(੨) ਲੋਕਿਯਦੁਕਂ

੧੦੪੪. ਪਞ੍ਚਨ੍ਨਂ ਖਨ੍ਧਾਨਂ ਕਤਿ ਲੋਕਿਯਾ, ਕਤਿ ਲੋਕੁਤ੍ਤਰਾ? ਦ੍ਵਾਦਸਨ੍ਨਂ ਆਯਤਨਾਨਂ ਕਤਿ ਲੋਕਿਯਾ, ਕਤਿ ਲੋਕੁਤ੍ਤਰਾ? ਅਟ੍ਠਾਰਸਨ੍ਨਂ ਧਾਤੂਨਂ ਕਤਿ ਲੋਕਿਯਾ, ਕਤਿ ਲੋਕੁਤ੍ਤਰਾ? ਚਤੁਨ੍ਨਂ ਸਚ੍ਚਾਨਂ ਕਤਿ ਲੋਕਿਯਾ, ਕਤਿ ਲੋਕੁਤ੍ਤਰਾ…ਪੇ… ਸਤ੍ਤਨ੍ਨਂ ਚਿਤ੍ਤਾਨਂ ਕਤਿ ਲੋਕਿਯਾ, ਕਤਿ ਲੋਕੁਤ੍ਤਰਾ?

ਰੂਪਕ੍ਖਨ੍ਧੋ ਲੋਕਿਯੋ. ਚਤ੍ਤਾਰੋ ਖਨ੍ਧਾ ਸਿਯਾ ਲੋਕਿਯਾ, ਸਿਯਾ ਲੋਕੁਤ੍ਤਰਾ. ਦਸਾਯਤਨਾ ਲੋਕਿਯਾ. ਦ੍ਵੇ ਆਯਤਨਾ ਸਿਯਾ ਲੋਕਿਯਾ, ਸਿਯਾ ਲੋਕੁਤ੍ਤਰਾ. ਸੋਲ਼ਸ ਧਾਤੁਯੋ ਲੋਕਿਯਾ. ਦ੍ਵੇ ਧਾਤੁਯੋ ਸਿਯਾ ਲੋਕਿਯਾ, ਸਿਯਾ ਲੋਕੁਤ੍ਤਰਾ. ਦ੍ਵੇ ਸਚ੍ਚਾ ਲੋਕਿਯਾ. ਦ੍ਵੇ ਸਚ੍ਚਾ ਲੋਕੁਤ੍ਤਰਾ.

ਦਸਿਨ੍ਦ੍ਰਿਯਾ ਲੋਕਿਯਾ. ਤੀਣਿਨ੍ਦ੍ਰਿਯਾ ਲੋਕੁਤ੍ਤਰਾ. ਨਵਿਨ੍ਦ੍ਰਿਯਾ ਸਿਯਾ ਲੋਕਿਯਾ, ਸਿਯਾ ਲੋਕੁਤ੍ਤਰਾ. ਤਯੋ ਅਕੁਸਲਹੇਤੂ ਲੋਕਿਯਾ. ਛ ਹੇਤੂ ਸਿਯਾ ਲੋਕਿਯਾ, ਸਿਯਾ ਲੋਕੁਤ੍ਤਰਾ. ਕਬਲ਼ੀਕਾਰੋ ਆਹਾਰੋ ਲੋਕਿਯੋ. ਤਯੋ ਆਹਾਰਾ ਸਿਯਾ ਲੋਕਿਯਾ, ਸਿਯਾ ਲੋਕੁਤ੍ਤਰਾ. ਛ ਫਸ੍ਸਾ ਲੋਕਿਯਾ. ਮਨੋਵਿਞ੍ਞਾਣਧਾਤੁਸਮ੍ਫਸ੍ਸੋ ਸਿਯਾ ਲੋਕਿਯੋ, ਸਿਯਾ ਲੋਕੁਤ੍ਤਰੋ. ਛ ਵੇਦਨਾ ਲੋਕਿਯਾ. ਮਨੋਵਿਞ੍ਞਾਣਧਾਤੁਸਮ੍ਫਸ੍ਸਜਾ ਵੇਦਨਾ ਸਿਯਾ ਲੋਕਿਯਾ, ਸਿਯਾ ਲੋਕੁਤ੍ਤਰਾ. ਛ ਸਞ੍ਞਾ ਲੋਕਿਯਾ. ਮਨੋਵਿਞ੍ਞਾਣਧਾਤੁਸਮ੍ਫਸ੍ਸਜਾ ਸਞ੍ਞਾ ਸਿਯਾ ਲੋਕਿਯਾ, ਸਿਯਾ ਲੋਕੁਤ੍ਤਰਾ. ਛ ਚੇਤਨਾ ਲੋਕਿਯਾ. ਮਨੋਵਿਞ੍ਞਾਣਧਾਤੁਸਮ੍ਫਸ੍ਸਜਾ ਚੇਤਨਾ ਸਿਯਾ ਲੋਕਿਯਾ, ਸਿਯਾ ਲੋਕੁਤ੍ਤਰਾ. ਛ ਚਿਤ੍ਤਾ ਲੋਕਿਯਾ. ਮਨੋਵਿਞ੍ਞਾਣਧਾਤੁ ਸਿਯਾ ਲੋਕਿਯਾ, ਸਿਯਾ ਲੋਕੁਤ੍ਤਰਾਤਿ.

ਅਭਿਞ੍ਞਾ ਦ੍ਵੇ ਸਾਰਮ੍ਮਣਾ, ਦਿਟ੍ਠਾ ਕੁਸਲਵੇਦਨਾ;

ਵਿਪਾਕਾ ਚ ਉਪਾਦਿਨ੍ਨਾ, ਵਿਤਕ੍ਕਂ ਰੂਪਲੋਕਿਯਾਤਿ.

ਧਮ੍ਮਹਦਯਵਿਭਙ੍ਗੋ ਨਿਟ੍ਠਿਤੋ.

ਵਿਭਙ੍ਗਪਕਰਣਂ ਨਿਟ੍ਠਿਤਂ.