੧-੬. ਪਟਿਚ੍ਚਵਾਰਾਦਿ

ਪਚ੍ਚਯਚਤੁਕ੍ਕਂ

ਹੇਤੁਪਚ੍ਚਯੋ

੧੨੧. ਹੇਤੁਂ ਵਿਪਾਕਧਮ੍ਮਧਮ੍ਮਂ ਪਟਿਚ੍ਚ ਹੇਤੁ ਵਿਪਾਕਧਮ੍ਮਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ. ਹੇਤੁਂ ਵਿਪਾਕਧਮ੍ਮਧਮ੍ਮਂ ਪਟਿਚ੍ਚ ਨਹੇਤੁ ਵਿਪਾਕਧਮ੍ਮਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ. ਹੇਤੁਂ ਵਿਪਾਕਧਮ੍ਮਧਮ੍ਮਂ ਪਟਿਚ੍ਚ ਹੇਤੁ ਵਿਪਾਕਧਮ੍ਮਧਮ੍ਮੋ ਚ ਨਹੇਤੁ ਵਿਪਾਕਧਮ੍ਮਧਮ੍ਮੋ ਚ ਧਮ੍ਮਾ ਉਪ੍ਪਜ੍ਜਨ੍ਤਿ ਹੇਤੁਪਚ੍ਚਯਾ. (੩)

ਨਹੇਤੁਂ ਵਿਪਾਕਧਮ੍ਮਧਮ੍ਮਂ ਪਟਿਚ੍ਚ ਨਹੇਤੁ ਵਿਪਾਕਧਮ੍ਮਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ… ਤੀਣਿ.

ਹੇਤੁਂ ਵਿਪਾਕਧਮ੍ਮਧਮ੍ਮਞ੍ਚ ਨਹੇਤੁਂ ਵਿਪਾਕਧਮ੍ਮਧਮ੍ਮਞ੍ਚ ਪਟਿਚ੍ਚ ਹੇਤੁ ਵਿਪਾਕਧਮ੍ਮਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ… ਤੀਣਿ (ਸਂਖਿਤ੍ਤਂ).

੧੨੨. ਹੇਤੁਯਾ ਨਵ, ਆਰਮ੍ਮਣੇ ਨਵ, ਅਧਿਪਤਿਯਾ ਨਵ…ਪੇ… ਕਮ੍ਮੇ ਨਵ, ਆਹਾਰੇ ਨਵ, ਇਨ੍ਦ੍ਰਿਯੇ ਨਵ, ਝਾਨੇ ਨਵ, ਮਗ੍ਗੇ ਨਵ, ਸਮ੍ਪਯੁਤ੍ਤੇ ਨਵ, ਵਿਪ੍ਪਯੁਤ੍ਤੇ ਨਵ, ਅਤ੍ਥਿਯਾ ਨਵ, ਨਤ੍ਥਿਯਾ ਨਵ, ਵਿਗਤੇ ਨਵ, ਅਵਿਗਤੇ ਨਵ.

ਨਹੇਤੁ-ਨਅਧਿਪਤਿਪਚ੍ਚਯਾ

੧੨੩. ਨਹੇਤੁਂ ਵਿਪਾਕਧਮ੍ਮਧਮ੍ਮਂ ਪਟਿਚ੍ਚ ਹੇਤੁ ਵਿਪਾਕਧਮ੍ਮਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ. (੧)

੧੨੪. ਹੇਤੁਂ ਵਿਪਾਕਧਮ੍ਮਧਮ੍ਮਂ ਪਟਿਚ੍ਚ ਹੇਤੁ ਵਿਪਾਕਧਮ੍ਮਧਮ੍ਮੋ ਉਪ੍ਪਜ੍ਜਤਿ ਨਅਧਿਪਤਿਪਚ੍ਚਯਾ… ਨਵ.

ਨਪੁਰੇਜਾਤਪਚ੍ਚਯਾਦਿ

੧੨੫. ਹੇਤੁਂ ਵਿਪਾਕਧਮ੍ਮਧਮ੍ਮਂ ਪਟਿਚ੍ਚ ਹੇਤੁ ਵਿਪਾਕਧਮ੍ਮਧਮ੍ਮੋ ਉਪ੍ਪਜ੍ਜਤਿ ਨਪੁਰੇਜਾਤਪਚ੍ਚਯਾ… ਨਵ… ਨਪਚ੍ਛਾਜਾਤਪਚ੍ਚਯਾ… ਨਵ… ਨਆਸੇਵਨਪਚ੍ਚਯਾ… ਨਵ.

੧੨੬. ਹੇਤੁਂ ਵਿਪਾਕਧਮ੍ਮਧਮ੍ਮਂ ਪਟਿਚ੍ਚ ਨਹੇਤੁ ਵਿਪਾਕਧਮ੍ਮਧਮ੍ਮੋ ਉਪ੍ਪਜ੍ਜਤਿ ਨਕਮ੍ਮਪਚ੍ਚਯਾ. (੧)

ਨਹੇਤੁਂ ਵਿਪਾਕਧਮ੍ਮਧਮ੍ਮਂ ਪਟਿਚ੍ਚ ਨਹੇਤੁ ਵਿਪਾਕਧਮ੍ਮਧਮ੍ਮੋ ਉਪ੍ਪਜ੍ਜਤਿ ਨਕਮ੍ਮਪਚ੍ਚਯਾ. (੧)

ਹੇਤੁਂ ਵਿਪਾਕਧਮ੍ਮਧਮ੍ਮਞ੍ਚ ਨਹੇਤੁਂ ਵਿਪਾਕਧਮ੍ਮਧਮ੍ਮਞ੍ਚ ਪਟਿਚ੍ਚ ਨਹੇਤੁ ਵਿਪਾਕਧਮ੍ਮਧਮ੍ਮੋ ਉਪ੍ਪਜ੍ਜਤਿ ਨਕਮ੍ਮਪਚ੍ਚਯਾ. (੧) (ਸਂਖਿਤ੍ਤਂ.)

੧੨੭. ਨਹੇਤੁਯਾ ਏਕਂ, ਨਅਧਿਪਤਿਯਾ ਨਵ, ਨਪੁਰੇਜਾਤੇ ਨਵ, ਨਪਚ੍ਛਾਜਾਤੇ ਨਵ, ਨਆਸੇਵਨੇ ਨਵ, ਨਕਮ੍ਮੇ ਤੀਣਿ, ਨਵਿਪਾਕੇ ਨਵ, ਨਵਿਪ੍ਪਯੁਤ੍ਤੇ ਨਵ (ਸਂਖਿਤ੍ਤਂ, ਪਚ੍ਚਨੀਯਂ).

ਹੇਤੁਪਚ੍ਚਯਾ ਨਅਧਿਪਤਿਯਾ ਨਵ (ਸਂਖਿਤ੍ਤਂ, ਅਨੁਲੋਮਪਚ੍ਚਨੀਯਂ).

ਨਹੇਤੁਪਚ੍ਚਯਾ ਆਰਮ੍ਮਣੇ ਏਕਂ (ਸਂਖਿਤ੍ਤਂ, ਪਚ੍ਚਨੀਯਾਨੁਲੋਮਂ).

(ਸਹਜਾਤਵਾਰੋਪਿ ਪਚ੍ਚਯਵਾਰੋਪਿ ਨਿਸ੍ਸਯਵਾਰੋਪਿ ਸਂਸਟ੍ਠਵਾਰੋਪਿ ਸਮ੍ਪਯੁਤ੍ਤਵਾਰੋਪਿ ਪਟਿਚ੍ਚਵਾਰਸਦਿਸਾ ਵਿਤ੍ਥਾਰੇਤਬ੍ਬਾ.)