੧. ਸੁਤ੍ਤਨ੍ਤਭਾਜਨੀਯਂ
੧. ਪਞ੍ਚਕ੍ਖਨ੍ਧਾ – ਰੂਪਕ੍ਖਨ੍ਧੋ, ਵੇਦਨਾਕ੍ਖਨ੍ਧੋ, ਸਞ੍ਞਾਕ੍ਖਨ੍ਧੋ, ਸਙ੍ਖਾਰਕ੍ਖਨ੍ਧੋ, ਵਿਞ੍ਞਾਣਕ੍ਖਨ੍ਧੋ.
੧. ਰੂਪਕ੍ਖਨ੍ਧੋ
੨. ਤਤ੍ਥ ਕਤਮੋ ਰੂਪਕ੍ਖਨ੍ਧੋ? ਯਂ ਕਿਞ੍ਚਿ ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਅਜ੍ਝਤ੍ਤਂ ਵਾ ਬਹਿਦ੍ਧਾ ਵਾ ਓਲ਼ਾਰਿਕਂ ਵਾ ਸੁਖੁਮਂ ਵਾ ਹੀਨਂ ਵਾ ਪਣੀਤਂ ਵਾ ਯਂ ਦੂਰੇ ਸਨ੍ਤਿਕੇ ਵਾ, ਤਦੇਕਜ੍ਝਂ ਅਭਿਸਞ੍ਞੂਹਿਤ੍ਵਾ ਅਭਿਸਙ੍ਖਿਪਿਤ੍ਵਾ – ਅਯਂ ਵੁਚ੍ਚਤਿ ਰੂਪਕ੍ਖਨ੍ਧੋ.
੩. ਤਤ੍ਥ ਕਤਮਂ ਰੂਪਂ ਅਤੀਤਂ? ਯਂ ਰੂਪਂ ਅਤੀਤਂ ਨਿਰੁਦ੍ਧਂ ਵਿਗਤਂ ਵਿਪਰਿਣਤਂ ਅਤ੍ਥਙ੍ਗਤਂ ਅਬ੍ਭਤ੍ਥਙ੍ਗਤਂ ਉਪ੍ਪਜ੍ਜਿਤ੍ਵਾ ਵਿਗਤਂ ਅਤੀਤਂ ਅਤੀਤਂਸੇਨ ਸਙ੍ਗਹਿਤਂ, ਚਤ੍ਤਾਰੋ ਚ ਮਹਾਭੂਤਾ ਚਤੁਨ੍ਨਞ੍ਚ ਮਹਾਭੂਤਾਨਂ ਉਪਾਦਾਯਰੂਪਂ – ਇਦਂ ਵੁਚ੍ਚਤਿ ਰੂਪਂ ਅਤੀਤਂ.
ਤਤ੍ਥ ਕਤਮਂ ਰੂਪਂ ਅਨਾਗਤਂ? ਯਂ ਰੂਪਂ ਅਜਾਤਂ ਅਭੂਤਂ ਅਸਞ੍ਜਾਤਂ ਅਨਿਬ੍ਬਤ੍ਤਂ ਅਨਭਿਨਿਬ੍ਬਤ੍ਤਂ ਅਪਾਤੁਭੂਤਂ ਅਨੁਪ੍ਪਨ੍ਨਂ ਅਸਮੁਪ੍ਪਨ੍ਨਂ ਅਨੁਟ੍ਠਿਤਂ ਅਸਮੁਟ੍ਠਿਤਂ ਅਨਾਗਤਂ ਅਨਾਗਤਂਸੇਨ ਸਙ੍ਗਹਿਤਂ, ਚਤ੍ਤਾਰੋ ਚ ਮਹਾਭੂਤਾ ਚਤੁਨ੍ਨਞ੍ਚ ਮਹਾਭੂਤਾਨਂ ਉਪਾਦਾਯਰੂਪਂ – ਇਦਂ ਵੁਚ੍ਚਤਿ ਰੂਪਂ ਅਨਾਗਤਂ.
ਤਤ੍ਥ ਕਤਮਂ ਰੂਪਂ ਪਚ੍ਚੁਪ੍ਪਨ੍ਨਂ? ਯਂ ਰੂਪਂ ਜਾਤਂ ਭੂਤਂ ਸਞ੍ਜਾਤਂ ਨਿਬ੍ਬਤ੍ਤਂ ਅਭਿਨਿਬ੍ਬਤ੍ਤਂ ਪਾਤੁਭੂਤਂ ਉਪ੍ਪਨ੍ਨਂ ਸਮੁਪ੍ਪਨ੍ਨਂ ਉਟ੍ਠਿਤਂ ਸਮੁਟ੍ਠਿਤਂ ਪਚ੍ਚੁਪ੍ਪਨ੍ਨਂ ਪਚ੍ਚੁਪ੍ਪਨ੍ਨਂਸੇਨ ਸਙ੍ਗਹਿਤਂ, ਚਤ੍ਤਾਰੋ ਚ ਮਹਾਭੂਤਾ ਚਤੁਨ੍ਨਞ੍ਚ ਮਹਾਭੂਤਾਨਂ ਉਪਾਦਾਯਰੂਪਂ – ਇਦਂ ਵੁਚ੍ਚਤਿ ਰੂਪਂ ਪਚ੍ਚੁਪ੍ਪਨ੍ਨਂ.
੪. ਤਤ੍ਥ ਕਤਮਂ ਰੂਪਂ ਅਜ੍ਝਤ੍ਤਂ? ਯਂ ਰੂਪਂ ਤੇਸਂ ਤੇਸਂ ਸਤ੍ਤਾਨਂ ਅਜ੍ਝਤ੍ਤਂ ਪਚ੍ਚਤ੍ਤਂ ਨਿਯਕਂ ਪਾਟਿਪੁਗ੍ਗਲਿਕਂ ਉਪਾਦਿਨ੍ਨਂ, ਚਤ੍ਤਾਰੋ ਚ ਮਹਾਭੂਤਾ ਚਤੁਨ੍ਨਞ੍ਚ ਮਹਾਭੂਤਾਨਂ ਉਪਾਦਾਯਰੂਪਂ – ਇਦਂ ਵੁਚ੍ਚਤਿ ਰੂਪਂ ਅਜ੍ਝਤ੍ਤਂ.
ਤਤ੍ਥ ਕਤਮਂ ਰੂਪਂ ਬਹਿਦ੍ਧਾ? ਯਂ ਰੂਪਂ ਤੇਸਂ ਤੇਸਂ ਪਰਸਤ੍ਤਾਨਂ ਪਰਪੁਗ੍ਗਲਾਨਂ ਅਜ੍ਝਤ੍ਤਂ ਪਚ੍ਚਤ੍ਤਂ ਨਿਯਕਂ ਪਾਟਿਪੁਗ੍ਗਲਿਕਂ ਉਪਾਦਿਨ੍ਨਂ, ਚਤ੍ਤਾਰੋ ਚ ਮਹਾਭੂਤਾ ਚਤੁਨ੍ਨਞ੍ਚ ਮਹਾਭੂਤਾਨਂ ਉਪਾਦਾਯਰੂਪਂ – ਇਦਂ ਵੁਚ੍ਚਤਿ ਰੂਪਂ ਬਹਿਦ੍ਧਾ.
੫. ਤਤ੍ਥ ਕਤਮਂ ਰੂਪਂ ਓਲ਼ਾਰਿਕਂ? ਚਕ੍ਖਾਯਤਨਂ…ਪੇ… ਫੋਟ੍ਠਬ੍ਬਾਯਤਨਂ – ਇਦਂ ਵੁਚ੍ਚਤਿ ਰੂਪਂ ਓਲ਼ਾਰਿਕਂ.
ਤਤ੍ਥ ਕਤਮਂ ਰੂਪਂ ਸੁਖੁਮਂ? ਇਤ੍ਥਿਨ੍ਦ੍ਰਿਯਂ…ਪੇ… ਕਬਲ਼ੀਕਾਰੋ [ਕਬਲ਼ਿਂਕਾਰੋ (ਸੀ. ਸ੍ਯਾ.)] ਆਹਾਰੋ – ਇਦਂ ਵੁਚ੍ਚਤਿ ਰੂਪਂ ਸੁਖੁਮਂ.
੬. ਤਤ੍ਥ ਕਤਮਂ ਰੂਪਂ ਹੀਨਂ? ਯਂ ਰੂਪਂ ਤੇਸਂ ਤੇਸਂ ਸਤ੍ਤਾਨਂ ਉਞ੍ਞਾਤਂ ਅਵਞ੍ਞਾਤਂ ਹੀਲ਼ਿਤਂ ਪਰਿਭੂਤਂ ਅਚਿਤ੍ਤੀਕਤਂ ਹੀਨਂ ਹੀਨਮਤਂ ਹੀਨਸਮ੍ਮਤਂ ਅਨਿਟ੍ਠਂ ਅਕਨ੍ਤਂ ਅਮਨਾਪਂ, ਰੂਪਾ ਸਦ੍ਦਾ ਗਨ੍ਧਾ ਰਸਾ ਫੋਟ੍ਠਬ੍ਬਾ – ਇਦਂ ਵੁਚ੍ਚਤਿ ਰੂਪਂ ਹੀਨਂ.
ਤਤ੍ਥ ਕਤਮਂ ਰੂਪਂ ਪਣੀਤਂ? ਯਂ ਰੂਪਂ ਤੇਸਂ ਤੇਸਂ ਸਤ੍ਤਾਨਂ ਅਨੁਞ੍ਞਾਤਂ ਅਨਵਞ੍ਞਾਤਂ ਅਹੀਲ਼ਿਤਂ ਅਪਰਿਭੂਤਂ ਚਿਤ੍ਤੀਕਤਂ ਪਣੀਤਂ ਪਣੀਤਮਤਂ ਪਣੀਤਸਮ੍ਮਤਂ ਇਟ੍ਠਂ ਕਨ੍ਤਂ ਮਨਾਪਂ, ਰੂਪਾ ਸਦ੍ਦਾ ਗਨ੍ਧਾ ਰਸਾ ਫੋਟ੍ਠਬ੍ਬਾ – ਇਦਂ ਵੁਚ੍ਚਤਿ ਰੂਪਂ ਪਣੀਤਂ. ਤਂ ਤਂ ਵਾ ਪਨ ਰੂਪਂ ਉਪਾਦਾਯੁਪਾਦਾਯ ਰੂਪਂ ਹੀਨਂ ਪਣੀਤਂ ਦਟ੍ਠਬ੍ਬਂ.
੭. ਤਤ੍ਥ ਕਤਮਂ ਰੂਪਂ ਦੂਰੇ? ਇਤ੍ਥਿਨ੍ਦ੍ਰਿਯਂ…ਪੇ… ਕਬਲ਼ੀਕਾਰੋ ਆਹਾਰੋ, ਯਂ ਵਾ ਪਨਞ੍ਞਮ੍ਪਿ ਅਤ੍ਥਿ ਰੂਪਂ ਅਨਾਸਨ੍ਨੇ ਅਨੁਪਕਟ੍ਠੇ ਦੂਰੇ ਅਸਨ੍ਤਿਕੇ – ਇਦਂ ਵੁਚ੍ਚਤਿ ਰੂਪਂ ਦੂਰੇ.
ਤਤ੍ਥ ਕਤਮਂ ਰੂਪਂ ਸਨ੍ਤਿਕੇ? ਚਕ੍ਖਾਯਤਨਂ…ਪੇ… ਫੋਟ੍ਠਬ੍ਬਾਯਤਨਂ, ਯਂ ਵਾ ਪਨਞ੍ਞਮ੍ਪਿ ਅਤ੍ਥਿ ਰੂਪਂ ਆਸਨ੍ਨੇ ਉਪਕਟ੍ਠੇ ਅਵਿਦੂਰੇ ਸਨ੍ਤਿਕੇ – ਇਦਂ ਵੁਚ੍ਚਤਿ ਰੂਪਂ ਸਨ੍ਤਿਕੇ. ਤਂ ਤਂ ਵਾ ਪਨ ਰੂਪਂ ਉਪਾਦਾਯੁਪਾਦਾਯ ਰੂਪਂ ਦੂਰੇ ਸਨ੍ਤਿਕੇ ਦਟ੍ਠਬ੍ਬਂ.
੨. ਵੇਦਨਾਕ੍ਖਨ੍ਧੋ
੮. ਤਤ੍ਥ ਕਤਮੋ ਵੇਦਨਾਕ੍ਖਨ੍ਧੋ? ਯਾ ਕਾਚਿ ਵੇਦਨਾ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾ ਅਜ੍ਝਤ੍ਤਾ ਵਾ ਬਹਿਦ੍ਧਾ ਵਾ ਓਲ਼ਾਰਿਕਾ ਵਾ ਸੁਖੁਮਾ ਵਾ ਹੀਨਾ ਵਾ ਪਣੀਤਾ ਵਾ ਯਾ ਦੂਰੇ ਸਨ੍ਤਿਕੇ ਵਾ, ਤਦੇਕਜ੍ਝਂ ਅਭਿਸਞ੍ਞੂਹਿਤ੍ਵਾ ਅਭਿਸਙ੍ਖਿਪਿਤ੍ਵਾ – ਅਯਂ ਵੁਚ੍ਚਤਿ ਵੇਦਨਾਕ੍ਖਨ੍ਧੋ.
੯. ਤਤ੍ਥ ਕਤਮਾ ਵੇਦਨਾ ਅਤੀਤਾ? ਯਾ ਵੇਦਨਾ ਅਤੀਤਾ ਨਿਰੁਦ੍ਧਾ ਵਿਗਤਾ ਵਿਪਰਿਣਤਾ ਅਤ੍ਥਙ੍ਗਤਾ ਅਬ੍ਭਤ੍ਥਙ੍ਗਤਾ ਉਪ੍ਪਜ੍ਜਿਤ੍ਵਾ ਵਿਗਤਾ ਅਤੀਤਾ ਅਤੀਤਂਸੇਨ ਸਙ੍ਗਹਿਤਾ, ਸੁਖਾ ਵੇਦਨਾ ਦੁਕ੍ਖਾ ਵੇਦਨਾ ਅਦੁਕ੍ਖਮਸੁਖਾ ਵੇਦਨਾ – ਅਯਂ ਵੁਚ੍ਚਤਿ ਵੇਦਨਾ ਅਤੀਤਾ.
ਤਤ੍ਥ ਕਤਮਾ ਵੇਦਨਾ ਅਨਾਗਤਾ? ਯਾ ਵੇਦਨਾ ਅਜਾਤਾ ਅਭੂਤਾ ਅਸਞ੍ਜਾਤਾ ਅਨਿਬ੍ਬਤ੍ਤਾ ਅਨਭਿਨਿਬ੍ਬਤ੍ਤਾ ਅਪਾਤੁਭੂਤਾ ਅਨੁਪ੍ਪਨ੍ਨਾ ਅਸਮੁਪ੍ਪਨ੍ਨਾ ਅਨੁਟ੍ਠਿਤਾ ਅਸਮੁਟ੍ਠਿਤਾ ਅਨਾਗਤਾ ਅਨਾਗਤਂਸੇਨ ਸਙ੍ਗਹਿਤਾ, ਸੁਖਾ ਵੇਦਨਾ ਦੁਕ੍ਖਾ ਵੇਦਨਾ ਅਦੁਕ੍ਖਮਸੁਖਾ ਵੇਦਨਾ – ਅਯਂ ਵੁਚ੍ਚਤਿ ਵੇਦਨਾ ਅਨਾਗਤਾ.
ਤਤ੍ਥ ਕਤਮਾ ਵੇਦਨਾ ਪਚ੍ਚੁਪ੍ਪਨ੍ਨਾ? ਯਾ ਵੇਦਨਾ ਜਾਤਾ ਭੂਤਾ ਸਞ੍ਜਾਤਾ ਨਿਬ੍ਬਤ੍ਤਾ ਅਭਿਨਿਬ੍ਬਤ੍ਤਾ ਪਾਤੁਭੂਤਾ ਉਪ੍ਪਨ੍ਨਾ ਸਮੁਪ੍ਪਨ੍ਨਾ ਉਟ੍ਠਿਤਾ ਸਮੁਟ੍ਠਿਤਾ ਪਚ੍ਚੁਪ੍ਪਨ੍ਨਾ ਪਚ੍ਚੁਪ੍ਪਨ੍ਨਂਸੇਨ ਸਙ੍ਗਹਿਤਾ, ਸੁਖਾ ਵੇਦਨਾ ਦੁਕ੍ਖਾ ਵੇਦਨਾ ਅਦੁਕ੍ਖਮਸੁਖਾ ਵੇਦਨਾ – ਅਯਂ ਵੁਚ੍ਚਤਿ ਵੇਦਨਾ ਪਚ੍ਚੁਪ੍ਪਨ੍ਨਾ.
੧੦. ਤਤ੍ਥ ਕਤਮਾ ਵੇਦਨਾ ਅਜ੍ਝਤ੍ਤਾ? ਯਾ ਵੇਦਨਾ ਤੇਸਂ ਤੇਸਂ ਸਤ੍ਤਾਨਂ ਅਜ੍ਝਤ੍ਤਂ ਪਚ੍ਚਤ੍ਤਂ ਨਿਯਕਾ ਪਾਟਿਪੁਗ੍ਗਲਿਕਾ ਉਪਾਦਿਨ੍ਨਾ, ਸੁਖਾ ਵੇਦਨਾ ਦੁਕ੍ਖਾ ਵੇਦਨਾ ਅਦੁਕ੍ਖਮਸੁਖਾ ਵੇਦਨਾ – ਅਯਂ ਵੁਚ੍ਚਤਿ ਵੇਦਨਾ ਅਜ੍ਝਤ੍ਤਾ.
ਤਤ੍ਥ ਕਤਮਾ ਵੇਦਨਾ ਬਹਿਦ੍ਧਾ? ਯਾ ਵੇਦਨਾ ਤੇਸਂ ਤੇਸਂ ਪਰਸਤ੍ਤਾਨਂ ਪਰਪੁਗ੍ਗਲਾਨਂ ਅਜ੍ਝਤ੍ਤਂ ਪਚ੍ਚਤ੍ਤਂ ਨਿਯਕਾ ਪਾਟਿਪੁਗ੍ਗਲਿਕਾ ਉਪਾਦਿਨ੍ਨਾ, ਸੁਖਾ ਵੇਦਨਾ ਦੁਕ੍ਖਾ ਵੇਦਨਾ ਅਦੁਕ੍ਖਮਸੁਖਾ ਵੇਦਨਾ – ਅਯਂ ਵੁਚ੍ਚਤਿ ਵੇਦਨਾ ਬਹਿਦ੍ਧਾ.
੧੧. ਤਤ੍ਥ ਕਤਮਾ ਵੇਦਨਾ ਓਲ਼ਾਰਿਕਾ ਸੁਖੁਮਾ? ਅਕੁਸਲਾ ਵੇਦਨਾ ਓਲ਼ਾਰਿਕਾ, ਕੁਸਲਾਬ੍ਯਾਕਤਾ ਵੇਦਨਾ ਸੁਖੁਮਾ. ਕੁਸਲਾਕੁਸਲਾ ਵੇਦਨਾ ਓਲ਼ਾਰਿਕਾ, ਅਬ੍ਯਾਕਤਾ ਵੇਦਨਾ ਸੁਖੁਮਾ. ਦੁਕ੍ਖਾ ਵੇਦਨਾ ਓਲ਼ਾਰਿਕਾ, ਸੁਖਾ ਚ ਅਦੁਕ੍ਖਮਸੁਖਾ ਚ ਵੇਦਨਾ ਸੁਖੁਮਾ. ਸੁਖਦੁਕ੍ਖਾ ਵੇਦਨਾ ਓਲ਼ਾਰਿਕਾ, ਅਦੁਕ੍ਖਮਸੁਖਾ ਵੇਦਨਾ ਸੁਖੁਮਾ. ਅਸਮਾਪਨ੍ਨਸ੍ਸ ਵੇਦਨਾ ਓਲ਼ਾਰਿਕਾ, ਸਮਾਪਨ੍ਨਸ੍ਸ ਵੇਦਨਾ ਸੁਖੁਮਾ. ਸਾਸਵਾ ਵੇਦਨਾ ਓਲ਼ਾਰਿਕਾ, ਅਨਾਸਵਾ ਵੇਦਨਾ ਸੁਖੁਮਾ. ਤਂ ਤਂ ਵਾ ਪਨ ਵੇਦਨਂ ਉਪਾਦਾਯੁਪਾਦਾਯ ਵੇਦਨਾ ਓਲ਼ਾਰਿਕਾ ਸੁਖੁਮਾ ਦਟ੍ਠਬ੍ਬਾ.
੧੨. ਤਤ੍ਥ ਕਤਮਾ ਵੇਦਨਾ ਹੀਨਾ ਪਣੀਤਾ? ਅਕੁਸਲਾ ਵੇਦਨਾ ਹੀਨਾ, ਕੁਸਲਾਬ੍ਯਾਕਤਾ ਵੇਦਨਾ ਪਣੀਤਾ. ਕੁਸਲਾਕੁਸਲਾ ਵੇਦਨਾ ਹੀਨਾ, ਅਬ੍ਯਾਕਤਾ ਵੇਦਨਾ ਪਣੀਤਾ. ਦੁਕ੍ਖਾ ਵੇਦਨਾ ਹੀਨਾ, ਸੁਖਾ ਚ ਅਦੁਕ੍ਖਮਸੁਖਾ ਚ ਵੇਦਨਾ ਪਣੀਤਾ. ਸੁਖਦੁਕ੍ਖਾ ਵੇਦਨਾ ਹੀਨਾ, ਅਦੁਕ੍ਖਮਸੁਖਾ ਵੇਦਨਾ ਪਣੀਤਾ. ਅਸਮਾਪਨ੍ਨਸ੍ਸ ਵੇਦਨਾ ਹੀਨਾ, ਸਮਾਪਨ੍ਨਸ੍ਸ ਵੇਦਨਾ ਪਣੀਤਾ. ਸਾਸਵਾ ਵੇਦਨਾ ਹੀਨਾ, ਅਨਾਸਵਾ ਵੇਦਨਾ ਪਣੀਤਾ. ਤਂ ਤਂ ਵਾ ਪਨ ਵੇਦਨਂ ਉਪਾਦਾਯੁਪਾਦਾਯ ਵੇਦਨਾ ਹੀਨਾ ਪਣੀਤਾ ਦਟ੍ਠਬ੍ਬਾ.
੧੩. ਤਤ੍ਥ ਕਤਮਾ ਵੇਦਨਾ ਦੂਰੇ? ਅਕੁਸਲਾ ਵੇਦਨਾ ਕੁਸਲਾਬ੍ਯਾਕਤਾਹਿ ਵੇਦਨਾਹਿ ਦੂਰੇ; ਕੁਸਲਾਬ੍ਯਾਕਤਾ ਵੇਦਨਾ ਅਕੁਸਲਾਯ ਵੇਦਨਾਯ ਦੂਰੇ; ਕੁਸਲਾ ਵੇਦਨਾ ਅਕੁਸਲਾਬ੍ਯਾਕਤਾਹਿ ਵੇਦਨਾਹਿ ਦੂਰੇ; ਅਕੁਸਲਾਬ੍ਯਾਕਤਾ ਵੇਦਨਾ ਕੁਸਲਾਯ ਵੇਦਨਾਯ ਦੂਰੇ; ਅਬ੍ਯਾਕਤਾ ਵੇਦਨਾ ਕੁਸਲਾਕੁਸਲਾਹਿ ਵੇਦਨਾਹਿ ਦੂਰੇ; ਕੁਸਲਾਕੁਸਲਾ ਵੇਦਨਾ ਅਬ੍ਯਾਕਤਾਯ ਵੇਦਨਾਯ ਦੂਰੇ. ਦੁਕ੍ਖਾ ਵੇਦਨਾ ਸੁਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਦੂਰੇ; ਸੁਖਾ ਚ ਅਦੁਕ੍ਖਮਸੁਖਾ ਚ ਵੇਦਨਾ ਦੁਕ੍ਖਾਯ ਵੇਦਨਾਯ ਦੂਰੇ; ਸੁਖਾ ਵੇਦਨਾ ਦੁਕ੍ਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਦੂਰੇ; ਦੁਕ੍ਖਾ ਚ ਅਦੁਕ੍ਖਮਸੁਖਾ ਚ ਵੇਦਨਾ ਸੁਖਾਯ ਵੇਦਨਾਯ ਦੂਰੇ; ਅਦੁਕ੍ਖਮਸੁਖਾ ਵੇਦਨਾ ਸੁਖਦੁਕ੍ਖਾਹਿ ਵੇਦਨਾਹਿ ਦੂਰੇ; ਸੁਖਦੁਕ੍ਖਾ ਵੇਦਨਾ ਅਦੁਕ੍ਖਮਸੁਖਾਯ ਵੇਦਨਾਯ ਦੂਰੇ. ਅਸਮਾਪਨ੍ਨਸ੍ਸ ਵੇਦਨਾ ਸਮਾਪਨ੍ਨਸ੍ਸ ਵੇਦਨਾਯ ਦੂਰੇ; ਸਮਾਪਨ੍ਨਸ੍ਸ ਵੇਦਨਾ ਅਸਮਾਪਨ੍ਨਸ੍ਸ ਵੇਦਨਾਯ ਦੂਰੇ. ਸਾਸਵਾ ਵੇਦਨਾ ਅਨਾਸਵਾਯ ਵੇਦਨਾਯ ਦੂਰੇ; ਅਨਾਸਵਾ ਵੇਦਨਾ ਸਾਸਵਾਯ ਵੇਦਨਾਯ ਦੂਰੇ – ਅਯਂ ਵੁਚ੍ਚਤਿ ਵੇਦਨਾ ਦੂਰੇ.
ਤਤ੍ਥ ਕਤਮਾ ਵੇਦਨਾ ਸਨ੍ਤਿਕੇ? ਅਕੁਸਲਾ ਵੇਦਨਾ ਅਕੁਸਲਾਯ ਵੇਦਨਾਯ ਸਨ੍ਤਿਕੇ; ਕੁਸਲਾ ਵੇਦਨਾ ਕੁਸਲਾਯ ਵੇਦਨਾਯ ਸਨ੍ਤਿਕੇ; ਅਬ੍ਯਾਕਤਾ ਵੇਦਨਾ ਅਬ੍ਯਾਕਤਾਯ ਵੇਦਨਾਯ ਸਨ੍ਤਿਕੇ. ਦੁਕ੍ਖਾ ਵੇਦਨਾ ਦੁਕ੍ਖਾਯ ਵੇਦਨਾਯ ਸਨ੍ਤਿਕੇ; ਸੁਖਾ ਵੇਦਨਾ ਸੁਖਾਯ ਵੇਦਨਾਯ ਸਨ੍ਤਿਕੇ; ਅਦੁਕ੍ਖਮਸੁਖਾ ਵੇਦਨਾ ਅਦੁਕ੍ਖਮਸੁਖਾਯ ਵੇਦਨਾਯ ਸਨ੍ਤਿਕੇ. ਅਸਮਾਪਨ੍ਨਸ੍ਸ ਵੇਦਨਾ ਅਸਮਾਪਨ੍ਨਸ੍ਸ ਵੇਦਨਾਯ ਸਨ੍ਤਿਕੇ; ਸਮਾਪਨ੍ਨਸ੍ਸ ਵੇਦਨਾ ਸਮਾਪਨ੍ਨਸ੍ਸ ਵੇਦਨਾਯ ਸਨ੍ਤਿਕੇ. ਸਾਸਵਾ ਵੇਦਨਾ ਸਾਸਵਾਯ ਵੇਦਨਾਯ ਸਨ੍ਤਿਕੇ; ਅਨਾਸਵਾ ਵੇਦਨਾ ਅਨਾਸਵਾਯ ਵੇਦਨਾਯ ਸਨ੍ਤਿਕੇ. ਅਯਂ ਵੁਚ੍ਚਤਿ ਵੇਦਨਾ ਸਨ੍ਤਿਕੇ. ਤਂ ਤਂ ਵਾ ਪਨ ਵੇਦਨਂ ਉਪਾਦਾਯੁਪਾਦਾਯ ਵੇਦਨਾ ਦੂਰੇ ਸਨ੍ਤਿਕੇ ਦਟ੍ਠਬ੍ਬਾ.
੩. ਸਞ੍ਞਾਕ੍ਖਨ੍ਧੋ
੧੪. ਤਤ੍ਥ ਕਤਮੋ ਸਞ੍ਞਾਕ੍ਖਨ੍ਧੋ? ਯਾ ਕਾਚਿ ਸਞ੍ਞਾ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾ ਅਜ੍ਝਤ੍ਤਾ ਵਾ ਬਹਿਦ੍ਧਾ ਵਾ ਓਲ਼ਾਰਿਕਾ ਵਾ ਸੁਖੁਮਾ ਵਾ ਹੀਨਾ ਵਾ ਪਣੀਤਾ ਵਾ ਯਾ ਦੂਰੇ ਸਨ੍ਤਿਕੇ ਵਾ ਤਦੇਕਜ੍ਝਂ ਅਭਿਸਞ੍ਞੂਹਿਤ੍ਵਾ ਅਭਿਸਙ੍ਖਿਪਿਤ੍ਵਾ – ਅਯਂ ਵੁਚ੍ਚਤਿ ਸਞ੍ਞਾਕ੍ਖਨ੍ਧੋ.
੧੫. ਤਤ੍ਥ ਕਤਮਾ ਸਞ੍ਞਾ ਅਤੀਤਾ? ਯਾ ਸਞ੍ਞਾ ਅਤੀਤਾ ਨਿਰੁਦ੍ਧਾ ਵਿਗਤਾ ਵਿਪਰਿਣਤਾ ਅਤ੍ਥਙ੍ਗਤਾ ਅਬ੍ਭਤ੍ਥਙ੍ਗਤਾ ਉਪ੍ਪਜ੍ਜਿਤ੍ਵਾ ਵਿਗਤਾ ਅਤੀਤਾ ਅਤੀਤਂਸੇਨ ਸਙ੍ਗਹਿਤਾ, ਚਕ੍ਖੁਸਮ੍ਫਸ੍ਸਜਾ ਸਞ੍ਞਾ ਸੋਤਸਮ੍ਫਸ੍ਸਜਾ ਸਞ੍ਞਾ ਘਾਨਸਮ੍ਫਸ੍ਸਜਾ ਸਞ੍ਞਾ ਜਿਵ੍ਹਾਸਮ੍ਫਸ੍ਸਜਾ ਸਞ੍ਞਾ ਕਾਯਸਮ੍ਫਸ੍ਸਜਾ ਸਞ੍ਞਾ ਮਨੋਸਮ੍ਫਸ੍ਸਜਾ ਸਞ੍ਞਾ – ਅਯਂ ਵੁਚ੍ਚਤਿ ਸਞ੍ਞਾ ਅਤੀਤਾ.
ਤਤ੍ਥ ਕਤਮਾ ਸਞ੍ਞਾ ਅਨਾਗਤਾ? ਯਾ ਸਞ੍ਞਾ ਅਜਾਤਾ ਅਭੂਤਾ ਅਸਞ੍ਜਾਤਾ ਅਨਿਬ੍ਬਤ੍ਤਾ ਅਨਭਿਨਿਬ੍ਬਤ੍ਤਾ ਅਪਾਤੁਭੂਤਾ ਅਨੁਪ੍ਪਨ੍ਨਾ ਅਸਮੁਪ੍ਪਨ੍ਨਾ ਅਨੁਟ੍ਠਿਤਾ ਅਸਮੁਟ੍ਠਿਤਾ ਅਨਾਗਤਾ ਅਨਾਗਤਂਸੇਨ ਸਙ੍ਗਹਿਤਾ, ਚਕ੍ਖੁਸਮ੍ਫਸ੍ਸਜਾ ਸਞ੍ਞਾ ਸੋਤਸਮ੍ਫਸ੍ਸਜਾ ਸਞ੍ਞਾ ਘਾਨਸਮ੍ਫਸ੍ਸਜਾ ਸਞ੍ਞਾ ਜਿਵ੍ਹਾਸਮ੍ਫਸ੍ਸਜਾ ਸਞ੍ਞਾ ਕਾਯਸਮ੍ਫਸ੍ਸਜਾ ਸਞ੍ਞਾ ਮਨੋਸਮ੍ਫਸ੍ਸਜਾ ਸਞ੍ਞਾ – ਅਯਂ ਵੁਚ੍ਚਤਿ ਸਞ੍ਞਾ ਅਨਾਗਤਾ.
ਤਤ੍ਥ ਕਤਮਾ ਸਞ੍ਞਾ ਪਚ੍ਚੁਪ੍ਪਨ੍ਨਾ? ਯਾ ਸਞ੍ਞਾ ਜਾਤਾ ਭੂਤਾ ਸਞ੍ਜਾਤਾ ਨਿਬ੍ਬਤ੍ਤਾ ਅਭਿਨਿਬ੍ਬਤ੍ਤਾ ਪਾਤੁਭੂਤਾ ਉਪ੍ਪਨ੍ਨਾ ਸਮੁਪ੍ਪਨ੍ਨਾ ਉਟ੍ਠਿਤਾ ਸਮੁਟ੍ਠਿਤਾ ਪਚ੍ਚੁਪ੍ਪਨ੍ਨਾ ਪਚ੍ਚੁਪ੍ਪਨ੍ਨਂਸੇਨ ਸਙ੍ਗਹਿਤਾ, ਚਕ੍ਖੁਸਮ੍ਫਸ੍ਸਜਾ ਸਞ੍ਞਾ ਸੋਤਸਮ੍ਫਸ੍ਸਜਾ ਸਞ੍ਞਾ ਘਾਨਸਮ੍ਫਸ੍ਸਜਾ ਸਞ੍ਞਾ ਜਿਵ੍ਹਾਸਮ੍ਫਸ੍ਸਜਾ ਸਞ੍ਞਾ ਕਾਯਸਮ੍ਫਸ੍ਸਜਾ ਸਞ੍ਞਾ ਮਨੋਸਮ੍ਫਸ੍ਸਜਾ ਸਞ੍ਞਾ – ਅਯਂ ਵੁਚ੍ਚਤਿ ਸਞ੍ਞਾ ਪਚ੍ਚੁਪ੍ਪਨ੍ਨਾ.
੧੬. ਤਤ੍ਥ ਕਤਮਾ ਸਞ੍ਞਾ ਅਜ੍ਝਤ੍ਤਾ? ਯਾ ਸਞ੍ਞਾ ਤੇਸਂ ਤੇਸਂ ਸਤ੍ਤਾਨਂ ਅਜ੍ਝਤ੍ਤਂ ਪਚ੍ਚਤ੍ਤਂ ਨਿਯਕਾ ਪਾਟਿਪੁਗ੍ਗਲਿਕਾ ਉਪਾਦਿਨ੍ਨਾ, ਚਕ੍ਖੁਸਮ੍ਫਸ੍ਸਜਾ ਸਞ੍ਞਾ ਸੋਤਸਮ੍ਫਸ੍ਸਜਾ ਸਞ੍ਞਾ ਘਾਨਸਮ੍ਫਸ੍ਸਜਾ ਸਞ੍ਞਾ ਜਿਵ੍ਹਾਸਮ੍ਫਸ੍ਸਜਾ ਸਞ੍ਞਾ ਕਾਯਸਮ੍ਫਸ੍ਸਜਾ ਸਞ੍ਞਾ ਮਨੋਸਮ੍ਫਸ੍ਸਜਾ ਸਞ੍ਞਾ – ਅਯਂ ਵੁਚ੍ਚਤਿ ਸਞ੍ਞਾ ਅਜ੍ਝਤ੍ਤਾ.
ਤਤ੍ਥ ਕਤਮਾ ਸਞ੍ਞਾ ਬਹਿਦ੍ਧਾ? ਯਾ ਸਞ੍ਞਾ ਤੇਸਂ ਤੇਸਂ ਪਰਸਤ੍ਤਾਨਂ ਪਰਪੁਗ੍ਗਲਾਨਂ ਅਜ੍ਝਤ੍ਤਂ ਪਚ੍ਚਤ੍ਤਂ ਨਿਯਕਾ ਪਾਟਿਪੁਗ੍ਗਲਿਕਾ ਉਪਾਦਿਨ੍ਨਾ, ਚਕ੍ਖੁਸਮ੍ਫਸ੍ਸਜਾ ਸਞ੍ਞਾ ਸੋਤਸਮ੍ਫਸ੍ਸਜਾ ਸਞ੍ਞਾ ਘਾਨਸਮ੍ਫਸ੍ਸਜਾ ਸਞ੍ਞਾ ਜਿਵ੍ਹਾਸਮ੍ਫਸ੍ਸਜਾ ਸਞ੍ਞਾ ਕਾਯਸਮ੍ਫਸ੍ਸਜਾ ਸਞ੍ਞਾ ਮਨੋਸਮ੍ਫਸ੍ਸਜਾ ਸਞ੍ਞਾ – ਅਯਂ ਵੁਚ੍ਚਤਿ ਸਞ੍ਞਾ ਬਹਿਦ੍ਧਾ.
੧੭. ਤਤ੍ਥ ਕਤਮਾ ਸਞ੍ਞਾ ਓਲ਼ਾਰਿਕਾ ਸੁਖੁਮਾ? ਪਟਿਘਸਮ੍ਫਸ੍ਸਜਾ ਸਞ੍ਞਾ ਓਲ਼ਾਰਿਕਾ, ਅਧਿਵਚਨਸਮ੍ਫਸ੍ਸਜਾ ਸਞ੍ਞਾ ਸੁਖੁਮਾ. ਅਕੁਸਲਾ ਸਞ੍ਞਾ ਓਲ਼ਾਰਿਕਾ, ਕੁਸਲਾਬ੍ਯਾਕਤਾ ਸਞ੍ਞਾ ਸੁਖੁਮਾ. ਕੁਸਲਾਕੁਸਲਾ ਸਞ੍ਞਾ ਓਲ਼ਾਰਿਕਾ, ਅਬ੍ਯਾਕਤਾ ਸਞ੍ਞਾ ਸੁਖੁਮਾ. ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾ ਸਞ੍ਞਾ ਓਲ਼ਾਰਿਕਾ, ਸੁਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤਾ ਸਞ੍ਞਾ ਸੁਖੁਮਾ. ਸੁਖਦੁਕ੍ਖਾਹਿ ਵੇਦਨਾਹਿ ਸਮ੍ਪਯੁਤ੍ਤਾ ਸਞ੍ਞਾ ਓਲ਼ਾਰਿਕਾ, ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ ਸਞ੍ਞਾ ਸੁਖੁਮਾ. ਅਸਮਾਪਨ੍ਨਸ੍ਸ ਸਞ੍ਞਾ ਓਲ਼ਾਰਿਕਾ, ਸਮਾਪਨ੍ਨਸ੍ਸ ਸਞ੍ਞਾ ਸੁਖੁਮਾ. ਸਾਸਵਾ ਸਞ੍ਞਾ ਓਲ਼ਾਰਿਕਾ, ਅਨਾਸਵਾ ਸਞ੍ਞਾ ਸੁਖੁਮਾ. ਤਂ ਤਂ ਵਾ ਪਨ ਸਞ੍ਞਂ ਉਪਾਦਾਯੁਪਾਦਾਯ ਸਞ੍ਞਾ ਓਲ਼ਾਰਿਕਾ ਸੁਖੁਮਾ ਦਟ੍ਠਬ੍ਬਾ.
੧੮. ਤਤ੍ਥ ਕਤਮਾ ਸਞ੍ਞਾ ਹੀਨਾ ਪਣੀਤਾ? ਅਕੁਸਲਾ ਸਞ੍ਞਾ ਹੀਨਾ, ਕੁਸਲਾਬ੍ਯਾਕਤਾ ਸਞ੍ਞਾ ਪਣੀਤਾ. ਕੁਸਲਾਕੁਸਲਾ ਸਞ੍ਞਾ ਹੀਨਾ, ਅਬ੍ਯਾਕਤਾ ਸਞ੍ਞਾ ਪਣੀਤਾ. ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾ ਸਞ੍ਞਾ ਹੀਨਾ, ਸੁਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤਾ ਸਞ੍ਞਾ ਪਣੀਤਾ. ਸੁਖਦੁਕ੍ਖਾਹਿ ਵੇਦਨਾਹਿ ਸਮ੍ਪਯੁਤ੍ਤਾ ਸਞ੍ਞਾ ਹੀਨਾ, ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ ਸਞ੍ਞਾ ਪਣੀਤਾ. ਅਸਮਾਪਨ੍ਨਸ੍ਸ ਸਞ੍ਞਾ ਹੀਨਾ, ਸਮਾਪਨ੍ਨਸ੍ਸ ਸਞ੍ਞਾ ਪਣੀਤਾ. ਸਾਸਵਾ ਸਞ੍ਞਾ ਹੀਨਾ, ਅਨਾਸਵਾ ਸਞ੍ਞਾ ਪਣੀਤਾ. ਤਂ ਤਂ ਵਾ ਪਨ ਸਞ੍ਞਂ ਉਪਾਦਾਯੁਪਾਦਾਯ ਸਞ੍ਞਾ ਹੀਨਾ ਪਣੀਤਾ ਦਟ੍ਠਬ੍ਬਾ.
੧੯. ਤਤ੍ਥ ਕਤਮਾ ਸਞ੍ਞਾ ਦੂਰੇ? ਅਕੁਸਲਾ ਸਞ੍ਞਾ ਕੁਸਲਾਬ੍ਯਾਕਤਾਹਿ ਸਞ੍ਞਾਹਿ ਦੂਰੇ; ਕੁਸਲਾਬ੍ਯਾਕਤਾ ਸਞ੍ਞਾ ਅਕੁਸਲਾਯ ਸਞ੍ਞਾਯ ਦੂਰੇ; ਕੁਸਲਾ ਸਞ੍ਞਾ ਅਕੁਸਲਾਬ੍ਯਾਕਤਾਹਿ ਸਞ੍ਞਾਹਿ ਦੂਰੇ; ਅਕੁਸਲਾਬ੍ਯਾਕਤਾ ਸਞ੍ਞਾ ਕੁਸਲਾਯ ਸਞ੍ਞਾਯ ਦੂਰੇ. ਅਬ੍ਯਾਕਤਾ ਸਞ੍ਞਾ ਕੁਸਲਾਕੁਸਲਾਹਿ ਸਞ੍ਞਾਹਿ ਦੂਰੇ; ਕੁਸਲਾਕੁਸਲਾ ਸਞ੍ਞਾ ਅਬ੍ਯਾਕਤਾਯ ਸਞ੍ਞਾਯ ਦੂਰੇ. ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾ ਸਞ੍ਞਾ ਸੁਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤਾਹਿ ਸਞ੍ਞਾਹਿ ਦੂਰੇ; ਸੁਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤਾ ਸਞ੍ਞਾ ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾਯ ਸਞ੍ਞਾਯ ਦੂਰੇ; ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ ਸਞ੍ਞਾ ਦੁਕ੍ਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤਾਹਿ ਸਞ੍ਞਾਹਿ ਦੂਰੇ; ਦੁਕ੍ਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤਾ ਸਞ੍ਞਾ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾਯ ਸਞ੍ਞਾਯ ਦੂਰੇ; ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ ਸਞ੍ਞਾ ਸੁਖਦੁਕ੍ਖਾਹਿ ਵੇਦਨਾਹਿ ਸਮ੍ਪਯੁਤ੍ਤਾਹਿ ਸਞ੍ਞਾਹਿ ਦੂਰੇ; ਸੁਖਦੁਕ੍ਖਾਹਿ ਵੇਦਨਾਹਿ ਸਮ੍ਪਯੁਤ੍ਤਾ ਸਞ੍ਞਾ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾਯ ਸਞ੍ਞਾਯ ਦੂਰੇ. ਅਸਮਾਪਨ੍ਨਸ੍ਸ ਸਞ੍ਞਾ ਸਮਾਪਨ੍ਨਸ੍ਸ ਸਞ੍ਞਾਯ ਦੂਰੇ; ਸਮਾਪਨ੍ਨਸ੍ਸ ਸਞ੍ਞਾ ਅਸਮਾਪਨ੍ਨਸ੍ਸ ਸਞ੍ਞਾਯ ਦੂਰੇ. ਸਾਸਵਾ ਸਞ੍ਞਾ ਅਨਾਸਵਾਯ ਸਞ੍ਞਾਯ ਦੂਰੇ; ਅਨਾਸਵਾ ਸਞ੍ਞਾ ਸਾਸਵਾਯ ਸਞ੍ਞਾਯ ਦੂਰੇ – ਅਯਂ ਵੁਚ੍ਚਤਿ ਸਞ੍ਞਾ ਦੂਰੇ.
ਤਤ੍ਥ ਕਤਮਾ ਸਞ੍ਞਾ ਸਨ੍ਤਿਕੇ? ਅਕੁਸਲਾ ਸਞ੍ਞਾ ਅਕੁਸਲਾਯ ਸਞ੍ਞਾਯ ਸਨ੍ਤਿਕੇ; ਕੁਸਲਾ ਸਞ੍ਞਾ ਕੁਸਲਾਯ ਸਞ੍ਞਾਯ ਸਨ੍ਤਿਕੇ; ਅਬ੍ਯਾਕਤਾ ਸਞ੍ਞਾ ਅਬ੍ਯਾਕਤਾਯ ਸਞ੍ਞਾਯ ਸਨ੍ਤਿਕੇ. ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾ ਸਞ੍ਞਾ ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾਯ ਸਞ੍ਞਾਯ ਸਨ੍ਤਿਕੇ; ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ ਸਞ੍ਞਾ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾਯ ਸਞ੍ਞਾਯ ਸਨ੍ਤਿਕੇ; ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ ਸਞ੍ਞਾ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾਯ ਸਞ੍ਞਾਯ ਸਨ੍ਤਿਕੇ. ਅਸਮਾਪਨ੍ਨਸ੍ਸ ਸਞ੍ਞਾ ਅਸਮਾਪਨ੍ਨਸ੍ਸ ਸਞ੍ਞਾਯ ਸਨ੍ਤਿਕੇ; ਸਮਾਪਨ੍ਨਸ੍ਸ ਸਞ੍ਞਾ ਸਮਾਪਨ੍ਨਸ੍ਸ ਸਞ੍ਞਾਯ ਸਨ੍ਤਿਕੇ. ਸਾਸਵਾ ਸਞ੍ਞਾ ਸਾਸਵਾਯ ਸਞ੍ਞਾਯ ਸਨ੍ਤਿਕੇ; ਅਨਾਸਵਾ ਸਞ੍ਞਾ ਅਨਾਸਵਾਯ ਸਞ੍ਞਾਯ ਸਨ੍ਤਿਕੇ. ਅਯਂ ਵੁਚ੍ਚਤਿ ਸਞ੍ਞਾ ਸਨ੍ਤਿਕੇ. ਤਂ ਤਂ ਵਾ ਪਨ ਸਞ੍ਞਂ ਉਪਾਦਾਯੁਪਾਦਾਯ ਸਞ੍ਞਾ ਦੂਰੇ ਸਨ੍ਤਿਕੇ ਦਟ੍ਠਬ੍ਬਾ.
੪. ਸਙ੍ਖਾਰਕ੍ਖਨ੍ਧੋ
੨੦. ਤਤ੍ਥ ਕਤਮੋ ਸਙ੍ਖਾਰਕ੍ਖਨ੍ਧੋ? ਯੇ ਕੇਚਿ ਸਙ੍ਖਾਰਾ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾ ਅਜ੍ਝਤ੍ਤਾ ਵਾ ਬਹਿਦ੍ਧਾ ਵਾ ਓਲ਼ਾਰਿਕਾ ਵਾ ਸੁਖੁਮਾ ਵਾ ਹੀਨਾ ਵਾ ਪਣੀਤਾ ਵਾ ਯੇ ਦੂਰੇ ਸਨ੍ਤਿਕੇ ਵਾ, ਤਦੇਕਜ੍ਝਂ ਅਭਿਸਞ੍ਞੂਹਿਤ੍ਵਾ ਅਭਿਸਙ੍ਖਿਪਿਤ੍ਵਾ – ਅਯਂ ਵੁਚ੍ਚਤਿ ਸਙ੍ਖਾਰਕ੍ਖਨ੍ਧੋ.
੨੧. ਤਤ੍ਥ ਕਤਮੇ ਸਙ੍ਖਾਰਾ ਅਤੀਤਾ? ਯੇ ਸਙ੍ਖਾਰਾ ਅਤੀਤਾ ਨਿਰੁਦ੍ਧਾ ਵਿਗਤਾ ਵਿਪਰਿਣਤਾ ਅਤ੍ਥਙ੍ਗਤਾ ਅਬ੍ਭਤ੍ਥਙ੍ਗਤਾ ਉਪ੍ਪਜ੍ਜਿਤ੍ਵਾ ਵਿਗਤਾ ਅਤੀਤਾ ਅਤੀਤਂਸੇਨ ਸਙ੍ਗਹਿਤਾ, ਚਕ੍ਖੁਸਮ੍ਫਸ੍ਸਜਾ ਚੇਤਨਾ ਸੋਤਸਮ੍ਫਸ੍ਸਜਾ ਚੇਤਨਾ ਘਾਨਸਮ੍ਫਸ੍ਸਜਾ ਚੇਤਨਾ ਜਿਵ੍ਹਾਸਮ੍ਫਸ੍ਸਜਾ ਚੇਤਨਾ ਕਾਯਸਮ੍ਫਸ੍ਸਜਾ ਚੇਤਨਾ ਮਨੋਸਮ੍ਫਸ੍ਸਜਾ ਚੇਤਨਾ – ਇਮੇ ਵੁਚ੍ਚਨ੍ਤਿ ਸਙ੍ਖਾਰਾ ਅਤੀਤਾ.
ਤਤ੍ਥ ਕਤਮੇ ਸਙ੍ਖਾਰਾ ਅਨਾਗਤਾ? ਯੇ ਸਙ੍ਖਾਰਾ ਅਜਾਤਾ ਅਭੂਤਾ ਅਸਞ੍ਜਾਤਾ ਅਨਿਬ੍ਬਤ੍ਤਾ ਅਨਭਿਨਿਬ੍ਬਤ੍ਤਾ ਅਪਾਤੁਭੂਤਾ ਅਨੁਪ੍ਪਨ੍ਨਾ ਅਸਮੁਪ੍ਪਨ੍ਨਾ ਅਨੁਟ੍ਠਿਤਾ ਅਸਮੁਟ੍ਠਿਤਾ ਅਨਾਗਤਾ ਅਨਾਗਤਂਸੇਨ ਸਙ੍ਗਹਿਤਾ, ਚਕ੍ਖੁਸਮ੍ਫਸ੍ਸਜਾ ਚੇਤਨਾ ਸੋਤਸਮ੍ਫਸ੍ਸਜਾ ਚੇਤਨਾ ਘਾਨਸਮ੍ਫਸ੍ਸਜਾ ਚੇਤਨਾ ਜਿਵ੍ਹਾਸਮ੍ਫਸ੍ਸਜਾ ਚੇਤਨਾ ਕਾਯਸਮ੍ਫਸ੍ਸਜਾ ਚੇਤਨਾ ਮਨੋਸਮ੍ਫਸ੍ਸਜਾ ਚੇਤਨਾ – ਇਮੇ ਵੁਚ੍ਚਨ੍ਤਿ ਸਙ੍ਖਾਰਾ ਅਨਾਗਤਾ.
ਤਤ੍ਥ ਕਤਮੇ ਸਙ੍ਖਾਰਾ ਪਚ੍ਚੁਪ੍ਪਨ੍ਨਾ? ਯੇ ਸਙ੍ਖਾਰਾ ਜਾਤਾ ਭੂਤਾ ਸਞ੍ਜਾਤਾ ਨਿਬ੍ਬਤ੍ਤਾ ਅਭਿਨਿਬ੍ਬਤ੍ਤਾ ਪਾਤੁਭੂਤਾ ਉਪ੍ਪਨ੍ਨਾ ਸਮੁਪ੍ਪਨ੍ਨਾ ਉਟ੍ਠਿਤਾ ਸਮੁਟ੍ਠਿਤਾ ਪਚ੍ਚੁਪ੍ਪਨ੍ਨਾ ਪਚ੍ਚੁਪ੍ਪਨ੍ਨਂਸੇਨ ਸਙ੍ਗਹਿਤਾ, ਚਕ੍ਖੁਸਮ੍ਫਸ੍ਸਜਾ ਚੇਤਨਾ ਸੋਤਸਮ੍ਫਸ੍ਸਜਾ ਚੇਤਨਾ ਘਾਨਸਮ੍ਫਸ੍ਸਜਾ ਚੇਤਨਾ ਜਿਵ੍ਹਾਸਮ੍ਫਸ੍ਸਜਾ ਚੇਤਨਾ ਕਾਯਸਮ੍ਫਸ੍ਸਜਾ ਚੇਤਨਾ ਮਨੋਸਮ੍ਫਸ੍ਸਜਾ ਚੇਤਨਾ – ਇਮੇ ਵੁਚ੍ਚਨ੍ਤਿ ਸਙ੍ਖਾਰਾ ਪਚ੍ਚੁਪ੍ਪਨ੍ਨਾ.
੨੨. ਤਤ੍ਥ ਕਤਮੇ ਸਙ੍ਖਾਰਾ ਅਜ੍ਝਤ੍ਤਾ? ਯੇ ਸਙ੍ਖਾਰਾ ਤੇਸਂ ਤੇਸਂ ਸਤ੍ਤਾਨਂ ਅਜ੍ਝਤ੍ਤਂ ਪਚ੍ਚਤ੍ਤਂ ਨਿਯਕਾ ਪਾਟਿਪੁਗ੍ਗਲਿਕਾ ਉਪਾਦਿਨ੍ਨਾ, ਚਕ੍ਖੁਸਮ੍ਫਸ੍ਸਜਾ ਚੇਤਨਾ ਸੋਤਸਮ੍ਫਸ੍ਸਜਾ ਚੇਤਨਾ ਘਾਨਸਮ੍ਫਸ੍ਸਜਾ ਚੇਤਨਾ ਜਿਵ੍ਹਾਸਮ੍ਫਸ੍ਸਜਾ ਚੇਤਨਾ ਕਾਯਸਮ੍ਫਸ੍ਸਜਾ ਚੇਤਨਾ ਮਨੋਸਮ੍ਫਸ੍ਸਜਾ ਚੇਤਨਾ – ਇਮੇ ਵੁਚ੍ਚਨ੍ਤਿ ਸਙ੍ਖਾਰਾ ਅਜ੍ਝਤ੍ਤਾ.
ਤਤ੍ਥ ਕਤਮੇ ਸਙ੍ਖਾਰਾ ਬਹਿਦ੍ਧਾ? ਯੇ ਸਙ੍ਖਾਰਾ ਤੇਸਂ ਤੇਸਂ ਪਰਸਤ੍ਤਾਨਂ ਪਰਪੁਗ੍ਗਲਾਨਂ ਅਜ੍ਝਤ੍ਤਂ ਪਚ੍ਚਤ੍ਤਂ ਨਿਯਕਾ ਪਾਟਿਪੁਗ੍ਗਲਿਕਾ ਉਪਾਦਿਨ੍ਨਾ, ਚਕ੍ਖੁਸਮ੍ਫਸ੍ਸਜਾ ਚੇਤਨਾ ਸੋਤਸਮ੍ਫਸ੍ਸਜਾ ਚੇਤਨਾ ਘਾਨਸਮ੍ਫਸ੍ਸਜਾ ਚੇਤਨਾ ਜਿਵ੍ਹਾਸਮ੍ਫਸ੍ਸਜਾ ਚੇਤਨਾ ਕਾਯਸਮ੍ਫਸ੍ਸਜਾ ਚੇਤਨਾ ਮਨੋਸਮ੍ਫਸ੍ਸਜਾ ਚੇਤਨਾ – ਇਮੇ ਵੁਚ੍ਚਨ੍ਤਿ ਸਙ੍ਖਾਰਾ ਬਹਿਦ੍ਧਾ.
੨੩. ਤਤ੍ਥ ਕਤਮੇ ਸਙ੍ਖਾਰਾ ਓਲ਼ਾਰਿਕਾ ਸੁਖੁਮਾ? ਅਕੁਸਲਾ ਸਙ੍ਖਾਰਾ ਓਲ਼ਾਰਿਕਾ, ਕੁਸਲਾਬ੍ਯਾਕਤਾ ਸਙ੍ਖਾਰਾ ਸੁਖੁਮਾ. ਕੁਸਲਾਕੁਸਲਾ ਸਙ੍ਖਾਰਾ ਓਲ਼ਾਰਿਕਾ, ਅਬ੍ਯਾਕਤਾ ਸਙ੍ਖਾਰਾ ਸੁਖੁਮਾ. ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾ ਸਙ੍ਖਾਰਾ ਓਲ਼ਾਰਿਕਾ, ਸੁਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤਾ ਸਙ੍ਖਾਰਾ ਸੁਖੁਮਾ. ਸੁਖਦੁਕ੍ਖਾਹਿ ਵੇਦਨਾਹਿ ਸਮ੍ਪਯੁਤ੍ਤਾ ਸਙ੍ਖਾਰਾ ਓਲ਼ਾਰਿਕਾ, ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ ਸਙ੍ਖਾਰਾ ਸੁਖੁਮਾ. ਅਸਮਾਪਨ੍ਨਸ੍ਸ ਸਙ੍ਖਾਰਾ ਓਲ਼ਾਰਿਕਾ, ਸਮਾਪਨ੍ਨਸ੍ਸ ਸਙ੍ਖਾਰਾ ਸੁਖੁਮਾ. ਸਾਸਵਾ ਸਙ੍ਖਾਰਾ ਓਲ਼ਾਰਿਕਾ, ਅਨਾਸਵਾ ਸਙ੍ਖਾਰਾ ਸੁਖੁਮਾ. ਤੇ ਤੇ ਵਾ ਪਨ ਸਙ੍ਖਾਰੇ ਉਪਾਦਾਯੁਪਾਦਾਯ ਸਙ੍ਖਾਰਾ ਓਲ਼ਾਰਿਕਾ ਸੁਖੁਮਾ ਦਟ੍ਠਬ੍ਬਾ.
੨੪. ਤਤ੍ਥ ਕਤਮੇ ਸਙ੍ਖਾਰਾ ਹੀਨਾ ਪਣੀਤਾ? ਅਕੁਸਲਾ ਸਙ੍ਖਾਰਾ ਹੀਨਾ, ਕੁਸਲਾਬ੍ਯਾਕਤਾ ਸਙ੍ਖਾਰਾ ਪਣੀਤਾ. ਕੁਸਲਾਕੁਸਲਾ ਸਙ੍ਖਾਰਾ ਹੀਨਾ, ਅਬ੍ਯਾਕਤਾ ਸਙ੍ਖਾਰਾ ਪਣੀਤਾ. ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾ ਸਙ੍ਖਾਰਾ ਹੀਨਾ, ਸੁਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤਾ ਸਙ੍ਖਾਰਾ ਪਣੀਤਾ. ਸੁਖਦੁਕ੍ਖਾਹਿ ਵੇਦਨਾਹਿ ਸਮ੍ਪਯੁਤ੍ਤਾ ਸਙ੍ਖਾਰਾ ਹੀਨਾ, ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ ਸਙ੍ਖਾਰਾ ਪਣੀਤਾ. ਅਸਮਾਪਨ੍ਨਸ੍ਸ ਸਙ੍ਖਾਰਾ ਹੀਨਾ, ਸਮਾਪਨ੍ਨਸ੍ਸ ਸਙ੍ਖਾਰਾ ਪਣੀਤਾ. ਸਾਸਵਾ ਸਙ੍ਖਾਰਾ ਹੀਨਾ, ਅਨਾਸਵਾ ਸਙ੍ਖਾਰਾ ਪਣੀਤਾ. ਤੇ ਤੇ ਵਾ ਪਨ ਸਙ੍ਖਾਰੇ ਉਪਾਦਾਯੁਪਾਦਾਯ ਸਙ੍ਖਾਰਾ ਹੀਨਾ ਪਣੀਤਾ ਦਟ੍ਠਬ੍ਬਾ.
੨੫. ਤਤ੍ਥ ਕਤਮੇ ਸਙ੍ਖਾਰਾ ਦੂਰੇ? ਅਕੁਸਲਾ ਸਙ੍ਖਾਰਾ ਕੁਸਲਾਬ੍ਯਾਕਤੇਹਿ ਸਙ੍ਖਾਰੇਹਿ ਦੂਰੇ; ਕੁਸਲਾਬ੍ਯਾਕਤਾ ਸਙ੍ਖਾਰਾ ਅਕੁਸਲੇਹਿ ਸਙ੍ਖਾਰੇਹਿ ਦੂਰੇ; ਕੁਸਲਾ ਸਙ੍ਖਾਰਾ ਅਕੁਸਲਾਬ੍ਯਾਕਤੇਹਿ ਸਙ੍ਖਾਰੇਹਿ ਦੂਰੇ; ਅਕੁਸਲਾਬ੍ਯਾਕਤਾ ਸਙ੍ਖਾਰਾ ਕੁਸਲੇਹਿ ਸਙ੍ਖਾਰੇਹਿ ਦੂਰੇ; ਅਬ੍ਯਾਕਤਾ ਸਙ੍ਖਾਰਾ ਕੁਸਲਾਕੁਸਲੇਹਿ ਸਙ੍ਖਾਰੇਹਿ ਦੂਰੇ; ਕੁਸਲਾਕੁਸਲਾ ਸਙ੍ਖਾਰਾ ਅਬ੍ਯਾਕਤੇਹਿ ਸਙ੍ਖਾਰੇਹਿ ਦੂਰੇ. ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾ ਸਙ੍ਖਾਰਾ ਸੁਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤੇਹਿ ਸਙ੍ਖਾਰੇਹਿ ਦੂਰੇ; ਸੁਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤਾ ਸਙ੍ਖਾਰਾ ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤੇਹਿ ਸਙ੍ਖਾਰੇਹਿ ਦੂਰੇ; ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ ਸਙ੍ਖਾਰਾ ਦੁਕ੍ਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤੇਹਿ ਸਙ੍ਖਾਰੇਹਿ ਦੂਰੇ; ਦੁਕ੍ਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤਾ ਸਙ੍ਖਾਰਾ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤੇਹਿ ਸਙ੍ਖਾਰੇਹਿ ਦੂਰੇ; ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ ਸਙ੍ਖਾਰਾ ਸੁਖਦੁਕ੍ਖਾਹਿ ਵੇਦਨਾਹਿ ਸਮ੍ਪਯੁਤ੍ਤੇਹਿ ਸਙ੍ਖਾਰੇਹਿ ਦੂਰੇ; ਸੁਖਦੁਕ੍ਖਾਹਿ ਵੇਦਨਾਹਿ ਸਮ੍ਪਯੁਤ੍ਤਾ ਸਙ੍ਖਾਰਾ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤੇਹਿ ਸਙ੍ਖਾਰੇਹਿ ਦੂਰੇ. ਅਸਮਾਪਨ੍ਨਸ੍ਸ ਸਙ੍ਖਾਰਾ ਸਮਾਪਨ੍ਨਸ੍ਸ ਸਙ੍ਖਾਰੇਹਿ ਦੂਰੇ; ਸਮਾਪਨ੍ਨਸ੍ਸ ਸਙ੍ਖਾਰਾ ਅਸਮਾਪਨ੍ਨਸ੍ਸ ਸਙ੍ਖਾਰੇਹਿ ਦੂਰੇ. ਸਾਸਵਾ ਸਙ੍ਖਾਰਾ ਅਨਾਸਵੇਹਿ ਸਙ੍ਖਾਰੇਹਿ ਦੂਰੇ; ਅਨਾਸਵਾ ਸਙ੍ਖਾਰਾ ਸਾਸਵੇਹਿ ਸਙ੍ਖਾਰੇਹਿ ਦੂਰੇ. ਇਮੇ ਵੁਚ੍ਚਨ੍ਤਿ ਸਙ੍ਖਾਰਾ ਦੂਰੇ.
ਤਤ੍ਥ ਕਤਮੇ ਸਙ੍ਖਾਰਾ ਸਨ੍ਤਿਕੇ? ਅਕੁਸਲਾ ਸਙ੍ਖਾਰਾ ਅਕੁਸਲਾਨਂ ਸਙ੍ਖਾਰਾਨਂ ਸਨ੍ਤਿਕੇ; ਕੁਸਲਾ ਸਙ੍ਖਾਰਾ ਕੁਸਲਾਨਂ ਸਙ੍ਖਾਰਾਨਂ ਸਨ੍ਤਿਕੇ; ਅਬ੍ਯਾਕਤਾ ਸਙ੍ਖਾਰਾ ਅਬ੍ਯਾਕਤਾਨਂ ਸਙ੍ਖਾਰਾਨਂ ਸਨ੍ਤਿਕੇ. ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾ ਸਙ੍ਖਾਰਾ ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾਨਂ ਸਙ੍ਖਾਰਾਨਂ ਸਨ੍ਤਿਕੇ; ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ ਸਙ੍ਖਾਰਾ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾਨਂ ਸਙ੍ਖਾਰਾਨਂ ਸਨ੍ਤਿਕੇ; ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ ਸਙ੍ਖਾਰਾ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾਨਂ ਸਙ੍ਖਾਰਾਨਂ ਸਨ੍ਤਿਕੇ. ਅਸਮਾਪਨ੍ਨਸ੍ਸ ਸਙ੍ਖਾਰਾ ਅਸਮਾਪਨ੍ਨਸ੍ਸ ਸਙ੍ਖਾਰਾਨਂ ਸਨ੍ਤਿਕੇ; ਸਮਾਪਨ੍ਨਸ੍ਸ ਸਙ੍ਖਾਰਾ ਸਮਾਪਨ੍ਨਸ੍ਸ ਸਙ੍ਖਾਰਾਨਂ ਸਨ੍ਤਿਕੇ. ਸਾਸਵਾ ਸਙ੍ਖਾਰਾ ਸਾਸਵਾਨਂ ਸਙ੍ਖਾਰਾਨਂ ਸਨ੍ਤਿਕੇ; ਅਨਾਸਵਾ ਸਙ੍ਖਾਰਾ ਅਨਾਸਵਾਨਂ ਸਙ੍ਖਾਰਾਨਂ ਸਨ੍ਤਿਕੇ. ਇਮੇ ਵੁਚ੍ਚਨ੍ਤਿ ਸਙ੍ਖਾਰਾ ਸਨ੍ਤਿਕੇ. ਤੇ ਤੇ ਵਾ ਪਨ ਸਙ੍ਖਾਰੇ ਉਪਾਦਾਯੁਪਾਦਾਯ ਸਙ੍ਖਾਰਾ ਦੂਰੇ ਸਨ੍ਤਿਕੇ ਦਟ੍ਠਬ੍ਬਾ.
੫. ਵਿਞ੍ਞਾਣਕ੍ਖਨ੍ਧੋ
੨੬. ਤਤ੍ਥ ਕਤਮੋ ਵਿਞ੍ਞਾਣਕ੍ਖਨ੍ਧੋ? ਯਂ ਕਿਞ੍ਚਿ ਵਿਞ੍ਞਾਣਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਅਜ੍ਝਤ੍ਤਂ ਵਾ ਬਹਿਦ੍ਧਾ ਵਾ ਓਲ਼ਾਰਿਕਂ ਵਾ ਸੁਖੁਮਂ ਵਾ ਹੀਨਂ ਵਾ ਪਣੀਤਂ ਵਾ ਯਂ ਦੂਰੇ ਸਨ੍ਤਿਕੇ ਵਾ, ਤਦੇਕਜ੍ਝਂ ਅਭਿਸਞ੍ਞੂਹਿਤ੍ਵਾ ਅਭਿਸਙ੍ਖਿਪਿਤ੍ਵਾ – ਅਯਂ ਵੁਚ੍ਚਤਿ ਵਿਞ੍ਞਾਣਕ੍ਖਨ੍ਧੋ.
੨੭. ਤਤ੍ਥ ਕਤਮਂ ਵਿਞ੍ਞਾਣਂ ਅਤੀਤਂ? ਯਂ ਵਿਞ੍ਞਾਣਂ ਅਤੀਤਂ ਨਿਰੁਦ੍ਧਂ ਵਿਗਤਂ ਵਿਪਰਿਣਤਂ ਅਤ੍ਥਙ੍ਗਤਂ ਅਬ੍ਭਤ੍ਥਙ੍ਗਤਂ ਉਪ੍ਪਜ੍ਜਿਤ੍ਵਾ ਵਿਗਤਂ ਅਤੀਤਂ ਅਤੀਤਂਸੇਨ ਸਙ੍ਗਹਿਤਂ, ਚਕ੍ਖੁਵਿਞ੍ਞਾਣਂ ਸੋਤਵਿਞ੍ਞਾਣਂ ਘਾਨਵਿਞ੍ਞਾਣਂ ਜਿਵ੍ਹਾਵਿਞ੍ਞਾਣਂ ਕਾਯਵਿਞ੍ਞਾਣਂ ਮਨੋਵਿਞ੍ਞਾਣਂ – ਇਦਂ ਵੁਚ੍ਚਤਿ ਵਿਞ੍ਞਾਣਂ ਅਤੀਤਂ.
ਤਤ੍ਥ ਕਤਮਂ ਵਿਞ੍ਞਾਣਂ ਅਨਾਗਤਂ? ਯਂ ਵਿਞ੍ਞਾਣਂ ਅਜਾਤਂ ਅਭੂਤਂ ਅਸਞ੍ਜਾਤਂ ਅਨਿਬ੍ਬਤ੍ਤਂ ਅਨਭਿਨਿਬ੍ਬਤ੍ਤਂ ਅਪਾਤੁਭੂਤਂ ਅਨੁਪ੍ਪਨ੍ਨਂ ਅਸਮੁਪ੍ਪਨ੍ਨਂ ਅਨੁਟ੍ਠਿਤਂ ਅਸਮੁਟ੍ਠਿਤਂ ਅਨਾਗਤਂ ਅਨਾਗਤਂਸੇਨ ਸਙ੍ਗਹਿਤਂ, ਚਕ੍ਖੁਵਿਞ੍ਞਾਣਂ ਸੋਤਵਿਞ੍ਞਾਣਂ ਘਾਨਵਿਞ੍ਞਾਣਂ ਜਿਵ੍ਹਾਵਿਞ੍ਞਾਣਂ ਕਾਯਵਿਞ੍ਞਾਣਂ ਮਨੋਵਿਞ੍ਞਾਣਂ – ਇਦਂ ਵੁਚ੍ਚਤਿ ਵਿਞ੍ਞਾਣਂ ਅਨਾਗਤਂ.
ਤਤ੍ਥ ਕਤਮਂ ਵਿਞ੍ਞਾਣਂ ਪਚ੍ਚੁਪ੍ਪਨ੍ਨਂ? ਯਂ ਵਿਞ੍ਞਾਣਂ ਜਾਤਂ ਭੂਤਂ ਸਞ੍ਜਾਤਂ ਨਿਬ੍ਬਤ੍ਤਂ ਅਭਿਨਿਬ੍ਬਤ੍ਤਂ ਪਾਤੁਭੂਤਂ ਉਪ੍ਪਨ੍ਨਂ ਸਮੁਪ੍ਪਨ੍ਨਂ ਉਟ੍ਠਿਤਂ ਸਮੁਟ੍ਠਿਤਂ ਪਚ੍ਚੁਪ੍ਪਨ੍ਨਂ ਪਚ੍ਚੁਪ੍ਪਨ੍ਨਂਸੇਨ ਸਙ੍ਗਹਿਤਂ, ਚਕ੍ਖੁਵਿਞ੍ਞਾਣਂ ਸੋਤਵਿਞ੍ਞਾਣਂ ਘਾਨਵਿਞ੍ਞਾਣਂ ਜਿਵ੍ਹਾਵਿਞ੍ਞਾਣਂ ਕਾਯਵਿਞ੍ਞਾਣਂ ਮਨੋਵਿਞ੍ਞਾਣਂ – ਇਦਂ ਵੁਚ੍ਚਤਿ ਵਿਞ੍ਞਾਣਂ ਪਚ੍ਚੁਪ੍ਪਨ੍ਨਂ.
੨੮. ਤਤ੍ਥ ਕਤਮਂ ਵਿਞ੍ਞਾਣਂ ਅਜ੍ਝਤ੍ਤਂ? ਯਂ ਵਿਞ੍ਞਾਣਂ ਤੇਸਂ ਤੇਸਂ ਸਤ੍ਤਾਨਂ ਅਜ੍ਝਤ੍ਤਂ ਪਚ੍ਚਤ੍ਤਂ ਨਿਯਕਂ ਪਾਟਿਪੁਗ੍ਗਲਿਕਂ ਉਪਾਦਿਨ੍ਨਂ, ਚਕ੍ਖੁਵਿਞ੍ਞਾਣਂ ਸੋਤਵਿਞ੍ਞਾਣਂ ਘਾਨਵਿਞ੍ਞਾਣਂ ਜਿਵ੍ਹਾਵਿਞ੍ਞਾਣਂ ਕਾਯਵਿਞ੍ਞਾਣਂ ਮਨੋਵਿਞ੍ਞਾਣਂ – ਇਦਂ ਵੁਚ੍ਚਤਿ ਵਿਞ੍ਞਾਣਂ ਅਜ੍ਝਤ੍ਤਂ.
ਤਤ੍ਥ ਕਤਮਂ ਵਿਞ੍ਞਾਣਂ ਬਹਿਦ੍ਧਾ? ਯਂ ਵਿਞ੍ਞਾਣਂ ਤੇਸਂ ਤੇਸਂ ਪਰਸਤ੍ਤਾਨਂ ਪਰਪੁਗ੍ਗਲਾਨਂ ਅਜ੍ਝਤ੍ਤਂ ਪਚ੍ਚਤ੍ਤਂ ਨਿਯਕਂ ਪਾਟਿਪੁਗ੍ਗਲਿਕਂ ਉਪਾਦਿਨ੍ਨਂ, ਚਕ੍ਖੁਵਿਞ੍ਞਾਣਂ ਸੋਤਵਿਞ੍ਞਾਣਂ ਘਾਨਵਿਞ੍ਞਾਣਂ ਜਿਵ੍ਹਾਵਿਞ੍ਞਾਣਂ ਕਾਯਵਿਞ੍ਞਾਣਂ ਮਨੋਵਿਞ੍ਞਾਣਂ – ਇਦਂ ਵੁਚ੍ਚਤਿ ਵਿਞ੍ਞਾਣਂ ਬਹਿਦ੍ਧਾ.
੨੯. ਤਤ੍ਥ ਕਤਮਂ ਵਿਞ੍ਞਾਣਂ ਓਲ਼ਾਰਿਕਂ ਸੁਖੁਮਂ? ਅਕੁਸਲਂ ਵਿਞ੍ਞਾਣਂ ਓਲ਼ਾਰਿਕਂ, ਕੁਸਲਾਬ੍ਯਾਕਤਾ ਵਿਞ੍ਞਾਣਾ ਸੁਖੁਮਾ. ਕੁਸਲਾਕੁਸਲਾ ਵਿਞ੍ਞਾਣਾ ਓਲ਼ਾਰਿਕਾ, ਅਬ੍ਯਾਕਤਂ ਵਿਞ੍ਞਾਣਂ ਸੁਖੁਮਂ. ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ ਓਲ਼ਾਰਿਕਂ, ਸੁਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤਾ ਵਿਞ੍ਞਾਣਾ ਸੁਖੁਮਾ. ਸੁਖਦੁਕ੍ਖਾਹਿ ਵੇਦਨਾਹਿ ਸਮ੍ਪਯੁਤ੍ਤਾ ਵਿਞ੍ਞਾਣਾ ਓਲ਼ਾਰਿਕਾ, ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ ਸੁਖੁਮਂ. ਅਸਮਾਪਨ੍ਨਸ੍ਸ ਵਿਞ੍ਞਾਣਂ ਓਲ਼ਾਰਿਕਂ, ਸਮਾਪਨ੍ਨਸ੍ਸ ਵਿਞ੍ਞਾਣਂ ਸੁਖੁਮਂ. ਸਾਸਵਂ ਵਿਞ੍ਞਾਣਂ ਓਲ਼ਾਰਿਕਂ, ਅਨਾਸਵਂ ਵਿਞ੍ਞਾਣਂ ਸੁਖੁਮਂ. ਤਂ ਤਂ ਵਾ ਪਨ ਵਿਞ੍ਞਾਣਂ ਉਪਾਦਾਯੁਪਾਦਾਯ ਵਿਞ੍ਞਾਣਂ ਓਲ਼ਾਰਿਕਂ ਸੁਖੁਮਂ ਦਟ੍ਠਬ੍ਬਂ.
੩੦. ਤਤ੍ਥ ਕਤਮਂ ਵਿਞ੍ਞਾਣਂ ਹੀਨਂ ਪਣੀਤਂ? ਅਕੁਸਲਂ ਵਿਞ੍ਞਾਣਂ ਹੀਨਂ, ਕੁਸਲਾਬ੍ਯਾਕਤਾ ਵਿਞ੍ਞਾਣਾ ਪਣੀਤਾ. ਕੁਸਲਾਕੁਸਲਾ ਵਿਞ੍ਞਾਣਾ ਹੀਨਾ, ਅਬ੍ਯਾਕਤਂ ਵਿਞ੍ਞਾਣਂ ਪਣੀਤਂ. ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ ਹੀਨਂ, ਸੁਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤਾ ਵਿਞ੍ਞਾਣਾ ਪਣੀਤਾ. ਸੁਖਦੁਕ੍ਖਾਹਿ ਵੇਦਨਾਹਿ ਸਮ੍ਪਯੁਤ੍ਤਾ ਵਿਞ੍ਞਾਣਾ ਹੀਨਾ, ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ ਪਣੀਤਂ. ਅਸਮਾਪਨ੍ਨਸ੍ਸ ਵਿਞ੍ਞਾਣਂ ਹੀਨਂ, ਸਮਾਪਨ੍ਨਸ੍ਸ ਵਿਞ੍ਞਾਣਂ ਪਣੀਤਂ. ਸਾਸਵਂ ਵਿਞ੍ਞਾਣਂ ਹੀਨਂ, ਅਨਾਸਵਂ ਵਿਞ੍ਞਾਣਂ ਪਣੀਤਂ. ਤਂ ਤਂ ਵਾ ਪਨ ਵਿਞ੍ਞਾਣਂ ਉਪਾਦਾਯੁਪਾਦਾਯ ਵਿਞ੍ਞਾਣਂ ਹੀਨਂ ਪਣੀਤਂ ਦਟ੍ਠਬ੍ਬਂ.
੩੧. ਤਤ੍ਥ ਕਤਮਂ ਵਿਞ੍ਞਾਣਂ ਦੂਰੇ? ਅਕੁਸਲਂ ਵਿਞ੍ਞਾਣਂ ਕੁਸਲਾਬ੍ਯਾਕਤੇਹਿ ਵਿਞ੍ਞਾਣੇਹਿ ਦੂਰੇ; ਕੁਸਲਾਬ੍ਯਾਕਤਾ ਵਿਞ੍ਞਾਣਾ ਅਕੁਸਲਾ ਵਿਞ੍ਞਾਣਾ ਦੂਰੇ; ਕੁਸਲਂ ਵਿਞ੍ਞਾਣਂ ਅਕੁਸਲਾਬ੍ਯਾਕਤੇਹਿ ਵਿਞ੍ਞਾਣੇਹਿ ਦੂਰੇ; ਅਕੁਸਲਾਬ੍ਯਾਕਤਾ ਵਿਞ੍ਞਾਣਾ ਕੁਸਲਾ ਵਿਞ੍ਞਾਣਾ ਦੂਰੇ; ਅਬ੍ਯਾਕਤਂ ਵਿਞ੍ਞਾਣਂ ਕੁਸਲਾਕੁਸਲੇਹਿ ਵਿਞ੍ਞਾਣੇਹਿ ਦੂਰੇ; ਕੁਸਲਾਕੁਸਲਾ ਵਿਞ੍ਞਾਣਾ ਅਬ੍ਯਾਕਤਾ ਵਿਞ੍ਞਾਣਾ ਦੂਰੇ. ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ ਸੁਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤੇਹਿ ਵਿਞ੍ਞਾਣੇਹਿ ਦੂਰੇ; ਸੁਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤਾ ਵਿਞ੍ਞਾਣਾ ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾ ਵਿਞ੍ਞਾਣਾ ਦੂਰੇ; ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ ਦੁਕ੍ਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤੇਹਿ ਵਿਞ੍ਞਾਣੇਹਿ ਦੂਰੇ; ਦੁਕ੍ਖਾਯ ਚ ਅਦੁਕ੍ਖਮਸੁਖਾਯ ਚ ਵੇਦਨਾਹਿ ਸਮ੍ਪਯੁਤ੍ਤਾ ਵਿਞ੍ਞਾਣਾ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ ਵਿਞ੍ਞਾਣਾ ਦੂਰੇ; ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ ਸੁਖਦੁਕ੍ਖਾਹਿ ਵੇਦਨਾਹਿ ਸਮ੍ਪਯੁਤ੍ਤੇਹਿ ਵਿਞ੍ਞਾਣੇਹਿ ਦੂਰੇ; ਸੁਖਦੁਕ੍ਖਾਹਿ ਵੇਦਨਾਹਿ ਸਮ੍ਪਯੁਤ੍ਤਾ ਵਿਞ੍ਞਾਣਾ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ ਵਿਞ੍ਞਾਣਾ ਦੂਰੇ. ਅਸਮਾਪਨ੍ਨਸ੍ਸ ਵਿਞ੍ਞਾਣਂ ਸਮਾਪਨ੍ਨਸ੍ਸ ਵਿਞ੍ਞਾਣਾ ਦੂਰੇ; ਸਮਾਪਨ੍ਨਸ੍ਸ ਵਿਞ੍ਞਾਣਂ ਅਸਮਾਪਨ੍ਨਸ੍ਸ ਵਿਞ੍ਞਾਣਾ ਦੂਰੇ. ਸਾਸਵਂ ਵਿਞ੍ਞਾਣਂ ਅਨਾਸਵਾ ਵਿਞ੍ਞਾਣਾ ਦੂਰੇ; ਅਨਾਸਵਂ ਵਿਞ੍ਞਾਣਂ ਸਾਸਵਾ ਵਿਞ੍ਞਾਣਾ ਦੂਰੇ – ਇਦਂ ਵੁਚ੍ਚਤਿ ਵਿਞ੍ਞਾਣਂ ਦੂਰੇ.
ਤਤ੍ਥ ਕਤਮਂ ਵਿਞ੍ਞਾਣਂ ਸਨ੍ਤਿਕੇ? ਅਕੁਸਲਂ ਵਿਞ੍ਞਾਣਂ ਅਕੁਸਲਸ੍ਸ ਵਿਞ੍ਞਾਣਸ੍ਸ ਸਨ੍ਤਿਕੇ; ਕੁਸਲਂ ਵਿਞ੍ਞਾਣਂ ਕੁਸਲਸ੍ਸ ਵਿਞ੍ਞਾਣਸ੍ਸ ਸਨ੍ਤਿਕੇ; ਅਬ੍ਯਾਕਤਂ ਵਿਞ੍ਞਾਣਂ ਅਬ੍ਯਾਕਤਸ੍ਸ ਵਿਞ੍ਞਾਣਸ੍ਸ ਸਨ੍ਤਿਕੇ. ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਸ੍ਸ ਵਿਞ੍ਞਾਣਸ੍ਸ ਸਨ੍ਤਿਕੇ; ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਸ੍ਸ ਵਿਞ੍ਞਾਣਸ੍ਸ ਸਨ੍ਤਿਕੇ; ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਸ੍ਸ ਵਿਞ੍ਞਾਣਸ੍ਸ ਸਨ੍ਤਿਕੇ. ਅਸਮਾਪਨ੍ਨਸ੍ਸ ਵਿਞ੍ਞਾਣਂ ਅਸਮਾਪਨ੍ਨਸ੍ਸ ਵਿਞ੍ਞਾਣਸ੍ਸ ਸਨ੍ਤਿਕੇ; ਸਮਾਪਨ੍ਨਸ੍ਸ ਵਿਞ੍ਞਾਣਂ ਸਮਾਪਨ੍ਨਸ੍ਸ ਵਿਞ੍ਞਾਣਸ੍ਸ ਸਨ੍ਤਿਕੇ. ਸਾਸਵਂ ਵਿਞ੍ਞਾਣਂ ਸਾਸਵਸ੍ਸ ਵਿਞ੍ਞਾਣਸ੍ਸ ਸਨ੍ਤਿਕੇ; ਅਨਾਸਵਂ ਵਿਞ੍ਞਾਣਂ ਅਨਾਸਵਸ੍ਸ ਵਿਞ੍ਞਾਣਸ੍ਸ ਸਨ੍ਤਿਕੇ – ਇਦਂ ਵੁਚ੍ਚਤਿ ਵਿਞ੍ਞਾਣਂ ਸਨ੍ਤਿਕੇ. ਤਂ ਤਂ ਵਾ ਪਨ ਵਿਞ੍ਞਾਣਂ ਉਪਾਦਾਯੁਪਾਦਾਯ ਵਿਞ੍ਞਾਣਂ ਦੂਰੇ ਸਨ੍ਤਿਕੇ ਦਟ੍ਠਬ੍ਬਂ.
ਸੁਤ੍ਤਨ੍ਤਭਾਜਨੀਯਂ.