੧-੪. ਪਚ੍ਚਯਚਤੁਕ੍ਕਂ

੨੧. ਨੀਵਰਣਂ ਧਮ੍ਮਂ ਸਂਸਟ੍ਠੋ ਨੀਵਰਣੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਕਾਮਚ੍ਛਨ੍ਦਨੀਵਰਣਂ ਸਂਸਟ੍ਠਂ ਥਿਨਮਿਦ੍ਧਨੀਵਰਣਂ ਉਦ੍ਧਚ੍ਚਨੀਵਰਣਂ ਅਵਿਜ੍ਜਾਨੀਵਰਣਂ (ਚਕ੍ਕਂ. ਸਬ੍ਬਂ ਨੀਵਰਣਂ ਵਿਤ੍ਥਾਰੇਤਬ੍ਬਂ).

੨੨. ਹੇਤੁਯਾ ਨਵ, ਆਰਮ੍ਮਣੇ ਨਵ (ਸਬ੍ਬਤ੍ਥ ਨਵ), ਵਿਪਾਕੇ ਏਕਂ…ਪੇ… ਅਵਿਗਤੇ ਨਵ.

ਅਨੁਲੋਮਂ.

੨੩. ਨੀਵਰਣਂ ਧਮ੍ਮਂ ਸਂਸਟ੍ਠੋ ਨੀਵਰਣੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ – ਵਿਚਿਕਿਚ੍ਛਾਨੀਵਰਣਂ ਸਂਸਟ੍ਠਂ ਅਵਿਜ੍ਜਾਨੀਵਰਣਂ, ਉਦ੍ਧਚ੍ਚਨੀਵਰਣਂ ਸਂਸਟ੍ਠਂ ਅਵਿਜ੍ਜਾਨੀਵਰਣਂ (ਸਂਖਿਤ੍ਤਂ).

੨੪. ਨਹੇਤੁਯਾ ਚਤ੍ਤਾਰਿ, ਨਅਧਿਪਤਿਯਾ ਨਵ, ਨਪੁਰੇਜਾਤੇ ਨਵ, ਨਪਚ੍ਛਾਜਾਤੇ ਨਵ, ਨਆਸੇਵਨੇ ਨਵ, ਨਕਮ੍ਮੇ ਤੀਣਿ, ਨਵਿਪਾਕੇ ਨਵ, ਨਝਾਨੇ ਏਕਂ, ਨਮਗ੍ਗੇ ਏਕਂ, ਨਵਿਪ੍ਪਯੁਤ੍ਤੇ ਨਵ.

ਪਚ੍ਚਨੀਯਂ.