੫. ਵਿਞ੍ਞਾਣਕ੍ਖਨ੍ਧੋ
੨੬. ਤਤ੍ਥ ਕਤਮੋ ਵਿਞ੍ਞਾਣਕ੍ਖਨ੍ਧੋ? ਯਂ ਕਿਞ੍ਚਿ ਵਿਞ੍ਞਾਣਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਅਜ੍ਝਤ੍ਤਂ ਵਾ ਬਹਿਦ੍ਧਾ ਵਾ ਓਲ਼ਾਰਿਕਂ ਵਾ ਸੁਖੁਮਂ ਵਾ ਹੀਨਂ ਵਾ ਪਣੀਤਂ ਵਾ ਯਂ ਦੂਰੇ ਸਨ੍ਤਿਕੇ ਵਾ, ਤਦੇਕਜ੍ਝਂ ਅਭਿਸਞ੍ਞੂਹਿਤ੍ਵਾ ਅਭਿਸਙ੍ਖਿਪਿਤ੍ਵਾ – ਅਯਂ ਵੁਚ੍ਚਤਿ ਵਿਞ੍ਞਾਣਕ੍ਖਨ੍ਧੋ.
੨੭. ਤਤ੍ਥ ਕਤਮਂ ਵਿਞ੍ਞਾਣਂ ਅਤੀਤਂ? ਯਂ ਵਿਞ੍ਞਾਣਂ ਅਤੀਤਂ ਨਿਰੁਦ੍ਧਂ ਵਿਗਤਂ ਵਿਪਰਿਣਤਂ ਅਤ੍ਥਙ੍ਗਤਂ ਅਬ੍ਭਤ੍ਥਙ੍ਗਤਂ ਉਪ੍ਪਜ੍ਜਿਤ੍ਵਾ ਵਿਗਤਂ ਅਤੀਤਂ ਅਤੀਤਂਸੇਨ ਸਙ੍ਗਹਿਤਂ, ਚਕ੍ਖੁਵਿਞ੍ਞਾਣਂ ਸੋਤਵਿਞ੍ਞਾਣਂ ਘਾਨਵਿਞ੍ਞਾਣਂ ਜਿਵ੍ਹਾਵਿਞ੍ਞਾਣਂ ਕਾਯਵਿਞ੍ਞਾਣਂ ਮਨੋਵਿਞ੍ਞਾਣਂ – ਇਦਂ ਵੁਚ੍ਚਤਿ ਵਿਞ੍ਞਾਣਂ ਅਤੀਤਂ.
ਤਤ੍ਥ ਕਤਮਂ ਵਿਞ੍ਞਾਣਂ ਅਨਾਗਤਂ? ਯਂ ਵਿਞ੍ਞਾਣਂ ਅਜਾਤਂ ਅਭੂਤਂ ਅਸਞ੍ਜਾਤਂ ਅਨਿਬ੍ਬਤ੍ਤਂ ਅਨਭਿਨਿਬ੍ਬਤ੍ਤਂ ਅਪਾਤੁਭੂਤਂ ਅਨੁਪ੍ਪਨ੍ਨਂ ਅਸਮੁਪ੍ਪਨ੍ਨਂ ਅਨੁਟ੍ਠਿਤਂ ਅਸਮੁਟ੍ਠਿਤਂ ਅਨਾਗਤਂ ਅਨਾਗਤਂਸੇਨ ਸਙ੍ਗਹਿਤਂ, ਚਕ੍ਖੁਵਿਞ੍ਞਾਣਂ ਸੋਤਵਿਞ੍ਞਾਣਂ ਘਾਨਵਿਞ੍ਞਾਣਂ ਜਿਵ੍ਹਾਵਿਞ੍ਞਾਣਂ ਕਾਯਵਿਞ੍ਞਾਣਂ ਮਨੋਵਿਞ੍ਞਾਣਂ – ਇਦਂ ਵੁਚ੍ਚਤਿ ਵਿਞ੍ਞਾਣਂ ਅਨਾਗਤਂ.
ਤਤ੍ਥ ਕਤਮਂ ਵਿਞ੍ਞਾਣਂ ਪਚ੍ਚੁਪ੍ਪਨ੍ਨਂ? ਯਂ ਵਿਞ੍ਞਾਣਂ ਜਾਤਂ ਭੂਤਂ ਸਞ੍ਜਾਤਂ ਨਿਬ੍ਬਤ੍ਤਂ ਅਭਿਨਿਬ੍ਬਤ੍ਤਂ ਪਾਤੁਭੂਤਂ ਉਪ੍ਪਨ੍ਨਂ ਸਮੁਪ੍ਪਨ੍ਨਂ ਉਟ੍ਠਿਤਂ ਸਮੁਟ੍ਠਿਤਂ ਪਚ੍ਚੁਪ੍ਪਨ੍ਨਂ ਪਚ੍ਚੁਪ੍ਪਨ੍ਨਂਸੇਨ ਸਙ੍ਗਹਿਤਂ, ਚਕ੍ਖੁਵਿਞ੍ਞਾਣਂ ਸੋਤਵਿਞ੍ਞਾਣਂ ਘਾਨਵਿਞ੍ਞਾਣਂ ਜਿਵ੍ਹਾਵਿਞ੍ਞਾਣਂ ਕਾਯਵਿਞ੍ਞਾਣਂ ਮਨੋਵਿਞ੍ਞਾਣਂ – ਇਦਂ ਵੁਚ੍ਚਤਿ ਵਿਞ੍ਞਾਣਂ ਪਚ੍ਚੁਪ੍ਪਨ੍ਨਂ.
੨੮. ਤਤ੍ਥ ਕਤਮਂ ਵਿਞ੍ਞਾਣਂ ਅਜ੍ਝਤ੍ਤਂ? ਯਂ ਵਿਞ੍ਞਾਣਂ ਤੇਸਂ ਤੇਸਂ ਸਤ੍ਤਾਨਂ ਅਜ੍ਝਤ੍ਤਂ ਪਚ੍ਚਤ੍ਤਂ ਨਿਯਕਂ ਪਾਟਿਪੁਗ੍ਗਲਿਕਂ ਉਪਾਦਿਨ੍ਨਂ, ਚਕ੍ਖੁਵਿਞ੍ਞਾਣਂ ਸੋਤਵਿਞ੍ਞਾਣਂ ਘਾਨਵਿਞ੍ਞਾਣਂ ਜਿਵ੍ਹਾਵਿਞ੍ਞਾਣਂ ਕਾਯਵਿਞ੍ਞਾਣਂ ਮਨੋਵਿਞ੍ਞਾਣਂ – ਇਦਂ ਵੁਚ੍ਚਤਿ ਵਿਞ੍ਞਾਣਂ ਅਜ੍ਝਤ੍ਤਂ.
ਤਤ੍ਥ ਕਤਮਂ ਵਿਞ੍ਞਾਣਂ ਬਹਿਦ੍ਧਾ? ਯਂ ਵਿਞ੍ਞਾਣਂ ਤੇਸਂ ਤੇਸਂ ਪਰਸਤ੍ਤਾਨਂ ਪਰਪੁਗ੍ਗਲਾਨਂ ਅਜ੍ਝਤ੍ਤਂ ਪਚ੍ਚਤ੍ਤਂ ਨਿਯਕਂ ਪਾਟਿਪੁਗ੍ਗਲਿਕਂ ਉਪਾਦਿਨ੍ਨਂ, ਚਕ੍ਖੁਵਿਞ੍ਞਾਣਂ ਸੋਤਵਿਞ੍ਞਾਣਂ ਘਾਨਵਿਞ੍ਞਾਣਂ ਜਿਵ੍ਹਾਵਿਞ੍ਞਾਣਂ ਕਾਯਵਿਞ੍ਞਾਣਂ ਮਨੋਵਿਞ੍ਞਾਣਂ – ਇਦਂ ਵੁਚ੍ਚਤਿ ਵਿਞ੍ਞਾਣਂ ਬਹਿਦ੍ਧਾ.
੨੯. ਤਤ੍ਥ ਕਤਮਂ ਵਿਞ੍ਞਾਣਂ ਓਲ਼ਾਰਿਕਂ ਸੁਖੁਮਂ? ਅਕੁਸਲਂ ਵਿਞ੍ਞਾਣਂ ਓਲ਼ਾਰਿਕਂ, ਕੁਸਲਾਬ੍ਯਾਕਤਾ ਵਿਞ੍ਞਾਣਾ ਸੁਖੁਮਾ. ਕੁਸਲਾਕੁਸਲਾ ਵਿਞ੍ਞਾਣਾ ਓਲ਼ਾਰਿਕਾ, ਅਬ੍ਯਾਕਤਂ ਵਿਞ੍ਞਾਣਂ ਸੁਖੁਮਂ. ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ ਓਲ਼ਾਰਿਕਂ, ਸੁਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤਾ ਵਿਞ੍ਞਾਣਾ ਸੁਖੁਮਾ. ਸੁਖਦੁਕ੍ਖਾਹਿ ਵੇਦਨਾਹਿ ਸਮ੍ਪਯੁਤ੍ਤਾ ਵਿਞ੍ਞਾਣਾ ਓਲ਼ਾਰਿਕਾ, ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ ਸੁਖੁਮਂ. ਅਸਮਾਪਨ੍ਨਸ੍ਸ ਵਿਞ੍ਞਾਣਂ ਓਲ਼ਾਰਿਕਂ, ਸਮਾਪਨ੍ਨਸ੍ਸ ਵਿਞ੍ਞਾਣਂ ਸੁਖੁਮਂ. ਸਾਸਵਂ ਵਿਞ੍ਞਾਣਂ ਓਲ਼ਾਰਿਕਂ, ਅਨਾਸਵਂ ਵਿਞ੍ਞਾਣਂ ਸੁਖੁਮਂ. ਤਂ ਤਂ ਵਾ ਪਨ ਵਿਞ੍ਞਾਣਂ ਉਪਾਦਾਯੁਪਾਦਾਯ ਵਿਞ੍ਞਾਣਂ ਓਲ਼ਾਰਿਕਂ ਸੁਖੁਮਂ ਦਟ੍ਠਬ੍ਬਂ.
੩੦. ਤਤ੍ਥ ਕਤਮਂ ਵਿਞ੍ਞਾਣਂ ਹੀਨਂ ਪਣੀਤਂ? ਅਕੁਸਲਂ ਵਿਞ੍ਞਾਣਂ ਹੀਨਂ, ਕੁਸਲਾਬ੍ਯਾਕਤਾ ਵਿਞ੍ਞਾਣਾ ਪਣੀਤਾ. ਕੁਸਲਾਕੁਸਲਾ ਵਿਞ੍ਞਾਣਾ ਹੀਨਾ, ਅਬ੍ਯਾਕਤਂ ਵਿਞ੍ਞਾਣਂ ਪਣੀਤਂ. ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ ਹੀਨਂ, ਸੁਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤਾ ਵਿਞ੍ਞਾਣਾ ਪਣੀਤਾ. ਸੁਖਦੁਕ੍ਖਾਹਿ ਵੇਦਨਾਹਿ ਸਮ੍ਪਯੁਤ੍ਤਾ ਵਿਞ੍ਞਾਣਾ ਹੀਨਾ, ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ ਪਣੀਤਂ. ਅਸਮਾਪਨ੍ਨਸ੍ਸ ਵਿਞ੍ਞਾਣਂ ਹੀਨਂ, ਸਮਾਪਨ੍ਨਸ੍ਸ ਵਿਞ੍ਞਾਣਂ ਪਣੀਤਂ. ਸਾਸਵਂ ਵਿਞ੍ਞਾਣਂ ਹੀਨਂ, ਅਨਾਸਵਂ ਵਿਞ੍ਞਾਣਂ ਪਣੀਤਂ. ਤਂ ਤਂ ਵਾ ਪਨ ਵਿਞ੍ਞਾਣਂ ਉਪਾਦਾਯੁਪਾਦਾਯ ਵਿਞ੍ਞਾਣਂ ਹੀਨਂ ਪਣੀਤਂ ਦਟ੍ਠਬ੍ਬਂ.
੩੧. ਤਤ੍ਥ ਕਤਮਂ ਵਿਞ੍ਞਾਣਂ ਦੂਰੇ? ਅਕੁਸਲਂ ਵਿਞ੍ਞਾਣਂ ਕੁਸਲਾਬ੍ਯਾਕਤੇਹਿ ਵਿਞ੍ਞਾਣੇਹਿ ਦੂਰੇ; ਕੁਸਲਾਬ੍ਯਾਕਤਾ ਵਿਞ੍ਞਾਣਾ ਅਕੁਸਲਾ ਵਿਞ੍ਞਾਣਾ ਦੂਰੇ; ਕੁਸਲਂ ਵਿਞ੍ਞਾਣਂ ਅਕੁਸਲਾਬ੍ਯਾਕਤੇਹਿ ਵਿਞ੍ਞਾਣੇਹਿ ਦੂਰੇ; ਅਕੁਸਲਾਬ੍ਯਾਕਤਾ ਵਿਞ੍ਞਾਣਾ ਕੁਸਲਾ ਵਿਞ੍ਞਾਣਾ ਦੂਰੇ; ਅਬ੍ਯਾਕਤਂ ਵਿਞ੍ਞਾਣਂ ਕੁਸਲਾਕੁਸਲੇਹਿ ਵਿਞ੍ਞਾਣੇਹਿ ਦੂਰੇ; ਕੁਸਲਾਕੁਸਲਾ ਵਿਞ੍ਞਾਣਾ ਅਬ੍ਯਾਕਤਾ ਵਿਞ੍ਞਾਣਾ ਦੂਰੇ. ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ ਸੁਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤੇਹਿ ਵਿਞ੍ਞਾਣੇਹਿ ਦੂਰੇ; ਸੁਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤਾ ਵਿਞ੍ਞਾਣਾ ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾ ਵਿਞ੍ਞਾਣਾ ਦੂਰੇ; ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ ਦੁਕ੍ਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤੇਹਿ ਵਿਞ੍ਞਾਣੇਹਿ ਦੂਰੇ; ਦੁਕ੍ਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤਾ ਵਿਞ੍ਞਾਣਾ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ ਵਿਞ੍ਞਾਣਾ ਦੂਰੇ; ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ ਸੁਖਦੁਕ੍ਖਾਹਿ ਵੇਦਨਾਹਿ ਸਮ੍ਪਯੁਤ੍ਤੇਹਿ ਵਿਞ੍ਞਾਣੇਹਿ ਦੂਰੇ; ਸੁਖਦੁਕ੍ਖਾਹਿ ਵੇਦਨਾਹਿ ਸਮ੍ਪਯੁਤ੍ਤਾ ਵਿਞ੍ਞਾਣਾ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ ਵਿਞ੍ਞਾਣਾ ਦੂਰੇ. ਅਸਮਾਪਨ੍ਨਸ੍ਸ ਵਿਞ੍ਞਾਣਂ ਸਮਾਪਨ੍ਨਸ੍ਸ ਵਿਞ੍ਞਾਣਾ ਦੂਰੇ; ਸਮਾਪਨ੍ਨਸ੍ਸ ਵਿਞ੍ਞਾਣਂ ਅਸਮਾਪਨ੍ਨਸ੍ਸ ਵਿਞ੍ਞਾਣਾ ਦੂਰੇ. ਸਾਸਵਂ ਵਿਞ੍ਞਾਣਂ ਅਨਾਸਵਾ ਵਿਞ੍ਞਾਣਾ ਦੂਰੇ; ਅਨਾਸਵਂ ਵਿਞ੍ਞਾਣਂ ਸਾਸਵਾ ਵਿਞ੍ਞਾਣਾ ਦੂਰੇ – ਇਦਂ ਵੁਚ੍ਚਤਿ ਵਿਞ੍ਞਾਣਂ ਦੂਰੇ.
ਤਤ੍ਥ ਕਤਮਂ ਵਿਞ੍ਞਾਣਂ ਸਨ੍ਤਿਕੇ? ਅਕੁਸਲਂ ਵਿਞ੍ਞਾਣਂ ਅਕੁਸਲਸ੍ਸ ਵਿਞ੍ਞਾਣਸ੍ਸ ਸਨ੍ਤਿਕੇ; ਕੁਸਲਂ ਵਿਞ੍ਞਾਣਂ ਕੁਸਲਸ੍ਸ ਵਿਞ੍ਞਾਣਸ੍ਸ ਸਨ੍ਤਿਕੇ; ਅਬ੍ਯਾਕਤਂ ਵਿਞ੍ਞਾਣਂ ਅਬ੍ਯਾਕਤਸ੍ਸ ਵਿਞ੍ਞਾਣਸ੍ਸ ਸਨ੍ਤਿਕੇ. ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਸ੍ਸ ਵਿਞ੍ਞਾਣਸ੍ਸ ਸਨ੍ਤਿਕੇ; ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਸ੍ਸ ਵਿਞ੍ਞਾਣਸ੍ਸ ਸਨ੍ਤਿਕੇ; ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਸ੍ਸ ਵਿਞ੍ਞਾਣਸ੍ਸ ਸਨ੍ਤਿਕੇ. ਅਸਮਾਪਨ੍ਨਸ੍ਸ ਵਿਞ੍ਞਾਣਂ ਅਸਮਾਪਨ੍ਨਸ੍ਸ ਵਿਞ੍ਞਾਣਸ੍ਸ ਸਨ੍ਤਿਕੇ; ਸਮਾਪਨ੍ਨਸ੍ਸ ਵਿਞ੍ਞਾਣਂ ਸਮਾਪਨ੍ਨਸ੍ਸ ਵਿਞ੍ਞਾਣਸ੍ਸ ਸਨ੍ਤਿਕੇ. ਸਾਸਵਂ ਵਿਞ੍ਞਾਣਂ ਸਾਸਵਸ੍ਸ ਵਿਞ੍ਞਾਣਸ੍ਸ ਸਨ੍ਤਿਕੇ; ਅਨਾਸਵਂ ਵਿਞ੍ਞਾਣਂ ਅਨਾਸਵਸ੍ਸ ਵਿਞ੍ਞਾਣਸ੍ਸ ਸਨ੍ਤਿਕੇ – ਇਦਂ ਵੁਚ੍ਚਤਿ ਵਿਞ੍ਞਾਣਂ ਸਨ੍ਤਿਕੇ. ਤਂ ਤਂ ਵਾ ਪਨ ਵਿਞ੍ਞਾਣਂ ਉਪਾਦਾਯੁਪਾਦਾਯ ਵਿਞ੍ਞਾਣਂ ਦੂਰੇ ਸਨ੍ਤਿਕੇ ਦਟ੍ਠਬ੍ਬਂ.
ਸੁਤ੍ਤਨ੍ਤਭਾਜਨੀਯਂ.