(੧) ਰੂਪਦੁਕਂ

੧੦੪੩. ਪਞ੍ਚਨ੍ਨਂ ਖਨ੍ਧਾਨਂ ਕਤਿ ਰੂਪਾ, ਕਤਿ ਅਰੂਪਾ…ਪੇ… ਸਤ੍ਤਨ੍ਨਂ ਚਿਤ੍ਤਾਨਂ ਕਤਿ ਰੂਪਾ, ਕਤਿ ਅਰੂਪਾ?

ਰੂਪਕ੍ਖਨ੍ਧੋ ਰੂਪਂ. ਚਤ੍ਤਾਰੋ ਖਨ੍ਧਾ ਅਰੂਪਾ. ਦਸਾਯਤਨਾ ਰੂਪਾ. ਮਨਾਯਤਨਂ ਅਰੂਪਂ. ਧਮ੍ਮਾਯਤਨਂ ਸਿਯਾ ਰੂਪਂ, ਸਿਯਾ ਅਰੂਪਂ. ਦਸ ਧਾਤੁਯੋ ਰੂਪਾ. ਸਤ੍ਤ ਧਾਤੁਯੋ ਅਰੂਪਾ. ਧਮ੍ਮਧਾਤੁ ਸਿਯਾ ਰੂਪਾ, ਸਿਯਾ ਅਰੂਪਾ. ਤੀਣਿ ਸਚ੍ਚਾਨਿ ਅਰੂਪਾ. ਦੁਕ੍ਖਸਚ੍ਚਂ ਸਿਯਾ ਰੂਪਂ, ਸਿਯਾ ਅਰੂਪਂ. ਸਤ੍ਤਿਨ੍ਦ੍ਰਿਯਾ ਰੂਪਾ. ਚੁਦ੍ਦਸਿਨ੍ਦ੍ਰਿਯਾ ਅਰੂਪਾ. ਜੀਵਿਤਿਨ੍ਦ੍ਰਿਯਂ ਸਿਯਾ ਰੂਪਂ, ਸਿਯਾ ਅਰੂਪਂ. ਨਵ ਹੇਤੂ ਅਰੂਪਾ. ਕਬਲ਼ੀਕਾਰੋ ਆਹਾਰੋ ਰੂਪਂ. ਤਯੋ ਆਹਾਰਾ ਅਰੂਪਾ. ਸਤ੍ਤ ਫਸ੍ਸਾ ਅਰੂਪਾ. ਸਤ੍ਤ ਵੇਦਨਾ… ਸਤ੍ਤ ਸਞ੍ਞਾ… ਸਤ੍ਤ ਚੇਤਨਾ ਸਤ੍ਤ ਚਿਤ੍ਤਾ ਅਰੂਪਾ.