੧. ਵਿਭਙ੍ਗਵਾਰੋ

ਹੇਤੁਪਚ੍ਚਯੋ

੬੬. ਨੀਵਰਣਸਮ੍ਪਯੁਤ੍ਤੋ ਧਮ੍ਮੋ ਨੀਵਰਣਸਮ੍ਪਯੁਤ੍ਤਸ੍ਸ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ – ਨੀਵਰਣਸਮ੍ਪਯੁਤ੍ਤਾ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. (ਮੂਲਂ ਪੁਚ੍ਛਿਤਬ੍ਬਂ) ਨੀਵਰਣਸਮ੍ਪਯੁਤ੍ਤਾ ਹੇਤੂ ਚਿਤ੍ਤਸਮੁਟ੍ਠਾਨਾਨਂ ਰੂਪਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. (ਮੂਲਂ ਪੁਚ੍ਛਿਤਬ੍ਬਂ) ਨੀਵਰਣਸਮ੍ਪਯੁਤ੍ਤਾ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਚਿਤ੍ਤਸਮੁਟ੍ਠਾਨਾਨਞ੍ਚ ਰੂਪਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. (੩)

ਨੀਵਰਣਵਿਪ੍ਪਯੁਤ੍ਤੋ ਧਮ੍ਮੋ ਨੀਵਰਣਵਿਪ੍ਪਯੁਤ੍ਤਸ੍ਸ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ – ਨੀਵਰਣਵਿਪ੍ਪਯੁਤ੍ਤਾ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਚਿਤ੍ਤਸਮੁਟ੍ਠਾਨਾਨਞ੍ਚ ਰੂਪਾਨਂ ਹੇਤੁਪਚ੍ਚਯੇਨ ਪਚ੍ਚਯੋ; ਪਟਿਸਨ੍ਧਿਕ੍ਖਣੇ…ਪੇ…. (੧)

ਆਰਮ੍ਮਣਪਚ੍ਚਯੋ

੬੭. ਨੀਵਰਣਸਮ੍ਪਯੁਤ੍ਤੋ ਧਮ੍ਮੋ ਨੀਵਰਣਸਮ੍ਪਯੁਤ੍ਤਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਰਾਗਂ ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਆਰਬ੍ਭ ਰਾਗੋ ਉਪ੍ਪਜ੍ਜਤਿ, ਦਿਟ੍ਠਿ…ਪੇ… ਵਿਚਿਕਿਚ੍ਛਾ…ਪੇ… ਉਦ੍ਧਚ੍ਚਂ…ਪੇ… ਦੋਮਨਸ੍ਸਂ ਉਪ੍ਪਜ੍ਜਤਿ; ਦਿਟ੍ਠਿਂ ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਆਰਬ੍ਭ ਰਾਗੋ ਉਪ੍ਪਜ੍ਜਤਿ, ਦਿਟ੍ਠਿ…ਪੇ… ਵਿਚਿਕਿਚ੍ਛਾ…ਪੇ… ਉਦ੍ਧਚ੍ਚਂ…ਪੇ… ਦੋਮਨਸ੍ਸਂ ਉਪ੍ਪਜ੍ਜਤਿ; ਵਿਚਿਕਿਚ੍ਛਂ ਆਰਬ੍ਭ ਵਿਚਿਕਿਚ੍ਛਾ…ਪੇ… ਦਿਟ੍ਠਿ…ਪੇ… ਉਦ੍ਧਚ੍ਚਂ…ਪੇ… ਦੋਮਨਸ੍ਸਂ ਉਪ੍ਪਜ੍ਜਤਿ; ਉਦ੍ਧਚ੍ਚਂ ਆਰਬ੍ਭ ਉਦ੍ਧਚ੍ਚਂ ਉਪ੍ਪਜ੍ਜਤਿ, ਦਿਟ੍ਠਿ…ਪੇ… ਵਿਚਿਕਿਚ੍ਛਾ, ਦੋਮਨਸ੍ਸਂ ਉਪ੍ਪਜ੍ਜਤਿ; ਦੋਮਨਸ੍ਸਂ ਆਰਬ੍ਭ ਦੋਮਨਸ੍ਸਂ ਉਪ੍ਪਜ੍ਜਤਿ; ਦਿਟ੍ਠਿ …ਪੇ… ਵਿਚਿਕਿਚ੍ਛਾ…ਪੇ… ਉਦ੍ਧਚ੍ਚਂ ਉਪ੍ਪਜ੍ਜਤਿ. (੧)

ਨੀਵਰਣਸਮ੍ਪਯੁਤ੍ਤੋ ਧਮ੍ਮੋ ਨੀਵਰਣਵਿਪ੍ਪਯੁਤ੍ਤਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਅਰਿਯਾ ਨੀਵਰਣਸਮ੍ਪਯੁਤ੍ਤੇ ਪਹੀਨੇ ਕਿਲੇਸੇ ਪਚ੍ਚਵੇਕ੍ਖਨ੍ਤਿ, ਵਿਕ੍ਖਮ੍ਭਿਤੇ ਕਿਲੇਸੇ ਪਚ੍ਚਵੇਕ੍ਖਨ੍ਤਿ, ਪੁਬ੍ਬੇ ਸਮੁਦਾਚਿਣ੍ਣੇ ਕਿਲੇਸੇ ਜਾਨਨ੍ਤਿ; ਨੀਵਰਣਸਮ੍ਪਯੁਤ੍ਤੇ ਖਨ੍ਧੇ ਅਨਿਚ੍ਚਤੋ ਦੁਕ੍ਖਤੋ ਅਨਤ੍ਤਤੋ ਵਿਪਸ੍ਸਤਿ, ਚੇਤੋਪਰਿਯਞਾਣੇਨ ਨੀਵਰਣਸਮ੍ਪਯੁਤ੍ਤਚਿਤ੍ਤਸਮਙ੍ਗਿਸ੍ਸ ਚਿਤ੍ਤਂ ਜਾਨਾਤਿ; ਨੀਵਰਣਸਮ੍ਪਯੁਤ੍ਤਾ ਖਨ੍ਧਾ ਚੇਤੋਪਰਿਯਞਾਣਸ੍ਸ, ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਸ੍ਸ, ਯਥਾਕਮ੍ਮੂਪਗਞਾਣਸ੍ਸ, ਅਨਾਗਤਂਸਞਾਣਸ੍ਸ, ਆਵਜ੍ਜਨਾਯ ਆਰਮ੍ਮਣਪਚ੍ਚਯੇਨ ਪਚ੍ਚਯੋ. (੨)

੬੮. ਨੀਵਰਣਵਿਪ੍ਪਯੁਤ੍ਤੋ ਧਮ੍ਮੋ ਨੀਵਰਣਵਿਪ੍ਪਯੁਤ੍ਤਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਦਾਨਂ…ਪੇ… ਸੀਲਂ…ਪੇ… ਉਪੋਸਥਕਮ੍ਮਂ ਕਤ੍ਵਾ ਤਂ ਪਚ੍ਚਵੇਕ੍ਖਤਿ, ਪੁਬ੍ਬੇ ਸੁਚਿਣ੍ਣਾਨਿ…ਪੇ… ਝਾਨਾ ਵੁਟ੍ਠਹਿਤ੍ਵਾ ਝਾਨਂ…ਪੇ… ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ…ਪੇ… ਫਲਂ…ਪੇ… ਨਿਬ੍ਬਾਨਂ…ਪੇ… ਨਿਬ੍ਬਾਨਂ ਗੋਤ੍ਰਭੁਸ੍ਸ, ਵੋਦਾਨਸ੍ਸ, ਮਗ੍ਗਸ੍ਸ, ਫਲਸ੍ਸ, ਆਵਜ੍ਜਨਾਯ ਆਰਮ੍ਮਣਪਚ੍ਚਯੇਨ ਪਚ੍ਚਯੋ; ਚਕ੍ਖੁਂ…ਪੇ… ਵਤ੍ਥੁਂ ਨੀਵਰਣਵਿਪ੍ਪਯੁਤ੍ਤੇ ਖਨ੍ਧੇ ਅਨਿਚ੍ਚਤੋ ਦੁਕ੍ਖਤੋ ਅਨਤ੍ਤਤੋ ਵਿਪਸ੍ਸਤਿ, ਦਿਬ੍ਬੇਨ ਚਕ੍ਖੁਨਾ ਰੂਪਂ ਪਸ੍ਸਤਿ (ਯਾਵ ਆਵਜ੍ਜਨਾਯ). (੧)

ਨੀਵਰਣਵਿਪ੍ਪਯੁਤ੍ਤੋ ਧਮ੍ਮੋ ਨੀਵਰਣਸਮ੍ਪਯੁਤ੍ਤਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਦਾਨਂ…ਪੇ… ਸੀਲਂ…ਪੇ… ਉਪੋਸਥਕਮ੍ਮਂ…ਪੇ… ਪੁਬ੍ਬੇ…ਪੇ… ਝਾਨਾ…ਪੇ… ਚਕ੍ਖੁਂ…ਪੇ… ਵਤ੍ਥੁਂ ਨੀਵਰਣਵਿਪ੍ਪਯੁਤ੍ਤੇ ਖਨ੍ਧੇ ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਆਰਬ੍ਭ ਰਾਗੋ ਉਪ੍ਪਜ੍ਜਤਿ, ਦਿਟ੍ਠਿ…ਪੇ… ਵਿਚਿਕਿਚ੍ਛਾ…ਪੇ… ਉਦ੍ਧਚ੍ਚਂ…ਪੇ… ਦੋਮਨਸ੍ਸਂ ਉਪ੍ਪਜ੍ਜਤਿ. (੨)

ਅਧਿਪਤਿਪਚ੍ਚਯੋ

੬੯. ਨੀਵਰਣਸਮ੍ਪਯੁਤ੍ਤੋ ਧਮ੍ਮੋ ਨੀਵਰਣਸਮ੍ਪਯੁਤ੍ਤਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ – ਆਰਮ੍ਮਣਾਧਿਪਤਿ, ਸਹਜਾਤਾਧਿਪਤਿ. ਆਰਮ੍ਮਣਾਧਿਪਤਿ – ਰਾਗਂ ਗਰੁਂ ਕਤ੍ਵਾ ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਗਰੁਂ ਕਤ੍ਵਾ ਰਾਗੋ ਉਪ੍ਪਜ੍ਜਤਿ, ਦਿਟ੍ਠਿ ਉਪ੍ਪਜ੍ਜਤਿ; ਦਿਟ੍ਠਿਂ ਗਰੁਂ ਕਤ੍ਵਾ ਅਸ੍ਸਾਦੇਤਿ…ਪੇ…. ਸਹਜਾਤਾਧਿਪਤਿ – ਨੀਵਰਣਸਮ੍ਪਯੁਤ੍ਤਾਧਿਪਤਿ ਨੀਵਰਣਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੧)

ਨੀਵਰਣਸਮ੍ਪਯੁਤ੍ਤੋ ਧਮ੍ਮੋ ਨੀਵਰਣਵਿਪ੍ਪਯੁਤ੍ਤਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਸਹਜਾਤਾਧਿਪਤਿ – ਨੀਵਰਣਸਮ੍ਪਯੁਤ੍ਤਾਧਿਪਤਿ ਚਿਤ੍ਤਸਮੁਟ੍ਠਾਨਾਨਂ ਰੂਪਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (ਮੂਲਂ ਪੁਚ੍ਛਿਤਬ੍ਬਂ) ਨੀਵਰਣਸਮ੍ਪਯੁਤ੍ਤਾਧਿਪਤਿ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਚਿਤ੍ਤਸਮੁਟ੍ਠਾਨਾਨਞ੍ਚ ਰੂਪਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੩)

੭੦. ਨੀਵਰਣਵਿਪ੍ਪਯੁਤ੍ਤੋ ਧਮ੍ਮੋ ਨੀਵਰਣਵਿਪ੍ਪਯੁਤ੍ਤਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ – ਆਰਮ੍ਮਣਾਧਿਪਤਿ, ਸਹਜਾਤਾਧਿਪਤਿ. ਆਰਮ੍ਮਣਾਧਿਪਤਿ – ਦਾਨਂ…ਪੇ… ਸੀਲਂ…ਪੇ… ਉਪੋਸਥਕਮ੍ਮਂ ਕਤ੍ਵਾ ਤਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਤਿ, ਪੁਬ੍ਬੇ ਸੁਚਿਣ੍ਣਾਨਿ…ਪੇ… ਝਾਨਾ ਵੁਟ੍ਠਹਿਤ੍ਵਾ ਝਾਨਂ…ਪੇ… ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ…ਪੇ… ਫਲਂ…ਪੇ… ਨਿਬ੍ਬਾਨਂ…ਪੇ… ਨਿਬ੍ਬਾਨਂ ਗੋਤ੍ਰਭੁਸ੍ਸ, ਵੋਦਾਨਸ੍ਸ, ਮਗ੍ਗਸ੍ਸ, ਫਲਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਸਹਜਾਤਾਧਿਪਤਿ – ਨੀਵਰਣਵਿਪ੍ਪਯੁਤ੍ਤਾਧਿਪਤਿ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਚਿਤ੍ਤਸਮੁਟ੍ਠਾਨਾਨਞ੍ਚ ਰੂਪਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੧)

ਨੀਵਰਣਵਿਪ੍ਪਯੁਤ੍ਤੋ ਧਮ੍ਮੋ ਨੀਵਰਣਸਮ੍ਪਯੁਤ੍ਤਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਆਰਮ੍ਮਣਾਧਿਪਤਿ – ਦਾਨਂ…ਪੇ… ਸੀਲਂ…ਪੇ… ਪੁਬ੍ਬੇ…ਪੇ… ਝਾਨਂ…ਪੇ… ਚਕ੍ਖੁਂ…ਪੇ… ਵਤ੍ਥੁਂ ਨੀਵਰਣਵਿਪ੍ਪਯੁਤ੍ਤੇ ਖਨ੍ਧੇ ਗਰੁਂ ਕਤ੍ਵਾ ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਗਰੁਂ ਕਤ੍ਵਾ ਰਾਗੋ ਉਪ੍ਪਜ੍ਜਤਿ, ਦਿਟ੍ਠਿ ਉਪ੍ਪਜ੍ਜਤਿ. (੨)

ਅਨਨ੍ਤਰਪਚ੍ਚਯੋ

੭੧. ਨੀਵਰਣਸਮ੍ਪਯੁਤ੍ਤੋ ਧਮ੍ਮੋ ਨੀਵਰਣਸਮ੍ਪਯੁਤ੍ਤਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਨੀਵਰਣਸਮ੍ਪਯੁਤ੍ਤਾ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਨੀਵਰਣਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (ਮੂਲਂ ਪੁਚ੍ਛਿਤਬ੍ਬਂ) ਨੀਵਰਣਸਮ੍ਪਯੁਤ੍ਤਾ ਖਨ੍ਧਾ ਵੁਟ੍ਠਾਨਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ (ਇਧ ਪੁਰਿਮਾ ਪੁਰਿਮਾਤਿ ਨਤ੍ਥਿ). (੨)

(ਮੂਲਂ ਪੁਚ੍ਛਿਤਬ੍ਬਂ) ਪੁਰਿਮਾ ਪੁਰਿਮਾ ਨੀਵਰਣਵਿਪ੍ਪਯੁਤ੍ਤਾ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਨੀਵਰਣਵਿਪ੍ਪਯੁਤ੍ਤਾਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ; ਅਨੁਲੋਮਂ ਗੋਤ੍ਰਭੁਸ੍ਸ…ਪੇ… ਫਲਸਮਾਪਤ੍ਤਿਯਾ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੧)

ਨੀਵਰਣਵਿਪ੍ਪਯੁਤ੍ਤੋ ਧਮ੍ਮੋ ਨੀਵਰਣਸਮ੍ਪਯੁਤ੍ਤਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਆਵਜ੍ਜਨਾ ਨੀਵਰਣਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੨)

ਸਮਨਨ੍ਤਰਪਚ੍ਚਯਾਦਿ

੭੨. ਨੀਵਰਣਸਮ੍ਪਯੁਤ੍ਤੋ ਧਮ੍ਮੋ ਨੀਵਰਣਸਮ੍ਪਯੁਤ੍ਤਸ੍ਸ ਧਮ੍ਮਸ੍ਸ ਸਮਨਨ੍ਤਰਪਚ੍ਚਯੇਨ ਪਚ੍ਚਯੋ… ਸਹਜਾਤਪਚ੍ਚਯੇਨ ਪਚ੍ਚਯੋ… ਅਞ੍ਞਮਞ੍ਞਪਚ੍ਚਯੇਨ ਪਚ੍ਚਯੋ… ਨਿਸ੍ਸਯਪਚ੍ਚਯੇਨ ਪਚ੍ਚਯੋ.

ਉਪਨਿਸ੍ਸਯਪਚ੍ਚਯੋ

੭੩. ਨੀਵਰਣਸਮ੍ਪਯੁਤ੍ਤੋ ਧਮ੍ਮੋ ਨੀਵਰਣਸਮ੍ਪਯੁਤ੍ਤਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਆਰਮ੍ਮਣੂਪਨਿਸ੍ਸਯੋ, ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਰਾਗਂ ਉਪਨਿਸ੍ਸਾਯ ਪਾਣਂ ਹਨਤਿ…ਪੇ… ਸਙ੍ਘਂ ਭਿਨ੍ਦਤਿ; ਦੋਸਂ… ਮੋਹਂ… ਮਾਨਂ… ਦਿਟ੍ਠਿਂ… ਪਤ੍ਥਨਂ ਉਪਨਿਸ੍ਸਾਯ ਪਾਣਂ ਹਨਤਿ…ਪੇ… ਸਙ੍ਘਂ ਭਿਨ੍ਦਤਿ; ਰਾਗੋ…ਪੇ… ਪਤ੍ਥਨਾ ਰਾਗਸ੍ਸ…ਪੇ… ਪਤ੍ਥਨਾਯ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੧)

ਨੀਵਰਣਸਮ੍ਪਯੁਤ੍ਤੋ ਧਮ੍ਮੋ ਨੀਵਰਣਵਿਪ੍ਪਯੁਤ੍ਤਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਰਾਗਂ ਉਪਨਿਸ੍ਸਾਯ ਦਾਨਂ ਦੇਤਿ…ਪੇ… ਸੀਲਂ…ਪੇ… ਉਪੋਸਥਕਮ੍ਮਂ…ਪੇ… ਝਾਨਂ…ਪੇ… ਵਿਪਸ੍ਸਨਂ… ਮਗ੍ਗਂ… ਅਭਿਞ੍ਞਂ… ਸਮਾਪਤ੍ਤਿਂ ਉਪ੍ਪਾਦੇਤਿ; ਦੋਸਂ…ਪੇ… ਪਤ੍ਥਨਂ ਉਪਨਿਸ੍ਸਾਯ ਦਾਨਂ ਦੇਤਿ…ਪੇ… ਸਮਾਪਤ੍ਤਿਂ ਉਪ੍ਪਾਦੇਤਿ; ਰਾਗੋ…ਪੇ… ਪਤ੍ਥਨਾ ਸਦ੍ਧਾਯ …ਪੇ… ਪਞ੍ਞਾਯ… ਕਾਯਿਕਸ੍ਸ ਸੁਖਸ੍ਸ, ਕਾਯਿਕਸ੍ਸ ਦੁਕ੍ਖਸ੍ਸ, ਮਗ੍ਗਸ੍ਸ, ਫਲਸਮਾਪਤ੍ਤਿਯਾ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੨)

੭੪. ਨੀਵਰਣਵਿਪ੍ਪਯੁਤ੍ਤੋ ਧਮ੍ਮੋ ਨੀਵਰਣਵਿਪ੍ਪਯੁਤ੍ਤਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਆਰਮ੍ਮਣੂਪਨਿਸ੍ਸਯੋ, ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਸਦ੍ਧਂ ਉਪਨਿਸ੍ਸਾਯ ਦਾਨਂ ਦੇਤਿ, ਸੀਲਂ…ਪੇ… ਮਗ੍ਗਂ…ਪੇ… ਅਭਿਞ੍ਞਂ…ਪੇ… ਸਮਾਪਤ੍ਤਿਂ ਉਪ੍ਪਾਦੇਤਿ, ਸੀਲਂ…ਪੇ… ਪਞ੍ਞਂ…ਪੇ… ਸੇਨਾਸਨਂ ਉਪਨਿਸ੍ਸਾਯ ਦਾਨਂ ਦੇਤਿ…ਪੇ… ਸਮਾਪਤ੍ਤਿਂ ਉਪ੍ਪਾਦੇਤਿ; ਸਦ੍ਧਾ…ਪੇ… ਸੇਨਾਸਨਂ ਸਦ੍ਧਾਯ…ਪੇ… ਪਞ੍ਞਾਯ…ਪੇ… ਮਗ੍ਗਸ੍ਸ ਫਲਸਮਾਪਤ੍ਤਿਯਾ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੧)

ਨੀਵਰਣਵਿਪ੍ਪਯੁਤ੍ਤੋ ਧਮ੍ਮੋ ਨੀਵਰਣਸਮ੍ਪਯੁਤ੍ਤਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਆਰਮ੍ਮਣੂਪਨਿਸ੍ਸਯੋ, ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਸਦ੍ਧਂ ਉਪਨਿਸ੍ਸਾਯ ਮਾਨਂ ਜਪ੍ਪੇਤਿ, ਦਿਟ੍ਠਿਂ ਗਣ੍ਹਾਤਿ; ਸੀਲਂ…ਪੇ… ਪਞ੍ਞਂ, ਕਾਯਿਕਂ ਸੁਖਂ…ਪੇ… ਸੇਨਾਸਨਂ ਉਪਨਿਸ੍ਸਾਯ ਪਾਣਂ ਹਨਤਿ…ਪੇ… ਸਙ੍ਘਂ ਭਿਨ੍ਦਤਿ; ਸਦ੍ਧਾ…ਪੇ… ਸੇਨਾਸਨਂ ਰਾਗਸ੍ਸ… ਦੋਸਸ੍ਸ… ਮੋਹਸ੍ਸ… ਮਾਨਸ੍ਸ… ਦਿਟ੍ਠਿਯਾ… ਪਤ੍ਥਨਾਯ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੨)

ਪੁਰੇਜਾਤਪਚ੍ਚਯੋ

੭੫. ਨੀਵਰਣਵਿਪ੍ਪਯੁਤ੍ਤੋ ਧਮ੍ਮੋ ਨੀਵਰਣਵਿਪ੍ਪਯੁਤ੍ਤਸ੍ਸ ਧਮ੍ਮਸ੍ਸ ਪੁਰੇਜਾਤਪਚ੍ਚਯੇਨ ਪਚ੍ਚਯੋ – ਆਰਮ੍ਮਣਪੁਰੇਜਾਤਂ, ਵਤ੍ਥੁਪੁਰੇਜਾਤਂ. ਆਰਮ੍ਮਣਪੁਰੇਜਾਤਂ – ਚਕ੍ਖੁਂ…ਪੇ… ਵਤ੍ਥੁਂ ਅਨਿਚ੍ਚਤੋ ਦੁਕ੍ਖਤੋ ਅਨਤ੍ਤਤੋ ਵਿਪਸ੍ਸਤਿ. ਦਿਬ੍ਬੇਨ ਚਕ੍ਖੁਨਾ ਰੂਪਂ ਪਸ੍ਸਤਿ, ਦਿਬ੍ਬਾਯ ਸੋਤਧਾਤੁਯਾ ਸਦ੍ਦਂ ਸੁਣਾਤਿ. ਰੂਪਾਯਤਨਂ ਚਕ੍ਖੁਵਿਞ੍ਞਾਣਸ੍ਸ…ਪੇ… ਫੋਟ੍ਠਬ੍ਬਾਯਤਨਂ ਕਾਯਵਿਞ੍ਞਾਣਸ੍ਸ…ਪੇ…. ਵਤ੍ਥੁਪੁਰੇਜਾਤਂ – ਚਕ੍ਖਾਯਤਨਂ ਚਕ੍ਖੁਵਿਞ੍ਞਾਣਸ੍ਸ…ਪੇ… ਕਾਯਾਯਤਨਂ ਕਾਯਵਿਞ੍ਞਾਣਸ੍ਸ…ਪੇ… ਵਤ੍ਥੁ ਨੀਵਰਣਵਿਪ੍ਪਯੁਤ੍ਤਾਨਂ ਖਨ੍ਧਾਨਂ ਪੁਰੇਜਾਤਪਚ੍ਚਯੇਨ ਪਚ੍ਚਯੋ. (੧)

ਨੀਵਰਣਵਿਪ੍ਪਯੁਤ੍ਤੋ ਧਮ੍ਮੋ ਨੀਵਰਣਸਮ੍ਪਯੁਤ੍ਤਸ੍ਸ ਧਮ੍ਮਸ੍ਸ ਪੁਰੇਜਾਤਪਚ੍ਚਯੇਨ ਪਚ੍ਚਯੋ – ਆਰਮ੍ਮਣਪੁਰੇਜਾਤਂ, ਵਤ੍ਥੁਪੁਰੇਜਾਤਂ. ਆਰਮ੍ਮਣਪੁਰੇਜਾਤਂ – ਚਕ੍ਖੁਂ…ਪੇ… ਵਤ੍ਥੁਂ ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਆਰਬ੍ਭ ਰਾਗੋ… ਦੋਸੋ… ਮੋਹੋ…. ਵਤ੍ਥੁਪੁਰੇਜਾਤਂ – ਵਤ੍ਥੁ ਨੀਵਰਣਸਮ੍ਪਯੁਤ੍ਤਾਨਂ ਖਨ੍ਧਾਨਂ ਪੁਰੇਜਾਤਪਚ੍ਚਯੇਨ ਪਚ੍ਚਯੋ. (੨)

ਪਚ੍ਛਾਜਾਤਾਸੇਵਨਪਚ੍ਚਯਾ

੭੬. ਨੀਵਰਣਸਮ੍ਪਯੁਤ੍ਤੋ ਧਮ੍ਮੋ ਨੀਵਰਣਵਿਪ੍ਪਯੁਤ੍ਤਸ੍ਸ ਧਮ੍ਮਸ੍ਸ ਪਚ੍ਛਾਜਾਤਪਚ੍ਚਯੇਨ ਪਚ੍ਚਯੋ… ਦ੍ਵੇ, ਆਸੇਵਨਪਚ੍ਚਯੇਨ ਪਚ੍ਚਯੋ… ਦ੍ਵੇ.

ਕਮ੍ਮਪਚ੍ਚਯਾਦਿ

੭੭. ਨੀਵਰਣਸਮ੍ਪਯੁਤ੍ਤੋ ਧਮ੍ਮੋ ਨੀਵਰਣਸਮ੍ਪਯੁਤ੍ਤਸ੍ਸ ਧਮ੍ਮਸ੍ਸ ਕਮ੍ਮਪਚ੍ਚਯੇਨ ਪਚ੍ਚਯੋ – ਨੀਵਰਣਸਮ੍ਪਯੁਤ੍ਤਾ ਚੇਤਨਾ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ. (ਮੂਲਂ ਕਾਤਬ੍ਬਂ) ਸਹਜਾਤਾ, ਨਾਨਾਕ੍ਖਣਿਕਾ. ਸਹਜਾਤਾ – ਨੀਵਰਣਸਮ੍ਪਯੁਤ੍ਤਾ ਚੇਤਨਾ ਚਿਤ੍ਤਸਮੁਟ੍ਠਾਨਾਨਂ ਰੂਪਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ. ਨਾਨਾਕ੍ਖਣਿਕਾ – ਨੀਵਰਣਸਮ੍ਪਯੁਤ੍ਤਾ ਚੇਤਨਾ ਵਿਪਾਕਾਨਂ ਖਨ੍ਧਾਨਂ ਕਟਤ੍ਤਾ ਚ ਰੂਪਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ. (ਮੂਲਂ ਕਾਤਬ੍ਬਂ) ਨੀਵਰਣਸਮ੍ਪਯੁਤ੍ਤਾ ਚੇਤਨਾ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਚਿਤ੍ਤਸਮੁਟ੍ਠਾਨਾਨਞ੍ਚ ਰੂਪਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ. (੩)

ਨੀਵਰਣਵਿਪ੍ਪਯੁਤ੍ਤੋ ਧਮ੍ਮੋ ਨੀਵਰਣਵਿਪ੍ਪਯੁਤ੍ਤਸ੍ਸ ਧਮ੍ਮਸ੍ਸ ਕਮ੍ਮਪਚ੍ਚਯੇਨ ਪਚ੍ਚਯੋ – ਸਹਜਾਤਾ, ਨਾਨਾਕ੍ਖਣਿਕਾ (ਸਂਖਿਤ੍ਤਂ). ਵਿਪਾਕਪਚ੍ਚਯਾ… ਏਕਂ.

ਆਹਾਰਪਚ੍ਚਯਾਦਿ

੭੮. ਨੀਵਰਣਸਮ੍ਪਯੁਤ੍ਤੋ ਧਮ੍ਮੋ ਨੀਵਰਣਸਮ੍ਪਯੁਤ੍ਤਸ੍ਸ ਧਮ੍ਮਸ੍ਸ ਆਹਾਰਪਚ੍ਚਯੇਨ ਪਚ੍ਚਯੋ… ਇਨ੍ਦ੍ਰਿਯਪਚ੍ਚਯੇਨ ਪਚ੍ਚਯੋ… ਝਾਨਪਚ੍ਚਯੇਨ ਪਚ੍ਚਯੋ… ਮਗ੍ਗਪਚ੍ਚਯੇਨ ਪਚ੍ਚਯੋ… ਸਮ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ… ਦ੍ਵੇ.

ਵਿਪ੍ਪਯੁਤ੍ਤਪਚ੍ਚਯੋ

੭੯. ਨੀਵਰਣਸਮ੍ਪਯੁਤ੍ਤੋ ਧਮ੍ਮੋ ਨੀਵਰਣਵਿਪ੍ਪਯੁਤ੍ਤਸ੍ਸ ਧਮ੍ਮਸ੍ਸ ਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ – ਸਹਜਾਤਂ, ਪਚ੍ਛਾਜਾਤਂ (ਸਂਖਿਤ੍ਤਂ). (੧)

ਨੀਵਰਣਵਿਪ੍ਪਯੁਤ੍ਤੋ ਧਮ੍ਮੋ ਨੀਵਰਣਵਿਪ੍ਪਯੁਤ੍ਤਸ੍ਸ ਧਮ੍ਮਸ੍ਸ ਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ – ਸਹਜਾਤਂ, ਪੁਰੇਜਾਤਂ, ਪਚ੍ਛਾਜਾਤਂ (ਸਂਖਿਤ੍ਤਂ). (੧)

ਨੀਵਰਣਵਿਪ੍ਪਯੁਤ੍ਤੋ ਧਮ੍ਮੋ ਨੀਵਰਣਸਮ੍ਪਯੁਤ੍ਤਸ੍ਸ ਧਮ੍ਮਸ੍ਸ ਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ. ਪੁਰੇਜਾਤਂ – ਵਤ੍ਥੁ ਨੀਵਰਣਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ. (੨)

ਅਤ੍ਥਿਪਚ੍ਚਯੋ

੮੦. ਨੀਵਰਣਸਮ੍ਪਯੁਤ੍ਤੋ ਧਮ੍ਮੋ ਨੀਵਰਣਸਮ੍ਪਯੁਤ੍ਤਸ੍ਸ ਧਮ੍ਮਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ – ਨੀਵਰਣਸਮ੍ਪਯੁਤ੍ਤੋ ਏਕੋ ਖਨ੍ਧੋ ਤਿਣ੍ਣਨ੍ਨਂ ਖਨ੍ਧਾਨਂ ਅਤ੍ਥਿਪਚ੍ਚਯੇਨ ਪਚ੍ਚਯੋ…ਪੇ…. (੧)

ਨੀਵਰਣਸਮ੍ਪਯੁਤ੍ਤੋ ਧਮ੍ਮੋ ਨੀਵਰਣਵਿਪ੍ਪਯੁਤ੍ਤਸ੍ਸ ਧਮ੍ਮਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ – ਸਹਜਾਤਂ, ਪਚ੍ਛਾਜਾਤਂ. ਸਹਜਾਤਾ – ਨੀਵਰਣਸਮ੍ਪਯੁਤ੍ਤਾ ਖਨ੍ਧਾ ਚਿਤ੍ਤਸਮੁਟ੍ਠਾਨਾਨਞ੍ਚ ਰੂਪਾਨਂ ਅਤ੍ਥਿਪਚ੍ਚਯੇਨ ਪਚ੍ਚਯੋ. ਪਚ੍ਛਾਜਾਤਾ – ਨੀਵਰਣਸਮ੍ਪਯੁਤ੍ਤਾ ਖਨ੍ਧਾ ਪੁਰੇਜਾਤਸ੍ਸ ਇਮਸ੍ਸ ਕਾਯਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ. (੨)

ਨੀਵਰਣਸਮ੍ਪਯੁਤ੍ਤੋ ਧਮ੍ਮੋ ਨੀਵਰਣਸਮ੍ਪਯੁਤ੍ਤਸ੍ਸ ਚ ਨੀਵਰਣਵਿਪ੍ਪਯੁਤ੍ਤਸ੍ਸ ਚ ਧਮ੍ਮਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ – ਨੀਵਰਣਸਮ੍ਪਯੁਤ੍ਤੋ ਏਕੋ ਖਨ੍ਧੋ ਤਿਣ੍ਣਨ੍ਨਂ ਖਨ੍ਧਾਨਂ ਚਿਤ੍ਤਸਮੁਟ੍ਠਾਨਾਨਞ੍ਚ ਰੂਪਾਨਂ ਅਤ੍ਥਿਪਚ੍ਚਯੇਨ ਪਚ੍ਚਯੋ…ਪੇ… ਦ੍ਵੇ ਖਨ੍ਧਾ ਦ੍ਵਿਨ੍ਨਂ ਖਨ੍ਧਾਨਂ ਚਿਤ੍ਤਸਮੁਟ੍ਠਾਨਾਨਞ੍ਚ ਰੂਪਾਨਂ ਅਤ੍ਥਿਪਚ੍ਚਯੇਨ ਪਚ੍ਚਯੋ. (੩)

੮੧. ਨੀਵਰਣਵਿਪ੍ਪਯੁਤ੍ਤੋ ਧਮ੍ਮੋ ਨੀਵਰਣਵਿਪ੍ਪਯੁਤ੍ਤਸ੍ਸ ਧਮ੍ਮਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ – ਸਹਜਾਤਂ, ਪੁਰੇਜਾਤਂ, ਪਚ੍ਛਾਜਾਤਂ, ਆਹਾਰਂ, ਇਨ੍ਦ੍ਰਿਯਂ (ਸਂਖਿਤ੍ਤਂ). (੧)

ਨੀਵਰਣਵਿਪ੍ਪਯੁਤ੍ਤੋ ਧਮ੍ਮੋ ਨੀਵਰਣਸਮ੍ਪਯੁਤ੍ਤਸ੍ਸ ਧਮ੍ਮਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ. ਪੁਰੇਜਾਤਂ – ਚਕ੍ਖੁਂ…ਪੇ… ਵਤ੍ਥੁਂ ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਆਰਬ੍ਭ ਰਾਗੋ…ਪੇ… ਦਿਟ੍ਠਿ…ਪੇ… ਵਿਚਿਕਿਚ੍ਛਾ…ਪੇ… ਉਦ੍ਧਚ੍ਚਂ…ਪੇ… ਦੋਮਨਸ੍ਸਂ ਉਪ੍ਪਜ੍ਜਤਿ; ਵਤ੍ਥੁ ਨੀਵਰਣਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਅਤ੍ਥਿਪਚ੍ਚਯੇਨ ਪਚ੍ਚਯੋ. (੨)

੮੨. ਨੀਵਰਣਸਮ੍ਪਯੁਤ੍ਤੋ ਚ ਨੀਵਰਣਵਿਪ੍ਪਯੁਤ੍ਤੋ ਚ ਧਮ੍ਮਾ ਨੀਵਰਣਸਮ੍ਪਯੁਤ੍ਤਸ੍ਸ ਧਮ੍ਮਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ – ਸਹਜਾਤਂ, ਪੁਰੇਜਾਤਂ. ਸਹਜਾਤੋ – ਨੀਵਰਣਸਮ੍ਪਯੁਤ੍ਤੋ ਏਕੋ ਖਨ੍ਧੋ ਚ ਵਤ੍ਥੁ ਚ ਤਿਣ੍ਣਨ੍ਨਂ ਖਨ੍ਧਾਨਂ ਅਤ੍ਥਿਪਚ੍ਚਯੇਨ ਪਚ੍ਚਯੋ…ਪੇ… ਦ੍ਵੇ ਖਨ੍ਧਾ ਚ ਵਤ੍ਥੁ ਚ ਦ੍ਵਿਨ੍ਨਂ ਖਨ੍ਧਾਨਂ ਅਤ੍ਥਿਪਚ੍ਚਯੇਨ ਪਚ੍ਚਯੋ. (੧)

ਨੀਵਰਣਸਮ੍ਪਯੁਤ੍ਤੋ ਚ ਨੀਵਰਣਵਿਪ੍ਪਯੁਤ੍ਤੋ ਚ ਧਮ੍ਮਾ ਨੀਵਰਣਵਿਪ੍ਪਯੁਤ੍ਤਸ੍ਸ ਧਮ੍ਮਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ – ਸਹਜਾਤਂ, ਪਚ੍ਛਾਜਾਤਂ, ਆਹਾਰਂ, ਇਨ੍ਦ੍ਰਿਯਂ. ਸਹਜਾਤਾ – ਨੀਵਰਣਸਮ੍ਪਯੁਤ੍ਤਾ ਖਨ੍ਧਾ ਚ ਮਹਾਭੂਤਾ ਚ ਚਿਤ੍ਤਸਮੁਟ੍ਠਾਨਾਨਂ ਰੂਪਾਨਂ ਅਤ੍ਥਿਪਚ੍ਚਯੇਨ ਪਚ੍ਚਯੋ. ਪਚ੍ਛਾਜਾਤਾ – ਨੀਵਰਣਸਮ੍ਪਯੁਤ੍ਤਾ ਖਨ੍ਧਾ ਚ ਕਬਲ਼ੀਕਾਰੋ ਆਹਾਰੋ ਚ ਇਮਸ੍ਸ ਕਾਯਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ. ਪਚ੍ਛਾਜਾਤਾ – ਨੀਵਰਣਸਮ੍ਪਯੁਤ੍ਤਾ ਖਨ੍ਧਾ ਚ ਰੂਪਜੀਵਿਤਿਨ੍ਦ੍ਰਿਯਞ੍ਚ ਕਟਤ੍ਤਾਰੂਪਾਨਂ ਅਤ੍ਥਿਪਚ੍ਚਯੇਨ ਪਚ੍ਚਯੋ. (੨)