੫. ਸਂਸਟ੍ਠਵਾਰੋ

੧-੪. ਪਚ੍ਚਯਾਨੁਲੋਮਾਦਿ

੬੩. ਸਞ੍ਞੋਜਨਸਮ੍ਪਯੁਤ੍ਤਂ ਧਮ੍ਮਂ ਸਂਸਟ੍ਠੋ ਸਞ੍ਞੋਜਨਸਮ੍ਪਯੁਤ੍ਤੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਸਞ੍ਞੋਜਨਸਮ੍ਪਯੁਤ੍ਤਂ ਏਕਂ ਖਨ੍ਧਂ ਸਂਸਟ੍ਠਾ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧੇ…ਪੇ….(੧)

ਸਞ੍ਞੋਜਨਵਿਪ੍ਪਯੁਤ੍ਤਂ ਧਮ੍ਮਂ ਸਂਸਟ੍ਠੋ ਸਞ੍ਞੋਜਨਵਿਪ੍ਪਯੁਤ੍ਤੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਸਞ੍ਞੋਜਨਵਿਪ੍ਪਯੁਤ੍ਤਂ ਏਕਂ ਖਨ੍ਧਂ ਸਂਸਟ੍ਠਾ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧੇ…ਪੇ… ਪਟਿਸਨ੍ਧਿਕ੍ਖਣੇ…ਪੇ…. (੧)

ਸਞ੍ਞੋਜਨਵਿਪ੍ਪਯੁਤ੍ਤਂ ਧਮ੍ਮਂ ਸਂਸਟ੍ਠੋ ਸਞ੍ਞੋਜਨਸਮ੍ਪਯੁਤ੍ਤੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਉਦ੍ਧਚ੍ਚਸਹਗਤਂ ਮੋਹਂ ਸਂਸਟ੍ਠਾ ਸਮ੍ਪਯੁਤ੍ਤਕਾ ਖਨ੍ਧਾ. (੨)

ਸਞ੍ਞੋਜਨਸਮ੍ਪਯੁਤ੍ਤਞ੍ਚ ਸਞ੍ਞੋਜਨਵਿਪ੍ਪਯੁਤ੍ਤਞ੍ਚ ਧਮ੍ਮਂ ਸਂਸਟ੍ਠੋ ਸਞ੍ਞੋਜਨਸਮ੍ਪਯੁਤ੍ਤੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਉਦ੍ਧਚ੍ਚਸਹਗਤਂ ਏਕਂ ਖਨ੍ਧਞ੍ਚ ਮੋਹਞ੍ਚ ਸਂਸਟ੍ਠਾ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧੇ…ਪੇ…. (੧) (ਸਂਖਿਤ੍ਤਂ.)

੬੪. ਹੇਤੁਯਾ ਚਤ੍ਤਾਰਿ, ਆਰਮ੍ਮਣੇ ਛ, ਅਧਿਪਤਿਯਾ ਦ੍ਵੇ, ਅਨਨ੍ਤਰੇ ਛ, ਸਮਨਨ੍ਤਰੇ ਛ…ਪੇ… ਅਵਿਗਤੇ ਛ.

੬੫. ਨਹੇਤੁਯਾ ਤੀਣਿ, ਨਅਧਿਪਤਿਯਾ ਛ, ਨਪੁਰੇਜਾਤੇ ਛ, ਨਪਚ੍ਛਾਜਾਤੇ ਛ, ਨਆਸੇਵਨੇ ਛ, ਨਕਮ੍ਮੇ ਚਤ੍ਤਾਰਿ, ਨਵਿਪਾਕੇ ਛ, ਨਝਾਨੇ ਏਕਂ, ਨਮਗ੍ਗੇ ਏਕਂ, ਨਵਿਪ੍ਪਯੁਤ੍ਤੇ ਛ.