੧. ਵਿਭਙ੍ਗਵਾਰੋ

ਨਹੇਤੁਪਚ੍ਚਯੋ

੫. ਨੋਆਸਵਂ ਧਮ੍ਮਂ ਪਟਿਚ੍ਚ ਨੋਆਸਵੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ – ਅਹੇਤੁਕਂ ਨੋਆਸਵਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ…ਪੇ… ਦ੍ਵੇ ਖਨ੍ਧੇ…ਪੇ… ਅਹੇਤੁਕਪਟਿਸਨ੍ਧਿਕ੍ਖਣੇ…ਪੇ… ਖਨ੍ਧੇ ਪਟਿਚ੍ਚ ਵਤ੍ਥੁ, ਵਤ੍ਥੁਂ ਪਟਿਚ੍ਚ ਖਨ੍ਧਾ, ਏਕਂ ਮਹਾਭੂਤਂ…ਪੇ… (ਯਾਵ ਅਸਞ੍ਞਸਤ੍ਤਾ). (੧)

ਨੋਆਸਵਂ ਧਮ੍ਮਂ ਪਟਿਚ੍ਚ ਆਸਵੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ – ਵਿਚਿਕਿਚ੍ਛਾਸਹਗਤੇ ਉਦ੍ਧਚ੍ਚਸਹਗਤੇ ਖਨ੍ਧੇ ਪਟਿਚ੍ਚ ਵਿਚਿਕਿਚ੍ਛਾਸਹਗਤੋ ਉਦ੍ਧਚ੍ਚਸਹਗਤੋ ਮੋਹੋ. (੨)

ਨਆਰਮ੍ਮਣਪਚ੍ਚਯੋ

੬. ਆਸਵਂ ਧਮ੍ਮਂ ਪਟਿਚ੍ਚ ਨੋਆਸਵੋ ਧਮ੍ਮੋ ਉਪ੍ਪਜ੍ਜਤਿ ਨਆਰਮ੍ਮਣਪਚ੍ਚਯਾ – ਆਸਵੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ. (੧)

ਨੋਆਸਵਂ ਧਮ੍ਮਂ ਪਟਿਚ੍ਚ ਨੋਆਸਵੋ ਧਮ੍ਮੋ ਉਪ੍ਪਜ੍ਜਤਿ ਨਆਰਮ੍ਮਣਪਚ੍ਚਯਾ – ਨੋਆਸਵੇ ਖਨ੍ਧੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ; ਪਟਿਸਨ੍ਧਿਕ੍ਖਣੇ…ਪੇ… ਖਨ੍ਧੇ ਪਟਿਚ੍ਚ ਵਤ੍ਥੁ, ਏਕਂ ਮਹਾਭੂਤਂ…ਪੇ… (ਯਾਵ ਅਸਞ੍ਞਸਤ੍ਤਾ). (੧)

ਆਸਵਞ੍ਚ ਨੋਆਸਵਞ੍ਚ ਧਮ੍ਮਂ ਪਟਿਚ੍ਚ ਨੋਆਸਵੋ ਧਮ੍ਮੋ ਉਪ੍ਪਜ੍ਜਤਿ ਨਆਰਮ੍ਮਣਪਚ੍ਚਯਾ – ਆਸਵੇ ਚ ਸਮ੍ਪਯੁਤ੍ਤਕੇ ਚ ਖਨ੍ਧੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ (ਸਂਖਿਤ੍ਤਂ). (੧)