(੪) ਤਿਸ੍ਸੋ ਅਕੁਸਲਧਾਤੁਯੋ

੯੧੨. ਤਤ੍ਥ ਕਤਮਾ ਤਿਸ੍ਸੋ ਅਕੁਸਲਧਾਤੁਯੋ? ਕਾਮਧਾਤੁ, ਬ੍ਯਾਪਾਦਧਾਤੁ, ਵਿਹਿਂਸਾਧਾਤੁ.

ਤਤ੍ਥ ਕਤਮਾ ਕਾਮਧਾਤੁ? ਕਾਮਵਿਤਕ੍ਕੋ ਕਾਮਧਾਤੁ. ਬ੍ਯਾਪਾਦਵਿਤਕ੍ਕੋ ਬ੍ਯਾਪਾਦਧਾਤੁ. ਵਿਹਿਂਸਾਵਿਤਕ੍ਕੋ ਵਿਹਿਂਸਾਧਾਤੁ.

(ਕ) ਤਤ੍ਥ ਕਤਮੋ ਕਾਮਵਿਤਕ੍ਕੋ? ਕਾਮਪਟਿਸਂਯੁਤ੍ਤੋ ਤਕ੍ਕੋ ਵਿਤਕ੍ਕੋ ਮਿਚ੍ਛਾਸਙ੍ਕਪ੍ਪੋ – ਅਯਂ ਵੁਚ੍ਚਤਿ ‘‘ਕਾਮਵਿਤਕ੍ਕੋ’’.

(ਖ) ਤਤ੍ਥ ਕਤਮੋ ਬ੍ਯਾਪਾਦਵਿਤਕ੍ਕੋ? ਬ੍ਯਾਪਾਦਪਟਿਸਂਯੁਤ੍ਤੋ ਤਕ੍ਕੋ ਵਿਤਕ੍ਕੋ ਮਿਚ੍ਛਾਸਙ੍ਕਪ੍ਪੋ – ਅਯਂ ਵੁਚ੍ਚਤਿ ‘‘ਬ੍ਯਾਪਾਦਵਿਤਕ੍ਕੋ’’.

(ਗ) ਤਤ੍ਥ ਕਤਮੋ ਵਿਹਿਂਸਾਵਿਤਕ੍ਕੋ? ਵਿਹਿਂਸਾਪਟਿਸਂਯੁਤ੍ਤੋ ਤਕ੍ਕੋ ਵਿਤਕ੍ਕੋ ਮਿਚ੍ਛਾਸਙ੍ਕਪ੍ਪੋ – ਅਯਂ ਵੁਚ੍ਚਤਿ ‘‘ਵਿਹਿਂਸਾਵਿਤਕ੍ਕੋ’’. ਇਮਾ ਤਿਸ੍ਸੋ ਅਕੁਸਲਧਾਤੁਯੋ.