੧. ਵਿਭਙ੍ਗਵਾਰੋ

(ਪਞ੍ਹਾਵਾਰੇ ਹੇਤੁਪਚ੍ਚਯੇਪਿ ਆਰਮ੍ਮਣਪਚ੍ਚਯੇਪਿ ਲੋਕੁਤ੍ਤਰਂ ਨ ਕਾਤਬ੍ਬਂ, ਸੇਖਾ ਗੋਤ੍ਰਭੁਂ ਪਚ੍ਚਵੇਕ੍ਖਨ੍ਤਿ, ਵੋਦਾਨਂ ਪਚ੍ਚਵੇਕ੍ਖਨ੍ਤੀਤਿ ਕਾਤਬ੍ਬਾ. ਅਧਿਪਤਿਪਚ੍ਚਯਮ੍ਪਿ ਸਬ੍ਬਂ ਜਾਨਿਤ੍ਵਾ ਕਾਤਬ੍ਬਂ.)

ਅਨਨ੍ਤਰਪਚ੍ਚਯੋ

੧੧੨. ਆਸਵੋ ਚੇਵ ਸਾਸਵੋ ਚ ਧਮ੍ਮੋ ਆਸਵਸ੍ਸ ਚੇਵ ਸਾਸਵਸ੍ਸ ਚ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਆਸਵਾ ਪਚ੍ਛਿਮਾਨਂ ਪਚ੍ਛਿਮਾਨਂ ਆਸਵਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੧)

ਆਸਵੋ ਚੇਵ ਸਾਸਵੋ ਚ ਧਮ੍ਮੋ ਸਾਸਵਸ੍ਸ ਚੇਵ ਨੋ ਚ ਆਸਵਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਆਸਵਾ ਪਚ੍ਛਿਮਾਨਂ ਪਚ੍ਛਿਮਾਨਂ ਸਾਸਵਞ੍ਚੇਵ ਨੋ ਚ ਆਸਵਾਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ; ਆਸਵਾ ਵੁਟ੍ਠਾਨਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੨)

ਆਸਵੋ ਚੇਵ ਸਾਸਵੋ ਚ ਧਮ੍ਮੋ ਆਸਵਸ੍ਸ ਚੇਵ ਸਾਸਵਸ੍ਸ ਚ ਸਾਸਵਸ੍ਸ ਚੇਵ ਨੋ ਚ ਆਸਵਸ੍ਸ ਚ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਆਸਵਾ ਪਚ੍ਛਿਮਾਨਂ ਪਚ੍ਛਿਮਾਨਂ ਆਸਵਾਨਂ ਸਮ੍ਪਯੁਤ੍ਤਕਾਨਞ੍ਚ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੩)

੧੧੩. ਸਾਸਵੋ ਚੇਵ ਨੋ ਚ ਆਸਵੋ ਧਮ੍ਮੋ ਸਾਸਵਸ੍ਸ ਚੇਵ ਨੋ ਚ ਆਸਵਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਸਾਸਵਾ ਚੇਵ ਨੋ ਚ ਆਸਵਾ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਸਾਸਵਾਨਞ੍ਚੇਵ ਨੋ ਚ ਆਸਵਾਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ; ਅਨੁਲੋਮਂ ਗੋਤ੍ਰਭੁਸ੍ਸ, ਅਨੁਲੋਮਂ ਵੋਦਾਨਸ੍ਸ, ਆਵਜ੍ਜਨਾ ਸਾਸਵਾਨਞ੍ਚੇਵ ਨੋ ਚ ਆਸਵਾਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੧)

ਸਾਸਵੋ ਚੇਵ ਨੋ ਚ ਆਸਵੋ ਧਮ੍ਮੋ ਆਸਵਸ੍ਸ ਚੇਵ ਸਾਸਵਸ੍ਸ ਚ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਸਾਸਵਾ ਚੇਵ ਨੋ ਚ ਆਸਵਾ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਆਸਵਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ; ਆਵਜ੍ਜਨਾ ਆਸਵਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੨)

ਸਾਸਵੋ ਚੇਵ ਨੋ ਚ ਆਸਵੋ ਧਮ੍ਮੋ ਆਸਵਸ੍ਸ ਚੇਵ ਸਾਸਵਸ੍ਸ ਚ ਸਾਸਵਸ੍ਸ ਚੇਵ ਨੋ ਚ ਆਸਵਸ੍ਸ ਚ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਸਾਸਵਾ ਚੇਵ ਨੋ ਚ ਆਸਵਾ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਆਸਵਾਨਂ ਸਮ੍ਪਯੁਤ੍ਤਕਾਨਞ੍ਚ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ; ਆਵਜ੍ਜਨਾ ਆਸਵਾਨਂ ਸਮ੍ਪਯੁਤ੍ਤਕਾਨਞ੍ਚ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੩)

੧੧੪. ਆਸਵੋ ਚੇਵ ਸਾਸਵੋ ਚ ਸਾਸਵੋ ਚੇਵ ਨੋ ਚ ਆਸਵੋ ਚ ਧਮ੍ਮਾ ਆਸਵਸ੍ਸ ਚੇਵ ਸਾਸਵਸ੍ਸ ਚ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਆਸਵਾ ਚ ਸਮ੍ਪਯੁਤ੍ਤਕਾ ਚ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਆਸਵਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੧)

ਆਸਵੋ ਚੇਵ ਸਾਸਵੋ ਚ ਸਾਸਵੋ ਚੇਵ ਨੋ ਚ ਆਸਵੋ ਚ ਧਮ੍ਮਾ ਸਾਸਵਸ੍ਸ ਚੇਵ ਨੋ ਚ ਆਸਵਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਆਸਵਾ ਚ ਸਮ੍ਪਯੁਤ੍ਤਕਾ ਚ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਸਾਸਵਾਨਞ੍ਚੇਵ ਨੋ ਚ ਆਸਵਾਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ; ਆਸਵਾ ਚ ਸਮ੍ਪਯੁਤ੍ਤਕਾ ਚ ਖਨ੍ਧਾ ਵੁਟ੍ਠਾਨਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੨)

ਆਸਵੋ ਚੇਵ ਸਾਸਵੋ ਚ ਸਾਸਵੋ ਚੇਵ ਨੋ ਚ ਆਸਵੋ ਚ ਧਮ੍ਮਾ ਆਸਵਸ੍ਸ ਚੇਵ ਸਾਸਵਸ੍ਸ ਚ ਸਾਸਵਸ੍ਸ ਚੇਵ ਨੋ ਚ ਆਸਵਸ੍ਸ ਚ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਆਸਵਾ ਚ ਸਮ੍ਪਯੁਤ੍ਤਕਾ ਚ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਆਸਵਾਨਂ ਸਮ੍ਪਯੁਤ੍ਤਕਾਨਞ੍ਚ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ (ਏਵਂ ਸਬ੍ਬਂ ਵਿਤ੍ਥਾਰੇਤਬ੍ਬਂ). (੩)

(ਆਸਵਦੁਕੇਪਿ ਅਨਨ੍ਤਰਂ ਇਮਿਨਾ ਸਦਿਸਂ ਕਾਤਬ੍ਬਂ. ਆਵਜ੍ਜਨਾਪਿ ਵੁਟ੍ਠਾਨਮ੍ਪਿ ਏਵਂ ਸਮੁਦ੍ਦਿਟ੍ਠਂ ਸਂਖਿਤ੍ਤਂ. ਸਬ੍ਬਂ ਪਰਿਪੁਣ੍ਣਂ. ਆਸਵਦੁਕਸਦਿਸਂ ਕਾਤਬ੍ਬਂ, ਨਿਨ੍ਨਾਨਂ.)

ਆਸਵਸਾਸਵਦੁਕਂ ਨਿਟ੍ਠਿਤਂ.