੪. ਸਚ੍ਚਵਿਭਙ੍ਗੋ

੧. ਸੁਤ੍ਤਨ੍ਤਭਾਜਨੀਯਂ

੧੮੯. ਚਤ੍ਤਾਰਿ ਅਰਿਯਸਚ੍ਚਾਨਿ – ਦੁਕ੍ਖਂ ਅਰਿਯਸਚ੍ਚਂ, ਦੁਕ੍ਖਸਮੁਦਯਂ [ਦੁਕ੍ਖਸਮੁਦਯੋ (ਸ੍ਯਾ.)] ਅਰਿਯਸਚ੍ਚਂ, ਦੁਕ੍ਖਨਿਰੋਧਂ [ਦੁਕ੍ਖਨਿਰੋਧੋ (ਸ੍ਯਾ.)] ਅਰਿਯਸਚ੍ਚਂ, ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ ਅਰਿਯਸਚ੍ਚਂ.

੧. ਦੁਕ੍ਖਸਚ੍ਚਂ

੧੯੦. ਤਤ੍ਥ ਕਤਮਂ ਦੁਕ੍ਖਂ ਅਰਿਯਸਚ੍ਚਂ? ਜਾਤਿਪਿ ਦੁਕ੍ਖਾ, ਜਰਾਪਿ ਦੁਕ੍ਖਾ, ਮਰਣਮ੍ਪਿ ਦੁਕ੍ਖਂ, ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾਪਿ ਦੁਕ੍ਖਾ, ਅਪ੍ਪਿਯੇਹਿ ਸਮ੍ਪਯੋਗੋ ਦੁਕ੍ਖੋ, ਪਿਯੇਹਿ ਵਿਪ੍ਪਯੋਗੋ ਦੁਕ੍ਖੋ, ਯਂ ਪਿਚ੍ਛਂ ਨ ਲਭਤਿ ਤਮ੍ਪਿ ਦੁਕ੍ਖਂ, ਸਂਖਿਤ੍ਤੇਨ ਪਞ੍ਚੁਪਾਦਾਨਕ੍ਖਨ੍ਧਾ ਦੁਕ੍ਖਾ.

੧੯੧. ਤਤ੍ਥ ਕਤਮਾ ਜਾਤਿ? ਯਾ ਤੇਸਂ ਤੇਸਂ ਸਤ੍ਤਾਨਂ ਤਮ੍ਹਿ ਤਮ੍ਹਿ ਸਤ੍ਤਨਿਕਾਯੇ ਜਾਤਿ ਸਞ੍ਜਾਤਿ ਓਕ੍ਕਨ੍ਤਿ ਅਭਿਨਿਬ੍ਬਤ੍ਤਿ ਖਨ੍ਧਾਨਂ ਪਾਤੁਭਾਵੋ ਆਯਤਨਾਨਂ ਪਟਿਲਾਭੋ – ਅਯਂ ਵੁਚ੍ਚਤਿ ‘‘ਜਾਤਿ’’.

੧੯੨. ਤਤ੍ਥ ਕਤਮਾ ਜਰਾ? ਯਾ ਤੇਸਂ ਤੇਸਂ ਸਤ੍ਤਾਨਂ ਤਮ੍ਹਿ ਤਮ੍ਹਿ ਸਤ੍ਤਨਿਕਾਯੇ ਜਰਾ ਜੀਰਣਤਾ ਖਣ੍ਡਿਚ੍ਚਂ ਪਾਲਿਚ੍ਚਂ ਵਲਿਤ੍ਤਚਤਾ ਆਯੁਨੋ ਸਂਹਾਨਿ ਇਨ੍ਦ੍ਰਿਯਾਨਂ ਪਰਿਪਾਕੋ – ਅਯਂ ਵੁਚ੍ਚਤਿ ‘‘ਜਰਾ’’.

੧੯੩. ਤਤ੍ਥ ਕਤਮਂ ਮਰਣਂ? ਯਾ ਤੇਸਂ ਤੇਸਂ ਸਤ੍ਤਾਨਂ ਤਮ੍ਹਾ ਤਮ੍ਹਾ ਸਤ੍ਤਨਿਕਾਯਾ ਚੁਤਿ ਚਵਨਤਾ ਭੇਦੋ ਅਨ੍ਤਰਧਾਨਂ ਮਚ੍ਚੁ ਮਰਣਂ ਕਾਲਕਿਰਿਯਾ ਖਨ੍ਧਾਨਂ ਭੇਦੋ ਕਲ਼ੇਵਰਸ੍ਸ ਨਿਕ੍ਖੇਪੋ ਜੀਵਿਤਿਨ੍ਦ੍ਰਿਯਸ੍ਸੁਪਚ੍ਛੇਦੋ – ਇਦਂ ਵੁਚ੍ਚਤਿ ‘‘ਮਰਣਂ’’.

੧੯੪. ਤਤ੍ਥ ਕਤਮੋ ਸੋਕੋ? ਞਾਤਿਬ੍ਯਸਨੇਨ ਵਾ ਫੁਟ੍ਠਸ੍ਸ ਭੋਗਬ੍ਯਸਨੇਨ ਵਾ ਫੁਟ੍ਠਸ੍ਸ ਰੋਗਬ੍ਯਸਨੇਨ ਵਾ ਫੁਟ੍ਠਸ੍ਸ ਸੀਲਬ੍ਯਸਨੇਨ ਵਾ ਫੁਟ੍ਠਸ੍ਸ ਦਿਟ੍ਠਿਬ੍ਯਸਨੇਨ ਵਾ ਫੁਟ੍ਠਸ੍ਸ ਅਞ੍ਞਤਰਞ੍ਞਤਰੇਨ ਬ੍ਯਸਨੇਨ ਸਮਨ੍ਨਾਗਤਸ੍ਸ ਅਞ੍ਞਤਰਞ੍ਞਤਰੇਨ ਦੁਕ੍ਖਧਮ੍ਮੇਨ ਫੁਟ੍ਠਸ੍ਸ ਸੋਕੋ ਸੋਚਨਾ ਸੋਚਿਤਤ੍ਤਂ ਅਨ੍ਤੋਸੋਕੋ ਅਨ੍ਤੋਪਰਿਸੋਕੋ ਚੇਤਸੋ ਪਰਿਜ੍ਝਾਯਨਾ ਦੋਮਨਸ੍ਸਂ ਸੋਕਸਲ੍ਲਂ – ਅਯਂ ਵੁਚ੍ਚਤਿ ‘‘ਸੋਕੋ’’.

੧੯੫. ਤਤ੍ਥ ਕਤਮੋ ਪਰਿਦੇਵੋ? ਞਾਤਿਬ੍ਯਸਨੇਨ ਵਾ ਫੁਟ੍ਠਸ੍ਸ ਭੋਗਬ੍ਯਸਨੇਨ ਵਾ ਫੁਟ੍ਠਸ੍ਸ ਰੋਗਬ੍ਯਸਨੇਨ ਵਾ ਫੁਟ੍ਠਸ੍ਸ ਸੀਲਬ੍ਯਸਨੇਨ ਵਾ ਫੁਟ੍ਠਸ੍ਸ ਦਿਟ੍ਠਿਬ੍ਯਸਨੇਨ ਵਾ ਫੁਟ੍ਠਸ੍ਸ ਅਞ੍ਞਤਰਞ੍ਞਤਰੇਨ ਬ੍ਯਸਨੇਨ ਸਮਨ੍ਨਾਗਤਸ੍ਸ ਅਞ੍ਞਤਰਞ੍ਞਤਰੇਨ ਦੁਕ੍ਖਧਮ੍ਮੇਨ ਫੁਟ੍ਠਸ੍ਸ ਆਦੇਵੋ ਪਰਿਦੇਵੋ ਆਦੇਵਨਾ ਪਰਿਦੇਵਨਾ ਆਦੇਵਿਤਤ੍ਤਂ ਪਰਿਦੇਵਿਤਤ੍ਤਂ ਵਾਚਾ ਪਲਾਪੋ ਵਿਪ੍ਪਲਾਪੋ ਲਾਲਪ੍ਪੋ ਲਾਲਪ੍ਪਨਾ ਲਾਲਪ੍ਪਿਤਤ੍ਤਂ [ਲਾਲਪੋ ਲਾਲਪਨਾ ਲਾਲਪਿਤਤ੍ਤਂ (ਸ੍ਯਾ.)] – ਅਯਂ ਵੁਚ੍ਚਤਿ ‘‘ਪਰਿਦੇਵੋ’’.

੧੯੬. ਤਤ੍ਥ ਕਤਮਂ ਦੁਕ੍ਖਂ? ਯਂ ਕਾਯਿਕਂ ਅਸਾਤਂ ਕਾਯਿਕਂ ਦੁਕ੍ਖਂ ਕਾਯਸਮ੍ਫਸ੍ਸਜਂ ਅਸਾਤਂ ਦੁਕ੍ਖਂ ਵੇਦਯਿਤਂ ਕਾਯਸਮ੍ਫਸ੍ਸਜਾ ਅਸਾਤਾ ਦੁਕ੍ਖਾ ਵੇਦਨਾ – ਇਦਂ ਵੁਚ੍ਚਤਿ ‘‘ਦੁਕ੍ਖਂ’’.

੧੯੭. ਤਤ੍ਥ ਕਤਮਂ ਦੋਮਨਸ੍ਸਂ? ਯਂ ਚੇਤਸਿਕਂ ਅਸਾਤਂ ਚੇਤਸਿਕਂ ਦੁਕ੍ਖਂ ਚੇਤੋਸਮ੍ਫਸ੍ਸਜਂ ਅਸਾਤਂ ਦੁਕ੍ਖਂ ਵੇਦਯਿਤਂ ਚੇਤੋਸਮ੍ਫਸ੍ਸਜਾ ਅਸਾਤਾ ਦੁਕ੍ਖਾ ਵੇਦਨਾ – ਇਦਂ ਵੁਚ੍ਚਤਿ ‘‘ਦੋਮਨਸ੍ਸਂ’’.

੧੯੮. ਤਤ੍ਥ ਕਤਮੋ ਉਪਾਯਾਸੋ? ਞਾਤਿਬ੍ਯਸਨੇਨ ਵਾ ਫੁਟ੍ਠਸ੍ਸ ਭੋਗਬ੍ਯਸਨੇਨ ਵਾ ਫੁਟ੍ਠਸ੍ਸ ਰੋਗਬ੍ਯਸਨੇਨ ਵਾ ਫੁਟ੍ਠਸ੍ਸ ਸੀਲਬ੍ਯਸਨੇਨ ਵਾ ਫੁਟ੍ਠਸ੍ਸ ਦਿਟ੍ਠਿਬ੍ਯਸਨੇਨ ਵਾ ਫੁਟ੍ਠਸ੍ਸ ਅਞ੍ਞਤਰਞ੍ਞਤਰੇਨ ਬ੍ਯਸਨੇਨ ਸਮਨ੍ਨਾਗਤਸ੍ਸ ਅਞ੍ਞਤਰਞ੍ਞਤਰੇਨ ਦੁਕ੍ਖਧਮ੍ਮੇਨ ਫੁਟ੍ਠਸ੍ਸ ਆਯਾਸੋ ਉਪਾਯਾਸੋ ਆਯਾਸਿਤਤ੍ਤਂ ਉਪਾਯਾਸਿਤਤ੍ਤਂ – ਅਯਂ ਵੁਚ੍ਚਤਿ ‘‘ਉਪਾਯਾਸੋ’’.

੧੯੯. ਤਤ੍ਥ ਕਤਮੋ ਅਪ੍ਪਿਯੇਹਿ ਸਮ੍ਪਯੋਗੋ ਦੁਕ੍ਖੋ? ਇਧ ਯਸ੍ਸ ਤੇ ਹੋਨ੍ਤਿ ਅਨਿਟ੍ਠਾ ਅਕਨ੍ਤਾ ਅਮਨਾਪਾ ਰੂਪਾ ਸਦ੍ਦਾ ਗਨ੍ਧਾ ਰਸਾ ਫੋਟ੍ਠਬ੍ਬਾ, ਯੇ ਵਾ ਪਨਸ੍ਸ ਤੇ ਹੋਨ੍ਤਿ ਅਨਤ੍ਥਕਾਮਾ ਅਹਿਤਕਾਮਾ ਅਫਾਸੁਕਕਾਮਾ ਅਯੋਗਕ੍ਖੇਮਕਾਮਾ; ਯਾ ਤੇਹਿ ਸਙ੍ਗਤਿ ਸਮਾਗਮੋ ਸਮੋਧਾਨਂ ਮਿਸ੍ਸੀਭਾਵੋ – ਅਯਂ ਵੁਚ੍ਚਤਿ ‘‘ਅਪ੍ਪਿਯੇਹਿ ਸਮ੍ਪਯੋਗੋ ਦੁਕ੍ਖੋ’’.

੨੦੦. ਤਤ੍ਥ ਕਤਮੋ ਪਿਯੇਹਿ ਵਿਪ੍ਪਯੋਗੋ ਦੁਕ੍ਖੋ? ਇਧ ਯਸ੍ਸ ਤੇ ਹੋਨ੍ਤਿ ਇਟ੍ਠਾ ਕਨ੍ਤਾ ਮਨਾਪਾ ਰੂਪਾ ਸਦ੍ਦਾ ਗਨ੍ਧਾ ਰਸਾ ਫੋਟ੍ਠਬ੍ਬਾ, ਯੇ ਵਾ ਪਨਸ੍ਸ ਤੇ ਹੋਨ੍ਤਿ ਅਤ੍ਥਕਾਮਾ ਹਿਤਕਾਮਾ ਫਾਸੁਕਕਾਮਾ ਯੋਗਕ੍ਖੇਮਕਾਮਾ ਮਾਤਾ ਵਾ ਪਿਤਾ ਵਾ ਭਾਤਾ ਵਾ ਭਗਿਨੀ ਵਾ ਮਿਤ੍ਤਾ ਵਾ ਅਮਚ੍ਚਾ ਵਾ ਞਾਤੀ ਵਾ ਸਾਲੋਹਿਤਾ ਵਾ; ਯਾ ਤੇਹਿ ਅਸਙ੍ਗਤਿ ਅਸਮਾਗਮੋ ਅਸਮੋਧਾਨਂ ਅਮਿਸ੍ਸੀਭਾਵੋ – ਅਯਂ ਵੁਚ੍ਚਤਿ ‘‘ਪਿਯੇਹਿ ਵਿਪ੍ਪਯੋਗੋ ਦੁਕ੍ਖੋ’’.

੨੦੧. ਤਤ੍ਥ ਕਤਮਂ ਯਮ੍ਪਿਚ੍ਛਂ ਨ ਲਭਤਿ ਤਮ੍ਪਿ ਦੁਕ੍ਖਂ? ਜਾਤਿਧਮ੍ਮਾਨਂ ਸਤ੍ਤਾਨਂ ਏਵਂ ਇਚ੍ਛਾ ਉਪ੍ਪਜ੍ਜਤਿ – ‘‘ਅਹੋ ਵਤ, ਮਯਂ ਨ ਜਾਤਿਧਮ੍ਮਾ ਅਸ੍ਸਾਮ; ਨ ਚ, ਵਤ, ਨੋ ਜਾਤਿ ਆਗਚ੍ਛੇਯ੍ਯਾ’’ਤਿ! ਨ ਖੋ ਪਨੇਤਂ ਇਚ੍ਛਾਯ ਪਤ੍ਤਬ੍ਬਂ. ਇਦਮ੍ਪਿ ‘‘ਯਮ੍ਪਿਚ੍ਛਂ ਨ ਲਭਤਿ ਤਮ੍ਪਿ ਦੁਕ੍ਖਂ’’.

ਜਰਾਧਮ੍ਮਾਨਂ ਸਤ੍ਤਾਨਂ…ਪੇ… ਬ੍ਯਾਧਿਧਮ੍ਮਾਨਂ ਸਤ੍ਤਾਨਂ…ਪੇ… ਮਰਣਧਮ੍ਮਾਨਂ ਸਤ੍ਤਾਨਂ…ਪੇ… ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਧਮ੍ਮਾਨਂ ਸਤ੍ਤਾਨਂ ਏਵਂ ਇਚ੍ਛਾ ਉਪ੍ਪਜ੍ਜਤਿ – ‘‘ਅਹੋ ਵਤ, ਮਯਂ ਨ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਧਮ੍ਮਾ ਅਸ੍ਸਾਮ; ਨ ਚ, ਵਤ, ਨੋ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ ਆਗਚ੍ਛੇਯ੍ਯੁ’’ਨ੍ਤਿ! ਨ ਖੋ ਪਨੇਤਂ ਇਚ੍ਛਾਯ ਪਤ੍ਤਬ੍ਬਂ. ਇਦਮ੍ਪਿ ‘‘ਯਮ੍ਪਿਚ੍ਛਂ ਨ ਲਭਤਿ ਤਮ੍ਪਿ ਦੁਕ੍ਖਂ’’.

੨੦੨. ਤਤ੍ਥ ਕਤਮੇ ਸਂਖਿਤ੍ਤੇਨ ਪਞ੍ਚੁਪਾਦਾਨਕ੍ਖਨ੍ਧਾ ਦੁਕ੍ਖਾ? ਸੇਯ੍ਯਥਿਦਂ – ਰੂਪੁਪਾਦਾਨਕ੍ਖਨ੍ਧੋ, ਵੇਦਨੁਪਾਦਾਨਕ੍ਖਨ੍ਧੋ, ਸਞ੍ਞੁਪਾਦਾਨਕ੍ਖਨ੍ਧੋ, ਸਙ੍ਖਾਰੁਪਾਦਾਨਕ੍ਖਨ੍ਧੋ, ਵਿਞ੍ਞਾਣੁਪਾਦਾਨਕ੍ਖਨ੍ਧੋ. ਇਮੇ ਵੁਚ੍ਚਨ੍ਤਿ ‘‘ਸਂਖਿਤ੍ਤੇਨ ਪਞ੍ਚੁਪਾਦਾਨਕ੍ਖਨ੍ਧਾ ਦੁਕ੍ਖਾ’’.

ਇਦਂ ਵੁਚ੍ਚਤਿ ‘‘ਦੁਕ੍ਖਂ ਅਰਿਯਸਚ੍ਚਂ’’.

੨. ਸਮੁਦਯਸਚ੍ਚਂ

੨੦੩. ਤਤ੍ਥ ਕਤਮਂ ਦੁਕ੍ਖਸਮੁਦਯਂ ਅਰਿਯਸਚ੍ਚਂ? ਯਾਯਂ ਤਣ੍ਹਾ ਪੋਨੋਭਵਿਕਾ [ਪੋਨੋਬ੍ਭਵਿਕਾ (ਸ੍ਯਾ. ਕ.)] ਨਨ੍ਦਿਰਾਗਸਹਗਤਾ ਤਤ੍ਰਤਤ੍ਰਾਭਿਨਨ੍ਦਿਨੀ, ਸੇਯ੍ਯਥਿਦਂ – ਕਾਮਤਣ੍ਹਾ, ਭਵਤਣ੍ਹਾ, ਵਿਭਵਤਣ੍ਹਾ.

ਸਾ ਖੋ ਪਨੇਸਾ ਤਣ੍ਹਾ ਕਤ੍ਥ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਕਤ੍ਥ ਨਿਵਿਸਮਾਨਾ ਨਿਵਿਸਤਿ? ਯਂ ਲੋਕੇ ਪਿਯਰੂਪਂ ਸਾਤਰੂਪਂ, ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ.

ਕਿਞ੍ਚ ਲੋਕੇ ਪਿਯਰੂਪਂ ਸਾਤਰੂਪਂ? ਚਕ੍ਖੁਂ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ. ਸੋਤਂ ਲੋਕੇ…ਪੇ… ਘਾਨਂ ਲੋਕੇ… ਜਿਵ੍ਹਾ ਲੋਕੇ… ਕਾਯੋ ਲੋਕੇ… ਮਨੋ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ.

ਰੂਪਾ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ. ਸਦ੍ਦਾ ਲੋਕੇ…ਪੇ… ਗਨ੍ਧਾ ਲੋਕੇ… ਰਸਾ ਲੋਕੇ… ਫੋਟ੍ਠਬ੍ਬਾ ਲੋਕੇ… ਧਮ੍ਮਾ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ.

ਚਕ੍ਖੁਵਿਞ੍ਞਾਣਂ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ. ਸੋਤਵਿਞ੍ਞਾਣਂ ਲੋਕੇ…ਪੇ… ਘਾਨਵਿਞ੍ਞਾਣਂ ਲੋਕੇ… ਜਿਵ੍ਹਾਵਿਞ੍ਞਾਣਂ ਲੋਕੇ… ਕਾਯਵਿਞ੍ਞਾਣਂ ਲੋਕੇ… ਮਨੋਵਿਞ੍ਞਾਣਂ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ.

ਚਕ੍ਖੁਸਮ੍ਫਸ੍ਸੋ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ. ਸੋਤਸਮ੍ਫਸ੍ਸੋ ਲੋਕੇ…ਪੇ… ਘਾਨਸਮ੍ਫਸ੍ਸੋ ਲੋਕੇ… ਜਿਵ੍ਹਾਸਮ੍ਫਸ੍ਸੋ ਲੋਕੇ… ਕਾਯਸਮ੍ਫਸ੍ਸੋ ਲੋਕੇ… ਮਨੋਸਮ੍ਫਸ੍ਸੋ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ.

ਚਕ੍ਖੁਸਮ੍ਫਸ੍ਸਜਾ ਵੇਦਨਾ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ. ਸੋਤਸਮ੍ਫਸ੍ਸਜਾ ਵੇਦਨਾ ਲੋਕੇ…ਪੇ… ਘਾਨਸਮ੍ਫਸ੍ਸਜਾ ਵੇਦਨਾ ਲੋਕੇ… ਜਿਵ੍ਹਾਸਮ੍ਫਸ੍ਸਜਾ ਵੇਦਨਾ ਲੋਕੇ… ਕਾਯਸਮ੍ਫਸ੍ਸਜਾ ਵੇਦਨਾ ਲੋਕੇ… ਮਨੋਸਮ੍ਫਸ੍ਸਜਾ ਵੇਦਨਾ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ.

ਰੂਪਸਞ੍ਞਾ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ. ਸਦ੍ਦਸਞ੍ਞਾ ਲੋਕੇ…ਪੇ… ਗਨ੍ਧਸਞ੍ਞਾ ਲੋਕੇ… ਰਸਸਞ੍ਞਾ ਲੋਕੇ… ਫੋਟ੍ਠਬ੍ਬਸਞ੍ਞਾ ਲੋਕੇ… ਧਮ੍ਮਸਞ੍ਞਾ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ.

ਰੂਪਸਞ੍ਚੇਤਨਾ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ. ਸਦ੍ਦਸਞ੍ਚੇਤਨਾ ਲੋਕੇ…ਪੇ… ਗਨ੍ਧਸਞ੍ਚੇਤਨਾ ਲੋਕੇ… ਰਸਸਞ੍ਚੇਤਨਾ ਲੋਕੇ… ਫੋਟ੍ਠਬ੍ਬਸਞ੍ਚੇਤਨਾ ਲੋਕੇ… ਧਮ੍ਮਸਞ੍ਚੇਤਨਾ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ.

ਰੂਪਤਣ੍ਹਾ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ. ਸਦ੍ਦਤਣ੍ਹਾ ਲੋਕੇ…ਪੇ… ਗਨ੍ਧਤਣ੍ਹਾ ਲੋਕੇ… ਰਸਤਣ੍ਹਾ ਲੋਕੇ… ਫੋਟ੍ਠਬ੍ਬਤਣ੍ਹਾ ਲੋਕੇ… ਧਮ੍ਮਤਣ੍ਹਾ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ.

ਰੂਪਵਿਤਕ੍ਕੋ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ. ਸਦ੍ਦਵਿਤਕ੍ਕੋ ਲੋਕੇ…ਪੇ… ਗਨ੍ਧਵਿਤਕ੍ਕੋ ਲੋਕੇ… ਰਸਵਿਤਕ੍ਕੋ ਲੋਕੇ… ਫੋਟ੍ਠਬ੍ਬਵਿਤਕ੍ਕੋ ਲੋਕੇ… ਧਮ੍ਮਵਿਤਕ੍ਕੋ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ.

ਰੂਪਵਿਚਾਰੋ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ. ਸਦ੍ਦਵਿਚਾਰੋ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ. ਗਨ੍ਧਵਿਚਾਰੋ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ. ਰਸਵਿਚਾਰੋ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ. ਫੋਟ੍ਠਬ੍ਬਵਿਚਾਰੋ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ. ਧਮ੍ਮਵਿਚਾਰੋ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤਿ.

ਇਦਂ ਵੁਚ੍ਚਤਿ ‘‘ਦੁਕ੍ਖਸਮੁਦਯਂ ਅਰਿਯਸਚ੍ਚਂ’’.

੩. ਨਿਰੋਧਸਚ੍ਚਂ

੨੦੪. ਤਤ੍ਥ ਕਤਮਂ ਦੁਕ੍ਖਨਿਰੋਧਂ ਅਰਿਯਸਚ੍ਚਂ? ਯੋ ਤਸ੍ਸਾਯੇਵ ਤਣ੍ਹਾਯ ਅਸੇਸਵਿਰਾਗਨਿਰੋਧੋ ਚਾਗੋ ਪਟਿਨਿਸ੍ਸਗ੍ਗੋ ਮੁਤ੍ਤਿ ਅਨਾਲਯੋ.

ਸਾ ਖੋ ਪਨੇਸਾ ਤਣ੍ਹਾ ਕਤ੍ਥ ਪਹੀਯਮਾਨਾ ਪਹੀਯਤਿ, ਕਤ੍ਥ ਨਿਰੁਜ੍ਝਮਾਨਾ ਨਿਰੁਜ੍ਝਤਿ? ਯਂ ਲੋਕੇ ਪਿਯਰੂਪਂ ਸਾਤਰੂਪਂ, ਏਤ੍ਥੇਸਾ ਤਣ੍ਹਾ ਪਹੀਯਮਾਨਾ ਪਹੀਯਤਿ, ਏਤ੍ਥ ਨਿਰੁਜ੍ਝਮਾਨਾ ਨਿਰੁਜ੍ਝਤਿ.

ਕਿਞ੍ਚ ਲੋਕੇ ਪਿਯਰੂਪਂ ਸਾਤਰੂਪਂ? ਚਕ੍ਖੁਂ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਪਹੀਯਮਾਨਾ ਪਹੀਯਤਿ, ਏਤ੍ਥ ਨਿਰੁਜ੍ਝਮਾਨਾ ਨਿਰੁਜ੍ਝਤਿ. ਸੋਤਂ ਲੋਕੇ…ਪੇ… ਘਾਨਂ ਲੋਕੇ… ਜਿਵ੍ਹਾ ਲੋਕੇ… ਕਾਯੋ ਲੋਕੇ… ਮਨੋ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਪਹੀਯਮਾਨਾ ਪਹੀਯਤਿ, ਏਤ੍ਥ ਨਿਰੁਜ੍ਝਮਾਨਾ ਨਿਰੁਜ੍ਝਤਿ.

ਰੂਪਾ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਪਹੀਯਮਾਨਾ ਪਹੀਯਤਿ, ਏਤ੍ਥ ਨਿਰੁਜ੍ਝਮਾਨਾ ਨਿਰੁਜ੍ਝਤਿ. ਸਦ੍ਦਾ ਲੋਕੇ…ਪੇ… ਗਨ੍ਧਾ ਲੋਕੇ… ਰਸਾ ਲੋਕੇ… ਫੋਟ੍ਠਬ੍ਬਾ ਲੋਕੇ… ਧਮ੍ਮਾ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਪਹੀਯਮਾਨਾ ਪਹੀਯਤਿ, ਏਤ੍ਥ ਨਿਰੁਜ੍ਝਮਾਨਾ ਨਿਰੁਜ੍ਝਤਿ.

ਚਕ੍ਖੁਵਿਞ੍ਞਾਣਂ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਪਹੀਯਮਾਨਾ ਪਹੀਯਤਿ, ਏਤ੍ਥ ਨਿਰੁਜ੍ਝਮਾਨਾ ਨਿਰੁਜ੍ਝਤਿ. ਸੋਤਵਿਞ੍ਞਾਣਂ ਲੋਕੇ…ਪੇ… ਘਾਨਵਿਞ੍ਞਾਣਂ ਲੋਕੇ… ਜਿਵ੍ਹਾਵਿਞ੍ਞਾਣਂ ਲੋਕੇ… ਕਾਯਵਿਞ੍ਞਾਣਂ ਲੋਕੇ… ਮਨੋਵਿਞ੍ਞਾਣਂ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਪਹੀਯਮਾਨਾ ਪਹੀਯਤਿ, ਏਤ੍ਥ ਨਿਰੁਜ੍ਝਮਾਨਾ ਨਿਰੁਜ੍ਝਤਿ.

ਚਕ੍ਖੁਸਮ੍ਫਸ੍ਸੋ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਪਹੀਯਮਾਨਾ ਪਹੀਯਤਿ, ਏਤ੍ਥ ਨਿਰੁਜ੍ਝਮਾਨਾ ਨਿਰੁਜ੍ਝਤਿ. ਸੋਤਸਮ੍ਫਸ੍ਸੋ ਲੋਕੇ…ਪੇ… ਘਾਨਸਮ੍ਫਸ੍ਸੋ ਲੋਕੇ… ਜਿਵ੍ਹਾਸਮ੍ਫਸ੍ਸੋ ਲੋਕੇ… ਕਾਯਸਮ੍ਫਸ੍ਸੋ ਲੋਕੇ… ਮਨੋਸਮ੍ਫਸ੍ਸੋ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਪਹੀਯਮਾਨਾ ਪਹੀਯਤਿ, ਏਤ੍ਥ ਨਿਰੁਜ੍ਝਮਾਨਾ ਨਿਰੁਜ੍ਝਤਿ.

ਚਕ੍ਖੁਸਮ੍ਫਸ੍ਸਜਾ ਵੇਦਨਾ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਪਹੀਯਮਾਨਾ ਪਹੀਯਤਿ, ਏਤ੍ਥ ਨਿਰੁਜ੍ਝਮਾਨਾ ਨਿਰੁਜ੍ਝਤਿ. ਸੋਤਸਮ੍ਫਸ੍ਸਜਾ ਵੇਦਨਾ ਲੋਕੇ…ਪੇ… ਘਾਨਸਮ੍ਫਸ੍ਸਜਾ ਵੇਦਨਾ ਲੋਕੇ… ਜਿਵ੍ਹਾਸਮ੍ਫਸ੍ਸਜਾ ਵੇਦਨਾ ਲੋਕੇ… ਕਾਯਸਮ੍ਫਸ੍ਸਜਾ ਵੇਦਨਾ ਲੋਕੇ… ਮਨੋਸਮ੍ਫਸ੍ਸਜਾ ਵੇਦਨਾ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਪਹੀਯਮਾਨਾ ਪਹੀਯਤਿ, ਏਤ੍ਥ ਨਿਰੁਜ੍ਝਮਾਨਾ ਨਿਰੁਜ੍ਝਤਿ.

ਰੂਪਸਞ੍ਞਾ ਲੋਕੇ… ਸਦ੍ਦਸਞ੍ਞਾ ਲੋਕੇ… ਗਨ੍ਧਸਞ੍ਞਾ ਲੋਕੇ… ਰਸਸਞ੍ਞਾ ਲੋਕੇ… ਫੋਟ੍ਠਬ੍ਬਸਞ੍ਞਾ ਲੋਕੇ… ਧਮ੍ਮਸਞ੍ਞਾ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਪਹੀਯਮਾਨਾ ਪਹੀਯਤਿ, ਏਤ੍ਥ ਨਿਰੁਜ੍ਝਮਾਨਾ ਨਿਰੁਜ੍ਝਤਿ.

ਰੂਪਸਞ੍ਚੇਤਨਾ ਲੋਕੇ… ਸਦ੍ਦਸਞ੍ਚੇਤਨਾ ਲੋਕੇ… ਗਨ੍ਧਸਞ੍ਚੇਤਨਾ ਲੋਕੇ… ਰਸਸਞ੍ਚੇਤਨਾ ਲੋਕੇ… ਫੋਟ੍ਠਬ੍ਬਸਞ੍ਚੇਤਨਾ ਲੋਕੇ… ਧਮ੍ਮਸਞ੍ਚੇਤਨਾ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਪਹੀਯਮਾਨਾ ਪਹੀਯਤਿ, ਏਤ੍ਥ ਨਿਰੁਜ੍ਝਮਾਨਾ ਨਿਰੁਜ੍ਝਤਿ.

ਰੂਪਤਣ੍ਹਾ ਲੋਕੇ… ਸਦ੍ਦਤਣ੍ਹਾ ਲੋਕੇ… ਗਨ੍ਧਤਣ੍ਹਾ ਲੋਕੇ… ਰਸਤਣ੍ਹਾ ਲੋਕੇ… ਫੋਟ੍ਠਬ੍ਬਤਣ੍ਹਾ ਲੋਕੇ… ਧਮ੍ਮਤਣ੍ਹਾ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਪਹੀਯਮਾਨਾ ਪਹੀਯਤਿ, ਏਤ੍ਥ ਨਿਰੁਜ੍ਝਮਾਨਾ ਨਿਰੁਜ੍ਝਤਿ.

ਰੂਪਵਿਤਕ੍ਕੋ ਲੋਕੇ… ਸਦ੍ਦਵਿਤਕ੍ਕੋ ਲੋਕੇ… ਗਨ੍ਧਵਿਤਕ੍ਕੋ ਲੋਕੇ… ਰਸਵਿਤਕ੍ਕੋ ਲੋਕੇ… ਫੋਟ੍ਠਬ੍ਬਵਿਤਕ੍ਕੋ ਲੋਕੇ… ਧਮ੍ਮਵਿਤਕ੍ਕੋ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਪਹੀਯਮਾਨਾ ਪਹੀਯਤਿ, ਏਤ੍ਥ ਨਿਰੁਜ੍ਝਮਾਨਾ ਨਿਰੁਜ੍ਝਤਿ.

ਰੂਪਵਿਚਾਰੋ ਲੋਕੇ… ਸਦ੍ਦਵਿਚਾਰੋ ਲੋਕੇ… ਗਨ੍ਧਵਿਚਾਰੋ ਲੋਕੇ… ਰਸਵਿਚਾਰੋ ਲੋਕੇ… ਫੋਟ੍ਠਬ੍ਬਵਿਚਾਰੋ ਲੋਕੇ… ਧਮ੍ਮਵਿਚਾਰੋ ਲੋਕੇ ਪਿਯਰੂਪਂ ਸਾਤਰੂਪਂ. ਏਤ੍ਥੇਸਾ ਤਣ੍ਹਾ ਪਹੀਯਮਾਨਾ ਪਹੀਯਤਿ, ਏਤ੍ਥ ਨਿਰੁਜ੍ਝਮਾਨਾ ਨਿਰੁਜ੍ਝਤਿ.

ਇਦਂ ਵੁਚ੍ਚਤਿ ‘‘ਦੁਕ੍ਖਨਿਰੋਧਂ ਅਰਿਯਸਚ੍ਚਂ’’.

੪. ਮਗ੍ਗਸਚ੍ਚਂ

੨੦੫. ਤਤ੍ਥ ਕਤਮਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ ਅਰਿਯਸਚ੍ਚਂ? ਅਯਮੇਵ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ, ਸੇਯ੍ਯਥਿਦਂ – ਸਮ੍ਮਾਦਿਟ੍ਠਿ, ਸਮ੍ਮਾਸਙ੍ਕਪ੍ਪੋ, ਸਮ੍ਮਾਵਾਚਾ, ਸਮ੍ਮਾਕਮ੍ਮਨ੍ਤੋ, ਸਮ੍ਮਾਆਜੀਵੋ, ਸਮ੍ਮਾਵਾਯਾਮੋ, ਸਮ੍ਮਾਸਤਿ, ਸਮ੍ਮਾਸਮਾਧਿ.

ਤਤ੍ਥ ਕਤਮਾ ਸਮ੍ਮਾਦਿਟ੍ਠਿ? ਦੁਕ੍ਖੇ ਞਾਣਂ, ਦੁਕ੍ਖਸਮੁਦਯੇ ਞਾਣਂ, ਦੁਕ੍ਖਨਿਰੋਧੇ ਞਾਣਂ, ਦੁਕ੍ਖਨਿਰੋਧਗਾਮਿਨਿਯਾ ਪਟਿਪਦਾਯ ਞਾਣਂ – ਅਯਂ ਵੁਚ੍ਚਤਿ ‘‘ਸਮ੍ਮਾਦਿਟ੍ਠਿ’’.

ਤਤ੍ਥ ਕਤਮੋ ਸਮ੍ਮਾਸਙ੍ਕਪ੍ਪੋ? ਨੇਕ੍ਖਮ੍ਮਸਙ੍ਕਪ੍ਪੋ, ਅਬ੍ਯਾਪਾਦਸਙ੍ਕਪ੍ਪੋ, ਅਵਿਹਿਂਸਾਸਙ੍ਕਪ੍ਪੋ – ਅਯਂ ਵੁਚ੍ਚਤਿ ‘‘ਸਮ੍ਮਾਸਙ੍ਕਪ੍ਪੋ’’.

ਤਤ੍ਥ ਕਤਮਾ ਸਮ੍ਮਾਵਾਚਾ? ਮੁਸਾਵਾਦਾ ਵੇਰਮਣੀ, ਪਿਸੁਣਾਯ ਵਾਚਾਯ ਵੇਰਮਣੀ, ਫਰੁਸਾਯ ਵਾਚਾਯ ਵੇਰਮਣੀ, ਸਮ੍ਫਪ੍ਪਲਾਪਾ ਵੇਰਮਣੀ – ਅਯਂ ਵੁਚ੍ਚਤਿ ‘‘ਸਮ੍ਮਾਵਾਚਾ’’.

ਤਤ੍ਥ ਕਤਮੋ ਸਮ੍ਮਾਕਮ੍ਮਨ੍ਤੋ? ਪਾਣਾਤਿਪਾਤਾ ਵੇਰਮਣੀ, ਅਦਿਨ੍ਨਾਦਾਨਾ ਵੇਰਮਣੀ, ਕਾਮੇਸੁਮਿਚ੍ਛਾਚਾਰਾ ਵੇਰਮਣੀ – ਅਯਂ ਵੁਚ੍ਚਤਿ ‘‘ਸਮ੍ਮਾਕਮ੍ਮਨ੍ਤੋ’’.

ਤਤ੍ਥ ਕਤਮੋ ਸਮ੍ਮਾਆਜੀਵੋ? ਇਧ ਅਰਿਯਸਾਵਕੋ ਮਿਚ੍ਛਾਆਜੀਵਂ ਪਹਾਯ ਸਮ੍ਮਾਆਜੀਵੇਨ ਜੀਵਿਕਂ ਕਪ੍ਪੇਤਿ – ਅਯਂ ਵੁਚ੍ਚਤਿ ‘‘ਸਮ੍ਮਾਆਜੀਵੋ’’.

ਤਤ੍ਥ ਕਤਮੋ ਸਮ੍ਮਾਵਾਯਾਮੋ? ਇਧ ਭਿਕ੍ਖੁ ਅਨੁਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਅਨੁਪ੍ਪਾਦਾਯ ਛਨ੍ਦਂ ਜਨੇਤਿ, ਵਾਯਮਤਿ, ਵੀਰਿਯਂ ਆਰਭਤਿ, ਚਿਤ੍ਤਂ ਪਗ੍ਗਣ੍ਹਾਤਿ, ਪਦਹਤਿ. ਉਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ ਛਨ੍ਦਂ ਜਨੇਤਿ, ਵਾਯਮਤਿ, ਵੀਰਿਯਂ ਆਰਭਤਿ, ਚਿਤ੍ਤਂ ਪਗ੍ਗਣ੍ਹਾਤਿ, ਪਦਹਤਿ. ਅਨੁਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਉਪ੍ਪਾਦਾਯ ਛਨ੍ਦਂ ਜਨੇਤਿ, ਵਾਯਮਤਿ, ਵੀਰਿਯਂ ਆਰਭਤਿ, ਚਿਤ੍ਤਂ ਪਗ੍ਗਣ੍ਹਾਤਿ, ਪਦਹਤਿ. ਉਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਠਿਤਿਯਾ ਅਸਮ੍ਮੋਸਾਯ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਭਾਵਨਾਯ ਪਾਰਿਪੂਰਿਯਾ ਛਨ੍ਦਂ ਜਨੇਤਿ, ਵਾਯਮਤਿ, ਵੀਰਿਯਂ ਆਰਭਤਿ, ਚਿਤ੍ਤਂ ਪਗ੍ਗਣ੍ਹਾਤਿ, ਪਦਹਤਿ. ਅਯਂ ਵੁਚ੍ਚਤਿ ‘‘ਸਮ੍ਮਾਵਾਯਾਮੋ’’.

ਤਤ੍ਥ ਕਤਮਾ ਸਮ੍ਮਾਸਤਿ? ਇਧ ਭਿਕ੍ਖੁ ਕਾਯੇ ਕਾਯਾਨੁਪਸ੍ਸੀ ਵਿਹਰਤਿ ਆਤਾਪੀ ਸਮ੍ਪਜਾਨੋ ਸਤਿਮਾ, ਵਿਨੇਯ੍ਯ ਲੋਕੇ ਅਭਿਜ੍ਝਾਦੋਮਨਸ੍ਸਂ. ਵੇਦਨਾਸੁ…ਪੇ… ਚਿਤ੍ਤੇ…ਪੇ… ਧਮ੍ਮੇਸੁ ਧਮ੍ਮਾਨੁਪਸ੍ਸੀ ਵਿਹਰਤਿ ਆਤਾਪੀ ਸਮ੍ਪਜਾਨੋ ਸਤਿਮਾ, ਵਿਨੇਯ੍ਯ ਲੋਕੇ ਅਭਿਜ੍ਝਾਦੋਮਨਸ੍ਸਂ. ਅਯਂ ਵੁਚ੍ਚਤਿ ‘‘ਸਮ੍ਮਾਸਤਿ’’.

ਤਤ੍ਥ ਕਤਮੋ ਸਮ੍ਮਾਸਮਾਧਿ? ਇਧ ਭਿਕ੍ਖੁ ਵਿਵਿਚ੍ਚੇਵ ਕਾਮੇਹਿ, ਵਿਵਿਚ੍ਚ ਅਕੁਸਲੇਹਿ ਧਮ੍ਮੇਹਿ, ਸਵਿਤਕ੍ਕਂ ਸਵਿਚਾਰਂ ਵਿਵੇਕਜਂ ਪੀਤਿਸੁਖਂ ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ. ਵਿਤਕ੍ਕਵਿਚਾਰਾਨਂ ਵੂਪਸਮਾ, ਅਜ੍ਝਤ੍ਤਂ ਸਮ੍ਪਸਾਦਨਂ, ਚੇਤਸੋ ਏਕੋਦਿਭਾਵਂ ਅਵਿਤਕ੍ਕਂ ਅਵਿਚਾਰਂ ਸਮਾਧਿਜਂ ਪੀਤਿਸੁਖਂ ਦੁਤਿਯਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ. ਪੀਤਿਯਾ ਚ ਵਿਰਾਗਾ, ਉਪੇਕ੍ਖਕੋ ਚ ਵਿਹਰਤਿ, ਸਤੋ ਚ ਸਮ੍ਪਜਾਨੋ, ਸੁਖਞ੍ਚ ਕਾਯੇਨ ਪਟਿਸਂਵੇਦੇਤਿ, ਯਂ ਤਂ ਅਰਿਯਾ ਆਚਿਕ੍ਖਨ੍ਤਿ – ‘‘ਉਪੇਕ੍ਖਕੋ ਸਤਿਮਾ ਸੁਖਵਿਹਾਰੀ’’ਤਿ, ਤਤਿਯਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ. ਸੁਖਸ੍ਸ ਚ ਪਹਾਨਾ, ਦੁਕ੍ਖਸ੍ਸ ਚ ਪਹਾਨਾ, ਪੁਬ੍ਬੇਵ ਸੋਮਨਸ੍ਸਦੋਮਨਸ੍ਸਾਨਂ ਅਤ੍ਥਙ੍ਗਮਾ, ਅਦੁਕ੍ਖਮਸੁਖਂ ਉਪੇਕ੍ਖਾਸਤਿਪਾਰਿਸੁਦ੍ਧਿਂ ਚਤੁਤ੍ਥਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ. ਅਯਂ ਵੁਚ੍ਚਤਿ ‘‘ਸਮ੍ਮਾਸਮਾਧਿ’’.

ਇਦਂ ਵੁਚ੍ਚਤਿ ‘‘ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ ਅਰਿਯਸਚ੍ਚਂ’’.

ਸੁਤ੍ਤਨ੍ਤਭਾਜਨੀਯਂ.

੨. ਅਭਿਧਮ੍ਮਭਾਜਨੀਯਂ

੨੦੬. ਚਤ੍ਤਾਰਿ ਸਚ੍ਚਾਨਿ – ਦੁਕ੍ਖਂ, ਦੁਕ੍ਖਸਮੁਦਯੋ, ਦੁਕ੍ਖਨਿਰੋਧੋ, ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ.

ਤਤ੍ਥ ਕਤਮੋ ਦੁਕ੍ਖਸਮੁਦਯੋ? ਤਣ੍ਹਾ – ਅਯਂ ਵੁਚ੍ਚਤਿ ‘‘ਦੁਕ੍ਖਸਮੁਦਯੋ’’.

ਤਤ੍ਥ ਕਤਮਂ ਦੁਕ੍ਖਂ? ਅਵਸੇਸਾ ਚ ਕਿਲੇਸਾ, ਅਵਸੇਸਾ ਚ ਅਕੁਸਲਾ ਧਮ੍ਮਾ, ਤੀਣਿ ਚ ਕੁਸਲਮੂਲਾਨਿ ਸਾਸਵਾਨਿ, ਅਵਸੇਸਾ ਚ ਸਾਸਵਾ ਕੁਸਲਾ ਧਮ੍ਮਾ, ਸਾਸਵਾ ਚ ਕੁਸਲਾਕੁਸਲਾਨਂ ਧਮ੍ਮਾਨਂ ਵਿਪਾਕਾ, ਯੇ ਚ ਧਮ੍ਮਾ ਕਿਰਿਯਾ ਨੇਵ ਕੁਸਲਾ ਨਾਕੁਸਲਾ ਨ ਚ ਕਮ੍ਮਵਿਪਾਕਾ, ਸਬ੍ਬਞ੍ਚ ਰੂਪਂ – ਇਦਂ ਵੁਚ੍ਚਤਿ ‘‘ਦੁਕ੍ਖਂ’’.

ਤਤ੍ਥ ਕਤਮੋ ਦੁਕ੍ਖਨਿਰੋਧੋ? ਤਣ੍ਹਾਯ ਪਹਾਨਂ – ਅਯਂ ਵੁਚ੍ਚਤਿ ‘‘ਦੁਕ੍ਖਨਿਰੋਧੋ’’.

ਤਤ੍ਥ ਕਤਮਾ ਸਮ੍ਮਾਦਿਟ੍ਠਿ? ਯਾ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ ਮਗ੍ਗਙ੍ਗਂ ਮਗ੍ਗਪਰਿਯਾਪਨ੍ਨਂ – ਅਯਂ ਵੁਚ੍ਚਤਿ ‘‘ਸਮ੍ਮਾਦਿਟ੍ਠਿ’’.

ਤਤ੍ਥ ਕਤਮੋ ਸਮ੍ਮਾਸਙ੍ਕਪ੍ਪੋ? ਯੋ ਤਕ੍ਕੋ ਵਿਤਕ੍ਕੋ…ਪੇ… ਸਮ੍ਮਾਸਙ੍ਕਪ੍ਪੋ ਮਗ੍ਗਙ੍ਗਂ ਮਗ੍ਗਪਰਿਯਾਪਨ੍ਨਂ – ਅਯਂ ਵੁਚ੍ਚਤਿ ‘‘ਸਮ੍ਮਾਸਙ੍ਕਪ੍ਪੋ’’.

ਤਤ੍ਥ ਕਤਮਾ ਸਮ੍ਮਾਵਾਚਾ? ਯਾ ਚਤੂਹਿ ਵਚੀਦੁਚ੍ਚਰਿਤੇਹਿ ਆਰਤਿ ਵਿਰਤਿ ਪਟਿਵਿਰਤਿ ਵੇਰਮਣੀ [ਵੇਰਮਣਿ (ਕ.) ਏਵਮੁਪਰਿਪਿ] ਅਕਿਰਿਯਾ ਅਕਰਣਂ ਅਨਜ੍ਝਾਪਤ੍ਤਿ ਵੇਲਾਅਨਤਿਕ੍ਕਮੋ ਸੇਤੁਘਾਤੋ ਸਮ੍ਮਾਵਾਚਾ ਮਗ੍ਗਙ੍ਗਂ ਮਗ੍ਗਪਰਿਯਾਪਨ੍ਨਂ – ਅਯਂ ਵੁਚ੍ਚਤਿ ‘‘ਸਮ੍ਮਾਵਾਚਾ’’.

ਤਤ੍ਥ ਕਤਮੋ ਸਮ੍ਮਾਕਮ੍ਮਨ੍ਤੋ? ਯਾ ਤੀਹਿ ਕਾਯਦੁਚ੍ਚਰਿਤੇਹਿ ਆਰਤਿ ਵਿਰਤਿ ਪਟਿਵਿਰਤਿ ਵੇਰਮਣੀ ਅਕਿਰਿਯਾ ਅਕਰਣਂ ਅਨਜ੍ਝਾਪਤ੍ਤਿ ਵੇਲਾਅਨਤਿਕ੍ਕਮੋ ਸੇਤੁਘਾਤੋ ਸਮ੍ਮਾਕਮ੍ਮਨ੍ਤੋ ਮਗ੍ਗਙ੍ਗਂ ਮਗ੍ਗਪਰਿਯਾਪਨ੍ਨਂ – ਅਯਂ ਵੁਚ੍ਚਤਿ ‘‘ਸਮ੍ਮਾਕਮ੍ਮਨ੍ਤੋ’’.

ਤਤ੍ਥ ਕਤਮੋ ਸਮ੍ਮਾਆਜੀਵੋ? ਯਾ ਮਿਚ੍ਛਾ ਆਜੀਵਾ ਆਰਤਿ ਵਿਰਤਿ ਪਟਿਵਿਰਤਿ ਵੇਰਮਣੀ ਅਕਿਰਿਯਾ ਅਕਰਣਂ ਅਨਜ੍ਝਾਪਤ੍ਤਿ ਵੇਲਾਅਨਤਿਕ੍ਕਮੋ ਸੇਤੁਘਾਤੋ ਸਮ੍ਮਾਆਜੀਵੋ ਮਗ੍ਗਙ੍ਗਂ ਮਗ੍ਗਪਰਿਯਾਪਨ੍ਨਂ – ਅਯਂ ਵੁਚ੍ਚਤਿ ‘‘ਸਮ੍ਮਾਆਜੀਵੋ’’.

ਤਤ੍ਥ ਕਤਮੋ ਸਮ੍ਮਾਵਾਯਾਮੋ? ਯੋ ਚੇਤਸਿਕੋ ਵੀਰਿਯਾਰਮ੍ਭੋ [ਵਿਰਿਯਾਰਮ੍ਭੋ (ਸੀ. ਸ੍ਯਾ.)] …ਪੇ… ਸਮ੍ਮਾਵਾਯਾਮੋ ਵੀਰਿਯਸਮ੍ਬੋਜ੍ਝਙ੍ਗੋ ਮਗ੍ਗਙ੍ਗਂ ਮਗ੍ਗਪਰਿਯਾਪਨ੍ਨਂ – ਅਯਂ ਵੁਚ੍ਚਤਿ ‘‘ਸਮ੍ਮਾਵਾਯਾਮੋ’’.

ਤਤ੍ਥ ਕਤਮਾ ਸਮ੍ਮਾਸਤਿ? ਯਾ ਸਤਿ ਅਨੁਸ੍ਸਤਿ…ਪੇ… ਸਮ੍ਮਾਸਤਿ ਸਤਿਸਮ੍ਬੋਜ੍ਝਙ੍ਗੋ ਮਗ੍ਗਙ੍ਗਂ ਮਗ੍ਗਪਰਿਯਾਪਨ੍ਨਂ – ਅਯਂ ਵੁਚ੍ਚਤਿ ‘‘ਸਮ੍ਮਾਸਤਿ’’.

ਤਤ੍ਥ ਕਤਮੋ ਸਮ੍ਮਾਸਮਾਧਿ? ਯਾ ਚਿਤ੍ਤਸ੍ਸ ਠਿਤਿ ਸਣ੍ਠਿਤਿ…ਪੇ… ਸਮ੍ਮਾਸਮਾਧਿ ਸਮਾਧਿਸਮ੍ਬੋਜ੍ਝਙ੍ਗੋ ਮਗ੍ਗਙ੍ਗਂ ਮਗ੍ਗਪਰਿਯਾਪਨ੍ਨਂ – ਅਯਂ ਵੁਚ੍ਚਤਿ ‘‘ਸਮ੍ਮਾਸਮਾਧਿ’’. ਅਯਂ ਵੁਚ੍ਚਤਿ ‘‘ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’’. ਅਵਸੇਸਾ ਧਮ੍ਮਾ ਦੁਕ੍ਖਨਿਰੋਧਗਾਮਿਨਿਯਾ ਪਟਿਪਦਾਯ ਸਮ੍ਪਯੁਤ੍ਤਾ.

੨੦੭. ਤਤ੍ਥ ਕਤਮੋ ਦੁਕ੍ਖਸਮੁਦਯੋ? ਤਣ੍ਹਾ ਚ ਅਵਸੇਸਾ ਚ ਕਿਲੇਸਾ – ਅਯਂ ਵੁਚ੍ਚਤਿ ‘‘ਦੁਕ੍ਖਸਮੁਦਯੋ’’.

ਤਤ੍ਥ ਕਤਮਂ ਦੁਕ੍ਖਂ? ਅਵਸੇਸਾ ਚ ਅਕੁਸਲਾ ਧਮ੍ਮਾ, ਤੀਣਿ ਚ ਕੁਸਲਮੂਲਾਨਿ ਸਾਸਵਾਨਿ, ਅਵਸੇਸਾ ਚ ਸਾਸਵਾ ਕੁਸਲਾ ਧਮ੍ਮਾ, ਸਾਸਵਾ ਚ ਕੁਸਲਾਕੁਸਲਾਨਂ ਧਮ੍ਮਾਨਂ ਵਿਪਾਕਾ, ਯੇ ਚ ਧਮ੍ਮਾ ਕਿਰਿਯਾ ਨੇਵ ਕੁਸਲਾ ਨਾਕੁਸਲਾ ਨ ਚ ਕਮ੍ਮਵਿਪਾਕਾ, ਸਬ੍ਬਞ੍ਚ ਰੂਪਂ – ਇਦਂ ਵੁਚ੍ਚਤਿ ‘‘ਦੁਕ੍ਖਂ’’.

ਤਤ੍ਥ ਕਤਮੋ ਦੁਕ੍ਖਨਿਰੋਧੋ? ਤਣ੍ਹਾਯ ਚ, ਅਵਸੇਸਾਨਞ੍ਚ ਕਿਲੇਸਾਨਂ ਪਹਾਨਂ – ਅਯਂ ਵੁਚ੍ਚਤਿ ‘‘ਦੁਕ੍ਖਨਿਰੋਧੋ’’.

ਤਤ੍ਥ ਕਤਮਾ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ? ਇਧ ਭਿਕ੍ਖੁ ਯਸ੍ਮਿਂ ਸਮਯੇ ਲੋਕੁਤ੍ਤਰਂ ਝਾਨਂ ਭਾਵੇਤਿ ਨਿਯ੍ਯਾਨਿਕਂ ਅਪਚਯਗਾਮਿਂ ਦਿਟ੍ਠਿਗਤਾਨਂ ਪਹਾਨਾਯ ਪਠਮਾਯ ਭੂਮਿਯਾ ਪਤ੍ਤਿਯਾ, ਵਿਵਿਚ੍ਚੇਵ ਕਾਮੇਹਿ…ਪੇ… ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ ਦੁਕ੍ਖਪਟਿਪਦਂ ਦਨ੍ਧਾਭਿਞ੍ਞਂ, ਤਸ੍ਮਿਂ ਸਮਯੇ ਅਟ੍ਠਙ੍ਗਿਕੋ ਮਗ੍ਗੋ ਹੋਤਿ – ਸਮ੍ਮਾਦਿਟ੍ਠਿ…ਪੇ… ਸਮ੍ਮਾਸਮਾਧਿ. ਅਯਂ ਵੁਚ੍ਚਤਿ – ‘‘ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’’. ਅਵਸੇਸਾ ਧਮ੍ਮਾ ਦੁਕ੍ਖਨਿਰੋਧਗਾਮਿਨਿਯਾ ਪਟਿਪਦਾਯ ਸਮ੍ਪਯੁਤ੍ਤਾ.

੨੦੮. ਤਤ੍ਥ ਕਤਮੋ ਦੁਕ੍ਖਸਮੁਦਯੋ? ਤਣ੍ਹਾ ਚ ਅਵਸੇਸਾ ਚ ਕਿਲੇਸਾ, ਅਵਸੇਸਾ ਚ ਅਕੁਸਲਾ ਧਮ੍ਮਾ – ਅਯਂ ਵੁਚ੍ਚਤਿ ‘‘ਦੁਕ੍ਖਸਮੁਦਯੋ’’.

ਤਤ੍ਥ ਕਤਮਂ ਦੁਕ੍ਖਂ? ਤੀਣਿ ਚ ਕੁਸਲਮੂਲਾਨਿ ਸਾਸਵਾਨਿ, ਅਵਸੇਸਾ ਚ ਸਾਸਵਾ ਕੁਸਲਾ ਧਮ੍ਮਾ, ਸਾਸਵਾ ਚ ਕੁਸਲਾਕੁਸਲਾਨਂ ਧਮ੍ਮਾਨਂ ਵਿਪਾਕਾ, ਯੇ ਚ ਧਮ੍ਮਾ ਕਿਰਿਯਾ ਨੇਵ ਕੁਸਲਾ ਨਾਕੁਸਲਾ ਨ ਚ ਕਮ੍ਮਵਿਪਾਕਾ, ਸਬ੍ਬਞ੍ਚ ਰੂਪਂ – ਇਦਂ ਵੁਚ੍ਚਤਿ ‘‘ਦੁਕ੍ਖਂ’’.

ਤਤ੍ਥ ਕਤਮੋ ਦੁਕ੍ਖਨਿਰੋਧੋ? ਤਣ੍ਹਾਯ ਚ, ਅਵਸੇਸਾਨਞ੍ਚ ਕਿਲੇਸਾਨਂ, ਅਵਸੇਸਾਨਞ੍ਚ ਅਕੁਸਲਾਨਂ ਧਮ੍ਮਾਨਂ ਪਹਾਨਂ – ਅਯਂ ਵੁਚ੍ਚਤਿ ‘‘ਦੁਕ੍ਖਨਿਰੋਧੋ’’.

ਤਤ੍ਥ ਕਤਮਾ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ? ਇਧ ਭਿਕ੍ਖੁ ਯਸ੍ਮਿਂ ਸਮਯੇ ਲੋਕੁਤ੍ਤਰਂ ਝਾਨਂ ਭਾਵੇਤਿ ਨਿਯ੍ਯਾਨਿਕਂ ਅਪਚਯਗਾਮਿਂ ਦਿਟ੍ਠਿਗਤਾਨਂ ਪਹਾਨਾਯ ਪਠਮਾਯ ਭੂਮਿਯਾ ਪਤ੍ਤਿਯਾ ਵਿਵਿਚ੍ਚੇਵ ਕਾਮੇਹਿ…ਪੇ… ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ ਦੁਕ੍ਖਪਟਿਪਦਂ ਦਨ੍ਧਾਭਿਞ੍ਞਂ, ਤਸ੍ਮਿਂ ਸਮਯੇ ਅਟ੍ਠਙ੍ਗਿਕੋ ਮਗ੍ਗੋ ਹੋਤਿ – ਸਮ੍ਮਾਦਿਟ੍ਠਿ…ਪੇ… ਸਮ੍ਮਾਸਮਾਧਿ. ਅਯਂ ਵੁਚ੍ਚਤਿ ‘‘ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’’. ਅਵਸੇਸਾ ਧਮ੍ਮਾ ਦੁਕ੍ਖਨਿਰੋਧਗਾਮਿਨਿਯਾ ਪਟਿਪਦਾਯ ਸਮ੍ਪਯੁਤ੍ਤਾ.

੨੦੯. ਤਤ੍ਥ ਕਤਮੋ ਦੁਕ੍ਖਸਮੁਦਯੋ? ਤਣ੍ਹਾ ਚ ਅਵਸੇਸਾ ਚ ਕਿਲੇਸਾ, ਅਵਸੇਸਾ ਚ ਅਕੁਸਲਾ ਧਮ੍ਮਾ, ਤੀਣਿ ਚ ਕੁਸਲਮੂਲਾਨਿ ਸਾਸਵਾਨਿ – ਅਯਂ ਵੁਚ੍ਚਤਿ ‘‘ਦੁਕ੍ਖਸਮੁਦਯੋ’’.

ਤਤ੍ਥ ਕਤਮਂ ਦੁਕ੍ਖਂ? ਅਵਸੇਸਾ ਚ ਸਾਸਵਾ ਕੁਸਲਾ ਧਮ੍ਮਾ, ਸਾਸਵਾ ਚ ਕੁਸਲਾਕੁਸਲਾਨਂ ਧਮ੍ਮਾਨਂ ਵਿਪਾਕਾ, ਯੇ ਚ ਧਮ੍ਮਾ ਕਿਰਿਯਾ ਨੇਵ ਕੁਸਲਾ ਨਾਕੁਸਲਾ ਨ ਚ ਕਮ੍ਮਵਿਪਾਕਾ, ਸਬ੍ਬਞ੍ਚ ਰੂਪਂ – ਇਦਂ ਵੁਚ੍ਚਤਿ ‘‘ਦੁਕ੍ਖਂ’’.

ਤਤ੍ਥ ਕਤਮੋ ਦੁਕ੍ਖਨਿਰੋਧੋ? ਤਣ੍ਹਾਯ ਚ, ਅਵਸੇਸਾਨਞ੍ਚ ਕਿਲੇਸਾਨਂ, ਅਵਸੇਸਾਨਞ੍ਚ ਅਕੁਸਲਾਨਂ ਧਮ੍ਮਾਨਂ, ਤਿਣ੍ਣਞ੍ਚ ਕੁਸਲਮੂਲਾਨਂ ਸਾਸਵਾਨਂ ਪਹਾਨਂ – ਅਯਂ ਵੁਚ੍ਚਤਿ ‘‘ਦੁਕ੍ਖਨਿਰੋਧੋ’’.

੨੧੦. ਤਤ੍ਥ ਕਤਮੋ ਦੁਕ੍ਖਸਮੁਦਯੋ? ਤਣ੍ਹਾ ਚ, ਅਵਸੇਸਾ ਚ ਕਿਲੇਸਾ, ਅਵਸੇਸਾ ਚ ਅਕੁਸਲਾ ਧਮ੍ਮਾ, ਤੀਣਿ ਚ ਕੁਸਲਮੂਲਾਨਿ ਸਾਸਵਾਨਿ, ਅਵਸੇਸਾ ਚ ਸਾਸਵਾ ਕੁਸਲਾ ਧਮ੍ਮਾ – ਅਯਂ ਵੁਚ੍ਚਤਿ ‘‘ਦੁਕ੍ਖਸਮੁਦਯੋ’’.

ਤਤ੍ਥ ਕਤਮਂ ਦੁਕ੍ਖਂ? ਸਾਸਵਾ ਕੁਸਲਾਕੁਸਲਾਨਂ ਧਮ੍ਮਾਨਂ ਵਿਪਾਕਾ, ਯੇ ਚ ਧਮ੍ਮਾ ਕਿਰਿਯਾ ਨੇਵ ਕੁਸਲਾ ਨਾਕੁਸਲਾ ਨ ਚ ਕਮ੍ਮਵਿਪਾਕਾ, ਸਬ੍ਬਞ੍ਚ ਰੂਪਂ – ਇਦਂ ਵੁਚ੍ਚਤਿ ‘‘ਦੁਕ੍ਖਂ’’.

ਤਤ੍ਥ ਕਤਮੋ ਦੁਕ੍ਖਨਿਰੋਧੋ? ਤਣ੍ਹਾਯ ਚ, ਅਵਸੇਸਾਨਞ੍ਚ ਕਿਲੇਸਾਨਂ, ਅਵਸੇਸਾਨਞ੍ਚ ਅਕੁਸਲਾਨਂ ਧਮ੍ਮਾਨਂ, ਤਿਣ੍ਣਞ੍ਚ ਕੁਸਲਮੂਲਾਨਂ ਸਾਸਵਾਨਂ, ਅਵਸੇਸਾਨਞ੍ਚ ਸਾਸਵਾਨਂ ਕੁਸਲਾਨਂ ਧਮ੍ਮਾਨਂ ਪਹਾਨਂ – ਅਯਂ ਵੁਚ੍ਚਤਿ ‘‘ਦੁਕ੍ਖਨਿਰੋਧੋ’’.

ਤਤ੍ਥ ਕਤਮਾ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ? ਇਧ ਭਿਕ੍ਖੁ ਯਸ੍ਮਿਂ ਸਮਯੇ ਲੋਕੁਤ੍ਤਰਂ ਝਾਨਂ ਭਾਵੇਤਿ ਨਿਯ੍ਯਾਨਿਕਂ ਅਪਚਯਗਾਮਿਂ ਦਿਟ੍ਠਿਗਤਾਨਂ ਪਹਾਨਾਯ ਪਠਮਾਯ ਭੂਮਿਯਾ ਪਤ੍ਤਿਯਾ, ਵਿਵਿਚ੍ਚੇਵ ਕਾਮੇਹਿ…ਪੇ… ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ ਦੁਕ੍ਖਪਟਿਪਦਂ ਦਨ੍ਧਾਭਿਞ੍ਞਂ, ਤਸ੍ਮਿਂ ਸਮਯੇ ਅਟ੍ਠਙ੍ਗਿਕੋ ਮਗ੍ਗੋ ਹੋਤਿ – ਸਮ੍ਮਾਦਿਟ੍ਠਿ…ਪੇ… ਸਮ੍ਮਾਸਮਾਧਿ. ਅਯਂ ਵੁਚ੍ਚਤਿ ‘‘ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’’. ਅਵਸੇਸਾ ਧਮ੍ਮਾ ਦੁਕ੍ਖਨਿਰੋਧਗਾਮਿਨਿਯਾ ਪਟਿਪਦਾਯ ਸਮ੍ਪਯੁਤ੍ਤਾ.

੨੧੧. ਚਤ੍ਤਾਰਿ ਸਚ੍ਚਾਨਿ – ਦੁਕ੍ਖਂ, ਦੁਕ੍ਖਸਮੁਦਯੋ, ਦੁਕ੍ਖਨਿਰੋਧੋ, ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ.

ਤਤ੍ਥ ਕਤਮੋ ਦੁਕ੍ਖਸਮੁਦਯੋ? ਤਣ੍ਹਾ – ਅਯਂ ਵੁਚ੍ਚਤਿ ‘‘ਦੁਕ੍ਖਸਮੁਦਯੋ’’.

ਤਤ੍ਥ ਕਤਮੋ ਦੁਕ੍ਖਨਿਰੋਧੋ? ਤਣ੍ਹਾਯ ਪਹਾਨਂ – ਅਯਂ ਵੁਚ੍ਚਤਿ ‘‘ਦੁਕ੍ਖਨਿਰੋਧੋ’’.

ਤਤ੍ਥ ਕਤਮਾ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ? ਇਧ ਭਿਕ੍ਖੁ ਯਸ੍ਮਿਂ ਸਮਯੇ ਲੋਕੁਤ੍ਤਰਂ ਝਾਨਂ ਭਾਵੇਤਿ ਨਿਯ੍ਯਾਨਿਕਂ ਅਪਚਯਗਾਮਿਂ ਦਿਟ੍ਠਿਗਤਾਨਂ ਪਹਾਨਾਯ ਪਠਮਾਯ ਭੂਮਿਯਾ ਪਤ੍ਤਿਯਾ, ਵਿਵਿਚ੍ਚੇਵ ਕਾਮੇਹਿ…ਪੇ… ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ ਦੁਕ੍ਖਪਟਿਪਦਂ ਦਨ੍ਧਾਭਿਞ੍ਞਂ, ਤਸ੍ਮਿਂ ਸਮਯੇ ਪਞ੍ਚਙ੍ਗਿਕੋ ਮਗ੍ਗੋ ਹੋਤਿ – ਸਮ੍ਮਾਦਿਟ੍ਠਿ, ਸਮ੍ਮਾਸਙ੍ਕਪ੍ਪੋ, ਸਮ੍ਮਾਵਾਯਾਮੋ, ਸਮ੍ਮਾਸਤਿ, ਸਮ੍ਮਾਸਮਾਧਿ.

ਤਤ੍ਥ ਕਤਮੋ ਸਮ੍ਮਾਵਾਯਾਮੋ? ਯੋ ਚੇਤਸਿਕੋ ਵੀਰਿਯਾਰਮ੍ਭੋ…ਪੇ… ਸਮ੍ਮਾਵਾਯਾਮੋ ਵੀਰਿਯਸਮ੍ਬੋਜ੍ਝਙ੍ਗੋ ਮਗ੍ਗਙ੍ਗਂ ਮਗ੍ਗਪਰਿਯਾਪਨ੍ਨਂ – ਅਯਂ ਵੁਚ੍ਚਤਿ ‘‘ਸਮ੍ਮਾਵਾਯਾਮੋ’’.

ਤਤ੍ਥ ਕਤਮੋ ਸਮ੍ਮਾਸਮਾਧਿ? ਯਾ ਚਿਤ੍ਤਸ੍ਸ ਠਿਤਿ…ਪੇ… ਸਮ੍ਮਾਸਮਾਧਿ ਸਮਾਧਿਸਮ੍ਬੋਜ੍ਝਙ੍ਗੋ ਮਗ੍ਗਙ੍ਗਂ ਮਗ੍ਗਪਰਿਯਾਪਨ੍ਨਂ – ਅਯਂ ਵੁਚ੍ਚਤਿ ‘‘ਸਮ੍ਮਾਸਮਾਧਿ’’. ਅਯਂ ਵੁਚ੍ਚਤਿ ‘‘ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’’. ਅਵਸੇਸਾ ਧਮ੍ਮਾ ਦੁਕ੍ਖਨਿਰੋਧਗਾਮਿਨਿਯਾ ਪਟਿਪਦਾਯ ਸਮ੍ਪਯੁਤ੍ਤਾ.

੨੧੨. ਤਤ੍ਥ ਕਤਮੋ ਦੁਕ੍ਖਸਮੁਦਯੋ? ਤਣ੍ਹਾ ਚ, ਅਵਸੇਸਾ ਚ ਕਿਲੇਸਾ, ਅਵਸੇਸਾ ਚ ਅਕੁਸਲਾ ਧਮ੍ਮਾ, ਤੀਣਿ ਚ ਕੁਸਲਮੂਲਾਨਿ ਸਾਸਵਾਨਿ, ਅਵਸੇਸਾ ਚ ਸਾਸਵਾ ਕੁਸਲਾ ਧਮ੍ਮਾ – ਅਯਂ ਵੁਚ੍ਚਤਿ ‘‘ਦੁਕ੍ਖਸਮੁਦਯੋ’’.

ਤਤ੍ਥ ਕਤਮਾ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ? ਇਧ ਭਿਕ੍ਖੁ ਯਸ੍ਮਿਂ ਸਮਯੇ ਲੋਕੁਤ੍ਤਰਂ ਝਾਨਂ ਭਾਵੇਤਿ ਨਿਯ੍ਯਾਨਿਕਂ ਅਪਚਯਗਾਮਿਂ ਦਿਟ੍ਠਿਗਤਾਨਂ ਪਹਾਨਾਯ ਪਠਮਾਯ ਭੂਮਿਯਾ ਪਤ੍ਤਿਯਾ, ਵਿਵਿਚ੍ਚੇਵ ਕਾਮੇਹਿ…ਪੇ… ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ ਦੁਕ੍ਖਪਟਿਪਦਂ ਦਨ੍ਧਾਭਿਞ੍ਞਂ, ਤਸ੍ਮਿਂ ਸਮਯੇ ਪਞ੍ਚਙ੍ਗਿਕੋ ਮਗ੍ਗੋ ਹੋਤਿ – ਸਮ੍ਮਾਦਿਟ੍ਠਿ, ਸਮ੍ਮਾਸਙ੍ਕਪ੍ਪੋ, ਸਮ੍ਮਾਵਾਯਾਮੋ, ਸਮ੍ਮਾਸਤਿ, ਸਮ੍ਮਾਸਮਾਧਿ. ਅਯਂ ਵੁਚ੍ਚਤਿ ‘‘ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’’. ਅਵਸੇਸਾ ਧਮ੍ਮਾ ਦੁਕ੍ਖਨਿਰੋਧਗਾਮਿਨਿਯਾ ਪਟਿਪਦਾਯ ਸਮ੍ਪਯੁਤ੍ਤਾ.

੨੧੩. ਚਤ੍ਤਾਰਿ ਸਚ੍ਚਾਨਿ – ਦੁਕ੍ਖਂ, ਦੁਕ੍ਖਸਮੁਦਯੋ, ਦੁਕ੍ਖਨਿਰੋਧੋ, ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ.

ਤਤ੍ਥ ਕਤਮੋ ਦੁਕ੍ਖਸਮੁਦਯੋ? ਤਣ੍ਹਾ – ਅਯਂ ਵੁਚ੍ਚਤਿ ‘‘ਦੁਕ੍ਖਸਮੁਦਯੋ’’.

ਤਤ੍ਥ ਕਤਮੋ ਦੁਕ੍ਖਨਿਰੋਧੋ? ਤਣ੍ਹਾਯ ਪਹਾਨਂ – ਅਯਂ ਵੁਚ੍ਚਤਿ ‘‘ਦੁਕ੍ਖਨਿਰੋਧੋ’’.

ਤਤ੍ਥ ਕਤਮਾ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ? ਇਧ ਭਿਕ੍ਖੁ ਯਸ੍ਮਿਂ ਸਮਯੇ ਲੋਕੁਤ੍ਤਰਂ ਝਾਨਂ ਭਾਵੇਤਿ ਨਿਯ੍ਯਾਨਿਕਂ ਅਪਚਯਗਾਮਿਂ ਦਿਟ੍ਠਿਗਤਾਨਂ ਪਹਾਨਾਯ ਪਠਮਾਯ ਭੂਮਿਯਾ ਪਤ੍ਤਿਯਾ ਵਿਵਿਚ੍ਚੇਵ ਕਾਮੇਹਿ…ਪੇ… ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ ਦੁਕ੍ਖਪਟਿਪਦਂ ਦਨ੍ਧਾਭਿਞ੍ਞਂ, ਤਸ੍ਮਿਂ ਸਮਯੇ ਫਸ੍ਸੋ ਹੋਤਿ…ਪੇ… ਅਵਿਕ੍ਖੇਪੋ ਹੋਤਿ. ਅਯਂ ਵੁਚ੍ਚਤਿ ‘‘ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’’.

੨੧੪. ਤਤ੍ਥ ਕਤਮੋ ਦੁਕ੍ਖਸਮੁਦਯੋ? ਤਣ੍ਹਾ ਚ, ਅਵਸੇਸਾ ਚ ਕਿਲੇਸਾ, ਅਵਸੇਸਾ ਚ ਅਕੁਸਲਾ ਧਮ੍ਮਾ, ਤੀਣਿ ਚ ਕੁਸਲਮੂਲਾਨਿ ਸਾਸਵਾਨਿ, ਅਵਸੇਸਾ ਚ ਸਾਸਵਾ ਕੁਸਲਾ ਧਮ੍ਮਾ – ਅਯਂ ਵੁਚ੍ਚਤਿ ‘‘ਦੁਕ੍ਖਸਮੁਦਯੋ’’.

ਤਤ੍ਥ ਕਤਮਾ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ? ਇਧ ਭਿਕ੍ਖੁ ਯਸ੍ਮਿਂ ਸਮਯੇ ਲੋਕੁਤ੍ਤਰਂ ਝਾਨਂ ਭਾਵੇਤਿ ਨਿਯ੍ਯਾਨਿਕਂ ਅਪਚਯਗਾਮਿਂ ਦਿਟ੍ਠਿਗਤਾਨਂ ਪਹਾਨਾਯ ਪਠਮਾਯ ਭੂਮਿਯਾ ਪਤ੍ਤਿਯਾ ਵਿਵਿਚ੍ਚੇਵ ਕਾਮੇਹਿ…ਪੇ… ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ ਦੁਕ੍ਖਪਟਿਪਦਂ ਦਨ੍ਧਾਭਿਞ੍ਞਂ, ਤਸ੍ਮਿਂ ਸਮਯੇ ਫਸ੍ਸੋ ਹੋਤਿ…ਪੇ… ਅਵਿਕ੍ਖੇਪੋ ਹੋਤਿ. ਅਯਂ ਵੁਚ੍ਚਤਿ ‘‘ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’’.

ਅਭਿਧਮ੍ਮਭਾਜਨੀਯਂ.

੩. ਪਞ੍ਹਾਪੁਚ੍ਛਕਂ

੨੧੫. ਚਤ੍ਤਾਰਿ ਅਰਿਯਸਚ੍ਚਾਨਿ – ਦੁਕ੍ਖਂ ਅਰਿਯਸਚ੍ਚਂ, ਦੁਕ੍ਖਸਮੁਦਯਂ ਅਰਿਯਸਚ੍ਚਂ, ਦੁਕ੍ਖਨਿਰੋਧਂ ਅਰਿਯਸਚ੍ਚਂ, ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ ਅਰਿਯਸਚ੍ਚਂ.

੨੧੬. ਚਤੁਨ੍ਨਂ ਅਰਿਯਸਚ੍ਚਾਨਂ ਕਤਿ ਕੁਸਲਾ, ਕਤਿ ਅਕੁਸਲਾ, ਕਤਿ ਅਬ੍ਯਾਕਤਾ…ਪੇ… ਕਤਿ ਸਰਣਾ, ਕਤਿ ਅਰਣਾ?

੧. ਤਿਕਂ

੨੧੭. ਸਮੁਦਯਸਚ੍ਚਂ ਅਕੁਸਲਂ. ਮਗ੍ਗਸਚ੍ਚਂ ਕੁਸਲਂ. ਨਿਰੋਧਸਚ੍ਚਂ ਅਬ੍ਯਾਕਤਂ. ਦੁਕ੍ਖਸਚ੍ਚਂ ਸਿਯਾ ਕੁਸਲਂ, ਸਿਯਾ ਅਕੁਸਲਂ, ਸਿਯਾ ਅਬ੍ਯਾਕਤਂ. ਦ੍ਵੇ ਸਚ੍ਚਾ ਸਿਯਾ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ, ਸਿਯਾ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ. ਨਿਰੋਧਸਚ੍ਚਂ ਨ ਵਤ੍ਤਬ੍ਬਂ – ‘‘ਸੁਖਾਯ ਵੇਦਨਾਯ ਸਮ੍ਪਯੁਤ੍ਤ’’ਨ੍ਤਿਪਿ, ‘‘ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤ’’ਨ੍ਤਿਪਿ, ‘‘ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤ’’ਨ੍ਤਿਪਿ. ਦੁਕ੍ਖਸਚ੍ਚਂ ਸਿਯਾ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ, ਸਿਯਾ ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਂ, ਸਿਯਾ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ, ਸਿਯਾ ਨ ਵਤ੍ਤਬ੍ਬਂ – ‘‘ਸੁਖਾਯ ਵੇਦਨਾਯ ਸਮ੍ਪਯੁਤ੍ਤ’’ਨ੍ਤਿਪਿ, ‘‘ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤ’’ਨ੍ਤਿਪਿ, ‘‘ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤ’’ਨ੍ਤਿਪਿ. ਦ੍ਵੇ ਸਚ੍ਚਾ ਵਿਪਾਕਧਮ੍ਮਧਮ੍ਮਾ. ਨਿਰੋਧਸਚ੍ਚਂ ਨੇਵਵਿਪਾਕਨਵਿਪਾਕਧਮ੍ਮਧਮ੍ਮਂ. ਦੁਕ੍ਖਸਚ੍ਚਂ ਸਿਯਾ ਵਿਪਾਕਂ, ਸਿਯਾ ਵਿਪਾਕਧਮ੍ਮਧਮ੍ਮਂ, ਸਿਯਾ ਨੇਵਵਿਪਾਕਨਵਿਪਾਕਧਮ੍ਮਧਮ੍ਮਂ. ਸਮੁਦਯਸਚ੍ਚਂ ਅਨੁਪਾਦਿਨ੍ਨੁਪਾਦਾਨਿਯਂ. ਦ੍ਵੇ ਸਚ੍ਚਾ ਅਨੁਪਾਦਿਨ੍ਨਅਨੁਪਾਦਾਨਿਯਾ. ਦੁਕ੍ਖਸਚ੍ਚਂ ਸਿਯਾ ਉਪਾਦਿਨ੍ਨੁਪਾਦਾਨਿਯਂ, ਸਿਯਾ ਅਨੁਪਾਦਿਨ੍ਨੁਪਾਦਾਨਿਯਂ.

ਸਮੁਦਯਸਚ੍ਚਂ ਸਂਕਿਲਿਟ੍ਠਸਂਕਿਲੇਸਿਕਂ. ਦ੍ਵੇ ਸਚ੍ਚਾ ਅਸਂਕਿਲਿਟ੍ਠਅਸਂਕਿਲੇਸਿਕਾ. ਦੁਕ੍ਖਸਚ੍ਚਂ ਸਿਯਾ ਸਂਕਿਲਿਟ੍ਠਸਂਕਿਲੇਸਿਕਂ, ਸਿਯਾ ਅਸਂਕਿਲਿਟ੍ਠਸਂਕਿਲੇਸਿਕਂ. ਸਮੁਦਯਸਚ੍ਚਂ ਸਵਿਤਕ੍ਕਸਵਿਚਾਰਂ. ਨਿਰੋਧਸਚ੍ਚਂ ਅਵਿਤਕ੍ਕਅਵਿਚਾਰਂ. ਮਗ੍ਗਸਚ੍ਚਂ ਸਿਯਾ ਸਵਿਤਕ੍ਕਸਵਿਚਾਰਂ, ਸਿਯਾ ਅਵਿਤਕ੍ਕਵਿਚਾਰਮਤ੍ਤਂ, ਸਿਯਾ ਅਵਿਤਕ੍ਕਅਵਿਚਾਰਂ. ਦੁਕ੍ਖਸਚ੍ਚਂ ਸਿਯਾ ਸਵਿਤਕ੍ਕਸਵਿਚਾਰਂ, ਸਿਯਾ ਅਵਿਤਕ੍ਕਵਿਚਾਰਮਤ੍ਤਂ, ਸਿਯਾ ਅਵਿਤਕ੍ਕਅਵਿਚਾਰਂ, ਸਿਯਾ ਨ ਵਤ੍ਤਬ੍ਬਂ – ‘‘ਸਵਿਤਕ੍ਕਸਵਿਚਾਰ’’ਨ੍ਤਿਪਿ, ‘‘ਅਵਿਤਕ੍ਕਵਿਚਾਰਮਤ੍ਤ’’ਨ੍ਤਿਪਿ, ‘‘ਅਵਿਤਕ੍ਕਅਵਿਚਾਰ’’ਨ੍ਤਿਪਿ. ਦ੍ਵੇ ਸਚ੍ਚਾ ਸਿਯਾ ਪੀਤਿਸਹਗਤਾ, ਸਿਯਾ ਸੁਖਸਹਗਤਾ, ਸਿਯਾ ਉਪੇਕ੍ਖਾਸਹਗਤਾ. ਨਿਰੋਧਸਚ੍ਚਂ ਨ ਵਤ੍ਤਬ੍ਬਂ – ‘‘ਪੀਤਿਸਹਗਤ’’ਨ੍ਤਿਪਿ, ‘‘ਸੁਖਸਹਗਤ’’ਨ੍ਤਿਪਿ, ‘‘ਉਪੇਕ੍ਖਾਸਹਗਤ’’ਨ੍ਤਿਪਿ. ਦੁਕ੍ਖਸਚ੍ਚਂ ਸਿਯਾ ਪੀਤਿਸਹਗਤਂ, ਸਿਯਾ ਸੁਖਸਹਗਤਂ, ਸਿਯਾ ਉਪੇਕ੍ਖਾਸਹਗਤਂ, ਸਿਯਾ ਨ ਵਤ੍ਤਬ੍ਬਂ – ‘‘ਪੀਤਿਸਹਗਤ’’ਨ੍ਤਿਪਿ, ‘‘ਸੁਖਸਹਗਤ’’ਨ੍ਤਿਪਿ, ‘‘ਉਪੇਕ੍ਖਾਸਹਗਤ’’ਨ੍ਤਿਪਿ.

ਦ੍ਵੇ ਸਚ੍ਚਾ ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਾ. ਸਮੁਦਯਸਚ੍ਚਂ ਸਿਯਾ ਦਸ੍ਸਨੇਨ ਪਹਾਤਬ੍ਬਂ, ਸਿਯਾ ਭਾਵਨਾਯ ਪਹਾਤਬ੍ਬਂ. ਦੁਕ੍ਖਸਚ੍ਚਂ ਸਿਯਾ ਦਸ੍ਸਨੇਨ ਪਹਾਤਬ੍ਬਂ, ਸਿਯਾ ਭਾਵਨਾਯ ਪਹਾਤਬ੍ਬਂ, ਸਿਯਾ ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਂ. ਦ੍ਵੇ ਸਚ੍ਚਾ ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਹੇਤੁਕਾ. ਸਮੁਦਯਸਚ੍ਚਂ ਸਿਯਾ ਦਸ੍ਸਨੇਨ ਪਹਾਤਬ੍ਬਹੇਤੁਕਂ, ਸਿਯਾ ਭਾਵਨਾਯ ਪਹਾਤਬ੍ਬਹੇਤੁਕਂ. ਦੁਕ੍ਖਸਚ੍ਚਂ ਸਿਯਾ ਦਸ੍ਸਨੇਨ ਪਹਾਤਬ੍ਬਹੇਤੁਕਂ, ਸਿਯਾ ਭਾਵਨਾਯ ਪਹਾਤਬ੍ਬਹੇਤੁਕਂ, ਸਿਯਾ ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਹੇਤੁਕਂ. ਸਮੁਦਯਸਚ੍ਚਂ ਆਚਯਗਾਮਿ. ਮਗ੍ਗਸਚ੍ਚਂ ਅਪਚਯਗਾਮਿ. ਨਿਰੋਧਸਚ੍ਚਂ ਨੇਵਾਚਯਗਾਮਿਨਾਪਚਯਗਾਮਿ. ਦੁਕ੍ਖਸਚ੍ਚਂ ਸਿਯਾ ਆਚਯਗਾਮਿ, ਸਿਯਾ ਨੇਵਾਚਯਗਾਮਿਨਾਪਚਯਗਾਮਿ. ਮਗ੍ਗਸਚ੍ਚਂ ਸੇਕ੍ਖਂ. ਤੀਣਿ ਸਚ੍ਚਾਨਿ ਨੇਵਸੇਕ੍ਖਨਾਸੇਕ੍ਖਾ. ਸਮੁਦਯਸਚ੍ਚਂ ਪਰਿਤ੍ਤਂ. ਦ੍ਵੇ ਸਚ੍ਚਾ ਅਪ੍ਪਮਾਣਾ. ਦੁਕ੍ਖਸਚ੍ਚਂ ਸਿਯਾ ਪਰਿਤ੍ਤਂ, ਸਿਯਾ ਮਹਗ੍ਗਤਂ. ਨਿਰੋਧਸਚ੍ਚਂ ਅਨਾਰਮ੍ਮਣਂ. ਮਗ੍ਗਸਚ੍ਚਂ ਅਪ੍ਪਮਾਣਾਰਮ੍ਮਣਂ. ਸਮੁਦਯਸਚ੍ਚਂ ਸਿਯਾ ਪਰਿਤ੍ਤਾਰਮ੍ਮਣਂ, ਸਿਯਾ ਮਹਗ੍ਗਤਾਰਮ੍ਮਣਂ ਨ ਅਪ੍ਪਮਾਣਾਰਮ੍ਮਣਂ, ਸਿਯਾ ਨ ਵਤ੍ਤਬ੍ਬਂ – ‘‘ਪਰਿਤ੍ਤਾਰਮ੍ਮਣ’’ਨ੍ਤਿਪਿ, ‘‘ਮਹਗ੍ਗਤਾਰਮ੍ਮਣ’’ਨ੍ਤਿਪਿ. ਦੁਕ੍ਖਸਚ੍ਚਂ ਸਿਯਾ ਪਰਿਤ੍ਤਾਰਮ੍ਮਣਂ, ਸਿਯਾ ਮਹਗ੍ਗਤਾਰਮ੍ਮਣਂ, ਸਿਯਾ ਅਪ੍ਪਮਾਣਾਰਮ੍ਮਣਂ, ਸਿਯਾ ਨ ਵਤ੍ਤਬ੍ਬਂ – ‘‘ਪਰਿਤ੍ਤਾਰਮ੍ਮਣ’’ਨ੍ਤਿਪਿ, ‘‘ਮਹਗ੍ਗਤਾਰਮ੍ਮਣ’’ਨ੍ਤਿਪਿ, ‘‘ਅਪ੍ਪਮਾਣਾਰਮ੍ਮਣ’’ਨ੍ਤਿਪਿ.

ਸਮੁਦਯਸਚ੍ਚਂ ਹੀਨਂ. ਦ੍ਵੇ ਸਚ੍ਚਾ ਪਣੀਤਾ. ਦੁਕ੍ਖਸਚ੍ਚਂ ਸਿਯਾ ਹੀਨਂ, ਸਿਯਾ ਮਜ੍ਝਿਮਂ. ਨਿਰੋਧਸਚ੍ਚਂ ਅਨਿਯਤਂ. ਮਗ੍ਗਸਚ੍ਚਂ ਸਮ੍ਮਤ੍ਤਨਿਯਤਂ. ਦ੍ਵੇ ਸਚ੍ਚਾ ਸਿਯਾ ਮਿਚ੍ਛਤ੍ਤਨਿਯਤਾ, ਸਿਯਾ ਅਨਿਯਤਾ. ਨਿਰੋਧਸਚ੍ਚਂ ਅਨਾਰਮ੍ਮਣਂ. ਸਮੁਦਯਸਚ੍ਚਂ ਨ ਵਤ੍ਤਬ੍ਬਂ – ‘‘ਮਗ੍ਗਾਰਮ੍ਮਣ’’ਨ੍ਤਿਪਿ, ‘‘ਮਗ੍ਗਹੇਤੁਕ’’ਨ੍ਤਿਪਿ, ‘‘ਮਗ੍ਗਾਧਿਪਤੀ’’ਤਿਪਿ. ਮਗ੍ਗਸਚ੍ਚਂ ਨ ਮਗ੍ਗਾਰਮ੍ਮਣਂ ਮਗ੍ਗਹੇਤੁਕਂ, ਸਿਯਾ ਮਗ੍ਗਾਧਿਪਤਿ, ਸਿਯਾ ਨ ਵਤ੍ਤਬ੍ਬਂ – ‘‘ਮਗ੍ਗਾਧਿਪਤੀ’’ਤਿ. ਦੁਕ੍ਖਸਚ੍ਚਂ ਸਿਯਾ ਮਗ੍ਗਾਰਮ੍ਮਣਂ ਨ ਮਗ੍ਗਹੇਤੁਕਂ, ਸਿਯਾ ਮਗ੍ਗਾਧਿਪਤਿ, ਸਿਯਾ ਨ ਵਤ੍ਤਬ੍ਬਂ – ‘‘ਮਗ੍ਗਾਰਮ੍ਮਣ’’ਨ੍ਤਿਪਿ, ‘‘ਮਗ੍ਗਾਧਿਪਤੀ’’ਤਿਪਿ. ਦ੍ਵੇ ਸਚ੍ਚਾ ਸਿਯਾ ਉਪ੍ਪਨ੍ਨਾ, ਸਿਯਾ ਅਨੁਪ੍ਪਨ੍ਨਾ, ਨ ਵਤ੍ਤਬ੍ਬਾ – ‘‘ਉਪ੍ਪਾਦਿਨੋ’’ਤਿ. ਨਿਰੋਧਸਚ੍ਚਂ ਨ ਵਤ੍ਤਬ੍ਬਂ – ‘‘ਉਪ੍ਪਨ੍ਨ’’ਨ੍ਤਿਪਿ, ‘‘ਅਨੁਪ੍ਪਨ੍ਨ’’ਨ੍ਤਿਪਿ, ‘‘ਉਪ੍ਪਾਦੀ’’ਤਿਪਿ. ਦੁਕ੍ਖਸਚ੍ਚਂ ਸਿਯਾ ਉਪ੍ਪਨ੍ਨਂ, ਸਿਯਾ ਅਨੁਪ੍ਪਨ੍ਨਂ, ਸਿਯਾ ਉਪ੍ਪਾਦਿ. ਤੀਣਿ ਸਚ੍ਚਾਨਿ ਸਿਯਾ ਅਤੀਤਾ, ਸਿਯਾ ਅਨਾਗਤਾ, ਸਿਯਾ ਪਚ੍ਚੁਪ੍ਪਨ੍ਨਾ. ਨਿਰੋਧਸਚ੍ਚਂ ਨ ਵਤ੍ਤਬ੍ਬਂ – ‘‘ਅਤੀਤ’’ਨ੍ਤਿਪਿ, ‘‘ਅਨਾਗਤ’’ਨ੍ਤਿਪਿ, ‘‘ਪਚ੍ਚੁਪ੍ਪਨ੍ਨ’’ਨ੍ਤਿਪਿ. ਨਿਰੋਧਸਚ੍ਚਂ ਅਨਾਰਮ੍ਮਣਂ. ਮਗ੍ਗਸਚ੍ਚਂ ਨ ਵਤ੍ਤਬ੍ਬਂ – ‘‘ਅਤੀਤਾਰਮ੍ਮਣ’’ਨ੍ਤਿਪਿ, ‘‘ਅਨਾਗਤਾਰਮ੍ਮਣ’’ਨ੍ਤਿਪਿ, ‘‘ਪਚ੍ਚੁਪ੍ਪਨ੍ਨਾਰਮ੍ਮਣ’’ਨ੍ਤਿਪਿ. ਦ੍ਵੇ ਸਚ੍ਚਾ ਸਿਯਾ ਅਤੀਤਾਰਮ੍ਮਣਾ, ਸਿਯਾ ਅਨਾਗਤਾਰਮ੍ਮਣਾ, ਸਿਯਾ ਪਚ੍ਚੁਪ੍ਪਨ੍ਨਾਰਮ੍ਮਣਾ, ਸਿਯਾ ਨ ਵਤ੍ਤਬ੍ਬਾ – ‘‘ਅਤੀਤਾਰਮ੍ਮਣਾ’’ਤਿਪਿ, ‘‘ਅਨਾਗਤਾਰਮ੍ਮਣਾ’’ਤਿਪਿ, ‘‘ਪਚ੍ਚੁਪ੍ਪਨ੍ਨਾਰਮ੍ਮਣਾ’’ਤਿਪਿ. ਨਿਰੋਧਸਚ੍ਚਂ ਬਹਿਦ੍ਧਾ. ਤੀਣਿ ਸਚ੍ਚਾਨਿ ਸਿਯਾ ਅਜ੍ਝਤ੍ਤਾ, ਸਿਯਾ ਬਹਿਦ੍ਧਾ, ਸਿਯਾ ਅਜ੍ਝਤ੍ਤਬਹਿਦ੍ਧਾ. ਨਿਰੋਧਸਚ੍ਚਂ ਅਨਾਰਮ੍ਮਣਂ. ਮਗ੍ਗਸਚ੍ਚਂ ਬਹਿਦ੍ਧਾਰਮ੍ਮਣਂ. ਸਮੁਦਯਸਚ੍ਚਂ ਸਿਯਾ ਅਜ੍ਝਤ੍ਤਾਰਮ੍ਮਣਂ, ਸਿਯਾ ਬਹਿਦ੍ਧਾਰਮ੍ਮਣਂ, ਸਿਯਾ ਅਜ੍ਝਤ੍ਤਬਹਿਦ੍ਧਾਰਮ੍ਮਣਂ. ਦੁਕ੍ਖਸਚ੍ਚਂ ਸਿਯਾ ਅਜ੍ਝਤ੍ਤਾਰਮ੍ਮਣਂ, ਸਿਯਾ ਬਹਿਦ੍ਧਾਰਮ੍ਮਣਂ, ਸਿਯਾ ਅਜ੍ਝਤ੍ਤਬਹਿਦ੍ਧਾਰਮ੍ਮਣਂ, ਸਿਯਾ ਨ ਵਤ੍ਤਬ੍ਬਂ – ‘‘ਅਜ੍ਝਤ੍ਤਾਰਮ੍ਮਣ’’ਨ੍ਤਿਪਿ, ‘‘ਬਹਿਦ੍ਧਾਰਮ੍ਮਣ’’ਨ੍ਤਿਪਿ, ‘‘ਅਜ੍ਝਤ੍ਤਬਹਿਦ੍ਧਾਰਮ੍ਮਣ’’ਨ੍ਤਿਪਿ. ਤੀਣਿ ਸਚ੍ਚਾਨਿ ਅਨਿਦਸ੍ਸਨਅਪ੍ਪਟਿਘਾ. ਦੁਕ੍ਖਸਚ੍ਚਂ ਸਿਯਾ ਸਨਿਦਸ੍ਸਨਸਪ੍ਪਟਿਘਂ, ਸਿਯਾ ਅਨਿਦਸ੍ਸਨਸਪ੍ਪਟਿਘਂ, ਸਿਯਾ ਅਨਿਦਸ੍ਸਨਅਪ੍ਪਟਿਘਂ.

੨. ਦੁਕਂ

੨੧੮. ਸਮੁਦਯਸਚ੍ਚਂ ਹੇਤੁ. ਨਿਰੋਧਸਚ੍ਚਂ ਨ ਹੇਤੁ. ਦ੍ਵੇ ਸਚ੍ਚਾ ਸਿਯਾ ਹੇਤੂ, ਸਿਯਾ ਨ ਹੇਤੂ. ਦ੍ਵੇ ਸਚ੍ਚਾ ਸਹੇਤੁਕਾ. ਨਿਰੋਧਸਚ੍ਚਂ ਅਹੇਤੁਕਂ. ਦੁਕ੍ਖਸਚ੍ਚਂ ਸਿਯਾ ਸਹੇਤੁਕਂ, ਸਿਯਾ ਅਹੇਤੁਕਂ. ਦ੍ਵੇ ਸਚ੍ਚਾ ਹੇਤੁਸਮ੍ਪਯੁਤ੍ਤਾ. ਨਿਰੋਧਸਚ੍ਚਂ ਹੇਤੁਵਿਪ੍ਪਯੁਤ੍ਤਂ. ਦੁਕ੍ਖਸਚ੍ਚਂ ਸਿਯਾ ਹੇਤੁਸਮ੍ਪਯੁਤ੍ਤਂ, ਸਿਯਾ ਹੇਤੁਵਿਪ੍ਪਯੁਤ੍ਤਂ. ਸਮੁਦਯਸਚ੍ਚਂ ਹੇਤੁ ਚੇਵ ਸਹੇਤੁਕਞ੍ਚ. ਨਿਰੋਧਸਚ੍ਚਂ ਨ ਵਤ੍ਤਬ੍ਬਂ – ‘‘ਹੇਤੁ ਚੇਵ ਸਹੇਤੁਕਞ੍ਚਾ’’ਤਿਪਿ, ‘‘ਸਹੇਤੁਕਞ੍ਚੇਵ ਨ ਚ ਹੇਤੂ’’ਤਿਪਿ. ਮਗ੍ਗਸਚ੍ਚਂ ਸਿਯਾ ਹੇਤੁ ਚੇਵ ਸਹੇਤੁਕਞ੍ਚ, ਸਿਯਾ ਸਹੇਤੁਕਞ੍ਚੇਵ ਨ ਚ ਹੇਤੁ. ਦੁਕ੍ਖਸਚ੍ਚਂ ਸਿਯਾ ਹੇਤੁ ਚੇਵ ਸਹੇਤੁਕਞ੍ਚ, ਸਿਯਾ ਸਹੇਤੁਕਞ੍ਚੇਵ ਨ ਚ ਹੇਤੁ, ਸਿਯਾ ਨ ਵਤ੍ਤਬ੍ਬਂ – ‘‘ਹੇਤੁ ਚੇਵ ਸਹੇਤੁਕਞ੍ਚਾ’’ਤਿਪਿ, ‘‘ਸਹੇਤੁਕਞ੍ਚੇਵ ਨ ਚ ਹੇਤੂ’’ਤਿਪਿ. ਸਮੁਦਯਸਚ੍ਚਂ ਹੇਤੁ ਚੇਵ ਹੇਤੁਸਮ੍ਪਯੁਤ੍ਤਞ੍ਚ. ਨਿਰੋਧਸਚ੍ਚਂ ਨ ਵਤ੍ਤਬ੍ਬਂ – ‘‘ਹੇਤੁ ਚੇਵ ਹੇਤੁਸਮ੍ਪਯੁਤ੍ਤਞ੍ਚਾ’’ਤਿਪਿ, ‘‘ਹੇਤੁਸਮ੍ਪਯੁਤ੍ਤਞ੍ਚੇਵ ਨ ਚ ਹੇਤੂ’’ਤਿਪਿ. ਮਗ੍ਗਸਚ੍ਚਂ ਸਿਯਾ ਹੇਤੁ ਚੇਵ ਹੇਤੁਸਮ੍ਪਯੁਤ੍ਤਞ੍ਚ, ਸਿਯਾ ਹੇਤੁਸਮ੍ਪਯੁਤ੍ਤਞ੍ਚੇਵ ਨ ਚ ਹੇਤੁ. ਦੁਕ੍ਖਸਚ੍ਚਂ ਸਿਯਾ ਹੇਤੁ ਚੇਵ ਹੇਤੁਸਮ੍ਪਯੁਤ੍ਤਞ੍ਚ, ਸਿਯਾ ਹੇਤੁਸਮ੍ਪਯੁਤ੍ਤਞ੍ਚੇਵ ਨ ਚ ਹੇਤੁ, ਸਿਯਾ ਨ ਵਤ੍ਤਬ੍ਬਂ – ‘‘ਹੇਤੁ ਚੇਵ ਹੇਤੁਸਮ੍ਪਯੁਤ੍ਤਞ੍ਚਾ’’ਤਿਪਿ, ‘‘ਹੇਤੁਸਮ੍ਪਯੁਤ੍ਤਞ੍ਚੇਵ ਨ ਚ ਹੇਤੂ’’ਤਿਪਿ. ਨਿਰੋਧਸਚ੍ਚਂ ਨ ਹੇਤੁਅਹੇਤੁਕਂ. ਸਮੁਦਯਸਚ੍ਚਂ ਨ ਵਤ੍ਤਬ੍ਬਂ – ‘‘ਨ ਹੇਤੁਸਹੇਤੁਕ’’ਨ੍ਤਿਪਿ, ‘‘ਨ ਹੇਤੁਅਹੇਤੁਕ’’ਨ੍ਤਿਪਿ. ਮਗ੍ਗਸਚ੍ਚਂ ਸਿਯਾ ਨ ਹੇਤੁਸਹੇਤੁਕਂ, ਸਿਯਾ ਨ ਵਤ੍ਤਬ੍ਬਂ – ‘‘ਨ ਹੇਤੁਸਹੇਤੁਕ’’ਨ੍ਤਿਪਿ, ‘‘ਨ ਹੇਤੁਅਹੇਤੁਕ’’ਨ੍ਤਿਪਿ. ਦੁਕ੍ਖਸਚ੍ਚਂ ਸਿਯਾ ਨ ਹੇਤੁਸਹੇਤੁਕਂ, ਸਿਯਾ ਨ ਹੇਤੁਅਹੇਤੁਕਂ, ਸਿਯਾ ਨ ਵਤ੍ਤਬ੍ਬਂ – ‘‘ਨ ਹੇਤੁਸਹੇਤੁਕ’’ਨ੍ਤਿਪਿ, ‘‘ਨ ਹੇਤੁਅਹੇਤੁਕ’’ਨ੍ਤਿਪਿ.

ਤੀਣਿ ਸਚ੍ਚਾਨਿ ਸਪ੍ਪਚ੍ਚਯਾ. ਨਿਰੋਧਸਚ੍ਚਂ ਅਪ੍ਪਚ੍ਚਯਂ. ਤੀਣਿ ਸਚ੍ਚਾਨਿ ਸਙ੍ਖਤਾ. ਨਿਰੋਧਸਚ੍ਚਂ ਅਸਙ੍ਖਤਂ. ਤੀਣਿ ਸਚ੍ਚਾਨਿ ਅਨਿਦਸ੍ਸਨਾ. ਦੁਕ੍ਖਸਚ੍ਚਂ ਸਿਯਾ ਸਨਿਦਸ੍ਸਨਂ, ਸਿਯਾ ਅਨਿਦਸ੍ਸਨਂ. ਤੀਣਿ ਸਚ੍ਚਾਨਿ ਅਪ੍ਪਟਿਘਾ. ਦੁਕ੍ਖਸਚ੍ਚਂ ਸਿਯਾ ਸਪ੍ਪਟਿਘਂ, ਸਿਯਾ ਅਪ੍ਪਟਿਘਂ. ਤੀਣਿ ਸਚ੍ਚਾਨਿ ਅਰੂਪਾਨਿ. ਦੁਕ੍ਖਸਚ੍ਚਂ ਸਿਯਾ ਰੂਪਂ, ਸਿਯਾ ਅਰੂਪਂ. ਦ੍ਵੇ ਸਚ੍ਚਾ ਲੋਕਿਯਾ. ਦ੍ਵੇ ਸਚ੍ਚਾ ਲੋਕੁਤ੍ਤਰਾ; ਕੇਨਚਿ ਵਿਞ੍ਞੇਯ੍ਯਾ, ਕੇਨਚਿ ਨ ਵਿਞ੍ਞੇਯ੍ਯਾ.

ਸਮੁਦਯਸਚ੍ਚਂ ਆਸਵੋ. ਦ੍ਵੇ ਸਚ੍ਚਾ ਨੋ ਆਸਵਾ. ਦੁਕ੍ਖਸਚ੍ਚਂ ਸਿਯਾ ਆਸਵੋ, ਸਿਯਾ ਨੋ ਆਸਵੋ. ਦ੍ਵੇ ਸਚ੍ਚਾ ਸਾਸਵਾ. ਦ੍ਵੇ ਸਚ੍ਚਾ ਅਨਾਸਵਾ. ਸਮੁਦਯਸਚ੍ਚਂ ਆਸਵਸਮ੍ਪਯੁਤ੍ਤਂ. ਦ੍ਵੇ ਸਚ੍ਚਾ ਆਸਵਵਿਪ੍ਪਯੁਤ੍ਤਾ. ਦੁਕ੍ਖਸਚ੍ਚਂ ਸਿਯਾ ਆਸਵਸਮ੍ਪਯੁਤ੍ਤਂ, ਸਿਯਾ ਆਸਵਵਿਪ੍ਪਯੁਤ੍ਤਂ. ਸਮੁਦਯਸਚ੍ਚਂ ਆਸਵੋ ਚੇਵ ਸਾਸਵਞ੍ਚ. ਦ੍ਵੇ ਸਚ੍ਚਾ ਨ ਵਤ੍ਤਬ੍ਬਾ – ‘‘ਆਸਵਾ ਚੇਵ ਸਾਸਵਾ ਚਾ’’ਤਿਪਿ, ‘‘ਸਾਸਵਾ ਚੇਵ ਨੋ ਚ ਆਸਵਾ’’ਤਿਪਿ. ਦੁਕ੍ਖਸਚ੍ਚਂ ਸਿਯਾ ਆਸਵੋ ਚੇਵ ਸਾਸਵਞ੍ਚ, ਸਿਯਾ ਸਾਸਵਞ੍ਚੇਵ ਨੋ ਚ ਆਸਵੋ. ਸਮੁਦਯਸਚ੍ਚਂ ਆਸਵੋ ਚੇਵ ਆਸਵਸਮ੍ਪਯੁਤ੍ਤਞ੍ਚ. ਦ੍ਵੇ ਸਚ੍ਚਾ ਨ ਵਤ੍ਤਬ੍ਬਾ – ‘‘ਆਸਵਾ ਚੇਵ ਆਸਵਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਆਸਵਸਮ੍ਪਯੁਤ੍ਤਾ ਚੇਵ ਨੋ ਚ ਆਸਵਾ’’ਤਿਪਿ. ਦੁਕ੍ਖਸਚ੍ਚਂ ਸਿਯਾ ਆਸਵੋ ਚੇਵ ਆਸਵਸਮ੍ਪਯੁਤ੍ਤਞ੍ਚ, ਸਿਯਾ ਆਸਵਸਮ੍ਪਯੁਤ੍ਤਞ੍ਚੇਵ ਨੋ ਚ ਆਸਵੋ, ਸਿਯਾ ਨ ਵਤ੍ਤਬ੍ਬਂ – ‘‘ਆਸਵੋ ਚੇਵ ਆਸਵਸਮ੍ਪਯੁਤ੍ਤਞ੍ਚਾ’’ਤਿਪਿ, ‘‘ਆਸਵਸਮ੍ਪਯੁਤ੍ਤਞ੍ਚੇਵ ਨੋ ਚ ਆਸਵੋ’’ਤਿਪਿ. ਦ੍ਵੇ ਸਚ੍ਚਾ ਆਸਵਵਿਪ੍ਪਯੁਤ੍ਤਅਨਾਸਵਾ. ਸਮੁਦਯਸਚ੍ਚਂ ਨ ਵਤ੍ਤਬ੍ਬਂ – ‘‘ਆਸਵਵਿਪ੍ਪਯੁਤ੍ਤਸਾਸਵ’’ਨ੍ਤਿਪਿ, ‘‘ਆਸਵਵਿਪ੍ਪਯੁਤ੍ਤਅਨਾਸਵ’’ਨ੍ਤਿਪਿ. ਦੁਕ੍ਖਸਚ੍ਚਂ ਸਿਯਾ ਆਸਵਵਿਪ੍ਪਯੁਤ੍ਤਸਾਸਵਂ, ਸਿਯਾ ਨ ਵਤ੍ਤਬ੍ਬਂ – ‘‘ਆਸਵਵਿਪ੍ਪਯੁਤ੍ਤਸਾਸਵ’’ਨ੍ਤਿਪਿ, ‘‘ਆਸਵਵਿਪ੍ਪਯੁਤ੍ਤਅਨਾਸਵ’’ਨ੍ਤਿਪਿ.

ਸਮੁਦਯਸਚ੍ਚਂ ਸਂਯੋਜਨਂ. ਦ੍ਵੇ ਸਚ੍ਚਾ ਨੋ ਸਂਯੋਜਨਾ. ਦੁਕ੍ਖਸਚ੍ਚਂ ਸਿਯਾ ਸਂਯੋਜਨਂ, ਸਿਯਾ ਨੋ ਸਂਯੋਜਨਂ. ਦ੍ਵੇ ਸਚ੍ਚਾ ਸਂਯੋਜਨਿਯਾ. ਦ੍ਵੇ ਸਚ੍ਚਾ ਅਸਂਯੋਜਨਿਯਾ. ਸਮੁਦਯਸਚ੍ਚਂ ਸਂਯੋਜਨਸਮ੍ਪਯੁਤ੍ਤਂ. ਦ੍ਵੇ ਸਚ੍ਚਾ ਸਂਯੋਜਨਵਿਪ੍ਪਯੁਤ੍ਤਾ. ਦੁਕ੍ਖਸਚ੍ਚਂ ਸਿਯਾ ਸਂਯੋਜਨਸਮ੍ਪਯੁਤ੍ਤਂ, ਸਿਯਾ ਸਂਯੋਜਨਵਿਪ੍ਪਯੁਤ੍ਤਂ. ਸਮੁਦਯਸਚ੍ਚਂ ਸਂਯੋਜਨਞ੍ਚੇਵ ਸਂਯੋਜਨਿਯਞ੍ਚ. ਦ੍ਵੇ ਸਚ੍ਚਾ ਨ ਵਤ੍ਤਬ੍ਬਾ – ‘‘ਸਂਯੋਜਨਾ ਚੇਵ ਸਂਯੋਜਨਿਯਾ ਚਾ’’ਤਿਪਿ, ‘‘ਸਂਯੋਜਨਿਯਾ ਚੇਵ ਨੋ ਚ ਸਂਯੋਜਨਾ’’ਤਿਪਿ. ਦੁਕ੍ਖਸਚ੍ਚਂ ਸਿਯਾ ਸਂਯੋਜਨਞ੍ਚੇਵ ਸਂਯੋਜਨਿਯਞ੍ਚ, ਸਿਯਾ ਸਂਯੋਜਨਿਯਞ੍ਚੇਵ ਨੋ ਚ ਸਂਯੋਜਨਂ. ਸਮੁਦਯਸਚ੍ਚਂ ਸਂਯੋਜਨਞ੍ਚੇਵ ਸਂਯੋਜਨਸਮ੍ਪਯੁਤ੍ਤਞ੍ਚ. ਦ੍ਵੇ ਸਚ੍ਚਾ ਨ ਵਤ੍ਤਬ੍ਬਾ – ‘‘ਸਂਯੋਜਨਾ ਚੇਵ ਸਂਯੋਜਨਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਸਂਯੋਜਨਸਮ੍ਪਯੁਤ੍ਤਾ ਚੇਵ ਨੋ ਚ ਸਂਯੋਜਨਾ’’ਤਿਪਿ. ਦੁਕ੍ਖਸਚ੍ਚਂ ਸਿਯਾ ਸਂਯੋਜਨਞ੍ਚੇਵ ਸਂਯੋਜਨਸਮ੍ਪਯੁਤ੍ਤਞ੍ਚ, ਸਿਯਾ ਸਂਯੋਜਨਸਮ੍ਪਯੁਤ੍ਤਞ੍ਚੇਵ ਨੋ ਚ ਸਂਯੋਜਨਂ, ਸਿਯਾ ਨ ਵਤ੍ਤਬ੍ਬਂ – ‘‘ਸਂਯੋਜਨਞ੍ਚੇਵ ਸਂਯੋਜਨਸਮ੍ਪਯੁਤ੍ਤਞ੍ਚਾ’’ਤਿਪਿ, ‘‘ਸਂਯੋਜਨਸਮ੍ਪਯੁਤ੍ਤਞ੍ਚੇਵ ਨੋ ਚ ਸਂਯੋਜਨ’’ਨ੍ਤਿਪਿ. ਦ੍ਵੇ ਸਚ੍ਚਾ ਸਂਯੋਜਨਵਿਪ੍ਪਯੁਤ੍ਤਅਸਂਯੋਜਨਿਯਾ. ਸਮੁਦਯਸਚ੍ਚਂ ਨ ਵਤ੍ਤਬ੍ਬਂ – ‘‘ਸਂਯੋਜਨਵਿਪ੍ਪਯੁਤ੍ਤਸਂਯੋਜਨਿਯ’’ਨ੍ਤਿਪਿ, ‘‘ਸਂਯੋਜਨਵਿਪ੍ਪਯੁਤ੍ਤਅਸਂਯੋਜਨਿਯ’’ਨ੍ਤਿਪਿ. ਦੁਕ੍ਖਸਚ੍ਚਂ ਸਿਯਾ ਸਂਯੋਜਨਵਿਪ੍ਪਯੁਤ੍ਤਸਂਯੋਜਨਿਯਂ, ਸਿਯਾ ਨ ਵਤ੍ਤਬ੍ਬਂ – ‘‘ਸਂਯੋਜਨਵਿਪ੍ਪਯੁਤ੍ਤਸਂਯੋਜਨਿਯ’’ਨ੍ਤਿਪਿ, ‘‘ਸਂਯੋਜਨਵਿਪ੍ਪਯੁਤ੍ਤਅਸਂਯੋਜਨਿਯ’’ਨ੍ਤਿਪਿ.

ਸਮੁਦਯਸਚ੍ਚਂ ਗਨ੍ਥੋ. ਦ੍ਵੇ ਸਚ੍ਚਾ ਨੋ ਗਨ੍ਥਾ. ਦੁਕ੍ਖਸਚ੍ਚਂ ਸਿਯਾ ਗਨ੍ਥੋ, ਸਿਯਾ ਨੋ ਗਨ੍ਥੋ. ਦ੍ਵੇ ਸਚ੍ਚਾ ਗਨ੍ਥਨਿਯਾ. ਦ੍ਵੇ ਸਚ੍ਚਾ ਅਗਨ੍ਥਨਿਯਾ. ਦ੍ਵੇ ਸਚ੍ਚਾ ਗਨ੍ਥਵਿਪ੍ਪਯੁਤ੍ਤਾ. ਦ੍ਵੇ ਸਚ੍ਚਾ ਸਿਯਾ ਗਨ੍ਥਸਮ੍ਪਯੁਤ੍ਤਾ, ਸਿਯਾ ਗਨ੍ਥਵਿਪ੍ਪਯੁਤ੍ਤਾ. ਸਮੁਦਯਸਚ੍ਚਂ ਗਨ੍ਥੋ ਚੇਵ ਗਨ੍ਥਨਿਯਞ੍ਚ. ਦ੍ਵੇ ਸਚ੍ਚਾ ਨ ਵਤ੍ਤਬ੍ਬਾ – ‘‘ਗਨ੍ਥਾ ਚੇਵ ਗਨ੍ਥਨਿਯਾ ਚਾ’’ਤਿਪਿ, ‘‘ਗਨ੍ਥਨਿਯਾ ਚੇਵ ਨੋ ਚ ਗਨ੍ਥਾ’’ਤਿਪਿ. ਦੁਕ੍ਖਸਚ੍ਚਂ ਸਿਯਾ ਗਨ੍ਥੋ ਚੇਵ ਗਨ੍ਥਨਿਯਞ੍ਚ, ਸਿਯਾ ਗਨ੍ਥਨਿਯਞ੍ਚੇਵ ਨੋ ਚ ਗਨ੍ਥੋ. ਸਮੁਦਯਸਚ੍ਚਂ ਗਨ੍ਥੋ ਚੇਵ ਗਨ੍ਥਸਮ੍ਪਯੁਤ੍ਤਞ੍ਚ, ਸਿਯਾ ਨ ਵਤ੍ਤਬ੍ਬਂ – ‘‘ਗਨ੍ਥੋ ਚੇਵ ਗਨ੍ਥਸਮ੍ਪਯੁਤ੍ਤਞ੍ਚਾ’’ਤਿਪਿ, ‘‘ਗਨ੍ਥਸਮ੍ਪਯੁਤ੍ਤਞ੍ਚੇਵ ਨੋ ਚ ਗਨ੍ਥੋ’’ਤਿਪਿ. ਦ੍ਵੇ ਸਚ੍ਚਾ ਨ ਵਤ੍ਤਬ੍ਬਾ – ‘‘ਗਨ੍ਥਾ ਚੇਵ ਗਨ੍ਥਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਗਨ੍ਥਸਮ੍ਪਯੁਤ੍ਤਾ ਚੇਵ ਨੋ ਚ ਗਨ੍ਥਾ’’ਤਿਪਿ. ਦੁਕ੍ਖਸਚ੍ਚਂ ਸਿਯਾ ਗਨ੍ਥੋ ਚੇਵ ਗਨ੍ਥਸਮ੍ਪਯੁਤ੍ਤਞ੍ਚ, ਸਿਯਾ ਗਨ੍ਥਸਮ੍ਪਯੁਤ੍ਤਞ੍ਚੇਵ ਨੋ ਚ ਗਨ੍ਥੋ, ਸਿਯਾ ਨ ਵਤ੍ਤਬ੍ਬਂ – ‘‘ਗਨ੍ਥੋ ਚੇਵ ਗਨ੍ਥਸਮ੍ਪਯੁਤ੍ਤਞ੍ਚਾ’’ਤਿਪਿ, ‘‘ਗਨ੍ਥਸਮ੍ਪਯੁਤ੍ਤਞ੍ਚੇਵ ਨੋ ਚ ਗਨ੍ਥੋ’’ਤਿਪਿ. ਦ੍ਵੇ ਸਚ੍ਚਾ ਗਨ੍ਥਵਿਪ੍ਪਯੁਤ੍ਤਅਗਨ੍ਥਨਿਯਾ. ਦ੍ਵੇ ਸਚ੍ਚਾ ਸਿਯਾ ਗਨ੍ਥਵਿਪ੍ਪਯੁਤ੍ਤਗਨ੍ਥਨਿਯਾ, ਸਿਯਾ ਨ ਵਤ੍ਤਬ੍ਬਾ – ‘‘ਗਨ੍ਥਵਿਪ੍ਪਯੁਤ੍ਤਗਨ੍ਥਨਿਯਾ’’ਤਿਪਿ, ‘‘ਗਨ੍ਥਵਿਪ੍ਪਯੁਤ੍ਤਅਗਨ੍ਥਨਿਯਾ’’ਤਿਪਿ.

ਸਮੁਦਯਸਚ੍ਚਂ ਓਘੋ…ਪੇ… ਯੋਗੋ…ਪੇ… ਨੀਵਰਣਂ. ਦ੍ਵੇ ਸਚ੍ਚਾ ਨੋ ਨੀਵਰਣਾ. ਦੁਕ੍ਖਸਚ੍ਚਂ ਸਿਯਾ ਨੀਵਰਣਂ, ਸਿਯਾ ਨੋ ਨੀਵਰਣਂ. ਦ੍ਵੇ ਸਚ੍ਚਾ ਨੀਵਰਣਿਯਾ ਦ੍ਵੇ ਸਚ੍ਚਾ ਅਨੀਵਰਣਿਯਾ. ਸਮੁਦਯਸਚ੍ਚਂ ਨੀਵਰਣਸਮ੍ਪਯੁਤ੍ਤਂ. ਦ੍ਵੇ ਸਚ੍ਚਾ ਨੀਵਰਣਵਿਪ੍ਪਯੁਤ੍ਤਾ. ਦੁਕ੍ਖਸਚ੍ਚਂ ਸਿਯਾ ਨੀਵਰਣਸਮ੍ਪਯੁਤ੍ਤਂ, ਸਿਯਾ ਨੀਵਰਣਵਿਪ੍ਪਯੁਤ੍ਤਂ. ਸਮੁਦਯਸਚ੍ਚਂ ਨੀਵਰਣਞ੍ਚੇਵ ਨੀਵਰਣਿਯਞ੍ਚ. ਦ੍ਵੇ ਸਚ੍ਚਾ ਨ ਵਤ੍ਤਬ੍ਬਾ – ‘‘ਨੀਵਰਣਾ ਚੇਵ ਨੀਵਰਣਿਯਾ ਚਾ’’ਤਿਪਿ, ‘‘ਨੀਵਰਣਿਯਾ ਚੇਵ ਨੋ ਚ ਨੀਵਰਣਾ’’ਤਿਪਿ. ਦੁਕ੍ਖਸਚ੍ਚਂ ਸਿਯਾ ਨੀਵਰਣਞ੍ਚੇਵ ਨੀਵਰਣਿਯਞ੍ਚ, ਸਿਯਾ ਨੀਵਰਣਿਯਞ੍ਚੇਵ ਨੋ ਚ ਨੀਵਰਣਂ. ਸਮੁਦਯਸਚ੍ਚਂ ਨੀਵਰਣਞ੍ਚੇਵ ਨੀਵਰਣਸਮ੍ਪਯੁਤ੍ਤਞ੍ਚ. ਦ੍ਵੇ ਸਚ੍ਚਾ ਨ ਵਤ੍ਤਬ੍ਬਾ – ‘‘ਨੀਵਰਣਾ ਚੇਵ ਨੀਵਰਣਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਨੀਵਰਣਸਮ੍ਪਯੁਤ੍ਤਾ ਚੇਵ ਨੋ ਚ ਨੀਵਰਣਾ’’ਤਿਪਿ. ਦੁਕ੍ਖਸਚ੍ਚਂ ਸਿਯਾ ਨੀਵਰਣਞ੍ਚੇਵ ਨੀਵਰਣਸਮ੍ਪਯੁਤ੍ਤਞ੍ਚ, ਸਿਯਾ ਨੀਵਰਣਸਮ੍ਪਯੁਤ੍ਤਞ੍ਚੇਵ ਨੋ ਚ ਨੀਵਰਣਂ, ਸਿਯਾ ਨ ਵਤ੍ਤਬ੍ਬਂ – ‘‘ਨੀਵਰਣਞ੍ਚੇਵ ਨੀਵਰਣਸਮ੍ਪਯੁਤ੍ਤਞ੍ਚਾ’’ਤਿਪਿ, ‘‘ਨੀਵਰਣਸਮ੍ਪਯੁਤ੍ਤਞ੍ਚੇਵ ਨੋ ਚ ਨੀਵਰਣ’’ਨ੍ਤਿਪਿ. ਦ੍ਵੇ ਸਚ੍ਚਾ ਨੀਵਰਣਵਿਪ੍ਪਯੁਤ੍ਤਅਨੀਵਰਣਿਯਾ. ਸਮੁਦਯਸਚ੍ਚਂ ਨ ਵਤ੍ਤਬ੍ਬਂ – ‘‘ਨੀਵਰਣਵਿਪ੍ਪਯੁਤ੍ਤਨੀਵਰਣਿਯ’’ਨ੍ਤਿਪਿ, ‘‘ਨੀਵਰਣਵਿਪ੍ਪਯੁਤ੍ਤਅਨੀਵਰਣਿਯ’’ਨ੍ਤਿਪਿ. ਦੁਕ੍ਖਸਚ੍ਚਂ ਸਿਯਾ ਨੀਵਰਣਵਿਪ੍ਪਯੁਤ੍ਤਨੀਵਰਣਿਯਂ, ਸਿਯਾ ਨ ਵਤ੍ਤਬ੍ਬਂ – ‘‘ਨੀਵਰਣਵਿਪ੍ਪਯੁਤ੍ਤਨੀਵਰਣਿਯ’’ਨ੍ਤਿਪਿ, ‘‘ਨੀਵਰਣਵਿਪ੍ਪਯੁਤ੍ਤਅਨੀਵਰਣਿਯ’’ਨ੍ਤਿਪਿ.

ਤੀਣਿ ਸਚ੍ਚਾਨਿ ਨੋ ਪਰਾਮਾਸਾ. ਦੁਕ੍ਖਸਚ੍ਚਂ ਸਿਯਾ ਪਰਾਮਾਸੋ, ਸਿਯਾ ਨੋ ਪਰਾਮਾਸੋ. ਦ੍ਵੇ ਸਚ੍ਚਾ ਪਰਾਮਟ੍ਠਾ. ਦ੍ਵੇ ਸਚ੍ਚਾ ਅਪਰਾਮਟ੍ਠਾ. ਦ੍ਵੇ ਸਚ੍ਚਾ ਪਰਾਮਾਸਵਿਪ੍ਪਯੁਤ੍ਤਾ. ਸਮੁਦਯਸਚ੍ਚਂ ਸਿਯਾ ਪਰਾਮਾਸਸਮ੍ਪਯੁਤ੍ਤਂ, ਸਿਯਾ ਪਰਾਮਾਸਵਿਪ੍ਪਯੁਤ੍ਤਂ. ਦੁਕ੍ਖਸਚ੍ਚਂ ਸਿਯਾ ਪਰਾਮਾਸਸਮ੍ਪਯੁਤ੍ਤਂ, ਸਿਯਾ ਪਰਾਮਾਸਵਿਪ੍ਪਯੁਤ੍ਤਂ, ਸਿਯਾ ਨ ਵਤ੍ਤਬ੍ਬਂ – ‘‘ਪਰਾਮਾਸਸਮ੍ਪਯੁਤ੍ਤ’’ਨ੍ਤਿਪਿ, ‘‘ਪਰਾਮਾਸਵਿਪ੍ਪਯੁਤ੍ਤ’’ਨ੍ਤਿਪਿ. ਸਮੁਦਯਸਚ੍ਚਂ ਨ ਵਤ੍ਤਬ੍ਬਂ – ‘‘ਪਰਾਮਾਸੋ ਚੇਵ ਪਰਾਮਟ੍ਠਞ੍ਚਾ’’ਤਿ, ਪਰਾਮਟ੍ਠਞ੍ਚੇਵ ਨੋ ਚ ਪਰਾਮਾਸੋ. ਦ੍ਵੇ ਸਚ੍ਚਾ ਨ ਵਤ੍ਤਬ੍ਬਾ – ‘‘ਪਰਾਮਾਸਾ ਚੇਵ ਪਰਾਮਟ੍ਠਾ ਚਾ’’ਤਿਪਿ, ‘‘ਪਰਾਮਟ੍ਠਾ ਚੇਵ ਨੋ ਚ ਪਰਾਮਾਸਾ’’ਤਿਪਿ. ਦੁਕ੍ਖਸਚ੍ਚਂ ਸਿਯਾ ਪਰਾਮਾਸੋ ਚੇਵ ਪਰਾਮਟ੍ਠਞ੍ਚ, ਸਿਯਾ ਪਰਾਮਟ੍ਠਞ੍ਚੇਵ ਨੋ ਚ ਪਰਾਮਾਸੋ. ਦ੍ਵੇ ਸਚ੍ਚਾ ਪਰਾਮਾਸਵਿਪ੍ਪਯੁਤ੍ਤਅਪਰਾਮਟ੍ਠਾ. ਦ੍ਵੇ ਸਚ੍ਚਾ ਸਿਯਾ ਪਰਾਮਾਸਵਿਪ੍ਪਯੁਤ੍ਤਪਰਾਮਟ੍ਠਾ, ਸਿਯਾ ਨ ਵਤ੍ਤਬ੍ਬਾ – ‘‘ਪਰਾਮਾਸਵਿਪ੍ਪਯੁਤ੍ਤਪਰਾਮਟ੍ਠਾ’’ਤਿਪਿ, ‘‘ਪਰਾਮਾਸਵਿਪ੍ਪਯੁਤ੍ਤਅਪਰਾਮਟ੍ਠਾ’’ਤਿਪਿ.

ਦ੍ਵੇ ਸਚ੍ਚਾ ਸਾਰਮ੍ਮਣਾ. ਨਿਰੋਧਸਚ੍ਚਂ ਅਨਾਰਮ੍ਮਣਂ. ਦੁਕ੍ਖਸਚ੍ਚਂ ਸਿਯਾ ਸਾਰਮ੍ਮਣਂ, ਸਿਯਾ ਅਨਾਰਮ੍ਮਣਂ. ਤੀਣਿ ਸਚ੍ਚਾਨਿ ਨੋ ਚਿਤ੍ਤਾ. ਦੁਕ੍ਖਸਚ੍ਚਂ ਸਿਯਾ ਚਿਤ੍ਤਂ, ਸਿਯਾ ਨੋ ਚਿਤ੍ਤਂ. ਦ੍ਵੇ ਸਚ੍ਚਾ ਚੇਤਸਿਕਾ. ਨਿਰੋਧਸਚ੍ਚਂ ਅਚੇਤਸਿਕਂ. ਦੁਕ੍ਖਸਚ੍ਚਂ ਸਿਯਾ ਚੇਤਸਿਕਂ, ਸਿਯਾ ਅਚੇਤਸਿਕਂ. ਦ੍ਵੇ ਸਚ੍ਚਾ ਚਿਤ੍ਤਸਮ੍ਪਯੁਤ੍ਤਾ. ਨਿਰੋਧਸਚ੍ਚਂ ਚਿਤ੍ਤਵਿਪ੍ਪਯੁਤ੍ਤਂ. ਦੁਕ੍ਖਸਚ੍ਚਂ ਸਿਯਾ ਚਿਤ੍ਤਸਮ੍ਪਯੁਤ੍ਤਂ, ਸਿਯਾ ਚਿਤ੍ਤਵਿਪ੍ਪਯੁਤ੍ਤਂ, ਸਿਯਾ ਨ ਵਤ੍ਤਬ੍ਬਂ – ‘‘ਚਿਤ੍ਤੇਨ ਸਮ੍ਪਯੁਤ੍ਤ’’ਨ੍ਤਿਪਿ, ‘‘ਚਿਤ੍ਤੇਨ ਵਿਪ੍ਪਯੁਤ੍ਤ’’ਨ੍ਤਿਪਿ. ਦ੍ਵੇ ਸਚ੍ਚਾ ਚਿਤ੍ਤਸਂਸਟ੍ਠਾ. ਨਿਰੋਧਸਚ੍ਚਂ ਚਿਤ੍ਤਵਿਸਂਸਟ੍ਠਂ. ਦੁਕ੍ਖਸਚ੍ਚਂ ਸਿਯਾ ਚਿਤ੍ਤਸਂਸਟ੍ਠਂ, ਸਿਯਾ ਚਿਤ੍ਤਵਿਸਂਸਟ੍ਠਂ, ਸਿਯਾ ਨ ਵਤ੍ਤਬ੍ਬਂ – ‘‘ਚਿਤ੍ਤੇਨ ਸਂਸਟ੍ਠ’’ਨ੍ਤਿਪਿ, ‘‘ਚਿਤ੍ਤੇਨ ਵਿਸਂਸਟ੍ਠ’’ਨ੍ਤਿਪਿ. ਦ੍ਵੇ ਸਚ੍ਚਾ ਚਿਤ੍ਤਸਮੁਟ੍ਠਾਨਾ. ਨਿਰੋਧਸਚ੍ਚਂ ਨੋ ਚਿਤ੍ਤਸਮੁਟ੍ਠਾਨਂ. ਦੁਕ੍ਖਸਚ੍ਚਂ ਸਿਯਾ ਚਿਤ੍ਤਸਮੁਟ੍ਠਾਨਂ, ਸਿਯਾ ਨੋ ਚਿਤ੍ਤਸਮੁਟ੍ਠਾਨਂ. ਦ੍ਵੇ ਸਚ੍ਚਾ ਚਿਤ੍ਤਸਹਭੁਨੋ. ਨਿਰੋਧਸਚ੍ਚਂ ਨੋ ਚਿਤ੍ਤਸਹਭੂ. ਦੁਕ੍ਖਸਚ੍ਚਂ ਸਿਯਾ ਚਿਤ੍ਤਸਹਭੂ, ਸਿਯਾ ਨੋ ਚਿਤ੍ਤਸਹਭੂ. ਦ੍ਵੇ ਸਚ੍ਚਾ ਚਿਤ੍ਤਾਨੁਪਰਿਵਤ੍ਤਿਨੋ. ਨਿਰੋਧਸਚ੍ਚਂ ਨੋ ਚਿਤ੍ਤਾਨੁਪਰਿਵਤ੍ਤਿ. ਦੁਕ੍ਖਸਚ੍ਚਂ ਸਿਯਾ ਚਿਤ੍ਤਾਨੁਪਰਿਵਤ੍ਤਿ, ਸਿਯਾ ਨੋ ਚਿਤ੍ਤਾਨੁਪਰਿਵਤ੍ਤਿ. ਦ੍ਵੇ ਸਚ੍ਚਾ ਚਿਤ੍ਤਸਂਸਟ੍ਠਸਮੁਟ੍ਠਾਨਾ. ਨਿਰੋਧਸਚ੍ਚਂ ਨੋ ਚਿਤ੍ਤਸਂਸਟ੍ਠਸਮੁਟ੍ਠਾਨਂ. ਦੁਕ੍ਖਸਚ੍ਚਂ ਸਿਯਾ ਚਿਤ੍ਤਸਂਸਟ੍ਠਸਮੁਟ੍ਠਾਨਂ, ਸਿਯਾ ਨੋ ਚਿਤ੍ਤਸਂਸਟ੍ਠਸਮੁਟ੍ਠਾਨਂ. ਦ੍ਵੇ ਸਚ੍ਚਾ ਚਿਤ੍ਤਸਂਸਟ੍ਠਸਮੁਟ੍ਠਾਨਸਹਭੁਨੋ. ਨਿਰੋਧਸਚ੍ਚਂ ਨੋ ਚਿਤ੍ਤਸਂਸਟ੍ਠਸਮੁਟ੍ਠਾਨਸਹਭੂ. ਦੁਕ੍ਖਸਚ੍ਚਂ ਸਿਯਾ ਚਿਤ੍ਤਸਂਸਟ੍ਠਸਮੁਟ੍ਠਾਨਸਹਭੂ, ਸਿਯਾ ਨੋ ਚਿਤ੍ਤਸਂਸਟ੍ਠਸਮੁਟ੍ਠਾਨਸਹਭੂ. ਦ੍ਵੇ ਸਚ੍ਚਾ ਚਿਤ੍ਤਸਂਸਟ੍ਠਸਮੁਟ੍ਠਾਨਾਨੁਪਰਿਵਤ੍ਤਿਨੋ. ਨਿਰੋਧਸਚ੍ਚਂ ਨੋ ਚਿਤ੍ਤਸਂਸਟ੍ਠਸਮੁਟ੍ਠਾਨਾਨੁਪਰਿਵਤ੍ਤਿ. ਦੁਕ੍ਖਸਚ੍ਚਂ ਸਿਯਾ ਚਿਤ੍ਤਸਂਸਟ੍ਠਸਮੁਟ੍ਠਾਨਾਨੁਪਰਿਵਤ੍ਤਿ, ਸਿਯਾ ਨੋ ਚਿਤ੍ਤਸਂਸਟ੍ਠਸਮੁਟ੍ਠਾਨਾਨੁਪਰਿਵਤ੍ਤਿ. ਤੀਣਿ ਸਚ੍ਚਾਨਿ ਬਾਹਿਰਾ. ਦੁਕ੍ਖਸਚ੍ਚਂ ਸਿਯਾ ਅਜ੍ਝਤ੍ਤਂ, ਸਿਯਾ ਬਾਹਿਰਂ.

ਤੀਣਿ ਸਚ੍ਚਾਨਿ ਨੋ ਉਪਾਦਾ. ਦੁਕ੍ਖਸਚ੍ਚਂ ਸਿਯਾ ਉਪਾਦਾ, ਸਿਯਾ ਨੋ ਉਪਾਦਾ. ਤੀਣਿ ਸਚ੍ਚਾਨਿ ਅਨੁਪਾਦਿਨ੍ਨਾ. ਦੁਕ੍ਖਸਚ੍ਚਂ ਸਿਯਾ ਉਪਾਦਿਨ੍ਨਂ, ਸਿਯਾ ਅਨੁਪਾਦਿਨ੍ਨਂ. ਸਮੁਦਯਸਚ੍ਚਂ ਉਪਾਦਾਨਂ. ਦ੍ਵੇ ਸਚ੍ਚਾ ਨੋ ਉਪਾਦਾਨਾ. ਦੁਕ੍ਖਸਚ੍ਚਂ ਸਿਯਾ ਉਪਾਦਾਨਂ, ਸਿਯਾ ਨੋ ਉਪਾਦਾਨਂ. ਦ੍ਵੇ ਸਚ੍ਚਾ ਉਪਾਦਾਨਿਯਾ. ਦ੍ਵੇ ਸਚ੍ਚਾ ਅਨੁਪਾਦਾਨਿਯਾ. ਦ੍ਵੇ ਸਚ੍ਚਾ ਉਪਾਦਾਨਵਿਪ੍ਪਯੁਤ੍ਤਾ. ਦ੍ਵੇ ਸਚ੍ਚਾ ਸਿਯਾ ਉਪਾਦਾਨਸਮ੍ਪਯੁਤ੍ਤਾ, ਸਿਯਾ ਉਪਾਦਾਨਵਿਪ੍ਪਯੁਤ੍ਤਾ. ਸਮੁਦਯਸਚ੍ਚਂ ਉਪਾਦਾਨਞ੍ਚੇਵ ਉਪਾਦਾਨਿਯਞ੍ਚ. ਦ੍ਵੇ ਸਚ੍ਚਾ ਨ ਵਤ੍ਤਬ੍ਬਾ – ‘‘ਉਪਾਦਾਨਾ ਚੇਵ ਉਪਾਦਾਨਿਯਾ ਚਾ’’ਤਿਪਿ, ‘‘ਉਪਾਦਾਨਿਯਾ ਚੇਵ ਨੋ ਚ ਉਪਾਦਾਨਾ’’ਤਿਪਿ. ਦੁਕ੍ਖਸਚ੍ਚਂ ਸਿਯਾ ਉਪਾਦਾਨਞ੍ਚੇਵ ਉਪਾਦਾਨਿਯਞ੍ਚ, ਸਿਯਾ ਉਪਾਦਾਨਿਯਞ੍ਚੇਵ ਨੋ ਚ ਉਪਾਦਾਨਂ. ਸਮੁਦਯਸਚ੍ਚਂ ਸਿਯਾ ਉਪਾਦਾਨਞ੍ਚੇਵ ਉਪਾਦਾਨਸਮ੍ਪਯੁਤ੍ਤਞ੍ਚ, ਸਿਯਾ ਨ ਵਤ੍ਤਬ੍ਬਂ – ‘‘ਉਪਾਦਾਨਞ੍ਚੇਵ ਉਪਾਦਾਨਸਮ੍ਪਯੁਤ੍ਤਞ੍ਚਾ’’ਤਿਪਿ, ‘‘ਉਪਾਦਾਨਸਮ੍ਪਯੁਤ੍ਤਞ੍ਚੇਵ ਨੋ ਚ ਉਪਾਦਾਨ’’ਨ੍ਤਿਪਿ. ਦ੍ਵੇ ਸਚ੍ਚਾ ਨ ਵਤ੍ਤਬ੍ਬਾ – ‘‘ਉਪਾਦਾਨਾ ਚੇਵ ਉਪਾਦਾਨਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਉਪਾਦਾਨਸਮ੍ਪਯੁਤ੍ਤਾ ਚੇਵ ਨੋ ਚ ਉਪਾਦਾਨਾ’’ਤਿਪਿ. ਦੁਕ੍ਖਸਚ੍ਚਂ ਸਿਯਾ ਉਪਾਦਾਨਞ੍ਚੇਵ ਉਪਾਦਾਨਸਮ੍ਪਯੁਤ੍ਤਞ੍ਚ, ਸਿਯਾ ਉਪਾਦਾਨਸਮ੍ਪਯੁਤ੍ਤਞ੍ਚੇਵ ਨੋ ਚ ਉਪਾਦਾਨਂ, ਸਿਯਾ ਨ ਵਤ੍ਤਬ੍ਬਂ – ‘‘ਉਪਾਦਾਨਞ੍ਚੇਵ ਉਪਾਦਾਨਸਮ੍ਪਯੁਤ੍ਤਞ੍ਚਾ’’ ਤਿਪਿ, ‘‘ਉਪਾਦਾਨਸਮ੍ਪਯੁਤ੍ਤਞ੍ਚੇਵ ਨੋ ਚ ਉਪਾਦਾਨ’’ਨ੍ਤਿਪਿ. ਦ੍ਵੇ ਸਚ੍ਚਾ ਉਪਾਦਾਨਵਿਪ੍ਪਯੁਤ੍ਤਅਨੁਪਾਦਾਨਿਯਾ. ਦ੍ਵੇ ਸਚ੍ਚਾ ਸਿਯਾ ਉਪਾਦਾਨਵਿਪ੍ਪਯੁਤ੍ਤਉਪਾਦਾਨਿਯਾ, ਸਿਯਾ ਨ ਵਤ੍ਤਬ੍ਬਾ – ‘‘ਉਪਾਦਾਨਵਿਪ੍ਪਯੁਤ੍ਤਉਪਾਦਾਨਿਯਾ’’ਤਿਪਿ, ‘‘ਉਪਾਦਾਨਵਿਪ੍ਪਯੁਤ੍ਤਅਨੁਪਾਦਾਨਿਯਾ’’ਤਿਪਿ.

ਸਮੁਦਯਸਚ੍ਚਂ ਕਿਲੇਸੋ. ਦ੍ਵੇ ਸਚ੍ਚਾ ਨੋ ਕਿਲੇਸਾ. ਦੁਕ੍ਖਸਚ੍ਚਂ ਸਿਯਾ ਕਿਲੇਸੋ, ਸਿਯਾ ਨੋ ਕਿਲੇਸੋ. ਦ੍ਵੇ ਸਚ੍ਚਾ ਸਂਕਿਲੇਸਿਕਾ. ਦ੍ਵੇ ਸਚ੍ਚਾ ਅਸਂਕਿਲੇਸਿਕਾ. ਸਮੁਦਯਸਚ੍ਚਂ ਸਂਕਿਲਿਟ੍ਠਂ. ਦ੍ਵੇ ਸਚ੍ਚਾ ਅਸਂਕਿਲਿਟ੍ਠਾ. ਦੁਕ੍ਖਸਚ੍ਚਂ ਸਿਯਾ ਸਂਕਿਲਿਟ੍ਠਂ, ਸਿਯਾ ਅਸਂਕਿਲਿਟ੍ਠਂ. ਸਮੁਦਯਸਚ੍ਚਂ ਕਿਲੇਸਸਮ੍ਪਯੁਤ੍ਤਂ. ਦ੍ਵੇ ਸਚ੍ਚਾ ਕਿਲੇਸਵਿਪ੍ਪਯੁਤ੍ਤਾ. ਦੁਕ੍ਖਸਚ੍ਚਂ ਸਿਯਾ ਕਿਲੇਸਸਮ੍ਪਯੁਤ੍ਤਂ, ਸਿਯਾ ਕਿਲੇਸਵਿਪ੍ਪਯੁਤ੍ਤਂ. ਸਮੁਦਯਸਚ੍ਚਂ ਕਿਲੇਸੋ ਚੇਵ ਸਂਕਿਲੇਸਿਕਞ੍ਚ. ਦ੍ਵੇ ਸਚ੍ਚਾ ਨ ਵਤ੍ਤਬ੍ਬਾ – ‘‘ਕਿਲੇਸਾ ਚੇਵ ਸਂਕਿਲੇਸਿਕਾ ਚਾ’’ਤਿਪਿ, ‘‘ਸਂਕਿਲੇਸਿਕਾ ਚੇਵ ਨੋ ਚ ਕਿਲੇਸਾ’’ਤਿਪਿ. ਦੁਕ੍ਖਸਚ੍ਚਂ ਸਿਯਾ ਕਿਲੇਸੋ ਚੇਵ ਸਂਕਿਲੇਸਿਕਞ੍ਚ, ਸਿਯਾ ਸਂਕਿਲੇਸਿਕਞ੍ਚੇਵ ਨੋ ਚ ਕਿਲੇਸੋ. ਸਮੁਦਯਸਚ੍ਚਂ ਕਿਲੇਸੋ ਚੇਵ ਸਂਕਿਲਿਟ੍ਠਞ੍ਚ. ਦ੍ਵੇ ਸਚ੍ਚਾ ਨ ਵਤ੍ਤਬ੍ਬਾ – ‘‘ਕਿਲੇਸਾ ਚੇਵ ਸਂਕਿਲਿਟ੍ਠਾ ਚਾ’’ਤਿਪਿ, ‘‘ਸਂਕਿਲਿਟ੍ਠਾ ਚੇਵ ਨੋ ਚ ਕਿਲੇਸਾ’’ਤਿਪਿ. ਦੁਕ੍ਖਸਚ੍ਚਂ ਸਿਯਾ ਕਿਲੇਸੋ ਚੇਵ ਸਂਕਿਲਿਟ੍ਠਞ੍ਚ, ਸਿਯਾ ਸਂਕਿਲਿਟ੍ਠਞ੍ਚੇਵ ਨੋ ਚ ਕਿਲੇਸੋ, ਸਿਯਾ ਨ ਵਤ੍ਤਬ੍ਬਂ – ‘‘ਕਿਲੇਸੋ ਚੇਵ ਸਂਕਿਲਿਟ੍ਠਞ੍ਚਾ’’ਤਿਪਿ, ‘‘ਸਂਕਿਲਿਟ੍ਠਞ੍ਚੇਵ ਨੋ ਚ ਕਿਲੇਸੋ’’ਤਿਪਿ. ਸਮੁਦਯਸਚ੍ਚਂ ਕਿਲੇਸੋ ਚੇਵ ਕਿਲੇਸਸਮ੍ਪਯੁਤ੍ਤਞ੍ਚ. ਦ੍ਵੇ ਸਚ੍ਚਾ ਨ ਵਤ੍ਤਬ੍ਬਾ – ‘‘ਕਿਲੇਸਾ ਚੇਵ ਕਿਲੇਸਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਕਿਲੇਸਸਮ੍ਪਯੁਤ੍ਤਾ ਚੇਵ ਨੋ ਚ ਕਿਲੇਸਾ’’ਤਿਪਿ. ਦੁਕ੍ਖਸਚ੍ਚਂ ਸਿਯਾ ਕਿਲੇਸੋ ਚੇਵ ਕਿਲੇਸਸਮ੍ਪਯੁਤ੍ਤਞ੍ਚ, ਸਿਯਾ ਕਿਲੇਸਸਮ੍ਪਯੁਤ੍ਤਞ੍ਚੇਵ ਨੋ ਚ ਕਿਲੇਸੋ, ਸਿਯਾ ਨ ਵਤ੍ਤਬ੍ਬਂ – ‘‘ਕਿਲੇਸੋ ਚੇਵ ਕਿਲੇਸਸਮ੍ਪਯੁਤ੍ਤਞ੍ਚਾ’’ ਤਿਪਿ, ‘‘ਕਿਲੇਸਸਮ੍ਪਯੁਤ੍ਤਞ੍ਚੇਵ ਨੋ ਚ ਕਿਲੇਸੋ’’ਤਿਪਿ. ਦ੍ਵੇ ਸਚ੍ਚਾ ਕਿਲੇਸਵਿਪ੍ਪਯੁਤ੍ਤਅਸਂਕਿਲੇਸਿਕਾ. ਸਮੁਦਯਸਚ੍ਚਂ ਨ ਵਤ੍ਤਬ੍ਬਂ – ‘‘ਕਿਲੇਸਵਿਪ੍ਪਯੁਤ੍ਤਸਂਕਿਲੇਸਿਕ’’ਨ੍ਤਿਪਿ, ‘‘ਕਿਲੇਸਵਿਪ੍ਪਯੁਤ੍ਤਅਸਂਕਿਲੇਸਿਕ’’ਨ੍ਤਿਪਿ. ਦੁਕ੍ਖਸਚ੍ਚਂ ਸਿਯਾ ਕਿਲੇਸਵਿਪ੍ਪਯੁਤ੍ਤਸਂਕਿਲੇਸਿਕਂ, ਸਿਯਾ ਨ ਵਤ੍ਤਬ੍ਬਂ – ‘‘ਕਿਲੇਸਵਿਪ੍ਪਯੁਤ੍ਤਸਂਕਿਲੇਸਿਕ’’ਨ੍ਤਿਪਿ, ‘‘ਕਿਲੇਸਵਿਪ੍ਪਯੁਤ੍ਤਅਸਂਕਿਲੇਸਿਕ’’ਨ੍ਤਿਪਿ.

ਦ੍ਵੇ ਸਚ੍ਚਾ ਨ ਦਸ੍ਸਨੇਨ ਪਹਾਤਬ੍ਬਾ. ਦ੍ਵੇ ਸਚ੍ਚਾ ਸਿਯਾ ਦਸ੍ਸਨੇਨ ਪਹਾਤਬ੍ਬਾ, ਸਿਯਾ ਨ ਦਸ੍ਸਨੇਨ ਪਹਾਤਬ੍ਬਾ. ਦ੍ਵੇ ਸਚ੍ਚਾ ਨ ਭਾਵਨਾਯ ਪਹਾਤਬ੍ਬਾ. ਦ੍ਵੇ ਸਚ੍ਚਾ ਸਿਯਾ ਭਾਵਨਾਯ ਪਹਾਤਬ੍ਬਾ, ਸਿਯਾ ਨ ਭਾਵਨਾਯ ਪਹਾਤਬ੍ਬਾ. ਦ੍ਵੇ ਸਚ੍ਚਾ ਨ ਦਸ੍ਸਨੇਨ ਪਹਾਤਬ੍ਬਹੇਤੁਕਾ. ਦ੍ਵੇ ਸਚ੍ਚਾ ਸਿਯਾ ਦਸ੍ਸਨੇਨ ਪਹਾਤਬ੍ਬਹੇਤੁਕਾ, ਸਿਯਾ ਨ ਦਸ੍ਸਨੇਨ ਪਹਾਤਬ੍ਬਹੇਤੁਕਾ. ਦ੍ਵੇ ਸਚ੍ਚਾ ਨ ਭਾਵਨਾਯ ਪਹਾਤਬ੍ਬਹੇਤੁਕਾ. ਦ੍ਵੇ ਸਚ੍ਚਾ ਸਿਯਾ ਭਾਵਨਾਯ ਪਹਾਤਬ੍ਬਹੇਤੁਕਾ, ਸਿਯਾ ਨ ਭਾਵਨਾਯ ਪਹਾਤਬ੍ਬਹੇਤੁਕਾ. ਸਮੁਦਯਸਚ੍ਚਂ ਸਵਿਤਕ੍ਕਂ. ਨਿਰੋਧਸਚ੍ਚਂ ਅਵਿਤਕ੍ਕਂ. ਦ੍ਵੇ ਸਚ੍ਚਾ ਸਿਯਾ ਸਵਿਤਕ੍ਕਾ, ਸਿਯਾ ਅਵਿਤਕ੍ਕਾ. ਸਮੁਦਯਸਚ੍ਚਂ ਸਵਿਚਾਰਂ. ਨਿਰੋਧਸਚ੍ਚਂ ਅਵਿਚਾਰਂ. ਦ੍ਵੇ ਸਚ੍ਚਾ ਸਿਯਾ ਸਵਿਚਾਰਾ, ਸਿਯਾ ਅਵਿਚਾਰਾ. ਨਿਰੋਧਸਚ੍ਚਂ ਅਪ੍ਪੀਤਿਕਂ. ਤੀਣਿ ਸਚ੍ਚਾਨਿ ਸਿਯਾ ਸਪ੍ਪੀਤਿਕਾ, ਸਿਯਾ ਅਪ੍ਪੀਤਿਕਾ. ਨਿਰੋਧਸਚ੍ਚਂ ਨ ਪੀਤਿਸਹਗਤਂ. ਤੀਣਿ ਸਚ੍ਚਾਨਿ ਸਿਯਾ ਪੀਤਿਸਹਗਤਾ, ਸਿਯਾ ਨ ਪੀਤਿਸਹਗਤਾ. ਨਿਰੋਧਸਚ੍ਚਂ ਨ ਸੁਖਸਹਗਤਂ. ਤੀਣਿ ਸਚ੍ਚਾਨਿ ਸਿਯਾ ਸੁਖਸਹਗਤਾ, ਸਿਯਾ ਨ ਸੁਖਸਹਗਤਾ. ਨਿਰੋਧਸਚ੍ਚਂ ਨ ਉਪੇਕ੍ਖਾਸਹਗਤਂ. ਤੀਣਿ ਸਚ੍ਚਾਨਿ ਸਿਯਾ ਉਪੇਕ੍ਖਾਸਹਗਤਾ, ਸਿਯਾ ਨ ਉਪੇਕ੍ਖਾਸਹਗਤਾ.

ਸਮੁਦਯਸਚ੍ਚਂ ਕਾਮਾਵਚਰਂ. ਦ੍ਵੇ ਸਚ੍ਚਾ ਨ ਕਾਮਾਵਚਰਾ. ਦੁਕ੍ਖਸਚ੍ਚਂ ਸਿਯਾ ਕਾਮਾਵਚਰਂ, ਸਿਯਾ ਨ ਕਾਮਾਵਚਰਂ. ਤੀਣਿ ਸਚ੍ਚਾਨਿ ਨ ਰੂਪਾਵਚਰਾ. ਦੁਕ੍ਖਸਚ੍ਚਂ ਸਿਯਾ ਰੂਪਾਵਚਰਂ, ਸਿਯਾ ਨ ਰੂਪਾਵਚਰਂ. ਤੀਣਿ ਸਚ੍ਚਾਨਿ ਨ ਅਰੂਪਾਵਚਰਾ. ਦੁਕ੍ਖਸਚ੍ਚਂ ਸਿਯਾ ਅਰੂਪਾਵਚਰਂ, ਸਿਯਾ ਨ ਅਰੂਪਾਵਚਰਂ. ਦ੍ਵੇ ਸਚ੍ਚਾ ਪਰਿਯਾਪਨ੍ਨਾ. ਦ੍ਵੇ ਸਚ੍ਚਾ ਅਪਰਿਯਾਪਨ੍ਨਾ. ਮਗ੍ਗਸਚ੍ਚਂ ਨਿਯ੍ਯਾਨਿਕਂ. ਤੀਣਿ ਸਚ੍ਚਾਨਿ ਅਨਿਯ੍ਯਾਨਿਕਾ. ਮਗ੍ਗਸਚ੍ਚਂ ਨਿਯਤਂ. ਨਿਰੋਧਸਚ੍ਚਂ ਅਨਿਯਤਂ. ਦ੍ਵੇ ਸਚ੍ਚਾ ਸਿਯਾ ਨਿਯਤਾ, ਸਿਯਾ ਅਨਿਯਤਾ. ਦ੍ਵੇ ਸਚ੍ਚਾ ਸਉਤ੍ਤਰਾ. ਦ੍ਵੇ ਸਚ੍ਚਾ ਅਨੁਤ੍ਤਰਾ. ਸਮੁਦਯਸਚ੍ਚਂ ਸਰਣਂ. ਦ੍ਵੇ ਸਚ੍ਚਾ ਅਰਣਾ. ਦੁਕ੍ਖਸਚ੍ਚਂ ਸਿਯਾ ਸਰਣਂ, ਸਿਯਾ ਅਰਣਨ੍ਤਿ.

ਪਞ੍ਹਾਪੁਚ੍ਛਕਂ.

ਸਚ੍ਚਵਿਭਙ੍ਗੋ ਨਿਟ੍ਠਿਤੋ.