਇਨ੍ਦਗ੍ਗਿ ਅਗ੍ਗਿਸਨ੍ਤਾਪੋ ਸੂਰਿਯਸਨ੍ਤਾਪੋ ਕਟ੍ਠਸਨ੍ਨਿਚਯਸਨ੍ਤਾਪੋ ਤਿਣਸਨ੍ਨਿਚਯਸਨ੍ਤਾਪੋ ਧਞ੍ਞਸਨ੍ਨਿਚਯਸਨ੍ਤਾਪੋ ਭਣ੍ਡਸਨ੍ਨਿਚਯਸਨ੍ਤਾਪੋ, ਯਂ ਵਾ ਪਨਞ੍ਞਮ੍ਪਿ ਅਤ੍ਥਿ ਬਾਹਿਰਂ ਤੇਜੋ ਤੇਜੋਗਤਂ ਉਸ੍ਮਾ ਉਸ੍ਮਾਗਤਂ ਉਸੁਮਂ ਉਸੁਮਗਤਂ ਬਹਿਦ੍ਧਾ ਅਨੁਪਾਦਿਨ੍ਨਂ – ਅਯਂ ਵੁਚ੍ਚਤਿ ‘ਬਾਹਿਰਾ ਤੇਜੋਧਾਤੁ’. ਯਾ ਚ ਅਜ੍ਝਤ੍ਤਿਕਾ ਤੇਜੋਧਾਤੁ ਯਾ ਚ ਬਾਹਿਰਾ ਤੇਜੋਧਾਤੁ, ਤਦੇਕਜ੍ਝਂ ਅਭਿਸਞ੍ਞੂਹਿਤ੍ਵਾ ਅਭਿਸਙ੍ਖਿਪਿਤ੍ਵਾ – ਅਯਂ ਵੁਚ੍ਚਤਿ ‘‘ਤੇਜੋਧਾਤੁ’’.
੧੭੬. ਤਤ੍ਥ ਕਤਮਾ ਵਾਯੋਧਾਤੁ? ਵਾਯੋਧਾਤੁਦ੍ਵਯਂ – ਅਤ੍ਥਿ ਅਜ੍ਝਤ੍ਤਿਕਾ, ਅਤ੍ਥਿ ਬਾਹਿਰਾ. ਤਤ੍ਥ ਕਤਮਾ ਅਜ੍ਝਤ੍ਤਿਕਾ ਵਾਯੋਧਾਤੁ? ਯਂ ਅਜ੍ਝਤ੍ਤਂ ਪਚ੍ਚਤ੍ਤਂ ਵਾਯੋ ਵਾਯੋਗਤਂ ਥਮ੍ਭਿਤਤ੍ਤਂ ਰੂਪਸ੍ਸ ਅਜ੍ਝਤ੍ਤਂ ਉਪਾਦਿਨ੍ਨਂ, ਸੇਯ੍ਯਥਿਦਂ – ਉਦ੍ਧਙ੍ਗਮਾ ਵਾਤਾ ਅਧੋਗਮਾ ਵਾਤਾ ਕੁਚ੍ਛਿਸਯਾ ਵਾਤਾ ਕੋਟ੍ਠਾਸਯਾ [ਕੋਟ੍ਠਸਯਾ (ਸੀ. ਸ੍ਯਾ.)] ਵਾਤਾ ਅਙ੍ਗਮਙ੍ਗਾਨੁਸਾਰਿਨੋ ਵਾਤਾ ਸਤ੍ਥਕਵਾਤਾ ਖੁਰਕਵਾਤਾ ਉਪ੍ਪਲਕਵਾਤਾ ਅਸ੍ਸਾਸੋ ਪਸ੍ਸਾਸੋ ਇਤਿ ਵਾ, ਯਂ ਵਾ ਪਨਞ੍ਞਮ੍ਪਿ ਅਤ੍ਥਿ ਅਜ੍ਝਤ੍ਤਂ ਪਚ੍ਚਤ੍ਤਂ ਵਾਯੋ ਵਾਯੋਗਤਂ ਥਮ੍ਭਿਤਤ੍ਤਂ ਰੂਪਸ੍ਸ ਅਜ੍ਝਤ੍ਤਂ ਉਪਾਦਿਨ੍ਨਂ – ਅਯਂ ਵੁਚ੍ਚਤਿ ‘ਅਜ੍ਝਤ੍ਤਿਕਾ ਵਾਯੋਧਾਤੁ’.
ਤਤ੍ਥ ਕਤਮਾ ਬਾਹਿਰਾ ਵਾਯੋਧਾਤੁ? ਯਂ ਬਾਹਿਰਂ ਵਾਯੋ ਵਾਯੋਗਤਂ ਥਮ੍ਭਿਤਤ੍ਤਂ ਰੂਪਸ੍ਸ ਬਹਿਦ੍ਧਾ ਅਨੁਪਾਦਿਨ੍ਨਂ, ਸੇਯ੍ਯਥਿਦਂ – ਪੁਰਤ੍ਥਿਮਾ ਵਾਤਾ ਪਚ੍ਛਿਮਾ ਵਾਤਾ ਉਤ੍ਤਰਾ ਵਾਤਾ ਦਕ੍ਖਿਣਾ ਵਾਤਾ ਸਰਜਾ ਵਾਤਾ ਅਰਜਾ ਵਾਤਾ ਸੀਤਾ ਵਾਤਾ ਉਣ੍ਹਾ ਵਾਤਾ ਪਰਿਤ੍ਤਾ ਵਾਤਾ ਅਧਿਮਤ੍ਤਾ ਵਾਤਾ ਕਾਲ਼ਵਾਤਾ ਵੇਰਮ੍ਭਵਾਤਾ ਪਕ੍ਖਵਾਤਾ ਸੁਪਣ੍ਣਵਾਤਾ ਤਾਲਵਣ੍ਟਵਾਤਾ ਵਿਧੂਪਨਵਾਤਾ, ਯਂ ਵਾ ਪਨਞ੍ਞਮ੍ਪਿ ਅਤ੍ਥਿ ਬਾਹਿਰਂ ਵਾਯੋ ਵਾਯੋਗਤਂ ਥਮ੍ਭਿਤਤ੍ਤਂ ਰੂਪਸ੍ਸ ਬਹਿਦ੍ਧਾ ਅਨੁਪਾਦਿਨ੍ਨਂ – ਅਯਂ ਵੁਚ੍ਚਤਿ ‘ਬਾਹਿਰਾ ਵਾਯੋਧਾਤੁ’. ਯਾ ਚ ਅਜ੍ਝਤ੍ਤਿਕਾ ਵਾਯੋਧਾਤੁ ਯਾ ਚ ਬਾਹਿਰਾ ਵਾਯੋਧਾਤੁ, ਤਦੇਕਜ੍ਝਂ ਅਭਿਸਞ੍ਞੂਹਿਤ੍ਵਾ ਅਭਿਸਙ੍ਖਿਪਿਤ੍ਵਾ – ਅਯਂ ਵੁਚ੍ਚਤਿ ‘‘ਵਾਯੋਧਾਤੁ’’.
੧੭੭. ਤਤ੍ਥ ਕਤਮਾ ਆਕਾਸਧਾਤੁ? ਆਕਾਸਧਾਤੁਦ੍ਵਯਂ – ਅਤ੍ਥਿ ਅਜ੍ਝਤ੍ਤਿਕਾ, ਅਤ੍ਥਿ ਬਾਹਿਰਾ. ਤਤ੍ਥ ਕਤਮਾ ਅਜ੍ਝਤ੍ਤਿਕਾ ਆਕਾਸਧਾਤੁ? ਯਂ ਅਜ੍ਝਤ੍ਤਂ ਪਚ੍ਚਤ੍ਤਂ ਆਕਾਸੋ ਆਕਾਸਗਤਂ ਅਘਂ ਅਘਗਤਂ ਵਿਵਰੋ ਵਿਵਰਗਤਂ ਅਸਮ੍ਫੁਟ੍ਠਂ ਮਂਸਲੋਹਿਤੇਹਿ ਅਜ੍ਝਤ੍ਤਂ ਉਪਾਦਿਨ੍ਨਂ, ਸੇਯ੍ਯਥਿਦਂ – ਕਣ੍ਣਚ੍ਛਿਦ੍ਦਂ ਨਾਸਚ੍ਛਿਦ੍ਦਂ ਮੁਖਦ੍ਵਾਰਂ, ਯੇਨ ਚ ਅਸਿਤਪੀਤਖਾਯਿਤਸਾਯਿਤਂ ਅਜ੍ਝੋਹਰਤਿ, ਯਤ੍ਥ ਚ ਅਸਿਤਪੀਤਖਾਯਿਤਸਾਯਿਤਂ ਸਨ੍ਤਿਟ੍ਠਤਿ, ਯੇਨ ਚ ਅਸਿਤਪੀਤਖਾਯਿਤਸਾਯਿਤਂ ਅਧੋਭਾਗਂ ਨਿਕ੍ਖਮਤਿ, ਯਂ ਵਾ ਪਨਞ੍ਞਮ੍ਪਿ ਅਤ੍ਥਿ ਅਜ੍ਝਤ੍ਤਂ ਪਚ੍ਚਤ੍ਤਂ ਆਕਾਸੋ ਆਕਾਸਗਤਂ ਅਘਂ ਅਘਗਤਂ ਵਿਵਰੋ ਵਿਵਰਗਤਂ ਅਸਮ੍ਫੁਟ੍ਠਂ ਮਂਸਲੋਹਿਤੇਹਿ ਅਜ੍ਝਤ੍ਤਂ ਉਪਾਦਿਨ੍ਨਂ – ਅਯਂ ਵੁਚ੍ਚਤਿ ‘ਅਜ੍ਝਤ੍ਤਿਕਾ ਆਕਾਸਧਾਤੁ’.
ਤਤ੍ਥ ਕਤਮਾ ਬਾਹਿਰਾ ਆਕਾਸਧਾਤੁ? ਯਂ ਬਾਹਿਰਂ ਆਕਾਸੋ ਆਕਾਸਗਤਂ ਅਘਂ ਅਘਗਤਂ ਵਿਵਰੋ ਵਿਵਰਗਤਂ ਅਸਮ੍ਫੁਟ੍ਠਂ ਚਤੂਹਿ ਮਹਾਭੂਤੇਹਿ ਬਹਿਦ੍ਧਾ ਅਨੁਪਾਦਿਨ੍ਨਂ – ਅਯਂ ਵੁਚ੍ਚਤਿ ‘ਬਾਹਿਰਾ ਆਕਾਸਧਾਤੁ’. ਯਾ ਚ ਅਜ੍ਝਤ੍ਤਿਕਾ ਆਕਾਸਧਾਤੁ ਯਾ ਚ ਬਾਹਿਰਾ ਆਕਾਸਧਾਤੁ, ਤਦੇਕਜ੍ਝਂ ਅਭਿਸਞ੍ਞੂਹਿਤ੍ਵਾ ਅਭਿਸਙ੍ਖਿਪਿਤ੍ਵਾ – ਅਯਂ ਵੁਚ੍ਚਤਿ ‘‘ਆਕਾਸਧਾਤੁ’’.
੧੭੮. ਤਤ੍ਥ ਕਤਮਾ ਵਿਞ੍ਞਾਣਧਾਤੁ? ਚਕ੍ਖੁਵਿਞ੍ਞਾਣਧਾਤੁ, ਸੋਤਵਿਞ੍ਞਾਣਧਾਤੁ, ਘਾਨਵਿਞ੍ਞਾਣਧਾਤੁ, ਜਿਵ੍ਹਾਵਿਞ੍ਞਾਣਧਾਤੁ, ਕਾਯਵਿਞ੍ਞਾਣਧਾਤੁ, ਮਨੋਵਿਞ੍ਞਾਣਧਾਤੁ – ਅਯਂ ਵੁਚ੍ਚਤਿ ‘‘ਵਿਞ੍ਞਾਣਧਾਤੁ’’.
ਇਮਾ ਛ ਧਾਤੁਯੋ.
੧੭੯. ਅਪਰਾਪਿ ਛ ਧਾਤੁਯੋ – ਸੁਖਧਾਤੁ, ਦੁਕ੍ਖਧਾਤੁ, ਸੋਮਨਸ੍ਸਧਾਤੁ, ਦੋਮਨਸ੍ਸਧਾਤੁ, ਉਪੇਕ੍ਖਾਧਾਤੁ, ਅਵਿਜ੍ਜਾਧਾਤੁ.
੧੮੦. ਤਤ੍ਥ ਕਤਮਾ ਸੁਖਧਾਤੁ? ਯਂ ਕਾਯਿਕਂ ਸਾਤਂ ਕਾਯਿਕਂ ਸੁਖਂ ਕਾਯਸਮ੍ਫਸ੍ਸਜਂ ਸਾਤਂ ਸੁਖਂ ਵੇਦਯਿਤਂ ਕਾਯਸਮ੍ਫਸ੍ਸਜਾ ਸਾਤਾ ਸੁਖਾ ਵੇਦਨਾ – ਅਯਂ ਵੁਚ੍ਚਤਿ ‘‘ਸੁਖਧਾਤੁ’’.
ਤਤ੍ਥ ਕਤਮਾ ਦੁਕ੍ਖਧਾਤੁ? ਯਂ ਕਾਯਿਕਂ ਅਸਾਤਂ ਕਾਯਿਕਂ ਦੁਕ੍ਖਂ ਕਾਯਸਮ੍ਫਸ੍ਸਜਂ ਅਸਾਤਂ ਦੁਕ੍ਖਂ ਵੇਦਯਿਤਂ ਕਾਯਸਮ੍ਫਸ੍ਸਜਾ ਅਸਾਤਾ ਦੁਕ੍ਖਾ ਵੇਦਨਾ – ਅਯਂ ਵੁਚ੍ਚਤਿ ‘‘ਦੁਕ੍ਖਧਾਤੁ’’.
ਤਤ੍ਥ ਕਤਮਾ ਸੋਮਨਸ੍ਸਧਾਤੁ? ਯਂ ਚੇਤਸਿਕਂ ਸਾਤਂ ਚੇਤਸਿਕਂ ਸੁਖਂ ਚੇਤੋਸਮ੍ਫਸ੍ਸਜਂ ਸਾਤਂ ਸੁਖਂ ਵੇਦਯਿਤਂ ਚੇਤੋਸਮ੍ਫਸ੍ਸਜਾ ਸਾਤਾ ਸੁਖਾ ਵੇਦਨਾ – ਅਯਂ ਵੁਚ੍ਚਤਿ ‘‘ਸੋਮਨਸ੍ਸਧਾਤੁ’’.
ਤਤ੍ਥ ਕਤਮਾ ਦੋਮਨਸ੍ਸਧਾਤੁ? ਯਂ ਚੇਤਸਿਕਂ ਅਸਾਤਂ ਚੇਤਸਿਕਂ ਦੁਕ੍ਖਂ ਚੇਤੋਸਮ੍ਫਸ੍ਸਜਂ ਅਸਾਤਂ ਦੁਕ੍ਖਂ ਵੇਦਯਿਤਂ ਚੇਤੋਸਮ੍ਫਸ੍ਸਜਾ ਅਸਾਤਾ ਦੁਕ੍ਖਾ ਵੇਦਨਾ – ਅਯਂ ਵੁਚ੍ਚਤਿ ‘‘ਦੋਮਨਸ੍ਸਧਾਤੁ’’.
ਤਤ੍ਥ ਕਤਮਾ ਉਪੇਕ੍ਖਾਧਾਤੁ? ਯਂ ਚੇਤਸਿਕਂ ਨੇਵ ਸਾਤਂ ਨਾਸਾਤਂ ਚੇਤੋਸਮ੍ਫਸ੍ਸਜਂ ਅਦੁਕ੍ਖਮਸੁਖਂ ਵੇਦਯਿਤਂ ਚੇਤੋਸਮ੍ਫਸ੍ਸਜਾ ਅਦੁਕ੍ਖਮਸੁਖਾ ਵੇਦਨਾ – ਅਯਂ ਵੁਚ੍ਚਤਿ ‘‘ਉਪੇਕ੍ਖਾਧਾਤੁ’’.
ਤਤ੍ਥ ਕਤਮਾ ਅਵਿਜ੍ਜਾਧਾਤੁ? ਯਂ ਅਞ੍ਞਾਣਂ ਅਦਸ੍ਸਨਂ ਅਨਭਿਸਮਯੋ ਅਨਨੁਬੋਧੋ ਅਸਮ੍ਬੋਧੋ ਅਪ੍ਪਟਿਵੇਧੋ ਅਸਙ੍ਗਾਹਣਾ ਅਪਰਿਯੋਗਾਹਣਾ ਅਸਮਪੇਕ੍ਖਨਾ ਅਪਚ੍ਚਵੇਕ੍ਖਣਾ ਅਪਚ੍ਚਕ੍ਖਕਮ੍ਮਂ ਦੁਮ੍ਮੇਜ੍ਝਂ ਬਾਲ੍ਯਂ ਅਸਮ੍ਪਜਞ੍ਞਂ ਮੋਹੋ ਪਮੋਹੋ ਸਮ੍ਮੋਹੋ ਅਵਿਜ੍ਜਾ ਅਵਿਜ੍ਜੋਘੋ ਅਵਿਜ੍ਜਾਯੋਗੋ ਅਵਿਜ੍ਜਾਨੁਸਯੋ ਅਵਿਜ੍ਜਾਪਰਿਯੁਟ੍ਠਾਨਂ ਅਵਿਜ੍ਜਾਲਙ੍ਗੀ ਮੋਹੋ ਅਕੁਸਲਮੂਲਂ – ਅਯਂ ਵੁਚ੍ਚਤਿ ‘‘ਅਵਿਜ੍ਜਾਧਾਤੁ’’.
ਇਮਾ ਛ ਧਾਤੁਯੋ.
੧੮੧. ਅਪਰਾਪਿ ਛ ਧਾਤੁਯੋ – ਕਾਮਧਾਤੁ, ਬ੍ਯਾਪਾਦਧਾਤੁ, ਵਿਹਿਂਸਾਧਾਤੁ, ਨੇਕ੍ਖਮ੍ਮਧਾਤੁ, ਅਬ੍ਯਾਪਾਦਧਾਤੁ, ਅਵਿਹਿਂਸਾਧਾਤੁ.
੧੮੨. ਤਤ੍ਥ ਕਤਮਾ ਕਾਮਧਾਤੁ? ਕਾਮਪਟਿਸਂਯੁਤ੍ਤੋ ਤਕ੍ਕੋ ਵਿਤਕ੍ਕੋ ਸਙ੍ਕਪ੍ਪੋ ਅਪ੍ਪਨਾ ਬ੍ਯਪ੍ਪਨਾ ਚੇਤਸੋ ਅਭਿਨਿਰੋਪਨਾ ਮਿਚ੍ਛਾਸਙ੍ਕਪ੍ਪੋ – ਅਯਂ ਵੁਚ੍ਚਤਿ ਕਾਮਧਾਤੁ. ਹੇਟ੍ਠਤੋ ਅਵੀਚਿਨਿਰਯਂ ਪਰਿਯਨ੍ਤਂ ਕਰਿਤ੍ਵਾ ਉਪਰਿਤੋ ਪਰਨਿਮ੍ਮਿਤਵਸਵਤ੍ਤੀ ਦੇਵੇ ਅਨ੍ਤੋ ਕਰਿਤ੍ਵਾ ਯਂ ਏਤਸ੍ਮਿਂ ਅਨ੍ਤਰੇ ਏਤ੍ਥਾਵਚਰਾ ਏਤ੍ਥ ਪਰਿਯਾਪਨ੍ਨਾ ਖਨ੍ਧਧਾਤੁਆਯਤਨਾ ਰੂਪਾ [ਰੂਪਂ (ਸ੍ਯਾ.)] ਵੇਦਨਾ ਸਞ੍ਞਾ ਸਙ੍ਖਾਰਾ ਵਿਞ੍ਞਾਣਂ – ਅਯਂ ਵੁਚ੍ਚਤਿ ‘‘ਕਾਮਧਾਤੁ’’.
ਤਤ੍ਥ ਕਤਮਾ ਬ੍ਯਾਪਾਦਧਾਤੁ? ਬ੍ਯਾਪਾਦਪਟਿਸਂਯੁਤ੍ਤੋ ਤਕ੍ਕੋ ਵਿਤਕ੍ਕੋ…ਪੇ… ਮਿਚ੍ਛਾਸਙ੍ਕਪ੍ਪੋ – ਅਯਂ ਵੁਚ੍ਚਤਿ ‘‘ਬ੍ਯਾਪਾਦਧਾਤੁ’’. ਦਸਸੁ ਵਾ ਆਘਾਤਵਤ੍ਥੂਸੁ ਚਿਤ੍ਤਸ੍ਸ ਆਘਾਤੋ ਪਟਿਘਾਤੋ ਪਟਿਘਂ ਪਟਿਵਿਰੋਧੋ ਕੋਪੋ ਪਕੋਪੋ ਸਮ੍ਪਕੋਪੋ ਦੋਸੋ ਪਦੋਸੋ ਸਮ੍ਪਦੋਸੋ ਚਿਤ੍ਤਸ੍ਸ ਬ੍ਯਾਪਤ੍ਤਿ ਮਨੋਪਦੋਸੋ ਕੋਧੋ ਕੁਜ੍ਝਨਾ ਕੁਜ੍ਝਿਤਤ੍ਤਂ ਦੋਸੋ ਦੁਸ੍ਸਨਾ ਦੁਸ੍ਸਿਤਤ੍ਤਂ ਬ੍ਯਾਪਤ੍ਤਿ ਬ੍ਯਾਪਜ੍ਜਨਾ ਵਿਰੋਧੋ ਪਟਿਵਿਰੋਧੋ ਚਣ੍ਡਿਕ੍ਕਂ ਅਸੁਰੋਪੋ ਅਨਤ੍ਤਮਨਤਾ ਚਿਤ੍ਤਸ੍ਸ – ਅਯਂ ਵੁਚ੍ਚਤਿ ‘‘ਬ੍ਯਾਪਾਦਧਾਤੁ’’.
ਤਤ੍ਥ ਕਤਮਾ ਵਿਹਿਂਸਾਧਾਤੁ? ਵਿਹਿਂਸਾਪਟਿਸਂਯੁਤ੍ਤੋ ਤਕ੍ਕੋ ਵਿਤਕ੍ਕੋ…ਪੇ… ਮਿਚ੍ਛਾਸਙ੍ਕਪ੍ਪੋ – ਅਯਂ ਵੁਚ੍ਚਤਿ ‘‘ਵਿਹਿਂਸਾਧਾਤੁ’’. ਇਧੇਕਚ੍ਚੋ ਪਾਣਿਨਾ ਵਾ ਲੇਡ੍ਡੁਨਾ ਵਾ ਦਣ੍ਡੇਨ ਵਾ ਸਤ੍ਥੇਨ ਵਾ ਰਜ੍ਜੁਯਾ ਵਾ ਅਞ੍ਞਤਰਞ੍ਞਤਰੇਨ ਸਤ੍ਤੇ ਵਿਹੇਠੇਤਿ, ਯਾ ਏਵਰੂਪਾ ਹੇਠਨਾ ਵਿਹੇਠਨਾ ਹਿਂਸਨਾ ਵਿਹਿਂਸਨਾ ਰੋਸਨਾ ਵਿਰੋਸਨਾ ਪਰੂਪਘਾਤੋ – ਅਯਂ ਵੁਚ੍ਚਤਿ ‘‘ਵਿਹਿਂਸਾਧਾਤੁ’’.
ਤਤ੍ਥ ਕਤਮਾ ਨੇਕ੍ਖਮ੍ਮਧਾਤੁ? ਨੇਕ੍ਖਮ੍ਮਪਟਿਸਂਯੁਤ੍ਤੋ ਤਕ੍ਕੋ ਵਿਤਕ੍ਕੋ…ਪੇ… ਸਮ੍ਮਾਸਙ੍ਕਪ੍ਪੋ – ਅਯਂ ਵੁਚ੍ਚਤਿ ‘‘ਨੇਕ੍ਖਮ੍ਮਧਾਤੁ’’. ਸਬ੍ਬੇਪਿ ਕੁਸਲਾ ਧਮ੍ਮਾ ‘‘ਨੇਕ੍ਖਮ੍ਮਧਾਤੁ’’.
ਤਤ੍ਥ ਕਤਮਾ ਅਬ੍ਯਾਪਾਦਧਾਤੁ? ਅਬ੍ਯਾਪਾਦਪਟਿਸਂਯੁਤ੍ਤੋ ਤਕ੍ਕੋ ਵਿਤਕ੍ਕੋ…ਪੇ… ਸਮ੍ਮਾਸਙ੍ਕਪ੍ਪੋ – ਅਯਂ ਵੁਚ੍ਚਤਿ ‘‘ਅਬ੍ਯਾਪਾਦਧਾਤੁ’’. ਯਾ ਸਤ੍ਤੇਸੁ ਮੇਤ੍ਤਿ ਮੇਤ੍ਤਾਯਨਾ ਮੇਤ੍ਤਾਯਿਤਤ੍ਤਂ ਮੇਤ੍ਤਾਚੇਤੋਵਿਮੁਤ੍ਤਿ – ਅਯਂ ਵੁਚ੍ਚਤਿ ‘‘ਅਬ੍ਯਾਪਾਦਧਾਤੁ’’.
ਤਤ੍ਥ ਕਤਮਾ ਅਵਿਹਿਂਸਾਧਾਤੁ? ਅਵਿਹਿਂਸਾਪਟਿਸਂਯੁਤ੍ਤੋ ਤਕ੍ਕੋ ਵਿਤਕ੍ਕੋ ਸਙ੍ਕਪ੍ਪੋ ਅਪ੍ਪਨਾ ਬ੍ਯਪ੍ਪਨਾ ਚੇਤਸੋ ਅਭਿਨਿਰੋਪਨਾ ਸਮ੍ਮਾਸਙ੍ਕਪ੍ਪੋ – ਅਯਂ ਵੁਚ੍ਚਤਿ ‘‘ਅਵਿਹਿਂਸਾਧਾਤੁ’’. ਯਾ ਸਤ੍ਤੇਸੁ ਕਰੁਣਾ ਕਰੁਣਾਯਨਾ ਕਰੁਣਾਯਿਤਤ੍ਤਂ ਕਰੁਣਾਚੇਤੋਵਿਮੁਤ੍ਤਿ – ਅਯਂ ਵੁਚ੍ਚਤਿ ‘‘ਅਵਿਹਿਂਸਾਧਾਤੁ’’.
ਇਮਾ ਛ ਧਾਤੁਯੋ.
ਇਤਿ ਇਮਾਨਿ ਤੀਣਿ ਛਕ੍ਕਾਨਿ ਤਦੇਕਜ੍ਝਂ ਅਭਿਸਞ੍ਞੂਹਿਤ੍ਵਾ ਅਭਿਸਙ੍ਖਿਪਿਤ੍ਵਾ ਅਟ੍ਠਾਰਸ ਧਾਤੁਯੋ ਹੋਨ੍ਤਿ.
ਸੁਤ੍ਤਨ੍ਤਭਾਜਨੀਯਂ.
੨. ਅਭਿਧਮ੍ਮਭਾਜਨੀਯਂ
੧੮੩. ਅਟ੍ਠਾਰਸ ਧਾਤੁਯੋ – ਚਕ੍ਖੁਧਾਤੁ, ਰੂਪਧਾਤੁ, ਚਕ੍ਖੁਵਿਞ੍ਞਾਣਧਾਤੁ, ਸੋਤਧਾਤੁ, ਸਦ੍ਦਧਾਤੁ, ਸੋਤਵਿਞ੍ਞਾਣਧਾਤੁ, ਘਾਨਧਾਤੁ, ਗਨ੍ਧਧਾਤੁ, ਘਾਨਵਿਞ੍ਞਾਣਧਾਤੁ, ਜਿਵ੍ਹਾਧਾਤੁ, ਰਸਧਾਤੁ, ਜਿਵ੍ਹਾਵਿਞ੍ਞਾਣਧਾਤੁ, ਕਾਯਧਾਤੁ, ਫੋਟ੍ਠਬ੍ਬਧਾਤੁ, ਕਾਯਵਿਞ੍ਞਾਣਧਾਤੁ, ਮਨੋਧਾਤੁ, ਧਮ੍ਮਧਾਤੁ, ਮਨੋਵਿਞ੍ਞਾਣਧਾਤੁ.
੧੮੪. ਤਤ੍ਥ ਕਤਮਾ ਚਕ੍ਖੁਧਾਤੁ? ਯਂ ਚਕ੍ਖੁ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋ…ਪੇ… ਸੁਞ੍ਞੋ ਗਾਮੋਪੇਸੋ – ਅਯਂ ਵੁਚ੍ਚਤਿ ‘‘ਚਕ੍ਖੁਧਾਤੁ’’.
ਤਤ੍ਥ ਕਤਮਾ ਰੂਪਧਾਤੁ? ਯਂ ਰੂਪਂ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਵਣ੍ਣਨਿਭਾ…ਪੇ… ਰੂਪਧਾਤੁਪੇਸਾ – ਅਯਂ ਵੁਚ੍ਚਤਿ ‘‘ਰੂਪਧਾਤੁ’’.
ਤਤ੍ਥ ਕਤਮਾ ਚਕ੍ਖੁਵਿਞ੍ਞਾਣਧਾਤੁ? ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਚਕ੍ਖੁਵਿਞ੍ਞਾਣਧਾਤੁ – ਅਯਂ ਵੁਚ੍ਚਤਿ ‘‘ਚਕ੍ਖੁਵਿਞ੍ਞਾਣਧਾਤੁ’’.
ਤਤ੍ਥ ਕਤਮਾ ਸੋਤਧਾਤੁ? ਯਂ ਸੋਤਂ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋ…ਪੇ… ਸੁਞ੍ਞੋ ਗਾਮੋਪੇਸੋ – ਅਯਂ ਵੁਚ੍ਚਤਿ ‘‘ਸੋਤਧਾਤੁ’’.
ਤਤ੍ਥ ਕਤਮਾ ਸਦ੍ਦਧਾਤੁ? ਯੋ ਸਦ੍ਦੋ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਅਨਿਦਸ੍ਸਨੋ ਸਪ੍ਪਟਿਘੋ…ਪੇ… ਸਦ੍ਦਧਾਤੁਪੇਸਾ – ਅਯਂ ਵੁਚ੍ਚਤਿ ‘‘ਸਦ੍ਦਧਾਤੁ’’.
ਤਤ੍ਥ ਕਤਮਾ ਸੋਤਵਿਞ੍ਞਾਣਧਾਤੁ? ਸੋਤਞ੍ਚ ਪਟਿਚ੍ਚ ਸਦ੍ਦੇ ਚ ਉਪ੍ਪਜ੍ਜਤਿ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਸੋਤਵਿਞ੍ਞਾਣਧਾਤੁ – ਅਯਂ ਵੁਚ੍ਚਤਿ ‘‘ਸੋਤਵਿਞ੍ਞਾਣਧਾਤੁ’’.
ਤਤ੍ਥ ਕਤਮਾ ਘਾਨਧਾਤੁ? ਯਂ ਘਾਨਂ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋ…ਪੇ… ਸੁਞ੍ਞੋ ਗਾਮੋਪੇਸੋ – ਅਯਂ ਵੁਚ੍ਚਤਿ ‘‘ਘਾਨਧਾਤੁ’’.
ਤਤ੍ਥ ਕਤਮਾ ਗਨ੍ਧਧਾਤੁ? ਯੋ ਗਨ੍ਧੋ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਅਨਿਦਸ੍ਸਨੋ ਸਪ੍ਪਟਿਘੋ…ਪੇ… ਗਨ੍ਧਧਾਤੁਪੇਸਾ – ਅਯਂ ਵੁਚ੍ਚਤਿ ‘‘ਗਨ੍ਧਧਾਤੁ’’.
ਤਤ੍ਥ ਕਤਮਾ ਘਾਨਵਿਞ੍ਞਾਣਧਾਤੁ? ਘਾਨਞ੍ਚ ਪਟਿਚ੍ਚ ਗਨ੍ਧੇ ਚ ਉਪ੍ਪਜ੍ਜਤਿ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਘਾਨਵਿਞ੍ਞਾਣਧਾਤੁ – ਅਯਂ ਵੁਚ੍ਚਤਿ ‘‘ਘਾਨਵਿਞ੍ਞਾਣਧਾਤੁ’’.
ਤਤ੍ਥ ਕਤਮਾ ਜਿਵ੍ਹਾਧਾਤੁ? ਯਾ ਜਿਵ੍ਹਾ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋ…ਪੇ… ਸੁਞ੍ਞੋ ਗਾਮੋਪੇਸੋ – ਅਯਂ ਵੁਚ੍ਚਤਿ ‘‘ਜਿਵ੍ਹਾਧਾਤੁ’’.
ਤਤ੍ਥ ਕਤਮਾ ਰਸਧਾਤੁ? ਯੋ ਰਸੋ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਅਨਿਦਸ੍ਸਨੋ ਸਪ੍ਪਟਿਘੋ…ਪੇ… ਰਸਧਾਤੁਪੇਸਾ – ਅਯਂ ਵੁਚ੍ਚਤਿ ‘‘ਰਸਧਾਤੁ’’.
ਤਤ੍ਥ ਕਤਮਾ ਜਿਵ੍ਹਾਵਿਞ੍ਞਾਣਧਾਤੁ? ਜਿਵ੍ਹਞ੍ਚ ਪਟਿਚ੍ਚ ਰਸੇ ਚ ਉਪ੍ਪਜ੍ਜਤਿ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਜਿਵ੍ਹਾਵਿਞ੍ਞਾਣਧਾਤੁ – ਅਯਂ ਵੁਚ੍ਚਤਿ ‘‘ਜਿਵ੍ਹਾਵਿਞ੍ਞਾਣਧਾਤੁ’’.
ਤਤ੍ਥ ਕਤਮਾ ਕਾਯਧਾਤੁ? ਯੋ ਕਾਯੋ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋ…ਪੇ… ਸੁਞ੍ਞੋ ਗਾਮੋਪੇਸੋ – ਅਯਂ ਵੁਚ੍ਚਤਿ ‘‘ਕਾਯਧਾਤੁ’’.
ਤਤ੍ਥ ਕਤਮਾ ਫੋਟ੍ਠਬ੍ਬਧਾਤੁ? ਪਥਵੀਧਾਤੁ…ਪੇ… ਫੋਟ੍ਠਬ੍ਬਧਾਤੁਪੇਸਾ – ਅਯਂ ਵੁਚ੍ਚਤਿ ‘‘ਫੋਟ੍ਠਬ੍ਬਧਾਤੁ’’.
ਤਤ੍ਥ ਕਤਮਾ ਕਾਯਵਿਞ੍ਞਾਣਧਾਤੁ? ਕਾਯਞ੍ਚ ਪਟਿਚ੍ਚ ਫੋਟ੍ਠਬ੍ਬੇ ਚ ਉਪ੍ਪਜ੍ਜਤਿ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਕਾਯਵਿਞ੍ਞਾਣਧਾਤੁ – ਅਯਂ ਵੁਚ੍ਚਤਿ ‘‘ਕਾਯਵਿਞ੍ਞਾਣਧਾਤੁ’’.
ਤਤ੍ਥ ਕਤਮਾ ਮਨੋਧਾਤੁ? ਚਕ੍ਖੁਵਿਞ੍ਞਾਣਧਾਤੁਯਾ ਉਪ੍ਪਜ੍ਜਿਤ੍ਵਾ ਨਿਰੁਦ੍ਧਸਮਨਨ੍ਤਰਾ ਉਪ੍ਪਜ੍ਜਤਿ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਮਨੋਧਾਤੁ; ਸੋਤਵਿਞ੍ਞਾਣਧਾਤੁਯਾ…ਪੇ… ਘਾਨਵਿਞ੍ਞਾਣਧਾਤੁਯਾ…ਪੇ… ਜਿਵ੍ਹਾਵਿਞ੍ਞਾਣਧਾਤੁਯਾ…ਪੇ… ਕਾਯਵਿਞ੍ਞਾਣਧਾਤੁਯਾ ਉਪ੍ਪਜ੍ਜਿਤ੍ਵਾ ਨਿਰੁਦ੍ਧਸਮਨਨ੍ਤਰਾ ਉਪ੍ਪਜ੍ਜਤਿ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਮਨੋਧਾਤੁ ਸਬ੍ਬਧਮ੍ਮੇਸੁ ਵਾ ਪਨ ਪਠਮਸਮਨ੍ਨਾਹਾਰੋ ਉਪ੍ਪਜ੍ਜਤਿ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਮਨੋਧਾਤੁ – ਅਯਂ ਵੁਚ੍ਚਤਿ ‘‘ਮਨੋਧਾਤੁ’’.
ਤਤ੍ਥ ਕਤਮਾ ਧਮ੍ਮਧਾਤੁ? ਵੇਦਨਾਕ੍ਖਨ੍ਧੋ, ਸਞ੍ਞਾਕ੍ਖਨ੍ਧੋ, ਸਙ੍ਖਾਰਕ੍ਖਨ੍ਧੋ, ਯਞ੍ਚ ਰੂਪਂ ਅਨਿਦਸ੍ਸਨਅਪ੍ਪਟਿਘਂ ਧਮ੍ਮਾਯਤਨਪਰਿਯਾਪਨ੍ਨਂ, ਅਸਙ੍ਖਤਾ ਚ ਧਾਤੁ.
ਤਤ੍ਥ ਕਤਮੋ ਵੇਦਨਾਕ੍ਖਨ੍ਧੋ? ਏਕਵਿਧੇਨ ਵੇਦਨਾਕ੍ਖਨ੍ਧੋ – ਫਸ੍ਸਸਮ੍ਪਯੁਤ੍ਤੋ. ਦੁਵਿਧੇਨ ਵੇਦਨਾਕ੍ਖਨ੍ਧੋ – ਅਤ੍ਥਿ ਸਹੇਤੁਕੋ, ਅਤ੍ਥਿ ਅਹੇਤੁਕੋ. ਤਿਵਿਧੇਨ ਵੇਦਨਾਕ੍ਖਨ੍ਧੋ – ਅਤ੍ਥਿ ਕੁਸਲੋ, ਅਤ੍ਥਿ ਅਕੁਸਲੋ, ਅਤ੍ਥਿ ਅਬ੍ਯਾਕਤੋ…ਪੇ… ਏਵਂ ਦਸਵਿਧੇਨ ਵੇਦਨਾਕ੍ਖਨ੍ਧੋ…ਪੇ… ਏਵਂ ਬਹੁਵਿਧੇਨ ਵੇਦਨਾਕ੍ਖਨ੍ਧੋ. ਅਯਂ ਵੁਚ੍ਚਤਿ ‘‘ਵੇਦਨਾਕ੍ਖਨ੍ਧੋ’’.
ਤਤ੍ਥ ਕਤਮੋ ਸਞ੍ਞਾਕ੍ਖਨ੍ਧੋ? ਏਕਵਿਧੇਨ ਸਞ੍ਞਾਕ੍ਖਨ੍ਧੋ – ਫਸ੍ਸਸਮ੍ਪਯੁਤ੍ਤੋ. ਦੁਵਿਧੇਨ ਸਞ੍ਞਾਕ੍ਖਨ੍ਧੋ – ਅਤ੍ਥਿ ਸਹੇਤੁਕੋ, ਅਤ੍ਥਿ ਅਹੇਤੁਕੋ. ਤਿਵਿਧੇਨ ਸਞ੍ਞਾਕ੍ਖਨ੍ਧੋ – ਅਤ੍ਥਿ ਕੁਸਲੋ, ਅਤ੍ਥਿ ਅਕੁਸਲੋ, ਅਤ੍ਥਿ ਅਬ੍ਯਾਕਤੋ…ਪੇ… ਏਵਂ ਦਸਵਿਧੇਨ ਸਞ੍ਞਾਕ੍ਖਨ੍ਧੋ…ਪੇ… ਏਵਂ ਬਹੁਵਿਧੇਨ ਸਞ੍ਞਾਕ੍ਖਨ੍ਧੋ. ਅਯਂ ਵੁਚ੍ਚਤਿ ‘‘ਸਞ੍ਞਾਕ੍ਖਨ੍ਧੋ’’.
ਤਤ੍ਥ ਕਤਮੋ ਸਙ੍ਖਾਰਕ੍ਖਨ੍ਧੋ? ਏਕਵਿਧੇਨ ਸਙ੍ਖਾਰਕ੍ਖਨ੍ਧੋ – ਚਿਤ੍ਤਸਮ੍ਪਯੁਤ੍ਤੋ. ਦੁਵਿਧੇਨ ਸਙ੍ਖਾਰਕ੍ਖਨ੍ਧੋ – ਅਤ੍ਥਿ ਹੇਤੁ, ਅਤ੍ਥਿ ਅਹੇਤੁ. ਤਿਵਿਧੇਨ ਸਙ੍ਖਾਰਕ੍ਖਨ੍ਧੋ – ਅਤ੍ਥਿ ਕੁਸਲੋ, ਅਤ੍ਥਿ ਅਕੁਸਲੋ, ਅਤ੍ਥਿ ਅਬ੍ਯਾਕਤੋ…ਪੇ… ਏਵਂ ਦਸਵਿਧੇਨ ਸਙ੍ਖਾਰਕ੍ਖਨ੍ਧੋ…ਪੇ… ਏਵਂ ਬਹੁਵਿਧੇਨ ਸਙ੍ਖਾਰਕ੍ਖਨ੍ਧੋ – ਅਯਂ ਵੁਚ੍ਚਤਿ ‘‘ਸਙ੍ਖਾਰਕ੍ਖਨ੍ਧੋ’’.
ਤਤ੍ਥ ਕਤਮਂ ਰੂਪਂ ਅਨਿਦਸ੍ਸਨਅਪ੍ਪਟਿਘਂ ਧਮ੍ਮਾਯਤਨਪਰਿਯਾਪਨ੍ਨਂ? ਇਤ੍ਥਿਨ੍ਦ੍ਰਿਯਂ…ਪੇ… ਕਬਲ਼ੀਕਾਰੋ ਆਹਾਰੋ – ਇਦਂ ਵੁਚ੍ਚਤਿ ਰੂਪਂ ‘‘ਅਨਿਦਸ੍ਸਨਅਪ੍ਪਟਿਘਂ ਧਮ੍ਮਾਯਤਨਪਰਿਯਾਪਨ੍ਨਂ’’.
ਤਤ੍ਥ ਕਤਮਾ ਅਸਙ੍ਖਤਾ ਧਾਤੁ? ਰਾਗਕ੍ਖਯੋ, ਦੋਸਕ੍ਖਯੋ, ਮੋਹਕ੍ਖਯੋ – ਅਯਂ ਵੁਚ੍ਚਤਿ ‘‘ਅਸਙ੍ਖਤਾ ਧਾਤੁ’’. ਅਯਂ ਵੁਚ੍ਚਤਿ ‘‘ਧਮ੍ਮਧਾਤੁ’’.
ਤਤ੍ਥ ਕਤਮਾ ਮਨੋਵਿਞ੍ਞਾਣਧਾਤੁ? ਚਕ੍ਖੁਵਿਞ੍ਞਾਣਧਾਤੁਯਾ ਉਪ੍ਪਜ੍ਜਿਤ੍ਵਾ ਨਿਰੁਦ੍ਧਸਮਨਨ੍ਤਰਾ ਉਪ੍ਪਜ੍ਜਤਿ ਮਨੋਧਾਤੁ, ਮਨੋਧਾਤੁਯਾ ਉਪ੍ਪਜ੍ਜਿਤ੍ਵਾ ਨਿਰੁਦ੍ਧਸਮਨਨ੍ਤਰਾ ਉਪ੍ਪਜ੍ਜਤਿ ਚਿਤ੍ਤਂ ਮਨੋ ਮਾਨਸਂ…ਪੇ… ਤਜ੍ਜਾਮਨੋਵਿਞ੍ਞਾਣਧਾਤੁ; ਸੋਤਵਿਞ੍ਞਾਣਧਾਤੁਯਾ…ਪੇ… ਘਾਨਵਿਞ੍ਞਾਣਧਾਤੁਯਾ …ਪੇ… ਜਿਵ੍ਹਾਵਿਞ੍ਞਾਣਧਾਤੁਯਾ…ਪੇ… ਕਾਯਵਿਞ੍ਞਾਣਧਾਤੁਯਾ ਉਪ੍ਪਜ੍ਜਿਤ੍ਵਾ ਨਿਰੁਦ੍ਧਸਮਨਨ੍ਤਰਾ ਉਪ੍ਪਜ੍ਜਤਿ ਮਨੋਧਾਤੁ, ਮਨੋਧਾਤੁਯਾਪਿ ਉਪ੍ਪਜ੍ਜਿਤ੍ਵਾ ਨਿਰੁਦ੍ਧਸਮਨਨ੍ਤਰਾ ਉਪ੍ਪਜ੍ਜਤਿ ਚਿਤ੍ਤਂ ਮਨੋ ਮਾਨਸਂ…ਪੇ… ਤਜ੍ਜਾਮਨੋਵਿਞ੍ਞਾਣਧਾਤੁ ਮਨਞ੍ਚ ਪਟਿਚ੍ਚ ਧਮ੍ਮੇ ਚ ਉਪ੍ਪਜ੍ਜਤਿ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਮਨੋਵਿਞ੍ਞਾਣਧਾਤੁ – ਅਯਂ ਵੁਚ੍ਚਤਿ ‘‘ਮਨੋਵਿਞ੍ਞਾਣਧਾਤੁ’’.
ਅਭਿਧਮ੍ਮਭਾਜਨੀਯਂ.
੩. ਪਞ੍ਹਾਪੁਚ੍ਛਕਂ
ਅਟ੍ਠਾਰਸ ਧਾਤੁਯੋ – ਚਕ੍ਖੁਧਾਤੁ, ਰੂਪਧਾਤੁ, ਚਕ੍ਖੁਵਿਞ੍ਞਾਣਧਾਤੁ, ਸੋਤਧਾਤੁ, ਸਦ੍ਦਧਾਤੁ, ਸੋਤਵਿਞ੍ਞਾਣਧਾਤੁ, ਘਾਨਧਾਤੁ, ਗਨ੍ਧਧਾਤੁ, ਘਾਨਵਿਞ੍ਞਾਣਧਾਤੁ, ਜਿਵ੍ਹਾਧਾਤੁ, ਰਸਧਾਤੁ, ਜਿਵ੍ਹਾਵਿਞ੍ਞਾਣਧਾਤੁ, ਕਾਯਧਾਤੁ, ਫੋਟ੍ਠਬ੍ਬਧਾਤੁ, ਕਾਯਵਿਞ੍ਞਾਣਧਾਤੁ, ਮਨੋਧਾਤੁ, ਧਮ੍ਮਧਾਤੁ, ਮਨੋਵਿਞ੍ਞਾਣਧਾਤੁ.
੧੮੬. ਅਟ੍ਠਾਰਸਨ੍ਨਂ ਧਾਤੂਨਂ ਕਤਿ ਕੁਸਲਾ, ਕਤਿ ਅਕੁਸਲਾ, ਕਤਿ ਅਬ੍ਯਾਕਤਾ…ਪੇ… ਕਤਿ ਸਰਣਾ, ਕਤਿ ਅਰਣਾ?
੧. ਤਿਕਂ
੧੮੭. ਸੋਲ਼ਸ ਧਾਤੁਯੋ ਅਬ੍ਯਾਕਤਾ. ਦ੍ਵੇ ਧਾਤੁਯੋ ਸਿਯਾ ਕੁਸਲਾ, ਸਿਯਾ ਅਕੁਸਲਾ, ਸਿਯਾ ਅਬ੍ਯਾਕਤਾ. ਦਸ ਧਾਤੁਯੋ ਨ ਵਤ੍ਤਬ੍ਬਾ – ‘‘ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ’’ਤਿਪਿ, ‘‘ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾ’’ਤਿਪਿ, ‘‘ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ’’ਤਿਪਿ. ਪਞ੍ਚ ਧਾਤੁਯੋ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ. ਕਾਯਵਿਞ੍ਞਾਣਧਾਤੁ ਸਿਯਾ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ, ਸਿਯਾ ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾ. ਮਨੋਵਿਞ੍ਞਾਣਧਾਤੁ ਸਿਯਾ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ, ਸਿਯਾ ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾ, ਸਿਯਾ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ. ਧਮ੍ਮਧਾਤੁ ਸਿਯਾ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ, ਸਿਯਾ ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾ, ਸਿਯਾ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ, ਸਿਯਾ ਨ ਵਤ੍ਤਬ੍ਬਾ – ‘‘ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ’’ਤਿਪਿ, ‘‘ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾ’’ਤਿਪਿ, ‘‘ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ’’ਤਿਪਿ.
ਦਸ ਧਾਤੁਯੋ ਨੇਵਵਿਪਾਕਨਵਿਪਾਕਧਮ੍ਮਧਮ੍ਮਾ. ਪਞ੍ਚ ਧਾਤੁਯੋ ਵਿਪਾਕਾ. ਮਨੋਧਾਤੁ ਸਿਯਾ ਵਿਪਾਕਾ, ਸਿਯਾ ਨੇਵਵਿਪਾਕਨਵਿਪਾਕਧਮ੍ਮਧਮ੍ਮਾ. ਦ੍ਵੇ ਧਾਤੁਯੋ ਸਿਯਾ ਵਿਪਾਕਾ, ਸਿਯਾ ਵਿਪਾਕਧਮ੍ਮਧਮ੍ਮਾ, ਸਿਯਾ ਨੇਵਵਿਪਾਕਨਵਿਪਾਕਧਮ੍ਮਧਮ੍ਮਾ.
ਦਸ ਧਾਤੁਯੋ ਉਪਾਦਿਨ੍ਨੁਪਾਦਾਨਿਯਾ. ਸਦ੍ਦਧਾਤੁ ਅਨੁਪਾਦਿਨ੍ਨੁਪਾਦਾਨਿਯਾ. ਪਞ੍ਚ ਧਾਤੁਯੋ ਸਿਯਾ ਉਪਾਦਿਨ੍ਨੁਪਾਦਾਨਿਯਾ, ਸਿਯਾ ਅਨੁਪਾਦਿਨ੍ਨੁਪਾਦਾਨਿਯਾ. ਦ੍ਵੇ ਧਾਤੁਯੋ ਸਿਯਾ ਉਪਾਦਿਨ੍ਨੁਪਾਦਾਨਿਯਾ, ਸਿਯਾ ਅਨੁਪਾਦਿਨ੍ਨੁਪਾਦਾਨਿਯਾ, ਸਿਯਾ ਅਨੁਪਾਦਿਨ੍ਨਅਨੁਪਾਦਾਨਿਯਾ.
ਸੋਲ਼ਸ ਧਾਤੁਯੋ ਅਸਂਕਿਲਿਟ੍ਠਸਂਕਿਲੇਸਿਕਾ. ਦ੍ਵੇ ਧਾਤੁਯੋ ਸਿਯਾ ਸਂਕਿਲਿਟ੍ਠਸਂਕਿਲੇਸਿਕਾ, ਸਿਯਾ ਅਸਂਕਿਲਿਟ੍ਠਸਂਕਿਲੇਸਿਕਾ, ਸਿਯਾ ਅਸਂਕਿਲਿਟ੍ਠਅਸਂਕਿਲੇਸਿਕਾ. ਪਨ੍ਨਰਸ ਧਾਤੁਯੋ ਅਵਿਤਕ੍ਕਅਵਿਚਾਰਾ. ਮਨੋਧਾਤੁ ਸਵਿਤਕ੍ਕਸਵਿਚਾਰਾ. ਮਨੋਵਿਞ੍ਞਾਣਧਾਤੁ ਸਿਯਾ ਸਵਿਤਕ੍ਕਸਵਿਚਾਰਾ, ਸਿਯਾ ਅਵਿਤਕ੍ਕਵਿਚਾਰਮਤ੍ਤਾ, ਸਿਯਾ ਅਵਿਤਕ੍ਕਅਵਿਚਾਰਾ. ਧਮ੍ਮਧਾਤੁ ਸਿਯਾ ਸਵਿਤਕ੍ਕਸਵਿਚਾਰਾ, ਸਿਯਾ ਅਵਿਤਕ੍ਕਵਿਚਾਰਮਤ੍ਤਾ, ਸਿਯਾ ਅਵਿਤਕ੍ਕਅਵਿਚਾਰਾ, ਸਿਯਾ ਨ ਵਤ੍ਤਬ੍ਬਾ – ‘‘ਸਵਿਤਕ੍ਕਸਵਿਚਾਰਾ’’ਤਿਪਿ, ‘‘ਅਵਿਤਕ੍ਕਵਿਚਾਰਮਤ੍ਤਾ’’ਤਿਪਿ, ‘‘ਅਵਿਤਕ੍ਕਅਵਿਚਾਰਾ’’ਤਿਪਿ. ਦਸ ਧਾਤੁਯੋ ਨ ਵਤ੍ਤਬ੍ਬਾ – ‘‘ਪੀਤਿਸਹਗਤਾ’’ਤਿਪਿ, ‘‘ਸੁਖਸਹਗਤਾ’’ਤਿਪਿ, ‘‘ਉਪੇਕ੍ਖਾਸਹਗਤਾ’’ਤਿਪਿ. ਪਞ੍ਚ ਧਾਤੁਯੋ ਉਪੇਕ੍ਖਾਸਹਗਤਾ. ਕਾਯਵਿਞ੍ਞਾਣਧਾਤੁ ਨ ਪੀਤਿਸਹਗਤਾ, ਸਿਯਾ ਸੁਖਸਹਗਤਾ, ਨ ਉਪੇਕ੍ਖਾਸਹਗਤਾ, ਸਿਯਾ ਨ ਵਤ੍ਤਬ੍ਬਾ – ‘‘ਸੁਖਸਹਗਤਾ’’ਤਿ. ਦ੍ਵੇ ਧਾਤੁਯੋ ਸਿਯਾ ਪੀਤਿਸਹਗਤਾ, ਸਿਯਾ ਸੁਖਸਹਗਤਾ, ਸਿਯਾ ਉਪੇਕ੍ਖਾਸਹਗਤਾ, ਸਿਯਾ ਨ ਵਤ੍ਤਬ੍ਬਾ – ‘‘ਪੀਤਿਸਹਗਤਾ’’ਤਿਪਿ, ‘‘ਸੁਖਸਹਗਤਾ’’ਤਿਪਿ, ‘‘ਉਪੇਕ੍ਖਾਸਹਗਤਾ’’ਤਿਪਿ.
ਸੋਲ਼ਸ ਧਾਤੁਯੋ ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਾ. ਦ੍ਵੇ ਧਾਤੁਯੋ ਸਿਯਾ ਦਸ੍ਸਨੇਨ ਪਹਾਤਬ੍ਬਾ, ਸਿਯਾ ਭਾਵਨਾਯ ਪਹਾਤਬ੍ਬਾ, ਸਿਯਾ ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਾ. ਸੋਲ਼ਸ ਧਾਤੁਯੋ ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਹੇਤੁਕਾ. ਦ੍ਵੇ ਧਾਤੁਯੋ ਸਿਯਾ ਦਸ੍ਸਨੇਨ ਪਹਾਤਬ੍ਬਹੇਤੁਕਾ, ਸਿਯਾ ਭਾਵਨਾਯ ਪਹਾਤਬ੍ਬਹੇਤੁਕਾ, ਸਿਯਾ ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਹੇਤੁਕਾ. ਸੋਲ਼ਸ ਧਾਤੁਯੋ ਨੇਵਾਚਯਗਾਮਿਨਾਪਚਯਗਾਮਿਨੋ. ਦ੍ਵੇ ਧਾਤੁਯੋ ਸਿਯਾ ਆਚਯਗਾਮਿਨੋ, ਸਿਯਾ ਅਪਚਯਗਾਮਿਨੋ, ਸਿਯਾ ਨੇਵਾਚਯਗਾਮਿਨਾਪਚਯਗਾਮਿਨੋ. ਸੋਲ਼ਸ ਧਾਤੁਯੋ ਨੇਵਸੇਕ੍ਖਨਾਸੇਕ੍ਖਾ. ਦ੍ਵੇ ਧਾਤੁਯੋ ਸਿਯਾ ਸੇਕ੍ਖਾ, ਸਿਯਾ ਅਸੇਕ੍ਖਾ, ਸਿਯਾ ਨੇਵਸੇਕ੍ਖਨਾਸੇਕ੍ਖਾ.
ਸੋਲ਼ਸ ਧਾਤੁਯੋ ਪਰਿਤ੍ਤਾ. ਦ੍ਵੇ ਧਾਤੁਯੋ ਸਿਯਾ ਪਰਿਤ੍ਤਾ, ਸਿਯਾ ਮਹਗ੍ਗਤਾ, ਸਿਯਾ ਅਪ੍ਪਮਾਣਾ. ਦਸ ਧਾਤੁਯੋ ਅਨਾਰਮ੍ਮਣਾ. ਛ ਧਾਤੁਯੋ ਪਰਿਤ੍ਤਾਰਮ੍ਮਣਾ. ਦ੍ਵੇ ਧਾਤੁਯੋ ਸਿਯਾ ਪਰਿਤ੍ਤਾਰਮ੍ਮਣਾ, ਸਿਯਾ ਮਹਗ੍ਗਤਾਰਮ੍ਮਣਾ, ਸਿਯਾ ਅਪ੍ਪਮਾਣਾਰਮ੍ਮਣਾ, ਸਿਯਾ ਨ ਵਤ੍ਤਬ੍ਬਾ – ‘‘ਪਰਿਤ੍ਤਾਰਮ੍ਮਣਾ’’ਤਿਪਿ, ‘‘ਮਹਗ੍ਗਤਾਰਮ੍ਮਣਾ’’ਤਿਪਿ, ‘‘ਅਪ੍ਪਮਾਣਾਰਮ੍ਮਣਾ’’ਤਿਪਿ. ਸੋਲ਼ਸ ਧਾਤੁਯੋ ਮਜ੍ਝਿਮਾ. ਦ੍ਵੇ ਧਾਤੁਯੋ ਸਿਯਾ ਹੀਨਾ, ਸਿਯਾ ਮਜ੍ਝਿਮਾ, ਸਿਯਾ ਪਣੀਤਾ. ਸੋਲ਼ਸ ਧਾਤੁਯੋ ਅਨਿਯਤਾ. ਦ੍ਵੇ ਧਾਤੁਯੋ ਸਿਯਾ ਮਿਚ੍ਛਤ੍ਤਨਿਯਤਾ, ਸਿਯਾ ਸਮ੍ਮਤ੍ਤਨਿਯਤਾ, ਸਿਯਾ ਅਨਿਯਤਾ.
ਦਸ ਧਾਤੁਯੋ ਅਨਾਰਮ੍ਮਣਾ. ਛ ਧਾਤੁਯੋ ਨ ਵਤ੍ਤਬ੍ਬਾ – ‘‘ਮਗ੍ਗਾਰਮ੍ਮਣਾ’’ਤਿਪਿ, ‘‘ਮਗ੍ਗਹੇਤੁਕਾ’’ਤਿਪਿ, ‘‘ਮਗ੍ਗਾਧਿਪਤਿਨੋ’’ਤਿਪਿ. ਦ੍ਵੇ ਧਾਤੁਯੋ ਸਿਯਾ ਮਗ੍ਗਾਰਮ੍ਮਣਾ, ਸਿਯਾ ਮਗ੍ਗਹੇਤੁਕਾ, ਸਿਯਾ ਮਗ੍ਗਾਧਿਪਤਿਨੋ, ਸਿਯਾ ਨ ਵਤ੍ਤਬ੍ਬਾ – ‘‘ਮਗ੍ਗਾਰਮ੍ਮਣਾ’’ਤਿਪਿ, ‘‘ਮਗ੍ਗਹੇਤੁਕਾ’’ਤਿਪਿ, ‘‘ਮਗ੍ਗਾਧਿਪਤਿਨੋ’’ਤਿਪਿ. ਦਸ ਧਾਤੁਯੋ ਸਿਯਾ ਉਪ੍ਪਨ੍ਨਾ, ਸਿਯਾ ਉਪ੍ਪਾਦਿਨੋ, ਸਿਯਾ ਨ ਵਤ੍ਤਬ੍ਬਾ – ‘‘ਅਨੁਪ੍ਪਨ੍ਨਾ’’ਤਿ. ਸਦ੍ਦਧਾਤੁ ਸਿਯਾ ਉਪ੍ਪਨ੍ਨਾ, ਸਿਯਾ ਅਨੁਪ੍ਪਨ੍ਨਾ, ਸਿਯਾ ਨ ਵਤ੍ਤਬ੍ਬਾ – ‘‘ਉਪ੍ਪਾਦਿਨੀ’’ਤਿ. ਛ ਧਾਤੁਯੋ ਸਿਯਾ ਉਪ੍ਪਨ੍ਨਾ, ਸਿਯਾ ਅਨੁਪ੍ਪਨ੍ਨਾ, ਸਿਯਾ ਉਪ੍ਪਾਦਿਨੋ. ਧਮ੍ਮਧਾਤੁ ਸਿਯਾ ਉਪ੍ਪਨ੍ਨਾ, ਸਿਯਾ ਅਨੁਪ੍ਪਨ੍ਨਾ, ਸਿਯਾ ਉਪ੍ਪਾਦਿਨੀ, ਸਿਯਾ ਨ ਵਤ੍ਤਬ੍ਬਾ – ‘‘ਉਪ੍ਪਨ੍ਨਾ’’ਤਿਪਿ, ‘‘ਅਨੁਪ੍ਪਨ੍ਨਾ’’ਤਿਪਿ, ‘‘ਉਪ੍ਪਾਦਿਨੀ’’ਤਿਪਿ.
ਸਤ੍ਤਰਸ ਧਾਤੁਯੋ ਸਿਯਾ ਅਤੀਤਾ, ਸਿਯਾ ਅਨਾਗਤਾ, ਸਿਯਾ ਪਚ੍ਚੁਪ੍ਪਨ੍ਨਾ. ਧਮ੍ਮਧਾਤੁ ਸਿਯਾ ਅਤੀਤਾ, ਸਿਯਾ ਅਨਾਗਤਾ, ਸਿਯਾ ਪਚ੍ਚੁਪ੍ਪਨ੍ਨਾ, ਸਿਯਾ ਨ ਵਤ੍ਤਬ੍ਬਾ – ‘‘ਅਤੀਤਾ’’ਤਿਪਿ, ‘‘ਅਨਾਗਤਾ’’ਤਿਪਿ, ‘‘ਪਚ੍ਚੁਪ੍ਪਨ੍ਨਾ’’ਤਿਪਿ. ਦਸ ਧਾਤੁਯੋ ਅਨਾਰਮ੍ਮਣਾ. ਛ ਧਾਤੁਯੋ ਪਚ੍ਚੁਪ੍ਪਨ੍ਨਾਰਮ੍ਮਣਾ. ਦ੍ਵੇ ਧਾਤੁਯੋ ਸਿਯਾ ਅਤੀਤਾਰਮ੍ਮਣਾ, ਸਿਯਾ ਅਨਾਗਤਾਰਮ੍ਮਣਾ, ਸਿਯਾ ਪਚ੍ਚੁਪ੍ਪਨ੍ਨਾਰਮ੍ਮਣਾ, ਸਿਯਾ ਨ ਵਤ੍ਤਬ੍ਬਾ – ‘‘ਅਤੀਤਾਰਮ੍ਮਣਾ’’ਤਿਪਿ, ‘‘ਅਨਾਗਤਾਰਮ੍ਮਣਾ’’ਤਿਪਿ, ‘‘ਪਚ੍ਚੁਪ੍ਪਨ੍ਨਾਰਮ੍ਮਣਾ’’ਤਿਪਿ; ਸਿਯਾ ਅਜ੍ਝਤ੍ਤਾ, ਸਿਯਾ ਬਹਿਦ੍ਧਾ, ਸਿਯਾ ਅਜ੍ਝਤ੍ਤਬਹਿਦ੍ਧਾ.
ਦਸ ਧਾਤੁਯੋ ਅਨਾਰਮ੍ਮਣਾ. ਛ ਧਾਤੁਯੋ ਸਿਯਾ ਅਜ੍ਝਤ੍ਤਾਰਮ੍ਮਣਾ, ਸਿਯਾ ਬਹਿਦ੍ਧਾਰਮ੍ਮਣਾ, ਸਿਯਾ ਅਜ੍ਝਤ੍ਤਬਹਿਦ੍ਧਾਰਮ੍ਮਣਾ. ਦ੍ਵੇ ਧਾਤੁਯੋ ਸਿਯਾ ਅਜ੍ਝਤ੍ਤਾਰਮ੍ਮਣਾ, ਸਿਯਾ ਬਹਿਦ੍ਧਾਰਮ੍ਮਣਾ, ਸਿਯਾ ਅਜ੍ਝਤ੍ਤਬਹਿਦ੍ਧਾਰਮ੍ਮਣਾ, ਸਿਯਾ ਨ ਵਤ੍ਤਬ੍ਬਾ – ‘‘ਅਜ੍ਝਤ੍ਤਾਰਮ੍ਮਣਾ’’ਤਿਪਿ, ‘‘ਬਹਿਦ੍ਧਾਰਮ੍ਮਣਾ’’ਤਿਪਿ, ‘‘ਅਜ੍ਝਤ੍ਤਬਹਿਦ੍ਧਾਰਮ੍ਮਣਾ’’ਤਿਪਿ. ਰੂਪਧਾਤੁ ਸਨਿਦਸ੍ਸਨਸਪ੍ਪਟਿਘਾ. ਨਵ ਧਾਤੁਯੋ ਅਨਿਦਸ੍ਸਨਅਪ੍ਪਟਿਘਾ. ਅਟ੍ਠ ਧਾਤੁਯੋ ਅਨਿਦਸ੍ਸਨਅਪ੍ਪਟਿਘਾ.
੨. ਦੁਕਂ
੧੮੮. ਸਤ੍ਤਰਸ ਧਾਤੁਯੋ ਨ ਹੇਤੂ. ਧਮ੍ਮਧਾਤੁ ਸਿਯਾ ਹੇਤੁ, ਸਿਯਾ ਨ ਹੇਤੁ. ਸੋਲ਼ਸ ਧਾਤੁਯੋ ਅਹੇਤੁਕਾ. ਦ੍ਵੇ ਧਾਤੁਯੋ ਸਿਯਾ ਸਹੇਤੁਕਾ, ਸਿਯਾ ਅਹੇਤੁਕਾ. ਸੋਲ਼ਸ ਧਾਤੁਯੋ ਅਹੇਤੁਕਾ. ਦ੍ਵੇ ਧਾਤੁਯੋ ਸਿਯਾ ਸਹੇਤੁਕਾ, ਸਿਯਾ ਅਹੇਤੁਕਾ. ਸੋਲ਼ਸ ਧਾਤੁਯੋ ਹੇਤੁਵਿਪ੍ਪਯੁਤ੍ਤਾ. ਦ੍ਵੇ ਧਾਤੁਯੋ ਸਿਯਾ ਹੇਤੁਸਮ੍ਪਯੁਤ੍ਤਾ, ਸਿਯਾ ਹੇਤੁਵਿਪ੍ਪਯੁਤ੍ਤਾ. ਸੋਲ਼ਸ ਧਾਤੁਯੋ ਨ ਵਤ੍ਤਬ੍ਬਾ – ‘‘ਹੇਤੁ ਚੇਵ ਸਹੇਤੁਕਾ ਚਾ’’ਤਿਪਿ, ‘‘ਸਹੇਤੁਕਾ ਚੇਵ ਨ ਚ ਹੇਤੂ’’ਤਿਪਿ. ਮਨੋਵਿਞ੍ਞਾਣਧਾਤੁ ਨ ਵਤ੍ਤਬ੍ਬਾ – ‘‘ਹੇਤੁ ਚੇਵ ਸਹੇਤੁਕਾ ਚਾ’’ਤਿ, ਸਿਯਾ ਸਹੇਤੁਕਾ ਚੇਵ ਨ ਚ ਹੇਤੁ, ਸਿਯਾ ਨ ਵਤ੍ਤਬ੍ਬਾ – ‘‘ਸਹੇਤੁਕਾ ਚੇਵ ਨ ਚ ਹੇਤੂ’’ਤਿ. ਧਮ੍ਮਧਾਤੁ ਸਿਯਾ ਹੇਤੁ ਚੇਵ ਸਹੇਤੁਕਾ ਚ, ਸਿਯਾ ਸਹੇਤੁਕਾ ਚੇਵ ਨ ਚ ਹੇਤੁ, ਸਿਯਾ ਨ ਵਤ੍ਤਬ੍ਬਾ – ‘‘ਹੇਤੁ ਚੇਵ ਸਹੇਤੁਕਾ ਚਾ’’ਤਿਪਿ, ‘‘ਸਹੇਤੁਕਾ ਚੇਵ ਨ ਚ ਹੇਤੂ’’ਤਿਪਿ. ਸੋਲ਼ਸ ਧਾਤੁਯੋ ਨ ਵਤ੍ਤਬ੍ਬਾ – ‘‘ਹੇਤੂ ਚੇਵ ਹੇਤੁਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਹੇਤੁਸਮ੍ਪਯੁਤ੍ਤਾ ਚੇਵ ਨ ਚ ਹੇਤੂ’’ਤਿਪਿ. ਮਨੋਵਿਞ੍ਞਾਣਧਾਤੁ ਨ ਵਤ੍ਤਬ੍ਬਾ – ‘‘ਹੇਤੁ ਚੇਵ ਹੇਤੁਸਮ੍ਪਯੁਤ੍ਤਾ ਚਾ’’ਤਿ, ਸਿਯਾ ਹੇਤੁਸਮ੍ਪਯੁਤ੍ਤਾ ਚੇਵ ਨ ਚ ਹੇਤੁ, ਸਿਯਾ ਨ ਵਤ੍ਤਬ੍ਬਾ – ‘‘ਹੇਤੁਸਮ੍ਪਯੁਤ੍ਤਾ ਚੇਵ ਨ ਚ ਹੇਤੂ’’ਤਿ. ਧਮ੍ਮਧਾਤੁ ਸਿਯਾ ਹੇਤੁ ਚੇਵ ਹੇਤੁਸਮ੍ਪਯੁਤ੍ਤਾ ਚ, ਸਿਯਾ ਹੇਤੁਸਮ੍ਪਯੁਤ੍ਤਾ ਚੇਵ ਨ ਚ ਹੇਤੁ, ਸਿਯਾ ਨ ਵਤ੍ਤਬ੍ਬਾ – ‘‘ਹੇਤੁ ਚੇਵ ਹੇਤੁਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਹੇਤੁਸਮ੍ਪਯੁਤ੍ਤਾ ਚੇਵ ਨ ਚ ਹੇਤੂ’’ਤਿਪਿ. ਸੋਲ਼ਸ ਧਾਤੁਯੋ ਨ ਹੇਤੁਅਹੇਤੁਕਾ. ਮਨੋਵਿਞ੍ਞਾਣਧਾਤੁ ਸਿਯਾ ਨ ਹੇਤੁਸਹੇਤੁਕਾ, ਸਿਯਾ ਨ ਹੇਤੁਅਹੇਤੁਕਾ. ਧਮ੍ਮਧਾਤੁ ਸਿਯਾ ਨ ਹੇਤੁਸਹੇਤੁਕਾ, ਸਿਯਾ ਨ ਹੇਤੁਅਹੇਤੁਕਾ, ਸਿਯਾ ਨ ਵਤ੍ਤਬ੍ਬਾ – ‘‘ਨ ਹੇਤੁਸਹੇਤੁਕਾ’’ਤਿਪਿ, ‘‘ਨ ਹੇਤੁਅਹੇਤੁਕਾ’’ਤਿਪਿ.
ਸਤ੍ਤਰਸ ਧਾਤੁਯੋ ਸਪ੍ਪਚ੍ਚਯਾ. ਧਮ੍ਮਧਾਤੁ ਸਿਯਾ ਸਪ੍ਪਚ੍ਚਯਾ, ਸਿਯਾ ਅਪ੍ਪਚ੍ਚਯਾ. ਸਤ੍ਤਰਸ ਧਾਤੁਯੋ ਸਙ੍ਖਤਾ. ਧਮ੍ਮਧਾਤੁ ਸਿਯਾ ਸਙ੍ਖਤਾ, ਸਿਯਾ ਅਸਙ੍ਖਤਾ. ਰੂਪਧਾਤੁ ਸਨਿਦਸ੍ਸਨਾ. ਸਤ੍ਤਰਸ ਧਾਤੁਯੋ ਅਨਿਦਸ੍ਸਨਾ. ਦਸ ਧਾਤੁਯੋ ਸਪ੍ਪਟਿਘਾ. ਅਟ੍ਠ ਧਾਤੁਯੋ ਅਪ੍ਪਟਿਘਾ. ਦਸ ਧਾਤੁਯੋ ਰੂਪਾ. ਸਤ੍ਤ ਧਾਤੁਯੋ ਅਰੂਪਾ. ਧਮ੍ਮਧਾਤੁ ਸਿਯਾ ਰੂਪਾ, ਸਿਯਾ ਅਰੂਪਾ. ਸੋਲ਼ਸ ਧਾਤੁਯੋ ਲੋਕਿਯਾ. ਦ੍ਵੇ ਧਾਤੁਯੋ ਸਿਯਾ ਲੋਕਿਯਾ, ਸਿਯਾ ਲੋਕੁਤ੍ਤਰਾ; ਕੇਨਚਿ ਵਿਞ੍ਞੇਯ੍ਯਾ, ਕੇਨਚਿ ਨ ਵਿਞ੍ਞੇਯ੍ਯਾ.
ਸਤ੍ਤਰਸ ਧਾਤੁਯੋ ਨੋ ਆਸਵਾ. ਧਮ੍ਮਧਾਤੁ ਸਿਯਾ ਆਸਵਾ, ਸਿਯਾ ਨੋ ਆਸਵਾ. ਸੋਲ਼ਸ ਧਾਤੁਯੋ ਸਾਸਵਾ. ਦ੍ਵੇ ਧਾਤੁਯੋ ਸਿਯਾ ਸਾਸਵਾ, ਸਿਯਾ ਅਨਾਸਵਾ. ਸੋਲ਼ਸ ਧਾਤੁਯੋ ਆਸਵਵਿਪ੍ਪਯੁਤ੍ਤਾ. ਦ੍ਵੇ ਧਾਤੁਯੋ ਸਿਯਾ ਆਸਵਸਮ੍ਪਯੁਤ੍ਤਾ, ਸਿਯਾ ਆਸਵਵਿਪ੍ਪਯੁਤ੍ਤਾ. ਸੋਲ਼ਸ ਧਾਤੁਯੋ ਨ ਵਤ੍ਤਬ੍ਬਾ – ‘‘ਆਸਵਾ ਚੇਵ ਸਾਸਵਾ ਚਾ’’ਤਿ, ‘‘ਸਾਸਵਾ ਚੇਵ ਨੋ ਚ ਆਸਵਾ’’. ਮਨੋਵਿਞ੍ਞਾਣਧਾਤੁ ਨ ਵਤ੍ਤਬ੍ਬਾ – ‘‘ਆਸਵੋ ਚੇਵ ਸਾਸਵਾ ਚਾ’’ਤਿ, ਸਿਯਾ ਸਾਸਵਾ ਚੇਵ ਨੋ ਚ ਆਸਵੋ, ਸਿਯਾ ਨ ਵਤ੍ਤਬ੍ਬਾ – ‘‘ਸਾਸਵਾ ਚੇਵ ਨੋ ਚ ਆਸਵੋ’’ਤਿ. ਧਮ੍ਮਧਾਤੁ ਸਿਯਾ ਆਸਵੋ ਚੇਵ ਸਾਸਵਾ ਚ, ਸਿਯਾ ਸਾਸਵਾ ਚੇਵ ਨੋ ਚ ਆਸਵੋ, ਸਿਯਾ ਨ ਵਤ੍ਤਬ੍ਬਾ – ‘‘ਆਸਵੋ ਚੇਵ ਸਾਸਵਾ ਚਾ’’ਤਿਪਿ, ‘‘ਸਾਸਵਾ ਚੇਵ ਨੋ ਚ ਆਸਵੋ’’ਤਿਪਿ.
ਸੋਲ਼ਸ ਧਾਤੁਯੋ ਨ ਵਤ੍ਤਬ੍ਬਾ – ‘‘ਆਸਵਾ ਚੇਵ ਆਸਵਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਆਸਵਸਮ੍ਪਯੁਤ੍ਤਾ ਚੇਵ ਨੋ ਚ ਆਸਵਾ’’ਤਿਪਿ. ਮਨੋਵਿਞ੍ਞਾਣਧਾਤੁ ਨ ਵਤ੍ਤਬ੍ਬਾ – ‘‘ਆਸਵੋ ਚੇਵ ਆਸਵਸਮ੍ਪਯੁਤ੍ਤਾ ਚਾ’’ਤਿ, ਸਿਯਾ ਆਸਵਸਮ੍ਪਯੁਤ੍ਤਾ ਚੇਵ ਨੋ ਚ ਆਸਵੋ, ਸਿਯਾ ਨ ਵਤ੍ਤਬ੍ਬਾ – ‘‘ਆਸਵਸਮ੍ਪਯੁਤ੍ਤਾ ਚੇਵ ਨੋ ਚ ਆਸਵੋ’’ਤਿ. ਧਮ੍ਮਧਾਤੁ ਸਿਯਾ ਆਸਵੋ ਚੇਵ ਆਸਵਸਮ੍ਪਯੁਤ੍ਤਾ ਚ, ਸਿਯਾ ਆਸਵਸਮ੍ਪਯੁਤ੍ਤਾ ਚੇਵ ਨੋ ਚ ਆਸਵੋ, ਸਿਯਾ ਨ ਵਤ੍ਤਬ੍ਬਾ – ‘‘ਆਸਵੋ ਚੇਵ ਆਸਵਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਆਸਵਸਮ੍ਪਯੁਤ੍ਤਾ ਚੇਵ ਨੋ ਚ ਆਸਵੋ’’ਤਿਪਿ. ਸੋਲ਼ਸ ਧਾਤੁਯੋ ਆਸਵਵਿਪ੍ਪਯੁਤ੍ਤਸਾਸਵਾ. ਦ੍ਵੇ ਧਾਤੁਯੋ ਸਿਯਾ ਆਸਵਵਿਪ੍ਪਯੁਤ੍ਤਸਾਸਵਾ, ਸਿਯਾ ਆਸਵਵਿਪ੍ਪਯੁਤ੍ਤਅਨਾਸਵਾ, ਸਿਯਾ ਨ ਵਤ੍ਤਬ੍ਬਾ – ‘‘ਆਸਵਵਿਪ੍ਪਯੁਤ੍ਤਸਾਸਵਾ’’ਤਿਪਿ, ‘‘ਆਸਵਵਿਪ੍ਪਯੁਤ੍ਤਅਨਾਸਵਾ’’ਤਿਪਿ.
ਸਤ੍ਤਰਸ ਧਾਤੁਯੋ ਨੋ ਸਂਯੋਜਨਾ. ਧਮ੍ਮਧਾਤੁ ਸਿਯਾ ਸਂਯੋਜਨਂ, ਸਿਯਾ ਨੋ ਸਂਯੋਜਨਂ. ਸੋਲ਼ਸ ਧਾਤੁਯੋ ਸਂਯੋਜਨਿਯਾ. ਦ੍ਵੇ ਧਾਤੁਯੋ ਸਿਯਾ ਸਂਯੋਜਨਿਯਾ, ਸਿਯਾ ਅਸਂਯੋਜਨਿਯਾ. ਸੋਲ਼ਸ ਧਾਤੁਯੋ ਸਂਯੋਜਨਵਿਪ੍ਪਯੁਤ੍ਤਾ. ਦ੍ਵੇ ਧਾਤੁਯੋ ਸਿਯਾ ਸਂਯੋਜਨਸਮ੍ਪਯੁਤ੍ਤਾ, ਸਿਯਾ ਸਂਯੋਜਨਵਿਪ੍ਪਯੁਤ੍ਤਾ. ਸੋਲ਼ਸ ਧਾਤੁਯੋ ਨ ਵਤ੍ਤਬ੍ਬਾ – ‘‘ਸਂਯੋਜਨਾ ਚੇਵ ਸਂਯੋਜਨਿਯਾ ਚਾ’’ਤਿ, ਸਂਯੋਜਨਿਯਾ ਚੇਵ ਨੋ ਚ ਸਂਯੋਜਨਾ. ਮਨੋਵਿਞ੍ਞਾਣਧਾਤੁ ਨ ਵਤ੍ਤਬ੍ਬਾ – ‘‘ਸਂਯੋਜਨਞ੍ਚੇਵ ਸਂਯੋਜਨਿਯਾ ਚਾ’’ਤਿ, ਸਿਯਾ ਸਂਯੋਜਨਿਯਾ ਚੇਵ ਨੋ ਚ ਸਂਯੋਜਨਂ, ਸਿਯਾ ਨ ਵਤ੍ਤਬ੍ਬਾ – ‘‘ਸਂਯੋਜਨਿਯਾ ਚੇਵ ਨੋ ਚ ਸਂਯੋਜਨ’’ਨ੍ਤਿ. ਧਮ੍ਮਧਾਤੁ ਸਿਯਾ ਸਂਯੋਜਨਞ੍ਚੇਵ ਸਂਯੋਜਨਿਯਾ ਚ, ਸਿਯਾ ਸਂਯੋਜਨਿਯਾ ਚੇਵ ਨੋ ਚ ਸਂਯੋਜਨਂ, ਸਿਯਾ ਨ ਵਤ੍ਤਬ੍ਬਾ – ‘‘ਸਂਯੋਜਨਞ੍ਚੇਵ ਸਂਯੋਜਨਿਯਾ ਚਾ’’ਤਿਪਿ, ‘‘ਸਂਯੋਜਨਿਯਾ ਚੇਵ ਨੋ ਚ ਸਂਯੋਜਨ’’ਨ੍ਤਿਪਿ. ਸੋਲ਼ਸ ਧਾਤੁਯੋ ਨ ਵਤ੍ਤਬ੍ਬਾ – ‘‘ਸਂਯੋਜਨਾ ਚੇਵ ਸਂਯੋਜਨਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਸਂਯੋਜਨਸਮ੍ਪਯੁਤ੍ਤਾ ਚੇਵ ਨੋ ਚ ਸਂਯੋਜਨਾ’’ਤਿਪਿ. ਮਨੋਵਿਞ੍ਞਾਣਧਾਤੁ ਨ ਵਤ੍ਤਬ੍ਬਾ – ‘‘ਸਂਯੋਜਨਞ੍ਚੇਵ ਸਂਯੋਜਨਸਮ੍ਪਯੁਤ੍ਤਾ ਚਾ’’ਤਿ, ਸਿਯਾ ਸਂਯੋਜਨਸਮ੍ਪਯੁਤ੍ਤਾ ਚੇਵ ਨੋ ਚ ਸਂਯੋਜਨਂ, ਸਿਯਾ ਨ ਵਤ੍ਤਬ੍ਬਾ – ‘‘ਸਂਯੋਜਨਸਮ੍ਪਯੁਤ੍ਤਾ ਚੇਵ ਨੋ ਚ ਸਂਯੋਜਨ’’ਨ੍ਤਿ. ਧਮ੍ਮਧਾਤੁ ਸਿਯਾ ਸਂਯੋਜਨਞ੍ਚੇਵ ਸਂਯੋਜਨਸਮ੍ਪਯੁਤ੍ਤਾ ਚ, ਸਿਯਾ ਸਂਯੋਜਨਸਮ੍ਪਯੁਤ੍ਤਾ ਚੇਵ ਨੋ ਚ ਸਂਯੋਜਨਂ, ਸਿਯਾ ਨ ਵਤ੍ਤਬ੍ਬਾ – ‘‘ਸਂਯੋਜਨਞ੍ਚੇਵ ਸਂਯੋਜਨਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਸਂਯੋਜਨਸਮ੍ਪਯੁਤ੍ਤਾ ਚੇਵ ਨੋ ਚ ਸਂਯੋਜਨ’’ਨ੍ਤਿਪਿ. ਸੋਲ਼ਸ ਧਾਤੁਯੋ ਸਂਯੋਜਨਵਿਪ੍ਪਯੁਤ੍ਤਸਂਯੋਜਨਿਯਾ. ਦ੍ਵੇ ਧਾਤੁਯੋ ਸਿਯਾ ਸਂਯੋਜਨਵਿਪ੍ਪਯੁਤ੍ਤਸਂਯੋਜਨਿਯਾ, ਸਿਯਾ ਸਂਯੋਜਨਵਿਪ੍ਪਯੁਤ੍ਤਅਸਂਯੋਜਨਿਯਾ, ਸਿਯਾ ਨ ਵਤ੍ਤਬ੍ਬਾ – ‘‘ਸਂਯੋਜਨਵਿਪ੍ਪਯੁਤ੍ਤਸਂਯੋਜਨਿਯਾ’’ਤਿਪਿ, ‘‘ਸਂਯੋਜਨਵਿਪ੍ਪਯੁਤ੍ਤਅਸਂਯੋਜਨਿਯਾ’’ਤਿਪਿ.
ਸਤ੍ਤਰਸ ਧਾਤੁਯੋ ਨੋ ਗਨ੍ਥਾ. ਧਮ੍ਮਧਾਤੁ ਸਿਯਾ ਗਨ੍ਥੋ, ਸਿਯਾ ਨੋ ਗਨ੍ਥੋ. ਸੋਲ਼ਸ ਧਾਤੁਯੋ ਗਨ੍ਥਨਿਯਾ. ਦ੍ਵੇ ਧਾਤੁਯੋ ਸਿਯਾ ਗਨ੍ਥਨਿਯਾ, ਸਿਯਾ ਅਗਨ੍ਥਨਿਯਾ. ਸੋਲ਼ਸ ਧਾਤੁਯੋ ਗਨ੍ਥਵਿਪ੍ਪਯੁਤ੍ਤਾ. ਦ੍ਵੇ ਧਾਤੁਯੋ ਸਿਯਾ ਗਨ੍ਥਸਮ੍ਪਯੁਤ੍ਤਾ, ਸਿਯਾ ਗਨ੍ਥਵਿਪ੍ਪਯੁਤ੍ਤਾ. ਸੋਲ਼ਸ ਧਾਤੁਯੋ ਨ ਵਤ੍ਤਬ੍ਬਾ – ‘‘ਗਨ੍ਥਾ ਚੇਵ ਗਨ੍ਥਨਿਯਾ ਚਾ’’ਤਿ, ਗਨ੍ਥਨਿਯਾ ਚੇਵ ਨੋ ਚ ਗਨ੍ਥਾ. ਮਨੋਵਿਞ੍ਞਾਣਧਾਤੁ ਨ ਵਤ੍ਤਬ੍ਬਾ – ‘‘ਗਨ੍ਥੋ ਚੇਵ ਗਨ੍ਥਨਿਯਾ ਚਾ’’ਤਿ, ਸਿਯਾ ਗਨ੍ਥਨਿਯਾ ਚੇਵ ਨੋ ਚ ਗਨ੍ਥੋ, ਸਿਯਾ ਨ ਵਤ੍ਤਬ੍ਬਾ – ‘‘ਗਨ੍ਥਨਿਯਾ ਚੇਵ ਨੋ ਚ ਗਨ੍ਥੋ’’ਤਿ. ਧਮ੍ਮਧਾਤੁ ਸਿਯਾ ਗਨ੍ਥੋ ਚੇਵ ਗਨ੍ਥਨਿਯਾ ਚ, ਸਿਯਾ ਗਨ੍ਥਨਿਯਾ ਚੇਵ ਨੋ ਚ ਗਨ੍ਥੋ, ਸਿਯਾ ਨ ਵਤ੍ਤਬ੍ਬਾ – ‘‘ਗਨ੍ਥੋ ਚੇਵ ਗਨ੍ਥਨਿਯਾ ਚਾ’’ਤਿਪਿ, ‘‘ਗਨ੍ਥਨਿਯਾ ਚੇਵ ਨੋ ਚ ਗਨ੍ਥੋ’’ਤਿਪਿ. ਸੋਲ਼ਸ ਧਾਤੁਯੋ ਨ ਵਤ੍ਤਬ੍ਬਾ – ‘‘ਗਨ੍ਥਾ ਚੇਵ ਗਨ੍ਥਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਗਨ੍ਥਸਮ੍ਪਯੁਤ੍ਤਾ ਚੇਵ ਨੋ ਚ ਗਨ੍ਥਾ’’ਤਿਪਿ. ਮਨੋਵਿਞ੍ਞਾਣਧਾਤੁ ਨ ਵਤ੍ਤਬ੍ਬਾ – ‘‘ਗਨ੍ਥੋ ਚੇਵ ਗਨ੍ਥਸਮ੍ਪਯੁਤ੍ਤਾ ਚਾ’’ਤਿ, ਸਿਯਾ ਗਨ੍ਥਸਮ੍ਪਯੁਤ੍ਤਾ ਚੇਵ ਨੋ ਚ ਗਨ੍ਥੋ, ਸਿਯਾ ਨ ਵਤ੍ਤਬ੍ਬਾ – ‘‘ਗਨ੍ਥਸਮ੍ਪਯੁਤ੍ਤਾ ਚੇਵ ਨੋ ਚ ਗਨ੍ਥੋ’’ਤਿ. ਧਮ੍ਮਧਾਤੁ ਸਿਯਾ ਗਨ੍ਥੋ ਚੇਵ ਗਨ੍ਥਸਮ੍ਪਯੁਤ੍ਤਾ ਚ, ਸਿਯਾ ਗਨ੍ਥਸਮ੍ਪਯੁਤ੍ਤਾ ਚੇਵ ਨੋ ਚ ਗਨ੍ਥੋ, ਸਿਯਾ ਨ ਵਤ੍ਤਬ੍ਬਾ – ‘‘ਗਨ੍ਥੋ ਚੇਵ ਗਨ੍ਥਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਗਨ੍ਥਸਮ੍ਪਯੁਤ੍ਤਾ ਚੇਵ ਨੋ ਚ ਗਨ੍ਥੋ’’ਤਿਪਿ. ਸੋਲ਼ਸ ਧਾਤੁਯੋ ਗਨ੍ਥਵਿਪ੍ਪਯੁਤ੍ਤਗਨ੍ਥਨਿਯਾ. ਦ੍ਵੇ ਧਾਤੁਯੋ ਸਿਯਾ ਗਨ੍ਥਵਿਪ੍ਪਯੁਤ੍ਤਗਨ੍ਥਨਿਯਾ, ਸਿਯਾ ਗਨ੍ਥਵਿਪ੍ਪਯੁਤ੍ਤਅਗਨ੍ਥਨਿਯਾ, ਸਿਯਾ ਨ ਵਤ੍ਤਬ੍ਬਾ – ‘‘ਗਨ੍ਥਵਿਪ੍ਪਯੁਤ੍ਤਗਨ੍ਥਨਿਯਾ’’ਤਿਪਿ, ‘‘ਗਨ੍ਥਵਿਪ੍ਪਯੁਤ੍ਤਅਗਨ੍ਥਨਿਯਾ’’ਤਿਪਿ.
ਸਤ੍ਤਰਸ ਧਾਤੁਯੋ ਨੋ ਓਘਾ…ਪੇ… ਨੋ ਯੋਗਾ…ਪੇ… ਨੋ ਨੀਵਰਣਾ. ਧਮ੍ਮਧਾਤੁ ਸਿਯਾ ਨੀਵਰਣਂ, ਸਿਯਾ ਨੋ ਨੀਵਰਣਂ. ਸੋਲ਼ਸ ਧਾਤੁਯੋ ਨੀਵਰਣਿਯਾ. ਦ੍ਵੇ ਧਾਤੁਯੋ ਸਿਯਾ ਨੀਵਰਣਿਯਾ, ਸਿਯਾ ਅਨੀਵਰਣਿਯਾ. ਸੋਲ਼ਸ ਧਾਤੁਯੋ ਨੀਵਰਣਵਿਪ੍ਪਯੁਤ੍ਤਾ. ਦ੍ਵੇ ਧਾਤੁਯੋ ਸਿਯਾ ਨੀਵਰਣਸਮ੍ਪਯੁਤ੍ਤਾ, ਸਿਯਾ ਨੀਵਰਣਵਿਪ੍ਪਯੁਤ੍ਤਾ. ਸੋਲ਼ਸ ਧਾਤੁਯੋ ਨ ਵਤ੍ਤਬ੍ਬਾ – ‘‘ਨੀਵਰਣਾ ਚੇਵ ਨੀਵਰਣਿਯਾ ਚਾ’’ਤਿ, ਨੀਵਰਣਿਯਾ ਚੇਵ ਨੋ ਚ ਨੀਵਰਣਾ. ਮਨੋਵਿਞ੍ਞਾਣਧਾਤੁ ਨ ਵਤ੍ਤਬ੍ਬਾ – ‘‘ਨੀਵਰਣਞ੍ਚੇਵ ਨੀਵਰਣਿਯਾ ਚਾ’’ਤਿ, ਸਿਯਾ ਨੀਵਰਣਿਯਾ ਚੇਵ ਨੋ ਚ ਨੀਵਰਣਂ, ਸਿਯਾ ਨ ਵਤ੍ਤਬ੍ਬਾ – ‘‘ਨੀਵਰਣਿਯਾ ਚੇਵ ਨੋ ਚ ਨੀਵਰਣ’’ਨ੍ਤਿ. ਧਮ੍ਮਧਾਤੁ ਸਿਯਾ ਨੀਵਰਣਞ੍ਚੇਵ ਨੀਵਰਣਿਯਾ ਚ, ਸਿਯਾ ਨੀਵਰਣਿਯਾ ਚੇਵ ਨੋ ਚ ਨੀਵਰਣਂ, ਸਿਯਾ ਨ ਵਤ੍ਤਬ੍ਬਾ – ‘‘ਨੀਵਰਣਞ੍ਚੇਵ ਨੀਵਰਣਿਯਾ ਚਾ’’ਤਿਪਿ, ‘‘ਨੀਵਰਣਿਯਾ ਚੇਵ ਨੋ ਚ ਨੀਵਰਣ’’ਨ੍ਤਿਪਿ. ਸੋਲ਼ਸ ਧਾਤੁਯੋ ਨ ਵਤ੍ਤਬ੍ਬਾ – ‘‘ਨੀਵਰਣਾ ਚੇਵ ਨੀਵਰਣਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਨੀਵਰਣਸਮ੍ਪਯੁਤ੍ਤਾ ਚੇਵ ਨੋ ਚ ਨੀਵਰਣਾ’’ਤਿਪਿ. ਮਨੋਵਿਞ੍ਞਾਣਧਾਤੁ ਨ ਵਤ੍ਤਬ੍ਬਾ – ‘‘ਨੀਵਰਣਞ੍ਚੇਵ ਨੀਵਰਣਸਮ੍ਪਯੁਤ੍ਤਾ ਚਾ’’ਤਿ, ਸਿਯਾ ਨੀਵਰਣਸਮ੍ਪਯੁਤ੍ਤਾ ਚੇਵ ਨੋ ਚ ਨੀਵਰਣਂ, ਸਿਯਾ ਨ ਵਤ੍ਤਬ੍ਬਾ – ‘‘ਨੀਵਰਣਸਮ੍ਪਯੁਤ੍ਤਾ ਚੇਵ ਨੋ ਚ ਨੀਵਰਣ’’ਨ੍ਤਿ. ਧਮ੍ਮਧਾਤੁ ਸਿਯਾ ਨੀਵਰਣਞ੍ਚੇਵ ਨੀਵਰਣਸਮ੍ਪਯੁਤ੍ਤਾ ਚ, ਸਿਯਾ ਨੀਵਰਣਸਮ੍ਪਯੁਤ੍ਤਾ ਚੇਵ ਨੋ ਚ ਨੀਵਰਣਂ, ਸਿਯਾ ਨ ਵਤ੍ਤਬ੍ਬਾ – ‘‘ਨੀਵਰਣਞ੍ਚੇਵ ਨੀਵਰਣਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਨੀਵਰਣਸਮ੍ਪਯੁਤ੍ਤਾ ਚੇਵ ਨੋ ਚ ਨੀਵਰਣ’’ਨ੍ਤਿਪਿ. ਸੋਲ਼ਸ ਧਾਤੁਯੋ ਨੀਵਰਣਵਿਪ੍ਪਯੁਤ੍ਤਨੀਵਰਣਿਯਾ. ਦ੍ਵੇ ਧਾਤੁਯੋ ਸਿਯਾ ਨੀਵਰਣਵਿਪ੍ਪਯੁਤ੍ਤਨੀਵਰਣਿਯਾ, ਸਿਯਾ ਨੀਵਰਣਵਿਪ੍ਪਯੁਤ੍ਤਅਨੀਵਰਣਿਯਾ, ਸਿਯਾ ਨ ਵਤ੍ਤਬ੍ਬਾ – ‘‘ਨੀਵਰਣਵਿਪ੍ਪਯੁਤ੍ਤਨੀਵਰਣਿਯਾ’’ਤਿਪਿ, ‘‘ਨੀਵਰਣਵਿਪ੍ਪਯੁਤ੍ਤਅਨੀਵਰਣਿਯਾ’’ਤਿਪਿ.
ਸਤ੍ਤਰਸ ਧਾਤੁਯੋ ਨੋ ਪਰਾਮਾਸਾ. ਧਮ੍ਮਧਾਤੁ ਸਿਯਾ ਪਰਾਮਾਸੋ, ਸਿਯਾ ਨੋ ਪਰਾਮਾਸੋ. ਸੋਲ਼ਸ ਧਾਤੁਯੋ ਪਰਾਮਟ੍ਠਾ. ਦ੍ਵੇ ਧਾਤੁਯੋ ਸਿਯਾ ਪਰਾਮਟ੍ਠਾ, ਸਿਯਾ ਅਪਰਾਮਟ੍ਠਾ. ਸੋਲ਼ਸ ਧਾਤੁਯੋ ਪਰਾਮਾਸਵਿਪ੍ਪਯੁਤ੍ਤਾ. ਮਨੋਵਿਞ੍ਞਾਣਧਾਤੁ ਸਿਯਾ ਪਰਾਮਾਸਸਮ੍ਪਯੁਤ੍ਤਾ, ਸਿਯਾ ਪਰਾਮਾਸਵਿਪ੍ਪਯੁਤ੍ਤਾ. ਧਮ੍ਮਧਾਤੁ ਸਿਯਾ ਪਰਾਮਾਸਸਮ੍ਪਯੁਤ੍ਤਾ, ਸਿਯਾ ਪਰਾਮਾਸਵਿਪ੍ਪਯੁਤ੍ਤਾ, ਸਿਯਾ ਨ ਵਤ੍ਤਬ੍ਬਾ – ‘‘ਪਰਾਮਾਸਸਮ੍ਪਯੁਤ੍ਤਾ’’ਤਿਪਿ, ‘‘ਪਰਾਮਾਸਵਿਪ੍ਪਯੁਤ੍ਤਾ’’ਤਿਪਿ. ਸੋਲ਼ਸ ਧਾਤੁਯੋ ਨ ਵਤ੍ਤਬ੍ਬਾ – ‘‘ਪਰਾਮਾਸਾ ਚੇਵ ਪਰਾਮਟ੍ਠਾ ਚਾਤਿ ਪਰਾਮਟ੍ਠਾ ਚੇਵ ਨੋ ਚ ਪਰਾਮਾਸਾ’’. ਮਨੋਵਿਞ੍ਞਾਣਧਾਤੁ ਨ ਵਤ੍ਤਬ੍ਬਾ – ‘‘ਪਰਾਮਾਸੋ ਚੇਵ ਪਰਾਮਟ੍ਠਾ ਚਾ’’ਤਿ, ਸਿਯਾ ਪਰਾਮਟ੍ਠਾ ਚੇਵ ਨੋ ਚ ਪਰਾਮਾਸੋ, ਸਿਯਾ ਨ ਵਤ੍ਤਬ੍ਬਾ – ‘‘ਪਰਾਮਟ੍ਠਾ ਚੇਵ ਨੋ ਚ ਪਰਾਮਾਸੋ’’ਤਿ. ਧਮ੍ਮਧਾਤੁ ਸਿਯਾ ਪਰਾਮਾਸੋ ਚੇਵ ਪਰਾਮਟ੍ਠਾ ਚ, ਸਿਯਾ ਪਰਾਮਟ੍ਠਾ ਚੇਵ ਨੋ ਚ ਪਰਾਮਾਸੋ, ਸਿਯਾ ਨ ਵਤ੍ਤਬ੍ਬਾ – ‘‘ਪਰਾਮਾਸੋ ਚੇਵ ਪਰਾਮਟ੍ਠਾ ਚਾ’’ਤਿਪਿ, ‘‘ਪਰਾਮਟ੍ਠਾ ਚੇਵ ਨੋ ਚ ਪਰਾਮਾਸੋ’’ਤਿਪਿ. ਸੋਲ਼ਸ ਧਾਤੁਯੋ ਪਰਾਮਾਸਵਿਪ੍ਪਯੁਤ੍ਤਪਰਾਮਟ੍ਠਾ. ਦ੍ਵੇ ਧਾਤੁਯੋ ਸਿਯਾ ਪਰਾਮਾਸਵਿਪ੍ਪਯੁਤ੍ਤਪਰਾਮਟ੍ਠਾ, ਸਿਯਾ ਪਰਾਮਾਸਵਿਪ੍ਪਯੁਤ੍ਤਅਪਰਾਮਟ੍ਠਾ, ਸਿਯਾ ਨ ਵਤ੍ਤਬ੍ਬਾ – ‘‘ਪਰਾਮਾਸਵਿਪ੍ਪਯੁਤ੍ਤਪਰਾਮਟ੍ਠਾ’’ਤਿਪਿ, ‘‘ਪਰਾਮਾਸਵਿਪ੍ਪਯੁਤ੍ਤਅਪਰਾਮਟ੍ਠਾ’’ਤਿਪਿ.
ਦਸ ਧਾਤੁਯੋ ਅਨਾਰਮ੍ਮਣਾ. ਸਤ੍ਤ ਧਾਤੁਯੋ ਸਾਰਮ੍ਮਣਾ. ਧਮ੍ਮਧਾਤੁ ਸਿਯਾ ਸਾਰਮ੍ਮਣਾ, ਸਿਯਾ ਅਨਾਰਮ੍ਮਣਾ. ਸਤ੍ਤ ਧਾਤੁਯੋ ਚਿਤ੍ਤਾ. ਏਕਾਦਸ ਧਾਤੁਯੋ ਨੋ ਚਿਤ੍ਤਾ. ਸਤ੍ਤਰਸ ਧਾਤੁਯੋ ਅਚੇਤਸਿਕਾ. ਧਮ੍ਮਧਾਤੁ ਸਿਯਾ ਚੇਤਸਿਕਾ, ਸਿਯਾ ਅਚੇਤਸਿਕਾ. ਦਸ ਧਾਤੁਯੋ ਚਿਤ੍ਤਵਿਪ੍ਪਯੁਤ੍ਤਾ. ਧਮ੍ਮਧਾਤੁ ਸਿਯਾ ਚਿਤ੍ਤਸਮ੍ਪਯੁਤ੍ਤਾ, ਸਿਯਾ ਚਿਤ੍ਤਵਿਪ੍ਪਯੁਤ੍ਤਾ. ਸਤ੍ਤ ਧਾਤੁਯੋ ਨ ਵਤ੍ਤਬ੍ਬਾ – ‘‘ਚਿਤ੍ਤੇਨ ਸਮ੍ਪਯੁਤ੍ਤਾ’’ਤਿਪਿ, ‘‘ਚਿਤ੍ਤੇਨ ਵਿਪ੍ਪਯੁਤ੍ਤਾ’’ਤਿਪਿ. ਦਸ ਧਾਤੁਯੋ ਚਿਤ੍ਤਵਿਸਂਸਟ੍ਠਾ. ਧਮ੍ਮਧਾਤੁ ਸਿਯਾ ਚਿਤ੍ਤਸਂਸਟ੍ਠਾ, ਸਿਯਾ ਚਿਤ੍ਤਵਿਸਂਸਟ੍ਠਾ. ਸਤ੍ਤ ਧਾਤੁਯੋ ਨ ਵਤ੍ਤਬ੍ਬਾ – ‘‘ਚਿਤ੍ਤੇਨ ਸਂਸਟ੍ਠਾ’’ਤਿਪਿ, ‘‘ਚਿਤ੍ਤੇਨ ਵਿਸਂਸਟ੍ਠਾ’’ਤਿਪਿ.
ਦ੍ਵਾਦਸ ਧਾਤੁਯੋ ਨੋ ਚਿਤ੍ਤਸਮੁਟ੍ਠਾਨਾ. ਛ ਧਾਤੁਯੋ ਸਿਯਾ ਚਿਤ੍ਤਸਮੁਟ੍ਠਾਨਾ, ਸਿਯਾ ਨੋ ਚਿਤ੍ਤਸਮੁਟ੍ਠਾਨਾ. ਸਤ੍ਤਰਸ ਧਾਤੁਯੋ ਨੋ ਚਿਤ੍ਤਸਹਭੁਨੋ. ਧਮ੍ਮਧਾਤੁ ਸਿਯਾ ਚਿਤ੍ਤਸਹਭੂ, ਸਿਯਾ ਨੋ ਚਿਤ੍ਤਸਹਭੂ. ਸਤ੍ਤਰਸ ਧਾਤੁਯੋ ਨੋ ਚਿਤ੍ਤਾਨੁਪਰਿਵਤ੍ਤਿਨੋ. ਧਮ੍ਮਧਾਤੁ ਸਿਯਾ ਚਿਤ੍ਤਾਨੁਪਰਿਵਤ੍ਤੀ, ਸਿਯਾ ਨੋ ਚਿਤ੍ਤਾਨੁਪਰਿਵਤ੍ਤੀ. ਸਤ੍ਤਰਸ ਧਾਤੁਯੋ ਨੋ ਚਿਤ੍ਤਸਂਸਟ੍ਠਸਮੁਟ੍ਠਾਨਾ. ਧਮ੍ਮਧਾਤੁ ਸਿਯਾ ਚਿਤ੍ਤਸਂਸਟ੍ਠਸਮੁਟ੍ਠਾਨਾ, ਸਿਯਾ ਨੋ ਚਿਤ੍ਤਸਂਸਟ੍ਠਸਮੁਟ੍ਠਾਨਾ. ਸਤ੍ਤਰਸ ਧਾਤੁਯੋ ਨੋ ਚਿਤ੍ਤਸਂਸਟ੍ਠਸਮੁਟ੍ਠਾਨਸਹਭੁਨੋ. ਧਮ੍ਮਧਾਤੁ ਸਿਯਾ ਚਿਤ੍ਤਸਂਸਟ੍ਠਸਮੁਟ੍ਠਾਨਸਹਭੂ, ਸਿਯਾ ਨੋ ਚਿਤ੍ਤਸਂਸਟ੍ਠਸਮੁਟ੍ਠਾਨਸਹਭੂ. ਸਤ੍ਤਰਸ ਧਾਤੁਯੋ ਨੋ ਚਿਤ੍ਤਸਂਸਟ੍ਠਸਮੁਟ੍ਠਾਨਾਨੁਪਰਿਵਤ੍ਤਿਨੋ. ਧਮ੍ਮਧਾਤੁ ਸਿਯਾ ਚਿਤ੍ਤਸਂਸਟ੍ਠਸਮੁਟ੍ਠਾਨਾਨੁਪਰਿਵਤ੍ਤੀ, ਸਿਯਾ ਨੋ ਚਿਤ੍ਤਸਂਸਟ੍ਠਸਮੁਟ੍ਠਾਨਾਨੁਪਰਿਵਤ੍ਤੀ. ਦ੍ਵਾਦਸ ਧਾਤੁਯੋ ਅਜ੍ਝਤ੍ਤਿਕਾ. ਛ ਧਾਤੁਯੋ ਬਾਹਿਰਾ.
ਨਵ ਧਾਤੁਯੋ ਉਪਾਦਾ. ਅਟ੍ਠ ਧਾਤੁਯੋ ਨੋ ਉਪਾਦਾ. ਧਮ੍ਮਧਾਤੁ ਸਿਯਾ ਉਪਾਦਾ, ਸਿਯਾ ਨੋ ਉਪਾਦਾ. ਦਸ ਧਾਤੁਯੋ ਉਪਾਦਿਨ੍ਨਾ. ਸਦ੍ਦਧਾਤੁ ਅਨੁਪਾਦਿਨ੍ਨਾ. ਸਤ੍ਤਧਾਤੁਯੋ ਸਿਯਾ ਉਪਾਦਿਨ੍ਨਾ, ਸਿਯਾ ਅਨੁਪਾਦਿਨ੍ਨਾ. ਸਤ੍ਤਰਸ ਧਾਤੁਯੋ ਨੋ ਉਪਾਦਾਨਾ. ਧਮ੍ਮਧਾਤੁ ਸਿਯਾ ਉਪਾਦਾਨਂ, ਸਿਯਾ ਨੋ ਉਪਾਦਾਨਂ. ਸੋਲ਼ਸ ਧਾਤੁਯੋ ਉਪਾਦਾਨਿਯਾ. ਦ੍ਵੇ ਧਾਤੁਯੋ ਸਿਯਾ ਉਪਾਦਾਨਿਯਾ, ਸਿਯਾ ਅਨੁਪਾਦਾਨਿਯਾ. ਸੋਲ਼ਸ ਧਾਤੁਯੋ ਉਪਾਦਾਨਵਿਪ੍ਪਯੁਤ੍ਤਾ. ਦ੍ਵੇ ਧਾਤੁਯੋ ਸਿਯਾ ਉਪਾਦਾਨਸਮ੍ਪਯੁਤ੍ਤਾ, ਸਿਯਾ ਉਪਾਦਾਨਵਿਪ੍ਪਯੁਤ੍ਤਾ. ਸੋਲ਼ਸ ਧਾਤੁਯੋ ਨ ਵਤ੍ਤਬ੍ਬਾ – ‘‘ਉਪਾਦਾਨਾ ਚੇਵ ਉਪਾਦਾਨਿਯਾ ਚਾ’’ਤਿ, ‘‘ਉਪਾਦਾਨਿਯਾ ਚੇਵ ਨੋ ਚ ਉਪਾਦਾਨਾ’’. ਮਨੋਵਿਞ੍ਞਾਣਧਾਤੁ ਨ ਵਤ੍ਤਬ੍ਬਾ – ‘‘ਉਪਾਦਾਨਞ੍ਚੇਵ ਉਪਾਦਾਨਿਯਾ ਚਾ’’ਤਿ, ਸਿਯਾ ਉਪਾਦਾਨਿਯਾ ਚੇਵ ਨੋ ਚ ਉਪਾਦਾਨਂ, ਸਿਯਾ ਨ ਵਤ੍ਤਬ੍ਬਾ – ‘‘ਉਪਾਦਾਨਿਯਾ ਚੇਵ ਨੋ ਚ ਉਪਾਦਾਨ’’ਨ੍ਤਿ. ਧਮ੍ਮਧਾਤੁ ਸਿਯਾ ਉਪਾਦਾਨਞ੍ਚੇਵ ਉਪਾਦਾਨਿਯਾ ਚ, ਸਿਯਾ ਉਪਾਦਾਨਿਯਾ ਚੇਵ ਨੋ ਚ ਉਪਾਦਾਨਂ, ਸਿਯਾ ਨ ਵਤ੍ਤਬ੍ਬਾ – ‘‘ਉਪਾਦਾਨਞ੍ਚੇਵ ਉਪਾਦਾਨਿਯਾ ਚਾ’’ਤਿਪਿ, ‘‘ਉਪਾਦਾਨਿਯਾ ਚੇਵ ਨੋ ਚ ਉਪਾਦਾਨ’’ਨ੍ਤਿਪਿ.
ਸੋਲ਼ਸ ਧਾਤੁਯੋ ਨ ਵਤ੍ਤਬ੍ਬਾ – ‘‘ਉਪਾਦਾਨਾ ਚੇਵ ਉਪਾਦਾਨਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਉਪਾਦਾਨਸਮ੍ਪਯੁਤ੍ਤਾ ਚੇਵ ਨੋ ਚ ਉਪਾਦਾਨਾ’’ਤਿਪਿ. ਮਨੋਵਿਞ੍ਞਾਣਧਾਤੁ ਨ ਵਤ੍ਤਬ੍ਬਾ – ‘‘ਉਪਾਦਾਨਞ੍ਚੇਵ ਉਪਾਦਾਨਸਮ੍ਪਯੁਤ੍ਤਾ ਚਾ’’ਤਿ, ਸਿਯਾ ਉਪਾਦਾਨਸਮ੍ਪਯੁਤ੍ਤਾ ਚੇਵ ਨੋ ਚ ਉਪਾਦਾਨਂ, ਸਿਯਾ ਨ ਵਤ੍ਤਬ੍ਬਾ – ‘‘ਉਪਾਦਾਨਸਮ੍ਪਯੁਤ੍ਤਾ ਚੇਵ ਨੋ ਚ ਉਪਾਦਾਨ’’ਨ੍ਤਿ. ਧਮ੍ਮਧਾਤੁ ਸਿਯਾ ਉਪਾਦਾਨਞ੍ਚੇਵ ਉਪਾਦਾਨਸਮ੍ਪਯੁਤ੍ਤਾ ਚ, ਸਿਯਾ ਉਪਾਦਾਨਸਮ੍ਪਯੁਤ੍ਤਾ ਚੇਵ ਨੋ ਚ ਉਪਾਦਾਨਂ, ਸਿਯਾ ਨ ਵਤ੍ਤਬ੍ਬਾ – ‘‘ਉਪਾਦਾਨਞ੍ਚੇਵ ਉਪਾਦਾਨਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਉਪਾਦਾਨਸਮ੍ਪਯੁਤ੍ਤਾ ਚੇਵ ਨੋ ਚ ਉਪਾਦਾਨ’’ਨ੍ਤਿਪਿ. ਸੋਲ਼ਸ ਧਾਤੁਯੋ ਉਪਾਦਾਨਵਿਪ੍ਪਯੁਤ੍ਤਉਪਾਦਾਨਿਯਾ. ਦ੍ਵੇ ਧਾਤੁਯੋ ਸਿਯਾ ਉਪਾਦਾਨਵਿਪ੍ਪਯੁਤ੍ਤਉਪਾਦਾਨਿਯਾ, ਸਿਯਾ ਉਪਾਦਾਨਵਿਪ੍ਪਯੁਤ੍ਤਅਨੁਪਾਦਾਨਿਯਾ, ਸਿਯਾ ਨ ਵਤ੍ਤਬ੍ਬਾ – ‘‘ਉਪਾਦਾਨਵਿਪ੍ਪਯੁਤ੍ਤਉਪਾਦਾਨਿਯਾ’’ਤਿਪਿ, ‘‘ਉਪਾਦਾਨਵਿਪ੍ਪਯੁਤ੍ਤਅਨੁਪਾਦਾਨਿਯਾ’’ਤਿਪਿ.
ਸਤ੍ਤਰਸ ਧਾਤੁਯੋ ਨੋ ਕਿਲੇਸਾ. ਧਮ੍ਮਧਾਤੁ ਸਿਯਾ ਕਿਲੇਸਾ, ਸਿਯਾ ਨੋ ਕਿਲੇਸਾ. ਸੋਲ਼ਸ ਧਾਤੁਯੋ ਸਂਕਿਲੇਸਿਕਾ. ਦ੍ਵੇ ਧਾਤੁਯੋ ਸਿਯਾ ਸਂਕਿਲੇਸਿਕਾ, ਸਿਯਾ ਅਸਂਕਿਲੇਸਿਕਾ. ਸੋਲ਼ਸ ਧਾਤੁਯੋ ਅਸਂਕਿਲਿਟ੍ਠਾ. ਦ੍ਵੇ ਧਾਤੁਯੋ ਸਿਯਾ ਸਂਕਿਲਿਟ੍ਠਾ, ਸਿਯਾ ਅਸਂਕਿਲਿਟ੍ਠਾ. ਸੋਲ਼ਸ ਧਾਤੁਯੋ ਕਿਲੇਸਵਿਪ੍ਪਯੁਤ੍ਤਾ. ਦ੍ਵੇ ਧਾਤੁਯੋ ਸਿਯਾ ਕਿਲੇਸਸਮ੍ਪਯੁਤ੍ਤਾ, ਸਿਯਾ ਕਿਲੇਸਵਿਪ੍ਪਯੁਤ੍ਤਾ. ਸੋਲ਼ਸ ਧਾਤੁਯੋ ਨ ਵਤ੍ਤਬ੍ਬਾ – ‘‘ਕਿਲੇਸਾ ਚੇਵ ਸਂਕਿਲੇਸਿਕਾ ਚਾ’’ਤਿ, ਸਂਕਿਲੇਸਿਕਾ ਚੇਵ ਨੋ ਚ ਕਿਲੇਸਾ. ਮਨੋਵਿਞ੍ਞਾਣਧਾਤੁ ਨ ਵਤ੍ਤਬ੍ਬਾ – ‘‘ਕਿਲੇਸੋ ਚੇਵ ਸਂਕਿਲੇਸਿਕਾ ਚਾ’’ਤਿ, ਸਿਯਾ ਸਂਕਿਲੇਸਿਕਾ ਚੇਵ ਨੋ ਚ ਕਿਲੇਸੋ, ਸਿਯਾ ਨ ਵਤ੍ਤਬ੍ਬਾ – ‘‘ਸਂਕਿਲੇਸਿਕਾ ਚੇਵ ਨੋ ਚ ਕਿਲੇਸੋ’’ਤਿ. ਧਮ੍ਮਧਾਤੁ ਸਿਯਾ ਕਿਲੇਸੋ ਚੇਵ ਸਂਕਿਲੇਸਿਕਾ ਚ, ਸਿਯਾ ਸਂਕਿਲੇਸਿਕਾ ਚੇਵ ਨੋ ਚ ਕਿਲੇਸੋ, ਸਿਯਾ ਨ ਵਤ੍ਤਬ੍ਬਾ – ‘‘ਕਿਲੇਸੋ ਚੇਵ ਸਂਕਿਲੇਸਿਕਾ ਚਾ’’ਤਿਪਿ, ‘‘ਸਂਕਿਲੇਸਿਕਾ ਚੇਵ ਨੋ ਚ ਕਿਲੇਸੋ’’ਤਿਪਿ.
ਸੋਲ਼ਸ ਧਾਤੁਯੋ ਨ ਵਤ੍ਤਬ੍ਬਾ – ‘‘ਕਿਲੇਸਾ ਚੇਵ ਸਂਕਿਲਿਟ੍ਠਾ ਚਾ’’ਤਿਪਿ, ‘‘ਸਂਕਿਲਿਟ੍ਠਾ ਚੇਵ ਨੋ ਚ ਕਿਲੇਸਾ’’ਤਿਪਿ. ਮਨੋਵਿਞ੍ਞਾਣਧਾਤੁ ਨ ਵਤ੍ਤਬ੍ਬਾ – ‘‘ਕਿਲੇਸੋ ਚੇਵ ਸਂਕਿਲਿਟ੍ਠਾ ਚਾ’’ਤਿ, ਸਿਯਾ ਸਂਕਿਲਿਟ੍ਠਾ ਚੇਵ ਨੋ ਚ ਕਿਲੇਸੋ, ਸਿਯਾ ਨ ਵਤ੍ਤਬ੍ਬਾ – ‘‘ਸਂਕਿਲਿਟ੍ਠਾ ਚੇਵ ਨੋ ਚ ਕਿਲੇਸੋ’’ਤਿ. ਧਮ੍ਮਧਾਤੁ ਸਿਯਾ ਕਿਲੇਸੋ ਚੇਵ ਸਂਕਿਲਿਟ੍ਠਾ ਚ, ਸਿਯਾ ਸਂਕਿਲਿਟ੍ਠਾ ਚੇਵ ਨੋ ਚ ਕਿਲੇਸੋ, ਸਿਯਾ ਨ ਵਤ੍ਤਬ੍ਬਾ – ‘‘ਕਿਲੇਸੋ ਚੇਵ ਸਂਕਿਲਿਟ੍ਠਾ ਚਾ’’ਤਿਪਿ, ‘‘ਸਂਕਿਲਿਟ੍ਠਾ ਚੇਵ ਨੋ ਚ ਕਿਲੇਸੋ’’ਤਿਪਿ. ਸੋਲ਼ਸ ਧਾਤੁਯੋ ਨ ਵਤ੍ਤਬ੍ਬਾ – ‘‘ਕਿਲੇਸਾ ਚੇਵ ਕਿਲੇਸਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਕਿਲੇਸਸਮ੍ਪਯੁਤ੍ਤਾ ਚੇਵ ਨੋ ਚ ਕਿਲੇਸਾ’’ਤਿਪਿ. ਮਨੋਵਿਞ੍ਞਾਣਧਾਤੁ ਨ ਵਤ੍ਤਬ੍ਬਾ – ‘‘ਕਿਲੇਸੋ ਚੇਵ ਕਿਲੇਸਸਮ੍ਪਯੁਤ੍ਤਾ ਚਾ’’ਤਿ, ਸਿਯਾ ਕਿਲੇਸਸਮ੍ਪਯੁਤ੍ਤਾ ਚੇਵ ਨੋ ਚ ਕਿਲੇਸੋ, ਸਿਯਾ ਨ ਵਤ੍ਤਬ੍ਬਾ – ‘‘ਕਿਲੇਸਸਮ੍ਪਯੁਤ੍ਤਾ ਚੇਵ ਨੋ ਚ ਕਿਲੇਸੋ’’ਤਿ. ਧਮ੍ਮਧਾਤੁ ਸਿਯਾ ਕਿਲੇਸੋ ਚੇਵ ਕਿਲੇਸਸਮ੍ਪਯੁਤ੍ਤਾ ਚ, ਸਿਯਾ ਕਿਲੇਸਸਮ੍ਪਯੁਤ੍ਤਾ ਚੇਵ ਨੋ ਚ ਕਿਲੇਸੋ, ਸਿਯਾ ਨ ਵਤ੍ਤਬ੍ਬਾ – ‘‘ਕਿਲੇਸੋ ਚੇਵ ਕਿਲੇਸਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਕਿਲੇਸਸਮ੍ਪਯੁਤ੍ਤਾ ਚੇਵ ਨੋ ਚ ਕਿਲੇਸੋ’’ਤਿਪਿ. ਸੋਲ਼ਸ ਧਾਤੁਯੋ ਕਿਲੇਸਵਿਪ੍ਪਯੁਤ੍ਤਸਂਕਿਲੇਸਿਕਾ. ਦ੍ਵੇ ਧਾਤੁਯੋ ਸਿਯਾ ਕਿਲੇਸਵਿਪ੍ਪਯੁਤ੍ਤਸਂਕਿਲੇਸਿਕਾ, ਸਿਯਾ ਕਿਲੇਸਵਿਪ੍ਪਯੁਤ੍ਤਅਸਂਕਿਲੇਸਿਕਾ, ਸਿਯਾ ਨ ਵਤ੍ਤਬ੍ਬਾ – ‘‘ਕਿਲੇਸਵਿਪ੍ਪਯੁਤ੍ਤਸਂਕਿਲੇਸਿਕਾ’’ਤਿਪਿ, ‘‘ਕਿਲੇਸਵਿਪ੍ਪਯੁਤ੍ਤਅਸਂਕਿਲੇਸਿਕਾ’’ਤਿਪਿ.
ਸੋਲ਼ਸ ਧਾਤੁਯੋ ਨ ਦਸ੍ਸਨੇਨ ਪਹਾਤਬ੍ਬਾ. ਦ੍ਵੇ ਧਾਤੁਯੋ ਸਿਯਾ ਦਸ੍ਸਨੇਨ ਪਹਾਤਬ੍ਬਾ, ਸਿਯਾ ਨ ਦਸ੍ਸਨੇਨ ਪਹਾਤਬ੍ਬਾ. ਸੋਲ਼ਸ ਧਾਤੁਯੋ ਨ ਭਾਵਨਾਯ ਪਹਾਤਬ੍ਬਾ. ਦ੍ਵੇ ਧਾਤੁਯੋ ਸਿਯਾ ਭਾਵਨਾਯ ਪਹਾਤਬ੍ਬਾ, ਸਿਯਾ ਨ ਭਾਵਨਾਯ ਪਹਾਤਬ੍ਬਾ. ਸੋਲ਼ਸ ਧਾਤੁਯੋ ਨ ਦਸ੍ਸਨੇਨ ਪਹਾਤਬ੍ਬਹੇਤੁਕਾ. ਦ੍ਵੇ ਧਾਤੁਯੋ ਸਿਯਾ ਦਸ੍ਸਨੇਨ ਪਹਾਤਬ੍ਬਹੇਤੁਕਾ, ਸਿਯਾ ਨ ਦਸ੍ਸਨੇਨ ਪਹਾਤਬ੍ਬਹੇਤੁਕਾ. ਸੋਲ਼ਸ ਧਾਤੁਯੋ ਨ ਭਾਵਨਾਯ ਪਹਾਤਬ੍ਬਹੇਤੁਕਾ. ਦ੍ਵੇ ਧਾਤੁਯੋ ਸਿਯਾ ਭਾਵਨਾਯ ਪਹਾਤਬ੍ਬਹੇਤੁਕਾ, ਸਿਯਾ ਨ ਭਾਵਨਾਯ ਪਹਾਤਬ੍ਬਹੇਤੁਕਾ.
ਪਨ੍ਨਰਸ ਧਾਤੁਯੋ ਅਵਿਤਕ੍ਕਾ. ਮਨੋਧਾਤੁ ਸਵਿਤਕ੍ਕਾ. ਦ੍ਵੇ ਧਾਤੁਯੋ ਸਿਯਾ ਸਵਿਤਕ੍ਕਾ, ਸਿਯਾ ਅਵਿਤਕ੍ਕਾ. ਪਨ੍ਨਰਸ ਧਾਤੁਯੋ ਅਵਿਚਾਰਾ. ਮਨੋਧਾਤੁ ਸਵਿਚਾਰਾ. ਦ੍ਵੇ ਧਾਤੁਯੋ ਸਿਯਾ ਸਵਿਚਾਰਾ, ਸਿਯਾ ਅਵਿਚਾਰਾ. ਸੋਲ਼ਸ ਧਾਤੁਯੋ ਅਪ੍ਪੀਤਿਕਾ. ਦ੍ਵੇ ਧਾਤੁਯੋ ਸਿਯਾ ਸਪ੍ਪੀਤਿਕਾ, ਸਿਯਾ ਅਪ੍ਪੀਤਿਕਾ. ਸੋਲ਼ਸ ਧਾਤੁਯੋ ਨ ਪੀਤਿਸਹਗਤਾ. ਦ੍ਵੇ ਧਾਤੁਯੋ ਸਿਯਾ ਪੀਤਿਸਹਗਤਾ, ਸਿਯਾ ਨ ਪੀਤਿਸਹਗਤਾ. ਪਨ੍ਨਰਸ ਧਾਤੁਯੋ ਨ ਸੁਖਸਹਗਤਾ. ਤਿਸ੍ਸੋ ਧਾਤੁਯੋ ਸਿਯਾ ਸੁਖਸਹਗਤਾ, ਸਿਯਾ ਨ ਸੁਖਸਹਗਤਾ. ਏਕਾਦਸ ਧਾਤੁਯੋ ਨ ਉਪੇਕ੍ਖਾਸਹਗਤਾ. ਪਞ੍ਚ ਧਾਤੁਯੋ ਉਪੇਕ੍ਖਾਸਹਗਤਾ. ਦ੍ਵੇ ਧਾਤੁਯੋ ਸਿਯਾ ਉਪੇਕ੍ਖਾਸਹਗਤਾ, ਸਿਯਾ ਨ ਉਪੇਕ੍ਖਾਸਹਗਤਾ.
ਸੋਲ਼ਸ ਧਾਤੁਯੋ ਕਾਮਾਵਚਰਾ. ਦ੍ਵੇ ਧਾਤੁਯੋ ਸਿਯਾ ਕਾਮਾਵਚਰਾ, ਸਿਯਾ ਨ ਕਾਮਾਵਚਰਾ. ਸੋਲ਼ਸ ਧਾਤੁਯੋ ਨ ਰੂਪਾਵਚਰਾ. ਦ੍ਵੇ ਧਾਤੁਯੋ ਸਿਯਾ ਰੂਪਾਵਚਰਾ, ਸਿਯਾ ਨ ਰੂਪਾਵਚਰਾ. ਸੋਲ਼ਸ ਧਾਤੁਯੋ ਨ ਅਰੂਪਾਵਚਰਾ. ਦ੍ਵੇ ਧਾਤੁਯੋ ਸਿਯਾ ਅਰੂਪਾਵਚਰਾ, ਸਿਯਾ ਨ ਅਰੂਪਾਵਚਰਾ. ਸੋਲ਼ਸ ਧਾਤੁਯੋ ਪਰਿਯਾਪਨ੍ਨਾ. ਦ੍ਵੇ ਧਾਤੁਯੋ ਸਿਯਾ ਪਰਿਯਾਪਨ੍ਨਾ, ਸਿਯਾ ਅਪਰਿਯਾਪਨ੍ਨਾ. ਸੋਲ਼ਸ ਧਾਤੁਯੋ ਅਨਿਯ੍ਯਾਨਿਕਾ. ਦ੍ਵੇ ਧਾਤੁਯੋ ਸਿਯਾ ਨਿਯ੍ਯਾਨਿਕਾ, ਸਿਯਾ ਅਨਿਯ੍ਯਾਨਿਕਾ. ਸੋਲ਼ਸ ਧਾਤੁਯੋ ਅਨਿਯਤਾ. ਦ੍ਵੇ ਧਾਤੁਯੋ ਸਿਯਾ ਨਿਯਤਾ, ਸਿਯਾ ਅਨਿਯਤਾ. ਸੋਲ਼ਸ ਧਾਤੁਯੋ ਸਉਤ੍ਤਰਾ. ਦ੍ਵੇ ਧਾਤੁਯੋ ਸਿਯਾ ਸਉਤ੍ਤਰਾ, ਸਿਯਾ ਅਨੁਤ੍ਤਰਾ. ਸੋਲ਼ਸ ਧਾਤੁਯੋ ਅਰਣਾ. ਦ੍ਵੇ ਧਾਤੁਯੋ ਸਿਯਾ ਸਰਣਾ, ਸਿਯਾ ਅਰਣਾਤਿ.
ਪਞ੍ਹਾਪੁਚ੍ਛਕਂ.
ਧਾਤੁਵਿਭਙ੍ਗੋ ਨਿਟ੍ਠਿਤੋ.