੨. ਆਯਤਨਵਿਭਙ੍ਗੋ

੧. ਸੁਤ੍ਤਨ੍ਤਭਾਜਨੀਯਂ

੧੫੪. ਦ੍ਵਾਦਸਾਯਤਨਾਨਿ – ਚਕ੍ਖਾਯਤਨਂ, ਰੂਪਾਯਤਨਂ, ਸੋਤਾਯਤਨਂ, ਸਦ੍ਦਾਯਤਨਂ, ਘਾਨਾਯਤਨਂ, ਗਨ੍ਧਾਯਤਨਂ, ਜਿਵ੍ਹਾਯਤਨਂ, ਰਸਾਯਤਨਂ, ਕਾਯਾਯਤਨਂ, ਫੋਟ੍ਠਬ੍ਬਾਯਤਨਂ, ਮਨਾਯਤਨਂ, ਧਮ੍ਮਾਯਤਨਂ.

ਚਕ੍ਖੁਂ ਅਨਿਚ੍ਚਂ ਦੁਕ੍ਖਂ ਅਨਤ੍ਤਾ ਵਿਪਰਿਣਾਮਧਮ੍ਮਂ. ਰੂਪਾ ਅਨਿਚ੍ਚਾ ਦੁਕ੍ਖਾ ਅਨਤ੍ਤਾ ਵਿਪਰਿਣਾਮਧਮ੍ਮਾ. ਸੋਤਂ ਅਨਿਚ੍ਚਂ ਦੁਕ੍ਖਂ ਅਨਤ੍ਤਾ ਵਿਪਰਿਣਾਮਧਮ੍ਮਂ. ਸਦ੍ਦਾ ਅਨਿਚ੍ਚਾ ਦੁਕ੍ਖਾ ਅਨਤ੍ਤਾ ਵਿਪਰਿਣਾਮਧਮ੍ਮਾ. ਘਾਨਂ ਅਨਿਚ੍ਚਂ ਦੁਕ੍ਖਂ ਅਨਤ੍ਤਾ ਵਿਪਰਿਣਾਮਧਮ੍ਮਂ. ਗਨ੍ਧਾ ਅਨਿਚ੍ਚਾ ਦੁਕ੍ਖਾ ਅਨਤ੍ਤਾ ਵਿਪਰਿਣਾਮਧਮ੍ਮਾ. ਜਿਵ੍ਹਾ ਅਨਿਚ੍ਚਾ ਦੁਕ੍ਖਾ ਅਨਤ੍ਤਾ ਵਿਪਰਿਣਾਮਧਮ੍ਮਾ. ਰਸਾ ਅਨਿਚ੍ਚਾ ਦੁਕ੍ਖਾ ਅਨਤ੍ਤਾ ਵਿਪਰਿਣਾਮਧਮ੍ਮਾ. ਕਾਯੋ ਅਨਿਚ੍ਚੋ ਦੁਕ੍ਖੋ ਅਨਤ੍ਤਾ ਵਿਪਰਿਣਾਮਧਮ੍ਮੋ. ਫੋਟ੍ਠਬ੍ਬਾ ਅਨਿਚ੍ਚਾ ਦੁਕ੍ਖਾ ਅਨਤ੍ਤਾ ਵਿਪਰਿਣਾਮਧਮ੍ਮਾ. ਮਨੋ ਅਨਿਚ੍ਚੋ ਦੁਕ੍ਖੋ ਅਨਤ੍ਤਾ ਵਿਪਰਿਣਾਮਧਮ੍ਮੋ. ਧਮ੍ਮਾ ਅਨਿਚ੍ਚਾ ਦੁਕ੍ਖਾ ਅਨਤ੍ਤਾ ਵਿਪਰਿਣਾਮਧਮ੍ਮਾ.

ਸੁਤ੍ਤਨ੍ਤਭਾਜਨੀਯਂ.

੨. ਅਭਿਧਮ੍ਮਭਾਜਨੀਯਂ

੧੫੫. ਦ੍ਵਾਦਸਾਯਤਨਾਨਿ – ਚਕ੍ਖਾਯਤਨਂ, ਸੋਤਾਯਤਨਂ, ਘਾਨਾਯਤਨਂ, ਜਿਵ੍ਹਾਯਤਨਂ, ਕਾਯਾਯਤਨਂ, ਮਨਾਯਤਨਂ, ਰੂਪਾਯਤਨਂ, ਸਦ੍ਦਾਯਤਨਂ, ਗਨ੍ਧਾਯਤਨਂ, ਰਸਾਯਤਨਂ, ਫੋਟ੍ਠਬ੍ਬਾਯਤਨਂ, ਧਮ੍ਮਾਯਤਨਂ.

੧੫੬. ਤਤ੍ਥ ਕਤਮਂ ਚਕ੍ਖਾਯਤਨਂ? ਯਂ ਚਕ੍ਖੁ [ਚਕ੍ਖੁਂ (ਸੀ. ਸ੍ਯਾ. ਕ.) ਧ. ਸ. ੫੯੬-੫੯੯] ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋ ਅਤ੍ਤਭਾਵਪਰਿਯਾਪਨ੍ਨੋ ਅਨਿਦਸ੍ਸਨੋ ਸਪ੍ਪਟਿਘੋ, ਯੇਨ ਚਕ੍ਖੁਨਾ ਅਨਿਦਸ੍ਸਨੇਨ ਸਪ੍ਪਟਿਘੇਨ ਰੂਪਂ ਸਨਿਦਸ੍ਸਨਂ ਸਪ੍ਪਟਿਘਂ ਪਸ੍ਸਿ ਵਾ ਪਸ੍ਸਤਿ ਵਾ ਪਸ੍ਸਿਸ੍ਸਤਿ ਵਾ ਪਸ੍ਸੇ ਵਾ, ਚਕ੍ਖੁਮ੍ਪੇਤਂ ਚਕ੍ਖਾਯਤਨਮ੍ਪੇਤਂ ਚਕ੍ਖੁਧਾਤੁਪੇਸਾ ਚਕ੍ਖੁਨ੍ਦ੍ਰਿਯਮ੍ਪੇਤਂ ਲੋਕੋਪੇਸੋ ਦ੍ਵਾਰਾਪੇਸਾ ਸਮੁਦ੍ਦੋਪੇਸੋ ਪਣ੍ਡਰਮ੍ਪੇਤਂ ਖੇਤ੍ਤਮ੍ਪੇਤਂ ਵਤ੍ਥੁਮ੍ਪੇਤਂ ਨੇਤ੍ਤਮ੍ਪੇਤਂ ਨਯਨਮ੍ਪੇਤਂ ਓਰਿਮਂ ਤੀਰਮ੍ਪੇਤਂ ਸੁਞ੍ਞੋ ਗਾਮੋਪੇਸੋ. ਇਦਂ ਵੁਚ੍ਚਤਿ ‘‘ਚਕ੍ਖਾਯਤਨਂ’’.

੧੫੭. ਤਤ੍ਥ ਕਤਮਂ ਸੋਤਾਯਤਨਂ? ਯਂ ਸੋਤਂ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋ ਅਤ੍ਤਭਾਵਪਰਿਯਾਪਨ੍ਨੋ ਅਨਿਦਸ੍ਸਨੋ ਸਪ੍ਪਟਿਘੋ, ਯੇਨ ਸੋਤੇਨ ਅਨਿਦਸ੍ਸਨੇਨ ਸਪ੍ਪਟਿਘੇਨ ਸਦ੍ਦਂ ਅਨਿਦਸ੍ਸਨਂ ਸਪ੍ਪਟਿਘਂ ਸੁਣਿ ਵਾ ਸੁਣਾਤਿ ਵਾ ਸੁਣਿਸ੍ਸਤਿ ਵਾ ਸੁਣੇ ਵਾ, ਸੋਤਮ੍ਪੇਤਂ ਸੋਤਾਯਤਨਮ੍ਪੇਤਂ ਸੋਤਧਾਤੁਪੇਸਾ ਸੋਤਿਨ੍ਦ੍ਰਿਯਮ੍ਪੇਤਂ ਲੋਕੋਪੇਸੋ ਦ੍ਵਾਰਾਪੇਸਾ ਸਮੁਦ੍ਦੋਪੇਸੋ ਪਣ੍ਡਰਮ੍ਪੇਤਂ ਖੇਤ੍ਤਮ੍ਪੇਤਂ ਵਤ੍ਥੁਮ੍ਪੇਤਂ ਓਰਿਮਂ ਤੀਰਮ੍ਪੇਤਂ ਸੁਞ੍ਞੋ ਗਾਮੋਪੇਸੋ. ਇਦਂ ਵੁਚ੍ਚਤਿ ‘‘ਸੋਤਾਯਤਨਂ’’.

੧੫੮. ਤਤ੍ਥ ਕਤਮਂ ਘਾਨਾਯਤਨਂ? ਯਂ ਘਾਨਂ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋ ਅਤ੍ਤਭਾਵਪਰਿਯਾਪਨ੍ਨੋ ਅਨਿਦਸ੍ਸਨੋ ਸਪ੍ਪਟਿਘੋ, ਯੇਨ ਘਾਨੇਨ ਅਨਿਦਸ੍ਸਨੇਨ ਸਪ੍ਪਟਿਘੇਨ ਗਨ੍ਧਂ ਅਨਿਦਸ੍ਸਨਂ ਸਪ੍ਪਟਿਘਂ ਘਾਯਿ ਵਾ ਘਾਯਤਿ ਵਾ ਘਾਯਿਸ੍ਸਤਿ ਵਾ ਘਾਯੇ ਵਾ, ਘਾਨਮ੍ਪੇਤਂ ਘਾਨਾਯਤਨਮ੍ਪੇਤਂ ਘਾਨਧਾਤੁਪੇਸਾ ਘਾਨਿਨ੍ਦ੍ਰਿਯਮ੍ਪੇਤਂ ਲੋਕੋਪੇਸੋ ਦ੍ਵਾਰਾਪੇਸਾ ਸਮੁਦ੍ਦੋਪੇਸੋ ਪਣ੍ਡਰਮ੍ਪੇਤਂ ਖੇਤ੍ਤਮ੍ਪੇਤਂ ਵਤ੍ਥੁਮ੍ਪੇਤਂ ਓਰਿਮਂ ਤੀਰਮ੍ਪੇਤਂ ਸੁਞ੍ਞੋ ਗਾਮੋਪੇਸੋ. ਇਦਂ ਵੁਚ੍ਚਤਿ ‘‘ਘਾਨਾਯਤਨਂ’’.

੧੫੯. ਤਤ੍ਥ ਕਤਮਂ ਜਿਵ੍ਹਾਯਤਨਂ? ਯਾ ਜਿਵ੍ਹਾ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋ ਅਤ੍ਤਭਾਵਪਰਿਯਾਪਨ੍ਨੋ ਅਨਿਦਸ੍ਸਨੋ ਸਪ੍ਪਟਿਘੋ, ਯਾਯ ਜਿਵ੍ਹਾਯ ਅਨਿਦਸ੍ਸਨਾਯ ਸਪ੍ਪਟਿਘਾਯ ਰਸਂ ਅਨਿਦਸ੍ਸਨਂ ਸਪ੍ਪਟਿਘਂ ਸਾਯਿ ਵਾ ਸਾਯਤਿ ਵਾ ਸਾਯਿਸ੍ਸਤਿ ਵਾ ਸਾਯੇ ਵਾ, ਜਿਵ੍ਹਾਪੇਸਾ ਜਿਵ੍ਹਾਯਤਨਮ੍ਪੇਤਂ ਜਿਵ੍ਹਾਧਾਤੁਪੇਸਾ ਜੀਵ੍ਹਿਨ੍ਦ੍ਰਿਯਮ੍ਪੇਤਂ ਲੋਕੋਪੇਸੋ ਦ੍ਵਾਰਾਪੇਸਾ ਸਮੁਦ੍ਦੋਪੇਸੋ ਪਣ੍ਡਰਮ੍ਪੇਤਂ ਖੇਤ੍ਤਮ੍ਪੇਤਂ ਵਤ੍ਥੁਮ੍ਪੇਤਂ ਓਰਿਮਂ ਤੀਰਮ੍ਪੇਤਂ ਸੁਞ੍ਞੋ ਗਾਮੋਪੇਸੋ. ਇਦਂ ਵੁਚ੍ਚਤਿ ‘‘ਜਿਵ੍ਹਾਯਤਨਂ’’.

੧੬੦. ਤਤ੍ਥ ਕਤਮਂ ਕਾਯਾਯਤਨਂ? ਯੋ ਕਾਯੋ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋ ਅਤ੍ਤਭਾਵਪਰਿਯਾਪਨ੍ਨੋ ਅਨਿਦਸ੍ਸਨੋ ਸਪ੍ਪਟਿਘੋ, ਯੇਨ ਕਾਯੇਨ ਅਨਿਦਸ੍ਸਨੇਨ ਸਪ੍ਪਟਿਘੇਨ ਫੋਟ੍ਠਬ੍ਬਂ ਅਨਿਦਸ੍ਸਨਂ ਸਪ੍ਪਟਿਘਂ ਫੁਸਿ ਵਾ ਫੁਸਤਿ ਵਾ ਫੁਸਿਸ੍ਸਤਿ ਵਾ ਫੁਸੇ ਵਾ, ਕਾਯੋਪੇਸੋ ਕਾਯਾਯਤਨਮ੍ਪੇਤਂ ਕਾਯਧਾਤੁਪੇਸਾ ਕਾਯਿਨ੍ਦ੍ਰਿਯਮ੍ਪੇਤਂ ਲੋਕੋਪੇਸੋ ਦ੍ਵਾਰਾਪੇਸਾ ਸਮੁਦ੍ਦੋਪੇਸੋ ਪਣ੍ਡਰਮ੍ਪੇਤਂ ਖੇਤ੍ਤਮ੍ਪੇਤਂ ਵਤ੍ਥੁਮ੍ਪੇਤਂ ਓਰਿਮਂ ਤੀਰਮ੍ਪੇਤਂ ਸੁਞ੍ਞੋ ਗਾਮੋਪੇਸੋ. ਇਦਂ ਵੁਚ੍ਚਤਿ ‘‘ਕਾਯਾਯਤਨਂ’’.

੧੬੧. ਤਤ੍ਥ ਕਤਮਂ ਮਨਾਯਤਨਂ? ਏਕਵਿਧੇਨ ਮਨਾਯਤਨਂ – ਫਸ੍ਸਸਮ੍ਪਯੁਤ੍ਤਂ.

ਦੁਵਿਧੇਨ ਮਨਾਯਤਨਂ – ਅਤ੍ਥਿ ਸਹੇਤੁਕਂ, ਅਤ੍ਥਿ ਅਹੇਤੁਕਂ.

ਤਿਵਿਧੇਨ ਮਨਾਯਤਨਂ – ਅਤ੍ਥਿ ਕੁਸਲਂ, ਅਤ੍ਥਿ ਅਕੁਸਲਂ, ਅਤ੍ਥਿ ਅਬ੍ਯਾਕਤਂ.

ਚਤੁਬ੍ਬਿਧੇਨ ਮਨਾਯਤਨਂ – ਅਤ੍ਥਿ ਕਾਮਾਵਚਰਂ, ਅਤ੍ਥਿ ਰੂਪਾਵਚਰਂ, ਅਤ੍ਥਿ ਅਰੂਪਾਵਚਰਂ, ਅਤ੍ਥਿ ਅਪਰਿਯਾਪਨ੍ਨਂ.

ਪਞ੍ਚਵਿਧੇਨ ਮਨਾਯਤਨਂ – ਅਤ੍ਥਿ ਸੁਖਿਨ੍ਦ੍ਰਿਯਸਮ੍ਪਯੁਤ੍ਤਂ, ਅਤ੍ਥਿ ਦੁਕ੍ਖਿਨ੍ਦ੍ਰਿਯਸਮ੍ਪਯੁਤ੍ਤਂ, ਅਤ੍ਥਿ ਸੋਮਨਸ੍ਸਿਨ੍ਦ੍ਰਿਯਸਮ੍ਪਯੁਤ੍ਤਂ, ਅਤ੍ਥਿ ਦੋਮਨਸ੍ਸਿਨ੍ਦ੍ਰਿਯਸਮ੍ਪਯੁਤ੍ਤਂ, ਅਤ੍ਥਿ ਉਪੇਕ੍ਖਿਨ੍ਦ੍ਰਿਯਸਮ੍ਪਯੁਤ੍ਤਂ.

ਛਬ੍ਬਿਧੇਨ ਮਨਾਯਤਨਂ – ਚਕ੍ਖੁਵਿਞ੍ਞਾਣਂ, ਸੋਤਵਿਞ੍ਞਾਣਂ, ਘਾਨਵਿਞ੍ਞਾਣਂ, ਜਿਵ੍ਹਾਵਿਞ੍ਞਾਣਂ, ਕਾਯਵਿਞ੍ਞਾਣਂ, ਮਨੋਵਿਞ੍ਞਾਣਂ. ਏਵਂ ਛਬ੍ਬਿਧੇਨ ਮਨਾਯਤਨਂ.

ਸਤ੍ਤਵਿਧੇਨ ਮਨਾਯਤਨਂ – ਚਕ੍ਖੁਵਿਞ੍ਞਾਣਂ, ਸੋਤਵਿਞ੍ਞਾਣਂ, ਘਾਨਵਿਞ੍ਞਾਣਂ, ਜਿਵ੍ਹਾਵਿਞ੍ਞਾਣਂ, ਕਾਯਵਿਞ੍ਞਾਣਂ, ਮਨੋਧਾਤੁ, ਮਨੋਵਿਞ੍ਞਾਣਧਾਤੁ. ਏਵਂ ਸਤ੍ਤਵਿਧੇਨ ਮਨਾਯਤਨਂ.

ਅਟ੍ਠਵਿਧੇਨ ਮਨਾਯਤਨਂ – ਚਕ੍ਖੁਵਿਞ੍ਞਾਣਂ, ਸੋਤਵਿਞ੍ਞਾਣਂ, ਘਾਨਵਿਞ੍ਞਾਣਂ, ਜਿਵ੍ਹਾਵਿਞ੍ਞਾਣਂ, ਕਾਯਵਿਞ੍ਞਾਣਂ ਅਤ੍ਥਿ ਸੁਖਸਹਗਤਂ, ਅਤ੍ਥਿ ਦੁਕ੍ਖਸਹਗਤਂ, ਮਨੋਧਾਤੁ, ਮਨੋਵਿਞ੍ਞਾਣਧਾਤੁ. ਏਵਂ ਅਟ੍ਠਵਿਧੇਨ ਮਨਾਯਤਨਂ.

ਨਵਵਿਧੇਨ ਮਨਾਯਤਨਂ – ਚਕ੍ਖੁਵਿਞ੍ਞਾਣਂ, ਸੋਤਵਿਞ੍ਞਾਣਂ, ਘਾਨਵਿਞ੍ਞਾਣਂ, ਜਿਵ੍ਹਾਵਿਞ੍ਞਾਣਂ, ਕਾਯਵਿਞ੍ਞਾਣਂ, ਮਨੋਧਾਤੁ, ਮਨੋਵਿਞ੍ਞਾਣਧਾਤੁ ਅਤ੍ਥਿ ਕੁਸਲਂ, ਅਤ੍ਥਿ ਅਕੁਸਲਂ, ਅਤ੍ਥਿ ਅਬ੍ਯਾਕਤਂ. ਏਵਂ ਨਵਵਿਧੇਨ ਮਨਾਯਤਨਂ.

ਦਸਵਿਧੇਨ ਮਨਾਯਤਨਂ – ਚਕ੍ਖੁਵਿਞ੍ਞਾਣਂ, ਸੋਤਵਿਞ੍ਞਾਣਂ, ਘਾਨਵਿਞ੍ਞਾਣਂ, ਜਿਵ੍ਹਾਵਿਞ੍ਞਾਣਂ, ਕਾਯਵਿਞ੍ਞਾਣਂ ਅਤ੍ਥਿ ਸੁਖਸਹਗਤਂ, ਅਤ੍ਥਿ ਦੁਕ੍ਖਸਹਗਤਂ, ਮਨੋਧਾਤੁ, ਮਨੋਵਿਞ੍ਞਾਣਧਾਤੁ ਅਤ੍ਥਿ ਕੁਸਲਂ, ਅਤ੍ਥਿ ਅਕੁਸਲਂ, ਅਤ੍ਥਿ ਅਬ੍ਯਾਕਤਂ. ਏਵਂ ਦਸਵਿਧੇਨ ਮਨਾਯਤਨਂ.

ਏਕਵਿਧੇਨ ਮਨਾਯਤਨਂ – ਫਸ੍ਸਸਮ੍ਪਯੁਤ੍ਤਂ.

ਦੁਵਿਧੇਨ ਮਨਾਯਤਨਂ – ਅਤ੍ਥਿ ਸਹੇਤੁਕਂ, ਅਤ੍ਥਿ ਅਹੇਤੁਕਂ.

ਤਿਵਿਧੇਨ ਮਨਾਯਤਨਂ – ਅਤ੍ਥਿ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ, ਅਤ੍ਥਿ ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਂ, ਅਤ੍ਥਿ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ…ਪੇ…. ਏਵਂ ਬਹੁਵਿਧੇਨ ਮਨਾਯਤਨਂ. ਇਦਂ ਵੁਚ੍ਚਤਿ ‘‘ਮਨਾਯਤਨਂ’’.

੧੬੨. ਤਤ੍ਥ ਕਤਮਂ ਰੂਪਾਯਤਨਂ? ਯਂ ਰੂਪਂ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਵਣ੍ਣਨਿਭਾ ਸਨਿਦਸ੍ਸਨਂ ਸਪ੍ਪਟਿਘਂ ਨੀਲਂ ਪੀਤਕਂ ਲੋਹਿਤਕਂ [ਪੀਤਂ ਲੋਹਿਤਂ (ਸੀ.)] ਓਦਾਤਂ ਕਾਲ਼ਕਂ ਮਞ੍ਜਿਟ੍ਠਕਂ [ਮਞ੍ਜੇਟ੍ਠਕਂ (ਸੀ. ਸ੍ਯਾ.)] ਹਰਿ ਹਰਿਵਣ੍ਣਂ ਅਮ੍ਬਙ੍ਕੁਰਵਣ੍ਣਂ ਦੀਘਂ ਰਸ੍ਸਂ ਅਣੁਂ ਥੂਲਂ ਵਟ੍ਟਂ ਪਰਿਮਣ੍ਡਲਂ ਚਤੁਰਸ੍ਸਂ ਛਲ਼ਂਸਂ ਅਟ੍ਠਂਸਂ ਸੋਲ਼ਸਂਸਂ ਨਿਨ੍ਨਂ ਥਲਂ ਛਾਯਾ ਆਤਪੋ ਆਲੋਕੋ ਅਨ੍ਧਕਾਰੋ ਅਬ੍ਭਾ ਮਹਿਕਾ ਧੂਮੋ ਰਜੋ ਚਨ੍ਦਮਣ੍ਡਲਸ੍ਸ ਵਣ੍ਣਨਿਭਾ ਸੂਰਿਯਮਣ੍ਡਲਸ੍ਸ [ਸੁਰਿਯਮਣ੍ਡਲਸ੍ਸ (ਸੀ. ਸ੍ਯਾ. ਕਂ.)] ਵਣ੍ਣਨਿਭਾ ਤਾਰਕਰੂਪਾਨਂ ਵਣ੍ਣਨਿਭਾ ਆਦਾਸਮਣ੍ਡਲਸ੍ਸ ਵਣ੍ਣਨਿਭਾ ਮਣਿਸਙ੍ਖਮੁਤ੍ਤਵੇਲ਼ੁਰਿਯਸ੍ਸ ਵਣ੍ਣਨਿਭਾ ਜਾਤਰੂਪਰਜਤਸ੍ਸ ਵਣ੍ਣਨਿਭਾ, ਯਂ ਵਾ ਪਨਞ੍ਞਮ੍ਪਿ ਅਤ੍ਥਿ ਰੂਪਂ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਵਣ੍ਣਨਿਭਾ ਸਨਿਦਸ੍ਸਨਂ ਸਪ੍ਪਟਿਘਂ, ਯਂ ਰੂਪਂ ਸਨਿਦਸ੍ਸਨਂ ਸਪ੍ਪਟਿਘਂ ਚਕ੍ਖੁਨਾ ਅਨਿਦਸ੍ਸਨੇਨ ਸਪ੍ਪਟਿਘੇਨ ਪਸ੍ਸਿ ਵਾ ਪਸ੍ਸਤਿ ਵਾ ਪਸ੍ਸਿਸ੍ਸਤਿ ਵਾ ਪਸ੍ਸੇ ਵਾ, ਰੂਪਮ੍ਪੇਤਂ ਰੂਪਾਯਤਨਮ੍ਪੇਤਂ ਰੂਪਧਾਤੁਪੇਸਾ. ਇਦਂ ਵੁਚ੍ਚਤਿ ‘‘ਰੂਪਾਯਤਨਂ’’.

੧੬੩. ਤਤ੍ਥ ਕਤਮਂ ਸਦ੍ਦਾਯਤਨਂ? ਯੋ ਸਦ੍ਦੋ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਅਨਿਦਸ੍ਸਨੋ ਸਪ੍ਪਟਿਘੋ ਭੇਰਿਸਦ੍ਦੋ ਮੁਦਿਙ੍ਗਸਦ੍ਦੋ [ਮੁਤਿਙ੍ਗਸਦ੍ਧੋ (ਸੀ.)] ਸਙ੍ਖਸਦ੍ਦੋ ਪਣਵਸਦ੍ਦੋ ਗੀਤਸਦ੍ਦੋ ਵਾਦਿਤਸਦ੍ਦੋ ਸਮ੍ਮਸਦ੍ਦੋ ਪਾਣਿਸਦ੍ਦੋ ਸਤ੍ਤਾਨਂ ਨਿਗ੍ਘੋਸਸਦ੍ਦੋ ਧਾਤੂਨਂ ਸਨ੍ਨਿਘਾਤਸਦ੍ਦੋ ਵਾਤਸਦ੍ਦੋ ਉਦਕਸਦ੍ਦੋ ਮਨੁਸ੍ਸਸਦ੍ਦੋ ਅਮਨੁਸ੍ਸਸਦ੍ਦੋ, ਯੋ ਵਾ ਪਨਞ੍ਞੋਪਿ ਅਤ੍ਥਿ ਸਦ੍ਦੋ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਅਨਿਦਸ੍ਸਨੋ ਸਪ੍ਪਟਿਘੋ, ਯਂ ਸਦ੍ਦਂ ਅਨਿਦਸ੍ਸਨਂ ਸਪ੍ਪਟਿਘਂ ਸੋਤੇਨ ਅਨਿਦਸ੍ਸਨੇਨ ਸਪ੍ਪਟਿਘੇਨ ਸੁਣਿ ਵਾ ਸੁਣਾਤਿ ਵਾ ਸੁਣਿਸ੍ਸਤਿ ਵਾ ਸੁਣੇ ਵਾ, ਸਦ੍ਦੋਪੇਸੋ ਸਦ੍ਦਾਯਤਨਮ੍ਪੇਤਂ ਸਦ੍ਦਧਾਤੁਪੇਸਾ. ਇਦਂ ਵੁਚ੍ਚਤਿ ‘‘ਸਦ੍ਦਾਯਤਨਂ’’.

੧੬੪. ਤਤ੍ਥ ਕਤਮਂ ਗਨ੍ਧਾਯਤਨਂ? ਯੋ ਗਨ੍ਧੋ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਅਨਿਦਸ੍ਸਨੋ ਸਪ੍ਪਟਿਘੋ ਮੂਲਗਨ੍ਧੋ ਸਾਰਗਨ੍ਧੋ ਤਚਗਨ੍ਧੋ ਪਤ੍ਤਗਨ੍ਧੋ ਪੁਪ੍ਫਗਨ੍ਧੋ ਫਲਗਨ੍ਧੋ ਆਮਗਨ੍ਧੋ ਵਿਸ੍ਸਗਨ੍ਧੋ ਸੁਗਨ੍ਧੋ ਦੁਗ੍ਗਨ੍ਧੋ, ਯੋ ਵਾ ਪਨਞ੍ਞੋਪਿ ਅਤ੍ਥਿ ਗਨ੍ਧੋ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਅਨਿਦਸ੍ਸਨੋ ਸਪ੍ਪਟਿਘੋ, ਯਂ ਗਨ੍ਧਂ ਅਨਿਦਸ੍ਸਨਂ ਸਪ੍ਪਟਿਘਂ ਘਾਨੇਨ ਅਨਿਦਸ੍ਸਨੇਨ ਸਪ੍ਪਟਿਘੇਨ ਘਾਯਿ ਵਾ ਘਾਯਤਿ ਵਾ ਘਾਯਿਸ੍ਸਤਿ ਵਾ ਘਾਯੇ ਵਾ, ਗਨ੍ਧੋਪੇਸੋ ਗਨ੍ਧਾਯਤਨਮ੍ਪੇਤਂ ਗਨ੍ਧਧਾਤੁਪੇਸਾ. ਇਦਂ ਵੁਚ੍ਚਤਿ ‘‘ਗਨ੍ਧਾਯਤਨਂ’’.

੧੬੫. ਤਤ੍ਥ ਕਤਮਂ ਰਸਾਯਤਨਂ? ਯੋ ਰਸੋ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਅਨਿਦਸ੍ਸਨੋ ਸਪ੍ਪਟਿਘੋ ਮੂਲਰਸੋ ਖਨ੍ਧਰਸੋ ਤਚਰਸੋ ਪਤ੍ਤਰਸੋ ਪੁਪ੍ਫਰਸੋ ਫਲਰਸੋ ਅਮ੍ਬਿਲਂ ਮਧੁਰਂ ਤਿਤ੍ਤਕਂ ਕਟੁਕਂ ਲੋਣਿਕਂ [ਲਪਿਲਕਂ (ਸੀ.), ਲਮ੍ਪਿਕਂ (ਕ. ਸੀ.)] ਖਾਰਿਕਂ ਲਮ੍ਬਿਕਂ ਕਸਾਵੋ ਸਾਦੁ ਅਸਾਦੁ, ਯੋ ਵਾ ਪਨਞ੍ਞੋਪਿ ਅਤ੍ਥਿ ਰਸੋ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਅਨਿਦਸ੍ਸਨੋ ਸਪ੍ਪਟਿਘੋ, ਯਂ ਰਸਂ ਅਨਿਦਸ੍ਸਨਂ ਸਪ੍ਪਟਿਘਂ ਜਿਵ੍ਹਾਯ ਅਨਿਦਸ੍ਸਨਾਯ ਸਪ੍ਪਟਿਘਾਯ ਸਾਯਿ ਵਾ ਸਾਯਤਿ ਵਾ ਸਾਯਿਸ੍ਸਤਿ ਵਾ ਸਾਯੇ ਵਾ, ਰਸੋਪੇਸੋ ਰਸਾਯਤਨਮ੍ਪੇਤਂ ਰਸਧਾਤੁਪੇਸਾ. ਇਦਂ ਵੁਚ੍ਚਤਿ ‘‘ਰਸਾਯਤਨਂ’’.

੧੬੬. ਤਤ੍ਥ ਕਤਮਂ ਫੋਟ੍ਠਬ੍ਬਾਯਤਨਂ? ਪਥਵੀਧਾਤੁ ਤੇਜੋਧਾਤੁ ਵਾਯੋਧਾਤੁ ਕਕ੍ਖਲ਼ਂ ਮੁਦੁਕਂ ਸਣ੍ਹਂ ਫਰੁਸਂ ਸੁਖਸਮ੍ਫਸ੍ਸਂ ਦੁਕ੍ਖਸਮ੍ਫਸ੍ਸਂ ਗਰੁਕਂ ਲਹੁਕਂ, ਯਂ ਫੋਟ੍ਠਬ੍ਬਂ ਅਨਿਦਸ੍ਸਨਂ ਸਪ੍ਪਟਿਘਂ ਕਾਯੇਨ ਅਨਿਦਸ੍ਸਨੇਨ ਸਪ੍ਪਟਿਘੇਨ ਫੁਸਿ ਵਾ ਫੁਸਤਿ ਵਾ ਫੁਸਿਸ੍ਸਤਿ ਵਾ ਫੁਸੇ ਵਾ, ਫੋਟ੍ਠਬ੍ਬੋਪੇਸੋ ਫੋਟ੍ਠਬ੍ਬਾਯਤਨਮ੍ਪੇਤਂ ਫੋਟ੍ਠਬ੍ਬਧਾਤੁਪੇਸਾ. ਇਦਂ ਵੁਚ੍ਚਤਿ ‘‘ਫੋਟ੍ਠਬ੍ਬਾਯਤਨਂ’’.

੧੬੭. ਤਤ੍ਥ ਕਤਮਂ ਧਮ੍ਮਾਯਤਨਂ? ਵੇਦਨਾਕ੍ਖਨ੍ਧੋ, ਸਞ੍ਞਾਕ੍ਖਨ੍ਧੋ, ਸਙ੍ਖਾਰਕ੍ਖਨ੍ਧੋ, ਯਞ੍ਚ ਰੂਪਂ ਅਨਿਦਸ੍ਸਨਅਪ੍ਪਟਿਘਂ ਧਮ੍ਮਾਯਤਨਪਰਿਯਾਪਨ੍ਨਂ, ਅਸਙ੍ਖਤਾ ਚ ਧਾਤੁ.

ਤਤ੍ਥ ਕਤਮੋ ਵੇਦਨਾਕ੍ਖਨ੍ਧੋ? ਏਕਵਿਧੇਨ ਵੇਦਨਾਕ੍ਖਨ੍ਧੋ – ਫਸ੍ਸਸਮ੍ਪਯੁਤ੍ਤੋ. ਦੁਵਿਧੇਨ ਵੇਦਨਾਕ੍ਖਨ੍ਧੋ – ਅਤ੍ਥਿ ਸਹੇਤੁਕੋ, ਅਤ੍ਥਿ ਅਹੇਤੁਕੋ. ਤਿਵਿਧੇਨ ਵੇਦਨਾਕ੍ਖਨ੍ਧੋ – ਅਤ੍ਥਿ ਕੁਸਲੋ, ਅਤ੍ਥਿ ਅਕੁਸਲੋ, ਅਤ੍ਥਿ ਅਬ੍ਯਾਕਤੋ…ਪੇ… ਏਵਂ ਦਸਵਿਧੇਨ ਵੇਦਨਾਕ੍ਖਨ੍ਧੋ…ਪੇ… ਏਵਂ ਬਹੁਵਿਧੇਨ ਵੇਦਨਾਕ੍ਖਨ੍ਧੋ. ਅਯਂ ਵੁਚ੍ਚਤਿ ‘‘ਵੇਦਨਾਕ੍ਖਨ੍ਧੋ’’.

ਤਤ੍ਥ ਕਤਮੋ ਸਞ੍ਞਾਕ੍ਖਨ੍ਧੋ? ਏਕਵਿਧੇਨ ਸਞ੍ਞਾਕ੍ਖਨ੍ਧੋ – ਫਸ੍ਸਸਮ੍ਪਯੁਤ੍ਤੋ. ਦੁਵਿਧੇਨ ਸਞ੍ਞਾਕ੍ਖਨ੍ਧੋ – ਅਤ੍ਥਿ ਸਹੇਤੁਕੋ, ਅਤ੍ਥਿ ਅਹੇਤੁਕੋ. ਤਿਵਿਧੇਨ ਸਞ੍ਞਾਕ੍ਖਨ੍ਧੋ – ਅਤ੍ਥਿ ਕੁਸਲੋ, ਅਤ੍ਥਿ ਅਕੁਸਲੋ, ਅਤ੍ਥਿ ਅਬ੍ਯਾਕਤੋ…ਪੇ… ਏਵਂ ਦਸਵਿਧੇਨ ਸਞ੍ਞਾਕ੍ਖਨ੍ਧੋ…ਪੇ… ਏਵਂ ਬਹੁਵਿਧੇਨ ਸਞ੍ਞਾਕ੍ਖਨ੍ਧੋ. ਅਯਂ ਵੁਚ੍ਚਤਿ ‘‘ਸਞ੍ਞਾਕ੍ਖਨ੍ਧੋ’’.

ਤਤ੍ਥ ਕਤਮੋ ਸਙ੍ਖਾਰਕ੍ਖਨ੍ਧੋ? ਏਕਵਿਧੇਨ ਸਙ੍ਖਾਰਕ੍ਖਨ੍ਧੋ – ਚਿਤ੍ਤਸਮ੍ਪਯੁਤ੍ਤੋ. ਦੁਵਿਧੇਨ ਸਙ੍ਖਾਰਕ੍ਖਨ੍ਧੋ – ਅਤ੍ਥਿ ਹੇਤੁ, ਅਤ੍ਥਿ ਨ ਹੇਤੁ. ਤਿਵਿਧੇਨ ਸਙ੍ਖਾਰਕ੍ਖਨ੍ਧੋ – ਅਤ੍ਥਿ ਕੁਸਲੋ, ਅਤ੍ਥਿ ਅਕੁਸਲੋ, ਅਤ੍ਥਿ ਅਬ੍ਯਾਕਤੋ…ਪੇ… ਏਵਂ ਦਸਵਿਧੇਨ ਸਙ੍ਖਾਰਕ੍ਖਨ੍ਧੋ…ਪੇ… ਏਵਂ ਬਹੁਵਿਧੇਨ ਸਙ੍ਖਾਰਕ੍ਖਨ੍ਧੋ. ਅਯਂ ਵੁਚ੍ਚਤਿ ‘‘ਸਙ੍ਖਾਰਕ੍ਖਨ੍ਧੋ’’.

ਤਤ੍ਥ ਕਤਮਂ ਰੂਪਂ ਅਨਿਦਸ੍ਸਨਅਪ੍ਪਟਿਘਂ ਧਮ੍ਮਾਯਤਨਪਰਿਯਾਪਨ੍ਨਂ? ਇਤ੍ਥਿਨ੍ਦ੍ਰਿਯਂ ਪੁਰਿਸਿਨ੍ਦ੍ਰਿਯਂ…ਪੇ… ਕਬਲ਼ੀਕਾਰੋ ਆਹਾਰੋ. ਇਦਂ ਵੁਚ੍ਚਤਿ ਰੂਪਂ ‘‘ਅਨਿਦਸ੍ਸਨਅਪ੍ਪਟਿਘਂ ਧਮ੍ਮਾਯਤਨਪਰਿਯਾਪਨ੍ਨਂ’’.

ਤਤ੍ਥ ਕਤਮਾ ਅਸਙ੍ਖਤਾ ਧਾਤੁ? ਰਾਗਕ੍ਖਯੋ, ਦੋਸਕ੍ਖਯੋ, ਮੋਹਕ੍ਖਯੋ – ਅਯਂ ਵੁਚ੍ਚਤਿ ‘‘ਅਸਙ੍ਖਤਾ ਧਾਤੁ’’.

ਇਦਂ ਵੁਚ੍ਚਤਿ ਧਮ੍ਮਾਯਤਨਂ.

ਅਭਿਧਮ੍ਮਭਾਜਨੀਯਂ.

੩. ਪਞ੍ਹਾਪੁਚ੍ਛਕਂ

੧੬੮. ਦ੍ਵਾਦਸਾਯਤਨਾਨਿ – ਚਕ੍ਖਾਯਤਨਂ, ਰੂਪਾਯਤਨਂ, ਸੋਤਾਯਤਨਂ, ਸਦ੍ਦਾਯਤਨਂ, ਘਾਨਾਯਤਨਂ, ਗਨ੍ਧਾਯਤਨਂ, ਜਿਵ੍ਹਾਯਤਨਂ, ਰਸਾਯਤਨਂ, ਕਾਯਾਯਤਨਂ, ਫੋਟ੍ਠਬ੍ਬਾਯਤਨਂ, ਮਨਾਯਤਨਂ, ਧਮ੍ਮਾਯਤਨਂ.

੧੬੯. ਦ੍ਵਾਦਸਨ੍ਨਂ ਆਯਤਨਾਨਂ ਕਤਿ ਕੁਸਲਾ, ਕਤਿ ਅਕੁਸਲਾ, ਕਤਿ ਅਬ੍ਯਾਕਤਾ…ਪੇ… ਕਤਿ ਸਰਣਾ, ਕਤਿ ਅਰਣਾ?

੧. ਤਿਕਂ

੧੭੦. ਦਸਾਯਤਨਾ ਅਬ੍ਯਾਕਤਾ. ਦ੍ਵਾਯਤਨਾ ਸਿਯਾ ਕੁਸਲਾ, ਸਿਯਾ ਅਕੁਸਲਾ, ਸਿਯਾ ਅਬ੍ਯਾਕਤਾ. ਦਸਾਯਤਨਾ ਨ ਵਤ੍ਤਬ੍ਬਾ – ‘‘ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ’’ਤਿਪਿ, ‘‘ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾ’’ਤਿਪਿ, ‘‘ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ’’ਤਿਪਿ. ਮਨਾਯਤਨਂ ਸਿਯਾ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ, ਸਿਯਾ ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਂ, ਸਿਯਾ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ. ਧਮ੍ਮਾਯਤਨਂ ਸਿਯਾ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ, ਸਿਯਾ ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਂ, ਸਿਯਾ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ, ਸਿਯਾ ਨ ਵਤ੍ਤਬ੍ਬਂ – ‘‘ਸੁਖਾਯ ਵੇਦਨਾਯ ਸਮ੍ਪਯੁਤ੍ਤ’’ਨ੍ਤਿਪਿ, ‘‘ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤ’’ਨ੍ਤਿਪਿ, ‘‘ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤ’’ਨ੍ਤਿਪਿ. ਦਸਾਯਤਨਾ ਨੇਵਵਿਪਾਕਨਵਿਪਾਕਧਮ੍ਮਧਮ੍ਮਾ. ਦ੍ਵਾਯਤਨਾ ਸਿਯਾ ਵਿਪਾਕਾ, ਸਿਯਾ ਵਿਪਾਕਧਮ੍ਮਧਮ੍ਮਾ, ਸਿਯਾ ਨੇਵਵਿਪਾਕਨਵਿਪਾਕਧਮ੍ਮਧਮ੍ਮਾ.

ਪਞ੍ਚਾਯਤਨਾ ਉਪਾਦਿਨ੍ਨੁਪਾਦਾਨਿਯਾ. ਸਦ੍ਦਾਯਤਨਂ ਅਨੁਪਾਦਿਨ੍ਨੁਪਾਦਾਨਿਯਂ. ਚਤ੍ਤਾਰੋ ਆਯਤਨਾ ਸਿਯਾ ਉਪਾਦਿਨ੍ਨੁਪਾਦਾਨਿਯਾ, ਸਿਯਾ ਅਨੁਪਾਦਿਨ੍ਨੁਪਾਦਾਨਿਯਾ, ਸਿਯਾ ਅਨੁਪਾਦਾਨਿਯਾ. ਦ੍ਵਾਯਤਨਾ ਸਿਯਾ ਉਪਾਦਿਨ੍ਨੁਪਾਦਾਨਿਯਾ, ਸਿਯਾ ਅਨੁਪਾਦਿਨ੍ਨੁਪਾਦਾਨਿਯਾ, ਸਿਯਾ ਅਨੁਪਾਦਿਨ੍ਨਅਨੁਪਾਦਾਨਿਯਾ. ਦਸਾਯਤਨਾ ਅਸਂਕਿਲਿਟ੍ਠਸਂਕਿਲੇਸਿਕਾ. ਦ੍ਵਾਯਤਨਾ ਸਿਯਾ ਸਂਕਿਲਿਟ੍ਠਸਂਕਿਲੇਸਿਕਾ, ਸਿਯਾ ਅਸਂਕਿਲਿਟ੍ਠਸਂਕਿਲੇਸਿਕਾ, ਸਿਯਾ ਅਸਂਕਿਲਿਟ੍ਠਅਸਂਕਿਲੇਸਿਕਾ. ਦਸਾਯਤਨਾ ਅਵਿਤਕ੍ਕਅਵਿਚਾਰਾ. ਮਨਾਯਤਨਂ ਸਿਯਾ ਸਵਿਤਕ੍ਕਸਵਿਚਾਰਂ, ਸਿਯਾ ਅਵਿਤਕ੍ਕਵਿਚਾਰਮਤ੍ਤਂ, ਸਿਯਾ ਅਵਿਤਕ੍ਕਅਵਿਚਾਰਂ. ਧਮ੍ਮਾਯਤਨਂ ਸਿਯਾ ਸਵਿਤਕ੍ਕਸਵਿਚਾਰਂ, ਸਿਯਾ ਅਵਿਤਕ੍ਕਵਿਚਾਰਮਤ੍ਤਂ, ਸਿਯਾ ਅਵਿਤਕ੍ਕਅਵਿਚਾਰਂ, ਸਿਯਾ ਨ ਵਤ੍ਤਬ੍ਬਂ – ‘‘ਸਵਿਤਕ੍ਕਸਵਿਚਾਰ’’ਨ੍ਤਿਪਿ, ‘‘ਅਵਿਤਕ੍ਕਵਿਚਾਰਮਤ੍ਤ’’ਨ੍ਤਿਪਿ, ‘‘ਅਵਿਤਕ੍ਕਅਵਿਚਾਰ’’ਨ੍ਤਿਪਿ. ਦਸਾਯਤਨਾ ਨ ਵਤ੍ਤਬ੍ਬਾ – ‘‘ਪੀਤਿਸਹਗਤਾ’’ਤਿਪਿ, ‘‘ਸੁਖਸਹਗਤਾ’’ਤਿਪਿ, ‘‘ਉਪੇਕ੍ਖਾਸਹਗਤਾ’’ਤਿਪਿ. ਦ੍ਵਾਯਤਨਾ ਸਿਯਾ ਪੀਤਿਸਹਗਤਾ, ਸਿਯਾ ਸੁਖਸਹਗਤਾ, ਸਿਯਾ ਉਪੇਕ੍ਖਾਸਹਗਤਾ, ਸਿਯਾ ਨ ਵਤ੍ਤਬ੍ਬਾ – ‘‘ਪੀਤਿਸਹਗਤਾ’’ਤਿਪਿ, ‘‘ਸੁਖਸਹਗਤਾ’’ਤਿਪਿ, ‘‘ਉਪੇਕ੍ਖਾਸਹਗਤਾ’’ਤਿਪਿ.

ਦਸਾਯਤਨਾ ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਾ. ਦ੍ਵਾਯਤਨਾ ਸਿਯਾ ਦਸ੍ਸਨੇਨ ਪਹਾਤਬ੍ਬਾ, ਸਿਯਾ ਭਾਵਨਾਯ ਪਹਾਤਬ੍ਬਾ, ਸਿਯਾ ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਾ. ਦਸਾਯਤਨਾ ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਹੇਤੁਕਾ. ਦ੍ਵਾਯਤਨਾ ਸਿਯਾ ਦਸ੍ਸਨੇਨ ਪਹਾਤਬ੍ਬਹੇਤੁਕਾ, ਸਿਯਾ ਭਾਵਨਾਯ ਪਹਾਤਬ੍ਬਹੇਤੁਕਾ, ਸਿਯਾ ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਹੇਤੁਕਾ. ਦਸਾਯਤਨਾ ਨੇਵਾਚਯਗਾਮਿਨਾਪਚਯਗਾਮਿਨੋ. ਦ੍ਵਾਯਤਨਾ ਸਿਯਾ ਆਚਯਗਾਮਿਨੋ, ਸਿਯਾ ਅਪਚਯਗਾਮਿਨੋ, ਸਿਯਾ ਨੇਵਾਚਯਗਾਮਿਨਾਪਚਯਗਾਮਿਨੋ. ਦਸਾਯਤਨਾ ਨੇਵਸੇਕ੍ਖਨਾਸੇਕ੍ਖਾ. ਦ੍ਵਾਯਤਨਾ ਸਿਯਾ ਸੇਕ੍ਖਾ, ਸਿਯਾ ਅਸੇਕ੍ਖਾ, ਸਿਯਾ ਨੇਵਸੇਕ੍ਖਨਾਸੇਕ੍ਖਾ. ਦਸਾਯਤਨਾ ਪਰਿਤ੍ਤਾ. ਦ੍ਵਾਯਤਨਾ ਸਿਯਾ ਪਰਿਤ੍ਤਾ, ਸਿਯਾ ਮਹਗ੍ਗਤਾ, ਸਿਯਾ ਅਪ੍ਪਮਾਣਾ. ਦਸਾਯਤਨਾ ਅਨਾਰਮ੍ਮਣਾ. ਦ੍ਵਾਯਤਨਾ ਸਿਯਾ ਪਰਿਤ੍ਤਾਰਮ੍ਮਣਾ, ਸਿਯਾ ਮਹਗ੍ਗਤਾਰਮ੍ਮਣਾ, ਸਿਯਾ ਅਪ੍ਪਮਾਣਾਰਮ੍ਮਣਾ, ਸਿਯਾ ਨ ਵਤ੍ਤਬ੍ਬਾ – ‘‘ਪਰਿਤ੍ਤਾਰਮ੍ਮਣਾ’’ਤਿਪਿ, ‘‘ਮਹਗ੍ਗਤਾਰਮ੍ਮਣਾ’’ਤਿਪਿ, ‘‘ਅਪ੍ਪਮਾਣਾਰਮ੍ਮਣਾ’’ਤਿਪਿ. ਦਸਾਯਤਨਾ ਮਜ੍ਝਿਮਾ. ਦ੍ਵਾਯਤਨਾ ਸਿਯਾ ਹੀਨਾ, ਸਿਯਾ ਮਜ੍ਝਿਮਾ, ਸਿਯਾ ਪਣੀਤਾ. ਦਸਾਯਤਨਾ ਅਨਿਯਤਾ. ਦ੍ਵਾਯਤਨਾ ਸਿਯਾ ਮਿਚ੍ਛਤ੍ਤਨਿਯਤਾ, ਸਿਯਾ ਸਮ੍ਮਤ੍ਤਨਿਯਤਾ, ਸਿਯਾ ਅਨਿਯਤਾ.

ਦਸਾਯਤਨਾ ਅਨਾਰਮ੍ਮਣਾ. ਦ੍ਵਾਯਤਨਾ ਸਿਯਾ ਮਗ੍ਗਾਰਮ੍ਮਣਾ, ਸਿਯਾ ਮਗ੍ਗਹੇਤੁਕਾ, ਸਿਯਾ ਮਗ੍ਗਾਧਿਪਤਿਨੋ, ਸਿਯਾ ਨ ਵਤ੍ਤਬ੍ਬਾ – ‘‘ਮਗ੍ਗਾਰਮ੍ਮਣਾ’’ਤਿਪਿ, ‘‘ਮਗ੍ਗਹੇਤੁਕਾ’’ਤਿਪਿ, ‘‘ਮਗ੍ਗਾਧਿਪਤਿਨੋ’’ਤਿਪਿ. ਪਞ੍ਚਾਯਤਨਾ ਸਿਯਾ ਉਪ੍ਪਨ੍ਨਾ, ਸਿਯਾ ਉਪ੍ਪਾਦਿਨੋ, ਨ ਵਤ੍ਤਬ੍ਬਾ – ‘‘ਅਨੁਪ੍ਪਨ੍ਨਾ’’ਤਿ. ਸਦ੍ਦਾਯਤਨਂ ਸਿਯਾ ਉਪ੍ਪਨ੍ਨਂ, ਸਿਯਾ ਅਨੁਪ੍ਪਨ੍ਨਂ, ਨ ਵਤ੍ਤਬ੍ਬਂ – ‘‘ਉਪ੍ਪਾਦੀ’’ਤਿ. ਪਞ੍ਚਾਯਤਨਾ ਸਿਯਾ ਉਪ੍ਪਨ੍ਨਾ, ਸਿਯਾ ਅਨੁਪ੍ਪਨ੍ਨਾ, ਸਿਯਾ ਉਪ੍ਪਾਦਿਨੋ. ਧਮ੍ਮਾਯਤਨਂ ਸਿਯਾ ਉਪ੍ਪਨ੍ਨਂ, ਸਿਯਾ ਅਨੁਪ੍ਪਨ੍ਨਂ, ਸਿਯਾ ਉਪ੍ਪਾਦਿ, ਸਿਯਾ ਨ ਵਤ੍ਤਬ੍ਬਂ – ‘‘ਉਪ੍ਪਨ੍ਨ’’ਨ੍ਤਿਪਿ, ‘‘ਅਨੁਪ੍ਪਨ੍ਨ’’ਨ੍ਤਿਪਿ, ‘‘ਉਪ੍ਪਾਦੀ’’ਤਿਪਿ. ਏਕਾਦਸਾਯਤਨਾ ਸਿਯਾ ਅਤੀਤਾ, ਸਿਯਾ ਅਨਾਗਤਾ, ਸਿਯਾ ਪਚ੍ਚੁਪ੍ਪਨ੍ਨਾ. ਧਮ੍ਮਾਯਤਨਂ ਸਿਯਾ ਅਤੀਤਂ, ਸਿਯਾ ਅਨਾਗਤਂ, ਸਿਯਾ ਪਚ੍ਚੁਪ੍ਪਨ੍ਨਂ, ਸਿਯਾ ਨ ਵਤ੍ਤਬ੍ਬਂ – ‘‘ਅਤੀਤ’’ਨ੍ਤਿਪਿ, ‘‘ਅਨਾਗਤ’’ਨ੍ਤਿਪਿ, ‘‘ਪਚ੍ਚੁਪ੍ਪਨ੍ਨ’’ਨ੍ਤਿਪਿ. ਦਸਾਯਤਨਾ ਅਨਾਰਮ੍ਮਣਾ. ਦ੍ਵਾਯਤਨਾ ਸਿਯਾ ਅਤੀਤਾਰਮ੍ਮਣਾ, ਸਿਯਾ ਅਨਾਗਤਾਰਮ੍ਮਣਾ, ਸਿਯਾ ਪਚ੍ਚੁਪ੍ਪਨ੍ਨਾਰਮ੍ਮਣਾ, ਸਿਯਾ ਨ ਵਤ੍ਤਬ੍ਬਾ – ‘‘ਅਤੀਤਾਰਮ੍ਮਣਾ’’ਤਿਪਿ, ‘‘ਅਨਾਗਤਾਰਮ੍ਮਣਾ’’ਤਿਪਿ, ‘‘ਪਚ੍ਚੁਪ੍ਪਨ੍ਨਾਰਮ੍ਮਣਾ’’ਤਿਪਿ; ਸਿਯਾ ਅਜ੍ਝਤ੍ਤਾ, ਸਿਯਾ ਬਹਿਦ੍ਧਾ, ਸਿਯਾ ਅਜ੍ਝਤ੍ਤਬਹਿਦ੍ਧਾ. ਦਸਾਯਤਨਾ ਅਨਾਰਮ੍ਮਣਾ. ਦ੍ਵਾਯਤਨਾ ਸਿਯਾ ਅਜ੍ਝਤ੍ਤਾਰਮ੍ਮਣਾ, ਸਿਯਾ ਬਹਿਦ੍ਧਾਰਮ੍ਮਣਾ, ਸਿਯਾ ਅਜ੍ਝਤ੍ਤਬਹਿਦ੍ਧਾਰਮ੍ਮਣਾ, ਸਿਯਾ ਨ ਵਤ੍ਤਬ੍ਬਾ – ‘‘ਅਜ੍ਝਤ੍ਤਾਰਮ੍ਮਣਾ’’ਤਿਪਿ, ‘‘ਬਹਿਦ੍ਧਾਰਮ੍ਮਣਾ’’ਤਿਪਿ, ‘‘ਅਜ੍ਝਤ੍ਤਬਹਿਦ੍ਧਾਰਮ੍ਮਣਾ’’ਤਿਪਿ. ਰੂਪਾਯਤਨਂ ਸਨਿਦਸ੍ਸਨਸਪ੍ਪਟਿਘਂ. ਨਵਾਯਤਨਾ ਅਨਿਦਸ੍ਸਨਸਪ੍ਪਟਿਘਾ. ਦ੍ਵਾਯਤਨਾ ਅਨਿਦਸ੍ਸਨਅਪ੍ਪਟਿਘਾ.

੨. ਦੁਕਂ

੧੭੧. ਏਕਾਦਸਾਯਤਨਾ ਨ ਹੇਤੂ. ਧਮ੍ਮਾਯਤਨਂ ਸਿਯਾ ਹੇਤੁ, ਸਿਯਾ ਨ ਹੇਤੁ. ਦਸਾਯਤਨਾ ਅਹੇਤੁਕਾ. ਦ੍ਵਾਯਤਨਾ ਸਿਯਾ ਸਹੇਤੁਕਾ, ਸਿਯਾ ਅਹੇਤੁਕਾ. ਦਸਾਯਤਨਾ ਹੇਤੁਵਿਪ੍ਪਯੁਤ੍ਤਾ. ਦ੍ਵਾਯਤਨਾ ਸਿਯਾ ਹੇਤੁਸਮ੍ਪਯੁਤ੍ਤਾ, ਸਿਯਾ ਹੇਤੁਵਿਪ੍ਪਯੁਤ੍ਤਾ. ਦਸਾਯਤਨਾ ਨ ਵਤ੍ਤਬ੍ਬਾ – ‘‘ਹੇਤੂ ਚੇਵ ਸਹੇਤੁਕਾ ਚਾ’’ਤਿਪਿ, ‘‘ਸਹੇਤੁਕਾ ਚੇਵ ਨ ਚ ਹੇਤੂ’’ਤਿਪਿ. ਮਨਾਯਤਨਂ ਨ ਵਤ੍ਤਬ੍ਬਂ – ‘‘ਹੇਤੁ ਚੇਵ ਸਹੇਤੁਕਞ੍ਚਾ’’ਤਿ, ਸਿਯਾ ਸਹੇਤੁਕਞ੍ਚੇਵ ਨ ਚ ਹੇਤੁ, ਸਿਯਾ ਨ ਵਤ੍ਤਬ੍ਬਂ – ‘‘ਸਹੇਤੁਕਞ੍ਚੇਵ ਨ ਚ ਹੇਤੂ’’ਤਿ. ਧਮ੍ਮਾਯਤਨਂ ਸਿਯਾ ਹੇਤੁ ਚੇਵ ਸਹੇਤੁਕਞ੍ਚ, ਸਿਯਾ ਸਹੇਤੁਕਞ੍ਚੇਵ ਨ ਚ ਹੇਤੁ, ਸਿਯਾ ਨ ਵਤ੍ਤਬ੍ਬਂ – ‘‘ਹੇਤੁ ਚੇਵ ਸਹੇਤੁਕਞ੍ਚਾ’’ਤਿਪਿ, ‘‘ਸਹੇਤੁਕਞ੍ਚੇਵ ਨ ਚ ਹੇਤੂ’’ਤਿਪਿ. ਦਸਾਯਤਨਾ ਨ ਵਤ੍ਤਬ੍ਬਾ – ‘‘ਹੇਤੂ ਚੇਵ ਹੇਤੁਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਹੇਤੁਸਮ੍ਪਯੁਤ੍ਤਾ ਚੇਵ ਨ ਚ ਹੇਤੂ’’ਤਿਪਿ. ਮਨਾਯਤਨਂ ਨ ਵਤ੍ਤਬ੍ਬਂ – ‘‘ਹੇਤੁ ਚੇਵ ਹੇਤੁਸਮ੍ਪਯੁਤ੍ਤਞ੍ਚਾ’’ਤਿ, ਸਿਯਾ ਹੇਤੁਸਮ੍ਪਯੁਤ੍ਤਞ੍ਚੇਵ ਨ ਚ ਹੇਤੁ, ਸਿਯਾ ਨ ਵਤ੍ਤਬ੍ਬਂ – ‘‘ਹੇਤੁਸਮ੍ਪਯੁਤ੍ਤਞ੍ਚੇਵ ਨ ਚ ਹੇਤੂ’’ਤਿ. ਧਮ੍ਮਾਯਤਨਂ ਸਿਯਾ ਹੇਤੁ ਚੇਵ ਹੇਤੁਸਮ੍ਪਯੁਤ੍ਤਞ੍ਚ, ਸਿਯਾ ਹੇਤੁਸਮ੍ਪਯੁਤ੍ਤਞ੍ਚੇਵ ਨ ਚ ਹੇਤੁ, ਸਿਯਾ ਨ ਵਤ੍ਤਬ੍ਬਂ – ‘‘ਹੇਤੁ ਚੇਵ ਹੇਤੁਸਮ੍ਪਯੁਤ੍ਤਞ੍ਚਾ’’ਤਿਪਿ, ‘‘ਹੇਤੁਸਮ੍ਪਯੁਤ੍ਤਞ੍ਚੇਵ ਨ ਚ ਹੇਤੂ’’ਤਿਪਿ. ਦਸਾਯਤਨਾ ਨ ਹੇਤੂਅਹੇਤੁਕਾ. ਮਨਾਯਤਨਂ ਸਿਯਾ ਨ ਹੇਤੁਸਹੇਤੁਕਂ, ਸਿਯਾ ਨ ਹੇਤੁਅਹੇਤੁਕਂ. ਧਮ੍ਮਾਯਤਨਂ ਸਿਯਾ ਨ ਹੇਤੁਸਹੇਤੁਕਂ, ਸਿਯਾ ਨ ਹੇਤੁਅਹੇਤੁਕਂ, ਸਿਯਾ ਨ ਵਤ੍ਤਬ੍ਬਂ – ‘‘ਨ ਹੇਤੁਸਹੇਤੁਕ’’ਨ੍ਤਿਪਿ, ‘‘ਨ ਹੇਤੁਅਹੇਤੁਕ’’ਨ੍ਤਿਪਿ.

ਏਕਾਦਸਾਯਤਨਾ ਸਪ੍ਪਚ੍ਚਯਾ. ਧਮ੍ਮਾਯਤਨਂ ਸਿਯਾ ਸਪ੍ਪਚ੍ਚਯਂ, ਸਿਯਾ ਅਪ੍ਪਚ੍ਚਯਂ. ਏਕਾਦਸਾਯਤਨਾ ਸਙ੍ਖਤਾ. ਧਮ੍ਮਾਯਤਨਂ ਸਿਯਾ ਸਙ੍ਖਤਂ, ਸਿਯਾ ਅਸਙ੍ਖਤਂ. ਰੂਪਾਯਤਨਂ ਸਨਿਦਸ੍ਸਨਂ. ਏਕਾਦਸਾਯਤਨਾ ਅਨਿਦਸ੍ਸਨਾ. ਦਸਾਯਤਨਾ ਸਪ੍ਪਟਿਘਾ. ਦ੍ਵਾਯਤਨਾ ਅਪ੍ਪਟਿਘਾ. ਦਸਾਯਤਨਾ ਰੂਪਾ. ਮਨਾਯਤਨਂ ਅਰੂਪਂ. ਧਮ੍ਮਾਯਤਨਂ ਸਿਯਾ ਰੂਪਂ, ਸਿਯਾ ਅਰੂਪਂ. ਦਸਾਯਤਨਾ ਲੋਕਿਯਾ. ਦ੍ਵਾਯਤਨਾ ਸਿਯਾ ਲੋਕਿਯਾ, ਸਿਯਾ ਲੋਕੁਤ੍ਤਰਾ; ਕੇਨਚਿ ਵਿਞ੍ਞੇਯ੍ਯਾ, ਕੇਨਚਿ ਨ ਵਿਞ੍ਞੇਯ੍ਯਾ.

ਏਕਾਦਸਾਯਤਨਾ ਨੋ ਆਸਵਾ. ਧਮ੍ਮਾਯਤਨਂ ਸਿਯਾ ਆਸਵੋ, ਸਿਯਾ ਨੋ ਆਸਵੋ. ਦਸਾਯਤਨਾ ਸਾਸਵਾ. ਦ੍ਵਾਯਤਨਾ ਸਿਯਾ ਸਾਸਵਾ, ਸਿਯਾ ਅਨਾਸਵਾ. ਦਸਾਯਤਨਾ ਆਸਵਵਿਪ੍ਪਯੁਤ੍ਤਾ. ਦ੍ਵਾਯਤਨਾ ਸਿਯਾ ਆਸਵਸਮ੍ਪਯੁਤ੍ਤਾ, ਸਿਯਾ ਆਸਵਵਿਪ੍ਪਯੁਤ੍ਤਾ. ਦਸਾਯਤਨਾ ਨ ਵਤ੍ਤਬ੍ਬਾ – ‘‘ਆਸਵਾ ਚੇਵ ਸਾਸਵਾ ਚਾ’’ਤਿ, ‘‘ਸਾਸਵਾ ਚੇਵ ਨੋ ਚ ਆਸਵਾ’’. ਮਨਾਯਤਨਂ ਨ ਵਤ੍ਤਬ੍ਬਂ – ‘‘ਆਸਵੋ ਚੇਵ ਸਾਸਵਞ੍ਚਾ’’ਤਿ, ਸਿਯਾ ਸਾਸਵਞ੍ਚੇਵ ਨੋ ਚ ਆਸਵੋ, ਸਿਯਾ ਨ ਵਤ੍ਤਬ੍ਬਂ – ‘‘ਸਾਸਵਞ੍ਚੇਵ ਨੋ ਚ ਆਸਵੋ’’ਤਿ. ਧਮ੍ਮਾਯਤਨਂ ਸਿਯਾ ਆਸਵੋ ਚੇਵ ਸਾਸਵਞ੍ਚ, ਸਿਯਾ ਸਾਸਵਞ੍ਚੇਵ ਨੋ ਚ ਆਸਵੋ, ਸਿਯਾ ਨ ਵਤ੍ਤਬ੍ਬਂ – ‘‘ਆਸਵੋ ਚੇਵ ਸਾਸਵਞ੍ਚਾ’’ਤਿਪਿ, ‘‘ਸਾਸਵਞ੍ਚੇਵ ਨੋ ਚ ਆਸਵੋ’’ਤਿਪਿ. ਦਸਾਯਤਨਾ ਨ ਵਤ੍ਤਬ੍ਬਾ – ‘‘ਆਸਵਾ ਚੇਵ ਆਸਵਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਆਸਵਸਮ੍ਪਯੁਤ੍ਤਾ ਚੇਵ ਨੋ ਚ ਆਸਵਾ’’ਤਿਪਿ. ਮਨਾਯਤਨਂ ਨ ਵਤ੍ਤਬ੍ਬਂ – ‘‘ਆਸਵੋ ਚੇਵ ਆਸਵਸਮ੍ਪਯੁਤ੍ਤਞ੍ਚਾ’’ਤਿ, ਸਿਯਾ ਆਸਵਸਮ੍ਪਯੁਤ੍ਤਞ੍ਚੇਵ ਨੋ ਚ ਆਸਵੋ, ਸਿਯਾ ਨ ਵਤ੍ਤਬ੍ਬਂ – ‘‘ਆਸਵਸਮ੍ਪਯੁਤ੍ਤਞ੍ਚੇਵ ਨੋ ਚ ਆਸਵੋ’’ਤਿ. ਧਮ੍ਮਾਯਤਨਂ ਸਿਯਾ ਆਸਵੋ ਚੇਵ ਆਸਵਸਮ੍ਪਯੁਤ੍ਤਞ੍ਚ, ਸਿਯਾ ਆਸਵਸਮ੍ਪਯੁਤ੍ਤਞ੍ਚੇਵ ਨੋ ਚ ਆਸਵੋ, ਸਿਯਾ ਨ ਵਤ੍ਤਬ੍ਬਂ – ‘‘ਆਸਵੋ ਚੇਵ ਆਸਵਸਮ੍ਪਯੁਤ੍ਤਞ੍ਚਾ’’ਤਿਪਿ, ‘‘ਆਸਵਸਮ੍ਪਯੁਤ੍ਤਞ੍ਚੇਵ ਨੋ ਚ ਆਸਵੋ’’ਤਿਪਿ. ਦਸਾਯਤਨਾ ਆਸਵਵਿਪ੍ਪਯੁਤ੍ਤਸਾਸਵਾ. ਦ੍ਵਾਯਤਨਾ ਸਿਯਾ ਆਸਵਵਿਪ੍ਪਯੁਤ੍ਤਸਾਸਵਾ, ਸਿਯਾ ਆਸਵਵਿਪ੍ਪਯੁਤ੍ਤਅਨਾਸਵਾ, ਸਿਯਾ ਨ ਵਤ੍ਤਬ੍ਬਾ – ‘‘ਆਸਵਵਿਪ੍ਪਯੁਤ੍ਤਸਾਸਵਾ’’ਤਿਪਿ, ‘‘ਆਸਵਵਿਪ੍ਪਯੁਤ੍ਤਅਨਾਸਵਾ’’ਤਿਪਿ.

ਏਕਾਦਸਾਯਤਨਾ ਨੋ ਸਂਯੋਜਨਾ. ਧਮ੍ਮਾਯਤਨਂ ਸਿਯਾ ਸਂਯੋਜਨਂ, ਸਿਯਾ ਨੋ ਸਂਯੋਜਨਂ. ਦਸਾਯਤਨਾ ਸਂਯੋਜਨਿਯਾ. ਦ੍ਵਾਯਤਨਾ ਸਿਯਾ ਸਂਯੋਜਨਿਯਾ, ਸਿਯਾ ਅਸਂਯੋਜਨਿਯਾ. ਦਸਾਯਤਨਾ ਸਂਯੋਜਨਵਿਪ੍ਪਯੁਤ੍ਤਾ. ਦ੍ਵਾਯਤਨਾ ਸਿਯਾ ਸਂਯੋਜਨਸਮ੍ਪਯੁਤ੍ਤਾ, ਸਿਯਾ ਸਂਯੋਜਨਵਿਪ੍ਪਯੁਤ੍ਤਾ. ਦਸਾਯਤਨਾ ਨ ਵਤ੍ਤਬ੍ਬਾ – ‘‘ਸਂਯੋਜਨਾ ਚੇਵ ਸਂਯੋਜਨਿਯਾ ਚਾ’’ਤਿ, ਸਂਯੋਜਨਿਯਾ ਚੇਵ ਨੋ ਚ ਸਂਯੋਜਨਾ. ਮਨਾਯਤਨਂ ਨ ਵਤ੍ਤਬ੍ਬਂ – ‘‘ਸਂਯੋਜਨਞ੍ਚੇਵ ਸਂਯੋਜਨਿਯਞ੍ਚਾ’’ਤਿ, ਸਿਯਾ ਸਂਯੋਜਨਿਯਞ੍ਚੇਵ ਨੋ ਚ ਸਂਯੋਜਨਂ, ਸਿਯਾ ਨ ਵਤ੍ਤਬ੍ਬਂ – ‘‘ਸਂਯੋਜਨਿਯਞ੍ਚੇਵ ਨੋ ਚ ਸਂਯੋਜਨ’’ਨ੍ਤਿ. ਧਮ੍ਮਾਯਤਨਂ ਸਿਯਾ ਸਂਯੋਜਨਞ੍ਚੇਵ ਸਂਯੋਜਨਿਯਞ੍ਚ, ਸਿਯਾ ਸਂਯੋਜਨਿਯਞ੍ਚੇਵ ਨੋ ਚ ਸਂਯੋਜਨਂ, ਸਿਯਾ ਨ ਵਤ੍ਤਬ੍ਬਂ – ‘‘ਸਂਯੋਜਨਞ੍ਚੇਵ ਸਂਯੋਜਨਿਯ’’ਨ੍ਤਿਪਿ, ‘‘ਸਂਯੋਜਨਿਯਞ੍ਚੇਵ ਨੋ ਚ ਸਂਯੋਜਨ’’ਨ੍ਤਿਪਿ. ਦਸਾਯਤਨਾ ਨ ਵਤ੍ਤਬ੍ਬਾ – ‘‘ਸਂਯੋਜਨਾ ਚੇਵ ਸਂਯੋਜਨਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਸਂਯੋਜਨਸਮ੍ਪਯੁਤ੍ਤਾ ਚੇਵ ਨੋ ਚ ਸਂਯੋਜਨਾ’’ਤਿਪਿ. ਮਨਾਯਤਨਂ ਨ ਵਤ੍ਤਬ੍ਬਂ – ‘‘ਸਂਯੋਜਨਞ੍ਚੇਵ ਸਂਯੋਜਨਸਮ੍ਪਯੁਤ੍ਤਞ੍ਚਾ’’ਤਿ, ਸਿਯਾ ਸਂਯੋਜਨਸਮ੍ਪਯੁਤ੍ਤਞ੍ਚੇਵ ਨੋ ਚ ਸਂਯੋਜਨਂ, ਸਿਯਾ ਨ ਵਤ੍ਤਬ੍ਬਂ – ‘‘ਸਂਯੋਜਨਸਮ੍ਪਯੁਤ੍ਤਞ੍ਚੇਵ ਨੋ ਚ ਸਂਯੋਜਨ’’ਨ੍ਤਿ. ਧਮ੍ਮਾਯਤਨਂ ਸਿਯਾ ਸਂਯੋਜਨਞ੍ਚੇਵ ਸਂਯੋਜਨਸਮ੍ਪਯੁਤ੍ਤਞ੍ਚ, ਸਿਯਾ ਸਂਯੋਜਨਸਮ੍ਪਯੁਤ੍ਤਞ੍ਚੇਵ ਨੋ ਚ ਸਂਯੋਜਨਂ, ਸਿਯਾ ਨ ਵਤ੍ਤਬ੍ਬਂ – ‘‘ਸਂਯੋਜਨਞ੍ਚੇਵ ਸਂਯੋਜਨਸਮ੍ਪਯੁਤ੍ਤਞ੍ਚਾ’’ਤਿਪਿ, ‘‘ਸਂਯੋਜਨਸਮ੍ਪਯੁਤ੍ਤਞ੍ਚੇਵ ਨੋ ਚ ਸਂਯੋਜਨ’’ਨ੍ਤਿਪਿ. ਦਸਾਯਤਨਾ ਸਂਯੋਜਨਵਿਪ੍ਪਯੁਤ੍ਤਸਂਯੋਜਨਿਯਾ. ਦ੍ਵਾਯਤਨਾ ਸਿਯਾ ਸਂਯੋਜਨਵਿਪ੍ਪਯੁਤ੍ਤਸਂਯੋਜਨਿਯਾ, ਸਿਯਾ ਸਂਯੋਜਨਵਿਪ੍ਪਯੁਤ੍ਤਅਸਂਯੋਜਨਿਯਾ, ਸਿਯਾ ਨ ਵਤ੍ਤਬ੍ਬਾ – ‘‘ਸਂਯੋਜਨਵਿਪ੍ਪਯੁਤ੍ਤਸਂਯੋਜਨਿਯਾ’’ਤਿਪਿ, ‘‘ਸਂਯੋਜਨਵਿਪ੍ਪਯੁਤ੍ਤਅਸਂਯੋਜਨਿਯਾ’’ਤਿਪਿ.

ਏਕਾਦਸਾਯਤਨਾ ਨੋ ਗਨ੍ਥਾ. ਧਮ੍ਮਾਯਤਨਂ ਸਿਯਾ ਗਨ੍ਥੋ, ਸਿਯਾ ਨੋ ਗਨ੍ਥੋ. ਦਸਾਯਤਨਾ ਗਨ੍ਥਨਿਯਾ. ਦ੍ਵਾਯਤਨਾ ਸਿਯਾ ਗਨ੍ਥਨਿਯਾ, ਸਿਯਾ ਅਗਨ੍ਥਨਿਯਾ. ਦਸਾਯਤਨਾ ਗਨ੍ਥਵਿਪ੍ਪਯੁਤ੍ਤਾ. ਦ੍ਵਾਯਤਨਾ ਸਿਯਾ ਗਨ੍ਥਸਮ੍ਪਯੁਤ੍ਤਾ, ਸਿਯਾ ਗਨ੍ਥਵਿਪ੍ਪਯੁਤ੍ਤਾ. ਦਸਾਯਤਨਾ ਨ ਵਤ੍ਤਬ੍ਬਾ – ‘‘ਗਨ੍ਥਾ ਚੇਵ ਗਨ੍ਥਨਿਯਾ ਚਾ’’ਤਿ, ਗਨ੍ਥਨਿਯਾ ਚੇਵ ਨੋ ਚ ਗਨ੍ਥਾ. ਮਨਾਯਤਨਂ ਨ ਵਤ੍ਤਬ੍ਬਂ – ‘‘ਗਨ੍ਥੋ ਚੇਵ ਗਨ੍ਥਨਿਯਞ੍ਚਾ’’ਤਿ, ਸਿਯਾ ਗਨ੍ਥਨਿਯਞ੍ਚੇਵ ਨੋ ਚ ਗਨ੍ਥੋ, ਸਿਯਾ ਨ ਵਤ੍ਤਬ੍ਬਂ – ‘‘ਗਨ੍ਥਨਿਯਞ੍ਚੇਵ ਨੋ ਚ ਗਨ੍ਥੋ’’ਤਿ. ਧਮ੍ਮਾਯਤਨਂ ਸਿਯਾ ਗਨ੍ਥੋ ਚੇਵ ਗਨ੍ਥਨਿਯਞ੍ਚ, ਸਿਯਾ ਗਨ੍ਥਨਿਯਞ੍ਚੇਵ ਨੋ ਚ ਗਨ੍ਥੋ, ਸਿਯਾ ਨ ਵਤ੍ਤਬ੍ਬਂ – ‘‘ਗਨ੍ਥੋ ਚੇਵ ਗਨ੍ਥਨਿਯਞ੍ਚਾ’’ਤਿਪਿ, ‘‘ਗਨ੍ਥਨਿਯਞ੍ਚੇਵ ਨੋ ਚ ਗਨ੍ਥੋ’’ਤਿਪਿ. ਦਸਾਯਤਨਾ ਨ ਵਤ੍ਤਬ੍ਬਾ – ‘‘ਗਨ੍ਥਾ ਚੇਵ ਗਨ੍ਥਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਗਨ੍ਥਸਮ੍ਪਯੁਤ੍ਤਾ ਚੇਵ ਨੋ ਚ ਗਨ੍ਥਾ’’ਤਿਪਿ. ਮਨਾਯਤਨਂ ਨ ਵਤ੍ਤਬ੍ਬਂ – ‘‘ਗਨ੍ਥੋ ਚੇਵ ਗਨ੍ਥਸਮ੍ਪਯੁਤ੍ਤਞ੍ਚਾ’’ਤਿ, ਸਿਯਾ ਗਨ੍ਥਸਮ੍ਪਯੁਤ੍ਤਞ੍ਚੇਵ ਨੋ ਚ ਗਨ੍ਥੋ, ਸਿਯਾ ਨ ਵਤ੍ਤਬ੍ਬਂ – ‘‘ਗਨ੍ਥਸਮ੍ਪਯੁਤ੍ਤਞ੍ਚੇਵ ਨੋ ਚ ਗਨ੍ਥੋ’’ਤਿ. ਧਮ੍ਮਾਯਤਨਂ ਸਿਯਾ ਗਨ੍ਥੋ ਚੇਵ ਗਨ੍ਥਸਮ੍ਪਯੁਤ੍ਤਞ੍ਚ, ਸਿਯਾ ਗਨ੍ਥਸਮ੍ਪਯੁਤ੍ਤਞ੍ਚੇਵ ਨੋ ਚ ਗਨ੍ਥੋ, ਸਿਯਾ ਨ ਵਤ੍ਤਬ੍ਬਂ – ‘‘ਗਨ੍ਥੋ ਚੇਵ ਗਨ੍ਥਸਮ੍ਪਯੁਤ੍ਤਞ੍ਚਾ’’ਤਿਪਿ, ‘‘ਗਨ੍ਥਸਮ੍ਪਯੁਤ੍ਤਞ੍ਚੇਵ ਨੋ ਚ ਗਨ੍ਥੋ’’ਤਿਪਿ. ਦਸਾਯਤਨਾ ਗਨ੍ਥਵਿਪ੍ਪਯੁਤ੍ਤਗਨ੍ਥਨਿਯਾ. ਦ੍ਵਾਯਤਨਾ ਸਿਯਾ ਗਨ੍ਥਵਿਪ੍ਪਯੁਤ੍ਤਗਨ੍ਥਨਿਯਾ, ਸਿਯਾ ਗਨ੍ਥਵਿਪ੍ਪਯੁਤ੍ਤਅਗਨ੍ਥਨਿਯਾ, ਸਿਯਾ ਨ ਵਤ੍ਤਬ੍ਬਾ – ‘‘ਗਨ੍ਥਵਿਪ੍ਪਯੁਤ੍ਤਗਨ੍ਥਨਿਯਾ’’ਤਿਪਿ, ‘‘ਗਨ੍ਥਵਿਪ੍ਪਯੁਤ੍ਤਅਗਨ੍ਥਨਿਯਾ’’ਤਿਪਿ.

ਏਕਾਦਸਾਯਤਨਾ ਨੋ ਓਘਾ…ਪੇ… ਨੋ ਯੋਗਾ…ਪੇ… ਨੋ ਨੀਵਰਣਾ. ਧਮ੍ਮਾਯਤਨਂ ਸਿਯਾ ਨੀਵਰਣਂ, ਸਿਯਾ ਨੋ ਨੀਵਰਣਂ. ਦਸਾਯਤਨਾ ਨੀਵਰਣਿਯਾ. ਦ੍ਵਾਯਤਨਾ ਸਿਯਾ ਨੀਵਰਣਿਯਾ, ਸਿਯਾ ਅਨੀਵਰਣਿਯਾ. ਦਸਾਯਤਨਾ ਨੀਵਰਣਵਿਪ੍ਪਯੁਤ੍ਤਾ. ਦ੍ਵਾਯਤਨਾ ਸਿਯਾ ਨੀਵਰਣਸਮ੍ਪਯੁਤ੍ਤਾ, ਸਿਯਾ ਨੀਵਰਣਵਿਪ੍ਪਯੁਤ੍ਤਾ. ਦਸਾਯਤਨਾ ਨ ਵਤ੍ਤਬ੍ਬਾ – ‘‘ਨੀਵਰਣਾ ਚੇਵ ਨੀਵਰਣਿਯਾ ਚਾ’’ਤਿ, ਨੀਵਰਣਿਯਾ ਚੇਵ ਨੋ ਚ ਨੀਵਰਣਾ. ਮਨਾਯਤਨਂ ਨ ਵਤ੍ਤਬ੍ਬਂ – ‘‘ਨੀਵਰਣਞ੍ਚੇਵ ਨੀਵਰਣਿਯਞ੍ਚਾ’’ਤਿ, ਸਿਯਾ ਨੀਵਰਣਿਯਞ੍ਚੇਵ ਨੋ ਚ ਨੀਵਰਣਂ, ਸਿਯਾ ਨ ਵਤ੍ਤਬ੍ਬਂ – ‘‘ਨੀਵਰਣਿਯਞ੍ਚੇਵ ਨੋ ਚ ਨੀਵਰਣ’’ਨ੍ਤਿ. ਧਮ੍ਮਾਯਤਨਂ ਸਿਯਾ ਨੀਵਰਣਞ੍ਚੇਵ ਨੀਵਰਣਿਯਞ੍ਚ, ਸਿਯਾ ਨੀਵਰਣਿਯਞ੍ਚੇਵ ਨੋ ਚ ਨੀਵਰਣਂ, ਸਿਯਾ ਨ ਵਤ੍ਤਬ੍ਬਂ – ‘‘ਨੀਵਰਣਞ੍ਚੇਵ ਨੀਵਰਣਿਯਞ੍ਚਾ’’ਤਿਪਿ, ‘‘ਨੀਵਰਣਿਯਞ੍ਚੇਵ ਨੋ ਚ ਨੀਵਰਣ’’ਨ੍ਤਿਪਿ. ਦਸਾਯਤਨਾ ਨ ਵਤ੍ਤਬ੍ਬਾ – ‘‘ਨੀਵਰਣਾ ਚੇਵ ਨੀਵਰਣਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਨੀਵਰਣਸਮ੍ਪਯੁਤ੍ਤਾ ਚੇਵ ਨੋ ਚ ਨੀਵਰਣਾ’’ਤਿਪਿ. ਮਨਾਯਤਨਂ ਨ ਵਤ੍ਤਬ੍ਬਂ – ‘‘ਨੀਵਰਣਞ੍ਚੇਵ ਨੀਵਰਣਸਮ੍ਪਯੁਤ੍ਤਞ੍ਚਾ’’ਤਿ, ਸਿਯਾ ਨੀਵਰਣਸਮ੍ਪਯੁਤ੍ਤਞ੍ਚੇਵ ਨੋ ਚ ਨੀਵਰਣਂ, ਸਿਯਾ ਨ ਵਤ੍ਤਬ੍ਬਂ – ‘‘ਨੀਵਰਣਸਮ੍ਪਯੁਤ੍ਤਞ੍ਚੇਵ ਨੋ ਚ ਨੀਵਰਣ’’ਨ੍ਤਿ. ਧਮ੍ਮਾਯਤਨਂ ਸਿਯਾ ਨੀਵਰਣਞ੍ਚੇਵ ਨੀਵਰਣਸਮ੍ਪਯੁਤ੍ਤਞ੍ਚ, ਸਿਯਾ ਨੀਵਰਣਸਮ੍ਪਯੁਤ੍ਤਞ੍ਚੇਵ ਨੋ ਚ ਨੀਵਰਣਂ, ਸਿਯਾ ਨ ਵਤ੍ਤਬ੍ਬਂ – ‘‘ਨੀਵਰਣਞ੍ਚੇਵ ਨੀਵਰਣਸਮ੍ਪਯੁਤ੍ਤਞ੍ਚਾ’’ਤਿਪਿ, ‘‘ਨੀਵਰਣਸਮ੍ਪਯੁਤ੍ਤਞ੍ਚੇਵ ਨੋ ਚ ਨੀਵਰਣ’’ਨ੍ਤਿਪਿ. ਦਸਾਯਤਨਾ ਨੀਵਰਣਵਿਪ੍ਪਯੁਤ੍ਤਨੀਵਰਣਿਯਾ. ਦ੍ਵਾਯਤਨਾ ਸਿਯਾ ਨੀਵਰਣਵਿਪ੍ਪਯੁਤ੍ਤਨੀਵਰਣਿਯਾ, ਸਿਯਾ ਨੀਵਰਣਵਿਪ੍ਪਯੁਤ੍ਤਅਨੀਵਰਣਿਯਾ, ਸਿਯਾ ਨ ਵਤ੍ਤਬ੍ਬਾ – ‘‘ਨੀਵਰਣਵਿਪ੍ਪਯੁਤ੍ਤਨੀਵਰਣਿਯਾ’’ਤਿਪਿ, ‘‘ਨੀਵਰਣਵਿਪ੍ਪਯੁਤ੍ਤਅਨੀਵਰਣਿਯਾ’’ਤਿਪਿ.

ਏਕਾਦਸਾਯਤਨਾ ਨੋ ਪਰਾਮਾਸਾ. ਧਮ੍ਮਾਯਤਨਂ ਸਿਯਾ ਪਰਾਮਾਸੋ, ਸਿਯਾ ਨੋ ਪਰਾਮਾਸੋ. ਦਸਾਯਤਨਾ ਪਰਾਮਟ੍ਠਾ. ਦ੍ਵਾਯਤਨਾ ਸਿਯਾ ਪਰਾਮਟ੍ਠਾ, ਸਿਯਾ ਅਪਰਾਮਟ੍ਠਾ. ਦਸਾਯਤਨਾ ਪਰਾਮਾਸਵਿਪ੍ਪਯੁਤ੍ਤਾ. ਮਨਾਯਤਨਂ ਸਿਯਾ ਪਰਾਮਾਸਸਮ੍ਪਯੁਤ੍ਤਂ, ਸਿਯਾ ਪਰਾਮਾਸਵਿਪ੍ਪਯੁਤ੍ਤਂ. ਧਮ੍ਮਾਯਤਨਂ ਸਿਯਾ ਪਰਾਮਾਸਸਮ੍ਪਯੁਤ੍ਤਂ, ਸਿਯਾ ਪਰਾਮਾਸਵਿਪ੍ਪਯੁਤ੍ਤਂ, ਸਿਯਾ ਨ ਵਤ੍ਤਬ੍ਬਂ – ‘‘ਪਰਾਮਾਸਸਮ੍ਪਯੁਤ੍ਤ’’ਨ੍ਤਿਪਿ, ‘‘ਪਰਾਮਾਸਵਿਪ੍ਪਯੁਤ੍ਤ’’ਨ੍ਤਿਪਿ. ਦਸਾਯਤਨਾ ਨ ਵਤ੍ਤਬ੍ਬਾ – ‘‘ਪਰਾਮਾਸਾ ਚੇਵ ਪਰਾਮਟ੍ਠਾ ਚਾ’’ਤਿ, ‘‘ਪਰਾਮਟ੍ਠਾ ਚੇਵ ਨੋ ਚ ਪਰਾਮਾਸਾ’’. ਮਨਾਯਤਨਂ ਨ ਵਤ੍ਤਬ੍ਬਂ – ‘‘ਪਰਾਮਾਸੋ ਚੇਵ ਪਰਾਮਟ੍ਠਞ੍ਚਾ’’ਤਿ, ਸਿਯਾ ਪਰਾਮਟ੍ਠਞ੍ਚੇਵ ਨੋ ਚ ਪਰਾਮਾਸੋ, ਸਿਯਾ ਨ ਵਤ੍ਤਬ੍ਬਂ – ‘‘ਪਰਾਮਟ੍ਠਞ੍ਚੇਵ ਨੋ ਚ ਪਰਾਮਾਸੋ’’ਤਿ. ਧਮ੍ਮਾਯਤਨਂ ਸਿਯਾ ਪਰਾਮਾਸੋ ਚੇਵ ਪਰਾਮਟ੍ਠਞ੍ਚ, ਸਿਯਾ ਪਰਾਮਟ੍ਠਞ੍ਚੇਵ ਨੋ ਚ ਪਰਾਮਾਸੋ, ਸਿਯਾ ਨ ਵਤ੍ਤਬ੍ਬਂ – ‘‘ਪਰਾਮਾਸੋ ਚੇਵ ਪਰਾਮਟ੍ਠਞ੍ਚਾ’’ਤਿਪਿ, ‘‘ਪਰਾਮਟ੍ਠਞ੍ਚੇਵ ਨੋ ਚ ਪਰਾਮਾਸੋ’’ਤਿਪਿ. ਦਸਾਯਤਨਾ ਪਰਾਮਾਸਵਿਪ੍ਪਯੁਤ੍ਤਪਰਾਮਟ੍ਠਾ. ਦ੍ਵਾਯਤਨਾ ਸਿਯਾ ਪਰਾਮਾਸਵਿਪ੍ਪਯੁਤ੍ਤਪਰਾਮਟ੍ਠਾ, ਸਿਯਾ ਪਰਾਮਾਸਵਿਪ੍ਪਯੁਤ੍ਤਅਪਰਾਮਟ੍ਠਾ, ਸਿਯਾ ਨ ਵਤ੍ਤਬ੍ਬਾ – ‘‘ਪਰਾਮਾਸਵਿਪ੍ਪਯੁਤ੍ਤਪਰਾਮਟ੍ਠਾ’’ਤਿਪਿ, ‘‘ਪਰਾਮਾਸਵਿਪ੍ਪਯੁਤ੍ਤਅਪਰਾਮਟ੍ਠਾ’’ਤਿਪਿ.

ਦਸਾਯਤਨਾ ਅਨਾਰਮ੍ਮਣਾ. ਮਨਾਯਤਨਂ ਸਾਰਮ੍ਮਣਂ. ਧਮ੍ਮਾਯਤਨਂ ਸਿਯਾ ਸਾਰਮ੍ਮਣਂ, ਸਿਯਾ ਅਨਾਰਮ੍ਮਣਂ. ਮਨਾਯਤਨਂ ਚਿਤ੍ਤਂ. ਏਕਾਦਸਾਯਤਨਾ ਨੋ ਚਿਤ੍ਤਾ. ਏਕਾਦਸਾਯਤਨਾ ਅਚੇਤਸਿਕਾ. ਧਮ੍ਮਾਯਤਨਂ ਸਿਯਾ ਚੇਤਸਿਕਂ, ਸਿਯਾ ਅਚੇਤਸਿਕਂ. ਦਸਾਯਤਨਾ ਚਿਤ੍ਤਵਿਪ੍ਪਯੁਤ੍ਤਾ. ਧਮ੍ਮਾਯਤਨਂ ਸਿਯਾ ਚਿਤ੍ਤਸਮ੍ਪਯੁਤ੍ਤਂ, ਸਿਯਾ ਚਿਤ੍ਤਵਿਪ੍ਪਯੁਤ੍ਤਂ. ਮਨਾਯਤਨਂ ਨ ਵਤ੍ਤਬ੍ਬਂ – ‘‘ਚਿਤ੍ਤੇਨ ਸਮ੍ਪਯੁਤ੍ਤ’’ਨ੍ਤਿਪਿ, ‘‘ਚਿਤ੍ਤੇਨ ਵਿਪ੍ਪਯੁਤ੍ਤ’’ਨ੍ਤਿਪਿ. ਦਸਾਯਤਨਾ ਚਿਤ੍ਤਵਿਸਂਸਟ੍ਠਾ. ਧਮ੍ਮਾਯਤਨਂ ਸਿਯਾ ਚਿਤ੍ਤਸਂਸਟ੍ਠਂ, ਸਿਯਾ ਚਿਤ੍ਤਵਿਸਂਸਟ੍ਠਂ. ਮਨਾਯਤਨਂ ਨ ਵਤ੍ਤਬ੍ਬਂ – ‘‘ਚਿਤ੍ਤੇਨ ਸਂਸਟ੍ਠ’’ਨ੍ਤਿਪਿ, ‘‘ਚਿਤ੍ਤੇਨ ਵਿਸਂਸਟ੍ਠ’’ਨ੍ਤਿਪਿ. ਛਾਯਤਨਾ ਨੋ ਚਿਤ੍ਤਸਮੁਟ੍ਠਾਨਾ. ਛਾਯਤਨਾ ਸਿਯਾ ਚਿਤ੍ਤਸਮੁਟ੍ਠਾਨਾ, ਸਿਯਾ ਨੋ ਚਿਤ੍ਤਸਮੁਟ੍ਠਾਨਾ. ਏਕਾਦਸਾਯਤਨਾ ਨੋ ਚਿਤ੍ਤਸਹਭੁਨੋ. ਧਮ੍ਮਾਯਤਨਂ ਸਿਯਾ ਚਿਤ੍ਤਸਹਭੂ, ਸਿਯਾ ਨੋ ਚਿਤ੍ਤਸਹਭੂ. ਏਕਾਦਸਾਯਤਨਾ ਨੋ ਚਿਤ੍ਤਾਨੁਪਰਿਵਤ੍ਤਿਨੋ. ਧਮ੍ਮਾਯਤਨਂ ਸਿਯਾ ਚਿਤ੍ਤਾਨੁਪਰਿਵਤ੍ਤਿ, ਸਿਯਾ ਨੋ ਚਿਤ੍ਤਾਨੁਪਰਿਵਤ੍ਤਿ. ਏਕਾਦਸਾਯਤਨਾ ਨੋ ਚਿਤ੍ਤਸਂਸਟ੍ਠਸਮੁਟ੍ਠਾਨਾ. ਧਮ੍ਮਾਯਤਨਂ ਸਿਯਾ ਚਿਤ੍ਤਸਂਸਟ੍ਠਸਮੁਟ੍ਠਾਨਂ, ਸਿਯਾ ਨੋ ਚਿਤ੍ਤਸਂਸਟ੍ਠਸਮੁਟ੍ਠਾਨਂ. ਏਕਾਦਸਾਯਤਨਾ ਨੋ ਚਿਤ੍ਤਸਂਸਟ੍ਠਸਮੁਟ੍ਠਾਨਸਹਭੁਨੋ. ਧਮ੍ਮਾਯਤਨਂ ਸਿਯਾ ਚਿਤ੍ਤਸਂਸਟ੍ਠਸਮੁਟ੍ਠਾਨਸਹਭੂ, ਸਿਯਾ ਨੋ ਚਿਤ੍ਤਸਂਸਟ੍ਠਸਮੁਟ੍ਠਾਨਸਹਭੂ. ਏਕਾਦਸਾਯਤਨਾ ਨੋ ਚਿਤ੍ਤਸਂਸਟ੍ਠਸਮੁਟ੍ਠਾਨਾਨੁਪਰਿਵਤ੍ਤਿਨੋ. ਧਮ੍ਮਾਯਤਨਂ ਸਿਯਾ ਚਿਤ੍ਤਸਂਸਟ੍ਠਸਮੁਟ੍ਠਾਨਾਨੁਪਰਿਵਤ੍ਤਿ, ਸਿਯਾ ਨੋ ਚਿਤ੍ਤਸਂਸਟ੍ਠਸਮੁਟ੍ਠਾਨਾਨੁਪਰਿਵਤ੍ਤਿ.

ਛਾਯਤਨਾ ਅਜ੍ਝਤ੍ਤਿਕਾ. ਛਾਯਤਨਾ ਬਾਹਿਰਾ. ਨਵਾਯਤਨਾ ਉਪਾਦਾ. ਦ੍ਵਾਯਤਨਾ ਨੋ ਉਪਾਦਾ. ਧਮ੍ਮਾਯਤਨਂ ਸਿਯਾ ਉਪਾਦਾ, ਸਿਯਾ ਨੋ ਉਪਾਦਾ. ਪਞ੍ਚਾਯਤਨਾ ਉਪਾਦਿਨ੍ਨਾ. ਸਦ੍ਦਾਯਤਨਂ ਅਨੁਪਾਦਿਨ੍ਨਂ. ਛਾਯਤਨਾ ਸਿਯਾ ਉਪਾਦਿਨ੍ਨਾ, ਸਿਯਾ ਅਨੁਪਾਦਿਨ੍ਨਾ. ਏਕਾਦਸਾਯਤਨਾ ਨੋ ਉਪਾਦਾਨਾ. ਧਮ੍ਮਾਯਤਨਂ ਸਿਯਾ ਉਪਾਦਾਨਂ, ਸਿਯਾ ਨੋ ਉਪਾਦਾਨਂ. ਦਸਾਯਤਨਾ ਉਪਾਦਾਨਿਯਾ. ਦ੍ਵਾਯਤਨਾ ਸਿਯਾ ਉਪਾਦਾਨਿਯਾ, ਸਿਯਾ ਅਨੁਪਾਦਾਨਿਯਾ. ਦਸਾਯਤਨਾ ਉਪਾਦਾਨਵਿਪ੍ਪਯੁਤ੍ਤਾ. ਦ੍ਵਾਯਤਨਾ ਸਿਯਾ ਉਪਾਦਾਨਸਮ੍ਪਯੁਤ੍ਤਾ, ਸਿਯਾ ਉਪਾਦਾਨਵਿਪ੍ਪਯੁਤ੍ਤਾ. ਦਸਾਯਤਨਾ ਨ ਵਤ੍ਤਬ੍ਬਾ – ‘‘ਉਪਾਦਾਨਾ ਚੇਵ ਉਪਾਦਾਨਿਯਾ ਚਾ’’ਤਿ, ਉਪਾਦਾਨਿਯਾ ਚੇਵ ਨੋ ਚ ਉਪਾਦਾਨਾ. ਮਨਾਯਤਨਂ ਨ ਵਤ੍ਤਬ੍ਬਂ – ‘‘ਉਪਾਦਾਨਞ੍ਚੇਵ ਉਪਾਦਾਨਿਯਞ੍ਚਾ’’ਤਿ, ਸਿਯਾ ਉਪਾਦਾਨਿਯਞ੍ਚੇਵ ਨੋ ਚ ਉਪਾਦਾਨਂ, ਸਿਯਾ ਨ ਵਤ੍ਤਬ੍ਬਂ – ‘‘ਉਪਾਦਾਨਿਯਞ੍ਚੇਵ ਨੋ ਚ ਉਪਾਦਾਨ’’ਨ੍ਤਿ. ਧਮ੍ਮਾਯਤਨਂ ਸਿਯਾ ਉਪਾਦਾਨਞ੍ਚੇਵ ਉਪਾਦਾਨਿਯਞ੍ਚ, ਸਿਯਾ ਉਪਾਦਾਨਿਯਞ੍ਚੇਵ ਨੋ ਚ ਉਪਾਦਾਨਂ, ਸਿਯਾ ਨ ਵਤ੍ਤਬ੍ਬਂ – ‘‘ਉਪਾਦਾਨਞ੍ਚੇਵ ਉਪਾਦਾਨਿਯਞ੍ਚਾ’’ਤਿਪਿ, ‘‘ਉਪਾਦਾਨਿਯਞ੍ਚੇਵ ਨੋ ਚ ਉਪਾਦਾਨ’’ਨ੍ਤਿਪਿ. ਦਸਾਯਤਨਾ ਨ ਵਤ੍ਤਬ੍ਬਾ – ‘‘ਉਪਾਦਾਨਾ ਚੇਵ ਉਪਾਦਾਨਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਉਪਾਦਾਨਸਮ੍ਪਯੁਤ੍ਤਾ ਚੇਵ ਨੋ ਚ ਉਪਾਦਾਨਾ’’ਤਿਪਿ. ਮਨਾਯਤਨਂ ਨ ਵਤ੍ਤਬ੍ਬਂ – ‘‘ਉਪਾਦਾਨਿਯਞ੍ਚੇਵ ਉਪਾਦਾਨਸਮ੍ਪਯੁਤ੍ਤਞ੍ਚਾ’’ਤਿ, ਸਿਯਾ ਉਪਾਦਾਨਸਮ੍ਪਯੁਤ੍ਤਞ੍ਚੇਵ ਨੋ ਚ ਉਪਾਦਾਨਂ, ਸਿਯਾ ਨ ਵਤ੍ਤਬ੍ਬਂ – ‘‘ਉਪਾਦਾਨਸਮ੍ਪਯੁਤ੍ਤਞ੍ਚੇਵ ਨੋ ਚ ਉਪਾਦਾਨ’’ਨ੍ਤਿ. ਧਮ੍ਮਾਯਤਨਂ ਸਿਯਾ ਉਪਾਦਾਨਞ੍ਚੇਵ ਉਪਾਦਾਨਸਮ੍ਪਯੁਤ੍ਤਞ੍ਚ, ਸਿਯਾ ਉਪਾਦਾਨਸਮ੍ਪਯੁਤ੍ਤਞ੍ਚੇਵ ਨੋ ਚ ਉਪਾਦਾਨਂ, ਸਿਯਾ ਨ ਵਤ੍ਤਬ੍ਬਂ – ‘‘ਉਪਾਦਾਨਞ੍ਚੇਵ ਉਪਾਦਾਨਸਮ੍ਪਯੁਤ੍ਤਞ੍ਚਾ’’ਤਿਪਿ, ‘‘ਉਪਾਦਾਨਸਮ੍ਪਯੁਤ੍ਤਞ੍ਚੇਵ ਨੋ ਚ ਉਪਾਦਾਨ’’ਨ੍ਤਿਪਿ. ਦਸਾਯਤਨਾ ਉਪਾਦਾਨਵਿਪ੍ਪਯੁਤ੍ਤਉਪਾਦਾਨਿਯਾ. ਦ੍ਵਾਯਤਨਾ ਸਿਯਾ ਉਪਾਦਾਨਸਮ੍ਪਯੁਤ੍ਤਉਪਾਦਾਨਿਯਾ, ਸਿਯਾ ਉਪਾਦਾਨਵਿਪ੍ਪਯੁਤ੍ਤਅਨੁਪਾਦਾਨਿਯਾ, ਸਿਯਾ ਨ ਵਤ੍ਤਬ੍ਬਾ – ‘‘ਉਪਾਦਾਨਵਿਪ੍ਪਯੁਤ੍ਤਉਪਾਦਾਨਿਯਾ’’ਤਿਪਿ, ‘‘ਉਪਾਦਾਨਵਿਪ੍ਪਯੁਤ੍ਤਅਨੁਪਾਦਾਨਿਯਾ’’ਤਿਪਿ.

ਏਕਾਦਸਾਯਤਨਾ ਨੋ ਕਿਲੇਸਾ. ਧਮ੍ਮਾਯਤਨਂ ਸਿਯਾ ਕਿਲੇਸੋ, ਸਿਯਾ ਨੋ ਕਿਲੇਸੋ. ਦਸਾਯਤਨਾ ਸਂਕਿਲੇਸਿਕਾ. ਦ੍ਵਾਯਤਨਾ ਸਿਯਾ ਸਂਕਿਲੇਸਿਕਾ, ਸਿਯਾ ਅਸਂਕਿਲੇਸਿਕਾ. ਦਸਾਯਤਨਾ ਅਸਂਕਿਲਿਟ੍ਠਾ. ਦ੍ਵਾਯਤਨਾ ਸਿਯਾ ਸਂਕਿਲਿਟ੍ਠਾ, ਸਿਯਾ ਅਸਂਕਿਲਿਟ੍ਠਾ. ਦਸਾਯਤਨਾ ਕਿਲੇਸਵਿਪ੍ਪਯੁਤ੍ਤਾ. ਦ੍ਵਾਯਤਨਾ ਸਿਯਾ ਕਿਲੇਸਸਮ੍ਪਯੁਤ੍ਤਾ, ਸਿਯਾ ਕਿਲੇਸਵਿਪ੍ਪਯੁਤ੍ਤਾ. ਦਸਾਯਤਨਾ ਨ ਵਤ੍ਤਬ੍ਬਾ – ‘‘ਕਿਲੇਸਾ ਚੇਵ ਸਂਕਿਲੇਸਿਕਾ ਚਾ’’ਤਿ, ‘‘ਸਂਕਿਲੇਸਿਕਾ ਚੇਵ ਨੋ ਚ ਕਿਲੇਸਾ’’. ਮਨਾਯਤਨਂ ਨ ਵਤ੍ਤਬ੍ਬਂ – ‘‘ਕਿਲੇਸੋ ਚੇਵ ਸਂਕਿਲੇਸਿਕਞ੍ਚਾ’’ਤਿ, ਸਿਯਾ ਸਂਕਿਲੇਸਿਕਞ੍ਚੇਵ ਨੋ ਚ ਕਿਲੇਸੋ, ਸਿਯਾ ਨ ਵਤ੍ਤਬ੍ਬਂ – ‘‘ਸਂਕਿਲੇਸਿਕਞ੍ਚੇਵ ਨੋ ਚ ਕਿਲੇਸੋ’’ਤਿ. ਧਮ੍ਮਾਯਤਨਂ ਸਿਯਾ ਕਿਲੇਸੋ ਚੇਵ ਸਂਕਿਲੇਸਿਕਞ੍ਚ, ਸਿਯਾ ਸਂਕਿਲੇਸਿਕਞ੍ਚੇਵ ਨੋ ਚ ਕਿਲੇਸੋ, ਸਿਯਾ ਨ ਵਤ੍ਤਬ੍ਬਂ – ‘‘ਕਿਲੇਸੋ ਚੇਵ ਸਂਕਿਲੇਸਿਕਞ੍ਚਾ’’ਤਿਪਿ, ‘‘ਸਂਕਿਲੇਸਿਕਞ੍ਚੇਵ ਨੋ ਚ ਕਿਲੇਸੋ’’ਤਿਪਿ. ਦਸਾਯਤਨਾ ਨ ਵਤ੍ਤਬ੍ਬਾ – ‘‘ਕਿਲੇਸਾ ਚੇਵ ਸਂਕਿਲਿਟ੍ਠਾ ਚਾ’’ਤਿਪਿ, ‘‘ਸਂਕਿਲਿਟ੍ਠਾ ਚੇਵ ਨੋ ਚ ਕਿਲੇਸਾ’’ਤਿਪਿ. ਮਨਾਯਤਨਂ ਨ ਵਤ੍ਤਬ੍ਬਂ – ‘‘ਕਿਲੇਸੋ ਚੇਵ ਸਂਕਿਲਿਟ੍ਠਞ੍ਚਾ’’ਤਿ, ਸਿਯਾ ਸਂਕਿਲਿਟ੍ਠਞ੍ਚੇਵ ਨੋ ਚ ਕਿਲੇਸੋ, ਸਿਯਾ ਨ ਵਤ੍ਤਬ੍ਬਂ – ‘‘ਸਂਕਿਲਿਟ੍ਠਞ੍ਚੇਵ ਨੋ ਚ ਕਿਲੇਸੋ’’ਤਿ. ਧਮ੍ਮਾਯਤਨਂ ਸਿਯਾ ਕਿਲੇਸੋ ਚੇਵ ਸਂਕਿਲਿਟ੍ਠਞ੍ਚ, ਸਿਯਾ ਸਂਕਿਲਿਟ੍ਠਞ੍ਚੇਵ ਨੋ ਚ ਕਿਲੇਸੋ, ਸਿਯਾ ਨ ਵਤ੍ਤਬ੍ਬਂ – ‘‘ਕਿਲੇਸੋ ਚੇਵ ਸਂਕਿਲਿਟ੍ਠਞ੍ਚਾ’’ਤਿਪਿ, ‘‘ਸਂਕਿਲਿਟ੍ਠਞ੍ਚੇਵ ਨੋ ਚ ਕਿਲੇਸੋ’’ਤਿਪਿ.

ਦਸਾਯਤਨਾ ਨ ਵਤ੍ਤਬ੍ਬਾ – ‘‘ਕਿਲੇਸਾ ਚੇਵ ਕਿਲੇਸਸਮ੍ਪਯੁਤ੍ਤਾ ਚਾ’’ਤਿਪਿ, ‘‘ਕਿਲੇਸਸਮ੍ਪਯੁਤ੍ਤਾ ਚੇਵ ਨੋ ਚ ਨ ਕਿਲੇਸਾ’’ਤਿਪਿ. ਮਨਾਯਤਨਂ ਨ ਵਤ੍ਤਬ੍ਬਂ – ‘‘ਕਿਲੇਸੋ ਚੇਵ ਕਿਲੇਸਸਮ੍ਪਯੁਤ੍ਤਞ੍ਚਾ’’ਤਿ, ਸਿਯਾ ਕਿਲੇਸਸਮ੍ਪਯੁਤ੍ਤਞ੍ਚੇਵ ਨੋ ਚ ਕਿਲੇਸੋ, ਸਿਯਾ ਨ ਵਤ੍ਤਬ੍ਬਂ – ‘‘ਕਿਲੇਸਸਮ੍ਪਯੁਤ੍ਤਞ੍ਚੇਵ ਨੋ ਚ ਕਿਲੇਸੋ’’ਤਿ. ਧਮ੍ਮਾਯਤਨਂ ਸਿਯਾ ਕਿਲੇਸੋ ਚੇਵ ਕਿਲੇਸਸਮ੍ਪਯੁਤ੍ਤਞ੍ਚ, ਸਿਯਾ ਕਿਲੇਸਸਮ੍ਪਯੁਤ੍ਤਞ੍ਚੇਵ ਨੋ ਚ ਕਿਲੇਸੋ, ਸਿਯਾ ਨ ਵਤ੍ਤਬ੍ਬਂ – ‘‘ਕਿਲੇਸੋ ਚੇਵ ਕਿਲੇਸਸਮ੍ਪਯੁਤ੍ਤਞ੍ਚਾ’’ਤਿਪਿ, ‘‘ਕਿਲੇਸਸਮ੍ਪਯੁਤ੍ਤਞ੍ਚੇਵ ਨੋ ਚ ਕਿਲੇਸੋ’’ਤਿਪਿ. ਦਸਾਯਤਨਾ ਕਿਲੇਸਵਿਪ੍ਪਯੁਤ੍ਤਸਂਕਿਲੇਸਿਕਾ. ਦ੍ਵਾਯਤਨਾ ਸਿਯਾ ਕਿਲੇਸਵਿਪ੍ਪਯੁਤ੍ਤਸਂਕਿਲੇਸਿਕਾ, ਸਿਯਾ ਕਿਲੇਸਵਿਪ੍ਪਯੁਤ੍ਤਅਸਂਕਿਲੇਸਿਕਾ, ਸਿਯਾ ਨ ਵਤ੍ਤਬ੍ਬਾ – ‘‘ਕਿਲੇਸਵਿਪ੍ਪਯੁਤ੍ਤਸਂਕਿਲੇਸਿਕਾ’’ਤਿਪਿ, ‘‘ਕਿਲੇਸਵਿਪ੍ਪਯੁਤ੍ਤਅਸਂਕਿਲੇਸਿਕਾ’’ਤਿਪਿ.

ਦਸਾਯਤਨਾ ਨ ਦਸ੍ਸਨੇਨ ਪਹਾਤਬ੍ਬਾ. ਦ੍ਵਾਯਤਨਾ ਸਿਯਾ ਦਸ੍ਸਨੇਨ ਪਹਾਤਬ੍ਬਾ, ਸਿਯਾ ਨ ਦਸ੍ਸਨੇਨ ਪਹਾਤਬ੍ਬਾ. ਦਸਾਯਤਨਾ ਨ ਭਾਵਨਾਯ ਪਹਾਤਬ੍ਬਾ. ਦ੍ਵਾਯਤਨਾ ਸਿਯਾ ਭਾਵਨਾਯ ਪਹਾਤਬ੍ਬਾ, ਸਿਯਾ ਨ ਭਾਵਨਾਯ ਪਹਾਤਬ੍ਬਾ. ਦਸਾਯਤਨਾ ਨ ਦਸ੍ਸਨੇਨ ਪਹਾਤਬ੍ਬਹੇਤੁਕਾ. ਦ੍ਵਾਯਤਨਾ ਸਿਯਾ ਦਸ੍ਸਨੇਨ ਪਹਾਤਬ੍ਬਹੇਤੁਕਾ, ਸਿਯਾ ਨ ਦਸ੍ਸਨੇਨ ਪਹਾਤਬ੍ਬਹੇਤੁਕਾ. ਦਸਾਯਤਨਾ ਨ ਭਾਵਨਾਯ ਪਹਾਤਬ੍ਬਹੇਤੁਕਾ. ਦ੍ਵਾਯਤਨਾ ਸਿਯਾ ਭਾਵਨਾਯ ਪਹਾਤਬ੍ਬਹੇਤੁਕਾ, ਸਿਯਾ ਨ ਭਾਵਨਾਯ ਪਹਾਤਬ੍ਬਹੇਤੁਕਾ. ਦਸਾਯਤਨਾ ਅਵਿਤਕ੍ਕਾ. ਦ੍ਵਾਯਤਨਾ ਸਿਯਾ ਸਵਿਤਕ੍ਕਾ, ਸਿਯਾ ਅਵਿਤਕ੍ਕਾ. ਦਸਾਯਤਨਾ ਅਵਿਚਾਰਾ. ਦ੍ਵਾਯਤਨਾ ਸਿਯਾ ਸਵਿਚਾਰਾ, ਸਿਯਾ ਅਵਿਚਾਰਾ. ਦਸਾਯਤਨਾ ਅਪ੍ਪੀਤਿਕਾ. ਦ੍ਵਾਯਤਨਾ ਸਿਯਾ ਸਪ੍ਪੀਤਿਕਾ, ਸਿਯਾ ਅਪ੍ਪੀਤਿਕਾ. ਦਸਾਯਤਨਾ ਨ ਪੀਤਿਸਹਗਤਾ. ਦ੍ਵਾਯਤਨਾ ਸਿਯਾ ਪੀਤਿਸਹਗਤਾ, ਸਿਯਾ ਨ ਪੀਤਿਸਹਗਤਾ. ਦਸਾਯਤਨਾ ਨ ਸੁਖਸਹਗਤਾ. ਦ੍ਵਾਯਤਨਾ ਸਿਯਾ ਸੁਖਸਹਗਤਾ, ਸਿਯਾ ਨ ਸੁਖਸਹਗਤਾ. ਦਸਾਯਤਨਾ ਨ ਉਪੇਕ੍ਖਾਸਹਗਤਾ. ਦ੍ਵਾਯਤਨਾ ਸਿਯਾ ਉਪੇਕ੍ਖਾਸਹਗਤਾ, ਸਿਯਾ ਨ ਉਪੇਕ੍ਖਾਸਹਗਤਾ.

ਦਸਾਯਤਨਾ ਕਾਮਾਵਚਰਾ. ਦ੍ਵਾਯਤਨਾ ਸਿਯਾ ਕਾਮਾਵਚਰਾ, ਸਿਯਾ ਨ ਕਾਮਾਵਚਰਾ. ਦਸਾਯਤਨਾ ਨ ਰੂਪਾਵਚਰਾ. ਦ੍ਵਾਯਤਨਾ ਸਿਯਾ ਰੂਪਾਵਚਰਾ, ਸਿਯਾ ਨ ਰੂਪਾਵਚਰਾ. ਦਸਾਯਤਨਾ ਨ ਅਰੂਪਾਵਚਰਾ. ਦ੍ਵਾਯਤਨਾ ਸਿਯਾ ਅਰੂਪਾਵਚਰਾ, ਸਿਯਾ ਨ ਅਰੂਪਾਵਚਰਾ. ਦਸਾਯਤਨਾ ਪਰਿਯਾਪਨ੍ਨਾ. ਦ੍ਵਾਯਤਨਾ ਸਿਯਾ ਪਰਿਯਾਪਨ੍ਨਾ, ਸਿਯਾ ਅਪਰਿਯਾਪਨ੍ਨਾ. ਦਸਾਯਤਨਾ ਅਨਿਯ੍ਯਾਨਿਕਾ. ਦ੍ਵਾਯਤਨਾ ਸਿਯਾ ਨਿਯ੍ਯਾਨਿਕਾ, ਸਿਯਾ ਅਨਿਯ੍ਯਾਨਿਕਾ. ਦਸਾਯਤਨਾ ਅਨਿਯਤਾ. ਦ੍ਵਾਯਤਨਾ ਸਿਯਾ ਨਿਯਤਾ, ਸਿਯਾ ਅਨਿਯਤਾ. ਦਸਾਯਤਨਾ ਸਉਤ੍ਤਰਾ. ਦ੍ਵਾਯਤਨਾ ਸਿਯਾ ਸਉਤ੍ਤਰਾ, ਸਿਯਾ ਅਨੁਤ੍ਤਰਾ. ਦਸਾਯਤਨਾ ਅਰਣਾ. ਦ੍ਵਾਯਤਨਾ ਸਿਯਾ ਸਰਣਾ, ਸਿਯਾ ਅਰਣਾਤਿ.

ਪਞ੍ਹਾਪੁਚ੍ਛਕਂ.

ਆਯਤਨਵਿਭਙ੍ਗੋ ਨਿਟ੍ਠਿਤੋ.